੬. ਅਙ੍ਕੋਲਪੁਪ੍ਫਿਯਤ੍ਥੇਰਅਪਦਾਨਂ

੨੯. ‘‘ਨਾਰਦੋ [ਵਰਦੋ (ਕ.)] ਇਤਿ ਮੇ ਨਾਮਂ, ਕਸ੍ਸਪੋ ਇਤਿ ਮਂ ਵਿਦੂ;

ਅਦ੍ਦਸਂ ਸਮਣਾਨਗ੍ਗਂ, ਵਿਪਸ੍ਸਿਂ ਦੇਵਸਕ੍ਕਤਂ.

੩੦. ‘‘ਅਨੁਬ੍ਯਞ੍ਜਨਧਰਂ ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਅਙ੍ਕੋਲਪੁਪ੍ਫਂ [ਵਕੁਲਪੁਪ੍ਫਂ (ਸ੍ਯਾ.), ਬਕੋਲਪੁਪ੍ਫਂ (ਕ.)] ਪਗ੍ਗਯ੍ਹ, ਬੁਦ੍ਧਸ੍ਸ ਅਭਿਰੋਪਯਿਂ.

੩੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੨. ‘‘ਚਤੁਸਤ੍ਤਤਿਤੋ ਕਪ੍ਪੇ, ਰੋਮਸੋ ਨਾਮ ਖਤ੍ਤਿਯੋ;

ਆਮੁਕ੍ਕਮਾਲਾਭਰਣੋ, ਸਯੋਗ੍ਗਬਲਵਾਹਨੋ.

੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਙ੍ਕੋਲਪੁਪ੍ਫਿਯੋ [ਵਕੁਲਪੁਪ੍ਫਿਯੋ (ਸ੍ਯਾ.), ਬਕੋਲਪੁਪ੍ਫਿਯੋ (ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਙ੍ਕੋਲਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.