ਅਧਿਕਰਣਭੇਦਂ

ਉਕ੍ਕੋਟਨਭੇਦਾਦਿਵਣ੍ਣਨਾ

੩੪੦. ਅਧਿਕਰਣਭੇਦੇ ਇਮੇ ਦਸ ਉਕ੍ਕੋਟਾਤਿ ਅਧਿਕਰਣਾਨਂ ਉਕ੍ਕੋਟੇਤ੍ਵਾ ਪੁਨ ਅਧਿਕਰਣਉਕ੍ਕੋਟੇਨ ਸਮਥਾਨਂ ਉਕ੍ਕੋਟਂ ਦਸ੍ਸੇਤੁਂ ‘‘ਵਿਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਕਤਿ ਸਮਥੇ ਉਕ੍ਕੋਟੇਤੀ’’ਤਿਆਦਿਮਾਹ. ਤਤ੍ਥ ਵਿਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਦ੍ਵੇ ਸਮਥੇ ਉਕ੍ਕੋਟੇਤੀਤਿ ਸਮ੍ਮੁਖਾਵਿਨਯਞ੍ਚ ਯੇਭੁਯ੍ਯਸਿਕਞ੍ਚ ਇਮੇ ਦ੍ਵੇ ਉਕ੍ਕੋਟੇਤਿ, ਪਟਿਸੇਧੇਤਿ; ਪਟਿਕ੍ਕੋਸਤੀਤਿ ਅਤ੍ਥੋ. ਅਨੁਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਚਤ੍ਤਾਰੋਤਿ ਸਮ੍ਮੁਖਾਵਿਨਯਂ, ਸਤਿਵਿਨਯਂ, ਅਮੂਲ਼੍ਹਵਿਨਯਂ, ਤਸ੍ਸਪਾਪਿਯਸਿਕਨ੍ਤਿ ਇਮੇ ਚਤ੍ਤਾਰੋ ਸਮਥੇ ਉਕ੍ਕੋਟੇਤਿ. ਆਪਤ੍ਤਾਧਿਕਰਣਂ ਉਕ੍ਕੋਟੇਨ੍ਤੋ ਤਯੋਤਿ ਸਮ੍ਮੁਖਾਵਿਨਯਂ, ਪਟਿਞ੍ਞਾਤਕਰਣਂ, ਤਿਣਵਤ੍ਥਾਰਕਨ੍ਤਿ ਇਮੇ ਤਯੋ ਸਮਥੇ ਉਕ੍ਕੋਟੇਤਿ. ਕਿਚ੍ਚਾਧਿਕਰਣਂ ਉਕ੍ਕੋਟੇਨ੍ਤੋ ਏਕਨ੍ਤਿ ਸਮ੍ਮੁਖਾਵਿਨਯਂ ਇਮਂ ਏਕਂ ਸਮਥਂ ਉਕ੍ਕੋਟੇਤਿ.

੩੪੧. ਕਤਿ ਉਕ੍ਕੋਟਾਤਿਆਦਿਪੁਚ੍ਛਾਨਂ ਵਿਸ੍ਸਜ੍ਜਨੇ ਪਨ ਦ੍ਵਾਦਸਸੁ ਉਕ੍ਕੋਟੇਸੁ ਅਕਤਂ ਕਮ੍ਮਨ੍ਤਿਆਦਯੋ ਤਾਵ ਤਯੋ ਉਕ੍ਕੋਟਾ ਵਿਸੇਸਤੋ ਦੁਤਿਯੇ ਅਨੁਵਾਦਾਧਿਕਰਣੇ ਲਬ੍ਭਨ੍ਤਿ. ਅਨਿਹਤਂ ਕਮ੍ਮਨ੍ਤਿਆਦਯੋ ਤਯੋ ਪਠਮੇ ਵਿਵਾਦਾਧਿਕਰਣੇ ਲਬ੍ਭਨ੍ਤਿ. ਅਵਿਨਿਚ੍ਛਿਤਨ੍ਤਿਆਦਯੋ ਤਯੋ ਤਤਿਯੇ ਆਪਤ੍ਤਾਧਿਕਰਣੇ ਲਬ੍ਭਨ੍ਤਿ. ਅਵੂਪਸਨ੍ਤਨ੍ਤਿਆਦਯੋ ਤਯੋ ਚਤੁਤ੍ਥੇ ਕਿਚ੍ਚਾਧਿਕਰਣੇ ਲਬ੍ਭਨ੍ਤਿ; ਅਪਿਚ ਦ੍ਵਾਦਸਾਪਿ ਚ ਏਕੇਕਸ੍ਮਿਂ ਅਧਿਕਰਣੇ ਲਬ੍ਭਨ੍ਤਿਯੇਵ.

ਤਤ੍ਥਜਾਤਕਂ ਅਧਿਕਰਣਂ ਉਕ੍ਕੋਟੇਤੀਤਿ ਯਸ੍ਮਿਂ ਵਿਹਾਰੇ ‘‘ਮਯ੍ਹਂ ਇਮਿਨਾ ਪਤ੍ਤੋ ਗਹਿਤੋ, ਚੀਵਰਂ ਗਹਿਤ’’ਨ੍ਤਿਆਦਿਨਾ ਨਯੇਨ ਪਤ੍ਤਚੀਵਰਾਦੀਨਂ ਅਤ੍ਥਾਯ ਅਧਿਕਰਣਂ ਉਪ੍ਪਨ੍ਨਂ ਹੋਤਿ, ਤਸ੍ਮਿਂਯੇਵ ਚ ਨਂ ਵਿਹਾਰੇ ਆਵਾਸਿਕਾ ਸਨ੍ਨਿਪਤਿਤ੍ਵਾ ‘‘ਅਲਂ ਆਵੁਸੋ’’ਤਿ ਅਤ੍ਤਪਚ੍ਚਤ੍ਥਿਕੇ ਸਞ੍ਞਾਪੇਤ੍ਵਾ ਪਾਲ਼ਿਮੁਤ੍ਤਕਵਿਨਿਚ੍ਛਯੇਨੇਵ ਵੂਪਸਮੇਨ੍ਤਿ, ਇਦਂ ਤਤ੍ਥਜਾਤਕਂ ਅਧਿਕਰਣਂ ਨਾਮ. ਯੇਨਾਪਿ ਵਿਨਿਚ੍ਛਯੇਨ ਸਮਿਤਂ, ਸੋਪਿ ਏਕੋ ਸਮਥੋਯੇਵ. ਇਮਂ ਉਕ੍ਕੋਟੇਨ੍ਤਸ੍ਸਾਪਿ ਪਾਚਿਤ੍ਤਿਯਂ.

ਤਤ੍ਥਜਾਤਕਂ ਵੂਪਸਨ੍ਤਨ੍ਤਿ ਸਚੇ ਪਨ ਤਂ ਅਧਿਕਰਣਂ ਨੇਵਾਸਿਕਾ ਵੂਪਸਮੇਤੁਂ ਨ ਸਕ੍ਕੋਨ੍ਤਿ, ਅਥਞ੍ਞੋ ਵਿਨਯਧਰੋ ਆਗਨ੍ਤ੍ਵਾ ‘‘ਕਿਂ ਆਵੁਸੋ ਇਮਸ੍ਮਿਂ ਵਿਹਾਰੇ ਉਪੋਸਥੋ ਵਾ ਪਵਾਰਣਾ ਵਾ ਠਿਤਾ’’ਤਿ ਪੁਚ੍ਛਤਿ, ਤੇਹਿ ਚ ਤਸ੍ਮਿਂ ਕਾਰਣੇ ਕਥਿਤੇ ਤਂ ਅਧਿਕਰਣਂ ਖਨ੍ਧਕਤੋ ਚ ਪਰਿਵਾਰਤੋ ਚ ਸੁਤ੍ਤੇਨ ਵਿਨਿਚ੍ਛਿਨਿਤ੍ਵਾ ਵੂਪਸਮੇਤਿ, ਇਦਂ ਤਤ੍ਥਜਾਤਕਂ ਵੂਪਸਨ੍ਤਂ ਨਾਮ ਅਧਿਕਰਣਂ. ਏਤਂ ਉਕ੍ਕੋਟੇਨ੍ਤਸ੍ਸਾਪਿ ਪਾਚਿਤ੍ਤਿਯਮੇਵ.

ਅਨ੍ਤਰਾਮਗ੍ਗੇਤਿ ਤੇ ਅਤ੍ਤਪਚ੍ਚਤ੍ਥਿਕਾ ‘‘ਨ ਮਯਂ ਏਤਸ੍ਸ ਵਿਨਿਚ੍ਛਯੇ ਤਿਟ੍ਠਾਮ, ਨਾਯਂ ਵਿਨਯੇ ਕੁਸਲੋ, ਅਸੁਕਸ੍ਮਿਂ ਨਾਮ ਗਾਮੇ ਵਿਨਯਧਰਾ ਥੇਰਾ ਵਸਨ੍ਤਿ, ਤਤ੍ਥ ਗਨ੍ਤ੍ਵਾ ਵਿਨਿਚ੍ਛਿਨਿਸ੍ਸਾਮਾ’’ਤਿ ਗਚ੍ਛਨ੍ਤਾ ਅਨ੍ਤਰਾਮਗ੍ਗੇਯੇਵ ਕਾਰਣਂ ਸਲ੍ਲਕ੍ਖੇਤ੍ਵਾ ਅਞ੍ਞਮਞ੍ਞਂ ਵਾ ਸਞ੍ਞਾਪੇਨ੍ਤਿ, ਅਞ੍ਞੇ ਵਾ ਤੇ ਭਿਕ੍ਖੂ ਨਿਜ੍ਝਾਪੇਨ੍ਤਿ, ਇਦਮ੍ਪਿ ਵੂਪਸਨ੍ਤਮੇਵ ਹੋਤਿ. ਏਵਂ ਵੂਪਸਨ੍ਤਂ ਅਨ੍ਤਰਾਮਗ੍ਗੇ ਅਧਿਕਰਣਂ ਉਕ੍ਕੋਟੇਤਿ ਯੋ, ਤਸ੍ਸਾਪਿ ਪਾਚਿਤ੍ਤਿਯਮੇਵ.

ਅਨ੍ਤਰਾਮਗ੍ਗੇ ਵੂਪਸਨ੍ਤਨ੍ਤਿ ਨ ਹੇਵ ਖੋ ਪਨ ਅਞ੍ਞਮਞ੍ਞਂ ਸਞ੍ਞਤ੍ਤਿਯਾ ਵਾ ਸਭਾਗਭਿਕ੍ਖੁਨਿਜ੍ਝਾਪਨੇਨ ਵਾ ਵੂਪਸਨ੍ਤਂ ਹੋਤਿ; ਅਪਿਚ ਖੋ ਪਟਿਪਥਂ ਆਗਚ੍ਛਨ੍ਤੋ ਏਕੋ ਵਿਨਯਧਰੋ ਦਿਸ੍ਵਾ ‘‘ਕਤ੍ਥ ਆਵੁਸੋ ਗਚ੍ਛਥਾ’’ਤਿ ਪੁਚ੍ਛਿਤ੍ਵਾ ‘‘ਅਸੁਕਂ ਨਾਮ ਗਾਮਂ, ਇਮਿਨਾ ਨਾਮ ਕਾਰਣੇਨਾ’’ਤਿ ਵੁਤ੍ਤੇ ‘‘ਅਲਂ, ਆਵੁਸੋ, ਕਿਂ ਤਤ੍ਥ ਗਤੇਨਾ’’ਤਿ ਤਤ੍ਥੇਵ ਧਮ੍ਮੇਨ ਵਿਨਯੇਨ ਤਂ ਅਧਿਕਰਣਂ ਵੂਪਸਮੇਤਿ, ਇਦਂ ਅਨ੍ਤਰਾਮਗ੍ਗੇ ਵੂਪਸਨ੍ਤਂ ਨਾਮ. ਏਤਂ ਉਕ੍ਕੋਟੇਨ੍ਤਸ੍ਸਾਪਿ ਪਾਚਿਤ੍ਤਿਯਮੇਵ.

ਤਤ੍ਥ ਗਤਨ੍ਤਿ ਸਚੇ ਪਨ ‘‘ਅਲਂ, ਆਵੁਸੋ, ਕਿਂ ਤਤ੍ਥ ਗਤੇਨਾ’’ਤਿ ਵੁਚ੍ਚਮਾਨਾਪਿ ‘‘ਮਯਂ ਤਤ੍ਥੇਵ ਗਨ੍ਤ੍ਵਾ ਵਿਨਿਚ੍ਛਯਂ ਪਾਪੇਸ੍ਸਾਮਾ’’ਤਿ ਵਿਨਯਧਰਸ੍ਸ ਵਚਨਂ ਅਨਾਦਿਯਿਤ੍ਵਾ ਗਚ੍ਛਨ੍ਤਿਯੇਵ, ਗਨ੍ਤ੍ਵਾ ਸਭਾਗਾਨਂ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਨ੍ਤਿ. ਸਭਾਗਾ ਭਿਕ੍ਖੂ ‘‘ਅਲਂ, ਆਵੁਸੋ, ਸਙ੍ਘਸਨ੍ਨਿਪਾਤਂ ਨਾਮ ਗਰੁਕ’’ਨ੍ਤਿ ਤਤ੍ਥੇਵ ਨਿਸੀਦਾਪੇਤ੍ਵਾ ਵਿਨਿਚ੍ਛਿਨਿਤ੍ਵਾ ਸਞ੍ਞਾਪੇਨ੍ਤਿ, ਇਦਮ੍ਪਿ ਵੂਪਸਨ੍ਤਮੇਵ ਹੋਤਿ. ਏਵਂ ਵੂਪਸਨ੍ਤਂ ਤਤ੍ਥ ਗਤਂ ਅਧਿਕਰਣਂ ਉਕ੍ਕੋਟੇਤਿ ਯੋ, ਤਸ੍ਸਾਪਿ ਪਾਚਿਤ੍ਤਿਯਮੇਵ.

ਤਤ੍ਥ ਗਤਂ ਵੂਪਸਨ੍ਤਨ੍ਤਿ ਨ ਹੇਵ ਖੋ ਪਨ ਸਭਾਗਭਿਕ੍ਖੂਨਂ ਸਞ੍ਞਤ੍ਤਿਯਾ ਵੂਪਸਨ੍ਤਂ ਹੋਤਿ; ਅਪਿਚ ਖੋ ਸਙ੍ਘਂ ਸਨ੍ਨਿਪਾਤੇਤ੍ਵਾ ਆਰੋਚਿਤਂ ਸਙ੍ਘਮਜ੍ਝੇ ਵਿਨਯਧਰਾ ਵੂਪਸਮੇਨ੍ਤਿ, ਇਦਂ ਤਤ੍ਥ ਗਤਂ ਵੂਪਸਨ੍ਤਂ ਨਾਮ. ਏਤਂ ਉਕ੍ਕੋਟੇਨ੍ਤਸ੍ਸਾਪਿ ਪਾਚਿਤ੍ਤਿਯਮੇਵ.

ਸਤਿਵਿਨਯਨ੍ਤਿ ਖੀਣਾਸਵਸ੍ਸ ਦਿਨ੍ਨਂ ਸਤਿਵਿਨਯਂ ਉਕ੍ਕੋਟੇਤਿ, ਪਾਚਿਤ੍ਤਿਯਮੇਵ. ਉਮ੍ਮਤ੍ਤਕਸ੍ਸ ਦਿਨ੍ਨੇ ਅਮੂਲ਼੍ਹਵਿਨਯੇ ਪਾਪੁਸ੍ਸਨ੍ਨਸ੍ਸ ਦਿਨ੍ਨਾਯ ਤਸ੍ਸਪਾਪਿਯਸਿਕਾਯਪਿ ਏਸੇਵ ਨਯੋ.

ਤਿਣਵਤ੍ਥਾਰਕਂ ਉਕ੍ਕੋਟੇਤੀਤਿ ਸਙ੍ਘੇਨ ਤਿਣਵਤ੍ਥਾਰਕਸਮਥੇਨ ਵੂਪਸਮਿਤੇ ਅਧਿਕਰਣੇ ‘‘ਆਪਤ੍ਤਿ ਨਾਮ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਦੇਸਿਯਮਾਨਾ ਵੁਟ੍ਠਾਤਿ, ਯਂ ਪਨੇਤਂ ਨਿਦ੍ਦਾਯਨ੍ਤਸ੍ਸਾਪਿ ਆਪਤ੍ਤਿਵੁਟ੍ਠਾਨਂ ਨਾਮ, ਏਤਂ ਮਯ੍ਹਂ ਨ ਖਮਤੀ’’ਤਿ ਏਵਂ ਵਦਨ੍ਤੋਪਿ ਤਿਣਵਤ੍ਥਾਰਕਂ ਉਕ੍ਕੋਟੇਤਿ ਨਾਮ, ਤਸ੍ਸਾਪਿ ਪਾਚਿਤ੍ਤਿਯਮੇਵ.

ਛਨ੍ਦਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤੀਤਿ ਵਿਨਯਧਰੋ ਹੁਤ੍ਵਾ ਅਤ੍ਤਨੋ ਉਪਜ੍ਝਾਯਾਦੀਨਂ ਅਤ੍ਥਾਯ ‘‘ਅਧਮ੍ਮਂ ਧਮ੍ਮੋ’’ਤਿਆਦੀਨਿ ਦੀਪੇਤ੍ਵਾ ਪੁਬ੍ਬੇ ਵਿਨਿਚ੍ਛਿਤਂ ਅਧਿਕਰਣਂ ਦ੍ਵਾਦਸਸੁ ਉਕ੍ਕੋਟੇਸੁ ਯੇਨ ਕੇਨਚਿ ਉਕ੍ਕੋਟੇਨ੍ਤੋ ਛਨ੍ਦਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ ਨਾਮ. ਦ੍ਵੀਸੁ ਪਨ ਅਤ੍ਤਪਚ੍ਚਤ੍ਥਿਕੇਸੁ ਏਕਸ੍ਮਿਂ ‘‘ਅਨਤ੍ਥਂ ਮੇ ਅਚਰੀ’’ਤਿਆਦਿਨਾ ਨਯੇਨ ਸਮੁਪ੍ਪਨ੍ਨਾਘਾਤੋ, ਤਸ੍ਸ ਪਰਾਜਯਂ ਆਰੋਪਨਤ੍ਥਂ ‘‘ਅਧਮ੍ਮਂ ਧਮ੍ਮੋ’’ਤਿਆਦੀਨਿ ਦੀਪੇਤ੍ਵਾ ਪੁਬ੍ਬੇ ਵਿਨਿਚ੍ਛਿਤਂ ਅਧਿਕਰਣਂ ਦ੍ਵਾਦਸਸੁ ਉਕ੍ਕੋਟੇਸੁ ਯੇਨ ਕੇਨਚਿ ਉਕ੍ਕੋਟੇਨ੍ਤੋ ਦੋਸਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ ਨਾਮ. ਮਨ੍ਦੋ ਪਨ ਮੋਮੂਹੋ ਮੋਮੂਹਤ੍ਤਾ ਏਵ ‘‘ਅਧਮ੍ਮਂ ਧਮ੍ਮੋ’’ਤਿਆਦੀਨਿ ਦੀਪੇਤ੍ਵਾ ਵੁਤ੍ਤਨਯੇਨੇਵ ਉਕ੍ਕੋਟੇਨ੍ਤੋ ਮੋਹਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ ਨਾਮ. ਸਚੇ ਪਨ ਦ੍ਵੀਸੁ ਅਤ੍ਤਪਚ੍ਚਤ੍ਥਿਕੇਸੁ ਏਕੋ ਵਿਸਮਾਨਿ ਕਾਯਕਮ੍ਮਾਦੀਨਿ ਗਹਨਮਿਚ੍ਛਾਦਿਟ੍ਠਿਂ ਬਲਵਨ੍ਤੇ ਚ ਪਕ੍ਖਨ੍ਤਰਿਯੇ ਅਭਿਞ੍ਞਾਤੇ ਭਿਕ੍ਖੂ ਨਿਸ੍ਸਿਤਤ੍ਤਾ ਵਿਸਮਨਿਸ੍ਸਿਤੋ ਗਹਨਨਿਸ੍ਸਿਤੋ ਬਲਵਨਿਸ੍ਸਿਤੋ ਚ ਹੋਤਿ, ਤਸ੍ਸ ਭਯੇਨ ‘‘ਅਯਂ ਮੇ ਜੀਵਿਤਨ੍ਤਰਾਯਂ ਵਾ ਬ੍ਰਹ੍ਮਚਰਿਯਨ੍ਤਰਾਯਂ ਵਾ ਕਰੇਯ੍ਯਾ’’ਤਿ ‘‘ਅਧਮ੍ਮਂ ਧਮ੍ਮੋ’’ਤਿਆਦੀਨਿ ਦੀਪੇਤ੍ਵਾ ਵੁਤ੍ਤਨਯੇਨੇਵ ਉਕ੍ਕੋਟੇਨ੍ਤੋ ਭਯਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ ਨਾਮ.

ਤਦਹੁਪਸਮ੍ਪਨ੍ਨੋਤਿ ਏਕੋ ਸਾਮਣੇਰੋ ਬ੍ਯਤ੍ਤੋ ਹੋਤਿ ਬਹੁਸ੍ਸੁਤੋ, ਸੋ ਵਿਨਿਚ੍ਛਯੇ ਪਰਾਜਯਂ ਪਤ੍ਵਾ ਮਙ੍ਕੁਭੂਤੇ ਭਿਕ੍ਖੂ ਦਿਸ੍ਵਾ ਪੁਚ੍ਛਤਿ ‘‘ਕਸ੍ਮਾ ਮਙ੍ਕੁਭੂਤਾਤ੍ਥਾ’’ਤਿ? ਤੇ ਤਸ੍ਸ ਤਂ ਅਧਿਕਰਣਂ ਆਰੋਚੇਨ੍ਤਿ. ਸੋ ਤੇ ਏਵਂ ਵਦੇਤਿ ‘‘ਹੋਤੁ, ਭਨ੍ਤੇ, ਮਂ ਉਪਸਮ੍ਪਾਦੇਥ, ਅਹਂ ਤਂ ਅਧਿਕਰਣਂ ਵੂਪਸਮੇਸ੍ਸਾਮੀ’’ਤਿ. ਤੇ ਤਂ ਉਪਸਮ੍ਪਾਦੇਨ੍ਤਿ. ਸੋ ਦੁਤਿਯਦਿਵਸੇ ਭੇਰਿਂ ਪਹਰਿਤ੍ਵਾ ਸਙ੍ਘਂ ਸਨ੍ਨਿਪਾਤੇਤਿ. ਤਤੋ ਭਿਕ੍ਖੂਹਿ ‘‘ਕੇਨ ਸਙ੍ਘੋ ਸਨ੍ਨਿਪਾਤਿਤੋ’’ਤਿ ਵੁਤ੍ਤੇ ‘‘ਮਯਾ’’ਤਿ ਵਦਤਿ. ‘‘ਕਸ੍ਮਾ ਸਨ੍ਨਿਪਾਤਿਤੋ’’ਤਿ? ‘‘ਹਿਯ੍ਯੋ ਅਧਿਕਰਣਂ ਦੁਬ੍ਬਿਨਿਚ੍ਛਿਤਂ, ਤਮਹਂ ਵਿਨਿਚ੍ਛਿਨਿਸ੍ਸਾਮੀ’’ਤਿ. ‘‘ਤ੍ਵਂ ਪਨ ਹਿਯ੍ਯੋ ਕੁਹਿਂ ਗਤੋ’’ਤਿ? ‘‘ਅਨੁਪਸਮ੍ਪਨ੍ਨੋਮ੍ਹਿ, ਭਨ੍ਤੇ, ਅਜ੍ਜ ਪਨ ਉਪਸਮ੍ਪਨ੍ਨੋਮ੍ਹੀ’’ਤਿ. ਸੋ ਵਤ੍ਤਬ੍ਬੋ ‘‘ਇਦਂ ਆਵੁਸੋ ਤੁਮ੍ਹਾਦਿਸਾਨਂ ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ, ‘ਤਦਹੁਪਸਮ੍ਪਨ੍ਨੋ ਉਕ੍ਕੋਟੇਤਿ, ਉਕ੍ਕੋਟਨਕਂ ਪਾਚਿਤ੍ਤਿਯ’ਨ੍ਤਿ, ਗਚ੍ਛ ਆਪਤ੍ਤਿਂ ਦੇਸੇਹੀ’’ਤਿ. ਆਗਨ੍ਤੁਕੇਪਿ ਏਸੇਵ ਨਯੋ.

ਕਾਰਕੋਤਿ ਏਕਂ ਸਙ੍ਘੇਨ ਸਦ੍ਧਿਂ ਅਧਿਕਰਣਂ ਵਿਨਿਚ੍ਛਿਨਿਤ੍ਵਾ ਪਰਿਵੇਣਗਤਂ ਪਰਾਜਿਤਾ ਭਿਕ੍ਖੂ ਵਦਨ੍ਤਿ ‘‘ਕਿਸ੍ਸ, ਭਨ੍ਤੇ, ਤੁਮ੍ਹੇਹਿ ਏਵਂ ਵਿਨਿਚ੍ਛਿਤਂ ਅਧਿਕਰਣਂ, ਨਨੁ ਏਵਂ ਵਿਨਿਚ੍ਛਿਨਿਤਬ੍ਬ’’ਨ੍ਤਿ. ਸੋ ‘‘ਕਸ੍ਮਾ ਪਠਮਂਯੇਵ ਏਵਂ ਨ ਵਦਿਤ੍ਥਾ’’ਤਿ ਤਂ ਅਧਿਕਰਣਂ ਉਕ੍ਕੋਟੇਤਿ. ਏਵਂ ਯੋ ਕਾਰਕੋ ਉਕ੍ਕੋਟੇਤਿ, ਤਸ੍ਸਾਪਿ ਉਕ੍ਕੋਟਨਕਂ ਪਾਚਿਤ੍ਤਿਯਂ. ਛਨ੍ਦਦਾਯਕੋਤਿ ਏਕੋ ਅਧਿਕਰਣਵਿਨਿਚ੍ਛਯੇ ਛਨ੍ਦਂ ਦਤ੍ਵਾ ਸਭਾਗੇ ਭਿਕ੍ਖੂ ਪਰਾਜਯਂ ਪਤ੍ਵਾ ਆਗਤੇ ਮਙ੍ਕੁਭੂਤੇ ਦਿਸ੍ਵਾ ‘‘ਸ੍ਵੇ ਦਾਨਿ ਅਹਂ ਵਿਨਿਚ੍ਛਿਨਿਸ੍ਸਾਮੀ’’ਤਿ ਸਙ੍ਘਂ ਸਨ੍ਨਿਪਾਤੇਤ੍ਵਾ ‘‘ਕਸ੍ਮਾ ਸਨ੍ਨਿਪਾਤੇਸੀ’’ਤਿ ਵੁਤ੍ਤੇ ‘‘ਹਿਯ੍ਯੋ ਅਧਿਕਰਣਂ ਦੁਬ੍ਬਿਨਿਚ੍ਛਿਤਂ, ਤਮਹਂ ਅਜ੍ਜ ਵਿਨਿਚ੍ਛਿਨਿਸ੍ਸਾਮੀ’’ਤਿ. ‘‘ਹਿਯ੍ਯੋ ਪਨ ਤ੍ਵਂ ਕਤ੍ਥ ਗਤੋ’’ਤਿ. ‘‘ਛਨ੍ਦਂ ਦਤ੍ਵਾ ਨਿਸਿਨ੍ਨੋਮ੍ਹੀ’’ਤਿ. ਸੋ ਵਤ੍ਤਬ੍ਬੋ ‘‘ਇਦਂ ਆਵੁਸੋ ਤੁਮ੍ਹਾਦਿਸਾਨਂ ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ, ‘ਛਨ੍ਦਦਾਯਕੋ ਉਕ੍ਕੋਟੇਤਿ, ਉਕ੍ਕੋਟਨਕਂ ਪਾਚਿਤ੍ਤਿਯ’ਨ੍ਤਿ, ਗਚ੍ਛ ਆਪਤ੍ਤਿਂ ਦੇਸੇਹੀ’’ਤਿ.

ਅਧਿਕਰਣਨਿਦਾਨਾਦਿਵਣ੍ਣਨਾ

੩੪੨. ਵਿਵਾਦਾਧਿਕਰਣਂ ਕਿਂਨਿਦਾਨਨ੍ਤਿਆਦੀਸੁ ਕਿਂ ਨਿਦਾਨਮਸ੍ਸਾਤਿ ਕਿਂਨਿਦਾਨਂ. ਕੋ ਸਮੁਦਯੋ ਅਸ੍ਸਾਤਿ ਕਿਂਸਮੁਦਯਂ. ਕਾ ਜਾਤਿ ਅਸ੍ਸਾਤਿ ਕਿਂਜਾਤਿਕਂ. ਕੋ ਪਭਵੋ ਅਸ੍ਸਾਤਿ ਕਿਂਪਭਵਂ. ਕੋ ਸਮ੍ਭਾਰੋ ਅਸ੍ਸਾਤਿ ਕਿਂਸਮ੍ਭਾਰਂ. ਕਿਂ ਸਮੁਟ੍ਠਾਨਂ ਅਸ੍ਸਾਤਿ ਕਿਂਸਮੁਟ੍ਠਾਨਂ. ਸਬ੍ਬਾਨੇਤਾਨਿ ਕਾਰਣਵੇਵਚਨਾਨਿਯੇਵ.

ਵਿਵਾਦਨਿਦਾਨਨ੍ਤਿਆਦੀਸੁਪਿ ਅਟ੍ਠਾਰਸਭੇਦਕਰਵਤ੍ਥੁਸਙ੍ਖਾਤੋ ਵਿਵਾਦੋ ਨਿਦਾਨਮੇਤਸ੍ਸਾਤਿ ਵਿਵਾਦਨਿਦਾਨਂ. ਵਿਵਾਦਂ ਨਿਸ੍ਸਾਯ ਉਪ੍ਪਜ੍ਜਨਕਵਿਵਾਦਵਸੇਨੇਤਂ ਵੁਤ੍ਤਂ. ਅਨੁਵਾਦੋ ਨਿਦਾਨਂ ਅਸ੍ਸਾਤਿ ਅਨੁਵਾਦਨਿਦਾਨਂ. ਇਦਮ੍ਪਿ ਅਨੁਵਾਦਂ ਨਿਸ੍ਸਾਯ ਉਪ੍ਪਜ੍ਜਨਕਅਨੁਵਾਦਵਸੇਨ ਵੁਤ੍ਤਂ. ਆਪਤ੍ਤਿ ਨਿਦਾਨਂ ਅਸ੍ਸਾਤਿ ਆਪਤ੍ਤਿਨਿਦਾਨਂ. ਆਪਤ੍ਤਾਧਿਕਰਣਪਚ੍ਚਯਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤੀਤਿ ਏਵਂ ਆਪਤ੍ਤਿਂ ਨਿਸ੍ਸਾਯ ਉਪ੍ਪਜ੍ਜਨਕਆਪਤ੍ਤਿਵਸੇਨੇਤਂ ਵੁਤ੍ਤਂ. ਕਿਚ੍ਚਯਂ ਨਿਦਾਨਮਸ੍ਸਾਤਿ ਕਿਚ੍ਚਯਨਿਦਾਨਂ; ਚਤੁਬ੍ਬਿਧਂ ਸਙ੍ਘਕਮ੍ਮਂ ਕਾਰਣਮਸ੍ਸਾਤਿ ਅਤ੍ਥੋ. ਉਕ੍ਖਿਤ੍ਤਾਨੁਵਤ੍ਤਿਕਾਯ ਭਿਕ੍ਖੁਨਿਯਾ ਯਾਵਤਤਿਯਂ ਸਮਨੁਭਾਸਨਾਦੀਨਂ ਕਿਚ੍ਚਂ ਨਿਸ੍ਸਾਯ ਉਪ੍ਪਜ੍ਜਨਕਕਿਚ੍ਚਾਨਂ ਵਸੇਨੇਤਂ ਵੁਤ੍ਤਂ. ਅਯਂ ਚਤੁਨ੍ਨਮ੍ਪਿ ਅਧਿਕਰਣਾਨਂ ਵਿਸ੍ਸਜ੍ਜਨਪਕ੍ਖੇ ਏਕਪਦਯੋਜਨਾ. ਏਤੇਨਾਨੁਸਾਰੇਨ ਸਬ੍ਬਪਦਾਨਿ ਯੋਜੇਤਬ੍ਬਾਨਿ.

ਦੁਤਿਯਪੁਚ੍ਛਾਯ ਹੇਤੁਨਿਦਾਨਨ੍ਤਿਆਦਿਮ੍ਹਿ ਵਿਸ੍ਸਜ੍ਜਨੇ ਨਵਨ੍ਨਂ ਕੁਸਲਾਕੁਸਲਾਬ੍ਯਾਕਤਹੇਤੂਨਂ ਵਸੇਨ ਹੇਤੁਨਿਦਾਨਾਦਿਤਾ ਵੇਦਿਤਬ੍ਬਾ. ਤਤਿਯਪੁਚ੍ਛਾਯ ਵਿਸ੍ਸਜ੍ਜਨੇ ਬ੍ਯਞ੍ਜਨਮਤ੍ਤਂ ਨਾਨਂ. ਹੇਤੁਯੇਵ ਹਿ ਏਤ੍ਥ ਪਚ੍ਚਯੋਤਿ ਵੁਤ੍ਤੋ.

੩੪੩. ਮੂਲਪੁਚ੍ਛਾਯ ਵਿਸ੍ਸਜ੍ਜਨੇ ਦ੍ਵਾਦਸ ਮੂਲਾਨੀਤਿ ਕੋਧਉਪਨਾਹਯੁਗਲ਼ਕਾਦੀਨਿ ਛ ਵਿਵਾਦਾਮੂਲਾਨਿ, ਲੋਭਦੋਸਮੋਹਾ ਤਯੋ, ਅਲੋਭਾਦੋਸਾਮੋਹਾ ਤਯੋਤਿ ਇਮਾਨਿ ਅਜ੍ਝਤ੍ਤਸਨ੍ਤਾਨਪ੍ਪਵਤ੍ਤਾਨਿ ਦ੍ਵਾਦਸ ਮੂਲਾਨਿ. ਚੁਦ੍ਦਸ ਮੂਲਾਨੀਤਿ ਤਾਨੇਵ ਦ੍ਵਾਦਸ ਕਾਯਵਾਚਾਹਿ ਸਦ੍ਧਿਂ ਚੁਦ੍ਦਸ ਹੋਨ੍ਤਿ. ਛ ਮੂਲਾਨੀਤਿ ਕਾਯਾਦੀਨਿ ਛ ਸਮੁਟ੍ਠਾਨਾਨਿ.

ਸਮੁਟ੍ਠਾਨਪੁਚ੍ਛਾਯ ਵਿਸ੍ਸਜ੍ਜਨੇ ਅਟ੍ਠਾਰਸ ਭੇਦਕਰਵਤ੍ਥੂਨਿ ਸਮੁਟ੍ਠਾਨਾਨਿ, ਤਞ੍ਹਿ ਏਤੇਸੁ ਅਟ੍ਠਾਰਸਸੁ ਭੇਦਕਰਵਤ੍ਥੂਸੁ ਸਮੁਟ੍ਠਾਤਿ, ਏਤੇਹਿ ਵਾ ਕਾਰਣਭੂਤੇਹਿ ਸਮੁਟ੍ਠਾਤਿ. ਤੇਨਸ੍ਸੇਤਾਨਿ ਸਮੁਟ੍ਠਾਨਾਨਿ ਵੁਚ੍ਚਨ੍ਤਿ. ਏਸ ਨਯੋ ਸਬ੍ਬਤ੍ਥ.

੩੪੪. ਵਿਵਾਦਾਧਿਕਰਣਂ ਆਪਤ੍ਤੀਤਿਆਦਿਭੇਦੇ ਏਕੇਨ ਅਧਿਕਰਣੇਨ ਕਿਚ੍ਚਾਧਿਕਰਣੇਨਾਤਿ ਇਦਂ ਯੇਨ ਅਧਿਕਰਣੇਨ ਸਮ੍ਮਨ੍ਤਿ, ਤਂ ਦਸ੍ਸੇਤੁਂ ਵੁਤ੍ਤਂ, ਨ ਪਨੇਤਾਨਿ ਏਕਂਸਤੋ ਕਿਚ੍ਚਾਧਿਕਰਣੇਨੇਵ ਸਮ੍ਮਨ੍ਤਿ. ਨ ਹਿ ਪੁਗ੍ਗਲਸ੍ਸ ਸਨ੍ਤਿਕੇ ਦੇਸੇਨ੍ਤਸ੍ਸ ਕਿਚ੍ਚਾਧਿਕਰਣਂ ਨਾਮ ਅਤ੍ਥਿ.

ਨ ਕਤਮੇਨ ਸਮਥੇਨਾਤਿ ਸਾਵਸੇਸਾਪਤ੍ਤਿ ਵਿਯ ਨ ਸਮ੍ਮਤਿ. ਨ ਹਿ ਸਕ੍ਕਾ ਸਾ ਦੇਸੇਤੁਂ, ਨ ਤਤੋ ਵੁਟ੍ਠਾਯ ਸੁਦ੍ਧਨ੍ਤੇ ਪਤਿਟ੍ਠਾਤੁਂ.

੩੪੮. ਵਿਵਾਦਾਧਿਕਰਣਂ ਹੋਤਿ ਅਨੁਵਾਦਾਧਿਕਰਣਨ੍ਤਿਆਦਿ ਨਯੋ ਉਤ੍ਤਾਨੋਯੇਵ.

੩੪੯. ਤਤੋ ਪਰਂ ਯਤ੍ਥ ਸਤਿਵਿਨਯੋਤਿਆਦਿਕਾ ਸਮ੍ਮੁਖਾਵਿਨਯਂ ਅਮੁਞ੍ਚਿਤ੍ਵਾ ਛ ਯਮਕਪੁਚ੍ਛਾ ਵੁਤ੍ਤਾ, ਤਾਸਂ ਵਿਸ੍ਸਜ੍ਜਨੇਨੇਵ ਅਤ੍ਥੋ ਪਕਾਸਿਤੋ.

੩੫੧. ਸਂਸਟ੍ਠਾਦਿਪੁਚ੍ਛਾਨਂ ਵਿਸ੍ਸਜ੍ਜਨੇ ਸਂਸਟ੍ਠਾਤਿ ਸਤਿਵਿਨਯਕਮ੍ਮਵਾਚਾਕ੍ਖਣਸ੍ਮਿਂਯੇਵ ਦ੍ਵਿਨ੍ਨਮ੍ਪਿ ਸਮਥਾਨਂ ਸਿਦ੍ਧਤ੍ਤਾ ਸਮ੍ਮੁਖਾਵਿਨਯੋਤਿ ਵਾ ਸਤਿਵਿਨਯੋਤਿ ਵਾ ਇਮੇ ਧਮ੍ਮਾ ਸਂਸਟ੍ਠਾ, ਨੋ ਵਿਸਂਸਟ੍ਠਾ. ਯਸ੍ਮਾ ਪਨ ਕਦਲਿਕ੍ਖਨ੍ਧੇ ਪਤ੍ਤਵਟ੍ਟੀਨਂ ਵਿਯ ਨ ਸਕ੍ਕਾ ਤੇਸਂ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਦਸ੍ਸੇਤੁਂ, ਤੇਨ ਵੁਤ੍ਤਂ ‘‘ਨ ਚ ਲਬ੍ਭਾ ਇਮੇਸਂ ਧਮ੍ਮਾਨਂ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁ’’ਨ੍ਤਿ. ਏਸ ਨਯੋ ਸਬ੍ਬਤ੍ਥ.

ਸਤ੍ਤਸਮਥਨਿਦਾਨਵਣ੍ਣਨਾ

੩੫੨. ਕਿਂਨਿਦਾਨੋਤਿ ਪੁਚ੍ਛਾਵਿਸ੍ਸਜ੍ਜਨੇ ਨਿਦਾਨਂ ਨਿਦਾਨਮਸ੍ਸਾਤਿ ਨਿਦਾਨਨਿਦਾਨੋ. ਤਤ੍ਥ ਸਙ੍ਘਸਮ੍ਮੁਖਤਾ, ਧਮ੍ਮਸਮ੍ਮੁਖਤਾ, ਵਿਨਯਸਮ੍ਮੁਖਤਾ, ਪੁਗ੍ਗਲਸਮ੍ਮੁਖਤਾਤਿ ਇਦਂ ਸਮ੍ਮੁਖਾਵਿਨਯਸ੍ਸ ਨਿਦਾਨਂ. ਸਤਿਵੇਪੁਲ੍ਲਪਤ੍ਤੋ ਖੀਣਾਸਵੋ ਲਦ੍ਧੁਪਵਾਦੋ ਸਤਿਵਿਨਯਸ੍ਸ ਨਿਦਾਨਂ. ਉਮ੍ਮਤ੍ਤਕੋ ਭਿਕ੍ਖੁ ਅਮੂਲ਼੍ਹਵਿਨਯਸ੍ਸ ਨਿਦਾਨਂ. ਯੋ ਚ ਦੇਸੇਤਿ, ਯਸ੍ਸ ਚ ਦੇਸੇਤਿ, ਉਭਿਨ੍ਨਂ ਸਮ੍ਮੁਖੀਭਾਵੋ ਪਟਿਞ੍ਞਾਤਕਰਣਸ੍ਸ ਨਿਦਾਨਂ. ਭਣ੍ਡਨਜਾਤਾਨਂ ਅਧਿਕਰਣਂ ਵੂਪਸਮੇਤੁਂ ਅਸਕ੍ਕੁਣੇਯ੍ਯਤਾ ਯੇਭੁਯ੍ਯਸਿਕਾਯ ਨਿਦਾਨਂ. ਪਾਪੁਸ੍ਸਨ੍ਨੋ ਪੁਗ੍ਗਲੋ ਤਸ੍ਸਪਾਪਿਯਸਿਕਾਯ ਨਿਦਾਨਂ. ਭਣ੍ਡਨਜਾਤਾਨਂ ਬਹੁ ਅਸ੍ਸਾਮਣਕਅਜ੍ਝਾਚਾਰੋ ਤਿਣਵਤ੍ਥਾਰਕਸ੍ਸ ਨਿਦਾਨਂ. ਹੇਤੁਪਚ੍ਚਯਵਾਰਾ ਵੁਤ੍ਤਨਯਾ ਏਵ.

੩੫੩. ਮੂਲਪੁਚ੍ਛਾਯ ਵਿਸ੍ਸਜ੍ਜਨਂ ਉਤ੍ਤਾਨਮੇਵ. ਸਮੁਟ੍ਠਾਨਪੁਚ੍ਛਾਯ ਕਿਞ੍ਚਾਪਿ ‘‘ਸਤ੍ਤਨ੍ਨਂ ਸਮਥਾਨਂ ਕਤਮੇ ਛਤ੍ਤਿਂਸ ਸਮੁਟ੍ਠਾਨਾ’’ਤਿ ਵੁਤ੍ਤਂ, ਸਮ੍ਮੁਖਾਵਿਨਯਸ੍ਸ ਪਨ ਕਮ੍ਮਸਙ੍ਗਹਾਭਾਵੇਨ ਸਮੁਟ੍ਠਾਨਾਭਾਵਤੋ ਛਨ੍ਨਂਯੇਵ ਸਮਥਾਨਂ ਛ ਸਮੁਟ੍ਠਾਨਾਨਿ ਵਿਭਤ੍ਤਾਨਿ. ਤਤ੍ਥ ਕਮ੍ਮਸ੍ਸ ਕਿਰਿਯਾਤਿ ਞਤ੍ਤਿ ਵੇਦਿਤਬ੍ਬਾ. ਕਰਣਨ੍ਤਿ ਤਸ੍ਸਾਯੇਵ ਞਤ੍ਤਿਯਾ ਠਪੇਤਬ੍ਬਕਾਲੇ ਠਪਨਂ. ਉਪਗਮਨਨ੍ਤਿ ਸਯਂ ਉਪਗਮਨਂ; ਅਤ੍ਤਨਾਯੇਵ ਤਸ੍ਸ ਕਮ੍ਮਸ੍ਸ ਕਰਣਨ੍ਤਿ ਅਤ੍ਥੋ. ਅਜ੍ਝੁਪਗਮਨਨ੍ਤਿ ਅਜ੍ਝੇਸਨੁਪਗਮਨਂ; ਅਞ੍ਞਂ ਸਦ੍ਧਿਵਿਹਾਰਿਕਾਦਿਕਂ ‘‘ਇਦਂ ਕਮ੍ਮਂ ਕਰੋਹੀ’’ਤਿ ਅਜ੍ਝੇਸਨਨ੍ਤਿ ਅਤ੍ਥੋ. ਅਧਿਵਾਸਨਾਤਿ ‘‘ਰੁਚ੍ਚਤਿ ਮੇ ਏਤਂ, ਕਰੋਤੁ ਸਙ੍ਘੋ’’ਤਿ ਏਵਂ ਅਧਿਵਾਸਨਾ; ਛਨ੍ਦਦਾਨਨ੍ਤਿ ਅਤ੍ਥੋ. ਅਪ੍ਪਟਿਕ੍ਕੋਸਨਾਤਿ ‘‘ਨ ਮੇਤਂ ਖਮਤਿ, ਮਾ ਏਵਂ ਕਰੋਥਾ’’ਤਿ ਅਪ੍ਪਟਿਸੇਧਨਾ. ਇਤਿ ਛਨ੍ਨਂ ਛਕ੍ਕਾਨਂ ਵਸੇਨ ਛਤ੍ਤਿਂਸ ਸਮੁਟ੍ਠਾਨਾ ਵੇਦਿਤਬ੍ਬਾ.

ਸਤ੍ਤਸਮਥਨਾਨਾਤ੍ਥਾਦਿਵਣ੍ਣਨਾ

੩੫੪. ਨਾਨਾਤ੍ਥਪੁਚ੍ਛਾਵਿਸ੍ਸਜ੍ਜਨਂ ਉਤ੍ਤਾਨਮੇਵ. ਅਧਿਕਰਣਪੁਚ੍ਛਾਵਿਸ੍ਸਜ੍ਜਨੇ ਅਯਂ ਵਿਵਾਦੋ ਨੋ ਅਧਿਕਰਣਨ੍ਤਿ ਅਯਂ ਮਾਤਾਪੁਤ੍ਤਾਦੀਨਂ ਵਿਵਾਦੋ ਵਿਰੁਦ੍ਧਵਾਦਤ੍ਤਾ ਵਿਵਾਦੋ ਨਾਮ ਹੋਤਿ, ਸਮਥੇਹਿ ਪਨ ਅਧਿਕਰਣੀਯਤਾਯ ਅਭਾਵਤੋ ਅਧਿਕਰਣਂ ਨ ਹੋਤਿ. ਅਨੁਵਾਦਾਦੀਸੁਪਿ ਏਸੇਵ ਨਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਅਧਿਕਰਣਭੇਦਵਣ੍ਣਨਾ ਨਿਟ੍ਠਿਤਾ.