੧੧. ਨਾਰਦਬੁਦ੍ਧਵਂਸੋ
੧. ਪਦੁਮਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;
ਨਾਰਦੋ ਨਾਮ ਨਾਮੇਨ, ਅਸਮੋ ਅਪ੍ਪਟਿਪੁਗ੍ਗਲੋ.
੨. ਸੋ ਬੁਦ੍ਧੋ ਚਕ੍ਕਵਤ੍ਤਿਸ੍ਸ, ਜੇਟ੍ਠੋ ਦਯਿਤਓਰਸੋ;
ਆਮੁਕ੍ਕਮਾਲਾਭਰਣੋ, ਉਯ੍ਯਾਨਂ ਉਪਸਙ੍ਕਮਿ.
੩. ਤਤ੍ਥਾਸਿ ਰੁਕ੍ਖੋ ਯਸਵਿਪੁਲੋ, ਅਭਿਰੂਪੋ ਬ੍ਰਹਾ ਸੁਚਿ;
ਤਮਜ੍ਝਪਤ੍ਵਾ ਉਪਨਿਸੀਦਿ, ਮਹਾਸੋਣਸ੍ਸ ਹੇਟ੍ਠਤੋ.
੪. ਤਤ੍ਥ ਞਾਣਵਰੁਪ੍ਪਜ੍ਜਿ, ਅਨਨ੍ਤਂ ਵਜਿਰੂਪਮਂ;
ਤੇਨ ਵਿਚਿਨਿ ਸਙ੍ਖਾਰੇ, ਉਕ੍ਕੁਜ੍ਜਮਵਕੁਜ੍ਜਕਂ [ਕੁਜ੍ਜਤਂ (ਸ੍ਯਾ. ਕਂ.)].
੫. ਤਤ੍ਥ ਸਬ੍ਬਕਿਲੇਸਾਨਿ, ਅਸੇਸਮਭਿਵਾਹਯਿ;
ਪਾਪੁਣੀ ਕੇਵਲਂ ਬੋਧਿਂ, ਬੁਦ੍ਧਞਾਣੇ ਚ ਚੁਦ੍ਦਸ.
੬. ਪਾਪੁਣਿਤ੍ਵਾਨ ਸਮ੍ਬੋਧਿਂ, ਧਮ੍ਮਚਕ੍ਕਂ ਪਵਤ੍ਤਯਿ;
ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.
੭. ਮਹਾਦੋਣਂ ਨਾਗਰਾਜਂ, ਵਿਨਯਨ੍ਤੋ ਮਹਾਮੁਨਿ;
ਪਾਟਿਹੇਰਂ ਤਦਾਕਾਸਿ, ਦਸ੍ਸਯਨ੍ਤੋ ਸਦੇਵਕੇ.
੮. ਤਦਾ ਦੇਵਮਨੁਸ੍ਸਾਨਂ, ਤਮ੍ਹਿ ਧਮ੍ਮਪ੍ਪਕਾਸਨੇ;
ਨਵੁਤਿਕੋਟਿਸਹਸ੍ਸਾਨਿ, ਤਰਿਂਸੁ ਸਬ੍ਬਸਂਸਯਂ.
੯. ਯਮ੍ਹਿ ਕਾਲੇ ਮਹਾਵੀਰੋ, ਓਵਦੀ ਸਕਮਤ੍ਰਜਂ;
ਅਸੀਤਿਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.
੧੦. ਸਨ੍ਨਿਪਾਤਾ ਤਯੋ ਆਸੁਂ, ਨਾਰਦਸ੍ਸ ਮਹੇਸਿਨੋ;
ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ.
੧੧. ਯਦਾ ਬੁਦ੍ਧੋ ਬੁਦ੍ਧਗੁਣਂ, ਸਨਿਦਾਨਂ ਪਕਾਸਯਿ;
ਨਵੁਤਿਕੋਟਿਸਹਸ੍ਸਾਨਿ, ਸਮਿਂਸੁ ਵਿਮਲਾ ਤਦਾ.
੧੨. ਯਦਾ ਵੇਰੋਚਨੋ ਨਾਗੋ, ਦਾਨਂ ਦਦਾਤਿ ਸਤ੍ਥੁਨੋ;
ਤਦਾ ਸਮਿਂਸੁ ਜਿਨਪੁਤ੍ਤਾ, ਅਸੀਤਿਸਤਸਹਸ੍ਸਿਯੋ.
੧੩. ਅਹਂ ਤੇਨ ਸਮਯੇਨ, ਜਟਿਲੋ ਉਗ੍ਗਤਾਪਨੋ;
ਅਨ੍ਤਲਿਕ੍ਖਚਰੋ ਆਸਿਂ, ਪਞ੍ਚਾਭਿਞ੍ਞਾਸੁ ਪਾਰਗੂ.
੧੪. ਤਦਾਪਾਹਂ ਅਸਮਸਮਂ, ਸਸਙ੍ਘਂ ਸਪਰਿਜ੍ਜਨਂ;
ਅਨ੍ਨਪਾਨੇਨ ਤਪ੍ਪੇਤ੍ਵਾ, ਚਨ੍ਦਨੇਨਾਭਿਪੂਜਯਿਂ.
੧੫. ਸੋਪਿ ਮਂ ਤਦਾ ਬ੍ਯਾਕਾਸਿ, ਨਾਰਦੋ ਲੋਕਨਾਯਕੋ;
‘‘ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੬. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.
੧੭. ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਹਾਸੇਤ੍ਵ ਮਾਨਸਂ;
ਅਧਿਟ੍ਠਹਿਂ ਵਤਂ ਉਗ੍ਗਂ, ਦਸਪਾਰਮਿਪੂਰਿਯਾ.
੧੮. ਨਗਰਂ ਧਞ੍ਞਵਤੀ ਨਾਮ, ਸੁਦੇਵੋ ਨਾਮ ਖਤ੍ਤਿਯੋ;
ਅਨੋਮਾ ਨਾਮ ਜਨਿਕਾ, ਨਾਰਦਸ੍ਸ ਮਹੇਸਿਨੋ.
੧੯. ਨਵਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;
ਜਿਤੋ ਵਿਜਿਤਾਭਿਰਾਮੋ, ਤਯੋ ਪਾਸਾਦਮੁਤ੍ਤਮਾ.
੨੦. ਤਿਚਤ੍ਤਾਰੀਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;
ਵਿਜਿਤਸੇਨਾ ਨਾਮ ਨਾਰੀ, ਨਨ੍ਦੁਤ੍ਤਰੋ ਨਾਮ ਅਤ੍ਰਜੋ.
੨੧. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਪਦਸਾ ਗਮਨੇਨ ਨਿਕ੍ਖਮਿ;
ਸਤ੍ਤਾਹਂ ਪਧਾਨਚਾਰਂ, ਅਚਰੀ ਪੁਰਿਸੁਤ੍ਤਮੋ [ਲੋਕਨਾਯਕੋ (ਸੀ. ਕ.)].
੨੨. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਨਾਰਦੋ ਲੋਕਨਾਯਕੋ;
ਵਤ੍ਤਿ ਚਕ੍ਕਂ ਮਹਾਵੀਰੋ, ਧਨਞ੍ਚੁਯ੍ਯਾਨਮੁਤ੍ਤਮੇ.
੨੩. ਭਦ੍ਦਸਾਲੋ ਜਿਤਮਿਤ੍ਤੋ, ਅਹੇਸੁਂ ਅਗ੍ਗਸਾਵਕਾ;
ਵਾਸੇਟ੍ਠੋ ਨਾਮੁਪਟ੍ਠਾਕੋ, ਨਾਰਦਸ੍ਸ ਮਹੇਸਿਨੋ.
੨੪. ਉਤ੍ਤਰਾ ਫਗ੍ਗੁਨੀ ਚੇਵ, ਅਹੇਸੁਂ ਅਗ੍ਗਸਾਵਿਕਾ;
ਬੋਧਿ ਤਸ੍ਸ ਭਗਵਤੋ, ਮਹਾਸੋਣੋਤਿ ਵੁਚ੍ਚਤਿ.
੨੫. ਉਗ੍ਗਰਿਨ੍ਦੋ ਵਸਭੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;
ਇਨ੍ਦਾਵਰੀ ਚ ਵਣ੍ਡੀ [ਉਨ੍ਦੀ (ਸੀ.), ਗਣ੍ਡੀ (ਸ੍ਯਾ. ਕਂ.)] ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.
੨੬. ਅਟ੍ਠਾਸੀਤਿਰਤਨਾਨਿ, ਅਚ੍ਚੁਗ੍ਗਤੋ ਮਹਾਮੁਨਿ;
ਕਞ੍ਚਨਗ੍ਘਿਯਸਙ੍ਕਾਸੋ, ਦਸਸਹਸ੍ਸੀ ਵਿਰੋਚਤਿ.
੨੭. ਤਸ੍ਸ ਬ੍ਯਾਮਪ੍ਪਭਾ ਕਾਯਾ, ਨਿਦ੍ਧਾਵਤਿ ਦਿਸੋਦਿਸਂ;
ਨਿਰਨ੍ਤਰਂ ਦਿਵਾਰਤ੍ਤਿਂ, ਯੋਜਨਂ ਫਰਤੇ ਸਦਾ.
੨੮. ਨ ਕੇਚਿ ਤੇਨ ਸਮਯੇਨ, ਸਮਨ੍ਤਾ ਯੋਜਨੇ ਜਨਾ;
ਉਕ੍ਕਾਪਦੀਪੇ ਉਜ੍ਜਾਲੇਨ੍ਤਿ, ਬੁਦ੍ਧਰਂਸੀਹਿ ਓਤ੍ਥਟਾ.
੨੯. ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;
ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.
੩੦. ਯਥਾ ਉਲ਼ੂਹਿ ਗਗਨਂ, ਵਿਚਿਤ੍ਤਂ ਉਪਸੋਭਤਿ;
ਤਥੇਵ ਸਾਸਨਂ ਤਸ੍ਸ, ਅਰਹਨ੍ਤੇਹਿ ਸੋਭਤਿ.
੩੧. ਸਂਸਾਰਸੋਤਂ ਤਰਣਾਯ, ਸੇਸਕੇ ਪਟਿਪਨ੍ਨਕੇ;
ਧਮ੍ਮਸੇਤੁਂ ਦਲ਼੍ਹਂ ਕਤ੍ਵਾ, ਨਿਬ੍ਬੁਤੋ ਸੋ ਨਰਾਸਭੋ.
੩੨. ਸੋਪਿ ਬੁਦ੍ਧੋ ਅਸਮਸਮੋ, ਤੇਪਿ ਖੀਣਾਸਵਾ ਅਤੁਲਤੇਜਾ;
ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.
੩੩. ਨਾਰਦੋ ਜਿਨਵਸਭੋ, ਨਿਬ੍ਬੁਤੋ ਸੁਦਸ੍ਸਨੇ ਪੁਰੇ;
ਤਤ੍ਥੇਵਸ੍ਸ ਥੂਪਵਰੋ, ਚਤੁਯੋਜਨਮੁਗ੍ਗਤੋਤਿ.
ਨਾਰਦਸ੍ਸ ਭਗਵਤੋ ਵਂਸੋ ਨਵਮੋ.