੫. ਕੂਟਦਨ੍ਤਸੁਤ੍ਤਂ
ਖਾਣੁਮਤਕਬ੍ਰਾਹ੍ਮਣਗਹਪਤਿਕਾ
੩੨੩. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਮਗਧੇਸੁ ਚਾਰਿਕਂ ਚਰਮਾਨੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਯੇਨ ਖਾਣੁਮਤਂ ਨਾਮ ਮਗਧਾਨਂ ਬ੍ਰਾਹ੍ਮਣਗਾਮੋ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਖਾਣੁਮਤੇ ਵਿਹਰਤਿ ਅਮ੍ਬਲਟ੍ਠਿਕਾਯਂ. ਤੇਨ ਖੋ ਪਨ ਸਮਯੇਨ ਕੂਟਦਨ੍ਤੋ ਬ੍ਰਾਹ੍ਮਣੋ ਖਾਣੁਮਤਂ ਅਜ੍ਝਾਵਸਤਿ ਸਤ੍ਤੁਸ੍ਸਦਂ ਸਤਿਣਕਟ੍ਠੋਦਕਂ ਸਧਞ੍ਞਂ ਰਾਜਭੋਗ੍ਗਂ ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ ਦਿਨ੍ਨਂ ਰਾਜਦਾਯਂ ਬ੍ਰਹ੍ਮਦੇਯ੍ਯਂ. ਤੇਨ ਖੋ ਪਨ ਸਮਯੇਨ ਕੂਟਦਨ੍ਤਸ੍ਸ ਬ੍ਰਾਹ੍ਮਣਸ੍ਸ ਮਹਾਯਞ੍ਞੋ ਉਪਕ੍ਖਟੋ ਹੋਤਿ. ਸਤ੍ਤ ਚ ਉਸਭਸਤਾਨਿ ਸਤ੍ਤ ਚ ਵਚ੍ਛਤਰਸਤਾਨਿ ਸਤ੍ਤ ਚ ਵਚ੍ਛਤਰੀਸਤਾਨਿ ਸਤ੍ਤ ਚ ਅਜਸਤਾਨਿ ਸਤ੍ਤ ਚ ਉਰਬ੍ਭਸਤਾਨਿ ਥੂਣੂਪਨੀਤਾਨਿ ਹੋਨ੍ਤਿ ਯਞ੍ਞਤ੍ਥਾਯ.
੩੨੪. ਅਸ੍ਸੋਸੁਂ ਖੋ ਖਾਣੁਮਤਕਾ ਬ੍ਰਾਹ੍ਮਣਗਹਪਤਿਕਾ – ‘‘ਸਮਣੋ ਖਲੁ, ਭੋ, ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਮਗਧੇਸੁ ਚਾਰਿਕਂ ਚਰਮਾਨੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਖਾਣੁਮਤਂ ਅਨੁਪ੍ਪਤ੍ਤੋ ਖਾਣੁਮਤੇ ਵਿਹਰਤਿ ਅਮ੍ਬਲਟ੍ਠਿਕਾਯਂ. ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ਤਿ. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ.
੩੨੫. ਅਥ ਖੋ ਖਾਣੁਮਤਕਾ ਬ੍ਰਾਹ੍ਮਣਗਹਪਤਿਕਾ ਖਾਣੁਮਤਾ ਨਿਕ੍ਖਮਿਤ੍ਵਾ ਸਙ੍ਘਸਙ੍ਘੀ ਗਣੀਭੂਤਾ ਯੇਨ ਅਮ੍ਬਲਟ੍ਠਿਕਾ ਤੇਨੁਪਸਙ੍ਕਮਨ੍ਤਿ.
੩੨੬. ਤੇਨ ਖੋ ਪਨ ਸਮਯੇਨ ਕੂਟਦਨ੍ਤੋ ਬ੍ਰਾਹ੍ਮਣੋ ਉਪਰਿਪਾਸਾਦੇ ਦਿਵਾਸੇਯ੍ਯਂ ਉਪਗਤੋ ਹੋਤਿ. ਅਦ੍ਦਸਾ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਖਾਣੁਮਤਕੇ ਬ੍ਰਾਹ੍ਮਣਗਹਪਤਿਕੇ ਖਾਣੁਮਤਾ ਨਿਕ੍ਖਮਿਤ੍ਵਾ ਸਙ੍ਘਸਙ੍ਘੀ ਗਣੀਭੂਤੇ ਯੇਨ ਅਮ੍ਬਲਟ੍ਠਿਕਾ ਤੇਨੁਪਸਙ੍ਕਮਨ੍ਤੇ. ਦਿਸ੍ਵਾ ਖਤ੍ਤਂ ਆਮਨ੍ਤੇਸਿ – ‘‘ਕਿਂ ਨੁ ਖੋ, ਭੋ ਖਤ੍ਤੇ, ਖਾਣੁਮਤਕਾ ਬ੍ਰਾਹ੍ਮਣਗਹਪਤਿਕਾ ਖਾਣੁਮਤਾ ਨਿਕ੍ਖਮਿਤ੍ਵਾ ਸਙ੍ਘਸਙ੍ਘੀ ਗਣੀਭੂਤਾ ਯੇਨ ਅਮ੍ਬਲਟ੍ਠਿਕਾ ਤੇਨੁਪਸਙ੍ਕਮਨ੍ਤੀ’’ਤਿ?
੩੨੭. ‘‘ਅਤ੍ਥਿ ਖੋ, ਭੋ, ਸਮਣੋ ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਮਗਧੇਸੁ ਚਾਰਿਕਂ ਚਰਮਾਨੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਖਾਣੁਮਤਂ ਅਨੁਪ੍ਪਤ੍ਤੋ, ਖਾਣੁਮਤੇ ਵਿਹਰਤਿ ਅਮ੍ਬਲਟ੍ਠਿਕਾਯਂ. ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ਤਿ. ਤਮੇਤੇ ਭਵਨ੍ਤਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਨ੍ਤੀ’’ਤਿ.
੩੨੮. ਅਥ ਖੋ ਕੂਟਦਨ੍ਤਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਸੁਤਂ ਖੋ ਪਨ ਮੇਤਂ – ‘ਸਮਣੋ ਗੋਤਮੋ ਤਿਵਿਧਂ ਯਞ੍ਞਸਮ੍ਪਦਂ ਸੋਲ਼ਸਪਰਿਕ੍ਖਾਰਂ ਜਾਨਾਤੀ’ਤਿ. ਨ ਖੋ ਪਨਾਹਂ ਜਾਨਾਮਿ ਤਿਵਿਧਂ ਯਞ੍ਞਸਮ੍ਪਦਂ ਸੋਲ਼ਸਪਰਿਕ੍ਖਾਰਂ. ਇਚ੍ਛਾਮਿ ਚਾਹਂ ਮਹਾਯਞ੍ਞਂ ਯਜਿਤੁਂ. ਯਂਨੂਨਾਹਂ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ਤਿਵਿਧਂ ਯਞ੍ਞਸਮ੍ਪਦਂ ਸੋਲ਼ਸਪਰਿਕ੍ਖਾਰਂ ਪੁਚ੍ਛੇਯ੍ਯ’’ਨ੍ਤਿ.
੩੨੯. ਅਥ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਖਤ੍ਤਂ ਆਮਨ੍ਤੇਸਿ – ‘‘ਤੇਨ ਹਿ, ਭੋ ਖਤ੍ਤੇ, ਯੇਨ ਖਾਣੁਮਤਕਾ ਬ੍ਰਾਹ੍ਮਣਗਹਪਤਿਕਾ ਤੇਨੁਪਸਙ੍ਕਮ. ਉਪਸਙ੍ਕਮਿਤ੍ਵਾ ਖਾਣੁਮਤਕੇ ਬ੍ਰਾਹ੍ਮਣਗਹਪਤਿਕੇ ਏਵਂ ਵਦੇਹਿ – ‘ਕੂਟਦਨ੍ਤੋ, ਭੋ, ਬ੍ਰਾਹ੍ਮਣੋ ਏਵਮਾਹ – ‘‘ਆਗਮੇਨ੍ਤੁ ਕਿਰ ਭਵਨ੍ਤੋ, ਕੂਟਦਨ੍ਤੋਪਿ ਬ੍ਰਾਹ੍ਮਣੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਤੀ’’’ਤਿ. ‘‘ਏਵਂ, ਭੋ’’ਤਿ ਖੋ ਸੋ ਖਤ੍ਤਾ ਕੂਟਦਨ੍ਤਸ੍ਸ ਬ੍ਰਾਹ੍ਮਣਸ੍ਸ ਪਟਿਸ੍ਸੁਤ੍ਵਾ ਯੇਨ ਖਾਣੁਮਤਕਾ ਬ੍ਰਾਹ੍ਮਣਗਹਪਤਿਕਾ ਤੇਨੁਪਸਙ੍ਕਮਿ. ਉਪਸਙ੍ਕਮਿਤ੍ਵਾ ਖਾਣੁਮਤਕੇ ਬ੍ਰਾਹ੍ਮਣਗਹਪਤਿਕੇ ਏਤਦਵੋਚ – ‘‘ਕੂਟਦਨ੍ਤੋ, ਭੋ, ਬ੍ਰਾਹ੍ਮਣੋ ਏਵਮਾਹ – ‘ਆਗਮੇਨ੍ਤੁ ਕਿਰ ਭੋਨ੍ਤੋ, ਕੂਟਦਨ੍ਤੋਪਿ ਬ੍ਰਾਹ੍ਮਣੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਤੀ’’’ਤਿ.
ਕੂਟਦਨ੍ਤਗੁਣਕਥਾ
੩੩੦. ਤੇਨ ਖੋ ਪਨ ਸਮਯੇਨ ਅਨੇਕਾਨਿ ਬ੍ਰਾਹ੍ਮਣਸਤਾਨਿ ਖਾਣੁਮਤੇ ਪਟਿਵਸਨ੍ਤਿ – ‘‘ਕੂਟਦਨ੍ਤਸ੍ਸ ਬ੍ਰਾਹ੍ਮਣਸ੍ਸ ਮਹਾਯਞ੍ਞਂ ਅਨੁਭਵਿਸ੍ਸਾਮਾ’’ਤਿ. ਅਸ੍ਸੋਸੁਂ ਖੋ ਤੇ ਬ੍ਰਾਹ੍ਮਣਾ – ‘‘ਕੂਟਦਨ੍ਤੋ ਕਿਰ ਬ੍ਰਾਹ੍ਮਣੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਤੀ’’ਤਿ. ਅਥ ਖੋ ਤੇ ਬ੍ਰਾਹ੍ਮਣਾ ਯੇਨ ਕੂਟਦਨ੍ਤੋ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿਂਸੁ.
੩੩੧. ਉਪਸਙ੍ਕਮਿਤ੍ਵਾ ਕੂਟਦਨ੍ਤਂ ਬ੍ਰਾਹ੍ਮਣਂ ਏਤਦਵੋਚੁਂ – ‘‘ਸਚ੍ਚਂ ਕਿਰ ਭਵਂ ਕੂਟਦਨ੍ਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਤੀ’’ਤਿ? ‘‘ਏਵਂ ਖੋ ਮੇ, ਭੋ, ਹੋਤਿ – ‘ਅਹਮ੍ਪਿ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਾਮੀ’’’ਤਿ.
‘‘ਮਾ ਭਵਂ ਕੂਟਦਨ੍ਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿ. ਨ ਅਰਹਤਿ ਭਵਂ ਕੂਟਦਨ੍ਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਸਚੇ ਭਵਂ ਕੂਟਦਨ੍ਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਤਿ, ਭੋਤੋ ਕੂਟਦਨ੍ਤਸ੍ਸ ਯਸੋ ਹਾਯਿਸ੍ਸਤਿ, ਸਮਣਸ੍ਸ ਗੋਤਮਸ੍ਸ ਯਸੋ ਅਭਿਵਡ੍ਢਿਸ੍ਸਤਿ. ਯਮ੍ਪਿ ਭੋਤੋ ਕੂਟਦਨ੍ਤਸ੍ਸ ਯਸੋ ਹਾਯਿਸ੍ਸਤਿ, ਸਮਣਸ੍ਸ ਗੋਤਮਸ੍ਸ ਯਸੋ ਅਭਿਵਡ੍ਢਿਸ੍ਸਤਿ, ਇਮਿਨਾਪਙ੍ਗੇਨ ਨ ਅਰਹਤਿ ਭਵਂ ਕੂਟਦਨ੍ਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਸਮਣੋ ਤ੍ਵੇਵ ਗੋਤਮੋ ਅਰਹਤਿ ਭਵਨ੍ਤਂ ਕੂਟਦਨ੍ਤਂ ਦਸ੍ਸਨਾਯ ਉਪਸਙ੍ਕਮਿਤੁਂ.
‘‘ਭਵਞ੍ਹਿ ਕੂਟਦਨ੍ਤੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ. ਯਮ੍ਪਿ ਭਵਂ ਕੂਟਦਨ੍ਤੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ, ਇਮਿਨਾਪਙ੍ਗੇਨ ਨ ਅਰਹਤਿ ਭਵਂ ਕੂਟਦਨ੍ਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਸਮਣੋ ਤ੍ਵੇਵ ਗੋਤਮੋ ਅਰਹਤਿ ਭਵਨ੍ਤਂ ਕੂਟਦਨ੍ਤਂ ਦਸ੍ਸਨਾਯ ਉਪਸਙ੍ਕਮਿਤੁਂ.
‘‘ਭਵਞ੍ਹਿ ਕੂਟਦਨ੍ਤੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਵਿਤ੍ਤੂਪਕਰਣੋ ਪਹੂਤਜਾਤਰੂਪਰਜਤੋ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਅਜ੍ਝਾਯਕੋ ਮਨ੍ਤਧਰੋ ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ ਪਦਕੋ ਵੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤੋ ਬ੍ਰਹ੍ਮਵਣ੍ਣੀ ਬ੍ਰਹ੍ਮਵਚ੍ਛਸੀ ਅਖੁਦ੍ਦਾਵਕਾਸੋ ਦਸ੍ਸਨਾਯ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਸੀਲਵਾ ਵੁਦ੍ਧਸੀਲੀ ਵੁਦ੍ਧਸੀਲੇਨ ਸਮਨ੍ਨਾਗਤੋ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਕਲ੍ਯਾਣਵਾਚੋ ਕਲ੍ਯਾਣਵਾਕ੍ਕਰਣੋ ਪੋਰਿਯਾ ਵਾਚਾਯ ਸਮਨ੍ਨਾਗਤੋ ਵਿਸ੍ਸਟ੍ਠਾਯ ਅਨੇਲਗਲਾਯ ਅਤ੍ਥਸ੍ਸ ਵਿਞ੍ਞਾਪਨਿਯਾ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਬਹੂਨਂ ਆਚਰਿਯਪਾਚਰਿਯੋ ਤੀਣਿ ਮਾਣਵਕਸਤਾਨਿ ਮਨ੍ਤੇ ਵਾਚੇਤਿ, ਬਹੂ ਖੋ ਪਨ ਨਾਨਾਦਿਸਾ ਨਾਨਾਜਨਪਦਾ ਮਾਣਵਕਾ ਆਗਚ੍ਛਨ੍ਤਿ ਭੋਤੋ ਕੂਟਦਨ੍ਤਸ੍ਸ ਸਨ੍ਤਿਕੇ ਮਨ੍ਤਤ੍ਥਿਕਾ ਮਨ੍ਤੇ ਅਧਿਯਿਤੁਕਾਮਾ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਜਿਣ੍ਣੋ ਵੁਦ੍ਧੋ ਮਹਲ੍ਲਕੋ ਅਦ੍ਧਗਤੋ ਵਯੋਅਨੁਪ੍ਪਤ੍ਤੋ. ਸਮਣੋ ਗੋਤਮੋ ਤਰੁਣੋ ਚੇਵ ਤਰੁਣਪਬ੍ਬਜਿਤੋ ਚ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਬ੍ਰਾਹ੍ਮਣਸ੍ਸ ਪੋਕ੍ਖਰਸਾਤਿਸ੍ਸ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ…ਪੇ…
‘‘ਭਵਞ੍ਹਿ ਕੂਟਦਨ੍ਤੋ ਖਾਣੁਮਤਂ ਅਜ੍ਝਾਵਸਤਿ ਸਤ੍ਤੁਸ੍ਸਦਂ ਸਤਿਣਕਟ੍ਠੋਦਕਂ ਸਧਞ੍ਞਂ ਰਾਜਭੋਗ੍ਗਂ ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ ਦਿਨ੍ਨਂ ਰਾਜਦਾਯਂ ਬ੍ਰਹ੍ਮਦੇਯ੍ਯਂ. ਯਮ੍ਪਿ ਭਵਂ ਕੂਟਦਨ੍ਤੋ ਖਾਣੁਮਤਂ ਅਜ੍ਝਾਵਸਤਿ ਸਤ੍ਤੁਸ੍ਸਦਂ ਸਤਿਣਕਟ੍ਠੋਦਕਂ ਸਧਞ੍ਞਂ ਰਾਜਭੋਗ੍ਗਂ, ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ ਦਿਨ੍ਨਂ ਰਾਜਦਾਯਂ ਬ੍ਰਹ੍ਮਦੇਯ੍ਯਂ, ਇਮਿਨਾਪਙ੍ਗੇਨ ਨ ਅਰਹਤਿ ਭਵਂ ਕੂਟਦਨ੍ਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਸਮਣੋਤ੍ਵੇਵ ਗੋਤਮੋ ਅਰਹਤਿ ਭਵਨ੍ਤਂ ਕੂਟਦਨ੍ਤਂ ਦਸ੍ਸਨਾਯ ਉਪਸਙ੍ਕਮਿਤੁ’’ਨ੍ਤਿ.
ਬੁਦ੍ਧਗੁਣਕਥਾ
੩੩੨. ਏਵਂ ਵੁਤ੍ਤੇ ਕੂਟਦਨ੍ਤੋ ਬ੍ਰਾਹ੍ਮਣੋ ਤੇ ਬ੍ਰਾਹ੍ਮਣੇ ਏਤਦਵੋਚ –
‘‘ਤੇਨ ਹਿ, ਭੋ, ਮਮਪਿ ਸੁਣਾਥ, ਯਥਾ ਮਯਮੇਵ ਅਰਹਾਮ ਤਂ ਭਵਨ੍ਤਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਂ, ਨ ਤ੍ਵੇਵ ਅਰਹਤਿ ਸੋ ਭਵਂ ਗੋਤਮੋ ਅਮ੍ਹਾਕਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਸਮਣੋ ਖਲੁ, ਭੋ, ਗੋਤਮੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ. ਯਮ੍ਪਿ, ਭੋ, ਸਮਣੋ ਗੋਤਮੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ, ਇਮਿਨਾਪਙ੍ਗੇਨ ਨ ਅਰਹਤਿ ਸੋ ਭਵਂ ਗੋਤਮੋ ਅਮ੍ਹਾਕਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਅਥ ਖੋ ਮਯਮੇਵ ਅਰਹਾਮ ਤਂ ਭਵਨ੍ਤਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਂ.
‘‘ਸਮਣੋ ਖਲੁ, ਭੋ, ਗੋਤਮੋ ਮਹਨ੍ਤਂ ਞਾਤਿਸਙ੍ਘਂ ਓਹਾਯ ਪਬ੍ਬਜਿਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਪਹੂਤਂ ਹਿਰਞ੍ਞਸੁਵਣ੍ਣਂ ਓਹਾਯ ਪਬ੍ਬਜਿਤੋ ਭੂਮਿਗਤਞ੍ਚ ਵੇਹਾਸਟ੍ਠਂ ਚ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਦਹਰੋਵ ਸਮਾਨੋ ਯੁਵਾ ਸੁਸੁਕਾਲ਼ਕੇਸੋ ਭਦ੍ਰੇਨ ਯੋਬ੍ਬਨੇਨ ਸਮਨ੍ਨਾਗਤੋ ਪਠਮੇਨ ਵਯਸਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਅਕਾਮਕਾਨਂ ਮਾਤਾਪਿਤੂਨਂ ਅਸ੍ਸੁਮੁਖਾਨਂ ਰੁਦਨ੍ਤਾਨਂ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤੋ ਬ੍ਰਹ੍ਮਵਣ੍ਣੀ ਬ੍ਰਹ੍ਮਵਚ੍ਛਸੀ ਅਖੁਦ੍ਦਾਵਕਾਸੋ ਦਸ੍ਸਨਾਯ …ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਸੀਲਵਾ ਅਰਿਯਸੀਲੀ ਕੁਸਲਸੀਲੀ ਕੁਸਲਸੀਲੇਨ ਸਮਨ੍ਨਾਗਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਕਲ੍ਯਾਣਵਾਚੋ ਕਲ੍ਯਾਣਵਾਕ੍ਕਰਣੋ ਪੋਰਿਯਾ ਵਾਚਾਯ ਸਮਨ੍ਨਾਗਤੋ ਵਿਸ੍ਸਟ੍ਠਾਯ ਅਨੇਲਗਲਾਯ ਅਤ੍ਥਸ੍ਸ ਵਿਞ੍ਞਾਪਨਿਯਾ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਬਹੂਨਂ ਆਚਰਿਯਪਾਚਰਿਯੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਖੀਣਕਾਮਰਾਗੋ ਵਿਗਤਚਾਪਲ੍ਲੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਕਮ੍ਮਵਾਦੀ ਕਿਰਿਯਵਾਦੀ ਅਪਾਪਪੁਰੇਕ੍ਖਾਰੋ ਬ੍ਰਹ੍ਮਞ੍ਞਾਯ ਪਜਾਯ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਉਚ੍ਚਾ ਕੁਲਾ ਪਬ੍ਬਜਿਤੋ ਅਸਮ੍ਭਿਨ੍ਨਖਤ੍ਤਿਯਕੁਲਾ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਅਡ੍ਢਾ ਕੁਲਾ ਪਬ੍ਬਜਿਤੋ ਮਹਦ੍ਧਨਾ ਮਹਾਭੋਗਾ…ਪੇ…
‘‘ਸਮਣਂ ਖਲੁ, ਭੋ, ਗੋਤਮਂ ਤਿਰੋਰਟ੍ਠਾ ਤਿਰੋਜਨਪਦਾ ਪਞ੍ਹਂ ਪੁਚ੍ਛਿਤੁਂ ਆਗਚ੍ਛਨ੍ਤਿ…ਪੇ…
‘‘ਸਮਣਂ ਖਲੁ, ਭੋ, ਗੋਤਮਂ ਅਨੇਕਾਨਿ ਦੇਵਤਾਸਹਸ੍ਸਾਨਿ ਪਾਣੇਹਿ ਸਰਣਂ ਗਤਾਨਿ…ਪੇ…
‘‘ਸਮਣਂ ਖਲੁ, ਭੋ, ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ ਤਿ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਏਹਿਸ੍ਵਾਗਤਵਾਦੀ ਸਖਿਲੋ ਸਮ੍ਮੋਦਕੋ ਅਬ੍ਭਾਕੁਟਿਕੋ ਉਤ੍ਤਾਨਮੁਖੋ ਪੁਬ੍ਬਭਾਸੀ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਚਤੁਨ੍ਨਂ ਪਰਿਸਾਨਂ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ…ਪੇ…
‘‘ਸਮਣੇ ਖਲੁ, ਭੋ, ਗੋਤਮੇ ਬਹੂ ਦੇਵਾ ਚ ਮਨੁਸ੍ਸਾ ਚ ਅਭਿਪ੍ਪਸਨ੍ਨਾ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਯਸ੍ਮਿਂ ਗਾਮੇ ਵਾ ਨਿਗਮੇ ਵਾ ਪਟਿਵਸਤਿ ਨ ਤਸ੍ਮਿਂ ਗਾਮੇ ਵਾ ਨਿਗਮੇ ਵਾ ਅਮਨੁਸ੍ਸਾ ਮਨੁਸ੍ਸੇ ਵਿਹੇਠੇਨ੍ਤਿ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਸਙ੍ਘੀ ਗਣੀ ਗਣਾਚਰਿਯੋ ਪੁਥੁਤਿਤ੍ਥਕਰਾਨਂ ਅਗ੍ਗਮਕ੍ਖਾਯਤਿ, ਯਥਾ ਖੋ ਪਨ, ਭੋ, ਏਤੇਸਂ ਸਮਣਬ੍ਰਾਹ੍ਮਣਾਨਂ ਯਥਾ ਵਾ ਤਥਾ ਵਾ ਯਸੋ ਸਮੁਦਾਗਚ੍ਛਤਿ, ਨ ਹੇਵਂ ਸਮਣਸ੍ਸ ਗੋਤਮਸ੍ਸ ਯਸੋ ਸਮੁਦਾਗਤੋ. ਅਥ ਖੋ ਅਨੁਤ੍ਤਰਾਯ ਵਿਜ੍ਜਾਚਰਣਸਮ੍ਪਦਾਯ ਸਮਣਸ੍ਸ ਗੋਤਮਸ੍ਸ ਯਸੋ ਸਮੁਦਾਗਤੋ…ਪੇ…
‘‘ਸਮਣਂ ਖਲੁ, ਭੋ, ਗੋਤਮਂ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਸਪੁਤ੍ਤੋ ਸਭਰਿਯੋ ਸਪਰਿਸੋ ਸਾਮਚ੍ਚੋ ਪਾਣੇਹਿ ਸਰਣਂ ਗਤੋ…ਪੇ…
‘‘ਸਮਣਂ ਖਲੁ, ਭੋ, ਗੋਤਮਂ ਰਾਜਾ ਪਸੇਨਦਿ ਕੋਸਲੋ ਸਪੁਤ੍ਤੋ ਸਭਰਿਯੋ ਸਪਰਿਸੋ ਸਾਮਚ੍ਚੋ ਪਾਣੇਹਿ ਸਰਣਂ ਗਤੋ…ਪੇ…
‘‘ਸਮਣਂ ਖਲੁ, ਭੋ, ਗੋਤਮਂ ਬ੍ਰਾਹ੍ਮਣੋ ਪੋਕ੍ਖਰਸਾਤਿ ਸਪੁਤ੍ਤੋ ਸਭਰਿਯੋ ਸਪਰਿਸੋ ਸਾਮਚ੍ਚੋ ਪਾਣੇਹਿ ਸਰਣਂ ਗਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਬ੍ਰਾਹ੍ਮਣਸ੍ਸ ਪੋਕ੍ਖਰਸਾਤਿਸ੍ਸ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ…ਪੇ…
‘‘ਸਮਣੋ ਖਲੁ, ਭੋ, ਗੋਤਮੋ ਖਾਣੁਮਤਂ ਅਨੁਪ੍ਪਤ੍ਤੋ ਖਾਣੁਮਤੇ ਵਿਹਰਤਿ ਅਮ੍ਬਲਟ੍ਠਿਕਾਯਂ. ਯੇ ਖੋ ਪਨ, ਭੋ, ਕੇਚਿ ਸਮਣਾ ਵਾ ਬ੍ਰਾਹ੍ਮਣਾ ਵਾ ਅਮ੍ਹਾਕਂ ਗਾਮਖੇਤ੍ਤਂ ਆਗਚ੍ਛਨ੍ਤਿ, ਅਤਿਥੀ ਨੋ ਤੇ ਹੋਨ੍ਤਿ. ਅਤਿਥੀ ਖੋ ਪਨਮ੍ਹੇਹਿ ਸਕ੍ਕਾਤਬ੍ਬਾ ਗਰੁਕਾਤਬ੍ਬਾ ਮਾਨੇਤਬ੍ਬਾ ਪੂਜੇਤਬ੍ਬਾ ਅਪਚੇਤਬ੍ਬਾ. ਯਮ੍ਪਿ, ਭੋ, ਸਮਣੋ ਗੋਤਮੋ ਖਾਣੁਮਤਂ ਅਨੁਪ੍ਪਤ੍ਤੋ ਖਾਣੁਮਤੇ ਵਿਹਰਤਿ ਅਮ੍ਬਲਟ੍ਠਿਕਾਯਂ, ਅਤਿਥਿਮ੍ਹਾਕਂ ਸਮਣੋ ਗੋਤਮੋ. ਅਤਿਥਿ ਖੋ ਪਨਮ੍ਹੇਹਿ ਸਕ੍ਕਾਤਬ੍ਬੋ ਗਰੁਕਾਤਬ੍ਬੋ ਮਾਨੇਤਬ੍ਬੋ ਪੂਜੇਤਬ੍ਬੋ ਅਪਚੇਤਬ੍ਬੋ. ਇਮਿਨਾਪਙ੍ਗੇਨ ਨਾਰਹਤਿ ਸੋ ਭਵਂ ਗੋਤਮੋ ਅਮ੍ਹਾਕਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਅਥ ਖੋ ਮਯਮੇਵ ਅਰਹਾਮ ਤਂ ਭਵਨ੍ਤਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਤੁਂ. ਏਤ੍ਤਕੇ ਖੋ ਅਹਂ, ਭੋ, ਤਸ੍ਸ ਭੋਤੋ ਗੋਤਮਸ੍ਸ ਵਣ੍ਣੇ ਪਰਿਯਾਪੁਣਾਮਿ, ਨੋ ਚ ਖੋ ਸੋ ਭਵਂ ਗੋਤਮੋ ਏਤ੍ਤਕਵਣ੍ਣੋ. ਅਪਰਿਮਾਣਵਣ੍ਣੋ ਹਿ ਸੋ ਭਵਂ ਗੋਤਮੋ’’ਤਿ.
੩੩੩. ਏਵਂ ਵੁਤ੍ਤੇ, ਤੇ ਬ੍ਰਾਹ੍ਮਣਾ ਕੂਟਦਨ੍ਤਂ ਬ੍ਰਾਹ੍ਮਣਂ ਏਤਦਵੋਚੁਂ – ‘‘ਯਥਾ ਖੋ ਭਵਂ ਕੂਟਦਨ੍ਤੋ ਸਮਣਸ੍ਸ ਗੋਤਮਸ੍ਸ ਵਣ੍ਣੇ ਭਾਸਤਿ, ਇਤੋ ਚੇਪਿ ਸੋ ਭਵਂ ਗੋਤਮੋ ਯੋਜਨਸਤੇ ਵਿਹਰਤਿ, ਅਲਮੇਵ ਸਦ੍ਧੇਨ ਕੁਲਪੁਤ੍ਤੇਨ ਦਸ੍ਸਨਾਯ ਉਪਸਙ੍ਕਮਿਤੁਂ ਅਪਿ ਪੁਟੋਸੇਨਾ’’ਤਿ. ‘‘ਤੇਨ ਹਿ, ਭੋ, ਸਬ੍ਬੇਵ ਮਯਂ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਾਮਾ’’ਤਿ.
ਮਹਾਵਿਜਿਤਰਾਜਯਞ੍ਞਕਥਾ
੩੩੪. ਅਥ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਮਹਤਾ ਬ੍ਰਾਹ੍ਮਣਗਣੇਨ ਸਦ੍ਧਿਂ ਯੇਨ ਅਮ੍ਬਲਟ੍ਠਿਕਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਖਾਣੁਮਤਕਾਪਿ ਖੋ ਬ੍ਰਾਹ੍ਮਣਗਹਪਤਿਕਾ ਅਪ੍ਪੇਕਚ੍ਚੇ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੁ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਨਾਮਗੋਤ੍ਤਂ ਸਾਵੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਤੁਣ੍ਹੀਭੂਤਾ ਏਕਮਨ੍ਤਂ ਨਿਸੀਦਿਂਸੁ.
੩੩੫. ਏਕਮਨ੍ਤਂ ਨਿਸਿਨ੍ਨੋ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਸੁਤਂ ਮੇਤਂ, ਭੋ ਗੋਤਮ – ‘ਸਮਣੋ ਗੋਤਮੋ ਤਿਵਿਧਂ ਯਞ੍ਞਸਮ੍ਪਦਂ ਸੋਲ਼ਸਪਰਿਕ੍ਖਾਰਂ ਜਾਨਾਤੀ’ਤਿ. ਨ ਖੋ ਪਨਾਹਂ ਜਾਨਾਮਿ ਤਿਵਿਧਂ ਯਞ੍ਞਸਮ੍ਪਦਂ ਸੋਲ਼ਸਪਰਿਕ੍ਖਾਰਂ. ਇਚ੍ਛਾਮਿ ਚਾਹਂ ਮਹਾਯਞ੍ਞਂ ਯਜਿਤੁਂ. ਸਾਧੁ ਮੇ ਭਵਂ ਗੋਤਮੋ ਤਿਵਿਧਂ ਯਞ੍ਞਸਮ੍ਪਦਂ ਸੋਲ਼ਸਪਰਿਕ੍ਖਾਰਂ ਦੇਸੇਤੂ’’ਤਿ.
੩੩੬. ‘‘ਤੇਨ ਹਿ, ਬ੍ਰਾਹ੍ਮਣ, ਸੁਣਾਹਿ ਸਾਧੁਕਂ ਮਨਸਿਕਰੋਹਿ, ਭਾਸਿਸ੍ਸਾਮੀ’’ਤਿ. ‘‘ਏਵਂ, ਭੋ’’ਤਿ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਭਗਵਤੋ ਪਚ੍ਚਸ੍ਸੋਸਿ. ਭਗਵਾ ਏਤਦਵੋਚ – ‘‘ਭੂਤਪੁਬ੍ਬਂ, ਬ੍ਰਾਹ੍ਮਣ, ਰਾਜਾ ਮਹਾਵਿਜਿਤੋ ਨਾਮ ਅਹੋਸਿ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਜਾਤਰੂਪਰਜਤੋ ਪਹੂਤਵਿਤ੍ਤੂਪਕਰਣੋ ਪਹੂਤਧਨਧਞ੍ਞੋ ਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਅਥ ਖੋ, ਬ੍ਰਾਹ੍ਮਣ, ਰਞ੍ਞੋ ਮਹਾਵਿਜਿਤਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘ਅਧਿਗਤਾ ਖੋ ਮੇ ਵਿਪੁਲਾ ਮਾਨੁਸਕਾ ਭੋਗਾ, ਮਹਨ੍ਤਂ ਪਥਵਿਮਣ੍ਡਲਂ ਅਭਿਵਿਜਿਯ ਅਜ੍ਝਾਵਸਾਮਿ, ਯਂਨੂਨਾਹਂ ਮਹਾਯਞ੍ਞਂ ਯਜੇਯ੍ਯਂ, ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’ਤਿ.
੩੩੭. ‘‘ਅਥ ਖੋ, ਬ੍ਰਾਹ੍ਮਣ, ਰਾਜਾ ਮਹਾਵਿਜਿਤੋ ਪੁਰੋਹਿਤਂ ਬ੍ਰਾਹ੍ਮਣਂ ਆਮਨ੍ਤੇਤ੍ਵਾ ਏਤਦਵੋਚ – ‘ਇਧ ਮਯ੍ਹਂ, ਬ੍ਰਾਹ੍ਮਣ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ਅਧਿਗਤਾ ਖੋ ਮੇ ਵਿਪੁਲਾ ਮਾਨੁਸਕਾ ਭੋਗਾ, ਮਹਨ੍ਤਂ ਪਥਵਿਮਣ੍ਡਲਂ ਅਭਿਵਿਜਿਯ ਅਜ੍ਝਾਵਸਾਮਿ. ਯਂਨੂਨਾਹਂ ਮਹਾਯਞ੍ਞਂ ਯਜੇਯ੍ਯਂ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’ਤਿ. ਇਚ੍ਛਾਮਹਂ, ਬ੍ਰਾਹ੍ਮਣ, ਮਹਾਯਞ੍ਞਂ ਯਜਿਤੁਂ. ਅਨੁਸਾਸਤੁ ਮਂ ਭਵਂ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’’ਤਿ.
੩੩੮. ‘‘ਏਵਂ ਵੁਤ੍ਤੇ, ਬ੍ਰਾਹ੍ਮਣ, ਪੁਰੋਹਿਤੋ ਬ੍ਰਾਹ੍ਮਣੋ ਰਾਜਾਨਂ ਮਹਾਵਿਜਿਤਂ ਏਤਦਵੋਚ – ‘ਭੋਤੋ ਖੋ ਰਞ੍ਞੋ ਜਨਪਦੋ ਸਕਣ੍ਟਕੋ ਸਉਪ੍ਪੀਲ਼ੋ, ਗਾਮਘਾਤਾਪਿ ਦਿਸ੍ਸਨ੍ਤਿ, ਨਿਗਮਘਾਤਾਪਿ ਦਿਸ੍ਸਨ੍ਤਿ, ਨਗਰਘਾਤਾਪਿ ਦਿਸ੍ਸਨ੍ਤਿ, ਪਨ੍ਥਦੁਹਨਾਪਿ ਦਿਸ੍ਸਨ੍ਤਿ. ਭਵਂ ਖੋ ਪਨ ਰਾਜਾ ਏਵਂ ਸਕਣ੍ਟਕੇ ਜਨਪਦੇ ਸਉਪ੍ਪੀਲ਼ੇ ਬਲਿਮੁਦ੍ਧਰੇਯ੍ਯ, ਅਕਿਚ੍ਚਕਾਰੀ ਅਸ੍ਸ ਤੇਨ ਭਵਂ ਰਾਜਾ. ਸਿਯਾ ਖੋ ਪਨ ਭੋਤੋ ਰਞ੍ਞੋ ਏਵਮਸ੍ਸ – ‘‘ਅਹਮੇਤਂ ਦਸ੍ਸੁਖੀਲਂ ਵਧੇਨ ਵਾ ਬਨ੍ਧੇਨ ਵਾ ਜਾਨਿਯਾ ਵਾ ਗਰਹਾਯ ਵਾ ਪਬ੍ਬਾਜਨਾਯ ਵਾ ਸਮੂਹਨਿਸ੍ਸਾਮੀ’’ਤਿ, ਨ ਖੋ ਪਨੇਤਸ੍ਸ ਦਸ੍ਸੁਖੀਲਸ੍ਸ ਏਵਂ ਸਮ੍ਮਾ ਸਮੁਗ੍ਘਾਤੋ ਹੋਤਿ. ਯੇ ਤੇ ਹਤਾਵਸੇਸਕਾ ਭਵਿਸ੍ਸਨ੍ਤਿ, ਤੇ ਪਚ੍ਛਾ ਰਞ੍ਞੋ ਜਨਪਦਂ ਵਿਹੇਠੇਸ੍ਸਨ੍ਤਿ. ਅਪਿ ਚ ਖੋ ਇਦਂ ਸਂਵਿਧਾਨਂ ਆਗਮ੍ਮ ਏਵਮੇਤਸ੍ਸ ਦਸ੍ਸੁਖੀਲਸ੍ਸ ਸਮ੍ਮਾ ਸਮੁਗ੍ਘਾਤੋ ਹੋਤਿ. ਤੇਨ ਹਿ ਭਵਂ ਰਾਜਾ ਯੇ ਭੋਤੋ ਰਞ੍ਞੋ ਜਨਪਦੇ ਉਸ੍ਸਹਨ੍ਤਿ ਕਸਿਗੋਰਕ੍ਖੇ, ਤੇਸਂ ਭਵਂ ਰਾਜਾ ਬੀਜਭਤ੍ਤਂ ਅਨੁਪ੍ਪਦੇਤੁ. ਯੇ ਭੋਤੋ ਰਞ੍ਞੋ ਜਨਪਦੇ ਉਸ੍ਸਹਨ੍ਤਿ ਵਾਣਿਜ੍ਜਾਯ, ਤੇਸਂ ਭਵਂ ਰਾਜਾ ਪਾਭਤਂ ਅਨੁਪ੍ਪਦੇਤੁ. ਯੇ ਭੋਤੋ ਰਞ੍ਞੋ ਜਨਪਦੇ ਉਸ੍ਸਹਨ੍ਤਿ ਰਾਜਪੋਰਿਸੇ, ਤੇਸਂ ਭਵਂ ਰਾਜਾ ਭਤ੍ਤਵੇਤਨਂ ਪਕਪ੍ਪੇਤੁ. ਤੇ ਚ ਮਨੁਸ੍ਸਾ ਸਕਮ੍ਮਪਸੁਤਾ ਰਞ੍ਞੋ ਜਨਪਦਂ ਨ ਵਿਹੇਠੇਸ੍ਸਨ੍ਤਿ; ਮਹਾ ਚ ਰਞ੍ਞੋ ਰਾਸਿਕੋ ਭਵਿਸ੍ਸਤਿ. ਖੇਮਟ੍ਠਿਤਾ ਜਨਪਦਾ ਅਕਣ੍ਟਕਾ ਅਨੁਪ੍ਪੀਲ਼ਾ. ਮਨੁਸ੍ਸਾ ਮੁਦਾ ਮੋਦਮਾਨਾ ਉਰੇ ਪੁਤ੍ਤੇ ਨਚ੍ਚੇਨ੍ਤਾ ਅਪਾਰੁਤਘਰਾ ਮਞ੍ਞੇ ਵਿਹਰਿਸ੍ਸਨ੍ਤੀ’ਤਿ. ‘ਏਵਂ, ਭੋ’ਤਿ ਖੋ, ਬ੍ਰਾਹ੍ਮਣ, ਰਾਜਾ ਮਹਾਵਿਜਿਤੋ ਪੁਰੋਹਿਤਸ੍ਸ ਬ੍ਰਾਹ੍ਮਣਸ੍ਸ ਪਟਿਸ੍ਸੁਤ੍ਵਾ ਯੇ ਰਞ੍ਞੋ ਜਨਪਦੇ ਉਸ੍ਸਹਿਂਸੁ ਕਸਿਗੋਰਕ੍ਖੇ, ਤੇਸਂ ਰਾਜਾ ਮਹਾਵਿਜਿਤੋ ਬੀਜਭਤ੍ਤਂ ਅਨੁਪ੍ਪਦਾਸਿ. ਯੇ ਚ ਰਞ੍ਞੋ ਜਨਪਦੇ ਉਸ੍ਸਹਿਂਸੁ ਵਾਣਿਜ੍ਜਾਯ, ਤੇਸਂ ਰਾਜਾ ਮਹਾਵਿਜਿਤੋ ਪਾਭਤਂ ਅਨੁਪ੍ਪਦਾਸਿ. ਯੇ ਚ ਰਞ੍ਞੋ ਜਨਪਦੇ ਉਸ੍ਸਹਿਂਸੁ ਰਾਜਪੋਰਿਸੇ, ਤੇਸਂ ਰਾਜਾ ਮਹਾਵਿਜਿਤੋ ਭਤ੍ਤਵੇਤਨਂ ਪਕਪ੍ਪੇਸਿ. ਤੇ ਚ ਮਨੁਸ੍ਸਾ ਸਕਮ੍ਮਪਸੁਤਾ ਰਞ੍ਞੋ ਜਨਪਦਂ ਨ ਵਿਹੇਠਿਂਸੁ, ਮਹਾ ਚ ਰਞ੍ਞੋ ਰਾਸਿਕੋ ਅਹੋਸਿ. ਖੇਮਟ੍ਠਿਤਾ ਜਨਪਦਾ ਅਕਣ੍ਟਕਾ ਅਨੁਪ੍ਪੀਲ਼ਾ ਮਨੁਸ੍ਸਾ ਮੁਦਾ ਮੋਦਮਾਨਾ ਉਰੇ ਪੁਤ੍ਤੇ ਨਚ੍ਚੇਨ੍ਤਾ ਅਪਾਰੁਤਘਰਾ ਮਞ੍ਞੇ ਵਿਹਰਿਂਸੁ. ਅਥ ਖੋ, ਬ੍ਰਾਹ੍ਮਣ, ਰਾਜਾ ਮਹਾਵਿਜਿਤੋ ਪੁਰੋਹਿਤਂ ਬ੍ਰਾਹ੍ਮਣਂ ਆਮਨ੍ਤੇਤ੍ਵਾ ਏਤਦਵੋਚ – ‘ਸਮੂਹਤੋ ਖੋ ਮੇ ਭੋਤੋ ਦਸ੍ਸੁਖੀਲੋ, ਭੋਤੋ ਸਂਵਿਧਾਨਂ ਆਗਮ੍ਮ ਮਹਾ ਚ ਮੇ ਰਾਸਿਕੋ. ਖੇਮਟ੍ਠਿਤਾ ਜਨਪਦਾ ਅਕਣ੍ਟਕਾ ਅਨੁਪ੍ਪੀਲ਼ਾ ਮਨੁਸ੍ਸਾ ਮੁਦਾ ਮੋਦਮਾਨਾ ਉਰੇ ਪੁਤ੍ਤੇ ਨਚ੍ਚੇਨ੍ਤਾ ਅਪਾਰੁਤਘਰਾ ਮਞ੍ਞੇ ਵਿਹਰਨ੍ਤਿ. ਇਚ੍ਛਾਮਹਂ ਬ੍ਰਾਹ੍ਮਣ ਮਹਾਯਞ੍ਞਂ ਯਜਿਤੁਂ. ਅਨੁਸਾਸਤੁ ਮਂ ਭਵਂ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’ਤਿ.
ਚਤੁਪਰਿਕ੍ਖਾਰਂ
੩੩੯. ‘‘ਤੇਨ ਹਿ ਭਵਂ ਰਾਜਾ ਯੇ ਭੋਤੋ ਰਞ੍ਞੋ ਜਨਪਦੇ ਖਤ੍ਤਿਯਾ ਆਨੁਯਨ੍ਤਾ ਨੇਗਮਾ ਚੇਵ ਜਾਨਪਦਾ ਚ ਤੇ ਭਵਂ ਰਾਜਾ ਆਮਨ੍ਤਯਤਂ – ‘ਇਚ੍ਛਾਮਹਂ, ਭੋ, ਮਹਾਯਞ੍ਞਂ ਯਜਿਤੁਂ, ਅਨੁਜਾਨਨ੍ਤੁ ਮੇ ਭਵਨ੍ਤੋ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’ਤਿ. ਯੇ ਭੋਤੋ ਰਞ੍ਞੋ ਜਨਪਦੇ ਅਮਚ੍ਚਾ ਪਾਰਿਸਜ੍ਜਾ ਨੇਗਮਾ ਚੇਵ ਜਾਨਪਦਾ ਚ…ਪੇ… ਬ੍ਰਾਹ੍ਮਣਮਹਾਸਾਲਾ ਨੇਗਮਾ ਚੇਵ ਜਾਨਪਦਾ ਚ…ਪੇ… ਗਹਪਤਿਨੇਚਯਿਕਾ ਨੇਗਮਾ ਚੇਵ ਜਾਨਪਦਾ ਚ, ਤੇ ਭਵਂ ਰਾਜਾ ਆਮਨ੍ਤਯਤਂ – ‘ਇਚ੍ਛਾਮਹਂ, ਭੋ, ਮਹਾਯਞ੍ਞਂ ਯਜਿਤੁਂ, ਅਨੁਜਾਨਨ੍ਤੁ ਮੇ ਭਵਨ੍ਤੋ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’ਤਿ. ‘ਏਵਂ, ਭੋ’ਤਿ ਖੋ, ਬ੍ਰਾਹ੍ਮਣ, ਰਾਜਾ ਮਹਾਵਿਜਿਤੋ ਪੁਰੋਹਿਤਸ੍ਸ ਬ੍ਰਾਹ੍ਮਣਸ੍ਸ ਪਟਿਸ੍ਸੁਤ੍ਵਾ ਯੇ ਰਞ੍ਞੋ ਜਨਪਦੇ ਖਤ੍ਤਿਯਾ ਆਨੁਯਨ੍ਤਾ ਨੇਗਮਾ ਚੇਵ ਜਾਨਪਦਾ ਚ, ਤੇ ਰਾਜਾ ਮਹਾਵਿਜਿਤੋ ਆਮਨ੍ਤੇਸਿ – ‘ਇਚ੍ਛਾਮਹਂ, ਭੋ, ਮਹਾਯਞ੍ਞਂ ਯਜਿਤੁਂ, ਅਨੁਜਾਨਨ੍ਤੁ ਮੇ ਭਵਨ੍ਤੋ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ‘ਯਜਤਂ ਭਵਂ ਰਾਜਾ ਯਞ੍ਞਂ, ਯਞ੍ਞਕਾਲੋ ਮਹਾਰਾਜਾ’ਤਿ. ਯੇ ਰਞ੍ਞੋ ਜਨਪਦੇ ਅਮਚ੍ਚਾ ਪਾਰਿਸਜ੍ਜਾ ਨੇਗਮਾ ਚੇਵ ਜਾਨਪਦਾ ਚ…ਪੇ… ਬ੍ਰਾਹ੍ਮਣਮਹਾਸਾਲਾ ਨੇਗਮਾ ਚੇਵ ਜਾਨਪਦਾ ਚ…ਪੇ… ਗਹਪਤਿਨੇਚਯਿਕਾ ਨੇਗਮਾ ਚੇਵ ਜਾਨਪਦਾ ਚ, ਤੇ ਰਾਜਾ ਮਹਾਵਿਜਿਤੋ ਆਮਨ੍ਤੇਸਿ – ‘ਇਚ੍ਛਾਮਹਂ, ਭੋ, ਮਹਾਯਞ੍ਞਂ ਯਜਿਤੁਂ. ਅਨੁਜਾਨਨ੍ਤੁ ਮੇ ਭਵਨ੍ਤੋ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’ਤਿ. ‘ਯਜਤਂ ਭਵਂ ਰਾਜਾ ਯਞ੍ਞਂ, ਯਞ੍ਞਕਾਲੋ ਮਹਾਰਾਜਾ’ਤਿ. ਇਤਿਮੇ ਚਤ੍ਤਾਰੋ ਅਨੁਮਤਿਪਕ੍ਖਾ ਤਸ੍ਸੇਵ ਯਞ੍ਞਸ੍ਸ ਪਰਿਕ੍ਖਾਰਾ ਭਵਨ੍ਤਿ.
ਅਟ੍ਠ ਪਰਿਕ੍ਖਾਰਾ
੩੪੦. ‘‘ਰਾਜਾ ਮਹਾਵਿਜਿਤੋ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ, ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤੋ ਬ੍ਰਹ੍ਮਵਣ੍ਣੀ ਬ੍ਰਹ੍ਮਵਚ੍ਛਸੀ ਅਖੁਦ੍ਦਾਵਕਾਸੋ ਦਸ੍ਸਨਾਯ; ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਜਾਤਰੂਪਰਜਤੋ ਪਹੂਤਵਿਤ੍ਤੂਪਕਰਣੋ ਪਹੂਤਧਨਧਞ੍ਞੋ ਪਰਿਪੁਣ੍ਣਕੋਸਕੋਟ੍ਠਾਗਾਰੋ; ਬਲਵਾ ਚਤੁਰਙ੍ਗਿਨਿਯਾ ਸੇਨਾਯ ਸਮਨ੍ਨਾਗਤੋ ਅਸ੍ਸਵਾਯ ਓਵਾਦਪਟਿਕਰਾਯ ਸਹਤਿ [ਪਤਪਤਿ (ਸੀ. ਪੀ.), ਤਪਤਿ (ਸ੍ਯਾ.)] ਮਞ੍ਞੇ ਪਚ੍ਚਤ੍ਥਿਕੇ ਯਸਸਾ; ਸਦ੍ਧੋ ਦਾਯਕੋ ਦਾਨਪਤਿ ਅਨਾਵਟਦ੍ਵਾਰੋ ਸਮਣਬ੍ਰਾਹ੍ਮਣਕਪਣਦ੍ਧਿਕਵਣਿਬ੍ਬਕਯਾਚਕਾਨਂ ਓਪਾਨਭੂਤੋ ਪੁਞ੍ਞਾਨਿ ਕਰੋਤਿ; ਬਹੁਸ੍ਸੁਤੋ ਤਸ੍ਸ ਤਸ੍ਸ ਸੁਤਜਾਤਸ੍ਸ, ਤਸ੍ਸ ਤਸ੍ਸੇਵ ਖੋ ਪਨ ਭਾਸਿਤਸ੍ਸ ਅਤ੍ਥਂ ਜਾਨਾਤਿ ‘ਅਯਂ ਇਮਸ੍ਸ ਭਾਸਿਤਸ੍ਸ ਅਤ੍ਥੋ ਅਯਂ ਇਮਸ੍ਸ ਭਾਸਿਤਸ੍ਸ ਅਤ੍ਥੋ’ਤਿ; ਪਣ੍ਡਿਤੋ, ਵਿਯਤ੍ਤੋ, ਮੇਧਾਵੀ, ਪਟਿਬਲੋ, ਅਤੀਤਾਨਾਗਤਪਚ੍ਚੁਪ੍ਪਨ੍ਨੇ ਅਤ੍ਥੇ ਚਿਨ੍ਤੇਤੁਂ. ਰਾਜਾ ਮਹਾਵਿਜਿਤੋ ਇਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ. ਇਤਿ ਇਮਾਨਿਪਿ ਅਟ੍ਠਙ੍ਗਾਨਿ ਤਸ੍ਸੇਵ ਯਞ੍ਞਸ੍ਸ ਪਰਿਕ੍ਖਾਰਾ ਭਵਨ੍ਤਿ.
ਚਤੁਪਰਿਕ੍ਖਾਰਂ
੩੪੧. ‘‘ਪੁਰੋਹਿਤੋ [ਪੁਰੋਹਿਤੋਪਿ (ਕ. ਸੀ. ਕ.)] ਬ੍ਰਾਹ੍ਮਣੋ ਚਤੁਹਙ੍ਗੇਹਿ ਸਮਨ੍ਨਾਗਤੋ. ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ; ਅਜ੍ਝਾਯਕੋ ਮਨ੍ਤਧਰੋ ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ ਪਦਕੋ ਵੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ; ਸੀਲਵਾ ਵੁਦ੍ਧਸੀਲੀ ਵੁਦ੍ਧਸੀਲੇਨ ਸਮਨ੍ਨਾਗਤੋ; ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਪਠਮੋ ਵਾ ਦੁਤਿਯੋ ਵਾ ਸੁਜਂ ਪਗ੍ਗਣ੍ਹਨ੍ਤਾਨਂ. ਪੁਰੋਹਿਤੋ ਬ੍ਰਾਹ੍ਮਣੋ ਇਮੇਹਿ ਚਤੂਹਙ੍ਗੇਹਿ ਸਮਨ੍ਨਾਗਤੋ. ਇਤਿ ਇਮਾਨਿ ਚਤ੍ਤਾਰਿ ਅਙ੍ਗਾਨਿ ਤਸ੍ਸੇਵ ਯਞ੍ਞਸ੍ਸ ਪਰਿਕ੍ਖਾਰਾ ਭਵਨ੍ਤਿ.
ਤਿਸ੍ਸੋ ਵਿਧਾ
੩੪੨. ‘‘ਅਥ ਖੋ, ਬ੍ਰਾਹ੍ਮਣ, ਪੁਰੋਹਿਤੋ ਬ੍ਰਾਹ੍ਮਣੋ ਰਞ੍ਞੋ ਮਹਾਵਿਜਿਤਸ੍ਸ ਪੁਬ੍ਬੇਵ ਯਞ੍ਞਾ ਤਿਸ੍ਸੋ ਵਿਧਾ ਦੇਸੇਸਿ. ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਿਟ੍ਠੁਕਾਮਸ੍ਸ [ਯਿਟ੍ਠਕਾਮਸ੍ਸ (ਕ.)] ਕੋਚਿਦੇਵ ਵਿਪ੍ਪਟਿਸਾਰੋ – ‘ਮਹਾ ਵਤ ਮੇ ਭੋਗਕ੍ਖਨ੍ਧੋ ਵਿਗਚ੍ਛਿਸ੍ਸਤੀ’ਤਿ, ਸੋ ਭੋਤਾ ਰਞ੍ਞਾ ਵਿਪ੍ਪਟਿਸਾਰੋ ਨ ਕਰਣੀਯੋ. ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਜਮਾਨਸ੍ਸ ਕੋਚਿਦੇਵ ਵਿਪ੍ਪਟਿਸਾਰੋ – ‘ਮਹਾ ਵਤ ਮੇ ਭੋਗਕ੍ਖਨ੍ਧੋ ਵਿਗਚ੍ਛਤੀ’ਤਿ, ਸੋ ਭੋਤਾ ਰਞ੍ਞਾ ਵਿਪ੍ਪਟਿਸਾਰੋ ਨ ਕਰਣੀਯੋ. ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਿਟ੍ਠਸ੍ਸ ਕੋਚਿਦੇਵ ਵਿਪ੍ਪਟਿਸਾਰੋ – ‘ਮਹਾ ਵਤ ਮੇ ਭੋਗਕ੍ਖਨ੍ਧੋ ਵਿਗਤੋ’ਤਿ, ਸੋ ਭੋਤਾ ਰਞ੍ਞਾ ਵਿਪ੍ਪਟਿਸਾਰੋ ਨ ਕਰਣੀਯੋ’’ਤਿ. ਇਮਾ ਖੋ, ਬ੍ਰਾਹ੍ਮਣ, ਪੁਰੋਹਿਤੋ ਬ੍ਰਾਹ੍ਮਣੋ ਰਞ੍ਞੋ ਮਹਾਵਿਜਿਤਸ੍ਸ ਪੁਬ੍ਬੇਵ ਯਞ੍ਞਾ ਤਿਸ੍ਸੋ ਵਿਧਾ ਦੇਸੇਸਿ.
ਦਸ ਆਕਾਰਾ
੩੪੩. ‘‘ਅਥ ਖੋ, ਬ੍ਰਾਹ੍ਮਣ, ਪੁਰੋਹਿਤੋ ਬ੍ਰਾਹ੍ਮਣੋ ਰਞ੍ਞੋ ਮਹਾਵਿਜਿਤਸ੍ਸ ਪੁਬ੍ਬੇਵ ਯਞ੍ਞਾ ਦਸਹਾਕਾਰੇਹਿ ਪਟਿਗ੍ਗਾਹਕੇਸੁ ਵਿਪ੍ਪਟਿਸਾਰਂ ਪਟਿਵਿਨੇਸਿ. ‘ਆਗਮਿਸ੍ਸਨ੍ਤਿ ਖੋ ਭੋਤੋ ਯਞ੍ਞਂ ਪਾਣਾਤਿਪਾਤਿਨੋਪਿ ਪਾਣਾਤਿਪਾਤਾ ਪਟਿਵਿਰਤਾਪਿ. ਯੇ ਤਤ੍ਥ ਪਾਣਾਤਿਪਾਤਿਨੋ, ਤੇਸਞ੍ਞੇਵ ਤੇਨ. ਯੇ ਤਤ੍ਥ ਪਾਣਾਤਿਪਾਤਾ ਪਟਿਵਿਰਤਾ, ਤੇ ਆਰਬ੍ਭ ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੁ. ਆਗਮਿਸ੍ਸਨ੍ਤਿ ਖੋ ਭੋਤੋ ਯਞ੍ਞਂ ਅਦਿਨ੍ਨਾਦਾਯਿਨੋਪਿ ਅਦਿਨ੍ਨਾਦਾਨਾ ਪਟਿਵਿਰਤਾਪਿ…ਪੇ… ਕਾਮੇਸੁ ਮਿਚ੍ਛਾਚਾਰਿਨੋਪਿ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤਾਪਿ… ਮੁਸਾਵਾਦਿਨੋਪਿ ਮੁਸਾਵਾਦਾ ਪਟਿਵਿਰਤਾਪਿ… ਪਿਸੁਣਵਾਚਿਨੋਪਿ ਪਿਸੁਣਾਯ ਵਾਚਾਯ ਪਟਿਵਿਰਤਾਪਿ… ਫਰੁਸਵਾਚਿਨੋਪਿ ਫਰੁਸਾਯ ਵਾਚਾਯ ਪਟਿਵਿਰਤਾਪਿ… ਸਮ੍ਫਪ੍ਪਲਾਪਿਨੋਪਿ ਸਮ੍ਫਪ੍ਪਲਾਪਾ ਪਟਿਵਿਰਤਾਪਿ … ਅਭਿਜ੍ਝਾਲੁਨੋਪਿ ਅਨਭਿਜ੍ਝਾਲੁਨੋਪਿ… ਬ੍ਯਾਪਨ੍ਨਚਿਤ੍ਤਾਪਿ ਅਬ੍ਯਾਪਨ੍ਨਚਿਤ੍ਤਾਪਿ… ਮਿਚ੍ਛਾਦਿਟ੍ਠਿਕਾਪਿ ਸਮ੍ਮਾਦਿਟ੍ਠਿਕਾਪਿ…. ਯੇ ਤਤ੍ਥ ਮਿਚ੍ਛਾਦਿਟ੍ਠਿਕਾ, ਤੇਸਞ੍ਞੇਵ ਤੇਨ. ਯੇ ਤਤ੍ਥ ਸਮ੍ਮਾਦਿਟ੍ਠਿਕਾ, ਤੇ ਆਰਬ੍ਭ ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੂ’ਤਿ. ਇਮੇਹਿ ਖੋ, ਬ੍ਰਾਹ੍ਮਣ, ਪੁਰੋਹਿਤੋ ਬ੍ਰਾਹ੍ਮਣੋ ਰਞ੍ਞੋ ਮਹਾਵਿਜਿਤਸ੍ਸ ਪੁਬ੍ਬੇਵ ਯਞ੍ਞਾ ਦਸਹਾਕਾਰੇਹਿ ਪਟਿਗ੍ਗਾਹਕੇਸੁ ਵਿਪ੍ਪਟਿਸਾਰਂ ਪਟਿਵਿਨੇਸਿ.
ਸੋਲ਼ਸ ਆਕਾਰਾ
੩੪੪. ‘‘ਅਥ ਖੋ, ਬ੍ਰਾਹ੍ਮਣ, ਪੁਰੋਹਿਤੋ ਬ੍ਰਾਹ੍ਮਣੋ ਰਞ੍ਞੋ ਮਹਾਵਿਜਿਤਸ੍ਸ ਮਹਾਯਞ੍ਞਂ ਯਜਮਾਨਸ੍ਸ ਸੋਲ਼ਸਹਾਕਾਰੇਹਿ ਚਿਤ੍ਤਂ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਜਮਾਨਸ੍ਸ ਕੋਚਿਦੇਵ ਵਤ੍ਤਾ – ‘ਰਾਜਾ ਖੋ ਮਹਾਵਿਜਿਤੋ ਮਹਾਯਞ੍ਞਂ ਯਜਤਿ, ਨੋ ਚ ਖੋ ਤਸ੍ਸ ਆਮਨ੍ਤਿਤਾ ਖਤ੍ਤਿਯਾ ਆਨੁਯਨ੍ਤਾ ਨੇਗਮਾ ਚੇਵ ਜਾਨਪਦਾ ਚ; ਅਥ ਚ ਪਨ ਭਵਂ ਰਾਜਾ ਏਵਰੂਪਂ ਮਹਾਯਞ੍ਞਂ ਯਜਤੀ’ਤਿ. ਏਵਮ੍ਪਿ ਭੋਤੋ ਰਞ੍ਞੋ ਵਤ੍ਤਾ ਧਮ੍ਮਤੋ ਨਤ੍ਥਿ. ਭੋਤਾ ਖੋ ਪਨ ਰਞ੍ਞਾ ਆਮਨ੍ਤਿਤਾ ਖਤ੍ਤਿਯਾ ਆਨੁਯਨ੍ਤਾ ਨੇਗਮਾ ਚੇਵ ਜਾਨਪਦਾ ਚ. ਇਮਿਨਾਪੇਤਂ ਭਵਂ ਰਾਜਾ ਜਾਨਾਤੁ, ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੁ.
‘‘ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਜਮਾਨਸ੍ਸ ਕੋਚਿਦੇਵ ਵਤ੍ਤਾ – ‘ਰਾਜਾ ਖੋ ਮਹਾਵਿਜਿਤੋ ਮਹਾਯਞ੍ਞਂ ਯਜਤਿ, ਨੋ ਚ ਖੋ ਤਸ੍ਸ ਆਮਨ੍ਤਿਤਾ ਅਮਚ੍ਚਾ ਪਾਰਿਸਜ੍ਜਾ ਨੇਗਮਾ ਚੇਵ ਜਾਨਪਦਾ ਚ…ਪੇ… ਬ੍ਰਾਹ੍ਮਣਮਹਾਸਾਲਾ ਨੇਗਮਾ ਚੇਵ ਜਾਨਪਦਾ ਚ…ਪੇ… ਗਹਪਤਿਨੇਚਯਿਕਾ ਨੇਗਮਾ ਚੇਵ ਜਾਨਪਦਾ ਚ, ਅਥ ਚ ਪਨ ਭਵਂ ਰਾਜਾ ਏਵਰੂਪਂ ਮਹਾਯਞ੍ਞਂ ਯਜਤੀ’ਤਿ. ਏਵਮ੍ਪਿ ਭੋਤੋ ਰਞ੍ਞੋ ਵਤ੍ਤਾ ਧਮ੍ਮਤੋ ਨਤ੍ਥਿ. ਭੋਤਾ ਖੋ ਪਨ ਰਞ੍ਞਾ ਆਮਨ੍ਤਿਤਾ ਗਹਪਤਿਨੇਚਯਿਕਾ ਨੇਗਮਾ ਚੇਵ ਜਾਨਪਦਾ ਚ. ਇਮਿਨਾਪੇਤਂ ਭਵਂ ਰਾਜਾ ਜਾਨਾਤੁ, ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੁ.
‘‘ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਜਮਾਨਸ੍ਸ ਕੋਚਿਦੇਵ ਵਤ੍ਤਾ – ‘ਰਾਜਾ ਖੋ ਮਹਾਵਿਜਿਤੋ ਮਹਾਯਞ੍ਞਂ ਯਜਤਿ, ਨੋ ਚ ਖੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ, ਅਥ ਚ ਪਨ ਭਵਂ ਰਾਜਾ ਏਵਰੂਪਂ ਮਹਾਯਞ੍ਞਂ ਯਜਤੀ’ਤਿ. ਏਵਮ੍ਪਿ ਭੋਤੋ ਰਞ੍ਞੋ ਵਤ੍ਤਾ ਧਮ੍ਮਤੋ ਨਤ੍ਥਿ. ਭਵਂ ਖੋ ਪਨ ਰਾਜਾ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ. ਇਮਿਨਾਪੇਤਂ ਭਵਂ ਰਾਜਾ ਜਾਨਾਤੁ, ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੁ.
‘‘ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਜਮਾਨਸ੍ਸ ਕੋਚਿਦੇਵ ਵਤ੍ਤਾ – ‘ਰਾਜਾ ਖੋ ਮਹਾਵਿਜਿਤੋ ਮਹਾਯਞ੍ਞਂ ਯਜਤਿ ਨੋ ਚ ਖੋ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤੋ ਬ੍ਰਹ੍ਮਵਣ੍ਣੀ ਬ੍ਰਹ੍ਮਵਚ੍ਛਸੀ ਅਖੁਦ੍ਦਾਵਕਾਸੋ ਦਸ੍ਸਨਾਯ…ਪੇ… ਨੋ ਚ ਖੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਜਾਤਰੂਪਰਜਤੋ ਪਹੂਤਵਿਤ੍ਤੂਪਕਰਣੋ ਪਹੂਤਧਨਧਞ੍ਞੋ ਪਰਿਪੁਣ੍ਣਕੋਸਕੋਟ੍ਠਾਗਾਰੋ…ਪੇ… ਨੋ ਚ ਖੋ ਬਲਵਾ ਚਤੁਰਙ੍ਗਿਨਿਯਾ ਸੇਨਾਯ ਸਮਨ੍ਨਾਗਤੋ ਅਸ੍ਸਵਾਯ ਓਵਾਦਪਟਿਕਰਾਯ ਸਹਤਿ ਮਞ੍ਞੇ ਪਚ੍ਚਤ੍ਥਿਕੇ ਯਸਸਾ…ਪੇ… ਨੋ ਚ ਖੋ ਸਦ੍ਧੋ ਦਾਯਕੋ ਦਾਨਪਤਿ ਅਨਾਵਟਦ੍ਵਾਰੋ ਸਮਣਬ੍ਰਾਹ੍ਮਣਕਪਣਦ੍ਧਿਕਵਣਿਬ੍ਬਕਯਾਚਕਾਨਂ ਓਪਾਨਭੂਤੋ ਪੁਞ੍ਞਾਨਿ ਕਰੋਤਿ…ਪੇ… ਨੋ ਚ ਖੋ ਬਹੁਸ੍ਸੁਤੋ ਤਸ੍ਸ ਤਸ੍ਸ ਸੁਤਜਾਤਸ੍ਸ…ਪੇ… ਨੋ ਚ ਖੋ ਤਸ੍ਸ ਤਸ੍ਸੇਵ ਖੋ ਪਨ ਭਾਸਿਤਸ੍ਸ ਅਤ੍ਥਂ ਜਾਨਾਤਿ ‘‘ਅਯਂ ਇਮਸ੍ਸ ਭਾਸਿਤਸ੍ਸ ਅਤ੍ਥੋ, ਅਯਂ ਇਮਸ੍ਸ ਭਾਸਿਤਸ੍ਸ ਅਤ੍ਥੋ’’ਤਿ…ਪੇ… ਨੋ ਚ ਖੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਪਟਿਬਲੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇ ਅਤ੍ਥੇ ਚਿਨ੍ਤੇਤੁਂ, ਅਥ ਚ ਪਨ ਭਵਂ ਰਾਜਾ ਏਵਰੂਪਂ ਮਹਾਯਞ੍ਞਂ ਯਜਤੀ’ਤਿ. ਏਵਮ੍ਪਿ ਭੋਤੋ ਰਞ੍ਞੋ ਵਤ੍ਤਾ ਧਮ੍ਮਤੋ ਨਤ੍ਥਿ. ਭਵਂ ਖੋ ਪਨ ਰਾਜਾ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਪਟਿਬਲੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇ ਅਤ੍ਥੇ ਚਿਨ੍ਤੇਤੁਂ. ਇਮਿਨਾਪੇਤਂ ਭਵਂ ਰਾਜਾ ਜਾਨਾਤੁ, ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੁ.
‘‘ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਜਮਾਨਸ੍ਸ ਕੋਚਿਦੇਵ ਵਤ੍ਤਾ – ‘ਰਾਜਾ ਖੋ ਮਹਾਵਿਜਿਤੋ ਮਹਾਯਞ੍ਞਂ ਯਜਤਿ. ਨੋ ਚ ਖ੍ਵਸ੍ਸ ਪੁਰੋਹਿਤੋ ਬ੍ਰਾਹ੍ਮਣੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ; ਅਥ ਚ ਪਨ ਭਵਂ ਰਾਜਾ ਏਵਰੂਪਂ ਮਹਾਯਞ੍ਞਂ ਯਜਤੀ’ਤਿ. ਏਵਮ੍ਪਿ ਭੋਤੋ ਰਞ੍ਞੋ ਵਤ੍ਤਾ ਧਮ੍ਮਤੋ ਨਤ੍ਥਿ. ਭੋਤੋ ਖੋ ਪਨ ਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਉਭਤੋ ਸੁਜਾਤੋ ਮਾਤਿਤੋ ਚ ਪਿਤਿਤੋ ਚ ਸਂਸੁਦ੍ਧਗਹਣਿਕੋ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਕ੍ਖਿਤ੍ਤੋ ਅਨੁਪਕ੍ਕੁਟ੍ਠੋ ਜਾਤਿਵਾਦੇਨ. ਇਮਿਨਾਪੇਤਂ ਭਵਂ ਰਾਜਾ ਜਾਨਾਤੁ, ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੁ.
‘‘ਸਿਯਾ ਖੋ ਪਨ ਭੋਤੋ ਰਞ੍ਞੋ ਮਹਾਯਞ੍ਞਂ ਯਜਮਾਨਸ੍ਸ ਕੋਚਿਦੇਵ ਵਤ੍ਤਾ – ‘ਰਾਜਾ ਖੋ ਮਹਾਵਿਜਿਤੋ ਮਹਾਯਞ੍ਞਂ ਯਜਤਿ. ਨੋ ਚ ਖ੍ਵਸ੍ਸ ਪੁਰੋਹਿਤੋ ਬ੍ਰਾਹ੍ਮਣੋ ਅਜ੍ਝਾਯਕੋ ਮਨ੍ਤਧਰੋ ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ ਪਦਕੋ ਵੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ…ਪੇ… ਨੋ ਚ ਖ੍ਵਸ੍ਸ ਪੁਰੋਹਿਤੋ ਬ੍ਰਾਹ੍ਮਣੋ ਸੀਲਵਾ ਵੁਦ੍ਧਸੀਲੀ ਵੁਦ੍ਧਸੀਲੇਨ ਸਮਨ੍ਨਾਗਤੋ…ਪੇ… ਨੋ ਚ ਖ੍ਵਸ੍ਸ ਪੁਰੋਹਿਤੋ ਬ੍ਰਾਹ੍ਮਣੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਪਠਮੋ ਵਾ ਦੁਤਿਯੋ ਵਾ ਸੁਜਂ ਪਗ੍ਗਣ੍ਹਨ੍ਤਾਨਂ, ਅਥ ਚ ਪਨ ਭਵਂ ਰਾਜਾ ਏਵਰੂਪਂ ਮਹਾਯਞ੍ਞਂ ਯਜਤੀ’ਤਿ. ਏਵਮ੍ਪਿ ਭੋਤੋ ਰਞ੍ਞੋ ਵਤ੍ਤਾ ਧਮ੍ਮਤੋ ਨਤ੍ਥਿ. ਭੋਤੋ ਖੋ ਪਨ ਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਪਠਮੋ ਵਾ ਦੁਤਿਯੋ ਵਾ ਸੁਜਂ ਪਗ੍ਗਣ੍ਹਨ੍ਤਾਨਂ. ਇਮਿਨਾਪੇਤਂ ਭਵਂ ਰਾਜਾ ਜਾਨਾਤੁ, ਯਜਤਂ ਭਵਂ, ਸਜ੍ਜਤਂ ਭਵਂ, ਮੋਦਤਂ ਭਵਂ, ਚਿਤ੍ਤਮੇਵ ਭਵਂ ਅਨ੍ਤਰਂ ਪਸਾਦੇਤੂਤਿ. ਇਮੇਹਿ ਖੋ, ਬ੍ਰਾਹ੍ਮਣ, ਪੁਰੋਹਿਤੋ ਬ੍ਰਾਹ੍ਮਣੋ ਰਞ੍ਞੋ ਮਹਾਵਿਜਿਤਸ੍ਸ ਮਹਾਯਞ੍ਞਂ ਯਜਮਾਨਸ੍ਸ ਸੋਲ਼ਸਹਿ ਆਕਾਰੇਹਿ ਚਿਤ੍ਤਂ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ.
੩੪੫. ‘‘ਤਸ੍ਮਿਂ ਖੋ, ਬ੍ਰਾਹ੍ਮਣ, ਯਞ੍ਞੇ ਨੇਵ ਗਾਵੋ ਹਞ੍ਞਿਂਸੁ, ਨ ਅਜੇਲ਼ਕਾ ਹਞ੍ਞਿਂਸੁ, ਨ ਕੁਕ੍ਕੁਟਸੂਕਰਾ ਹਞ੍ਞਿਂਸੁ, ਨ ਵਿਵਿਧਾ ਪਾਣਾ ਸਂਘਾਤਂ ਆਪਜ੍ਜਿਂਸੁ, ਨ ਰੁਕ੍ਖਾ ਛਿਜ੍ਜਿਂਸੁ ਯੂਪਤ੍ਥਾਯ, ਨ ਦਬ੍ਭਾ ਲੂਯਿਂਸੁ ਬਰਿਹਿਸਤ੍ਥਾਯ [ਪਰਿਹਿਂਸਤ੍ਥਾਯ (ਸ੍ਯਾ. ਕ. ਸੀ. ਕ.), ਪਰਹਿਂਸਤ੍ਥਾਯ (ਕ.)]. ਯੇਪਿਸ੍ਸ ਅਹੇਸੁਂ ਦਾਸਾਤਿ ਵਾ ਪੇਸ੍ਸਾਤਿ ਵਾ ਕਮ੍ਮਕਰਾਤਿ ਵਾ, ਤੇਪਿ ਨ ਦਣ੍ਡਤਜ੍ਜਿਤਾ ਨ ਭਯਤਜ੍ਜਿਤਾ ਨ ਅਸ੍ਸੁਮੁਖਾ ਰੁਦਮਾਨਾ ਪਰਿਕਮ੍ਮਾਨਿ ਅਕਂਸੁ. ਅਥ ਖੋ ਯੇ ਇਚ੍ਛਿਂਸੁ, ਤੇ ਅਕਂਸੁ, ਯੇ ਨ ਇਚ੍ਛਿਂਸੁ, ਨ ਤੇ ਅਕਂਸੁ; ਯਂ ਇਚ੍ਛਿਂਸੁ, ਤਂ ਅਕਂਸੁ, ਯਂ ਨ ਇਚ੍ਛਿਂਸੁ, ਨ ਤਂ ਅਕਂਸੁ. ਸਪ੍ਪਿਤੇਲਨਵਨੀਤਦਧਿਮਧੁਫਾਣਿਤੇਨ ਚੇਵ ਸੋ ਯਞ੍ਞੋ ਨਿਟ੍ਠਾਨਮਗਮਾਸਿ.
੩੪੬. ‘‘ਅਥ ਖੋ, ਬ੍ਰਾਹ੍ਮਣ, ਖਤ੍ਤਿਯਾ ਆਨੁਯਨ੍ਤਾ ਨੇਗਮਾ ਚੇਵ ਜਾਨਪਦਾ ਚ, ਅਮਚ੍ਚਾ ਪਾਰਿਸਜ੍ਜਾ ਨੇਗਮਾ ਚੇਵ ਜਾਨਪਦਾ ਚ, ਬ੍ਰਾਹ੍ਮਣਮਹਾਸਾਲਾ ਨੇਗਮਾ ਚੇਵ ਜਾਨਪਦਾ ਚ, ਗਹਪਤਿਨੇਚਯਿਕਾ ਨੇਗਮਾ ਚੇਵ ਜਾਨਪਦਾ ਚ ਪਹੂਤਂ ਸਾਪਤੇਯ੍ਯਂ ਆਦਾਯ ਰਾਜਾਨਂ ਮਹਾਵਿਜਿਤਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ – ‘ਇਦਂ, ਦੇਵ, ਪਹੂਤਂ ਸਾਪਤੇਯ੍ਯਂ ਦੇਵਞ੍ਞੇਵ ਉਦ੍ਦਿਸ੍ਸਾਭਤਂ, ਤਂ ਦੇਵੋ ਪਟਿਗ੍ਗਣ੍ਹਾਤੂ’ਤਿ. ‘ਅਲਂ, ਭੋ, ਮਮਾਪਿਦਂ ਪਹੂਤਂ ਸਾਪਤੇਯ੍ਯਂ ਧਮ੍ਮਿਕੇਨ ਬਲਿਨਾ ਅਭਿਸਙ੍ਖਤਂ; ਤਞ੍ਚ ਵੋ ਹੋਤੁ, ਇਤੋ ਚ ਭਿਯ੍ਯੋ ਹਰਥਾ’ਤਿ. ਤੇ ਰਞ੍ਞਾ ਪਟਿਕ੍ਖਿਤ੍ਤਾ ਏਕਮਨ੍ਤਂ ਅਪਕ੍ਕਮ੍ਮ ਏਵਂ ਸਮਚਿਨ੍ਤੇਸੁਂ – ‘ਨ ਖੋ ਏਤਂ ਅਮ੍ਹਾਕਂ ਪਤਿਰੂਪਂ, ਯਂ ਮਯਂ ਇਮਾਨਿ ਸਾਪਤੇਯ੍ਯਾਨਿ ਪੁਨਦੇਵ ਸਕਾਨਿ ਘਰਾਨਿ ਪਟਿਹਰੇਯ੍ਯਾਮ. ਰਾਜਾ ਖੋ ਮਹਾਵਿਜਿਤੋ ਮਹਾਯਞ੍ਞਂ ਯਜਤਿ, ਹਨ੍ਦਸ੍ਸ ਮਯਂ ਅਨੁਯਾਗਿਨੋ ਹੋਮਾ’ਤਿ.
੩੪੭. ‘‘ਅਥ ਖੋ, ਬ੍ਰਾਹ੍ਮਣ, ਪੁਰਤ੍ਥਿਮੇਨ ਯਞ੍ਞਵਾਟਸ੍ਸ [ਯਞ੍ਞਾਵਾਟਸ੍ਸ (ਸੀ. ਪੀ. ਕ.)] ਖਤ੍ਤਿਯਾ ਆਨੁਯਨ੍ਤਾ ਨੇਗਮਾ ਚੇਵ ਜਾਨਪਦਾ ਚ ਦਾਨਾਨਿ ਪਟ੍ਠਪੇਸੁਂ. ਦਕ੍ਖਿਣੇਨ ਯਞ੍ਞਵਾਟਸ੍ਸ ਅਮਚ੍ਚਾ ਪਾਰਿਸਜ੍ਜਾ ਨੇਗਮਾ ਚੇਵ ਜਾਨਪਦਾ ਚ ਦਾਨਾਨਿ ਪਟ੍ਠਪੇਸੁਂ. ਪਚ੍ਛਿਮੇਨ ਯਞ੍ਞਵਾਟਸ੍ਸ ਬ੍ਰਾਹ੍ਮਣਮਹਾਸਾਲਾ ਨੇਗਮਾ ਚੇਵ ਜਾਨਪਦਾ ਚ ਦਾਨਾਨਿ ਪਟ੍ਠਪੇਸੁਂ. ਉਤ੍ਤਰੇਨ ਯਞ੍ਞਵਾਟਸ੍ਸ ਗਹਪਤਿਨੇਚਯਿਕਾ ਨੇਗਮਾ ਚੇਵ ਜਾਨਪਦਾ ਚ ਦਾਨਾਨਿ ਪਟ੍ਠਪੇਸੁਂ.
‘‘ਤੇਸੁਪਿ ਖੋ, ਬ੍ਰਾਹ੍ਮਣ, ਯਞ੍ਞੇਸੁ ਨੇਵ ਗਾਵੋ ਹਞ੍ਞਿਂਸੁ, ਨ ਅਜੇਲ਼ਕਾ ਹਞ੍ਞਿਂਸੁ, ਨ ਕੁਕ੍ਕੁਟਸੂਕਰਾ ਹਞ੍ਞਿਂਸੁ, ਨ ਵਿਵਿਧਾ ਪਾਣਾ ਸਂਘਾਤਂ ਆਪਜ੍ਜਿਂਸੁ, ਨ ਰੁਕ੍ਖਾ ਛਿਜ੍ਜਿਂਸੁ ਯੂਪਤ੍ਥਾਯ, ਨ ਦਬ੍ਭਾ ਲੂਯਿਂਸੁ ਬਰਿਹਿਸਤ੍ਥਾਯ. ਯੇਪਿ ਨੇਸਂ ਅਹੇਸੁਂ ਦਾਸਾਤਿ ਵਾ ਪੇਸ੍ਸਾਤਿ ਵਾ ਕਮ੍ਮਕਰਾਤਿ ਵਾ, ਤੇਪਿ ਨ ਦਣ੍ਡਤਜ੍ਜਿਤਾ ਨ ਭਯਤਜ੍ਜਿਤਾ ਨ ਅਸ੍ਸੁਮੁਖਾ ਰੁਦਮਾਨਾ ਪਰਿਕਮ੍ਮਾਨਿ ਅਕਂਸੁ. ਅਥ ਖੋ ਯੇ ਇਚ੍ਛਿਂਸੁ, ਤੇ ਅਕਂਸੁ, ਯੇ ਨ ਇਚ੍ਛਿਂਸੁ, ਨ ਤੇ ਅਕਂਸੁ; ਯਂ ਇਚ੍ਛਿਂਸੁ, ਤਂ ਅਕਂਸੁ, ਯਂ ਨ ਇਚ੍ਛਿਂਸੁ ਨ ਤਂ ਅਕਂਸੁ. ਸਪ੍ਪਿਤੇਲਨਵਨੀਤਦਧਿਮਧੁਫਾਣਿਤੇਨ ਚੇਵ ਤੇ ਯਞ੍ਞਾ ਨਿਟ੍ਠਾਨਮਗਮਂਸੁ.
‘‘ਇਤਿ ਚਤ੍ਤਾਰੋ ਚ ਅਨੁਮਤਿਪਕ੍ਖਾ, ਰਾਜਾ ਮਹਾਵਿਜਿਤੋ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ, ਪੁਰੋਹਿਤੋ ਬ੍ਰਾਹ੍ਮਣੋ ਚਤੂਹਙ੍ਗੇਹਿ ਸਮਨ੍ਨਾਗਤੋ; ਤਿਸ੍ਸੋ ਚ ਵਿਧਾ ਅਯਂ ਵੁਚ੍ਚਤਿ ਬ੍ਰਾਹ੍ਮਣ ਤਿਵਿਧਾ ਯਞ੍ਞਸਮ੍ਪਦਾ ਸੋਲ਼ਸਪਰਿਕ੍ਖਾਰਾ’’ਤਿ.
੩੪੮. ਏਵਂ ਵੁਤ੍ਤੇ, ਤੇ ਬ੍ਰਾਹ੍ਮਣਾ ਉਨ੍ਨਾਦਿਨੋ ਉਚ੍ਚਾਸਦ੍ਦਮਹਾਸਦ੍ਦਾ ਅਹੇਸੁਂ – ‘‘ਅਹੋ ਯਞ੍ਞੋ, ਅਹੋ ਯਞ੍ਞਸਮ੍ਪਦਾ’’ਤਿ! ਕੂਟਦਨ੍ਤੋ ਪਨ ਬ੍ਰਾਹ੍ਮਣੋ ਤੂਣ੍ਹੀਭੂਤੋਵ ਨਿਸਿਨ੍ਨੋ ਹੋਤਿ. ਅਥ ਖੋ ਤੇ ਬ੍ਰਾਹ੍ਮਣਾ ਕੂਟਦਨ੍ਤਂ ਬ੍ਰਾਹ੍ਮਣਂ ਏਤਦਵੋਚੁਂ – ‘‘ਕਸ੍ਮਾ ਪਨ ਭਵਂ ਕੂਟਦਨ੍ਤੋ ਸਮਣਸ੍ਸ ਗੋਤਮਸ੍ਸ ਸੁਭਾਸਿਤਂ ਸੁਭਾਸਿਤਤੋ ਨਾਬ੍ਭਨੁਮੋਦਤੀ’’ਤਿ? ‘‘ਨਾਹਂ, ਭੋ, ਸਮਣਸ੍ਸ ਗੋਤਮਸ੍ਸ ਸੁਭਾਸਿਤਂ ਸੁਭਾਸਿਤਤੋ ਨਾਬ੍ਭਨੁਮੋਦਾਮਿ. ਮੁਦ੍ਧਾਪਿ ਤਸ੍ਸ ਵਿਪਤੇਯ੍ਯ, ਯੋ ਸਮਣਸ੍ਸ ਗੋਤਮਸ੍ਸ ਸੁਭਾਸਿਤਂ ਸੁਭਾਸਿਤਤੋ ਨਾਬ੍ਭਨੁਮੋਦੇਯ੍ਯ. ਅਪਿ ਚ ਮੇ, ਭੋ, ਏਵਂ ਹੋਤਿ – ਸਮਣੋ ਗੋਤਮੋ ਨ ਏਵਮਾਹ – ‘ਏਵਂ ਮੇ ਸੁਤ’ਨ੍ਤਿ ਵਾ ‘ਏਵਂ ਅਰਹਤਿ ਭਵਿਤੁ’ਨ੍ਤਿ ਵਾ; ਅਪਿ ਚ ਸਮਣੋ ਗੋਤਮੋ – ‘ਏਵਂ ਤਦਾ ਆਸਿ, ਇਤ੍ਥਂ ਤਦਾ ਆਸਿ’ ਤ੍ਵੇਵ ਭਾਸਤਿ. ਤਸ੍ਸ ਮਯ੍ਹਂ ਭੋ ਏਵਂ ਹੋਤਿ – ‘ਅਦ੍ਧਾ ਸਮਣੋ ਗੋਤਮੋ ਤੇਨ ਸਮਯੇਨ ਰਾਜਾ ਵਾ ਅਹੋਸਿ ਮਹਾਵਿਜਿਤੋ ਯਞ੍ਞਸ੍ਸਾਮਿ ਪੁਰੋਹਿਤੋ ਵਾ ਬ੍ਰਾਹ੍ਮਣੋ ਤਸ੍ਸ ਯਞ੍ਞਸ੍ਸ ਯਾਜੇਤਾ’ਤਿ. ਅਭਿਜਾਨਾਤਿ ਪਨ ਭਵਂ ਗੋਤਮੋ ਏਵਰੂਪਂ ਯਞ੍ਞਂ ਯਜਿਤ੍ਵਾ ਵਾ ਯਾਜੇਤ੍ਵਾ ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਤਾਤਿ’’? ‘‘ਅਭਿਜਾਨਾਮਹਂ, ਬ੍ਰਾਹ੍ਮਣ, ਏਵਰੂਪਂ ਯਞ੍ਞਂ ਯਜਿਤ੍ਵਾ ਵਾ ਯਾਜੇਤ੍ਵਾ ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਤਾ, ਅਹਂ ਤੇਨ ਸਮਯੇਨ ਪੁਰੋਹਿਤੋ ਬ੍ਰਾਹ੍ਮਣੋ ਅਹੋਸਿਂ ਤਸ੍ਸ ਯਞ੍ਞਸ੍ਸ ਯਾਜੇਤਾ’’ਤਿ.
ਨਿਚ੍ਚਦਾਨਅਨੁਕੁਲਯਞ੍ਞਂ
੩੪੯. ‘‘ਅਤ੍ਥਿ ਪਨ, ਭੋ ਗੋਤਮ, ਅਞ੍ਞੋ ਯਞ੍ਞੋ ਇਮਾਯ ਤਿਵਿਧਾਯ ਯਞ੍ਞਸਮ੍ਪਦਾਯ [ਤਿਵਿਧਯਞ੍ਞਸਮ੍ਪਦਾਯ (ਕ.)] ਸੋਲ਼ਸਪਰਿਕ੍ਖਾਰਾਯ ਅਪ੍ਪਟ੍ਠਤਰੋ [ਅਪ੍ਪਤ੍ਥਤਰੋ (ਸ੍ਯਾ. ਕਂ.)] ਚ ਅਪ੍ਪਸਮਾਰਮ੍ਭਤਰੋ [ਅਪ੍ਪਸਮਾਰਬ੍ਭਤਰੋ (ਸੀ. ਪੀ. ਕ.)] ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਅਤ੍ਥਿ ਖੋ, ਬ੍ਰਾਹ੍ਮਣ, ਅਞ੍ਞੋ ਯਞ੍ਞੋ ਇਮਾਯ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
‘‘ਕਤਮੋ ਪਨ ਸੋ, ਭੋ ਗੋਤਮ, ਯਞ੍ਞੋ ਇਮਾਯ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਯਾਨਿ ਖੋ ਪਨ ਤਾਨਿ, ਬ੍ਰਾਹ੍ਮਣ, ਨਿਚ੍ਚਦਾਨਾਨਿ ਅਨੁਕੁਲਯਞ੍ਞਾਨਿ ਸੀਲਵਨ੍ਤੇ ਪਬ੍ਬਜਿਤੇ ਉਦ੍ਦਿਸ੍ਸ ਦਿਯ੍ਯਨ੍ਤਿ; ਅਯਂ ਖੋ, ਬ੍ਰਾਹ੍ਮਣ, ਯਞ੍ਞੋ ਇਮਾਯ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
‘‘ਕੋ ਨੁ ਖੋ, ਭੋ ਗੋਤਮ, ਹੇਤੁ ਕੋ ਪਚ੍ਚਯੋ, ਯੇਨ ਤਂ ਨਿਚ੍ਚਦਾਨਂ ਅਨੁਕੁਲਯਞ੍ਞਂ ਇਮਾਯ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਅਪ੍ਪਟ੍ਠਤਰਞ੍ਚ ਅਪ੍ਪਸਮਾਰਮ੍ਭਤਰਞ੍ਚ ਮਹਪ੍ਫਲਤਰਞ੍ਚ ਮਹਾਨਿਸਂਸਤਰਞ੍ਚਾ’’ਤਿ?
‘‘ਨ ਖੋ, ਬ੍ਰਾਹ੍ਮਣ, ਏਵਰੂਪਂ ਯਞ੍ਞਂ ਉਪਸਙ੍ਕਮਨ੍ਤਿ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ. ਤਂ ਕਿਸ੍ਸ ਹੇਤੁ? ਦਿਸ੍ਸਨ੍ਤਿ ਹੇਤ੍ਥ, ਬ੍ਰਾਹ੍ਮਣ, ਦਣ੍ਡਪ੍ਪਹਾਰਾਪਿ ਗਲਗ੍ਗਹਾਪਿ, ਤਸ੍ਮਾ ਏਵਰੂਪਂ ਯਞ੍ਞਂ ਨ ਉਪਸਙ੍ਕਮਨ੍ਤਿ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ. ਯਾਨਿ ਖੋ ਪਨ ਤਾਨਿ, ਬ੍ਰਾਹ੍ਮਣ, ਨਿਚ੍ਚਦਾਨਾਨਿ ਅਨੁਕੁਲਯਞ੍ਞਾਨਿ ਸੀਲਵਨ੍ਤੇ ਪਬ੍ਬਜਿਤੇ ਉਦ੍ਦਿਸ੍ਸ ਦਿਯ੍ਯਨ੍ਤਿ; ਏਵਰੂਪਂ ਖੋ, ਬ੍ਰਾਹ੍ਮਣ, ਯਞ੍ਞਂ ਉਪਸਙ੍ਕਮਨ੍ਤਿ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ. ਤਂ ਕਿਸ੍ਸ ਹੇਤੁ? ਨ ਹੇਤ੍ਥ, ਬ੍ਰਾਹ੍ਮਣ, ਦਿਸ੍ਸਨ੍ਤਿ ਦਣ੍ਡਪ੍ਪਹਾਰਾਪਿ ਗਲਗ੍ਗਹਾਪਿ, ਤਸ੍ਮਾ ਏਵਰੂਪਂ ਯਞ੍ਞਂ ਉਪਸਙ੍ਕਮਨ੍ਤਿ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ. ਅਯਂ ਖੋ, ਬ੍ਰਾਹ੍ਮਣ, ਹੇਤੁ ਅਯਂ ਪਚ੍ਚਯੋ, ਯੇਨ ਤਂ ਨਿਚ੍ਚਦਾਨਂ ਅਨੁਕੁਲਯਞ੍ਞਂ ਇਮਾਯ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਅਪ੍ਪਟ੍ਠਤਰਞ੍ਚ ਅਪ੍ਪਸਮਾਰਮ੍ਭਤਰਞ੍ਚ ਮਹਪ੍ਫਲਤਰਞ੍ਚ ਮਹਾਨਿਸਂਸਤਰਞ੍ਚਾ’’ਤਿ.
੩੫੦. ‘‘ਅਤ੍ਥਿ ਪਨ, ਭੋ ਗੋਤਮ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਅਤ੍ਥਿ ਖੋ, ਬ੍ਰਾਹ੍ਮਣ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
‘‘ਕਤਮੋ ਪਨ ਸੋ, ਭੋ ਗੋਤਮ, ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਯੋ ਖੋ, ਬ੍ਰਾਹ੍ਮਣ, ਚਾਤੁਦ੍ਦਿਸਂ ਸਙ੍ਘਂ ਉਦ੍ਦਿਸ੍ਸ ਵਿਹਾਰਂ ਕਰੋਤਿ, ਅਯਂ ਖੋ, ਬ੍ਰਾਹ੍ਮਣ, ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
੩੫੧. ‘‘ਅਤ੍ਥਿ ਪਨ, ਭੋ ਗੋਤਮ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਅਤ੍ਥਿ ਖੋ, ਬ੍ਰਾਹ੍ਮਣ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
‘‘ਕਤਮੋ ਪਨ ਸੋ, ਭੋ ਗੋਤਮ, ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਯੋ ਖੋ, ਬ੍ਰਾਹ੍ਮਣ, ਪਸਨ੍ਨਚਿਤ੍ਤੋ ਬੁਦ੍ਧਂ ਸਰਣਂ ਗਚ੍ਛਤਿ, ਧਮ੍ਮਂ ਸਰਣਂ ਗਚ੍ਛਤਿ, ਸਙ੍ਘਂ ਸਰਣਂ ਗਚ੍ਛਤਿ; ਅਯਂ ਖੋ, ਬ੍ਰਾਹ੍ਮਣ, ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
੩੫੨. ‘‘ਅਤ੍ਥਿ ਪਨ, ਭੋ ਗੋਤਮ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਇਮੇਹਿ ਚ ਸਰਣਗਮਨੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਅਤ੍ਥਿ ਖੋ, ਬ੍ਰਾਹ੍ਮਣ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਇਮੇਹਿ ਚ ਸਰਣਗਮਨੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
‘‘ਕਤਮੋ ਪਨ ਸੋ, ਭੋ ਗੋਤਮ, ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਇਮੇਹਿ ਚ ਸਰਣਗਮਨੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਯੋ ਖੋ, ਬ੍ਰਾਹ੍ਮਣ, ਪਸਨ੍ਨਚਿਤ੍ਤੋ ਸਿਕ੍ਖਾਪਦਾਨਿ ਸਮਾਦਿਯਤਿ – ਪਾਣਾਤਿਪਾਤਾ ਵੇਰਮਣਿਂ, ਅਦਿਨ੍ਨਾਦਾਨਾ ਵੇਰਮਣਿਂ, ਕਾਮੇਸੁਮਿਚ੍ਛਾਚਾਰਾ ਵੇਰਮਣਿਂ, ਮੁਸਾਵਾਦਾ ਵੇਰਮਣਿਂ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣਿਂ. ਅਯਂ ਖੋ, ਬ੍ਰਾਹ੍ਮਣ, ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਇਮੇਹਿ ਚ ਸਰਣਗਮਨੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
੩੫੩. ‘‘ਅਤ੍ਥਿ ਪਨ, ਭੋ ਗੋਤਮ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਇਮੇਹਿ ਚ ਸਰਣਗਮਨੇਹਿ ਇਮੇਹਿ ਚ ਸਿਕ੍ਖਾਪਦੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਅਤ੍ਥਿ ਖੋ, ਬ੍ਰਾਹ੍ਮਣ, ਅਞ੍ਞੋ ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਇਮੇਹਿ ਚ ਸਰਣਗਮਨੇਹਿ ਇਮੇਹਿ ਚ ਸਿਕ੍ਖਾਪਦੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ.
‘‘ਕਤਮੋ ਪਨ ਸੋ, ਭੋ ਗੋਤਮ, ਯਞ੍ਞੋ ਇਮਾਯ ਚ ਤਿਵਿਧਾਯ ਯਞ੍ਞਸਮ੍ਪਦਾਯ ਸੋਲ਼ਸਪਰਿਕ੍ਖਾਰਾਯ ਇਮਿਨਾ ਚ ਨਿਚ੍ਚਦਾਨੇਨ ਅਨੁਕੁਲਯਞ੍ਞੇਨ ਇਮਿਨਾ ਚ ਵਿਹਾਰਦਾਨੇਨ ਇਮੇਹਿ ਚ ਸਰਣਗਮਨੇਹਿ ਇਮੇਹਿ ਚ ਸਿਕ੍ਖਾਪਦੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾ’’ਤਿ?
‘‘ਇਧ, ਬ੍ਰਾਹ੍ਮਣ, ਤਥਾਗਤੋ ਲੋਕੇ ਉਪ੍ਪਜ੍ਜਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ…ਪੇ… (ਯਥਾ ੧੯੦-੨੧੨ ਅਨੁਚ੍ਛੇਦੇਸੁ, ਏਵਂ ਵਿਤ੍ਥਾਰੇਤਬ੍ਬਂ). ਏਵਂ ਖੋ, ਬ੍ਰਾਹ੍ਮਣ, ਭਿਕ੍ਖੁ ਸੀਲਸਮ੍ਪਨ੍ਨੋ ਹੋਤਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਅਯਂ ਖੋ, ਬ੍ਰਾਹ੍ਮਣ, ਯਞ੍ਞੋ ਪੁਰਿਮੇਹਿ ਯਞ੍ਞੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚ…ਪੇ… ਦੁਤਿਯਂ ਝਾਨਂ…ਪੇ… ਤਤਿਯਂ ਝਾਨਂ…ਪੇ… ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਅਯਮ੍ਪਿ ਖੋ, ਬ੍ਰਾਹ੍ਮਣ, ਯਞ੍ਞੋ ਪੁਰਿਮੇਹਿ ਯਞ੍ਞੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚਾਤਿ. ਞਾਣਦਸ੍ਸਨਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ…ਪੇ… ਅਯਮ੍ਪਿ ਖੋ, ਬ੍ਰਾਹ੍ਮਣ, ਯਞ੍ਞੋ ਪੁਰਿਮੇਹਿ ਯਞ੍ਞੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤਿ. ਅਯਮ੍ਪਿ ਖੋ, ਬ੍ਰਾਹ੍ਮਣ, ਯਞ੍ਞੋ ਪੁਰਿਮੇਹਿ ਯਞ੍ਞੇਹਿ ਅਪ੍ਪਟ੍ਠਤਰੋ ਚ ਅਪ੍ਪਸਮਾਰਮ੍ਭਤਰੋ ਚ ਮਹਪ੍ਫਲਤਰੋ ਚ ਮਹਾਨਿਸਂਸਤਰੋ ਚ. ਇਮਾਯ ਚ, ਬ੍ਰਾਹ੍ਮਣ, ਯਞ੍ਞਸਮ੍ਪਦਾਯ ਅਞ੍ਞਾ ਯਞ੍ਞਸਮ੍ਪਦਾ ਉਤ੍ਤਰਿਤਰਾ ਵਾ ਪਣੀਤਤਰਾ ਵਾ ਨਤ੍ਥੀ’’ਤਿ.
ਕੂਟਦਨ੍ਤਉਪਾਸਕਤ੍ਤਪਟਿਵੇਦਨਾ
੩੫੪. ਏਵਂ ਵੁਤ੍ਤੇ, ਕੂਟਦਨ੍ਤੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ, ਅਭਿਕ੍ਕਨ੍ਤਂ, ਭੋ ਗੋਤਮ! ਸੇਯ੍ਯਥਾਪਿ ਭੋ ਗੋਤਮ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ ‘ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀ’ਤਿ; ਏਵਮੇਵਂ ਭੋਤਾ ਗੋਤਮੇਨ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਸਾਹਂ ਭਵਨ੍ਤਂ ਗੋਤਮਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤਂ. ਏਸਾਹਂ ਭੋ ਗੋਤਮ ਸਤ੍ਤ ਚ ਉਸਭਸਤਾਨਿ ਸਤ੍ਤ ਚ ਵਚ੍ਛਤਰਸਤਾਨਿ ਸਤ੍ਤ ਚ ਵਚ੍ਛਤਰੀਸਤਾਨਿ ਸਤ੍ਤ ਚ ਅਜਸਤਾਨਿ ਸਤ੍ਤ ਚ ਉਰਬ੍ਭਸਤਾਨਿ ਮੁਞ੍ਚਾਮਿ, ਜੀਵਿਤਂ ਦੇਮਿ, ਹਰਿਤਾਨਿ ਚੇਵ ਤਿਣਾਨਿ ਖਾਦਨ੍ਤੁ, ਸੀਤਾਨਿ ਚ ਪਾਨੀਯਾਨਿ ਪਿਵਨ੍ਤੁ, ਸੀਤੋ ਚ ਨੇਸਂ ਵਾਤੋ ਉਪਵਾਯਤੂ’’ਤਿ.
ਸੋਤਾਪਤ੍ਤਿਫਲਸਚ੍ਛਿਕਿਰਿਯਾ
੩੫੫. ਅਥ ਖੋ ਭਗਵਾ ਕੂਟਦਨ੍ਤਸ੍ਸ ਬ੍ਰਾਹ੍ਮਣਸ੍ਸ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ, ਦਾਨਕਥਂ ਸੀਲਕਥਂ ਸਗ੍ਗਕਥਂ; ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਭਗਵਾ ਅਞ੍ਞਾਸਿ ਕੂਟਦਨ੍ਤਂ ਬ੍ਰਾਹ੍ਮਣਂ ਕਲ੍ਲਚਿਤ੍ਤਂ ਮੁਦੁਚਿਤ੍ਤਂ ਵਿਨੀਵਰਣਚਿਤ੍ਤਂ ਉਦਗ੍ਗਚਿਤ੍ਤਂ ਪਸਨ੍ਨਚਿਤ੍ਤਂ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ – ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਕੂਟਦਨ੍ਤਸ੍ਸ ਬ੍ਰਾਹ੍ਮਣਸ੍ਸ ਤਸ੍ਮਿਞ੍ਞੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ.
੩੫੬. ਅਥ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਦਿਟ੍ਠਧਮ੍ਮੋ ਪਤ੍ਤਧਮ੍ਮੋ ਵਿਦਿਤਧਮ੍ਮੋ ਪਰਿਯੋਗਾਲ਼੍ਹਧਮ੍ਮੋ ਤਿਣ੍ਣਵਿਚਿਕਿਚ੍ਛੋ ਵਿਗਤਕਥਂਕਥੋ ਵੇਸਾਰਜ੍ਜਪ੍ਪਤ੍ਤੋ ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ ਭਵਂ ਗੋਤਮੋ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.
੩੫੭. ਅਥ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਸਕੇ ਯਞ੍ਞਵਾਟੇ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭੋ ਗੋਤਮ; ਨਿਟ੍ਠਿਤਂ ਭਤ੍ਤ’’ਨ੍ਤਿ.
੩੫੮. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਕੂਟਦਨ੍ਤਸ੍ਸ ਬ੍ਰਾਹ੍ਮਣਸ੍ਸ ਯਞ੍ਞਵਾਟੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ.
ਅਥ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਸਿ ਸਮ੍ਪਵਾਰੇਸਿ. ਅਥ ਖੋ ਕੂਟਦਨ੍ਤੋ ਬ੍ਰਾਹ੍ਮਣੋ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਅਞ੍ਞਤਰਂ ਨੀਚਂ ਆਸਨਂ ਗਹੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਕੂਟਦਨ੍ਤਂ ਬ੍ਰਾਹ੍ਮਣਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮੀਤਿ.
ਕੂਟਦਨ੍ਤਸੁਤ੍ਤਂ ਨਿਟ੍ਠਿਤਂ ਪਞ੍ਚਮਂ.