੬. ਚਿਤਕਪੂਜਕਤ੍ਥੇਰਅਪਦਾਨਂ

੪੯. ‘‘ਵਸਾਮਿ ਰਾਜਾਯਤਨੇ, ਸਾਮਚ੍ਚੋ ਸਪਰਿਜ੍ਜਨੋ;

ਪਰਿਨਿਬ੍ਬੁਤੇ ਭਗਵਤਿ, ਸਿਖਿਨੋ ਲੋਕਬਨ੍ਧੁਨੋ.

੫੦. ‘‘ਪਸਨ੍ਨਚਿਤ੍ਤੋ ਸੁਮਨੋ, ਚਿਤਕਂ ਅਗਮਾਸਹਂ;

ਤੂਰਿਯਂ ਤਤ੍ਥ ਵਾਦੇਤ੍ਵਾ, ਗਨ੍ਧਮਾਲਂ ਸਮੋਕਿਰਿਂ.

੫੧. ‘‘ਚਿਤਮ੍ਹਿ ਪੂਜਂ ਕਤ੍ਵਾਨ, ਵਨ੍ਦਿਤ੍ਵਾ ਚਿਤਕਂ ਅਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਸਕਂ ਭਵਨੁਪਾਗਮਿਂ.

੫੨. ‘‘ਭਵਨੇ ਉਪਵਿਟ੍ਠੋਹਂ, ਚਿਤਪੂਜਂ ਅਨੁਸ੍ਸਰਿਂ;

ਤੇਨ ਕਮ੍ਮੇਨ ਦ੍ਵਿਪਦਿਨ੍ਦ, ਲੋਕਜੇਟ੍ਠ ਨਰਾਸਭ.

੫੩. ‘‘ਅਨੁਭੋਤ੍ਵਾਨ ਸਮ੍ਪਤ੍ਤਿਂ, ਦੇਵੇਸੁ ਮਾਨੁਸੇਸੁ ਚ;

ਪਤ੍ਤੋਮ੍ਹਿ ਅਚਲਂ ਠਾਨਂ, ਹਿਤ੍ਵਾ ਜਯਪਰਾਜਯਂ.

੫੪. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਚਿਤਪੂਜਾਯਿਦਂ ਫਲਂ.

੫੫. ‘‘ਏਕੂਨਤਿਂਸਕਪ੍ਪਮ੍ਹਿ, ਇਤੋ ਸੋਲ਼ਸ ਰਾਜਾਨੋ;

ਉਗ੍ਗਤਾ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲਾ.

੫੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚਿਤਕਪੂਜਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.