੮. ਞਾਣਸਞ੍ਞਿਕਤ੍ਥੇਰਅਪਦਾਨਂ

੮੪. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਵਸਾਮਿ ਪਬ੍ਬਤਨ੍ਤਰੇ;

ਪੁਲਿਨਂ ਸੋਭਨਂ ਦਿਸ੍ਵਾ, ਬੁਦ੍ਧਸੇਟ੍ਠਂ ਅਨੁਸ੍ਸਰਿਂ.

੮੫. ‘‘ਞਾਣੇ ਉਪਨਿਧਾ ਨਤ੍ਥਿ, ਸਙ੍ਖਾਰਂ [ਸਙ੍ਗਾਮਂ (ਸੀ. ਸ੍ਯਾ.), ਸਙ੍ਖਾਤਂ (ਥੇਰਗਾਥਾ ਅਟ੍ਠ.)] ਨਤ੍ਥਿ ਸਤ੍ਥੁਨੋ;

ਸਬ੍ਬਧਮ੍ਮਂ ਅਭਿਞ੍ਞਾਯ, ਞਾਣੇਨ ਅਧਿਮੁਚ੍ਚਤਿ.

੮੬. ‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਞਾਣੇਨ ਤੇ ਸਮੋ ਨਤ੍ਥਿ, ਯਾਵਤਾ ਞਾਣਮੁਤ੍ਤਮਂ.

੮੭. ‘‘ਞਾਣੇ ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ;

ਅਵਸੇਸੇਸੁ ਕਪ੍ਪੇਸੁ, ਕੁਸਲਂ ਚਰਿਤਂ [ਕਰਿਤਂ (ਸੀ. ਸ੍ਯਾ.), ਕਿਰਿਯਂ (ਕ.)] ਮਯਾ.

੮੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਞਾਣਸਞ੍ਞਾਯਿਦਂ ਫਲਂ.

੮੯. ‘‘ਇਤੋ ਸਤ੍ਤਤਿਕਪ੍ਪਮ੍ਹਿ [ਤੇਸਤ੍ਤਤਿਕਪ੍ਪੇ (ਸੀ. ਸ੍ਯਾ.)], ਏਕੋ ਪੁਲਿਨਪੁਪ੍ਫਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੯੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਞਾਣਸਞ੍ਞਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਞਾਣਸਞ੍ਞਿਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.