ਸਮੁਟ੍ਠਾਨਸੀਸਵਣ੍ਣਨਾ
੨੫੭. ਤਦਨਨ੍ਤਰਾਯ ਪਨ ਸਮੁਟ੍ਠਾਨਕਥਾਯ ਅਨਤ੍ਤਾ ਇਤਿ ਨਿਚ੍ਛਯਾਤਿ ਅਨਤ੍ਤਾ ਇਤਿ ਨਿਚ੍ਛਿਤਾ. ਸਭਾਗਧਮ੍ਮਾਨਨ੍ਤਿ ਅਨਿਚ੍ਚਾਕਾਰਾਦੀਹਿ ਸਭਾਗਾਨਂ ਸਙ੍ਖਤਧਮ੍ਮਾਨਂ. ਨਾਮਮਤ੍ਤਂ ਨ ਨਾਯਤੀਤਿ ਨਾਮਮਤ੍ਤਮ੍ਪਿ ਨ ਪਞ੍ਞਾਯਤਿ. ਦੁਕ੍ਖਹਾਨਿਨ੍ਤਿ ਦੁਕ੍ਖਘਾਤਨਂ. ਖਨ੍ਧਕਾ ਯਾ ਚ ਮਾਤਿਕਾਤਿ ਖਨ੍ਧਕਾ ਯਾ ਚ ਮਾਤਿਕਾਤਿ ਅਤ੍ਥੋ. ਅਯਮੇਵ ਵਾ ਪਾਠੋ. ਸਮੁਟ੍ਠਾਨਂ ਨਿਯਤੋ ਕਤਨ੍ਤਿ ਸਮੁਟ੍ਠਾਨਂ ਨਿਯਤੋਕਤਂ ਨਿਯਤਕਤਂ; ਨਿਯਤਸਮੁਟ੍ਠਾਨਨ੍ਤਿ ਅਤ੍ਥੋ. ਏਤੇਨ ਭੂਤਾਰੋਚਨਚੋਰਿਵੁਟ੍ਠਾਪਨਅਨਨੁਞ੍ਞਾਤਸਿਕ੍ਖਾਪਦਤ੍ਤਯਸ੍ਸ ਸਙ੍ਗਹੋ ਪਚ੍ਚੇਤਬ੍ਬੋ. ਏਤਾਨੇਵ ਹਿ ਤੀਣਿ ਸਿਕ੍ਖਾਪਦਾਨਿ ਨਿਯਤਸਮੁਟ੍ਠਾਨਾਨਿ, ਅਞ੍ਞੇਹਿ ਸਦ੍ਧਿਂ ਅਸਮ੍ਭਿਨ੍ਨਸਮੁਟ੍ਠਾਨਾਨਿ.
ਸਮ੍ਭੇਦਂ ਨਿਦਾਨਞ੍ਚਞ੍ਞਨ੍ਤਿ ਅਞ੍ਞਮ੍ਪਿ ਸਮ੍ਭੇਦਞ੍ਚ ਨਿਦਾਨਞ੍ਚ. ਤਤ੍ਥ ਸਮ੍ਭੇਦਵਚਨੇਨ ਸਮੁਟ੍ਠਾਨਸਮ੍ਭੇਦਸ੍ਸ ਗਹਣਂ ਪਚ੍ਚੇਤਬ੍ਬਂ, ਤਾਨਿ ਹਿ ਤੀਣਿ ਸਿਕ੍ਖਾਪਦਾਨਿ ਠਪੇਤ੍ਵਾ ਸੇਸਾਨਿ ਸਮ੍ਭਿਨ੍ਨਸਮੁਟ੍ਠਾਨਾਨਿ. ਨਿਦਾਨਵਚਨੇਨ ਸਿਕ੍ਖਾਪਦਾਨਂ ਪਞ੍ਞਤ੍ਤਿਦੇਸਸਙ੍ਖਾਤਂ ਨਿਦਾਨਂ ਪਚ੍ਚੇਤਬ੍ਬਂ. ਸੁਤ੍ਤੇ ਦਿਸ੍ਸਨ੍ਤਿ ਉਪਰੀਤਿ ਸਿਕ੍ਖਾਪਦਾਨਂ ਸਮੁਟ੍ਠਾਨਨਿਯਮੋ ਸਮ੍ਭੇਦੋ ਨਿਦਾਨਨ੍ਤਿ ਇਮਾਨਿ ਤੀਣਿ ਸੁਤ੍ਤਮ੍ਹਿ ਏਵ ਦਿਸ੍ਸਨ੍ਤਿ; ਪਞ੍ਞਾਯਨ੍ਤੀਤਿ ਅਤ੍ਥੋ. ਤਤ੍ਥ ‘‘ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ, ਕਾਯਤੋ ਚ ਚਿਤ੍ਤਤੋ ਚਾ’’ਤਿਆਦਿਮ੍ਹਿ ਤਾਵ ਪੁਰਿਮਨਯੇ ਸਮੁਟ੍ਠਾਨਨਿਯਮੋ ਚ ਸਮ੍ਭੇਦੋ ਚ ਦਿਸ੍ਸਨ੍ਤਿ. ਇਤਰਂ ਪਨ ਨਿਦਾਨਂ ਨਾਮ –
‘‘ਵੇਸਾਲਿਯਾ ਰਾਜਗਹੇ, ਸਾਵਤ੍ਥਿਯਾ ਚ ਆਲ਼ਵੀ;
ਕੋਸਮ੍ਬਿਯਾ ਚ ਸਕ੍ਕੇਸੁ, ਭਗ੍ਗੇਸੁ ਚੇਵ ਪਞ੍ਞਤ੍ਤਾ’’ਤਿ.
ਏਵਂ ਉਪਰਿ ਦਿਸ੍ਸਤਿ, ਪਰਤੋ ਆਗਤੇ ਸੁਤ੍ਤੇ ਦਿਸ੍ਸਤੀਤਿ ਵੇਦਿਤਬ੍ਬਂ.
‘‘ਵਿਭਙ੍ਗੇ ਦ੍ਵੀਸੂ’’ਤਿ ਗਾਥਾਯ ਅਯਮਤ੍ਥੋ – ਯਂ ਸਿਕ੍ਖਾਪਦਂ ਦ੍ਵੀਸੁ ਵਿਭਙ੍ਗੇਸੁ ਪਞ੍ਞਤ੍ਤਂ ਉਪੋਸਥਦਿਵਸੇ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਉਦ੍ਦਿਸਨ੍ਤਿ, ਤਸ੍ਸ ਯਥਾਞਾਯਂ ਸਮੁਟ੍ਠਾਨਂ ਪਵਕ੍ਖਾਮਿ, ਤਂ ਮੇ ਸੁਣਾਥਾਤਿ.
ਸਞ੍ਚਰਿਤ੍ਤਾਨੁਭਾਸਨਞ੍ਚਾਤਿ ਸਞ੍ਚਰਿਤ੍ਤਞ੍ਚ ਸਮਨੁਭਾਸਨਞ੍ਚ. ਅਤਿਰੇਕਞ੍ਚ ਚੀਵਰਨ੍ਤਿ ਅਤਿਰੇਕਚੀਵਰਂ; ਕਥਿਨਨ੍ਤਿ ਅਤ੍ਥੋ. ਲੋਮਾਨਿ ਪਦਸੋਧਮ੍ਮੋਤਿ ਏਲ਼ਕਲੋਮਾਨਿ ਚ ਪਦਸੋਧਮ੍ਮੋ ਚ. ਭੂਤਂ ਸਂਵਿਧਾਨੇਨ ਚਾਤਿ ਭੂਤਾਰੋਚਨਞ੍ਚ ਸਂਵਿਦਹਿਤ੍ਵਾ ਅਦ੍ਧਾਨਪ੍ਪਟਿਪਜ੍ਜਨਞ੍ਚ. ਥੇਯ੍ਯਦੇਸਨਾ ਚੋਰਿਂ ਚਾਤਿ ਥੇਯ੍ਯਸਤ੍ਥੋ ਚ ਛਤ੍ਤਪਾਣਿਸ੍ਸ ਅਗਿਲਾਨਸ੍ਸ ਧਮ੍ਮਦੇਸਨਾ ਚ ਚੋਰਿਵੁਟ੍ਠਾਪਨਞ੍ਚ. ਅਨਨੁਞ੍ਞਾਤਾਯ ਤੇਰਸਾਤਿ ਮਾਤਾਪਿਤੁਸਾਮਿਕੇਹਿ ਅਨਨੁਞ੍ਞਾਤਾਯ ਸਦ੍ਧਿਂ ਇਮਾਨਿ ਤੇਰਸ ਸਮੁਟ੍ਠਾਨਾਨਿ ਹੋਨ੍ਤਿ. ਸਦਿਸਾ ਇਧ ਦਿਸ੍ਸਰੇਤਿ ਇਧ ਉਭਤੋਵਿਭਙ੍ਗੇ ਏਤੇਸੁ ਤੇਰਸਸੁ ਸਮੁਟ੍ਠਾਨਸੀਸੇਸੁ ਏਕੇਕਸ੍ਮਿਂ ਅਞ੍ਞਾਨਿਪਿ ਸਦਿਸਾਨਿ ਸਮੁਟ੍ਠਾਨਾਨਿ ਦਿਸ੍ਸਨ੍ਤਿ.
ਪਠਮਪਾਰਾਜਿਕਸਮੁਟ੍ਠਾਨਵਣ੍ਣਨਾ
੨੫੮. ਇਦਾਨਿ ਤਾਨਿ ਦਸ੍ਸੇਤੁਂ ‘‘ਮੇਥੁਨਂ ਸੁਕ੍ਕਸਂਸਗ੍ਗੋ’’ਤਿਆਦਿ ਵੁਤ੍ਤਂ. ਤਤ੍ਥ ਮੇਥੁਨਨ੍ਤਿ ਇਦਂ ਤਾਵ ਪਠਮਪਾਰਾਜਿਕਂ ਨਾਮ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ. ਤਤ੍ਥ ਸੁਕ੍ਕਸਂਸਗ੍ਗੋਤਿ ਸੁਕ੍ਕਵਿਸ੍ਸਟ੍ਠਿ ਚੇਵ ਕਾਯਸਂਸਗ੍ਗੋ ਚ. ਅਨਿਯਤਾ ਪਠਮਿਕਾਤਿ ਪਠਮਂ ਅਨਿਯਤਸਿਕ੍ਖਾਪਦਂ. ਪੁਬ੍ਬੂਪਪਰਿਪਾਚਿਤਾਤਿ ‘‘ਜਾਨਂ ਪੁਬ੍ਬੂਪਗਤਂ ਭਿਕ੍ਖੁ’’ਨ੍ਤਿ ਸਿਕ੍ਖਾਪਦਞ੍ਚ ਭਿਕ੍ਖੁਨਿਪਰਿਪਾਚਿਤਪਿਣ੍ਡਪਾਤਸਿਕ੍ਖਾਪਦਞ੍ਚ. ਰਹੋ ਭਿਕ੍ਖੁਨਿਯਾ ਸਹਾਤਿ ਭਿਕ੍ਖੁਨਿਯਾ ਸਦ੍ਧਿਂ ਰਹੋ ਨਿਸਜ੍ਜਸਿਕ੍ਖਾਪਦਞ੍ਚ.
ਸਭੋਜਨੇ ਰਹੋ ਦ੍ਵੇ ਚਾਤਿ ਸਭੋਜਨੇ ਕੁਲੇ ਅਨੁਪਖਜ੍ਜਨਿਸਜ੍ਜਸਿਕ੍ਖਾਪਦਞ੍ਚ ਦ੍ਵੇ ਰਹੋਨਿਸਜ੍ਜਸਿਕ੍ਖਾਪਦਾਨਿ ਚ. ਅਙ੍ਗੁਲਿ ਉਦਕੇ ਹਸਨ੍ਤਿ ਅਙ੍ਗੁਲਿਪਤੋਦਕਞ੍ਚ ਉਦਕੇ ਹਸਧਮ੍ਮਸਿਕ੍ਖਾਪਦਞ੍ਚ. ਪਹਾਰੇ ਉਗ੍ਗਿਰੇ ਚੇਵਾਤਿ ਪਹਾਰਦਾਨਸਿਕ੍ਖਾਪਦਞ੍ਚ ਤਲਸਤ੍ਤਿਕਉਗ੍ਗਿਰਣਸਿਕ੍ਖਾਪਦਞ੍ਚ. ਤੇਪਞ੍ਞਾਸਾ ਚ ਸੇਖਿਯਾਤਿ ਪਰਿਮਣ੍ਡਲਨਿਵਾਸਨਾਦੀਨਿ ਖੁਦ੍ਦਕਵਣ੍ਣਨਾਵਸਾਨੇ ਵੁਤ੍ਤਾਨਿ ਤੇਪਞ੍ਞਾਸ ਸੇਖਿਯਸਿਕ੍ਖਾਪਦਾਨਿ ਚ.
ਅਧਕ੍ਖਗਾਮਾਵਸ੍ਸੁਤਾਤਿ ਭਿਕ੍ਖੁਨੀਨਂ ਅਧਕ੍ਖਕਸਿਕ੍ਖਾਪਦਞ੍ਚ ਗਾਮਨ੍ਤਰਗਮਨਂ ਅਵਸ੍ਸੁਤਾ ਅਵਸ੍ਸੁਤਸ੍ਸ ਹਤ੍ਥਤੋ ਖਾਦਨੀਯਭੋਜਨੀਯਗ੍ਗਹਣਸਿਕ੍ਖਾਪਦਞ੍ਚ. ਤਲਮਟ੍ਠਞ੍ਚ ਸੁਦ੍ਧਿਕਾਤਿ ਤਲਘਾਤਕਂ ਜਤੁਮਟ੍ਠਂ ਉਦਕਸੁਦ੍ਧਿਕਾਦਿਯਨਞ੍ਚ. ਵਸ੍ਸਂਵੁਟ੍ਠਾ ਚ ਓਵਾਦਨ੍ਤਿ ਵਸ੍ਸਂਵੁਟ੍ਠਾ ਛਪ੍ਪਞ੍ਚਯੋਜਨਾਨਿ ਸਿਕ੍ਖਾਪਦਞ੍ਚ ਓਵਾਦਾਯ ਅਗਮਨਸਿਕ੍ਖਾਪਦਞ੍ਚ. ਨਾਨੁਬਨ੍ਧੇ ਪਵਤ੍ਤਿਨਿਨ੍ਤਿ ਯਾ ਪਨ ਭਿਕ੍ਖੁਨੀ ਵੁਟ੍ਠਾਪਿਤਂ ਪਵਤ੍ਤਿਨਿਂ ਦ੍ਵੇ ਵਸ੍ਸਾਨਿ ਨਾਨੁਬਨ੍ਧੇਯ੍ਯਾਤਿ ਵੁਤ੍ਤਸਿਕ੍ਖਾਪਦਂ.
ਇਮੇ ਸਿਕ੍ਖਾਤਿ ਇਮਾ ਸਿਕ੍ਖਾਯੋ; ਲਿਙ੍ਗਵਿਪਰਿਯਾਯੋ ਕਤੋ. ਕਾਯਮਾਨਸਿਕਾ ਕਤਾਤਿ ਕਾਯਚਿਤ੍ਤਸਮੁਟ੍ਠਾਨਾ ਕਤਾ.
ਦੁਤਿਯਪਾਰਾਜਿਕਸਮੁਟ੍ਠਾਨਵਣ੍ਣਨਾ
੨੫੯. ਅਦਿਨ੍ਨਨ੍ਤਿ ਇਦਂ ਤਾਵ ਅਦਿਨ੍ਨਾਦਾਨਨ੍ਤਿ ਵਾ ਦੁਤਿਯਪਾਰਾਜਿਕਨ੍ਤਿ ਵਾ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ. ਤਤ੍ਥ ਵਿਗ੍ਗਹੁਤ੍ਤਰੀਤਿ ਮਨੁਸ੍ਸਵਿਗ੍ਗਹਉਤ੍ਤਰਿਮਨੁਸ੍ਸਧਮ੍ਮਸਿਕ੍ਖਾਪਦਾਨਿ. ਦੁਟ੍ਠੁਲ੍ਲਾ ਅਤ੍ਤਕਾਮਿਨਨ੍ਤਿ ਦੁਟ੍ਠੁਲ੍ਲਵਾਚਾਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਾਨਿ. ਅਮੂਲਾ ਅਞ੍ਞਭਾਗਿਯਾਤਿ ਦ੍ਵੇ ਦੁਟ੍ਠਦੋਸਸਿਕ੍ਖਾਪਦਾਨਿ. ਅਨਿਯਤਾ ਦੁਤਿਯਿਕਾਤਿ ਦੁਤਿਯਂ ਅਨਿਯਤਸਿਕ੍ਖਾਪਦਂ.
ਅਚ੍ਛਿਨ੍ਦੇ ਪਰਿਣਾਮਨੇਤਿ ਸਾਮਂ ਚੀਵਰਂ ਦਤ੍ਵਾ ਅਚ੍ਛਿਨ੍ਦਨਞ੍ਚ ਸਙ੍ਘਿਕਲਾਭਸ੍ਸ ਅਤ੍ਤਨੋ ਪਰਿਣਾਮਨਞ੍ਚ. ਮੁਸਾ ਓਮਸਪੇਸੁਣਾਤਿ ਮੁਸਾਵਾਦੋ ਚ ਓਮਸਵਾਦੋ ਚ ਭਿਕ੍ਖੁਪੇਸੁਞ੍ਞਞ੍ਚ. ਦੁਟ੍ਠੁਲ੍ਲਾ ਪਥਵੀਖਣੇਤਿ ਦੁਟ੍ਠੁਲ੍ਲਾਪਤ੍ਤਿਆਰੋਚਨਞ੍ਚ ਪਥਵੀਖਣਞ੍ਚ. ਭੂਤਂ ਅਞ੍ਞਾਯ ਉਜ੍ਝਾਪੇਤਿ ਭੂਤਗਾਮਅਞ੍ਞਵਾਦਕਉਜ੍ਝਾਪਨਕਸਿਕ੍ਖਾਪਦਾਨਿ.
ਨਿਕ੍ਕਡ੍ਢਨਂ ਸਿਞ੍ਚਨਞ੍ਚਾਤਿ ਵਿਹਾਰਤੋ ਨਿਕ੍ਕਡ੍ਢਨਞ੍ਚ ਉਦਕੇਨ ਤਿਣਾਦਿਸਿਞ੍ਚਨਞ੍ਚ. ਆਮਿਸਹੇਤੁ ਭੁਤ੍ਤਾਵੀਤਿ ‘‘ਆਮਿਸਹੇਤੁ ਭਿਕ੍ਖੁਨਿਯੋ ਓਵਦਨ੍ਤੀ’’ਤਿ ਸਿਕ੍ਖਾਪਦਞ੍ਚ, ਭੁਤ੍ਤਾਵਿਂ ਅਨਤਿਰਿਤ੍ਤੇਨ ਖਾਦਨੀਯਾਦਿਨਾ ਪਵਾਰਣਾਸਿਕ੍ਖਾਪਦਞ੍ਚ. ਏਹਿ ਅਨਾਦਰਿ ਭਿਂਸਾਤਿ ‘‘ਏਹਾਵੁਸੋ ਗਾਮਂ ਵਾ’’ਤਿ ਸਿਕ੍ਖਾਪਦਞ੍ਚ, ਅਨਾਦਰਿਯਞ੍ਚ ਭਿਕ੍ਖੁਭਿਂਸਾਪਨਕਞ੍ਚ. ਅਪਨਿਧੇ ਚ ਜੀਵਿਤਨ੍ਤਿ ਪਤ੍ਤਾਦੀਨਂ ਅਪਨਿਧਾਨਸਿਕ੍ਖਾਪਦਞ੍ਚ, ਸਞ੍ਚਿਚ੍ਚ ਪਾਣਂ ਜੀਵਿਤਾਵੋਰੋਪਨਞ੍ਚ.
ਜਾਨਂ ਸਪ੍ਪਾਣਕਂ ਕਮ੍ਮਨ੍ਤਿ ਜਾਨਂ ਸਪ੍ਪਾਣਕਉਦਕਸਿਕ੍ਖਾਪਦਞ੍ਚ ਪੁਨਕਮ੍ਮਾਯ ਉਕ੍ਕੋਟਨਞ੍ਚ. ਊਨਸਂਵਾਸਨਾਸਨਾਤਿ ਊਨਵੀਸਤਿਵਸ੍ਸਸਿਕ੍ਖਾਪਦਞ੍ਚ ਉਕ੍ਖਿਤ੍ਤਕੇਨ ਸਦ੍ਧਿਂ ਸਂਵਾਸਸਿਕ੍ਖਾਪਦਞ੍ਚ ਨਾਸਿਤਕਸਾਮਣੇਰਸਮ੍ਭੋਗਸਿਕ੍ਖਾਪਦਞ੍ਚ. ਸਹਧਮ੍ਮਿਕਂ ਵਿਲੇਖਾਤਿ ਸਹਧਮ੍ਮਿਕਂ ਵੁਚ੍ਚਮਾਨਸਿਕ੍ਖਾਪਦਞ੍ਚ, ਵਿਲੇਖਾਯ ਸਂਵਤ੍ਤਨ੍ਤੀਤਿ ਆਗਤਸਿਕ੍ਖਾਪਦਞ੍ਚ. ਮੋਹੋ ਅਮੂਲਕੇਨ ਚਾਤਿ ਮੋਹਨਕੇ ਪਾਚਿਤ੍ਤਿਯਸਿਕ੍ਖਾਪਦਞ੍ਚ, ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸਨਸਿਕ੍ਖਾਪਦਞ੍ਚ.
ਕੁਕ੍ਕੁਚ੍ਚਂ ਧਮ੍ਮਿਕਂ ਚੀਵਰਂ ਦਤ੍ਵਾਤਿ ਕੁਕ੍ਕੁਚ੍ਚਉਪਦਹਨਞ੍ਚ, ਧਮ੍ਮਿਕਾਨਂ ਕਮ੍ਮਾਨਂ ਛਨ੍ਦਂ ਦਤ੍ਵਾ ਖੀਯਨਞ੍ਚ, ਚੀਵਰਂ ਦਤ੍ਵਾ ਖੀਯਨਞ੍ਚ. ਪਰਿਣਾਮੇਯ੍ਯ ਪੁਗ੍ਗਲੇਤਿ ਸਙ੍ਘਿਕਂ ਲਾਭਂ ਪੁਗ੍ਗਲਸ੍ਸ ਪਰਿਣਾਮਨਸਿਕ੍ਖਾਪਦਂ. ਕਿਂ ਤੇ ਅਕਾਲਂ ਅਚ੍ਛਿਨ੍ਦੇਤਿ ‘‘ਕਿਂ ਤੇ ਅਯ੍ਯੇ ਏਸੋ ਪੁਰਿਸਪੁਗ੍ਗਲੋ ਕਰਿਸ੍ਸਤੀ’’ਤਿ ਆਗਤਸਿਕ੍ਖਾਪਦਞ੍ਚ, ‘‘ਅਕਾਲਚੀਵਰਂ ਕਾਲਚੀਵਰ’’ਨ੍ਤਿ ਅਧਿਟ੍ਠਹਿਤ੍ਵਾ ਭਾਜਨਸਿਕ੍ਖਾਪਦਞ੍ਚ, ਭਿਕ੍ਖੁਨਿਯਾ ਸਦ੍ਧਿਂ ਚੀਵਰਂ ਪਰਿਵਤ੍ਤੇਤ੍ਵਾ ਅਚ੍ਛਿਨ੍ਦਨਸਿਕ੍ਖਾਪਦਞ੍ਚ. ਦੁਗ੍ਗਹੀ ਨਿਰਯੇਨ ਚਾਤਿ ਦੁਗ੍ਗਹਿਤੇਨ ਦੁਪ੍ਪਧਾਰਿਤੇਨ ਪਰਂ ਉਜ੍ਝਾਪਨਸਿਕ੍ਖਾਪਦਞ੍ਚ, ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪਨਸਿਕ੍ਖਾਪਦਞ੍ਚ.
ਗਣਂ ਵਿਭਙ੍ਗ ਦੁਬ੍ਬਲਨ੍ਤਿ ‘‘ਗਣਸ੍ਸ ਚੀਵਰਲਾਭਂ ਅਨ੍ਤਰਾਯਂ ਕਰੇਯ੍ਯਾ’’ਤਿ ਚ ‘‘ਧਮ੍ਮਿਕਂ ਚੀਵਰਵਿਭਙ੍ਗਂ ਪਟਿਬਾਹੇਯ੍ਯਾ’’ਤਿ ਚ ‘‘ਦੁਬ੍ਬਲਚੀਵਰਪਚ੍ਚਾਸਾਯ ਚੀਵਰਕਾਲਸਮਯਂ ਅਤਿਕ੍ਕਾਮੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਾਨਿ. ਕਥਿਨਾ ਫਾਸੁ ਪਸ੍ਸਯਨ੍ਤਿ ‘‘ਧਮ੍ਮਿਕਂ ਕਥਿਨੁਦ੍ਧਾਰਂ ਪਟਿਬਾਹੇਯ੍ਯ, ਭਿਕ੍ਖੁਨਿਯਾ ਸਞ੍ਚਿਚ੍ਚ ਅਫਾਸੁਂ ਕਰੇਯ੍ਯ, ਭਿਕ੍ਖੁਨਿਯਾ ਉਪਸ੍ਸਯਂ ਦਤ੍ਵਾ ਕੁਪਿਤਾ ਅਨਤ੍ਤਮਨਾ ਨਿਕ੍ਕਡ੍ਢੇਯ੍ਯ ਵਾ’’ਤਿ ਵੁਤ੍ਤਸਿਕ੍ਖਾਪਦਾਨਿ. ਅਕ੍ਕੋਸਚਣ੍ਡੀ ਮਚ੍ਛਰੀਤਿ ‘‘ਭਿਕ੍ਖੁਂ ਅਕ੍ਕੋਸੇਯ੍ਯ ਵਾ ਪਰਿਭਾਸੇਯ੍ਯ ਵਾ, ਚਣ੍ਡਿਕਤਾ ਗਣਂ ਪਰਿਭਾਸੇਯ੍ਯ, ਕੁਲੇ ਮਚ੍ਛਰਿਨੀ ਅਸ੍ਸਾ’’ਤਿ ਵੁਤ੍ਤਸਿਕ੍ਖਾਪਦਾਨਿ. ਗਬ੍ਭਿਨਿਞ੍ਚ ਪਾਯਨ੍ਤਿਯਾਤਿ ‘‘ਗਬ੍ਭਿਨਿਂ ਵੁਟ੍ਠਾਪੇਯ੍ਯ, ਪਾਯਨ੍ਤਿਂ ਵੁਟ੍ਠਾਪੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਾਨਿ.
ਦ੍ਵੇਵਸ੍ਸਂ ਸਿਕ੍ਖਾ ਸਙ੍ਘੇਨਾਤਿ ‘‘ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਅਸਿਕ੍ਖਿਤਸਿਕ੍ਖਂ ਸਿਕ੍ਖਮਾਨਂ ਵੁਟ੍ਠਾਪੇਯ੍ਯ, ਸਿਕ੍ਖਿਤਸਿਕ੍ਖਂ ਸਿਕ੍ਖਮਾਨਂ ਸਙ੍ਘੇਨ ਅਸਮ੍ਮਤਂ ਵੁਟ੍ਠਾਪੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਾਨਿ. ਤਯੋ ਚੇਵ ਗਿਹੀਗਤਾਤਿ ਊਨਦ੍ਵਾਦਸਵਸ੍ਸਂ ਗਿਹਿਗਤਂ, ਪਰਿਪੁਣ੍ਣਦ੍ਵਾਦਸਵਸ੍ਸਂ ਗਿਹਿਗਤਂ ‘‘ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਅਸਿਕ੍ਖਿਤਸਿਕ੍ਖਂ ਦ੍ਵੇ ਵਸ੍ਸਾਨਿ ਸਿਕ੍ਖਿਤਸਿਕ੍ਖਂ ਸਙ੍ਘੇਨ ਅਸਮ੍ਮਤ’’ਨ੍ਤਿ ਵੁਤ੍ਤਸਿਕ੍ਖਾਪਦਾਨਿ. ਕੁਮਾਰਿਭੂਤਾ ਤਿਸ੍ਸੋਤਿ ‘‘ਊਨਵੀਸਤਿਵਸ੍ਸਂ ਕੁਮਾਰਿਭੂਤ’’ਨ੍ਤਿਆਦਿਨਾ ਨਯੇਨ ਵੁਤ੍ਤਾ ਤਿਸ੍ਸੋ. ਊਨਦ੍ਵਾਦਸਸਮ੍ਮਤਾਤਿ ‘‘ਊਨਦ੍ਵਾਦਸਵਸ੍ਸਾ ਵੁਟ੍ਠਾਪੇਯ੍ਯ, ਪਰਿਪੁਣ੍ਣਦ੍ਵਾਦਸਵਸ੍ਸਾ ਸਙ੍ਘੇਨ ਅਸਮ੍ਮਤਾ ਵੁਟ੍ਠਾਪੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਦ੍ਵਯਂ.
ਅਲਂ ਤਾਵ ਸੋਕਾਵਾਸਨ੍ਤਿ ‘‘ਅਲਂ ਤਾਵ ਤੇ ਅਯ੍ਯੇ ਵੁਟ੍ਠਾਪਿਤੇਨਾ’’ਤਿ ਚ, ‘‘ਚਣ੍ਡਿਂ ਸੋਕਾਵਾਸਂ ਸਿਕ੍ਖਮਾਨਂ ਵੁਟ੍ਠਾਪੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਛਨ੍ਦਾ ਅਨੁਵਸ੍ਸਾ ਚ ਦ੍ਵੇਤਿ ‘‘ਪਾਰਿਵਾਸਿਕਛਨ੍ਦਦਾਨੇਨ ਸਿਕ੍ਖਮਾਨਂ ਵੁਟ੍ਠਾਪੇਯ੍ਯ, ਅਨੁਵਸ੍ਸਂ ਵੁਟ੍ਠਾਪੇਯ੍ਯ, ਏਕਂ ਵਸ੍ਸਂ ਦ੍ਵੇ ਵੁਟ੍ਠਾਪੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਸਮੁਟ੍ਠਾਨਾ ਤਿਕਾ ਕਤਾਤਿ ਤਿਕਸਮੁਟ੍ਠਾਨਾ ਕਤਾ.
ਸਞ੍ਚਰਿਤ੍ਤਸਮੁਟ੍ਠਾਨਵਣ੍ਣਨਾ
੨੬੦. ਸਞ੍ਚਰੀ ਕੁਟਿ ਵਿਹਾਰੋਤਿ ਸਞ੍ਚਰਿਤ੍ਤਂ ਸਞ੍ਞਾਚਿਕਾਯ ਕੁਟਿਕਰਣਂ ਮਹਲ੍ਲਕਵਿਹਾਰਕਰਣਞ੍ਚ. ਧੋਵਨਞ੍ਚ ਪਟਿਗ੍ਗਹੋਤਿ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਪੁਰਾਣਚੀਵਰਧੋਵਾਪਨਞ੍ਚ ਚੀਵਰਪਟਿਗ੍ਗਹਣਞ੍ਚ. ਵਿਞ੍ਞਤ੍ਤੁਤ੍ਤਰਿ ਅਭਿਹਟ੍ਠੁਨ੍ਤਿ ਅਞ੍ਞਾਤਕਂ ਗਹਪਤਿਂ ਚੀਵਰਵਿਞ੍ਞਾਪਨਂ ਤਤੁਤ੍ਤਰਿਸਾਦਿਯਨਸਿਕ੍ਖਾਪਦਞ੍ਚ. ਉਭਿਨ੍ਨਂ ਦੂਤਕੇਨ ਚਾਤਿ ‘‘ਚੀਵਰਚੇਤਾਪਨ੍ਨਂ ਉਪਕ੍ਖਟਂ ਹੋਤੀ’’ਤਿ ਆਗਤਸਿਕ੍ਖਾਪਦਦ੍ਵਯਞ੍ਚ ਦੂਤੇਨ ਚੀਵਰਚੇਤਾਪਨ੍ਨਪਹਿਤਸਿਕ੍ਖਾਪਦਞ੍ਚ.
ਕੋਸਿਯਾ ਸੁਦ੍ਧਦ੍ਵੇਭਾਗਾ, ਛਬ੍ਬਸ੍ਸਾਨਿ ਨਿਸੀਦਨਨ੍ਤਿ ‘‘ਕੋਸਿਯਮਿਸ੍ਸਕਂ ਸਨ੍ਥਤ’’ਨ੍ਤਿਆਦੀਨਿ ਪਞ੍ਚ ਸਿਕ੍ਖਾਪਦਾਨਿ. ਰਿਞ੍ਚਨ੍ਤਿ ਰੂਪਿਕਾ ਚੇਵਾਤਿ ਵਿਭਙ੍ਗੇ ‘‘ਰਿਞ੍ਚਨ੍ਤਿ ਉਦ੍ਦੇਸ’’ਨ੍ਤਿ ਆਗਤਂ ਏਲ਼ਕਲੋਮਧੋਵਾਪਨਂ ਰੂਪਿਯਪ੍ਪਟਿਗ੍ਗਹਣਸਿਕ੍ਖਾਪਦਞ੍ਚ. ਉਭੋ ਨਾਨਪ੍ਪਕਾਰਕਾਤਿ ਰੂਪਿਯਸਂਵੋਹਾਰਕਯਵਿਕ੍ਕਯਸਿਕ੍ਖਾਪਦਦ੍ਵਯਂ.
ਊਨਬਨ੍ਧਨਵਸ੍ਸਿਕਾਤਿ ਊਨਪਞ੍ਚਬਨ੍ਧਨਪਤ੍ਤਸਿਕ੍ਖਾਪਦਞ੍ਚ ਵਸ੍ਸਿਕਸਾਟਿਕਸਿਕ੍ਖਾਪਦਞ੍ਚ. ਸੁਤ੍ਤਂ ਵਿਕਪ੍ਪਨੇਨ ਚਾਤਿ ਸੁਤ੍ਤਂ ਵਿਞ੍ਞਾਪੇਤ੍ਵਾ ਚੀਵਰਵਾਯਾਪਨਞ੍ਚ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਾਪਜ੍ਜਨਞ੍ਚ. ਦ੍ਵਾਰਦਾਨਸਿਬ੍ਬਾਨਿ ਚਾਤਿ ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਾਯ, ‘‘ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਦਦੇਯ੍ਯ, ਚੀਵਰਂ ਸਿਬ੍ਬੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਪੂਵਪਚ੍ਚਯਜੋਤਿ ਚਾਤਿ ਪੂਵੇਹਿ ਵਾ ਮਨ੍ਥੇਹਿ ਵਾ ਅਭਿਹਟ੍ਠੁਂ ਪਵਾਰਣਾਸਿਕ੍ਖਾਪਦਂ ਚਾਤੁਮਾਸਪਚ੍ਚਯਪ੍ਪਵਾਰਣਾਜੋਤਿਸਮਾਦਹਨਸਿਕ੍ਖਾਪਦਾਨਿ ਚ.
ਰਤਨਂ ਸੂਚਿ ਮਞ੍ਚੋ ਚ, ਤੂਲਂ ਨਿਸੀਦਨਕਣ੍ਡੁ ਚ, ਵਸ੍ਸਿਕਾ ਚ ਸੁਗਤੇਨਾਤਿ ਰਤਨਸਿਕ੍ਖਾਪਦਞ੍ਚੇਵ ਸੂਚਿਘਰਸਿਕ੍ਖਾਪਦਾਦੀਨਿ ਚ ਸਤ੍ਤ ਸਿਕ੍ਖਾਪਦਾਨਿ. ਵਿਞ੍ਞਤ੍ਤਿ ਅਞ੍ਞਂ ਚੇਤਾਪਨਾ, ਦ੍ਵੇ ਸਙ੍ਘਿਕਾ ਮਹਾਜਨਿਕਾ, ਦ੍ਵੇ ਪੁਗ੍ਗਲਲਹੁਕਾ ਗਰੂਤਿ ‘‘ਯਾ ਪਨ ਭਿਕ੍ਖੁਨੀ ਅਞ੍ਞਂ ਵਿਞ੍ਞਾਪੇਤ੍ਵਾ ਅਞ੍ਞਂ ਵਿਞ੍ਞਾਪੇਯ੍ਯਾ’’ਤਿਆਦੀਨਿ ਨਵ ਸਿਕ੍ਖਾਪਦਾਨਿ. ਦ੍ਵੇ ਵਿਘਾਸਾ ਸਾਟਿਕਾ ਚਾਤਿ ‘‘ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਸਙ੍ਕਾਰਂ ਵਾ ਵਿਘਾਸਂ ਵਾ ਤਿਰੋਕੁਟ੍ਟੇ ਵਾ ਤਿਰੋਪਾਕਾਰੇ ਵਾ ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾ, ਹਰਿਤੇ ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾ’’ਤਿ ਏਵਂ ਵੁਤ੍ਤਾਨਿ ਦ੍ਵੇ ਵਿਘਾਸਸਿਕ੍ਖਾਪਦਾਨਿ ਚ ਉਦਕਸਾਟਿਕਾਸਿਕ੍ਖਾਪਦਞ੍ਚ. ਸਮਣਚੀਵਰੇਨ ਚਾਤਿ ‘‘ਸਮਣਚੀਵਰਂ ਦਦੇਯ੍ਯਾ’’ਤਿ ਇਦਮੇਤਂ ਸਨ੍ਧਾਯ ਵੁਤ੍ਤਂ.
ਸਮਨੁਭਾਸਨਾਸਮੁਟ੍ਠਾਨਵਣ੍ਣਨਾ
੨੬੧. ਭੇਦਾਨੁਵਤ੍ਤਦੁਬ੍ਬਚਦੂਸਦੁਟ੍ਠੁਲ੍ਲਦਿਟ੍ਠਿ ਚਾਤਿ ਸਙ੍ਘਭੇਦਾਨੁਵਤ੍ਤਕਦੁਬ੍ਬਚਕੁਲਦੂਸਕਦੁਟ੍ਠੁਲ੍ਲਪ੍ਪਟਿਚ੍ਛਾਦਨਦਿਟ੍ਠਿਅਪ੍ਪਟਿਨਿਸ੍ਸਜ੍ਜਨਸਿਕ੍ਖਾਪਦਾਨਿ. ਛਨ੍ਦਂ ਉਜ੍ਜਗ੍ਘਿਕਾ ਦ੍ਵੇ ਚਾਤਿ ਛਨ੍ਦਂ ਅਦਤ੍ਵਾ ਗਮਨਸਿਕ੍ਖਾਪਦਂ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਗਮਨਨਿਸੀਦਨਸਿਕ੍ਖਾਪਦਦ੍ਵਯਞ੍ਚ. ਦ੍ਵੇ ਚ ਸਦ੍ਦਾਤਿ ‘‘ਅਪ੍ਪਸਦ੍ਦੋ ਅਨ੍ਤਰਘਰੇ ਗਮਿਸ੍ਸਾਮਿ, ਨਿਸੀਦਿਸ੍ਸਾਮੀ’’ਤਿ ਸਿਕ੍ਖਾਪਦਦ੍ਵਯਞ੍ਚ. ਨ ਬ੍ਯਾਹਰੇਤਿ ‘‘ਨ ਸਕਬਲ਼ੇਨ ਮੁਖੇਨ ਬ੍ਯਾਹਰਿਸ੍ਸਾਮੀ’’ਤਿ ਸਿਕ੍ਖਾਪਦਂ.
ਛਮਾ ਨੀਚਾਸਨੇ ਠਾਨਂ, ਪਚ੍ਛਤੋ ਉਪ੍ਪਥੇਨ ਚਾਤਿ ਛਮਾਯਂ ਨਿਸੀਦਿਤ੍ਵਾ, ਨੀਚੇ ਆਸਨੇ ਨਿਸੀਦਿਤ੍ਵਾ; ਠਿਤੇਨ ਨਿਸਿਨ੍ਨਸ੍ਸ, ਪਚ੍ਛਤੋ ਗਚ੍ਛਨ੍ਤੇਨ ਪੁਰਤੋ ਗਚ੍ਛਨ੍ਤਸ੍ਸ, ਉਪ੍ਪਥੇਨ ਗਚ੍ਛਨ੍ਤੇਨ ਪਥੇਨ ਗਚ੍ਛਨ੍ਤਸ੍ਸ ਧਮ੍ਮਦੇਸਨਾਸਿਕ੍ਖਾਪਦਾਨਿ. ਵਜ੍ਜਾਨੁਵਤ੍ਤਿਗਹਣਾਤਿ ਵਜ੍ਜਪ੍ਪਟਿਚ੍ਛਾਦਨ, ਉਕ੍ਖਿਤ੍ਤਾਨੁਵਤ੍ਤਕ, ਹਤ੍ਥਗ੍ਗਹਣਾਦਿਸਙ੍ਖਾਤਾਨਿ ਤੀਣਿ ਪਾਰਾਜਿਕਾਨਿ. ਓਸਾਰੇ ਪਚ੍ਚਾਚਿਕ੍ਖਨਾਤਿ ‘‘ਅਨਪਲੋਕੇਤ੍ਵਾ ਕਾਰਕਸਙ੍ਘਂ ਅਨਞ੍ਞਾਯ ਗਣਸ੍ਸ ਛਨ੍ਦਂ ਓਸਾਰੇਯ੍ਯਾ’’ਤਿ ਚ ‘‘ਬੁਦ੍ਧਂ ਪਚ੍ਚਕ੍ਖਾਮੀ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ.
ਕਿਸ੍ਮਿਂ ਸਂਸਟ੍ਠਾ ਦ੍ਵੇ ਵਧੀਤਿ ‘‘ਕਿਸ੍ਮਿਞ੍ਚਿਦੇਵ ਅਧਿਕਰਣੇ ਪਚ੍ਚਾਕਤਾ’’ਤਿ ਚ ‘‘ਭਿਕ੍ਖੁਨਿਯੋ ਪਨੇਵ ਸਂਸਟ੍ਠਾ ਵਿਹਰਨ੍ਤੀ’’ਤਿ ਚ ‘‘ਯਾ ਪਨ ਭਿਕ੍ਖੁਨੀ ਏਵਂ ਵਦੇਯ੍ਯ ਸਂਸਟ੍ਠਾਵ ਅਯ੍ਯੇ ਤੁਮ੍ਹੇ ਵਿਹਰਥਾ’’ਤਿ ਚ ‘‘ਅਤ੍ਤਾਨਂ ਵਧਿਤ੍ਵਾ ਵਧਿਤ੍ਵਾ ਰੋਦੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਾਨਿ. ਵਿਸਿਬ੍ਬੇ ਦੁਕ੍ਖਿਤਾਯ ਚਾਤਿ ‘‘ਭਿਕ੍ਖੁਨਿਯਾ ਚੀਵਰਂ ਵਿਸਿਬ੍ਬੇਤ੍ਵਾ ਵਾ ਵਿਸਿਬ੍ਬਾਪੇਤ੍ਵਾ ਵਾ’’ਤਿ ਚ ‘‘ਦੁਕ੍ਖਿਤਂ ਸਹਜੀਵਿਨਿ’’ਨ੍ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਪੁਨ ਸਂਸਟ੍ਠਾ ਨ ਵੂਪਸਮੇਤਿ ‘‘ਸਂਸਟ੍ਠਾ ਵਿਹਰੇਯ੍ਯ ਗਹਪਤਿਨਾ ਵਾ ਗਹਪਤਿਪੁਤ੍ਤੇਨ ਵਾ’’ਤਿ ਏਵਂ ਪੁਨ ਵੁਤ੍ਤਸਂਸਟ੍ਠਸਿਕ੍ਖਾਪਦਞ੍ਚ ‘‘ਏਹਯ੍ਯੇ, ਇਮਂ ਅਧਿਕਰਣਂ ਵੂਪਸਮੇਹੀ’’ਤਿ ਵੁਚ੍ਚਮਾਨਾ, ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ‘‘ਸਾ ਪਚ੍ਛਾ ਅਨਨ੍ਤਰਾਯਿਕਿਨੀ ਨੇਵ ਵੂਪਸਮ੍ਮੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਞ੍ਚ. ਆਰਾਮਞ੍ਚ ਪਵਾਰਣਾਤਿ ‘‘ਜਾਨਂ ਸਭਿਕ੍ਖੁਕਂ ਆਰਾਮਂ ਅਨਾਪੁਚ੍ਛਾ ਪਵਿਸੇਯ੍ਯਾ’’ਤਿ ਚ ‘‘ਉਭਤੋਸਙ੍ਘੇ ਤੀਹਿ ਠਾਨੇਹਿ ਨ ਪਵਾਰੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ.
ਅਨ੍ਵਦ੍ਧਂ ਸਹਜੀਵਿਨਿਂ ਦ੍ਵੇਤਿ ‘‘ਅਨ੍ਵਦ੍ਧਮਾਸਂ ਭਿਕ੍ਖੁਨਿਯਾ ਭਿਕ੍ਖੁਸਙ੍ਘਤੋ ਦ੍ਵੇ ਧਮ੍ਮਾ ਪਚ੍ਚਾਸੀਸਿਤਬ੍ਬਾ’’ਤਿ ਵੁਤ੍ਤਸਿਕ੍ਖਾਪਦਞ੍ਚ, ‘‘ਸਹਜੀਵਿਨਿਂ ਵੁਟ੍ਠਾਪੇਤ੍ਵਾ ਦ੍ਵੇ ਵਸ੍ਸਾਨਿ ਨੇਵ ਅਨੁਗ੍ਗਣ੍ਹੇਯ੍ਯ, ਸਹਜੀਵਿਨਿਂ ਵੁਟ੍ਠਾਪੇਤ੍ਵਾ ਨੇਵ ਵੂਪਕਾਸੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ. ਚੀਵਰਂ ਅਨੁਬਨ੍ਧਨਾਤਿ ‘‘ਸਚੇ ਮੇ ਤ੍ਵਂ, ਅਯ੍ਯੇ, ਚੀਵਰਂ ਦਸ੍ਸਸਿ, ਏਵਾਹਂ ਤਂ ਵੁਟ੍ਠਾਪੇਸ੍ਸਾਮੀ’’ਤਿ ਚ ‘‘ਸਚੇ ਮਂ ਤ੍ਵਂ, ਅਯ੍ਯੇ, ਦ੍ਵੇ ਵਸ੍ਸਾਨਿ ਅਨੁਬਨ੍ਧਿਸ੍ਸਸਿ, ਏਵਾਹਂ ਤਂ ਵੁਟ੍ਠਾਪੇਸ੍ਸਾਮੀ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ.
ਕਥਿਨਸਮੁਟ੍ਠਾਨਵਣ੍ਣਨਾ
੨੬੨. ਉਬ੍ਭਤਂ ਕਥਿਨਂ ਤੀਣੀਤਿ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ’’ਤਿ ਵੁਤ੍ਤਾਨਿ ਆਦਿਤੋਵ ਤੀਣਿ ਸਿਕ੍ਖਾਪਦਾਨਿ. ਪਠਮਂ ਪਤ੍ਤਭੇਸਜ੍ਜਨ੍ਤਿ ‘‘ਦਸਾਹਪਰਮਂ ਅਤਿਰੇਕਪਤ੍ਤੋ’’ਤਿ ਵੁਤ੍ਤਂ ਪਠਮਪਤ੍ਤਸਿਕ੍ਖਾਪਦਞ੍ਚ ‘‘ਪਟਿਸਾਯਨੀਯਾਨਿ ਭੇਸਜ੍ਜਾਨੀ’’ਤਿ ਵੁਤ੍ਤਸਿਕ੍ਖਾਪਦਞ੍ਚ. ਅਚ੍ਚੇਕਞ੍ਚਾਪਿ ਸਾਸਙ੍ਕਨ੍ਤਿ ਅਚ੍ਚੇਕਚੀਵਰਸਿਕ੍ਖਾਪਦਞ੍ਚ ਤਦਨਨ੍ਤਰਮੇਵ ਸਾਸਙ੍ਕਸਿਕ੍ਖਾਪਦਞ੍ਚ. ਪਕ੍ਕਮਨ੍ਤੇਨ ਵਾ ਦੁਵੇਤਿ ‘‘ਤਂ ਪਕ੍ਕਮਨ੍ਤੋ ਨੇਵ ਉਦ੍ਧਰੇਯ੍ਯਾ’’ਤਿ ਭੂਤਗਾਮਵਗ੍ਗੇ ਵੁਤ੍ਤਸਿਕ੍ਖਾਪਦਦ੍ਵਯਂ.
ਉਪਸ੍ਸਯਂ ਪਰਮ੍ਪਰਾਤਿ ‘‘ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾ ਭਿਕ੍ਖੁਨਿਯੋ ਓਵਦੇਯ੍ਯਾ’’ਤਿ ਚ ‘‘ਪਰਮ੍ਪਰਭੋਜਨੇ ਪਾਚਿਤ੍ਤਿਯ’’ਨ੍ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਅਨਤਿਰਿਤ੍ਤਂ ਨਿਮਨ੍ਤਨਾਤਿ ‘‘ਅਨਤਿਰਿਤ੍ਤਂ ਖਾਦਨੀਯਂ ਵਾ ਭੋਜਨੀਯਂ ਵਾ’’ਤਿ ਚ ‘‘ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਵਿਕਪ੍ਪਂ ਰਞ੍ਞੋ ਵਿਕਾਲੇਤਿ ‘‘ਸਾਮਂ ਚੀਵਰਂ ਵਿਕਪ੍ਪੇਤ੍ਵਾ’’ਤਿ ਚ ‘‘ਰਞ੍ਞੋ ਖਤ੍ਤਿਯਸ੍ਸਾ’’ਤਿ ਚ ‘‘ਵਿਕਾਲੇ ਗਾਮਂ ਪਵਿਸੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਤ੍ਤਯਂ. ਵੋਸਾਸਾਰਞ੍ਞਕੇਨ ਚਾਤਿ ‘‘ਵੋਸਾਸਮਾਨਰੂਪਾ ਠਿਤਾ’’ਤਿ ਚ ‘‘ਤਥਾਰੂਪੇਸੁ ਆਰਞ੍ਞਕੇਸੁ ਸੇਨਾਸਨੇਸੁ ਪੁਬ੍ਬੇ ਅਪ੍ਪਟਿਸਂਵਿਦਿਤ’’ਨ੍ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ.
ਉਸ੍ਸਯਾ ਸਨ੍ਨਿਚਯਞ੍ਚਾਤਿ ‘‘ਉਸ੍ਸਯਵਾਦਿਕਾ’’ਤਿ ਚ ‘‘ਪਤ੍ਤਸਨ੍ਨਿਚਯਂ ਕਰੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਪੁਰੇ ਪਚ੍ਛਾ ਵਿਕਾਲੇ ਚਾਤਿ ‘‘ਯਾ ਪਨ ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ’’ਤਿ ਚ, ‘‘ਪਚ੍ਛਾਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ’’ਤਿ ਚ, ‘‘ਵਿਕਾਲੇ ਕੁਲਾਨਿ ਉਪਸਙ੍ਕਮਿਤ੍ਵਾ’’ਤਿ ਚ ਵੁਤ੍ਤਸਿਕ੍ਖਾਪਦਤ੍ਤਯਂ. ਪਞ੍ਚਾਹਿਕਾ ਸਙ੍ਕਮਨੀਤਿ ‘‘ਪਞ੍ਚਾਹਿਕਾ ਸਙ੍ਘਾਟਿਚਾਰਂ ਅਤਿਕ੍ਕਮੇਯ੍ਯਾ’’ਤਿ ਚ ‘‘ਚੀਵਰਸਙ੍ਕਮਨੀਯਂ ਧਾਰੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਦ੍ਵੇਪਿ ਆਵਸਥੇਨ ਚਾਤਿ ‘‘ਆਵਸਥਚੀਵਰਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜੇਯ੍ਯ, ਆਵਸਥਂ ਅਨਿਸ੍ਸਜ੍ਜਿਤ੍ਵਾ ਚਾਰਿਕਂ ਪਕ੍ਕਮੇਯ੍ਯਾ’’ਤਿ ਚ ਏਵਂ ਆਵਸਥੇਨ ਸਦ੍ਧਿਂ ਵੁਤ੍ਤਸਿਕ੍ਖਾਪਦਾਨਿ ਚ ਦ੍ਵੇ.
ਪਸਾਖੇ ਆਸਨੇ ਚੇਵਾਤਿ ‘‘ਪਸਾਖੇ ਜਾਤਂ ਗਣ੍ਡਂ ਵਾ’’ਤਿ ਚ ‘‘ਭਿਕ੍ਖੁਸ੍ਸ ਪੁਰਤੋ ਅਨਾਪੁਚ੍ਛਾ ਆਸਨੇ ਨਿਸੀਦੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ.
ਏਲ਼ਕਲੋਮਸਮੁਟ੍ਠਾਨਵਣ੍ਣਨਾ
੨੬੩. ਏਲ਼ਕਲੋਮਾ ਦ੍ਵੇ ਸੇਯ੍ਯਾਤਿ ਏਲ਼ਕਲੋਮਸਿਕ੍ਖਾਪਦਞ੍ਚੇਵ ਦ੍ਵੇ ਚ ਸਹਸੇਯ੍ਯਸਿਕ੍ਖਾਪਦਾਨਿ. ਆਹਚ੍ਚ ਪਿਣ੍ਡਭੋਜਨਨ੍ਤਿ ਆਹਚ੍ਚਪਾਦਕਸਿਕ੍ਖਾਪਦਞ੍ਚ ਆਵਸਥਪਿਣ੍ਡਭੋਜਨਸਿਕ੍ਖਾਪਦਞ੍ਚ. ਗਣਵਿਕਾਲਸਨ੍ਨਿਧੀਤਿ ਗਣਭੋਜਨਵਿਕਾਲਭੋਜਨਸਨ੍ਨਿਧਿਕਾਰਕਸਿਕ੍ਖਾਪਦਤ੍ਤਯਂ. ਦਨ੍ਤਪੋਨੇਨ ਚੇਲਕਾਤਿ ਦਨ੍ਤਪੋਨਸਿਕ੍ਖਾਪਦਞ੍ਚ ਅਚੇਲਕਸਿਕ੍ਖਾਪਦਞ੍ਚ. ਉਯ੍ਯੁਤ੍ਤਂ ਸੇਨਂ ਉਯ੍ਯੋਧੀਤਿ ‘‘ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਚ੍ਛੇਯ੍ਯ, ਸੇਨਾਯ ਵਸੇਯ੍ਯ, ਉਯ੍ਯੋਧਿਕਂ ਵਾ…ਪੇ… ਅਨੀਕਦਸ੍ਸਨਂ ਵਾ ਗਚ੍ਛੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਸੁਰਾ ਓਰੇਨ ਨ੍ਹਾਯਨਾਤਿ ਸੁਰਾਪਾਨਸਿਕ੍ਖਾਪਦਞ੍ਚ ਓਰੇਨਦ੍ਧਮਾਸਨਹਾਨਸਿਕ੍ਖਾਪਦਞ੍ਚ. ਦੁਬ੍ਬਣ੍ਣੇ ਦ੍ਵੇ ਦੇਸਨਿਕਾਤਿ ‘‘ਤਿਣ੍ਣਂ ਦੁਬ੍ਬਣ੍ਣਕਰਣਾਨ’’ਨ੍ਤਿ ਵੁਤ੍ਤਸਿਕ੍ਖਾਪਦਞ੍ਚ ਵੁਤ੍ਤਾਵਸੇਸਪਾਟਿਦੇਸਨੀਯਦ੍ਵਯਞ੍ਚ. ਲਸੁਣੁਪਤਿਟ੍ਠੇ ਨਚ੍ਚਨਾਤਿ ਲਸੁਣਸਿਕ੍ਖਾਪਦਂ, ‘‘ਭਿਕ੍ਖੁਸ੍ਸ ਭੁਞ੍ਜਨ੍ਤਸ੍ਸ ਪਾਨੀਯੇਨ ਵਾ ਵਿਧੂਪਨੇਨ ਵਾ ਉਪਤਿਟ੍ਠੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਂ, ‘‘ਨਚ੍ਚਂ ਵਾ ਗੀਤਂ ਵਾ ਵਾਦਿਤਂ ਵਾ ਦਸ੍ਸਨਾਯ ਗਚ੍ਛੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਞ੍ਚ. ਇਤੋ ਪਰਂ ਪਾਲ਼ਿਂ ਵਿਰਜ੍ਝਿਤ੍ਵਾ ਲਿਖਨ੍ਤਿ. ਯਥਾ ਪਨ ਅਤ੍ਥਂ ਵਣ੍ਣਯਿਸ੍ਸਾਮ; ਏਵਮੇਤ੍ਥ ਅਨੁਕ੍ਕਮੋ ਵੇਦਿਤਬ੍ਬੋ.
ਨ੍ਹਾਨਮਤ੍ਥਰਣਂ ਸੇਯ੍ਯਾਤਿ ‘‘ਨਗ੍ਗਾ ਨਹਾਯੇਯ੍ਯ, ਏਕਤ੍ਥਰਣਪਾਵੁਰਣਾ ਤੁਵਟ੍ਟੇਯ੍ਯੁਂ, ਏਕਮਞ੍ਚੇ ਤੁਵਟ੍ਟੇਯ੍ਯੁ’’ਨ੍ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਅਨ੍ਤੋਰਟ੍ਠੇ ਤਥਾ ਬਹੀਤਿ ‘‘ਅਨ੍ਤੋਰਟ੍ਠੇ ਸਾਸਙ੍ਕਸਮ੍ਮਤੇ, ਤਿਰੋਰਟ੍ਠੇ ਸਾਸਙ੍ਕਸਮ੍ਮਤੇ’’ਤਿ ਵੁਤ੍ਤਸਿਕ੍ਖਾਪਦਦ੍ਵਯਂ. ਅਨ੍ਤੋਵਸ੍ਸਂ ਚਿਤ੍ਤਾਗਾਰਨ੍ਤਿ ‘‘ਅਨ੍ਤੋਵਸ੍ਸਂ ਚਾਰਿਕਂ ਪਕ੍ਕਮੇਯ੍ਯ, ਰਾਜਾਗਾਰਂ ਵਾ ਚਿਤ੍ਤਾਗਾਰਂ ਵਾ…ਪੇ… ਪੋਕ੍ਖਰਣਿਂ ਵਾ ਦਸ੍ਸਨਾਯ ਗਚ੍ਛੇਯ੍ਯਾ’’ਤਿ ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਆਸਨ੍ਦਿਂ ਸੁਤ੍ਤਕਨ੍ਤਨਾਤਿ ‘‘ਆਸਨ੍ਦਿਂ ਵਾ ਪਲ੍ਲਙ੍ਕਂ ਵਾ ਪਰਿਭੁਞ੍ਜੇਯ੍ਯ, ਸੁਤ੍ਤਂ ਕਨ੍ਤੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਦ੍ਵਯਂ.
ਵੇਯ੍ਯਾਵਚ੍ਚਂ ਸਹਤ੍ਥਾ ਚਾਤਿ ‘‘ਗਿਹਿਵੇਯ੍ਯਾਵਚ੍ਚਂ ਕਰੇਯ੍ਯ, ਅਗਾਰਿਕਸ੍ਸ ਵਾ ਪਰਿਬ੍ਬਾਜਕਸ੍ਸ ਵਾ ਪਰਿਬ੍ਬਾਜਿਕਾਯ ਵਾ ਸਹਤ੍ਥਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦਦੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਦ੍ਵਯਂ. ਅਭਿਕ੍ਖੁਕਾਵਾਸੇਨ ਚਾਤਿ ‘‘ਅਭਿਕ੍ਖੁਕੇ ਆਵਾਸੇ ਵਸ੍ਸਂ ਵਸੇਯ੍ਯਾ’’ਤਿ ਇਦਮੇਤਂ ਸਨ੍ਧਾਯ ਵੁਤ੍ਤਂ. ਛਤ੍ਤਂ ਯਾਨਞ੍ਚ ਸਙ੍ਘਾਣਿਨ੍ਤਿ ‘‘ਛਤ੍ਤੁਪਾਹਨਂ ਧਾਰੇਯ੍ਯ, ਯਾਨੇਨ ਯਾਯੇਯ੍ਯ, ਸਙ੍ਘਾਣਿਂ ਧਾਰੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਅਲਙ੍ਕਾਰਗਨ੍ਧਵਾਸਿਤਨ੍ਤਿ ‘‘ਇਤ੍ਥਾਲਙ੍ਕਾਰਂ ਧਾਰੇਯ੍ਯ, ਗਨ੍ਧਚੁਣ੍ਣਕੇਨ ਨਹਾਯੇਯ੍ਯ, ਵਾਸਿਤਕੇਨ ਪਿਞ੍ਞਾਕੇਨ ਨਹਾਯੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਭਿਕ੍ਖੁਨੀਤਿਆਦਿਨਾ ‘‘ਭਿਕ੍ਖੁਨਿਯਾ ਉਮ੍ਮਦ੍ਦਾਪੇਯ੍ਯਾ’’ਤਿਆਦੀਨਿ ਚਤ੍ਤਾਰਿ ਸਿਕ੍ਖਾਪਦਾਨਿ ਵੁਤ੍ਤਾਨਿ. ਅਸਙ੍ਕਚ੍ਚਿਕਾ ਆਪਤ੍ਤੀਤਿ ‘‘ਅਸਙ੍ਕਚ੍ਚਿਕਾ ਗਾਮਂ ਪਵਿਸੇਯ੍ਯ ਪਾਚਿਤ੍ਤਿਯ’’ਨ੍ਤਿ ਏਵਂ ਵੁਤ੍ਤਆਪਤ੍ਤਿ ਚ. ਚਤ੍ਤਾਰੀਸਾ ਚਤੁਤ੍ਤਰੀਤਿ ਏਤਾਨਿ ਸਬ੍ਬਾਨਿਪਿ ਚਤੁਚਤ੍ਤਾਲੀਸ ਸਿਕ੍ਖਾਪਦਾਨਿ ਵੁਤ੍ਤਾਨਿ.
ਕਾਯੇਨ ਨ ਵਾਚਾਚਿਤ੍ਤੇਨ, ਕਾਯਚਿਤ੍ਤੇਨ ਨ ਵਾਚਤੋਤਿ ਕਾਯੇਨ ਚੇਵ ਕਾਯਚਿਤ੍ਤੇਨ ਚ ਸਮੁਟ੍ਠਹਨ੍ਤਿ; ਨ ਵਾਚਾਚਿਤ੍ਤੇਨ ਨ ਵਾਚਤੋਤਿ ਅਤ੍ਥੋ. ਦ੍ਵਿਸਮੁਟ੍ਠਾਨਿਕਾ ਸਬ੍ਬੇ, ਸਮਾ ਏਲ਼ਕਲੋਮਿਕਾਤਿ ਇਦਂ ਉਤ੍ਤਾਨਤ੍ਥਮੇਵ.
ਪਦਸੋਧਮ੍ਮਸਮੁਟ੍ਠਾਨਵਣ੍ਣਨਾ
੨੬੪. ਪਦਞ੍ਞਤ੍ਰ ਅਸਮ੍ਮਤਾਤਿ ‘‘ਪਦਸੋ ਧਮ੍ਮਂ, ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਯ੍ਯ, ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਅਸਮ੍ਮਤੋ ਭਿਕ੍ਖੁਨਿਯੋ ਓਵਦੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਤਥਾ ਅਤ੍ਥਙ੍ਗਤੇਨ ਚਾਤਿ ‘‘ਅਤ੍ਥਙ੍ਗਤੇ ਸੂਰਿਯੇ ਓਵਦੇਯ੍ਯਾ’’ਤਿ ਇਦਮੇਤਂ ਸਨ੍ਧਾਯ ਵੁਤ੍ਤਂ. ਤਿਰਚ੍ਛਾਨਵਿਜ੍ਜਾ ਦ੍ਵੇਤਿ ‘‘ਤਿਰਚ੍ਛਾਨਵਿਜ੍ਜਂ ਪਰਿਯਾਪੁਣੇਯ੍ਯ, ਵਾਚੇਯ੍ਯਾ’’ਤਿ ਏਵਂ ਵੁਤ੍ਤਸਿਕ੍ਖਾਪਦਦ੍ਵਯਂ. ਅਨੋਕਾਸੋ ਚ ਪੁਚ੍ਛਨਾਤਿ ‘‘ਅਨੋਕਾਸਕਤਂ ਭਿਕ੍ਖੁਂ ਪਞ੍ਹਂ ਪੁਚ੍ਛੇਯ੍ਯਾ’’ਤਿ ਇਦਮੇਤਂ ਸਨ੍ਧਾਯ ਵੁਤ੍ਤਂ.
ਅਦ੍ਧਾਨਸਮੁਟ੍ਠਾਨਵਣ੍ਣਨਾ
੨੬੫. ਅਦ੍ਧਾਨਨਾਵਂ ਪਣੀਤਨ੍ਤਿ ‘‘ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜੇਯ੍ਯ, ਏਕਂ ਨਾਵਂ ਅਭਿਰੁਹੇਯ੍ਯ, ਪਣੀਤਭੋਜਨਾਨਿ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਤ੍ਤਯਂ. ਮਾਤੁਗਾਮੇਨ ਸਂਹਰੇਤਿ ਮਾਤੁਗਾਮੇਨ ਸਦ੍ਧਿਂ ਸਂਵਿਧਾਯ ਗਮਨਞ੍ਚ ‘‘ਸਮ੍ਬਾਧੇ ਲੋਮਂ ਸਂਹਰਾਪੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਞ੍ਚ. ਧਞ੍ਞਂ ਨਿਮਨ੍ਤਿਤਾ ਚੇਵਾਤਿ ‘‘ਧਞ੍ਞਂ ਵਿਞ੍ਞਾਪੇਤ੍ਵਾ ਵਾ’’ਤਿ ਚ ‘‘ਨਿਮਨ੍ਤਿਤਾ ਵਾ ਪਵਾਰਿਤਾ ਵਾ ਖਾਦਨੀਯਂ ਵਾ ਭੋਜਨੀਯਂ ਵਾ ਖਾਦੇਯ੍ਯ ਵਾ ਭੁਞ੍ਜੇਯ੍ਯ ਵਾ’’ਤਿ ਵੁਤ੍ਤਸਿਕ੍ਖਾਪਦਞ੍ਚ. ਅਟ੍ਠ ਚਾਤਿ ਭਿਕ੍ਖੁਨੀਨਂ ਵੁਤ੍ਤਾ ਅਟ੍ਠ ਪਾਟਿਦੇਸਨੀਯਾ ਵਾ.
ਥੇਯ੍ਯਸਤ੍ਥਸਮੁਟ੍ਠਾਨਵਣ੍ਣਨਾ
੨੬੬. ਥੇਯ੍ਯਸਤ੍ਥਂ ਉਪਸ੍ਸੁਤੀਤਿ ਥੇਯ੍ਯਸਤ੍ਥੇਨ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਗਮਨਞ੍ਚ ਉਪਸ੍ਸੁਤਿਤਿਟ੍ਠਨਞ੍ਚ. ਸੂਪਵਿਞ੍ਞਾਪਨੇਨ ਚਾਤਿ ਇਦਂ ਸੂਪੋਦਨਵਿਞ੍ਞਤ੍ਤਿਂ ਸਨ੍ਧਾਯ ਵੁਤ੍ਤਂ. ਰਤ੍ਤਿਛਨ੍ਨਞ੍ਚ ਓਕਾਸਨ੍ਤਿ ‘‘ਰਤ੍ਤਨ੍ਧਕਾਰੇ ਅਪ੍ਪਦੀਪੇ, ਪਟਿਚ੍ਛਨ੍ਨੇ ਓਕਾਸੇ, ਅਜ੍ਝੋਕਾਸੇ ਪੁਰਿਸੇਨ ਸਦ੍ਧਿ’’ਨ੍ਤਿ ਏਵਂ ਵੁਤ੍ਤਸਿਕ੍ਖਾਪਦਤ੍ਤਯਂ. ਬ੍ਯੂਹੇਨ ਸਤ੍ਤਮਾਤਿ ਇਦਂ ਤਦਨਨ੍ਤਰਮੇਵ ‘‘ਰਥਿਕਾਯ ਵਾ ਬ੍ਯੂਹੇ ਵਾ ਸਿਙ੍ਘਾਟਕੇ ਵਾ ਪੁਰਿਸੇਨ ਸਦ੍ਧਿ’’ਨ੍ਤਿ ਆਗਤਸਿਕ੍ਖਾਪਦਂ ਸਨ੍ਧਾਯ ਵੁਤ੍ਤਂ.
ਧਮ੍ਮਦੇਸਨਾਸਮੁਟ੍ਠਾਨਵਣ੍ਣਨਾ
੨੬੭. ਧਮ੍ਮਦੇਸਨਾਸਮੁਟ੍ਠਾਨਾਨਿ ਏਕਾਦਸ ਉਤ੍ਤਾਨਾਨੇਵ. ਏਵਂ ਤਾਵ ਸਮ੍ਭਿਨ੍ਨਸਮੁਟ੍ਠਾਨਂ ਵੇਦਿਤਬ੍ਬਂ. ਨਿਯਤਸਮੁਟ੍ਠਾਨਂ ਪਨ ਤਿਵਿਧਂ, ਤਂ ਏਕੇਕਸ੍ਸੇਵ ਸਿਕ੍ਖਾਪਦਸ੍ਸ ਹੋਤਿ, ਤਂ ਵਿਸੁਂਯੇਵ ਦਸ੍ਸੇਤੁਂ ‘‘ਭੂਤਂ ਕਾਯੇਨ ਜਾਯਤੀ’’ਤਿਆਦਿ ਵੁਤ੍ਤਂ, ਤਂ ਉਤ੍ਤਾਨਮੇਵ. ਨੇਤ੍ਤਿਧਮ੍ਮਾਨੁਲੋਮਿਕਨ੍ਤਿ ਵਿਨਯਪਾਲ਼ਿਧਮ੍ਮਸ੍ਸ ਅਨੁਲੋਮਨ੍ਤਿ.
ਸਮੁਟ੍ਠਾਨਸੀਸਵਣ੍ਣਨਾ ਨਿਟ੍ਠਿਤਾ.