੮. ਭਦ੍ਦਜਿਤ੍ਥੇਰਅਪਦਾਨਂ

੯੮. ‘‘ਓਗਯ੍ਹ ਯਂ ਪੋਕ੍ਖਰਣਿਂ, ਨਾਨਾਕੁਞ੍ਜਰਸੇਵਿਤਂ;

ਉਦ੍ਧਰਾਮਿ ਭਿਸਂ ਤਤ੍ਥ, ਘਾਸਹੇਤੁ ਅਹਂ ਤਦਾ.

੯੯. ‘‘ਭਗਵਾ ਤਮ੍ਹਿ ਸਮਯੇ, ਪਦੁਮੁਤ੍ਤਰਸਵ੍ਹਯੋ;

ਰਤ੍ਤਮ੍ਬਰਧਰੋ ਬੁਦ੍ਧੋ, ਗਚ੍ਛਤੇ ਅਨਿਲਞ੍ਜਸੇ.

੧੦੦. ‘‘ਧੁਨਨ੍ਤੋ ਪਂਸੁਕੂਲਾਨਿ, ਸਦ੍ਦਂ ਅਸ੍ਸੋਸਹਂ ਤਦਾ;

ਉਦ੍ਧਂ ਨਿਜ੍ਝਾਯਮਾਨੋਹਂ, ਅਦ੍ਦਸਂ ਲੋਕਨਾਯਕਂ.

੧੦੧. ‘‘ਤਤ੍ਥੇਵ ਠਿਤਕੋ ਸਨ੍ਤੋ, ਆਯਾਚਿਂ ਲੋਕਨਾਯਕਂ;

ਮਧੁਂ ਭਿਸੇਹਿ ਸਹਿਤਂ, ਖੀਰਂ ਸਪ੍ਪਿਂ ਮੁਲ਼ਾਲਿਕਂ [ਮਧੁਂ ਭਿਸੇਹਿ ਪਚਤਿ, ਖੀਰਸਪ੍ਪਿ ਮੁਲਾਲਿਭਿ (ਕ.) ਭਿਸਦਾਯਕਤ੍ਥੇਰਾਪਦਾਨੇਪਿ].

੧੦੨. ‘‘ਪਟਿਗ੍ਗਣ੍ਹਾਤੁ ਮੇ ਬੁਦ੍ਧੋ, ਅਨੁਕਮ੍ਪਾਯ ਚਕ੍ਖੁਮਾ;

ਤਤੋ ਕਾਰੁਣਿਕੋ ਸਤ੍ਥਾ, ਓਰੋਹਿਤ੍ਵਾ ਮਹਾਯਸੋ.

੧੦੩. ‘‘ਪਟਿਗ੍ਗਣ੍ਹਿ ਮਮ ਭਿਕ੍ਖਂ, ਅਨੁਕਮ੍ਪਾਯ ਚਕ੍ਖੁਮਾ;

ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਅਕਾ ਮੇ ਅਨੁਮੋਦਨਂ.

੧੦੪. ‘‘‘ਸੁਖੀ ਹੋਤੁ ਮਹਾਪੁਞ੍ਞ, ਗਤਿ ਤੁਯ੍ਹਂ ਸਮਿਜ੍ਝਤੁ;

ਇਮਿਨਾ ਭਿਸਦਾਨੇਨ, ਲਭਸ੍ਸੁ ਵਿਪੁਲਂ ਸੁਖਂ’.

੧੦੫. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਭਿਕ੍ਖਮਾਦਾਯ ਸਮ੍ਬੁਦ੍ਧੋ, ਆਕਾਸੇਨਾਗਮਾ ਜਿਨੋ.

੧੦੬. ‘‘ਤਤੋ ਭਿਸਂ ਗਹੇਤ੍ਵਾਨ, ਅਗਚ੍ਛਿਂ ਮਮ ਅਸ੍ਸਮਂ;

ਭਿਸਂ ਰੁਕ੍ਖੇ ਲਗ੍ਗੇਤ੍ਵਾਨ, ਮਮ ਦਾਨਂ ਅਨੁਸ੍ਸਰਿਂ.

੧੦੭. ‘‘ਮਹਾਵਾਤੋ ਉਟ੍ਠਹਿਤ੍ਵਾ, ਸਞ੍ਚਾਲੇਸਿ ਵਨਂ ਤਦਾ;

ਆਕਾਸੋ ਅਭਿਨਾਦਿਤ੍ਥ, ਅਸਨੀ ਚ ਫਲੀ ਤਦਾ.

੧੦੮. ‘‘ਤਤੋ ਮੇ ਅਸਨੀਪਾਤੋ, ਮਤ੍ਥਕੇ ਨਿਪਤੀ ਤਦਾ;

ਸੋਹਂ ਨਿਸਿਨ੍ਨਕੋ ਸਨ੍ਤੋ, ਤਤ੍ਥ ਕਾਲਙ੍ਕਤੋ ਅਹਂ.

੧੦੯. ‘‘ਪੁਞ੍ਞਕਮ੍ਮੇਨ ਸਞ੍ਞੁਤ੍ਤੋ, ਤੁਸਿਤਂ ਉਪਪਜ੍ਜਹਂ;

ਕਲ਼ੇਵਰਂ ਮੇ ਪਤਿਤਂ, ਦੇਵਲੋਕੇ ਰਮਾਮਹਂ.

੧੧੦. ‘‘ਛਲ਼ਸੀਤਿਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਸਾਯਂ ਪਾਤਂ ਉਪਟ੍ਠਨ੍ਤਿ, ਭਿਸਦਾਨਸ੍ਸਿਦਂ ਫਲਂ.

੧੧੧. ‘‘ਮਨੁਸ੍ਸਯੋਨਿਮਾਗਨ੍ਤ੍ਵਾ, ਸੁਖਿਤੋ ਹੋਮਹਂ ਤਦਾ;

ਭੋਗਾ ਮੇ ਊਨਤਾ ਨਤ੍ਥਿ, ਭਿਸਦਾਨਸ੍ਸਿਦਂ ਫਲਂ.

੧੧੨. ‘‘ਅਨੁਕਮ੍ਪਿਤਕੋ ਤੇਨ, ਦੇਵਦੇਵੇਨ ਤਾਦਿਨਾ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੧੩. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਭਿਸਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਸਦਾਨਸ੍ਸਿਦਂ ਫਲਂ.

੧੧੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੧੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਭਦ੍ਦਜਿਤ੍ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਭਦ੍ਦਜਿਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.