੧੦. ਪਦੁਮਪੂਜਕਤ੍ਥੇਰਅਪਦਾਨਂ

੯੭. ‘‘ਹਿਮਵਨ੍ਤਸ੍ਸਾਵਿਦੂਰੇ, ਗੋਤਮੋ ਨਾਮ ਪਬ੍ਬਤੋ;

ਨਾਨਾਰੁਕ੍ਖੇਹਿ ਸਞ੍ਛਨ੍ਨੋ, ਮਹਾਭੂਤਗਣਾਲਯੋ.

੯੮. ‘‘ਵੇਮਜ੍ਝਮ੍ਹਿ ਚ ਤਸ੍ਸਾਸਿ, ਅਸ੍ਸਮੋ ਅਭਿਨਿਮ੍ਮਿਤੋ;

ਪੁਰਕ੍ਖਤੋ ਸਸਿਸ੍ਸੇਹਿ, ਵਸਾਮਿ ਅਸ੍ਸਮੇ ਅਹਂ.

੯੯. ‘‘ਆਯਨ੍ਤੁ ਮੇ ਸਿਸ੍ਸਗਣਾ, ਪਦੁਮਂ ਆਹਰਨ੍ਤੁ ਮੇ;

ਬੁਦ੍ਧਪੂਜਂ ਕਰਿਸ੍ਸਾਮਿ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

੧੦੦. ‘‘ਏਵਨ੍ਤਿ ਤੇ ਪਟਿਸ੍ਸੁਤ੍ਵਾ, ਪਦੁਮਂ ਆਹਰਿਂਸੁ ਮੇ;

ਤਥਾ ਨਿਮਿਤ੍ਤਂ ਕਤ੍ਵਾਹਂ, ਬੁਦ੍ਧਸ੍ਸ ਅਭਿਰੋਪਯਿਂ.

੧੦੧. ‘‘ਸਿਸ੍ਸੇ ਤਦਾ ਸਮਾਨੇਤ੍ਵਾ, ਸਾਧੁਕਂ ਅਨੁਸਾਸਹਂ;

ਮਾ ਖੋ ਤੁਮ੍ਹੇ ਪਮਜ੍ਜਿਤ੍ਥ, ਅਪ੍ਪਮਾਦੋ ਸੁਖਾਵਹੋ.

੧੦੨. ‘‘ਏਵਂ ਸਮਨੁਸਾਸਿਤ੍ਵਾ, ਤੇ ਸਿਸ੍ਸੇ ਵਚਨਕ੍ਖਮੇ;

ਅਪ੍ਪਮਾਦਗੁਣੇ ਯੁਤ੍ਤੋ, ਤਦਾ ਕਾਲਙ੍ਕਤੋ ਅਹਂ.

੧੦੩. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੦੪. ‘‘ਏਕਪਞ੍ਞਾਸਕਪ੍ਪਮ੍ਹਿ, ਰਾਜਾ ਆਸਿਂ ਜਲੁਤ੍ਤਮੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੧੦੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਦੁਮਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਪਦੁਮਪੂਜਕਤ੍ਥੇਰਸ੍ਸਾਪਦਾਨਂ ਦਸਮਂ.

ਸੇਰੇਯ੍ਯਵਗ੍ਗੋ ਤੇਰਸਮੋ.