੬. ਮਹਾਲਿਸੁਤ੍ਤਂ

ਬ੍ਰਾਹ੍ਮਣਦੂਤਵਤ੍ਥੁ

੩੫੯. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ ਵੇਸਾਲਿਯਂ ਪਟਿਵਸਨ੍ਤਿ ਕੇਨਚਿਦੇਵ ਕਰਣੀਯੇਨ. ਅਸ੍ਸੋਸੁਂ ਖੋ ਤੇ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ – ‘‘ਸਮਣੋ ਖਲੁ, ਭੋ, ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ.

੩੬੦. ਅਥ ਖੋ ਤੇ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ ਯੇਨ ਮਹਾਵਨਂ ਕੂਟਾਗਾਰਸਾਲਾ ਤੇਨੁਪਸਙ੍ਕਮਿਂਸੁ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਨਾਗਿਤੋ ਭਗਵਤੋ ਉਪਟ੍ਠਾਕੋ ਹੋਤਿ. ਅਥ ਖੋ ਤੇ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ ਯੇਨਾਯਸ੍ਮਾ ਨਾਗਿਤੋ ਤੇਨੁਪਸਙ੍ਕਮਿਂਸੁ. ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਗਿਤਂ ਏਤਦਵੋਚੁਂ – ‘‘ਕਹਂ ਨੁ ਖੋ, ਭੋ ਨਾਗਿਤ, ਏਤਰਹਿ ਸੋ ਭਵਂ ਗੋਤਮੋ ਵਿਹਰਤਿ? ਦਸ੍ਸਨਕਾਮਾ ਹਿ ਮਯਂ ਤਂ ਭਵਨ੍ਤਂ ਗੋਤਮ’’ਨ੍ਤਿ. ‘‘ਅਕਾਲੋ ਖੋ, ਆਵੁਸੋ, ਭਗਵਨ੍ਤਂ ਦਸ੍ਸਨਾਯ, ਪਟਿਸਲ੍ਲੀਨੋ ਭਗਵਾ’’ਤਿ. ਅਥ ਖੋ ਤੇ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ ਤਤ੍ਥੇਵ ਏਕਮਨ੍ਤਂ ਨਿਸੀਦਿਂਸੁ – ‘‘ਦਿਸ੍ਵਾਵ ਮਯਂ ਤਂ ਭਵਨ੍ਤਂ ਗੋਤਮਂ ਗਮਿਸ੍ਸਾਮਾ’’ਤਿ.

ਓਟ੍ਠਦ੍ਧਲਿਚ੍ਛਵੀਵਤ੍ਥੁ

੩੬੧. ਓਟ੍ਠਦ੍ਧੋਪਿ ਲਿਚ੍ਛਵੀ ਮਹਤਿਯਾ ਲਿਚ੍ਛਵੀਪਰਿਸਾਯ ਸਦ੍ਧਿਂ ਯੇਨ ਮਹਾਵਨਂ ਕੂਟਾਗਾਰਸਾਲਾ ਯੇਨਾਯਸ੍ਮਾ ਨਾਗਿਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਗਿਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਓਟ੍ਠਦ੍ਧੋਪਿ ਲਿਚ੍ਛਵੀ ਆਯਸ੍ਮਨ੍ਤਂ ਨਾਗਿਤਂ ਏਤਦਵੋਚ – ‘‘ਕਹਂ ਨੁ ਖੋ, ਭਨ੍ਤੇ ਨਾਗਿਤ, ਏਤਰਹਿ ਸੋ ਭਗਵਾ ਵਿਹਰਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ, ਦਸ੍ਸਨਕਾਮਾ ਹਿ ਮਯਂ ਤਂ ਭਗਵਨ੍ਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ. ‘‘ਅਕਾਲੋ ਖੋ, ਮਹਾਲਿ, ਭਗਵਨ੍ਤਂ ਦਸ੍ਸਨਾਯ, ਪਟਿਸਲ੍ਲੀਨੋ ਭਗਵਾ’’ਤਿ. ਓਟ੍ਠਦ੍ਧੋਪਿ ਲਿਚ੍ਛਵੀ ਤਤ੍ਥੇਵ ਏਕਮਨ੍ਤਂ ਨਿਸੀਦਿ – ‘‘ਦਿਸ੍ਵਾਵ ਅਹਂ ਤਂ ਭਗਵਨ੍ਤਂ ਗਮਿਸ੍ਸਾਮਿ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ.

੩੬੨. ਅਥ ਖੋ ਸੀਹੋ ਸਮਣੁਦ੍ਦੇਸੋ ਯੇਨਾਯਸ੍ਮਾ ਨਾਗਿਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਨਾਗਿਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੀਹੋ ਸਮਣੁਦ੍ਦੇਸੋ ਆਯਸ੍ਮਨ੍ਤਂ ਨਾਗਿਤਂ ਏਤਦਵੋਚ – ‘‘ਏਤੇ, ਭਨ੍ਤੇ ਕਸ੍ਸਪ, ਸਮ੍ਬਹੁਲਾ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ ਇਧੂਪਸਙ੍ਕਨ੍ਤਾ ਭਗਵਨ੍ਤਂ ਦਸ੍ਸਨਾਯ; ਓਟ੍ਠਦ੍ਧੋਪਿ ਲਿਚ੍ਛਵੀ ਮਹਤਿਯਾ ਲਿਚ੍ਛਵੀਪਰਿਸਾਯ ਸਦ੍ਧਿਂ ਇਧੂਪਸਙ੍ਕਨ੍ਤੋ ਭਗਵਨ੍ਤਂ ਦਸ੍ਸਨਾਯ, ਸਾਧੁ, ਭਨ੍ਤੇ ਕਸ੍ਸਪ, ਲਭਤਂ ਏਸਾ ਜਨਤਾ ਭਗਵਨ੍ਤਂ ਦਸ੍ਸਨਾਯਾ’’ਤਿ.

‘‘ਤੇਨ ਹਿ, ਸੀਹ, ਤ੍ਵਞ੍ਞੇਵ ਭਗਵਤੋ ਆਰੋਚੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਸੀਹੋ ਸਮਣੁਦ੍ਦੇਸੋ ਆਯਸ੍ਮਤੋ ਨਾਗਿਤਸ੍ਸ ਪਟਿਸ੍ਸੁਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੀਹੋ ਸਮਣੁਦ੍ਦੇਸੋ ਭਗਵਨ੍ਤਂ ਏਤਦਵੋਚ – ‘‘ਏਤੇ, ਭਨ੍ਤੇ, ਸਮ੍ਬਹੁਲਾ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ ਇਧੂਪਸਙ੍ਕਨ੍ਤਾ ਭਗਵਨ੍ਤਂ ਦਸ੍ਸਨਾਯ, ਓਟ੍ਠਦ੍ਧੋਪਿ ਲਿਚ੍ਛਵੀ ਮਹਤਿਯਾ ਲਿਚ੍ਛਵੀਪਰਿਸਾਯ ਸਦ੍ਧਿਂ ਇਧੂਪਸਙ੍ਕਨ੍ਤੋ ਭਗਵਨ੍ਤਂ ਦਸ੍ਸਨਾਯ. ਸਾਧੁ, ਭਨ੍ਤੇ, ਲਭਤਂ ਏਸਾ ਜਨਤਾ ਭਗਵਨ੍ਤਂ ਦਸ੍ਸਨਾਯਾ’’ਤਿ. ‘‘ਤੇਨ ਹਿ, ਸੀਹ, ਵਿਹਾਰਪਚ੍ਛਾਯਾਯਂ ਆਸਨਂ ਪਞ੍ਞਪੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਸੀਹੋ ਸਮਣੁਦ੍ਦੇਸੋ ਭਗਵਤੋ ਪਟਿਸ੍ਸੁਤ੍ਵਾ ਵਿਹਾਰਪਚ੍ਛਾਯਾਯਂ ਆਸਨਂ ਪਞ੍ਞਪੇਸਿ.

੩੬੩. ਅਥ ਖੋ ਭਗਵਾ ਵਿਹਾਰਾ ਨਿਕ੍ਖਮ੍ਮ ਵਿਹਾਰਪਚ੍ਛਾਯਾਯਂ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਤੇ ਕੋਸਲਕਾ ਚ ਬ੍ਰਾਹ੍ਮਣਦੂਤਾ ਮਾਗਧਕਾ ਚ ਬ੍ਰਾਹ੍ਮਣਦੂਤਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੁ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਓਟ੍ਠਦ੍ਧੋਪਿ ਲਿਚ੍ਛਵੀ ਮਹਤਿਯਾ ਲਿਚ੍ਛਵੀਪਰਿਸਾਯ ਸਦ੍ਧਿਂ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ.

੩੬੪. ਏਕਮਨ੍ਤਂ ਨਿਸਿਨ੍ਨੋ ਖੋ ਓਟ੍ਠਦ੍ਧੋ ਲਿਚ੍ਛਵੀ ਭਗਵਨ੍ਤਂ ਏਤਦਵੋਚ – ‘‘ਪੁਰਿਮਾਨਿ, ਭਨ੍ਤੇ, ਦਿਵਸਾਨਿ ਪੁਰਿਮਤਰਾਨਿ ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਏਤਦਵੋਚ – ‘ਯਦਗ੍ਗੇ ਅਹਂ, ਮਹਾਲਿ, ਭਗਵਨ੍ਤਂ ਉਪਨਿਸ੍ਸਾਯ ਵਿਹਰਾਮਿ, ਨ ਚਿਰਂ ਤੀਣਿ ਵਸ੍ਸਾਨਿ, ਦਿਬ੍ਬਾਨਿ ਹਿ ਖੋ ਰੂਪਾਨਿ ਪਸ੍ਸਾਮਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਚ ਖੋ ਦਿਬ੍ਬਾਨਿ ਸਦ੍ਦਾਨਿ ਸੁਣਾਮਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨੀ’ਤਿ. ਸਨ੍ਤਾਨੇਵ ਨੁ ਖੋ, ਭਨ੍ਤੇ, ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋ ਦਿਬ੍ਬਾਨਿ ਸਦ੍ਦਾਨਿ ਨਾਸ੍ਸੋਸਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਉਦਾਹੁ ਅਸਨ੍ਤਾਨੀ’’ਤਿ?

ਏਕਂਸਭਾਵਿਤਸਮਾਧਿ

੩੬੫. ‘‘ਸਨ੍ਤਾਨੇਵ ਖੋ, ਮਹਾਲਿ, ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋ ਦਿਬ੍ਬਾਨਿ ਸਦ੍ਦਾਨਿ ਨਾਸ੍ਸੋਸਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਅਸਨ੍ਤਾਨੀ’’ਤਿ. ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਸਨ੍ਤਾਨੇਵ ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋ ਦਿਬ੍ਬਾਨਿ ਸਦ੍ਦਾਨਿ ਨਾਸ੍ਸੋਸਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਅਸਨ੍ਤਾਨੀ’’ਤਿ?

੩੬੬. ‘‘ਇਧ, ਮਹਾਲਿ, ਭਿਕ੍ਖੁਨੋ ਪੁਰਤ੍ਥਿਮਾਯ ਦਿਸਾਯ ਏਕਂਸਭਾਵਿਤੋ ਸਮਾਧਿ ਹੋਤਿ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਸੋ ਪੁਰਤ੍ਥਿਮਾਯ ਦਿਸਾਯ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਪੁਰਤ੍ਥਿਮਾਯ ਦਿਸਾਯ ਦਿਬ੍ਬਾਨਿ ਰੂਪਾਨਿ ਪਸ੍ਸਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਚ ਖੋ ਦਿਬ੍ਬਾਨਿ ਸਦ੍ਦਾਨਿ ਸੁਣਾਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ, ਮਹਾਲਿ, ਹੋਤਿ ਭਿਕ੍ਖੁਨੋ ਪੁਰਤ੍ਥਿਮਾਯ ਦਿਸਾਯ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ.

੩੬੭. ‘‘ਪੁਨ ਚਪਰਂ, ਮਹਾਲਿ, ਭਿਕ੍ਖੁਨੋ ਦਕ੍ਖਿਣਾਯ ਦਿਸਾਯ…ਪੇ… ਪਚ੍ਛਿਮਾਯ ਦਿਸਾਯ … ਉਤ੍ਤਰਾਯ ਦਿਸਾਯ… ਉਦ੍ਧਮਧੋ ਤਿਰਿਯਂ ਏਕਂਸਭਾਵਿਤੋ ਸਮਾਧਿ ਹੋਤਿ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਸੋ ਉਦ੍ਧਮਧੋ ਤਿਰਿਯਂ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਉਦ੍ਧਮਧੋ ਤਿਰਿਯਂ ਦਿਬ੍ਬਾਨਿ ਰੂਪਾਨਿ ਪਸ੍ਸਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਚ ਖੋ ਦਿਬ੍ਬਾਨਿ ਸਦ੍ਦਾਨਿ ਸੁਣਾਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ, ਮਹਾਲਿ, ਹੋਤਿ ਭਿਕ੍ਖੁਨੋ ਉਦ੍ਧਮਧੋ ਤਿਰਿਯਂ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ.

੩੬੮. ‘‘ਇਧ, ਮਹਾਲਿ, ਭਿਕ੍ਖੁਨੋ ਪੁਰਤ੍ਥਿਮਾਯ ਦਿਸਾਯ ਏਕਂਸਭਾਵਿਤੋ ਸਮਾਧਿ ਹੋਤਿ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਸੋ ਪੁਰਤ੍ਥਿਮਾਯ ਦਿਸਾਯ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਪੁਰਤ੍ਥਿਮਾਯ ਦਿਸਾਯ ਦਿਬ੍ਬਾਨਿ ਸਦ੍ਦਾਨਿ ਸੁਣਾਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਚ ਖੋ ਦਿਬ੍ਬਾਨਿ ਰੂਪਾਨਿ ਪਸ੍ਸਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ, ਮਹਾਲਿ, ਹੋਤਿ ਭਿਕ੍ਖੁਨੋ ਪੁਰਤ੍ਥਿਮਾਯ ਦਿਸਾਯ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ.

੩੬੯. ‘‘ਪੁਨ ਚਪਰਂ, ਮਹਾਲਿ, ਭਿਕ੍ਖੁਨੋ ਦਕ੍ਖਿਣਾਯ ਦਿਸਾਯ…ਪੇ… ਪਚ੍ਛਿਮਾਯ ਦਿਸਾਯ… ਉਤ੍ਤਰਾਯ ਦਿਸਾਯ… ਉਦ੍ਧਮਧੋ ਤਿਰਿਯਂ ਏਕਂਸਭਾਵਿਤੋ ਸਮਾਧਿ ਹੋਤਿ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਸੋ ਉਦ੍ਧਮਧੋ ਤਿਰਿਯਂ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਉਦ੍ਧਮਧੋ ਤਿਰਿਯਂ ਦਿਬ੍ਬਾਨਿ ਸਦ੍ਦਾਨਿ ਸੁਣਾਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਚ ਖੋ ਦਿਬ੍ਬਾਨਿ ਰੂਪਾਨਿ ਪਸ੍ਸਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ, ਮਹਾਲਿ, ਹੋਤਿ ਭਿਕ੍ਖੁਨੋ ਉਦ੍ਧਮਧੋ ਤਿਰਿਯਂ ਏਕਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਂ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਨੋ ਚ ਖੋ ਦਿਬ੍ਬਾਨਂ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ.

੩੭੦. ‘‘ਇਧ, ਮਹਾਲਿ, ਭਿਕ੍ਖੁਨੋ ਪੁਰਤ੍ਥਿਮਾਯ ਦਿਸਾਯ ਉਭਯਂਸਭਾਵਿਤੋ ਸਮਾਧਿ ਹੋਤਿ ਦਿਬ੍ਬਾਨਞ੍ਚ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ ਦਿਬ੍ਬਾਨਞ੍ਚ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਸੋ ਪੁਰਤ੍ਥਿਮਾਯ ਦਿਸਾਯ ਉਭਯਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਞ੍ਚ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਦਿਬ੍ਬਾਨਞ੍ਚ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਪੁਰਤ੍ਥਿਮਾਯ ਦਿਸਾਯ ਦਿਬ੍ਬਾਨਿ ਚ ਰੂਪਾਨਿ ਪਸ੍ਸਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਦਿਬ੍ਬਾਨਿ ਚ ਸਦ੍ਦਾਨਿ ਸੁਣਾਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ, ਮਹਾਲਿ, ਹੋਤਿ ਭਿਕ੍ਖੁਨੋ ਪੁਰਤ੍ਥਿਮਾਯ ਦਿਸਾਯ ਉਭਯਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਞ੍ਚ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ ਦਿਬ੍ਬਾਨਞ੍ਚ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ.

੩੭੧. ‘‘ਪੁਨ ਚਪਰਂ, ਮਹਾਲਿ, ਭਿਕ੍ਖੁਨੋ ਦਕ੍ਖਿਣਾਯ ਦਿਸਾਯ…ਪੇ… ਪਚ੍ਛਿਮਾਯ ਦਿਸਾਯ… ਉਤ੍ਤਰਾਯ ਦਿਸਾਯ… ਉਦ੍ਧਮਧੋ ਤਿਰਿਯਂ ਉਭਯਂਸਭਾਵਿਤੋ ਸਮਾਧਿ ਹੋਤਿ ਦਿਬ੍ਬਾਨਞ੍ਚ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਦਿਬ੍ਬਾਨਞ੍ਚ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਸੋ ਉਦ੍ਧਮਧੋ ਤਿਰਿਯਂ ਉਭਯਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਞ੍ਚ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ ਦਿਬ੍ਬਾਨਞ੍ਚ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਉਦ੍ਧਮਧੋ ਤਿਰਿਯਂ ਦਿਬ੍ਬਾਨਿ ਚ ਰੂਪਾਨਿ ਪਸ੍ਸਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਦਿਬ੍ਬਾਨਿ ਚ ਸਦ੍ਦਾਨਿ ਸੁਣਾਤਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ, ਮਹਾਲਿ, ਹੋਤਿ ਭਿਕ੍ਖੁਨੋ ਉਦ੍ਧਮਧੋ ਤਿਰਿਯਂ ਉਭਯਂਸਭਾਵਿਤੇ ਸਮਾਧਿਮ੍ਹਿ ਦਿਬ੍ਬਾਨਞ੍ਚ ਰੂਪਾਨਂ ਦਸ੍ਸਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ, ਦਿਬ੍ਬਾਨਞ੍ਚ ਸਦ੍ਦਾਨਂ ਸਵਨਾਯ ਪਿਯਰੂਪਾਨਂ ਕਾਮੂਪਸਂਹਿਤਾਨਂ ਰਜਨੀਯਾਨਂ. ਅਯਂ ਖੋ ਮਹਾਲਿ, ਹੇਤੁ, ਅਯਂ ਪਚ੍ਚਯੋ, ਯੇਨ ਸਨ੍ਤਾਨੇਵ ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋ ਦਿਬ੍ਬਾਨਿ ਸਦ੍ਦਾਨਿ ਨਾਸ੍ਸੋਸਿ ਪਿਯਰੂਪਾਨਿ ਕਾਮੂਪਸਂਹਿਤਾਨਿ ਰਜਨੀਯਾਨਿ, ਨੋ ਅਸਨ੍ਤਾਨੀ’’ਤਿ.

੩੭੨. ‘‘ਏਤਾਸਂ ਨੂਨ, ਭਨ੍ਤੇ, ਸਮਾਧਿਭਾਵਨਾਨਂ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਭਗਵਤਿ ਬ੍ਰਹ੍ਮਚਰਿਯਂ ਚਰਨ੍ਤੀ’’ਤਿ. ‘‘ਨ ਖੋ, ਮਹਾਲਿ, ਏਤਾਸਂ ਸਮਾਧਿਭਾਵਨਾਨਂ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਮਯਿ ਬ੍ਰਹ੍ਮਚਰਿਯਂ ਚਰਨ੍ਤਿ. ਅਤ੍ਥਿ ਖੋ, ਮਹਾਲਿ, ਅਞ੍ਞੇਵ ਧਮ੍ਮਾ ਉਤ੍ਤਰਿਤਰਾ ਚ ਪਣੀਤਤਰਾ ਚ, ਯੇਸਂ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਮਯਿ ਬ੍ਰਹ੍ਮਚਰਿਯਂ ਚਰਨ੍ਤੀ’’ਤਿ.

ਚਤੁਅਰਿਯਫਲਂ

੩੭੩. ‘‘ਕਤਮੇ ਪਨ ਤੇ, ਭਨ੍ਤੇ, ਧਮ੍ਮਾ ਉਤ੍ਤਰਿਤਰਾ ਚ ਪਣੀਤਤਰਾ ਚ, ਯੇਸਂ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਭਗਵਤਿ ਬ੍ਰਹ੍ਮਚਰਿਯਂ ਚਰਨ੍ਤੀ’’ਤਿ? ‘‘ਇਧ, ਮਹਾਲਿ, ਭਿਕ੍ਖੁ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ. ਅਯਮ੍ਪਿ ਖੋ, ਮਹਾਲਿ, ਧਮ੍ਮੋ ਉਤ੍ਤਰਿਤਰੋ ਚ ਪਣੀਤਤਰੋ ਚ, ਯਸ੍ਸ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਮਯਿ ਬ੍ਰਹ੍ਮਚਰਿਯਂ ਚਰਨ੍ਤਿ.

‘‘ਪੁਨ ਚਪਰਂ, ਮਹਾਲਿ, ਭਿਕ੍ਖੁ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਰਾਗਦੋਸਮੋਹਾਨਂ ਤਨੁਤ੍ਤਾ ਸਕਦਾਗਾਮੀ ਹੋਤਿ, ਸਕਿਦੇਵ [ਸਕਿਂਦੇਵ (ਕ.)] ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਮ੍ਪਿ ਖੋ, ਮਹਾਲਿ, ਧਮ੍ਮੋ ਉਤ੍ਤਰਿਤਰੋ ਚ ਪਣੀਤਤਰੋ ਚ, ਯਸ੍ਸ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਮਯਿ ਬ੍ਰਹ੍ਮਚਰਿਯਂ ਚਰਨ੍ਤਿ.

‘‘ਪੁਨ ਚਪਰਂ, ਮਹਾਲਿ, ਭਿਕ੍ਖੁ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ ਓਪਪਾਤਿਕੋ ਹੋਤਿ, ਤਤ੍ਥ ਪਰਿਨਿਬ੍ਬਾਯੀ, ਅਨਾਵਤ੍ਤਿਧਮ੍ਮੋ ਤਸ੍ਮਾ ਲੋਕਾ. ਅਯਮ੍ਪਿ ਖੋ, ਮਹਾਲਿ, ਧਮ੍ਮੋ ਉਤ੍ਤਰਿਤਰੋ ਚ ਪਣੀਤਤਰੋ ਚ, ਯਸ੍ਸ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਮਯਿ ਬ੍ਰਹ੍ਮਚਰਿਯਂ ਚਰਨ੍ਤਿ.

‘‘ਪੁਨ ਚਪਰਂ, ਮਹਾਲਿ, ਭਿਕ੍ਖੁ ਆਸਵਾਨਂ ਖਯਾ ਅਨਾਸਵਂ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਤਿ. ਅਯਮ੍ਪਿ ਖੋ, ਮਹਾਲਿ, ਧਮ੍ਮੋ ਉਤ੍ਤਰਿਤਰੋ ਚ ਪਣੀਤਤਰੋ ਚ, ਯਸ੍ਸ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਮਯਿ ਬ੍ਰਹ੍ਮਚਰਿਯਂ ਚਰਨ੍ਤਿ. ਇਮੇ ਖੋ ਤੇ, ਮਹਾਲਿ, ਧਮ੍ਮਾ ਉਤ੍ਤਰਿਤਰਾ ਚ ਪਣੀਤਤਰਾ ਚ, ਯੇਸਂ ਸਚ੍ਛਿਕਿਰਿਯਾਹੇਤੁ ਭਿਕ੍ਖੂ ਮਯਿ ਬ੍ਰਹ੍ਮਚਰਿਯਂ ਚਰਨ੍ਤੀ’’ਤਿ.

ਅਰਿਯਅਟ੍ਠਙ੍ਗਿਕਮਗ੍ਗੋ

੩੭੪. ‘‘ਅਤ੍ਥਿ ਪਨ, ਭਨ੍ਤੇ, ਮਗ੍ਗੋ ਅਤ੍ਥਿ ਪਟਿਪਦਾ ਏਤੇਸਂ ਧਮ੍ਮਾਨਂ ਸਚ੍ਛਿਕਿਰਿਯਾਯਾ’’ਤਿ? ‘‘ਅਤ੍ਥਿ ਖੋ, ਮਹਾਲਿ, ਮਗ੍ਗੋ ਅਤ੍ਥਿ ਪਟਿਪਦਾ ਏਤੇਸਂ ਧਮ੍ਮਾਨਂ ਸਚ੍ਛਿਕਿਰਿਯਾਯਾ’’ਤਿ.

੩੭੫. ‘‘ਕਤਮੋ ਪਨ, ਭਨ੍ਤੇ, ਮਗ੍ਗੋ ਕਤਮਾ ਪਟਿਪਦਾ ਏਤੇਸਂ ਧਮ੍ਮਾਨਂ ਸਚ੍ਛਿਕਿਰਿਯਾਯਾ’’ਤਿ? ‘‘ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ. ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ. ਅਯਂ ਖੋ, ਮਹਾਲਿ, ਮਗ੍ਗੋ ਅਯਂ ਪਟਿਪਦਾ ਏਤੇਸਂ ਧਮ੍ਮਾਨਂ ਸਚ੍ਛਿਕਿਰਿਯਾਯ.

ਦ੍ਵੇਪਬ੍ਬਜਿਤਵਤ੍ਥੁ

੩੭੬. ‘‘ਏਕਮਿਦਾਹਂ, ਮਹਾਲਿ, ਸਮਯਂ ਕੋਸਮ੍ਬਿਯਂ ਵਿਹਰਾਮਿ ਘੋਸਿਤਾਰਾਮੇ. ਅਥ ਖੋ ਦ੍ਵੇ ਪਬ੍ਬਜਿਤਾ – ਮੁਣ੍ਡਿਯੋ ਚ ਪਰਿਬ੍ਬਾਜਕੋ ਜਾਲਿਯੋ ਚ ਦਾਰੁਪਤ੍ਤਿਕਨ੍ਤੇਵਾਸੀ ਯੇਨਾਹਂ ਤੇਨੁਪਸਙ੍ਕਮਿਂਸੁ. ਉਪਸਙ੍ਕਮਿਤ੍ਵਾ ਮਯਾ ਸਦ੍ਧਿਂ ਸਮ੍ਮੋਦਿਂਸੁ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਕਮਨ੍ਤਂ ਠਿਤਾ ਖੋ ਤੇ ਦ੍ਵੇ ਪਬ੍ਬਜਿਤਾ ਮਂ ਏਤਦਵੋਚੁਂ – ‘ਕਿਂ ਨੁ ਖੋ, ਆਵੁਸੋ ਗੋਤਮ, ਤਂ ਜੀਵਂ ਤਂ ਸਰੀਰਂ, ਉਦਾਹੁ ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ?

੩੭੭. ‘‘‘ਤੇਨ ਹਾਵੁਸੋ, ਸੁਣਾਥ ਸਾਧੁਕਂ ਮਨਸਿ ਕਰੋਥ ਭਾਸਿਸ੍ਸਾਮੀ’’ਤਿ. ‘ਏਵਮਾਵੁਸੋ’ਤਿ ਖੋ ਤੇ ਦ੍ਵੇ ਪਬ੍ਬਜਿਤਾ ਮਮ ਪਚ੍ਚਸ੍ਸੋਸੁਂ. ਅਹਂ ਏਤਦਵੋਚਂ – ਇਧਾਵੁਸੋ ਤਥਾਗਤੋ ਲੋਕੇ ਉਪ੍ਪਜ੍ਜਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ…ਪੇ… (ਯਥਾ ੧੯੦-੨੧੨ ਅਨੁਚ੍ਛੇਦੇਸੁ ਏਵਂ ਵਿਤ੍ਥਾਰੇਤਬ੍ਬਂ). ਏਵਂ ਖੋ, ਆਵੁਸੋ, ਭਿਕ੍ਖੁ ਸੀਲਸਮ੍ਪਨ੍ਨੋ ਹੋਤਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਯੋ ਖੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ, ਕਲ੍ਲਂ ਨੁ ਖੋ ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ? ਯੋ ਸੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ, ਕਲ੍ਲਂ ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ. ਅਹਂ ਖੋ ਪਨੇਤਂ, ਆਵੁਸੋ, ਏਵਂ ਜਾਨਾਮਿ ਏਵਂ ਪਸ੍ਸਾਮਿ. ਅਥ ਚ ਪਨਾਹਂ ਨ ਵਦਾਮਿ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ…ਪੇ… ਦੁਤਿਯਂ ਝਾਨਂ…ਪੇ… ਤਤਿਯਂ ਝਾਨਂ…ਪੇ… ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਯੋ ਖੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ, ਕਲ੍ਲਂ ਨੁ ਖੋ ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ? ਯੋ ਸੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ, ਕਲ੍ਲਂ ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ. ਅਹਂ ਖੋ ਪਨੇਤਂ, ਆਵੁਸੋ, ਏਵਂ ਜਾਨਾਮਿ ਏਵਂ ਪਸ੍ਸਾਮਿ. ਅਥ ਚ ਪਨਾਹਂ ਨ ਵਦਾਮਿ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ…ਪੇ… ਞਾਣਦਸ੍ਸਨਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ…ਪੇ… ਯੋ ਖੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ, ਕਲ੍ਲਂ ਨੁ ਖੋ ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ? ਯੋ ਸੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ, ਕਲ੍ਲਂ [ਨ ਕਲ੍ਲਂ (ਸੀ. ਸ੍ਯਾ. ਕਂ. ਕ.)] ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ. ਅਹਂ ਖੋ ਪਨੇਤਂ, ਆਵੁਸੋ, ਏਵਂ ਜਾਨਾਮਿ ਏਵਂ ਪਸ੍ਸਾਮਿ. ਅਥ ਚ ਪਨਾਹਂ ਨ ਵਦਾਮਿ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ…ਪੇ… ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤਿ. ਯੋ ਖੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ, ਕਲ੍ਲਂ ਨੁ ਖੋ ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ? ਯੋ ਸੋ, ਆਵੁਸੋ, ਭਿਕ੍ਖੁ ਏਵਂ ਜਾਨਾਤਿ ਏਵਂ ਪਸ੍ਸਤਿ ਨ ਕਲ੍ਲਂ ਤਸ੍ਸੇਤਂ ਵਚਨਾਯ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾਤਿ. ਅਹਂ ਖੋ ਪਨੇਤਂ, ਆਵੁਸੋ, ਏਵਂ ਜਾਨਾਮਿ ਏਵਂ ਪਸ੍ਸਾਮਿ. ਅਥ ਚ ਪਨਾਹਂ ਨ ਵਦਾਮਿ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ’’ਤਿ. ਇਦਮਵੋਚ ਭਗਵਾ. ਅਤ੍ਤਮਨੋ ਓਟ੍ਠਦ੍ਧੋ ਲਿਚ੍ਛਵੀ ਭਗਵਤੋ ਭਾਸਿਤਂ ਅਭਿਨਨ੍ਦੀਤਿ.

ਮਹਾਲਿਸੁਤ੍ਤਂ ਨਿਟ੍ਠਿਤਂ ਛਟ੍ਠਂ.