ਉਪੋਸਥਾਦਿਪੁਚ੍ਛਾਵਿਸ੍ਸਜ੍ਜਨਾ

੩੩੨. ‘‘ਉਪੋਸਥਕਮ੍ਮਸ੍ਸ ਕੋ ਆਦੀ’’ਤਿਆਦੀਨਂ ਪੁਚ੍ਛਾਨਂ ਵਿਸ੍ਸਜ੍ਜਨੇ ਸਾਮਗ੍ਗੀ ਆਦੀਤਿ ‘‘ਉਪੋਸਥਂ ਕਰਿਸ੍ਸਾਮਾ’’ਤਿ ਸੀਮਂ ਸੋਧੇਤ੍ਵਾ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਸਨ੍ਨਿਪਤਿਤਾਨਂ ਕਾਯਸਾਮਗ੍ਗੀ ਆਦਿ. ਕਿਰਿਯਾ ਮਜ੍ਝੇਤਿ ਪੁਬ੍ਬਕਿਚ੍ਚਂ ਕਤ੍ਵਾ ਪਾਤਿਮੋਕ੍ਖਓਸਾਰਣਕਿਰਿਯਾ ਮਜ੍ਝੇ. ਨਿਟ੍ਠਾਨਂ ਪਰਿਯੋਸਾਨਨ੍ਤਿ ‘‘ਤਤ੍ਥ ਸਬ੍ਬੇਹੇਵ ਸਮਗ੍ਗੇਹਿ ਸਮ੍ਮੋਦਮਾਨੇਹਿ ਅਵਿਵਦਮਾਨੇਹਿ ਸਿਕ੍ਖਿਤਬ੍ਬ’’ਨ੍ਤਿ ਇਦਂ ਪਾਤਿਮੋਕ੍ਖਨਿਟ੍ਠਾਨਂ ਪਰਿਯੋਸਾਨਂ. ਪਵਾਰਣਾਕਮ੍ਮਸ੍ਸ ਸਾਮਗ੍ਗੀ ਆਦੀਤਿ ‘‘ਪਵਾਰਣਂ ਕਰਿਸ੍ਸਾਮਾ’’ਤਿ ਸੀਮਂ ਸੋਧੇਤ੍ਵਾ ਛਨ੍ਦਪਵਾਰਣਂ ਆਹਰਿਤ੍ਵਾ ਸਨ੍ਨਿਪਤਿਤਾਨਂ ਕਾਯਸਾਮਗ੍ਗੀ ਆਦਿ. ਕਿਰਿਯਾ ਮਜ੍ਝੇਤਿ ਪਵਾਰਣਾਞਤ੍ਤਿ ਚ ਪਵਾਰਣਾਕਥਾ ਚ ਮਜ੍ਝੇ, ਸਙ੍ਘਨਵਕਸ੍ਸ ‘‘ਪਸ੍ਸਨ੍ਤੋ ਪਟਿਕਰਿਸ੍ਸਾਮੀ’’ਤਿ ਵਚਨਂ ਪਰਿਯੋਸਾਨਂ. ਤਜ੍ਜਨੀਯਕਮ੍ਮਾਦੀਸੁ ਵਤ੍ਥੁ ਨਾਮ ਯੇਨ ਵਤ੍ਥੁਨਾ ਕਮ੍ਮਾਰਹੋ ਹੋਤਿ, ਤਂ ਵਤ੍ਥੁ. ਪੁਗ੍ਗਲੋਤਿ ਯੇਨ ਤਂ ਵਤ੍ਥੁ ਕਤਂ, ਸੋ ਪੁਗ੍ਗਲੋ. ਕਮ੍ਮਵਾਚਾ ਪਰਿਯੋਸਾਨਨ੍ਤਿ ‘‘ਕਤਂ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ ਏਵਂ ਤਸ੍ਸਾ ਤਸ੍ਸਾ ਕਮ੍ਮਵਾਚਾਯ ਅਵਸਾਨਵਚਨਂ ਪਰਿਯੋਸਾਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ

ਉਪੋਸਥਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ ਨਿਟ੍ਠਿਤਾ.

ਅਤ੍ਥਵਸਪਕਰਣਾਵਣ੍ਣਨਾ

੩੩੪. ਅਤ੍ਥਵਸਪਕਰਣੇ – ਦਸ ਅਤ੍ਥਵਸੇਤਿਆਦੀਸੁ ਯਂ ਵਤ੍ਤਬ੍ਬਂ ਤਂ ਪਠਮਪਾਰਾਜਿਕਵਣ੍ਣਨਾਯਮੇਵ ਵੁਤ੍ਤਂ. ਯਂ ਸਙ੍ਘਸੁਟ੍ਠੁ ਤਂ ਸਙ੍ਘਫਾਸੂਤਿਆਦੀਸੁ ਉਪਰਿਮਂ ਉਪਰਿਮਂ ਪਦਂ ਹੇਟ੍ਠਿਮਸ੍ਸ ਹੇਟ੍ਠਿਮਸ੍ਸ ਪਦਸ੍ਸ ਅਤ੍ਥੋ.

ਅਤ੍ਥਸਤਂ ਧਮ੍ਮਸਤਨ੍ਤਿਆਦਿਮ੍ਹਿ ਪਨ ਯਦੇਤਂ ਦਸਸੁ ਪਦੇਸੁ ਏਕੇਕਂ ਮੂਲਂ ਕਤ੍ਵਾ ਦਸਕ੍ਖਤ੍ਤੁਂ ਯੋਜਨਾਯ ਪਦਸਤਂ ਵੁਤ੍ਤਂ. ਤਤ੍ਥ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਪਦਸ੍ਸ ਵਸੇਨ ਅਤ੍ਥਸਤਂ ਪੁਰਿਮਸ੍ਸ ਪੁਰਿਮਸ੍ਸ ਵਸੇਨ ਧਮ੍ਮਸਤਂ ਵੇਦਿਤਬ੍ਬਂ. ਅਥ ਵਾ ਯੇ ਦਸ ਅਤ੍ਥਵਸੇ ਪਟਿਚ੍ਚ ਤਥਾਗਤੇਨ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਤ੍ਤਂ, ਯੇ ਪੁਬ੍ਬੇ ਪਠਮਪਾਰਾਜਿਕਵਣ੍ਣਨਾਯਂ ‘‘ਤਤ੍ਥ ਸਙ੍ਘਸੁਟ੍ਠੁਤਾ ਨਾਮ ਸਙ੍ਘਸ੍ਸ ਸੁਟ੍ਠੁਭਾਵੋ ‘ਸੁਟ੍ਠੁ ਦੇਵਾ’ਤਿ ਆਗਤਟ੍ਠਾਨੇ ਵਿਯ ‘ਸੁਟ੍ਠੁ ਭਨ੍ਤੇ’ਤਿ ਵਚਨਸਮ੍ਪਟਿਚ੍ਛਨਭਾਵੋ, ਯੋ ਚ ਤਥਾਗਤਸ੍ਸ ਵਚਨਂ ਸਮ੍ਪਟਿਚ੍ਛਤਿ, ਤਸ੍ਸ ਤਂ ਦੀਘਰਤ੍ਤਂ ਹਿਤਾਯ ਸੁਖਾਯ ਹੋਤਿ, ਤਸ੍ਮਾ ਸਙ੍ਘਸ੍ਸ ‘ਸੁਟ੍ਠੁ ਭਨ੍ਤੇ’ਤਿ ਮਮ ਵਚਨਸਮ੍ਪਟਿਚ੍ਛਨਤ੍ਥਂ ਪਞ੍ਞਪੇਸ੍ਸਾਮਿ ਅਸਮ੍ਪਟਿਚ੍ਛਨੇ ਆਦੀਨਵਂ ਸਮ੍ਪਟਿਚ੍ਛਨੇ ਚ ਆਨਿਸਂਸਂ ਦਸ੍ਸੇਤ੍ਵਾ ਨ ਬਲਕ੍ਕਾਰੇਨ ਅਭਿਭਵਿਤ੍ਵਾਤਿ ਏਤਮਤ੍ਥਂ ਆਵਿਕਰੋਨ੍ਤੋ ਆਹ – ਸਙ੍ਘਸੁਟ੍ਠੁਤਾਯਾ’’ਤਿ ਏਵਮਾਦਿਨਾ ਨਯੇਨ ਵਣ੍ਣਿਤਾ, ਤੇਸਂ ਇਧ ਦਸਕ੍ਖਤ੍ਤੁਂ ਆਗਤਤ੍ਤਾ ਅਤ੍ਥਸਤਂ ਤਦਤ੍ਥਜੋਤਕਾਨਞ੍ਚ ਪਦਾਨਂ ਵਸੇਨ ਧਮ੍ਮਸਤਂ ਵੇਦਿਤਬ੍ਬਂ. ਇਦਾਨਿ ਅਤ੍ਥਜੋਤਕਾਨਂ ਨਿਰੁਤ੍ਤੀਨਂ ਵਸੇਨ ਨਿਰੁਤ੍ਤਿਸਤਂ, ਧਮ੍ਮਭੂਤਾਨਂ ਨਿਰੁਤ੍ਤੀਨਂ ਵਸੇਨ ਨਿਰੁਤ੍ਤਿਸਤਨ੍ਤਿ ਦ੍ਵੇ ਨਿਰੁਤ੍ਤਿਸਤਾਨਿ, ਅਤ੍ਥਸਤੇ ਞਾਣਸਤਂ, ਧਮ੍ਮਸਤੇ ਞਾਣਸਤਂ, ਦ੍ਵੀਸੁ ਨਿਰੁਤ੍ਤਿਸਤੇਸੁ ਦ੍ਵੇ ਞਾਣਸਤਾਨੀਤਿ ਚਤ੍ਤਾਰਿ ਞਾਣਸਤਾਨਿ ਚ ਵੇਦਿਤਬ੍ਬਾਨਿ.

‘‘ਅਤ੍ਥਸਤਂ ਧਮ੍ਮਸਤਂ, ਦ੍ਵੇ ਨਿਰੁਤ੍ਤਿਸਤਾਨਿ;

ਚਤ੍ਤਾਰਿ ਞਾਣਸਤਾਨਿ, ਅਤ੍ਥਵਸੇ ਪਕਰਣੇ’’ਤਿ.

ਇਤਿ ਹਿ ਯਂ ਵੁਤ੍ਤਂ, ਇਦਮੇਤਂ ਪਟਿਚ੍ਚ ਵੁਤ੍ਤਨ੍ਤਿ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਮਹਾਵਗ੍ਗਵਣ੍ਣਨਾ ਨਿਟ੍ਠਿਤਾ.