੧੨. ਪਦੁਮੁਤ੍ਤਰਬੁਦ੍ਧਵਂਸੋ

੧. ਨਾਰਦਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਪਦੁਮੁਤ੍ਤਰੋ ਨਾਮ ਜਿਨੋ, ਅਕ੍ਖੋਭੋ ਸਾਗਰੂਪਮੋ.

੨. ਮਣ੍ਡਕਪ੍ਪੋਵ ਸੋ ਆਸਿ, ਯਮ੍ਹਿ ਬੁਦ੍ਧੋ ਅਜਾਯਥ;

ਉਸ੍ਸਨ੍ਨਕੁਸਲਾ ਜਨਤਾ, ਤਮ੍ਹਿ ਕਪ੍ਪੇ ਅਜਾਯਥ.

੩. ਪਦੁਮੁਤ੍ਤਰਸ੍ਸ ਭਗਵਤੋ, ਪਠਮੇ ਧਮ੍ਮਦੇਸਨੇ;

ਕੋਟਿਸਤਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੪. ਤਤੋ ਪਰਮ੍ਪਿ ਵਸ੍ਸਨ੍ਤੇ, ਤਪ੍ਪਯਨ੍ਤੇ ਚ ਪਾਣਿਨੇ;

ਸਤ੍ਤਤਿਂਸਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ਯਮ੍ਹਿ ਕਾਲੇ ਮਹਾਵੀਰੋ, ਆਨਨ੍ਦਂ ਉਪਸਙ੍ਕਮਿ;

ਪਿਤੁਸਨ੍ਤਿਕਂ ਉਪਗਨ੍ਤ੍ਵਾ, ਆਹਨੀ ਅਮਤਦੁਨ੍ਦੁਭਿਂ.

੬. ਆਹਤੇ ਅਮਤਭੇਰਿਮ੍ਹਿ, ਵਸ੍ਸਨ੍ਤੇ ਧਮ੍ਮਵੁਟ੍ਠਿਯਾ;

ਪਞ੍ਞਾਸਸਤਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.

੭. ਓਵਾਦਕੋ ਵਿਞ੍ਞਾਪਕੋ, ਤਾਰਕੋ ਸਬ੍ਬਪਾਣਿਨਂ;

ਦੇਸਨਾਕੁਸਲੋ ਬੁਦ੍ਧੋ, ਤਾਰੇਸਿ ਜਨਤਂ ਬਹੁਂ.

੮. ਸਨ੍ਨਿਪਾਤਾ ਤਯੋ ਆਸੁਂ, ਪਦੁਮੁਤ੍ਤਰਸ੍ਸ ਸਤ੍ਥੁਨੋ;

ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ.

੯. ਯਦਾ ਬੁਦ੍ਧੋ ਅਸਮਸਮੋ, ਵਸਿ ਵੇਭਾਰਪਬ੍ਬਤੇ;

ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੧੦. ਪੁਨ ਚਾਰਿਕਂ ਪਕ੍ਕਨ੍ਤੇ, ਗਾਮਨਿਗਮਰਟ੍ਠਤੋ;

ਅਸੀਤਿਕੋਟਿਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ.

੧੧. ਅਹਂ ਤੇਨ ਸਮਯੇਨ, ਜਟਿਲੋ ਨਾਮ ਰਟ੍ਠਿਕੋ;

ਸਮ੍ਬੁਦ੍ਧਪ੍ਪਮੁਖਂ ਸਙ੍ਘਂ, ਸਭਤ੍ਤਂ ਦੁਸ੍ਸਮਦਾਸਹਂ.

੧੨. ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸਙ੍ਘਮਜ੍ਝੇ ਨਿਸੀਦਿਯ;

‘‘ਸਤਸਹਸ੍ਸਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੩. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.

੧੪. ਤਸ੍ਸਾਪਿ ਵਚਨਂ ਸੁਤ੍ਵਾ, ਉਤ੍ਤਰਿਂ ਵਤਮਧਿਟ੍ਠਹਿਂ;

ਅਕਾਸਿਂ ਉਗ੍ਗਦਲ਼੍ਹਂ ਧਿਤਿਂ, ਦਸਪਾਰਮਿਪੂਰਿਯਾ.

੧੫. ਬ੍ਯਾਹਤਾ ਤਿਤ੍ਥਿਯਾ ਸਬ੍ਬੇ, ਵਿਮਨਾ ਦੁਮ੍ਮਨਾ ਤਦਾ;

ਨ ਤੇਸਂ ਕੇਚਿ ਪਰਿਚਰਨ੍ਤਿ, ਰਟ੍ਠਤੋ ਨਿਚ੍ਛੁਭਨ੍ਤਿ ਤੇ.

੧੬. ਸਬ੍ਬੇ ਤਤ੍ਥ ਸਮਾਗਨ੍ਤ੍ਵਾ, ਉਪਗਚ੍ਛੁਂ ਬੁਦ੍ਧਸਨ੍ਤਿਕੇ;

ਤੁਵਂ ਨਾਥੋ ਮਹਾਵੀਰ, ਸਰਣਂ ਹੋਹਿ ਚਕ੍ਖੁਮ.

੧੭. ਅਨੁਕਮ੍ਪਕੋ ਕਾਰੁਣਿਕੋ, ਹਿਤੇਸੀ ਸਬ੍ਬਪਾਣਿਨਂ;

ਸਮ੍ਪਤ੍ਤੇ ਤਿਤ੍ਥਿਯੇ ਸਬ੍ਬੇ, ਪਞ੍ਚਸੀਲੇ ਪਤਿਟ੍ਠਪਿ.

੧੮. ਏਵਂ ਨਿਰਾਕੁਲਂ ਆਸਿ, ਸੁਞ੍ਞਤਂ ਤਿਤ੍ਥਿਯੇਹਿ ਤਂ;

ਵਿਚਿਤ੍ਤਂ ਅਰਹਨ੍ਤੇਹਿ, ਵਸੀਭੂਤੇਹਿ ਤਾਦਿਹਿ.

੧੯. ਨਗਰਂ ਹਂਸਵਤੀ ਨਾਮ, ਆਨਨ੍ਦੋ ਨਾਮ ਖਤ੍ਤਿਯੋ;

ਸੁਜਾਤਾ ਨਾਮ ਜਨਿਕਾ, ਪਦੁਮੁਤ੍ਤਰਸ੍ਸ ਸਤ੍ਥੁਨੋ.

੨੦. ਦਸਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਨਰਵਾਹਨੋ ਯਸੋ ਵਸਵਤ੍ਤੀ [ਨਾਰਿਵਾਹਨੋ ਯਸਵਤੀ (ਸ੍ਯਾ. ਕਂ.)], ਤਯੋ ਪਾਸਾਦਮੁਤ੍ਤਮਾ.

੨੧. ਤਿਚਤ੍ਤਾਰੀਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਵਸੁਦਤ੍ਤਾ ਨਾਮ ਨਾਰੀ, ਉਤ੍ਤਮੋ ਨਾਮ ਅਤ੍ਰਜੋ.

੨੨. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਪਾਸਾਦੇਨਾਭਿਨਿਕ੍ਖਮਿ;

ਸਤ੍ਤਾਹਂ ਪਧਾਨਚਾਰਂ, ਅਚਰੀ ਪੁਰਿਸੁਤ੍ਤਮੋ.

੨੩. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਪਦੁਮੁਤ੍ਤਰੋ ਵਿਨਾਯਕੋ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਮਿਥਿਲੁਯ੍ਯਾਨਮੁਤ੍ਤਮੇ.

੨੪. ਦੇਵਲੋ ਚ ਸੁਜਾਤੋ ਚ, ਅਹੇਸੁਂ ਅਗ੍ਗਸਾਵਕਾ;

ਸੁਮਨੋ ਨਾਮੁਪਟ੍ਠਾਕੋ, ਪਦੁਮੁਤ੍ਤਰਸ੍ਸ ਮਹੇਸਿਨੋ.

੨੫. ਅਮਿਤਾ ਚ ਅਸਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਸਲਲੋਤਿ ਪਵੁਚ੍ਚਤਿ.

੨੬. ਵਿਤਿਣ੍ਣੋ ਚੇਵ [ਅਮਿਤੋ ਚੇਵ (ਸ੍ਯਾ.)] ਤਿਸ੍ਸੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਹਟ੍ਠਾ ਚੇਵ ਵਿਚਿਤ੍ਤਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੭. ਅਟ੍ਠਪਣ੍ਣਾਸਰਤਨਂ, ਅਚ੍ਚੁਗ੍ਗਤੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਦ੍ਵਤ੍ਤਿਂਸਵਰਲਕ੍ਖਣੋ.

੨੮. ਕੁਟ੍ਟਾ ਕਵਾਟਾ ਭਿਤ੍ਤੀ ਚ, ਰੁਕ੍ਖਾ ਨਗਸਿਲੁਚ੍ਚਯਾ;

ਨ ਤਸ੍ਸਾਵਰਣਂ ਅਤ੍ਥਿ, ਸਮਨ੍ਤਾ ਦ੍ਵਾਦਸਯੋਜਨੇ.

੨੯. ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੦. ਸਨ੍ਤਾਰੇਤ੍ਵਾ ਬਹੁਜਨਂ, ਛਿਨ੍ਦਿਤ੍ਵਾ ਸਬ੍ਬਸਂਸਯਂ;

ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ ਨਿਬ੍ਬੁਤੋ ਸੋ ਸਸਾਵਕੋ.

੩੧. ਪਦੁਮੁਤ੍ਤਰੋ ਜਿਨੋ ਬੁਦ੍ਧੋ, ਨਨ੍ਦਾਰਾਮਮ੍ਹਿ ਨਿਬ੍ਬੁਤੋ;

ਤਤ੍ਥੇਵਸ੍ਸ ਥੂਪਵਰੋ, ਦ੍ਵਾਦਸੁਬ੍ਬੇਧਯੋਜਨੋਤਿ.

ਪਦੁਮੁਤ੍ਤਰਸ੍ਸ ਭਗਵਤੋ ਵਂਸੋ ਦਸਮੋ.