੧. ਜਗਤਿਦਾਯਕਤ੍ਥੇਰਅਪਦਾਨਂ

੧. ‘‘ਧਮ੍ਮਦਸ੍ਸਿਸ੍ਸ ਮੁਨਿਨੋ, ਬੋਧਿਯਾ ਪਾਦਪੁਤ੍ਤਮੇ;

ਪਸਨ੍ਨਚਿਤ੍ਤੋ ਸੁਮਨੋ, ਜਗਤਿਂ ਕਾਰਯਿਂ ਅਹਂ.

੨. ‘‘ਦਰਿਤੋ ਪਬ੍ਬਤਤੋ ਵਾ, ਰੁਕ੍ਖਤੋ ਪਤਿਤੋ ਅਹਂ;

ਚੁਤੋ ਪਤਿਟ੍ਠਂ ਵਿਨ੍ਦਾਮਿ, ਜਗਤਿਯਾ ਇਦਂ ਫਲਂ.

੩. ‘‘ਨ ਮੇ ਚੋਰਾ ਵਿਹੇਸਨ੍ਤਿ, ਨਾਤਿਮਞ੍ਞਨ੍ਤਿ ਖਤ੍ਤਿਯਾ [ਪਸਹਨ੍ਤਿ, ਨਾਤਿਮਞ੍ਞਤਿ ਖਤ੍ਤਿਯੋ (ਸੀ. ਪੀ.)];

ਸਬ੍ਬਾਮਿਤ੍ਤੇਤਿਕ੍ਕਮਾਮਿ, ਜਗਤਿਯਾ ਇਦਂ ਫਲਂ.

੪. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਸਬ੍ਬਤ੍ਥ ਪੂਜਿਤੋ ਹੋਮਿ, ਜਗਤਿਯਾ ਇਦਂ ਫਲਂ.

੫. ‘‘ਅਟ੍ਠਾਰਸੇ ਕਪ੍ਪਸਤੇ, ਜਗਤਿਂ ਕਾਰਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਜਗਤਿਦਾਨਸ੍ਸਿਦਂ ਫਲਂ.

੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੭. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੮. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਜਗਤਿਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਜਗਤਿਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.