੧. ਯਸਤ੍ਥੇਰਅਪਦਾਨਂ

੧. ‘‘ਮਹਾਸਮੁਦ੍ਦਂ ਓਗ੍ਗਯ੍ਹ, ਭਵਨਂ ਮੇ ਸੁਨਿਮ੍ਮਿਤਂ;

ਸੁਨਿਮ੍ਮਿਤਾ ਪੋਕ੍ਖਰਣੀ, ਚਕ੍ਕਵਾਕੂਪਕੂਜਿਤਾ.

੨. ‘‘ਮਨ੍ਦਾਰਕੇਹਿ ਸਞ੍ਛਨ੍ਨਾ, ਪਦੁਮੁਪ੍ਪਲਕੇਹਿ ਚ;

ਨਦੀ ਚ ਸਨ੍ਦਤੇ ਤਤ੍ਥ, ਸੁਪਤਿਤ੍ਥਾ ਮਨੋਰਮਾ.

੩. ‘‘ਮਚ੍ਛਕਚ੍ਛਪਸਞ੍ਛਨ੍ਨਾ, ਨਾਨਾਦਿਜਸਮੋਤ੍ਥਟਾ [ਨਾਨਾਮਿਗਸਮੋਤ੍ਥਟਾ (ਸ੍ਯਾ.)];

ਮਯੂਰਕੋਞ੍ਚਾਭਿਰੁਦਾ, ਕੋਕਿਲਾਦੀਹਿ ਵਗ੍ਗੁਹਿ.

੪. ‘‘ਪਾਰੇਵਤਾ ਰਵਿਹਂਸਾ, ਚਕ੍ਕਵਾਕਾ ਨਦੀਚਰਾ;

ਤਿਤ੍ਤਿਰਾ ਸਾਲ਼ਿਕਾ ਚੇਤ੍ਥ, ਪਾਵਕਾ [ਸਮ੍ਬਕਾ (ਕ.)] ਜੀਵਂਜੀਵਕਾ.

੫. ‘‘ਹਂਸਾਕੋਞ੍ਚਾਭਿਨਦਿਤਾ, ਕੋਸਿਯਾ ਪਿਙ੍ਗਲਾ [ਪਿਙ੍ਗਲੀ (ਸੀ.), ਸਿਙ੍ਗਲੀ, ਸਿਙ੍ਘਲੀ (ਕ.)] ਬਹੂ;

ਸਤ੍ਤਰਤਨਸਮ੍ਪਨ੍ਨਾ, ਮਣਿਮੁਤ੍ਤਪਵਾਲ਼ਿਕਾ.

੬. ‘‘ਸਬ੍ਬੇ ਸੋਣ੍ਣਮਯਾ ਰੁਕ੍ਖਾ, ਨਾਨਾਖਨ੍ਧਸਮੇਰਿਤਾ;

ਉਜ੍ਜੋਤੇਨ੍ਤਿ ਦਿਵਾਰਤ੍ਤਿਂ, ਭਵਨਂ ਸਬ੍ਬਕਾਲਿਕਂ.

੭. ‘‘ਸਟ੍ਠਿਤੁਰਿਯਸਹਸ੍ਸਾਨਿ, ਸਾਯਂ ਪਾਤੋ ਪਵਜ੍ਜਰੇ;

ਸੋਲ਼ਸਿਤ੍ਥਿਸਹਸ੍ਸਾਨਿ, ਪਰਿਵਾਰੇਨ੍ਤਿ ਮਂ ਸਦਾ.

੮. ‘‘ਅਭਿਨਿਕ੍ਖਮ੍ਮ ਭਵਨਾ, ਸੁਮੇਧਂ ਲੋਕਨਾਯਕਂ;

ਪਸਨ੍ਨਚਿਤ੍ਤੋ ਸੁਮਨੋ, ਵਨ੍ਦਯਿਂ ਤਂ [ਸਬ੍ਬਦਸ੍ਸਿਂ (ਕ.)] ਮਹਾਯਸਂ.

੯. ‘‘ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਸਸਙ੍ਘਂ ਤਂ ਨਿਮਨ੍ਤਯਿਂ;

ਅਧਿਵਾਸੇਸਿ ਸੋ ਧੀਰੋ, ਸੁਮੇਧੋ ਲੋਕਨਾਯਕੋ.

੧੦. ‘‘ਮਮ ਧਮ੍ਮਕਥਂ ਕਤ੍ਵਾ, ਉਯ੍ਯੋਜੇਸਿ ਮਹਾਮੁਨਿ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਭਵਨਂ ਮੇ ਉਪਾਗਮਿਂ.

੧੧. ‘‘ਆਮਨ੍ਤਯਿਂ ਪਰਿਜਨਂ, ਸਬ੍ਬੇ ਸਨ੍ਨਿਪਤੁਂ ਤਦਾ;

‘ਪੁਬ੍ਬਣ੍ਹਸਮਯਂ ਬੁਦ੍ਧੋ, ਭਵਨਂ ਆਗਮਿਸ੍ਸਤਿ’.

੧੨. ‘‘‘ਲਾਭਾ ਅਮ੍ਹਂ ਸੁਲਦ੍ਧਾ ਨੋ, ਯੇ ਵਸਾਮ ਤਵਨ੍ਤਿਕੇ;

ਮਯਮ੍ਪਿ ਬੁਦ੍ਧਸੇਟ੍ਠਸ੍ਸ, ਪੂਜਯਿਸ੍ਸਾਮ ਸਤ੍ਥੁਨੋ’.

੧੩. ‘‘ਅਨ੍ਨਂ ਪਾਨਂ ਪਟ੍ਠਪੇਤ੍ਵਾ, ਕਾਲਂ ਆਰੋਚਯਿਂ ਅਹਂ;

ਵਸੀਸਤਸਹਸ੍ਸੇਹਿ, ਉਪੇਸਿ ਲੋਕਨਾਯਕੋ.

੧੪. ‘‘ਪਞ੍ਚਙ੍ਗਿਕੇਹਿ ਤੁਰਿਯੇਹਿ, ਪਚ੍ਚੁਗ੍ਗਮਮਕਾਸਹਂ;

ਸਬ੍ਬਸੋਣ੍ਣਮਯੇ ਪੀਠੇ, ਨਿਸੀਦਿ ਪੁਰਿਸੁਤ੍ਤਮੋ.

੧੫. ‘‘ਉਪਰਿਚ੍ਛਦਨਂ ਆਸਿ, ਸਬ੍ਬਸੋਣ੍ਣਮਯਂ ਤਦਾ;

ਬੀਜਨੀਯੋ ਪਵਾਯਨ੍ਤਿ, ਭਿਕ੍ਖੁਸਙ੍ਘਂ ਅਨੁਤ੍ਤਰਂ.

੧੬. ‘‘ਪਹੂਤੇਨਨ੍ਨਪਾਨੇਨ, ਭਿਕ੍ਖੁਸਙ੍ਘਂ ਅਤਪ੍ਪਯਿਂ;

ਪਚ੍ਚੇਕਦੁਸ੍ਸਯੁਗਲੇ, ਭਿਕ੍ਖੁਸਙ੍ਘਸ੍ਸਦਾਸਹਂ.

੧੭. ‘‘ਯਂ ਵਦੇਤਿ ਸੁਮੇਧੋ ਸੋ, ਆਹੁਤੀਨਂ ਪਟਿਗ੍ਗਹੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੧੮. ‘‘‘ਯੋ ਮਂ ਅਨ੍ਨੇਨ ਪਾਨੇਨ, ਸਬ੍ਬੇ ਇਮੇ ਚ ਤਪ੍ਪਯਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੯. ‘‘‘ਅਟ੍ਠਾਰਸੇ ਕਪ੍ਪਸਤੇ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾਯਂ, ਚਕ੍ਕਵਤ੍ਤੀ ਭਵਿਸ੍ਸਤਿ.

੨੦. ‘‘‘ਉਪਗਚ੍ਛਤਿ ਯਂ ਯੋਨਿਂ, ਦੇਵਤ੍ਤਂ ਅਥ ਮਾਨੁਸਂ;

ਸਬ੍ਬਸੋਣ੍ਣਮਯਂ ਤਸ੍ਸ, ਛਦਨਂ ਧਾਰਯਿਸ੍ਸਤਿ.

੨੧. ‘‘‘ਤਿਂਸਕਪ੍ਪਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੨੨. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੨੩. ‘‘‘ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਸੀਹਨਾਦਂ ਨਦਿਸ੍ਸਤਿ’;

ਚਿਤਕੇ ਛਤ੍ਤਂ ਧਾਰੇਨ੍ਤਿ, ਹੇਟ੍ਠਾ ਛਤ੍ਤਮ੍ਹਿ ਡਯ੍ਹਥ.

੨੪. ‘‘ਸਾਮਞ੍ਞਂ ਮੇ ਅਨੁਪ੍ਪਤ੍ਤਂ, ਕਿਲੇਸਾ ਝਾਪਿਤਾ ਮਯਾ;

ਮਣ੍ਡਪੇ ਰੁਕ੍ਖਮੂਲੇ ਵਾ, ਸਨ੍ਤਾਸੋ ਮੇ ਨ ਵਿਜ੍ਜਤਿ.

੨੫. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਬ੍ਬਦਾਨਸ੍ਸਿਦਂ ਫਲਂ.

੨੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੨੭. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੮. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਯਸੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਯਸਤ੍ਥੇਰਸ੍ਸਾਪਦਾਨਂ ਪਠਮਂ.