ਪਞ੍ਚਵਗ੍ਗੋ

ਕਮ੍ਮਵਗ੍ਗਵਣ੍ਣਨਾ

੪੮੨. ਕਮ੍ਮਵਗ੍ਗੇ ਚਤੁਨ੍ਨਂ ਕਮ੍ਮਾਨਂ ਨਾਨਾਕਰਣਂ ਸਮਥਕ੍ਖਨ੍ਧਕੇ ਵੁਤ੍ਤਮੇਵ. ਕਿਞ੍ਚਾਪਿ ਵੁਤ੍ਤਂ, ਅਥ ਖੋ ਅਯਂ ਕਮ੍ਮਵਿਨਿਚ੍ਛਯੋ ਨਾਮ ਆਦਿਤੋ ਪਟ੍ਠਾਯ ਵੁਚ੍ਚਮਾਨੋ ਪਾਕਟੋ ਹੋਤਿ, ਤਸ੍ਮਾ ਆਦਿਤੋ ਪਟ੍ਠਾਯੇਵੇਤ੍ਥ ਵਤ੍ਤਬ੍ਬਂ ਵਦਿਸ੍ਸਾਮ. ਚਤ੍ਤਾਰੀਤਿ ਕਮ੍ਮਾਨਂ ਗਣਨਪਰਿਚ੍ਛੇਦਵਚਨਮੇਤਂ. ਕਮ੍ਮਾਨੀਤਿ ਪਰਿਚ੍ਛਿਨ੍ਨਕਮ੍ਮਨਿਦਸ੍ਸਨਂ. ਅਪਲੋਕਨਕਮ੍ਮਂ ਨਾਮ ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਤਿਕ੍ਖਤ੍ਤੁਂ ਸਾਵੇਤ੍ਵਾ ਕਤ੍ਤਬ੍ਬਂ ਕਮ੍ਮਂ. ਞਤ੍ਤਿਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਕਤ੍ਤਬ੍ਬਂ ਕਮ੍ਮਂ. ਞਤ੍ਤਿਦੁਤਿਯਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਏਕਾਯ ਚ ਅਨੁਸ੍ਸਾਵਨਾਯਾਤਿ ਏਵਂ ਞਤ੍ਤਿਦੁਤਿਯਾਯ ਅਨੁਸ੍ਸਾਵਨਾਯ ਕਤ੍ਤਬ੍ਬਂ ਕਮ੍ਮਂ. ਞਤ੍ਤਿਚਤੁਤ੍ਥਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਤੀਹਿ ਚ ਅਨੁਸ੍ਸਾਵਨਾਹੀਤਿ ਏਵਂ ਞਤ੍ਤਿਚਤੁਤ੍ਥਾਹਿ ਤੀਹਿ ਅਨੁਸ੍ਸਾਵਨਾਹਿ ਕਤ੍ਤਬ੍ਬਂ ਕਮ੍ਮਂ.

ਤਤ੍ਥ ਅਪਲੋਕਨਕਮ੍ਮਂ ਅਪਲੋਕੇਤ੍ਵਾਵ ਕਾਤਬ੍ਬਂ, ਞਤ੍ਤਿਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਕਮ੍ਮਮ੍ਪਿ ਏਕਂ ਞਤ੍ਤਿਂ ਠਪੇਤ੍ਵਾਵ ਕਾਤਬ੍ਬਂ, ਅਪਲੋਕਨਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਦੁਤਿਯਕਮ੍ਮਂ ਪਨ ਅਪਲੋਕੇਤ੍ਵਾ ਕਾਤਬ੍ਬਮ੍ਪਿ ਅਤ੍ਥਿ, ਅਕਾਤਬ੍ਬਮ੍ਪਿ ਅਤ੍ਥਿ.

ਤਤ੍ਥ ਸੀਮਾਸਮ੍ਮੁਤਿ, ਸੀਮਾਸਮੂਹਨਨਂ, ਕਥਿਨਦਾਨਂ, ਕਥਿਨੁਦ੍ਧਾਰੋ, ਕੁਟਿਵਤ੍ਥੁਦੇਸਨਾ, ਵਿਹਾਰਵਤ੍ਥੁਦੇਸਨਾਤਿ ਇਮਾਨਿ ਛ ਕਮ੍ਮਾਨਿ ਗਰੁਕਾਨਿ ਅਪਲੋਕੇਤ੍ਵਾ ਕਾਤੁਂ ਨ ਵਟ੍ਟਨ੍ਤਿ, ਞਤ੍ਤਿਦੁਤਿਯਕਮ੍ਮਵਾਚਂ ਸਾਵੇਤ੍ਵਾਵ ਕਾਤਬ੍ਬਾਨਿ. ਅਵਸੇਸਾ ਤੇਰਸ ਸਮ੍ਮੁਤਿਯੋ ਸੇਨਾਸਨਗ੍ਗਾਹਕਮਤਕਚੀਵਰਦਾਨਾਦਿਸਮ੍ਮੁਤਿਯੋ ਚਾਤਿ ਏਤਾਨਿ ਲਹੁਕਕਮ੍ਮਾਨਿ ਅਪਲੋਕੇਤ੍ਵਾਪਿ ਕਾਤੁਂ ਵਟ੍ਟਨ੍ਤਿ, ਞਤ੍ਤਿਕਮ੍ਮ-ਞਤ੍ਤਿਚਤੁਤ੍ਥਕਮ੍ਮਵਸੇਨ ਪਨ ਨ ਕਾਤਬ੍ਬਮੇਵ. ਞਤ੍ਤਿਚਤੁਤ੍ਥਕਮ੍ਮਵਸੇਨ ਕਯਿਰਮਾਨਂ ਦਲ਼੍ਹਤਰਂ ਹੋਤਿ, ਤਸ੍ਮਾ ਕਾਤਬ੍ਬਨ੍ਤਿ ਏਕਚ੍ਚੇ ਵਦਨ੍ਤਿ. ਏਵਂ ਪਨ ਸਤਿ ਕਮ੍ਮਸਙ੍ਕਰੋ ਹੋਤਿ, ਤਸ੍ਮਾ ਨ ਕਾਤਬ੍ਬਨ੍ਤਿ ਪਟਿਕ੍ਖਿਤ੍ਤਮੇਵ. ਸਚੇ ਪਨ ਅਕ੍ਖਰਪਰਿਹੀਨਂ ਵਾ ਪਦਪਰਿਹੀਨਂ ਵਾ ਦੁਰੁਤ੍ਤਪਦਂ ਵਾ ਹੋਤਿ, ਤਸ੍ਸ ਸੋਧਨਤ੍ਥਂ ਪੁਨਪ੍ਪੁਨਂ ਵਤ੍ਤੁਂ ਵਟ੍ਟਤਿ. ਇਦਂ ਅਕੁਪ੍ਪਕਮ੍ਮਸ੍ਸ ਦਲ਼੍ਹੀਕਮ੍ਮਂ ਹੋਤਿ, ਕੁਪ੍ਪਕਮ੍ਮੇ ਕਮ੍ਮਂ ਹੁਤ੍ਵਾ ਤਿਟ੍ਠਤਿ.

ਞਤ੍ਤਿਚਤੁਤ੍ਥਕਮ੍ਮਂ ਞਤ੍ਤਿਞ੍ਚ ਤਿਸ੍ਸੋ ਚ ਕਮ੍ਮਵਾਚਾਯੋ ਸਾਵੇਤ੍ਵਾਵ ਕਾਤਬ੍ਬਂ, ਅਪਲੋਕਨਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਪਞ੍ਚਹਾਕਾਰੇਹਿ ਵਿਪਜ੍ਜਨ੍ਤੀਤਿ ਪਞ੍ਚਹਿ ਕਾਰਣੇਹਿ ਵਿਪਜ੍ਜਨ੍ਤਿ.

੪੮੩. ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਨ੍ਤਿ ਏਤ੍ਥ ਅਤ੍ਥਿ ਕਮ੍ਮਂ ਸਮ੍ਮੁਖਾਕਰਣੀਯਂ; ਅਤ੍ਥਿ ਅਸਮ੍ਮੁਖਾਕਰਣੀਯਂ; ਤਤ੍ਥ ਅਸਮ੍ਮੁਖਾਕਰਣੀਯਂ ਨਾਮ ਦੂਤੇਨੁਪਸਮ੍ਪਦਾ, ਪਤ੍ਤਨਿਕ੍ਕੁਜ੍ਜਨਂ, ਪਤ੍ਤੁਕ੍ਕੁਜ੍ਜਨਂ, ਉਮ੍ਮਤ੍ਤਕਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸਮ੍ਮੁਤਿ, ਸੇਕ੍ਖਾਨਂ ਕੁਲਾਨਂ ਸੇਕ੍ਖਸਮ੍ਮੁਤਿ, ਛਨ੍ਨਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡੋ, ਦੇਵਦਤ੍ਤਸ੍ਸ ਪਕਾਸਨੀਯਕਮ੍ਮਂ, ਅਪ੍ਪਸਾਦਨੀਯਂ ਦਸ੍ਸੇਨ੍ਤਸ੍ਸ ਭਿਕ੍ਖੁਨੋ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬਂ ਅਵਨ੍ਦਨੀਯਕਮ੍ਮਨ੍ਤਿ ਅਟ੍ਠਵਿਧਂ ਹੋਤਿ, ਤਂ ਸਬ੍ਬਂ ਤਤ੍ਥ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਦਂ ਅਟ੍ਠਵਿਧਮ੍ਪਿ ਕਮ੍ਮਂ ਅਸਮ੍ਮੁਖਾ ਕਤਂ ਸੁਕਤਂ ਹੋਤਿ ਅਕੁਪ੍ਪਂ.

ਸੇਸਾਨਿ ਸਬ੍ਬਕਮ੍ਮਾਨਿ ਸਮ੍ਮੁਖਾ ਏਵ ਕਾਤਬ੍ਬਾਨਿ – ਸਙ੍ਘਸਮ੍ਮੁਖਤਾ, ਧਮ੍ਮਸਮ੍ਮੁਖਤਾ, ਵਿਨਯਸਮ੍ਮੁਖਤਾ, ਪੁਗ੍ਗਲਸਮ੍ਮੁਖਤਾਤਿ ਇਮਂ ਚਤੁਬ੍ਬਿਧਂ ਸਮ੍ਮੁਖਾਵਿਨਯਂ ਉਪਨੇਤ੍ਵਾਵ ਕਾਤਬ੍ਬਾਨਿ. ਏਵਂ ਕਤਾਨਿ ਹਿ ਸੁਕਤਾਨਿ ਹੋਨ੍ਤਿ. ਏਵਂ ਅਕਤਾਨਿ ਪਨੇਤਾਨਿ ਇਮਂ ਸਮ੍ਮੁਖਾਵਿਨਯਸਙ੍ਖਾਤਂ ਵਤ੍ਥੁਂ ਵਿਨਾ ਕਤਤ੍ਤਾ ਵਤ੍ਥੁਵਿਪਨ੍ਨਾਨਿ ਨਾਮ ਹੋਨ੍ਤਿ. ਤੇਨ ਵੁਤ੍ਤਂ – ‘‘ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮ’’ਨ੍ਤਿ.

ਪਟਿਪੁਚ੍ਛਾਕਰਣੀਯਾਦੀਸੁਪਿ ਪਟਿਪੁਚ੍ਛਾਦਿਕਰਣਮੇਵ ਵਤ੍ਥੁ, ਤਂ ਵਤ੍ਥੁਂ ਵਿਨਾ ਕਤਤ੍ਤਾ ਤੇਸਮ੍ਪਿ ਵਤ੍ਥੁਵਿਪਨ੍ਨਤਾ ਵੇਦਿਤਬ੍ਬਾ. ਇਦਂ ਪਨੇਤ੍ਥ ਵਚਨਤ੍ਥਮਤ੍ਤਂ. ਪਟਿਪੁਚ੍ਛਾ ਕਰਣੀਯਂ ਅਪ੍ਪਟਿਪੁਚ੍ਛਾ ਕਰੋਤੀਤਿ ਪੁਚ੍ਛਿਤ੍ਵਾ ਚੋਦੇਤ੍ਵਾ ਸਾਰੇਤ੍ਵਾ ਕਾਤਬ੍ਬਂ ਅਪੁਚ੍ਛਿਤ੍ਵਾ ਅਚੋਦੇਤ੍ਵਾ ਅਸਾਰੇਤ੍ਵਾ ਕਰੋਤਿ. ਪਟਿਞ੍ਞਾਯ ਕਰਣੀਯਂ ਅਪ੍ਪਟਿਞ੍ਞਾਯ ਕਰੋਤੀਤਿ ਪਟਿਞ੍ਞਂ ਆਰੋਪੇਤ੍ਵਾ ਯਥਾਦਿਨ੍ਨਾਯ ਪਟਿਞ੍ਞਾਯ ਕਾਤਬ੍ਬਂ ਅਪ੍ਪਟਿਞ੍ਞਾਯ ਕਰੋਨ੍ਤਸ੍ਸ ਵਿਪ੍ਪਲਪਨ੍ਤਸ੍ਸ ਬਲਕ੍ਕਾਰੇਨ ਕਰੋਤਿ. ਸਤਿਵਿਨਯਾਰਹਸ੍ਸਾਤਿ ਦਬ੍ਬਮਲ੍ਲਪੁਤ੍ਤਤ੍ਥੇਰਸਦਿਸਸ੍ਸ ਖੀਣਾਸਵਸ੍ਸ. ਅਮੂਲ਼੍ਹਵਿਨਯਾਰਹਸ੍ਸਾਤਿ ਗਗ੍ਗਭਿਕ੍ਖੁਸਦਿਸਸ੍ਸ ਉਮ੍ਮਤ੍ਤਕਸ੍ਸ. ਤਸ੍ਸਪਾਪਿਯਸਿਕਕਮ੍ਮਾਰਹਸ੍ਸਾਤਿ ਉਪਵਾਲ਼ਭਿਕ੍ਖੁਸਦਿਸਸ੍ਸ ਉਸ੍ਸਨ੍ਨਪਾਪਸ੍ਸ. ਏਸ ਨਯੋ ਸਬ੍ਬਤ੍ਥ.

ਅਨੁਪੋਸਥੇ ਉਪੋਸਥਂ ਕਰੋਤੀਤਿ ਅਨੁਪੋਸਥਦਿਵਸੇ ਉਪੋਸਥਂ ਕਰੋਤਿ. ਉਪੋਸਥਦਿਵਸੋ ਨਾਮ ਠਪੇਤ੍ਵਾ ਕਤ੍ਤਿਕਮਾਸਂ ਅਵਸੇਸੇਸੁ ਏਕਾਦਸਸੁ ਮਾਸੇਸੁ ਭਿਨ੍ਨਸ੍ਸ ਸਙ੍ਘਸ੍ਸ ਸਾਮਗ੍ਗਿਦਿਵਸੋ ਚ ਯਥਾਵੁਤ੍ਤਚਾਤੁਦ੍ਦਸਪਨ੍ਨਰਸਾ ਚ. ਏਤਂ ਤਿਪ੍ਪਕਾਰਮ੍ਪਿ ਉਪੋਸਥਦਿਵਸਂ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ ਉਪੋਸਥਂ ਕਰੋਨ੍ਤੋ ਅਨੁਪੋਸਥੇ ਉਪੋਸਥਂ ਕਰੋਤਿ ਨਾਮ. ਯਤ੍ਰ ਹਿ ਪਤ੍ਤਚੀਵਰਾਦੀਨਂ ਅਤ੍ਥਾਯ ਅਪ੍ਪਮਤ੍ਤਕੇਨ ਕਾਰਣੇਨ ਵਿਵਦਨ੍ਤਾ ਉਪੋਸਥਂ ਵਾ ਪਵਾਰਣਂ ਵਾ ਠਪੇਨ੍ਤਿ, ਤਤ੍ਥ ਤਸ੍ਮਿਂ ਅਧਿਕਰਣੇ ਵਿਨਿਚ੍ਛਿਤੇ ‘‘ਸਮਗ੍ਗਾ ਜਾਤਾਮ੍ਹਾ’’ਤਿ ਅਨ੍ਤਰਾ ਸਾਮਗ੍ਗਿਉਪੋਸਥਂ ਕਾਤੁਂ ਨ ਲਭਨ੍ਤਿ, ਕਰੋਨ੍ਤੇਹਿ ਅਨੁਪੋਸਥੇ ਉਪੋਸਥੋ ਕਤੋ ਨਾਮ ਹੋਤਿ.

ਅਪਵਾਰਣਾਯ ਪਵਾਰੇਤੀਤਿ ਅਪਵਾਰਣਾਦਿਵਸੇ ਪਵਾਰੇਤਿ; ਪਵਾਰਣਾਦਿਵਸੋ ਨਾਮ ਏਕਸ੍ਮਿਂ ਕਤ੍ਤਿਕਮਾਸੇ ਭਿਨ੍ਨਸ੍ਸ ਸਙ੍ਘਸ੍ਸ ਸਾਮਗ੍ਗਿਦਿਵਸੋ ਚ ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋ ਚ ਦ੍ਵੇ ਚ ਪੁਣ੍ਣਮਾਸਿਯੋ. ਏਵਂ ਚਤੁਬ੍ਬਿਧਮ੍ਪਿ ਪਵਾਰਣਾਦਿਵਸਂ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ ਪਵਾਰੇਨ੍ਤੋ ਅਪਵਾਰਣਾਯ ਪਵਾਰੇਤਿ ਨਾਮ. ਇਧਾਪਿ ਅਪ੍ਪਮਤ੍ਤਕਸ੍ਸ ਵਿਵਾਦਸ੍ਸ ਵੂਪਸਮੇ ਸਾਮਗ੍ਗਿਪਵਾਰਣਂ ਕਾਤੁਂ ਨ ਲਭਨ੍ਤਿ, ਕਰੋਨ੍ਤੇਹਿ ਅਪਵਾਰਣਾਯ ਪਵਾਰਣਾ ਕਤਾ ਹੋਤਿ. ਅਪਿਚ ਊਨਵੀਸਤਿਵਸ੍ਸਂ ਵਾ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਪੁਬ੍ਬਂ ਵਾ ਏਕਾਦਸਸੁ ਵਾ ਅਭਬ੍ਬਪੁਗ੍ਗਲੇਸੁ ਅਞ੍ਞਤਰਂ ਉਪਸਮ੍ਪਾਦੇਨ੍ਤਸ੍ਸਪਿ ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ ਹੋਤਿ. ਏਵਂ ਵਤ੍ਥੁਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.

੪੮੪. ਞਤ੍ਤਿਤੋ ਵਿਪਤ੍ਤਿਯਂ ਪਨ ਵਤ੍ਥੁਂ ਨ ਪਰਾਮਸਤੀਤਿ ਯਸ੍ਸ ਉਪਸਮ੍ਪਦਾਦਿਕਮ੍ਮਂ ਕਰੋਤਿ, ਤਂ ਨ ਪਰਾਮਸਤਿ, ਤਸ੍ਸ ਨਾਮਂ ਨ ਗਣ੍ਹਾਤਿ. ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਦਤਿ; ਏਵਂ ਵਤ੍ਥੁਂ ਨ ਪਰਾਮਸਤਿ.

ਸਙ੍ਘਂ ਨ ਪਰਾਮਸਤੀਤਿ ਸਙ੍ਘਸ੍ਸ ਨਾਮਂ ਨ ਗਣ੍ਹਾਤਿ. ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ ਭਨ੍ਤੇ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਦਤਿ; ਏਵਂ ਸਙ੍ਘਂ ਨ ਪਰਾਮਸਤਿ.

ਪੁਗ੍ਗਲਂ ਨ ਪਰਾਮਸਤੀਤਿ ਯੋ ਉਪਸਮ੍ਪਦਾਪੇਕ੍ਖਸ੍ਸ ਉਪਜ੍ਝਾਯੋ, ਤਂ ਨ ਪਰਾਮਸਤਿ, ਤਸ੍ਸ ਨਾਮਂ ਨ ਗਣ੍ਹਾਤਿ. ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਉਪਸਮ੍ਪਦਾਪੇਕ੍ਖੋ’’ਤਿ ਵਦਤਿ; ਏਵਂ ਪੁਗ੍ਗਲਂ ਨ ਪਰਾਮਸਤਿ.

ਞਤ੍ਤਿਂ ਨ ਪਰਾਮਸਤੀਤਿ ਸਬ੍ਬੇਨ ਸਬ੍ਬਂ ਞਤ੍ਤਿਂ ਨ ਪਰਾਮਸਤਿ. ਞਤ੍ਤਿਦੁਤਿਯਕਮ੍ਮੇ ਞਤ੍ਤਿਂ ਅਟ੍ਠਪੇਤ੍ਵਾ ਦ੍ਵਿਕ੍ਖਤ੍ਤੁਂ ਕਮ੍ਮਵਾਚਾਯ ਏਵ ਅਨੁਸ੍ਸਾਵਨਕਮ੍ਮਂ ਕਰੋਤਿ. ਞਤ੍ਤਿਚਤੁਤ੍ਥਕਮ੍ਮੇਪਿ ਞਤ੍ਤਿਂ ਅਟ੍ਠਪੇਤ੍ਵਾ ਚਤੁਕ੍ਖਤ੍ਤੁਂ ਕਮ੍ਮਵਾਚਾਯ ਏਵ ਅਨੁਸ੍ਸਾਵਨਕਮ੍ਮਂ ਕਰੋਤਿ; ਏਵਂ ਞਤ੍ਤਿਂ ਨ ਪਰਾਮਸਤਿ.

ਪਚ੍ਛਾ ਵਾ ਞਤ੍ਤਿਂ ਠਪੇਤੀਤਿ ਪਠਮਂ ਕਮ੍ਮਵਾਚਾਯ ਅਨੁਸ੍ਸਾਵਨਕਮ੍ਮਂ ਕਤ੍ਵਾ ‘‘ਏਸਾ ਞਤ੍ਤੀ’’ਤਿ ਵਤ੍ਵਾ ‘‘ਖਮਤਿ ਸਙ੍ਘਸ੍ਸ ਤਸ੍ਮਾ ਤੁਣ੍ਹੀ ਏਵਮੇਤਂ ਧਾਰਯਾਮੀ’’ਤਿ ਵਦਤਿ; ਏਵਂ ਪਚ੍ਛਾ ਞਤ੍ਤਿਂ ਠਪੇਤਿ. ਇਤਿ ਇਮੇਹਿ ਪਞ੍ਚਹਾਕਾਰੇਹਿ ਞਤ੍ਤਿਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.

੪੮੫. ਅਨੁਸ੍ਸਾਵਨਤੋ ਵਿਪਤ੍ਤਿਯਂ ਪਨ ਵਤ੍ਥੁਆਦੀਨਿ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ. ਏਵਂ ਪਨ ਨੇਸਂ ਅਪਰਾਮਸਨਂ ਹੋਤਿ – ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ’’ਤਿ ਪਠਮਾਨੁਸ੍ਸਾਵਨੇ ‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ, ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ, ਸੁਣਾਤੁ ਮੇ ਭਨ੍ਤੇ ਸਙ੍ਘੋ’’ਤਿ ਦੁਤਿਯਤਤਿਯਾਨੁਸ੍ਸਾਵਨਾਸੁ ਵਾ ‘‘ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸਾ’’ਤਿ ਵਦਨ੍ਤੋ ਵਤ੍ਥੁਂ ਨ ਪਰਾਮਸਤਿ ਨਾਮ. ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ ਭਨ੍ਤੇ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਦਨ੍ਤੋ ਸਙ੍ਘਂ ਨ ਪਰਾਮਸਤਿ ਨਾਮ. ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸਾ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਉਪਸਮ੍ਪਦਾਪੇਕ੍ਖੋ’’ਤਿ ਵਦਨ੍ਤੋ ਪੁਗ੍ਗਲਂ ਨ ਪਰਾਮਸਤਿ ਨਾਮ.

ਸਾਵਨਂ ਹਾਪੇਤੀਤਿ ਸਬ੍ਬੇਨ ਸਬ੍ਬਂ ਕਮ੍ਮਵਾਚਾਯ ਅਨੁਸ੍ਸਾਵਨਂ ਨ ਕਰੋਤਿ, ਞਤ੍ਤਿਦੁਤਿਯਕਮ੍ਮੇ ਦ੍ਵਿਕ੍ਖਤ੍ਤੁਂ ਞਤ੍ਤਿਮੇਵ ਠਪੇਤਿ, ਞਤ੍ਤਿਚਤੁਤ੍ਥਕਮ੍ਮੇ ਚਤੁਕ੍ਖਤ੍ਤੁਂ ਞਤ੍ਤਿਮੇਵ ਠਪੇਤਿ; ਏਵਂ ਅਨੁਸ੍ਸਾਵਨਂ ਹਾਪੇਤਿ. ਯੋਪਿ ਞਤ੍ਤਿਦੁਤਿਯਕਮ੍ਮੇ ਏਕਂ ਞਤ੍ਤਿਂ ਠਪੇਤ੍ਵਾ ਏਕਂ ਕਮ੍ਮਵਾਚਂ ਅਨੁਸ੍ਸਾਵੇਨ੍ਤੋ ਅਕ੍ਖਰਂ ਵਾ ਛਡ੍ਡੇਤਿ, ਪਦਂ ਵਾ ਦੁਰੁਤ੍ਤਂ ਕਰੋਤਿ, ਅਯਮ੍ਪਿ ਅਨੁਸ੍ਸਾਵਨਂ ਹਾਪੇਤਿਯੇਵ. ਞਤ੍ਤਿਚਤੁਤ੍ਥਕਮ੍ਮੇ ਪਨ ਏਕਂ ਞਤ੍ਤਿਂ ਠਪੇਤ੍ਵਾ ਸਕਿਮੇਵ ਵਾ ਦ੍ਵਿਕ੍ਖਤ੍ਤੁਂ ਵਾ ਕਮ੍ਮਵਾਚਾਯ ਅਨੁਸ੍ਸਾਵਨਂ ਕਰੋਨ੍ਤੋਪਿ ਅਕ੍ਖਰਂ ਵਾ ਪਦਂ ਵਾ ਛਡ੍ਡੇਨ੍ਤੋਪਿ ਦੁਰੁਤ੍ਤਂ ਕਰੋਨ੍ਤੋਪਿ ਅਨੁਸ੍ਸਾਵਨਂ ਹਾਪੇਤਿਯੇਵਾਤਿ ਵੇਦਿਤਬ੍ਬੋ.

ਦੁਰੁਤ੍ਤਂ ਕਰੋਤੀਤਿ ਏਤ੍ਥ ਪਨ ਅਯਂ ਵਿਨਿਚ੍ਛਯੋ – ਯੋ ਹਿ ਅਞ੍ਞਸ੍ਮਿਂ ਅਕ੍ਖਰੇ ਵਤ੍ਤਬ੍ਬੇ ਅਞ੍ਞਂ ਵਦਤਿ, ਅਯਂ ਦੁਰੁਤ੍ਤਂ ਕਰੋਤਿ ਨਾਮ. ਤਸ੍ਮਾ ਕਮ੍ਮਵਾਚਂ ਕਰੋਨ੍ਤੇਨ ਭਿਕ੍ਖੁਨਾ ਯ੍ਵਾਯਂ –

‘‘ਸਿਥਿਲਂ ਧਨਿਤਞ੍ਚ ਦੀਘਰਸ੍ਸਂ, ਗਰੁਕਂ ਲਹੁਕਞ੍ਚ ਨਿਗ੍ਗਹਿਤਂ;

ਸਮ੍ਬਨ੍ਧਂ ਵਵਤ੍ਥਿਤਂ ਵਿਮੁਤ੍ਤਂ, ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋ’’ਤਿ.

ਵੁਤ੍ਤੋ, ਅਯਂ ਸੁਟ੍ਠੁ ਉਪਲਕ੍ਖੇਤਬ੍ਬੋ. ਏਤ੍ਥ ਹਿ ‘‘ਸਿਥਿਲਂ’’ ਨਾਮ ਪਞ੍ਚਸੁ ਵਗ੍ਗੇਸੁ ਪਠਮਤਤਿਯਂ. ‘‘ਧਨਿਤਂ’’ ਨਾਮ ਤੇਸ੍ਵੇਵ ਦੁਤਿਯਚਤੁਤ੍ਥਂ. ‘‘ਦੀਘ’’ਨ੍ਤਿ ਦੀਘੇਨ ਕਾਲੇਨ ਵਤ੍ਤਬ੍ਬਂ ਆਕਾਰਾਦਿ. ‘‘ਰਸ੍ਸ’’ਨ੍ਤਿ ਤਤੋ ਉਪਡ੍ਢਕਾਲੇਨ ਵਤ੍ਤਬ੍ਬਂ ਅਕਾਰਾਦਿ. ‘‘ਗਰੁਕ’’ਨ੍ਤਿ ਦੀਘਮੇਵ. ਯਂ ਵਾ ਆਯਸ੍ਮਤੋ ਬੁਦ੍ਧਰਕ੍ਖਿਤਤ੍ਥੇਰਸ੍ਸ ਯਸ੍ਸ ਨਕ੍ਖਮਤੀਤਿ ਏਵਂ ਸਂਯੋਗਪਰਂ ਕਤ੍ਵਾ ਵੁਚ੍ਚਤਿ. ‘‘ਲਹੁਕ’’ਨ੍ਤਿ ਰਸ੍ਸਮੇਵ. ਯਂ ਵਾ ਆਯਸ੍ਮਤੋ ਬੁਦ੍ਧਰਕ੍ਖਿਤਥੇਰਸ੍ਸ ਯਸ੍ਸ ਨ ਖਮਤੀਤਿ ਏਵਂ ਅਸਂਯੋਗਪਰਂ ਕਤ੍ਵਾ ਵੁਚ੍ਚਤਿ. ‘‘ਨਿਗ੍ਗਹਿਤ’’ਨ੍ਤਿ ਯਂ ਕਰਣਾਨਿ ਨਿਗ੍ਗਹੇਤ੍ਵਾ ਅਵਿਸ੍ਸਜ੍ਜੇਤ੍ਵਾ ਅਵਿਵਟੇਨ ਮੁਖੇਨ ਸਾਨੁਨਾਸਿਕਂ ਕਤ੍ਵਾ ਵਤ੍ਤਬ੍ਬਂ. ‘‘ਸਮ੍ਬਨ੍ਧ’’ਨ੍ਤਿ ਯਂ ਪਰਪਦੇਨ ਸਮ੍ਬਨ੍ਧਿਤ੍ਵਾ ‘‘ਤੁਣ੍ਹਿਸ੍ਸਾ’’ਤਿ ਵਾ ‘‘ਤੁਣ੍ਹਸ੍ਸਾ’’ਤਿ ਵਾ ਵੁਚ੍ਚਤਿ. ‘‘ਵਵਤ੍ਥਿਤ’’ਨ੍ਤਿ ਯਂ ਪਰਪਦੇਨ ਅਸਮ੍ਬਨ੍ਧਂ ਕਤ੍ਵਾ ਵਿਚ੍ਛਿਨ੍ਦਿਤ੍ਵਾ ‘‘ਤੁਣ੍ਹੀ ਅਸ੍ਸਾ’’ਤਿ ਵਾ ‘‘ਤੁਣ੍ਹ ਅਸ੍ਸਾ’’ਤਿ ਵਾ ਵੁਚ੍ਚਤਿ. ‘‘ਵਿਮੁਤ੍ਤ’’ਨ੍ਤਿ ਯਂ ਕਰਣਾਨਿ ਅਨਿਗ੍ਗਹੇਤ੍ਵਾ ਵਿਸ੍ਸਜ੍ਜੇਤ੍ਵਾ ਵਿਵਟੇਨ ਮੁਖੇਨ ਅਨੁਨਾਸਿਕਂ ਅਕਤ੍ਵਾ ਵੁਚ੍ਚਤਿ.

ਤਤ੍ਥ ‘‘ਸੁਣਾਤੁ ਮੇ’’ਤਿ ਵਤ੍ਤਬ੍ਬੇ ਤ-ਕਾਰਸ੍ਸ ਥ-ਕਾਰਂ ਕਤ੍ਵਾ ‘‘ਸੁਣਾਥੁ ਮੇ’’ਤਿ ਵਚਨਂ ਸਿਥਿਲਸ੍ਸ ਧਨਿਤਕਰਣਂ ਨਾਮ. ਤਥਾ ‘‘ਪਤ੍ਤਕਲ੍ਲਂ, ਏਸਾ ਞਤ੍ਤੀ’’ਤਿ ਵਤ੍ਤਬ੍ਬੇ ‘‘ਪਤ੍ਥਕਲ੍ਲਂ, ਏਸਾ ਞਤ੍ਥੀ’’ਤਿਆਦਿਵਚਨਞ੍ਚ. ‘‘ਭਨ੍ਤੇ ਸਙ੍ਘੋ’’ਤਿ ਵਤ੍ਤਬ੍ਬੇ ਭ-ਕਾਰ ਘ-ਕਾਰਾਨਂ ਬ-ਕਾਰ ਗ-ਕਾਰੇ ਕਤ੍ਵਾ ‘‘ਬਨ੍ਤੇ ਸਙ੍ਗੋ’’ਤਿ ਵਚਨਂ ਧਨਿਤਸ੍ਸ ਸਿਥਿਲਕਰਣਂ ਨਾਮ. ‘‘ਸੁਣਾਤੁ ਮੇ’’ਤਿ ਵਿਵਟੇਨ ਮੁਖੇਨ ਵਤ੍ਤਬ੍ਬੇ ਪਨ ‘‘ਸੁਣਂਤੁ ਮੇ’’ਤਿ ਵਾ ‘‘ਏਸਾ ਞਤ੍ਤੀ’’ਤਿ ਵਤ੍ਤਬ੍ਬੇ ‘‘ਏਸਂ ਞਤ੍ਤੀ’’ਤਿ ਵਾ ਅਵਿਵਟੇਨ ਮੁਖੇਨ ਅਨੁਨਾਸਿਕਂ ਕਤ੍ਵਾ ਵਚਨਂ ਵਿਮੁਤ੍ਤਸ੍ਸ ਨਿਗ੍ਗਹਿਤਵਚਨਂ ਨਾਮ. ‘‘ਪਤ੍ਤਕਲ੍ਲ’’ਨ੍ਤਿ ਅਵਿਵਟੇਨ ਮੁਖੇਨ ਅਨੁਨਾਸਿਕਂ ਕਤ੍ਵਾ ਵਤ੍ਤਬ੍ਬੇ ‘‘ਪਤ੍ਤਕਲ੍ਲਾ’’ਤਿ ਵਿਵਟੇਨ ਮੁਖੇਨ ਅਨੁਨਾਸਿਕਂ ਅਕਤ੍ਵਾ ਵਚਨਂ ਨਿਗ੍ਗਹਿਤਸ੍ਸ ਵਿਮੁਤ੍ਤਵਚਨਂ ਨਾਮ.

ਇਤਿ ਸਿਥਿਲੇ ਕਤ੍ਤਬ੍ਬੇ ਧਨਿਤਂ, ਧਨਿਤੇ ਕਤ੍ਤਬ੍ਬੇ ਸਿਥਿਲਂ, ਵਿਮੁਤ੍ਤੇ ਕਤ੍ਤਬ੍ਬੇ ਨਿਗ੍ਗਹਿਤਂ, ਨਿਗ੍ਗਹਿਤੇ ਕਤ੍ਤਬ੍ਬੇ ਵਿਮੁਤ੍ਤਨ੍ਤਿ ਇਮਾਨਿ ਚਤ੍ਤਾਰਿ ਬ੍ਯਞ੍ਜਨਾਨਿ ਅਨ੍ਤੋਕਮ੍ਮਵਾਚਾਯ ਕਮ੍ਮਂ ਦੂਸੇਨ੍ਤਿ. ਏਵਂ ਵਦਨ੍ਤੋ ਹਿ ਅਞ੍ਞਸ੍ਮਿਂ ਅਕ੍ਖਰੇ ਵਤ੍ਤਬ੍ਬੇ ਅਞ੍ਞਂ ਵਦਤਿ, ਦੁਰੁਤ੍ਤਂ ਕਰੋਤੀਤਿ ਵੁਚ੍ਚਤਿ. ਇਤਰੇਸੁ ਪਨ ਦੀਘਰਸ੍ਸਾਦੀਸੁ ਛਸੁ ਬ੍ਯਞ੍ਜਨੇਸੁ ਦੀਘਟ੍ਠਾਨੇ ਦੀਘਮੇਵ, ਰਸ੍ਸਟ੍ਠਾਨੇ ਚ ਰਸ੍ਸਮੇਵਾਤਿ ਏਵਂ ਯਥਾਠਾਨੇ ਤਂ ਤਦੇਵ ਅਕ੍ਖਰਂ ਭਾਸਨ੍ਤੇਨ ਅਨੁਕ੍ਕਮਾਗਤਂ ਪਵੇਣਿਂ ਅਵਿਨਾਸੇਨ੍ਤੇਨ ਕਮ੍ਮਵਾਚਾ ਕਾਤਬ੍ਬਾ. ਸਚੇ ਪਨ ਏਵਂ ਅਕਤ੍ਵਾ ਦੀਘੇ ਵਤ੍ਤਬ੍ਬੇ ਰਸ੍ਸਂ, ਰਸ੍ਸੇ ਵਾ ਵਤ੍ਤਬ੍ਬੇ ਦੀਘਂ ਵਦਤਿ; ਤਥਾ ਗਰੁਕੇ ਵਤ੍ਤਬ੍ਬੇ ਲਹੁਕਂ, ਲਹੁਕੇ ਵਾ ਵਤ੍ਤਬ੍ਬੇ ਗਰੁਕਂ ਵਦਤਿ; ਸਮ੍ਬਨ੍ਧੇ ਵਾ ਪਨ ਵਤ੍ਤਬ੍ਬੇ ਵਵਤ੍ਥਿਤਂ, ਵਵਤ੍ਥਿਤੇ ਵਾ ਵਤ੍ਤਬ੍ਬੇ ਸਮ੍ਬਨ੍ਧਂ ਵਦਤਿ; ਏਵਂ ਵੁਤ੍ਤੇਪਿ ਕਮ੍ਮਵਾਚਾ ਨ ਕੁਪ੍ਪਤਿ. ਇਮਾਨਿ ਹਿ ਛ ਬ੍ਯਞ੍ਜਨਾਨਿ ਕਮ੍ਮਂ ਨ ਕੋਪੇਨ੍ਤਿ.

ਯਂ ਪਨ ਸੁਤ੍ਤਨ੍ਤਿਕਤ੍ਥੇਰਾ ‘‘ਦ-ਕਾਰੋ ਤ-ਕਾਰਮਾਪਜ੍ਜਤਿ, ਤ-ਕਾਰੋ ਦ-ਕਾਰਮਾਪਜ੍ਜਤਿ, ਚ-ਕਾਰੋ ਜ-ਕਾਰਮਾਪਜ੍ਜਤਿ, ਜ-ਕਾਰੋ ਚ-ਕਾਰਮਾਪਜ੍ਜਤਿ, ਯ-ਕਾਰੋ ਕ-ਕਾਰਮਾਪਜ੍ਜਤਿ, ਕ-ਕਾਰੋ ਯ-ਕਾਰਮਾਪਜ੍ਜਤਿ; ਤਸ੍ਮਾ ਦ-ਕਾਰਾਦੀਸੁ ਵਤ੍ਤਬ੍ਬੇਸੁ ਤ-ਕਾਰਾਦਿਵਚਨਂ ਨ ਵਿਰੁਜ੍ਝਤੀ’’ਤਿ ਵਦਨ੍ਤਿ, ਤਂ ਕਮ੍ਮਵਾਚਂ ਪਤ੍ਵਾ ਨ ਵਟ੍ਟਤਿ. ਤਸ੍ਮਾ ਵਿਨਯਧਰੇਨ ਨੇਵ ਦ-ਕਾਰੋ ਤ-ਕਾਰੋ ਕਾਤਬ੍ਬੋ…ਪੇ… ਨ ਕ-ਕਾਰੋ ਯ-ਕਾਰੋ. ਯਥਾਪਾਲ਼ਿਯਾ ਨਿਰੁਤ੍ਤਿਂ ਸੋਧੇਤ੍ਵਾ ਦਸਵਿਧਾਯ ਬ੍ਯਞ੍ਜਨਨਿਰੁਤ੍ਤਿਯਾ ਵੁਤ੍ਤਦੋਸੇ ਪਰਿਹਰਨ੍ਤੇਨ ਕਮ੍ਮਵਾਚਾ ਕਾਤਬ੍ਬਾ. ਇਤਰਥਾ ਹਿ ਸਾਵਨਂ ਹਾਪੇਤਿ ਨਾਮ.

ਅਕਾਲੇ ਵਾ ਸਾਵੇਤੀਤਿ ਸਾਵਨਾਯ ਅਕਾਲੇ ਅਨੋਕਾਸੇ ਞਤ੍ਤਿਂ ਅਟ੍ਠਪੇਤ੍ਵਾ ਪਠਮਂਯੇਵ ਅਨੁਸ੍ਸਾਵਨਕਮ੍ਮਂ ਕਤ੍ਵਾ ਪਚ੍ਛਾ ਞਤ੍ਤਿਂ ਠਪੇਤਿ. ਇਤਿ ਇਮੇਹਿ ਪਞ੍ਚਹਾਕਾਰੇਹਿ ਅਨੁਸ੍ਸਾਵਨਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.

੪੮੬. ਸੀਮਤੋ ਵਿਪਤ੍ਤਿਯਂ ਪਨ ਅਤਿਖੁਦ੍ਦਕਸੀਮਾ ਨਾਮ ਯਾ ਏਕਵੀਸਤਿ ਭਿਕ੍ਖੂ ਨ ਗਣ੍ਹਾਤਿ. ਕੁਰੁਨ੍ਦਿਯਂ ਪਨ ‘‘ਯਤ੍ਥ ਏਕਵੀਸਤਿ ਭਿਕ੍ਖੂ ਨਿਸੀਦਿਤੁਂ ਨ ਸਕ੍ਕੋਨ੍ਤੀ’’ਤਿ ਵੁਤ੍ਤਂ. ਤਸ੍ਮਾ ਯਾ ਏਵਰੂਪਾ ਸੀਮਾ, ਅਯਂ ਸਮ੍ਮਤਾਪਿ ਅਸਮ੍ਮਤਾ, ਗਾਮਖੇਤ੍ਤਸਦਿਸਾਵ ਹੋਤਿ, ਤਤ੍ਥ ਕਤਂ ਕਮ੍ਮਂ ਕੁਪ੍ਪਤਿ. ਏਸ ਨਯੋ ਸੇਸਸੀਮਾਸੁਪਿ. ਏਤ੍ਥ ਪਨ ਅਤਿਮਹਤੀ ਨਾਮ ਯਾ ਕੇਸਗ੍ਗਮਤ੍ਤੇਨਾਪਿ ਤਿਯੋਜਨਂ ਅਤਿਕ੍ਕਾਮੇਤ੍ਵਾ ਸਮ੍ਮਤਾ ਹੋਤਿ. ਖਣ੍ਡਨਿਮਿਤ੍ਤਾ ਨਾਮ ਅਘਟਿਤਨਿਮਿਤ੍ਤਾ ਵੁਚ੍ਚਤਿ. ਪੁਰਤ੍ਥਿਮਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਅਨੁਕ੍ਕਮੇਨੇਵ ਦਕ੍ਖਿਣਾਯ ਪਚ੍ਛਿਮਾਯ ਉਤ੍ਤਰਾਯ ਦਿਸਾਯ ਕਿਤ੍ਤੇਤ੍ਵਾ ਪੁਨ ਪੁਰਤ੍ਥਿਮਾਯ ਦਿਸਾਯ ਪੁਬ੍ਬਕਿਤ੍ਤਿਤਂ ਨਿਮਿਤ੍ਤਂ ਪਟਿਕਿਤ੍ਤੇਤ੍ਵਾਵ ਠਪੇਤੁਂ ਵਟ੍ਟਤਿ; ਏਵਂ ਅਖਣ੍ਡਨਿਮਿਤ੍ਤਾ ਹੋਤਿ. ਸਚੇ ਪਨ ਅਨੁਕ੍ਕਮੇਨ ਆਹਰਿਤ੍ਵਾ ਉਤ੍ਤਰਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤ੍ਥੇਵ ਠਪੇਤਿ, ਖਣ੍ਡਨਿਮਿਤ੍ਤਾ ਹੋਤਿ. ਅਪਰਾਪਿ ਖਣ੍ਡਨਿਮਿਤ੍ਤਾ ਨਾਮ ਯਾ ਅਨਿਮਿਤ੍ਤੁਪਗਂ ਤਚਸਾਰਰੁਕ੍ਖਂ ਵਾ ਖਾਣੁਕਂ ਵਾ ਪਂਸੁਪੁਞ੍ਜਵਾਲਿਕਾਪੁਞ੍ਜਾਨਂ ਵਾ ਅਞ੍ਞਤਰਂ ਅਨ੍ਤਰਾ ਏਕਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ ਹੋਤਿ. ਛਾਯਾਨਿਮਿਤ੍ਤਾ ਨਾਮ ਯਾ ਪਬ੍ਬਤਚ੍ਛਾਯਾਦੀਨਂ ਯਂਕਿਞ੍ਚਿ ਛਾਯਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ ਹੋਤਿ. ਅਨਿਮਿਤ੍ਤਾ ਨਾਮ ਯਾ ਸਬ੍ਬੇਨ ਸਬ੍ਬਂ ਨਿਮਿਤ੍ਤਾਨਿ ਅਕਿਤ੍ਤੇਤ੍ਵਾ ਸਮ੍ਮਤਾ ਹੋਤਿ.

ਬਹਿਸੀਮੇ ਠਿਤੋ ਸੀਮਂ ਸਮ੍ਮਨ੍ਨਤਿ ਨਾਮ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਨਿਮਿਤ੍ਤਾਨਂ ਬਹਿ ਠਿਤੋ ਸਮ੍ਮਨ੍ਨਤਿ. ਨਦਿਯਾ ਸਮੁਦ੍ਦੇ ਜਾਤਸ੍ਸਰੇ ਸੀਮਂ ਸਮ੍ਮਨ੍ਨਤੀਤਿ ਏਤੇਸੁ ਨਦਿਆਦੀਸੁ ਯਂ ਸਮ੍ਮਨ੍ਨਤਿ, ਸਾ ਏਵਂ ਸਮ੍ਮਤਾਪਿ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੭) ਵਚਨਤੋ ਅਸਮ੍ਮਤਾਵ ਹੋਤਿ. ਸੀਮਾਯ ਸੀਮਂ ਸਮ੍ਭਿਨ੍ਦਤੀਤਿ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਸਮ੍ਭਿਨ੍ਦਤਿ. ਅਜ੍ਝੋਤ੍ਥਰਤੀਤਿ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਅਜ੍ਝੋਤ੍ਥਰਤਿ. ਤਤ੍ਥ ਯਥਾ ਸਮ੍ਭੇਦੋ ਚ ਅਜ੍ਝੋਤ੍ਥਰਣਞ੍ਚ ਹੋਤਿ, ਤਂ ਸਬ੍ਬਂ ਉਪੋਸਥਕ੍ਖਨ੍ਧਕੇ ਵੁਤ੍ਤਮੇਵ. ਇਤਿ ਇਮਾ ਏਕਾਦਸਪਿ ਸੀਮਾ ਅਸੀਮਾ ਗਾਮਖੇਤ੍ਤਸਦਿਸਾ ਏਵ, ਤਾਸੁ ਨਿਸੀਦਿਤ੍ਵਾ ਕਤਂ ਕਮ੍ਮਂ ਕੁਪ੍ਪਤਿ. ਤੇਨ ਵੁਤ੍ਤਂ ‘‘ਇਮੇਹਿ ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤੀ’’ਤਿ.

੪੮੭-੪੮੮. ਪਰਿਸਤੋ ਕਮ੍ਮਵਿਪਤ੍ਤਿਯਂ ਪਨ ਕਿਞ੍ਚਿ ਅਨੁਤ੍ਤਾਨਂ ਨਾਮ ਨਤ੍ਥਿ. ਯਮ੍ਪਿ ਤਤ੍ਥ ਕਮ੍ਮਪ੍ਪਤ੍ਤਛਨ੍ਦਾਰਹਲਕ੍ਖਣਂ ਵਤ੍ਤਬ੍ਬਂ ਸਿਯਾ, ਤਮ੍ਪਿ ਪਰਤੋ ‘‘ਚਤ੍ਤਾਰੋ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ’’ਤਿਆਦਿਨਾ ਨਯੇਨ ਵੁਤ੍ਤਮੇਵ. ਤਤ੍ਥ ਪਕਤਤ੍ਤਾ ਕਮ੍ਮਪ੍ਪਤ੍ਤਾਤਿ ਚਤੁਵਗ੍ਗਕਰਣੇ ਕਮ੍ਮੇ ਚਤ੍ਤਾਰੋ ਪਕਤਤ੍ਤਾ ਅਨੁਕ੍ਖਿਤ੍ਤਾ ਅਨਿਸ੍ਸਾਰਿਤਾ ਪਰਿਸੁਦ੍ਧਸੀਲਾ ਚਤ੍ਤਾਰੋ ਭਿਕ੍ਖੂ ਕਮ੍ਮਪ੍ਪਤ੍ਤਾ ਕਮ੍ਮਸ੍ਸ ਅਰਹਾ ਅਨੁਚ੍ਛਵਿਕਾ ਸਾਮਿਨੋ. ਨ ਤੇਹਿ ਵਿਨਾ ਤਂ ਕਮ੍ਮਂ ਕਯਿਰਤਿ, ਨ ਤੇਸਂ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਏਤਿ. ਅਵਸੇਸਾ ਪਨ ਸਚੇਪਿ ਸਹਸ੍ਸਮਤ੍ਤਾ ਹੋਨ੍ਤਿ, ਸਚੇ ਸਮਾਨਸਂਵਾਸਕਾ, ਸਬ੍ਬੇ ਛਨ੍ਦਾਰਹਾਵ ਹੋਨ੍ਤਿ. ਛਨ੍ਦਪਾਰਿਸੁਦ੍ਧਿਂ ਦਤ੍ਵਾ ਆਗਚ੍ਛਨ੍ਤੁ ਵਾ ਮਾ ਵਾ, ਕਮ੍ਮਂ ਪਨ ਤਿਟ੍ਠਤਿ. ਯਸ੍ਸ ਪਨ ਸਙ੍ਘੋ ਪਰਿਵਾਸਾਦਿਕਮ੍ਮਂ ਕਰੋਤਿ, ਸੋ ਨੇਵ ਕਮ੍ਮਪ੍ਪਤ੍ਤੋ, ਨਾਪਿ ਛਨ੍ਦਾਰਹੋ. ਅਪਿਚ ਯਸ੍ਮਾ ਤਂ ਪੁਗ੍ਗਲਂ ਵਤ੍ਥੁਂ ਕਤ੍ਵਾ ਸਙ੍ਘੋ ਕਮ੍ਮਂ ਕਰੋਤਿ, ਤਸ੍ਮਾ ‘‘ਕਮ੍ਮਾਰਹੋ’’ਤਿ ਵੁਚ੍ਚਤਿ. ਸੇਸਕਮ੍ਮੇਸੁਪਿ ਏਸੇਵ ਨਯੋ.

੪੮੯. ਪੁਨ ਚਤ੍ਤਾਰਿ ਕਮ੍ਮਾਨੀਤਿਆਦਿਕੋ ਨਯੋ ਪਣ੍ਡਕਾਦੀਨਂ ਅਵਤ੍ਥੁਭਾਵਦਸ੍ਸਨਤ੍ਥਂ ਵੁਤ੍ਤੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਅਪਲੋਕਨਕਮ੍ਮਕਥਾ

੪੯੫-੪੯੬. ਇਦਾਨਿ ਤੇਸਂ ਕਮ੍ਮਾਨਂ ਪਭੇਦਦਸ੍ਸਨਤ੍ਥਂ ‘‘ਅਪਲੋਕਨਕਮ੍ਮਂ ਕਤਿ ਠਾਨਾਨਿ ਗਚ੍ਛਤੀ’’ਤਿਆਦਿਮਾਹ. ਤਤ੍ਥ ‘‘ਅਪਲੋਕਨਕਮ੍ਮਂ ਪਞ੍ਚ ਠਾਨਾਨਿ ਗਚ੍ਛਤਿ – ਓਸਾਰਣਂ, ਨਿਸ੍ਸਾਰਣਂ, ਭਣ੍ਡੁਕਮ੍ਮਂ, ਬ੍ਰਹ੍ਮਦਣ੍ਡਂ, ਕਮ੍ਮਲਕ੍ਖਣਞ੍ਞੇਵ ਪਞ੍ਚਮ’’ਨ੍ਤਿ ਏਤ੍ਥ ‘‘ਓਸਾਰਣਂ ਨਿਸ੍ਸਾਰਣ’’ਨ੍ਤਿ ਪਦਸਿਲਿਟ੍ਠਤਾਯੇਤਂ ਵੁਤ੍ਤਂ. ਪਠਮਂ ਪਨ ਨਿਸ੍ਸਾਰਣਾ ਹੋਤਿ, ਪਚ੍ਛਾ ਓਸਾਰਣਾ. ਤਤ੍ਥ ਯਾ ਕਣ੍ਟਕਸਾਮਣੇਰਸ੍ਸ ਦਣ੍ਡਕਮ੍ਮਨਾਸਨਾ, ਸਾ ‘‘ਨਿਸ੍ਸਾਰਣਾ’’ਤਿ ਵੇਦਿਤਬ੍ਬਾ. ਤਸ੍ਮਾ ਏਤਰਹਿ ਸਚੇਪਿ ਸਾਮਣੇਰੋ ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਅਵਣ੍ਣਂ ਭਣਤਿ, ‘‘ਅਕਪ੍ਪਿਯਂ ਕਪ੍ਪਿਯ’’ਨ੍ਤਿ ਦੀਪੇਤਿ, ਮਿਚ੍ਛਾਦਿਟ੍ਠਿਕੋ ਹੋਤਿ ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋ, ਸੋ ਯਾਵਤਤਿਯਂ ਨਿਵਾਰੇਤ੍ਵਾ ਤਂ ਲਦ੍ਧਿਂ ਨਿਸ੍ਸਜ੍ਜਾਪੇਤਬ੍ਬੋ. ਨੋ ਚੇ ਵਿਸ੍ਸਜ੍ਜੇਤਿ, ਸਙ੍ਘਂ ਸਨ੍ਨਿਪਾਤੇਤ੍ਵਾ ‘‘ਵਿਸ੍ਸਜ੍ਜੇਹੀ’’ਤਿ ਵਤ੍ਤਬ੍ਬੋ. ਨੋ ਚੇ ਵਿਸ੍ਸਜ੍ਜੇਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਅਪਲੋਕਨਕਮ੍ਮਂ ਕਤ੍ਵਾ ਨਿਸ੍ਸਾਰੇਤਬ੍ਬੋ. ਏਵਞ੍ਚ ਪਨ ਕਮ੍ਮਂ ਕਾਤਬ੍ਬਂ –

‘‘ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ – ‘ਅਯਂ ਇਤ੍ਥਨ੍ਨਾਮੋ ਸਾਮਣੇਰੋ ਬੁਦ੍ਧਸ੍ਸ ਧਮ੍ਮਸ੍ਸ ਸਙ੍ਘਸ੍ਸ ਅਵਣ੍ਣਵਾਦੀ ਮਿਚ੍ਛਾਦਿਟ੍ਠਿਕੋ, ਯਂ ਅਞ੍ਞੇ ਸਾਮਣੇਰਾ ਲਭਨ੍ਤਿ, ਦਿਰਤ੍ਤਤਿਰਤ੍ਤਂ ਭਿਕ੍ਖੂਹਿ ਸਦ੍ਧਿਂ ਸਹਸੇਯ੍ਯਂ, ਤਸ੍ਸ ਅਲਾਭਾਯ ਨਿਸ੍ਸਾਰਣਾ ਰੁਚ੍ਚਤਿ ਸਙ੍ਘਸ੍ਸਾ’ਤਿ. ਦੁਤਿਯਮ੍ਪਿ… ਤਤਿਯਮ੍ਪਿ, ਭਨ੍ਤੇ, ਸਙ੍ਘਂ ਪੁਚ੍ਛਾਮਿ – ‘ਅਯਂ ਇਤ੍ਥਨ੍ਨਾਮੋ ਸਾਮਣੇਰੋ ਬੁਦ੍ਧਸ੍ਸ…ਪੇ… ਰੁਚ੍ਚਤਿ ਸਙ੍ਘਸ੍ਸਾ’ਤਿ ਚਰ ਪਿਰੇ ਵਿਨਸ੍ਸਾ’’ਤਿ.

ਸੋ ਅਪਰੇਨ ਸਮਯੇਨ ‘‘ਅਹਂ, ਭਨ੍ਤੇ, ਬਾਲਤਾਯ ਅਞ੍ਞਾਣਤਾਯ ਅਲਕ੍ਖਿਕਤਾਯ ਏਵਂ ਅਕਾਸਿਂ, ਸ੍ਵਾਹਂ ਸਙ੍ਘਂ ਖਮਾਪੇਮੀ’’ਤਿ ਖਮਾਪੇਨ੍ਤੋ ਯਾਵਤਤਿਯਂ ਯਾਚਾਪੇਤ੍ਵਾ ਅਪਲੋਕਨਕਮ੍ਮੇਨੇਵ ਓਸਾਰੇਤਬ੍ਬੋ. ਏਵਂ ਪਨ ਓਸਾਰੇਤਬ੍ਬੋ, ਸਙ੍ਘਮਜ੍ਝੇ ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –

‘‘ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ – ਅਯਂ ਇਤ੍ਥਨ੍ਨਾਮੋ ਸਾਮਣੇਰੋ ਬੁਦ੍ਧਸ੍ਸ ਧਮ੍ਮਸ੍ਸ ਸਙ੍ਘਸ੍ਸ ਅਵਣ੍ਣਵਾਦੀ ਮਿਚ੍ਛਾਦਿਟ੍ਠਿਕੋ, ਯਂ ਅਞ੍ਞੇ ਸਾਮਣੇਰਾ ਲਭਨ੍ਤਿ, ਭਿਕ੍ਖੂਹਿ ਸਦ੍ਧਿਂ ਦਿਰਤ੍ਤਤਿਰਤ੍ਤਂ ਸਹਸੇਯ੍ਯਂ, ਤਸ੍ਸ ਅਲਾਭਾਯ ਨਿਸ੍ਸਾਰਿਤੋ, ਸ੍ਵਾਯਂ ਇਦਾਨਿ ਸੋਰਤੋ ਨਿਵਾਤਵੁਤ੍ਤਿ ਲਜ੍ਜਿਧਮ੍ਮਂ ਓਕ੍ਕਨ੍ਤੋ ਹਿਰੋਤ੍ਤਪ੍ਪੇ ਪਤਿਟ੍ਠਿਤੋ ਕਤਦਣ੍ਡਕਮ੍ਮੋ ਅਚ੍ਚਯਂ ਦੇਸੇਤਿ, ਇਮਸ੍ਸ ਸਾਮਣੇਰਸ੍ਸ ਯਥਾ ਪੁਰੇ ਕਾਯਸਮ੍ਭੋਗਸਾਮਗ੍ਗਿਦਾਨਂ ਰੁਚ੍ਚਤਿ ਸਙ੍ਘਸ੍ਸਾ’’ਤਿ.

ਏਵਂ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਏਵਂ ਅਪਲੋਕਨਕਮ੍ਮਂ ਓਸਾਰਣਞ੍ਚ ਨਿਸ੍ਸਾਰਣਞ੍ਚ ਗਚ੍ਛਤਿ. ਭਣ੍ਡੁਕਮ੍ਮਂ ਮਹਾਖਨ੍ਧਕਵਣ੍ਣਨਾਯਂ ਵੁਤ੍ਤਮੇਵ. ਬ੍ਰਹ੍ਮਦਣ੍ਡੋ ਪਞ੍ਚਸਤਿਕਕ੍ਖਨ੍ਧਕੇ ਵੁਤ੍ਤੋਯੇਵ. ਨ ਕੇਵਲਂ ਪਨੇਸ ਛਨ੍ਨਸ੍ਸੇਵ ਪਞ੍ਞਤ੍ਤੋ, ਯੋ ਅਞ੍ਞੋਪਿ ਭਿਕ੍ਖੁ ਮੁਖਰੋ ਹੋਤਿ, ਭਿਕ੍ਖੂ ਦੁਰੁਤ੍ਤਵਚਨੇਹਿ ਘਟ੍ਟੇਨ੍ਤੋ ਖੁਂਸੇਨ੍ਤੋ ਵਮ੍ਭੇਨ੍ਤੋ ਵਿਹਰਤਿ, ਤਸ੍ਸਪਿ ਦਾਤਬ੍ਬੋ. ਏਵਞ੍ਚ ਪਨ ਦਾਤਬ੍ਬੋ, ਸਙ੍ਘਮਜ੍ਝੇ ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –

‘‘ਭਨ੍ਤੇ, ਇਤ੍ਥਨ੍ਨਾਮੋ ਭਿਕ੍ਖੁ ਮੁਖਰੋ, ਭਿਕ੍ਖੂ ਦੁਰੁਤ੍ਤਵਚਨੇਹਿ ਘਟ੍ਟੇਨ੍ਤੋ ਵਿਹਰਤਿ. ਸੋ ਭਿਕ੍ਖੁ ਯਂ ਇਚ੍ਛੇਯ੍ਯ, ਤਂ ਵਦੇਯ੍ਯ. ਭਿਕ੍ਖੂਹਿ ਇਤ੍ਥਨ੍ਨਾਮੋ ਭਿਕ੍ਖੁ ਨੇਵ ਵਤ੍ਤਬ੍ਬੋ, ਨ ਓਵਦਿਤਬ੍ਬੋ, ਨ ਅਨੁਸਾਸਿਤਬ੍ਬੋ. ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ – ‘ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਦਾਨਂ, ਰੁਚ੍ਚਤਿ ਸਙ੍ਘਸ੍ਸਾ’ਤਿ. ਦੁਤਿਯਮ੍ਪਿ ਪੁਚ੍ਛਾਮਿ, ਤਤਿਯਮ੍ਪਿ ਪੁਚ੍ਛਾਮਿ – ‘ਇਤ੍ਥਨ੍ਨਾਮਸ੍ਸ, ਭਨ੍ਤੇ, ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਦਾਨਂ, ਰੁਚ੍ਚਤਿ ਸਙ੍ਘਸ੍ਸਾ’’’ਤਿ.

ਤਸ੍ਸ ਅਪਰੇਨ ਸਮਯੇਨ ਸਮ੍ਮਾ ਵਤ੍ਤਿਤ੍ਵਾ ਖਮਾਪੇਨ੍ਤਸ੍ਸ ਬ੍ਰਹ੍ਮਦਣ੍ਡੋ ਪਟਿਪ੍ਪਸ੍ਸਮ੍ਭੇਤਬ੍ਬੋ. ਏਵਞ੍ਚ ਪਨ ਪਟਿਪ੍ਪਸ੍ਸਮ੍ਭੇਤਬ੍ਬੋ, ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਮਜ੍ਝੇ ਸਾਵੇਤਬ੍ਬਂ –

‘‘ਭਨ੍ਤੇ, ਭਿਕ੍ਖੁਸਙ੍ਘੋ ਅਸੁਕਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਂ ਅਦਾਸਿ, ਸੋ ਭਿਕ੍ਖੁ ਸੋਰਤੋ ਨਿਵਾਤਵੁਤ੍ਤਿ ਲਜ੍ਜਿਧਮ੍ਮਂ ਓਕ੍ਕਨ੍ਤੋ ਹਿਰੋਤ੍ਤਪ੍ਪੇ ਪਤਿਟ੍ਠਿਤੋ, ਪਟਿਸਙ੍ਖਾ ਆਯਤਿਂ ਸਂਵਰੇ ਤਿਟ੍ਠਤਿ, ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ, ਤਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਪਟਿਪ੍ਪਸ੍ਸਦ੍ਧਿ, ਰੁਚ੍ਚਤਿ ਸਙ੍ਘਸ੍ਸਾ’’ਤਿ.

ਏਵਂ ਯਾਵਤਤਿਯਂ ਵਤ੍ਵਾ ਅਪਲੋਕਨਕਮ੍ਮੇਨੇਵ ਬ੍ਰਹ੍ਮਦਣ੍ਡੋ ਪਟਿਪ੍ਪਸ੍ਸਮ੍ਭੇਤਬ੍ਬੋਤਿ.

ਕਮ੍ਮਲਕ੍ਖਣਞ੍ਞੇਵ ਪਞ੍ਚਮਨ੍ਤਿ ਯਂ ਤਂ ਭਗਵਤਾ ਭਿਕ੍ਖੁਨਿਕ੍ਖਨ੍ਧਕੇ ‘‘ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਨਿਯੋ ਕਦ੍ਦਮੋਦਕੇਨ ਓਸਿਞ੍ਚਨ੍ਤਿ, ‘ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁ’ਨ੍ਤਿ, ਕਾਯਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਊਰੁਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਅਙ੍ਗਜਾਤਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਭਿਕ੍ਖੁਨਿਯੋ ਓਭਾਸੇਨ੍ਤਿ, ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਨ੍ਤਿ, ‘ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁ’ਨ੍ਤਿ. ਇਮੇਸੁ ਵਤ੍ਥੂਸੁ ਤੇਸਂ ਭਿਕ੍ਖੂਨਂ ਦੁਕ੍ਕਟਂ ਪਞ੍ਞਪੇਤ੍ਵਾ ‘ਅਨੁਜਾਨਾਮਿ ਭਿਕ੍ਖਵੇ ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’ਨ੍ਤਿ. ਅਥ ਖੋ ਭਿਕ੍ਖੁਨੀਨਂ ਏਤਦਹੋਸਿ – ‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ – ‘ਅਵਨ੍ਦਿਯੋ ਸੋ ਭਿਕ੍ਖਵੇ ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋ’’’ਤਿ ਏਵਂ ਅਵਨ੍ਦਿਯਕਮ੍ਮਂ ਅਨੁਞ੍ਞਾਤਂ, ਤਂ ਕਮ੍ਮਲਕ੍ਖਣਞ੍ਞੇਵ ਪਞ੍ਚਮਂ ਇਮਸ੍ਸ ਅਪਲੋਕਨਕਮ੍ਮਸ੍ਸ ਠਾਨਂ ਹੋਤਿ. ਤਸ੍ਸ ਹਿ ਕਮ੍ਮਞ੍ਞੇਵ ਲਕ੍ਖਣਂ, ਨ ਓਸਾਰਣਾਦੀਨਿ; ਤਸ੍ਮਾ ‘‘ਕਮ੍ਮਲਕ੍ਖਣ’’ਨ੍ਤਿ ਵੁਚ੍ਚਤਿ. ਤਸ੍ਸ ਕਰਣਂ ਤਤ੍ਥੇਵ ਵੁਤ੍ਤਂ. ਅਪਿਚ ਨਂ ਪਟਿਪ੍ਪਸ੍ਸਦ੍ਧਿਯਾ ਸਦ੍ਧਿਂ ਵਿਤ੍ਥਾਰਤੋ ਦਸ੍ਸੇਤੁਂ ਇਧਾਪਿ ਵਦਾਮ, ਭਿਕ੍ਖੁਨੁਪਸ੍ਸਯੇ ਸਨ੍ਨਿਪਤਿਤਸ੍ਸ ਭਿਕ੍ਖੁਨਿਸਙ੍ਘਸ੍ਸ ਅਨੁਮਤਿਯਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਸਾਵੇਤਬ੍ਬਂ –

‘‘ਅਯ੍ਯੇ ਅਸੁਕੋ ਨਾਮ ਅਯ੍ਯੋ ਭਿਕ੍ਖੁਨੀਨਂ ਅਪਾਸਾਦਿਕਂ ਦਸ੍ਸੇਤਿ, ਏਤਸ੍ਸ ਅਯ੍ਯਸ੍ਸ ਅਵਨ੍ਦਿਯਕਰਣਂ ਰੁਚ੍ਚਤੀਤਿ ਭਿਕ੍ਖੁਨਿਸਙ੍ਘਂ ਪੁਚ੍ਛਾਮਿ, ਦੁਤਿਯਮ੍ਪਿ… ਤਤਿਯਮ੍ਪਿ ਭਿਕ੍ਖੁਨਿਸਙ੍ਘਂ ਪੁਚ੍ਛਾਮੀ’’ਤਿ.

ਏਵਂ ਤਿਕ੍ਖਤ੍ਤੁਂ ਸਾਵੇਤ੍ਵਾ ਅਪਲੋਕਨਕਮ੍ਮੇਨ ਅਵਨ੍ਦਿਯਕਮ੍ਮਂ ਕਾਤਬ੍ਬਂ.

ਤਤੋ ਪਟ੍ਠਾਯ ਸੋ ਭਿਕ੍ਖੁ ਭਿਕ੍ਖੁਨੀਹਿ ਨ ਵਨ੍ਦਿਤਬ੍ਬੋ. ਸਚੇ ਅਵਨ੍ਦਿਯਮਾਨੋ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਪੇਤ੍ਵਾ ਸਮ੍ਮਾ ਵਤ੍ਤਤਿ, ਤੇਨ ਭਿਕ੍ਖੁਨਿਯੋ ਖਮਾਪੇਤਬ੍ਬਾ. ਖਮਾਪੇਨ੍ਤੇਨ ਭਿਕ੍ਖੁਨੁਪਸ੍ਸਯਂ ਅਗਨ੍ਤ੍ਵਾ ਵਿਹਾਰੇਯੇਵ ਸਙ੍ਘਂ ਵਾ ਗਣਂ ਵਾ ਏਕਂ ਭਿਕ੍ਖੁਂ ਵਾ ਉਪਸਙ੍ਕਮਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਅਹਂ ਭਨ੍ਤੇ ਪਟਿਸਙ੍ਖਾ ਆਯਤਿਂ ਸਂਵਰੇ ਤਿਟ੍ਠਾਮਿ, ਨ ਪੁਨ ਅਪਾਸਾਦਿਕਂ ਦਸ੍ਸੇਸ੍ਸਾਮਿ, ਭਿਕ੍ਖੁਨਿਸਙ੍ਘੋ ਮਯ੍ਹਂ ਖਮਤੂ’’ਤਿ ਖਮਾਪੇਤਬ੍ਬਂ. ਤੇਨ ਸਙ੍ਘੇਨ ਵਾ ਗਣੇਨ ਵਾ ਏਕਂ ਭਿਕ੍ਖੁਂ ਪੇਸੇਤ੍ਵਾ ਏਕਭਿਕ੍ਖੁਨਾ ਵਾ ਸਯਮੇਵ ਗਨ੍ਤ੍ਵਾ ਭਿਕ੍ਖੁਨਿਯੋ ਵਤ੍ਤਬ੍ਬਾ – ‘‘ਅਯਂ ਭਿਕ੍ਖੁ ਪਟਿਸਙ੍ਖਾ ਆਯਤਿਂ ਸਂਵਰੇ ਠਿਤੋ, ਇਮਿਨਾ ਅਚ੍ਚਯਂ ਦੇਸੇਤ੍ਵਾ ਭਿਕ੍ਖੁਨਿਸਙ੍ਘੋ ਖਮਾਪਿਤੋ, ਭਿਕ੍ਖੁਨਿਸਙ੍ਘੋ ਇਮਂ ਵਨ੍ਦਿਯਂ ਕਰੋਤੂ’’ਤਿ. ਸੋ ਵਨ੍ਦਿਯੋ ਕਾਤਬ੍ਬੋ. ਏਵਞ੍ਚ ਪਨ ਕਾਤਬ੍ਬੋ, ਭਿਕ੍ਖੁਨੁਪਸ੍ਸਯੇ ਸਨ੍ਨਿਪਤਿਤਸ੍ਸ ਭਿਕ੍ਖੁਨਿਸਙ੍ਘਸ੍ਸ ਅਨੁਮਤਿਯਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਸਾਵੇਤਬ੍ਬਂ –

‘‘ਅਯਂ ਅਯ੍ਯੇ ਅਸੁਕੋ ਨਾਮ ਅਯ੍ਯੋ ਭਿਕ੍ਖੁਨੀਨਂ ਅਪਾਸਾਦਿਕਂ ਦਸ੍ਸੇਤੀਤਿ ਭਿਕ੍ਖੁਨਿਸਙ੍ਘੇਨ ਅਵਨ੍ਦਿਯੋ ਕਤੋ, ਸੋ ਲਜ੍ਜਿਧਮ੍ਮਂ ਓਕ੍ਕਮਿਤ੍ਵਾ ਪਟਿਸਙ੍ਖਾ ਆਯਤਿਂ ਸਂਵਰੇ ਠਿਤੋ ਅਚ੍ਚਯਂ ਦੇਸੇਤ੍ਵਾ ਭਿਕ੍ਖੁਨਿਸਙ੍ਘਂ ਖਮਾਪੇਸਿ, ਤਸ੍ਸ ਅਯ੍ਯਸ੍ਸ ਵਨ੍ਦਿਯਕਰਣਂ ਰੁਚ੍ਚਤੀਤਿ ਭਿਕ੍ਖੁਨਿਸਙ੍ਘਂ ਪੁਚ੍ਛਾਮੀ’’ਤਿ –

ਤਿਕ੍ਖਤ੍ਤੁਂ ਵਤ੍ਤਬ੍ਬਂ ਏਵਂ ਅਪਲੋਕਨਕਮ੍ਮੇਨੇਵ ਵਨ੍ਦਿਯੋ ਕਾਤਬ੍ਬੋ.

ਅਯਂ ਪਨੇਤ੍ਥ ਪਾਲ਼ਿਮੁਤ੍ਤਕੋਪਿ ਕਮ੍ਮਲਕ੍ਖਣਵਿਨਿਚ੍ਛਯੋ. ਇਦਞ੍ਹਿ ਕਮ੍ਮਲਕ੍ਖਣਂ ਨਾਮ ਭਿਕ੍ਖੁਨਿਸਙ੍ਘਮੂਲਕਂ ਪਞ੍ਞਤ੍ਤਂ, ਭਿਕ੍ਖੁਸਙ੍ਘਸ੍ਸਾਪਿ ਪਨੇਤਂ ਲਬ੍ਭਤਿਯੇਵ. ਯਞ੍ਹਿ ਭਿਕ੍ਖੁਸਙ੍ਘੋ ਸਲਾਕਗ੍ਗਯਾਗਗ੍ਗਭਤ੍ਤਗ੍ਗਉਪੋਸਥਗ੍ਗੇਸੁ ਅਪਲੋਕਨਕਮ੍ਮਂ ਕਰੋਤਿ, ਏਤਮ੍ਪਿ ਕਮ੍ਮਲਕ੍ਖਣਮੇਵ. ਅਚ੍ਛਿਨ੍ਨਚੀਵਰਜਿਣ੍ਣਚੀਵਰਨਟ੍ਠਚੀਵਰਾਨਞ੍ਹਿ ਸਙ੍ਘਂ ਸਨ੍ਨਿਪਾਤੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਯਾਵਤਤਿਯਂ ਸਾਵੇਤ੍ਵਾ ਅਪਲੋਕਨਕਮ੍ਮਂ ਕਤ੍ਵਾ ਚੀਵਰਂ ਦਾਤੁਂ ਵਟ੍ਟਤਿ. ਅਪ੍ਪਮਤ੍ਤਕਵਿਸ੍ਸਜ੍ਜਕੇਨ ਪਨ ਚੀਵਰਂ ਕਰੋਨ੍ਤਸ੍ਸ ਸੇਨਾਸਨਕ੍ਖਨ੍ਧਕਵਣ੍ਣਨਾਯਂ ਵੁਤ੍ਤਪ੍ਪਭੇਦਾਨਿ ਸੂਚਿਆਦੀਨਿ ਅਨਪਲੋਕੇਤ੍ਵਾਪਿ ਦਾਤਬ੍ਬਾਨਿ. ਤੇਸਂ ਦਾਨੇ ਸੋਯੇਵ ਇਸ੍ਸਰੋ, ਤਤੋ ਅਤਿਰੇਕਂ ਦੇਨ੍ਤੇਨ ਅਪਲੋਕੇਤ੍ਵਾ ਦਾਤਬ੍ਬਂ. ਤਤੋ ਹਿ ਅਤਿਰੇਕਦਾਨੇ ਸਙ੍ਘੋ ਸਾਮੀ. ਗਿਲਾਨਭੇਸਜ੍ਜਮ੍ਪਿ ਤਤ੍ਥ ਵੁਤ੍ਤਪ੍ਪਕਾਰਂ ਸਯਮੇਵ ਦਾਤਬ੍ਬਂ. ਅਤਿਰੇਕਂ ਇਚ੍ਛਨ੍ਤਸ੍ਸ ਅਪਲੋਕੇਤ੍ਵਾ ਦਾਤਬ੍ਬਂ. ਯੋਪਿ ਚ ਦੁਬ੍ਬਲੋ ਵਾ ਛਿਨ੍ਨਿਰਿਯਾਪਥੋ ਵਾ ਪਚ੍ਛਿਨ੍ਨਭਿਕ੍ਖਾਚਾਰਪਥੋ ਵਾ ਮਹਾਗਿਲਾਨੋ, ਤਸ੍ਸ ਮਹਾਵਾਸੇਸੁ ਤਤ੍ਰੁਪ੍ਪਾਦਤੋ ਦੇਵਸਿਕਂ ਨਾਲ਼ਿ ਵਾ ਉਪਡ੍ਢਨਾਲ਼ਿ ਵਾ ਏਕਦਿਵਸਂਯੇਵ ਵਾ ਪਞ੍ਚ ਵਾ ਦਸ ਵਾ ਤਣ੍ਡੁਲਨਾਲ਼ਿਯੋ ਦੇਨ੍ਤੇਨ ਅਪਲੋਕਨਕਮ੍ਮਂ ਕਤ੍ਵਾਵ ਦਾਤਬ੍ਬਾ. ਪੇਸਲਸ੍ਸ ਭਿਕ੍ਖੁਨੋ ਤਤ੍ਰੁਪ੍ਪਾਦਤੋ ਇਣਪਲਿਬੋਧਮ੍ਪਿ ਬਹੁਸ੍ਸੁਤਸ੍ਸ ਸਙ੍ਘਭਾਰਨਿਤ੍ਥਾਰਕਸ੍ਸ ਭਿਕ੍ਖੁਨੋ ਅਨੁਟ੍ਠਾਪਨੀਯਸੇਨਾਸਨਮ੍ਪਿ ਸਙ੍ਘਕਿਚ੍ਚਂ ਕਰੋਨ੍ਤਾਨਂ ਕਪ੍ਪਿਯਕਾਰਕਾਦੀਨਂ ਭਤ੍ਤਵੇਤਨਮ੍ਪਿ ਅਪਲੋਕਨਕਮ੍ਮੇਨ ਦਾਤੁਂ ਵਟ੍ਟਤਿ.

ਚਤੁਪਚ੍ਚਯਵਸੇਨ ਦਿਨ੍ਨਤਤ੍ਰੁਪ੍ਪਾਦਤੋ ਸਙ੍ਘਿਕਂ ਆਵਾਸਂ ਜਗ੍ਗਾਪੇਤੁਂ ਵਟ੍ਟਤਿ. ‘‘ਅਯਂ ਭਿਕ੍ਖੁ ਇਸ੍ਸਰਵਤਾਯ ਵਿਚਾਰੇਤੀ’’ਤਿ ਕਥਾਪਚ੍ਛਿਨ੍ਦਨਤ੍ਥਂ ਪਨ ਸਲਾਕਗ੍ਗਾਦੀਸੁ ਵਾ ਅਨ੍ਤਰਸਨ੍ਨਿਪਾਤੇ ਵਾ ਸਙ੍ਘਂ ਪੁਚ੍ਛਿਤ੍ਵਾਵ ਜਗ੍ਗਾਪੇਤਬ੍ਬੋ. ਚੀਵਰਪਿਣ੍ਡਪਾਤਤ੍ਥਾਯ ਓਦਿਸ੍ਸਦਿਨ੍ਨਤਤ੍ਰੁਪ੍ਪਾਦਤੋਪਿ ਅਪਲੋਕੇਤ੍ਵਾ ਆਵਾਸੋ ਜਗ੍ਗਾਪੇਤਬ੍ਬੋ. ਅਨਪਲੋਕੇਤ੍ਵਾਪਿ ਵਟ੍ਟਤਿ. ‘‘ਸੂਰੋ ਵਤਾਯਂ ਭਿਕ੍ਖੁ ਚੀਵਰਪਿਣ੍ਡਪਾਤਤ੍ਥਾਯ ਦਿਨ੍ਨਤੋ ਆਵਾਸਂ ਜਗ੍ਗਾਪੇਤੀ’’ਤਿ ਏਵਂ ਉਪ੍ਪਨ੍ਨਕਥਾਪਚ੍ਛੇਦਨਤ੍ਥਂ ਪਨ ਅਪਲੋਕਨਕਮ੍ਮਮੇਵ ਕਤ੍ਵਾ ਜਗ੍ਗਾਪੇਤਬ੍ਬੋ.

ਚੇਤਿਯੇ ਛਤ੍ਤਂ ਵਾ ਵੇਦਿਕਂ ਵਾ ਬੋਧਿਘਰਂ ਵਾ ਆਸਨਘਰਂ ਵਾ ਅਕਤਂ ਵਾ ਕਰੋਨ੍ਤੇਨ ਜਿਣ੍ਣਂ ਵਾ ਪਟਿਸਙ੍ਖਰੋਨ੍ਤੇਨ ਸੁਧਾਕਮ੍ਮਂ ਵਾ ਕਰੋਨ੍ਤੇਨ ਮਨੁਸ੍ਸੇ ਸਮਾਦਪੇਤ੍ਵਾ ਕਾਤੁਂ ਵਟ੍ਟਤਿ. ਸਚੇ ਕਾਰਕੋ ਨਤ੍ਥਿ, ਚੇਤਿਯਸ੍ਸ ਉਪਨਿਕ੍ਖੇਪਤੋ ਕਾਰੇਤਬ੍ਬਂ. ਉਪਨਿਕ੍ਖੇਪੇਪਿ ਅਸਤਿ ਅਪਲੋਕਨਕਮ੍ਮਂ ਕਤ੍ਵਾ ਤਤ੍ਰੁਪ੍ਪਾਦਤੋ ਕਾਰੇਤਬ੍ਬਂ, ਸਙ੍ਘਿਕੇਨਪਿ. ਸਙ੍ਘਿਕੇਨ ਹਿ ਅਪਲੋਕੇਤ੍ਵਾ ਚੇਤਿਯਕਿਚ੍ਚਂ ਕਾਤੁਂ ਵਟ੍ਟਤਿ. ਚੇਤਿਯਸ੍ਸ ਸਨ੍ਤਕੇਨ ਅਪਲੋਕੇਤ੍ਵਾਪਿ ਸਙ੍ਘਿਕਕਿਚ੍ਚਂ ਕਾਤੁਂ ਨ ਵਟ੍ਟਤਿ. ਤਾਵਕਾਲਿਕਂ ਪਨ ਗਹੇਤ੍ਵਾ ਪਾਕਤਿਕਂ ਕਾਤੁਂ ਵਟ੍ਟਤਿ.

ਚੇਤਿਯੇ ਸੁਧਾਕਮ੍ਮਾਦੀਨਿ ਕਰੋਨ੍ਤੇਹਿ ਪਨ ਭਿਕ੍ਖਾਚਾਰਤੋ ਵਾ ਸਙ੍ਘਤੋ ਵਾ ਯਾਪਨਮਤ੍ਤਂ ਅਲਭਨ੍ਤੇਹਿ ਚੇਤਿਯਸਨ੍ਤਕਤੋ ਯਾਪਨਮਤ੍ਤਂ ਗਹੇਤ੍ਵਾ ਪਰਿਭੁਞ੍ਜਨ੍ਤੇਹਿ ਵਤ੍ਤਂ ਕਾਤੁਂ ਵਟ੍ਟਤਿ, ‘‘ਵਤ੍ਤਂ ਕਰੋਮਾ’’ਤਿ ਮਚ੍ਛਮਂਸਾਦੀਹਿ ਸਙ੍ਘਭਤ੍ਤਂ ਕਾਤੁਂ ਨ ਵਟ੍ਟਤਿ. ਯੇ ਵਿਹਾਰੇ ਰੋਪਿਤਾ ਫਲਰੁਕ੍ਖਾ ਸਙ੍ਘੇਨ ਪਰਿਗ੍ਗਹਿਤਾ ਹੋਨ੍ਤਿ, ਜਗ੍ਗਨਕਮ੍ਮਂ ਲਭਨ੍ਤਿ, ਯੇਸਂ ਫਲਾਨਿ ਘਣ੍ਟਿਂ ਪਹਰਿਤ੍ਵਾ ਭਾਜੇਤ੍ਵਾ ਪਰਿਭੁਞ੍ਜਨ੍ਤਿ, ਤੇਸੁ ਅਪਲੋਕਨਕਮ੍ਮਂ ਨ ਕਾਤਬ੍ਬਂ. ਯੇ ਪਨ ਅਪਰਿਗ੍ਗਹਿਤਾ, ਤੇਸੁ ਅਪਲੋਕਨਕਮ੍ਮਂ ਕਾਤਬ੍ਬਂ. ਤਂ ਪਨ ਸਲਾਕਗ੍ਗਯਾਗਗ੍ਗਭਤ੍ਤਗ੍ਗਅਨ੍ਤਰਸਨ੍ਨਿਪਾਤੇਸੁਪਿ ਕਾਤੁਂ ਵਟ੍ਟਤਿ, ਉਪੋਸਥਗ੍ਗੇ ਪਨ ਵਟ੍ਟਤਿਯੇਵ. ਤਤ੍ਥ ਹਿ ਅਨਾਗਤਾਨਮ੍ਪਿ ਛਨ੍ਦਪਾਰਿਸੁਦ੍ਧਿ ਆਹਰਿਯਤਿ, ਤਸ੍ਮਾ ਤਂ ਸੁਵਿਸੋਧਿਤਂ ਹੋਤਿ.

ਏਵਞ੍ਚ ਪਨ ਕਾਤਬ੍ਬਂ, ਬ੍ਯਤ੍ਤੇਨ ਭਿਕ੍ਖੁਨਾ ਭਿਕ੍ਖੁਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –

‘‘ਭਨ੍ਤੇ, ਯਂ ਇਮਸ੍ਮਿਂ ਵਿਹਾਰੇ ਅਨ੍ਤੋਸੀਮਾਯ ਸਙ੍ਘਸਨ੍ਤਕਂ ਮੂਲਤਚਪਤ੍ਤਅਙ੍ਕੁਰਪੁਪ੍ਫਫਲਖਾਦਨੀਯਾਦਿ ਅਤ੍ਥਿ, ਤਂ ਸਬ੍ਬਂ ਆਗਤਾਗਤਾਨਂ ਭਿਕ੍ਖੂਨਂ ਯਥਾਸੁਖਂ ਪਰਿਭੁਞ੍ਜਿਤੁਂ ਰੁਚ੍ਚਤੀਤਿ ਸਙ੍ਘਂ ਪੁਚ੍ਛਾਮੀ’’ਤਿ ਤਿਕ੍ਖਤ੍ਤੁਂ ਪੁਚ੍ਛਿਤਬ੍ਬਂ.

ਚਤੂਹਿ ਪਞ੍ਚਹਿ ਭਿਕ੍ਖੂਹਿ ਕਤਂ ਸੁਕਤਮੇਵ. ਯਸ੍ਮਿਂ ਵਿਹਾਰੇ ਦ੍ਵੇ ਤਯੋ ਜਨਾ ਵਸਨ੍ਤਿ, ਤੇਹਿ ਨਿਸੀਦਿਤ੍ਵਾ ਕਤਮ੍ਪਿ ਸਙ੍ਘੇਨ ਕਤਸਦਿਸਮੇਵ. ਯਸ੍ਮਿਂ ਪਨ ਵਿਹਾਰੇ ਏਕੋ ਭਿਕ੍ਖੁ ਹੋਤਿ, ਤੇਨ ਭਿਕ੍ਖੁਨਾ ਉਪੋਸਥਦਿਵਸੇ ਪੁਬ੍ਬਕਰਣਪੁਬ੍ਬਕਿਚ੍ਚਂ ਕਤ੍ਵਾ ਨਿਸਿਨ੍ਨੇਨ ਕਤਮ੍ਪਿ ਕਤਿਕਵਤ੍ਤਂ ਸਙ੍ਘੇਨ ਕਤਸਦਿਸਮੇਵ ਹੋਤਿ.

ਕਰੋਨ੍ਤੇਨ ਪਨ ਫਲਵਾਰੇਨ ਕਾਤੁਮ੍ਪਿ ਚਤ੍ਤਾਰੋ ਮਾਸੇ ਛ ਮਾਸੇ ਏਕਸਂਵਚ੍ਛਰਨ੍ਤਿ ਏਵਂ ਪਰਿਚ੍ਛਿਨ੍ਦਿਤ੍ਵਾਪਿ ਅਪਰਿਚ੍ਛਿਨ੍ਦਿਤ੍ਵਾਪਿ ਕਾਤੁਂ ਵਟ੍ਟਤਿ. ਪਰਿਚ੍ਛਿਨ੍ਨੇ ਯਥਾਪਰਿਚ੍ਛੇਦਂ ਪਰਿਭੁਞ੍ਜਿਤ੍ਵਾ ਪੁਨ ਕਾਤਬ੍ਬਂ. ਅਪਰਿਚ੍ਛਿਨ੍ਨੇ ਯਾਵ ਰੁਕ੍ਖਾ ਧਰਨ੍ਤਿ ਤਾਵ ਵਟ੍ਟਤਿਯੇਵ. ਯੇਪਿ ਤੇਸਂ ਰੁਕ੍ਖਾਨਂ ਬੀਜੇਹਿ ਅਞ੍ਞੇ ਰੁਕ੍ਖਾ ਰੋਪਿਤਾ ਹੋਨ੍ਤਿ, ਤੇਸਮ੍ਪਿ ਸਾ ਏਵ ਕਤਿਕਾ.

ਸਚੇ ਪਨ ਅਞ੍ਞਸ੍ਮਿਂ ਵਿਹਾਰੇ ਰੋਪਿਤਾ ਹੋਨ੍ਤਿ, ਤੇਸਂ ਯਤ੍ਥ ਰੋਪਿਤਾ, ਤਸ੍ਮਿਂਯੇਵ ਵਿਹਾਰੇ ਸਙ੍ਘੋ ਸਾਮੀ. ਯੇਪਿ ਅਞ੍ਞਤੋ ਬੀਜਾਨਿ ਆਹਰਿਤ੍ਵਾ ਪੁਰਿਮਵਿਹਾਰੇ ਪਚ੍ਛਾ ਰੋਪਿਤਾ, ਤੇਸੁ ਅਞ੍ਞਾ ਕਤਿਕਾ ਕਾਤਬ੍ਬਾ. ਕਤਿਕਾਯ ਕਤਾਯ ਪੁਗ੍ਗਲਿਕਟ੍ਠਾਨੇ ਤਿਟ੍ਠਨ੍ਤਿ, ਯਥਾਸੁਖਂ ਫਲਾਦੀਨਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਚੇ ਪਨੇਤ੍ਥ ਤਂ ਤਂ ਓਕਾਸਂ ਪਰਿਕ੍ਖਿਪਿਤ੍ਵਾ ਪਰਿਵੇਣਾਨਿ ਕਤ੍ਵਾ ਜਗ੍ਗਨ੍ਤਿ, ਤੇਸਂ ਭਿਕ੍ਖੂਨਂ ਪੁਗ੍ਗਲਿਕਟ੍ਠਾਨੇ ਤਿਟ੍ਠਨ੍ਤਿ. ਅਞ੍ਞੇ ਪਰਿਭੁਞ੍ਜਿਤੁਂ ਨ ਲਭਨ੍ਤਿ, ਤੇਹਿ ਪਨ ਸਙ੍ਘਸ੍ਸ ਦਸਭਾਗਂ ਦਤ੍ਵਾ ਪਰਿਭੁਞ੍ਜਿਤਬ੍ਬਾਨਿ. ਯੋਪਿ ਮਜ੍ਝੇਵਿਹਾਰੇ ਰੁਕ੍ਖਂ ਸਾਖਾਹਿ ਪਰਿਵਾਰੇਤ੍ਵਾ ਰਕ੍ਖਤਿ, ਤਸ੍ਸਾਪਿ ਏਸੇਵ ਨਯੋ.

ਪੋਰਾਣਵਿਹਾਰਂ ਗਤਸ੍ਸ ਸਮ੍ਭਾਵਨੀਯਭਿਕ੍ਖੁਨੋ ‘‘ਥੇਰੋ ਆਗਤੋ’’ਤਿ ਫਲਾਫਲਂ ਆਹਰਨ੍ਤਿ, ਸਚੇ ਤਤ੍ਥ ਮੂਲੇ ਸਬ੍ਬਪਰਿਯਤ੍ਤਿਧਰੋ ਬਹੁਸ੍ਸੁਤਭਿਕ੍ਖੁ ਵਿਹਾਸਿ, ‘‘ਅਦ੍ਧਾ ਏਤ੍ਥ ਦੀਘਾ ਕਤਿਕਾ ਕਤਾ ਭਵਿਸ੍ਸਤੀ’’ਤਿ ਨਿਕ੍ਕੁਕ੍ਕੁਚ੍ਚੇਨ ਪਰਿਭੁਞ੍ਜਿਤਬ੍ਬਂ. ਵਿਹਾਰੇ ਫਲਾਫਲਂ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ, ਧੁਤਙ੍ਗਂ ਨ ਕੋਪੇਤਿ. ਸਾਮਣੇਰਾ ਅਤ੍ਤਨੋ ਆਚਰਿਯੁਪਜ੍ਝਾਯਾਨਂ ਬਹੂਨਿ ਫਲਾਨਿ ਦੇਨ੍ਤਿ, ਅਞ੍ਞੇ ਭਿਕ੍ਖੂ ਅਲਭਨ੍ਤਾ ਖਿਯ੍ਯਨ੍ਤਿ, ਖਿਯ੍ਯਨਮਤ੍ਤਮੇਵ ਚੇਤਂ ਹੋਤਿ.

ਸਚੇ ਪਨ ਦੁਬ੍ਭਿਕ੍ਖਂ ਹੋਤਿ, ਏਕਂ ਪਨਸਰੁਕ੍ਖਂ ਨਿਸ੍ਸਾਯ ਸਟ੍ਠਿਪਿ ਜਨਾ ਜੀਵਨ੍ਤਿ, ਤਾਦਿਸੇ ਕਾਲੇ ਸਬ੍ਬੇਸਂ ਸਙ੍ਗਹਕਰਣਤ੍ਥਾਯ ਭਾਜੇਤ੍ਵਾ ਖਾਦਿਤਬ੍ਬਂ, ਅਯਂ ਸਾਮੀਚਿ. ਯਾਵ ਪਨ ਕਤਿਕਵਤ੍ਤਂ ਨ ਪਟਿਪ੍ਪਸ੍ਸਮ੍ਭਤਿ, ਤਾਵ ਤੇਹਿ ਖਾਯਿਤਂ ਸੁਖਾਯਿਤਮੇਵ. ਕਦਾ ਪਨ ਕਤਿਕਵਤ੍ਤਂ ਪਟਿਪ੍ਪਸ੍ਸਮ੍ਭਤਿ? ਯਦਾ ਸਮਗ੍ਗੋ ਸਙ੍ਘੋ ਸਨ੍ਨਿਪਤਿਤ੍ਵਾ ‘‘ਇਤੋ ਪਟ੍ਠਾਯ ਭਾਜੇਤ੍ਵਾ ਖਾਦਨ੍ਤੂ’’ਤਿ ਸਾਵੇਤਿ. ਏਕਭਿਕ੍ਖੁਕੇ ਪਨ ਵਿਹਾਰੇ ਏਕੇਨ ਸਾਵਿਤੇਪਿ ਪੁਰਿਮਕਤਿਕਾ ਪਟਿਪ੍ਪਸ੍ਸਮ੍ਭਤਿਯੇਵ. ਸਚੇ ਪਟਿਪ੍ਪਸ੍ਸਦ੍ਧਾਯ ਕਤਿਕਾਯ ਸਾਮਣੇਰਾ ਨੇਵ ਰੁਕ੍ਖਤੋ ਪਾਤੇਨ੍ਤਿ, ਨ ਭੂਮਿਤੋ ਗਹੇਤ੍ਵਾ ਭਿਕ੍ਖੂਨਂ ਦੇਨ੍ਤਿ, ਪਤਿਤਫਲਾਨਿ ਪਾਦੇਹਿ ਪਹਰਨ੍ਤਾ ਵਿਚਰਨ੍ਤਿ, ਤੇਸਂ ਦਸਭਾਗਤੋ ਪਟ੍ਠਾਯ ਯਾਵ ਉਪਡ੍ਢਫਲਭਾਗੇਨ ਫਾਤਿਕਮ੍ਮਂ ਕਾਤਬ੍ਬਂ. ਅਦ੍ਧਾ ਫਾਤਿਕਮ੍ਮਲੋਭੇਨ ਆਹਰਿਤ੍ਵਾ ਦਸ੍ਸਨ੍ਤਿ. ਪੁਨ ਸੁਭਿਕ੍ਖੇ ਜਾਤੇ ਕਪ੍ਪਿਯਕਾਰਕੇਸੁ ਆਗਨ੍ਤ੍ਵਾ ਸਾਖਾਪਰਿਵਾਰਾਦੀਨਿ ਕਤ੍ਵਾ ਰੁਕ੍ਖੇ ਰਕ੍ਖਨ੍ਤੇਸੁ ਸਾਮਣੇਰਾਨਂ ਫਾਤਿਕਮ੍ਮਂ ਨ ਦਾਤਬ੍ਬਂ, ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ.

‘‘ਵਿਹਾਰੇ ਫਲਾਫਲਂ ਅਤ੍ਥੀ’’ਤਿ ਸਾਮਨ੍ਤਗਾਮੇਹਿ ਮਨੁਸ੍ਸਾ ਗਿਲਾਨਾਨਂ ਵਾ ਗਬ੍ਭਿਨੀਨਂ ਵਾ ਅਤ੍ਥਾਯ ਆਗਨ੍ਤ੍ਵਾ ‘‘ਏਕਂ ਨਾਲ਼ਿਕੇਰਂ ਦੇਥ, ਅਮ੍ਬਂ ਦੇਥ, ਲਬੁਜਂ ਦੇਥਾ’’ਤਿ ਯਾਚਨ੍ਤਿ, ਦਾਤਬ੍ਬਂ ਨ ਦਾਤਬ੍ਬਨ੍ਤਿ? ਦਾਤਬ੍ਬਂ. ਅਦੀਯਮਾਨੇ ਹਿ ਤੇ ਦੋਮਨਸ੍ਸਿਕਾ ਹੋਨ੍ਤਿ, ਦੇਨ੍ਤੇਨ ਪਨ ਸਙ੍ਘਂ ਸਨ੍ਨਿਪਾਤੇਤ੍ਵਾ ਯਾਵਤਤਿਯਂ ਸਾਵੇਤ੍ਵਾ ਅਪਲੋਕਨਕਮ੍ਮਂ ਕਤ੍ਵਾਵ ਦਾਤਬ੍ਬਂ, ਕਤਿਕਵਤ੍ਤਂ ਵਾ ਕਤ੍ਵਾ ਠਪੇਤਬ੍ਬਂ, ਏਵਞ੍ਚ ਪਨ ਕਾਤਬ੍ਬਂ, ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –

‘‘ਸਾਮਨ੍ਤਗਾਮੇਹਿ ਮਨੁਸ੍ਸਾ ਆਗਨ੍ਤ੍ਵਾ ਗਿਲਾਨਾਦੀਨਂ ਅਤ੍ਥਾਯ ਫਲਾਫਲਂ ਯਾਚਨ੍ਤਿ, ਦ੍ਵੇ ਨਾਲ਼ਿਕੇਰਾਨਿ, ਦ੍ਵੇ ਤਾਲਫਲਾਨਿ, ਦ੍ਵੇ ਪਨਸਾਨਿ, ਪਞ੍ਚ ਅਮ੍ਬਾਨਿ, ਪਞ੍ਚ ਕਦਲਿਫਲਾਨਿ ਗਣ੍ਹਨ੍ਤਾਨਂ ਅਨਿਵਾਰਣਂ, ਅਸੁਕਰੁਕ੍ਖਤੋ ਚ ਅਸੁਕਰੁਕ੍ਖਤੋ ਚ ਫਲਂ ਗਣ੍ਹਨ੍ਤਾਨਂ ਅਨਿਵਾਰਣਂ ਰੁਚ੍ਚਤਿ ਭਿਕ੍ਖੁਸਙ੍ਘਸ੍ਸਾ’’ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ.

ਤਤੋ ਪਟ੍ਠਾਯ ਗਿਲਾਨਾਦੀਨਂ ਨਾਮਂ ਗਹੇਤ੍ਵਾ ਯਾਚਨ੍ਤਾ ‘‘ਗਣ੍ਹਥਾ’’ਤਿ ਨ ਵਤ੍ਤਬ੍ਬਾ, ਵਤ੍ਤਂ ਪਨ ਆਚਿਕ੍ਖਿਤਬ੍ਬਂ – ‘‘ਨਾਲ਼ਿਕੇਰਾਦੀਨਿ ਇਮਿਨਾ ਨਾਮ ਪਰਿਚ੍ਛੇਦੇਨ ਗਣ੍ਹਨ੍ਤਾਨਂ ਅਸੁਕਰੁਕ੍ਖਤੋ ਚ ਅਸੁਕਰੁਕ੍ਖਤੋ ਚ ਫਲਂ ਗਣ੍ਹਨ੍ਤਾਨਂ ਅਨਿਵਾਰਣਂ ਕਤ’’ਨ੍ਤਿ. ਅਨੁਵਿਚਰਿਤ੍ਵਾ ਪਨ ‘‘ਅਯਂ ਮਧੁਰਫਲੋ ਅਮ੍ਬੋ, ਇਤੋ ਗਣ੍ਹਥਾ’’ਤਿਪਿ ਨ ਵਤ੍ਤਬ੍ਬਾ. ਫਲਭਾਜਨਕਾਲੇ ਪਨ ਆਗਤਾਨਂ ਸਮ੍ਮਤੇਨ ਉਪਡ੍ਢਭਾਗੋ ਦਾਤਬ੍ਬੋ, ਅਸਮ੍ਮਤੇਨ ਅਪਲੋਕੇਤ੍ਵਾ ਦਾਤਬ੍ਬਂ.

ਖੀਣਪਰਿਬ੍ਬਯੋ ਵਾ ਮਗ੍ਗਗਮਿਯਸਤ੍ਥਵਾਹੋ ਵਾ ਅਞ੍ਞੋ ਵਾ ਇਸ੍ਸਰੋ ਆਗਨ੍ਤ੍ਵਾ ਯਾਚਤਿ, ਅਪਲੋਕੇਤ੍ਵਾਵ ਦਾਤਬ੍ਬਂ. ਬਲਕ੍ਕਾਰੇਨ ਗਹੇਤ੍ਵਾ ਖਾਦਨ੍ਤੋ ਨ ਵਾਰੇਤਬ੍ਬੋ. ਕੁਦ੍ਧੋ ਹਿ ਸੋ ਰੁਕ੍ਖੇਪਿ ਛਿਨ੍ਦੇਯ੍ਯ, ਅਞ੍ਞਮ੍ਪਿ ਅਨਤ੍ਥਂ ਕਰੇਯ੍ਯ. ਪੁਗ੍ਗਲਿਕਪਰਿਵੇਣਂ ਆਗਨ੍ਤ੍ਵਾ ਗਿਲਾਨਸ੍ਸ ਗਾਮੇਨ ਯਾਚਨ੍ਤੋ ‘‘ਅਮ੍ਹੇਹਿ ਛਾਯਾਦੀਨਂ ਅਤ੍ਥਾਯ ਰੋਪਿਤਂ, ਸਚੇ ਅਤ੍ਥਿ, ਤੁਮ੍ਹੇ ਜਾਨਾਥਾ’’ਤਿ ਵਤ੍ਤਬ੍ਬੋ. ਯਦਿ ਪਨ ਫਲਭਰਿਤਾਵ ਰੁਕ੍ਖਾ ਹੋਨ੍ਤਿ, ਕਣ੍ਟਕੇ ਬਨ੍ਧਿਤ੍ਵਾ ਫਲਵਾਰੇਨ ਖਾਦਨ੍ਤਿ, ਅਪਚ੍ਚਾਸੀਸਨ੍ਤੇਨ ਹੁਤ੍ਵਾ ਦਾਤਬ੍ਬਂ. ਬਲਕ੍ਕਾਰੇਨ ਗਣ੍ਹਨ੍ਤੋ ਨ ਵਾਰੇਤਬ੍ਬੋ, ਪੁਬ੍ਬੇ ਵੁਤ੍ਤਮੇਵੇਤ੍ਥ ਕਾਰਣਂ.

ਸਙ੍ਘਸ੍ਸ ਫਲਾਰਾਮੋ ਹੋਤਿ, ਪਟਿਜਗ੍ਗਨਂ ਨ ਲਭਤਿ, ਸਚੇ ਤਂ ਕੋਚਿ ਵਤ੍ਤਸੀਸੇਨ ਜਗ੍ਗਤਿ, ਸਙ੍ਘਸ੍ਸੇਵ ਹੋਤਿ. ਅਥਾਪਿ ਕਸ੍ਸਚਿ ਪਟਿਬਲਸ੍ਸ ਭਿਕ੍ਖੁਨੋ ‘‘ਇਮਂ ਸਪ੍ਪੁਰਿਸ ਜਗ੍ਗਿਤ੍ਵਾ ਦੇਹੀ’’ਤਿ ਸਙ੍ਘੋ ਭਾਰਂ ਕਰੋਤਿ, ਸੋ ਚੇ ਵਤ੍ਤਸੀਸੇਨ ਜਗ੍ਗਤਿ, ਏਵਮ੍ਪਿ ਸਙ੍ਘਸ੍ਸੇਵ ਹੋਤਿ. ਫਾਤਿਕਮ੍ਮਂ ਪਚ੍ਚਾਸੀਸਨ੍ਤਸ੍ਸ ਪਨ ਤਤਿਯਭਾਗੇਨ ਵਾ ਉਪਡ੍ਢਭਾਗੇਨ ਵਾ ਫਾਤਿਕਮ੍ਮਂ ਕਾਤਬ੍ਬਂ. ‘‘ਭਾਰਿਯਂ ਕਮ੍ਮ’’ਨ੍ਤਿ ਵਤ੍ਵਾ ਏਤ੍ਤਕੇਨ ਅਨਿਚ੍ਛਨ੍ਤੋ ਪਨ ਸਬ੍ਬਂ ਤਵੇਵ ਸਨ੍ਤਕਂ ਕਤ੍ਵਾ ‘‘ਮੂਲਭਾਗਂ ਦਸਭਾਗਮਤ੍ਤਂ ਦਤ੍ਵਾ ਜਗ੍ਗਾਹੀ’’ਤਿਪਿ ਵਤ੍ਤਬ੍ਬੋ. ਗਰੁਭਣ੍ਡਤ੍ਤਾ ਪਨ ਮੂਲਚ੍ਛੇਜ੍ਜਵਸੇਨ ਨ ਦਾਤਬ੍ਬਂ. ਸੋ ਮੂਲਭਾਗਂ ਦਤ੍ਵਾ ਖਾਦਨ੍ਤੋ ਅਕਤਾਵਾਸਂ ਵਾ ਕਤ੍ਵਾ ਕਤਾਵਾਸਂ ਵਾ ਜਗ੍ਗਿਤ੍ਵਾ ਨਿਸ੍ਸਿਤਕਾਨਂ ਆਰਾਮਂ ਨਿਯ੍ਯਾਦੇਤਿ, ਤੇਹਿਪਿ ਮੂਲਭਾਗੋ ਦਾਤਬ੍ਬੋਵ. ਯਦਾ ਪਨ ਭਿਕ੍ਖੂ ਸਯਂ ਜਗ੍ਗਿਤੁਂ ਪਹੋਨ੍ਤਿ, ਅਥ ਤੇਸਂ ਜਗ੍ਗਿਤੁਞ੍ਚ ਨ ਦਾਤਬ੍ਬਂ, ਜਗ੍ਗਿਤਕਾਲੇ ਚ ਨ ਵਾਰੇਤਬ੍ਬਾ, ਜਗ੍ਗਨਕਾਲੇਯੇਵ ਵਾਰੇਤਬ੍ਬਾ. ‘‘ਬਹੁਂ ਤੁਮ੍ਹੇਹਿ ਖਾਯਿਤਂ, ਇਦਾਨਿ ਮਾ ਜਗ੍ਗਿਤ੍ਥ, ਭਿਕ੍ਖੁਸਙ੍ਘੋਯੇਵ ਜਗ੍ਗਿਸ੍ਸਤੀ’’ਤਿ ਵਤ੍ਤਬ੍ਬਂ.

ਸਚੇ ਪਨ ਨੇਵ ਵਤ੍ਤਸੀਸੇਨ ਜਗ੍ਗਨ੍ਤੋ ਅਤ੍ਥਿ, ਨ ਫਾਤਿਕਮ੍ਮੇਨ, ਨ ਸਙ੍ਘੋ ਜਗ੍ਗਿਤੁਂ ਪਹੋਤਿ, ਏਕੋ ਅਨਾਪੁਚ੍ਛਿਤ੍ਵਾਵ ਜਗ੍ਗਿਤ੍ਵਾ ਫਾਤਿਕਮ੍ਮਂ ਵਡ੍ਢੇਤ੍ਵਾ ਪਚ੍ਚਾਸੀਸਤਿ, ਅਪਲੋਕਨਕਮ੍ਮੇਨ ਫਾਤਿਕਮ੍ਮਂ ਵਡ੍ਢੇਤ੍ਵਾ ਦਾਤਬ੍ਬਂ. ਇਤਿ ਇਮਂ ਸਬ੍ਬਮ੍ਪਿ ਕਮ੍ਮਲਕ੍ਖਣਮੇਵ ਹੋਤਿ. ਅਪਲੋਕਨਕਮ੍ਮਂ ਇਮਾਨਿ ਪਞ੍ਚ ਠਾਨਾਨਿ ਗਚ੍ਛਤਿ.

ਞਤ੍ਤਿਕਮ੍ਮਟ੍ਠਾਨਭੇਦੇ ਪਨ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਅਨੁਸਿਟ੍ਠੋ ਸੋ ਮਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਆਗਚ੍ਛੇਯ੍ਯਾਤਿ, ਆਗਚ੍ਛਾਹੀਤਿ ਵਤ੍ਤਬ੍ਬੋ’’ਤਿ ਏਵਂ ਉਪਸਮ੍ਪਦਾਪੇਕ੍ਖਸ੍ਸ ਓਸਾਰਣਾ ਓਸਾਰਣਾ ਨਾਮ.

‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਧਮ੍ਮਕਥਿਕੋ ਇਮਸ੍ਸ ਨੇਵ ਸੁਤ੍ਤਂ ਆਗਚ੍ਛਤਿ, ਨੋ ਸੁਤ੍ਤਵਿਭਙ੍ਗੋ, ਸੋ ਅਤ੍ਥਂ ਅਸਲ੍ਲਕ੍ਖੇਤ੍ਵਾ ਬ੍ਯਞ੍ਜਨਚ੍ਛਾਯਾਯ ਅਤ੍ਥਂ ਪਟਿਬਾਹਤਿ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਤ੍ਥਨ੍ਨਾਮਂ ਭਿਕ੍ਖੁਂ ਵੁਟ੍ਠਾਪੇਤ੍ਵਾ ਅਵਸੇਸਾ ਇਮਂ ਅਧਿਕਰਣਂ ਵੂਪਸਮੇਯ੍ਯਾਮਾ’’ਤਿ ਏਵਂ ਉਬ੍ਬਾਹਿਕਾਵਿਨਿਚ੍ਛਯੇ ਧਮ੍ਮਕਥਿਕਸ੍ਸ ਭਿਕ੍ਖੁਨੋ ਨਿਸ੍ਸਾਰਣਾ ਨਿਸ੍ਸਾਰਣਾ ਨਾਮ.

‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਜ੍ਜੁਪੋਸਥੋ ਪਨ੍ਨਰਸੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਉਪੋਸਥਂ ਕਰੇਯ੍ਯਾ’’ਤਿ ਏਵਂ ਉਪੋਸਥਕਮ੍ਮਵਸੇਨ ਠਪਿਤਾ ਞਤ੍ਤਿ ਉਪੋਸਥੋ ਨਾਮ.

‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਜ੍ਜ ਪਵਾਰਣਾ ਪਨ੍ਨਰਸੀ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ ਏਵਂ ਪਵਾਰਣਾਕਮ੍ਮਵਸੇਨ ਠਪਿਤਾ ਞਤ੍ਤਿ ਪਵਾਰਣਾ ਨਾਮ.

‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯ’’ਨ੍ਤਿ. ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯਾ’’ਤਿ. ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛੇਯ੍ਯ’’ਨ੍ਤਿ. ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛੇਯ੍ਯਾ’’ਤਿ. ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਵਿਨਯਂ ਪੁਚ੍ਛੇਯ੍ਯ’’ਨ੍ਤਿ. ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਵਿਨਯਂ ਪੁਚ੍ਛੇਯ੍ਯਾ’’ਤਿ. ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮੇਨ ਵਿਨਯਂ ਪੁਟ੍ਠੋ ਵਿਸ੍ਸਜ੍ਜੇਯ੍ਯ’’ਨ੍ਤਿ. ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮੇਨ ਵਿਨਯਂ ਪੁਟ੍ਠੋ ਵਿਸ੍ਸਜ੍ਜੇਯ੍ਯਾ’’ਤਿ ਏਵਂ ਅਤ੍ਤਾਨਂ ਵਾ ਪਰਂ ਵਾ ਸਮ੍ਮਨ੍ਨਿਤੁਂ ਠਪਿਤਾ ਞਤ੍ਤਿ ਸਮ੍ਮੁਤਿ ਨਾਮ.

‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਙ੍ਘਸ੍ਸ ਨਿਸ੍ਸਟ੍ਠਂ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯਾ’’ਤਿ. ‘‘ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਆਯਸ੍ਮਨ੍ਤਾ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯੁ’’ਨ੍ਤਿ ਏਵਂ ਨਿਸ੍ਸਟ੍ਠਚੀਵਰਪਤ੍ਤਾਦੀਨਂ ਦਾਨਂ ਦਾਨਂ ਨਾਮ.

‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਆਪਤ੍ਤਿਂ ਸਰਤਿ, ਵਿਵਰਤਿ, ਉਤ੍ਤਾਨਿਂ ਕਰੋਤਿ, ਦੇਸੇਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯਨ੍ਤਿ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯ’’ਨ੍ਤਿ. ਤੇਨ ਵਤ੍ਤਬ੍ਬੋ ‘‘ਪਸ੍ਸਸੀ’’ਤਿ. ‘‘ਆਮ ਪਸ੍ਸਾਮੀ’’ਤਿ. ਆਯਤਿਂ ਸਂਵਰੇਯ੍ਯਾਸੀਤਿ ਏਵਂ ਆਪਤ੍ਤਿਪਟਿਗ੍ਗਹੋ ਪਟਿਗ੍ਗਹੋ ਨਾਮ.

‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤਾ ਆਵਾਸਿਕਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਕਾਲ਼ੇ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਂ ਕਾਲ਼ਂ ਅਨੁਵਸੇਯ੍ਯੁਂ, ਆਵਾਸਿਕੇਨ ਭਿਕ੍ਖੁਨਾ ਬ੍ਯਤ੍ਤੇਨ ਪਟਿਬਲੇਨ ਆਵਾਸਿਕਾ ਭਿਕ੍ਖੂ ਞਾਪੇਤਬ੍ਬਾ – ‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤਾ ਆਵਾਸਿਕਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਜੁਣ੍ਹੇ ਪਵਾਰੇਯ੍ਯਾਮਾ’’ਤਿ ਏਵਂ ਕਤਾ ਪਵਾਰਣਾਪਚ੍ਚੁਕ੍ਕਡ੍ਢਨਾ ਪਚ੍ਚੁਕ੍ਕਡ੍ਢਨਾ ਨਾਮ.

ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬਂ, ਸਨ੍ਨਿਪਤਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ ਅਮ੍ਹਾਕਂ ਭਣ੍ਡਨਜਾਤਾਨਂ ਕਲਹਜਾਤਾਨਂ ਵਿਵਾਦਾਪਨ੍ਨਾਨਂ ਵਿਹਰਤਂ ਬਹੁਂ ਅਸ੍ਸਾਮਣਕਂ ਅਜ੍ਝਾਚਿਣ੍ਣਂ ਭਾਸਿਤਪਰਿਕ੍ਕਨ੍ਤਂ. ਸਚੇ ਮਯਂ ਇਮਾਹਿ ਆਪਤ੍ਤੀਹਿ ਅਞ੍ਞਮਞ੍ਞਂ ਕਾਰੇਸ੍ਸਾਮ, ਸਿਯਾਪਿ ਤਂ ਅਧਿਕਰਣਂ ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯ ਭੇਦਾਯ ਸਂਵਤ੍ਤੇਯ੍ਯ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਅਧਿਕਰਣਂ ਤਿਣਵਤ੍ਥਾਰਕੇਨ ਵੂਪਸਮੇਯ੍ਯ ਠਪੇਤ੍ਵਾ ਥੁਲ੍ਲਵਜ੍ਜਂ, ਠਪੇਤ੍ਵਾ ਗਿਹਿਪਟਿਸਯੁਤ੍ਤ’’ਨ੍ਤਿ ਏਵਂ ਤਿਣਵਤ੍ਥਾਰਕਸਮਥੇਨ ਕਤ੍ਵਾ ਸਬ੍ਬਪਠਮਾ ਸਬ੍ਬਸਙ੍ਗਾਹਿਕਞਤ੍ਤਿ ਕਮ੍ਮਲਕ੍ਖਣਂ ਨਾਮ.

ਤਥਾ ਤਤੋ ਪਰਾ ਏਕੇਕਸ੍ਮਿਂ ਪਕ੍ਖੇ ਏਕੇਕਂ ਕਤ੍ਵਾ ਦ੍ਵੇ ਞਤ੍ਤਿਯੋ ਇਤਿ ਯਥਾਵੁਤ੍ਤਪ੍ਪਭੇਦਂ ਓਸਾਰਣਂ ਨਿਸ੍ਸਾਰਣਂ…ਪੇ… ਕਮ੍ਮਲਕ੍ਖਣਞ੍ਞੇਵ ਨਵਮਨ੍ਤਿ ਞਤ੍ਤਿਕਮ੍ਮਂ ਇਮਾਨਿ ਨਵ ਠਾਨਾਨਿ ਗਚ੍ਛਤਿ.

ਞਤ੍ਤਿਦੁਤਿਯਕਮ੍ਮਟ੍ਠਾਨਭੇਦੇ ਪਨ ਵਡ੍ਢਸ੍ਸ ਲਿਚ੍ਛਵਿਨੋ ਪਤ੍ਤਨਿਕ੍ਕੁਜ੍ਜਨਵਸੇਨ ਖਨ੍ਧਕੇ ਵੁਤ੍ਤਾ ਨਿਸ੍ਸਾਰਣਾ. ਤਸ੍ਸੇਵ ਪਤ੍ਤੁਕ੍ਕੁਜ੍ਜਨਵਸੇਨ ਵੁਤ੍ਤਾ ਓਸਾਰਣਾ ਚ ਵੇਦਿਤਬ੍ਬਾ.

ਸੀਮਾਸਮ੍ਮੁਤਿ ਤਿਚੀਵਰੇਨ ਅਵਿਪ੍ਪਵਾਸਸਮ੍ਮੁਤਿ, ਸਨ੍ਥਤਸਮ੍ਮੁਤਿ, ਭਤ੍ਤੁਦ੍ਦੇਸਕ-ਸੇਨਾਸਨਗ੍ਗਾਹਾਪਕ-ਭਣ੍ਡਾਗਾਰਿਕ-ਚੀਵਰਪਟਿਗ੍ਗਾਹਕ-ਚੀਵਰਭਾਜਕ-ਯਾਗੁਭਾਜਕਫਲਭਾਜਕ-ਖਜ੍ਜਭਾਜਕ-ਅਪ੍ਪਮਤ੍ਤਕਵਿਸ੍ਸਜ੍ਜਕ-ਸਾਟਿਯਗ੍ਗਾਹਾਪਕ-ਪਤ੍ਤਗ੍ਗਾਹਾਪਕ-ਆਰਾਮਿਕਪੇਸਕਸਾਮਣੇਰਪੇਸਕਸਮ੍ਮੁਤੀਤਿ ਏਤਾਸਂ ਸਮ੍ਮੁਤੀਨਂ ਵਸੇਨ ਸਮ੍ਮੁਤਿ ਵੇਦਿਤਬ੍ਬਾ. ਕਥਿਨਚੀਵਰਦਾਨਮਤਕਚੀਵਰਦਾਨਵਸੇਨ ਦਾਨਂ ਵੇਦਿਤਬ੍ਬਂ.

ਕਥਿਨੁਦ੍ਧਾਰਵਸੇਨ ਉਦ੍ਧਾਰੋ ਵੇਦਿਤਬ੍ਬੋ. ਕੁਟਿਵਤ੍ਥੁਵਿਹਾਰਵਤ੍ਥੁਦੇਸਨਾਵਸੇਨ ਦੇਸਨਾ ਵੇਦਿਤਬ੍ਬਾ. ਯਾ ਪਨ ਤਿਣਵਤ੍ਥਾਰਕਸਮਥੇ ਸਬ੍ਬਸਙ੍ਗਾਹਿਕਞਤ੍ਤਿਞ੍ਚ ਏਕੇਕਸ੍ਮਿਂ ਪਕ੍ਖੇ ਏਕੇਕਂ ਞਤ੍ਤਿਞ੍ਚਾਤਿ ਤਿਸ੍ਸੋ ਞਤ੍ਤਿਯੋ ਠਪੇਤ੍ਵਾ ਪੁਨ ਏਕਸ੍ਮਿਂ ਪਕ੍ਖੇ ਏਕਾ, ਏਕਸ੍ਮਿਂ ਪਕ੍ਖੇ ਏਕਾਤਿ ਦ੍ਵੇ ਞਤ੍ਤਿਦੁਤਿਯਕਮ੍ਮਵਾਚਾ ਵੁਤ੍ਤਾ, ਤਾਸਂ ਵਸੇਨ ਕਮ੍ਮਲਕ੍ਖਣਂ ਵੇਦਿਤਬ੍ਬਂ. ਇਤਿ ਞਤ੍ਤਿਦੁਤਿਯਕਮ੍ਮਂ ਇਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ.

ਞਤ੍ਤਿਚਤੁਤ੍ਥਕਮ੍ਮਟ੍ਠਾਨਭੇਦੇ ਪਨ ਤਜ੍ਜਨੀਯਕਮ੍ਮਾਦੀਨਂ ਸਤ੍ਤਨ੍ਨਂ ਕਮ੍ਮਾਨਂ ਵਸੇਨ ਨਿਸ੍ਸਾਰਣਾ, ਤੇਸਂਯੇਵ ਚ ਕਮ੍ਮਾਨਂ ਪਟਿਪ੍ਪਸ੍ਸਮ੍ਭਨਵਸੇਨ ਓਸਾਰਣਾ ਵੇਦਿਤਬ੍ਬਾ. ਭਿਕ੍ਖੁਨੋਵਾਦਕਸਮ੍ਮੁਤਿਵਸੇਨ ਸਮ੍ਮੁਤਿ ਵੇਦਿਤਬ੍ਬਾ. ਪਰਿਵਾਸਦਾਨਮਾਨਤ੍ਤਦਾਨਵਸੇਨ ਦਾਨਂ ਵੇਦਿਤਬ੍ਬਂ. ਮੂਲਾਯਪਟਿਕਸ੍ਸਨਕਮ੍ਮਵਸੇਨ ਨਿਗ੍ਗਹੋ ਵੇਦਿਤਬ੍ਬੋ. ‘‘ਉਕ੍ਖਿਤ੍ਤਾਨੁਵਤ੍ਤਿਕਾ ਅਟ੍ਠ, ਯਾਵਤਤਿਯਕਾ ਅਰਿਟ੍ਠੋ ਚਣ੍ਡਕਾਲ਼ੀ ਚ ਇਮੇ ਤੇ ਯਾਵਤਤਿਯਕਾ’’ਤਿ ਇਮਾਸਂ ਏਕਾਦਸਨ੍ਨਂ ਸਮਨੁਭਾਸਨਾਨਂ ਵਸੇਨ ਸਮਨੁਭਾਸਨਾ ਵੇਦਿਤਬ੍ਬਾ. ਉਪਸਮ੍ਪਦਾਕਮ੍ਮਅਬ੍ਭਾਨਕਮ੍ਮਵਸੇਨ ਪਨ ਕਮ੍ਮਲਕ੍ਖਣਂ ਵੇਦਿਤਬ੍ਬਂ. ਇਤਿ ਞਤ੍ਤਿਚਤੁਤ੍ਥਕਮ੍ਮਂ ਇਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ.

੪੯੭. ਇਤਿ ਕਮ੍ਮਾਨਿ ਚ ਕਮ੍ਮਵਿਪਤ੍ਤਿਞ੍ਚ ਵਿਪਤ੍ਤਿਵਿਰਹਿਤਾਨਂ ਕਮ੍ਮਾਨਂ ਠਾਨਪਭੇਦਗਮਨਞ੍ਚ ਦਸ੍ਸੇਤ੍ਵਾ ਇਦਾਨਿ ਤੇਸਂ ਕਮ੍ਮਾਨਂ ਕਾਰਕਸ੍ਸ ਸਙ੍ਘਸ੍ਸ ਪਰਿਚ੍ਛੇਦਂ ਦਸ੍ਸੇਨ੍ਤੋ ਪੁਨ ‘‘ਚਤੁਵਗ੍ਗਕਰਣੇ ਕਮ੍ਮੇ’’ਤਿਆਦਿਮਾਹ. ਤਸ੍ਸਤ੍ਥੋ ਪਰਿਸਤੋ ਕਮ੍ਮਵਿਪਤ੍ਤਿਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ.

ਕਮ੍ਮਵਗ੍ਗਵਣ੍ਣਨਾ ਨਿਟ੍ਠਿਤਾ.

ਅਤ੍ਥਵਸਵਗ੍ਗਾਦਿਵਣ੍ਣਨਾ

੪੯੮. ਇਦਾਨਿ ਯਾਨਿ ਤਾਨਿ ਤੇਸਂ ਕਮ੍ਮਾਨਂ ਵਤ੍ਥੁਭੂਤਾਨਿ ਸਿਕ੍ਖਾਪਦਾਨਿ, ਤੇਸਂ ਪਞ੍ਞਤ੍ਤਿਯਂ ਆਨਿਸਂਸਂ ਦਸ੍ਸੇਤੁਂ ‘‘ਦ੍ਵੇ ਅਤ੍ਥਵਸੇ ਪਟਿਚ੍ਚਾ’’ਤਿਆਦਿ ਆਰਦ੍ਧਂ. ਤਤ੍ਥ ਦਿਟ੍ਠਧਮ੍ਮਿਕਾਨਂ ਵੇਰਾਨਂ ਸਂਵਰਾਯਾਤਿ ਪਾਣਾਤਿਪਾਤਾਦੀਨਂ ਪਞ੍ਚਨ੍ਨਂ ਦਿਟ੍ਠਧਮ੍ਮਿਕਵੇਰਾਨਂ ਸਂਵਰਤ੍ਥਾਯ ਪਿਦਹਨਤ੍ਥਾਯ. ਸਮ੍ਪਰਾਯਿਕਾਨਂ ਵੇਰਾਨਂ ਪਟਿਘਾਤਾਯਾਤਿ ਵਿਪਾਕਦੁਕ੍ਖਸਙ੍ਖਾਤਾਨਂ ਸਮ੍ਪਰਾਯਿਕਵੇਰਾਨਂ ਪਟਿਘਾਤਤ੍ਥਾਯ, ਸਮੁਚ੍ਛੇਦਨਤ੍ਥਾਯ ਅਨੁਪ੍ਪਜ੍ਜਨਤ੍ਥਾਯ. ਦਿਟ੍ਠਧਮ੍ਮਿਕਾਨਂ ਵਜ੍ਜਾਨਂ ਸਂਵਰਾਯਾਤਿ ਤੇਸਂਯੇਵ ਪਞ੍ਚਨ੍ਨਂ ਵੇਰਾਨਂ ਸਂਵਰਤ੍ਥਾਯ. ਸਮ੍ਪਰਾਯਿਕਾਨਂ ਵਜ੍ਜਾਨਨ੍ਤਿ ਤੇਸਂਯੇਵ ਵਿਪਾਕਦੁਕ੍ਖਾਨਂ. ਵਿਪਾਕਦੁਕ੍ਖਾਨੇਵ ਹਿ ਇਧ ਵਜ੍ਜਨੀਯਭਾਵਤੋ ਵਜ੍ਜਾਨੀਤਿ ਵੁਤ੍ਤਾਨਿ. ਦਿਟ੍ਠਧਮ੍ਮਿਕਾਨਂ ਭਯਾਨਨ੍ਤਿ ਗਰਹਾ ਉਪਵਾਦੋ ਤਜ੍ਜਨੀਯਾਦੀਨਿ ਕਮ੍ਮਾਨਿ ਉਪੋਸਥਪਵਾਰਣਾਨਂ ਠਪਨਂ ਅਕਿਤ੍ਤਿਪਕਾਸਨੀਯਕਮ੍ਮਨ੍ਤਿ ਏਤਾਨਿ ਦਿਟ੍ਠਧਮ੍ਮਿਕਭਯਾਨਿ ਨਾਮ, ਏਤੇਸਂ ਸਂਵਰਤ੍ਥਾਯ. ਸਮ੍ਪਰਾਯਿਕਭਯਾਨਿ ਪਨ ਵਿਪਾਕਦੁਕ੍ਖਾਨਿਯੇਵ, ਤੇਸਂ ਪਟਿਘਾਤਤ੍ਥਾਯ. ਦਿਟ੍ਠਧਮ੍ਮਿਕਾਨਂ ਅਕੁਸਲਾਨਨ੍ਤਿ ਪਞ੍ਚਵੇਰਦਸਅਕੁਸਲਕਮ੍ਮਪਥਪ੍ਪਭੇਦਾਨਂ ਅਕੁਸਲਾਨਂ ਸਂਵਰਤ੍ਥਾਯ. ਵਿਪਾਕਦੁਕ੍ਖਾਨੇਵ ਪਨ ਅਕ੍ਖਮਟ੍ਠੇਨ ਸਮ੍ਪਰਾਯਿਕਅਕੁਸਲਾਨੀਤਿ ਵੁਚ੍ਚਨ੍ਤਿ, ਤੇਸਂ ਪਟਿਘਾਤਤ੍ਥਾਯ. ਗਿਹੀਨਂ ਅਨੁਕਮ੍ਪਾਯਾਤਿ ਅਗਾਰਿਕਾਨਂ ਸਦ੍ਧਾਰਕ੍ਖਣਵਸੇਨ ਅਨੁਕਮ੍ਪਨਤ੍ਥਾਯ. ਪਾਪਿਚ੍ਛਾਨਂ ਪਕ੍ਖੁਪਚ੍ਛੇਦਾਯਾਤਿ ਪਾਪਿਚ੍ਛਪੁਗ੍ਗਲਾਨਂ ਗਣਬਨ੍ਧਭੇਦਨਤ੍ਥਾਯ ਗਣਭੋਜਨਸਿਕ੍ਖਾਪਦਂ ਪਞ੍ਞਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਯਞ੍ਹੇਤ੍ਥ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਪਠਮਪਾਰਾਜਿਕਵਣ੍ਣਨਾਯਮੇਵ ਵੁਤ੍ਤਨ੍ਤਿ.

ਸਿਕ੍ਖਾਪਦੇਸੁ ਅਤ੍ਥਵਸੇਨ ਵਣ੍ਣਨਾ ਨਿਟ੍ਠਿਤਾ.

੪੯੯. ਪਾਤਿਮੋਕ੍ਖਾਦੀਸੁ ਪਾਤਿਮੋਕ੍ਖੁਦ੍ਦੇਸੋਤਿ ਭਿਕ੍ਖੂਨਂ ਪਞ੍ਚਵਿਧੋ ਭਿਕ੍ਖੁਨੀਨਂ ਚਤੁਬ੍ਬਿਧੋ. ਪਰਿਵਾਸਦਾਨਾਦੀਸੁ ਓਸਾਰਣੀਯਂ ਪਞ੍ਞਤ੍ਤਨ੍ਤਿ ਅਟ੍ਠਾਰਸਸੁ ਵਾ ਤੇਚਤ੍ਤਾਲੀਸਾਯ ਵਾ ਵਤ੍ਤੇਸੁ ਵਤ੍ਤਮਾਨਸ੍ਸ ਓਸਾਰਣੀਯਂ ਪਞ੍ਞਤ੍ਤਂ. ਯੇਨ ਕਮ੍ਮੇਨ ਓਸਾਰੀਯਤਿ, ਤਂ ਕਮ੍ਮਂ ਪਞ੍ਞਤ੍ਤਨ੍ਤਿ ਅਤ੍ਥੋ. ਨਿਸ੍ਸਾਰਣੀਯਂ ਪਞ੍ਞਤ੍ਤਨ੍ਤਿ ਭਣ੍ਡਨਕਾਰਕਾਦਯੋ ਯੇਨ ਕਮ੍ਮੇਨ ਨਿਸ੍ਸਾਰੀਯਨ੍ਤਿ, ਤਂ ਕਮ੍ਮਂ ਪਞ੍ਞਤ੍ਤਨ੍ਤਿ ਅਤ੍ਥੋ.

੫੦੦. ਅਪਞ੍ਞਤ੍ਤੇਤਿਆਦੀਸੁ ਅਪਞ੍ਞਤ੍ਤੇ ਪਞ੍ਞਤ੍ਤਨ੍ਤਿ ਸਤ੍ਤਾਪਤ੍ਤਿਕ੍ਖਨ੍ਧਾ ਕਕੁਸਨ੍ਧਞ੍ਚ ਸਮ੍ਮਾਸਮ੍ਬੁਦ੍ਧਂ ਕੋਣਾਗਮਨਞ੍ਚ ਕਸ੍ਸਪਞ੍ਚ ਸਮ੍ਮਾਸਮ੍ਬੁਦ੍ਧਂ ਠਪੇਤ੍ਵਾ ਅਨ੍ਤਰਾ ਕੇਨਚਿ ਅਪਞ੍ਞਤ੍ਤੇ ਸਿਕ੍ਖਾਪਦੇ ਪਞ੍ਞਤ੍ਤਂ ਨਾਮ. ਮਕ੍ਕਟਿਵਤ੍ਥੁਆਦਿਵਿਨੀਤਕਥਾ ਸਿਕ੍ਖਾਪਦੇ ਪਞ੍ਞਤ੍ਤੇ ਅਨੁਪਞ੍ਞਤ੍ਤਂ ਨਾਮ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਆਨਿਸਂਸਵਗ੍ਗਵਣ੍ਣਨਾ ਨਿਟ੍ਠਿਤਾ.

੫੦੧. ਇਦਾਨਿ ਸਬ੍ਬਸਿਕ੍ਖਾਪਦਾਨਂ ਏਕੇਕੇਨ ਆਕਾਰੇਨ ਨਵਧਾ ਸਙ੍ਗਹਂ ਦਸ੍ਸੇਤੁਂ ‘‘ਨਵ ਸਙ੍ਗਹਾ’’ਤਿਆਦਿਮਾਹ. ਤਤ੍ਥ ਵਤ੍ਥੁਸਙ੍ਗਹੋਤਿ ਵਤ੍ਥੁਨਾ ਸਙ੍ਗਹੋ. ਏਵਂ ਸੇਸੇਸੁਪਿ ਪਦਤ੍ਥੋ ਵੇਦਿਤਬ੍ਬੋ. ਅਯਂ ਪਨੇਤ੍ਥ ਅਤ੍ਥਯੋਜਨਾ – ਯਸ੍ਮਾ ਹਿ ਏਕਸਿਕ੍ਖਾਪਦਮ੍ਪਿ ਅਵਤ੍ਥੁਸ੍ਮਿਂ ਪਞ੍ਞਤ੍ਤਂ ਨਤ੍ਥਿ, ਤਸ੍ਮਾ ਸਬ੍ਬਾਨਿ ਵਤ੍ਥੁਨਾ ਸਙ੍ਗਹਿਤਾਨੀਤਿ ਏਵਂ ਤਾਵ ਵਤ੍ਥੁਸਙ੍ਗਹੋ ਵੇਦਿਤਬ੍ਬੋ.

ਯਸ੍ਮਾ ਪਨ ਦ੍ਵੇ ਆਪਤ੍ਤਿਕ੍ਖਨ੍ਧਾ ਸੀਲਵਿਪਤ੍ਤਿਯਾ ਸਙ੍ਗਹਿਤਾ, ਪਞ੍ਚਾਪਤ੍ਤਿਕ੍ਖਨ੍ਧਾ ਆਚਾਰਵਿਪਤ੍ਤਿਯਾ, ਛ ਸਿਕ੍ਖਾਪਦਾਨਿ ਆਜੀਵਵਿਪਤ੍ਤਿਯਾ ਸਙ੍ਗਹਿਤਾਨਿ, ਤਸ੍ਮਾ ਸਬ੍ਬਾਨਿਪਿ ਵਿਪਤ੍ਤਿਯਾ ਸਙ੍ਗਹਿਤਾਨੀਤਿ ਏਵਂ ਵਿਪਤ੍ਤਿਸਙ੍ਗਹੋ ਵੇਦਿਤਬ੍ਬੋ.

ਯਸ੍ਮਾ ਪਨ ਸਤ੍ਤਹਾਪਤ੍ਤੀਹਿ ਮੁਤ੍ਤਂ ਏਕਸਿਕ੍ਖਾਪਦਮ੍ਪਿ ਨਤ੍ਥਿ, ਤਸ੍ਮਾ ਸਬ੍ਬਾਨਿ ਆਪਤ੍ਤਿਯਾ ਸਙ੍ਗਹਿਤਾਨੀਤਿ ਏਵਂ ਆਪਤ੍ਤਿਸਙ੍ਗਹੋ ਵੇਦਿਤਬ੍ਬੋ.

ਸਬ੍ਬਾਨਿ ਚ ਸਤ੍ਤਸੁ ਨਗਰੇਸੁ ਪਞ੍ਞਤ੍ਤਾਨੀਤਿ ਨਿਦਾਨੇਨ ਸਙ੍ਗਹਿਤਾਨੀਤਿ ਏਵਂ ਨਿਦਾਨਸਙ੍ਗਹੋ ਵੇਦਿਤਬ੍ਬੋ.

ਯਸ੍ਮਾ ਪਨ ਏਕਸਿਕ੍ਖਾਪਦਮ੍ਪਿ ਅਜ੍ਝਾਚਾਰਿਕਪੁਗ੍ਗਲੇ ਅਸਤਿ ਪਞ੍ਞਤ੍ਤਂ ਨਤ੍ਥਿ, ਤਸ੍ਮਾ ਸਬ੍ਬਾਨਿ ਪੁਗ੍ਗਲੇਨ ਸਙ੍ਗਹਿਤਾਨੀਤਿ ਏਵਂ ਪੁਗ੍ਗਲਸਙ੍ਗਹੋ ਵੇਦਿਤਬ੍ਬੋ.

ਸਬ੍ਬਾਨਿ ਪਨ ਪਞ੍ਚਹਿ ਚੇਵ ਸਤ੍ਤਹਿ ਚ ਆਪਤ੍ਤਿਕ੍ਖਨ੍ਧੇਹਿ ਸਙ੍ਗਹਿਤਾਨਿ, ਸਬ੍ਬਾਨਿ ਨ ਵਿਨਾ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਨ੍ਤੀਤਿ ਸਮੁਟ੍ਠਾਨੇਨ ਸਙ੍ਗਹਿਤਾਨਿ. ਸਬ੍ਬਾਨਿ ਚ ਚਤੂਸੁ ਅਧਿਕਰਣੇਸੁ ਆਪਤ੍ਤਾਧਿਕਰਣੇਨ ਸਙ੍ਗਹਿਤਾਨਿ. ਸਬ੍ਬਾਨਿ ਸਤ੍ਤਹਿ ਸਮਥੇਹਿ ਸਮਥਂ ਗਚ੍ਛਨ੍ਤੀਤਿ ਸਮਥੇਹਿ ਸਙ੍ਗਹਿਤਾਨਿ. ਏਵਮੇਤ੍ਥ ਖਨ੍ਧਸਮੁਟ੍ਠਾਨਅਧਿਕਰਣਸਮਥਸਙ੍ਗਹਾਪਿ ਵੇਦਿਤਬ੍ਬਾ. ਸੇਸਂ ਪੁਬ੍ਬੇ ਵੁਤ੍ਤਨਯਮੇਵਾਤਿ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਨਵਸਙ੍ਗਹਿਤਵਗ੍ਗਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਪਰਿਵਾਰਸ੍ਸ ਅਨੁਤ੍ਤਾਨਤ੍ਥਪਦਵਣ੍ਣਨਾਤਿ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਉਭਤੋ ਵਿਭਙ੍ਗਖਨ੍ਧਕ-ਪਰਿਵਾਰਵਿਭਤ੍ਤਿਦੇਸਨਂ ਨਾਥੋ;

ਵਿਨਯਪਿਟਕਂ ਵਿਨੇਨ੍ਤੋ, ਵੇਨੇਯ੍ਯਂ ਯਂ ਜਿਨੋ ਆਹ.

ਸਮਧਿਕਸਤ੍ਤਵੀਸਤਿ-ਸਹਸ੍ਸਮਤ੍ਤੇਨ ਤਸ੍ਸ ਗਨ੍ਥੇਨ;

ਸਂਵਣ੍ਣਨਾ ਸਮਤ੍ਤਾ, ਸਮਨ੍ਤਪਾਸਾਦਿਕਾ ਨਾਮ.

ਤਤ੍ਰਿਦਂ ਸਮਨ੍ਤਪਾਸਾਦਿਕਾਯ ਸਮਨ੍ਤਪਾਸਾਦਿਕਤ੍ਤਸ੍ਮਿਂ –

ਆਚਰਿਯਪਰਮ੍ਪਰਤੋ, ਨਿਦਾਨਵਤ੍ਥੁਪ੍ਪਭੇਦਦੀਪਨਤੋ;

ਪਰਸਮਯਵਿਵਜ੍ਜਨਤੋ, ਸਕਸਮਯਵਿਸੁਦ੍ਧਿਤੋ ਚੇਵ.

ਬ੍ਯਞ੍ਜਨਪਰਿਸੋਧਨਤੋ, ਪਦਤ੍ਥਤੋ ਪਾਲ਼ਿਯੋਜਨਕ੍ਕਮਤੋ;

ਸਿਕ੍ਖਾਪਦਨਿਚ੍ਛਯਤੋ, ਵਿਭਙ੍ਗਨਯਭੇਦਦਸ੍ਸਨਤੋ.

ਸਮ੍ਪਸ੍ਸਤਂ ਨ ਦਿਸ੍ਸਤਿ, ਕਿਞ੍ਚਿ ਅਪਾਸਾਦਿਕਂ ਯਤੋ ਏਤ੍ਥ;

ਵਿਞ੍ਞੂਨਮਯਂ ਤਸ੍ਮਾ, ਸਮਨ੍ਤਪਾਸਾਦਿਕਾਤ੍ਵੇਵ.

ਸਂਵਣ੍ਣਨਾ ਪਵਤ੍ਤਾ, ਵਿਨਯਸ੍ਸ ਵਿਨੇਯ੍ਯਦਮਨਕੁਸਲੇਨ;

ਵੁਤ੍ਤਸ੍ਸ ਲੋਕਨਾਥੇਨ, ਲੋਕਮਨੁਕਮ੍ਪਮਾਨੇਨਾਤਿ.

ਮਹਾਅਟ੍ਠਕਥਞ੍ਚੇਵ, ਮਹਾਪਚ੍ਚਰਿਮੇਵਚ;

ਕੁਰੁਨ੍ਦਿਞ੍ਚਾਤਿ ਤਿਸ੍ਸੋਪਿ, ਸੀਹਲ਼ਟ੍ਠਕਥਾ ਇਮਾ.

ਬੁਦ੍ਧਮਿਤ੍ਤੋਤਿ ਨਾਮੇਨ, ਵਿਸ੍ਸੁਤਸ੍ਸ ਯਸਸ੍ਸਿਨੋ;

ਵਿਨਯਞ੍ਞੁਸ੍ਸ ਧੀਰਸ੍ਸ, ਸੁਤ੍ਵਾ ਥੇਰਸ੍ਸ ਸਨ੍ਤਿਕੇ.

ਮਹਾਮੇਘਵਨੁਯ੍ਯਾਨੇ, ਭੂਮਿਭਾਗੇ ਪਤਿਟ੍ਠਿਤੋ;

ਮਹਾਵਿਹਾਰੋ ਯੋ ਸਤ੍ਥੁ, ਮਹਾਬੋਧਿਵਿਭੂਸਿਤੋ.

ਯਂ ਤਸ੍ਸ ਦਕ੍ਖਿਣੇ ਭਾਗੇ, ਪਧਾਨਘਰਮੁਤ੍ਤਮਂ;

ਸੁਚਿਚਾਰਿਤ੍ਤਸੀਲੇਨ, ਭਿਕ੍ਖੁਸਙ੍ਘੇਨ ਸੇਵਿਤਂ.

ਉਲ਼ਾਰਕੁਲਸਮ੍ਭੂਤੋ, ਸਙ੍ਘੁਪਟ੍ਠਾਯਕੋ ਸਦਾ;

ਅਨਾਕੁਲਾਯ ਸਦ੍ਧਾਯ, ਪਸਨ੍ਨੋ ਰਤਨਤ੍ਤਯੇ.

ਮਹਾਨਿਗਮਸਾਮੀਤਿ, ਵਿਸ੍ਸੁਤੋ ਤਤ੍ਥ ਕਾਰਯਿ;

ਚਾਰੁਪਾਕਾਰਸਞ੍ਚਿਤਂ, ਯਂ ਪਾਸਾਦਂ ਮਨੋਰਮਂ.

ਸੀਤਚ੍ਛਾਯਤਰੂਪੇਤਂ, ਸਮ੍ਪਨ੍ਨਸਲਿਲਾਸਯਂ;

ਵਸਤਾ ਤਤ੍ਰ ਪਾਸਾਦੇ, ਮਹਾਨਿਗਮਸਾਮਿਨੋ.

ਸੁਚਿਸੀਲਸਮਾਚਾਰਂ, ਥੇਰਂ ਬੁਦ੍ਧਸਿਰਿਵ੍ਹਯਂ;

ਯਾ ਉਦ੍ਦਿਸਿਤ੍ਵਾ ਆਰਦ੍ਧਾ, ਇਦ੍ਧਾ ਵਿਨਯਵਣ੍ਣਨਾ.

ਪਾਲਯਨ੍ਤਸ੍ਸ ਸਕਲਂ, ਲਙ੍ਕਾਦੀਪਂ ਨਿਰਬ੍ਬੁਦਂ;

ਰਞ੍ਞੋ ਸਿਰਿਨਿਵਾਸਸ੍ਸ, ਸਿਰਿਪਾਲਯਸਸ੍ਸਿਨੋ.

ਸਮਵੀਸਤਿਮੇ ਖੇਮੇ, ਜਯਸਂਵਚ੍ਛਰੇ ਅਯਂ;

ਆਰਦ੍ਧਾ ਏਕਵੀਸਮ੍ਹਿ, ਸਮ੍ਪਤ੍ਤੇ ਪਰਿਨਿਟ੍ਠਿਤਾ.

ਉਪਦ੍ਦਵਾ ਕੁਲੇ ਲੋਕੇ, ਨਿਰੁਪਦ੍ਦਵਤੋ ਅਯਂ;

ਏਕਸਂਵਚ੍ਛਰੇਨੇਵ, ਯਥਾ ਨਿਟ੍ਠਂ ਉਪਾਗਤਾ.

ਏਵਂ ਸਬ੍ਬਸ੍ਸ ਲੋਕਸ੍ਸ, ਨਿਟ੍ਠਂ ਧਮ੍ਮੂਪਸਂਹਿਤਾ;

ਸੀਘਂ ਗਚ੍ਛਨ੍ਤੁ ਆਰਮ੍ਭਾ, ਸਬ੍ਬੇਪਿ ਨਿਰੁਪਦ੍ਦਵਾ.

ਚਿਰਟ੍ਠਿਤਤ੍ਥਂ ਧਮ੍ਮਸ੍ਸ, ਕਰੋਨ੍ਤੇਨ ਮਯਾ ਇਮਂ;

ਸਦ੍ਧਮ੍ਮਬਹੁਮਾਨੇਨ, ਯਞ੍ਚ ਪੁਞ੍ਞਂ ਸਮਾਚਿਤਂ.

ਸਬ੍ਬਸ੍ਸ ਆਨੁਭਾਵੇਨ, ਤਸ੍ਸ ਸਬ੍ਬੇਪਿ ਪਾਣਿਨੋ;

ਭਵਨ੍ਤੁ ਧਮ੍ਮਰਾਜਸ੍ਸ, ਸਦ੍ਧਮ੍ਮਰਸਸੇਵਿਨੋ.

ਚਿਰਂ ਤਿਟ੍ਠਤੁ ਸਦ੍ਧਮ੍ਮੋ, ਕਾਲੇ ਵਸ੍ਸਂ ਚਿਰਂ ਪਜਂ;

ਤਪ੍ਪੇਤੁ ਦੇਵੋ ਧਮ੍ਮੇਨ, ਰਾਜਾ ਰਕ੍ਖਤੁ ਮੇਦਿਨਿਨ੍ਤਿ.

ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਪਟਿਮਣ੍ਡਿਤੇਨ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯਸਮੁਦਿਤੇਨ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਣਸਮਤ੍ਥੇਨ ਪਞ੍ਞਾਵੇਯ੍ਯਤ੍ਤਿਯਸਮਨ੍ਨਾਗਤੇਨ ਤਿਪਿਟਕਪਰਿਯਤ੍ਤਿਪ੍ਪਭੇਦੇ ਸਾਟ੍ਠਕਥੇ ਸਤ੍ਥੁਸਾਸਨੇ ਅਪ੍ਪਟਿਹਤਞ੍ਞਾਣਪ੍ਪਭਾਵੇਨ ਮਹਾਵੇਯ੍ਯਾਕਰਣੇਨ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਲਾਵਣ੍ਣਯੁਤ੍ਤੇਨ ਯੁਤ੍ਤਮੁਤ੍ਤਵਾਦਿਨਾ ਵਾਦਿਵਰੇਨ ਮਹਾਕਵਿਨਾ ਪਭਿਨ੍ਨਪਅਸਮ੍ਭਿਦਾਪਰਿਵਾਰੇ ਛਲ਼ਭਿਞ੍ਞਾਦਿਪਭੇਦਗੁਣਪਟਿਮਣ੍ਡਿਤੇ ਉਤ੍ਤਰਿਮਨੁਸ੍ਸਧਮ੍ਮੇ ਸੁਪ੍ਪਤਿਟ੍ਠਿਤਬੁਦ੍ਧੀਨਂ ਥੇਰਵਂਸਪ੍ਪਦੀਪਾਨਂ ਥੇਰਾਨਂ ਮਹਾਵਿਹਾਰਵਾਸੀਨਂ ਵਂਸਾਲਙ੍ਕਾਰਭੂਤੇਨ ਵਿਪੁਲਵਿਸੁਦ੍ਧਬੁਦ੍ਧਿਨਾ ਬੁਦ੍ਧਘੋਸੋਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਥੇਰੇਨ ਕਤਾ ਅਯਂ ਸਮਨ੍ਤਪਾਸਾਦਿਕਾ ਨਾਮ ਵਿਨਯਸਂਵਣ੍ਣਨਾ –

ਤਾਵ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;

ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਸੀਲਵਿਸੁਦ੍ਧਿਯਾ.

ਯਾਵ ਬੁਦ੍ਧੋਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;

ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋਤਿ.

ਸਮਨ੍ਤਪਾਸਾਦਿਕਾ ਨਾਮ

ਵਿਨਯ-ਅਟ੍ਠਕਥਾ ਨਿਟ੍ਠਿਤਾ.