ਏਕੁਤ੍ਤਰਿਕਨਯੋ
ਏਕਕਵਾਰਵਣ੍ਣਨਾ
੩੨੧. ਆਪਤ੍ਤਿਕਰਾ ਧਮ੍ਮਾ ਜਾਨਿਤਬ੍ਬਾਤਿਆਦਿਮ੍ਹਿ ਏਕੁਤ੍ਤਰਿਕਨਯੇ ਆਪਤ੍ਤਿਕਰਾ ਧਮ੍ਮਾ ਨਾਮ ਛ ਆਪਤ੍ਤਿਸਮੁਟ੍ਠਾਨਾਨਿ. ਏਤੇਸਞ੍ਹਿ ਵਸੇਨ ਪੁਗ੍ਗਲੋ ਆਪਤ੍ਤਿਂ ਆਪਜ੍ਜਤਿ, ਤਸ੍ਮਾ ‘‘ਆਪਤ੍ਤਿਕਰਾ’’ਤਿ ਵੁਤ੍ਤਾ. ਅਨਾਪਤ੍ਤਿਕਰਾ ਨਾਮ ਸਤ੍ਤ ਸਮਥਾ. ਆਪਤ੍ਤਿ ਜਾਨਿਤਬ੍ਬਾਤਿ ਤਸ੍ਮਿਂ ਤਸ੍ਮਿਂ ਸਿਕ੍ਖਾਪਦੇ ਚ ਵਿਭਙ੍ਗੇ ਚ ਵੁਤ੍ਤਾ ਆਪਤ੍ਤਿ ਜਾਨਿਤਬ੍ਬਾ. ਅਨਾਪਤ੍ਤੀਤਿ ‘‘ਅਨਾਪਤ੍ਤਿ ਭਿਕ੍ਖੁ ਅਸਾਦਿਯਨ੍ਤਸ੍ਸਾ’’ਤਿਆਦਿਨਾ ਨਯੇਨ ਅਨਾਪਤ੍ਤਿ ਜਾਨਿਤਬ੍ਬਾ. ਲਹੁਕਾਤਿ ਲਹੁਕੇਨ ਵਿਨਯਕਮ੍ਮੇਨ ਵਿਸੁਜ੍ਝਨਤੋ ਪਞ੍ਚਵਿਧਾ ਆਪਤ੍ਤਿ. ਗਰੁਕਾਤਿ ਗਰੁਕੇਨ ਵਿਨਯਕਮ੍ਮੇਨ ਵਿਸੁਜ੍ਝਨਤੋ ਸਙ੍ਘਾਦਿਸੇਸਾ ਆਪਤ੍ਤਿ. ਕੇਨਚਿ ਆਕਾਰੇਨ ਅਨਾਪਤ੍ਤਿਭਾਵਂ ਉਪਨੇਤੁਂ ਅਸਕ੍ਕੁਣੇਯ੍ਯਤੋ ਪਾਰਾਜਿਕਾਪਤ੍ਤਿ ਚ. ਸਾਵਸੇਸਾਤਿ ਠਪੇਤ੍ਵਾ ਪਾਰਾਜਿਕਂ ਸੇਸਾ. ਅਨਵਸੇਸਾਤਿ ਪਾਰਾਜਿਕਾਪਤ੍ਤਿ. ਦ੍ਵੇ ਆਪਤ੍ਤਿਕ੍ਖਨ੍ਧਾ ਦੁਟ੍ਠੁਲ੍ਲਾ; ਅਵਸੇਸਾ ਅਦੁਟ੍ਠੁਲ੍ਲਾ. ਸਪ੍ਪਟਿਕਮ੍ਮਦੁਕਂ ਸਾਵਸੇਸਦੁਕਸਦਿਸਂ. ਦੇਸਨਾਗਾਮਿਨਿਦੁਕਂ ਲਹੁਕਦੁਕਸਙ੍ਗਹਿਤਂ.
ਅਨ੍ਤਰਾਯਿਕਾਤਿ ਸਤ੍ਤਪਿ ਆਪਤ੍ਤਿਯੋ ਸਞ੍ਚਿਚ੍ਚ ਵੀਤਿਕ੍ਕਨ੍ਤਾ ਸਗ੍ਗਨ੍ਤਰਾਯਞ੍ਚੇਵ ਮੋਕ੍ਖਨ੍ਤਰਾਯਞ੍ਚ ਕਰੋਨ੍ਤੀਤਿ ਅਨ੍ਤਰਾਯਿਕਾ. ਅਜਾਨਨ੍ਤੇਨ ਵੀਤਿਕ੍ਕਨ੍ਤਾ ਪਨ ਪਣ੍ਣਤ੍ਤਿਵਜ੍ਜਾਪਤ੍ਤਿ ਨੇਵ ਸਗ੍ਗਨ੍ਤਰਾਯਂ ਨ ਮੋਕ੍ਖਨ੍ਤਰਾਯਂ ਕਰੋਤੀਤਿ ਅਨਨ੍ਤਰਾਯਿਕਾ. ਅਨ੍ਤਰਾਯਿਕਂ ਆਪਨ੍ਨਸ੍ਸਾਪਿ ਦੇਸਨਾਗਾਮਿਨਿਂ ਦੇਸੇਤ੍ਵਾ ਵੁਟ੍ਠਾਨਗਾਮਿਨਿਤੋ ਵੁਟ੍ਠਾਯ ਸੁਦ੍ਧਿਪਤ੍ਤਸ੍ਸ ਸਾਮਣੇਰਭੂਮਿਯਂ ਠਿਤਸ੍ਸ ਚ ਅਵਾਰਿਤੋ ਸਗ੍ਗਮੋਕ੍ਖਮਗ੍ਗੋਤਿ. ਸਾਵਜ੍ਜਪਞ੍ਞਤ੍ਤੀਤਿ ਲੋਕਵਜ੍ਜਾ. ਅਨਵਜ੍ਜਪਞ੍ਞਤ੍ਤੀਤਿ ਪਣ੍ਣਤ੍ਤਿਵਜ੍ਜਾ. ਕਿਰਿਯਤੋ ਸਮੁਟ੍ਠਿਤਾ ਨਾਮ ਯਂ ਕਰੋਨ੍ਤੋ ਆਪਜ੍ਜਤਿ ਪਾਰਾਜਿਕਾਪਤ੍ਤਿ ਵਿਯ. ਅਕਿਰਿਯਤੋਤਿ ਯਂ ਅਕਰੋਨ੍ਤੋ ਆਪਜ੍ਜਤਿ, ਚੀਵਰਅਨਧਿਟ੍ਠਾਨਾਪਤ੍ਤਿ ਵਿਯ. ਕਿਰਿਯਾਕਿਰਿਯਤੋਤਿ ਯਂ ਕਰੋਨ੍ਤੋ ਚ ਅਕਰੋਨ੍ਤੋ ਚ ਆਪਜ੍ਜਤਿ, ਕੁਟਿਕਾਰਾਪਤ੍ਤਿ ਵਿਯ.
ਪੁਬ੍ਬਾਪਤ੍ਤੀਤਿ ਪਠਮਂ ਆਪਨ੍ਨਾਪਤ੍ਤਿ. ਅਪਰਾਪਤ੍ਤੀਤਿ ਪਾਰਿਵਾਸਿਕਾਦੀਹਿ ਪਚ੍ਛਾ ਆਪਨ੍ਨਾਪਤ੍ਤਿ. ਪੁਬ੍ਬਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਮੂਲਵਿਸੁਦ੍ਧਿਯਾ ਅਨ੍ਤਰਾਪਤ੍ਤਿ. ਅਪਰਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਅਗ੍ਘਵਿਸੁਦ੍ਧਿਯਾ ਅਨ੍ਤਰਾਪਤ੍ਤਿ. ਕੁਰੁਨ੍ਦਿਯਂ ਪਨ ‘‘ਪੁਬ੍ਬਾਪਤ੍ਤਿ ਨਾਮ ਪਠਮਂ ਆਪਨ੍ਨਾ. ਅਪਰਾਪਤ੍ਤਿ ਨਾਮ ਮਾਨਤ੍ਤਾਰਹਕਾਲੇ ਆਪਨ੍ਨਾ. ਪੁਬ੍ਬਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਪਰਿਵਾਸੇ ਆਪਨ੍ਨਾ. ਅਪਰਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਮਾਨਤ੍ਤਚਾਰੇ ਆਪਨ੍ਨਾ’’ਤਿ ਵੁਤ੍ਤਂ. ਇਦਮ੍ਪਿ ਏਕੇਨ ਪਰਿਯਾਯੇਨ ਯੁਜ੍ਜਤਿ.
ਦੇਸਿਤਾ ਗਣਨੂਪਗਾ ਨਾਮ ਯਾ ਧੁਰਨਿਕ੍ਖੇਪਂ ਕਤ੍ਵਾ ਪੁਨ ਨ ਆਪਜ੍ਜਿਸ੍ਸਾਮੀਤਿ ਦੇਸਿਤਾ ਹੋਤਿ. ਅਗਣਨੂਪਗਾ ਨਾਮ ਯਾ ਧੁਰਨਿਕ੍ਖੇਪਂ ਅਕਤ੍ਵਾ ਸਉਸ੍ਸਾਹੇਨੇਵ ਚਿਤ੍ਤੇਨ ਅਪਰਿਸੁਦ੍ਧੇਨ ਦੇਸਿਤਾ ਹੋਤਿ. ਅਯਞ੍ਹਿ ਦੇਸਿਤਾਪਿ ਦੇਸਿਤਗਣਨਂ ਨ ਉਪੇਤਿ. ਅਟ੍ਠਮੇ ਵਤ੍ਥੁਸ੍ਮਿਂ ਭਿਕ੍ਖੁਨਿਯਾ ਪਾਰਾਜਿਕਮੇਵ ਹੋਤਿ. ਪਞ੍ਞਤ੍ਤਿ ਜਾਨਿਤਬ੍ਬਾਤਿਆਦੀਸੁ ਨਵਸੁ ਪਦੇਸੁ ਪਠਮਪਾਰਾਜਿਕਪੁਚ੍ਛਾਯ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ.
ਥੁਲ੍ਲਵਜ੍ਜਾਤਿ ਥੁਲ੍ਲਦੋਸੇ ਪਞ੍ਞਤ੍ਤਾ ਗਰੁਕਾਪਤ੍ਤਿ. ਅਥੁਲ੍ਲਵਜ੍ਜਾਤਿ ਲਹੁਕਾਪਤ੍ਤਿ. ਗਿਹਿਪਟਿਸਂਯੁਤ੍ਤਾਤਿ ਸੁਧਮ੍ਮਤ੍ਥੇਰਸ੍ਸ ਆਪਤ੍ਤਿ, ਯਾ ਚ ਧਮ੍ਮਿਕਸ੍ਸ ਪਟਿਸ੍ਸਵਸ੍ਸ ਅਸਚ੍ਚਾਪਨੇ ਆਪਤ੍ਤਿ, ਅਵਸੇਸਾ ਨ ਗਿਹਿਪਟਿਸਂਯੁਤ੍ਤਾ. ਪਞ੍ਚਾਨਨ੍ਤਰਿਯਕਮ੍ਮਾਪਤ੍ਤਿ ਨਿਯਤਾ, ਸੇਸਾ ਅਨਿਯਤਾ. ਆਦਿਕਰੋਤਿ ਸੁਦਿਨ੍ਨਤ੍ਥੇਰਾਦਿ ਆਦਿਕਮ੍ਮਿਕੋ. ਅਨਾਦਿਕਰੋਤਿ ਮਕ੍ਕਟਿਸਮਣਾਦਿ ਅਨੁਪਞ੍ਞਤ੍ਤਿਕਾਰਕੋ. ਅਧਿਚ੍ਚਾਪਤ੍ਤਿਕੋ ਨਾਮ ਯੋ ਕਦਾਚਿ ਕਰਹਚਿ ਆਪਤ੍ਤਿਂ ਆਪਜ੍ਜਤਿ. ਅਭਿਣ੍ਹਾਪਤ੍ਤਿਕੋ ਨਾਮ ਯੋ ਨਿਚ੍ਚਂ ਆਪਜ੍ਜਤਿ.
ਚੋਦਕੋ ਨਾਮ ਯੋ ਵਤ੍ਥੁਨਾ ਵਾ ਆਪਤ੍ਤਿਯਾ ਵਾ ਪਰਂ ਚੋਦੇਤਿ. ਯੋ ਪਨ ਏਵਂ ਚੋਦਿਤੋ ਅਯਂ ਚੁਦਿਤਕੋ ਨਾਮ. ਪਞ੍ਚਦਸਸੁ ਧਮ੍ਮੇਸੁ ਅਪ੍ਪਤਿਟ੍ਠਹਿਤ੍ਵਾ ਅਭੂਤੇਨ ਵਤ੍ਥੁਨਾ ਚੋਦੇਨ੍ਤੋ ਅਧਮ੍ਮਚੋਦਕੋ ਨਾਮ, ਤੇਨ ਤਥਾ ਚੋਦਿਤੋ ਅਧਮ੍ਮਚੁਦਿਤਕੋ ਨਾਮ. ਵਿਪਰਿਯਾਯੇਨ ਧਮ੍ਮਚੋਦਕਚੁਦਿਤਕਾ ਵੇਦਿਤਬ੍ਬਾ. ਮਿਚ੍ਛਤ੍ਤਨਿਯਤੇਹਿ ਵਾ ਸਮ੍ਮਤ੍ਤਨਿਯਤੇਹਿ ਵਾ ਧਮ੍ਮੇਹਿ ਸਮਨ੍ਨਾਗਤੋ ਨਿਯਤੋ, ਵਿਪਰੀਤੋ ਅਨਿਯਤੋ.
ਸਾਵਕਾ ਭਬ੍ਬਾਪਤ੍ਤਿਕਾ ਨਾਮ, ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਅਭਬ੍ਬਾਪਤ੍ਤਿਕਾ ਨਾਮ. ਉਕ੍ਖੇਪਨੀਯਕਮ੍ਮਕਤੋ ਉਕ੍ਖਿਤ੍ਤਕੋ ਨਾਮ, ਅਵਸੇਸਚਤੁਬ੍ਬਿਧਤਜ੍ਜਨੀਯਾਦਿਕਮ੍ਮਕਤੋ ਅਨੁਕ੍ਖਿਤ੍ਤਕੋ ਨਾਮ. ਅਯਞ੍ਹਿ ਉਪੋਸਥਂ ਵਾ ਪਵਾਰਣਂ ਵਾ ਧਮ੍ਮਪਰਿਭੋਗਂ ਵਾ ਆਮਿਸਪਰਿਭੋਗਂ ਵਾ ਨ ਕੋਪੇਤਿ. ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥ, ਦੂਸਕੋ ਨਾਸੇਤਬ੍ਬੋ, ਕਣ੍ਟਕੋ ਸਮਣੁਦ੍ਦੇਸੋ ਨਾਸੇਤਬ੍ਬੋ’’ਤਿ ਏਵਂ ਲਿਙ੍ਗਦਣ੍ਡਕਮ੍ਮ-ਸਂਵਾਸਨਾਸਨਾਹਿ ਨਾਸਿਤਬ੍ਬੋ ਨਾਸਿਤਕੋ ਨਾਮ. ਸੇਸਾ ਸਬ੍ਬੇ ਅਨਾਸਿਤਕਾ. ਯੇਨ ਸਦ੍ਧਿਂ ਉਪੋਸਥਾਦਿਕੋ ਸਂਵਾਸੋ ਅਤ੍ਥਿ, ਅਯਂ ਸਮਾਨਸਂਵਾਸਕੋ, ਇਤਰੋ ਨਾਨਾਸਂਵਾਸਕੋ. ਸੋ ਕਮ੍ਮਨਾਨਾਸਂਵਾਸਕੋ ਲਦ੍ਧਿਨਾਨਾਸਂਵਾਸਕੋਤਿ ਦੁਵਿਧੋ ਹੋਤਿ. ਠਪਨਂ ਜਾਨਿਤਬ੍ਬਨ੍ਤਿ ‘‘ਏਕਂ ਭਿਕ੍ਖਵੇ ਅਧਮ੍ਮਿਕਂ ਪਾਤਿਮੋਕ੍ਖਟ੍ਠਪਨ’’ਨ੍ਤਿਆਦਿਨਾ ਨਯੇਨ ਵੁਤ੍ਤਂ ਪਾਤਿਮੋਕ੍ਖਟ੍ਠਪਨਂ ਜਾਨਿਤਬ੍ਬਨ੍ਤਿ ਅਤ੍ਥੋ.
ਏਕਕਵਾਰਵਣ੍ਣਨਾ ਨਿਟ੍ਠਿਤਾ.
ਦੁਕਵਾਰਵਣ੍ਣਨਾ
੩੨੨. ਦੁਕੇਸੁ ਸਚਿਤ੍ਤਕਾ ਆਪਤ੍ਤਿ ਸਞ੍ਞਾਵਿਮੋਕ੍ਖਾ, ਅਚਿਤ੍ਤਕਾ ਨੋਸਞ੍ਞਾਵਿਮੋਕ੍ਖਾ. ਲਦ੍ਧਸਮਾਪਤ੍ਤਿਕਸ੍ਸ ਆਪਤ੍ਤਿ ਨਾਮ ਭੂਤਾਰੋਚਨਾਪਤ੍ਤਿ, ਅਲਦ੍ਧਸਮਾਪਤ੍ਤਿਕਸ੍ਸ ਆਪਤ੍ਤਿ ਨਾਮ ਅਭੂਤਾਰੋਚਨਾਪਤ੍ਤਿ. ਸਦ੍ਧਮ੍ਮਪਟਿਸਞ੍ਞੁਤ੍ਤਾ ਨਾਮ ਪਦਸੋਧਮ੍ਮਾਦਿਕਾ, ਅਸਦ੍ਧਮ੍ਮਪਟਿਸਞ੍ਞੁਤ੍ਤਾ ਨਾਮ ਦੁਟ੍ਠੁਲ੍ਲਵਾਚਾਪਤ੍ਤਿ. ਸਪਰਿਕ੍ਖਾਰਪਟਿਸਞ੍ਞੁਤ੍ਤਾ ਨਾਮ ਨਿਸ੍ਸਗ੍ਗਿਯਵਤ੍ਥੁਨੋ ਅਨਿਸ੍ਸਜ੍ਜਿਤ੍ਵਾ ਪਰਿਭੋਗੇ, ਪਤ੍ਤਚੀਵਰਾਨਂ ਨਿਦਹਨੇ, ਕਿਲਿਟ੍ਠਚੀਵਰਾਨਂ ਅਧੋਵਨੇ, ਮਲਗ੍ਗਹਿਤਪਤ੍ਤਸ੍ਸ ਅਪਚਨੇਤਿ ਏਵਂ ਅਯੁਤ੍ਤਪਰਿਭੋਗੇ ਆਪਤ੍ਤਿ. ਪਰਪਰਿਕ੍ਖਾਰਪਟਿਸਞ੍ਞੁਤ੍ਤਾ ਨਾਮ ਸਙ੍ਘਿਕਮਞ੍ਚਪੀਠਾਦੀਨਂ ਅਜ੍ਝੋਕਾਸੇ ਸਨ੍ਥਰਣਅਨਾਪੁਚ੍ਛਾਗਮਨਾਦੀਸੁ ਆਪਜ੍ਜਿਤਬ੍ਬਾ ਆਪਤ੍ਤਿ. ਸਪੁਗ੍ਗਲਪਟਿਸਞ੍ਞੁਤ੍ਤਾ ਨਾਮ ‘‘ਮੁਦੁਪਿਟ੍ਠਿਕਸ੍ਸ ਲਮ੍ਬਿਸ੍ਸ ਊਰੁਨਾ ਅਙ੍ਗਜਾਤਂ ਪੀਲ਼ੇਨ੍ਤਸ੍ਸਾ’’ਤਿਆਦਿਨਾ ਨਯੇਨ ਵੁਤ੍ਤਾਪਤ੍ਤਿ. ਪਰਪੁਗ੍ਗਲਪਟਿਸਞ੍ਞੁਤ੍ਤਾ ਨਾਮ ਮੇਥੁਨਧਮ੍ਮਕਾਯਸਂਸਗ੍ਗਪਹਾਰਦਾਨਾਦੀਸੁ ਵੁਤ੍ਤਾਪਤ੍ਤਿ, ‘‘ਸਿਖਰਣੀਸੀ’’ਤਿ ਸਚ੍ਚਂ ਭਣਨ੍ਤੋ ਗਰੁਕਂ ਆਪਜ੍ਜਤਿ, ‘‘ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯ’’ਨ੍ਤਿ ਮੁਸਾ ਭਣਨ੍ਤੋ ਲਹੁਕਂ. ਅਭੂਤਾਰੋਚਨੇ ਮੁਸਾ ਭਣਨ੍ਤੋ ਗਰੁਕਂ. ਭੂਤਾਰੋਚਨੇ ਸਚ੍ਚਂ ਭਣਨ੍ਤੋ ਲਹੁਕਂ.
‘‘ਸਙ੍ਘਕਮ੍ਮਂ ਵਗ੍ਗਂ ਕਰਿਸ੍ਸਾਮੀ’’ਤਿ ਅਨ੍ਤੋਸੀਮਾਯ ਏਕਮਨ੍ਤੇ ਨਿਸੀਦਨ੍ਤੋ ਭੂਮਿਗਤੋ ਆਪਜ੍ਜਤਿ ਨਾਮ. ਸਚੇ ਪਨ ਅਙ੍ਗੁਲਿਮਤ੍ਤਮ੍ਪਿ ਆਕਾਸੇ ਤਿਟ੍ਠੇਯ੍ਯ, ਨ ਆਪਜ੍ਜੇਯ੍ਯ, ਤੇਨ ਵੁਤ੍ਤਂ ‘‘ਨੋ ਵੇਹਾਸਗਤੋ’’ਤਿ. ਵੇਹਾਸਕੁਟਿਯਾ ਆਹਚ੍ਚਪਾਦਕਂ ਮਞ੍ਚਂ ਵਾ ਪੀਠਂ ਵਾ ਅਭਿਨਿਸੀਦਨ੍ਤੋ ਵੇਹਾਸਗਤੋ ਆਪਜ੍ਜਤਿ ਨਾਮ. ਸਚੇ ਪਨ ਤਂ ਭੂਮਿਯਂ ਪਞ੍ਞਾਪੇਤ੍ਵਾ ਨਿਪਜ੍ਜੇਯ੍ਯ ਨ ਆਪਜ੍ਜੇਯ੍ਯ, ਤੇਨ ਵੁਤ੍ਤਂ – ‘‘ਨੋ ਭੂਮਿਗਤੋ’’ਤਿ. ਗਮਿਯੋ ਗਮਿਯਵਤ੍ਤਂ ਅਪੂਰੇਤ੍ਵਾ ਗਚ੍ਛਨ੍ਤੋ ਨਿਕ੍ਖਮਨ੍ਤੋ ਆਪਜ੍ਜਤਿ ਨਾਮ, ਨੋ ਪਵਿਸਨ੍ਤੋ. ਆਗਨ੍ਤੁਕੋ ਆਗਨ੍ਤੁਕਵਤ੍ਤਂ ਅਪੂਰੇਤ੍ਵਾ ਸਛਤ੍ਤੁਪਾਹਨੋ ਪਵਿਸਨ੍ਤੋ ਪਵਿਸਨ੍ਤੋ ਆਪਜ੍ਜਤਿ ਨਾਮ, ਨੋ ਨਿਕ੍ਖਮਨ੍ਤੋ.
ਆਦਿਯਨ੍ਤੋ ਆਪਜ੍ਜਤਿ ਨਾਮ ਭਿਕ੍ਖੁਨੀ ਅਤਿਗਮ੍ਭੀਰਂ ਉਦਕਸੁਦ੍ਧਿਕਂ ਆਦਿਯਮਾਨਾ; ਦੁਬ੍ਬਣ੍ਣਕਰਣਂ ਅਨਾਦਿਯਿਤ੍ਵਾ ਚੀਵਰਂ ਪਰਿਭੁਞ੍ਜਨ੍ਤੋ ਪਨ ਅਨਾਦਿਯਨ੍ਤੋ ਆਪਜ੍ਜਤਿ ਨਾਮ. ਮੂਗਬ੍ਬਤਾਦੀਨਿ ਤਿਤ੍ਥਿਯਵਤ੍ਤਾਨਿ ਸਮਾਦਿਯਨ੍ਤੋ ਸਮਾਦਿਯਨ੍ਤੋ ਆਪਜ੍ਜਤਿ ਨਾਮ. ਪਾਰਿਵਾਸਿਕਾਦਯੋ ਪਨ ਤਜ੍ਜਨੀਯਾਦਿਕਮ੍ਮਕਤਾ ਵਾ ਅਤ੍ਤਨੋ ਵਤ੍ਤਂ ਅਸਮਾਦਿਯਨ੍ਤਾ ਆਪਜ੍ਜਨ੍ਤਿ, ਤੇ ਸਨ੍ਧਾਯ ਵੁਤ੍ਤਂ ‘‘ਅਤ੍ਥਾਪਤ੍ਤਿ ਨ ਸਮਾਦਿਯਨ੍ਤੋ ਆਪਜ੍ਜਤੀ’’ਤਿ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਸਿਬ੍ਬਨ੍ਤੋ ਵੇਜ੍ਜਕਮ੍ਮਭਣ੍ਡਾਗਾਰਿਕਕਮ੍ਮਚਿਤ੍ਤਕਮ੍ਮਾਦੀਨਿ ਵਾ ਕਰੋਨ੍ਤੋ ਕਰੋਨ੍ਤੋ ਆਪਜ੍ਜਤਿ ਨਾਮ. ਉਪਜ੍ਝਾਯਵਤ੍ਤਾਦੀਨਿ ਅਕਰੋਨ੍ਤੋ ਅਕਰੋਨ੍ਤੋ ਆਪਜ੍ਜਤਿ ਨਾਮ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਦਦਮਾਨੋ ਦੇਨ੍ਤੋ ਆਪਜ੍ਜਤਿ ਨਾਮ. ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਾਨਂ ਚੀਵਰਾਦੀਨਿ ਅਦੇਨ੍ਤੋ ਅਦੇਨ੍ਤੋ ਆਪਜ੍ਜਤਿ ਨਾਮ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਗਣ੍ਹਨ੍ਤੋ ਪਟਿਗ੍ਗਣ੍ਹਨ੍ਤੋ ਆਪਜ੍ਜਤਿ ਨਾਮ. ‘‘ਨ ਭਿਕ੍ਖਵੇ ਓਵਾਦੋ ਨ ਗਹੇਤਬ੍ਬੋ’’ਤਿ ਵਚਨਤੋ ਓਵਾਦਂ ਅਗਣ੍ਹਨ੍ਤੋ ਨ ਪਟਿਗ੍ਗਣ੍ਹਨ੍ਤੋ ਆਪਜ੍ਜਤਿ ਨਾਮ.
ਨਿਸ੍ਸਗ੍ਗਿਯਵਤ੍ਥੁਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨ੍ਤੋ ਪਰਿਭੋਗੇਨ ਆਪਜ੍ਜਤਿ ਨਾਮ. ਪਞ੍ਚਾਹਿਕਂ ਸਙ੍ਘਾਟਿਚਾਰਂ ਅਤਿਕ੍ਕਾਮਯਮਾਨਾ ਅਪਰਿਭੋਗੇਨ ਆਪਜ੍ਜਤਿ ਨਾਮ. ਸਹਗਾਰਸੇਯ੍ਯਂ ਰਤ੍ਤਿਂ ਆਪਜ੍ਜਤਿ ਨਾਮ, ਨੋ ਦਿਵਾ, ਦ੍ਵਾਰਂ ਅਸਂਵਰਿਤ੍ਵਾ ਪਟਿਸਲ੍ਲੀਯਨ੍ਤੋ ਦਿਵਾ ਆਪਜ੍ਜਤਿ, ਨੋ ਰਤ੍ਤਿਂ. ਏਕਰਤ੍ਤਛਾਰਤ੍ਤਸਤ੍ਤਾਹਦਸਾਹਮਾਸਾਤਿਕ੍ਕਮੇਸੁ ਵੁਤ੍ਤਆਪਤ੍ਤਿਂ ਆਪਜ੍ਜਨ੍ਤੋ ਅਰੁਣੁਗ੍ਗੇ ਆਪਜ੍ਜਤਿ ਨਾਮ, ਪਵਾਰੇਤ੍ਵਾ ਭੁਞ੍ਜਨ੍ਤੋ ਨ ਅਰੁਣੁਗ੍ਗੇ ਆਪਜ੍ਜਤਿ ਨਾਮ.
ਭੂਤਗਾਮਞ੍ਚੇਵ ਅਙ੍ਗਜਾਤਞ੍ਚ ਛਿਨ੍ਦਨ੍ਤੋ ਛਿਨ੍ਦਨ੍ਤੋ ਆਪਜ੍ਜਤਿ ਨਾਮ, ਕੇਸੇ ਵਾ ਨਖੇ ਵਾ ਨ ਛਿਨ੍ਦਨ੍ਤੋ ਨ ਛਿਨ੍ਦਨ੍ਤੋ ਆਪਜ੍ਜਤਿ ਨਾਮ. ਆਪਤ੍ਤਿਂ ਛਾਦੇਨ੍ਤੋ ਛਾਦੇਨ੍ਤੋ ਆਪਜ੍ਜਤਿ ਨਾਮ, ‘‘ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਆਗਨ੍ਤਬ੍ਬਂ, ਨਤ੍ਵੇਵ ਨਗ੍ਗੇਨ ਆਗਨ੍ਤਬ੍ਬਂ, ਯੋ ਆਗਚ੍ਛੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਮਂ ਪਨ ਆਪਤ੍ਤਿਂ ਨ ਛਾਦੇਨ੍ਤੋ ਆਪਜ੍ਜਤਿ ਨਾਮ. ਕੁਸਚੀਰਾਦੀਨਿ ਧਾਰੇਨ੍ਤੋ ਧਾਰੇਨ੍ਤੋ ਆਪਜ੍ਜਤਿ ਨਾਮ, ‘‘ਅਯਂ ਤੇ ਭਿਕ੍ਖੁ ਪਤ੍ਤੋ ਯਾਵ ਭੇਦਨਾਯ ਧਾਰੇਤਬ੍ਬੋ’’ਤਿ ਇਮਂ ਆਪਤ੍ਤਿਂ ਨ ਧਾਰੇਨ੍ਤੋ ਆਪਜ੍ਜਤਿ ਨਾਮ.
‘‘ਅਤ੍ਤਨਾ ਵਾ ਅਤ੍ਤਾਨਂ ਨਾਨਾਸਂਵਾਸਕਂ ਕਰੋਤੀ’’ਤਿ ਏਕਸੀਮਾਯਂ ਦ੍ਵੀਸੁ ਸਙ੍ਘੇਸੁ ਨਿਸਿਨ੍ਨੇਸੁ ਏਕਸ੍ਮਿਂ ਪਕ੍ਖੇ ਨਿਸੀਦਿਤ੍ਵਾ ਪਰਪਕ੍ਖਸ੍ਸ ਲਦ੍ਧਿਂ ਗਣ੍ਹਨ੍ਤੋ ਯਸ੍ਮਿਂ ਪਕ੍ਖੇ ਨਿਸਿਨ੍ਨੋ ਤੇਸਂ ਅਤ੍ਤਨਾਵ ਅਤ੍ਤਾਨਂ ਨਾਨਾਸਂਵਾਸਕਂ ਕਰੋਤਿ ਨਾਮ. ਯੇਸਂ ਸਨ੍ਤਿਕੇ ਨਿਸਿਨ੍ਨੋ ਤੇਸਂ ਗਣਪੂਰਕੋ ਹੁਤ੍ਵਾ ਕਮ੍ਮਂ ਕੋਪੇਤਿ, ਇਤਰੇਸਂ ਹਤ੍ਥਪਾਸਂ ਅਨਾਗਤਤ੍ਤਾ. ਸਮਾਨਸਂਵਾਸਕੇਪਿ ਏਸੇਵ ਨਯੋ. ਯੇਸਞ੍ਹਿ ਸੋ ਲਦ੍ਧਿਂ ਰੋਚੇਤਿ, ਤੇਸਂ ਸਮਾਨਸਂਵਾਸਕੋ ਹੋਤਿ, ਇਤਰੇਸਂ ਨਾਨਾਸਂਵਾਸਕੋ. ਸਤ੍ਤ ਆਪਤ੍ਤਿਯੋ ਸਤ੍ਤ ਆਪਤ੍ਤਿਕ੍ਖਨ੍ਧਾਤਿ ਆਪਜ੍ਜਿਤਬ੍ਬਤੋ ਆਪਤ੍ਤਿਯੋ, ਰਾਸਟ੍ਠੇਨ ਖਨ੍ਧਾਤਿ ਏਵਂ ਦ੍ਵੇਯੇਵ ਨਾਮਾਨਿ ਹੋਨ੍ਤੀਤਿ ਨਾਮਵਸੇਨ ਦੁਕਂ ਦਸ੍ਸਿਤਂ. ਕਮ੍ਮੇਨ ਵਾ ਸਲਾਕਗ੍ਗਾਹੇਨ ਵਾਤਿ ਏਤ੍ਥ ਉਦ੍ਦੇਸੋ ਚੇਵ ਕਮ੍ਮਞ੍ਚ ਏਕਂ, ਵੋਹਾਰੋ ਚੇਵ ਅਨੁਸ੍ਸਾਵਨਾ ਚ ਸਲਾਕਗ੍ਗਾਹੋ ਚ ਏਕਂ, ਵੋਹਾਰਾਨੁਸ੍ਸਾਵਨਸਲਾਕਗ੍ਗਾਹਾ ਪੁਬ੍ਬਭਾਗਾ, ਕਮ੍ਮਞ੍ਚੇਵ ਉਦ੍ਦੇਸੋ ਚ ਪਮਾਣਂ.
ਅਦ੍ਧਾਨਹੀਨੋ ਨਾਮ ਊਨਵੀਸਤਿਵਸ੍ਸੋ. ਅਙ੍ਗਹੀਨੋ ਨਾਮ ਹਤ੍ਥਚ੍ਛਿਨ੍ਨਾਦਿਭੇਦੋ. ਵਤ੍ਥੁਵਿਪਨ੍ਨੋ ਨਾਮ ਪਣ੍ਡਕੋ ਤਿਰਚ੍ਛਾਨਗਤੋ ਉਭਤੋਬ੍ਯਞ੍ਜਨਕੋ ਚ. ਅਵਸੇਸਾ ਥੇਯ੍ਯਸਂਵਾਸਕਾਦਯੋ ਅਟ੍ਠ ਅਭਬ੍ਬਪੁਗ੍ਗਲਾ ਕਰਣਦੁਕ੍ਕਟਕਾ ਨਾਮ. ਦੁਕ੍ਕਟਕਿਰਿਯਾ ਦੁਕ੍ਕਟਕਮ੍ਮਾ, ਇਮਸ੍ਮਿਂਯੇਵ ਅਤ੍ਤਭਾਵੇ ਕਤੇਨ ਅਤ੍ਤਨੋ ਕਮ੍ਮੇਨ ਅਭਬ੍ਬਟ੍ਠਾਨਂ ਪਤ੍ਤਾਤਿ ਅਤ੍ਥੋ. ਅਪਰਿਪੂਰੋ ਨਾਮ ਅਪਰਿਪੁਣ੍ਣਪਤ੍ਤਚੀਵਰੋ. ਨੋ ਚ ਯਾਚਤਿ ਨਾਮ ਉਪਸਮ੍ਪਦਂ ਨ ਯਾਚਤਿ. ਅਲਜ੍ਜਿਸ੍ਸ ਚ ਬਾਲਸ੍ਸ ਚਾਤਿ ਅਲਜ੍ਜੀ ਸਚੇਪਿ ਤੇਪਿਟਕੋ ਹੋਤਿ, ਬਾਲੋ ਚ ਸਚੇਪਿ ਸਟ੍ਠਿਵਸ੍ਸੋ ਹੋਤਿ, ਉਭੋਪਿ ਨਿਸ੍ਸਾਯ ਨ ਵਤ੍ਥਬ੍ਬਂ. ਬਾਲਸ੍ਸ ਚ ਲਜ੍ਜਿਸ੍ਸ ਚਾਤਿ ਏਤ੍ਥ ਬਾਲਸ੍ਸ ‘‘ਤ੍ਵਂ ਨਿਸ੍ਸਯਂ ਗਣ੍ਹਾ’’ਤਿ ਆਣਾਯਪਿ ਨਿਸ੍ਸਯੋ ਦਾਤਬ੍ਬੋ, ਲਜ੍ਜਿਸ੍ਸ ਪਨ ਯਾਚਨ੍ਤਸ੍ਸੇਵ. ਸਾਤਿਸਾਰਨ੍ਤਿ ਸਦੋਸਂ; ਯਂ ਅਜ੍ਝਾਚਰਨ੍ਤੋ ਆਪਤ੍ਤਿਂ ਆਪਜ੍ਜਤਿ.
ਕਾਯੇਨ ਪਟਿਕ੍ਕੋਸਨਾ ਨਾਮ ਹਤ੍ਥਵਿਕਾਰਾਦੀਹਿ ਪਟਿਕ੍ਕੋਸਨਾ. ਕਾਯੇਨ ਪਟਿਜਾਨਾਤੀਤਿ ਹਤ੍ਥਵਿਕਾਰਾਦੀਹਿ ਪਟਿਜਾਨਾਤਿ. ਉਪਘਾਤਿਕਾ ਨਾਮ ਉਪਘਾਤਾ. ਸਿਕ੍ਖੂਪਘਾਤਿਕਾ ਨਾਮ ਸਿਕ੍ਖੂਪਘਾਤੋ. ਭੋਗੂਪਘਾਤਿਕਾ ਨਾਮ ਪਰਿਭੋਗੂਪਘਾਤੋ, ਤਤ੍ਥ ਤਿਸ੍ਸੋ ਸਿਕ੍ਖਾ ਅਸਿਕ੍ਖਤੋ ਸਿਕ੍ਖੂਪਘਾਤਿਕਾਤਿ ਵੇਦਿਤਬ੍ਬਾ. ਸਙ੍ਘਿਕਂ ਵਾ ਪੁਗ੍ਗਲਿਕਂ ਵਾ ਦੁਪ੍ਪਰਿਭੋਗਂ ਭੁਞ੍ਜਤੋ ਭੋਗੂਪਘਾਤਿਕਾਤਿ ਵੇਦਿਤਬ੍ਬਾ. ਦ੍ਵੇ ਵੇਨਯਿਕਾਤਿ ਦ੍ਵੇ ਅਤ੍ਥਾ ਵਿਨਯਸਿਦ੍ਧਾ. ਪਞ੍ਞਤ੍ਤਂ ਨਾਮ ਸਕਲੇ ਵਿਨਯਪਿਟਕੇ ਕਪ੍ਪਿਯਾਕਪ੍ਪਿਯਵਸੇਨ ਪਞ੍ਞਤ੍ਤਂ. ਪਞ੍ਞਤ੍ਤਾਨੁਲੋਮਂ ਨਾਮ ਚਤੂਸੁ ਮਹਾਪਦੇਸੇਸੁ ਦਟ੍ਠਬ੍ਬਂ. ਸੇਤੁਘਾਤੋਤਿ ਪਚ੍ਚਯਘਾਤੋ; ਯੇਨ ਚਿਤ੍ਤੇਨ ਅਕਪ੍ਪਿਯਂ ਕਰੇਯ੍ਯ, ਤਸ੍ਸ ਚਿਤ੍ਤਸ੍ਸਾਪਿ ਅਨੁਪ੍ਪਾਦਨਨ੍ਤਿ ਅਤ੍ਥੋ. ਮਤ੍ਤਕਾਰਿਤਾਤਿ ਮਤ੍ਤਾਯ ਪਮਾਣੇਨ ਕਰਣਂ; ਪਮਾਣੇ ਠਾਨਨ੍ਤਿ ਅਤ੍ਥੋ. ਕਾਯੇਨ ਆਪਜ੍ਜਤੀਤਿ ਕਾਯਦ੍ਵਾਰਿਕਂ ਕਾਯੇਨ ਆਪਜ੍ਜਤਿ; ਵਚੀਦ੍ਵਾਰਿਕਂ ਵਾਚਾਯ. ਕਾਯੇਨ ਵੁਟ੍ਠਾਤੀਤਿ ਤਿਣਵਤ੍ਥਾਰਕਸਮਥੇ ਵਿਨਾਪਿ ਦੇਸਨਾਯ ਕਾਯੇਨੇਵ ਵੁਟ੍ਠਾਤਿ; ਦੇਸੇਤ੍ਵਾ ਵੁਟ੍ਠਹਨ੍ਤੋ ਪਨ ਵਾਚਾਯ ਵੁਟ੍ਠਾਤਿ. ਅਬ੍ਭਨ੍ਤਰਪਰਿਭੋਗੋ ਨਾਮ ਅਜ੍ਝੋਹਰਣਪਰਿਭੋਗੋ. ਬਾਹਿਰਪਰਿਭੋਗੋ ਨਾਮ ਸੀਸਮਕ੍ਖਨਾਦਿ.
ਅਨਾਗਤਂ ਭਾਰਂ ਵਹਤੀਤਿ ਅਥੇਰੋਵ ਸਮਾਨੋ ਥੇਰੇਹਿ ਵਹਿਤਬ੍ਬਂ ਬੀਜਨਗਾਹਧਮ੍ਮਜ੍ਝੇਸਨਾਦਿਭਾਰਂ ਵਹਤਿ; ਤਂ ਨਿਤ੍ਥਰਿਤੁਂ ਵੀਰਿਯਂ ਆਰਭਤਿ. ਆਗਤਂ ਭਾਰਂ ਨ ਵਹਤੀਤਿ ਥੇਰੋ ਥੇਰਕਿਚ੍ਚਂ ਨ ਕਰੋਤਿ, ‘‘ਅਨੁਜਾਨਾਮਿ ਭਿਕ੍ਖਵੇ ਥੇਰੇਨ ਭਿਕ੍ਖੁਨਾ ਸਾਮਂ ਵਾ ਧਮ੍ਮਂ ਭਾਸਿਤੁਂ, ਪਰਂ ਵਾ ਅਜ੍ਝੇਸਿਤੁਂ, ਅਨੁਜਾਨਾਮਿ ਭਿਕ੍ਖਵੇ ਥੇਰਾਧੇਯ੍ਯਂ ਪਾਤਿਮੋਕ੍ਖ’’ਨ੍ਤਿ ਏਵਮਾਦਿ ਸਬ੍ਬਂ ਪਰਿਹਾਪੇਤੀਤਿ ਅਤ੍ਥੋ. ਨ ਕੁਕ੍ਕੁਚ੍ਚਾਯਿਤਬ੍ਬਂ ਕੁਕ੍ਕੁਚ੍ਚਾਯਤੀਤਿ ਨ ਕੁਕ੍ਕੁਚ੍ਚਾਯਿਤਬ੍ਬਂ ਕੁਕ੍ਕੁਚ੍ਚਾਯਿਤ੍ਵਾ ਕਰੋਤਿ. ਕੁਕ੍ਕੁਚ੍ਚਾਯਿਤਬ੍ਬਂ ਨ ਕੁਕ੍ਕੁਚ੍ਚਾਯਤੀਤਿ ਕੁਕ੍ਕੁਚ੍ਚਾਯਿਤਬ੍ਬਂ ਨ ਕੁਕ੍ਕੁਚ੍ਚਾਯਿਤ੍ਵਾ ਕਰੋਤਿ. ਏਤੇਸਂ ਦ੍ਵਿਨ੍ਨਂ ਦਿਵਾ ਚ ਰਤ੍ਤੋ ਚ ਆਸਵਾ ਵਡ੍ਢਨ੍ਤੀਤਿ ਅਤ੍ਥੋ. ਅਨਨ੍ਤਰਦੁਕੇਪਿ ਵੁਤ੍ਤਪਟਿਪਕ੍ਖਵਸੇਨ ਅਤ੍ਥੋ ਵੇਦਿਤਬ੍ਬੋ. ਸੇਸਂ ਤਤ੍ਥ ਤਤ੍ਥ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵਾਤਿ.
ਦੁਕਵਾਰਵਣ੍ਣਨਾ ਨਿਟ੍ਠਿਤਾ.
ਤਿਕਵਾਰਵਣ੍ਣਨਾ
੩੨੩. ਤਿਕੇਸੁ ਅਤ੍ਥਾਪਤ੍ਤਿ ਤਿਟ੍ਠਨ੍ਤੇ ਭਗਵਤਿ ਆਪਜ੍ਜਤੀਤਿ ਅਤ੍ਥਿ ਆਪਤ੍ਤਿ, ਯਂ ਤਿਟ੍ਠਨ੍ਤੇ ਭਗਵਤਿ ਆਪਜ੍ਜਤੀਤਿ ਅਤ੍ਥੋ. ਏਸੇਵ ਨਯੋ ਸਬ੍ਬਤ੍ਥ. ਤਤ੍ਥ ਲੋਹਿਤੁਪ੍ਪਾਦਾਪਤ੍ਤਿਂ ਤਿਟ੍ਠਨ੍ਤੇ ਆਪਜ੍ਜਤਿ. ‘‘ਏਤਰਹਿ ਖੋ ਪਨਾਨਨ੍ਦ, ਭਿਕ੍ਖੂ ਅਞ੍ਞਮਞ੍ਞਂ ਆਵੁਸੋਵਾਦੇਨ ਸਮੁਦਾਚਰਨ੍ਤਿ, ਨ ਵੋ ਮਮਚ੍ਚਯੇਨ ਏਵਂ ਸਮੁਦਾਚਰਿਤਬ੍ਬਂ, ਨਵਕੇਨ, ਆਨਨ੍ਦ, ਭਿਕ੍ਖੁਨਾ ਥੇਰੋ ਭਿਕ੍ਖੂ ‘ਭਨ੍ਤੇ’ਤਿ ਵਾ ‘ਆਯਸ੍ਮਾ’ਤਿ ਵਾ ਸਮੁਦਾਚਰਿਤਬ੍ਬੋ’’ਤਿ ਵਚਨਤੋ ਥੇਰਂ ਆਵੁਸੋਵਾਦੇਨ ਸਮੁਦਾਚਰਣਪਚ੍ਚਯਾ ਆਪਤ੍ਤਿਂ ਪਰਿਨਿਬ੍ਬੁਤੇ ਭਗਵਤਿ ਆਪਜ੍ਜਤਿ, ਨੋ ਤਿਟ੍ਠਨ੍ਤੇ. ਇਮਾ ਦ੍ਵੇ ਆਪਤ੍ਤਿਯੋ ਠਪੇਤ੍ਵਾ ਅਵਸੇਸਾ ਧਰਨ੍ਤੇਪਿ ਭਗਵਤਿ ਆਪਜ੍ਜਤਿ, ਪਰਿਨਿਬ੍ਬੁਤੇਪਿ.
ਪਵਾਰੇਤ੍ਵਾ ਅਨਤਿਰਿਤ੍ਤਂ ਭੁਞ੍ਜਨ੍ਤੋ ਆਪਤ੍ਤਿਂ ਕਾਲੇ ਆਪਜ੍ਜਤਿ ਨੋ ਵਿਕਾਲੇ. ਵਿਕਾਲਭੋਜਨਾਪਤ੍ਤਿਂ ਪਨ ਵਿਕਾਲੇ ਆਪਜ੍ਜਤਿ ਨੋ ਕਾਲੇ. ਅਵਸੇਸਾ ਕਾਲੇ ਚੇਵ ਆਪਜ੍ਜਤਿ ਵਿਕਾਲੇ ਚ. ਸਹਗਾਰਸੇਯ੍ਯਂ ਰਤ੍ਤਿਂ ਆਪਜ੍ਜਤਿ, ਦ੍ਵਾਰਂ ਅਸਂਵਰਿਤ੍ਵਾ ਪਟਿਸਲ੍ਲੀਯਨਂ ਦਿਵਾ. ਸੇਸਾ ਰਤ੍ਤਿਞ੍ਚੇਵ ਦਿਵਾ ਚ. ‘‘ਦਸਵਸ੍ਸੋਮ੍ਹਿ ਅਤਿਰੇਕਦਸਵਸ੍ਸੋਮ੍ਹੀ’’ਤਿ ਬਾਲੋ ਅਬ੍ਯਤ੍ਤੋ ਪਰਿਸਂ ਉਪਟ੍ਠਾਪੇਨ੍ਤੋ ਦਸਵਸ੍ਸੋ ਆਪਜ੍ਜਤਿ ਨੋ ਊਨਦਸਵਸ੍ਸੋ. ‘‘ਅਹਂ ਪਣ੍ਡਿਤੋ ਬ੍ਯਤ੍ਤੋ’’ਤਿ ਨਵੋ ਵਾ ਮਜ੍ਝਿਮੋ ਵਾ ਪਰਿਸਂ ਉਪਟ੍ਠਾਪੇਨ੍ਤੋ ਊਨਦਸਵਸ੍ਸੋ ਆਪਜ੍ਜਤਿ ਨੋ ਦਸਵਸ੍ਸੋ. ਸੇਸਾ ਦਸਵਸ੍ਸੋ ਚੇਵ ਆਪਜ੍ਜਤਿ ਊਨਦਸਵਸ੍ਸੋ ਚ. ‘‘ਪਞ੍ਚਵਸ੍ਸੋਮ੍ਹੀ’’ਤਿ ਬਾਲੋ ਅਬ੍ਯਤ੍ਤੋ ਅਨਿਸ੍ਸਾਯ ਵਸਨ੍ਤੋ ਪਞ੍ਚਵਸ੍ਸੋ ਆਪਜ੍ਜਤਿ. ‘‘ਅਹਂ ਪਣ੍ਡਿਤੋ ਬ੍ਯਤ੍ਤੋ’’ਤਿ ਨਵਕੋ ਅਨਿਸ੍ਸਾਯ ਵਸਨ੍ਤੋ ਊਨਪਞ੍ਚਵਸ੍ਸੋ ਆਪਜ੍ਜਤਿ. ਸੇਸਂ ਪਞ੍ਚਵਸ੍ਸੋ ਚੇਵ ਆਪਜ੍ਜਤਿ ਊਨਪਞ੍ਚਵਸ੍ਸੋ ਚ. ਅਨੁਪਸਮ੍ਪਨ੍ਨਂ ਪਦਸੋਧਮ੍ਮਂ ਵਾਚੇਨ੍ਤੋ, ਮਾਤੁਗਾਮਸ੍ਸ ਧਮ੍ਮਂ ਦੇਸੇਨ੍ਤੋ ਏਵਰੂਪਂ ਆਪਤ੍ਤਿਂ ਕੁਸਲਚਿਤ੍ਤੋ ਆਪਜ੍ਜਤਿ, ਪਾਰਾਜਿਕ-ਸੁਕ੍ਕਵਿਸ੍ਸਟ੍ਠਿ-ਕਾਯਸਂਸਗ੍ਗ-ਦੁਟ੍ਠੁਲ੍ਲ-ਅਤ੍ਤਕਾਮਪਾਰਿਚਰਿਯ-ਦੁਟ੍ਠਦੋਸ-ਸਙ੍ਘਭੇਦਪਹਾਰਦਾਨ-ਤਲਸਤ੍ਤਿਕਾਦਿਭੇਦਂ ਅਕੁਸਲਚਿਤ੍ਤੋ ਆਪਜ੍ਜਤਿ, ਅਸਞ੍ਚਿਚ੍ਚ ਸਹਗਾਰਸੇਯ੍ਯਾਦਿਂ ਅਬ੍ਯਾਕਤਚਿਤ੍ਤੋ ਆਪਜ੍ਜਤਿ, ਯਂ ਅਰਹਾਵ ਆਪਜ੍ਜਤਿ, ਸਬ੍ਬਂ ਅਬ੍ਯਾਕਤਚਿਤ੍ਤੋਵ ਆਪਜ੍ਜਤਿ, ਮੇਥੁਨਧਮ੍ਮਾਦਿਭੇਦਮਾਪਤ੍ਤਿਂ ਸੁਖਵੇਦਨਾਸਮਙ੍ਗੀ ਆਪਜ੍ਜਤਿ, ਦੁਟ੍ਠਦੋਸਾਦਿਭੇਦਂ ਦੁਕ੍ਖਵੇਦਨਾਸਮਙ੍ਗੀ, ਯਂ ਸੁਖਵੇਦਨਾਸਮਙ੍ਗੀ ਆਪਜ੍ਜਤਿ, ਤਂਯੇਵ ਮਜ੍ਝਤ੍ਤੋ ਹੁਤ੍ਵਾ ਆਪਜ੍ਜਨ੍ਤੋ ਅਦੁਕ੍ਖਮਸੁਖਵੇਦਨਾਸਮਙ੍ਗੀ ਆਪਜ੍ਜਤਿ.
ਤਯੋ ਪਟਿਕ੍ਖੇਪਾਤਿ ਬੁਦ੍ਧਸ੍ਸ ਭਗਵਤੋ ਤਯੋ ਪਟਿਕ੍ਖੇਪਾ. ਚਤੂਸੁ ਪਚ੍ਚਯੇਸੁ ਮਹਿਚ੍ਛਤਾ ਅਸਨ੍ਤੁਟ੍ਠਿਤਾ ਕਿਲੇਸਸਲ੍ਲੇਖਨਪਟਿਪਤ੍ਤਿਯਾ ਅਗੋਪਾਯਨਾ, ਇਮੇ ਹਿ ਤਯੋ ਧਮ੍ਮਾ ਬੁਦ੍ਧੇਨ ਭਗਵਤਾ ਪਟਿਕ੍ਖਿਤ੍ਤਾ. ਅਪ੍ਪਿਚ੍ਛਤਾਦਯੋ ਪਨ ਤਯੋ ਬੁਦ੍ਧੇਨ ਭਗਵਤਾ ਅਨੁਞ੍ਞਾਤਾ, ਤੇਨ ਵੁਤ੍ਤਂ ‘‘ਤਯੋ ਅਨੁਞ੍ਞਾਤਾ’’ਤਿ.
‘‘ਦਸਵਸ੍ਸੋਮ੍ਹੀ’’ਤਿ ਪਰਿਸਂ ਉਪਟ੍ਠਾਪੇਨ੍ਤੋ ‘‘ਪਞ੍ਚਵਸ੍ਸੋਮ੍ਹੀ’’ਤਿ ਨਿਸ੍ਸਯਂ ਅਗਣ੍ਹਨ੍ਤੋ ਬਾਲੋ ਆਪਜ੍ਜਤਿ ਨੋ ਪਣ੍ਡਿਤੋ, ਊਨਦਸਵਸ੍ਸੋ ‘‘ਬ੍ਯਤ੍ਤੋਮ੍ਹੀ’’ਤਿ ਬਹੁਸ੍ਸੁਤਤ੍ਤਾ ਪਰਿਸਂ ਉਪਟ੍ਠਾਪੇਨ੍ਤੋ ਊਨਪਞ੍ਚਵਸ੍ਸੋ ਚ ਨਿਸ੍ਸਯਂ ਅਗਣ੍ਹਨ੍ਤੋ ਪਣ੍ਡਿਤੋ ਆਪਜ੍ਜਤਿ ਨੋ ਬਾਲੋ; ਅਵਸੇਸਂ ਪਣ੍ਡਿਤੋ ਚੇਵ ਆਪਜ੍ਜਤਿ ਬਾਲੋ ਚ. ਵਸ੍ਸਂ ਅਨੁਪਗਚ੍ਛਨ੍ਤੋ ਕਾਲ਼ੇ ਆਪਜ੍ਜਤਿ ਨੋ ਜੁਣ੍ਹੇ; ਮਹਾਪਵਾਰਣਾਯ ਅਪ੍ਪਵਾਰੇਨ੍ਤੋ ਜੁਣ੍ਹੇ ਆਪਜ੍ਜਤਿ ਨੋ ਕਾਲ਼ੇ; ਅਵਸੇਸਂ ਕਾਲ਼ੇ ਚੇਵ ਆਪਜ੍ਜਤਿ ਜੁਣ੍ਹੇ ਚ. ਵਸ੍ਸੂਪਗਮਨਂ ਕਾਲ਼ੇ ਕਪ੍ਪਤਿ ਨੋ ਜੁਣ੍ਹੇ; ਮਹਾਪਵਾਰਣਾਯ ਪਵਾਰਣਾ ਜੁਣ੍ਹੇ ਕਪ੍ਪਤਿ ਨੋ ਕਾਲ਼ੇ; ਸੇਸਂ ਅਨੁਞ੍ਞਾਤਕਂ ਕਾਲ਼ੇ ਚੇਵ ਕਪ੍ਪਤਿ ਜੁਣ੍ਹੇ ਚ.
ਕਤ੍ਤਿਕਪੁਣ੍ਣਮਾਸਿਯਾ ਪਚ੍ਛਿਮੇ ਪਾਟਿਪਦਦਿਵਸੇ ਵਿਕਪ੍ਪੇਤ੍ਵਾ ਠਪਿਤਂ ਵਸ੍ਸਿਕਸਾਟਿਕਂ ਨਿਵਾਸੇਨ੍ਤੋ ਹੇਮਨ੍ਤੇ ਆਪਜ੍ਜਤਿ. ਕੁਰੁਨ੍ਦਿਯਂ ਪਨ ‘‘ਕਤ੍ਤਿਕਪੁਣ੍ਣਮਦਿਵਸੇ ਅਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਆਪਜ੍ਜਤੀ’’ਤਿ ਵੁਤ੍ਤਂ, ਤਮ੍ਪਿ ਸੁਵੁਤ੍ਤਂ. ‘‘ਚਾਤੁਮਾਸਂ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਹਿ ਵੁਤ੍ਤਂ. ਅਤਿਰੇਕਮਾਸੇ ਸੇਸੇ ਗਿਮ੍ਹਾਨੇ ਪਰਿਯੇਸਨ੍ਤੋ ਅਤਿਰੇਕਡ੍ਢਮਾਸੇ ਸੇਸੇ ਕਤ੍ਵਾ ਨਿਵਾਸੇਨ੍ਤੋ ਚ ਗਿਮ੍ਹੇ ਆਪਜ੍ਜਤਿ ਨਾਮ. ਸਤਿਯਾ ਵਸ੍ਸਿਕਸਾਟਿਕਾਯ ਨਗ੍ਗੋ ਕਾਯਂ ਓਵਸ੍ਸਾਪੇਨ੍ਤੋ ਵਸ੍ਸੇ ਆਪਜ੍ਜਤਿ ਨਾਮ. ਪਾਰਿਸੁਦ੍ਧਿਉਪੋਸਥਂ ਵਾ ਅਧਿਟ੍ਠਾਨੁਪੋਸਥਂ ਵਾ ਕਰੋਨ੍ਤੋ ਸਙ੍ਘੋ ਆਪਜ੍ਜਤਿ. ਸੁਤ੍ਤੁਦ੍ਦੇਸਞ੍ਚ ਅਧਿਟ੍ਠਾਨੁਪੋਸਥਞ੍ਚ ਕਰੋਨ੍ਤੋ ਗਣੋ ਆਪਜ੍ਜਤਿ. ਏਕਕੋ ਸੁਤ੍ਤੁਦ੍ਦੇਸਂ ਪਾਰਿਸੁਦ੍ਧਿਉਪੋਸਥਞ੍ਚ ਕਰੋਨ੍ਤੋ ਪੁਗ੍ਗਲੋ ਆਪਜ੍ਜਤਿ. ਪਵਾਰਣਾਯਪਿ ਏਸੇਵ ਨਯੋ.
ਸਙ੍ਘੁਪੋਸਥੋ ਚ ਸਙ੍ਘਪਵਾਰਣਾ ਚ ਸਙ੍ਘਸ੍ਸੇਵ ਕਪ੍ਪਤਿ. ਗਣੁਪੋਸਥੋ ਚ ਗਣਪਵਾਰਣਾ ਚ ਗਣਸ੍ਸੇਵ ਕਪ੍ਪਤਿ. ਅਧਿਟ੍ਠਾਨੁਪੋਸਥੋ ਚ ਅਧਿਟ੍ਠਾਨਪਵਾਰਣਾ ਚ ਪੁਗ੍ਗਲਸ੍ਸੇਵ ਕਪ੍ਪਤਿ. ‘‘ਪਾਰਾਜਿਕਂ ਆਪਨ੍ਨੋਮ੍ਹੀ’’ਤਿਆਦੀਨਿ ਭਣਨ੍ਤੋ ਵਤ੍ਥੁਂ ਛਾਦੇਤਿ ਨ ਆਪਤ੍ਤਿਂ, ‘‘ਮੇਥੁਨਂ ਧਮ੍ਮਂ ਪਟਿਸੇਵਿ’’ਨ੍ਤਿਆਦੀਨਿ ਭਣਨ੍ਤੋ ਆਪਤ੍ਤਿਂ ਛਾਦੇਤਿ ਨੋ ਵਤ੍ਥੁਂ, ਯੋ ਨੇਵ ਵਤ੍ਥੁਂ ਨ ਆਪਤ੍ਤਿਂ ਆਰੋਚੇਤਿ, ਅਯਂ ਵਤ੍ਥੁਞ੍ਚੇਵ ਛਾਦੇਤਿ ਆਪਤ੍ਤਿਞ੍ਚ.
ਪਟਿਚ੍ਛਾਦੇਤੀਤਿ ਪਟਿਚ੍ਛਾਦਿ. ਜਨ੍ਤਾਘਰਮੇਵ ਪਟਿਚ੍ਛਾਦਿ ਜਨ੍ਤਾਘਰਪਟਿਚ੍ਛਾਦਿ. ਇਤਰਾਸੁਪਿ ਏਸੇਵ ਨਯੋ. ਦ੍ਵਾਰਂ ਪਿਦਹਿਤ੍ਵਾ ਅਨ੍ਤੋਜਨ੍ਤਾਘਰੇ ਠਿਤੇਨ ਪਰਿਕਮ੍ਮਂ ਕਾਤੁਂ ਵਟ੍ਟਤਿ. ਉਦਕੇ ਓਤਿਣ੍ਣੇਨਾਪਿ ਏਤਦੇਵ ਵਟ੍ਟਤਿ. ਉਭਯਤ੍ਥ ਖਾਦਿਤੁਂ ਭੁਞ੍ਜਿਤੁਂ ਵਾ ਨ ਵਟ੍ਟਤਿ. ਵਤ੍ਥਪਟਿਚ੍ਛਾਦਿ ਸਬ੍ਬਕਪ੍ਪਿਯਤਾਯ ਪਟਿਚ੍ਛਨ੍ਨੇਨ ਸਬ੍ਬਂ ਕਾਤੁਂ ਵਟ੍ਟਤਿ. ਵਹਨ੍ਤੀਤਿ ਯਨ੍ਤਿ ਨਿਯ੍ਯਨ੍ਤਿ; ਨਿਨ੍ਦਂ ਵਾ ਪਟਿਕ੍ਕੋਸਂ ਵਾ ਨ ਲਭਨ੍ਤਿ. ਚਨ੍ਦਮਣ੍ਡਲਂ ਅਬ੍ਭਾਮਹਿਕਾਧੂਮਰਜਰਾਹੁਵਿਮੁਤ੍ਤਂ ਵਿਵਟਂਯੇਵ ਵਿਰੋਚਤਿ, ਨ ਤੇਸੁ ਅਞ੍ਞਤਰੇਨ ਪਟਿਚ੍ਛਨ੍ਨਂ. ਤਥਾ ਸੂਰਿਯਮਣ੍ਡਲਂ, ਧਮ੍ਮਵਿਨਯੋਪਿ ਵਿਵਰਿਤ੍ਵਾ ਵਿਭਜਿਤ੍ਵਾ ਦੇਸਿਯਮਾਨੋਵ ਵਿਰੋਚਤਿ ਨੋ ਪਟਿਚ੍ਛਨ੍ਨੋ.
ਅਞ੍ਞੇਨ ਭੇਸਜ੍ਜੇਨ ਕਰਣੀਯੇਨ ਅਞ੍ਞਂ ਵਿਞ੍ਞਾਪੇਨ੍ਤੋ ਗਿਲਾਨੋ ਆਪਜ੍ਜਤਿ, ਨ ਭੇਸਜ੍ਜੇਨ ਕਰਣੀਯੇਨ ਭੇਸਜ੍ਜਂ ਵਿਞ੍ਞਾਪੇਨ੍ਤੋ ਅਗਿਲਾਨੋ ਆਪਜ੍ਜਤਿ, ਅਵਸੇਸਂ ਆਪਤ੍ਤਿਂ ਗਿਲਾਨੋ ਚੇਵ ਆਪਜ੍ਜਤਿ ਅਗਿਲਾਨੋ ਚ.
ਅਨ੍ਤੋ ਆਪਜ੍ਜਤਿ ਨੋ ਬਹੀਤਿ ਅਨੁਪਖਜ੍ਜ ਸੇਯ੍ਯਂ ਕਪ੍ਪੇਨ੍ਤੋ ਅਨ੍ਤੋ ਆਪਜ੍ਜਤਿ ਨੋ ਬਹਿ, ਬਹਿ ਆਪਜ੍ਜਤਿ ਨੋ ਅਨ੍ਤੋਤਿ ਸਙ੍ਘਿਕਂ ਮਞ੍ਚਾਦਿਂ ਅਜ੍ਝੋਕਾਸੇ ਸਨ੍ਥਰਿਤ੍ਵਾ ਪਕ੍ਕਮਨ੍ਤੋ ਬਹਿ ਆਪਜ੍ਜਤਿ ਨੋ ਅਨ੍ਤੋ, ਅਵਸੇਸਂ ਪਨ ਅਨ੍ਤੋ ਚੇਵ ਆਪਜ੍ਜਤਿ ਬਹਿ ਚ. ਅਨ੍ਤੋਸੀਮਾਯਾਤਿ ਆਗਨ੍ਤੁਕੋ ਆਗਨ੍ਤੁਕਵਤ੍ਤਂ ਅਦਸ੍ਸੇਤ੍ਵਾ ਸਛਤ੍ਤੁਪਾਹਨੋ ਵਿਹਾਰਂ ਪਵਿਸਨ੍ਤੋ ਉਪਚਾਰਸੀਮਂ ਓਕ੍ਕਨ੍ਤਮਤ੍ਤੋਵ ਆਪਜ੍ਜਤਿ. ਬਹਿਸੀਮਾਯਾਤਿ ਗਮਿਕੋ ਦਾਰੁਭਣ੍ਡਪਟਿਸਾਮਨਾਦਿਗਮਿਕਵਤ੍ਤਂ ਅਪੂਰੇਤ੍ਵਾ ਪਕ੍ਕਮਨ੍ਤੋ ਉਪਚਾਰਸੀਮਂ ਅਤਿਕ੍ਕਨ੍ਤਮਤ੍ਤੋਵ ਆਪਜ੍ਜਤਿ. ਅਵਸੇਸਂ ਅਨ੍ਤੋਸੀਮਾਯ ਚੇਵ ਆਪਜ੍ਜਤਿ ਬਹਿਸੀਮਾਯ ਚ. ਸਤਿ ਵੁਡ੍ਢਤਰੇ ਅਨਜ੍ਝਿਟ੍ਠੋ ਧਮ੍ਮਂ ਭਾਸਨ੍ਤੋ ਸਙ੍ਘਮਜ੍ਝੇ ਆਪਜ੍ਜਤਿ ਨਾਮ. ਗਣਮਜ੍ਝੇਪਿ ਪੁਗ੍ਗਲਸਨ੍ਤਿਕੇਪਿ ਏਸੇਵ ਨਯੋ. ਕਾਯੇਨ ਵੁਟ੍ਠਾਤੀਤਿ ਤਿਣਵਤ੍ਥਾਰਕਸਮਥੇਨ ਵੁਟ੍ਠਾਤਿ. ਕਾਯਂ ਅਚਾਲੇਤ੍ਵਾ ਵਾਚਾਯ ਦੇਸੇਨ੍ਤਸ੍ਸ ਵਾਚਾਯ ਵੁਟ੍ਠਾਤਿ. ਵਚੀਸਮ੍ਪਯੁਤ੍ਤਂ ਕਾਯਕਿਰਿਯਂ ਕਤ੍ਵਾ ਦੇਸੇਨ੍ਤਸ੍ਸ ਕਾਯੇਨ ਵਾਚਾਯ ਵੁਟ੍ਠਾਤਿ ਨਾਮ. ਸਙ੍ਘਮਜ੍ਝੇ ਦੇਸਨਾਗਾਮਿਨੀਪਿ ਵੁਟ੍ਠਾਨਗਾਮਿਨੀਪਿ ਵੁਟ੍ਠਾਤਿ. ਗਣਪੁਗ੍ਗਲਮਜ੍ਝੇ ਪਨ ਦੇਸਨਾਗਾਮਿਨੀਯੇਵ ਵੁਟ੍ਠਾਤਿ.
ਆਗਾਲ਼੍ਹਾਯ ਚੇਤੇਯ੍ਯਾਤਿ ਆਗਾਲ਼੍ਹਾਯ ਦਲ਼੍ਹਭਾਵਾਯ ਚੇਤੇਯ੍ਯ; ਤਜ੍ਜਨੀਯਕਮ੍ਮਾਦਿਕਤਸ੍ਸ ਵਤ੍ਤਂ ਨ ਪੂਰਯਤੋ ਇਚ੍ਛਮਾਨੋ ਸਙ੍ਘੋ ਉਕ੍ਖੇਪਨੀਯਕਮ੍ਮਂ ਕਰੇਯ੍ਯਾਤਿ ਅਤ੍ਥੋ. ਅਲਜ੍ਜੀ ਚ ਹੋਤਿ ਬਾਲੋ ਚ ਅਪਕਤਤ੍ਤੋ ਚਾਤਿ ਏਤ੍ਥ ਬਾਲੋ ‘‘ਅਯਂ ਧਮ੍ਮਾਧਮ੍ਮਂ ਨ ਜਾਨਾਤਿ’’ ਅਪਕਤਤ੍ਤੋ ਵਾ ‘‘ਆਪਤ੍ਤਾਨਾਪਤ੍ਤਿਂ ਨ ਜਾਨਾਤੀ’’ਤਿ ਨ ਏਤ੍ਤਾਵਤਾ ਕਮ੍ਮਂ ਕਾਤਬ੍ਬਂ; ਬਾਲਭਾਵਮੂਲਕਂ ਪਨ ਅਪਕਤਤ੍ਤਭਾਵਮੂਲਕਞ੍ਚ ਆਪਤ੍ਤਿਂ ਆਪਨ੍ਨਸ੍ਸ ਕਮ੍ਮਂ ਕਾਤਬ੍ਬਨ੍ਤਿ ਅਤ੍ਥੋ. ਅਧਿਸੀਲੇ ਸੀਲਵਿਪਨ੍ਨੋ ਨਾਮ ਦ੍ਵੇ ਆਪਤ੍ਤਿਕ੍ਖਨ੍ਧੇ ਆਪਨ੍ਨੋ; ਆਚਾਰਵਿਪਨ੍ਨੋ ਨਾਮ ਪਞ੍ਚ ਆਪਤ੍ਤਿਕ੍ਖਨ੍ਧੇ ਆਪਨ੍ਨੋ; ਦਿਟ੍ਠਿਵਿਪਨ੍ਨੋ ਨਾਮ ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋ. ਤੇਸਂ ਆਪਤ੍ਤਿਂ ਅਪਸ੍ਸਨ੍ਤਾਨਂ ਅਪ੍ਪਟਿਕਰੋਨ੍ਤਾਨਂ ਦਿਟ੍ਠਿਞ੍ਚ ਅਨਿਸ੍ਸਜ੍ਜਨ੍ਤਾਨਂਯੇਵ ਕਮ੍ਮਂ ਕਾਤਬ੍ਬਂ.
ਕਾਯਿਕੋ ਦਵੋ ਨਾਮ ਪਾਸਕਾਦੀਹਿ ਜੂਤਕੀਲ਼ਨਾਦਿਭੇਦੋ ਅਨਾਚਾਰੋ; ਵਾਚਸਿਕੋ ਦਵੋ ਨਾਮ ਮੁਖਾਲਮ੍ਬਰਕਰਣਾਦਿਭੇਦੋ ਅਨਾਚਾਰੋ; ਕਾਯਿਕਵਾਚਸਿਕੋ ਨਾਮ ਨਚ੍ਚਨਗਾਯਨਾਦਿਭੇਦੋ ਦ੍ਵੀਹਿਪਿ ਦ੍ਵਾਰੇਹਿ ਅਨਾਚਾਰੋ. ਕਾਯਿਕੋ ਅਨਾਚਾਰੋ ਨਾਮ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋ; ਵਾਚਸਿਕੋ ਅਨਾਚਾਰੋ ਨਾਮ ਵਚੀਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋ; ਕਾਯਿਕਵਾਚਸਿਕੋ ਨਾਮ ਦ੍ਵਾਰਦ੍ਵਯੇਪਿ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋ. ਕਾਯਿਕੇਨ ਉਪਘਾਤਿਕੇਨਾਤਿ ਕਾਯਦ੍ਵਾਰੇ ਪਞ੍ਞਤ੍ਤਸ੍ਸ ਸਿਕ੍ਖਾਪਦਸ੍ਸ ਅਸਿਕ੍ਖਨੇਨ, ਯੋ ਹਿ ਤਂ ਨ ਸਿਕ੍ਖਤਿ, ਸੋ ਨਂ ਉਪਘਾਤੇਤਿ, ਤਸ੍ਮਾ ਤਸ੍ਸ ਤਂ ਅਸਿਕ੍ਖਨਂ ‘‘ਕਾਯਿਕਂ ਉਪਘਾਤਿਕ’’ਨ੍ਤਿ ਵੁਚ੍ਚਤਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਕਾਯਿਕੇਨ ਮਿਚ੍ਛਾਜੀਵੇਨਾਤਿ ਜਙ੍ਘਪੇਸਨਿਕਾਦਿਨਾ ਵਾ ਗਣ੍ਡਫਾਲਨਾਦਿਨਾ ਵਾ ਵੇਜ੍ਜਕਮ੍ਮੇਨ; ਵਾਚਸਿਕੇਨਾਤਿ ਸਾਸਨਉਗ੍ਗਹਣਆਰੋਚਨਾਦਿਨਾ; ਤਤਿਯਪਦਂ ਉਭਯਸਮ੍ਪਯੋਗਵਸੇਨ ਵੁਤ੍ਤਂ.
ਅਲਂ ਭਿਕ੍ਖੁ ਮਾ ਭਣ੍ਡਨਨ੍ਤਿ ਅਲਂ ਭਿਕ੍ਖੁ ਮਾ ਭਣ੍ਡਨਂ ਕਰਿ, ਮਾ ਕਲਹਂ, ਮਾ ਵਿਵਾਦਂ ਕਰੀਤਿ ਅਤ੍ਥੋ. ਨ ਵੋਹਰਿਤਬ੍ਬਨ੍ਤਿ ਨ ਕਿਞ੍ਚਿ ਵਤ੍ਤਬ੍ਬਂ; ਵਦਤੋਪਿ ਹਿ ਤਾਦਿਸਸ੍ਸ ਵਚਨਂ ਨ ਸੋਤਬ੍ਬਂ ਮਞ੍ਞਨ੍ਤਿ. ਨ ਕਿਸ੍ਮਿਞ੍ਚਿ ਪਚ੍ਚੇਕਟ੍ਠਾਨੇਤਿ ਕਿਸ੍ਮਿਞ੍ਚਿ ਬੀਜਨਗ੍ਗਾਹਾਦਿਕੇ ਏਕਸ੍ਮਿਮ੍ਪਿ ਜੇਟ੍ਠਕਟ੍ਠਾਨੇ ਨ ਠਪੇਤਬ੍ਬੋਤਿ ਅਤ੍ਥੋ. ਓਕਾਸਕਮ੍ਮਂ ਕਾਰੇਨ੍ਤਸ੍ਸਾਤਿ ‘‘ਕਰੋਤੁ ਆਯਸ੍ਮਾ ਓਕਾਸਂ, ਅਹਂ ਤਂ ਵਤ੍ਤੁਕਾਮੋ’’ਤਿ ਏਵਂ ਓਕਾਸਂ ਕਾਰੇਨ੍ਤਸ੍ਸ. ਨਾਲਂ ਓਕਾਸਕਮ੍ਮਂ ਕਾਤੁਨ੍ਤਿ ‘‘ਕਿਂ ਤ੍ਵਂ ਕਰਿਸ੍ਸਸੀ’’ਤਿ ਓਕਾਸੋ ਨ ਕਾਤਬ੍ਬੋ. ਸਵਚਨੀਯਂ ਨਾਦਾਤਬ੍ਬਨ੍ਤਿ ਵਚਨਂ ਨ ਆਦਾਤਬ੍ਬਂ, ਵਚਨਮ੍ਪਿ ਨ ਸੋਤਬ੍ਬਂ; ਯਤ੍ਥ ਗਹੇਤ੍ਵਾ ਗਨ੍ਤੁਕਾਮੋ ਹੋਤਿ, ਨ ਤਤ੍ਥ ਗਨ੍ਤਬ੍ਬਨ੍ਤਿ ਅਤ੍ਥੋ.
ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਵਿਨਯੋਤਿ ਯਂ ਸੋ ਜਾਨਾਤਿ, ਸੋ ਤਸ੍ਸ ਵਿਨਯੋ ਨਾਮ ਹੋਤਿ; ਸੋ ਨ ਪੁਚ੍ਛਿਤਬ੍ਬੋਤਿ ਅਤ੍ਥੋ. ਅਨੁਯੋਗੋ ਨ ਦਾਤਬ੍ਬੋਤਿ ‘‘ਇਦਂ ਕਪ੍ਪਤੀ’’ਤਿ ਪੁਚ੍ਛਨ੍ਤਸ੍ਸ ਪੁਚ੍ਛਾਯ ਓਕਾਸੋ ਨ ਦਾਤਬ੍ਬੋ, ‘‘ਅਞ੍ਞਂ ਪੁਚ੍ਛਾ’’ਤਿ ਵਤ੍ਤਬ੍ਬੋ. ਇਤਿ ਸੋ ਨੇਵ ਪੁਚ੍ਛਿਤਬ੍ਬੋ ਨਾਸ੍ਸ ਪੁਚ੍ਛਾ ਸੋਤਬ੍ਬਾਤਿ ਅਤ੍ਥੋ. ਵਿਨਯੋ ਨ ਸਾਕਚ੍ਛਾਤਬ੍ਬੋਤਿ ਵਿਨਯਪਞ੍ਹੋ ਨ ਸਾਕਚ੍ਛਿਤਬ੍ਬੋ, ਕਪ੍ਪਿਯਾਕਪ੍ਪਿਯਕਥਾ ਨ ਸਂਸਨ੍ਦੇਤਬ੍ਬਾ.
ਇਦਮਪ੍ਪਹਾਯਾਤਿ ਏਤਂ ਬ੍ਰਹ੍ਮਚਾਰਿਪਟਿਞ੍ਞਾਤਾਦਿਕਂ ਲਦ੍ਧਿਂ ਅਵਿਜਹਿਤ੍ਵਾ. ਸੁਦ੍ਧਂ ਬ੍ਰਹ੍ਮਚਾਰਿਨ੍ਤਿ ਖੀਣਾਸਵਂ ਭਿਕ੍ਖੁਂ. ‘‘ਪਾਤਬ੍ਯਤਂ ਆਪਜ੍ਜਤੀ’’ਤਿ ਪਾਤਬ੍ਯਭਾਵਂ ਪਟਿਸੇਵਨਂ ਆਪਜ੍ਜਤਿ. ‘‘ਇਦਮਪ੍ਪਹਾਯਾ’’ਤਿ ਵਚਨਤੋ ਪਨ ਤਂ ਬ੍ਰਹ੍ਮਚਾਰਿਪਟਿਞ੍ਞਾਤਂ ਪਹਾਯ ਖੀਣਾਸਵਂ ‘‘ਮੁਸਾ ਮਯਾ ਭਣਿਤਂ, ਖਮਥ ਮੇ’’ਤਿ ਖਮਾਪੇਤ੍ਵਾ ‘‘ਨਤ੍ਥਿ ਕਾਮੇਸੁ ਦੋਸੋ’’ਤਿ ਲਦ੍ਧਿਂ ਵਿਜਹਿਤ੍ਵਾ ਗਤਿਵਿਸੋਧਨਂ ਕਰੇਯ੍ਯ. ਅਕੁਸਲਮੂਲਾਨੀਤਿ ਅਕੁਸਲਾਨਿ ਚੇਵ ਮੂਲਾਨਿ ਚ, ਅਕੁਸਲਾਨਂ ਵਾ ਮੂਲਾਨਿ ਅਕੁਸਲਮੂਲਾਨਿ. ਕੁਸਲਮੂਲੇਸੁਪਿ ਏਸੇਵ ਨਯੋ. ਦੁਟ੍ਠੁ ਚਰਿਤਾਨਿ ਵਿਰੂਪਾਨਿ ਵਾ ਚਰਿਤਾਨਿ ਦੁਚ੍ਚਰਿਤਾਨਿ. ਸੁਟ੍ਠੁ ਚਰਿਤਾਨਿ ਸੁਨ੍ਦਰਾਨਿ ਵਾ ਚਰਿਤਾਨਿ ਸੁਚਰਿਤਾਨਿ. ਕਾਯੇਨ ਕਰਣਭੂਤੇਨ ਕਤਂ ਦੁਚ੍ਚਰਿਤਂ ਕਾਯਦੁਚ੍ਚਰਿਤਂ. ਏਸ ਨਯੋ ਸਬ੍ਬਤ੍ਥ. ਸੇਸਂ ਤਤ੍ਥ ਤਤ੍ਥ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵਾਤਿ.
ਤਿਕਵਾਰਵਣ੍ਣਨਾ ਨਿਟ੍ਠਿਤਾ.
ਚਤੁਕ੍ਕਵਾਰਵਣ੍ਣਨਾ
੩੨੪. ਚਤੁਕ੍ਕੇਸੁ ਸਕਵਾਚਾਯ ਆਪਜ੍ਜਤਿ ਪਰਵਾਚਾਯ ਵੁਟ੍ਠਾਤੀਤਿ ਵਚੀਦ੍ਵਾਰਿਕਂ ਪਦਸੋਧਮ੍ਮਾਦਿਭੇਦਂ ਆਪਤ੍ਤਿਂ ਆਪਜ੍ਜਿਤ੍ਵਾ ਤਿਣਵਤ੍ਥਾਰਕਸਮਥਟ੍ਠਾਨਂ ਗਤੋ ਪਰਸ੍ਸ ਕਮ੍ਮਵਾਚਾਯ ਵੁਟ੍ਠਾਤਿ. ਪਰਵਾਚਾਯ ਆਪਜ੍ਜਤਿ ਸਕਵਾਚਾਯ ਵੁਟ੍ਠਾਤੀਤਿ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਪਰਸ੍ਸ ਕਮ੍ਮਵਾਚਾਯ ਆਪਜ੍ਜਤਿ, ਪੁਗ੍ਗਲਸ੍ਸ ਸਨ੍ਤਿਕੇ ਦੇਸੇਨ੍ਤੋ ਸਕਵਾਚਾਯ ਵੁਟ੍ਠਾਤਿ. ਸਕਵਾਚਾਯ ਆਪਜ੍ਜਤਿ ਸਕਵਾਚਾਯ ਵੁਟ੍ਠਾਤੀਤਿ ਵਚੀਦ੍ਵਾਰਿਕਂ ਪਦਸੋਧਮ੍ਮਾਦਿਭੇਦਂ ਆਪਤ੍ਤਿਂ ਸਕਵਾਚਾਯ ਆਪਜ੍ਜਤਿ, ਦੇਸੇਤ੍ਵਾ ਵੁਟ੍ਠਹਨ੍ਤੋਪਿ ਸਕਵਾਚਾਯ ਵੁਟ੍ਠਾਤਿ. ਪਰਵਾਚਾਯ ਆਪਜ੍ਜਤਿ ਪਰਵਾਚਾਯ ਵੁਟ੍ਠਾਤੀਤਿ ਯਾਵਤਤਿਯਕਂ ਸਙ੍ਘਾਦਿਸੇਸਂ ਪਰਸ੍ਸ ਕਮ੍ਮਵਾਚਾਯ ਆਪਜ੍ਜਤਿ, ਵੁਟ੍ਠਹਨ੍ਤੋਪਿ ਪਰਸ੍ਸ ਪਰਿਵਾਸਕਮ੍ਮਵਾਚਾਦੀਹਿ ਵੁਟ੍ਠਾਤਿ. ਤਤੋ ਪਰੇਸੁ ਕਾਯਦ੍ਵਾਰਿਕਂ ਕਾਯੇਨ ਆਪਜ੍ਜਤਿ, ਦੇਸੇਨ੍ਤੋ ਵਾਚਾਯ ਵੁਟ੍ਠਾਤਿ. ਵਚੀਦ੍ਵਾਰਿਕਂ ਵਾਚਾਯ ਆਪਜ੍ਜਤਿ, ਤਿਣਵਤ੍ਥਾਰਕੇ ਕਾਯੇਨ ਵੁਟ੍ਠਾਤਿ. ਕਾਯਦ੍ਵਾਰਿਕਂ ਕਾਯੇਨਆਪਜ੍ਜਤਿ, ਤਮੇਵ ਤਿਣਵਤ੍ਥਾਰਕੇ ਕਾਯੇਨ ਵੁਟ੍ਠਾਤਿ. ਵਚੀਦ੍ਵਾਰਿਕਂ ਵਾਚਾਯ ਆਪਜ੍ਜਤਿ, ਤਮੇਵ ਦੇਸੇਨ੍ਤੋ ਵਾਚਾਯ ਵੁਟ੍ਠਾਤਿ. ਸਙ੍ਘਿਕਮਞ੍ਚਸ੍ਸ ਅਤ੍ਤਨੋ ਪਚ੍ਚਤ੍ਥਰਣੇਨ ਅਨਤ੍ਥਰਤੋ ਕਾਯਸਮ੍ਫੁਸਨੇ ਲੋਮਗਣਨਾਯ ਆਪਜ੍ਜਿਤਬ੍ਬਾਪਤ੍ਤਿਂ ਸਹਗਾਰਸੇਯ੍ਯਾਪਤ੍ਤਿਞ੍ਚ ਪਸੁਤ੍ਤੋ ਆਪਜ੍ਜਤਿ, ਪਬੁਜ੍ਝਿਤ੍ਵਾ ਪਨ ਆਪਨ੍ਨਭਾਵਂ ਞਤ੍ਵਾ ਦੇਸੇਨ੍ਤੋ ਪਟਿਬੁਦ੍ਧੋ ਵੁਟ੍ਠਾਤਿ. ਜਗ੍ਗਨ੍ਤੋ ਆਪਜ੍ਜਿਤ੍ਵਾ ਪਨ ਤਿਣਵਤ੍ਥਾਰਕਸਮਥਟ੍ਠਾਨੇ ਸਯਨ੍ਤੋ ਪਟਿਬੁਦ੍ਧੋ ਆਪਜ੍ਜਤਿ ਪਸੁਤ੍ਤੋ ਵੁਟ੍ਠਾਤਿ ਨਾਮ. ਪਚ੍ਛਿਮਪਦਦ੍ਵਯਮ੍ਪਿ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ.
ਅਚਿਤ੍ਤਕਾਪਤ੍ਤਿਂ ਅਚਿਤ੍ਤਕੋ ਆਪਜ੍ਜਤਿ ਨਾਮ. ਪਚ੍ਛਾ ਦੇਸੇਨ੍ਤੋ ਸਚਿਤ੍ਤਕੋ ਵੁਟ੍ਠਾਤਿ. ਸਚਿਤ੍ਤਕਾਪਤ੍ਤਿਂ ਸਚਿਤ੍ਤਕੋ ਆਪਜ੍ਜਤਿ ਨਾਮ. ਤਿਣਵਤ੍ਥਾਰਕਟ੍ਠਾਨੇ ਸਯਨ੍ਤੋ ਅਚਿਤ੍ਤਕੋ ਵੁਟ੍ਠਾਤਿ. ਸੇਸਪਦਦ੍ਵਯਮ੍ਪਿ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ. ਯੋ ਸਭਾਗਂ ਆਪਤ੍ਤਿਂ ਦੇਸੇਤਿ, ਅਯਂ ਦੇਸਨਾਪਚ੍ਚਯਾ ਦੁਕ੍ਕਟਂ ਆਪਜ੍ਜਨ੍ਤੋ ਪਾਚਿਤ੍ਤਿਯਾਦੀਸੁ ਅਞ੍ਞਤਰਂ ਦੇਸੇਤਿ, ਤਞ੍ਚ ਦੇਸੇਨ੍ਤੋ ਦੁਕ੍ਕਟਂ ਆਪਜ੍ਜਤਿ. ਤਂ ਪਨ ਦੁਕ੍ਕਟਂ ਆਪਜ੍ਜਨ੍ਤੋ ਪਾਚਿਤ੍ਤਿਯਾਦਿਤੋ ਵੁਟ੍ਠਾਤਿ. ਪਾਚਿਤ੍ਤਿਯਾਦਿਤੋ ਚ ਵੁਟ੍ਠਹਨ੍ਤੋ ਤਂ ਆਪਜ੍ਜਤਿ. ਇਤਿ ਏਕਸ੍ਸ ਪੁਗ੍ਗਲਸ੍ਸ ਏਕਮੇਵ ਪਯੋਗਂ ਸਨ੍ਧਾਯ ‘‘ਆਪਤ੍ਤਿਂ ਆਪਜ੍ਜਨ੍ਤੋ ਦੇਸੇਤੀ’’ਤਿ ਇਦਂ ਚਤੁਕ੍ਕਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.
ਕਮ੍ਮਚਤੁਕ੍ਕੇ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗਾਪਤ੍ਤਿਂ ਕਮ੍ਮੇਨ ਆਪਜ੍ਜਤਿ, ਦੇਸੇਨ੍ਤੋ ਅਕਮ੍ਮੇਨ ਵੁਟ੍ਠਾਤਿ. ਵਿਸ੍ਸਟ੍ਠਿਆਦਿਕਂ ਅਕਮ੍ਮੇਨ ਆਪਜ੍ਜਤਿ, ਪਰਿਵਾਸਾਦਿਨਾ ਕਮ੍ਮੇਨ ਵੁਟ੍ਠਾਤਿ. ਸਮਨੁਭਾਸਨਂ ਕਮ੍ਮੇਨੇਵ ਆਪਜ੍ਜਤਿ, ਕਮ੍ਮੇਨ ਵੁਟ੍ਠਾਤਿ. ਸੇਸਂ ਅਕਮ੍ਮੇਨ ਆਪਜ੍ਜਤਿ,ਅਕਮ੍ਮੇਨਵੁਟ੍ਠਾਤਿ.
ਪਰਿਕ੍ਖਾਰਚਤੁਕ੍ਕੇ ਪਠਮੋ ਸਕਪਰਿਕ੍ਖਾਰੋ, ਦੁਤਿਯੋ ਸਙ੍ਘਿਕੋਵ ਤਤਿਯੋ ਚੇਤਿਯਸਨ੍ਤਕੋ, ਚਤੁਤ੍ਥੋ ਗਿਹਿਪਰਿਕ੍ਖਾਰੋ. ਸਚੇ ਪਨ ਸੋ ਪਤ੍ਤਚੀਵਰਨਵਕਮ੍ਮਭੇਸਜ੍ਜਾਨਂ ਅਤ੍ਥਾਯ ਆਹਟੋ ਹੋਤਿ, ਅਵਾਪੁਰਣਂ ਦਾਤੁਂ ਅਨ੍ਤੋ ਠਪਾਪੇਤੁਞ੍ਚ ਵਟ੍ਟਤਿ.
ਸਮ੍ਮੁਖਾਚਤੁਕ੍ਕੇ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗਾਪਤ੍ਤਿਂ ਸਙ੍ਘਸ੍ਸ ਸਮ੍ਮੁਖਾ ਆਪਜ੍ਜਤਿ, ਵੁਟ੍ਠਾਨਕਾਲੇ ਪਨ ਸਙ੍ਘੇਨ ਕਿਚ੍ਚਂ ਨਤ੍ਥੀਤਿ ਪਰਮ੍ਮੁਖਾ ਵੁਟ੍ਠਾਤਿ. ਵਿਸ੍ਸਟ੍ਠਿਆਦਿਕਂ ਪਰਮ੍ਮੁਖਾ ਆਪਜ੍ਜਤਿ, ਸਙ੍ਘਸ੍ਸ ਸਮ੍ਮੁਖਾ ਵੁਟ੍ਠਾਤਿ. ਸਮਨੁਭਾਸਨਂ ਸਙ੍ਘਸ੍ਸ ਸਮ੍ਮੁਖਾ ਏਵ ਆਪਜ੍ਜਤਿ, ਸਮ੍ਮੁਖਾ ਵੁਟ੍ਠਾਤਿ. ਸੇਸਂ ਸਮ੍ਪਜਾਨਮੁਸਾਵਾਦਾਦਿਭੇਦਂ ਪਰਮ੍ਮੁਖਾਵ ਆਪਜ੍ਜਤਿ, ਪਰਮ੍ਮੁਖਾਵ ਵੁਟ੍ਠਾਤਿ. ਅਜਾਨਨ੍ਤਚਤੁਕ੍ਕਂ ਅਚਿਤ੍ਤਕਚਤੁਕ੍ਕਸਦਿਸਂ.
ਲਿਙ੍ਗਪਾਤੁਭਾਵੇਨਾਤਿ ਸਯਿਤਸ੍ਸੇਵ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਲਿਙ੍ਗਪਰਿਵਤ੍ਤੇ ਜਾਤੇ ਸਹਗਾਰਸੇਯ੍ਯਾਪਤ੍ਤਿ ਹੋਤਿ ਇਦਮੇਵ ਤਂ ਪਟਿਚ੍ਚ ਵੁਤ੍ਤਂ. ਉਭਿਨ੍ਨਮ੍ਪਿ ਪਨ ਅਸਾਧਾਰਣਾਪਤ੍ਤਿ ਲਿਙ੍ਗਪਾਤੁਭਾਵੇਨ ਵੁਟ੍ਠਾਤਿ. ਸਹਪਟਿਲਾਭਚਤੁਕ੍ਕੇ ਯਸ੍ਸ ਭਿਕ੍ਖੁਨੋ ਲਿਙ੍ਗਂ ਪਰਿਵਤ੍ਤਤਿ, ਸੋ ਸਹ ਲਿਙ੍ਗਪਟਿਲਾਭੇਨ ਪਠਮਂ ਉਪ੍ਪਨ੍ਨਵਸੇਨ ਸੇਟ੍ਠਭਾਵੇਨ ਚ ਪੁਰਿਮਂ ਪੁਰਿਸਲਿਙ੍ਗਂ ਜਹਤਿ, ਪਚ੍ਛਿਮੇ ਇਤ੍ਥਿਲਿਙ੍ਗੇ ਪਤਿਟ੍ਠਾਤਿ, ਪੁਰਿਸਕੁਤ੍ਤਪੁਰਿਸਾਕਾਰਾਦਿਵਸੇਨ ਪਵਤ੍ਤਾ ਕਾਯਵਚੀਵਿਞ੍ਞਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤਿ, ਭਿਕ੍ਖੂਤਿ ਵਾ ਪੁਰਿਸੋਤਿ ਵਾ ਏਵਂ ਪਵਤ੍ਤਾ ਪਣ੍ਣਤ੍ਤਿਯੋ ਨਿਰੁਜ੍ਝਨ੍ਤਿ, ਯਾਨਿ ਭਿਕ੍ਖੁਨੀਹਿ ਅਸਾਧਾਰਣਾਨਿ ਛਚਤ੍ਤਾਲੀਸ ਸਿਕ੍ਖਾਪਦਾਨਿ ਤੇਹਿ ਅਨਾਪਤ੍ਤਿਯੇਵ ਹੋਤਿ. ਦੁਤਿਯਚਤੁਕ੍ਕੇ ਪਨ ਯਸ੍ਸਾ ਭਿਕ੍ਖੁਨਿਯਾ ਲਿਙ੍ਗਂ ਪਰਿਵਤ੍ਤਤਿ, ਸਾ ਪਚ੍ਛਾਸਮੁਪ੍ਪਤ੍ਤਿਯਾ ਵਾ ਹੀਨਭਾਵੇਨ ਵਾ ਪਚ੍ਛਿਮਨ੍ਤਿ ਸਙ੍ਖ੍ਯਂ ਗਤਂ ਇਤ੍ਥਿਲਿਙ੍ਗਂ ਜਹਤਿ, ਵੁਤ੍ਤਪ੍ਪਕਾਰੇਨ ਪੁਰਿਮਨ੍ਤਿ ਸਙ੍ਖ੍ਯਂ ਗਤੇ ਪੁਰਿਸਲਿਙ੍ਗੇ ਪਤਿਟ੍ਠਾਤਿ. ਵੁਤ੍ਤਵਿਪਰੀਤਾ ਵਿਞ੍ਞਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤਿ, ਭਿਕ੍ਖੁਨੀਤਿ ਵਾ ਇਤ੍ਥੀਤਿ ਵਾ ਏਵਂ ਪਵਤ੍ਤਾ ਪਣ੍ਣਤ੍ਤਿਯੋਪਿ ਨਿਰੁਜ੍ਝਨ੍ਤਿ, ਯਾਨਿ ਭਿਕ੍ਖੂਹਿ ਅਸਾਧਾਰਣਾਨਿ ਸਤਂ ਤਿਂਸਞ੍ਚ ਸਿਕ੍ਖਾਪਦਾਨਿ, ਤੇਹਿ ਅਨਾਪਤ੍ਤਿਯੇਵ ਹੋਤਿ.
ਚਤ੍ਤਾਰੋ ਸਾਮੁਕ੍ਕਂਸਾਤਿ ਚਤ੍ਤਾਰੋ ਮਹਾਪਦੇਸਾ, ਤੇ ਹਿ ਭਗਵਤਾ ਅਨੁਪ੍ਪਨ੍ਨੇ ਵਤ੍ਥੁਮ੍ਹਿ ਸਯਂ ਉਕ੍ਕਂਸਿਤ੍ਵਾ ਉਕ੍ਖਿਪਿਤ੍ਵਾ ਠਪਿਤਤ੍ਤਾ ‘‘ਸਾਮੁਕ੍ਕਂਸਾ’’ਤਿ ਵੁਚ੍ਚਨ੍ਤਿ. ਪਰਿਭੋਗਾਤਿ ਅਜ੍ਝੋਹਰਣੀਯਪਰਿਭੋਗਾ, ਉਦਕਂ ਪਨ ਅਕਾਲਿਕਤ੍ਤਾ ਅਪ੍ਪਟਿਗ੍ਗਹਿਤਕਂ ਵਟ੍ਟਤਿ. ਯਾਵਕਾਲਿਕਾਦੀਨਿ ਅਪ੍ਪਟਿਗ੍ਗਹਿਤਕਾਨਿ ਅਜ੍ਝੋਹਰਿਤੁਂ ਨ ਵਟ੍ਟਨ੍ਤਿ. ਚਤ੍ਤਾਰਿ ਮਹਾਵਿਕਟਾਨਿ ਕਾਲੋਦਿਸ੍ਸਤ੍ਤਾ ਯਥਾਵੁਤ੍ਤੇ ਕਾਲੇ ਵਟ੍ਟਨ੍ਤਿ. ਉਪਾਸਕੋ ਸੀਲਵਾਤਿ ਪਞ੍ਚ ਵਾ ਦਸ ਵਾ ਸੀਲਾਨਿ ਗੋਪਯਮਾਨੋ.
ਆਗਨ੍ਤੁਕਾਦਿਚਤੁਕ੍ਕੇ ਸਛਤ੍ਤੁਪਾਹਨੋ ਸਸੀਸਂ ਪਾਰੁਤੋ ਵਿਹਾਰਂ ਪਵਿਸਨ੍ਤੋ ਤਤ੍ਥ ਵਿਚਰਨ੍ਤੋ ਚ ਆਗਨ੍ਤੁਕੋਵ ਆਪਜ੍ਜਤਿ, ਨੋ ਆਵਾਸਿਕੋ. ਆਵਾਸਿਕਵਤ੍ਤਂ ਅਕਰੋਨ੍ਤੋ ਪਨ ਆਵਾਸਿਕੋ ਆਪਜ੍ਜਤਿ, ਨੋ ਆਗਨ੍ਤੁਕੋ. ਸੇਸਂ ਕਾਯਵਚੀਦ੍ਵਾਰਿਕਂ ਆਪਤ੍ਤਿਂ ਉਭੋਪਿ ਆਪਜ੍ਜਨ੍ਤਿ, ਅਸਾਧਾਰਣਂ ਆਪਤ੍ਤਿਂ ਨੇਵ ਆਗਨ੍ਤੁਕੋ ਆਪਜ੍ਜਤਿ, ਨੋ ਆਵਾਸਿਕੋ. ਗਮਿਯਚਤੁਕ੍ਕੇਪਿ ਗਮਿਯਵਤ੍ਤਂ ਅਪੂਰੇਤ੍ਵਾ ਗਚ੍ਛਨ੍ਤੋ ਗਮਿਕੋ ਆਪਜ੍ਜਤਿ, ਨੋ ਆਵਾਸਿਕੋ. ਆਵਾਸਿਕਵਤ੍ਤਂ ਅਕਰੋਨ੍ਤੋ ਪਨ ਆਵਾਸਿਕੋ ਆਪਜ੍ਜਤਿ, ਨੋ ਗਮਿਕੋ. ਸੇਸਂ ਉਭੋਪਿ ਆਪਜ੍ਜਨ੍ਤਿ, ਅਸਾਧਾਰਣਂ ਉਭੋਪਿ ਨਾਪਜ੍ਜਨ੍ਤਿ. ਵਤ੍ਥੁਨਾਨਤ੍ਤਤਾਦਿਚਤੁਕ੍ਕੇ ਚਤੁਨ੍ਨਂ ਪਾਰਾਜਿਕਾਨਂ ਅਞ੍ਞਮਞ੍ਞਂ ਵਤ੍ਥੁਨਾਨਤ੍ਤਤਾਵ ਹੋਤਿ,ਨਆਪਤ੍ਤਿਨਾਨਤ੍ਤਤਾ. ਸਬ੍ਬਾਪਿ ਹਿ ਸਾ ਪਾਰਾਜਿਕਾਪਤ੍ਤਿਯੇਵ. ਸਙ੍ਘਾਦਿਸੇਸਾਦੀਸੁਪਿ ਏਸੇਵ ਨਯੋ. ਭਿਕ੍ਖੁਸ੍ਸ ਚ ਭਿਕ੍ਖੁਨਿਯਾ ਚ ਅਞ੍ਞਮਞ੍ਞਂ ਕਾਯਸਂਸਗ੍ਗੇ ਭਿਕ੍ਖੁਸ੍ਸ ਸਙ੍ਘਾਦਿਸੇਸੋ ਭਿਕ੍ਖੁਨਿਯਾ ਪਾਰਾਜਿਕਨ੍ਤਿ ਏਵਂ ਆਪਤ੍ਤਿਨਾਨਤ੍ਤਤਾਵ ਹੋਤਿ, ਨ ਵਤ੍ਥੁਨਾਨਤ੍ਤਤਾ, ਉਭਿਨ੍ਨਮ੍ਪਿ ਹਿ ਕਾਯਸਂਸਗ੍ਗੋਵ ਵਤ੍ਥੁ. ਤਥਾ ‘‘ਲਸੁਣਕ੍ਖਾਦਨੇ ਭਿਕ੍ਖੁਨਿਯਾ ਪਾਚਿਤ੍ਤਿਯਂ, ਭਿਕ੍ਖੁਸ੍ਸ ਦੁਕ੍ਕਟ’’ਨ੍ਤਿ ਏਵਮਾਦਿਨਾਪੇਤ੍ਥ ਨਯੇਨ ਯੋਜਨਾ ਵੇਦਿਤਬ੍ਬਾ. ਚਤੁਨ੍ਨਂ ਪਾਰਾਜਿਕਾਨਂ ਤੇਰਸਹਿ ਸਙ੍ਘਾਦਿਸੇਸੇਹਿ ਸਦ੍ਧਿਂ ਵਤ੍ਥੁਨਾਨਤ੍ਤਤਾ ਚੇਵ ਆਪਤ੍ਤਿਨਾਨਤ੍ਤਤਾ ਚ. ਏਵਂ ਸਙ੍ਘਾਦਿਸੇਸਾਦੀਨਂ ਅਨਿਯਤਾਦੀਹਿ. ਆਦਿਤੋ ਪਟ੍ਠਾਯ ਚਤ੍ਤਾਰਿ ਪਾਰਾਜਿਕਾਨਿ ਏਕਤੋ ਆਪਜ੍ਜਨ੍ਤਾਨਂ ਭਿਕ੍ਖੁਭਿਕ੍ਖੁਨੀਨਂ ਨੇਵ ਵਤ੍ਥੁਨਾਨਤ੍ਤਤਾ ਨੋ ਆਪਤ੍ਤਿਨਾਨਤ੍ਤਤਾ. ਵਿਸੁਂ ਆਪਜ੍ਜਨ੍ਤੇਸੁਪਿ ਸੇਸਾ ਸਾਧਾਰਣਾਪਤ੍ਤਿਯੋ ਆਪਜ੍ਜਨ੍ਤੇਸੁਪਿ ਏਸੇਵ ਨਯੋ.
ਵਤ੍ਥੁਸਭਾਗਾਦਿਚਤੁਕ੍ਕੇ ਭਿਕ੍ਖੁਸ੍ਸ ਚ ਭਿਕ੍ਖੁਨਿਯਾ ਚ ਕਾਯਸਂਸਗ੍ਗੇ ਵਤ੍ਥੁਸਭਾਗਤਾ, ਨੋ ਆਪਤ੍ਤਿਸਭਾਗਤਾ, ਚਤੂਸੁ ਪਾਰਾਜਿਕੇਸੁ ਆਪਤ੍ਤਿਸਭਾਗਤਾ, ਨੋ ਵਤ੍ਥੁਸਭਾਗਤਾ. ਏਸ ਨਯੋ ਸਙ੍ਘਾਦਿਸੇਸਾਦੀਸੁ. ਭਿਕ੍ਖੁਸ੍ਸ ਚ ਭਿਕ੍ਖੁਨਿਯਾ ਚ ਚਤੂਸੁ ਪਾਰਾਜਿਕੇਸੁ ਵਤ੍ਥੁਸਭਾਗਤਾ ਚੇਵ ਆਪਤ੍ਤਿਸਭਾਗਤਾ ਚ. ਏਸ ਨਯੋ ਸਬ੍ਬਾਸੁ ਸਾਧਾਰਣਾਪਤ੍ਤੀਸੁ. ਅਸਾਧਾਰਣਾਪਤ੍ਤਿਯਂ ਨੇਵ ਵਤ੍ਥੁਸਭਾਗਤਾ ਨੋ ਆਪਤ੍ਤਿਸਭਾਗਤਾ. ਯੋ ਹਿ ਪੁਰਿਮਚਤੁਕ੍ਕੇ ਪਠਮੋ ਪਞ੍ਹੋ, ਸੋ ਇਧ ਦੁਤਿਯੋ; ਯੋ ਚ ਤਤ੍ਥ ਦੁਤਿਯੋ, ਸੋ ਇਧ ਪਠਮੋ. ਤਤਿਯਚਤੁਤ੍ਥੇਸੁ ਨਾਨਾਕਰਣਂ ਨਤ੍ਥਿ.
ਉਪਜ੍ਝਾਯਚਤੁਕ੍ਕੇ ਸਦ੍ਧਿਵਿਹਾਰਿਕਸ੍ਸ ਉਪਜ੍ਝਾਯੇਨ ਕਤ੍ਤਬ੍ਬਵਤ੍ਤਸ੍ਸ ਅਕਰਣੇ ਆਪਤ੍ਤਿਂ ਉਪਜ੍ਝਾਯੋ ਆਪਜ੍ਜਤਿ, ਨੋ ਸਦ੍ਧਿਵਿਹਾਰਿਕੋ ਉਪਜ੍ਝਾਯਸ੍ਸ ਕਤ੍ਤਬ੍ਬਵਤ੍ਤਂ ਅਕਰੋਨ੍ਤੋ ਸਦ੍ਧਿਵਿਹਾਰਿਕੋ ਆਪਜ੍ਜਤਿ, ਨੋ ਉਪਜ੍ਝਾਯੋ; ਸੇਸਂ ਉਭੋਪਿ ਆਪਜ੍ਜਨ੍ਤਿ, ਅਸਾਧਾਰਣਂ ਉਭੋਪਿ ਨਾਪਜ੍ਜਨ੍ਤਿ. ਆਚਰਿਯਚਤੁਕ੍ਕੇਪਿ ਏਸੇਵ ਨਯੋ.
ਆਦਿਯਨ੍ਤਚਤੁਕ੍ਕੇ ਪਾਦਂ ਵਾ ਅਤਿਰੇਕਪਾਦਂ ਵਾ ਸਹਤ੍ਥਾ ਆਦਿਯਨ੍ਤੋ ਗਰੁਕਂ ਆਪਜ੍ਜਤਿ, ਊਨਕਪਾਦਂ ਗਣ੍ਹਾਹੀਤਿ ਆਣਤ੍ਤਿਯਾ ਅਞ੍ਞਂ ਪਯੋਜੇਨ੍ਤੋ ਲਹੁਕਂ ਆਪਜ੍ਜਤਿ. ਏਤੇਨ ਨਯੇਨ ਸੇਸਪਦਤ੍ਤਯਂ ਵੇਦਿਤਬ੍ਬਂ.
ਅਭਿਵਾਦਨਾਰਹਚਤੁਕ੍ਕੇ ਭਿਕ੍ਖੁਨੀਨਂ ਤਾਵ ਭਤ੍ਤਗ੍ਗੇ ਨਵਮਭਿਕ੍ਖੁਨਿਤੋ ਪਟ੍ਠਾਯ ਉਪਜ੍ਝਾਯਾਪਿ ਅਭਿਵਾਦਨਾਰਹਾ ਨੋ ਪਚ੍ਚੁਟ੍ਠਾਨਾਰਹਾ. ਅਵਿਸੇਸੇਨ ਚ ਵਿਪ੍ਪਕਤਭੋਜਨਸ੍ਸ ਭਿਕ੍ਖੁਸ੍ਸ ਯੋ ਕੋਚਿ ਵੁਡ੍ਢਤਰੋ. ਸਟ੍ਠਿਵਸ੍ਸਸ੍ਸਾਪਿ ਪਾਰਿਵਾਸਿਕਸ੍ਸ ਸਮੀਪਗਤੋ ਤਦਹੁਪਸਮ੍ਪਨ੍ਨੋਪਿ ਪਚ੍ਚੁਟ੍ਠਾਨਾਰਹੋ ਨੋ ਅਭਿਵਾਦਨਾਰਹੋ. ਅਪ੍ਪਟਿਕ੍ਖਿਤ੍ਤੇਸੁ ਠਾਨੇਸੁ ਵੁਡ੍ਢੋ ਨਵਕਸ੍ਸ ਅਭਿਵਾਦਨਾਰਹੋ ਚੇਵ ਪਚ੍ਚੁਟ੍ਠਾਨਾਰਹੋ ਚ. ਨਵਕੋ ਪਨ ਵੁਡ੍ਢਸ੍ਸ ਨੇਵ ਅਭਿਵਾਦਨਾਰਹੋ ਨ ਪਚ੍ਚੁਟ੍ਠਾਨਾਰਹੋ. ਆਸਨਾਰਹਚਤੁਕ੍ਕਸ੍ਸ ਪਠਮਪਦਂ ਪੁਰਿਮਚਤੁਕ੍ਕੇ ਦੁਤਿਯਪਦੇਨ, ਦੁਤਿਯਪਦਞ੍ਚ ਪਠਮਪਦੇਨ ਅਤ੍ਥਤੋ ਸਦਿਸਂ.
ਕਾਲਚਤੁਕ੍ਕੇ ਪਵਾਰੇਤ੍ਵਾ ਭੁਞ੍ਜਨ੍ਤੋ ਕਾਲੇ ਆਪਜ੍ਜਤਿ ਨੋ ਵਿਕਾਲੇ, ਵਿਕਾਲਭੋਜਨਾਪਤ੍ਤਿਂ ਵਿਕਾਲੇ ਆਪਜ੍ਜਤਿ ਨੋ ਕਾਲੇ, ਸੇਸਂ ਕਾਲੇ ਚੇਵ ਆਪਜ੍ਜਤਿ ਵਿਕਾਲੇ ਚ, ਅਸਾਧਾਰਣਂ ਨੇਵ ਕਾਲੇ ਨੋ ਵਿਕਾਲੇ. ਪਟਿਗ੍ਗਹਿਤਚਤੁਕ੍ਕੇ ਪੁਰੇਭਤ੍ਤਂ ਪਟਿਗ੍ਗਹਿਤਾਮਿਸਂ ਕਾਲੇ ਕਪ੍ਪਤਿ ਨੋ ਵਿਕਾਲੇ. ਪਾਨਕਂ ਵਿਕਾਲੇ ਕਪ੍ਪਤਿ, ਪੁਨਦਿਵਸਮ੍ਹਿ ਨੋ ਕਾਲੇ. ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਕਾਲੇ ਚੇਵ ਕਪ੍ਪਤਿ ਵਿਕਾਲੇ ਚ. ਅਤ੍ਤਨੋ ਅਤ੍ਤਨੋ ਕਾਲਾਤੀਤਂ ਯਾਵਕਾਲਿਕਾਦਿਤ੍ਤਯਂ ਅਕਪ੍ਪਿਯਮਂਸਂ ਉਗ੍ਗਹਿਤਕਮਪ੍ਪਟਿਗ੍ਗਹਿਤਕਞ੍ਚ ਨੇਵ ਕਾਲੇ ਕਪ੍ਪਤਿ ਨੋ ਵਿਕਾਲੇ.
ਪਚ੍ਚਨ੍ਤਿਮਚਤੁਕ੍ਕੇ ਸਮੁਦ੍ਦੇ ਸੀਮਂ ਬਨ੍ਧਨ੍ਤੋ ਪਚ੍ਚਨ੍ਤਿਮੇਸੁ ਜਨਪਦੇਸੁ ਆਪਜ੍ਜਤਿ, ਨੋ ਮਜ੍ਝਿਮੇਸੁ; ਪਞ੍ਚਵਗ੍ਗੇਨ ਗਣੇਨ ਉਪਸਮ੍ਪਾਦੇਨ੍ਤੋ ਗੁਣਙ੍ਗੁਣੂਪਾਹਨਂ ਧੁਵਨਹਾਨਂ ਚਮ੍ਮਤ੍ਥਰਣਾਨਿ ਚ ਮਜ੍ਝਿਮੇਸੁ ਜਨਪਦੇਸੁ ਆਪਜ੍ਜਤਿ ਨੋ ਪਚ੍ਚਨ੍ਤਿਮੇਸੁ. ਇਮਾਨਿ ਚਤ੍ਤਾਰਿ ‘‘ਇਧ ਨ ਕਪ੍ਪਨ੍ਤੀ’’ਤਿ ਵਦਨ੍ਤੋਪਿ ਪਚ੍ਚਨ੍ਤਿਮੇਸੁ ਆਪਜ੍ਜਤਿ, ‘‘ਇਧ ਕਪ੍ਪਨ੍ਤੀ’’ਤਿ ਵਦਨ੍ਤੋ ਪਨ ਮਜ੍ਝਿਮੇਸੁ ਆਪਜ੍ਜਤਿ. ਸੇਸਾਪਤ੍ਤਿਂ ਉਭਯਤ੍ਥ ਆਪਜ੍ਜਤਿ, ਅਸਾਧਾਰਣਂ ਨ ਕਤ੍ਥਚਿ ਆਪਜ੍ਜਤਿ. ਦੁਤਿਯਚਤੁਕ੍ਕੇ ਪਞ੍ਚਵਗ੍ਗੇਨ ਗਣੇਨ ਉਪਸਮ੍ਪਦਾਦਿ ਚਤੁਬ੍ਬਿਧਮ੍ਪਿ ਵਤ੍ਥੁ ਪਚ੍ਚਨ੍ਤਿਮੇਸੁ ਜਨਪਦੇਸੁ ਕਪ੍ਪਤਿ. ‘‘ਇਦਂ ਕਪ੍ਪਤੀ’’ਤਿ ਦੀਪੇਤੁਮ੍ਪਿ ਤਤ੍ਥੇਵ ਕਪ੍ਪਤਿ ਨੋ ਮਜ੍ਝਿਮੇਸੁ. ‘‘ਇਦਂ ਨ ਕਪ੍ਪਤੀ’’ਤਿ ਦੀਪੇਤੁਂ ਪਨ ਮਜ੍ਝਿਮੇਸੁ ਜਨਪਦੇਸੁ ਕਪ੍ਪਤਿ ਨੋ ਪਚ੍ਚਨ੍ਤਿਮੇਸੁ. ਸੇਸਂ ‘‘ਅਨੁਜਾਨਾਮਿ ਭਿਕ੍ਖਵੇ ਪਞ੍ਚ ਲੋਣਾਨੀ’’ਤਿਆਦਿ ਅਨੁਞ੍ਞਾਤਕਂ ਉਭਯਤ੍ਥ ਕਪ੍ਪਤਿ. ਯਂ ਪਨ ਅਕਪ੍ਪਿਯਨ੍ਤਿ ਪਟਿਕ੍ਖਿਤ੍ਤਂ, ਤਂ ਉਭਯਤ੍ਥਾਪਿ ਨ ਕਪ੍ਪਤਿ.
ਅਨ੍ਤੋਆਦਿਚਤੁਕ੍ਕੇ ਅਨੁਪਖਜ੍ਜ ਸੇਯ੍ਯਾਦਿਂ ਅਨ੍ਤੋ ਆਪਜ੍ਜਤਿ ਨੋ ਬਹਿ, ਅਜ੍ਝੋਕਾਸੇ ਸਙ੍ਘਿਕਮਞ੍ਚਾਦੀਨਿ ਨਿਕ੍ਖਿਪਿਤ੍ਵਾ ਪਕ੍ਕਮਨ੍ਤੋ ਬਹਿ ਆਪਜ੍ਜਤਿ ਨੋ ਅਨ੍ਤੋ, ਸੇਸਂ ਅਨ੍ਤੋ ਚੇਵ ਬਹਿ ਚ, ਅਸਾਧਾਰਣਂ ਨੇਵ ਅਨ੍ਤੋ ਨ ਬਹਿ. ਅਨ੍ਤੋਸੀਮਾਦਿਚਤੁਕ੍ਕੇ ਆਗਨ੍ਤੁਕੋ ਵਤ੍ਤਂ ਅਪੂਰੇਨ੍ਤੋ ਅਨ੍ਤੋਸੀਮਾਯ ਆਪਜ੍ਜਤਿ, ਗਮਿਯੋ ਬਹਿਸੀਮਾਯ ਮੁਸਾਵਾਦਾਦਿਂ ਅਨ੍ਤੋਸੀਮਾਯ ਚ ਬਹਿਸੀਮਾਯ ਚ ਆਪਜ੍ਜਤਿ,ਅਸਾਧਾਰਣਂ ਨ ਕਤ੍ਥਚਿ. ਗਾਮਚਤੁਕ੍ਕੇ ਅਨ੍ਤਰਘਰਪਟਿਸਂਯੁਤ੍ਤਂ ਸੇਖਿਯਪਞ੍ਞਤ੍ਤਿਂ ਗਾਮੇ ਆਪਜ੍ਜਤਿ ਨੋ ਅਰਞ੍ਞੇ. ਭਿਕ੍ਖੁਨੀ ਅਰੁਣਂ ਉਟ੍ਠਾਪਯਮਾਨਾ ਅਰਞ੍ਞੇ ਆਪਜ੍ਜਤਿ ਨੋ ਗਾਮੇ. ਮੁਸਾਵਾਦਾਦਿਂ ਗਾਮੇ ਚੇਵ ਆਪਜ੍ਜਤਿ ਅਰਞ੍ਞੇ ਚ, ਅਸਾਧਾਰਣਂ ਨ ਕਤ੍ਥਚਿ.
ਚਤ੍ਤਾਰੋ ਪੁਬ੍ਬਕਿਚ੍ਚਾਤਿ ‘‘ਸਮ੍ਮਜ੍ਜਨੀ ਪਦੀਪੋ ਚ ਉਦਕਂ ਆਸਨੇਨ ਚਾ’’ਤਿ ਇਦਂ ਚਤੁਬ੍ਬਿਧਂ ਪੁਬ੍ਬਕਰਣਨ੍ਤਿ ਵੁਚ੍ਚਤੀਤਿ ਵੁਤ੍ਤਂ. ‘‘ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਂ ਭਿਕ੍ਖੁਗਣਨਾ ਚ ਓਵਾਦੋ’’ਤਿ ਇਮੇ ਪਨ ‘‘ਚਤ੍ਤਾਰੋ ਪੁਬ੍ਬਕਿਚ੍ਚਾ’’ਤਿ ਵੇਦਿਤਬ੍ਬਾ. ਚਤ੍ਤਾਰੋ ਪਤ੍ਤਕਲ੍ਲਾਤਿ ਉਪੋਸਥੋ ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਆਗਤਾ ਹੋਨ੍ਤਿ, ਸਭਾਗਾਪਤ੍ਤਿਯੋ ਨ ਵਿਜ੍ਜਨ੍ਤਿ, ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤਿ, ਪਤ੍ਤਕਲ੍ਲਨ੍ਤਿ ਵੁਚ੍ਚਤੀਤਿ. ਚਤ੍ਤਾਰਿ ਅਨਞ੍ਞਪਾਚਿਤ੍ਤਿਯਾਨੀਤਿ ‘‘ਏਤਦੇਵ ਪਚ੍ਚਯਂ ਕਰਿਤ੍ਵਾ ਅਨਞ੍ਞਂ ਪਾਚਿਤ੍ਤਿਯ’’ਨ੍ਤਿ ਏਵਂ ਵੁਤ੍ਤਾਨਿ ਅਨੁਪਖਜ੍ਜਸੇਯ੍ਯਾਕਪ੍ਪਨਸਿਕ੍ਖਾਪਦਂ ‘‘ਏਹਾਵੁਸੋ ਗਾਮਂ ਵਾ ਨਿਗਮਂ ਵਾ’’ਤਿ ਸਿਕ੍ਖਾਪਦਂ, ਸਞ੍ਚਿਚ੍ਚ ਕੁਕ੍ਕੁਚ੍ਚਉਪਦਹਨਂ, ਉਪਸ੍ਸੁਤਿਤਿਟ੍ਠਨਨ੍ਤਿ ਇਮਾਨਿ ਚਤ੍ਤਾਰਿ. ਚਤਸ੍ਸੋ ਭਿਕ੍ਖੁਸਮ੍ਮੁਤਿਯੋਤਿ ‘‘ਏਕਰਤ੍ਤਮ੍ਪਿ ਚੇ ਭਿਕ੍ਖੁ ਤਿਚੀਵਰੇਨ ਵਿਪ੍ਪਵਸੇਯ੍ਯ ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ, ਅਞ੍ਞਂ ਨਵਂ ਸਨ੍ਥਤਂ ਕਾਰਾਪੇਯ੍ਯ ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ, ਤਤੋ ਚੇ ਉਤ੍ਤਰਿ ਵਿਪ੍ਪਵਸੇਯ੍ਯ ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ, ਦੁਟ੍ਠੁਲ੍ਲਂ ਆਪਤ੍ਤਿਂ ਅਨੁਪਸਮ੍ਪਨ੍ਨਸ੍ਸ ਆਰੋਚੇਯ੍ਯ ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ’’ਤਿ ਏਵਂ ਆਗਤਾ ਤੇਰਸਹਿ ਸਮ੍ਮੁਤੀਹਿ ਮੁਤ੍ਤਾ ਸਮ੍ਮੁਤਿਯੋ. ਗਿਲਾਨਚਤੁਕ੍ਕੇ ਅਞ੍ਞਭੇਸਜ੍ਜੇਨ ਕਰਣੀਯੇਨ ਲੋਲਤਾਯ ਅਞ੍ਞਂ ਵਿਞ੍ਞਾਪੇਨ੍ਤੋ ਗਿਲਾਨੋ ਆਪਜ੍ਜਤਿ, ਅਭੇਸਜ੍ਜਕਰਣੀਯੇਨ ਭੇਸਜ੍ਜਂ ਵਿਞ੍ਞਾਪੇਨ੍ਤੋ ਅਗਿਲਾਨੋ ਆਪਜ੍ਜਤਿ, ਮੁਸਾਵਾਦਾਦਿਂ ਉਭੋਪਿ ਆਪਜ੍ਜਨ੍ਤਿ, ਅਸਾਧਾਰਣਂ ਉਭੋਪਿ ਨਾਪਜ੍ਜਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਚਤੁਕ੍ਕਵਾਰਵਣ੍ਣਨਾ ਨਿਟ੍ਠਿਤਾ.
ਪਞ੍ਚਕਵਾਰਵਣ੍ਣਨਾ
੩੨੫. ਪਞ੍ਚਕੇਸੁ ਪਞ੍ਚ ਪੁਗ੍ਗਲਾ ਨਿਯਤਾਤਿ ਆਨਨ੍ਤਰਿਯਾਨਮੇਵੇਤਂ ਗਹਣਂ. ਪਞ੍ਚ ਛੇਦਨਕਾ ਆਪਤ੍ਤਿਯੋ ਨਾਮ ਪਮਾਣਾਤਿਕ੍ਕਨ੍ਤੇ ਮਞ੍ਚਪੀਠੇ ਨਿਸੀਦਨਕਣ੍ਡੁਪ੍ਪਟਿਚ੍ਛਾਦਿਵਸ੍ਸਿਕਸਾਟਿਕਾਸੁ ਸੁਗਤਚੀਵਰੇ ਚ ਵੇਦਿਤਬ੍ਬਾ. ਪਞ੍ਚਹਾਕਾਰੇਹੀਤਿ ਅਲਜ੍ਜਿਤਾ, ਅਞ੍ਞਾਣਤਾ, ਕੁਕ੍ਕੁਚ੍ਚਪ੍ਪਕਤਤਾ, ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾ, ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਤਿ ਇਮੇਹਿ ਪਞ੍ਚਹਿ. ਪਞ੍ਚ ਆਪਤ੍ਤਿਯੋ ਮੁਸਾਵਾਦਪਚ੍ਚਯਾਤਿ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਸਙ੍ਘਾਦਿਸੇਸਪਾਚਿਤ੍ਤਿਯਾ. ਅਨਾਮਨ੍ਤਚਾਰੋਤਿ ‘‘ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯਾ’’ਤਿ ਇਮਸ੍ਸ ਆਪੁਚ੍ਛਿਤ੍ਵਾ ਚਾਰਸ੍ਸ ਅਭਾਵੋ. ਅਨਧਿਟ੍ਠਾਨਨ੍ਤਿ ‘‘ਗਣਭੋਜਨੇ ਅਞ੍ਞਤ੍ਰ ਸਮਯਾ’’ਤਿ ਵੁਤ੍ਤਂ ਸਮਯਂ ਅਧਿਟ੍ਠਹਿਤ੍ਵਾ ਭੋਜਨਂ ਅਧਿਟ੍ਠਾਨਂ ਨਾਮ; ਤਥਾ ਅਕਰਣਂ ਅਨਧਿਟ੍ਠਾਨਂ. ਅਵਿਕਪ੍ਪਨਾ ਨਾਮ ਯਾ ਪਰਮ੍ਪਰਭੋਜਨੇ ਵਿਕਪ੍ਪਨਾ ਵੁਤ੍ਤਾ, ਤਸ੍ਸਾ ਅਕਰਣਂ. ਇਮਾਨਿ ਹਿ ਪਞ੍ਚ ਪਿਣ੍ਡਪਾਤਿਕਸ੍ਸ ਧੁਤਙ੍ਗੇਨੇਵ ਪਟਿਕ੍ਖਿਤ੍ਤਾਨਿ. ਉਸ੍ਸਙ੍ਕਿਤਪਰਿਸਙ੍ਕਿਤੋਤਿ ਯੇ ਪਸ੍ਸਨ੍ਤਿ, ਯੇ ਸੁਣਨ੍ਤਿ, ਤੇਹਿ ਉਸ੍ਸਙ੍ਕਿਤੋ ਚੇਵ ਪਰਿਸਙ੍ਕਿਤੋ ਚ. ਅਪਿ ਅਕੁਪ੍ਪਧਮ੍ਮੋ ਖੀਣਾਸਵੋਪਿ ਸਮਾਨੋ, ਤਸ੍ਮਾ ਅਗੋਚਰਾ ਪਰਿਹਰਿਤਬ੍ਬਾ. ਨ ਹਿ ਏਤੇਸੁ ਸਨ੍ਦਿਸ੍ਸਮਾਨੋ ਅਯਸਤੋ ਵਾ ਗਰਹਤੋ ਵਾ ਮੁਚ੍ਚਤਿ. ਸੋਸਾਨਿਕਨ੍ਤਿ ਸੁਸਾਨੇ ਪਤਿਤਕਂ. ਪਾਪਣਿਕਨ੍ਤਿ ਆਪਣਦ੍ਵਾਰੇ ਪਤਿਤਕਂ. ਥੂਪਚੀਵਰਨ੍ਤਿ ਵਮ੍ਮਿਕਂ ਪਰਿਕ੍ਖਿਪਿਤ੍ਵਾ ਬਲਿਕਮ੍ਮਕਤਂ. ਆਭਿਸੇਕਿਕਨ੍ਤਿ ਨਹਾਨਟ੍ਠਾਨੇ ਵਾ ਰਞ੍ਞੋ ਅਭਿਸੇਕਟ੍ਠਾਨੇ ਵਾ ਛਡ੍ਡਿਤਚੀਵਰਂ. ਭਤਪਟਿਯਾਭਤਨ੍ਤਿ ਸੁਸਾਨਂ ਨੇਤ੍ਵਾ ਪੁਨ ਆਨੀਤਕਂ. ਪਞ੍ਚ ਮਹਾਚੋਰਾ ਉਤ੍ਤਰਿਮਨੁਸ੍ਸਧਮ੍ਮੇ ਵੁਤ੍ਤਾ.
ਪਞ੍ਚਾਪਤ੍ਤਿਯੋ ਕਾਯਤੋ ਸਮੁਟ੍ਠਨ੍ਤੀਤਿ ਪਠਮੇਨ ਆਪਤ੍ਤਿਸਮੁਟ੍ਠਾਨੇਨ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ, ‘‘ਭਿਕ੍ਖੁ ਕਪ੍ਪਿਯਸਞ੍ਞੀ ਸਞ੍ਞਾਚਿਕਾਯ ਕੁਟਿਂ ਕਰੋਤੀ’’ਤਿ ਏਵਂ ਅਨ੍ਤਰਪੇਯ੍ਯਾਲੇ ਵੁਤ੍ਤਾਪਤ੍ਤਿਯੋ. ਪਞ੍ਚ ਆਪਤ੍ਤਿਯੋ ਕਾਯਤੋ ਚ ਵਾਚਤੋ ਚਾਤਿ ਤਤਿਯੇਨ ਆਪਤ੍ਤਿਸਮੁਟ੍ਠਾਨੇਨ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ, ‘‘ਭਿਕ੍ਖੁ ਕਪ੍ਪਿਯਸਞ੍ਞੀ ਸਂਵਿਦਹਿਤ੍ਵਾ ਕੁਟਿਂ ਕਰੋਤੀ’’ਤਿ ਏਵਂ ਤਤ੍ਥੇਵ ਵੁਤ੍ਤਾ ਆਪਤ੍ਤਿਯੋ. ਦੇਸਨਾਗਾਮਿਨਿਯੋਤਿ ਠਪੇਤ੍ਵਾ ਪਾਰਾਜਿਕਞ੍ਚ ਸਙ੍ਘਾਦਿਸੇਸਞ੍ਚ ਅਵਸੇਸਾ.
ਪਞ੍ਚ ਕਮ੍ਮਾਨੀਤਿ ਤਜ੍ਜਨੀਯਨਿਯਸ੍ਸਪਬ੍ਬਾਜਨੀਯਪਟਿਸਾਰਣੀਯਾਨਿ ਚਤ੍ਤਾਰਿ ਉਕ੍ਖੇਪਨੀਯਞ੍ਚ ਤਿਵਿਧਮ੍ਪਿ ਏਕਨ੍ਤਿ ਪਞ੍ਚ. ਯਾਵਤਤਿਯਕੇ ਪਞ੍ਚਾਤਿ ਉਕ੍ਖਿਤ੍ਤਾਨੁਵਤ੍ਤਿਕਾਯ ਭਿਕ੍ਖੁਨਿਯਾ ਯਾਵਤਤਿਯਂ ਸਮਨੁਭਾਸਨਾਯ ਅਪ੍ਪਟਿਨਿਸ੍ਸਜ੍ਜਨ੍ਤਿਯਾ ਪਾਰਾਜਿਕਂ ਥੁਲ੍ਲਚ੍ਚਯਂ ਦੁਕ੍ਕਟਨ੍ਤਿ ਤਿਸ੍ਸੋ, ਭੇਦਕਾਨੁਵਤ੍ਤਕਾਦਿਸਮਨੁਭਾਸਨਾਸੁ ਸਙ੍ਘਾਦਿਸੇਸੋ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਪਾਚਿਤ੍ਤਿਯਂ. ਅਦਿਨ੍ਨਨ੍ਤਿ ਅਞ੍ਞੇਨ ਅਦਿਨ੍ਨਂ. ਅਵਿਦਿਤਨ੍ਤਿ ਪਟਿਗ੍ਗਣ੍ਹਾਮੀਤਿ ਚੇਤਨਾਯ ਅਭਾਵੇਨ ਅਵਿਦਿਤਂ. ਅਕਪ੍ਪਿਯਨ੍ਤਿ ਪਞ੍ਚਹਿ ਸਮਣਕਪ੍ਪੇਹਿ ਅਕਪ੍ਪਿਯਕਤਂ; ਯਂ ਵਾ ਪਨਞ੍ਞਮ੍ਪਿ ਅਕਪ੍ਪਿਯਮਂਸਂ ਅਕਪ੍ਪਿਯਭੋਜਨਂ. ਅਕਤਾਤਿਰਿਤ੍ਤਨ੍ਤਿ ਪਵਾਰੇਤ੍ਵਾ ਅਤਿਰਿਤ੍ਤਂ ਅਕਤਂ. ਸਮਜ੍ਜਦਾਨਨ੍ਤਿ ਨਟਸਮਜ੍ਜਾਦਿਦਾਨਂ. ਉਸਭਦਾਨਨ੍ਤਿ ਗੋਗਣਸ੍ਸ ਅਨ੍ਤਰੇ ਉਸਭਵਿਸ੍ਸਜ੍ਜਨਂ. ਚਿਤ੍ਤਕਮ੍ਮਦਾਨਨ੍ਤਿ ਆਵਾਸਂ ਕਾਰੇਤ੍ਵਾ ਤਤ੍ਥ ਚਿਤ੍ਤਕਮ੍ਮਂ ਕਾਰੇਤੁਂ ਵਟ੍ਟਤਿ. ਇਦਂ ਪਨ ਪਟਿਭਾਨਚਿਤ੍ਤਕਮ੍ਮਦਾਨਂ ਸਨ੍ਧਾਯ ਵੁਤ੍ਤਂ. ਇਮਾਨਿ ਹਿ ਪਞ੍ਚ ਕਿਞ੍ਚਾਪਿ ਲੋਕਸ੍ਸ ਪੁਞ੍ਞਸਮ੍ਮਤਾਨਿ, ਅਥ ਖੋ ਅਪੁਞ੍ਞਾਨਿ ਅਕੁਸਲਾਨਿਯੇਵ. ਉਪ੍ਪਨ੍ਨਂ ਪਟਿਭਾਨਨ੍ਤਿ ਏਤ੍ਥ ਪਟਿਭਾਨਨ੍ਤਿ ਕਥੇਤੁਕਮ੍ਯਤਾ ਵੁਚ੍ਚਤਿ. ਇਮੇ ਪਞ੍ਚ ਦੁਪ੍ਪਟਿਵਿਨੋਦਯਾਤਿ ਨ ਸੁਪਟਿਵਿਨੋਦਯਾ; ਉਪਾਯੇਨ ਪਨ ਕਾਰਣੇਨ ਅਨੁਰੂਪਾਹਿ ਪਚ੍ਚਵੇਕ੍ਖਨਾਅਨੁਸਾਸਨਾਦੀਹਿ ਸਕ੍ਕਾ ਪਟਿਵਿਨੋਦੇਤੁਨ੍ਤਿ ਅਤ੍ਥੋ.
ਸਕਚਿਤ੍ਤਂ ਪਸੀਦਤੀਤਿ ਏਤ੍ਥ ਇਮਾਨਿ ਵਤ੍ਥੂਨਿ – ਕਟਅਨ੍ਧਕਾਰਵਾਸੀ ਫੁਸ੍ਸਦੇਵਤ੍ਥੇਰੋ ਕਿਰ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਸਿਨ੍ਦੁਵਾਰਕੁਸੁਮਸਨ੍ਥਤਮਿਵ ਸਮਵਿਪ੍ਪਕਿਣ੍ਣਵਾਲਿਕਂ ਚੇਤਿਯਙ੍ਗਣਂ ਓਲੋਕੇਨ੍ਤੋ ਬੁਦ੍ਧਾਰਮ੍ਮਣਂ ਪੀਤਿਪਾਮੋਜ੍ਜਂ ਉਪ੍ਪਾਦੇਤ੍ਵਾ ਅਟ੍ਠਾਸਿ. ਤਸ੍ਮਿਂ ਖਣੇ ਮਾਰੋ ਪਬ੍ਬਤਪਾਦੇ ਨਿਬ੍ਬਤ੍ਤਕਾਲ਼ਮਕ੍ਕਟੋ ਵਿਯ ਹੁਤ੍ਵਾ ਚੇਤਿਯਙ੍ਗਣੇ ਗੋਮਯਂ ਵਿਪ੍ਪਕਿਰਨ੍ਤੋ ਗਤੋ. ਥੇਰੋ ਨਾਸਕ੍ਖਿ ਅਰਹਤ੍ਤਂ ਪਾਪੁਣਿਤੁਂ, ਸਮ੍ਮਜ੍ਜਿਤ੍ਵਾ ਅਗਮਾਸਿ. ਦੁਤਿਯਦਿਵਸੇਪਿ ਜਰਗ੍ਗਵੋ ਹੁਤ੍ਵਾ ਤਾਦਿਸਮੇਵ ਵਿਪ੍ਪਕਾਰਂ ਅਕਾਸਿ. ਤਤਿਯਦਿਵਸੇ ਵਙ੍ਕਪਾਦਂ ਮਨੁਸ੍ਸਤ੍ਤਭਾਵਂ ਨਿਮ੍ਮਿਨਿਤ੍ਵਾ ਪਾਦੇਨ ਪਰਿਕਸਨ੍ਤੋ ਅਗਮਾਸਿ. ਥੇਰੋ ‘‘ਏਵਰੂਪੋ ਬੀਭਚ੍ਛਪੁਰਿਸੋ ਸਮਨ੍ਤਾ ਯੋਜਨਪ੍ਪਮਾਣੇਸੁ ਗੋਚਰਗਾਮੇਸੁ ਨਤ੍ਥਿ, ਸਿਯਾ ਨੁ ਖੋ ਮਾਰੋ’’ਤਿ ਚਿਨ੍ਤੇਤ੍ਵਾ ‘‘ਮਾਰੋਸਿ ਤ੍ਵ’’ਨ੍ਤਿ ਆਹ. ‘‘ਆਮ, ਭਨ੍ਤੇ, ਮਾਰੋਮ੍ਹਿ, ਨ ਦਾਨਿ ਤੇ ਵਞ੍ਚੇਤੁਂ ਅਸਕ੍ਖਿ’’ਨ੍ਤਿ. ‘‘ਦਿਟ੍ਠਪੁਬ੍ਬੋ ਤਯਾ ਤਥਾਗਤੋ’’ਤਿ? ‘‘ਆਮ, ਦਿਟ੍ਠਪੁਬ੍ਬੋ’’ਤਿ. ‘‘ਮਾਰੋ ਨਾਮ ਮਹਾਨੁਭਾਵੋ ਹੋਤਿ, ਇਙ੍ਘ ਤਾਵ ਬੁਦ੍ਧਸ੍ਸ ਭਗਵਤੋ ਅਤ੍ਤਭਾਵਸਦਿਸਂ ਅਤ੍ਤਭਾਵਂ ਨਿਮ੍ਮਿਨਾਹੀ’’ਤਿ? ‘‘ਨ ਸਕ੍ਕਾ, ਭਨ੍ਤੇ, ਤਾਦਿਸਂ ਰੂਪਂ ਨਿਮ੍ਮਿਨਿਤੁਂ; ਅਪਿਚ ਖੋ ਪਨ ਤਂਸਰਿਕ੍ਖਕਂ ਪਤਿਰੂਪਕਂ ਨਿਮ੍ਮਿਨਿਸ੍ਸਾਮੀ’’ਤਿ ਸਕਭਾਵਂ ਵਿਜਹਿਤ੍ਵਾ ਬੁਦ੍ਧਰੂਪਸਦਿਸੇਨ ਅਤ੍ਤਭਾਵੇਨ ਅਟ੍ਠਾਸਿ. ਥੇਰੋ ਮਾਰਂ ਓਲੋਕੇਤ੍ਵਾ ‘‘ਅਯਂ ਤਾਵ ਸਰਾਗਦੋਸਮੋਹੋ ਏਵਂ ਸੋਭਤਿ, ਕਥਂ ਨੁ ਖੋ ਭਗਵਾ ਨ ਸੋਭਤਿ ਸਬ੍ਬਸੋ ਵੀਤਰਾਗਦੋਸਮੋਹੋ’’ਤਿ ਬੁਦ੍ਧਾਰਮ੍ਮਣਂ ਪੀਤਿਂ ਪਟਿਲਭਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਮਾਰੋ ‘‘ਵਞ੍ਚਿਤੋਮ੍ਹਿ ਤਯਾ, ਭਨ੍ਤੇ’’ਤਿ ਆਹ. ਥੇਰੋਪਿ ‘‘ਕਿਂ ਅਤ੍ਥਿ ਜਰਮਾਰ, ਤਾਦਿਸਂ ਵਞ੍ਚੇਤੁ’’ਨ੍ਤਿ ਆਹ. ਲੋਕਨ੍ਤਰਵਿਹਾਰੇਪਿ ਦਤ੍ਤੋ ਨਾਮ ਦਹਰਭਿਕ੍ਖੁ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਓਲੋਕੇਨ੍ਤੋ ਓਦਾਤਕਸਿਣਂ ਪਟਿਲਭਿ. ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਸਿ. ਤਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਫਲਤ੍ਤਯਂ ਸਚ੍ਛਾਕਾਸਿ.
ਪਰਚਿਤ੍ਤਂ ਪਸੀਦਤੀਤਿ ਏਤ੍ਥ ਇਮਾਨਿ ਵਤ੍ਥੂਨਿ – ਤਿਸ੍ਸੋ ਨਾਮ ਦਹਰਭਿਕ੍ਖੁ ਜਮ੍ਬੁਕੋਲਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਸਙ੍ਕਾਰਛਡ੍ਡਨਿਂ ਹਤ੍ਥੇਨ ਗਹੇਤ੍ਵਾਵ ਅਟ੍ਠਾਸਿ. ਤਸ੍ਮਿਂ ਖਣੇ ਤਿਸ੍ਸਦਤ੍ਤਤ੍ਥੇਰੋ ਨਾਮ ਨਾਵਾਤੋ ਓਰੁਯ੍ਹ ਚੇਤਿਯਙ੍ਗਣਂ ਓਲੋਕੇਨ੍ਤੋ ਭਾਵਿਤਚਿਤ੍ਤੇਨ ਸਮ੍ਮਟ੍ਠਟ੍ਠਾਨਨ੍ਤਿ ਞਤ੍ਵਾ ਪਞ੍ਹਾਸਹਸ੍ਸਂ ਪੁਚ੍ਛਿ, ਇਤਰੋ ਸਬ੍ਬਂ ਵਿਸ੍ਸਜ੍ਜੇਸਿ. ਅਞ੍ਞਤਰਸ੍ਮਿਮ੍ਪਿ ਵਿਹਾਰੇ ਥੇਰੋ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਵਤ੍ਤਂ ਪਰਿਚ੍ਛਿਨ੍ਦਿ. ਯੋਨਕਵਿਸਯਤੋ ਚੇਤਿਯਵਨ੍ਦਕਾ ਚਤ੍ਤਾਰੋ ਥੇਰਾ ਆਗਨ੍ਤ੍ਵਾ ਚੇਤਿਯਙ੍ਗਣਂ ਦਿਸ੍ਵਾ ਅਨ੍ਤੋ ਅਪ੍ਪਵਿਸਿਤ੍ਵਾ ਦ੍ਵਾਰੇਯੇਵ ਠਤ੍ਵਾ ਏਕੋ ਥੇਰੋ ਅਟ੍ਠ ਕਪ੍ਪੇ ਅਨੁਸ੍ਸਰਿ, ਏਕੋ ਸੋਲ਼ਸ, ਏਕੋ ਵੀਸਤਿ, ਏਕੋ ਤਿਂਸ ਕਪ੍ਪੇ ਅਨੁਸ੍ਸਰਿ.
ਦੇਵਤਾ ਅਤ੍ਤਮਨਾ ਹੋਨ੍ਤੀਤਿ ਏਤ੍ਥ ਇਦਂ ਵਤ੍ਥੁ – ਏਕਸ੍ਮਿਂ ਕਿਰ ਵਿਹਾਰੇ ਏਕੋ ਭਿਕ੍ਖੁ ਚੇਤਿਯਙ੍ਗਣਞ੍ਚ ਬੋਧਿਯਙ੍ਗਣਞ੍ਚ ਸਮ੍ਮਜ੍ਜਿਤ੍ਵਾ ਨਹਾਯਿਤੁਂ ਗਤੋ. ਦੇਵਤਾ ‘‘ਇਮਸ੍ਸ ਵਿਹਾਰਸ੍ਸ ਕਤਕਾਲਤੋ ਪਟ੍ਠਾਯ ਏਵਂ ਵਤ੍ਤਂ ਪੂਰੇਤ੍ਵਾ ਸਮ੍ਮਟ੍ਠਪੁਬ੍ਬੋ ਭਿਕ੍ਖੁ ਨਤ੍ਥੀ’’ਤਿ ਪਸਨ੍ਨਚਿਤ੍ਤਾ ਪੁਪ੍ਫਹਤ੍ਥਾ ਅਟ੍ਠਂਸੁ. ਥੇਰੋ ਆਗਨ੍ਤ੍ਵਾ ‘‘ਕਤਰਗਾਮਵਾਸਿਕਾਤ੍ਥਾ’’ਤਿ ਆਹ. ‘‘ਭਨ੍ਤੇ, ਇਧੇਵ ਵਸਾਮ, ਇਮਸ੍ਸ ਵਿਹਾਰਸ੍ਸ ਕਤਕਾਲਤੋ ਪਟ੍ਠਾਯ ਏਵਂ ਵਤ੍ਤਂ ਪੂਰੇਤ੍ਵਾ ਸਮ੍ਮਟ੍ਠਪੁਬ੍ਬੋ ਭਿਕ੍ਖੁ ਨਤ੍ਥੀਤਿ ਤੁਮ੍ਹਾਕਂ, ਭਨ੍ਤੇ, ਵਤ੍ਤੇ ਪਸੀਦਿਤ੍ਵਾ ਪੁਪ੍ਫਹਤ੍ਥਾ ਠਿਤਾਮ੍ਹਾ’’ਤਿ ਦੇਵਤਾ ਆਹਂਸੁ.
ਪਾਸਾਦਿਕਸਂਵਤ੍ਤਨਿਕਨ੍ਤਿ ਏਤ੍ਥ ਇਦਂ ਵਤ੍ਥੁ – ਏਕਂ ਕਿਰ ਅਮਚ੍ਚਪੁਤ੍ਤਂ ਅਭਯਤ੍ਥੇਰਞ੍ਚ ਆਰਬ੍ਭ ਅਯਂ ਕਥਾ ਉਦਪਾਦਿ ‘‘ਕਿਂ ਨੁ ਖੋ ਅਮਚ੍ਚਪੁਤ੍ਤੋ ਪਾਸਾਦਿਕੋ, ਅਭਯਤ੍ਥੇਰੋਤਿ ਉਭੋਪਿ ਨੇ ਏਕਸ੍ਮਿਂ ਠਾਨੇ ਓਲੋਕੇਸ੍ਸਾਮਾ’’ਤਿ. ਞਾਤਕਾ ਅਮਚ੍ਚਪੁਤ੍ਤਂ ਅਲਙ੍ਕਰਿਤ੍ਵਾ ਮਹਾਚੇਤਿਯਂ ਵਨ੍ਦਾਪੇਸ੍ਸਾਮਾਤਿ ਅਗਮਂਸੁ. ਥੇਰਮਾਤਾਪਿ ਪਾਸਾਦਿਕਂ ਚੀਵਰਂ ਕਾਰੇਤ੍ਵਾ ਪੁਤ੍ਤਸ੍ਸ ਪਹਿਣਿ, ‘‘ਪੁਤ੍ਤੋ ਮੇ ਕੇਸੇ ਛਿਨ੍ਦਾਪੇਤ੍ਵਾ ਇਮਂ ਚੀਵਰਂ ਪਾਰੁਪਿਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਮਹਾਚੇਤਿਯਂ ਵਨ੍ਦਤੂ’’ਤਿ. ਅਮਚ੍ਚਪੁਤ੍ਤੋ ਞਾਤਿਪਰਿਵੁਤੋ ਪਾਚੀਨਦ੍ਵਾਰੇਨ ਚੇਤਿਯਙ੍ਗਣਂ ਆਰੁਲ਼੍ਹੋ, ਅਭਯਤ੍ਥੇਰੋ ਭਿਕ੍ਖੁਸਙ੍ਘਪਰਿਵੁਤੋ ਦਕ੍ਖਿਣਦ੍ਵਾਰੇਨ ਚੇਤਿਯਙ੍ਗਣਂ ਆਰੁਹਿਤ੍ਵਾ ਚੇਤਿਯਙ੍ਗਣੇ ਤੇਨ ਸਦ੍ਧਿਂ ਸਮਾਗਨ੍ਤ੍ਵਾ ਆਹ – ‘‘ਕਿਂ ਤ੍ਵਂ, ਆਵੁਸੋ, ਮਹਲ੍ਲਕਤ੍ਥੇਰਸ੍ਸ ਸਮ੍ਮਟ੍ਠਟ੍ਠਾਨੇ ਕਚਵਰਂ ਛਡ੍ਡੇਤ੍ਵਾ ਮਯਾ ਸਦ੍ਧਿਂ ਯੁਗਗ੍ਗਾਹਂ ਗਣ੍ਹਾਸੀ’’ਤਿ. ਅਤੀਤਤ੍ਤਭਾਵੇ ਕਿਰ ਅਭਯਤ੍ਥੇਰੋ ਮਹਲ੍ਲਕਤ੍ਥੇਰੋ ਨਾਮ ਹੁਤ੍ਵਾ ਗੋਚਰਗਾਮੇ ਚੇਤਿਯਙ੍ਗਣਂ ਸਮ੍ਮਜ੍ਜਿ, ਅਮਚ੍ਚਪੁਤ੍ਤੋ ਮਹਾਉਪਾਸਕੋ ਹੁਤ੍ਵਾ ਸਮ੍ਮਟ੍ਠਟ੍ਠਾਨੇ ਕਚਵਰਂ ਗਹੇਤ੍ਵਾ ਛਡ੍ਡੇਸਿ.
ਸਤ੍ਥੁਸਾਸਨਂ ਕਤਂ ਹੋਤੀਤਿ ਇਦਂ ਸਮ੍ਮਜ੍ਜਨਵਤ੍ਤਂ ਨਾਮ ਬੁਦ੍ਧੇਹਿ ਵਣ੍ਣਿਤਂ, ਤਸ੍ਮਾ ਤਂ ਕਰੋਨ੍ਤੇਨ ਸਤ੍ਥੁਸਾਸਨਂ ਕਤਂ ਹੋਤਿ. ਤਤ੍ਰਿਦਂ ਵਤ੍ਥੁ – ਆਯਸ੍ਮਾ ਕਿਰ ਸਾਰਿਪੁਤ੍ਤੋ ਹਿਮਵਨ੍ਤਂ ਗਨ੍ਤ੍ਵਾ ਏਕਸ੍ਮਿਂ ਪਬ੍ਭਾਰੇ ਅਸਮ੍ਮਜ੍ਜਿਤ੍ਵਾਵ ਨਿਰੋਧਂ ਸਮਾਪਜ੍ਜਿਤ੍ਵਾ ਨਿਸੀਦਿ. ਭਗਵਾ ਆਵਜ੍ਜਨ੍ਤੋ ਥੇਰਸ੍ਸ ਅਸਮ੍ਮਜ੍ਜਿਤ੍ਵਾ ਨਿਸਿਨ੍ਨਭਾਵਂ ਞਤ੍ਵਾ ਆਕਾਸੇਨ ਗਨ੍ਤ੍ਵਾ ਥੇਰਸ੍ਸ ਪੁਰਤੋ ਅਸਮ੍ਮਟ੍ਠਟ੍ਠਾਨੇ ਪਾਦਾਨਿ ਦਸ੍ਸੇਤ੍ਵਾ ਪਚ੍ਚਾਗਞ੍ਛਿ. ਥੇਰੋ ਸਮਾਪਤ੍ਤਿਤੋ ਵੁਟ੍ਠਿਤੋ ਭਗਵਤੋ ਪਾਦਾਨਿ ਦਿਸ੍ਵਾ ਬਲਵਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਾਪੇਤ੍ਵਾ ਜਣ੍ਣੁਕੇਹਿ ਪਤਿਟ੍ਠਾਯ ‘‘ਅਸਮ੍ਮਜ੍ਜਿਤ੍ਵਾ ਨਿਸਿਨ੍ਨਭਾਵਂ ਵਤ ਮੇ ਸਤ੍ਥਾ ਅਞ੍ਞਾਸਿ, ਸਙ੍ਘਮਜ੍ਝੇ ਦਾਨਿ ਚੋਦਨਂ ਕਾਰੇਸ੍ਸਾਮੀ’’ਤਿ ਦਸਬਲਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸੀਦਿ. ਭਗਵਾ ‘‘ਕੁਹਿਂ ਗਤੋਸਿ, ਸਾਰਿਪੁਤ੍ਤਾ’’ਤਿ ਵਤ੍ਵਾ ‘‘ਨ ਪਤਿਰੂਪਂ ਦਾਨਿ ਤੇ ਮਯ੍ਹਂ ਅਨਨ੍ਤਰੇ ਠਾਨੇ ਠਤ੍ਵਾ ਵਿਚਰਨ੍ਤਸ੍ਸ ਅਸਮ੍ਮਜ੍ਜਿਤ੍ਵਾ ਨਿਸੀਦਿਤੁ’’ਨ੍ਤਿ ਆਹ. ਤਤੋ ਪਟ੍ਠਾਯ ਥੇਰੋ ਗਣ੍ਠਿਕਪਟਿਮੁਞ੍ਚਨਟ੍ਠਾਨੇਪਿ ਤਿਟ੍ਠਨ੍ਤੋ ਪਾਦੇਨ ਕਚਵਰਂ ਵਿਯੂਹਿਤ੍ਵਾਵ ਤਿਟ੍ਠਤਿ.
ਅਤ੍ਤਨੋ ਭਾਸਪਰਿਯਨ੍ਤਂ ਨ ਉਗ੍ਗਣ੍ਹਾਤੀਤਿ ‘‘ਇਮਸ੍ਮਿਂ ਵਤ੍ਥੁਸ੍ਮਿਂ ਏਤ੍ਤਕਂ ਸੁਤ੍ਤਂ ਉਪਲਬ੍ਭਤਿ, ਏਤ੍ਤਕੋ ਵਿਨਿਚ੍ਛਯੋ, ਏਤ੍ਤਕਂ ਸੁਤ੍ਤਞ੍ਚ ਵਿਨਿਚ੍ਛਯਞ੍ਚ ਵਕ੍ਖਾਮੀ’’ਤਿ ਏਵਂ ਅਤ੍ਤਨੋ ਭਾਸਪਰਿਯਨ੍ਤਂ ਨ ਉਗ੍ਗਣ੍ਹਾਤਿ. ‘‘ਅਯਂ ਚੋਦਕਸ੍ਸ ਪੁਰਿਮਕਥਾ, ਅਯਂ ਪਚ੍ਛਿਮਕਥਾ, ਅਯਂ ਚੁਦਿਤਕਸ੍ਸ ਪੁਰਿਮਕਥਾ, ਅਯਂ ਪਚ੍ਛਿਮਕਥਾ, ਏਤ੍ਤਕਂ ਗਯ੍ਹੂਪਗਂ, ਏਤ੍ਤਕਂ ਨ ਗਯ੍ਹੂਪਗ’’ਨ੍ਤਿ ਏਵਂ ਅਨੁਗ੍ਗਣ੍ਹਨ੍ਤੋ ਪਨ ਪਰਸ੍ਸ ਭਾਸਪਰਿਯਨ੍ਤਂ ਨ ਉਗ੍ਗਣ੍ਹਾਤਿ ਨਾਮ. ਆਪਤ੍ਤਿਂ ਨ ਜਾਨਾਤੀਤਿ ਪਾਰਾਜਿਕਂ ਵਾ ਸਙ੍ਘਾਦਿਸੇਸਂ ਵਾਤਿ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਨਾਨਾਕਰਣਂ ਨ ਜਾਨਾਤਿ. ਮੂਲਨ੍ਤਿ ਦ੍ਵੇ ਆਪਤ੍ਤਿਯਾ ਮੂਲਾਨਿ ਕਾਯੋ ਚ ਵਾਚਾ ਚ, ਤਾਨਿ ਨ ਜਾਨਾਤਿ. ਸਮੁਦਯਨ੍ਤਿ ਛ ਆਪਤ੍ਤਿਸਮੁਟ੍ਠਾਨਾਨਿ ਆਪਤ੍ਤਿਸਮੁਦਯੋ ਨਾਮ, ਤਾਨਿ ਨ ਜਾਨਾਤਿ. ਪਾਰਾਜਿਕਾਦੀਨਂ ਵਤ੍ਥੁਂ ਨ ਜਾਨਾਤੀਤਿਪਿ ਵੁਤ੍ਤਂ ਹੋਤਿ. ਨਿਰੋਧਨ੍ਤਿ ਅਯਂ ਆਪਤ੍ਤਿ ਦੇਸਨਾਯ ਨਿਰੁਜ੍ਝਤਿ, ਵੂਪਸਮ੍ਮਤਿ, ਅਯਂ ਵੁਟ੍ਠਾਨੇਨਾਤਿ ਏਵਂ ਆਪਤ੍ਤਿਨਿਰੋਧਂ ਨ ਜਾਨਾਤਿ. ਸਤ੍ਤ ਸਮਥੇ ਅਜਾਨਨ੍ਤੋ ਪਨ ਆਪਤ੍ਤਿਨਿਰੋਧਗਾਮਿਨਿਪਟਿਪਦਂ ਨ ਜਾਨਾਤਿ.
ਅਧਿਕਰਣਪਞ੍ਚਕੇ ਅਧਿਕਰਣਂ ਨਾਮ ਚਤ੍ਤਾਰਿ ਅਧਿਕਰਣਾਨਿ. ਅਧਿਕਰਣਸ੍ਸ ਮੂਲਂ ਨਾਮ ਤੇਤ੍ਤਿਂਸ ਮੂਲਾਨਿ – ਵਿਵਾਦਾਧਿਕਰਣਸ੍ਸ ਦ੍ਵਾਦਸ ਮੂਲਾਨਿ, ਅਨੁਵਾਦਾਧਿਕਰਣਸ੍ਸ ਚੁਦ੍ਦਸ, ਆਪਤ੍ਤਾਧਿਕਰਣਸ੍ਸ ਛ, ਕਿਚ੍ਚਾਧਿਕਰਣਸ੍ਸ ਏਕਂ; ਤਾਨਿ ਪਰਤੋ ਆਵਿ ਭਵਿਸ੍ਸਨ੍ਤਿ. ਅਧਿਕਰਣਸਮੁਦਯੋ ਨਾਮ ਅਧਿਕਰਣਸਮੁਟ੍ਠਾਨਂ. ਵਿਵਾਦਾਧਿਕਰਣਂ ਅਟ੍ਠਾਰਸ ਭੇਦਕਰਵਤ੍ਥੂਨਿ ਨਿਸ੍ਸਾਯ ਉਪ੍ਪਜ੍ਜਤਿ; ਅਨੁਵਾਦਾਧਿਕਰਣਂ ਚਤਸ੍ਸੋ ਵਿਪਤ੍ਤਿਯੋ; ਆਪਤ੍ਤਾਧਿਕਰਣਂ ਸਤ੍ਤਾਪਤ੍ਤਿਕ੍ਖਨ੍ਧੇ; ਕਿਚ੍ਚਾਧਿਕਰਣਂ ਚਤ੍ਤਾਰਿ ਸਙ੍ਘਕਿਚ੍ਚਾਨੀਤਿ ਇਮਂ ਵਿਭਾਗਂ ਨ ਜਾਨਾਤੀਤਿ ਅਤ੍ਥੋ. ਅਧਿਕਰਣਨਿਰੋਧਂ ਨ ਜਾਨਾਤੀਤਿ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਮੂਲਾਮੂਲਂ ਗਨ੍ਤ੍ਵਾ ਵਿਨਿਚ੍ਛਯਸਮਥਂ ਪਾਪੇਤੁਂ ਨ ਸਕ੍ਕੋਤਿ; ‘‘ਇਦਂ ਅਧਿਕਰਣਂ ਦ੍ਵੀਹਿ, ਇਦਂ ਚਤੂਹਿ, ਇਦਂ ਤੀਹਿ ਇਦਂ ਏਕੇਨ ਸਮਥੇਨ ਸਮ੍ਮਤੀ’’ਤਿ ਏਵਂ ਸਤ੍ਤ ਸਮਥੇ ਅਜਾਨਨ੍ਤੋ ਪਨ ਅਧਿਕਰਣਨਿਰੋਧਗਾਮਿਨਿਪਟਿਪਦਂ ਨ ਜਾਨਾਤਿ ਨਾਮ. ਵਤ੍ਥੁਂ ਨ ਜਾਨਾਤੀਤਿ ‘‘ਇਦਂ ਪਾਰਾਜਿਕਸ੍ਸ ਵਤ੍ਥੁ, ਇਦਂ ਸਙ੍ਘਾਦਿਸੇਸਸ੍ਸਾ’’ਤਿ ਏਵਂ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਵਤ੍ਥੁਂ ਨ ਜਾਨਾਤਿ. ਨਿਦਾਨਨ੍ਤਿ ‘‘ਸਤ੍ਤਨ੍ਨਂ ਨਿਦਾਨਾਨਂ ਇਦਂ ਸਿਕ੍ਖਾਪਦਂ ਏਤ੍ਥ ਪਞ੍ਞਤ੍ਤਂ, ਇਦਂ ਏਤ੍ਥਾ’’ਤਿ ਨ ਜਾਨਾਤਿ. ਪਞ੍ਞਤ੍ਤਿਂ ਨ ਜਾਨਾਤੀਤਿ ਤਸ੍ਮਿਂ ਤਸ੍ਮਿਂ ਸਿਕ੍ਖਾਪਦੇ ਪਠਮਪਞ੍ਞਤ੍ਤਿਂ ਨ ਜਾਨਾਤਿ. ਅਨੁਪਞ੍ਞਤ੍ਤਿਨ੍ਤਿ ਪੁਨਪ੍ਪੁਨਂ ਪਞ੍ਞਤ੍ਤਿਂ ਨ ਜਾਨਾਤਿ. ਅਨੁਸਨ੍ਧਿਵਚਨਪਥਨ੍ਤਿ ਕਥਾਨੁਸਨ੍ਧਿ-ਵਿਨਿਚ੍ਛਯਾਨੁਸਨ੍ਧਿਵਸੇਨ ਵਤ੍ਥੁਂ ਨ ਜਾਨਾਤਿ. ਞਤ੍ਤਿਂ ਨ ਜਾਨਾਤੀਤਿ ਸਬ੍ਬੇਨ ਸਬ੍ਬਂ ਞਤ੍ਤਿਂ ਨ ਜਾਨਾਤਿ. ਞਤ੍ਤਿਯਾ ਕਰਣਂ ਨ ਜਾਨਾਤੀਤਿ ਞਤ੍ਤਿਕਿਚ੍ਚਂ ਨ ਜਾਨਾਤਿ, ਓਸਾਰਣਾਦੀਸੁ ਨਵਸੁ ਠਾਨੇਸੁ ਞਤ੍ਤਿਕਮ੍ਮਂ ਨਾਮ ਹੋਤਿ, ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮੇਸੁ ਞਤ੍ਤਿਯਾ ਕਮ੍ਮਪ੍ਪਤ੍ਤੋ ਹੁਤ੍ਵਾ ਤਿਟ੍ਠਤੀਤਿ ਨ ਜਾਨਾਤਿ. ਨ ਪੁਬ੍ਬਕੁਸਲੋ ਹੋਤਿ ਨ ਅਪਰਕੁਸਲੋਤਿ ਪੁਬ੍ਬੇ ਕਥੇਤਬ੍ਬਞ੍ਚ ਪਚ੍ਛਾ ਕਥੇਤਬ੍ਬਞ੍ਚ ਨ ਜਾਨਾਤਿ, ਞਤ੍ਤਿ ਨਾਮ ਪੁਬ੍ਬੇ ਠਪੇਤਬ੍ਬਾ, ਪਚ੍ਛਾ ਨ ਠਪੇਤਬ੍ਬਾਤਿਪਿ ਨ ਜਾਨਾਤਿ. ਅਕਾਲਞ੍ਞੂ ਚ ਹੋਤੀਤਿ ਕਾਲਂ ਨ ਜਾਨਾਤਿ, ਅਨਜ੍ਝਿਟ੍ਠੋ ਅਯਾਚਿਤੋ ਭਾਸਤਿ, ਞਤ੍ਤਿਕਾਲਮ੍ਪਿ ਞਤ੍ਤਿਖੇਤ੍ਤਮ੍ਪਿ ਞਤ੍ਤਿਓਕਾਸਮ੍ਪਿ ਨ ਜਾਨਾਤਿ.
ਮਨ੍ਦਤ੍ਤਾ ਮੋਮੂਹਤ੍ਤਾਤਿ ਕੇਵਲਂ ਅਞ੍ਞਾਣੇਨ ਮੋਮੂਹਭਾਵੇਨ ਧੁਤਙ੍ਗੇ ਆਨਿਸਂਸਂ ਅਜਾਨਿਤ੍ਵਾ. ਪਾਪਿਚ੍ਛੋਤਿ ਤੇਨ ਅਰਞ੍ਞਵਾਸੇਨ ਪਚ੍ਚਯਲਾਭਂ ਪਤ੍ਥਯਮਾਨੋ. ਪਵਿਵੇਕਨ੍ਤਿ ਕਾਯਚਿਤ੍ਤਉਪਧਿਵਿਵੇਕਂ. ਇਦਮਤ੍ਥਿਤਨ੍ਤਿ ਇਮਾਯ ਕਲ੍ਯਾਣਾਯ ਪਟਿਪਤ੍ਤਿਯਾ ਅਤ੍ਥੋ ਏਤਸ੍ਸਾਤਿ ਇਦਮਤ੍ਥਿ, ਇਦਮਤ੍ਥਿਨੋ ਭਾਵੋ ਇਦਮਤ੍ਥਿਤਾ; ਤਂ ਇਦਮਤ੍ਥਿਤਂਯੇਵ ਨਿਸ੍ਸਾਯ ਨ ਅਞ੍ਞਂ ਕਿਞ੍ਚਿ ਲੋਕਾਮਿਸਨ੍ਤਿ ਅਤ੍ਥੋ.
ਉਪੋਸਥਂ ਨ ਜਾਨਾਤੀਤਿ ਨਵਵਿਧਂ ਉਪੋਸਥਂ ਨ ਜਾਨਾਤਿ. ਉਪੋਸਥਕਮ੍ਮਨ੍ਤਿ ਅਧਮ੍ਮੇਨਵਗ੍ਗਾਦਿਭੇਦਂ ਚਤੁਬ੍ਬਿਧਂ ਉਪੋਸਥਕਮ੍ਮਂ ਨ ਜਾਨਾਤਿ. ਪਾਤਿਮੋਕ੍ਖਨ੍ਤਿ ਦ੍ਵੇ ਮਾਤਿਕਾ ਨ ਜਾਨਾਤਿ. ਪਾਤਿਮੋਕ੍ਖੁਦ੍ਦੇਸਨ੍ਤਿ ਸਬ੍ਬਮ੍ਪਿ ਨਵਵਿਧਂ ਪਾਤਿਮੋਕ੍ਖੁਦ੍ਦੇਸਂ ਨ ਜਾਨਾਤਿ. ਪਵਾਰਣਨ੍ਤਿ ਨਵਵਿਧਂ ਪਵਾਰਣਂ ਨ ਜਾਨਾਤਿ. ਪਵਾਰਣਾਕਮ੍ਮਂ ਉਪੋਸਥਕਮ੍ਮਸਦਿਸਮੇਵ.
ਅਪਾਸਾਦਿਕਪਞ੍ਚਕੇ – ਅਪਾਸਾਦਿਕਨ੍ਤਿ ਕਾਯਦੁਚ੍ਚਰਿਤਾਦਿ ਅਕੁਸਲਕਮ੍ਮਂ ਵੁਚ੍ਚਤਿ. ਪਾਸਾਦਿਕਨ੍ਤਿ ਕਾਯਸੁਚਰਿਤਾਦਿ ਕੁਸਲਕਮ੍ਮਂ ਵੁਚ੍ਚਤਿ. ਅਤਿਵੇਲਨ੍ਤਿ ਵੇਲਂ ਅਤਿਕ੍ਕਮ੍ਮ ਬਹੁਤਰਂ ਕਾਲਂ ਕੁਲੇਸੁ ਅਪ੍ਪਂ ਵਿਹਾਰੇਤਿ ਅਤ੍ਥੋ. ਓਤਾਰੋਤਿ ਕਿਲੇਸਾਨਂ ਅਨ੍ਤੋ ਓਤਰਣਂ. ਸਂਕਿਲਿਟ੍ਠਨ੍ਤਿ ਦੁਟ੍ਠੁਲ੍ਲਾਪਤ੍ਤਿਕਾਯਸਂਸਗ੍ਗਾਦਿਭੇਦਂ. ਵਿਸੁਦ੍ਧਿਪਞ੍ਚਕੇਪਵਾਰਣਾਗ੍ਗਹਣੇਨ ਨਵਵਿਧਾਪਿ ਪਵਾਰਣਾ ਵੇਦਿਤਬ੍ਬਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਞ੍ਚਕਵਾਰਵਣ੍ਣਨਾ ਨਿਟ੍ਠਿਤਾ.
ਛਕ੍ਕਵਾਰਵਣ੍ਣਨਾ
੩੨੬. ਛਕ੍ਕੇਸੁ – ਛ ਸਾਮੀਚਿਯੋਤਿ ‘‘ਸੋ ਚ ਭਿਕ੍ਖੁ ਅਨਬ੍ਭਿਤੋ, ਤੇ ਚ ਭਿਕ੍ਖੂ ਗਾਰਯ੍ਹਾ, ਅਯਂ ਤਤ੍ਥ ਸਾਮੀਚਿ’’, ‘‘ਯੁਞ੍ਜਨ੍ਤਾਯਸ੍ਮਨ੍ਤੋ ਸਕਂ, ਮਾ ਵੋ ਸਕਂ ਵਿਨਸ੍ਸਾਤਿ ਅਯਂ ਤਤ੍ਥ ਸਾਮੀਚਿ’’, ‘‘ਅਯਂ ਤੇ ਭਿਕ੍ਖੁ ਪਤ੍ਤੋ ਯਾਵ ਭੇਦਨਾਯ ਧਾਰੇਤਬ੍ਬੋਤਿ ਅਯਂ ਤਤ੍ਥ ਸਾਮੀਚਿ’’, ‘‘ਤਤੋ ਨੀਹਰਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਿਭਜਿਤਬ੍ਬਂ, ਅਯਂ ਤਤ੍ਥ ਸਾਮੀਚਿ’’, ‘‘ਅਞ੍ਞਾਤਬ੍ਬਂ ਪਰਿਪੁਚ੍ਛਿਤਬ੍ਬਂ ਪਰਿਪਞ੍ਹਿਤਬ੍ਬਂ, ਅਯਂ ਤਤ੍ਥ ਸਾਮੀਚਿ’’, ‘‘ਯਸ੍ਸ ਭਵਿਸ੍ਸਤਿ ਸੋ ਹਰਿਸ੍ਸਤੀਤਿ ਅਯਂ ਤਤ੍ਥ ਸਾਮੀਚੀ’’ਤਿ ਇਮਾ ਭਿਕ੍ਖੁਪਾਤਿਮੋਕ੍ਖੇਯੇਵ ਛ ਸਾਮੀਚਿਯੋ. ਛ ਛੇਦਨਕਾਤਿ ਪਞ੍ਚਕੇ ਵੁਤ੍ਤਾ ਪਞ੍ਚ ਭਿਕ੍ਖੁਨੀਨਂ ਉਦਕਸਾਟਿਕਾਯ ਸਦ੍ਧਿਂ ਛ. ਛਹਾਕਾਰੇਹੀਤਿ ਅਲਜ੍ਜਿਤਾ ਅਞ੍ਞਾਣਤਾ ਕੁਕ੍ਕੁਚ੍ਚਪਕਤਤਾ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾ ਸਤਿਸਮ੍ਮੋਸਾਤਿ. ਤਤ੍ਥ ਏਕਰਤ੍ਤਛਾਰਤ੍ਤਸਤ੍ਤਾਹਾਤਿਕ੍ਕਮਾਦੀਸੁ ਆਪਤ੍ਤਿਂ ਸਤਿਸਮ੍ਮੋਸੇਨ ਆਪਜ੍ਜਤਿ. ਸੇਸਂ ਵੁਤ੍ਤਨਯਮੇਵ. ਛ ਆਨਿਸਂਸਾ ਵਿਨਯਧਰੇਤਿ ਪਞ੍ਚਕੇ ਵੁਤ੍ਤਾ ਪਞ੍ਚ ਤਸ੍ਸਾਧੇਯ੍ਯੋ ਉਪੋਸਥੋਤਿ ਇਮਿਨਾ ਸਦ੍ਧਿਂ ਛ.
ਛ ਪਰਮਾਨੀਤਿ ‘‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬਂ, ਮਾਸਪਰਮਂ ਤੇਨ ਭਿਕ੍ਖੁਨਾ ਤਂ ਚੀਵਰਂ ਨਿਕ੍ਖਿਪਿਤਬ੍ਬਂ, ਸਨ੍ਤਰੁਤ੍ਤਰਪਰਮਂ ਤੇਨ ਭਿਕ੍ਖੁਨਾ ਤਤੋ ਚੀਵਰਂ ਸਾਦਿਤਬ੍ਬਂ, ਛਕ੍ਖਤ੍ਤੁਪਰਮਂ ਤੁਣ੍ਹੀਭੂਤੇਨ ਉਦ੍ਦਿਸ੍ਸ ਠਾਤਬ੍ਬਂ, ਨਵਂ ਪਨ ਭਿਕ੍ਖੁਨਾ ਸਨ੍ਥਤਂ ਕਾਰਾਪੇਤ੍ਵਾ ਛਬ੍ਬਸ੍ਸਾਨਿ ਧਾਰੇਤਬ੍ਬਂ ਛਬ੍ਬਸ੍ਸਪਰਮਤਾ ਧਾਰੇਤਬ੍ਬਂ, ਤਿਯੋਜਨਪਰਮਂ ਸਹਤ੍ਥਾ ਧਾਰੇਤਬ੍ਬਾਨਿ, ਦਸਾਹਪਰਮਂ ਅਤਿਰੇਕਪਤ੍ਤੋ ਧਾਰੇਤਬ੍ਬੋ, ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨਿ, ਛਾਰਤ੍ਤਪਰਮਂ ਤੇਨ ਭਿਕ੍ਖੁਨਾ ਤੇਨ ਚੀਵਰੇਨ ਵਿਪ੍ਪਵਸਿਤਬ੍ਬਂ, ਚਤੁਕ੍ਕਂਸਪਰਮਂ, ਅਡ੍ਢਤੇਯ੍ਯਕਂਸਪਰਮਂ, ਦ੍ਵਙ੍ਗੁਲਪਬ੍ਬਪਰਮਂ ਆਦਾਤਬ੍ਬਂ, ਅਟ੍ਠਙ੍ਗੁਲਪਰਮਂ ਮਞ੍ਚਪਟਿਪਾਦਕਂ, ਅਟ੍ਠਙ੍ਗੁਲਪਰਮਂ ਦਨ੍ਤਕਟ੍ਠ’’ਨ੍ਤਿ ਇਮਾਨਿ ਚੁਦ੍ਦਸ ਪਰਮਾਨਿ. ਤਤ੍ਥ ਪਠਮਾਨਿ ਛ ਏਕਂ ਛਕ੍ਕਂ, ਤਤੋ ਏਕਂ ਅਪਨੇਤ੍ਵਾ ਸੇਸੇਸੁ ਏਕੇਕਂ ਪਕ੍ਖਿਪਿਤ੍ਵਾਤਿਆਦਿਨਾ ਨਯੇਨ ਅਞ੍ਞਾਨਿਪਿ ਛਕ੍ਕਾਨਿ ਕਾਤਬ੍ਬਾਨਿ.
ਛ ਆਪਤ੍ਤਿਯੋਤਿ ਤੀਣਿ ਛਕ੍ਕਾਨਿ ਅਨ੍ਤਰਪੇਯ੍ਯਾਲੇ ਵੁਤ੍ਤਾਨਿ. ਛ ਕਮ੍ਮਾਨੀਤਿ ਤਜ੍ਜਨੀਯ-ਨਿਯਸ੍ਸ-ਪਬ੍ਬਾਜਨੀਯ-ਪਟਿਸਾਰਣੀਯਾਨਿ ਚਤ੍ਤਾਰਿ, ਆਪਤ੍ਤਿਯਾ ਅਦਸ੍ਸਨੇ ਚ ਅਪ੍ਪਟਿਕਮ੍ਮੇ ਚ ਵੁਤ੍ਤਦ੍ਵਯਮ੍ਪਿ ਏਕਂ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਏਕਨ੍ਤਿ ਛ. ਨਹਾਨੇਤਿ ਓਰੇਨਡ੍ਢਮਾਸਂ ਨਹਾਨੇ; ਵਿਪ੍ਪਕਤਚੀਵਰਾਦਿਛਕ੍ਕਦ੍ਵਯਂ ਕਥਿਨਕ੍ਖਨ੍ਧਕੇ ਨਿਦ੍ਦਿਟ੍ਠਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਛਕ੍ਕਵਾਰਵਣ੍ਣਨਾ ਨਿਟ੍ਠਿਤਾ.
ਸਤ੍ਤਕਵਾਰਵਣ੍ਣਨਾ
੩੨੭. ਸਤ੍ਤਕੇਸੁ – ਸਤ੍ਤ ਸਾਮੀਚਿਯੋਤਿ ਪੁਬ੍ਬੇ ਵੁਤ੍ਤੇਸੁ ਛਸੁ ‘‘ਸਾ ਚ ਭਿਕ੍ਖੁਨੀ ਅਨਬ੍ਭਿਤਾ, ਤਾ ਚ ਭਿਕ੍ਖੁਨਿਯੋ ਗਾਰਯ੍ਹਾ, ਅਯਂ ਤਤ੍ਥ ਸਾਮੀਚੀ’’ਤਿ ਇਮਂ ਪਕ੍ਖਿਪਿਤ੍ਵਾ ਸਤ੍ਤ ਵੇਦਿਤਬ੍ਬਾ. ਸਤ੍ਤ ਅਧਮ੍ਮਿਕਾ ਪਟਿਞ੍ਞਾਤਕਰਣਾਤਿ ‘‘ਭਿਕ੍ਖੁ ਪਾਰਾਜਿਕਂ ਅਜ੍ਝਾਪਨ੍ਨੋ ਹੋਤਿ, ਪਾਰਾਜਿਕੇਨ ਚੋਦਿਯਮਾਨੋ ‘ਸਙ੍ਘਾਦਿਸੇਸਂ ਅਜ੍ਝਾਪਨ੍ਨੋਮ੍ਹੀ’ਤਿ ਪਟਿਜਾਨਾਤਿ, ਤਂ ਸਙ੍ਘੋ ਸਙ੍ਘਾਦਿਸੇਸੇਨ ਕਾਰੇਤਿ, ਅਧਮ੍ਮਿਕਂ ਪਟਿਞ੍ਞਾਤਕਰਣ’’ਨ੍ਤਿ ਏਵਂ ਸਮਥਕ੍ਖਨ੍ਧਕੇ ਨਿਦ੍ਦਿਟ੍ਠਾ. ਧਮ੍ਮਿਕਾਪਿ ਤਤ੍ਥੇਵ ਨਿਦ੍ਦਿਟ੍ਠਾ. ਸਤ੍ਤਨ੍ਨਂ ਅਨਾਪਤ੍ਤਿ ਸਤ੍ਤਾਹਕਰਣੀਯੇਨ ਗਨ੍ਤੁਨ੍ਤਿ ਵਸ੍ਸੂਪਨਾਯਿਕਕ੍ਖਨ੍ਧਕੇ ਵੁਤ੍ਤਂ. ਸਤ੍ਤਾਨਿਸਂਸਾ ਵਿਨਯਧਰੇਤਿ ‘‘ਤਸ੍ਸਾਧੇਯ੍ਯੋ ਉਪੋਸਥੋ ਪਵਾਰਣਾ’’ਤਿ ਇਮੇਹਿ ਸਦ੍ਧਿਂ ਪਞ੍ਚਕੇ ਵੁਤ੍ਤਾ ਪਞ੍ਚ ਸਤ੍ਤ ਹੋਨ੍ਤਿ. ਸਤ੍ਤ ਪਰਮਾਨੀਤਿ ਛਕ੍ਕੇ ਵੁਤ੍ਤਾਨਿਯੇਵ ਸਤ੍ਤਕਵਸੇਨ ਯੋਜੇਤਬ੍ਬਾਨਿ. ਕਤਚੀਵਰਨ੍ਤਿਆਦੀਨਿ ਦ੍ਵੇ ਸਤ੍ਤਕਾਨਿ ਕਥਿਨਕ੍ਖਨ੍ਧਕੇ ਨਿਦ੍ਦਿਟ੍ਠਾਨਿ.
ਭਿਕ੍ਖੁਸ੍ਸ ਨ ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਦਟ੍ਠਬ੍ਬਾ, ਭਿਕ੍ਖੁਸ੍ਸ ਹੋਤਿ ਆਪਤ੍ਤਿ ਪਟਿਕਾਤਬ੍ਬਾਤਿ ਇਮਾਨਿ ਤੀਣਿ ਸਤ੍ਤਕਾਨਿ, ਦ੍ਵੇ ਅਧਮ੍ਮਿਕਾਨਿ, ਏਕਂ ਧਮ੍ਮਿਕਂ; ਤਾਨਿ ਤੀਣਿਪਿ ਚਮ੍ਪੇਯ੍ਯਕੇ ਨਿਦ੍ਦਿਟ੍ਠਾਨਿ. ਅਸਦ੍ਧਮ੍ਮਾਤਿ ਅਸਤਂ ਧਮ੍ਮਾ, ਅਸਨ੍ਤੋ ਵਾ ਧਮ੍ਮਾ; ਅਸੋਭਨਾ ਹੀਨਾ ਲਾਮਕਾਤਿ ਅਤ੍ਥੋ. ਸਦ੍ਧਮ੍ਮਾਤਿ ਸਤਂ ਬੁਦ੍ਧਾਦੀਨਂ ਧਮ੍ਮਾ; ਸਨ੍ਤੋ ਵਾ ਧਮ੍ਮਾ ਸੁਨ੍ਦਰਾ ਉਤ੍ਤਮਾਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸਤ੍ਤਕਵਾਰਵਣ੍ਣਨਾ ਨਿਟ੍ਠਿਤਾ.
ਅਟ੍ਠਕਵਾਰਵਣ੍ਣਨਾ
੩੨੮. ਅਟ੍ਠਕੇਸੁ – ਅਟ੍ਠਾਨਿਸਂਸੇਤਿ ‘‘ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਉਪੋਸਥਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਉਪੋਸਥਂ ਕਰਿਸ੍ਸਾਮ, ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਪਵਾਰੇਸ੍ਸਾਮ, ਸਙ੍ਘਕਮ੍ਮਂ ਕਰਿਸ੍ਸਾਮ, ਆਸਨੇ ਨਿਸੀਦਿਸ੍ਸਾਮ, ਯਾਗੁਪਾਨੇ ਨਿਸੀਦਿਸ੍ਸਾਮ, ਭਤ੍ਤਗ੍ਗੇ ਨਿਸੀਦਿਸ੍ਸਾਮ, ਏਕਚ੍ਛਨ੍ਨੇ ਵਸਿਸ੍ਸਾਮ, ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਕਰਿਸ੍ਸਾਮਾ’’ਤਿ ਏਵਂ ਕੋਸਮ੍ਬਕਕ੍ਖਨ੍ਧਕੇ ਵੁਤ੍ਤੇ ਆਨਿਸਂਸੇ. ਦੁਤਿਯਅਟ੍ਠਕੇਪਿ ਏਸੇਵ ਨਯੋ, ਤਮ੍ਪਿ ਹਿ ਏਵਮੇਵ ਕੋਸਮ੍ਬਕਕ੍ਖਨ੍ਧਕੇ ਵੁਤ੍ਤਂ.
ਅਟ੍ਠ ਯਾਵਤਤਿਯਕਾਤਿ ਭਿਕ੍ਖੂਨਂ ਤੇਰਸਕੇ ਚਤ੍ਤਾਰੋ, ਭਿਕ੍ਖੁਨੀਨਂ ਸਤ੍ਤਰਸਕੇ ਭਿਕ੍ਖੂਹਿ ਅਸਾਧਾਰਣਾ ਚਤ੍ਤਾਰੋਤਿ ਅਟ੍ਠ. ਅਟ੍ਠਹਾਕਾਰੇਹਿ ਕੁਲਾਨਿ ਦੂਸੇਤੀਤਿ ਕੁਲਾਨਿ ਦੂਸੇਤਿ ਪੁਪ੍ਫੇਨ ਵਾ ਫਲੇਨ ਵਾ ਚੁਣ੍ਣੇਨ ਵਾ ਮਤ੍ਤਿਕਾਯ ਵਾ ਦਨ੍ਤਕਟ੍ਠੇਨ ਵਾ ਵੇਲ਼ੁਯਾ ਵਾ ਵੇਜ੍ਜਿਕਾਯ ਵਾ ਜਙ੍ਘਪੇਸਨਿਕੇਨ ਵਾਤਿ ਇਮੇਹਿ ਅਟ੍ਠਹਿ. ਅਟ੍ਠ ਮਾਤਿਕਾ ਚੀਵਰਕ੍ਖਨ੍ਧਕੇ, ਅਪਰਾ ਅਟ੍ਠ ਕਥਿਨਕ੍ਖਨ੍ਧਕੇ ਵੁਤ੍ਤਾ. ਅਟ੍ਠਹਿ ਅਸਦ੍ਧਮ੍ਮੇਹੀਤਿ ਲਾਭੇਨ ਅਲਾਭੇਨ ਯਸੇਨ ਅਯਸੇਨ ਸਕ੍ਕਾਰੇਨ ਅਸਕ੍ਕਾਰੇਨ ਪਾਪਿਚ੍ਛਤਾਯ ਪਾਪਮਿਤ੍ਤਤਾਯ. ਅਟ੍ਠ ਲੋਕਧਮ੍ਮਾ ਨਾਮ ਲਾਭੇ ਸਾਰਾਗੋ, ਅਲਾਭੇ ਪਟਿਵਿਰੋਧੋ; ਏਵਂ ਯਸੇ ਅਯਸੇ, ਪਸਂਸਾਯ ਨਿਨ੍ਦਾਯ, ਸੁਖੇ ਸਾਰਾਗੋ, ਦੁਕ੍ਖੇ ਪਟਿਵਿਰੋਧੋਤਿ. ਅਟ੍ਠਙ੍ਗਿਕੋ ਮੁਸਾਵਾਦੋਤਿ ‘‘ਵਿਨਿਧਾਯ ਸਞ੍ਞ’’ਨ੍ਤਿ ਇਮਿਨਾ ਸਦ੍ਧਿਂ ਪਾਲ਼ਿਯਂ ਆਗਤੇਹਿ ਸਤ੍ਤਹੀਤਿ ਅਟ੍ਠਹਿ ਅਙ੍ਗੇਹਿ ਅਟ੍ਠਙ੍ਗਿਕੋ.
ਅਟ੍ਠ ਉਪੋਸਥਙ੍ਗਾਨੀਤਿ –
‘‘ਪਾਣਂ ਨ ਹਨੇ ਨ ਚਾਦਿਨ੍ਨਮਾਦਿਯੇ,
ਮੁਸਾ ਨ ਭਾਸੇ ਨ ਚ ਮਜ੍ਜਪੋ ਸਿਯਾ;
ਅਬ੍ਰਹ੍ਮਚਰਿਯਾ ਵਿਰਮੇਯ੍ਯ ਮੇਥੁਨਾ,
ਰਤ੍ਤਿਂ ਨ ਭੁਞ੍ਜੇਯ੍ਯ ਵਿਕਾਲਭੋਜਨਂ.
‘‘ਮਾਲਂ ਨ ਧਾਰੇ ਨ ਚ ਗਨ੍ਧਮਾਚਰੇ,
ਮਞ੍ਚੇ ਛਮਾਯਂਵ ਸਯੇਥ ਸਨ੍ਥਤੇ;
ਏਤਞ੍ਹਿ ਅਟ੍ਠਙ੍ਗਿਕਮਾਹੁਪੋਸਥਂ,
ਬੁਦ੍ਧੇਨ ਦੁਕ੍ਖਨ੍ਤਗੁਨਾ ਪਕਾਸਿਤ’’ਨ੍ਤਿ. (ਅ. ਨਿ. ੩.੭੧);
ਏਵਂ ਵੁਤ੍ਤਾਨਿ ਅਟ੍ਠ. ਅਟ੍ਠ ਦੂਤੇਯ੍ਯਙ੍ਗਾਨੀਤਿ ‘‘ਇਧ, ਭਿਕ੍ਖਵੇ, ਭਿਕ੍ਖੁ ਸੋਤਾ ਚ ਹੋਤਿ ਸਾਵੇਤਾ ਚਾ’’ਤਿਆਦਿਨਾ ਨਯੇਨ ਸਙ੍ਘਭੇਦਕੇ ਵੁਤ੍ਤਾਨਿ. ਤਿਤ੍ਥਿਯਵਤ੍ਤਾਨਿ ਮਹਾਖਨ੍ਧਕੇ ਨਿਦ੍ਦਿਟ੍ਠਾਨਿ. ਅਨਤਿਰਿਤ੍ਤਾ ਚ ਅਤਿਰਿਤ੍ਤਾ ਚ ਪਵਾਰਣਾਸਿਕ੍ਖਾਪਦੇ ਨਿਦ੍ਦਿਟ੍ਠਾ. ਅਟ੍ਠਨ੍ਨਂ ਪਚ੍ਚੁਟ੍ਠਾਤਬ੍ਬਨ੍ਤਿ ਭਤ੍ਤਗ੍ਗੇ ਵੁਡ੍ਢਭਿਕ੍ਖੁਨੀਨਂ, ਆਸਨਮ੍ਪਿ ਤਾਸਂਯੇਵ ਦਾਤਬ੍ਬਂ. ਉਪਾਸਿਕਾਤਿ ਵਿਸਾਖਾ. ਅਟ੍ਠਾਨਿਸਂਸਾ ਵਿਨਯਧਰੇਤਿ ਪਞ੍ਚਕੇ ਵੁਤ੍ਤੇਸੁ ਪਞ੍ਚਸੁ ‘‘ਤਸ੍ਸਾਧੇਯ੍ਯੋ ਉਪੋਸਥੋ, ਪਵਾਰਣਾ, ਸਙ੍ਘਕਮ੍ਮ’’ਨ੍ਤਿ ਇਮੇ ਤਯੋ ਪਕ੍ਖਿਪਿਤ੍ਵਾ ਅਟ੍ਠ ਵੇਦਿਤਬ੍ਬਾ. ਅਟ੍ਠ ਪਰਮਾਨੀਤਿ ਪੁਬ੍ਬੇ ਵੁਤ੍ਤਪਰਮਾਨੇਵ ਅਟ੍ਠਕਵਸੇਨ ਯੋਜੇਤ੍ਵਾ ਵੇਦਿਤਬ੍ਬਾਨਿ. ਅਟ੍ਠਸੁ ਧਮ੍ਮੇਸੁ ਸਮ੍ਮਾ ਵਤ੍ਤਿਤਬ੍ਬਨ੍ਤਿ ‘‘ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ’’ਤਿਆਦਿਨਾ ਨਯੇਨ ਸਮਥਕ੍ਖਨ੍ਧਕੇ ਨਿਦ੍ਦਿਟ੍ਠੇਸੁ ਅਟ੍ਠਸੁ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਅਟ੍ਠਕਵਾਰਵਣ੍ਣਨਾ ਨਿਟ੍ਠਿਤਾ.
ਨਵਕਵਾਰਵਣ੍ਣਨਾ
੩੨੯. ਨਵਕੇਸੁ – ਨਵ ਆਘਾਤਵਤ੍ਥੂਨੀਤਿ ‘‘ਅਨਤ੍ਥਂ ਮੇ ਅਚਰੀ’’ਤਿਆਦੀਨਿ ਨਵ. ਨਵ ਆਘਾਤਪਟਿਵਿਨਯਾਤਿ ‘‘ਅਨਤ੍ਥਂ ਮੇ ਅਚਰਿ, ਤਂ ਕੁਤੇਤ੍ਥ ਲਬ੍ਭਾਤਿ ਆਘਾਤਂ ਪਟਿਵਿਨੇਤੀ’’ਤਿਆਦੀਨਿ ਨਵ. ਨਵ ਵਿਨੀਤਵਤ੍ਥੂਨੀਤਿ ਨਵਹਿ ਆਘਾਤਵਤ੍ਥੂਹਿ ਆਰਤਿ ਵਿਰਤਿ ਪਟਿਵਿਰਤਿ ਸੇਤੁਘਾਤੋ. ਨਵਹਿ ਸਙ੍ਘੋ ਭਿਜ੍ਜਤੀਤਿ ‘‘ਨਵਨ੍ਨਂ ਵਾ, ਉਪਾਲਿ, ਅਤਿਰੇਕਨਵਨ੍ਨਂ ਵਾ ਸਙ੍ਘਰਾਜਿ ਚੇਵ ਹੋਤਿ ਸਙ੍ਘਭੇਦੋ ਚਾ’’ਤਿ. ਨਵ ਪਰਮਾਨੀਤਿ ਪੁਬ੍ਬੇ ਵੁਤ੍ਤਪਰਮਾਨੇਵ ਨਵਕਵਸੇਨ ਯੋਜੇਤ੍ਵਾ ਵੇਦਿਤਬ੍ਬਾਨਿ. ਨਵ ਤਣ੍ਹਾਮੂਲਕਾ ਨਾਮ ਤਣ੍ਹਂ ਪਟਿਚ੍ਚ ਪਰਿਯੇਸਨਾ, ਪਰਿਯੇਸਨਂ ਪਟਿਚ੍ਚ ਲਾਭੋ, ਲਾਭਂ ਪਟਿਚ੍ਚ ਵਿਨਿਚ੍ਛਯੋ, ਵਿਨਿਚ੍ਛਯਂ ਪਟਿਚ੍ਚ ਛਨ੍ਦਰਾਗੋ, ਛਨ੍ਦਰਾਗਂ ਪਟਿਚ੍ਚ ਅਜ੍ਝੋਸਾਨਂ, ਅਜ੍ਝੋਸਾਨਂ ਪਟਿਚ੍ਚ ਪਰਿਗ੍ਗਹੋ, ਪਰਿਗ੍ਗਹਂ ਪਟਿਚ੍ਚ ਮਚ੍ਛਰਿਯਂ, ਮਚ੍ਛਰਿਯਂ ਪਟਿਚ੍ਚ ਆਰਕ੍ਖਾ, ਆਰਕ੍ਖਾਧਿਕਰਣਂ ਦਣ੍ਡਾਦਾਨਸਤ੍ਥਾਦਾਨਕਲਹਵਿਗ੍ਗਹਵਿਵਾਦਤੁਵਂਤੁਵਂਪੇਸੁਞ੍ਞਮੁਸਾਵਾਦਾ. ਨਵ ਵਿਧਮਾਨਾਤਿ ‘‘ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀ’’ਤਿਮਾਨਾਦਯੋ. ਨਵ ਚੀਵਰਾਨੀਤਿ ਤਿਚੀਵਰਨ੍ਤਿ ਵਾ ਵਸ੍ਸਿਕਸਾਟਿਕਾਤਿ ਵਾਤਿਆਦਿਨਾ ਨਯੇਨ ਵੁਤ੍ਤਾਨਿ. ਨ ਵਿਕਪ੍ਪੇਤਬ੍ਬਾਨੀਤਿ ਅਧਿਟ੍ਠਿਤਕਾਲਤੋ ਪਟ੍ਠਾਯ ਨ ਵਿਕਪ੍ਪੇਤਬ੍ਬਾਨਿ. ਨਵ ਅਧਮ੍ਮਿਕਾਨਿ ਦਾਨਾਨੀਤਿ ਸਙ੍ਘਸ੍ਸ ਪਰਿਣਤਂ ਅਞ੍ਞਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਪੁਗ੍ਗਲਸ੍ਸ ਵਾ ਪਰਿਣਾਮੇਤਿ, ਚੇਤਿਯਸ੍ਸ ਪਰਿਣਤਂ ਅਞ੍ਞਚੇਤਿਯਸ੍ਸ ਵਾ ਸਙ੍ਘਸ੍ਸ ਵਾ ਪੁਗ੍ਗਲਸ੍ਸ ਵਾ ਪਰਿਣਾਮੇਤਿ, ਪੁਗ੍ਗਲਸ੍ਸ ਪਰਿਣਤਂ ਅਞ੍ਞਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਪਰਿਣਾਮੇਤੀਤਿ ਏਵਂ ਵੁਤ੍ਤਾਨਿ.
ਨਵ ਪਟਿਗ੍ਗਹਪਰਿਭੋਗਾਤਿ ਏਤੇਸਂਯੇਵ ਦਾਨਾਨਂ ਪਟਿਗ੍ਗਹਾ ਚ ਪਰਿਭੋਗਾ ਚ. ਤੀਣਿ ਧਮ੍ਮਿਕਾਨਿ ਦਾਨਾਨੀਤਿ ਸਙ੍ਘਸ੍ਸ ਨਿਨ੍ਨਂ ਸਙ੍ਘਸ੍ਸੇਵ ਦੇਤਿ, ਚੇਤਿਯਸ੍ਸ ਨਿਨ੍ਨਂ ਚੇਤਿਯਸ੍ਸੇਵ, ਪੁਗ੍ਗਲਸ੍ਸ ਨਿਨ੍ਨਂ ਪੁਗ੍ਗਲਸ੍ਸੇਵ ਦੇਤੀਤਿ ਇਮਾਨਿ ਤੀਣਿ. ਪਟਿਗ੍ਗਹਪਟਿਭੋਗਾਪਿ ਤੇਸਂਯੇਵ ਪਟਿਗ੍ਗਹਾ ਚ ਪਰਿਭੋਗਾ ਚ. ਨਵ ਅਧਮ੍ਮਿਕਾ ਸਞ੍ਞਤ੍ਤਿਯੋਤਿ ਅਧਮ੍ਮਵਾਦਿਪੁਗ੍ਗਲੋ, ਅਧਮ੍ਮਵਾਦਿਸਮ੍ਬਹੁਲਾ, ਅਧਮ੍ਮਵਾਦਿਸਙ੍ਘੋਤਿ ਏਵਂ ਤੀਣਿ ਤਿਕਾਨਿ ਸਮਥਕ੍ਖਨ੍ਧਕੇ ਨਿਦ੍ਦਿਟ੍ਠਾਨਿ. ਧਮ੍ਮਿਕਾ ਸਞ੍ਞਤ੍ਤਿਯੋਪਿ ਧਮ੍ਮਵਾਦੀ ਪੁਗ੍ਗਲੋਤਿਆਦਿਨਾ ਨਯੇਨ ਤਤ੍ਥੇਵ ਨਿਦ੍ਦਿਟ੍ਠਾ. ਅਧਮ੍ਮਕਮ੍ਮੇ ਦ੍ਵੇ ਨਵਕਾਨਿ ਓਵਾਦਵਗ੍ਗਸ੍ਸ ਪਠਮਸਿਕ੍ਖਾਪਦਨਿਦ੍ਦੇਸੇ ਪਾਚਿਤ੍ਤਿਯਵਸੇਨ ਵੁਤ੍ਤਾਨਿ. ਧਮ੍ਮਕਮ੍ਮੇ ਦ੍ਵੇ ਨਵਕਾਨਿ ਤਤ੍ਥੇਵ ਦੁਕ੍ਕਟਵਸੇਨ ਵੁਤ੍ਤਾਨਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਨਵਕਵਾਰਵਣ੍ਣਨਾ ਨਿਟ੍ਠਿਤਾ.
ਦਸਕਵਾਰਵਣ੍ਣਨਾ
੩੩੦. ਦਸਕੇਸੁ – ਦਸ ਆਘਾਤਵਤ੍ਥੂਨੀਤਿ ਨਵਕੇਸੁ ਵੁਤ੍ਤਾਨਿ ਨਵ ‘‘ਅਟ੍ਠਾਨੇ ਵਾ ਪਨ ਆਘਾਤੋ ਜਾਯਤੀ’’ਤਿ ਇਮਿਨਾ ਸਦ੍ਧਿਂ ਦਸ ਹੋਨ੍ਤਿ. ਆਘਾਤਪਟਿਵਿਨਯਾਪਿ ਤਤ੍ਥ ਵੁਤ੍ਤਾ ਨਵ ‘‘ਅਟ੍ਠਾਨੇ ਵਾ ਪਨ ਆਘਾਤੋ ਜਾਯਤਿ, ਤਂ ਕੁਤੇਤ੍ਥ ਲਬ੍ਭਾਤਿ ਆਘਾਤਂ ਪਟਿਵਿਨੇਤੀ’’ਤਿ ਇਮਿਨਾ ਸਦ੍ਧਿਂ ਦਸ ਵੇਦਿਤਬ੍ਬਾ. ਦਸ ਵਿਨੀਤਵਤ੍ਥੂਨੀਤਿ ਦਸਹਿ ਆਘਾਤਵਤ੍ਥੂਹਿ ਵਿਰਤਿਸਙ੍ਖਾਤਾਨਿ ਦਸ. ਦਸਵਤ੍ਥੁਕਾ ਮਿਚ੍ਛਾਦਿਟ੍ਠੀਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਵਸੇਨ ਵੇਦਿਤਬ੍ਬਾ, ‘‘ਅਤ੍ਥਿ ਦਿਨ੍ਨ’’ਨ੍ਤਿਆਦਿਵਸੇਨ ਸਮ੍ਮਾਦਿਟ੍ਠਿ, ‘‘ਸਸ੍ਸਤੋ ਲੋਕੋ’’ਤਿਆਦਿਨਾ ਵਸੇਨ ਪਨ ਅਨ੍ਤਗ੍ਗਾਹਿਕਾ ਦਿਟ੍ਠਿ ਵੇਦਿਤਬ੍ਬਾ. ਦਸ ਮਿਚ੍ਛਤ੍ਤਾਤਿ ਮਿਚ੍ਛਾਦਿਟ੍ਠਿਆਦਯੋ ਮਿਚ੍ਛਾਵਿਮੁਤ੍ਤਿਪਰਿਯੋਸਾਨਾ, ਵਿਪਰੀਤਾ ਸਮ੍ਮਤ੍ਤਾ. ਸਲਾਕਗ੍ਗਾਹਾ ਸਮਥਕ੍ਖਨ੍ਧਕੇ ਨਿਦ੍ਦਿਟ੍ਠਾ.
ਦਸਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਉਬ੍ਬਾਹਿਕਾਯ ਸਮ੍ਮਨ੍ਨਿਤਬ੍ਬੋਤਿ ‘‘ਸੀਲਵਾ ਹੋਤੀ’’ਤਿਆਦਿਨਾ ਨਯੇਨ ਸਮਥਕ੍ਖਨ੍ਧਕੇ ਵੁਤ੍ਤੇਹਿ ਦਸਹਿ. ਦਸ ਆਦੀਨਵਾ ਰਾਜਨ੍ਤੇਪੁਰਪ੍ਪਵੇਸਨੇ ਰਾਜਸਿਕ੍ਖਾਪਦੇ ਨਿਦ੍ਦਿਟ੍ਠਾ. ਦਸ ਦਾਨਵਤ੍ਥੂਨੀਤਿ ਅਨ੍ਨਂ ਪਾਨਂ ਵਤ੍ਥਂ ਯਾਨਂ ਮਾਲਾ ਗਨ੍ਧਂ ਵਿਲੇਪਨਂ ਸੇਯ੍ਯਾਵਸਥਂ ਪਦੀਪੇਯ੍ਯਂ. ਦਸ ਰਤਨਾਨੀਤਿ ਮੁਤ੍ਤਾਮਣਿਵੇਲ਼ੁਰਿਯਾਦੀਨਿ. ਦਸ ਪਂਸੁਕੂਲਾਨੀਤਿ ਸੋਸਾਨਿਕਂ, ਪਾਪਣਿਕਂ, ਉਨ੍ਦੂਰਕ੍ਖਾਯਿਤਂ, ਉਪਚਿਕਕ੍ਖਾਯਿਤਂ, ਅਗ੍ਗਿਦਡ੍ਢਂ, ਗੋਖਾਯਿਤਂ, ਅਜਿਕਕ੍ਖਾਯਿਤਂ, ਥੂਪਚੀਵਰਂ, ਆਭਿਸੇਕਿਯਂ, ਭਤਪਟਿਯਾਭਤਨ੍ਤਿ ਏਤੇਸੁ ਉਪਸਮ੍ਪਨ੍ਨੇਨ ਉਸ੍ਸੁਕ੍ਕਂ ਕਾਤਬ੍ਬਂ. ਦਸ ਚੀਵਰਧਾਰਣਾਤਿ ‘‘ਸਬ੍ਬਨੀਲਕਾਨਿ ਚੀਵਰਾਨਿ ਧਾਰੇਨ੍ਤੀ’’ਤਿ ਵੁਤ੍ਤਵਸੇਨ ਦਸਾਤਿ ਕੁਰੁਨ੍ਦਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਨਵਸੁ ਕਪ੍ਪਿਯਚੀਵਰੇਸੁ ਉਦਕਸਾਟਿਕਂ ਵਾ ਸਙ੍ਕਚ੍ਚਿਕਂ ਵਾ ਪਕ੍ਖਿਪਿਤ੍ਵਾ ਦਸਾ’’ਤਿ ਵੁਤ੍ਤਂ.
ਅਵਨ੍ਦਨੀਯਪੁਗ੍ਗਲਾ ਸੇਨਾਸਨਕ੍ਖਨ੍ਧਕੇ ਨਿਦ੍ਦਿਟ੍ਠਾ. ਦਸ ਅਕ੍ਕੋਸਵਤ੍ਥੂਨਿ ਓਮਸਵਾਦੇ ਨਿਦ੍ਦਿਟ੍ਠਾਨਿ. ਦਸ ਆਕਾਰਾ ਪੇਸੁਞ੍ਞਸਿਕ੍ਖਾਪਦੇ ਨਿਦ੍ਦਿਟ੍ਠਾ. ਦਸ ਸੇਨਾਸਨਾਨੀਤਿ ਮਞ੍ਚੋ, ਪੀਠਂ, ਭਿਸਿ, ਬਿਮ੍ਬੋਹਨਂ, ਚਿਮਿਲਿਕਾ, ਉਤ੍ਤਰਤ੍ਥਰਣਂ, ਤਟ੍ਟਿਕਾ, ਚਮ੍ਮਖਣ੍ਡੋ, ਨਿਸੀਦਨਂ, ਤਿਣਸਨ੍ਥਾਰੋ, ਪਣ੍ਣਸਨ੍ਥਾਰੋਤਿ. ਦਸ ਵਰਾਨਿ ਯਾਚਿਂਸੂਤਿ ਵਿਸਾਖਾ ਅਟ੍ਠ, ਸੁਦ੍ਧੋਦਨਮਹਾਰਾਜਾ ਏਕਂ, ਜੀਵਕੋ ਏਕਂ. ਯਾਗੁਆਨਿਸਂਸਾ ਚ ਅਕਪ੍ਪਿਯਮਂਸਾਨਿ ਚ ਭੇਸਜ੍ਜਕ੍ਖਨ੍ਧਕੇ ਨਿਦ੍ਦਿਟ੍ਠਾਨਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਦਸਕਵਾਰਵਣ੍ਣਨਾ ਨਿਟ੍ਠਿਤਾ.
ਏਕਾਦਸਕਵਾਰਵਣ੍ਣਨਾ
੩੩੧. ਏਕਾਦਸਕੇਸੁ – ਏਕਾਦਸਾਤਿ ਪਣ੍ਡਕਾਦਯੋ ਏਕਾਦਸ. ਏਕਾਦਸ ਪਾਦੁਕਾਤਿ ਦਸ ਰਤਨਮਯਾ, ਏਕਾ ਕਟ੍ਠਪਾਦੁਕਾ. ਤਿਣਪਾਦੁਕਮੁਞ੍ਜਪਾਦੁਕਪਬ੍ਬਜਪਾਦੁਕਾਦਯੋ ਪਨ ਕਟ੍ਠਪਾਦੁਕਸਙ੍ਗਹਮੇਵ ਗਚ੍ਛਨ੍ਤਿ. ਏਕਾਦਸ ਪਤ੍ਤਾਤਿ ਤਮ੍ਬਲੋਹਮਯੇਨ ਵਾ ਦਾਰੁਮਯੇਨ ਵਾ ਸਦ੍ਧਿਂ ਦਸ ਰਤਨਮਯਾ. ਏਕਾਦਸ ਚੀਵਰਾਨੀਤਿ ਸਬ੍ਬਨੀਲਕਾਦੀਨਿ ਏਕਾਦਸ. ਯਾਵਤਤਿਯਕਾਤਿ ਉਕ੍ਖਿਤ੍ਤਾਨੁਵਤ੍ਤਿਕਾ ਭਿਕ੍ਖੁਨੀ, ਸਙ੍ਘਾਦਿਸੇਸਾ ਅਟ੍ਠ, ਅਰਿਟ੍ਠੋ, ਚਣ੍ਡਕਾਲ਼ੀਤਿ. ਏਕਾਦਸ ਅਨ੍ਤਰਾਯਿਕਾ ਨਾਮ ‘‘ਨਸਿ ਅਨਿਮਿਤ੍ਤਾ’’ਤਿ ਆਦਯੋ. ਏਕਾਦਸ ਚੀਵਰਾਨਿ ਅਧਿਟ੍ਠਾਤਬ੍ਬਾਨੀਤਿ ਤਿਚੀਵਰਂ, ਵਸ੍ਸਿਕਸਾਟਿਕਾ, ਨਿਸੀਦਨਂ, ਪਚ੍ਚਤ੍ਥਰਣਂ, ਕਣ੍ਡੁਪ੍ਪਟਿਚ੍ਛਾਦਿ, ਮੁਖਪੁਞ੍ਛਨਚੋਲ਼ਂ, ਪਰਿਕ੍ਖਾਰਚੋਲ਼ਂ, ਉਦਕਸਾਟਿਕਾ, ਸਙ੍ਕਚ੍ਚਿਕਾਤਿ. ਨ ਵਿਕਪ੍ਪੇਤਬ੍ਬਾਨੀਤਿ ਏਤਾਨੇਵ ਅਧਿਟ੍ਠਿਤਕਾਲਤੋ ਪਟ੍ਠਾਯ ਨ ਵਿਕਪ੍ਪੇਤਬ੍ਬਾਨਿ. ਗਣ੍ਠਿਕਾ ਚ ਵਿਧਾ ਚ ਸੁਤ੍ਤਮਯੇਨ ਸਦ੍ਧਿਂ ਏਕਾਦਸ ਹੋਨ੍ਤਿ, ਤੇ ਸਬ੍ਬੇ ਖੁਦ੍ਦਕਕ੍ਖਨ੍ਧਕੇ ਨਿਦ੍ਦਿਟ੍ਠਾ. ਪਥਵਿਯੋ ਪਥਵਿਸਿਕ੍ਖਾਪਦੇ ਨਿਦ੍ਦਿਟ੍ਠਾ. ਨਿਸ੍ਸਯਪਟਿਪਸ੍ਸਦ੍ਧਿਯੋ ਉਪਜ੍ਝਾਯਮ੍ਹਾ ਪਞ੍ਚ, ਆਚਰਿਯਮ੍ਹਾ ਛ; ਏਵਂ ਏਕਾਦਸ. ਅਵਨ੍ਦਿਯਪੁਗ੍ਗਲਾ ਨਗ੍ਗੇਨ ਸਦ੍ਧਿਂ ਏਕਾਦਸ, ਤੇ ਸਬ੍ਬੇ ਸੇਨਾਸਨਕ੍ਖਨ੍ਧਕੇ ਨਿਦ੍ਦਿਟ੍ਠਾ. ਏਕਾਦਸ ਪਰਮਾਨਿ ਪੁਬ੍ਬੇ ਵੁਤ੍ਤੇਸੁ ਚੁਦ੍ਦਸਸੁ ਏਕਾਦਸਕਵਸੇਨ ਯੋਜੇਤ੍ਵਾ ਵੇਦਿਤਬ੍ਬਾਨਿ. ਏਕਾਦਸ ਵਰਾਨੀਤਿ ਮਹਾਪਜਾਪਤਿਯਾ ਯਾਚਿਤਵਰੇਨ ਸਦ੍ਧਿਂ ਪੁਬ੍ਬੇ ਵੁਤ੍ਤਾਨਿ ਦਸ. ਏਕਾਦਸ ਸੀਮਾਦੋਸਾਤਿ ‘‘ਅਤਿਖੁਦ੍ਦਕਂ ਸੀਮਂ ਸਮ੍ਮਨ੍ਨਨ੍ਤੀ’’ਤਿਆਦਿਨਾ ਨਯੇਨ ਕਮ੍ਮਵਗ੍ਗੇ ਆਗਮਿਸ੍ਸਨ੍ਤਿ.
ਅਕ੍ਕੋਸਕਪਰਿਭਾਸਕੇ ਪੁਗ੍ਗਲੇ ਏਕਾਦਸਾਦੀਨਵਾ ਨਾਮ ‘‘ਯੋ ਸੋ, ਭਿਕ੍ਖਵੇ, ਭਿਕ੍ਖੁ ਅਕ੍ਕੋਸਕੋ ਪਰਿਭਾਸਕੋ ਅਰਿਯੂਪਵਾਦੀ, ਸਬ੍ਰਹ੍ਮਚਾਰੀਨਂ ਅਟ੍ਠਾਨਮੇਤਂ ਅਨਵਕਾਸੋ ਯਂ ਸੋ ਏਕਾਦਸਨ੍ਨਂ ਬ੍ਯਸਨਾਨਂ ਅਞ੍ਞਤਰਂ ਬ੍ਯਸਨਂ ਨ ਨਿਗਚ੍ਛੇਯ੍ਯ. ਕਤਮੇਸਂ ਏਕਾਦਸਨ੍ਨਂ? ਅਨਧਿਗਤਂ ਨਾਧਿਗਚ੍ਛਤਿ, ਅਧਿਗਤਾ ਪਰਿਹਾਯਤਿ, ਸਦ੍ਧਮ੍ਮਸ੍ਸ ਨ ਵੋਦਾਯਨ੍ਤਿ, ਸਦ੍ਧਮ੍ਮੇਸੁ ਵਾ ਅਧਿਮਾਨਿਕੋ ਹੋਤਿ, ਅਨਭਿਰਤੋ ਵਾ ਬ੍ਰਹ੍ਮਚਰਿਯਂ ਚਰਤਿ, ਅਞ੍ਞਤਰਂ ਵਾ ਸਂਕਿਲਿਟ੍ਠਂ ਆਪਤ੍ਤਿਂ ਆਪਜ੍ਜਤਿ, ਸਿਕ੍ਖਂ ਵਾ ਪਚ੍ਚਕ੍ਖਾਯ ਹੀਨਾਯਾਵਤ੍ਤਤਿ, ਗਾਲ਼੍ਹਂ ਵਾ ਰੋਗਾਤਙ੍ਕਂ ਫੁਸਤਿ, ਉਮ੍ਮਾਦਂ ਵਾ ਪਾਪੁਣਾਤਿ ਚਿਤ੍ਤਕ੍ਖੇਪਂ ਵਾ, ਸਮ੍ਮੂਲ਼੍ਹੋ ਕਾਲਂ ਕਰੋਤਿ, ਕਾਯਸ੍ਸ ਭੇਦਾ ਪਰਮ੍ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤੀ’’ਤਿ (ਅ. ਨਿ. ੧੧.੬). ਏਤ੍ਥ ਚ ਸਦ੍ਧਮ੍ਮੋਤਿ ਬੁਦ੍ਧਵਚਨਂ ਅਧਿਪ੍ਪੇਤਂ.
ਆਸੇਵਿਤਾਯਾਤਿ ਆਦਿਤੋ ਪਟ੍ਠਾਯ ਸੇਵਿਤਾਯ. ਭਾਵਿਤਾਯਾਤਿ ਨਿਪ੍ਫਾਦਿਤਾਯ ਵਡ੍ਢਿਤਾਯ
ਵਾ. ਬਹੁਲੀਕਤਾਯਾਤਿ ਪੁਨਪ੍ਪੁਨਂ ਕਤਾਯ. ਯਾਨੀਕਤਾਯਾਤਿ ਸੁਯੁਤ੍ਤਯਾਨਸਦਿਸਾਯ ਕਤਾਯ. ਵਤ੍ਥੁਕਤਾਯਾਤਿ ਯਥਾ ਪਤਿਟ੍ਠਾ ਹੋਤਿ; ਏਵਂ ਕਤਾਯ. ਅਨੁਟ੍ਠਿਤਾਯਾਤਿ ਅਨੁ ਅਨੁ ਪਵਤ੍ਤਿਤਾਯ; ਨਿਚ੍ਚਾਧਿਟ੍ਠਿਤਾਯਾਤਿ ਅਤ੍ਥੋ. ਪਰਿਚਿਤਾਯਾਤਿ ਸਮਨ੍ਤਤੋ ਚਿਤਾਯ; ਸਬ੍ਬਦਿਸਾਸੁ ਚਿਤਾਯ ਆਚਿਤਾਯ ਭਾਵਿਤਾਯ ਅਭਿਵਡ੍ਢਿਤਾਯਾਤਿ ਅਤ੍ਥੋ. ਸੁਸਮਾਰਦ੍ਧਾਯਾਤਿ ਸੁਟ੍ਠੁ ਸਮਾਰਦ੍ਧਾਯ; ਵਸੀਭਾਵਂ ਉਪਨੀਤਾਯਾਤਿ ਅਤ੍ਥੋ. ਨ ਪਾਪਕਂ ਸੁਪਿਨਨ੍ਤਿ ਪਾਪਕਮੇਵ ਨ ਪਸ੍ਸਤਿ, ਭਦ੍ਰਕਂ ਪਨ ਵੁਡ੍ਢਿਕਾਰਣਭੂਤਂ ਪਸ੍ਸਤਿ. ਦੇਵਤਾ ਰਕ੍ਖਨ੍ਤੀਤਿ ਆਰਕ੍ਖਦੇਵਤਾ ਧਮ੍ਮਿਕਂ ਰਕ੍ਖਂ ਪਚ੍ਚੁਪਟ੍ਠਾਪੇਨ੍ਤਿ. ਤੁਵਟਂ ਚਿਤ੍ਤਂ ਸਮਾਧਿਯਤੀਤਿ ਖਿਪ੍ਪਂ ਚਿਤ੍ਤਂ ਸਮਾਧਿਯਤਿ. ਉਤ੍ਤਰਿ ਅਪ੍ਪਟਿਵਿਜ੍ਝਨ੍ਤੋਤਿ ਮੇਤ੍ਤਾਝਾਨਤੋ ਉਤ੍ਤਰਿਂ ਅਰਹਤ੍ਤਂ ਅਸਚ੍ਛਿਕਰੋਨ੍ਤੋ ਸੇਖੋ ਵਾ ਪੁਥੁਜ੍ਜਨੋ ਵਾ ਹੁਤ੍ਵਾ ਕਾਲਂ ਕਰੋਨ੍ਤੋ ਬ੍ਰਹ੍ਮਲੋਕੂਪਗੋ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਏਕਾਦਸਕਵਾਰਵਣ੍ਣਨਾ ਪਰਿਯੋਸਾਨਾ
ਏਕੁਤ੍ਤਰਿਕਵਣ੍ਣਨਾ ਨਿਟ੍ਠਿਤਾ.