(੩) ਪਾਚਿਤ੍ਤਿਯਾਦਿਪਞ੍ਹਾਵਣ੍ਣਨਾ

੪੮੧. ਅਧਿਟ੍ਠਿਤਨ੍ਤਿ ਗਾਥਾ ਨਿਸ੍ਸਗ੍ਗਿਯਚੀਵਰਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨ੍ਤਂ ਸਨ੍ਧਾਯ ਵੁਤ੍ਤਾ.

ਅਤ੍ਥਙ੍ਗਤੇ ਸੂਰਿਯੇਤਿ ਗਾਥਾ ਰੋਮਨ੍ਥਕਂ ਸਨ੍ਧਾਯ ਵੁਤ੍ਤਾ.

ਨ ਰਤ੍ਤਚਿਤ੍ਤੋਤਿ ਗਾਥਾਯ ਅਯਮਤ੍ਥੋ – ਰਤ੍ਤਚਿਤ੍ਤੋ ਮੇਥੁਨਧਮ੍ਮਪਾਰਾਜਿਕਂ ਆਪਜ੍ਜਤਿ. ਥੇਯ੍ਯਚਿਤ੍ਤੋ ਅਦਿਨ੍ਨਾਦਾਨਪਾਰਾਜਿਕਂ, ਪਰਂ ਮਰਣਾਯ ਚੇਤੇਨ੍ਤੋ ਮਨੁਸ੍ਸਵਿਗ੍ਗਹਪਾਰਾਜਿਕਂ, ਸਙ੍ਘਭੇਦਕੋ ਪਨ ਨ ਰਤ੍ਤਚਿਤ੍ਤੋ ਨ ਚ ਪਨ ਥੇਯ੍ਯਚਿਤ੍ਤੋ ਨ ਚਾਪਿ ਸੋ ਪਰਂ ਮਰਣਾਯ ਚੇਤਯਿ, ਸਲਾਕਂ ਪਨਸ੍ਸ ਦੇਨ੍ਤਸ੍ਸ ਹੋਤਿ ਛੇਜ੍ਜਂ, ਪਾਰਾਜਿਕਂ ਹੋਤਿ, ਸਲਾਕਂ ਪਟਿਗ੍ਗਣ੍ਹਨ੍ਤਸ੍ਸ ਭੇਦਕਾਨੁਵਤ੍ਤਕਸ੍ਸ ਥੁਲ੍ਲਚ੍ਚਯਂ.

ਗਚ੍ਛੇਯ੍ਯ ਅਡ੍ਢਯੋਜਨਨ੍ਤਿ ਅਯਂ ਪਞ੍ਹਾ ਸੁਪ੍ਪਤਿਟ੍ਠਿਤਨਿਗ੍ਰੋਧਸਦਿਸਂ ਏਕਕੁਲਸ੍ਸ ਰੁਕ੍ਖਮੂਲਂ ਸਨ੍ਧਾਯ ਵੁਤ੍ਤਾ.

ਕਾਯਿਕਾਨੀਤਿ ਅਯਂ ਗਾਥਾ ਸਮ੍ਬਹੁਲਾਨਂ ਇਤ੍ਥੀਨਂ ਕੇਸੇ ਵਾ ਅਙ੍ਗੁਲਿਯੋ ਵਾ ਏਕਤੋ ਗਣ੍ਹਨ੍ਤਂ ਸਨ੍ਧਾਯ ਵੁਤ੍ਤਾ.

ਵਾਚਸਿਕਾਨੀਤਿ ਅਯਂ ਗਾਥਾ ‘‘ਸਬ੍ਬਾ ਤੁਮ੍ਹੇ ਸਿਖਰਣਿਯੋ’’ਤਿਆਦਿਨਾ ਨਯੇਨ ਦੁਟ੍ਠੁਲ੍ਲਭਾਣਿਂ ਸਨ੍ਧਾਯ ਵੁਤ੍ਤਾ.

ਤਿਸ੍ਸਿਤ੍ਥਿਯੋ ਮੇਥੁਨਂ ਤਂ ਨ ਸੇਵੇਤਿ ਤਿਸ੍ਸੋ ਇਤ੍ਥਿਯੋ ਵੁਤ੍ਤਾ, ਤਾਸੁਪਿ ਯਂ ਤਂ ਮੇਥੁਨਂ ਨਾਮ, ਤਂ ਨ ਸੇਵਤਿ. ਤਯੋ ਪੁਰਿਸੇਤਿ ਤਯੋ ਪੁਰਿਸੇਪਿ ਉਪਗਨ੍ਤ੍ਵਾ ਮੇਥੁਨਂ ਨ ਸੇਵਤਿ. ਤਯੋ ਅਨਰਿਯਪਣ੍ਡਕੇਤਿ ਉਭਤੋਬ੍ਯਞ੍ਜਨਸਙ੍ਖਾਤੇ ਤਯੋ ਅਨਰਿਯੇ ਤਯੋ ਚ ਪਣ੍ਡਕੇਤਿ ਇਮੇਪਿ ਛ ਜਨੇ ਉਪਗਨ੍ਤ੍ਵਾ ਮੇਥੁਨਂ ਨ ਸੇਵਤਿ. ਨ ਚਾਚਰੇ ਮੇਥੁਨਂ ਬ੍ਯਞ੍ਜਨਸ੍ਮਿਨ੍ਤਿ ਅਨੁਲੋਮਪਾਰਾਜਿਕਵਸੇਨਪਿ ਮੇਥੁਨਂ ਨਾਚਰਤਿ. ਛੇਜ੍ਜਂ ਸਿਯਾ ਮੇਥੁਨਧਮ੍ਮਪਚ੍ਚਯਾਤਿ ਸਿਯਾ ਮੇਥੁਨਧਮ੍ਮਪਚ੍ਚਯਾ ਪਾਰਾਜਿਕਨ੍ਤਿ. ਅਯਂ ਪਞ੍ਹਾ ਅਟ੍ਠਵਤ੍ਥੁਕਂ ਸਨ੍ਧਾਯ ਵੁਤ੍ਤਾ, ਤਸ੍ਸਾ ਹਿ ਮੇਥੁਨਧਮ੍ਮਸ੍ਸ ਪੁਬ੍ਬਭਾਗਂ ਕਾਯਸਂਸਗ੍ਗਂ ਆਪਜ੍ਜਿਤੁਂ ਵਾਯਮਨ੍ਤਿਯਾ ਮੇਥੁਨਧਮ੍ਮਪਚ੍ਚਯਾ ਛੇਜ੍ਜਂ ਹੋਤਿ.

ਮਾਤਰਂ ਚੀਵਰਨ੍ਤਿ ਅਯਂ ਗਾਥਾ ਪਿਟ੍ਠਿਸਮਯੇ ਵਸ੍ਸਿਕਸਾਟਿਕਤ੍ਥਂ ਸਤੁਪ੍ਪਾਦਕਰਣਂ ਸਨ੍ਧਾਯ ਵੁਤ੍ਤਾ. ਵਿਨਿਚ੍ਛਯੋ ਪਨਸ੍ਸਾ ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾਯਮੇਵ ਵੁਤ੍ਤੋ.

ਕੁਦ੍ਧੋ ਆਰਾਧਕੋ ਹੋਤੀਤਿ ਗਾਥਾ ਤਿਤ੍ਥਿਯਵਤ੍ਤਂ ਸਨ੍ਧਾਯ ਵੁਤ੍ਤਾ. ਤਿਤ੍ਥਿਯੋ ਹਿ ਵਤ੍ਤਂ ਪੂਰਯਮਾਨੋ ਤਿਤ੍ਥਿਯਾਨਂ ਵਣ੍ਣੇ ਭਞ੍ਞਮਾਨੇ ਕੁਦ੍ਧੋ ਆਰਾਧਕੋ ਹੋਤਿ, ਵਤ੍ਥੁਤ੍ਤਯਸ੍ਸ ਵਣ੍ਣੇ ਭਞ੍ਞਮਾਨੇ ਕੁਦ੍ਧੋ ਗਾਰਯ੍ਹੋ ਹੋਤੀਤਿ ਤਤ੍ਥੇਵਸ੍ਸਾ ਵਿਤ੍ਥਾਰੋ ਵੁਤ੍ਤੋ. ਦੁਤਿਯਗਾਥਾਪਿ ਤਮੇਵ ਸਨ੍ਧਾਯ ਵੁਤ੍ਤਾ.

ਸਙ੍ਘਾਦਿਸੇਸਨ੍ਤਿਆਦਿ ਗਾਥਾ ਯਾ ਭਿਕ੍ਖੁਨੀ ਅਵਸ੍ਸੁਤਾਵ ਅਵਸ੍ਸੁਤਸ੍ਸ ਪੁਰਿਸਸ੍ਸ ਹਤ੍ਥਤੋ ਪਿਣ੍ਡਪਾਤਂ ਗਹੇਤ੍ਵਾ ਮਨੁਸ੍ਸਮਂਸਲਸੁਣਪਣੀਤਭੋਜਨਸੇਸਅਕਪ੍ਪਿਯਮਂਸੇਹਿ ਸਦ੍ਧਿਂ ਓਮਦ੍ਦਿਤ੍ਵਾ ਅਜ੍ਝੋਹਰਤਿ, ਤਂ ਸਨ੍ਧਾਯ ਵੁਤ੍ਤਾ.

ਏਕੋ ਉਪਸਮ੍ਪਨ੍ਨੋ ਏਕੋ ਅਨੁਪਸਮ੍ਪਨ੍ਨੋਤਿ ਗਾਥਾ ਆਕਾਸਗਤਂ ਸਨ੍ਧਾਯ ਵੁਤ੍ਤਾ. ਸਚੇ ਹਿ ਦ੍ਵੀਸੁ ਸਾਮਣੇਰੇਸੁ ਏਕੋ ਇਦ੍ਧਿਯਾ ਕੇਸਗ੍ਗਮਤ੍ਤਮ੍ਪਿ ਪਥਵਿਂ ਮੁਞ੍ਚਿਤ੍ਵਾ ਨਿਸਿਨ੍ਨੋ ਹੋਤਿ, ਸੋ ਅਨੁਪਸਮ੍ਪਨ੍ਨੋ ਨਾਮ ਹੋਤਿ. ਸਙ੍ਘੇਨਾਪਿ ਆਕਾਸੇ ਨਿਸੀਦਿਤ੍ਵਾ ਭੂਮਿਗਤਸ੍ਸ ਕਮ੍ਮਂ ਨ ਕਾਤਬ੍ਬਂ. ਸਚੇ ਕਰੋਤਿ, ਕੁਪ੍ਪਤਿ.

ਅਕਪ੍ਪਕਤਨ੍ਤਿ ਗਾਥਾ ਅਚ੍ਛਿਨ੍ਨਚੀਵਰਕਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤਾ. ਤਸ੍ਮਿਂਯੇਵ ਚਸ੍ਸਾ ਸਿਕ੍ਖਾਪਦੇ ਵਿਤ੍ਥਾਰੇਨ ਵਿਨਿਚ੍ਛਯੋਪਿ ਵੁਤ੍ਤੋ.

ਨ ਦੇਤਿ ਨ ਪਟਿਗ੍ਗਣ੍ਹਾਤੀਤਿ ਨਾਪਿ ਉਯ੍ਯੋਜਿਕਾ ਦੇਤਿ, ਨ ਉਯ੍ਯੋਜਿਤਾ ਤਸ੍ਸਾ ਹਤ੍ਥਤੋ ਗਣ੍ਹਾਤਿ. ਪਟਿਗ੍ਗਹੋ ਤੇਨ ਨ ਵਿਜ੍ਜਤੀਤਿ ਤੇਨੇਵ ਕਾਰਣੇਨ ਉਯ੍ਯੋਜਿਕਾਯ ਹਤ੍ਥਤੋ ਉਯ੍ਯੋਜਿਤਾਯ ਪਟਿਗ੍ਗਹੋ ਨ ਵਿਜ੍ਜਤਿ. ਆਪਜ੍ਜਤਿ ਗਰੁਕਨ੍ਤਿ ਏਵਂ ਸਨ੍ਤੇਪਿ ਅਵਸ੍ਸੁਤਸ੍ਸ ਹਤ੍ਥਤੋ ਪਿਣ੍ਡਪਾਤਗ੍ਗਹਣੇ ਉਯ੍ਯੋਜੇਨ੍ਤੀ ਸਙ੍ਘਾਦਿਸੇਸਾਪਤ੍ਤਿਂ ਆਪਜ੍ਜਤਿ. ਤਞ੍ਚ ਪਰਿਭੋਗਪਚ੍ਚਯਾਤਿ ਤਞ੍ਚ ਪਨ ਆਪਤ੍ਤਿਂ ਆਪਜ੍ਜਮਾਨਾ ਤਸ੍ਸਾ ਉਯ੍ਯੋਜਿਤਾਯ ਪਰਿਭੋਗਪਚ੍ਚਯਾ ਆਪਜ੍ਜਤਿ. ਤਸ੍ਸਾ ਹਿ ਭੋਜਨਪਰਿਯੋਸਾਨੇ ਉਯ੍ਯੋਜਿਕਾਯ ਸਙ੍ਘਾਦਿਸੇਸੋ ਹੋਤੀਤਿ. ਦੁਤਿਯਗਾਥਾ ਤਸ੍ਸਾਯੇਵ ਉਦਕਦਨ੍ਤਪੋਨਗ੍ਗਹਣੇ ਉਯ੍ਯੋਜਨਂ ਸਨ੍ਧਾਯ ਵੁਤ੍ਤਾ.

ਨ ਭਿਕ੍ਖੁਨੀ ਨੋ ਚ ਫੁਸੇਯ੍ਯ ਵਜ੍ਜਨ੍ਤਿ ਸਤ੍ਤਰਸਕੇਸੁ ਹਿ ਅਞ੍ਞਤਰਂ ਆਪਤ੍ਤਿਂ ਆਪਜ੍ਜਿਤ੍ਵਾ ਅਨਾਦਰਿਯੇਨ ਛਾਦਯਮਾਨਾਪਿ ਭਿਕ੍ਖੁਨੀ ਛਾਦਨਪਚ੍ਚਯਾ ਵਜ੍ਜਂ ਨ ਫੁਸਤਿ, ਅਞ੍ਞਂ ਨਵਂ ਆਪਤ੍ਤਿਂ ਨਾਪਜ੍ਜਤਿ, ਪਟਿਚ੍ਛਨ੍ਨਾਯ ਵਾ ਅਪ੍ਪਟਿਚ੍ਛਨ੍ਨਾਯ ਵਾ ਆਪਤ੍ਤਿਯਾ ਪਕ੍ਖਮਾਨਤ੍ਤਮੇਵ ਲਭਤਿ. ਅਯਂ ਪਨ ਭਿਕ੍ਖੁਨੀਪਿ ਨ ਹੋਤਿ, ਸਾਵਸੇਸਞ੍ਚ ਗਰੁਕਂ ਆਪਜ੍ਜਿਤ੍ਵਾ ਛਾਦੇਤ੍ਵਾ ਵਜ੍ਜਂ ਨ ਫੁਸਤਿ. ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾਤਿ ਅਯਂ ਕਿਰ ਪਞ੍ਹਾ ਉਕ੍ਖਿਤ੍ਤਕਭਿਕ੍ਖੁਂ ਸਨ੍ਧਾਯ ਵੁਤ੍ਤਾ. ਤੇਨ ਹਿ ਸਦ੍ਧਿਂ ਵਿਨਯਕਮ੍ਮਂ ਨਤ੍ਥਿ, ਤਸ੍ਮਾ ਸੋ ਸਙ੍ਘਾਦਿਸੇਸਂ ਆਪਜ੍ਜਿਤ੍ਵਾ ਛਾਦੇਨ੍ਤੋ ਵਜ੍ਜਂ ਨ ਫੁਸਤੀਤਿ.

ਸੇਦਮੋਚਨਗਾਥਾਵਣ੍ਣਨਾ ਨਿਟ੍ਠਿਤਾ.