ਪਠਮਗਾਥਾਸਙ੍ਗਣਿਕਂ

ਸਤ੍ਤਨਗਰੇਸੁ ਪਞ੍ਞਤ੍ਤਸਿਕ੍ਖਾਪਦਵਣ੍ਣਨਾ

੩੩੫. ਏਕਂਸਂ ਚੀਵਰਂ ਕਤ੍ਵਾਤਿ ਏਕਸ੍ਮਿਂ ਅਂਸਕੂਟੇ ਚੀਵਰਂ ਕਤ੍ਵਾ; ਸਾਧੁਕਂ ਉਤ੍ਤਰਾਸਙ੍ਗਂ ਕਤ੍ਵਾਤਿ ਅਤ੍ਥੋ. ਪਗ੍ਗਣ੍ਹਿਤ੍ਵਾਨ ਅਞ੍ਜਲਿਨ੍ਤਿ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਉਕ੍ਖਿਪਿਤ੍ਵਾ. ਆਸੀਸਮਾਨਰੂਪੋ ਵਾਤਿ ਪਚ੍ਚਾਸੀਸਮਾਨਰੂਪੋ ਵਿਯ. ਕਿਸ੍ਸ ਤ੍ਵਂ ਇਧ ਮਾਗਤੋਤਿ ਕੇਨ ਕਾਰਣੇਨ ਕਿਮਤ੍ਥਂ ਪਤ੍ਥਯਮਾਨੋ ਤ੍ਵਂ ਇਧ ਆਗਤੋ. ਕੋ ਏਵਮਾਹ? ਸਮ੍ਮਾਸਮ੍ਬੁਦ੍ਧੋ. ਕਂ ਏਵਮਾਹ? ਆਯਸ੍ਮਨ੍ਤਂ ਉਪਾਲਿਂ. ਇਤਿ ਆਯਸ੍ਮਾ ਉਪਾਲਿ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਦ੍ਵੀਸੁ ਵਿਨਯੇਸੂ’’ਤਿ ਇਮਂ ਗਾਥਂ ਪੁਚ੍ਛਿ. ਅਥਸ੍ਸ ਭਗਵਾ ‘‘ਭਦ੍ਦਕੋ ਤੇ ਉਮ੍ਮਙ੍ਗੋ’’ਤਿਆਦੀਨਿ ਵਤ੍ਵਾ ਤਂ ਵਿਸ੍ਸਜ੍ਜੇਸਿ. ਏਸ ਨਯੋ ਸਬ੍ਬਤ੍ਥ. ਇਤਿ ਇਮੇ ਸਬ੍ਬਪਞ੍ਹੇ ਬੁਦ੍ਧਕਾਲੇ ਉਪਾਲਿਤ੍ਥੇਰੋ ਪੁਚ੍ਛਿ. ਭਗਵਾ ਬ੍ਯਾਕਾਸਿ. ਸਙ੍ਗੀਤਿਕਾਲੇ ਪਨ ਮਹਾਕਸ੍ਸਪਤ੍ਥੇਰੋ ਪੁਚ੍ਛਿ. ਉਪਾਲਿਤ੍ਥੇਰੋ ਬ੍ਯਾਕਾਸਿ.

ਤਤ੍ਥ ਭਦ੍ਦਕੋ ਤੇ ਉਮ੍ਮਙ੍ਗੋਤਿ ਭਦ੍ਦਕਾ ਤੇ ਪਞ੍ਹਾ; ਪਞ੍ਹਾ ਹਿ ਅਵਿਜ੍ਜਨ੍ਧਕਾਰਤੋ ਉਮ੍ਮੁਜ੍ਜਿਤ੍ਵਾ ਠਿਤਤ੍ਤਾ ‘‘ਉਮ੍ਮਙ੍ਗੋ’’ਤਿ ਵੁਚ੍ਚਤਿ. ਤਗ੍ਘਾਤਿ ਕਾਰਣਤ੍ਥੇ ਨਿਪਾਤੋ. ਯਸ੍ਮਾ ਮਂ ਪੁਚ੍ਛਸਿ, ਤਸ੍ਮਾ ਤੇ ਅਹਮਕ੍ਖਿਸ੍ਸਨ੍ਤਿ ਅਤ੍ਥੋ. ਸਮ੍ਪਟਿਚ੍ਛਨਤ੍ਥੇ ਵਾ, ‘‘ਤਗ੍ਘਾ’’ਤਿ ਹਿ ਇਮਿਨਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਕ੍ਖਿਸ੍ਸਨ੍ਤਿ ਆਹ. ‘‘ਸਮਾਦਹਿਤ੍ਵਾ ਵਿਸਿਬ੍ਬੇਨ੍ਤਿ, ਸਾਮਿਸੇਨ, ਸਸਿਤ੍ਥਕ’’ਨ੍ਤਿ ਇਮਾਨਿ ਤੀਣਿਯੇਵ ਸਿਕ੍ਖਾਪਦਾਨਿ ਭਗ੍ਗੇਸੁ ਪਞ੍ਞਤ੍ਤਾਨਿ.

ਚਤੁਵਿਪਤ੍ਤਿਵਣ੍ਣਨਾ

੩੩੬. ਯਂ ਤਂ ਪੁਚ੍ਛਿਮ੍ਹਾਤਿ ਯਂ ਤ੍ਵਂ ਅਪੁਚ੍ਛਿਮ੍ਹਾ. ਅਕਿਤ੍ਤਯੀਤਿ ਅਭਾਸਿ. ਨੋਤਿ ਅਮ੍ਹਾਕਂ. ਤਂ ਤਂ ਬ੍ਯਾਕਤਨ੍ਤਿ ਯਂ ਯਂ ਪੁਟ੍ਠਂ, ਤਂ ਤਦੇਵ ਬ੍ਯਾਕਤਂ. ਅਨਞ੍ਞਥਾਤਿ ਅਞ੍ਞਥਾ ਅਕਤ੍ਵਾ ਬ੍ਯਾਕਤਂ.

ਯੇ ਦੁਟ੍ਠੁਲ੍ਲਾ ਸਾ ਸੀਲਵਿਪਤ੍ਤੀਤਿ ਏਤ੍ਥ ਕਿਞ੍ਚਾਪਿ ਸੀਲਵਿਪਤ੍ਤਿ ਨਾਮ ਪਞ੍ਹੇ ਨਤ੍ਥਿ, ਅਥ ਖੋ ਦੁਟ੍ਠੁਲ੍ਲਂ ਵਿਸ੍ਸਜ੍ਜੇਤੁਕਾਮਤਾਯੇਤਂ ਵੁਤ੍ਤਂ. ਚਤੂਸੁ ਹਿ ਵਿਪਤ੍ਤੀਸੁ ਦੁਟ੍ਠੁਲ੍ਲਂ ਏਕਾਯ ਵਿਪਤ੍ਤਿਯਾ ਸਙ੍ਗਹਿਤਂ, ਅਦੁਟ੍ਠੁਲ੍ਲਂ ਤੀਹਿ ਵਿਪਤ੍ਤੀਹਿ ਸਙ੍ਗਹਿਤਂ. ਤਸ੍ਮਾ ‘‘ਯੇ ਦੁਟ੍ਠੁਲ੍ਲਾ ਸਾ ਸੀਲਵਿਪਤ੍ਤੀ’’ਤਿ ਵਤ੍ਵਾ ਤਮੇਵ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਪਾਰਾਜਿਕਂ ਸਙ੍ਘਾਦਿਸੇਸੋ ਸੀਲਵਿਪਤ੍ਤੀਤਿ ਵੁਚ੍ਚਤੀ’’ਤਿ ਆਹ.

ਇਦਾਨਿ ਤਿਸ੍ਸਨ੍ਨਂ ਵਿਪਤ੍ਤੀਨਂ ਵਸੇਨ ਅਦੁਟ੍ਠੁਲ੍ਲਂ ਦਸ੍ਸੇਤੁਂ ‘‘ਥੁਲ੍ਲਚ੍ਚਯ’’ਨ੍ਤਿਆਦਿਮਾਹ. ਤਤ੍ਥ ਯੋ ਚਾਯਂ, ਅਕ੍ਕੋਸਤਿ ਹਸਾਧਿਪ੍ਪਾਯੋਤਿ ਇਦਂ ਦੁਬ੍ਭਾਸਿਤਸ੍ਸ ਵਤ੍ਥੁਦਸ੍ਸਨਤ੍ਥਂ ਵੁਤ੍ਤਂ.

ਅਬ੍ਭਾਚਿਕ੍ਖਨ੍ਤੀਤਿ ‘‘ਤਥਾਹਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮੀ’’ਤਿ ਵਦਨ੍ਤਾ ਅਬ੍ਭਾਚਿਕ੍ਖਨ੍ਤਿ.

ਅਯਂ ਸਾ ਆਜੀਵਵਿਪਤ੍ਤਿਸਮ੍ਮਤਾਤਿ ਅਯਂ ਛਹਿ ਸਿਕ੍ਖਾਪਦੇਹਿ ਸਙ੍ਗਹਿਤਾ ਆਜੀਵਵਿਪਤ੍ਤਿ ਨਾਮ ਚਤੁਤ੍ਥਾ ਵਿਪਤ੍ਤਿ ਸਮ੍ਮਤਾਤਿ ਏਤ੍ਤਾਵਤਾ ‘‘ਅਦੁਟ੍ਠੁਲ੍ਲ’’ਨ੍ਤਿ ਇਦਂ ਵਿਸ੍ਸਜ੍ਜਿਤਂ ਹੋਤਿ.

ਇਦਾਨਿ ‘‘ਯੇ ਚ ਯਾਵਤਤਿਯਕਾ’’ਤਿ ਪਞ੍ਹਂ ਵਿਸ੍ਸਜ੍ਜੇਤੁਂ ‘‘ਏਕਾਦਸਾ’’ਤਿਆਦਿਮਾਹ.

ਛੇਦਨਕਾਦਿਵਣ੍ਣਨਾ

੩੩੭. ਯਸ੍ਮਾ ਪਨ ‘‘ਯੇ ਚ ਯਾਵਤਤਿਯਕਾ’’ਤਿ ਅਯਂ ਪਞ੍ਹੋ ‘‘ਏਕਾਦਸ ਯਾਵਤਤਿਯਕਾ’’ਤਿ ਏਵਂ ਸਙ੍ਖਾਵਸੇਨ ਵਿਸ੍ਸਜ੍ਜਿਤੋ, ਤਸ੍ਮਾ ਸਙ੍ਖਾਨੁਸਨ੍ਧਿਵਸੇਨੇਵ ‘‘ਕਤਿ ਛੇਦਨਕਾਨੀ’’ਤਿਆਦਿਕੇ ਅਞ੍ਞੇ ਅਨ੍ਤਰਾਪਞ੍ਹੇ ਪੁਚ੍ਛਿ. ਤੇਸਂ ਵਿਸ੍ਸਜ੍ਜਨਤ੍ਥਂ ‘‘ਛ ਛੇਦਨਕਾਨੀ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਏਕਂ ਭੇਦਨਕਂ, ਏਕਂ ਉਦ੍ਦਾਲਨਕਂ, ਸੋਦਸ ਜਾਨਨ੍ਤਿ ਪਞ੍ਞਤ੍ਤਾ’’ਤਿ ਇਦਮੇਵ ਅਪੁਬ੍ਬਂ. ਸੇਸਂ ਮਹਾਵਗ੍ਗੇ ਵਿਭਤ੍ਤਮੇਵ. ਯਂ ਪਨੇਤਂ ਅਪੁਬ੍ਬਂ ਤਤ੍ਥ ਏਕਂ ਭੇਦਨਕਨ੍ਤਿ ਸੂਚਿਘਰਂ. ਏਕਂ ਉਦ੍ਦਾਲਨਕਨ੍ਤਿ ਤੂਲੋਨਦ੍ਧਮਞ੍ਚਪੀਠਂ. ਸੋਦਸਾਤਿ ਸੋਲ਼ਸ. ਜਾਨਨ੍ਤਿ ਪਞ੍ਞਤ੍ਤਾਤਿ ‘‘ਜਾਨ’’ਨ੍ਤਿ ਏਵਂ ਵਤ੍ਵਾ ਪਞ੍ਞਤ੍ਤਾ, ਤੇ ਏਵਂ ਵੇਦਿਤਬ੍ਬਾ – ‘‘ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਅਤ੍ਤਨੋ ਪਰਿਣਾਮੇਯ੍ਯ, ਜਾਨਂ ਪੁਬ੍ਬੁਪਗਤਂ ਭਿਕ੍ਖੁਂ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਯ੍ਯ, ਜਾਨਂ ਸਪ੍ਪਾਣਕਂ ਉਦਕਂ ਤਿਣਂ ਵਾ ਮਤ੍ਤਿਕਂ ਵਾ ਸਿਞ੍ਚੇਯ੍ਯ ਵਾ ਸਿਞ੍ਚਾਪੇਯ੍ਯ ਵਾ, ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜੇਯ੍ਯ, ਜਾਨਂ ਆਸਾਦਨਾਪੇਕ੍ਖੋ ਭੁਤ੍ਤਸ੍ਮਿਂ ਪਾਚਿਤ੍ਤਿਯਂ, ਜਾਨਂ ਸਪ੍ਪਾਣਕਂ ਉਦਕਂ ਪਰਿਭੁਞ੍ਜੇਯ੍ਯ, ਜਾਨਂ ਯਥਾਧਮ੍ਮਂ ਨਿਹਤਾਧਿਕਰਣਂ, ਜਾਨਂ ਦੁਟ੍ਠੁਲ੍ਲਂ ਆਪਤ੍ਤਿਂ ਪਟਿਚ੍ਛਾਦੇਯ੍ਯ, ਜਾਨਂ ਊਨਵੀਸਤਿਵਸ੍ਸਂ ਪੁਗ੍ਗਲਂ ਉਪਸਮ੍ਪਾਦੇਯ੍ਯ, ਜਾਨਂ ਥੇਯ੍ਯਸਤ੍ਥੇਨ ਸਦ੍ਧਿਂ, ਜਾਨਂ ਤਥਾਵਾਦਿਨਾ ਭਿਕ੍ਖੁਨਾ ਅਕਤਾਨੁਧਮ੍ਮੇਨ, ਜਾਨਂ ਤਥਾਨਾਸਿਤਂ ਸਮਣੁਦ੍ਦੇਸਂ, ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਪੁਗ੍ਗਲਸ੍ਸ ਪਰਿਣਾਮੇਯ੍ਯ, ਜਾਨਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ ਭਿਕ੍ਖੁਨਿਂ ਨੇਵ ਅਤ੍ਤਨਾ ਪਟਿਚੋਦੇਯ੍ਯ, ਜਾਨਂ ਚੋਰਿਂ ਵਜ੍ਝਂ ਵਿਦਿਤਂ ਅਨਪਲੋਕੇਤ੍ਵਾ, ਜਾਨਂ ਸਭਿਕ੍ਖੁਕਂ ਆਰਾਮਂ ਅਨਾਪੁਚ੍ਛਾ ਪਵਿਸੇਯ੍ਯਾ’’ਤਿ.

ਅਸਾਧਾਰਣਾਦਿਵਣ੍ਣਨਾ

੩੩੮. ਇਦਾਨਿ ‘‘ਸਾਧਾਰਣਂ ਅਸਾਧਾਰਣ’’ਨ੍ਤਿ ਇਮਂ ਪੁਰਿਮਪਞ੍ਹਂ ਵਿਸ੍ਸਜ੍ਜੇਨ੍ਤੋ ‘‘ਵੀਸਂ ਦ੍ਵੇ ਸਤਾਨੀ’’ਤਿਆਦਿਮਾਹ. ਤਤ੍ਥ ਭਿਕ੍ਖੁਨੀਹਿ ਅਸਾਧਾਰਣੇਸੁ ਛ ਸਙ੍ਘਾਦਿਸੇਸਾਤਿ ਵਿਸ੍ਸਟ੍ਠਿ, ਕਾਯਸਂਸਗ੍ਗੋ, ਦੁਟ੍ਠੁਲ੍ਲਂ, ਅਤ੍ਤਕਾਮ, ਕੁਟਿ, ਵਿਹਾਰੋਤਿ. ਦ੍ਵੇ ਅਨਿਯਤੇਹਿ ਅਟ੍ਠਾਤਿ ਦ੍ਵੀਹਿ ਅਨਿਯਤੇਹਿ ਸਦ੍ਧਿਂ ਅਟ੍ਠ ਇਮੇ.

ਨਿਸ੍ਸਗ੍ਗਿਯਾਨਿ ਦ੍ਵਾਦਸਾਤਿ –

ਧੋਵਨਞ੍ਚ ਪਟਿਗ੍ਗਹੋ, ਕੋਸੇਯ੍ਯਸੁਦ੍ਧਦ੍ਵੇਭਾਗਾ;

ਛਬ੍ਬਸ੍ਸਾਨਿ ਨਿਸੀਦਨਂ, ਦ੍ਵੇ ਲੋਮਾ ਪਠਮੋ ਪਤ੍ਤੋ;

ਵਸ੍ਸਿਕਾ ਆਰਞ੍ਞਕੇਨ ਚਾਤਿ – ਇਮੇ ਦ੍ਵਾਦਸ.

ਦ੍ਵੇਵੀਸਤਿ ਖੁਦ੍ਦਕਾਤਿ –

ਸਕਲੋ ਭਿਕ੍ਖੁਨੀਵਗ੍ਗੋ, ਪਰਮ੍ਪਰਞ੍ਚ ਭੋਜਨਂ;

ਅਨਤਿਰਿਤ੍ਤਂ ਅਭਿਹਟਂ, ਪਣੀਤਞ੍ਚ ਅਚੇਲਕਂ;

ਊਨਂ ਦੁਟ੍ਠੁਲ੍ਲਛਾਦਨਂ.

ਮਾਤੁਗਾਮੇਨ ਸਦ੍ਧਿਞ੍ਚ, ਯਾ ਚ ਅਨਿਕ੍ਖਨ੍ਤਰਾਜਕੇ;

ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ, ਵਿਕਾਲੇ ਗਾਮਪ੍ਪਵੇਸਨਾ.

ਨਿਸੀਦਨੇ ਚ ਯਾ ਸਿਕ੍ਖਾ, ਵਸ੍ਸਿਕਾ ਯਾ ਚ ਸਾਟਿਕਾ;

ਦ੍ਵਾਵੀਸਤਿ ਇਮਾ ਸਿਕ੍ਖਾ, ਖੁਦ੍ਦਕੇਸੁ ਪਕਾਸਿਤਾਤਿ.

ਭਿਕ੍ਖੂਹਿ ਅਸਾਧਾਰਣੇਸੁਪਿ ਸਙ੍ਘਮ੍ਹਾ ਦਸ ਨਿਸ੍ਸਰੇਤਿ ‘‘ਸਙ੍ਘਮ੍ਹਾ ਨਿਸ੍ਸਾਰੀਯਤੀ’’ਤਿ ਏਵਂ ਵਿਭਙ੍ਗੇ ਵੁਤ੍ਤਾ, ਮਾਤਿਕਾਯਂ ਪਨ ‘‘ਨਿਸ੍ਸਾਰਣੀਯਂ ਸਙ੍ਘਾਦਿਸੇਸ’’ਨ੍ਤਿ ਏਵਂ ਆਗਤਾ ਦਸ. ਨਿਸ੍ਸਗ੍ਗਿਯਾਨਿ ਦ੍ਵਾਦਸਾਤਿ ਭਿਕ੍ਖੁਨਿਵਿਭਙ੍ਗੇ ਵਿਭਤ੍ਤਾਨਿ ਨਿਸ੍ਸਗ੍ਗਿਯਾਨੇਵ. ਖੁਦ੍ਦਕਾਪਿ ਤਤ੍ਥ ਵਿਭਤ੍ਤਖੁਦ੍ਦਕਾ ਏਵ. ਤਥਾ ਚਤ੍ਤਾਰੋ ਪਾਟਿਦੇਸਨੀਯਾ, ਇਤਿ ਸਤਞ੍ਚੇਵ ਤਿਂਸਞ੍ਚ ਸਿਕ੍ਖਾ ਵਿਭਙ੍ਗੇ ਭਿਕ੍ਖੁਨੀਨਂ ਭਿਕ੍ਖੂਹਿ ਅਸਾਧਾਰਣਾ. ਸੇਸਂ ਇਮਸ੍ਮਿਂ ਸਾਧਾਰਣਾਸਾਧਾਰਣਵਿਸ੍ਸਜ੍ਜਨੇ ਉਤ੍ਤਾਨਮੇਵ.

ਇਦਾਨਿ ਵਿਪਤ੍ਤਿਯੋ ਚ ‘‘ਯੇਹਿ ਸਮਥੇਹਿ ਸਮ੍ਮਨ੍ਤੀ’’ਤਿ ਇਦਂ ਪਞ੍ਹਂ ਵਿਸ੍ਸਜ੍ਜੇਨ੍ਤੋ ਅਟ੍ਠੇਵ ਪਾਰਾਜਿਕਾਤਿਆਦਿਮਾਹ. ਤਤ੍ਥ ਦੁਰਾਸਦਾਤਿ ਇਮਿਨਾ ਤੇਸਂ ਸਪ੍ਪਟਿਭਯਤਂ ਦਸ੍ਸੇਤਿ. ਕਣ੍ਹਸਪ੍ਪਾਦਯੋ ਵਿਯ ਹਿ ਏਤੇ ਦੁਰਾਸਦਾ ਦੁਰੂਪਗਮਨਾ ਦੁਰਾਸਜ੍ਜਨਾ, ਆਪਜ੍ਜਿਯਮਾਨਾ ਮੂਲਚ੍ਛੇਦਾਯ ਸਂਵਤ੍ਤਨ੍ਤਿ. ਤਾਲਵਤ੍ਥੁਸਮੂਪਮਾਤਿ ਸਬ੍ਬਂ ਤਾਲਂ ਉਦ੍ਧਰਿਤ੍ਵਾ ਤਾਲਸ੍ਸ ਵਤ੍ਥੁਮਤ੍ਤਕਰਣੇਨ ਸਮੂਪਮਾ. ਯਥਾ ਵਤ੍ਥੁਮਤ੍ਤਕਤੋ ਤਾਲੋ ਨ ਪੁਨ ਪਾਕਤਿਕੋ ਹੋਤਿ, ਏਵਂ ਨ ਪੁਨ ਪਾਕਤਿਕਾ ਹੋਨ੍ਤਿ.

ਏਵਂ ਸਾਧਾਰਣਂ ਉਪਮਂ ਦਸ੍ਸੇਤ੍ਵਾ ਪੁਨ ਏਕੇਕਸ੍ਸ ਵੁਤ੍ਤਂ ਉਪਮਂ ਦਸ੍ਸੇਨ੍ਤੋ ਪਣ੍ਡੁਪਲਾਸੋਤਿਆਦਿਮਾਹ. ਅਵਿਰੁਲ਼੍ਹੀ ਭਵਨ੍ਤਿ ਤੇਤਿ ਯਥਾ ਏਤੇ ਪਣ੍ਡੁਪਲਾਸਾਦਯੋ ਪੁਨਹਰਿਤਾਦਿਭਾਵੇਨ ਅਵਿਰੁਲ਼੍ਹਿਧਮ੍ਮਾ ਹੋਨ੍ਤਿ; ਏਵਂ ਪਾਰਾਜਿਕਾਪਿ ਪੁਨ ਪਕਤਿਸੀਲਾਭਾਵੇਨ ਅਵਿਰੁਲ਼੍ਹਿਧਮ੍ਮਾ ਹੋਨ੍ਤੀਤਿ ਅਤ੍ਥੋ. ਏਤ੍ਤਾਵਤਾ ‘‘ਵਿਪਤ੍ਤਿਯੋ ਚ ਯੇਹਿ ਸਮਥੇਹਿ ਸਮ੍ਮਨ੍ਤੀ’’ਤਿ ਏਤ੍ਥ ਇਮਾ ਤਾਵ ਅਟ੍ਠ ਪਾਰਾਜਿਕਵਿਪਤ੍ਤਿਯੋ ਕੇਹਿਚਿ ਸਮਥੇਹਿ ਨ ਸਮ੍ਮਨ੍ਤੀਤਿ ਏਵਂ ਦਸ੍ਸਿਤਂ ਹੋਤਿ. ਯਾ ਪਨ ਵਿਪਤ੍ਤਿਯੋ ਸਮ੍ਮਨ੍ਤਿ, ਤਾ ਦਸ੍ਸੇਤੁਂ ਤੇਵੀਸਤਿ ਸਙ੍ਘਾਦਿਸੇਸਾਤਿਆਦਿ ਵੁਤ੍ਤਂ. ਤਤ੍ਥ ਤੀਹਿ ਸਮਥੇਹੀਤਿ ਸਬ੍ਬਸਙ੍ਗਾਹਿਕਵਚਨਮੇਤਂ. ਸਙ੍ਘਾਦਿਸੇਸਾ ਹਿ ਦ੍ਵੀਹਿ ਸਮਥੇਹਿ ਸਮ੍ਮਨ੍ਤਿ, ਨ ਤਿਣਵਤ੍ਥਾਰਕੇਨ. ਸੇਸਾ ਤੀਹਿਪਿ ਸਮ੍ਮਨ੍ਤਿ.

ਦ੍ਵੇ ਉਪੋਸਥਾ ਦ੍ਵੇ ਪਵਾਰਣਾਤਿ ਇਦਂ ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਵਸੇਨ ਵੁਤ੍ਤਂ. ਵਿਭਤ੍ਤਿਮਤ੍ਤਦਸ੍ਸਨੇਨੇਵ ਚੇਤਂ ਵੁਤ੍ਤਂ, ਨ ਸਮਥੇਹਿ ਵੂਪਸਮਨਵਸੇਨ. ਭਿਕ੍ਖੁਉਪੋਸਥੋ, ਭਿਕ੍ਖੁਨਿਉਪੋਸਥੋ, ਭਿਕ੍ਖੁਪਵਾਰਣਾ, ਭਿਕ੍ਖੁਨਿਪਵਾਰਣਾਤਿ ਇਮਾਪਿ ਹਿ ਚਤਸ੍ਸੋ ਵਿਭਤ੍ਤਿਯੋ; ਵਿਭਜਨਾਨੀਤਿ ਅਤ੍ਥੋ. ਚਤ੍ਤਾਰਿ ਕਮ੍ਮਾਨੀਤਿ ਅਧਮ੍ਮੇਨਵਗ੍ਗਾਦੀਨਿ ਉਪੋਸਥਕਮ੍ਮਾਨਿ. ਪਞ੍ਚੇਵ ਉਦ੍ਦੇਸਾ ਚਤੁਰੋ ਭਵਨ੍ਤਿ ਅਨਞ੍ਞਥਾਤਿ ਭਿਕ੍ਖੂਨਂ ਪਞ੍ਚ ਉਦ੍ਦੇਸਾ ਭਿਕ੍ਖੁਨੀਨਂ ਚਤੁਰੋ ਭਵਨ੍ਤਿ, ਅਞ੍ਞਥਾ ਨ ਭਵਨ੍ਤਿ; ਇਮਾ ਅਪਰਾਪਿ ਵਿਭਤ੍ਤਿਯੋ. ਆਪਤ੍ਤਿਕ੍ਖਨ੍ਧਾ ਚ ਭਵਨ੍ਤਿ ਸਤ੍ਤ, ਅਧਿਕਰਣਾਨਿ ਚਤ੍ਤਾਰੀਤਿ ਇਮਾ ਪਨ ਵਿਭਤ੍ਤਿਯੋ ਸਮਥੇਹਿ ਸਮ੍ਮਨ੍ਤਿ, ਤਸ੍ਮਾ ਸਤ੍ਤਹਿ ਸਮਥੇਹੀਤਿਆਦਿਮਾਹ. ਅਥ ਵਾ ‘‘ਦ੍ਵੇ ਉਪੋਸਥਾ ਦ੍ਵੇ ਪਵਾਰਣਾ ਚਤ੍ਤਾਰਿ ਕਮ੍ਮਾਨਿ ਪਞ੍ਚੇਵ ਉਦ੍ਦੇਸਾ ਚਤੁਰੋ ਭਵਨ੍ਤਿ, ਅਨਞ੍ਞਥਾ’’ਤਿ ਇਮਾਪਿ ਚਤਸ੍ਸੋ ਵਿਭਤ੍ਤਿਯੋ ਨਿਸ੍ਸਾਯ ‘‘ਨਸ੍ਸਨ੍ਤੇਤੇ ਵਿਨਸ੍ਸਨ੍ਤੇਤੇ’’ਤਿਆਦਿਨਾ ਨਯੇਨ ਯਾ ਆਪਤ੍ਤਿਯੋ ਆਪਜ੍ਜਨ੍ਤਿ, ਤਾ ਯਸ੍ਮਾ ਵੁਤ੍ਤਪ੍ਪਕਾਰੇਹੇਵ ਸਮਥੇਹਿ ਸਮ੍ਮਨ੍ਤਿ, ਤਸ੍ਮਾ ਤਂਮੂਲਕਾਨਂ ਆਪਤ੍ਤੀਨਂ ਸਮਥਦਸ੍ਸਨਤ੍ਥਮ੍ਪਿ ਤਾ ਵਿਭਤ੍ਤਿਯੋ ਵੁਤ੍ਤਾਤਿ ਵੇਦਿਤਬ੍ਬਾ. ਕਿਚ੍ਚਂ ਏਕੇਨਾਤਿ ਕਿਚ੍ਚਾਧਿਕਰਣਂ ਏਕੇਨ ਸਮਥੇਨ ਸਮ੍ਮਤਿ.

ਪਾਰਾਜਿਕਾਦਿਆਪਤ੍ਤਿਵਣ੍ਣਨਾ

੩੩੯. ਏਵਂ ਪੁਚ੍ਛਾਨੁਕ੍ਕਮੇਨ ਸਬ੍ਬਪਞ੍ਹੇ ਵਿਸ੍ਸਜ੍ਜੇਤ੍ਵਾ ਇਦਾਨਿ ‘‘ਆਪਤ੍ਤਿਕ੍ਖਨ੍ਧਾ ਚ ਭਵਨ੍ਤਿ ਸਤ੍ਤਾ’’ਤਿ ਏਤ੍ਥ ਸਙ੍ਗਹਿਤਆਪਤ੍ਤਿਕ੍ਖਨ੍ਧਾਨਂ ਪਚ੍ਚੇਕਂ ਨਿਬ੍ਬਚਨਮਤ੍ਤਂ ਦਸ੍ਸੇਨ੍ਤੋ ਪਾਰਾਜਿਕਨ੍ਤਿਆਦਿਮਾਹ. ਤਤ੍ਥ ਪਾਰਾਜਿਕਨ੍ਤਿ ਗਾਥਾਯ ਅਯਮਤ੍ਥੋ – ਯਦਿਦਂ ਪੁਗ੍ਗਲਾਪਤ੍ਤਿਸਿਕ੍ਖਾਪਦਪਾਰਾਜਿਕੇਸੁ ਆਪਤ੍ਤਿਪਾਰਾਜਿਕਂ ਨਾਮ ਵੁਤ੍ਤਂ, ਤਂ ਆਪਜ੍ਜਨ੍ਤੋ ਪੁਗ੍ਗਲੋ ਯਸ੍ਮਾ ਪਰਾਜਿਤੋ ਪਰਾਜਯਮਾਪਨ੍ਨੋ ਸਦ੍ਧਮ੍ਮਾ ਚੁਤੋ ਪਰਦ੍ਧੋ ਭਟ੍ਠੋ ਨਿਰਙ੍ਕਤੋ ਚ ਹੋਤਿ, ਅਨਿਹਤੇ ਤਸ੍ਮਿਂ ਪੁਗ੍ਗਲੇ ਪੁਨ ਉਪੋਸਥਪ੍ਪਵਾਰਣਾਦਿਭੇਦੋ ਸਂਵਾਸੋ ਨਤ੍ਥਿ. ਤੇਨੇਤਂ ਇਤਿ ਵੁਚ੍ਚਤੀਤਿ ਤੇਨ ਕਾਰਣੇਨ ਏਤਂ ਆਪਤ੍ਤਿਪਾਰਾਜਿਕਨ੍ਤਿ ਵੁਚ੍ਚਤਿ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਯਸ੍ਮਾ ਪਰਾਜਿਤੋ ਹੋਤਿ ਤੇਨ, ਤਸ੍ਮਾ ਏਤਂ ਪਾਰਾਜਿਕਨ੍ਤਿ ਵੁਚ੍ਚਤਿ.

ਦੁਤਿਯਗਾਥਾਯਪਿ ਬ੍ਯਞ੍ਜਨਂ ਅਨਾਦਿਯਿਤ੍ਵਾ ਅਤ੍ਥਮਤ੍ਤਮੇਵ ਦਸ੍ਸੇਤੁਂ ਸਙ੍ਘੋਵ ਦੇਤਿ ਪਰਿਵਾਸਨ੍ਤਿਆਦਿ ਵੁਤ੍ਤਂ. ਅਯਂ ਪਨੇਤ੍ਥ ਅਤ੍ਥੋ – ਇਮਂ ਆਪਤ੍ਤਿਂ ਆਪਜ੍ਜਿਤ੍ਵਾ ਵੁਟ੍ਠਾਤੁਕਾਮਸ੍ਸ ਯਂ ਤਂ ਆਪਤ੍ਤਿਵੁਟ੍ਠਾਨਂ ਤਸ੍ਸ ਆਦਿਮ੍ਹਿ ਚੇਵ ਪਰਿਵਾਸਦਾਨਤ੍ਥਾਯ ਆਦਿਤੋ ਸੇਸੇ ਮਜ੍ਝੇ ਮਾਨਤ੍ਤਦਾਨਤ੍ਥਾਯ ਮੂਲਾਯਪਟਿਕਸ੍ਸਨੇਨ ਵਾ ਸਹ ਮਾਨਤ੍ਤਦਾਨਤ੍ਥਾਯ, ਅਵਸਾਨੇ ਅਬ੍ਭਾਨਤ੍ਥਾਯ ਚ ਸਙ੍ਘੋ ਇਚ੍ਛਿਤਬ੍ਬੋ, ਨ ਹੇਤ੍ਥ ਏਕਮ੍ਪਿ ਕਮ੍ਮਂ ਵਿਨਾ ਸਙ੍ਘੇਨ ਸਕ੍ਕਾ ਕਾਤੁਨ੍ਤਿ ਸਙ੍ਘੋ, ਆਦਿਮ੍ਹਿ ਚੇਵ ਸੇਸੇ ਚ ਇਚ੍ਛਿਤਬ੍ਬੋ ਅਸ੍ਸਾਤਿ ਸਙ੍ਘਾਦਿਸੇਸੋ.

ਤਤਿਯਗਾਥਾਯ ਅਨਿਯਤੋ ਨ ਨਿਯਤੋਤਿ ਯਸ੍ਮਾ ਨ ਨਿਯਤੋ, ਤਸ੍ਮਾ ਅਨਿਯਤੋ ਅਯਮਾਪਤ੍ਤਿਕ੍ਖਨ੍ਧੋਤਿ ਅਤ੍ਥੋ. ਕਿਂ ਕਾਰਣਾ ਨ ਨਿਯਤੋਤਿ? ਅਨੇਕਂਸਿਕਤਂ ਪਦਂ, ਯਸ੍ਮਾ ਇਦਂ ਸਿਕ੍ਖਾਪਦਂ ਅਨੇਕਂਸੇਨ ਕਤਨ੍ਤਿ ਅਤ੍ਥੋ. ਕਥਂ ਅਨੇਕਂਸੇਨ? ਤਿਣ੍ਣਮਞ੍ਞਤਰਂ ਠਾਨਂ, ਤਿਣ੍ਣਂ ਧਮ੍ਮਾਨਂ ਅਞ੍ਞਤਰੇਨ ਕਾਰੇਤਬ੍ਬੋਤਿ ਹਿ ਤਤ੍ਥ ਵੁਤ੍ਤਂ, ਤਸ੍ਮਾ ‘‘ਅਨਿਯਤੋ’’ਤਿ ਪਵੁਚ੍ਚਤਿ, ਸੋ ਆਪਤ੍ਤਿਕ੍ਖਨ੍ਧੋ ਅਨਿਯਤੋਤਿ ਵੁਚ੍ਚਤਿ. ਯਥਾ ਚ ਤਿਣ੍ਣਂ ਅਞ੍ਞਤਰਂ ਠਾਨਂ, ਏਵਂ ਦ੍ਵਿਨ੍ਨਂ ਧਮ੍ਮਾਨਂ ਅਞ੍ਞਤਰਂ ਠਾਨਂ ਯਤ੍ਥ ਵੁਤ੍ਤਂ, ਸੋਪਿ ਅਨਿਯਤੋ ਏਵ.

ਚਤੁਤ੍ਥਗਾਥਾਯ ਅਚ੍ਚਯੋ ਤੇਨ ਸਮੋ ਨਤ੍ਥੀਤਿ ਦੇਸਨਾਗਾਮਿਨੀਸੁ ਅਚ੍ਚਯੇਸੁ ਤੇਨ ਸਮੋ ਥੂਲੋ ਅਚ੍ਚਯੋ ਨਤ੍ਥਿ, ਤੇਨੇਤਂ ਇਤਿ ਵੁਚ੍ਚਤਿ; ਥੂਲਤ੍ਤਾ ਅਚ੍ਚਯਸ੍ਸ ਏਤਂ ਥੁਲ੍ਲਚ੍ਚਯਨ੍ਤਿ ਵੁਚ੍ਚਤੀਤਿ ਅਤ੍ਥੋ.

ਪਞ੍ਚਮਗਾਥਾਯ ਨਿਸ੍ਸਜ੍ਜਿਤ੍ਵਾਨ ਦੇਸੇਤਿ ਤੇਨੇਤਨ੍ਤਿ ਨਿਸ੍ਸਜ੍ਜਿਤ੍ਵਾ ਦੇਸੇਤਬ੍ਬਤੋ ਨਿਸ੍ਸਗ੍ਗਿਯਨ੍ਤਿ ਵੁਚ੍ਚਤੀਤਿ ਅਤ੍ਥੋ.

ਛਟ੍ਠਗਾਥਾਯ ਪਾਤੇਤਿ ਕੁਸਲਂ ਧਮ੍ਮਨ੍ਤਿ ਸਞ੍ਚਿਚ੍ਚ ਆਪਜ੍ਜਨ੍ਤਸ੍ਸ ਕੁਸਲਧਮ੍ਮਸਙ੍ਖਾਤਂ ਕੁਸਲਚਿਤ੍ਤਂ ਪਾਤੇਤਿ, ਤਸ੍ਮਾ ਪਾਤੇਤਿ ਚਿਤ੍ਤਨ੍ਤਿ ਪਾਚਿਤ੍ਤਿਯਂ. ਯਂ ਪਨ ਚਿਤ੍ਤਂ ਪਾਤੇਤਿ, ਤਂ ਯਸ੍ਮਾ ਅਰਿਯਮਗ੍ਗਂ ਅਪਰਜ੍ਝਤਿ, ਚਿਤ੍ਤਸਮ੍ਮੋਹਕਾਰਣਞ੍ਚ ਹੋਤਿ, ਤਸ੍ਮਾ ‘‘ਅਰਿਯਮਗ੍ਗਂ ਅਪਰਜ੍ਝਤਿ, ਚਿਤ੍ਤਸਮ੍ਮੋਹਨਟ੍ਠਾਨ’’ਨ੍ਤਿ ਚ ਵੁਤ੍ਤਂ.

ਪਾਟਿਦੇਸਨੀਯਗਾਥਾਸੁ ‘‘ਗਾਰਯ੍ਹਂ ਆਵੁਸੋ ਧਮ੍ਮਂ ਆਪਜ੍ਜਿ’’ਨ੍ਤਿ ਵੁਤ੍ਤਗਾਰਯ੍ਹਭਾਵਕਾਰਣਦਸ੍ਸਨਤ੍ਥਮੇਵ ਭਿਕ੍ਖੁ ਅਞ੍ਞਾਤਕੋ ਸਨ੍ਤੋਤਿਆਦਿ ਵੁਤ੍ਤਂ. ਪਟਿਦੇਸੇਤਬ੍ਬਤੋ ਪਨ ਸਾ ਆਪਤ੍ਤਿ ਪਾਟਿਦੇਸਨੀਯਾਤਿ ਵੁਚ੍ਚਤਿ.

ਦੁਕ੍ਕਟਗਾਥਾਯ ਅਪਰਦ੍ਧਂ ਵਿਰਦ੍ਧਞ੍ਚ ਖਲਿਤਨ੍ਤਿ ਸਬ੍ਬਮੇਤਂ ‘‘ਯਞ੍ਚ ਦੁਕ੍ਕਟ’’ਨ੍ਤਿ ਏਤ੍ਥ ਵੁਤ੍ਤਸ੍ਸ ਦੁਕ੍ਕਟਸ੍ਸ ਪਰਿਯਾਯਵਚਨਂ. ਯਞ੍ਹਿ ਦੁਟ੍ਠੁ ਕਤਂ ਵਿਰੂਪਂ ਵਾ ਕਤਂ, ਤਂ ਦੁਕ੍ਕਟਂ. ਤਂ ਪਨੇਤਂ ਯਥਾ ਸਤ੍ਥਾਰਾ ਵੁਤ੍ਤਂ; ਏਵਂ ਅਕਤਤ੍ਤਾ ਅਪਰਦ੍ਧਂ, ਕੁਸਲਂ ਵਿਰਜ੍ਝਿਤ੍ਵਾ ਪਵਤ੍ਤਤ੍ਤਾ ਵਿਰਦ੍ਧਂ, ਅਰਿਯਵਤ੍ਤਪਟਿਪਦਂ ਅਨਾਰੁਲ਼੍ਹਤ੍ਤਾ ਖਲਿਤਂ. ਯਂ ਮਨੁਸ੍ਸੋ ਕਰੇਤਿ ਇਦਂ ਪਨਸ੍ਸ ਓਪਮ੍ਮਨਿਦਸ੍ਸਨਂ. ਤਸ੍ਸਤ੍ਥੋ – ਯਥਾ ਹਿ ਯਂ ਲੋਕੇ ਮਨੁਸ੍ਸੋ ਆਵਿ ਵਾ ਯਦਿ ਵਾ ਰਹੋ ਪਾਪਂ ਕਰੋਤਿ, ਤਂ ਦੁਕ੍ਕਟਨ੍ਤਿ ਪਵੇਦੇਨ੍ਤਿ; ਏਵਮਿਦਮ੍ਪਿ ਬੁਦ੍ਧਪ੍ਪਟਿਕੁਟ੍ਠੇਨ ਲਾਮਕਭਾਵੇਨ ਪਾਪਂ, ਤਸ੍ਮਾ ਦੁਕ੍ਕਟਨ੍ਤਿ ਵੇਦਿਤਬ੍ਬਂ.

ਦੁਬ੍ਭਾਸਿਤਗਾਥਾਯ ਦੁਬ੍ਭਾਸਿਤਂ ਦੁਰਾਭਟ੍ਠਨ੍ਤਿ ਦੁਟ੍ਠੁ ਆਭਟ੍ਠਂ ਭਾਸਿਤਂ ਲਪਿਤਨ੍ਤਿ ਦੁਰਾਭਟ੍ਠਂ. ਯਂ ਦੁਰਾਭਟ੍ਠਂ, ਤਂ ਦੁਬ੍ਭਾਸਿਤਨ੍ਤਿ ਅਤ੍ਥੋ. ਕਿਞ੍ਚ ਭਿਯ੍ਯੋ? ਸਂਕਿਲਿਟ੍ਠਞ੍ਚ ਯਂ ਪਦਂ, ਸਂਕਿਲਿਟ੍ਠਂ ਯਸ੍ਮਾ ਤਂ ਪਦਂ ਹੋਤੀਤਿ ਅਤ੍ਥੋ. ਤਥਾ ਯਞ੍ਚ ਵਿਞ੍ਞੂ ਗਰਹਨ੍ਤਿ, ਯਸ੍ਮਾ ਚ ਨਂ ਵਿਞ੍ਞੂ ਗਰਹਨ੍ਤੀਤਿ ਅਤ੍ਥੋ. ਤੇਨੇਤਂ ਇਤਿ ਵੁਚ੍ਚਤੀਤਿ ਤੇਨ ਸਂਕਿਲਿਟ੍ਠਭਾਵੇਨ ਚ ਵਿਞ੍ਞੁਗਰਹਨੇਨਾਪਿ ਚ ਏਤਂ ਇਤਿ ਵੁਚ੍ਚਤਿ; ‘‘ਦੁਬ੍ਭਾਸਿਤ’’ਨ੍ਤਿ ਏਵਂ ਵੁਚ੍ਚਤੀਤਿ ਅਤ੍ਥੋ.

ਸੇਖਿਯਗਾਥਾਯ ‘‘ਆਦਿ ਚੇਤਂ ਚਰਣਞ੍ਚਾ’’ਤਿਆਦਿਨਾ ਨਯੇਨ ਸੇਖਸ੍ਸ ਸਨ੍ਤਕਭਾਵਂ ਦੀਪੇਤਿ. ਤਸ੍ਮਾ ਸੇਖਸ੍ਸ ਇਦਂ ਸੇਖਿਯਨ੍ਤਿ ਅਯਮੇਤ੍ਥ ਸਙ੍ਖੇਪਤ੍ਥੋ. ਇਦਂ ‘‘ਗਰੁਕਲਹੁਕਞ੍ਚਾਪੀ’’ਤਿਆਦਿਪਞ੍ਹੇਹਿ ਅਸਙ੍ਗਹਿਤਸ੍ਸ ‘‘ਹਨ੍ਦ ਵਾਕ੍ਯਂ ਸੁਣੋਮ ਤੇ’’ਤਿ ਇਮਿਨਾ ਪਨ ਆਯਾਚਨਵਚਨੇਨ ਸਙ੍ਗਹਿਤਸ੍ਸ ਅਤ੍ਥਸ੍ਸ ਦੀਪਨਤ੍ਥਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਛਨ੍ਨਮਤਿਵਸ੍ਸਤੀਤਿਆਦਿਮ੍ਹਿਪਿ ਏਸੇਵ ਨਯੋ. ਤਤ੍ਥ ਛਨ੍ਨਮਤਿਵਸ੍ਸਤੀਤਿ ਗੇਹਂ ਤਾਵ ਤਿਣਾਦੀਹਿ ਅਚ੍ਛਨ੍ਨਂ ਅਤਿਵਸ੍ਸਤਿ. ਇਦਂ ਪਨ ਆਪਤ੍ਤਿਸਙ੍ਖਾਤਂ ਗੇਹਂ ਛਨ੍ਨਂ ਅਤਿਵਸ੍ਸਤਿ; ਮੂਲਾਪਤ੍ਤਿਞ੍ਹਿ ਛਾਦੇਨ੍ਤੋ ਅਞ੍ਞਂ ਨਵਂ ਆਪਤ੍ਤਿਂ ਆਪਜ੍ਜਤਿ. ਵਿਵਟਂ ਨਾਤਿਵਸ੍ਸਤੀਤਿ ਗੇਹਂ ਤਾਵ ਅਵਿਵਟਂ ਸੁਚ੍ਛਨ੍ਨਂ ਨਾਤਿਵਸ੍ਸਤਿ. ਇਦਂ ਪਨ ਆਪਤ੍ਤਿਸਙ੍ਖਾਤਂ ਗੇਹਂ ਵਿਵਟਂ ਨਾਤਿਵਸ੍ਸਤਿ; ਮੂਲਾਪਤ੍ਤਿਞ੍ਹਿ ਵਿਵਰਨ੍ਤੋ ਦੇਸਨਾਗਾਮਿਨਿਂ ਦੇਸੇਤ੍ਵਾ ਵੁਟ੍ਠਾਨਗਾਮਿਨਿਤੋ ਵੁਟ੍ਠਹਿਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਤਿ. ਆਯਤਿਂ ਸਂਵਰਨ੍ਤੋ ਅਞ੍ਞਂ ਆਪਤ੍ਤਿਂ ਨਾਪਜ੍ਜਤਿ. ਤਸ੍ਮਾ ਛਨ੍ਨਂ ਵਿਵਰੇਥਾਤਿ ਤੇਨ ਕਾਰਣੇਨ ਦੇਸਨਾਗਾਮਿਨਿਂ ਦੇਸੇਨ੍ਤੋ ਵੁਟ੍ਠਾਨਗਾਮਿਨਿਤੋ ਚ ਵੁਟ੍ਠਹਨ੍ਤੋ ਛਨ੍ਨਂ ਵਿਵਰੇਥ. ਏਵਂ ਤਂ ਨਾਤਿਵਸ੍ਸਤੀਤਿ ਏਵਞ੍ਚੇਤਂ ਵਿਵਟਂ ਨਾਤਿਵਸ੍ਸਤੀਤਿ ਅਤ੍ਥੋ.

ਗਤਿ ਮਿਗਾਨਂ ਪਵਨਨ੍ਤਿ ਅਜ੍ਝੋਕਾਸੇ ਬ੍ਯਗ੍ਘਾਦੀਹਿ ਪਰਿਪਾਤਿਯਮਾਨਾਨਂ ਮਿਗਾਨਂ ਪਵਨਂ ਰੁਕ੍ਖਾਦਿਗਹਨਂ ਅਰਞ੍ਞਂ ਗਤਿ ਪਟਿਸਰਣਂ ਹੋਤਿ, ਤਂ ਪਤ੍ਵਾ ਤੇ ਅਸ੍ਸਾਸਨ੍ਤਿ. ਏਤੇਨੇਵ ਨਯੇਨ ਆਕਾਸੋ ਪਕ੍ਖੀਨਂ ਗਤਿ. ਅਵਸ੍ਸਂ ਉਪਗਮਨਟ੍ਠੇਨ ਪਨ ਵਿਭਵੋ ਗਤਿ ਧਮ੍ਮਾਨਂ, ਸਬ੍ਬੇਸਮ੍ਪਿ ਸਙ੍ਖਤਧਮ੍ਮਾਨਂ ਵਿਨਾਸੋਵ ਤੇਸਂ ਗਤਿ. ਨ ਹਿ ਤੇ ਵਿਨਾਸਂ ਅਗਚ੍ਛਨ੍ਤਾ ਠਾਤੁਂ ਸਕ੍ਕੋਨ੍ਤਿ. ਸੁਚਿਰਮ੍ਪਿ ਠਤ੍ਵਾ ਪਨ ਨਿਬ੍ਬਾਨਂ ਅਰਹਤੋ ਗਤਿ, ਖੀਣਾਸਵਸ੍ਸ ਅਰਹਤੋ ਅਨੁਪਾਦਿਸੇਸਨਿਬ੍ਬਾਨਧਾਤੁ ਏਕਂਸੇਨ ਗਤੀਤਿ ਅਤ੍ਥੋ.

ਪਠਮਗਾਥਾਸਙ੍ਗਣਿਕਵਣ੍ਣਨਾ ਨਿਟ੍ਠਿਤਾ.