੧੪. ਸੁਜਾਤਬੁਦ੍ਧਵਂਸੋ
੧. ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਸੁਜਾਤੋ ਨਾਮ ਨਾਯਕੋ;
ਸੀਹਹਨੁਸਭਕ੍ਖਨ੍ਧੋ, ਅਪ੍ਪਮੇਯ੍ਯੋ ਦੁਰਾਸਦੋ.
੨. ਚਨ੍ਦੋਵ ਵਿਮਲੋ ਸੁਦ੍ਧੋ, ਸਤਰਂਸੀਵ ਪਤਾਪਵਾ;
ਏਵਂ ਸੋਭਤਿ ਸਮ੍ਬੁਦ੍ਧੋ, ਜਲਨ੍ਤੋ ਸਿਰਿਯਾ ਸਦਾ.
੩. ਪਾਪੁਣਿਤ੍ਵਾਨ ਸਮ੍ਬੁਦ੍ਧੋ, ਕੇਵਲਂ ਬੋਧਿਮੁਤ੍ਤਮਂ;
ਸੁਮਙ੍ਗਲਮ੍ਹਿ ਨਗਰੇ, ਧਮ੍ਮਚਕ੍ਕਂ ਪਵਤ੍ਤਯਿ.
੪. ਦੇਸੇਨ੍ਤੇ [ਦੇਸੇਨ੍ਤੋ (ਸ੍ਯਾ. ਕਂ.)] ਪਵਰਂ ਧਮ੍ਮਂ, ਸੁਜਾਤੇ ਲੋਕਨਾਯਕੇ [ਸੁਜਾਤੋ ਲੋਕਨਾਯਕੋ (ਸ੍ਯਾ. ਕਂ.)];
ਅਸੀਤਿਕੋਟੀ ਅਭਿਸਮਿਂਸੁ, ਪਠਮੇ ਧਮ੍ਮਦੇਸਨੇ.
੫. ਯਦਾ ਸੁਜਾਤੋ ਅਮਿਤਯਸੋ, ਦੇਵੇ ਵਸ੍ਸਂ ਉਪਾਗਮਿ;
ਸਤ੍ਤਤਿਂਸਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.
੬. ਯਦਾ ਸੁਜਾਤੋ ਅਸਮਸਮੋ, ਉਪਗਚ੍ਛਿ ਪਿਤੁਸਨ੍ਤਿਕਂ;
ਸਟ੍ਠਿਸਤਸਹਸ੍ਸਾਨਂ [ਸਤ੍ਤਤਿਂਸਸਹਸ੍ਸਾਨਂ (ਸੀ.)], ਤਤਿਯਾਭਿਸਮਯੋ ਅਹੁ.
੭. ਸਨ੍ਨਿਪਾਤਾ ਤਯੋ ਆਸੁਂ, ਸੁਜਾਤਸ੍ਸ ਮਹੇਸਿਨੋ;
ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.
੮. ਅਭਿਞ੍ਞਾਬਲਪ੍ਪਤ੍ਤਾਨਂ, ਅਪ੍ਪਤ੍ਤਾਨਂ ਭਵਾਭਵੇ;
ਸਟ੍ਠਿਸਤਸਹਸ੍ਸਾਨਿ, ਪਠਮਂ ਸਨ੍ਨਿਪਤਿਂਸੁ ਤੇ.
੯. ਪੁਨਾਪਰਂ ਸਨ੍ਨਿਪਾਤੇ, ਤਿਦਿਵੋਰੋਹਣੇ ਜਿਨੇ;
ਪਞ੍ਞਾਸਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.
੧੦. ਉਪਸਙ੍ਕਮਨ੍ਤੋ ਨਰਾਸਭਂ, ਤਸ੍ਸ ਯੋ ਅਗ੍ਗਸਾਵਕੋ;
ਚਤੂਹਿ ਸਤਸਹਸ੍ਸੇਹਿ, ਸਮ੍ਬੁਦ੍ਧਂ ਉਪਸਙ੍ਕਮਿ.
੧੧. ਅਹਂ ਤੇਨ ਸਮਯੇਨ, ਚਤੁਦੀਪਮ੍ਹਿ ਇਸ੍ਸਰੋ;
ਅਨ੍ਤਲਿਕ੍ਖਚਰੋ ਆਸਿਂ, ਚਕ੍ਕਵਤ੍ਤੀ ਮਹਬ੍ਬਲੋ.
੧੨. ਲੋਕੇ ਅਚ੍ਛਰਿਯਂ ਦਿਸ੍ਵਾ, ਅਬ੍ਭੁਤਂ ਲੋਮਹਂਸਨਂ;
ਉਪਗਨ੍ਤ੍ਵਾਨ ਵਨ੍ਦਿਂ ਸੋ, ਸੁਜਾਤਂ ਲੋਕਨਾਯਕਂ.
੧੩. ਚਤੁਦੀਪੇ ਮਹਾਰਜ੍ਜਂ, ਰਤਨੇ ਸਤ੍ਤ ਉਤ੍ਤਮੇ;
ਬੁਦ੍ਧੇ ਨਿਯ੍ਯਾਦਯਿਤ੍ਵਾਨ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.
੧੪. ਆਰਾਮਿਕਾ ਜਨਪਦੇ, ਉਟ੍ਠਾਨਂ ਪਟਿਪਿਣ੍ਡਿਯ;
ਉਪਨੇਨ੍ਤਿ ਭਿਕ੍ਖੁਸਙ੍ਘਸ੍ਸ, ਪਚ੍ਚਯਂ ਸਯਨਾਸਨਂ.
੧੫. ਸੋਪਿ ਮਂ ਬੁਦ੍ਧੋ [ਤਦਾ (ਸ੍ਯਾ. ਕਂ.)] ਬ੍ਯਾਕਾਸਿ, ਦਸਸਹਸ੍ਸਿਮ੍ਹਿ ਇਸ੍ਸਰੋ;
‘‘ਤਿਂਸਕਪ੍ਪਸਹਸ੍ਸਮ੍ਹਿ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੬. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.
੧੭. ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਹਾਸਂ ਜਨੇਸਹਂ;
ਅਧਿਟ੍ਠਹਿਂ ਵਤਂ ਉਗ੍ਗਂ, ਦਸਪਾਰਮਿਪੂਰਿਯਾ.
੧੮. ਸੁਤ੍ਤਨ੍ਤਂ ਵਿਨਯਞ੍ਚਾਪਿ, ਨਵਙ੍ਗਂ ਸਤ੍ਥੁਸਾਸਨਂ;
ਸਬ੍ਬਂ ਪਰਿਯਾਪੁਣਿਤ੍ਵਾਨ, ਸੋਭਯਿਂ ਜਿਨਸਾਸਨਂ.
੧੯. ਤਤ੍ਥਪ੍ਪਮਤ੍ਤੋ ਵਿਹਰਨ੍ਤੋ, ਬ੍ਰਹ੍ਮਂ ਭਾਵੇਤ੍ਵ ਭਾਵਨਂ;
ਅਭਿਞ੍ਞਾਪਾਰਮਿਂ ਗਨ੍ਤ੍ਵਾ, ਬ੍ਰਹ੍ਮਲੋਕਮਗਞ੍ਛਹਂ.
੨੦. ਸੁਮਙ੍ਗਲਂ ਨਾਮ ਨਗਰਂ, ਉਗ੍ਗਤੋ ਨਾਮ ਖਤ੍ਤਿਯੋ;
ਮਾਤਾ ਪਭਾਵਤੀ ਨਾਮ, ਸੁਜਾਤਸ੍ਸ ਮਹੇਸਿਨੋ.
੨੧. ਨਵਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;
ਸਿਰੀ ਉਪਸਿਰੀ ਨਨ੍ਦੋ, ਤਯੋ ਪਾਸਾਦਮੁਤ੍ਤਮਾ.
੨੨. ਤੇਵੀਸਤਿਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;
ਸਿਰਿਨਨ੍ਦਾ ਨਾਮ ਨਾਰੀ, ਉਪਸੇਨੋ ਨਾਮ ਅਤ੍ਰਜੋ.
੨੩. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਅਸ੍ਸਯਾਨੇਨ ਨਿਕ੍ਖਮਿ;
ਅਨੂਨਨਵਮਾਸਾਨਿ, ਪਧਾਨਂ ਪਦਹੀ ਜਿਨੋ.
੨੪. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਸੁਜਾਤੋ ਲੋਕਨਾਯਕੋ;
ਵਤ੍ਤਿ ਚਕ੍ਕਂ ਮਹਾਵੀਰੋ, ਸੁਮਙ੍ਗਲੁਯ੍ਯਾਨਮੁਤ੍ਤਮੇ.
੨੫. ਸੁਦਸ੍ਸਨੋ ਸੁਦੇਵੋ ਚ, ਅਹੇਸੁਂ ਅਗ੍ਗਸਾਵਕਾ;
ਨਾਰਦੋ ਨਾਮੁਪਟ੍ਠਾਕੋ, ਸੁਜਾਤਸ੍ਸ ਮਹੇਸਿਨੋ.
੨੬. ਨਾਗਾ ਚ ਨਾਗਸਮਾਲਾ ਚ, ਅਹੇਸੁਂ ਅਗ੍ਗਸਾਵਿਕਾ;
ਬੋਧਿ ਤਸ੍ਸ ਭਗਵਤੋ, ਮਹਾਵੇਲ਼ੂਤਿ ਵੁਚ੍ਚਤਿ.
੨੭. ਸੋ ਚ ਰੁਕ੍ਖੋ ਘਨਕ੍ਖਨ੍ਧੋ [ਘਨਰੁਚਿਰੋ (ਸੀ. ਕ.)], ਅਚ੍ਛਿਦ੍ਦੋ ਹੋਤਿ ਪਤ੍ਤਿਕੋ;
ਉਜੁ ਵਂਸੋ ਬ੍ਰਹਾ ਹੋਤਿ, ਦਸ੍ਸਨੀਯੋ ਮਨੋਰਮੋ.
੨੮. ਏਕਕ੍ਖਨ੍ਧੋ ਪਵਡ੍ਢਿਤ੍ਵਾ, ਤਤੋ ਸਾਖਾ ਪਭਿਜ੍ਜਤਿ;
ਯਥਾ ਸੁਬਦ੍ਧੋ ਮੋਰਹਤ੍ਥੋ, ਏਵਂ ਸੋਭਤਿ ਸੋ ਦੁਮੋ.
੨੯. ਨ ਤਸ੍ਸ ਕਣ੍ਟਕਾ ਹੋਨ੍ਤਿ, ਨਾਪਿ ਛਿਦ੍ਦਂ ਮਹਾ ਅਹੁ;
ਵਿਤ੍ਥਿਣ੍ਣਸਾਖੋ ਅਵਿਰਲੋ, ਸਨ੍ਦਚ੍ਛਾਯੋ ਮਨੋਰਮੋ.
੩੦. ਸੁਦਤ੍ਤੋ ਚੇਵ ਚਿਤ੍ਤੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;
ਸੁਭਦ੍ਦਾ ਚ ਪਦੁਮਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.
੩੧. ਪਞ੍ਞਾਸਰਤਨੋ ਆਸਿ, ਉਚ੍ਚਤ੍ਤਨੇਨ ਸੋ ਜਿਨੋ;
ਸਬ੍ਬਾਕਾਰਵਰੂਪੇਤੋ, ਸਬ੍ਬਗੁਣਮੁਪਾਗਤੋ.
੩੨. ਤਸ੍ਸ ਪਭਾ ਅਸਮਸਮਾ, ਨਿਦ੍ਧਾਵਤਿ ਸਮਨ੍ਤਤੋ;
ਅਪ੍ਪਮਾਣੋ ਅਤੁਲਿਯੋ, ਓਪਮ੍ਮੇਹਿ ਅਨੂਪਮੋ.
੩੩. ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;
ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.
੩੪. ਯਥਾਪਿ ਸਾਗਰੇ ਊਮੀ, ਗਗਨੇ ਤਾਰਕਾ ਯਥਾ;
ਏਵਂ ਤਦਾ ਪਾਵਚਨਂ, ਅਰਹਨ੍ਤੇਹਿ ਚਿਤ੍ਤਿਤਂ [ਚਿਤ੍ਤਕਂ (ਸ੍ਯਾ. ਕਂ.)].
੩੫. ਸੋ ਚ ਬੁਦ੍ਧੋ ਅਸਮਸਮੋ, ਗੁਣਾਨਿ ਚ ਤਾਨਿ ਅਤੁਲਿਯਾਨਿ;
ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.
੩੬. ਸੁਜਾਤੋ ਜਿਨਵਰੋ ਬੁਦ੍ਧੋ, ਸਿਲਾਰਾਮਮ੍ਹਿ ਨਿਬ੍ਬੁਤੋ;
ਤਤ੍ਥੇਵ ਤਸ੍ਸ ਚੇਤਿਯੋ [ਤਤ੍ਥੇਵ ਚੇਤਿਯੋ ਸਤ੍ਥੁ (ਸ੍ਯਾ. ਕਂ.)], ਤੀਣਿਗਾਵੁਤਮੁਗ੍ਗਤੋਤਿ.
ਸੁਜਾਤਸ੍ਸ ਭਗਵਤੋ ਵਂਸੋ ਦ੍ਵਾਦਸਮੋ.