੧੩. ਸੁਮੇਧਬੁਦ੍ਧਵਂਸੋ
੧. ਪਦੁਮੁਤ੍ਤਰਸ੍ਸ ਅਪਰੇਨ, ਸੁਮੇਧੋ ਨਾਮ ਨਾਯਕੋ;
ਦੁਰਾਸਦੋ ਉਗ੍ਗਤੇਜੋ, ਸਬ੍ਬਲੋਕੁਤ੍ਤਮੋ ਮੁਨਿ.
੨. ਪਸਨ੍ਨਨੇਤ੍ਤੋ ਸੁਮੁਖੋ, ਬ੍ਰਹਾ ਉਜੁ ਪਤਾਪਵਾ;
ਹਿਤੇਸੀ ਸਬ੍ਬਸਤ੍ਤਾਨਂ, ਬਹੂ ਮੋਚੇਸਿ ਬਨ੍ਧਨਾ.
੩. ਯਦਾ ਬੁਦ੍ਧੋ ਪਾਪੁਣਿਤ੍ਵਾ, ਕੇਵਲਂ ਬੋਧਿਮੁਤ੍ਤਮਂ;
ਸੁਦਸ੍ਸਨਮ੍ਹਿ ਨਗਰੇ, ਧਮ੍ਮਚਕ੍ਕਂ ਪਵਤ੍ਤਯਿ.
੪. ਤਸ੍ਸਾਪਿ ਅਭਿਸਮਯਾ ਤੀਣਿ, ਅਹੇਸੁਂ ਧਮ੍ਮਦੇਸਨੇ;
ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.
੫. ਪੁਨਾਪਰਂ ਕੁਮ੍ਭਕਣ੍ਣਂ, ਯਕ੍ਖਂ ਸੋ ਦਮਯੀ ਜਿਨੋ;
ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.
੬. ਪੁਨਾਪਰਂ ਅਮਿਤਯਸੋ, ਚਤੁਸਚ੍ਚਂ ਪਕਾਸਯਿ;
ਅਸੀਤਿਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.
੭. ਸਨ੍ਨਿਪਾਤਾ ਤਯੋ ਆਸੁਂ, ਸੁਮੇਧਸ੍ਸ ਮਹੇਸਿਨੋ;
ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.
੮. ਸੁਦਸ੍ਸਨਂ ਨਾਮ ਨਗਰਂ, ਉਪਗਞ੍ਛਿ ਜਿਨੋ ਯਦਾ;
ਤਦਾ ਖੀਣਾਸਵਾ ਭਿਕ੍ਖੂ, ਸਮਿਂਸੁ ਸਤਕੋਟਿਯੋ.
੯. ਪੁਨਾਪਰਂ ਦੇਵਕੂਟੇ, ਭਿਕ੍ਖੂਨਂ ਕਥਿਨਤ੍ਥਤੇ;
ਤਦਾ ਨਵੁਤਿਕੋਟੀਨਂ, ਦੁਤਿਯੋ ਆਸਿ ਸਮਾਗਮੋ.
੧੦. ਪੁਨਾਪਰਂ ਦਸਬਲੋ, ਯਦਾ ਚਰਤਿ ਚਾਰਿਕਂ;
ਤਦਾ ਅਸੀਤਿਕੋਟੀਨਂ, ਤਤਿਯੋ ਆਸਿ ਸਮਾਗਮੋ.
੧੧. ਅਹਂ ਤੇਨ ਸਮਯੇਨ, ਉਤ੍ਤਰੋ ਨਾਮ ਮਾਣਵੋ;
ਅਸੀਤਿਕੋਟਿਯੋ ਮਯ੍ਹਂ, ਘਰੇ ਸਨ੍ਨਿਚਿਤਂ ਧਨਂ.
੧੨. ਕੇਵਲਂ ਸਬ੍ਬਂ ਦਤ੍ਵਾਨ, ਸਸਙ੍ਘੇ ਲੋਕਨਾਯਕੇ;
ਸਰਣਂ ਤਸ੍ਸੁਪਗਞ੍ਛਿਂ, ਪਬ੍ਬਜ੍ਜਞ੍ਚਾਭਿਰੋਚਯਿਂ.
੧੩. ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਕਰੋਨ੍ਤੋ ਅਨੁਮੋਦਨਂ;
‘‘ਤਿਂਸਕਪ੍ਪਸਹਸ੍ਸਮ੍ਹਿ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੪. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.
੧੫. ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;
ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.
੧੬. ਸੁਤ੍ਤਨ੍ਤਂ ਵਿਨਯਞ੍ਚਾਪਿ, ਨਵਙ੍ਗਂ ਸਤ੍ਥੁਸਾਸਨਂ;
ਸਬ੍ਬਂ ਪਰਿਯਾਪੁਣਿਤ੍ਵਾਨ, ਸੋਭਯਿਂ ਜਿਨਸਾਸਨਂ.
੧੭. ਤਤ੍ਥਪ੍ਪਮਤ੍ਤੋ ਵਿਹਰਨ੍ਤੋ, ਨਿਸਜ੍ਜਟ੍ਠਾਨਚਙ੍ਕਮੇ;
ਅਭਿਞ੍ਞਾਸੁ ਪਾਰਮਿਂ ਗਨ੍ਤ੍ਵਾ, ਬ੍ਰਹ੍ਮਲੋਕਮਗਞ੍ਛਹਂ.
੧੮. ਸੁਦਸ੍ਸਨਂ ਨਾਮ ਨਗਰਂ, ਸੁਦਤ੍ਤੋ ਨਾਮ ਖਤ੍ਤਿਯੋ;
ਸੁਦਤ੍ਤਾ ਨਾਮ ਜਨਿਕਾ, ਸੁਮੇਧਸ੍ਸ ਮਹੇਸਿਨੋ.
੧੯. ਨਵਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;
ਸੁਚਨ੍ਦਕਞ੍ਚਨਸਿਰਿਵਡ੍ਢਾ, ਤਯੋ ਪਾਸਾਦਮੁਤ੍ਤਮਾ.
੨੦. ਤਿਸੋਲ਼ਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;
ਸੁਮਨਾ ਨਾਮ ਸਾ ਨਾਰੀ, ਪੁਨਬ੍ਬਸੁ ਨਾਮ ਅਤ੍ਰਜੋ.
੨੧. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਹਤ੍ਥਿਯਾਨੇਨ ਨਿਕ੍ਖਮਿ;
ਅਨੂਨਕਂ ਅਡ੍ਢਮਾਸਂ, ਪਧਾਨਂ ਪਦਹੀ ਜਿਨੋ.
੨੨. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਸੁਮੇਧੋ ਲੋਕਨਾਯਕੋ;
ਵਤ੍ਤਿ ਚਕ੍ਕਂ ਮਹਾਵੀਰੋ, ਸੁਦਸ੍ਸਨੁਯ੍ਯਾਨਮੁਤ੍ਤਮੇ.
੨੩. ਸਰਣੋ ਸਬ੍ਬਕਾਮੋ ਚ, ਅਹੇਸੁਂ ਅਗ੍ਗਸਾਵਕਾ;
ਸਾਗਰੋ ਨਾਮੁਪਟ੍ਠਾਕੋ, ਸੁਮੇਧਸ੍ਸ ਮਹੇਸਿਨੋ.
੨੪. ਰਾਮਾ ਚੇਵ ਸੁਰਾਮਾ ਚ, ਅਹੇਸੁਂ ਅਗ੍ਗਸਾਵਿਕਾ;
ਬੋਧਿ ਤਸ੍ਸ ਭਗਵਤੋ, ਮਹਾਨੀਪੋਤਿ ਵੁਚ੍ਚਤਿ.
੨੫. ਉਰੁਵੇਲਾ ਯਸਵਾ ਚ, ਅਹੇਸੁਂ ਅਗ੍ਗੁਪਟ੍ਠਕਾ;
ਯਸੋਧਰਾ ਸਿਰਿਮਾ ਚ [ਯਸਾ ਨਾਮ ਸਿਰਿਮਾ ਚ (ਸ੍ਯਾ. ਕਂ.)], ਅਹੇਸੁਂ ਅਗ੍ਗੁਪਟ੍ਠਿਕਾ.
੨੬. ਅਟ੍ਠਾਸੀਤਿਰਤਨਾਨਿ, ਅਚ੍ਚੁਗ੍ਗਤੋ ਮਹਾਮੁਨਿ;
ਓਭਾਸੇਤਿ ਦਿਸਾ ਸਬ੍ਬਾ, ਚਨ੍ਦੋ ਤਾਰਗਣੇ ਯਥਾ.
੨੭. ਚਕ੍ਕਵਤ੍ਤਿਮਣੀ ਨਾਮ, ਯਥਾ ਤਪਤਿ ਯੋਜਨਂ;
ਤਥੇਵ ਤਸ੍ਸ ਰਤਨਂ, ਸਮਨ੍ਤਾ ਫਰਤਿ ਯੋਜਨਂ.
੨੮. ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;
ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.
੨੯. ਤੇਵਿਜ੍ਜਛਲ਼ਭਿਞ੍ਞੇਹਿ, ਬਲਪ੍ਪਤ੍ਤੇਹਿ ਤਾਦਿਹਿ;
ਸਮਾਕੁਲਮਿਦਂ ਆਸਿ, ਅਰਹਨ੍ਤੇਹਿ ਸਾਧੁਹਿ.
੩੦. ਤੇਪਿ ਸਬ੍ਬੇ ਅਮਿਤਯਸਾ, ਵਿਪ੍ਪਮੁਤ੍ਤਾ ਨਿਰੂਪਧੀ;
ਞਾਣਾਲੋਕਂ ਦਸ੍ਸਯਿਤ੍ਵਾ, ਨਿਬ੍ਬੁਤਾ ਤੇ ਮਹਾਯਸਾ.
੩੧. ਸੁਮੇਧੋ ਜਿਨਵਰੋ ਬੁਦ੍ਧੋ, ਮੇਧਾਰਾਮਮ੍ਹਿ ਨਿਬ੍ਬੁਤੋ;
ਧਾਤੁਵਿਤ੍ਥਾਰਿਕਂ ਆਸਿ, ਤੇਸੁ ਤੇਸੁ ਪਦੇਸਤੋਤਿ.
ਸੁਮੇਧਸ੍ਸ ਭਗਵਤੋ ਵਂਸੋ ਏਕਾਦਸਮੋ.