ਕਥਿਨਭੇਦਂ

ਕਥਿਨਅਤ੍ਥਤਾਦਿਵਣ੍ਣਨਾ

੪੦੩. ਕਥਿਨੇ – ਅਟ੍ਠ ਮਾਤਿਕਾਤਿ ਖਨ੍ਧਕੇ ਵੁਤ੍ਤਾ ਪਕ੍ਕਮਨਨ੍ਤਿਕਾਦਿਕਾ ਅਟ੍ਠ. ਪਲਿਬੋਧਾਨਿਸਂਸਾਪਿ ਪੁਬ੍ਬੇ ਵੁਤ੍ਤਾ ਏਵ.

੪੦੪. ਪਯੋਗਸ੍ਸਾਤਿ ਚੀਵਰਧੋਵਨਾਦਿਨੋ ਸਤ੍ਤਵਿਧਸ੍ਸ ਪੁਬ੍ਬਕਰਣਸ੍ਸਤ੍ਥਾਯ ਯੋ ਉਦਕਾਹਰਣਾਦਿਕੋ ਪਯੋਗੋ ਕਯਿਰਤਿ, ਤਸ੍ਸ ਪਯੋਗਸ੍ਸ. ਕਤਮੇ ਧਮ੍ਮਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋਤਿ ਅਨਾਗਤਵਸੇਨ ਅਨਨ੍ਤਰਾ ਹੁਤ੍ਵਾ ਕਤਮੇ ਧਮ੍ਮਾ ਪਚ੍ਚਯਾ ਹੋਨ੍ਤੀਤਿ ਅਤ੍ਥੋ. ਸਮਨਨ੍ਤਰਪਚ੍ਚਯੇਨਾਤਿ ਸੁਟ੍ਠੁ ਅਨਨ੍ਤਰਪਚ੍ਚਯੇਨ, ਅਨਨ੍ਤਰਪਚ੍ਚਯਮੇਵ ਆਸਨ੍ਨਤਰਂ ਕਤ੍ਵਾ ਪੁਚ੍ਛਤਿ. ਨਿਸ੍ਸਯਪਚ੍ਚਯੇਨਾਤਿ ਉਪ੍ਪਜ੍ਜਮਾਨਸ੍ਸ ਪਯੋਗਸ੍ਸ ਨਿਸ੍ਸਯਂ ਆਧਾਰਭਾਵਂ ਉਪਗਤਾ ਵਿਯ ਹੁਤ੍ਵਾ ਕਤਮੇ ਧਮ੍ਮਾ ਪਚ੍ਚਯਾ ਹੋਨ੍ਤੀਤਿ ਅਤ੍ਥੋ. ਉਪਨਿਸ੍ਸਯਪਚ੍ਚਯੇਨਾਤਿ ਉਪੇਤੇਨ ਨਿਸ੍ਸਯਪਚ੍ਚਯੇਨ; ਨਿਸ੍ਸਯਪਚ੍ਚਯਮੇਵ ਉਪਗਤਤਰਂ ਕਤ੍ਵਾ ਪੁਚ੍ਛਤਿ. ਪੁਰੇਜਾਤਪਚ੍ਚਯੇਨਾਤਿ ਇਮਿਨਾ ਪਠਮਂ ਉਪ੍ਪਨ੍ਨਸ੍ਸ ਪਚ੍ਚਯਭਾਵਂ ਪੁਚ੍ਛਤਿ. ਪਚ੍ਛਾਜਾਤਪਚ੍ਚਯੇਨਾਤਿ ਇਮਿਨਾ ਪਚ੍ਛਾ ਉਪ੍ਪਜ੍ਜਨਕਸ੍ਸ ਪਚ੍ਚਯਭਾਵਂ ਪੁਚ੍ਛਤਿ. ਸਹਜਾਤਪਚ੍ਚਯੇਨਾਤਿ ਇਮਿਨਾ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜਮਾਨਾਨਂ ਪਚ੍ਚਯਭਾਵਂ ਪੁਚ੍ਛਤਿ. ਪੁਬ੍ਬਕਰਣਸ੍ਸਾਤਿ ਧੋਵਨਾਦਿਨੋ ਪੁਬ੍ਬਕਰਣਸ੍ਸ. ਪਚ੍ਚੁਦ੍ਧਾਰਸ੍ਸਾਤਿ ਪੁਰਾਣਸਙ੍ਘਾਟਿਆਦੀਨਂ ਪਚ੍ਚੁਦ੍ਧਰਣਸ੍ਸ. ਅਧਿਟ੍ਠਾਨਸ੍ਸਾਤਿ ਕਥਿਨਚੀਵਰਾਧਿਟ੍ਠਾਨਸ੍ਸ. ਅਤ੍ਥਾਰਸ੍ਸਾਤਿ ਕਥਿਨਤ੍ਥਾਰਸ੍ਸ. ਮਾਤਿਕਾਨਞ੍ਚ ਪਲਿਬੋਧਾਨਞ੍ਚਾਤਿ ਅਟ੍ਠਨ੍ਨਂ ਮਾਤਿਕਾਨਂ ਦ੍ਵਿਨ੍ਨਞ੍ਚ ਪਲਿਬੋਧਾਨਂ. ਵਤ੍ਥੁਸ੍ਸਾਤਿ ਸਙ੍ਘਾਟਿਆਦਿਨੋ ਕਥਿਨਵਤ੍ਥੁਸ੍ਸ; ਸੇਸਂ ਵੁਤ੍ਤਨਯਮੇਵ.

ਏਵਂ ਯਞ੍ਚ ਲਬ੍ਭਤਿ ਯਞ੍ਚ ਨ ਲਬ੍ਭਤਿ, ਸਬ੍ਬਂ ਪੁਚ੍ਛਿਤ੍ਵਾ ਇਦਾਨਿ ਯਂ ਯਸ੍ਸ ਲਬ੍ਭਤਿ, ਤਦੇਵ ਦਸ੍ਸੇਨ੍ਤੋ ਪੁਬ੍ਬਕਰਣਂ ਪਯੋਗਸ੍ਸਾਤਿਆਦਿਨਾ ਨਯੇਨ ਵਿਸ੍ਸਜ੍ਜਨਮਾਹ. ਤਸ੍ਸਤ੍ਥੋ – ਯਂ ਵੁਤ੍ਤਂ ‘‘ਪਯੋਗਸ੍ਸ ਕਤਮੇ ਧਮ੍ਮਾ’’ਤਿਆਦਿ, ਤਤ੍ਥ ਵੁਚ੍ਚਤੇ, ਪੁਬ੍ਬਕਰਣਂ ਪਯੋਗਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਨਿਸ੍ਸਯਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਯੋਗਸ੍ਸ ਹਿ ਸਤ੍ਤਵਿਧਮ੍ਪਿ ਪੁਬ੍ਬਕਰਣਂ ਯਸ੍ਮਾ ਤੇਨ ਪਯੋਗੇਨ ਨਿਪ੍ਫਾਦੇਤਬ੍ਬਸ੍ਸ ਪੁਬ੍ਬਕਰਣਸ੍ਸਤ੍ਥਾਯ ਸੋ ਪਯੋਗੋ ਕਯਿਰਤਿ, ਤਸ੍ਮਾ ਇਮੇਹਿ ਚਤੂਹਿ ਪਚ੍ਚਯੇਹਿ ਪਚ੍ਚਯੋ ਹੋਤਿ. ਪੁਰੇਜਾਤਪਚ੍ਚਯੇ ਪਨੇਸ ਉਦ੍ਦਿਟ੍ਠਧਮ੍ਮੇਸੁ ਏਕਧਮ੍ਮਮ੍ਪਿ ਨ ਲਭਤਿ, ਅਞ੍ਞਦਤ੍ਥੁ ਪੁਬ੍ਬਕਰਣਸ੍ਸ ਸਯਂ ਪੁਰੇਜਾਤਪਚ੍ਚਯੋ ਹੋਤਿ, ਪਯੋਗੇ ਸਤਿ ਪੁਬ੍ਬਕਰਣਸ੍ਸ ਨਿਪ੍ਫਜ੍ਜਨਤੋ. ਤੇਨ ਵੁਤ੍ਤਂ – ‘‘ਪਯੋਗੋ ਪੁਬ੍ਬਕਰਣਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ’’ਤਿ. ਪਚ੍ਛਾਜਾਤਪਚ੍ਚਯਂ ਪਨ ਲਭਤਿ, ਤੇਨ ਵੁਤ੍ਤਂ – ‘‘ਪੁਬ੍ਬਕਰਣਂ ਪਯੋਗਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ’’ਤਿ. ਪਚ੍ਛਾ ਉਪ੍ਪਜ੍ਜਨਕਸ੍ਸ ਹਿ ਪੁਬ੍ਬਕਰਣਸ੍ਸ ਅਤ੍ਥਾਯ ਸੋ ਪਯੋਗੋ ਕਯਿਰਤਿ. ਸਹਜਾਤਪਚ੍ਚਯਂ ਪਨ ਮਾਤਿਕਾਪਲਿਬੋਧਾਨਿਸਂਸਸਙ੍ਖਾਤੇ ਪਨ੍ਨਰਸ ਧਮ੍ਮੇ ਠਪੇਤ੍ਵਾ ਅਞ੍ਞੋ ਪਯੋਗਾਦੀਸੁ ਏਕੋਪਿ ਧਮ੍ਮੋ ਨ ਲਭਤਿ, ਤੇ ਏਵ ਹਿ ਪਨ੍ਨਰਸ ਧਮ੍ਮਾ ਸਹ ਕਥਿਨਤ੍ਥਾਰੇਨ ਏਕਤੋ ਨਿਪ੍ਫਜ੍ਜਨ੍ਤੀਤਿ ਅਞ੍ਞਮਞ੍ਞਂ ਸਹਜਾਤਪਚ੍ਚਯਾ ਹੋਨ੍ਤਿ. ਤੇਨ ਵੁਤ੍ਤਂ – ‘‘ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ. ਏਤੇਨੁਪਾਯੇਨ ਸਬ੍ਬਪਦਵਿਸ੍ਸਜ੍ਜਨਾਨਿ ਵੇਦਿਤਬ੍ਬਾਨਿ.

ਪੁਬ੍ਬਕਰਣਨਿਦਾਨਾਦਿਵਿਭਾਗਵਣ੍ਣਨਾ

੪੦੫. ਪੁਬ੍ਬਕਰਣਂ ਕਿਂਨਿਦਾਨਨ੍ਤਿਆਦਿਪੁਚ੍ਛਾਵਿਸ੍ਸਜ੍ਜਨਂ ਉਤ੍ਤਾਨਮੇਵ.

੪੦੬-੭. ‘‘ਪਯੋਗੋ ਕਿਂਨਿਦਾਨੋ’’ਤਿਆਦੀਸੁ ਪੁਚ੍ਛਾਦ੍ਵਯਵਿਸ੍ਸਜ੍ਜਨੇਸੁ ਹੇਤੁਨਿਦਾਨੋ ਪਚ੍ਚਯਨਿਦਾਨੋਤਿ ਏਤ੍ਥ ਛ ਚੀਵਰਾਨਿ ਹੇਤੁ ਚੇਵ ਪਚ੍ਚਯੋ ਚਾਤਿ ਵੇਦਿਤਬ੍ਬਾਨਿ. ਪੁਬ੍ਬਪਯੋਗਾਦੀਨਞ੍ਹਿ ਸਬ੍ਬੇਸਂ ਤਾਨਿਯੇਵ ਹੇਤੁ, ਤਾਨਿ ਪਚ੍ਚਯੋ. ਨ ਹਿ ਛਬ੍ਬਿਧੇ ਚੀਵਰੇ ਅਸਤਿ ਪਯੋਗੋ ਅਤ੍ਥਿ, ਨ ਪੁਬ੍ਬਕਰਣਾਦੀਨਿ, ਤਸ੍ਮਾ ‘‘ਪਯੋਗੋ ਹੇਤੁਨਿਦਾਨੋ’’ਤਿਆਦਿ ਵੁਤ੍ਤਂ.

੪੦੮. ਸਙ੍ਗਹਵਾਰੇ – ਵਚੀਭੇਦੇਨਾਤਿ ‘‘ਇਮਾਯ ਸਙ੍ਘਾਟਿਯਾ, ਇਮਿਨਾ ਉਤ੍ਤਰਾਸਙ੍ਗੇਨ, ਇਮਿਨਾ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਾਮੀ’’ਤਿ ਏਤੇਨ ਵਚੀਭੇਦੇਨ. ਕਤਿਮੂਲਾਦਿਪੁਚ੍ਛਾਵਿਸ੍ਸਜ੍ਜਨੇ – ਕਿਰਿਯਾ ਮਜ੍ਝੇਤਿ ਪਚ੍ਚੁਦ੍ਧਾਰੋ ਚੇਵ ਅਧਿਟ੍ਠਾਨਞ੍ਚ.

੪੧੧. ਵਤ੍ਥੁਵਿਪਨ੍ਨਂ ਹੋਤੀਤਿ ਅਕਪ੍ਪਿਯਦੁਸ੍ਸਂ ਹੋਤਿ. ਕਾਲਵਿਪਨ੍ਨਂ ਨਾਮ ਅਜ੍ਜ ਦਾਯਕੇਹਿ ਦਿਨ੍ਨਂ ਸ੍ਵੇ ਸਙ੍ਘੋ ਕਥਿਨਤ੍ਥਾਰਕਸ੍ਸ ਦੇਤਿ. ਕਰਣਵਿਪਨ੍ਨਂ ਨਾਮ ਤਦਹੇਵ ਛਿਨ੍ਦਿਤ੍ਵਾ ਅਕਤਂ.

ਕਥਿਨਾਦਿਜਾਨਿਤਬ੍ਬਵਿਭਾਗਵਣ੍ਣਨਾ

੪੧੨. ਕਥਿਨਂ ਜਾਨਿਤਬ੍ਬਨ੍ਤਿਆਦਿਪੁਚ੍ਛਾਯ ਵਿਸ੍ਸਜ੍ਜਨੇ – ਤੇਸਞ੍ਞੇਵ ਧਮ੍ਮਾਨਨ੍ਤਿ ਯੇਸੁ ਰੂਪਾਦਿਧਮ੍ਮੇਸੁ ਸਤਿ ਕਥਿਨਂ ਨਾਮ ਹੋਤਿ, ਤੇਸਂ ਸਮੋਧਾਨਂ ਮਿਸ੍ਸੀਭਾਵੋ. ਨਾਮਂ ਨਾਮਕਮ੍ਮਨ੍ਤਿਆਦਿਨਾ ਪਨ ‘‘ਕਥਿਨ’’ਨ੍ਤਿ ਇਦਂ ਬਹੂਸੁ ਧਮ੍ਮੇਸੁ ਨਾਮਮਤ੍ਤਂ, ਨ ਪਰਮਤ੍ਥਤੋ ਏਕੋ ਧਮ੍ਮੋ ਅਤ੍ਥੀਤਿ ਦਸ੍ਸੇਤਿ.

ਚਤੁਵੀਸਤਿਯਾ ਆਕਾਰੇਹੀਤਿ ‘‘ਨ ਉਲ੍ਲਿਖਿਤਮਤ੍ਤੇਨਾ’’ਤਿਆਦੀਹਿ ਪੁਬ੍ਬੇ ਵੁਤ੍ਤਕਾਰਣੇਹਿ. ਸਤ੍ਤਰਸਹਿ ਆਕਾਰੇਹੀਤਿ ‘‘ਅਹਤੇਨ ਅਤ੍ਥਤਂ ਹੋਤਿ ਕਥਿਨ’’ਨ੍ਤਿਆਦੀਹਿ ਪੁਬ੍ਬੇ ਵੁਤ੍ਤਕਾਰਣੇਹਿ. ਨਿਮਿਤ੍ਤਕਮ੍ਮਾਦੀਸੁ ਯਂ ਵਤ੍ਤਬ੍ਬਂ ਸਬ੍ਬਂ ਕਥਿਨਕ੍ਖਨ੍ਧਕਵਣ੍ਣਨਾਯਂ ਵੁਤ੍ਤਂ.

੪੧੬. ਏਕੁਪ੍ਪਾਦਾ ਏਕਨਿਰੋਧਾਤਿ ਉਪ੍ਪਜ੍ਜਮਾਨਾਪਿ ਏਕਤੋ ਉਪ੍ਪਜ੍ਜਨ੍ਤਿ, ਨਿਰੁਜ੍ਝਮਾਨਾਪਿ ਏਕਤੋ ਨਿਰੁਜ੍ਝਨ੍ਤਿ. ਏਕੁਪ੍ਪਾਦਾ ਨਾਨਾਨਿਰੋਧਾਤਿ ਉਪ੍ਪਜ੍ਜਮਾਨਾ ਏਕਤੋ ਉਪ੍ਪਜ੍ਜਨ੍ਤਿ, ਨਿਰੁਜ੍ਝਮਾਨਾ ਨਾਨਾ ਨਿਰੁਜ੍ਝਨ੍ਤਿ. ਕਿਂ ਵੁਤ੍ਤਂ ਹੋਤਿ? ਸਬ੍ਬੇਪਿ ਅਤ੍ਥਾਰੇਨ ਸਦ੍ਧਿਂ ਏਕਤੋ ਉਪ੍ਪਜ੍ਜਨ੍ਤਿ, ਅਤ੍ਥਾਰੇ ਹਿ ਸਤਿ ਉਦ੍ਧਾਰੋ ਨਾਮ. ਨਿਰੁਜ੍ਝਮਾਨਾ ਪਨੇਤ੍ਥ ਪੁਰਿਮਾ ਦ੍ਵੇ ਅਤ੍ਥਾਰੇਨ ਸਦ੍ਧਿਂ ਏਕਤੋ ਨਿਰੁਜ੍ਝਨ੍ਤਿ, ਉਦ੍ਧਾਰਭਾਵਂ ਪਾਪੁਣਨ੍ਤਿ. ਅਤ੍ਥਾਰਸ੍ਸ ਹਿ ਨਿਰੋਧੋ ਏਤੇਸਞ੍ਚ ਉਦ੍ਧਾਰਭਾਵੋ ਏਕਕ੍ਖਣੇ ਹੋਤਿ, ਇਤਰੇ ਨਾਨਾ ਨਿਰੁਜ੍ਝਨ੍ਤਿ. ਤੇਸੁ ਉਦ੍ਧਾਰਭਾਵਂ ਪਤ੍ਤੇਸੁਪਿ ਅਤ੍ਥਾਰੋ ਤਿਟ੍ਠਤਿਯੇਵ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਕਥਿਨਭੇਦਵਣ੍ਣਨਾ ਨਿਟ੍ਠਿਤਾ.

ਪਞ੍ਞਤ੍ਤਿਵਗ੍ਗਵਣ੍ਣਨਾ ਨਿਟ੍ਠਿਤਾ.