ਅਨ੍ਤਰਪੇਯ੍ਯਾਲਂ

ਕਤਿਪੁਚ੍ਛਾਵਾਰਵਣ੍ਣਨਾ

੨੭੧. ਇਦਾਨਿ ਆਪਤ੍ਤਿਆਦਿਕੋਟ੍ਠਾਸੇਸੁ ਕੋਸਲ੍ਲਜਨਨਤ੍ਥਂ ‘‘ਕਤਿ ਆਪਤ੍ਤਿਯੋ’’ਤਿਆਦਿਨਾ ਨਯੇਨ ਮਾਤਿਕਂ ਠਪੇਤ੍ਵਾ ਨਿਦ੍ਦੇਸਪ੍ਪਟਿਨਿਦ੍ਦੇਸਵਸੇਨ ਵਿਭਙ੍ਗੋ ਵੁਤ੍ਤੋ.

ਤਤ੍ਥ ਕਤਿ ਆਪਤ੍ਤਿਯੋਤਿ ਮਾਤਿਕਾਯ ਚ ਵਿਭਙ੍ਗੇ ਚ ਆਗਤਾਪਤ੍ਤਿਪੁਚ੍ਛਾ. ਏਸ ਨਯੋ ਦੁਤਿਯਪਦੇਪਿ. ਕੇਵਲਞ੍ਹੇਤ੍ਥ ਆਪਤ੍ਤਿਯੋ ਏਵ ਰਾਸਿਵਸੇਨ ਖਨ੍ਧਾਤਿ ਵੁਤ੍ਤਾ. ਵਿਨੀਤਵਤ੍ਥੂਨੀਤਿ ਤਾਸਂ ਆਪਤ੍ਤੀਨਂ ਵਿਨਯਪੁਚ੍ਛਾ; ‘‘ਵਿਨੀਤਂ ਵਿਨਯੋ ਵੂਪਸਮੋ’’ਤਿ ਇਦਞ੍ਹਿ ਅਤ੍ਥਤੋ ਏਕਂ, ਵਿਨੀਤਾਨਿਯੇਵ ਵਿਨੀਤਵਤ੍ਥੂਨੀਤਿ ਅਯਮੇਤ੍ਥ ਪਦਤ੍ਥੋ. ਇਦਾਨਿ ਯੇਸੁ ਸਤਿ ਆਪਤ੍ਤਿਯੋ ਹੋਨ੍ਤਿ, ਅਸਤਿ ਨ ਹੋਨ੍ਤਿ, ਤੇ ਦਸ੍ਸੇਤੁਂ ‘‘ਕਤਿ ਅਗਾਰਵਾ’’ਤਿ ਪੁਚ੍ਛਾਦ੍ਵਯਂ. ਵਿਨੀਤਵਤ੍ਥੂਨੀਤਿ ਅਯਂ ਪਨ ਤੇਸਂ ਅਗਾਰਵਾਨਂ ਵਿਨਯਪੁਚ੍ਛਾ. ਯਸ੍ਮਾ ਪਨ ਤਾ ਆਪਤ੍ਤਿਯੋ ਵਿਪਤ੍ਤਿਂ ਆਪਤ੍ਤਾ ਨਾਮ ਨਤ੍ਥਿ, ਤਸ੍ਮਾ ‘‘ਕਤਿ ਵਿਪਤ੍ਤਿਯੋ’’ਤਿ ਅਯਂ ਆਪਤ੍ਤੀਨਂ ਵਿਪਤ੍ਤਿਭਾਵਪੁਚ੍ਛਾ. ਕਤਿ ਆਪਤ੍ਤਿਸਮੁਟ੍ਠਾਨਾਨੀਤਿ ਤਾਸਂਯੇਵ ਆਪਤ੍ਤੀਨਂ ਸਮੁਟ੍ਠਾਨਪੁਚ੍ਛਾ. ਵਿਵਾਦਮੂਲਾਨਿ ਅਨੁਵਾਦਮੂਲਾਨੀਤਿ ਇਮਾ ‘‘ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣ’’ਨ੍ਤਿ ਆਗਤਾਨਂ ਵਿਵਾਦਾਨੁਵਾਦਾਨਂ ਮੂਲਪੁਚ੍ਛਾ. ਸਾਰਣੀਯਾ ਧਮ੍ਮਾਤਿ ਵਿਵਾਦਾਨੁਵਾਦਮੂਲਾਨਂ ਅਭਾਵਕਰਧਮ੍ਮਪੁਚ੍ਛਾ. ਭੇਦਕਰਵਤ੍ਥੂਨੀਤਿ ਅਯਂ ‘‘ਭੇਦਨਸਂਵਤ੍ਤਨਿਕਂ ਵਾ ਅਧਿਕਰਣ’’ਨ੍ਤਿਆਦੀਸੁ ਵੁਤ੍ਤਭੇਦਕਰਣਪੁਚ੍ਛਾ. ਅਧਿਕਰਣਾਨੀਤਿ ਭੇਦਕਰਵਤ੍ਥੂਸੁ ਸਤਿ ਉਪ੍ਪਜ੍ਜਨਧਮ੍ਮਪੁਚ੍ਛਾ. ਸਮਥਾਤਿ ਤੇਸਂਯੇਵ ਵੂਪਸਮਨਧਮ੍ਮਪੁਚ੍ਛਾ. ਪਞ੍ਚ ਆਪਤ੍ਤਿਯੋਤਿ ਮਾਤਿਕਾਯ ਆਗਤਵਸੇਨ ਵੁਤ੍ਤਾ. ਸਤ੍ਤਾਤਿ ਵਿਭਙ੍ਗੇ ਆਗਤਵਸੇਨ.

ਆਰਕਾ ਏਤੇਹਿ ਰਮਤੀਤਿ ਆਰਤਿ; ਭੁਸਾ ਵਾ ਰਤਿ ਆਰਤਿ. ਵਿਨਾ ਏਤੇਹਿ ਰਮਤੀਤਿ ਵਿਰਤਿ. ਪਚ੍ਚੇਕਂ ਪਚ੍ਚੇਕਂ ਵਿਰਮਤੀਤਿ ਪਟਿਵਿਰਤਿ. ਵੇਰਂ ਮਣਤਿ ਵਿਨਾਸੇਤੀਤਿ ਵੇਰਮਣੀ. ਨ ਏਤਾਯ ਏਤੇ ਆਪਤ੍ਤਿਕ੍ਖਨ੍ਧਾ ਕਰੀਯਨ੍ਤੀਤਿ ਅਕਿਰਿਯਾ. ਯਂ ਏਤਾਯ ਅਸਤਿ ਆਪਤ੍ਤਿਕ੍ਖਨ੍ਧਕਰਣਂ ਉਪ੍ਪਜ੍ਜੇਯ੍ਯ, ਤਸ੍ਸ ਪਟਿਪਕ੍ਖਤੋ ਅਕਰਣਂ. ਆਪਤ੍ਤਿਕ੍ਖਨ੍ਧਅਜ੍ਝਾਪਤ੍ਤਿਯਾ ਪਟਿਪਕ੍ਖਤੋ ਅਨਜ੍ਝਾਪਤ੍ਤਿ. ਵੇਲਨਤੋ ਵੇਲਾ; ਚਲਯਨਤੋ ਵਿਨਾਸਨਤੋਤਿ ਅਤ੍ਥੋ. ਨਿਯ੍ਯਾਨਂ ਸਿਨੋਤਿ ਬਨ੍ਧਤਿ ਨਿਵਾਰੇਤੀਤਿ ਸੇਤੁ. ਆਪਤ੍ਤਿਕ੍ਖਨ੍ਧਾਨਮੇਤਂ ਅਧਿਵਚਨਂ. ਸੋ ਸੇਤੁ ਏਤਾਯ ਪਞ੍ਞਤ੍ਤਿਯਾ ਹਞ੍ਞਤੀਤਿ ਸੇਤੁਘਾਤੋ. ਸੇਸਵਿਨੀਤਵਤ੍ਥੁਨਿਦ੍ਦੇਸੇਸੁਪਿ ਏਸੇਵ ਨਯੋ.

ਬੁਦ੍ਧੇ ਅਗਾਰਵਾਦੀਸੁ ਯੋ ਬੁਦ੍ਧੇ ਧਰਮਾਨੇ ਉਪਟ੍ਠਾਨਂ ਨ ਗਚ੍ਛਤਿ, ਪਰਿਨਿਬ੍ਬੁਤੇ ਚੇਤਿਯਟ੍ਠਾਨਂ ਬੋਧਿਟ੍ਠਾਨਂ ਨ ਗਚ੍ਛਤਿ, ਚੇਤਿਯਂ ਵਾ ਬੋਧਿਂ ਵਾ ਨ ਵਨ੍ਦਤਿ, ਚੇਤਿਯਙ੍ਗਣੇ ਸਛਤ੍ਤੋ ਸਉਪਾਹਨੋ ਚਰਤਿ, ਨਤ੍ਥੇਤਸ੍ਸ ਬੁਦ੍ਧੇ ਗਾਰਵੋਤਿ ਵੇਦਿਤਬ੍ਬੋ. ਯੋ ਪਨ ਸਕ੍ਕੋਨ੍ਤੋਯੇਵ ਧਮ੍ਮਸ੍ਸਵਨਂ ਨ ਗਚ੍ਛਤਿ, ਸਰਭਞ੍ਞਂ ਨ ਭਣਤਿ, ਧਮ੍ਮਕਥਂ ਨ ਕਥੇਤਿ, ਧਮ੍ਮਸ੍ਸਵਨਗ੍ਗਂ ਭਿਨ੍ਦਿਤ੍ਵਾ ਗਚ੍ਛਤਿ, ਵਿਕ੍ਖਿਤ੍ਤੋ ਵਾ ਅਨਾਦਰੋ ਵਾ ਨਿਸੀਦਤਿ, ਨਤ੍ਥੇਤਸ੍ਸ ਧਮ੍ਮੇ ਗਾਰਵੋ. ਯੋ ਥੇਰਨਵਮਜ੍ਝਿਮੇਸੁ ਚਿਤ੍ਤੀਕਾਰਂ ਨ ਪਚ੍ਚੁਪਟ੍ਠਾਪੇਤਿ, ਉਪੋਸਥਾਗਾਰਵਿਤਕ੍ਕਮਾਲ਼ਕਾਦੀਸੁ ਕਾਯਪ੍ਪਾਗਬ੍ਭਿਯਂ ਦਸ੍ਸੇਤਿ, ਯਥਾਵੁਡ੍ਢਂ ਨ ਵਨ੍ਦਤਿ, ਨਤ੍ਥੇਤਸ੍ਸ ਸਙ੍ਘੇ ਗਾਰਵੋ. ਤਿਸ੍ਸੋ ਸਿਕ੍ਖਾ ਸਮਾਦਾਯ ਅਸਿਕ੍ਖਮਾਨੋਯੇਵ ਪਨ ਸਿਕ੍ਖਾਯ ਅਗਾਰਵੋਤਿ ਵੇਦਿਤਬ੍ਬੋ. ਪਮਾਦੇ ਚ ਸਤਿਵਿਪ੍ਪਵਾਸੇ ਤਿਟ੍ਠਮਾਨੋਯੇਵ ਅਪ੍ਪਮਾਦਲਕ੍ਖਣਂ ਅਬ੍ਰੂਹਯਮਾਨੋ ਅਪ੍ਪਮਾਦੇ ਅਗਾਰਵੋਤਿ ਵੇਦਿਤਬ੍ਬੋ. ਤਥਾ ਆਮਿਸਪ੍ਪਟਿਸਨ੍ਥਾਰਂ ਧਮ੍ਮਪ੍ਪਟਿਸਨ੍ਥਾਰਨ੍ਤਿ ਇਮਂ ਦੁਵਿਧਂ ਪਟਿਸਨ੍ਥਾਰਂ ਅਕਰੋਨ੍ਤੋਯੇਵ ਪਟਿਸਨ੍ਥਾਰੇ ਅਗਾਰਵੋਤਿ ਵੇਦਿਤਬ੍ਬੋ. ਗਾਰਵਨਿਦ੍ਦੇਸੇ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.

੨੭੨. ਵਿਵਾਦਮੂਲਨਿਦ੍ਦੇਸੇ ‘‘ਸਤ੍ਥਰਿਪਿ ਅਗਾਰਵੋ’’ਤਿਆਦੀਨਂ ਬੁਦ੍ਧੇ ਅਗਾਰਵਾਦੀਸੁ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਅਪ੍ਪਤਿਸ੍ਸੋਤਿ ਅਨੀਚਵੁਤ੍ਤਿ; ਨ ਸਤ੍ਥਾਰਂ ਜੇਟ੍ਠਕਂ ਕਤ੍ਵਾ ਵਿਹਰਤਿ. ਅਜ੍ਝਤ੍ਤਂ ਵਾਤਿ ਅਤ੍ਤਨੋ ਸਨ੍ਤਾਨੇ ਵਾ ਅਤ੍ਤਨੋ ਪਕ੍ਖੇ ਵਾ; ਸਕਾਯ ਪਰਿਸਾਯਾਤਿ ਅਤ੍ਥੋ. ਬਹਿਦ੍ਧਾ ਵਾਤਿ ਪਰਸਨ੍ਤਾਨੇ ਵਾ ਪਰਪਕ੍ਖੇ ਵਾ. ਤਤ੍ਰ ਤੁਮ੍ਹੇਤਿ ਤਸ੍ਮਿਂ ਅਜ੍ਝਤ੍ਤਬਹਿਦ੍ਧਾਭੇਦੇ ਸਪਰਸਨ੍ਤਾਨੇ ਵਾ ਸਪਰਪਰਿਸਾਯ ਵਾ. ਪਹਾਨਾਯ ਵਾਯਮੇਯ੍ਯਾਥਾਤਿ ਮੇਤ੍ਤਾਭਾਵਨਾਦੀਹਿ ਨਯੇਹਿ ਪਹਾਨਤ੍ਥਂ ਵਾਯਮੇਯ੍ਯਾਥ; ਮੇਤ੍ਤਾਭਾਵਨਾਦਿਨਯੇਨ ਹਿ ਤਂ ਅਜ੍ਝਤ੍ਤਮ੍ਪਿ ਬਹਿਦ੍ਧਾਪਿ ਪਹੀਯਤਿ. ਅਨਵਸ੍ਸਵਾਯਾਤਿ ਅਪ੍ਪਵਤ੍ਤਿਭਾਵਾਯ.

ਸਨ੍ਦਿਟ੍ਠਿਪਰਾਮਾਸੀਤਿ ਸਕਮੇਵ ਦਿਟ੍ਠਿਂ ਪਰਾਮਸਤਿ; ਯਂ ਅਤ੍ਤਨਾ ਦਿਟ੍ਠਿਗਤਂ ਗਹਿਤਂ, ਇਦਮੇਵ ਸਚ੍ਚਨ੍ਤਿ ਗਣ੍ਹਾਤਿ. ਆਧਾਨਗ੍ਗਾਹੀਤਿ ਦਲ਼੍ਹਗ੍ਗਾਹੀ.

੨੭੩. ਅਨੁਵਾਦਮੂਲਨਿਦ੍ਦੇਸੋ ਕਿਞ੍ਚਾਪਿ ਵਿਵਾਦਮੂਲਨਿਦ੍ਦੇਸੇਨੇਵ ਸਮਾਨੋ, ਅਥ ਖੋ ਅਟ੍ਠਾਰਸ ਭੇਦਕਰਵਤ੍ਥੂਨਿ ਨਿਸ੍ਸਾਯ ਵਿਵਦਨ੍ਤਾਨਂ ਕੋਧੂਪਨਾਹਾਦਯੋ ਵਿਵਾਦਮੂਲਾਨਿ. ਤਥਾ ਵਿਵਦਨ੍ਤਾ ਪਨ ਸੀਲਵਿਪਤ੍ਤਿਆਦੀਸੁ ਅਞ੍ਞਤਰਵਿਪਤ੍ਤਿਂ ਆਪਜ੍ਜਿਤ੍ਵਾ ‘‘ਅਸੁਕੋ ਭਿਕ੍ਖੁ ਅਸੁਕਂ ਨਾਮ ਵਿਪਤ੍ਤਿਂ ਆਪਨ੍ਨੋ’’ਤਿ ਵਾ, ‘‘ਪਾਰਾਜਿਕਂ ਆਪਨ੍ਨੋਸਿ, ਸਙ੍ਘਾਦਿਸੇਸਂ ਆਪਨ੍ਨੋਸੀ’’ਤਿ ਵਾ ਅਨੁਵਦਨ੍ਤਿ. ਏਵਂ ਅਨੁਵਦਨ੍ਤਾਨਂ ਕੋਧੂਪਨਾਹਾਦਯੋ ਅਨੁਵਾਦਮੂਲਾਨੀਤਿ ਅਯਮੇਤ੍ਥ ਵਿਸੇਸੋ.

੨੭੪. ਸਾਰਣੀਯਧਮ੍ਮਨਿਦ੍ਦੇਸੇ ਮੇਤ੍ਤਚਿਤ੍ਤੇਨ ਕਤਂ ਕਾਯਕਮ੍ਮਂ ਮੇਤ੍ਤਂ ਕਾਯਕਮ੍ਮਂ ਨਾਮ. ਆਵਿ ਚੇਵ ਰਹੋ ਚਾਤਿ ਸਮ੍ਮੁਖਾ ਚ ਪਰਮ੍ਮੁਖਾ ਚ. ਤਤ੍ਥ ਨਵਕਾਨਂ ਚੀਵਰਕਮ੍ਮਾਦੀਸੁ ਸਹਾਯਭਾਵਗਮਨਂ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ. ਥੇਰਾਨਂ ਪਨ ਪਾਦਧੋਵਨਬੀਜਨਵਾਤਦਾਨਾਦਿਭੇਦਮ੍ਪਿ ਸਬ੍ਬਂ ਸਾਮੀਚਿਕਮ੍ਮਂ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ. ਉਭਯੇਹਿਪਿ ਦੁਨ੍ਨਿਕ੍ਖਿਤ੍ਤਾਨਂ ਦਾਰੁਭਣ੍ਡਾਦੀਨਂ ਤੇਸੁ ਅਵਮਞ੍ਞਂ ਅਕਤ੍ਵਾ ਅਤ੍ਤਨਾ ਦੁਨ੍ਨਿਕ੍ਖਿਤ੍ਤਾਨਂ ਵਿਯ ਪਟਿਸਾਮਨਂ ਪਰਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ. ਅਯਮ੍ਪਿ ਧਮ੍ਮੋ ਸਾਰਣੀਯੋਤਿ ਅਯਂ ਮੇਤ੍ਤਾਕਾਯਕਮ੍ਮਸਙ੍ਖਾਤੋ ਧਮ੍ਮੋ ਸਰਿਤਬ੍ਬੋ ਸਤਿਜਨਕੋ; ਯੋ ਨਂ ਕਰੋਤਿ, ਤਂ ਪੁਗ੍ਗਲਂ; ਯੇਸਂ ਕਤੋ ਹੋਤਿ, ਤੇ ਪਸਨ੍ਨਚਿਤ੍ਤਾ ‘‘ਅਹੋ ਸਪ੍ਪੁਰਿਸੋ’’ਤਿ ਅਨੁਸ੍ਸਰਨ੍ਤੀਤਿ ਅਧਿਪ੍ਪਾਯੋ. ਪਿਯਕਰਣੋਤਿ ਤਂ ਪੁਗ੍ਗਲਂ ਸਬ੍ਰਹ੍ਮਚਾਰੀਨਂ ਪਿਯਂ ਕਰੋਤਿ. ਗਰੁਕਰਣੋਤਿ ਤਂ ਪੁਗ੍ਗਲਂ ਸਬ੍ਰਹ੍ਮਚਾਰੀਨਂ ਗਰੁਂ ਕਰੋਤਿ. ਸਙ੍ਗਹਾਯਾਤਿਆਦੀਸੁ ਸਬ੍ਰਹ੍ਮਚਾਰੀਹਿ ਸਙ੍ਗਹੇਤਬ੍ਬਭਾਵਾਯ. ਤੇਹਿ ਸਦ੍ਧਿਂ ਅਵਿਵਾਦਾਯ ਸਮਗ੍ਗਭਾਵਾਯ ਏਕੀਭਾਵਾਯ ਚ ਸਂਵਤ੍ਤਤਿ.

ਮੇਤ੍ਤਂ ਵਚੀਕਮ੍ਮਨ੍ਤਿਆਦੀਸੁ ਦੇਵਤ੍ਥੇਰੋ ਤਿਸ੍ਸਤ੍ਥੇਰੋਤਿ ਏਵਂ ਪਗ੍ਗਯ੍ਹ ਵਚਨਂ ਸਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ. ਵਿਹਾਰੇ ਅਸਨ੍ਤੇ ਪਨ ਤਂ ਪਟਿਪੁਚ੍ਛਨ੍ਤਸ੍ਸ ‘‘ਕੁਹਿਂ ਅਮ੍ਹਾਕਂ ਦੇਵਤ੍ਥੇਰੋ, ਕੁਹਿਂ ਅਮ੍ਹਾਕਂ ਤਿਸ੍ਸਤ੍ਥੇਰੋ, ਕਦਾ ਨੁ ਖੋ ਆਗਮਿਸ੍ਸਤੀ’’ਤਿ ਏਵਂ ਮਮਾਯਨਵਚਨਂ ਪਰਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ. ਮੇਤ੍ਤਾਸਿਨੇਹਸਿਨਿਦ੍ਧਾਨਿ ਪਨ ਨਯਨਾਨਿ ਉਮ੍ਮੀਲੇਤ੍ਵਾ ਪਸਨ੍ਨੇਨ ਮੁਖੇਨ ਓਲੋਕਨਂ ਸਮ੍ਮੁਖਾ ਮੇਤ੍ਤਂ ਮਨੋਕਮ੍ਮਂ ਨਾਮ. ‘‘ਦੇਵਤ੍ਥੇਰੋ ਤਿਸ੍ਸਤ੍ਥੇਰੋ ਅਰੋਗੋ ਹੋਤੁ, ਅਪ੍ਪਾਬਾਧੋ’’ਤਿ ਸਮਨ੍ਨਾਹਰਣਂ ਪਰਮ੍ਮੁਖਾ ਮੇਤ੍ਤਂ ਮਨੋਕਮ੍ਮਂ ਨਾਮ.

ਅਪ੍ਪਟਿਵਿਭਤ੍ਤਭੋਗੀਤਿ ਨੇਵ ਆਮਿਸਂ ਪਟਿਵਿਭਜਿਤ੍ਵਾ ਭੁਞ੍ਜਤਿ, ਨ ਪੁਗ੍ਗਲਂ. ਯੋ ਹਿ ‘‘ਏਤ੍ਤਕਂ ਪਰੇਸਂ ਦਸ੍ਸਾਮਿ, ਏਤ੍ਤਕਂ ਅਤ੍ਤਨਾ ਭੁਞ੍ਜਿਸ੍ਸਾਮਿ, ਏਤ੍ਤਕਂ ਵਾ ਅਸੁਕਸ੍ਸ ਚ ਅਸੁਕਸ੍ਸ ਚ ਦਸ੍ਸਾਮਿ, ਏਤ੍ਤਕਂ ਅਤ੍ਤਨਾ ਭੁਞ੍ਜਿਸ੍ਸਾਮੀ’’ਤਿ ਵਿਭਜਿਤ੍ਵਾ ਭੁਞ੍ਜਤਿ, ਅਯਂ ਪਟਿਵਿਭਤ੍ਤਭੋਗੀ ਨਾਮ. ਅਯਂ ਪਨ ਏਵਂ ਅਕਤ੍ਵਾ ਆਭਤਂ ਪਿਣ੍ਡਪਾਤਂ ਥੇਰਾਸਨਤੋ ਪਟ੍ਠਾਯ ਦਤ੍ਵਾ ਗਹਿਤਾਵਸੇਸਂ ਭੁਞ੍ਜਤਿ. ‘‘ਸੀਲਵਨ੍ਤੇਹੀ’’ਤਿ ਵਚਨਤੋ ਦੁਸ੍ਸੀਲਸ੍ਸ ਅਦਾਤੁਮ੍ਪਿ ਵਟ੍ਟਤਿ, ਸਾਰਣੀਯਧਮ੍ਮਪੂਰਕੇਨ ਪਨ ਸਬ੍ਬੇਸਂ ਦਾਤਬ੍ਬਮੇਵਾਤਿ ਵੁਤ੍ਤਂ. ਗਿਲਾਨ-ਗਿਲਾਨੁਪਟ੍ਠਾਕ-ਆਗਨ੍ਤੁਕ-ਗਮਿਕਚੀਵਰਕਮ੍ਮਾਦਿਪਸੁਤਾਨਂ ਵਿਚੇਯ੍ਯ ਦਾਤੁਮ੍ਪਿ ਵਟ੍ਟਤਿ. ਨ ਹਿ ਏਤੇ ਵਿਚਿਨਿਤ੍ਵਾ ਦੇਨ੍ਤੇਨ ਪੁਗ੍ਗਲਵਿਭਾਗੋ ਕਤੋ ਹੋਤਿ, ਈਦਿਸਾਨਞ੍ਹਿ ਕਿਚ੍ਛਲਾਭਤ੍ਤਾ ਵਿਸੇਸੋ ਕਾਤਬ੍ਬੋਯੇਵਾਤਿ ਅਯਂ ਕਰੋਤਿ.

ਅਖਣ੍ਡਾਨੀਤਿਆਦੀਸੁ ਯਸ੍ਸ ਸਤ੍ਤਸੁ ਆਪਤ੍ਤਿਕ੍ਖਨ੍ਧੇਸੁ ਆਦਿਮ੍ਹਿ ਵਾ ਅਨ੍ਤੇ ਵਾ ਸਿਕ੍ਖਾਪਦਂ ਭਿਨ੍ਨਂ ਹੋਤਿ, ਤਸ੍ਸ ਸੀਲਂ ਪਰਿਯਨ੍ਤੇ ਛਿਨ੍ਨਸਾਟਕੋ ਵਿਯ ਖਣ੍ਡਂ ਨਾਮ. ਯਸ੍ਸ ਪਨ ਵੇਮਜ੍ਝੇ ਭਿਨ੍ਨਂ, ਤਸ੍ਸ ਮਜ੍ਝੇ ਛਿਦ੍ਦਸਾਟਕੋ ਵਿਯ ਛਿਦ੍ਦਂ ਨਾਮ ਹੋਤਿ. ਯਸ੍ਸ ਪਟਿਪਾਟਿਯਾ ਦ੍ਵੇ ਤੀਣਿ ਭਿਨ੍ਨਾਨਿ, ਤਸ੍ਸ ਪਿਟ੍ਠਿਯਂ ਵਾ ਕੁਚ੍ਛਿਯਂ ਵਾ ਉਟ੍ਠਿਤੇਨ ਵਿਸਭਾਗਵਣ੍ਣੇਨ ਕਾਲ਼ਰਤ੍ਤਾਦੀਨਂ ਅਞ੍ਞਤਰਸਰੀਰਵਣ੍ਣਾ ਗਾਵੀ ਵਿਯ ਸਬਲਂ ਨਾਮ ਹੋਤਿ. ਯਸ੍ਸ ਅਨ੍ਤਰਨ੍ਤਰਾ ਭਿਨ੍ਨਾਨਿ, ਤਸ੍ਸ ਅਨ੍ਤਰਨ੍ਤਰਾ ਵਿਸਭਾਗਵਣ੍ਣਬਿਨ੍ਦੁਵਿਚਿਤ੍ਰਾ ਗਾਵੀ ਵਿਯ ਕਮ੍ਮਾਸਂ ਨਾਮ ਹੋਤਿ. ਯਸ੍ਸ ਪਨ ਸਬ੍ਬੇਨ ਸਬ੍ਬਂ ਅਭਿਨ੍ਨਾਨਿ ਸੀਲਾਨਿ, ਤਸ੍ਸ ਤਾਨਿ ਸੀਲਾਨਿ ਅਖਣ੍ਡਾਨਿ ਅਚ੍ਛਿਦ੍ਦਾਨਿ ਅਸਬਲਾਨਿ ਅਕਮ੍ਮਾਸਾਨਿ ਨਾਮ ਹੋਨ੍ਤਿ. ਤਾਨਿ ਪਨੇਤਾਨਿ ਭੁਜਿਸ੍ਸਭਾਵਕਰਣਤੋ ਭੁਜਿਸ੍ਸਾਨਿ. ਵਿਞ੍ਞੂਹਿ ਪਸਤ੍ਥਤ੍ਤਾ ਵਿਞ੍ਞੁਪ੍ਪਸਤ੍ਥਾਨਿ. ਤਣ੍ਹਾਦਿਟ੍ਠੀਹਿ ਅਪਰਾਮਟ੍ਠਤ੍ਤਾ ਅਪਰਾਮਟ੍ਠਾਨਿ. ਉਪਚਾਰਸਮਾਧਿਂ ਅਪ੍ਪਨਾਸਮਾਧਿਂ ਵਾ ਸਂਵਤ੍ਤਯਨ੍ਤੀਤਿ ਸਮਾਧਿਸਂਵਤ੍ਤਨਿਕਾਨੀਤਿ ਵੁਚ੍ਚਨ੍ਤਿ. ਸੀਲਸਾਮਞ੍ਞਗਤੋ ਵਿਹਰਤੀਤਿ ਤੇਸੁ ਤੇਸੁ ਦਿਸਾਭਾਗੇਸੁ ਵਿਹਰਨ੍ਤੇਹਿ ਕਲ੍ਯਾਣਸੀਲੇਹਿ ਭਿਕ੍ਖੂਹਿ ਸਦ੍ਧਿਂ ਸਮਾਨਭਾਵੂਪਗਤਸੀਲੋ ਵਿਹਰਤਿ.

ਯਾਯਂ ਦਿਟ੍ਠੀਤਿ ਮਗ੍ਗਸਮ੍ਪਯੁਤ੍ਤਾ ਸਮ੍ਮਾਦਿਟ੍ਠਿ. ਅਰਿਯਾਤਿ ਨਿਦ੍ਦੋਸਾ. ਨਿਯ੍ਯਾਤੀਤਿ ਨਿਯ੍ਯਾਨਿਕਾ. ਤਕ੍ਕਰਸ੍ਸਾਤਿ ਯੋ ਤਥਾਕਾਰੀ ਹੋਤਿ, ਤਸ੍ਸ. ਦੁਕ੍ਖਕ੍ਖਯਾਯਾਤਿ ਸਬ੍ਬਦੁਕ੍ਖਸ੍ਸ ਖਯਤ੍ਥਂ. ਸੇਸਂ ਯਾਵ ਸਮਥਭੇਦਪਰਿਯੋਸਾਨਾ ਉਤ੍ਤਾਨਤ੍ਥਮੇਵ.

ਕਤਿਪੁਚ੍ਛਾਵਾਰਵਣ੍ਣਨਾ ਨਿਟ੍ਠਿਤਾ.