ਮਹਾਸਙ੍ਗਾਮੋ

ਵੋਹਰਨ੍ਤੇਨ ਜਾਨਿਤਬ੍ਬਾਦਿਵਣ੍ਣਨਾ

੩੬੮-੩੭੪. ਮਹਾਸਙ੍ਗਾਮੇ – ਵਤ੍ਥੁਤੋ ਵਾ ਵਤ੍ਥੁਂ ਸਙ੍ਕਮਤੀਤਿ ‘‘ਪਠਮਪਾਰਾਜਿਕਵਤ੍ਥੁ ਮਯਾ ਦਿਟ੍ਠਂ ਵਾ ਸੁਤਂ ਵਾ’’ਤਿ ਵਤ੍ਵਾ ਪੁਨ ਪੁਚ੍ਛਿਯਮਾਨੋ ਨਿਘਂਸਿਯਮਾਨੋ ‘‘ਨ ਮਯਾ ਪਠਮਪਾਰਾਜਿਕਸ੍ਸ ਵਤ੍ਥੁ ਦਿਟ੍ਠਂ, ਨ ਸੁਤਂ; ਦੁਤਿਯਪਾਰਾਜਿਕਸ੍ਸ ਵਤ੍ਥੁ ਦਿਟ੍ਠਂ ਵਾ ਸੁਤਂ ਵਾ’’ਤਿ ਵਦਤਿ. ਏਤੇਨੇਵ ਨਯੇਨ ਸੇਸਵਤ੍ਥੁਸਙ੍ਕਮਨਂ, ਵਿਪਤ੍ਤਿਤੋ ਵਿਪਤ੍ਤਿਸਙ੍ਕਮਨਂ ਆਪਤ੍ਤਿਤੋ ਆਪਤ੍ਤਿਸਙ੍ਕਮਨਞ੍ਚ ਵੇਦਿਤਬ੍ਬਂ. ਯੋ ਪਨ ‘‘ਨੇਵ ਮਯਾ ਦਿਟ੍ਠਂ, ਨ ਸੁਤ’’ਨ੍ਤਿ ਵਤ੍ਵਾ ਪਚ੍ਛਾ ‘‘ਮਯਾਪੇਤਂ ਦਿਟ੍ਠਂ ਵਾ ਸੁਤਂ ਵਾ’’ਤਿ ਵਦਤਿ, ‘‘ਦਿਟ੍ਠਂ ਵਾ ਸੁਤਂ ਵਾ’’ਤਿ ਵਤ੍ਵਾ ਪਚ੍ਛਾ ‘‘ਨ ਦਿਟ੍ਠਂ ਵਾ ਨ ਸੁਤਂ ਵਾ’’ਤਿ ਵਦਤਿ, ਅਯਂ ਅਵਜਾਨਿਤ੍ਵਾ ਪਟਿਜਾਨਾਤਿ, ਪਟਿਜਾਨਿਤ੍ਵਾ ਅਵਜਾਨਾਤੀਤਿ ਵੇਦਿਤਬ੍ਬੋ. ਏਸੇਵ ਅਞ੍ਞੇਨਞ੍ਞਂ ਪਟਿਚਰਤਿ ਨਾਮ.

੩੭੫. ਵਣ੍ਣਾਵਣ੍ਣੋਤਿ ਨੀਲਾਦਿਵਣ੍ਣਾਵਣ੍ਣਵਸੇਨ ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਂ ਵੁਤ੍ਤਂ. ਵਚਨਮਨੁਪ੍ਪਦਾਨਨ੍ਤਿ ਸਞ੍ਚਰਿਤ੍ਤਂ ਵੁਤ੍ਤਂ. ਕਾਯਸਂਸਗ੍ਗਾਦਿਤ੍ਤਯਂ ਸਰੂਪੇਨੇਵ ਵੁਤ੍ਤਂ. ਇਤਿ ਇਮਾਨਿ ਪਞ੍ਚ ਮੇਥੁਨਧਮ੍ਮਸ੍ਸ ਪੁਬ੍ਬਭਾਗੋ ਪੁਬ੍ਬਪਯੋਗੋਤਿ ਵੇਦਿਤਬ੍ਬਾਨਿ.

੩੭੬. ਚਤ੍ਤਾਰਿ ਅਪਲੋਕਨਕਮ੍ਮਾਨੀਤਿ ਅਧਮ੍ਮੇਨਵਗ੍ਗਾਦੀਨਿ. ਸੇਸੇਸੁਪਿ ਏਸੇਵ ਨਯੋ. ਇਤਿ ਚਤ੍ਤਾਰਿ ਚਤੁਕ੍ਕਾਨਿ ਸੋਲ਼ਸ ਹੋਨ੍ਤਿ.

ਅਗਤਿਅਗਨ੍ਤਬ੍ਬਵਣ੍ਣਨਾ

੩੭੯. ਬਹੁਜਨਅਹਿਤਾਯ ਪਟਿਪਨ੍ਨੋ ਹੋਤੀਤਿ ਵਿਨਯਧਰੇਨ ਹਿ ਏਵਂ ਛਨ੍ਦਾਦਿਗਤਿਯਾ ਅਧਿਕਰਣੇ ਵਿਨਿਚ੍ਛਿਤੇ ਤਸ੍ਮਿਂ ਵਿਹਾਰੇ ਸਙ੍ਘੋ ਦ੍ਵਿਧਾ ਭਿਜ੍ਜਤਿ. ਓਵਾਦੂਪਜੀਵਿਨਿਯੋ ਭਿਕ੍ਖੁਨਿਯੋਪਿ ਦ੍ਵੇ ਭਾਗਾ ਹੋਨ੍ਤਿ. ਉਪਾਸਕਾਪਿ ਉਪਾਸਿਕਾਯੋਪਿ ਦਾਰਕਾਪਿ ਦਾਰਿਕਾਯੋਪਿ ਤੇਸਂ ਆਰਕ੍ਖਦੇਵਤਾਪਿ ਤਥੇਵ ਦ੍ਵਿਧਾ ਭਿਜ੍ਜਨ੍ਤਿ. ਤਤੋ ਭੁਮ੍ਮਦੇਵਤਾ ਆਦਿਂ ਕਤ੍ਵਾ ਯਾਵ ਅਕਨਿਟ੍ਠਬ੍ਰਹ੍ਮਾਨੋ ਦ੍ਵਿਧਾਵ ਹੋਨ੍ਤਿ. ਤੇਨ ਵੁਤ੍ਤਂ – ‘‘ਬਹੁਜਨਅਹਿਤਾਯ ਪਟਿਪਨ੍ਨੋ ਹੋਤਿ…ਪੇ… ਦੁਕ੍ਖਾਯ ਦੇਵਮਨੁਸ੍ਸਾਨ’’ਨ੍ਤਿ.

੩੮੨. ਵਿਸਮਨਿਸ੍ਸਿਤੋਤਿ ਵਿਸਮਾਨਿ ਕਾਯਕਮ੍ਮਾਦੀਨਿ ਨਿਸ੍ਸਿਤੋ. ਗਹਨਨਿਸ੍ਸਿਤੋਤਿ ਮਿਚ੍ਛਾਦਿਟ੍ਠਿਅਨ੍ਤਗ੍ਗਾਹਿਕਦਿਟ੍ਠਿਸਙ੍ਖਾਤਂ ਗਹਨਂ ਨਿਸ੍ਸਿਤੋ. ਬਲਵਨਿਸ੍ਸਿਤੋਤਿ ਬਲਵਨ੍ਤੇ ਅਭਿਞ੍ਞਾਤੇ ਭਿਕ੍ਖੂ ਨਿਸ੍ਸਿਤੋ.

੩੯੩. ਤਸ੍ਸ ਅਵਜਾਨਨ੍ਤੋਤਿ ਤਸ੍ਸ ਵਚਨਂ ਅਵਜਾਨਨ੍ਤੋ. ਉਪਯੋਗਤ੍ਥੇ ਵਾ ਸਾਮਿਵਚਨਂ, ਤਂ ਅਵਜਾਨਨ੍ਤੋਤਿ ਅਤ੍ਥੋ.

੩੯੪. ਯਂ ਅਤ੍ਥਾਯਾਤਿ ਯਦਤ੍ਥਾਯ. ਤਂ ਅਤ੍ਥਨ੍ਤਿ ਸੋ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਮਹਾਸਙ੍ਗਾਮਵਣ੍ਣਨਾ ਨਿਟ੍ਠਿਤਾ.