੯. ਪਚ੍ਚੁਪਟ੍ਠਾਨਸਞ੍ਞਕਤ੍ਥੇਰਅਪਦਾਨਂ

੭੨. ‘‘ਅਤ੍ਥਦਸ੍ਸਿਮ੍ਹਿ ਸੁਗਤੇ, ਨਿਬ੍ਬੁਤੇ ਸਮਨਨ੍ਤਰਾ;

ਯਕ੍ਖਯੋਨਿਂ ਉਪਪਜ੍ਜਿਂ, ਯਸਂ ਪਤ੍ਤੋ ਚਹਂ ਤਦਾ.

੭੩. ‘‘ਦੁਲ੍ਲਦ੍ਧਂ ਵਤ ਮੇ ਆਸਿ, ਦੁਪ੍ਪਭਾਤਂ ਦੁਰੁਟ੍ਠਿਤਂ;

ਯਂ ਮੇ ਭੋਗੇ ਵਿਜ੍ਜਮਾਨੇ, ਪਰਿਨਿਬ੍ਬਾਯਿ ਚਕ੍ਖੁਮਾ.

੭੪. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਾਗਰੋ ਨਾਮ ਸਾਵਕੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਮਮ ਸਨ੍ਤਿਕਂ.

੭੫. ‘‘ਕਿਂ ਨੁ ਸੋਚਸਿ ਮਾ ਭਾਯਿ, ਚਰ ਧਮ੍ਮਂ ਸੁਮੇਧਸ;

ਅਨੁਪ੍ਪਦਿਨ੍ਨਾ ਬੁਦ੍ਧੇਨ, ਸਬ੍ਬੇਸਂ ਬੀਜਸਮ੍ਪਦਾ.

੭੬. ‘‘ਸੋ ਚੇ ਪੂਜੇਯ੍ਯ ਸਮ੍ਬੁਦ੍ਧਂ, ਤਿਟ੍ਠਨ੍ਤਂ ਲੋਕਨਾਯਕਂ;

ਧਾਤੁਂ ਸਾਸਪਮਤ੍ਤਮ੍ਪਿ, ਨਿਬ੍ਬੁਤਸ੍ਸਾਪਿ ਪੂਜਯੇ.

੭੭. ‘‘ਸਮੇ ਚਿਤ੍ਤਪ੍ਪਸਾਦਮ੍ਹਿ, ਸਮਂ ਪੁਞ੍ਞਂ ਮਹਗ੍ਗਤਂ;

ਤਸ੍ਮਾ ਥੂਪਂ ਕਰਿਤ੍ਵਾਨ, ਪੂਜੇਹਿ ਜਿਨਧਾਤੁਯੋ.

੭੮. ‘‘ਸਾਗਰਸ੍ਸ ਵਚੋ ਸੁਤ੍ਵਾ, ਬੁਦ੍ਧਥੂਪਂ ਅਕਾਸਹਂ;

ਪਞ੍ਚਵਸ੍ਸੇ ਪਰਿਚਰਿਂ, ਮੁਨਿਨੋ ਥੂਪਮੁਤ੍ਤਮਂ.

੭੯. ‘‘ਤੇਨ ਕਮ੍ਮੇਨ ਦ੍ਵਿਪਦਿਨ੍ਦ, ਲੋਕਜੇਟ੍ਠ ਨਰਾਸਭ;

ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਅਰਹਤ੍ਤਮਪਾਪੁਣਿਂ.

੮੦. ‘‘ਭੂਰਿਪਞ੍ਞਾ ਚ ਚਤ੍ਤਾਰੋ, ਸਤ੍ਤਕਪ੍ਪਸਤੇ ਇਤੋ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੮੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਚ੍ਚੁਪਟ੍ਠਾਨਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਚ੍ਚੁਪਟ੍ਠਾਨਸਞ੍ਞਕਤ੍ਥੇਰਸ੍ਸਾਪਦਾਨਂ ਨਵਮਂ.