੧. ਤਿਕਣਿਕਾਰਪੁਪ੍ਫਿਯਤ੍ਥੇਰਅਪਦਾਨਂ

੧. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਬਾਤ੍ਤਿਂਸਵਰਲਕ੍ਖਣੋ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਹਿਮਵਨ੍ਤਮੁਪਾਗਮਿਂ.

੨. ‘‘ਅਜ੍ਝੋਗਯ੍ਹ ਹਿਮਵਨ੍ਤਂ, ਅਗ੍ਗੋ ਕਾਰੁਣਿਕੋ ਮੁਨਿ;

ਪਲ੍ਲਙ੍ਕਮਾਭੁਜਿਤ੍ਵਾਨ, ਨਿਸੀਦਿ ਪੁਰਿਸੁਤ੍ਤਮੋ.

੩. ‘‘ਵਿਜ੍ਜਾਧਰੋ ਤਦਾ ਆਸਿਂ, ਅਨ੍ਤਲਿਕ੍ਖਚਰੋ ਅਹਂ;

ਤਿਸੂਲਂ ਸੁਕਤਂ ਗਯ੍ਹ, ਗਚ੍ਛਾਮਿ ਅਮ੍ਬਰੇ ਤਦਾ.

੪. ‘‘ਪਬ੍ਬਤਗ੍ਗੇ ਯਥਾ ਅਗ੍ਗਿ, ਪੁਣ੍ਣਮਾਯੇਵ ਚਨ੍ਦਿਮਾ;

ਵਨੇ ਓਭਾਸਤੇ ਬੁਦ੍ਧੋ, ਸਾਲਰਾਜਾਵ ਫੁਲ੍ਲਿਤੋ.

੫. ‘‘ਵਨਗ੍ਗਾ ਨਿਕ੍ਖਮਿਤ੍ਵਾਨ, ਬੁਦ੍ਧਰਂਸੀਭਿਧਾਵਰੇ;

ਨਲ਼ਗ੍ਗਿਵਣ੍ਣਸਙ੍ਕਾਸਾ, ਦਿਸ੍ਵਾ ਚਿਤ੍ਤਂ ਪਸਾਦਯਿਂ.

੬. ‘‘ਵਿਚਿਨਂ ਅਦ੍ਦਸਂ ਪੁਪ੍ਫਂ, ਕਣਿਕਾਰਂ ਦੇਵਗਨ੍ਧਿਕਂ;

ਤੀਣਿ ਪੁਪ੍ਫਾਨਿ ਆਦਾਯ, ਬੁਦ੍ਧਸੇਟ੍ਠਮਪੂਜਯਿਂ.

੭. ‘‘ਬੁਦ੍ਧਸ੍ਸ ਆਨੁਭਾਵੇਨ, ਤੀਣਿ ਪੁਪ੍ਫਾਨਿ ਮੇ ਤਦਾ;

ਉਦ੍ਧਂਵਣ੍ਟਾ ਅਧੋਪਤ੍ਤਾ, ਛਾਯਂ ਕੁਬ੍ਬਨ੍ਤਿ ਸਤ੍ਥੁਨੋ.

੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੯. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਕਣਿਕਾਰੀਤਿ ਞਾਯਤਿ;

ਸਟ੍ਠਿਯੋਜਨਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

੧੦. ‘‘ਸਹਸ੍ਸਕਣ੍ਡਂ ਸਤਭੇਣ੍ਡੁ [ਸਤਗੇਣ੍ਡੁ (ਸ੍ਯਾ.)], ਧਜਾਲੁਹਰਿਤਾਮਯਂ;

ਸਤਸਹਸ੍ਸਨਿਯ੍ਯੂਹਾ, ਬ੍ਯਮ੍ਹੇ ਪਾਤੁਭਵਿਂਸੁ ਮੇ.

੧੧. ‘‘ਸੋਣ੍ਣਮਯਾ ਮਣਿਮਯਾ, ਲੋਹਿਤਙ੍ਗਮਯਾਪਿ ਚ;

ਫਲਿਕਾਪਿ ਚ ਪਲ੍ਲਙ੍ਕਾ, ਯੇਨਿਚ੍ਛਕਾ ਯਦਿਚ੍ਛਕਾ [ਯੇਨਿਚ੍ਛਯਾ ਯਦਿਚ੍ਛਕਂ (ਸ੍ਯਾ.), ਯਦਿਚ੍ਛਕਾਯਦਿਚ੍ਛਕਾ (ਕ.)].

੧੨. ‘‘ਮਹਾਰਹਞ੍ਚ ਸਯਨਂ, ਤੂਲਿਕਾਵਿਕਤੀਯੁਤਂ;

ਉਦ੍ਧਲੋਮਿਕਏਕਨ੍ਤਂ, ਬਿਮ੍ਬੋਹਨਸਮਾਯੁਤਂ [ਬਿਬ੍ਬੋਹਨਸਮਾਯੁਤਂ… (ਸ੍ਯਾ. ਕ.)].

੧੩. ‘‘ਭਵਨਾ ਨਿਕ੍ਖਮਿਤ੍ਵਾਨ, ਚਰਨ੍ਤੋ ਦੇਵਚਾਰਿਕਂ;

ਯਦਾ ਇਚ੍ਛਾਮਿ ਗਮਨਂ, ਦੇਵਸਙ੍ਘਪੁਰਕ੍ਖਤੋ.

੧੪. ‘‘ਪੁਪ੍ਫਸ੍ਸ ਹੇਟ੍ਠਾ ਤਿਟ੍ਠਾਮਿ, ਉਪਰਿਚ੍ਛਦਨਂ ਮਮ;

ਸਮਨ੍ਤਾ ਯੋਜਨਸਤਂ, ਕਣਿਕਾਰੇਹਿ ਛਾਦਿਤਂ.

੧੫. ‘‘ਸਟ੍ਠਿਤੁਰਿਯਸਹਸ੍ਸਾਨਿ, ਸਾਯਪਾਤਮੁਪਟ੍ਠਹੁਂ;

ਪਰਿਵਾਰੇਨ੍ਤਿ ਮਂ ਨਿਚ੍ਚਂ, ਰਤ੍ਤਿਨ੍ਦਿਵਮਤਨ੍ਦਿਤਾ.

੧੬. ‘‘ਤਤ੍ਥ ਨਚ੍ਚੇਹਿ ਗੀਤੇਹਿ, ਤਾਲ਼ੇਹਿ ਵਾਦਿਤੇਹਿ ਚ;

ਰਮਾਮਿ ਖਿਡ੍ਡਾਰਤਿਯਾ, ਮੋਦਾਮਿ ਕਾਮਕਾਮਿਹਂ.

੧੭. ‘‘ਤਤ੍ਥ ਭੁਤ੍ਵਾ ਪਿਵਿਤ੍ਵਾ ਚ, ਮੋਦਾਮਿ ਤਿਦਸੇ ਤਦਾ;

ਨਾਰੀਗਣੇਹਿ ਸਹਿਤੋ, ਮੋਦਾਮਿ ਬ੍ਯਮ੍ਹਮੁਤ੍ਤਮੇ.

੧੮. ‘‘ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ;

ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੯. ‘‘ਭਵਾਭਵੇ ਸਂਸਰਨ੍ਤੋ, ਮਹਾਭੋਗਂ ਲਭਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਬੁਦ੍ਧਪੂਜਾਯਿਦਂ ਫਲਂ.

੨੦. ‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞਂ ਗਤਿਂ ਨ ਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੧. ‘‘ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਚਾਪਿ ਬ੍ਰਾਹ੍ਮਣੇ;

ਨੀਚੇ ਕੁਲੇ ਨ ਜਾਯਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੨. ‘‘ਹਤ੍ਥਿਯਾਨਂ ਅਸ੍ਸਯਾਨਂ, ਸਿਵਿਕਂ ਸਨ੍ਦਮਾਨਿਕਂ;