੯. ਸੁਕਤਾਵੇਲ਼ਿਯਤ੍ਥੇਰਅਪਦਾਨਂ

੪੩. ‘‘ਅਸਿਤੋ ਨਾਮ ਨਾਮੇਨ, ਮਾਲਾਕਾਰੋ ਅਹਂ [ਅਹੁਂ (?)] ਤਦਾ;

ਆਵੇਲ਼ਂ ਪਗ੍ਗਹੇਤ੍ਵਾਨ, ਰਞ੍ਞੋ ਦਾਤੁਂ ਵਜਾਮਹਂ.

੪੪. ‘‘ਅਸਮ੍ਪਤ੍ਤੋਮ੍ਹਿ [ਅਸਮ੍ਪਤ੍ਤਮ੍ਹਿ (ਸੀ.), ਅਸਮ੍ਪਤ੍ਤੋਵ (?)] ਰਾਜਾਨਂ, ਅਦ੍ਦਸਂ ਸਿਖਿਨਾਯਕਂ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਬੁਦ੍ਧਸ੍ਸ ਅਭਿਰੋਪਯਿਂ.

੪੫. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪੬. ‘‘ਪਞ੍ਚਵੀਸੇ ਇਤੋ ਕਪ੍ਪੇ, ਰਾਜਾਹੋਸਿਂ ਮਹਬ੍ਬਲੋ;

ਵੇਭਾਰੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਕਤਾਵੇਲ਼ਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਕਤਾਵੇਲ਼ਿਯਤ੍ਥੇਰਸ੍ਸਾਪਦਾਨਂ ਨਵਮਂ.