੧੫. ਛਤ੍ਤਵਗ੍ਗੋ
੧. ਅਤਿਛਤ੍ਤਿਯਤ੍ਥੇਰਅਪਦਾਨਂ
੧. ‘‘ਪਰਿਨਿਬ੍ਬੁਤੇ ਭਗਵਤਿ, ਅਤ੍ਥਦਸ੍ਸੀਨਰੁਤ੍ਤਮੇ;
ਛਤ੍ਤਾਤਿਛਤ੍ਤਂ [ਛਤ੍ਤਾਧਿਛਤ੍ਤਂ (ਸੀ.)] ਕਾਰੇਤ੍ਵਾ, ਥੂਪਮ੍ਹਿ ਅਭਿਰੋਪਯਿਂ.
੨. ‘‘ਕਾਲੇਨ ਕਾਲਮਾਗਨ੍ਤ੍ਵਾ, ਨਮਸ੍ਸਿਂ ਲੋਕਨਾਯਕਂ [ਸਤ੍ਥੁ ਚੇਤਿਯਂ (ਸੀ.)];
ਪੁਪ੍ਫਚ੍ਛਦਨਂ ਕਤ੍ਵਾਨ, ਛਤ੍ਤਮ੍ਹਿ ਅਭਿਰੋਪਯਿਂ.
੩. ‘‘ਸਤ੍ਤਰਸੇ ਕਪ੍ਪਸਤੇ, ਦੇਵਰਜ੍ਜਮਕਾਰਯਿਂ;
ਮਨੁਸ੍ਸਤ੍ਤਂ ਨ ਗਚ੍ਛਾਮਿ, ਥੂਪਪੂਜਾਯਿਦਂ ਫਲਂ.
੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਤਿਛਤ੍ਤਿਯੋ [ਅਧਿਛਤ੍ਤਿਯੋ (ਸੀ. ਸ੍ਯਾ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਅਤਿਛਤ੍ਤਿਯਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਥਮ੍ਭਾਰੋਪਕਤ੍ਥੇਰਅਪਦਾਨਂ
੫. ‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਧਮ੍ਮਦਸ੍ਸੀਨਰਾਸਭੇ;
ਆਰੋਪੇਸਿਂ ਧਜਤ੍ਥਮ੍ਭਂ, ਬੁਦ੍ਧਸੇਟ੍ਠਸ੍ਸ ਚੇਤਿਯੇ.
੬. ‘‘ਨਿਸ੍ਸੇਣਿਂ ਮਾਪਯਿਤ੍ਵਾਨ, ਥੂਪਸੇਟ੍ਠਂ ਸਮਾਰੁਹਿਂ;
ਜਾਤਿਪੁਪ੍ਫਂ ਗਹੇਤ੍ਵਾਨ, ਥੂਪਮ੍ਹਿ ਅਭਿਰੋਪਯਿਂ.
੭. ‘‘ਅਹੋ ਬੁਦ੍ਧੋ ਅਹੋ ਧਮ੍ਮੋ, ਅਹੋ ਨੋ ਸਤ੍ਥੁ ਸਮ੍ਪਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਥੂਪਪੂਜਾਯਿਦਂ ਫਲਂ.
੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਥੂਪਸੀਖਸਨਾਮਕਾ;
ਸੋਲ਼ਸਾਸਿਂਸੁ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.
੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਥਮ੍ਭਾਰੋਪਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਥਮ੍ਭਾਰੋਪਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਵੇਦਿਕਾਰਕਤ੍ਥੇਰਅਪਦਾਨਂ
੧੦. ‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਪਿਯਦਸ੍ਸੀਨਰੁਤ੍ਤਮੇ;
ਪਸਨ੍ਨਚਿਤ੍ਤੋ ਸੁਮਨੋ, ਮੁਤ੍ਤਾਵੇਦਿਮਕਾਸਹਂ.
੧੧. ‘‘ਮਣੀਹਿ ਪਰਿਵਾਰੇਤ੍ਵਾ, ਅਕਾਸਿਂ ਵੇਦਿਮੁਤ੍ਤਮਂ;
ਵੇਦਿਕਾਯ ਮਹਂ ਕਤ੍ਵਾ, ਤਤ੍ਥ ਕਾਲਙ੍ਕਤੋ ਅਹਂ.
੧੨. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;
ਮਣੀ ਧਾਰੇਨ੍ਤਿ ਆਕਾਸੇ, ਪੁਞ੍ਞਕਮ੍ਮਸ੍ਸਿਦਂ ਫਲਂ.
੧੩. ‘‘ਸੋਲ਼ਸਿਤੋ ਕਪ੍ਪਸਤੇ, ਮਣਿਪ੍ਪਭਾਸਨਾਮਕਾ;
ਛਤ੍ਤਿਂਸਾਸਿਂਸੁ [ਬਾਤ੍ਤਿਂਸਾਸਿਂਸੁ (ਸੀ. ਸ੍ਯਾ.)] ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.
੧੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਵੇਦਿਕਾਰਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਵੇਦਿਕਾਰਕਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਸਪਰਿਵਾਰਿਯਤ੍ਥੇਰਅਪਦਾਨਂ
੧੫. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਲੋਕਜੇਟ੍ਠੋ ਨਰਾਸਭੋ;
ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ, ਸਮ੍ਬੁਦ੍ਧੋ ਪਰਿਨਿਬ੍ਬੁਤੋ.
੧੬. ‘‘ਨਿਬ੍ਬੁਤੇ ਚ ਮਹਾਵੀਰੇ, ਥੂਪੋ ਵਿਤ੍ਥਾਰਿਕੋ ਅਹੁ;
ਦੂਰਤੋਵ [ਅਹੋਰਤ੍ਤਂ (ਸੀ.), ਥੂਪਦਤ੍ਤਂ (ਸ੍ਯਾ.)] ਉਪਟ੍ਠੇਨ੍ਤਿ, ਧਾਤੁਗੇਹਵਰੁਤ੍ਤਮੇ.
੧੭. ‘‘ਪਸਨ੍ਨਚਿਤ੍ਤੋ ਸੁਮਨੋ, ਅਕਂ ਚਨ੍ਦਨਵੇਦਿਕਂ;
ਦਿਸ੍ਸਤਿ ਥੂਪਖਨ੍ਧੋ ਚ [ਦੀਯਤਿ ਧੂਮਕ੍ਖਨ੍ਧੋ ਚ (ਸੀ.), ਦੀਯਤਿ ਧੂਪਗਨ੍ਧੋ ਚ (ਸ੍ਯਾ.)], ਥੂਪਾਨੁਚ੍ਛਵਿਕੋ ਤਦਾ.
੧੮. ‘‘ਭਵੇ ਨਿਬ੍ਬਤ੍ਤਮਾਨਮ੍ਹਿ, ਦੇਵਤ੍ਤੇ ਅਥ ਮਾਨੁਸੇ;
ਓਮਤ੍ਤਂ ਮੇ ਨ ਪਸ੍ਸਾਮਿ, ਪੁਬ੍ਬਕਮ੍ਮਸ੍ਸਿਦਂ ਫਲਂ.
੧੯. ‘‘ਪਞ੍ਚਦਸਕਪ੍ਪਸਤੇ, ਇਤੋ ਅਟ੍ਠ ਜਨਾ ਅਹੁਂ;
ਸਬ੍ਬੇ ਸਮਤ੍ਤਨਾਮਾ ਤੇ, ਚਕ੍ਕਵਤ੍ਤੀ ਮਹਬ੍ਬਲਾ.
੨੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਪਰਿਵਾਰਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਪਰਿਵਾਰਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਉਮਾਪੁਪ੍ਫਿਯਤ੍ਥੇਰਅਪਦਾਨਂ
੨੧. ‘‘ਨਿਬ੍ਬੁਤੇ ਲੋਕਮਹਿਤੇ [ਲੋਕਨਾਥਮ੍ਹਿ (ਸੀ.)], ਆਹੁਤੀਨਂ ਪਟਿਗ੍ਗਹੇ;
ਸਿਦ੍ਧਤ੍ਥਮ੍ਹਿ ਭਗਵਤਿ, ਮਹਾਥੂਪਮਹੋ ਅਹੁ.
੨੨. ‘‘ਮਹੇ ਪਵਤ੍ਤਮਾਨਮ੍ਹਿ, ਸਿਦ੍ਧਤ੍ਥਸ੍ਸ ਮਹੇਸਿਨੋ;
ਉਮਾਪੁਪ੍ਫਂ [ਉਮ੍ਮਾਪੁਪ੍ਫਂ (ਸਬ੍ਬਤ੍ਥ)] ਗਹੇਤ੍ਵਾਨ, ਥੂਪਮ੍ਹਿ ਅਭਿਰੋਪਯਿਂ.
੨੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਥੂਪਪੂਜਾਯਿਦਂ [ਪੁਪ੍ਫਪੂਜਾਯਿਦਂ (ਸ੍ਯਾ.), ਬੁਦ੍ਧਪੂਜਾਯਿਦਂ (ਕ.)] ਫਲਂ.
੨੪. ‘‘ਇਤੋ ਚ ਨਵਮੇ ਕਪ੍ਪੇ, ਸੋਮਦੇਵਸਨਾਮਕਾ;
ਪਞ੍ਚਾਸੀਤਿਸੁ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.
੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਉਮਾਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਉਮਾਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਅਨੁਲੇਪਦਾਯਕਤ੍ਥੇਰਅਪਦਾਨਂ
੨੬. ‘‘ਅਨੋਮਦਸ੍ਸੀਮੁਨਿਨੋ, ਬੋਧਿਵੇਦਿਮਕਾਸਹਂ;
ਸੁਧਾਯ ਪਿਣ੍ਡਂ ਦਤ੍ਵਾਨ, ਪਾਣਿਕਮ੍ਮਂ ਅਕਾਸਹਂ.
੨੭. ‘‘ਦਿਸ੍ਵਾ ਤਂ ਸੁਕਤਂ ਕਮ੍ਮਂ, ਅਨੋਮਦਸ੍ਸੀ ਨਰੁਤ੍ਤਮੋ;
ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਂ ਗਾਥਂ ਅਭਾਸਥ.
੨੮. ‘‘‘ਇਮਿਨਾ ਸੁਧਕਮ੍ਮੇਨ, ਚੇਤਨਾਪਣਿਧੀਹਿ ਚ;
ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤਿ’.
੨੯. ‘‘ਪਸਨ੍ਨਮੁਖਵਣ੍ਣੋਮ੍ਹਿ, ਏਕਗ੍ਗੋ ਸੁਸਮਾਹਿਤੋ;
ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.
੩੦. ‘‘ਇਤੋ ਕਪ੍ਪਸਤੇ ਆਸਿਂ, ਪਰਿਪੁਣ੍ਣੇ ਅਨੂਨਕੇ [ਪਰਿਪੁਣ੍ਣੋ ਅਨੂਨਕੋ (ਸ੍ਯਾ.)];
ਰਾਜਾ ਸਬ੍ਬਘਨੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.
੩੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਨੁਲੇਪਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਅਨੁਲੇਪਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਮਗ੍ਗਦਾਯਕਤ੍ਥੇਰਅਪਦਾਨਂ
੩੨. ‘‘ਉਤ੍ਤਰਿਤ੍ਵਾਨ ਨਦਿਕਂ, ਵਨਂ ਗਚ੍ਛਤਿ ਚਕ੍ਖੁਮਾ;
ਤਮਦ੍ਦਸਾਸਿਂ ਸਮ੍ਬੁਦ੍ਧਂ, ਸਿਦ੍ਧਤ੍ਥਂ ਵਰਲਕ੍ਖਣਂ.
੩੩. ‘‘ਕੁਦਾਲ [ਕੁਦ੍ਦਾਲ (ਸੀ. ਸ੍ਯਾ.)] ਪਿਟਕਮਾਦਾਯ, ਸਮਂ ਕਤ੍ਵਾਨ ਤਂ ਪਥਂ;
ਸਤ੍ਥਾਰਂ ਅਭਿਵਾਦੇਤ੍ਵਾ, ਸਕਂ ਚਿਤ੍ਤਂ ਪਸਾਦਯਿਂ.
੩੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਮਗ੍ਗਦਾਨਸ੍ਸਿਦਂ ਫਲਂ.
੩੫. ‘‘ਸਤ੍ਤਪਞ੍ਞਾਸਕਪ੍ਪਮ੍ਹਿ, ਏਕੋ ਆਸਿਂ ਜਨਾਧਿਪੋ;
ਨਾਮੇਨ ਸੁਪ੍ਪਬੁਦ੍ਧੋਤਿ, ਨਾਯਕੋ ਸੋ ਨਰਿਸ੍ਸਰੋ.
੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਮਗ੍ਗਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਮਗ੍ਗਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਫਲਕਦਾਯਕਤ੍ਥੇਰਅਪਦਾਨਂ
੩੭. ‘‘ਯਾਨਕਾਰੋ ਪੁਰੇ ਆਸਿਂ, ਦਾਰੁਕਮ੍ਮੇ ਸੁਸਿਕ੍ਖਿਤੋ;
ਚਨ੍ਦਨਂ ਫਲਕਂ ਕਤ੍ਵਾ, ਅਦਾਸਿਂ ਲੋਕਬਨ੍ਧੁਨੋ.
੩੮. ‘‘ਪਭਾਸਤਿ ਇਦਂ ਬ੍ਯਮ੍ਹਂ, ਸੁਵਣ੍ਣਸ੍ਸ ਸੁਨਿਮ੍ਮਿਤਂ;
ਹਤ੍ਥਿਯਾਨਂ ਅਸ੍ਸਯਾਨਂ, ਦਿਬ੍ਬਯਾਨਂ ਉਪਟ੍ਠਿਤਂ.
੩੯. ‘‘ਪਾਸਾਦਾ ਸਿਵਿਕਾ ਚੇਵ, ਨਿਬ੍ਬਤ੍ਤਨ੍ਤਿ ਯਦਿਚ੍ਛਕਂ;
ਅਕ੍ਖੁਬ੍ਭਂ [ਅਕ੍ਖੋਭਂ (ਸੀ.)] ਰਤਨਂ ਮਯ੍ਹਂ, ਫਲਕਸ੍ਸ ਇਦਂ ਫਲਂ.
੪੦. ‘‘ਏਕਨਵੁਤਿਤੋ ਕਪ੍ਪੇ, ਫਲਕਂ ਯਮਹਂ ਦਦਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਫਲਕਸ੍ਸ ਇਦਂ ਫਲਂ.
੪੧. ‘‘ਸਤ੍ਤਪਞ੍ਞਾਸਕਪ੍ਪਮ੍ਹਿ, ਚਤੁਰੋ ਨਿਮ੍ਮਿਤਾਵ੍ਹਯਾ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਫਲਕਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਫਲਕਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਵਟਂਸਕਿਯਤ੍ਥੇਰਅਪਦਾਨਂ
੪੩. ‘‘ਸੁਮੇਧੋ ਨਾਮ ਨਾਮੇਨ, ਸਯਮ੍ਭੂ ਅਪਰਾਜਿਤੋ;
ਵਿਵੇਕਮਨੁਬ੍ਰੂਹਨ੍ਤੋ, ਅਜ੍ਝੋਗਹਿ ਮਹਾਵਨਂ.
੪੪. ‘‘ਸਲ਼ਲਂ ਪੁਪ੍ਫਿਤਂ ਦਿਸ੍ਵਾ, ਗਨ੍ਥਿਤ੍ਵਾਨ [ਬਨ੍ਧਿਤ੍ਵਾਨ (ਸੀ.)] ਵਟਂਸਕਂ;
ਬੁਦ੍ਧਸ੍ਸ ਅਭਿਰੋਪੇਸਿਂ, ਸਮ੍ਮੁਖਾ ਲੋਕਨਾਯਕਂ.
੪੫. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੪੬. ‘‘ਊਨਵੀਸੇ ਕਪ੍ਪਸਤੇ, ਸੋਲ਼ਸਾਸੁਂ ਸੁਨਿਮ੍ਮਿਤਾ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਵਟਂਸਕਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਵਟਂਸਕਿਯਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਪਲ੍ਲਙ੍ਕਦਾਯਕਤ੍ਥੇਰਅਪਦਾਨਂ
੪੮. ‘‘ਸੁਮੇਧਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;
ਪਲ੍ਲਙ੍ਕੋ ਹਿ ਮਯਾ ਦਿਨ੍ਨੋ, ਸਉਤ੍ਤਰਸਪਚ੍ਛਦੋ.
੪੯. ‘‘ਸਤ੍ਤਰਤਨਸਮ੍ਪਨ੍ਨੋ, ਪਲ੍ਲਙ੍ਕੋ ਆਸਿ ਸੋ ਤਦਾ;
ਮਮ ਸਙ੍ਕਪ੍ਪਮਞ੍ਞਾਯ, ਨਿਬ੍ਬਤ੍ਤਤਿ ਸਦਾ ਮਮ.
੫੦. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਪਲ੍ਲਙ੍ਕਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਲ੍ਲਙ੍ਕਸ੍ਸ ਇਦਂ ਫਲਂ.
੫੧. ‘‘ਵੀਸਕਪ੍ਪਸਹਸ੍ਸਮ੍ਹਿ, ਸੁਵਣ੍ਣਾਭਾ ਤਯੋ ਜਨਾ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੫੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਲ੍ਲਙ੍ਕਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪਲ੍ਲਙ੍ਕਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.
ਛਤ੍ਤਵਗ੍ਗੋ ਪਨ੍ਨਰਸਮੋ.