੪. ਮਹਾਸੁਦਸ੍ਸਨਸੁਤ੍ਤਂ

੨੪੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਕੁਸਿਨਾਰਾਯਂ ਵਿਹਰਤਿ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਅਨ੍ਤਰੇਨ ਯਮਕਸਾਲਾਨਂ ਪਰਿਨਿਬ੍ਬਾਨਸਮਯੇ. ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਮਾ, ਭਨ੍ਤੇ, ਭਗਵਾ ਇਮਸ੍ਮਿਂ ਖੁਦ੍ਦਕਨਗਰਕੇ ਉਜ੍ਜਙ੍ਗਲਨਗਰਕੇ ਸਾਖਾਨਗਰਕੇ ਪਰਿਨਿਬ੍ਬਾਯਿ. ਸਨ੍ਤਿ, ਭਨ੍ਤੇ, ਅਞ੍ਞਾਨਿ ਮਹਾਨਗਰਾਨਿ. ਸੇਯ੍ਯਥਿਦਂ – ਚਮ੍ਪਾ, ਰਾਜਗਹਂ, ਸਾਵਤ੍ਥਿ, ਸਾਕੇਤਂ, ਕੋਸਮ੍ਬੀ, ਬਾਰਾਣਸੀ; ਏਤ੍ਥ ਭਗਵਾ ਪਰਿਨਿਬ੍ਬਾਯਤੁ. ਏਤ੍ਥ ਬਹੂ ਖਤ੍ਤਿਯਮਹਾਸਾਲਾ ਬ੍ਰਾਹ੍ਮਣਮਹਾਸਾਲਾ ਗਹਪਤਿਮਹਾਸਾਲਾ ਤਥਾਗਤੇ ਅਭਿਪ੍ਪਸਨ੍ਨਾ, ਤੇ ਤਥਾਗਤਸ੍ਸ ਸਰੀਰਪੂਜਂ ਕਰਿਸ੍ਸਨ੍ਤੀ’’ਤਿ.

੨੪੨. ‘‘ਮਾ ਹੇਵਂ, ਆਨਨ੍ਦ, ਅਵਚ; ਮਾ ਹੇਵਂ, ਆਨਨ੍ਦ, ਅਵਚ – ਖੁਦ੍ਦਕਨਗਰਕਂ ਉਜ੍ਜਙ੍ਗਲਨਗਰਕਂ ਸਾਖਾਨਗਰਕ’’ਨ੍ਤਿ.

ਕੁਸਾਵਤੀਰਾਜਧਾਨੀ

‘‘ਭੂਤਪੁਬ੍ਬਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਨਾਮ ਅਹੋਸਿ ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ [ਖਤ੍ਤਿਯੋ ਮੁਦ੍ਧਾਭਿਸਿਤ੍ਤੋ (ਕ.), ਚਕ੍ਕਵਤ੍ਤੀਧਮ੍ਮਿਕੋ ਧਮ੍ਮਰਾਜਾ (ਮਹਾਪਰਿਨਿਬ੍ਬਾਨਸੁਤ੍ਤ)] ਚਾਤੁਰਨ੍ਤੋ ਵਿਜਿਤਾਵੀ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਅਯਂ ਕੁਸਿਨਾਰਾ ਕੁਸਾਵਤੀ ਨਾਮ ਰਾਜਧਾਨੀ ਅਹੋਸਿ. ਪੁਰਤ੍ਥਿਮੇਨ ਚ ਪਚ੍ਛਿਮੇਨ ਚ ਦ੍ਵਾਦਸਯੋਜਨਾਨਿ ਆਯਾਮੇਨ, ਉਤ੍ਤਰੇਨ ਚ ਦਕ੍ਖਿਣੇਨ ਚ ਸਤ੍ਤਯੋਜਨਾਨਿ ਵਿਤ੍ਥਾਰੇਨ. ਕੁਸਾਵਤੀ, ਆਨਨ੍ਦ, ਰਾਜਧਾਨੀ ਇਦ੍ਧਾ ਚੇਵ ਅਹੋਸਿ ਫੀਤਾ ਚ ਬਹੁਜਨਾ ਚ ਆਕਿਣ੍ਣਮਨੁਸ੍ਸਾ ਚ ਸੁਭਿਕ੍ਖਾ ਚ. ਸੇਯ੍ਯਥਾਪਿ, ਆਨਨ੍ਦ, ਦੇਵਾਨਂ ਆਲ਼ਕਮਨ੍ਦਾ ਨਾਮ ਰਾਜਧਾਨੀ ਇਦ੍ਧਾ ਚੇਵ ਹੋਤਿ ਫੀਤਾ ਚ [ਇਦ੍ਧਾ ਚੇਵ ਅਹੋਸਿ ਫੀਤਾ ਚ (ਸ੍ਯਾ.)] ਬਹੁਜਨਾ ਚ ਆਕਿਣ੍ਣਯਕ੍ਖਾ ਚ ਸੁਭਿਕ੍ਖਾ ਚ; ਏਵਮੇਵ ਖੋ, ਆਨਨ੍ਦ, ਕੁਸਾਵਤੀ ਰਾਜਧਾਨੀ ਇਦ੍ਧਾ ਚੇਵ ਅਹੋਸਿ ਫੀਤਾ ਚ ਬਹੁਜਨਾ ਚ ਆਕਿਣ੍ਣਮਨੁਸ੍ਸਾ ਚ ਸੁਭਿਕ੍ਖਾ ਚ. ਕੁਸਾਵਤੀ, ਆਨਨ੍ਦ, ਰਾਜਧਾਨੀ ਦਸਹਿ ਸਦ੍ਦੇਹਿ ਅਵਿਵਿਤ੍ਤਾ ਅਹੋਸਿ ਦਿਵਾ ਚੇਵ ਰਤ੍ਤਿਞ੍ਚ, ਸੇਯ੍ਯਥਿਦਂ – ਹਤ੍ਥਿਸਦ੍ਦੇਨ ਅਸ੍ਸਸਦ੍ਦੇਨ ਰਥਸਦ੍ਦੇਨ ਭੇਰਿਸਦ੍ਦੇਨ ਮੁਦਿਙ੍ਗਸਦ੍ਦੇਨ ਵੀਣਾਸਦ੍ਦੇਨ ਗੀਤਸਦ੍ਦੇਨ ਸਙ੍ਖਸਦ੍ਦੇਨ ਸਮ੍ਮਸਦ੍ਦੇਨ ਪਾਣਿਤਾਲ਼ਸਦ੍ਦੇਨ ‘ਅਸ੍ਨਾਥ ਪਿਵਥ ਖਾਦਥਾ’ਤਿ ਦਸਮੇਨ ਸਦ੍ਦੇਨ.

‘‘ਕੁਸਾਵਤੀ, ਆਨਨ੍ਦ, ਰਾਜਧਾਨੀ ਸਤ੍ਤਹਿ ਪਾਕਾਰੇਹਿ ਪਰਿਕ੍ਖਿਤ੍ਤਾ ਅਹੋਸਿ. ਏਕੋ ਪਾਕਾਰੋ ਸੋਵਣ੍ਣਮਯੋ, ਏਕੋ ਰੂਪਿਯਮਯੋ, ਏਕੋ ਵੇਲ਼ੁਰਿਯਮਯੋ, ਏਕੋ ਫਲਿਕਮਯੋ, ਏਕੋ ਲੋਹਿਤਙ੍ਕਮਯੋ [ਲੋਹਿਤਙ੍ਗਮਯੋ (ਕ.), ਲੋਹਿਤਕਮਯੋ (ਬ੍ਯਾਕਰਣੇਸੁ)], ਏਕੋ ਮਸਾਰਗਲ੍ਲਮਯੋ, ਏਕੋ ਸਬ੍ਬਰਤਨਮਯੋ. ਕੁਸਾਵਤਿਯਾ, ਆਨਨ੍ਦ, ਰਾਜਧਾਨਿਯਾ ਚਤੁਨ੍ਨਂ ਵਣ੍ਣਾਨਂ ਦ੍ਵਾਰਾਨਿ ਅਹੇਸੁਂ. ਏਕਂ ਦ੍ਵਾਰਂ ਸੋਵਣ੍ਣਮਯਂ, ਏਕਂ ਰੂਪਿਯਮਯਂ, ਏਕਂ ਵੇਲ਼ੁਰਿਯਮਯਂ, ਏਕਂ ਫਲਿਕਮਯਂ. ਏਕੇਕਸ੍ਮਿਂ ਦ੍ਵਾਰੇ ਸਤ੍ਤ ਸਤ੍ਤ ਏਸਿਕਾ ਨਿਖਾਤਾ ਅਹੇਸੁਂ ਤਿਪੋਰਿਸਙ੍ਗਾ ਤਿਪੋਰਿਸਨਿਖਾਤਾ ਦ੍ਵਾਦਸਪੋਰਿਸਾ ਉਬ੍ਬੇਧੇਨ. ਏਕਾ ਏਸਿਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ, ਏਕਾ ਵੇਲ਼ੁਰਿਯਮਯਾ, ਏਕਾ ਫਲਿਕਮਯਾ, ਏਕਾ ਲੋਹਿਤਙ੍ਕਮਯਾ, ਏਕਾ ਮਸਾਰਗਲ੍ਲਮਯਾ, ਏਕਾ ਸਬ੍ਬਰਤਨਮਯਾ. ਕੁਸਾਵਤੀ, ਆਨਨ੍ਦ, ਰਾਜਧਾਨੀ ਸਤ੍ਤਹਿ ਤਾਲਪਨ੍ਤੀਹਿ ਪਰਿਕ੍ਖਿਤ੍ਤਾ ਅਹੋਸਿ. ਏਕਾ ਤਾਲਪਨ੍ਤਿ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ, ਏਕਾ ਵੇਲ਼ੁਰਿਯਮਯਾ, ਏਕਾ ਫਲਿਕਮਯਾ, ਏਕਾ ਲੋਹਿਤਙ੍ਕਮਯਾ, ਏਕਾ ਮਸਾਰਗਲ੍ਲਮਯਾ, ਏਕਾ ਸਬ੍ਬਰਤਨਮਯਾ. ਸੋਵਣ੍ਣਮਯਸ੍ਸ ਤਾਲਸ੍ਸ ਸੋਵਣ੍ਣਮਯੋ ਖਨ੍ਧੋ ਅਹੋਸਿ, ਰੂਪਿਯਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਰੂਪਿਯਮਯਸ੍ਸ ਤਾਲਸ੍ਸ ਰੂਪਿਯਮਯੋ ਖਨ੍ਧੋ ਅਹੋਸਿ, ਸੋਵਣ੍ਣਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਵੇਲ਼ੁਰਿਯਮਯਸ੍ਸ ਤਾਲਸ੍ਸ ਵੇਲ਼ੁਰਿਯਮਯੋ ਖਨ੍ਧੋ ਅਹੋਸਿ, ਫਲਿਕਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਫਲਿਕਮਯਸ੍ਸ ਤਾਲਸ੍ਸ ਫਲਿਕਮਯੋ ਖਨ੍ਧੋ ਅਹੋਸਿ, ਵੇਲ਼ੁਰਿਯਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਲੋਹਿਤਙ੍ਕਮਯਸ੍ਸ ਤਾਲਸ੍ਸ ਲੋਹਿਤਙ੍ਕਮਯੋ ਖਨ੍ਧੋ ਅਹੋਸਿ, ਮਸਾਰਗਲ੍ਲਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਮਸਾਰਗਲ੍ਲਮਯਸ੍ਸ ਤਾਲਸ੍ਸ ਮਸਾਰਗਲ੍ਲਮਯੋ ਖਨ੍ਧੋ ਅਹੋਸਿ, ਲੋਹਿਤਙ੍ਕਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਸਬ੍ਬਰਤਨਮਯਸ੍ਸ ਤਾਲਸ੍ਸ ਸਬ੍ਬਰਤਨਮਯੋ ਖਨ੍ਧੋ ਅਹੋਸਿ, ਸਬ੍ਬਰਤਨਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਤਾਸਂ ਖੋ ਪਨਾਨਨ੍ਦ, ਤਾਲਪਨ੍ਤੀਨਂ ਵਾਤੇਰਿਤਾਨਂ ਸਦ੍ਦੋ ਅਹੋਸਿ ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ [ਕਮਨੀਯੋ (ਸੀ. ਸ੍ਯਾ. ਪੀ.)] ਚ ਮਦਨੀਯੋ ਚ. ਸੇਯ੍ਯਥਾਪਿ, ਆਨਨ੍ਦ, ਪਞ੍ਚਙ੍ਗਿਕਸ੍ਸ ਤੂਰਿਯਸ੍ਸ ਸੁਵਿਨੀਤਸ੍ਸ ਸੁਪ੍ਪਟਿਤਾਲ਼ਿਤਸ੍ਸ ਸੁਕੁਸਲੇਹਿ ਸਮਨ੍ਨਾਹਤਸ੍ਸ ਸਦ੍ਦੋ ਹੋਤਿ ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ, ਏਵਮੇਵ ਖੋ, ਆਨਨ੍ਦ, ਤਾਸਂ ਤਾਲਪਨ੍ਤੀਨਂ ਵਾਤੇਰਿਤਾਨਂ ਸਦ੍ਦੋ ਅਹੋਸਿ ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ. ਯੇ ਖੋ ਪਨਾਨਨ੍ਦ, ਤੇਨ ਸਮਯੇਨ ਕੁਸਾਵਤਿਯਾ ਰਾਜਧਾਨਿਯਾ ਧੁਤ੍ਤਾ ਅਹੇਸੁਂ ਸੋਣ੍ਡਾ ਪਿਪਾਸਾ, ਤੇ ਤਾਸਂ ਤਾਲਪਨ੍ਤੀਨਂ ਵਾਤੇਰਿਤਾਨਂ ਸਦ੍ਦੇਨ ਪਰਿਚਾਰੇਸੁਂ.

ਚਕ੍ਕਰਤਨਂ

੨੪੩. ‘‘ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਸਤ੍ਤਹਿ ਰਤਨੇਹਿ ਸਮਨ੍ਨਾਗਤੋ ਅਹੋਸਿ ਚਤੂਹਿ ਚ ਇਦ੍ਧੀਹਿ. ਕਤਮੇਹਿ ਸਤ੍ਤਹਿ? ਇਧਾਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਤਦਹੁਪੋਸਥੇ ਪਨ੍ਨਰਸੇ ਸੀਸਂਨ੍ਹਾਤਸ੍ਸ ਉਪੋਸਥਿਕਸ੍ਸ ਉਪਰਿਪਾਸਾਦਵਰਗਤਸ੍ਸ ਦਿਬ੍ਬਂ ਚਕ੍ਕਰਤਨਂ ਪਾਤੁਰਹੋਸਿ ਸਹਸ੍ਸਾਰਂ ਸਨੇਮਿਕਂ ਸਨਾਭਿਕਂ ਸਬ੍ਬਾਕਾਰਪਰਿਪੂਰਂ. ਦਿਸ੍ਵਾ ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਸੁਤਂ ਖੋ ਪਨੇਤਂ – ‘‘ਯਸ੍ਸ ਰਞ੍ਞੋ ਖਤ੍ਤਿਯਸ੍ਸ ਮੁਦ੍ਧਾਵਸਿਤ੍ਤਸ੍ਸ ਤਦਹੁਪੋਸਥੇ ਪਨ੍ਨਰਸੇ ਸੀਸਂਨ੍ਹਾਤਸ੍ਸ ਉਪੋਸਥਿਕਸ੍ਸ ਉਪਰਿਪਾਸਾਦਵਰਗਤਸ੍ਸ ਦਿਬ੍ਬਂ ਚਕ੍ਕਰਤਨਂ ਪਾਤੁਭਵਤਿ ਸਹਸ੍ਸਾਰਂ ਸਨੇਮਿਕਂ ਸਨਾਭਿਕਂ ਸਬ੍ਬਾਕਾਰਪਰਿਪੂਰਂ, ਸੋ ਹੋਤਿ ਰਾਜਾ ਚਕ੍ਕਵਤ੍ਤੀ’’ਤਿ. ਅਸ੍ਸਂ ਨੁ ਖੋ ਅਹਂ ਰਾਜਾ ਚਕ੍ਕਵਤ੍ਤੀ’ਤਿ.

੨੪੪. ‘‘ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵਾਮੇਨ ਹਤ੍ਥੇਨ ਸੁਵਣ੍ਣਭਿਙ੍ਕਾਰਂ ਗਹੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਚਕ੍ਕਰਤਨਂ ਅਬ੍ਭੁਕ੍ਕਿਰਿ – ‘ਪਵਤ੍ਤਤੁ ਭਵਂ ਚਕ੍ਕਰਤਨਂ, ਅਭਿਵਿਜਿਨਾਤੁ ਭਵਂ ਚਕ੍ਕਰਤਨ’ਨ੍ਤਿ. ਅਥ ਖੋ ਤਂ, ਆਨਨ੍ਦ, ਚਕ੍ਕਰਤਨਂ ਪੁਰਤ੍ਥਿਮਂ ਦਿਸਂ ਪਵਤ੍ਤਿ [ਪਵਤ੍ਤਤਿ (ਸ੍ਯਾ. ਕ.)], ਅਨ੍ਵਦੇਵ [ਅਨੁਦੇਵ (ਸ੍ਯਾ.)] ਰਾਜਾ ਮਹਾਸੁਦਸ੍ਸਨੋ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ, ਯਸ੍ਮਿਂ ਖੋ ਪਨਾਨਨ੍ਦ, ਪਦੇਸੇ ਚਕ੍ਕਰਤਨਂ ਪਤਿਟ੍ਠਾਸਿ, ਤਤ੍ਥ ਰਾਜਾ ਮਹਾਸੁਦਸ੍ਸਨੋ ਵਾਸਂ ਉਪਗਚ੍ਛਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ. ਯੇ ਖੋ ਪਨਾਨਨ੍ਦ, ਪੁਰਤ੍ਥਿਮਾਯ ਦਿਸਾਯ ਪਟਿਰਾਜਾਨੋ, ਤੇ ਰਾਜਾਨਂ ਮਹਾਸੁਦਸ੍ਸਨਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ – ‘ਏਹਿ ਖੋ ਮਹਾਰਾਜ, ਸ੍ਵਾਗਤਂ ਤੇ ਮਹਾਰਾਜ, ਸਕਂ ਤੇ ਮਹਾਰਾਜ, ਅਨੁਸਾਸ ਮਹਾਰਾਜਾ’ਤਿ. ਰਾਜਾ ਮਹਾਸੁਦਸ੍ਸਨੋ ਏਵਮਾਹ – ‘ਪਾਣੋ ਨ ਹਨ੍ਤਬ੍ਬੋ, ਅਦਿਨ੍ਨਂ ਨ ਆਦਾਤਬ੍ਬਂ, ਕਾਮੇਸੁ ਮਿਚ੍ਛਾ ਨ ਚਰਿਤਬ੍ਬਾ, ਮੁਸਾ ਨ ਭਣਿਤਬ੍ਬਾ, ਮਜ੍ਜਂ ਨ ਪਾਤਬ੍ਬਂ, ਯਥਾਭੁਤ੍ਤਞ੍ਚ ਭੁਞ੍ਜਥਾ’ਤਿ. ਯੇ ਖੋ ਪਨਾਨਨ੍ਦ, ਪੁਰਤ੍ਥਿਮਾਯ ਦਿਸਾਯ ਪਟਿਰਾਜਾਨੋ, ਤੇ ਰਞ੍ਞੋ ਮਹਾਸੁਦਸ੍ਸਨਸ੍ਸ ਅਨੁਯਨ੍ਤਾ ਅਹੇਸੁਂ. ਅਥ ਖੋ ਤਂ, ਆਨਨ੍ਦ, ਚਕ੍ਕਰਤਨਂ ਪੁਰਤ੍ਥਿਮਂ ਸਮੁਦ੍ਦਂ ਅਜ੍ਝੋਗਾਹੇਤ੍ਵਾ ਪਚ੍ਚੁਤ੍ਤਰਿਤ੍ਵਾ ਦਕ੍ਖਿਣਂ ਦਿਸਂ ਪਵਤ੍ਤਿ…ਪੇ… ਦਕ੍ਖਿਣਂ ਸਮੁਦ੍ਦਂ ਅਜ੍ਝੋਗਾਹੇਤ੍ਵਾ ਪਚ੍ਚੁਤ੍ਤਰਿਤ੍ਵਾ ਪਚ੍ਛਿਮਂ ਦਿਸਂ ਪਵਤ੍ਤਿ…ਪੇ… ਪਚ੍ਛਿਮਂ ਸਮੁਦ੍ਦਂ ਅਜ੍ਝੋਗਾਹੇਤ੍ਵਾ ਪਚ੍ਚੁਤ੍ਤਰਿਤ੍ਵਾ ਉਤ੍ਤਰਂ ਦਿਸਂ ਪਵਤ੍ਤਿ, ਅਨ੍ਵਦੇਵ ਰਾਜਾ ਮਹਾਸੁਦਸ੍ਸਨੋ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ. ਯਸ੍ਮਿਂ ਖੋ ਪਨਾਨਨ੍ਦ, ਪਦੇਸੇ ਚਕ੍ਕਰਤਨਂ ਪਤਿਟ੍ਠਾਸਿ, ਤਤ੍ਥ ਰਾਜਾ ਮਹਾਸੁਦਸ੍ਸਨੋ ਵਾਸਂ ਉਪਗਚ੍ਛਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ. ਯੇ ਖੋ ਪਨਾਨਨ੍ਦ, ਉਤ੍ਤਰਾਯ ਦਿਸਾਯ ਪਟਿਰਾਜਾਨੋ, ਤੇ ਰਾਜਾਨਂ ਮਹਾਸੁਦਸ੍ਸਨਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ – ‘ਏਹਿ ਖੋ ਮਹਾਰਾਜ, ਸ੍ਵਾਗਤਂ ਤੇ ਮਹਾਰਾਜ, ਸਕਂ ਤੇ ਮਹਾਰਾਜ, ਅਨੁਸਾਸ ਮਹਾਰਾਜਾ’ਤਿ. ਰਾਜਾ ਮਹਾਸੁਦਸ੍ਸਨੋ ਏਵਮਾਹ – ‘ਪਾਣੋ ਨ ਹਨ੍ਤਬ੍ਬੋ, ਅਦਿਨ੍ਨਂ ਨ ਆਦਾਤਬ੍ਬਂ, ਕਾਮੇਸੁ ਮਿਚ੍ਛਾ ਨ ਚਰਿਤਬ੍ਬਾ, ਮੁਸਾ ਨ ਭਣਿਤਬ੍ਬਾ, ਮਜ੍ਜਂ ਨ ਪਾਤਬ੍ਬਂ, ਯਥਾਭੁਤ੍ਤਞ੍ਚ ਭੁਞ੍ਜਥਾ’ਤਿ. ਯੇ ਖੋ ਪਨਾਨਨ੍ਦ, ਉਤ੍ਤਰਾਯ ਦਿਸਾਯ ਪਟਿਰਾਜਾਨੋ, ਤੇ ਰਞ੍ਞੋ ਮਹਾਸੁਦਸ੍ਸਨਸ੍ਸ ਅਨੁਯਨ੍ਤਾ ਅਹੇਸੁਂ.

੨੪੫. ‘‘ਅਥ ਖੋ ਤਂ, ਆਨਨ੍ਦ, ਚਕ੍ਕਰਤਨਂ ਸਮੁਦ੍ਦਪਰਿਯਨ੍ਤਂ ਪਥਵਿਂ ਅਭਿਵਿਜਿਨਿਤ੍ਵਾ ਕੁਸਾਵਤਿਂ ਰਾਜਧਾਨਿਂ ਪਚ੍ਚਾਗਨ੍ਤ੍ਵਾ ਰਞ੍ਞੋ ਮਹਾਸੁਦਸ੍ਸਨਸ੍ਸ ਅਨ੍ਤੇਪੁਰਦ੍ਵਾਰੇ ਅਤ੍ਥਕਰਣਪਮੁਖੇ ਅਕ੍ਖਾਹਤਂ ਮਞ੍ਞੇ ਅਟ੍ਠਾਸਿ ਰਞ੍ਞੋ ਮਹਾਸੁਦਸ੍ਸਨਸ੍ਸ ਅਨ੍ਤੇਪੁਰਂ ਉਪਸੋਭਯਮਾਨਂ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਏਵਰੂਪਂ ਚਕ੍ਕਰਤਨਂ ਪਾਤੁਰਹੋਸਿ.

ਹਤ੍ਥਿਰਤਨਂ

੨੪੬. ‘‘ਪੁਨ ਚਪਰਂ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਹਤ੍ਥਿਰਤਨਂ ਪਾਤੁਰਹੋਸਿ ਸਬ੍ਬਸੇਤੋ ਸਤ੍ਤਪ੍ਪਤਿਟ੍ਠੋ ਇਦ੍ਧਿਮਾ ਵੇਹਾਸਙ੍ਗਮੋ ਉਪੋਸਥੋ ਨਾਮ ਨਾਗਰਾਜਾ. ਤਂ ਦਿਸ੍ਵਾ ਰਞ੍ਞੋ ਮਹਾਸੁਦਸ੍ਸਨਸ੍ਸ ਚਿਤ੍ਤਂ ਪਸੀਦਿ – ‘ਭਦ੍ਦਕਂ ਵਤ ਭੋ ਹਤ੍ਥਿਯਾਨਂ, ਸਚੇ ਦਮਥਂ ਉਪੇਯ੍ਯਾ’ਤਿ. ਅਥ ਖੋ ਤਂ, ਆਨਨ੍ਦ, ਹਤ੍ਥਿਰਤਨਂ – ਸੇਯ੍ਯਥਾਪਿ ਨਾਮ ਗਨ੍ਧਹਤ੍ਥਾਜਾਨਿਯੋ ਦੀਘਰਤ੍ਤਂ ਸੁਪਰਿਦਨ੍ਤੋ, ਏਵਮੇਵ ਦਮਥਂ ਉਪਗਚ੍ਛਿ. ਭੂਤਪੁਬ੍ਬਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਮੇਵ ਹਤ੍ਥਿਰਤਨਂ ਵੀਮਂਸਮਾਨੋ ਪੁਬ੍ਬਣ੍ਹਸਮਯਂ ਅਭਿਰੁਹਿਤ੍ਵਾ ਸਮੁਦ੍ਦਪਰਿਯਨ੍ਤਂ ਪਥਵਿਂ ਅਨੁਯਾਯਿਤ੍ਵਾ ਕੁਸਾਵਤਿਂ ਰਾਜਧਾਨਿਂ ਪਚ੍ਚਾਗਨ੍ਤ੍ਵਾ ਪਾਤਰਾਸਮਕਾਸਿ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਏਵਰੂਪਂ ਹਤ੍ਥਿਰਤਨਂ ਪਾਤੁਰਹੋਸਿ.

ਅਸ੍ਸਰਤਨਂ

੨੪੭. ‘‘ਪੁਨ ਚਪਰਂ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਅਸ੍ਸਰਤਨਂ ਪਾਤੁਰਹੋਸਿ ਸਬ੍ਬਸੇਤੋ ਕਾਲ਼ਸੀਸੋ ਮੁਞ੍ਜਕੇਸੋ ਇਦ੍ਧਿਮਾ ਵੇਹਾਸਙ੍ਗਮੋ ਵਲਾਹਕੋ ਨਾਮ ਅਸ੍ਸਰਾਜਾ. ਤਂ ਦਿਸ੍ਵਾ ਰਞ੍ਞੋ ਮਹਾਸੁਦਸ੍ਸਨਸ੍ਸ ਚਿਤ੍ਤਂ ਪਸੀਦਿ – ‘ਭਦ੍ਦਕਂ ਵਤ ਭੋ ਅਸ੍ਸਯਾਨਂ ਸਚੇ ਦਮਥਂ ਉਪੇਯ੍ਯਾ’ਤਿ. ਅਥ ਖੋ ਤਂ, ਆਨਨ੍ਦ, ਅਸ੍ਸਰਤਨਂ ਸੇਯ੍ਯਥਾਪਿ ਨਾਮ ਭਦ੍ਦੋ ਅਸ੍ਸਾਜਾਨਿਯੋ ਦੀਘਰਤ੍ਤਂ ਸੁਪਰਿਦਨ੍ਤੋ, ਏਵਮੇਵ ਦਮਥਂ ਉਪਗਚ੍ਛਿ. ਭੂਤਪੁਬ੍ਬਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਮੇਵ ਅਸ੍ਸਰਤਨਂ ਵੀਮਂਸਮਾਨੋ ਪੁਬ੍ਬਣ੍ਹਸਮਯਂ ਅਭਿਰੁਹਿਤ੍ਵਾ ਸਮੁਦ੍ਦਪਰਿਯਨ੍ਤਂ ਪਥਵਿਂ ਅਨੁਯਾਯਿਤ੍ਵਾ ਕੁਸਾਵਤਿਂ ਰਾਜਧਾਨਿਂ ਪਚ੍ਚਾਗਨ੍ਤ੍ਵਾ ਪਾਤਰਾਸਮਕਾਸਿ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਏਵਰੂਪਂ ਅਸ੍ਸਰਤਨਂ ਪਾਤੁਰਹੋਸਿ.

ਮਣਿਰਤਨਂ

੨੪੮. ‘‘ਪੁਨ ਚਪਰਂ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਮਣਿਰਤਨਂ ਪਾਤੁਰਹੋਸਿ. ਸੋ ਅਹੋਸਿ ਮਣਿ ਵੇਲ਼ੁਰਿਯੋ ਸੁਭੋ ਜਾਤਿਮਾ ਅਟ੍ਠਂਸੋ ਸੁਪਰਿਕਮ੍ਮਕਤੋ ਅਚ੍ਛੋ ਵਿਪ੍ਪਸਨ੍ਨੋ ਅਨਾਵਿਲੋ ਸਬ੍ਬਾਕਾਰਸਮ੍ਪਨ੍ਨੋ. ਤਸ੍ਸ ਖੋ ਪਨਾਨਨ੍ਦ, ਮਣਿਰਤਨਸ੍ਸ ਆਭਾ ਸਮਨ੍ਤਾ ਯੋਜਨਂ ਫੁਟਾ ਅਹੋਸਿ. ਭੂਤਪੁਬ੍ਬਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਮੇਵ ਮਣਿਰਤਨਂ ਵੀਮਂਸਮਾਨੋ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਮਣਿਂ ਧਜਗ੍ਗਂ ਆਰੋਪੇਤ੍ਵਾ ਰਤ੍ਤਨ੍ਧਕਾਰਤਿਮਿਸਾਯ ਪਾਯਾਸਿ. ਯੇ ਖੋ ਪਨਾਨਨ੍ਦ, ਸਮਨ੍ਤਾ ਗਾਮਾ ਅਹੇਸੁਂ, ਤੇ ਤੇਨੋਭਾਸੇਨ ਕਮ੍ਮਨ੍ਤੇ ਪਯੋਜੇਸੁਂ ਦਿਵਾਤਿ ਮਞ੍ਞਮਾਨਾ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਏਵਰੂਪਂ ਮਣਿਰਤਨਂ ਪਾਤੁਰਹੋਸਿ.

ਇਤ੍ਥਿਰਤਨਂ

੨੪੯. ‘‘ਪੁਨ ਚਪਰਂ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਇਤ੍ਥਿਰਤਨਂ ਪਾਤੁਰਹੋਸਿ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ ਨਾਤਿਦੀਘਾ ਨਾਤਿਰਸ੍ਸਾ ਨਾਤਿਕਿਸਾ ਨਾਤਿਥੂਲਾ ਨਾਤਿਕਾਲ਼ਿਕਾ ਨਾਚ੍ਚੋਦਾਤਾ ਅਤਿਕ੍ਕਨ੍ਤਾ ਮਾਨੁਸਿਵਣ੍ਣਂ [ਮਾਨੁਸ੍ਸਿਵਣ੍ਣਂ (ਸ੍ਯਾ.)] ਅਪ੍ਪਤ੍ਤਾ ਦਿਬ੍ਬਵਣ੍ਣਂ. ਤਸ੍ਸ ਖੋ ਪਨਾਨਨ੍ਦ, ਇਤ੍ਥਿਰਤਨਸ੍ਸ ਏਵਰੂਪੋ ਕਾਯਸਮ੍ਫਸ੍ਸੋ ਹੋਤਿ, ਸੇਯ੍ਯਥਾਪਿ ਨਾਮ ਤੂਲਪਿਚੁਨੋ ਵਾ ਕਪ੍ਪਾਸਪਿਚੁਨੋ ਵਾ. ਤਸ੍ਸ ਖੋ ਪਨਾਨਨ੍ਦ, ਇਤ੍ਥਿਰਤਨਸ੍ਸ ਸੀਤੇ ਉਣ੍ਹਾਨਿ ਗਤ੍ਤਾਨਿ ਹੋਨ੍ਤਿ, ਉਣ੍ਹੇ ਸੀਤਾਨਿ. ਤਸ੍ਸ ਖੋ ਪਨਾਨਨ੍ਦ, ਇਤ੍ਥਿਰਤਨਸ੍ਸ ਕਾਯਤੋ ਚਨ੍ਦਨਗਨ੍ਧੋ ਵਾਯਤਿ, ਮੁਖਤੋ ਉਪ੍ਪਲਗਨ੍ਧੋ. ਤਂ ਖੋ ਪਨਾਨਨ੍ਦ, ਇਤ੍ਥਿਰਤਨਂ ਰਞ੍ਞੋ ਮਹਾਸੁਦਸ੍ਸਨਸ੍ਸ ਪੁਬ੍ਬੁਟ੍ਠਾਯਿਨੀ ਅਹੋਸਿ ਪਚ੍ਛਾਨਿਪਾਤਿਨੀ ਕਿਙ੍ਕਾਰਪਟਿਸ੍ਸਾਵਿਨੀ ਮਨਾਪਚਾਰਿਨੀ ਪਿਯਵਾਦਿਨੀ. ਤਂ ਖੋ ਪਨਾਨਨ੍ਦ, ਇਤ੍ਥਿਰਤਨਂ ਰਾਜਾਨਂ ਮਹਾਸੁਦਸ੍ਸਨਂ ਮਨਸਾਪਿ ਨੋ ਅਤਿਚਰਿ [ਅਤਿਚਰੀ (ਕ.), ਅਤਿਚਾਰੀ (ਸੀ. ਸ੍ਯਾ. ਪੀ.)], ਕੁਤੋ ਪਨ ਕਾਯੇਨ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਏਵਰੂਪਂ ਇਤ੍ਥਿਰਤਨਂ ਪਾਤੁਰਹੋਸਿ.

ਗਹਪਤਿਰਤਨਂ

੨੫੦. ‘‘ਪੁਨ ਚਪਰਂ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਗਹਪਤਿਰਤਨਂ ਪਾਤੁਰਹੋਸਿ. ਤਸ੍ਸ ਕਮ੍ਮਵਿਪਾਕਜਂ ਦਿਬ੍ਬਚਕ੍ਖੁ ਪਾਤੁਰਹੋਸਿ ਯੇਨ ਨਿਧਿਂ ਪਸ੍ਸਤਿ ਸਸ੍ਸਾਮਿਕਮ੍ਪਿ ਅਸ੍ਸਾਮਿਕਮ੍ਪਿ. ਸੋ ਰਾਜਾਨਂ ਮਹਾਸੁਦਸ੍ਸਨਂ ਉਪਸਙ੍ਕਮਿਤ੍ਵਾ ਏਵਮਾਹ – ‘ਅਪ੍ਪੋਸ੍ਸੁਕ੍ਕੋ ਤ੍ਵਂ, ਦੇਵ, ਹੋਹਿ, ਅਹਂ ਤੇ ਧਨੇਨ ਧਨਕਰਣੀਯਂ ਕਰਿਸ੍ਸਾਮੀ’ਤਿ. ਭੂਤਪੁਬ੍ਬਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਮੇਵ ਗਹਪਤਿਰਤਨਂ ਵੀਮਂਸਮਾਨੋ ਨਾਵਂ ਅਭਿਰੁਹਿਤ੍ਵਾ ਮਜ੍ਝੇ ਗਙ੍ਗਾਯ ਨਦਿਯਾ ਸੋਤਂ ਓਗਾਹਿਤ੍ਵਾ ਗਹਪਤਿਰਤਨਂ ਏਤਦਵੋਚ – ‘ਅਤ੍ਥੋ ਮੇ, ਗਹਪਤਿ, ਹਿਰਞ੍ਞਸੁਵਣ੍ਣੇਨਾ’ਤਿ. ‘ਤੇਨ ਹਿ, ਮਹਾਰਾਜ, ਏਕਂ ਤੀਰਂ ਨਾਵਾ ਉਪੇਤੂ’ਤਿ. ‘ਇਧੇਵ ਮੇ, ਗਹਪਤਿ, ਅਤ੍ਥੋ ਹਿਰਞ੍ਞਸੁਵਣ੍ਣੇਨਾ’ਤਿ. ਅਥ ਖੋ ਤਂ, ਆਨਨ੍ਦ, ਗਹਪਤਿਰਤਨਂ ਉਭੋਹਿ ਹਤ੍ਥੇਹਿ ਉਦਕਂ ਓਮਸਿਤ੍ਵਾ ਪੂਰਂ ਹਿਰਞ੍ਞਸੁਵਣ੍ਣਸ੍ਸ ਕੁਮ੍ਭਿਂ ਉਦ੍ਧਰਿਤ੍ਵਾ ਰਾਜਾਨਂ ਮਹਾਸੁਦਸ੍ਸਨਂ ਏਤਦਵੋਚ – ‘ਅਲਮੇਤ੍ਤਾਵਤਾ ਮਹਾਰਾਜ, ਕਤਮੇਤ੍ਤਾਵਤਾ ਮਹਾਰਾਜ, ਪੂਜਿਤਮੇਤ੍ਤਾਵਤਾ ਮਹਾਰਾਜਾ’ਤਿ? ਰਾਜਾ ਮਹਾਸੁਦਸ੍ਸਨੋ ਏਵਮਾਹ – ‘ਅਲਮੇਤ੍ਤਾਵਤਾ ਗਹਪਤਿ, ਕਤਮੇਤ੍ਤਾਵਤਾ ਗਹਪਤਿ, ਪੂਜਿਤਮੇਤ੍ਤਾਵਤਾ ਗਹਪਤੀ’ਤਿ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਏਵਰੂਪਂ ਗਹਪਤਿਰਤਨਂ ਪਾਤੁਰਹੋਸਿ.

ਪਰਿਣਾਯਕਰਤਨਂ

੨੫੧. ‘‘ਪੁਨ ਚਪਰਂ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਪਰਿਣਾਯਕਰਤਨਂ ਪਾਤੁਰਹੋਸਿ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਪਟਿਬਲੋ ਰਾਜਾਨਂ ਮਹਾਸੁਦਸ੍ਸਨਂ ਉਪਯਾਪੇਤਬ੍ਬਂ ਉਪਯਾਪੇਤੁਂ, ਅਪਯਾਪੇਤਬ੍ਬਂ ਅਪਯਾਪੇਤੁਂ, ਠਪੇਤਬ੍ਬਂ ਠਪੇਤੁਂ. ਸੋ ਰਾਜਾਨਂ ਮਹਾਸੁਦਸ੍ਸਨਂ ਉਪਸਙ੍ਕਮਿਤ੍ਵਾ ਏਵਮਾਹ – ‘ਅਪ੍ਪੋਸ੍ਸੁਕ੍ਕੋ ਤ੍ਵਂ, ਦੇਵ, ਹੋਹਿ, ਅਹਮਨੁਸਾਸਿਸ੍ਸਾਮੀ’ਤਿ. ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਏਵਰੂਪਂ ਪਰਿਣਾਯਕਰਤਨਂ ਪਾਤੁਰਹੋਸਿ.

‘‘ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਇਮੇਹਿ ਸਤ੍ਤਹਿ ਰਤਨੇਹਿ ਸਮਨ੍ਨਾਗਤੋ ਅਹੋਸਿ.

ਚਤੁਇਦ੍ਧਿਸਮਨ੍ਨਾਗਤੋ

੨੫੨. ‘‘ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਚਤੂਹਿ ਇਦ੍ਧੀਹਿ ਸਮਨ੍ਨਾਗਤੋ ਅਹੋਸਿ. ਕਤਮਾਹਿ ਚਤੂਹਿ ਇਦ੍ਧੀਹਿ? ਇਧਾਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਅਭਿਰੂਪੋ ਅਹੋਸਿ ਦਸ੍ਸਨੀਯੋ ਪਾਸਾਦਿਕੋ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤੋ ਅਤਿਵਿਯ ਅਞ੍ਞੇਹਿ ਮਨੁਸ੍ਸੇਹਿ. ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਇਮਾਯ ਪਠਮਾਯ ਇਦ੍ਧਿਯਾ ਸਮਨ੍ਨਾਗਤੋ ਅਹੋਸਿ.

‘‘ਪੁਨ ਚਪਰਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਦੀਘਾਯੁਕੋ ਅਹੋਸਿ ਚਿਰਟ੍ਠਿਤਿਕੋ ਅਤਿਵਿਯ ਅਞ੍ਞੇਹਿ ਮਨੁਸ੍ਸੇਹਿ. ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਇਮਾਯ ਦੁਤਿਯਾਯ ਇਦ੍ਧਿਯਾ ਸਮਨ੍ਨਾਗਤੋ ਅਹੋਸਿ.

‘‘ਪੁਨ ਚਪਰਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਅਪ੍ਪਾਬਾਧੋ ਅਹੋਸਿ ਅਪ੍ਪਾਤਙ੍ਕੋ ਸਮਵੇਪਾਕਿਨਿਯਾ ਗਹਣਿਯਾ ਸਮਨ੍ਨਾਗਤੋ ਨਾਤਿਸੀਤਾਯ ਨਾਚ੍ਚੁਣ੍ਹਾਯ ਅਤਿਵਿਯ ਅਞ੍ਞੇਹਿ ਮਨੁਸ੍ਸੇਹਿ. ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਇਮਾਯ ਤਤਿਯਾਯ ਇਦ੍ਧਿਯਾ ਸਮਨ੍ਨਾਗਤੋ ਅਹੋਸਿ.

‘‘ਪੁਨ ਚਪਰਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਬ੍ਰਾਹ੍ਮਣਗਹਪਤਿਕਾਨਂ ਪਿਯੋ ਅਹੋਸਿ ਮਨਾਪੋ. ਸੇਯ੍ਯਥਾਪਿ, ਆਨਨ੍ਦ, ਪਿਤਾ ਪੁਤ੍ਤਾਨਂ ਪਿਯੋ ਹੋਤਿ ਮਨਾਪੋ, ਏਵਮੇਵ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਬ੍ਰਾਹ੍ਮਣਗਹਪਤਿਕਾਨਂ ਪਿਯੋ ਅਹੋਸਿ ਮਨਾਪੋ. ਰਞ੍ਞੋਪਿ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਬ੍ਰਾਹ੍ਮਣਗਹਪਤਿਕਾ ਪਿਯਾ ਅਹੇਸੁਂ ਮਨਾਪਾ. ਸੇਯ੍ਯਥਾਪਿ, ਆਨਨ੍ਦ, ਪਿਤੁ ਪੁਤ੍ਤਾ ਪਿਯਾ ਹੋਨ੍ਤਿ ਮਨਾਪਾ, ਏਵਮੇਵ ਖੋ, ਆਨਨ੍ਦ, ਰਞ੍ਞੋਪਿ ਮਹਾਸੁਦਸ੍ਸਨਸ੍ਸ ਬ੍ਰਾਹ੍ਮਣਗਹਪਤਿਕਾ ਪਿਯਾ ਅਹੇਸੁਂ ਮਨਾਪਾ.

‘‘ਭੂਤਪੁਬ੍ਬਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਚਤੁਰਙ੍ਗਿਨਿਯਾ ਸੇਨਾਯ ਉਯ੍ਯਾਨਭੂਮਿਂ ਨਿਯ੍ਯਾਸਿ. ਅਥ ਖੋ, ਆਨਨ੍ਦ, ਬ੍ਰਾਹ੍ਮਣਗਹਪਤਿਕਾ ਰਾਜਾਨਂ ਮਹਾਸੁਦਸ੍ਸਨਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ – ‘ਅਤਰਮਾਨੋ, ਦੇਵ, ਯਾਹਿ, ਯਥਾ ਤਂ ਮਯਂ ਚਿਰਤਰਂ ਪਸ੍ਸੇਯ੍ਯਾਮਾ’ਤਿ. ਰਾਜਾਪਿ, ਆਨਨ੍ਦ, ਮਹਾਸੁਦਸ੍ਸਨੋ ਸਾਰਥਿਂ ਆਮਨ੍ਤੇਸਿ – ‘ਅਤਰਮਾਨੋ, ਸਾਰਥਿ, ਰਥਂ ਪੇਸੇਹਿ, ਯਥਾ ਅਹਂ ਬ੍ਰਾਹ੍ਮਣਗਹਪਤਿਕੇ ਚਿਰਤਰਂ ਪਸ੍ਸੇਯ੍ਯ’ਨ੍ਤਿ. ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਇਮਾਯ ਚਤੁਤ੍ਥਿਯਾ [ਚਤੁਤ੍ਥਾਯ (ਸ੍ਯਾ.)] ਇਦ੍ਧਿਯਾ ਸਮਨ੍ਨਾਗਤੋ ਅਹੋਸਿ. ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਇਮਾਹਿ ਚਤੂਹਿ ਇਦ੍ਧੀਹਿ ਸਮਨ੍ਨਾਗਤੋ ਅਹੋਸਿ.

ਧਮ੍ਮਪਾਸਾਦਪੋਕ੍ਖਰਣੀ

੨੫੩. ‘‘ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਯਂਨੂਨਾਹਂ ਇਮਾਸੁ ਤਾਲਨ੍ਤਰਿਕਾਸੁ ਧਨੁਸਤੇ ਧਨੁਸਤੇ ਪੋਕ੍ਖਰਣਿਯੋ ਮਾਪੇਯ੍ਯ’ਨ੍ਤਿ.

‘‘ਮਾਪੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਾਸੁ ਤਾਲਨ੍ਤਰਿਕਾਸੁ ਧਨੁਸਤੇ ਧਨੁਸਤੇ ਪੋਕ੍ਖਰਣਿਯੋ. ਤਾ ਖੋ ਪਨਾਨਨ੍ਦ, ਪੋਕ੍ਖਰਣਿਯੋ ਚਤੁਨ੍ਨਂ ਵਣ੍ਣਾਨਂ ਇਟ੍ਠਕਾਹਿ ਚਿਤਾ ਅਹੇਸੁਂ – ਏਕਾ ਇਟ੍ਠਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ, ਏਕਾ ਵੇਲ਼ੁਰਿਯਮਯਾ, ਏਕਾ ਫਲਿਕਮਯਾ.

‘‘ਤਾਸੁ ਖੋ ਪਨਾਨਨ੍ਦ, ਪੋਕ੍ਖਰਣੀਸੁ ਚਤ੍ਤਾਰਿ ਚਤ੍ਤਾਰਿ ਸੋਪਾਨਾਨਿ ਅਹੇਸੁਂ ਚਤੁਨ੍ਨਂ ਵਣ੍ਣਾਨਂ, ਏਕਂ ਸੋਪਾਨਂ ਸੋਵਣ੍ਣਮਯਂ ਏਕਂ ਰੂਪਿਯਮਯਂ ਏਕਂ ਵੇਲ਼ੁਰਿਯਮਯਂ ਏਕਂ ਫਲਿਕਮਯਂ. ਸੋਵਣ੍ਣਮਯਸ੍ਸ ਸੋਪਾਨਸ੍ਸ ਸੋਵਣ੍ਣਮਯਾ ਥਮ੍ਭਾ ਅਹੇਸੁਂ, ਰੂਪਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਰੂਪਿਯਮਯਸ੍ਸ ਸੋਪਾਨਸ੍ਸ ਰੂਪਿਯਮਯਾ ਥਮ੍ਭਾ ਅਹੇਸੁਂ, ਸੋਵਣ੍ਣਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਵੇਲ਼ੁਰਿਯਮਯਸ੍ਸ ਸੋਪਾਨਸ੍ਸ ਵੇਲ਼ੁਰਿਯਮਯਾ ਥਮ੍ਭਾ ਅਹੇਸੁਂ, ਫਲਿਕਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਫਲਿਕਮਯਸ੍ਸ ਸੋਪਾਨਸ੍ਸ ਫਲਿਕਮਯਾ ਥਮ੍ਭਾ ਅਹੇਸੁਂ, ਵੇਲ਼ੁਰਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਤਾ ਖੋ ਪਨਾਨਨ੍ਦ, ਪੋਕ੍ਖਰਣਿਯੋ ਦ੍ਵੀਹਿ ਵੇਦਿਕਾਹਿ ਪਰਿਕ੍ਖਿਤ੍ਤਾ ਅਹੇਸੁਂ ਏਕਾ ਵੇਦਿਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ. ਸੋਵਣ੍ਣਮਯਾਯ ਵੇਦਿਕਾਯ ਸੋਵਣ੍ਣਮਯਾ ਥਮ੍ਭਾ ਅਹੇਸੁਂ, ਰੂਪਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਰੂਪਿਯਮਯਾਯ ਵੇਦਿਕਾਯ ਰੂਪਿਯਮਯਾ ਥਮ੍ਭਾ ਅਹੇਸੁਂ, ਸੋਵਣ੍ਣਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਯਂਨੂਨਾਹਂ ਇਮਾਸੁ ਪੋਕ੍ਖਰਣੀਸੁ ਏਵਰੂਪਂ ਮਾਲਂ ਰੋਪਾਪੇਯ੍ਯਂ ਉਪ੍ਪਲਂ ਪਦੁਮਂ ਕੁਮੁਦਂ ਪੁਣ੍ਡਰੀਕਂ ਸਬ੍ਬੋਤੁਕਂ ਸਬ੍ਬਜਨਸ੍ਸ ਅਨਾਵਟ’ਨ੍ਤਿ. ਰੋਪਾਪੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਾਸੁ ਪੋਕ੍ਖਰਣੀਸੁ ਏਵਰੂਪਂ ਮਾਲਂ ਉਪ੍ਪਲਂ ਪਦੁਮਂ ਕੁਮੁਦਂ ਪੁਣ੍ਡਰੀਕਂ ਸਬ੍ਬੋਤੁਕਂ ਸਬ੍ਬਜਨਸ੍ਸ ਅਨਾਵਟਂ.

੨੫੪. ‘‘ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਯਂਨੂਨਾਹਂ ਇਮਾਸਂ ਪੋਕ੍ਖਰਣੀਨਂ ਤੀਰੇ ਨ੍ਹਾਪਕੇ ਪੁਰਿਸੇ ਠਪੇਯ੍ਯਂ, ਯੇ ਆਗਤਾਗਤਂ ਜਨਂ ਨ੍ਹਾਪੇਸ੍ਸਨ੍ਤੀ’ਤਿ. ਠਪੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਾਸਂ ਪੋਕ੍ਖਰਣੀਨਂ ਤੀਰੇ ਨ੍ਹਾਪਕੇ ਪੁਰਿਸੇ, ਯੇ ਆਗਤਾਗਤਂ ਜਨਂ ਨ੍ਹਾਪੇਸੁਂ.

‘‘ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਯਂਨੂਨਾਹਂ ਇਮਾਸਂ ਪੋਕ੍ਖਰਣੀਨਂ ਤੀਰੇ ਏਵਰੂਪਂ ਦਾਨਂ ਪਟ੍ਠਪੇਯ੍ਯਂ – ਅਨ੍ਨਂ ਅਨ੍ਨਟ੍ਠਿਕਸ੍ਸ [ਅਨ੍ਨਤ੍ਥਿਤਸ੍ਸ (ਸੀ. ਸ੍ਯਾ. ਕਂ. ਪੀ.), ਏਵਂ ਸਬ੍ਬਤ੍ਥ ਪਕਭਿਰੂਪੇਨੇਵ ਦਿਸ੍ਸਤਿ], ਪਾਨਂ ਪਾਨਟ੍ਠਿਕਸ੍ਸ, ਵਤ੍ਥਂ ਵਤ੍ਥਟ੍ਠਿਕਸ੍ਸ, ਯਾਨਂ ਯਾਨਟ੍ਠਿਕਸ੍ਸ, ਸਯਨਂ ਸਯਨਟ੍ਠਿਕਸ੍ਸ, ਇਤ੍ਥਿਂ ਇਤ੍ਥਿਟ੍ਠਿਕਸ੍ਸ, ਹਿਰਞ੍ਞਂ ਹਿਰਞ੍ਞਟ੍ਠਿਕਸ੍ਸ, ਸੁਵਣ੍ਣਂ ਸੁਵਣ੍ਣਟ੍ਠਿਕਸ੍ਸਾ’ਤਿ. ਪਟ੍ਠਪੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਾਸਂ ਪੋਕ੍ਖਰਣੀਨਂ ਤੀਰੇ ਏਵਰੂਪਂ ਦਾਨਂ – ਅਨ੍ਨਂ ਅਨ੍ਨਟ੍ਠਿਕਸ੍ਸ, ਪਾਨਂ ਪਾਨਟ੍ਠਿਕਸ੍ਸ, ਵਤ੍ਥਂ ਵਤ੍ਥਟ੍ਠਿਕਸ੍ਸ, ਯਾਨਂ ਯਾਨਟ੍ਠਿਕਸ੍ਸ, ਸਯਨਂ ਸਯਨਟ੍ਠਿਕਸ੍ਸ, ਇਤ੍ਥਿਂ ਇਤ੍ਥਿਟ੍ਠਿਕਸ੍ਸ, ਹਿਰਞ੍ਞਂ ਹਿਰਞ੍ਞਟ੍ਠਿਕਸ੍ਸ, ਸੁਵਣ੍ਣਂ ਸੁਵਣ੍ਣਟ੍ਠਿਕਸ੍ਸ.

੨੫੫. ‘‘ਅਥ ਖੋ, ਆਨਨ੍ਦ, ਬ੍ਰਾਹ੍ਮਣਗਹਪਤਿਕਾ ਪਹੂਤਂ ਸਾਪਤੇਯ੍ਯਂ ਆਦਾਯ ਰਾਜਾਨਂ ਮਹਾਸੁਦਸ੍ਸਨਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ – ‘ਇਦਂ, ਦੇਵ, ਪਹੂਤਂ ਸਾਪਤੇਯ੍ਯਂ ਦੇਵਞ੍ਞੇਵ ਉਦ੍ਦਿਸ੍ਸ ਆਭਤਂ, ਤਂ ਦੇਵੋ ਪਟਿਗ੍ਗਣ੍ਹਤੂ’ਤਿ. ‘ਅਲਂ ਭੋ, ਮਮਪਿਦਂ ਪਹੂਤਂ ਸਾਪਤੇਯ੍ਯਂ ਧਮ੍ਮਿਕੇਨ ਬਲਿਨਾ ਅਭਿਸਙ੍ਖਤਂ, ਤਞ੍ਚ ਵੋ ਹੋਤੁ, ਇਤੋ ਚ ਭਿਯ੍ਯੋ ਹਰਥਾ’ਤਿ. ਤੇ ਰਞ੍ਞਾ ਪਟਿਕ੍ਖਿਤ੍ਤਾ ਏਕਮਨ੍ਤਂ ਅਪਕ੍ਕਮ੍ਮ ਏਵਂ ਸਮਚਿਨ੍ਤੇਸੁਂ – ‘ਨ ਖੋ ਏਤਂ ਅਮ੍ਹਾਕਂ ਪਤਿਰੂਪਂ, ਯਂ ਮਯਂ ਇਮਾਨਿ ਸਾਪਤੇਯ੍ਯਾਨਿ ਪੁਨਦੇਵ ਸਕਾਨਿ ਘਰਾਨਿ ਪਟਿਹਰੇਯ੍ਯਾਮ. ਯਂਨੂਨ ਮਯਂ ਰਞ੍ਞੋ ਮਹਾਸੁਦਸ੍ਸਨਸ੍ਸ ਨਿਵੇਸਨਂ ਮਾਪੇਯ੍ਯਾਮਾ’ਤਿ. ਤੇ ਰਾਜਾਨਂ ਮਹਾਸੁਦਸ੍ਸਨਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ – ‘ਨਿਵੇਸਨਂ ਤੇ ਦੇਵ, ਮਾਪੇਸ੍ਸਾਮਾ’ਤਿ. ਅਧਿਵਾਸੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤੁਣ੍ਹੀਭਾਵੇਨ.

੨੫੬. ‘‘ਅਥ ਖੋ, ਆਨਨ੍ਦ, ਸਕ੍ਕੋ ਦੇਵਾਨਮਿਨ੍ਦੋ ਰਞ੍ਞੋ ਮਹਾਸੁਦਸ੍ਸਨਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਵਿਸ੍ਸਕਮ੍ਮਂ [ਵਿਸੁਕਮ੍ਮਂ (ਕ.)] ਦੇਵਪੁਤ੍ਤਂ ਆਮਨ੍ਤੇਸਿ – ‘ਏਹਿ ਤ੍ਵਂ, ਸਮ੍ਮ ਵਿਸ੍ਸਕਮ੍ਮ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਨਿਵੇਸਨਂ ਮਾਪੇਹਿ ਧਮ੍ਮਂ ਨਾਮ ਪਾਸਾਦ’ਨ੍ਤਿ. ‘ਏਵਂ ਭਦ੍ਦਨ੍ਤਵਾ’ਤਿ ਖੋ, ਆਨਨ੍ਦ, ਵਿਸ੍ਸਕਮ੍ਮੋ ਦੇਵਪੁਤ੍ਤੋ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਪਟਿਸ੍ਸੁਤ੍ਵਾ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ ਦੇਵੇਸੁ ਤਾਵਤਿਂਸੇਸੁ ਅਨ੍ਤਰਹਿਤੋ ਰਞ੍ਞੋ ਮਹਾਸੁਦਸ੍ਸਨਸ੍ਸ ਪੁਰਤੋ ਪਾਤੁਰਹੋਸਿ. ਅਥ ਖੋ, ਆਨਨ੍ਦ, ਵਿਸ੍ਸਕਮ੍ਮੋ ਦੇਵਪੁਤ੍ਤੋ ਰਾਜਾਨਂ ਮਹਾਸੁਦਸ੍ਸਨਂ ਏਤਦਵੋਚ – ‘ਨਿਵੇਸਨਂ ਤੇ ਦੇਵ, ਮਾਪੇਸ੍ਸਾਮਿ ਧਮ੍ਮਂ ਨਾਮ ਪਾਸਾਦ’ਨ੍ਤਿ. ਅਧਿਵਾਸੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤੁਣ੍ਹੀਭਾਵੇਨ.

‘‘ਮਾਪੇਸਿ ਖੋ, ਆਨਨ੍ਦ, ਵਿਸ੍ਸਕਮ੍ਮੋ ਦੇਵਪੁਤ੍ਤੋ ਰਞ੍ਞੋ ਮਹਾਸੁਦਸ੍ਸਨਸ੍ਸ ਨਿਵੇਸਨਂ ਧਮ੍ਮਂ ਨਾਮ ਪਾਸਾਦਂ. ਧਮ੍ਮੋ, ਆਨਨ੍ਦ, ਪਾਸਾਦੋ ਪੁਰਤ੍ਥਿਮੇਨ ਪਚ੍ਛਿਮੇਨ ਚ ਯੋਜਨਂ ਆਯਾਮੇਨ ਅਹੋਸਿ. ਉਤ੍ਤਰੇਨ ਦਕ੍ਖਿਣੇਨ ਚ ਅਡ੍ਢਯੋਜਨਂ ਵਿਤ੍ਥਾਰੇਨ. ਧਮ੍ਮਸ੍ਸ, ਆਨਨ੍ਦ, ਪਾਸਾਦਸ੍ਸ ਤਿਪੋਰਿਸਂ ਉਚ੍ਚਤਰੇਨ ਵਤ੍ਥੁ ਚਿਤਂ ਅਹੋਸਿ ਚਤੁਨ੍ਨਂ ਵਣ੍ਣਾਨਂ ਇਟ੍ਠਕਾਹਿ – ਏਕਾ ਇਟ੍ਠਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ, ਏਕਾ ਵੇਲ਼ੁਰਿਯਮਯਾ, ਏਕਾ ਫਲਿਕਮਯਾ.

‘‘ਧਮ੍ਮਸ੍ਸ, ਆਨਨ੍ਦ, ਪਾਸਾਦਸ੍ਸ ਚਤੁਰਾਸੀਤਿ ਥਮ੍ਭਸਹਸ੍ਸਾਨਿ ਅਹੇਸੁਂ ਚਤੁਨ੍ਨਂ ਵਣ੍ਣਾਨਂ – ਏਕੋ ਥਮ੍ਭੋ ਸੋਵਣ੍ਣਮਯੋ, ਏਕੋ ਰੂਪਿਯਮਯੋ, ਏਕੋ ਵੇਲ਼ੁਰਿਯਮਯੋ, ਏਕੋ ਫਲਿਕਮਯੋ. ਧਮ੍ਮੋ, ਆਨਨ੍ਦ, ਪਾਸਾਦੋ ਚਤੁਨ੍ਨਂ ਵਣ੍ਣਾਨਂ ਫਲਕੇਹਿ ਸਨ੍ਥਤੋ ਅਹੋਸਿ – ਏਕਂ ਫਲਕਂ ਸੋਵਣ੍ਣਮਯਂ, ਏਕਂ ਰੂਪਿਯਮਯਂ, ਏਕਂ ਵੇਲ਼ੁਰਿਯਮਯਂ, ਏਕਂ ਫਲਿਕਮਯਂ.

‘‘ਧਮ੍ਮਸ੍ਸ, ਆਨਨ੍ਦ, ਪਾਸਾਦਸ੍ਸ ਚਤੁਵੀਸਤਿ ਸੋਪਾਨਾਨਿ ਅਹੇਸੁਂ ਚਤੁਨ੍ਨਂ ਵਣ੍ਣਾਨਂ – ਏਕਂ ਸੋਪਾਨਂ ਸੋਵਣ੍ਣਮਯਂ, ਏਕਂ ਰੂਪਿਯਮਯਂ, ਏਕਂ ਵੇਲ਼ੁਰਿਯਮਯਂ, ਏਕਂ ਫਲਿਕਮਯਂ. ਸੋਵਣ੍ਣਮਯਸ੍ਸ ਸੋਪਾਨਸ੍ਸ ਸੋਵਣ੍ਣਮਯਾ ਥਮ੍ਭਾ ਅਹੇਸੁਂ ਰੂਪਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਰੂਪਿਯਮਯਸ੍ਸ ਸੋਪਾਨਸ੍ਸ ਰੂਪਿਯਮਯਾ ਥਮ੍ਭਾ ਅਹੇਸੁਂ ਸੋਵਣ੍ਣਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਵੇਲ਼ੁਰਿਯਮਯਸ੍ਸ ਸੋਪਾਨਸ੍ਸ ਵੇਲ਼ੁਰਿਯਮਯਾ ਥਮ੍ਭਾ ਅਹੇਸੁਂ ਫਲਿਕਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਫਲਿਕਮਯਸ੍ਸ ਸੋਪਾਨਸ੍ਸ ਫਲਿਕਮਯਾ ਥਮ੍ਭਾ ਅਹੇਸੁਂ ਵੇਲ਼ੁਰਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ.

‘‘ਧਮ੍ਮੇ, ਆਨਨ੍ਦ, ਪਾਸਾਦੇ ਚਤੁਰਾਸੀਤਿ ਕੂਟਾਗਾਰਸਹਸ੍ਸਾਨਿ ਅਹੇਸੁਂ ਚਤੁਨ੍ਨਂ ਵਣ੍ਣਾਨਂ – ਏਕਂ ਕੂਟਾਗਾਰਂ ਸੋਵਣ੍ਣਮਯਂ, ਏਕਂ ਰੂਪਿਯਮਯਂ, ਏਕਂ ਵੇਲ਼ੁਰਿਯਮਯਂ, ਏਕਂ ਫਲਿਕਮਯਂ. ਸੋਵਣ੍ਣਮਯੇ ਕੂਟਾਗਾਰੇ ਰੂਪਿਯਮਯੋ ਪਲ੍ਲਙ੍ਕੋ ਪਞ੍ਞਤ੍ਤੋ ਅਹੋਸਿ, ਰੂਪਿਯਮਯੇ ਕੂਟਾਗਾਰੇ ਸੋਵਣ੍ਣਮਯੋ ਪਲ੍ਲਙ੍ਕੋ ਪਞ੍ਞਤ੍ਤੋ ਅਹੋਸਿ, ਵੇਲ਼ੁਰਿਯਮਯੇ ਕੂਟਾਗਾਰੇ ਦਨ੍ਤਮਯੋ ਪਲ੍ਲਙ੍ਕੋ ਪਞ੍ਞਤ੍ਤੋ ਅਹੋਸਿ, ਫਲਿਕਮਯੇ ਕੂਟਾਗਾਰੇ ਸਾਰਮਯੋ ਪਲ੍ਲਙ੍ਕੋ ਪਞ੍ਞਤ੍ਤੋ ਅਹੋਸਿ. ਸੋਵਣ੍ਣਮਯਸ੍ਸ ਕੂਟਾਗਾਰਸ੍ਸ ਦ੍ਵਾਰੇ ਰੂਪਿਯਮਯੋ ਤਾਲੋ ਠਿਤੋ ਅਹੋਸਿ, ਤਸ੍ਸ ਰੂਪਿਯਮਯੋ ਖਨ੍ਧੋ ਸੋਵਣ੍ਣਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਰੂਪਿਯਮਯਸ੍ਸ ਕੂਟਾਗਾਰਸ੍ਸ ਦ੍ਵਾਰੇ ਸੋਵਣ੍ਣਮਯੋ ਤਾਲੋ ਠਿਤੋ ਅਹੋਸਿ, ਤਸ੍ਸ ਸੋਵਣ੍ਣਮਯੋ ਖਨ੍ਧੋ, ਰੂਪਿਯਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਵੇਲ਼ੁਰਿਯਮਯਸ੍ਸ ਕੂਟਾਗਾਰਸ੍ਸ ਦ੍ਵਾਰੇ ਫਲਿਕਮਯੋ ਤਾਲੋ ਠਿਤੋ ਅਹੋਸਿ, ਤਸ੍ਸ ਫਲਿਕਮਯੋ ਖਨ੍ਧੋ, ਵੇਲ਼ੁਰਿਯਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਫਲਿਕਮਯਸ੍ਸ ਕੂਟਾਗਾਰਸ੍ਸ ਦ੍ਵਾਰੇ ਵੇਲ਼ੁਰਿਯਮਯੋ ਤਾਲੋ ਠਿਤੋ ਅਹੋਸਿ, ਤਸ੍ਸ ਵੇਲ਼ੁਰਿਯਮਯੋ ਖਨ੍ਧੋ, ਫਲਿਕਮਯਾਨਿ ਪਤ੍ਤਾਨਿ ਚ ਫਲਾਨਿ ਚ.

੨੫੭. ‘‘ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਯਂਨੂਨਾਹਂ ਮਹਾਵਿਯੂਹਸ੍ਸ ਕੂਟਾਗਾਰਸ੍ਸ ਦ੍ਵਾਰੇ ਸਬ੍ਬਸੋਵਣ੍ਣਮਯਂ ਤਾਲਵਨਂ ਮਾਪੇਯ੍ਯਂ, ਯਤ੍ਥ ਦਿਵਾਵਿਹਾਰਂ ਨਿਸੀਦਿਸ੍ਸਾਮੀ’ਤਿ. ਮਾਪੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਮਹਾਵਿਯੂਹਸ੍ਸ ਕੂਟਾਗਾਰਸ੍ਸ ਦ੍ਵਾਰੇ ਸਬ੍ਬਸੋਵਣ੍ਣਮਯਂ ਤਾਲਵਨਂ, ਯਤ੍ਥ ਦਿਵਾਵਿਹਾਰਂ ਨਿਸੀਦਿ. ਧਮ੍ਮੋ, ਆਨਨ੍ਦ, ਪਾਸਾਦੋ ਦ੍ਵੀਹਿ ਵੇਦਿਕਾਹਿ ਪਰਿਕ੍ਖਿਤ੍ਤੋ ਅਹੋਸਿ, ਏਕਾ ਵੇਦਿਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ. ਸੋਵਣ੍ਣਮਯਾਯ ਵੇਦਿਕਾਯ ਸੋਵਣ੍ਣਮਯਾ ਥਮ੍ਭਾ ਅਹੇਸੁਂ, ਰੂਪਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਰੂਪਿਯਮਯਾਯ ਵੇਦਿਕਾਯ ਰੂਪਿਯਮਯਾ ਥਮ੍ਭਾ ਅਹੇਸੁਂ, ਸੋਵਣ੍ਣਮਯਾ ਸੂਚਿਯੋ ਚ ਉਣ੍ਹੀਸਞ੍ਚ.

੨੫੮. ‘‘ਧਮ੍ਮੋ, ਆਨਨ੍ਦ, ਪਾਸਾਦੋ ਦ੍ਵੀਹਿ ਕਿਙ੍ਕਿਣਿਕਜਾਲੇਹਿ [ਕਿਙ੍ਕਣਿਕਜਾਲੇਹਿ (ਸ੍ਯਾ. ਕ.)] ਪਰਿਕ੍ਖਿਤ੍ਤੋ ਅਹੋਸਿ – ਏਕਂ ਜਾਲਂ ਸੋਵਣ੍ਣਮਯਂ ਏਕਂ ਰੂਪਿਯਮਯਂ. ਸੋਵਣ੍ਣਮਯਸ੍ਸ ਜਾਲਸ੍ਸ ਰੂਪਿਯਮਯਾ ਕਿਙ੍ਕਿਣਿਕਾ ਅਹੇਸੁਂ, ਰੂਪਿਯਮਯਸ੍ਸ ਜਾਲਸ੍ਸ ਸੋਵਣ੍ਣਮਯਾ ਕਿਙ੍ਕਿਣਿਕਾ ਅਹੇਸੁਂ. ਤੇਸਂ ਖੋ ਪਨਾਨਨ੍ਦ, ਕਿਙ੍ਕਿਣਿਕਜਾਲਾਨਂ ਵਾਤੇਰਿਤਾਨਂ ਸਦ੍ਦੋ ਅਹੋਸਿ ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ. ਸੇਯ੍ਯਥਾਪਿ, ਆਨਨ੍ਦ, ਪਞ੍ਚਙ੍ਗਿਕਸ੍ਸ ਤੂਰਿਯਸ੍ਸ ਸੁਵਿਨੀਤਸ੍ਸ ਸੁਪ੍ਪਟਿਤਾਲ਼ਿਤਸ੍ਸ ਸੁਕੁਸਲੇਹਿ [ਕੁਸਲੇਹਿ (ਸੀ. ਸ੍ਯਾ. ਕਂ. ਪੀ.)] ਸਮਨ੍ਨਾਹਤਸ੍ਸ ਸਦ੍ਦੋ ਹੋਤਿ, ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ, ਏਵਮੇਵ ਖੋ, ਆਨਨ੍ਦ, ਤੇਸਂ ਕਿਙ੍ਕਿਣਿਕਜਾਲਾਨਂ ਵਾਤੇਰਿਤਾਨਂ ਸਦ੍ਦੋ ਅਹੋਸਿ ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ. ਯੇ ਖੋ ਪਨਾਨਨ੍ਦ, ਤੇਨ ਸਮਯੇਨ ਕੁਸਾਵਤਿਯਾ ਰਾਜਧਾਨਿਯਾ ਧੁਤ੍ਤਾ ਅਹੇਸੁਂ ਸੋਣ੍ਡਾ ਪਿਪਾਸਾ, ਤੇ ਤੇਸਂ ਕਿਙ੍ਕਿਣਿਕਜਾਲਾਨਂ ਵਾਤੇਰਿਤਾਨਂ ਸਦ੍ਦੇਨ ਪਰਿਚਾਰੇਸੁਂ. ਨਿਟ੍ਠਿਤੋ ਖੋ ਪਨਾਨਨ੍ਦ, ਧਮ੍ਮੋ ਪਾਸਾਦੋ ਦੁਦ੍ਦਿਕ੍ਖੋ ਅਹੋਸਿ ਮੁਸਤਿ ਚਕ੍ਖੂਨਿ. ਸੇਯ੍ਯਥਾਪਿ, ਆਨਨ੍ਦ, ਵਸ੍ਸਾਨਂ ਪਚ੍ਛਿਮੇ ਮਾਸੇ ਸਰਦਸਮਯੇ ਵਿਦ੍ਧੇ ਵਿਗਤਵਲਾਹਕੇ ਦੇਵੇ ਆਦਿਚ੍ਚੋ ਨਭਂ ਅਬ੍ਭੁਸ੍ਸਕ੍ਕਮਾਨੋ [ਅਬ੍ਭੁਗ੍ਗਮਮਾਨੋ (ਸੀ. ਪੀ. ਕ.)] ਦੁਦ੍ਦਿਕ੍ਖੋ [ਦੁਦਿਕ੍ਖੋ (ਪੀ.)] ਹੋਤਿ ਮੁਸਤਿ ਚਕ੍ਖੂਨਿ; ਏਵਮੇਵ ਖੋ, ਆਨਨ੍ਦ, ਧਮ੍ਮੋ ਪਾਸਾਦੋ ਦੁਦ੍ਦਿਕ੍ਖੋ ਅਹੋਸਿ ਮੁਸਤਿ ਚਕ੍ਖੂਨਿ.

੨੫੯. ‘‘ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਯਂਨੂਨਾਹਂ ਧਮ੍ਮਸ੍ਸ ਪਾਸਾਦਸ੍ਸ ਪੁਰਤੋ ਧਮ੍ਮਂ ਨਾਮ ਪੋਕ੍ਖਰਣਿਂ ਮਾਪੇਯ੍ਯ’ਨ੍ਤਿ. ਮਾਪੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਧਮ੍ਮਸ੍ਸ ਪਾਸਾਦਸ੍ਸ ਪੁਰਤੋ ਧਮ੍ਮਂ ਨਾਮ ਪੋਕ੍ਖਰਣਿਂ. ਧਮ੍ਮਾ, ਆਨਨ੍ਦ, ਪੋਕ੍ਖਰਣੀ ਪੁਰਤ੍ਥਿਮੇਨ ਪਚ੍ਛਿਮੇਨ ਚ ਯੋਜਨਂ ਆਯਾਮੇਨ ਅਹੋਸਿ, ਉਤ੍ਤਰੇਨ ਦਕ੍ਖਿਣੇਨ ਚ ਅਡ੍ਢਯੋਜਨਂ ਵਿਤ੍ਥਾਰੇਨ. ਧਮ੍ਮਾ, ਆਨਨ੍ਦ, ਪੋਕ੍ਖਰਣੀ ਚਤੁਨ੍ਨਂ ਵਣ੍ਣਾਨਂ ਇਟ੍ਠਕਾਹਿ ਚਿਤਾ ਅਹੋਸਿ – ਏਕਾ ਇਟ੍ਠਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ, ਏਕਾ ਵੇਲ਼ੁਰਿਯਮਯਾ, ਏਕਾ ਫਲਿਕਮਯਾ.

‘‘ਧਮ੍ਮਾਯ, ਆਨਨ੍ਦ, ਪੋਕ੍ਖਰਣਿਯਾ ਚਤੁਵੀਸਤਿ ਸੋਪਾਨਾਨਿ ਅਹੇਸੁਂ ਚਤੁਨ੍ਨਂ ਵਣ੍ਣਾਨਂ – ਏਕਂ ਸੋਪਾਨਂ ਸੋਵਣ੍ਣਮਯਂ, ਏਕਂ ਰੂਪਿਯਮਯਂ, ਏਕਂ ਵੇਲ਼ੁਰਿਯਮਯਂ, ਏਕਂ ਫਲਿਕਮਯਂ. ਸੋਵਣ੍ਣਮਯਸ੍ਸ ਸੋਪਾਨਸ੍ਸ ਸੋਵਣ੍ਣਮਯਾ ਥਮ੍ਭਾ ਅਹੇਸੁਂ ਰੂਪਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਰੂਪਿਯਮਯਸ੍ਸ ਸੋਪਾਨਸ੍ਸ ਰੂਪਿਯਮਯਾ ਥਮ੍ਭਾ ਅਹੇਸੁਂ ਸੋਵਣ੍ਣਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਵੇਲ਼ੁਰਿਯਮਯਸ੍ਸ ਸੋਪਾਨਸ੍ਸ ਵੇਲ਼ੁਰਿਯਮਯਾ ਥਮ੍ਭਾ ਅਹੇਸੁਂ ਫਲਿਕਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਫਲਿਕਮਯਸ੍ਸ ਸੋਪਾਨਸ੍ਸ ਫਲਿਕਮਯਾ ਥਮ੍ਭਾ ਅਹੇਸੁਂ ਵੇਲ਼ੁਰਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ.

‘‘ਧਮ੍ਮਾ, ਆਨਨ੍ਦ, ਪੋਕ੍ਖਰਣੀ ਦ੍ਵੀਹਿ ਵੇਦਿਕਾਹਿ ਪਰਿਕ੍ਖਿਤ੍ਤਾ ਅਹੋਸਿ – ਏਕਾ ਵੇਦਿਕਾ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ. ਸੋਵਣ੍ਣਮਯਾਯ ਵੇਦਿਕਾਯ ਸੋਵਣ੍ਣਮਯਾ ਥਮ੍ਭਾ ਅਹੇਸੁਂ ਰੂਪਿਯਮਯਾ ਸੂਚਿਯੋ ਚ ਉਣ੍ਹੀਸਞ੍ਚ. ਰੂਪਿਯਮਯਾਯ ਵੇਦਿਕਾਯ ਰੂਪਿਯਮਯਾ ਥਮ੍ਭਾ ਅਹੇਸੁਂ ਸੋਵਣ੍ਣਮਯਾ ਸੂਚਿਯੋ ਚ ਉਣ੍ਹੀਸਞ੍ਚ.

‘‘ਧਮ੍ਮਾ, ਆਨਨ੍ਦ, ਪੋਕ੍ਖਰਣੀ ਸਤ੍ਤਹਿ ਤਾਲਪਨ੍ਤੀਹਿ ਪਰਿਕ੍ਖਿਤ੍ਤਾ ਅਹੋਸਿ – ਏਕਾ ਤਾਲਪਨ੍ਤਿ ਸੋਵਣ੍ਣਮਯਾ, ਏਕਾ ਰੂਪਿਯਮਯਾ, ਏਕਾ ਵੇਲ਼ੁਰਿਯਮਯਾ, ਏਕਾ ਫਲਿਕਮਯਾ, ਏਕਾ ਲੋਹਿਤਙ੍ਕਮਯਾ, ਏਕਾ ਮਸਾਰਗਲ੍ਲਮਯਾ, ਏਕਾ ਸਬ੍ਬਰਤਨਮਯਾ. ਸੋਵਣ੍ਣਮਯਸ੍ਸ ਤਾਲਸ੍ਸ ਸੋਵਣ੍ਣਮਯੋ ਖਨ੍ਧੋ ਅਹੋਸਿ ਰੂਪਿਯਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਰੂਪਿਯਮਯਸ੍ਸ ਤਾਲਸ੍ਸ ਰੂਪਿਯਮਯੋ ਖਨ੍ਧੋ ਅਹੋਸਿ ਸੋਵਣ੍ਣਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਵੇਲ਼ੁਰਿਯਮਯਸ੍ਸ ਤਾਲਸ੍ਸ ਵੇਲ਼ੁਰਿਯਮਯੋ ਖਨ੍ਧੋ ਅਹੋਸਿ ਫਲਿਕਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਫਲਿਕਮਯਸ੍ਸ ਤਾਲਸ੍ਸ ਫਲਿਕਮਯੋ ਖਨ੍ਧੋ ਅਹੋਸਿ ਵੇਲ਼ੁਰਿਯਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਲੋਹਿਤਙ੍ਕਮਯਸ੍ਸ ਤਾਲਸ੍ਸ ਲੋਹਿਤਙ੍ਕਮਯੋ ਖਨ੍ਧੋ ਅਹੋਸਿ ਮਸਾਰਗਲ੍ਲਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਮਸਾਰਗਲ੍ਲਮਯਸ੍ਸ ਤਾਲਸ੍ਸ ਮਸਾਰਗਲ੍ਲਮਯੋ ਖਨ੍ਧੋ ਅਹੋਸਿ ਲੋਹਿਤਙ੍ਕਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਸਬ੍ਬਰਤਨਮਯਸ੍ਸ ਤਾਲਸ੍ਸ ਸਬ੍ਬਰਤਨਮਯੋ ਖਨ੍ਧੋ ਅਹੋਸਿ, ਸਬ੍ਬਰਤਨਮਯਾਨਿ ਪਤ੍ਤਾਨਿ ਚ ਫਲਾਨਿ ਚ. ਤਾਸਂ ਖੋ ਪਨਾਨਨ੍ਦ, ਤਾਲਪਨ੍ਤੀਨਂ ਵਾਤੇਰਿਤਾਨਂ ਸਦ੍ਦੋ ਅਹੋਸਿ, ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ. ਸੇਯ੍ਯਥਾਪਿ, ਆਨਨ੍ਦ, ਪਞ੍ਚਙ੍ਗਿਕਸ੍ਸ ਤੂਰਿਯਸ੍ਸ ਸੁਵਿਨੀਤਸ੍ਸ ਸੁਪ੍ਪਟਿਤਾਲ਼ਿਤਸ੍ਸ ਸੁਕੁਸਲੇਹਿ ਸਮਨ੍ਨਾਹਤਸ੍ਸ ਸਦ੍ਦੋ ਹੋਤਿ ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ, ਏਵਮੇਵ ਖੋ, ਆਨਨ੍ਦ, ਤਾਸਂ ਤਾਲਪਨ੍ਤੀਨਂ ਵਾਤੇਰਿਤਾਨਂ ਸਦ੍ਦੋ ਅਹੋਸਿ ਵਗ੍ਗੁ ਚ ਰਜਨੀਯੋ ਚ ਖਮਨੀਯੋ ਚ ਮਦਨੀਯੋ ਚ. ਯੇ ਖੋ ਪਨਾਨਨ੍ਦ, ਤੇਨ ਸਮਯੇਨ ਕੁਸਾਵਤਿਯਾ ਰਾਜਧਾਨਿਯਾ ਧੁਤ੍ਤਾ ਅਹੇਸੁਂ ਸੋਣ੍ਡਾ ਪਿਪਾਸਾ, ਤੇ ਤਾਸਂ ਤਾਲਪਨ੍ਤੀਨਂ ਵਾਤੇਰਿਤਾਨਂ ਸਦ੍ਦੇਨ ਪਰਿਚਾਰੇਸੁਂ.

‘‘ਨਿਟ੍ਠਿਤੇ ਖੋ ਪਨਾਨਨ੍ਦ, ਧਮ੍ਮੇ ਪਾਸਾਦੇ ਨਿਟ੍ਠਿਤਾਯ ਧਮ੍ਮਾਯ ਚ ਪੋਕ੍ਖਰਣਿਯਾ ਰਾਜਾ ਮਹਾਸੁਦਸ੍ਸਨੋ ‘ਯੇ [ਯੇ ਕੋ ਪਨਾਨਨ੍ਦ (ਸ੍ਯਾ. ਕ.)] ਤੇਨ ਸਮਯੇਨ ਸਮਣੇਸੁ ਵਾ ਸਮਣਸਮ੍ਮਤਾ ਬ੍ਰਾਹ੍ਮਣੇਸੁ ਵਾ ਬ੍ਰਾਹ੍ਮਣਸਮ੍ਮਤਾ’, ਤੇ ਸਬ੍ਬਕਾਮੇਹਿ ਸਨ੍ਤਪ੍ਪੇਤ੍ਵਾ ਧਮ੍ਮਂ ਪਾਸਾਦਂ ਅਭਿਰੁਹਿ.

ਪਠਮਭਾਣਵਾਰੋ.

ਝਾਨਸਮ੍ਪਤ੍ਤਿ

੨੬੦. ‘‘ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਕਿਸ੍ਸ ਨੁ ਖੋ ਮੇ ਇਦਂ ਕਮ੍ਮਸ੍ਸ ਫਲਂ ਕਿਸ੍ਸ ਕਮ੍ਮਸ੍ਸ ਵਿਪਾਕੋ, ਯੇਨਾਹਂ ਏਤਰਹਿ ਏਵਂਮਹਿਦ੍ਧਿਕੋ ਏਵਂਮਹਾਨੁਭਾਵੋ’ਤਿ? ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਤਿਣ੍ਣਂ ਖੋ ਮੇ ਇਦਂ ਕਮ੍ਮਾਨਂ ਫਲਂ ਤਿਣ੍ਣਂ ਕਮ੍ਮਾਨਂ ਵਿਪਾਕੋ, ਯੇਨਾਹਂ ਏਤਰਹਿ ਏਵਂਮਹਿਦ੍ਧਿਕੋ ਏਵਂਮਹਾਨੁਭਾਵੋ, ਸੇਯ੍ਯਥਿਦਂ ਦਾਨਸ੍ਸ ਦਮਸ੍ਸ ਸਂਯਮਸ੍ਸਾ’ਤਿ.

‘‘ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਯੇਨ ਮਹਾਵਿਯੂਹਂ ਕੂਟਾਗਾਰਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਹਾਵਿਯੂਹਸ੍ਸ ਕੂਟਾਗਾਰਸ੍ਸ ਦ੍ਵਾਰੇ ਠਿਤੋ ਉਦਾਨਂ ਉਦਾਨੇਸਿ – ‘ਤਿਟ੍ਠ, ਕਾਮਵਿਤਕ੍ਕ, ਤਿਟ੍ਠ, ਬ੍ਯਾਪਾਦਵਿਤਕ੍ਕ, ਤਿਟ੍ਠ, ਵਿਹਿਂਸਾਵਿਤਕ੍ਕ. ਏਤ੍ਤਾਵਤਾ ਕਾਮਵਿਤਕ੍ਕ, ਏਤ੍ਤਾਵਤਾ ਬ੍ਯਾਪਾਦਵਿਤਕ੍ਕ, ਏਤ੍ਤਾਵਤਾ ਵਿਹਿਂਸਾਵਿਤਕ੍ਕਾ’ਤਿ.

੨੬੧. ‘‘ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਮਹਾਵਿਯੂਹਂ ਕੂਟਾਗਾਰਂ ਪਵਿਸਿਤ੍ਵਾ ਸੋਵਣ੍ਣਮਯੇ ਪਲ੍ਲਙ੍ਕੇ ਨਿਸਿਨ੍ਨੋ ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਾਸਿ. ਵਿਤਕ੍ਕਵਿਚਾਰਾਨਂ ਵੂਪਸਮਾ ਅਜ੍ਝਤ੍ਤਂ ਸਮ੍ਪਸਾਦਨਂ ਚੇਤਸੋ ਏਕੋਦਿਭਾਵਂ ਅਵਿਤਕ੍ਕਂ ਅਵਿਚਾਰਂ ਸਮਾਧਿਜਂ ਪੀਤਿਸੁਖਂ ਦੁਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਾਸਿ. ਪੀਤਿਯਾ ਚ ਵਿਰਾਗਾ ਉਪੇਕ੍ਖਕੋ ਚ ਵਿਹਾਸਿ, ਸਤੋ ਚ ਸਮ੍ਪਜਾਨੋ ਸੁਖਞ੍ਚ ਕਾਯੇਨ ਪਟਿਸਂਵੇਦੇਸਿ, ਯਂ ਤਂ ਅਰਿਯਾ ਆਚਿਕ੍ਖਨ੍ਤਿ – ‘ਉਪੇਕ੍ਖਕੋ ਸਤਿਮਾ ਸੁਖਵਿਹਾਰੀ’ਤਿ ਤਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਾਸਿ. ਸੁਖਸ੍ਸ ਚ ਪਹਾਨਾ ਦੁਕ੍ਖਸ੍ਸ ਚ ਪਹਾਨਾ ਪੁਬ੍ਬੇਵ ਸੋਮਨਸ੍ਸਦੋਮਨਸ੍ਸਾਨਂ ਅਤ੍ਥਙ੍ਗਮਾ ਅਦੁਕ੍ਖਮਸੁਖਂ ਉਪੇਕ੍ਖਾਸਤਿਪਾਰਿਸੁਦ੍ਧਿਂ ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਾਸਿ.

੨੬੨. ‘‘ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਮਹਾਵਿਯੂਹਾ ਕੂਟਾਗਾਰਾ ਨਿਕ੍ਖਮਿਤ੍ਵਾ ਸੋਵਣ੍ਣਮਯਂ ਕੂਟਾਗਾਰਂ ਪਵਿਸਿਤ੍ਵਾ ਰੂਪਿਯਮਯੇ ਪਲ੍ਲਙ੍ਕੇ ਨਿਸਿਨ੍ਨੋ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਾਸਿ. ਤਥਾ ਦੁਤਿਯਂ ਤਥਾ ਤਤਿਯਂ ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ ਫਰਿਤ੍ਵਾ ਵਿਹਾਸਿ. ਕਰੁਣਾਸਹਗਤੇਨ ਚੇਤਸਾ…ਪੇ… ਮੁਦਿਤਾਸਹਗਤੇਨ ਚੇਤਸਾ…ਪੇ… ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਾਸਿ ਤਥਾ ਦੁਤਿਯਂ ਤਥਾ ਤਤਿਯਂ ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਉਪੇਕ੍ਖਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ ਫਰਿਤ੍ਵਾ ਵਿਹਾਸਿ.

ਚਤੁਰਾਸੀਤਿ ਨਗਰਸਹਸ੍ਸਾਦਿ

੨੬੩. ‘‘ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ ਚਤੁਰਾਸੀਤਿ ਨਗਰਸਹਸ੍ਸਾਨਿ ਅਹੇਸੁਂ ਕੁਸਾਵਤੀਰਾਜਧਾਨਿਪ੍ਪਮੁਖਾਨਿ; ਚਤੁਰਾਸੀਤਿ ਪਾਸਾਦਸਹਸ੍ਸਾਨਿ ਅਹੇਸੁਂ ਧਮ੍ਮਪਾਸਾਦਪ੍ਪਮੁਖਾਨਿ; ਚਤੁਰਾਸੀਤਿ ਕੂਟਾਗਾਰਸਹਸ੍ਸਾਨਿ ਅਹੇਸੁਂ ਮਹਾਵਿਯੂਹਕੂਟਾਗਾਰਪ੍ਪਮੁਖਾਨਿ; ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਅਹੇਸੁਂ ਸੋਵਣ੍ਣਮਯਾਨਿ ਰੂਪਿਯਮਯਾਨਿ ਦਨ੍ਤਮਯਾਨਿ ਸਾਰਮਯਾਨਿ ਗੋਨਕਤ੍ਥਤਾਨਿ ਪਟਿਕਤ੍ਥਤਾਨਿ ਪਟਲਿਕਤ੍ਥਤਾਨਿ ਕਦਲਿਮਿਗਪਵਰਪਚ੍ਚਤ੍ਥਰਣਾਨਿ ਸਉਤ੍ਤਰਚ੍ਛਦਾਨਿ ਉਭਤੋਲੋਹਿਤਕੂਪਧਾਨਾਨਿ; ਚਤੁਰਾਸੀਤਿ ਨਾਗਸਹਸ੍ਸਾਨਿ ਅਹੇਸੁਂ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਉਪੋਸਥਨਾਗਰਾਜਪ੍ਪਮੁਖਾਨਿ; ਚਤੁਰਾਸੀਤਿ ਅਸ੍ਸਸਹਸ੍ਸਾਨਿ ਅਹੇਸੁਂ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵਲਾਹਕਅਸ੍ਸਰਾਜਪ੍ਪਮੁਖਾਨਿ; ਚਤੁਰਾਸੀਤਿ ਰਥਸਹਸ੍ਸਾਨਿ ਅਹੇਸੁਂ ਸੀਹਚਮ੍ਮਪਰਿਵਾਰਾਨਿ ਬ੍ਯਗ੍ਘਚਮ੍ਮਪਰਿਵਾਰਾਨਿ ਦੀਪਿਚਮ੍ਮਪਰਿਵਾਰਾਨਿ ਪਣ੍ਡੁਕਮ੍ਬਲਪਰਿਵਾਰਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵੇਜਯਨ੍ਤਰਥਪ੍ਪਮੁਖਾਨਿ; ਚਤੁਰਾਸੀਤਿ ਮਣਿਸਹਸ੍ਸਾਨਿ ਅਹੇਸੁਂ ਮਣਿਰਤਨਪ੍ਪਮੁਖਾਨਿ; ਚਤੁਰਾਸੀਤਿ ਇਤ੍ਥਿਸਹਸ੍ਸਾਨਿ ਅਹੇਸੁਂ ਸੁਭਦ੍ਦਾਦੇਵਿਪ੍ਪਮੁਖਾਨਿ; ਚਤੁਰਾਸੀਤਿ ਗਹਪਤਿਸਹਸ੍ਸਾਨਿ ਅਹੇਸੁਂ ਗਹਪਤਿਰਤਨਪ੍ਪਮੁਖਾਨਿ; ਚਤੁਰਾਸੀਤਿ ਖਤ੍ਤਿਯਸਹਸ੍ਸਾਨਿ ਅਹੇਸੁਂ ਅਨੁਯਨ੍ਤਾਨਿ ਪਰਿਣਾਯਕਰਤਨਪ੍ਪਮੁਖਾਨਿ; ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਅਹੇਸੁਂ ਦੁਹਸਨ੍ਦਨਾਨਿ [ਦੁਕੂਲਸਨ੍ਦਨਾਨਿ(ਪੀ.)] ਦੁਕੂਲਸਨ੍ਦਾਨਾਨਿ [ਦੁਕੂਲਸਨ੍ਦਨਾਨਿ (ਪੀ.) ਦੁਕੂਲਸਨ੍ਦਾਨਾਨਿ (ਸਂ. ਨਿ. ੩.੯੬)] ਕਂਸੂਪਧਾਰਣਾਨਿ; ਚਤੁਰਾਸੀਤਿ ਵਤ੍ਥਕੋਟਿਸਹਸ੍ਸਾਨਿ ਅਹੇਸੁਂ ਖੋਮਸੁਖੁਮਾਨਂ ਕਪ੍ਪਾਸਿਕਸੁਖੁਮਾਨਂ ਕੋਸੇਯ੍ਯਸੁਖੁਮਾਨਂ ਕਮ੍ਬਲਸੁਖੁਮਾਨਂ; (ਰਞ੍ਞੋ, ਆਨਨ੍ਦ, ਮਹਾਸੁਦਸ੍ਸਨਸ੍ਸ) [( ) ਸੀ. ਇਪੋਤ੍ਥਕੇਸੁ ਨਤ੍ਥਿ] ਚਤੁਰਾਸੀਤਿ ਥਾਲਿਪਾਕਸਹਸ੍ਸਾਨਿ ਅਹੇਸੁਂ ਸਾਯਂ ਪਾਤਂ ਭਤ੍ਤਾਭਿਹਾਰੋ ਅਭਿਹਰਿਯਿਤ੍ਥ.

੨੬੪. ‘‘ਤੇਨ ਖੋ ਪਨਾਨਨ੍ਦ, ਸਮਯੇਨ ਰਞ੍ਞੋ ਮਹਾਸੁਦਸ੍ਸਨਸ੍ਸ ਚਤੁਰਾਸੀਤਿ ਨਾਗਸਹਸ੍ਸਾਨਿ ਸਾਯਂ ਪਾਤਂ ਉਪਟ੍ਠਾਨਂ ਆਗਚ੍ਛਨ੍ਤਿ. ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਏਤਦਹੋਸਿ – ‘ਇਮਾਨਿ ਖੋ ਮੇ ਚਤੁਰਾਸੀਤਿ ਨਾਗਸਹਸ੍ਸਾਨਿ ਸਾਯਂ ਪਾਤਂ ਉਪਟ੍ਠਾਨਂ ਆਗਚ੍ਛਨ੍ਤਿ, ਯਂਨੂਨ ਵਸ੍ਸਸਤਸ੍ਸ ਵਸ੍ਸਸਤਸ੍ਸ ਅਚ੍ਚਯੇਨ ਦ੍ਵੇਚਤ੍ਤਾਲੀਸਂ ਦ੍ਵੇਚਤ੍ਤਾਲੀਸਂ ਨਾਗਸਹਸ੍ਸਾਨਿ ਸਕਿਂ ਸਕਿਂ ਉਪਟ੍ਠਾਨਂ ਆਗਚ੍ਛੇਯ੍ਯੁ’ਨ੍ਤਿ. ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਪਰਿਣਾਯਕਰਤਨਂ ਆਮਨ੍ਤੇਸਿ – ‘ਇਮਾਨਿ ਖੋ ਮੇ, ਸਮ੍ਮ ਪਰਿਣਾਯਕਰਤਨ, ਚਤੁਰਾਸੀਤਿ ਨਾਗਸਹਸ੍ਸਾਨਿ ਸਾਯਂ ਪਾਤਂ ਉਪਟ੍ਠਾਨਂ ਆਗਚ੍ਛਨ੍ਤਿ, ਤੇਨ ਹਿ, ਸਮ੍ਮ ਪਰਿਣਾਯਕਰਤਨ, ਵਸ੍ਸਸਤਸ੍ਸ ਵਸ੍ਸਸਤਸ੍ਸ ਅਚ੍ਚਯੇਨ ਦ੍ਵੇਚਤ੍ਤਾਲੀਸਂ ਦ੍ਵੇਚਤ੍ਤਾਲੀਸਂ ਨਾਗਸਹਸ੍ਸਾਨਿ ਸਕਿਂ ਸਕਿਂ ਉਪਟ੍ਠਾਨਂ ਆਗਚ੍ਛਨ੍ਤੂ’ਤਿ. ‘ਏਵਂ, ਦੇਵਾ’ਤਿ ਖੋ, ਆਨਨ੍ਦ, ਪਰਿਣਾਯਕਰਤਨਂ ਰਞ੍ਞੋ ਮਹਾਸੁਦਸ੍ਸਨਸ੍ਸ ਪਚ੍ਚਸ੍ਸੋਸਿ. ਅਥ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਅਪਰੇਨ ਸਮਯੇਨ ਵਸ੍ਸਸਤਸ੍ਸ ਵਸ੍ਸਸਤਸ੍ਸ ਅਚ੍ਚਯੇਨ ਦ੍ਵੇਚਤ੍ਤਾਲੀਸਂ ਦ੍ਵੇਚਤ੍ਤਾਲੀਸਂ ਨਾਗਸਹਸ੍ਸਾਨਿ ਸਕਿਂ ਸਕਿਂ ਉਪਟ੍ਠਾਨਂ ਆਗਮਂਸੁ.

ਸੁਭਦ੍ਦਾਦੇਵਿਉਪਸਙ੍ਕਮਨਂ

੨੬੫. ‘‘ਅਥ ਖੋ, ਆਨਨ੍ਦ, ਸੁਭਦ੍ਦਾਯ ਦੇਵਿਯਾ ਬਹੁਨ੍ਨਂ ਵਸ੍ਸਾਨਂ ਬਹੁਨ੍ਨਂ ਵਸ੍ਸਸਤਾਨਂ ਬਹੁਨ੍ਨਂ ਵਸ੍ਸਸਹਸ੍ਸਾਨਂ ਅਚ੍ਚਯੇਨ ਏਤਦਹੋਸਿ – ‘ਚਿਰਂ ਦਿਟ੍ਠੋ ਖੋ ਮੇ ਰਾਜਾ ਮਹਾਸੁਦਸ੍ਸਨੋ. ਯਂਨੂਨਾਹਂ ਰਾਜਾਨਂ ਮਹਾਸੁਦਸ੍ਸਨਂ ਦਸ੍ਸਨਾਯ ਉਪਸਙ੍ਕਮੇਯ੍ਯ’ਨ੍ਤਿ. ਅਥ ਖੋ, ਆਨਨ੍ਦ, ਸੁਭਦ੍ਦਾ ਦੇਵੀ ਇਤ੍ਥਾਗਾਰਂ ਆਮਨ੍ਤੇਸਿ – ‘ਏਥ ਤੁਮ੍ਹੇ ਸੀਸਾਨਿ ਨ੍ਹਾਯਥ ਪੀਤਾਨਿ ਵਤ੍ਥਾਨਿ ਪਾਰੁਪਥ. ਚਿਰਂ ਦਿਟ੍ਠੋ ਨੋ ਰਾਜਾ ਮਹਾਸੁਦਸ੍ਸਨੋ, ਰਾਜਾਨਂ ਮਹਾਸੁਦਸ੍ਸਨਂ ਦਸ੍ਸਨਾਯ ਉਪਸਙ੍ਕਮਿਸ੍ਸਾਮਾ’ਤਿ. ‘ਏਵਂ, ਅਯ੍ਯੇ’ਤਿ ਖੋ, ਆਨਨ੍ਦ, ਇਤ੍ਥਾਗਾਰਂ ਸੁਭਦ੍ਦਾਯ ਦੇਵਿਯਾ ਪਟਿਸ੍ਸੁਤ੍ਵਾ ਸੀਸਾਨਿ ਨ੍ਹਾਯਿਤ੍ਵਾ ਪੀਤਾਨਿ ਵਤ੍ਥਾਨਿ ਪਾਰੁਪਿਤ੍ਵਾ ਯੇਨ ਸੁਭਦ੍ਦਾ ਦੇਵੀ ਤੇਨੁਪਸਙ੍ਕਮਿ. ਅਥ ਖੋ, ਆਨਨ੍ਦ, ਸੁਭਦ੍ਦਾ ਦੇਵੀ ਪਰਿਣਾਯਕਰਤਨਂ ਆਮਨ੍ਤੇਸਿ – ‘ਕਪ੍ਪੇਹਿ, ਸਮ੍ਮ ਪਰਿਣਾਯਕਰਤਨ, ਚਤੁਰਙ੍ਗਿਨਿਂ ਸੇਨਂ, ਚਿਰਂ ਦਿਟ੍ਠੋ ਨੋ ਰਾਜਾ ਮਹਾਸੁਦਸ੍ਸਨੋ, ਰਾਜਾਨਂ ਮਹਾਸੁਦਸ੍ਸਨਂ ਦਸ੍ਸਨਾਯ ਉਪਸਙ੍ਕਮਿਸ੍ਸਾਮਾ’ਤਿ. ‘ਏਵਂ, ਦੇਵੀ’ਤਿ ਖੋ, ਆਨਨ੍ਦ, ਪਰਿਣਾਯਕਰਤਨਂ ਸੁਭਦ੍ਦਾਯ ਦੇਵਿਯਾ ਪਟਿਸ੍ਸੁਤ੍ਵਾ ਚਤੁਰਙ੍ਗਿਨਿਂ ਸੇਨਂ ਕਪ੍ਪਾਪੇਤ੍ਵਾ ਸੁਭਦ੍ਦਾਯ ਦੇਵਿਯਾ ਪਟਿਵੇਦੇਸਿ – ‘ਕਪ੍ਪਿਤਾ ਖੋ, ਦੇਵਿ, ਚਤੁਰਙ੍ਗਿਨੀ ਸੇਨਾ, ਯਸ੍ਸਦਾਨਿ ਕਾਲਂ ਮਞ੍ਞਸੀ’ਤਿ. ਅਥ ਖੋ, ਆਨਨ੍ਦ, ਸੁਭਦ੍ਦਾ ਦੇਵੀ ਚਤੁਰਙ੍ਗਿਨਿਯਾ ਸੇਨਾਯ ਸਦ੍ਧਿਂ ਇਤ੍ਥਾਗਾਰੇਨ ਯੇਨ ਧਮ੍ਮੋ ਪਾਸਾਦੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਧਮ੍ਮਂ ਪਾਸਾਦਂ ਅਭਿਰੁਹਿਤ੍ਵਾ ਯੇਨ ਮਹਾਵਿਯੂਹਂ ਕੂਟਾਗਾਰਂ ਤੇਨੁਪਸਙ੍ਕਮਿ. ਉਪਸਙ੍ਕਮਿਤ੍ਵਾ ਮਹਾਵਿਯੂਹਸ੍ਸ ਕੂਟਾਗਾਰਸ੍ਸ ਦ੍ਵਾਰਬਾਹਂ ਆਲਮ੍ਬਿਤ੍ਵਾ ਅਟ੍ਠਾਸਿ. ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਸਦ੍ਦਂ ਸੁਤ੍ਵਾ – ‘ਕਿਂ ਨੁ ਖੋ ਮਹਤੋ ਵਿਯ ਜਨਕਾਯਸ੍ਸ ਸਦ੍ਦੋ’ਤਿ ਮਹਾਵਿਯੂਹਾ ਕੂਟਾਗਾਰਾ ਨਿਕ੍ਖਮਨ੍ਤੋ ਅਦ੍ਦਸ ਸੁਭਦ੍ਦਂ ਦੇਵਿਂ ਦ੍ਵਾਰਬਾਹਂ ਆਲਮ੍ਬਿਤ੍ਵਾ ਠਿਤਂ, ਦਿਸ੍ਵਾਨ ਸੁਭਦ੍ਦਂ ਦੇਵਿਂ ਏਤਦਵੋਚ – ‘ਏਤ੍ਥੇਵ, ਦੇਵਿ, ਤਿਟ੍ਠ ਮਾ ਪਾਵਿਸੀ’ਤਿ. ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਅਞ੍ਞਤਰਂ ਪੁਰਿਸਂ ਆਮਨ੍ਤੇਸਿ – ‘ਏਹਿ ਤ੍ਵਂ, ਅਮ੍ਭੋ ਪੁਰਿਸ, ਮਹਾਵਿਯੂਹਾ ਕੂਟਾਗਾਰਾ ਸੋਵਣ੍ਣਮਯਂ ਪਲ੍ਲਙ੍ਕਂ ਨੀਹਰਿਤ੍ਵਾ ਸਬ੍ਬਸੋਵਣ੍ਣਮਯੇ ਤਾਲਵਨੇ ਪਞ੍ਞਪੇਹੀ’ਤਿ. ‘ਏਵਂ, ਦੇਵਾ’ਤਿ ਖੋ, ਆਨਨ੍ਦ, ਸੋ ਪੁਰਿਸੋ ਰਞ੍ਞੋ ਮਹਾਸੁਦਸ੍ਸਨਸ੍ਸ ਪਟਿਸ੍ਸੁਤ੍ਵਾ ਮਹਾਵਿਯੂਹਾ ਕੂਟਾਗਾਰਾ ਸੋਵਣ੍ਣਮਯਂ ਪਲ੍ਲਙ੍ਕਂ ਨੀਹਰਿਤ੍ਵਾ ਸਬ੍ਬਸੋਵਣ੍ਣਮਯੇ ਤਾਲਵਨੇ ਪਞ੍ਞਪੇਸਿ. ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਦਕ੍ਖਿਣੇਨ ਪਸ੍ਸੇਨ ਸੀਹਸੇਯ੍ਯਂ ਕਪ੍ਪੇਸਿ ਪਾਦੇ ਪਾਦਂ ਅਚ੍ਚਾਧਾਯ ਸਤੋ ਸਮ੍ਪਜਾਨੋ.

੨੬੬. ‘‘ਅਥ ਖੋ, ਆਨਨ੍ਦ, ਸੁਭਦ੍ਦਾਯ ਦੇਵਿਯਾ ਏਤਦਹੋਸਿ – ‘ਵਿਪ੍ਪਸਨ੍ਨਾਨਿ ਖੋ ਰਞ੍ਞੋ ਮਹਾਸੁਦਸ੍ਸਨਸ੍ਸ ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ, ਮਾ ਹੇਵ ਖੋ ਰਾਜਾ ਮਹਾਸੁਦਸ੍ਸਨੋ ਕਾਲਮਕਾਸੀ’ਤਿ ਰਾਜਾਨਂ ਮਹਾਸੁਦਸ੍ਸਨਂ ਏਤਦਵੋਚ –

‘ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਨਗਰਸਹਸ੍ਸਾਨਿ ਕੁਸਾਵਤੀਰਾਜਧਾਨਿਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਪਾਸਾਦਸਹਸ੍ਸਾਨਿ ਧਮ੍ਮਪਾਸਾਦਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਕੂਟਾਗਾਰਸਹਸ੍ਸਾਨਿ ਮਹਾਵਿਯੂਹਕੂਟਾਗਾਰਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਸੋਵਣ੍ਣਮਯਾਨਿ ਰੂਪਿਯਮਯਾਨਿ ਦਨ੍ਤਮਯਾਨਿ ਸਾਰਮਯਾਨਿ ਗੋਨਕਤ੍ਥਤਾਨਿ ਪਟਿਕਤ੍ਥਤਾਨਿ ਪਟਲਿਕਤ੍ਥਤਾਨਿ ਕਦਲਿਮਿਗਪਵਰਪਚ੍ਚਤ੍ਥਰਣਾਨਿ ਸਉਤ੍ਤਰਚ੍ਛਦਾਨਿ ਉਭਤੋਲੋਹਿਤਕੂਪਧਾਨਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ, ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਨਾਗਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਉਪੋਸਥਨਾਗਰਾਜਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਅਸ੍ਸਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵਲਾਹਕਅਸ੍ਸਰਾਜਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ ਚਤੁਰਾਸੀਤਿ ਰਥਸਹਸ੍ਸਾਨਿ ਸੀਹਚਮ੍ਮਪਰਿਵਾਰਾਨਿ ਬ੍ਯਗ੍ਘਚਮ੍ਮਪਰਿਵਾਰਾਨਿ ਦੀਪਿਚਮ੍ਮਪਰਿਵਾਰਾਨਿ ਪਣ੍ਡੁਕਮ੍ਬਲਪਰਿਵਾਰਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵੇਜਯਨ੍ਤਰਥਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਮਣਿਸਹਸ੍ਸਾਨਿ ਮਣਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਇਤ੍ਥਿਸਹਸ੍ਸਾਨਿ ਇਤ੍ਥਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਗਹਪਤਿਸਹਸ੍ਸਾਨਿ ਗਹਪਤਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਖਤ੍ਤਿਯਸਹਸ੍ਸਾਨਿ ਅਨੁਯਨ੍ਤਾਨਿ ਪਰਿਣਾਯਕਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਦੁਹਸਨ੍ਦਨਾਨਿ ਕਂਸੂਪਧਾਰਣਾਨਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਵਤ੍ਥਕੋਟਿਸਹਸ੍ਸਾਨਿ ਖੋਮਸੁਖੁਮਾਨਂ ਕਪ੍ਪਾਸਿਕਸੁਖੁਮਾਨਂ ਕੋਸੇਯ੍ਯਸੁਖੁਮਾਨਂ ਕਮ੍ਬਲਸੁਖੁਮਾਨਂ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ, ਜੀਵਿਤੇ ਅਪੇਕ੍ਖਂ ਕਰੋਹਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਥਾਲਿਪਾਕਸਹਸ੍ਸਾਨਿ ਸਾਯਂ ਪਾਤਂ ਭਤ੍ਤਾਭਿਹਾਰੋ ਅਭਿਹਰਿਯਤਿ. ਏਤ੍ਥ, ਦੇਵ, ਛਨ੍ਦਂ ਜਨੇਹਿ ਜੀਵਿਤੇ ਅਪੇਕ੍ਖਂ ਕਰੋਹੀ’ਤਿ.

੨੬੭. ‘‘ਏਵਂ ਵੁਤ੍ਤੇ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਸੁਭਦ੍ਦਂ ਦੇਵਿਂ ਏਤਦਵੋਚ –

‘ਦੀਘਰਤ੍ਤਂ ਖੋ ਮਂ ਤ੍ਵਂ, ਦੇਵਿ, ਇਟ੍ਠੇਹਿ ਕਨ੍ਤੇਹਿ ਪਿਯੇਹਿ ਮਨਾਪੇਹਿ ਸਮੁਦਾਚਰਿਤ੍ਥ; ਅਥ ਚ ਪਨ ਮਂ ਤ੍ਵਂ ਪਚ੍ਛਿਮੇ ਕਾਲੇ ਅਨਿਟ੍ਠੇਹਿ ਅਕਨ੍ਤੇਹਿ ਅਪ੍ਪਿਯੇਹਿ ਅਮਨਾਪੇਹਿ ਸਮੁਦਾਚਰਸੀ’ਤਿ. ‘ਕਥਂ ਚਰਹਿ ਤਂ, ਦੇਵ, ਸਮੁਦਾਚਰਾਮੀ’ਤਿ? ‘ਏਵਂ ਖੋ ਮਂ ਤ੍ਵਂ, ਦੇਵਿ, ਸਮੁਦਾਚਰ – ‘‘ਸਬ੍ਬੇਹੇਵ, ਦੇਵ, ਪਿਯੇਹਿ ਮਨਾਪੇਹਿ ਨਾਨਾਭਾਵੋ ਵਿਨਾਭਾਵੋ ਅਞ੍ਞਥਾਭਾਵੋ, ਮਾ ਖੋ ਤ੍ਵਂ, ਦੇਵ, ਸਾਪੇਕ੍ਖੋ ਕਾਲਮਕਾਸਿ, ਦੁਕ੍ਖਾ ਸਾਪੇਕ੍ਖਸ੍ਸ ਕਾਲਙ੍ਕਿਰਿਯਾ, ਗਰਹਿਤਾ ਚ ਸਾਪੇਕ੍ਖਸ੍ਸ ਕਾਲਙ੍ਕਿਰਿਯਾ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਨਗਰਸਹਸ੍ਸਾਨਿ ਕੁਸਾਵਤੀਰਾਜਧਾਨਿਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਪਾਸਾਦਸਹਸ੍ਸਾਨਿ ਧਮ੍ਮਪਾਸਾਦਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਕੂਟਾਗਾਰਸਹਸ੍ਸਾਨਿ ਮਹਾਵਿਯੂਹਕੂਟਾਗਾਰਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਸੋਵਣ੍ਣਮਯਾਨਿ ਰੂਪਿਯਮਯਾਨਿ ਦਨ੍ਤਮਯਾਨਿ ਸਾਰਮਯਾਨਿ ਗੋਨਕਤ੍ਥਤਾਨਿ ਪਟਿਕਤ੍ਥਤਾਨਿ ਪਟਲਿਕਤ੍ਥਤਾਨਿ ਕਦਲਿਮਿਗਪਵਰਪਚ੍ਚਤ੍ਥਰਣਾਨਿ ਸਉਤ੍ਤਰਚ੍ਛਦਾਨਿ ਉਭਤੋਲੋਹਿਤਕੂਪਧਾਨਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਨਾਗਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਉਪੋਸਥਨਾਗਰਾਜਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਅਸ੍ਸਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵਲਾਹਕਅਸ੍ਸਰਾਜਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਰਥਸਹਸ੍ਸਾਨਿ ਸੀਹਚਮ੍ਮਪਰਿਵਾਰਾਨਿ ਬ੍ਯਗ੍ਘਚਮ੍ਮਪਰਿਵਾਰਾਨਿ ਦੀਪਿਚਮ੍ਮਪਰਿਵਾਰਾਨਿ ਪਣ੍ਡੁਕਮ੍ਬਲਪਰਿਵਾਰਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵੇਜਯਨ੍ਤਰਥਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਮਣਿਸਹਸ੍ਸਾਨਿ ਮਣਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਇਤ੍ਥਿਸਹਸ੍ਸਾਨਿ ਸੁਭਦ੍ਦਾਦੇਵਿਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਗਹਪਤਿਸਹਸ੍ਸਾਨਿ ਗਹਪਤਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਖਤ੍ਤਿਯਸਹਸ੍ਸਾਨਿ ਅਨੁਯਨ੍ਤਾਨਿ ਪਰਿਣਾਯਕਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਦੁਹਸਨ੍ਦਨਾਨਿ ਕਂਸੂਪਧਾਰਣਾਨਿ. ਏਤ੍ਥ ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਵਤ੍ਥਕੋਟਿਸਹਸ੍ਸਾਨਿ ਖੋਮਸੁਖੁਮਾਨਂ ਕਪ੍ਪਾਸਿਕਸੁਖੁਮਾਨਂ ਕੋਸੇਯ੍ਯਸੁਖੁਮਾਨਂ ਕਮ੍ਬਲਸੁਖੁਮਾਨਂ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ ਦੇਵ ਚਤੁਰਾਸੀਤਿ ਥਾਲਿਪਾਕਸਹਸ੍ਸਾਨਿ ਸਾਯਂ ਪਾਤਂ ਭਤ੍ਤਾਭਿਹਾਰੋ ਅਭਿਹਰਿਯਤਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸੀ’’’ਤਿ.

੨੬੮. ‘‘ਏਵਂ ਵੁਤ੍ਤੇ, ਆਨਨ੍ਦ, ਸੁਭਦ੍ਦਾ ਦੇਵੀ ਪਰੋਦਿ ਅਸ੍ਸੂਨਿ ਪਵਤ੍ਤੇਸਿ. ਅਥ ਖੋ, ਆਨਨ੍ਦ, ਸੁਭਦ੍ਦਾ ਦੇਵੀ ਅਸ੍ਸੂਨਿ ਪੁਞ੍ਛਿਤ੍ਵਾ [ਪਮਜ੍ਜਿਤ੍ਵਾ (ਸੀ. ਸ੍ਯਾ. ਪੀ.), ਪੁਞ੍ਜਿਤ੍ਵਾ (ਕ.)] ਰਾਜਾਨਂ ਮਹਾਸੁਦਸ੍ਸਨਂ ਏਤਦਵੋਚ –

‘ਸਬ੍ਬੇਹੇਵ, ਦੇਵ, ਪਿਯੇਹਿ ਮਨਾਪੇਹਿ ਨਾਨਾਭਾਵੋ ਵਿਨਾਭਾਵੋ ਅਞ੍ਞਥਾਭਾਵੋ, ਮਾ ਖੋ ਤ੍ਵਂ, ਦੇਵ, ਸਾਪੇਕ੍ਖੋ ਕਾਲਮਕਾਸਿ, ਦੁਕ੍ਖਾ ਸਾਪੇਕ੍ਖਸ੍ਸ ਕਾਲਙ੍ਕਿਰਿਯਾ, ਗਰਹਿਤਾ ਚ ਸਾਪੇਕ੍ਖਸ੍ਸ ਕਾਲਙ੍ਕਿਰਿਯਾ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਨਗਰਸਹਸ੍ਸਾਨਿ ਕੁਸਾਵਤੀਰਾਜਧਾਨਿਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਪਾਸਾਦਸਹਸ੍ਸਾਨਿ ਧਮ੍ਮਪਾਸਾਦਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਕੂਟਾਗਾਰਸਹਸ੍ਸਾਨਿ ਮਹਾਵਿਯੂਹਕੂਟਾਗਾਰਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਸੋਵਣ੍ਣਮਯਾਨਿ ਰੂਪਿਯਮਯਾਨਿ ਦਨ੍ਤਮਯਾਨਿ ਸਾਰਮਯਾਨਿ ਗੋਨਕਤ੍ਥਤਾਨਿ ਪਟਿਕਤ੍ਥਤਾਨਿ ਪਟਲਿਕਤ੍ਥਤਾਨਿ ਕਦਲਿਮਿਗਪਵਰਪਚ੍ਚਤ੍ਥਰਣਾਨਿ ਸਉਤ੍ਤਰਚ੍ਛਦਾਨਿ ਉਭਤੋਲੋਹਿਤਕੂਪਧਾਨਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਨਾਗਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਉਪੋਸਥਨਾਗਰਾਜਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਅਸ੍ਸਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵਲਾਹਕਅਸ੍ਸਰਾਜਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ, ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਰਥਸਹਸ੍ਸਾਨਿ ਸੀਹਚਮ੍ਮਪਰਿਵਾਰਾਨਿ ਬ੍ਯਗ੍ਘਚਮ੍ਮਪਰਿਵਾਰਾਨਿ ਦੀਪਿਚਮ੍ਮਪਰਿਵਾਰਾਨਿ ਪਣ੍ਡੁਕਮ੍ਬਲਪਰਿਵਾਰਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵੇਜਯਨ੍ਤਰਥਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਮਣਿਸਹਸ੍ਸਾਨਿ ਮਣਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਇਤ੍ਥਿਸਹਸ੍ਸਾਨਿ ਇਤ੍ਥਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ, ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਗਹਪਤਿਸਹਸ੍ਸਾਨਿ ਗਹਪਤਿਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਖਤ੍ਤਿਯਸਹਸ੍ਸਾਨਿ ਅਨੁਯਨ੍ਤਾਨਿ ਪਰਿਣਾਯਕਰਤਨਪ੍ਪਮੁਖਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਦੁਹਸਨ੍ਦਨਾਨਿ ਕਂਸੂਪਧਾਰਣਾਨਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਵਤ੍ਥਕੋਟਿਸਹਸ੍ਸਾਨਿ ਖੋਮਸੁਖੁਮਾਨਂ ਕਪ੍ਪਾਸਿਕਸੁਖੁਮਾਨਂ ਕੋਸੇਯ੍ਯਸੁਖੁਮਾਨਂ ਕਮ੍ਬਲਸੁਖੁਮਾਨਂ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸਿ. ਇਮਾਨਿ ਤੇ, ਦੇਵ, ਚਤੁਰਾਸੀਤਿ ਥਾਲਿਪਾਕਸਹਸ੍ਸਾਨਿ ਸਾਯਂ ਪਾਤਂ ਭਤ੍ਤਾਭਿਹਾਰੋ ਅਭਿਹਰਿਯਤਿ. ਏਤ੍ਥ, ਦੇਵ, ਛਨ੍ਦਂ ਪਜਹ ਜੀਵਿਤੇ ਅਪੇਕ੍ਖਂ ਮਾਕਾਸੀ’ਤਿ.

ਬ੍ਰਹ੍ਮਲੋਕੂਪਗਮਂ

੨੬੯. ‘‘ਅਥ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਨਚਿਰਸ੍ਸੇਵ ਕਾਲਮਕਾਸਿ. ਸੇਯ੍ਯਥਾਪਿ, ਆਨਨ੍ਦ, ਗਹਪਤਿਸ੍ਸ ਵਾ ਗਹਪਤਿਪੁਤ੍ਤਸ੍ਸ ਵਾ ਮਨੁਞ੍ਞਂ ਭੋਜਨਂ ਭੁਤ੍ਤਾਵਿਸ੍ਸ ਭਤ੍ਤਸਮ੍ਮਦੋ ਹੋਤਿ, ਏਵਮੇਵ ਖੋ, ਆਨਨ੍ਦ, ਰਞ੍ਞੋ ਮਹਾਸੁਦਸ੍ਸਨਸ੍ਸ ਮਾਰਣਨ੍ਤਿਕਾ ਵੇਦਨਾ ਅਹੋਸਿ. ਕਾਲਙ੍ਕਤੋ ਚ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਸੁਗਤਿਂ ਬ੍ਰਹ੍ਮਲੋਕਂ ਉਪਪਜ੍ਜਿ. ਰਾਜਾ, ਆਨਨ੍ਦ, ਮਹਾਸੁਦਸ੍ਸਨੋ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਕੁਮਾਰਕੀਲ਼ਂ [ਕੀਲ਼ਿਤਂ (ਕ.), ਕੀਲ਼ਿਕਂ (ਸੀ. ਪੀ.)] ਕੀਲ਼ਿ. ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਓਪਰਜ੍ਜਂ ਕਾਰੇਸਿ. ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਰਜ੍ਜਂ ਕਾਰੇਸਿ. ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਗਿਹਿਭੂਤੋ [ਗਿਹੀਭੂਤੋ (ਸੀ. ਪੀ.)] ਧਮ੍ਮੇ ਪਾਸਾਦੇ ਬ੍ਰਹ੍ਮਚਰਿਯਂ ਚਰਿ [ਬ੍ਰਹ੍ਮਚਰਿਯਮਚਰਿ (ਕ.)]. ਸੋ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਬ੍ਰਹ੍ਮਲੋਕੂਪਗੋ ਅਹੋਸਿ.

੨੭੦. ‘‘ਸਿਯਾ ਖੋ ਪਨਾਨਨ੍ਦ, ਏਵਮਸ੍ਸ – ‘ਅਞ੍ਞੋ ਨੂਨ ਤੇਨ ਸਮਯੇਨ ਰਾਜਾ ਮਹਾਸੁਦਸ੍ਸਨੋ ਅਹੋਸੀ’ਤਿ, ਨ ਖੋ ਪਨੇਤਂ, ਆਨਨ੍ਦ, ਏਵਂ ਦਟ੍ਠਬ੍ਬਂ. ਅਹਂ ਤੇਨ ਸਮਯੇਨ ਰਾਜਾ ਮਹਾਸੁਦਸ੍ਸਨੋ ਅਹੋਸਿਂ. ਮਮ ਤਾਨਿ ਚਤੁਰਾਸੀਤਿ ਨਗਰਸਹਸ੍ਸਾਨਿ ਕੁਸਾਵਤੀਰਾਜਧਾਨਿਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਪਾਸਾਦਸਹਸ੍ਸਾਨਿ ਧਮ੍ਮਪਾਸਾਦਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਕੂਟਾਗਾਰਸਹਸ੍ਸਾਨਿ ਮਹਾਵਿਯੂਹਕੂਟਾਗਾਰਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਸੋਵਣ੍ਣਮਯਾਨਿ ਰੂਪਿਯਮਯਾਨਿ ਦਨ੍ਤਮਯਾਨਿ ਸਾਰਮਯਾਨਿ ਗੋਨਕਤ੍ਥਤਾਨਿ ਪਟਿਕਤ੍ਥਤਾਨਿ ਪਟਲਿਕਤ੍ਥਤਾਨਿ ਕਦਲਿਮਿਗਪਵਰਪਚ੍ਚਤ੍ਥਰਣਾਨਿ ਸਉਤ੍ਤਰਚ੍ਛਦਾਨਿ ਉਭਤੋਲੋਹਿਤਕੂਪਧਾਨਾਨਿ, ਮਮ ਤਾਨਿ ਚਤੁਰਾਸੀਤਿ ਨਾਗਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਉਪੋਸਥਨਾਗਰਾਜਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਅਸ੍ਸਸਹਸ੍ਸਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵਲਾਹਕਅਸ੍ਸਰਾਜਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਰਥਸਹਸ੍ਸਾਨਿ ਸੀਹਚਮ੍ਮਪਰਿਵਾਰਾਨਿ ਬ੍ਯਗ੍ਘਚਮ੍ਮਪਰਿਵਾਰਾਨਿ ਦੀਪਿਚਮ੍ਮਪਰਿਵਾਰਾਨਿ ਪਣ੍ਡੁਕਮ੍ਬਲਪਰਿਵਾਰਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪਟਿਚ੍ਛਨ੍ਨਾਨਿ ਵੇਜਯਨ੍ਤਰਥਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਮਣਿਸਹਸ੍ਸਾਨਿ ਮਣਿਰਤਨਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਇਤ੍ਥਿਸਹਸ੍ਸਾਨਿ ਸੁਭਦ੍ਦਾਦੇਵਿਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਗਹਪਤਿਸਹਸ੍ਸਾਨਿ ਗਹਪਤਿਰਤਨਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਖਤ੍ਤਿਯਸਹਸ੍ਸਾਨਿ ਅਨੁਯਨ੍ਤਾਨਿ ਪਰਿਣਾਯਕਰਤਨਪ੍ਪਮੁਖਾਨਿ, ਮਮ ਤਾਨਿ ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਦੁਹਸਨ੍ਦਨਾਨਿ ਕਂਸੂਪਧਾਰਣਾਨਿ, ਮਮ ਤਾਨਿ ਚਤੁਰਾਸੀਤਿ ਵਤ੍ਥਕੋਟਿਸਹਸ੍ਸਾਨਿ ਖੋਮਸੁਖੁਮਾਨਂ ਕਪ੍ਪਾਸਿਕਸੁਖੁਮਾਨਂ ਕੋਸੇਯ੍ਯਸੁਖੁਮਾਨਂ ਕਮ੍ਬਲਸੁਖੁਮਾਨਂ, ਮਮ ਤਾਨਿ ਚਤੁਰਾਸੀਤਿ ਥਾਲਿਪਾਕਸਹਸ੍ਸਾਨਿ ਸਾਯਂ ਪਾਤਂ ਭਤ੍ਤਾਭਿਹਾਰੋ ਅਭਿਹਰਿਯਿਤ੍ਥ.

੨੭੧. ‘‘ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਨਗਰਸਹਸ੍ਸਾਨਂ ਏਕਞ੍ਞੇਵ ਤਂ ਨਗਰਂ ਹੋਤਿ, ਯਂ ਤੇਨ ਸਮਯੇਨ ਅਜ੍ਝਾਵਸਾਮਿ ਯਦਿਦਂ ਕੁਸਾਵਤੀ ਰਾਜਧਾਨੀ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਪਾਸਾਦਸਹਸ੍ਸਾਨਂ ਏਕੋਯੇਵ ਸੋ ਪਾਸਾਦੋ ਹੋਤਿ, ਯਂ ਤੇਨ ਸਮਯੇਨ ਅਜ੍ਝਾਵਸਾਮਿ ਯਦਿਦਂ ਧਮ੍ਮੋ ਪਾਸਾਦੋ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਕੂਟਾਗਾਰਸਹਸ੍ਸਾਨਂ ਏਕਞ੍ਞੇਵ ਤਂ ਕੂਟਾਗਾਰਂ ਹੋਤਿ, ਯਂ ਤੇਨ ਸਮਯੇਨ ਅਜ੍ਝਾਵਸਾਮਿ ਯਦਿਦਂ ਮਹਾਵਿਯੂਹਂ ਕੂਟਾਗਾਰਂ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਪਲ੍ਲਙ੍ਕਸਹਸ੍ਸਾਨਂ ਏਕੋਯੇਵ ਸੋ ਪਲ੍ਲਙ੍ਕੋ ਹੋਤਿ, ਯਂ ਤੇਨ ਸਮਯੇਨ ਪਰਿਭੁਞ੍ਜਾਮਿ ਯਦਿਦਂ ਸੋਵਣ੍ਣਮਯੋ ਵਾ ਰੂਪਿਯਮਯੋ ਵਾ ਦਨ੍ਤਮਯੋ ਵਾ ਸਾਰਮਯੋ ਵਾ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਨਾਗਸਹਸ੍ਸਾਨਂ ਏਕੋਯੇਵ ਸੋ ਨਾਗੋ ਹੋਤਿ, ਯਂ ਤੇਨ ਸਮਯੇਨ ਅਭਿਰੁਹਾਮਿ ਯਦਿਦਂ ਉਪੋਸਥੋ ਨਾਗਰਾਜਾ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਅਸ੍ਸਸਹਸ੍ਸਾਨਂ ਏਕੋਯੇਵ ਸੋ ਅਸ੍ਸੋ ਹੋਤਿ, ਯਂ ਤੇਨ ਸਮਯੇਨ ਅਭਿਰੁਹਾਮਿ ਯਦਿਦਂ ਵਲਾਹਕੋ ਅਸ੍ਸਰਾਜਾ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਰਥਸਹਸ੍ਸਾਨਂ ਏਕੋਯੇਵ ਸੋ ਰਥੋ ਹੋਤਿ, ਯਂ ਤੇਨ ਸਮਯੇਨ ਅਭਿਰੁਹਾਮਿ ਯਦਿਦਂ ਵੇਜਯਨ੍ਤਰਥੋ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਇਤ੍ਥਿਸਹਸ੍ਸਾਨਂ ਏਕਾਯੇਵ ਸਾ ਇਤ੍ਥੀ ਹੋਤਿ, ਯਾ ਤੇਨ ਸਮਯੇਨ ਪਚ੍ਚੁਪਟ੍ਠਾਤਿ ਖਤ੍ਤਿਯਾਨੀ ਵਾ ਵੇਸ੍ਸਿਨੀ [ਵੇਸ੍ਸਾਯਿਨੀ (ਸ੍ਯਾ.), ਵੇਲਾਮਿਕਾਨੀ (ਕ. ਸੀ. ਪੀ.) ਵੇਲਾਮਿਕਾ (ਸਂ. ਨਿ. ੩.੯੬)] ਵਾ. ਤੇਸਂ ਖੋ ਪਨਾਨਨ੍ਦ, ਵਾ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਵਤ੍ਥਕੋਟਿਸਹਸ੍ਸਾਨਂ ਏਕਂਯੇਵ ਤਂ ਦੁਸ੍ਸਯੁਗਂ ਹੋਤਿ, ਯਂ ਤੇਨ ਸਮਯੇਨ ਪਰਿਦਹਾਮਿ ਖੋਮਸੁਖੁਮਂ ਵਾ ਕਪ੍ਪਾਸਿਕਸੁਖੁਮਂ ਵਾ ਕੋਸੇਯ੍ਯਸੁਖੁਮਂ ਵਾ ਕਮ੍ਬਲਸੁਖੁਮਂ ਵਾ. ਤੇਸਂ ਖੋ ਪਨਾਨਨ੍ਦ, ਚਤੁਰਾਸੀਤਿਥਾਲਿਪਾਕਸਹਸ੍ਸਾਨਂ ਏਕੋਯੇਵ ਸੋ ਥਾਲਿਪਾਕੋ ਹੋਤਿ, ਯਤੋ ਨਾਲ਼ਿਕੋਦਨਪਰਮਂ ਭੁਞ੍ਜਾਮਿ ਤਦੁਪਿਯਞ੍ਚ ਸੂਪੇਯ੍ਯਂ.

੨੭੨. ‘‘ਪਸ੍ਸਾਨਨ੍ਦ, ਸਬ੍ਬੇਤੇ ਸਙ੍ਖਾਰਾ ਅਤੀਤਾ ਨਿਰੁਦ੍ਧਾ ਵਿਪਰਿਣਤਾ. ਏਵਂ ਅਨਿਚ੍ਚਾ ਖੋ, ਆਨਨ੍ਦ, ਸਙ੍ਖਾਰਾ; ਏਵਂ ਅਦ੍ਧੁਵਾ ਖੋ, ਆਨਨ੍ਦ, ਸਙ੍ਖਾਰਾ; ਏਵਂ ਅਨਸ੍ਸਾਸਿਕਾ ਖੋ, ਆਨਨ੍ਦ, ਸਙ੍ਖਾਰਾ! ਯਾਵਞ੍ਚਿਦਂ, ਆਨਨ੍ਦ, ਅਲਮੇਵ ਸਬ੍ਬਸਙ੍ਖਾਰੇਸੁ ਨਿਬ੍ਬਿਨ੍ਦਿਤੁਂ, ਅਲਂ ਵਿਰਜ੍ਜਿਤੁਂ, ਅਲਂ ਵਿਮੁਚ੍ਚਿਤੁਂ.

‘‘ਛਕ੍ਖਤ੍ਤੁਂ ਖੋ ਪਨਾਹਂ, ਆਨਨ੍ਦ, ਅਭਿਜਾਨਾਮਿ ਇਮਸ੍ਮਿਂ ਪਦੇਸੇ ਸਰੀਰਂ ਨਿਕ੍ਖਿਪਿਤਂ, ਤਞ੍ਚ ਖੋ ਰਾਜਾਵ ਸਮਾਨੋ ਚਕ੍ਕਵਤ੍ਤੀ ਧਮ੍ਮਿਕੋ ਧਮ੍ਮਰਾਜਾ ਚਾਤੁਰਨ੍ਤੋ ਵਿਜਿਤਾਵੀ ਜਨਪਦਤ੍ਥਾਵਰਿਯਪਤ੍ਤੋ ਸਤ੍ਤਰਤਨਸਮਨ੍ਨਾਗਤੋ, ਅਯਂ ਸਤ੍ਤਮੋ ਸਰੀਰਨਿਕ੍ਖੇਪੋ. ਨ ਖੋ ਪਨਾਹਂ, ਆਨਨ੍ਦ, ਤਂ ਪਦੇਸਂ ਸਮਨੁਪਸ੍ਸਾਮਿ ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਯਤ੍ਥ ਤਥਾਗਤੋ ਅਟ੍ਠਮਂ ਸਰੀਰਂ ਨਿਕ੍ਖਿਪੇਯ੍ਯਾ’’ਤਿ. ਇਦਮਵੋਚ ਭਗਵਾ, ਇਦਂ ਵਤ੍ਵਾਨ ਸੁਗਤੋ ਅਥਾਪਰਂ ਏਤਦਵੋਚ ਸਤ੍ਥਾ –

‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’’ਤਿ.

ਮਹਾਸੁਦਸ੍ਸਨਸੁਤ੍ਤਂ ਨਿਟ੍ਠਿਤਂ ਚਤੁਤ੍ਥਂ.