੧. ਕੁਣ੍ਡਧਾਨਤ੍ਥੇਰਅਪਦਾਨਂ

੧. ‘‘ਸਤ੍ਤਾਹਂ ਪਟਿਸਲ੍ਲੀਨਂ, ਸਯਮ੍ਭੁਂ ਅਗ੍ਗਪੁਗ੍ਗਲਂ;

ਪਸਨ੍ਨਚਿਤ੍ਤੋ ਸੁਮਨੋ, ਬੁਦ੍ਧਸੇਟ੍ਠਂ ਉਪਟ੍ਠਹਿਂ.

੨. ‘‘ਵੁਟ੍ਠਿਤਂ ਕਾਲਮਞ੍ਞਾਯ, ਪਦੁਮੁਤ੍ਤਰਂ ਮਹਾਮੁਨਿਂ;

ਮਹਨ੍ਤਿਂ ਕਦਲੀਕਣ੍ਣਿਂ, ਗਹੇਤ੍ਵਾ ਉਪਗਚ੍ਛਹਂ.

੩. ‘‘ਪਟਿਗ੍ਗਹੇਤ੍ਵਾ [ਪਟਿਗ੍ਗਹੇਸਿ (ਸ੍ਯਾ. ਕ.)] ਭਗਵਾ, ਸਬ੍ਬਞ੍ਞੂ [ਤਂ ਫਲਂ (ਸੀ.)] ਲੋਕਨਾਯਕੋ;

ਮਮ ਚਿਤ੍ਤਂ ਪਸਾਦੇਨ੍ਤੋ, ਪਰਿਭੁਞ੍ਜਿ ਮਹਾਮੁਨਿ.

੪. ‘‘ਪਰਿਭੁਞ੍ਜਿਤ੍ਵਾ ਸਮ੍ਬੁਦ੍ਧੋ, ਸਤ੍ਥਵਾਹੋ ਅਨੁਤ੍ਤਰੋ;

ਸਕਾਸਨੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੫. ‘‘‘ਯੇ ਚ ਸਨ੍ਤਿ ਸਮਿਤਾਰੋ [ਯੇ ਵਸਨ੍ਤਿ ਸਮੇਤਾਰੋ (ਸੀ.)], ਯਕ੍ਖਾ ਇਮਮ੍ਹਿ ਪਬ੍ਬਤੇ;

ਅਰਞ੍ਞੇ ਭੂਤਭਬ੍ਯਾਨਿ [ਭੂਤਗਣਾ ਸਬ੍ਬੇ (ਸ੍ਯਾ.)], ਸੁਣਨ੍ਤੁ ਵਚਨਂ ਮਮ’.

੬. ‘‘ਯੋ ਸੋ ਬੁਦ੍ਧਂ ਉਪਟ੍ਠਾਸਿ, ਮਿਗਰਾਜਂਵ ਕੇਸਰਿਂ [ਮਿਗਰਾਜਾਵ ਕੇਸਰੀ (ਸੀ.)];

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੭. ‘‘‘ਏਕਾਦਸਞ੍ਚਕ੍ਖਤ੍ਤੁਂ, ਸੋ [ਸੋਯਮੇਕਾਦਸਕ੍ਖਤ੍ਤੁਂ (ਸੀ.)] ਦੇਵਰਾਜਾ ਭਵਿਸ੍ਸਤਿ;

ਚਤੁਤਿਂਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੮. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੯. ‘‘‘ਅਕ੍ਕੋਸਿਤ੍ਵਾਨ ਸਮਣੇ, ਸੀਲਵਨ੍ਤੇ ਅਨਾਸਵੇ;

ਪਾਪਕਮ੍ਮਵਿਪਾਕੇਨ, ਨਾਮਧੇਯ੍ਯਂ ਲਭਿਸ੍ਸਤਿ [ਭਵਿਸ੍ਸਤਿ (ਕ.)].

੧੦. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕੁਣ੍ਡਧਾਨੋਤਿ ਨਾਮੇਨ, ਸਾਵਕੋ ਸੋ ਭਵਿਸ੍ਸਤਿ’.

੧੧. ‘‘ਪਵਿਵੇਕਮਨੁਯੁਤ੍ਤੋ, ਝਾਯੀ ਝਾਨਰਤੋ ਅਹਂ;

ਤੋਸਯਿਤ੍ਵਾਨ ਸਤ੍ਥਾਰਂ, ਵਿਹਰਾਮਿ ਅਨਾਸਵੋ.

੧੨. ‘‘ਸਾਵਕੇਹਿ [ਸਾਵਕਗ੍ਗੇਹਿ (ਸੀ.)] ਪਰਿਵੁਤੋ, ਭਿਕ੍ਖੁਸਙ੍ਘਪੁਰਕ੍ਖਤੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਸਲਾਕਂ ਗਾਹਯੀ ਜਿਨੋ.

੧੩. ‘‘ਏਕਂਸਂ ਚੀਵਰਂ ਕਤ੍ਵਾ, ਵਨ੍ਦਿਤ੍ਵਾ ਲੋਕਨਾਯਕਂ;

ਵਦਤਂ ਵਰਸ੍ਸ ਪੁਰਤੋ, ਪਠਮਂ ਅਗ੍ਗਹੇਸਹਂ.

੧੪. ‘‘ਤੇਨ ਕਮ੍ਮੇਨ ਭਗਵਾ, ਦਸਸਹਸ੍ਸੀਕਮ੍ਪਕੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਅਗ੍ਗਟ੍ਠਾਨੇ ਠਪੇਸਿ ਮਂ.

੧੫. ‘‘ਵੀਰਿਯਂ ਮੇ ਧੁਰਧੋਰਯ੍ਹਂ, ਯੋਗਕ੍ਖੇਮਾਧਿਵਾਹਨਂ;

ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.

੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕੁਣ੍ਡਧਾਨੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕੁਣ੍ਡਧਾਨਤ੍ਥੇਰਸ੍ਸਾਪਦਾਨਂ ਪਠਮਂ.