ਚੂਲ਼ਸਙ੍ਗਾਮੋ

ਅਨੁਵਿਜ੍ਜਕਸ੍ਸ ਪਟਿਪਤ੍ਤਿਵਣ੍ਣਨਾ

੩੬੫. ਚੂਲ਼ਸਙ੍ਗਾਮੇ ਸਙ੍ਗਾਮਾਵਚਰੇਨ ਭਿਕ੍ਖੁਨਾਤਿ ਸਙ੍ਗਾਮੋ ਵੁਚ੍ਚਤਿ ਅਧਿਕਰਣਵਿਨਿਚ੍ਛਯਤ੍ਥਾਯ ਸਙ੍ਘਸਨ੍ਨਿਪਾਤੋ. ਤਤ੍ਰ ਹਿ ਅਤ੍ਤਪਚ੍ਚਤ੍ਥਿਕਾ ਚੇਵ ਸਾਸਨਪਚ੍ਚਤ੍ਥਿਕਾ ਚ ਉਦ੍ਧਮ੍ਮਂ ਉਬ੍ਬਿਨਯਂ ਸਤ੍ਥੁ ਸਾਸਨਂ ਦੀਪੇਨ੍ਤਾ ਸਮੋਸਰਨ੍ਤਿ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਵਿਯ. ਯੋ ਭਿਕ੍ਖੁ ਤੇਸਂ ਪਚ੍ਚਤ੍ਥਿਕਾਨਂ ਲਦ੍ਧਿਂ ਮਦ੍ਦਿਤ੍ਵਾ ਸਕਵਾਦਦੀਪਨਤ੍ਥਾਯ ਤਤ੍ਥ ਅਵਚਰਤਿ, ਅਜ੍ਝੋਗਾਹੇਤ੍ਵਾ ਵਿਨਿਚ੍ਛਯਂ ਪਵਤ੍ਤੇਤਿ, ਸੋ ਸਙ੍ਗਾਮਾਵਚਰੋ ਨਾਮ ਯਸਤ੍ਥੇਰੋ ਵਿਯ. ਤੇਨ ਸਙ੍ਗਾਮਾਵਚਰੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਨ੍ਤੇਨ ਨੀਚਚਿਤ੍ਤੇਨ ਸਙ੍ਘੋ ਉਪਸਙ੍ਕਮਿਤਬ੍ਬੋ. ਨੀਚਚਿਤ੍ਤੇਨਾਤਿ ਮਾਨਦ੍ਧਜਂ ਨਿਪਾਤੇਤ੍ਵਾ ਨਿਹਤਮਾਨਚਿਤ੍ਤੇਨ. ਰਜੋਹਰਣਸਮੇਨਾਤਿ ਪਾਦਪੁਞ੍ਛਨਸਮੇਨ; ਯਥਾ ਰਜੋਹਰਣਸ੍ਸ ਸਂਕਿਲਿਟ੍ਠੇ ਵਾ ਅਸਂਕਿਲਿਟ੍ਠੇ ਵਾ ਪਾਦੇ ਪੁਞ੍ਛਿਯਮਾਨੇ ਨੇਵ ਰਾਗੋ ਨ ਦੋਸੋ; ਏਵਂ ਇਟ੍ਠਾਨਿਟ੍ਠੇਸੁ ਅਰਜ੍ਜਨ੍ਤੇਨ ਅਦੁਸ੍ਸਨ੍ਤੇਨਾਤਿ ਅਤ੍ਥੋ. ਯਥਾਪਤਿਰੂਪੇ ਆਸਨੇਤਿ ਯਥਾਪਤਿਰੂਪਂ ਆਸਨਂ ਞਤ੍ਵਾ ਅਤ੍ਤਨੋ ਪਾਪੁਣਨਟ੍ਠਾਨੇ ਥੇਰਾਨਂ ਭਿਕ੍ਖੂਨਂ ਪਿਟ੍ਠਿਂ ਅਦਸ੍ਸੇਤ੍ਵਾ ਨਿਸੀਦਿਤਬ੍ਬਂ. ਅਨਾਨਾਕਥਿਕੇਨਾਤਿ ਨਾਨਾਵਿਧਂ ਤਂ ਤਂ ਅਨਤ੍ਥਕਥਂ ਅਕਥੇਨ੍ਤੇਨ. ਅਤਿਰਚ੍ਛਾਨਕਥਿਕੇਨਾਤਿ ਦਿਟ੍ਠਸੁਤਮੁਤਮ੍ਪਿ ਰਾਜਕਥਾਦਿਕਂ ਤਿਰਚ੍ਛਾਨਕਥਂ ਅਕਥੇਨ੍ਤੇਨ. ਸਾਮਂ ਵਾ ਧਮ੍ਮੋ ਭਾਸਿਤਬ੍ਬੋਤਿ ਸਙ੍ਘਸਨ੍ਨਿਪਾਤਟ੍ਠਾਨੇ ਕਪ੍ਪਿਯਾਕਪ੍ਪਿਯਨਿਸ੍ਸਿਤਾ ਵਾ ਰੂਪਾਰੂਪਪਰਿਚ੍ਛੇਦਸਮਥਾਚਾਰਵਿਪਸ੍ਸਨਾਚਾਰਟ੍ਠਾਨਨਿਸਜ੍ਜਵਤ੍ਤਾਦਿਨਿਸ੍ਸਿਤਾ ਵਾ ਕਥਾ ਧਮ੍ਮੋ ਨਾਮ. ਏਵਰੂਪੋ ਧਮ੍ਮੋ ਸਯਂ ਵਾ ਭਾਸਿਤਬ੍ਬੋ, ਪਰੋ ਵਾ ਅਜ੍ਝੇਸਿਤਬ੍ਬੋ. ਯੋ ਭਿਕ੍ਖੁ ਤਥਾਰੂਪਿਂ ਕਥਂ ਕਥੇਤੁਂ ਪਹੋਤਿ, ਸੋ ਵਤ੍ਤਬ੍ਬੋ – ‘‘ਆਵੁਸੋ ਸਙ੍ਘਮਜ੍ਝਮ੍ਹਿ ਪਞ੍ਹੇ ਉਪ੍ਪਨ੍ਨੇ ਤ੍ਵਂ ਕਥੇਯ੍ਯਾਸੀ’’ਤਿ. ਅਰਿਯੋ ਵਾ ਤੁਣ੍ਹੀਭਾਵੋ ਨਾਤਿਮਞ੍ਞਿਤਬ੍ਬੋਤਿ ਅਰਿਯਾ ਤੁਣ੍ਹੀ ਨਿਸੀਦਨ੍ਤਾ ਨ ਬਾਲਪੁਥੁਜ੍ਜਨਾ ਵਿਯ ਨਿਸੀਦਨ੍ਤਿ. ਅਞ੍ਞਤਰਂ ਕਮ੍ਮਟ੍ਠਾਨਂ ਗਹੇਤ੍ਵਾਵ ਨਿਸੀਦਨ੍ਤਿ. ਇਤਿ ਕਮ੍ਮਟ੍ਠਾਨਮਨਸਿਕਾਰਵਸੇਨ ਤੁਣ੍ਹੀਭਾਵੋ ਅਰਿਯੋ ਤੁਣ੍ਹੀਭਾਵੋ ਨਾਮ, ਸੋ ਨਾਤਿਮਞ੍ਞਿਤਬ੍ਬੋ, ਕਿਂ ਕਮ੍ਮਟ੍ਠਾਨਾਨੁਯੋਗੇਨਾਤਿ ਨਾਵਜਾਨਿਤਬ੍ਬੋ; ਅਤ੍ਤਨੋ ਪਤਿਰੂਪਂ ਕਮ੍ਮਟ੍ਠਾਨਂ ਗਹੇਤ੍ਵਾਵ ਨਿਸੀਦਿਤਬ੍ਬਨ੍ਤਿ ਅਤ੍ਥੋ.

ਨ ਉਪਜ੍ਝਾਯੋ ਪੁਚ੍ਛਿਤਬ੍ਬੋਤਿ ‘‘ਕੋ ਨਾਮੋ ਤੁਯ੍ਹਂ ਉਪਜ੍ਝਾਯੋ’’ਤਿ ਨ ਪੁਚ੍ਛਿਤਬ੍ਬੋ. ਏਸ ਨਯੋ ਸਬ੍ਬਤ੍ਥ. ਨ ਜਾਤੀਤਿ ‘‘ਖਤ੍ਤਿਯਜਾਤਿਯੋ ਤ੍ਵਂ ਬ੍ਰਾਹ੍ਮਣਜਾਤਿਯੋ’’ਤਿ ਏਵਂ ਜਾਤਿ ਨ ਪੁਚ੍ਛਿਤਬ੍ਬਾ. ਨ ਆਗਮੋਤਿ ‘‘ਦੀਘਭਾਣਕੋਸਿ ਤ੍ਵਂ ਮਜ੍ਝਿਮਭਾਣਕੋ’’ਤਿ ਏਵਂ ਆਗਮੋ ਨ ਪੁਚ੍ਛਿਤਬ੍ਬੋ. ਕੁਲਪਦੇਸੋਤਿ ਖਤ੍ਤਿਯਕੁਲਾਦਿਵਸੇਨੇਵ ਵੇਦਿਤਬ੍ਬੋ. ਅਤ੍ਰਸ੍ਸ ਪੇਮਂ ਵਾ ਦੋਸੋ ਵਾਤਿ ਅਤ੍ਰ ਪੁਗ੍ਗਲੇ ਏਤੇਸਂ ਕਾਰਣਾਨਂ ਅਞ੍ਞਤਰਵਸੇਨ ਪੇਮਂ ਵਾ ਭਵੇਯ੍ਯ ਦੋਸੋ ਵਾ.

ਨੋ ਪਰਿਸਕਪ੍ਪਿਕੇਨਾਤਿ ਪਰਿਸਕਪ੍ਪਕੇਨ ਪਰਿਸਾਨੁਵਿਧਾਯਕੇਨ ਨ ਭਵਿਤਬ੍ਬਂ; ਯਂ ਪਰਿਸਾਯ ਰੁਚ੍ਚਤਿ, ਤਦੇਵ ਚੇਤੇਤ੍ਵਾ ਕਪ੍ਪੇਤ੍ਵਾ ਨ ਕਥੇਤਬ੍ਬਨ੍ਤਿ ਅਤ੍ਥੋ. ਨ ਹਤ੍ਥਮੁਦ੍ਦਾ ਦਸ੍ਸੇਤਬ੍ਬਾਤਿ ਕਥੇਤਬ੍ਬੇ ਚ ਅਕਥੇਤਬ੍ਬੇ ਚ ਸਞ੍ਞਾਜਨਨਤ੍ਥਂ ਹਤ੍ਥਵਿਕਾਰੋ ਨ ਕਾਤਬ੍ਬੋ.

ਅਤ੍ਥਂ ਅਨੁਵਿਧਿਯਨ੍ਤੇਨਾਤਿ ਵਿਨਿਚ੍ਛਯਪਟਿਵੇਧਮੇਵ ਸਲ੍ਲਕ੍ਖੇਨ੍ਤੇਨ ‘‘ਇਦਂ ਸੁਤ੍ਤਂ ਉਪਲਬ੍ਭਤਿ, ਇਮਸ੍ਮਿਂ ਵਿਨਿਚ੍ਛਯੇ ਇਦਂ ਵਕ੍ਖਾਮੀ’’ਤਿ ਏਵਂ ਪਰਿਤੁਲਯਨ੍ਤੇਨ ਨਿਸੀਦਿਤਬ੍ਬਨ੍ਤਿ ਅਤ੍ਥੋ. ਨ ਚ ਆਸਨਾ ਵੁਟ੍ਠਾਤਬ੍ਬਨ੍ਤਿ ਨ ਆਸਨਾ ਵੁਟ੍ਠਾਯ ਸਨ੍ਨਿਪਾਤਮਣ੍ਡਲੇ ਵਿਚਰਿਤਬ੍ਬਂ, ਵਿਨਯਧਰੇ ਉਟ੍ਠਿਤੇ ਸਬ੍ਬਾ ਪਰਿਸਾ ਉਟ੍ਠਹਤਿ. ਨ ਵੀਤਿਹਾਤਬ੍ਬਨ੍ਤਿ ਨ ਵਿਨਿਚ੍ਛਯੋ ਹਾਪੇਤਬ੍ਬੋ. ਨ ਕੁਮ੍ਮਗ੍ਗੋ ਸੇਵਿਤਬ੍ਬੋਤਿ ਨ ਆਪਤ੍ਤਿ ਦੀਪੇਤਬ੍ਬਾ. ਅਸਾਹਸਿਕੇਨ ਭਵਿਤਬ੍ਬਨ੍ਤਿ ਨ ਸਹਸਾਕਾਰਿਨਾ ਭਵਿਤਬ੍ਬਂ; ਸਹਸਾ ਦੁਰੁਤ੍ਤਵਚਨਂ ਨ ਕਥੇਤਬ੍ਬਨ੍ਤਿ ਅਤ੍ਥੋ. ਵਚਨਕ੍ਖਮੇਨਾਤਿ ਦੁਰੁਤ੍ਤਵਾਚਂ ਖਮਨਸੀਲੇਨ. ਹਿਤਪਰਿਸਕ੍ਕਿਨਾਤਿ ਹਿਤੇਸਿਨਾ ਹਿਤਗਵੇਸਿਨਾ ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ ਉਪਟ੍ਠਾਪੇਤਬ੍ਬੋਤਿ ਅਯਂ ਪਦਦ੍ਵਯੇਪਿ ਅਧਿਪ੍ਪਾਯੋ. ਅਨਸੁਰੁਤ੍ਤੇਨਾਤਿ ਨ ਅਸੁਰੁਤ੍ਤੇਨ. ਅਸੁਰੁਤ੍ਤਂ ਵੁਚ੍ਚਤਿ ਵਿਗ੍ਗਾਹਿਕਕਥਾਸਙ੍ਖਾਤਂ ਅਸੁਨ੍ਦਰਵਚਨਂ; ਤਂ ਨ ਕਥੇਤਬ੍ਬਨ੍ਤਿ ਅਤ੍ਥੋ. ਅਤ੍ਤਾ ਪਰਿਗ੍ਗਹੇਤਬ੍ਬੋਤਿ ‘‘ਵਿਨਿਚ੍ਛਿਨਿਤੁਂ ਵੂਪਸਮੇਤੁਂ ਸਕ੍ਖਿਸ੍ਸਾਮਿ ਨੁ ਖੋ ਨੋ’’ਤਿ ਏਵਂ ਅਤ੍ਤਾ ਪਰਿਗ੍ਗਹੇਤਬ੍ਬੋ; ਅਤ੍ਤਨੋ ਪਮਾਣਂ ਜਾਨਿਤਬ੍ਬਨ੍ਤਿ ਅਤ੍ਥੋ. ਪਰੋ ਪਰਿਗ੍ਗਹੇਤਬ੍ਬੋਤਿ ‘‘ਲਜ੍ਜਿਯਾ ਨੁ ਖੋ ਅਯਂ ਪਰਿਸਾ, ਸਕ੍ਕਾ ਸਞ੍ਞਾਪੇਤੁਂ ਉਦਾਹੁ ਨੋ’’ਤਿ ਏਵਂ ਪਰੋ ਪਰਿਗ੍ਗਹੇਤਬ੍ਬੋ.

ਚੋਦਕੋ ਪਰਿਗ੍ਗਹੇਤਬ੍ਬੋਤਿ ‘‘ਧਮ੍ਮਚੋਦਕੋ ਨੁ ਖੋ ਨੋ’’ਤਿ ਏਵਂ ਪਰਿਗ੍ਗਹੇਤਬ੍ਬੋ. ਚੁਦਿਤਕੋ ਪਰਿਗ੍ਗਹੇਤਬ੍ਬੋਤਿ ‘‘ਧਮ੍ਮਚੁਦਿਤਕੋ ਨੁ ਖੋ ਨੋ’’ਤਿ ਏਵਂ ਪਰਿਗ੍ਗਹੇਤਬ੍ਬੋ. ਅਧਮ੍ਮਚੋਦਕੋ ਪਰਿਗ੍ਗਹੇਤਬ੍ਬੋਤਿ ਤਸ੍ਸ ਪਮਾਣਂ ਜਾਨਿਤਬ੍ਬਂ. ਸੇਸੇਸੁਪਿ ਏਸੇਵ ਨਯੋ. ਵੁਤ੍ਤਂ ਅਹਾਪੇਨ੍ਤੇਨਾਤਿ ਚੋਦਕਚੁਦਿਤਕੇਹਿ ਵੁਤ੍ਤਵਚਨਂ ਅਹਾਪੇਨ੍ਤੇਨ. ਅਵੁਤ੍ਤਂ ਅਪਕਾਸੇਨ੍ਤੇਨਾਤਿ ਅਨੋਸਟਂ ਵਤ੍ਥੁਂ ਅਪ੍ਪਕਾਸੇਨ੍ਤੇਨ. ਮਨ੍ਦੋ ਹਾਸੇਤਬ੍ਬੋਤਿ ਮਨ੍ਦੋ ਮੋਮੂਹੋ ਪਗ੍ਗਣ੍ਹਿਤਬ੍ਬੋ, ‘‘ਨਨੁ ਤ੍ਵਂ ਕੁਲਪੁਤ੍ਤੋ’’ਤਿ ਉਤ੍ਤੇਜੇਤ੍ਵਾ ਅਨੁਯੋਗਵਤ੍ਤਂ ਕਥਾਪੇਤ੍ਵਾ ਤਸ੍ਸ ਅਨੁਯੋਗੋ ਗਣ੍ਹਿਤਬ੍ਬੋ. ਭੀਰੂ ਅਸ੍ਸਾਸੇਤਬ੍ਬੋਤਿ ਯਸ੍ਸ ਸਙ੍ਘਮਜ੍ਝਂ ਵਾ ਗਣਮਜ੍ਝਂ ਵਾ ਅਨੋਸਟਪੁਬ੍ਬਤ੍ਤਾ ਸਾਰਜ੍ਜਂ ਉਪ੍ਪਜ੍ਜਤਿ, ਤਾਦਿਸੋ ‘‘ਮਾ ਭਾਯਿ, ਵਿਸ੍ਸਟ੍ਠੋ ਕਥੇਹਿ, ਮਯਂ ਤੇ ਉਪਤ੍ਥਮ੍ਭਾ ਭਵਿਸ੍ਸਾਮਾ’’ਤਿ ਵਤ੍ਵਾਪਿ ਅਨੁਯੋਗਵਤ੍ਤਂ ਕਥਾਪੇਤਬ੍ਬੋ. ਚਣ੍ਡੋ ਨਿਸੇਧੇਤਬ੍ਬੋਤਿ ਅਪਸਾਦੇਤਬ੍ਬੋ ਤਜ੍ਜੇਤਬ੍ਬੋ. ਅਸੁਚਿ ਵਿਭਾਵੇਤਬ੍ਬੋਤਿ ਅਲਜ੍ਜਿਂ ਪਕਾਸੇਤ੍ਵਾ ਆਪਤ੍ਤਿਂ ਦੇਸਾਪੇਤਬ੍ਬੋ. ਉਜੁਮਦ੍ਦਵੇਨਾਤਿ ਯੋ ਭਿਕ੍ਖੁ ਉਜੁ ਸੀਲਵਾ ਕਾਯਵਙ੍ਕਾਦਿਰਹਿਤੋ, ਸੋ ਮਦ੍ਦਵੇਨੇਵ ਉਪਚਰਿਤਬ੍ਬੋ. ਧਮ੍ਮੇਸੁ ਚ ਪੁਗ੍ਗਲੇਸੁ ਚਾਤਿ ਏਤ੍ਥ ਯੋ ਧਮ੍ਮਗਰੁਕੋ ਹੋਤਿ ਨ ਪੁਗ੍ਗਲਗਰੁਕੋ, ਅਯਮੇਵ ਧਮ੍ਮੇਸੁ ਚ ਪੁਗ੍ਗਲੇਸੁ ਚ ਮਜ੍ਝਤ੍ਤੋਤਿ ਵੇਦਿਤਬ੍ਬੋ.

੩੬੬. ਸੁਤ੍ਤਂ ਸਂਸਨ੍ਦਨਤ੍ਥਾਯਾਤਿਆਦੀਸੁ ਤੇਨ ਚ ਪਨ ਏਵਂ ਸਬ੍ਰਹ੍ਮਚਾਰੀਨਂ ਪਿਯਮਨਾਪਗਰੁਭਾਵਨੀਯੇਨ ਅਨੁਵਿਜ੍ਜਕੇਨ ਸਮੁਦਾਹਟੇਸੁ ਸੁਤ੍ਤਾਦੀਸੁ ਸੁਤ੍ਤਂ ਸਂਸਨ੍ਦਨਤ੍ਥਾਯ; ਆਪਤ੍ਤਾਨਾਪਤ੍ਤੀਨਂ ਸਂਸਨ੍ਦਨਤ੍ਥਨ੍ਤਿ ਵੇਦਿਤਬ੍ਬਂ. ਓਪਮ੍ਮਂ ਨਿਦਸ੍ਸਨਤ੍ਥਾਯਾਤਿ ਓਪਮ੍ਮਂ ਅਤ੍ਥਦਸ੍ਸਨਤ੍ਥਾਯ. ਅਤ੍ਥੋ ਵਿਞ੍ਞਾਪਨਤ੍ਥਾਯਾਤਿ ਅਤ੍ਥੋ ਜਾਨਾਪਨਤ੍ਥਾਯ. ਪਟਿਪੁਚ੍ਛਾ ਠਪਨਤ੍ਥਾਯਾਤਿ ਪੁਚ੍ਛਾ ਪੁਗ੍ਗਲਸ੍ਸ ਠਪਨਤ੍ਥਾਯ. ਓਕਾਸਕਮ੍ਮਂ ਚੋਦਨਤ੍ਥਾਯਾਤਿ ਵਤ੍ਥੁਨਾ ਵਾ ਆਪਤ੍ਤਿਯਾ ਵਾ ਚੋਦਨਤ੍ਥਾਯ. ਚੋਦਨਾ ਸਾਰਣਤ੍ਥਾਯਾਤਿ ਦੋਸਾਦੋਸਂ ਸਰਾਪਨਤ੍ਥਾਯ. ਸਾਰਣਾ ਸਵਚਨੀਯਤ੍ਥਾਯਾਤਿ ਦੋਸਾਦੋਸਸਾਰਣਾ ਸਵਚਨੀਯਕਰਣਤ੍ਥਾਯ. ਸਵਚਨੀਯਂ ਪਲਿਬੋਧਤ੍ਥਾਯਾਤਿ ਸਵਚਨੀਯਂ ‘‘ਇਮਮ੍ਹਾ ਆਵਾਸਾ ਪਰਂ ਮਾ ਪਕ੍ਕਮੀ’’ਤਿ ਏਵਂ ਪਲਿਬੋਧਤ੍ਥਾਯ. ਪਲਿਬੋਧੋ ਵਿਨਿਚ੍ਛਯਤ੍ਥਾਯਾਤਿ ਵਿਨਿਚ੍ਛਯਂ ਪਾਪਨਤ੍ਥਾਯ. ਵਿਨਿਚ੍ਛਯੋ ਸਨ੍ਤੀਰਣਤ੍ਥਾਯਾਤਿ ਦੋਸਾਦੋਸਂ ਸਨ੍ਤੀਰਣਤ੍ਥਾਯ ਤੁਲਨਤ੍ਥਾਯ. ਸਨ੍ਤੀਰਣਂ ਠਾਨਾਟ੍ਠਾਨਗਮਨਤ੍ਥਾਯਾਤਿ ਆਪਤ੍ਤਿਅਨਾਪਤ੍ਤਿਗਰੁਕਲਹੁਕਾਪਤ੍ਤਿਜਾਨਨਤ੍ਥਾਯ. ਸਙ੍ਘੋ ਸਮ੍ਪਰਿਗ੍ਗਹਸਮ੍ਪਟਿਚ੍ਛਨਤ੍ਥਾਯਾਤਿ ਵਿਨਿਚ੍ਛਯਸਮ੍ਪਟਿਗ੍ਗਹਣਤ੍ਥਾਯ ਚ; ਸੁਵਿਨਿਚ੍ਛਿਤਦੁਬ੍ਬਿਨਿਚ੍ਛਿਤਭਾਵਜਾਨਨਤ੍ਥਾਯ ਚਾਤਿ ਅਤ੍ਥੋ. ਪਚ੍ਚੇਕਟ੍ਠਾਯਿਨੋ ਅਵਿਸਂਵਾਦਕਟ੍ਠਾਯਿਨੋਤਿ ਇਸ੍ਸਰਿਯਾਧਿਪਚ੍ਚਜੇਟ੍ਠਕਟ੍ਠਾਨੇ ਚ ਅਵਿਸਂਵਾਦਕਟ੍ਠਾਨੇ ਚ ਠਿਤਾ; ਨ ਤੇ ਅਪਸਾਦੇਤਬ੍ਬਾਤਿ ਅਤ੍ਥੋ.

ਇਦਾਨਿ ਯੇ ਮਨ੍ਦਾ ਮਨ੍ਦਬੁਦ੍ਧਿਨੋ ਏਵਂ ਵਦੇਯ੍ਯੁਂ ‘‘ਵਿਨਯੋ ਨਾਮ ਕਿਮਤ੍ਥਾਯਾ’’ਤਿ ਤੇਸਂ ਵਚਨੋਕਾਸਪਿਦਹਨਤ੍ਥਮਤ੍ਤਂ ਦਸ੍ਸੇਤੁਂ ਵਿਨਯੋ ਸਂਵਰਤ੍ਥਾਯਾਤਿਆਦਿਮਾਹ. ਤਤ੍ਥ ਵਿਨਯੋ ਸਂਵਰਤ੍ਥਾਯਾਤਿ ਸਕਲਾਪਿ ਵਿਨਯਪਞ੍ਞਤ੍ਤਿ ਕਾਯਵਚੀਦ੍ਵਾਰਸਂਵਰਤ੍ਥਾਯ. ਆਜੀਵਵਿਸੁਦ੍ਧਿਪਰਿਯੋਸਾਨਸ੍ਸ ਸੀਲਸ੍ਸ ਉਪਨਿਸ੍ਸਯੋ ਹੋਤਿ; ਪਚ੍ਚਯੋ ਹੋਤੀਤਿ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ. ਅਪਿਚੇਤ੍ਥ ਅਵਿਪ੍ਪਟਿਸਾਰੋਤਿ ਪਾਪਪੁਞ੍ਞਾਨਂ ਕਤਾਕਤਵਸੇਨ ਚਿਤ੍ਤਵਿਪ੍ਪਟਿਸਾਰਾਭਾਵੋ. ਪਾਮੁਜ੍ਜਨ੍ਤਿ ਦੁਬ੍ਬਲਾ ਤਰੁਣਪੀਤਿ. ਪੀਤੀਤਿ ਬਲਵਾ ਬਹਲਪੀਤਿ. ਪਸ੍ਸਦ੍ਧੀਤਿ ਕਾਯਚਿਤ੍ਤਦਰਥਪਟਿਪ੍ਪਸ੍ਸਦ੍ਧਿ. ਸੁਖਨ੍ਤਿ ਕਾਯਿਕਚੇਤਸਿਕਸੁਖਂ. ਤਞ੍ਹਿ ਦੁਵਿਧਮ੍ਪਿ ਸਮਾਧਿਸ੍ਸ ਉਪਨਿਸ੍ਸਯਪਚ੍ਚਯੋ ਹੋਤਿ. ਸਮਾਧੀਤਿ ਚਿਤ੍ਤੇਕਗ੍ਗਤਾ. ਯਥਾਭੂਤਞਾਣਦਸ੍ਸਨਨ੍ਤਿ ਤਰੁਣਵਿਪਸ੍ਸਨਾ; ਉਦਯਬ੍ਬਯਞਾਣਸ੍ਸੇਤਂ ਅਧਿਵਚਨਂ. ਚਿਤ੍ਤੇਕਗ੍ਗਤਾ ਹਿ ਤਰੁਣਵਿਪਸ੍ਸਨਾਯ ਉਪਨਿਸ੍ਸਯਪਚ੍ਚਯੋ ਹੋਤਿ. ਨਿਬ੍ਬਿਦਾਤਿ ਸਿਖਾਪਤ੍ਤਾ ਵੁਟ੍ਠਾਨਗਾਮਿਨਿਬਲਵਵਿਪਸ੍ਸਨਾ. ਵਿਰਾਗੋਤਿ ਅਰਿਯਮਗ੍ਗੋ. ਵਿਮੁਤ੍ਤੀਤਿ ਅਰਹਤ੍ਤਫਲਂ. ਚਤੁਬ੍ਬਿਧੋਪਿ ਹਿ ਅਰਿਯਮਗ੍ਗੋ ਅਰਹਤ੍ਤਫਲਸ੍ਸ ਉਪਨਿਸ੍ਸਯਪਚ੍ਚਯੋ ਹੋਤਿ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਪਚ੍ਚਵੇਕ੍ਖਣਾਞਾਣਂ. ਵਿਮੁਤ੍ਤਿਞਾਣਦਸ੍ਸਨਂ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯਾਤਿ ਅਪਚ੍ਚਯਪਰਿਨਿਬ੍ਬਾਨਤ੍ਥਾਯ. ਅਪਚ੍ਚਯਪਰਿਨਿਬ੍ਬਾਨਸ੍ਸ ਹਿ ਤਂ ਪਚ੍ਚਯੋ ਹੋਤਿ, ਤਸ੍ਮਿਂ ਅਨੁਪ੍ਪਤ੍ਤੇ ਅਵਸ੍ਸਂ ਪਰਿਨਿਬ੍ਬਾਯਿਤਬ੍ਬਤੋਤਿ. ਏਤਦਤ੍ਥਾ ਕਥਾਤਿ ਅਯਂ ਵਿਨਯਕਥਾ ਨਾਮ ਏਤਦਤ੍ਥਾ. ਮਨ੍ਤਨਾਤਿ ਵਿਨਯਮਨ੍ਤਨਾ ਏਵ. ਉਪਨਿਸਾਤਿ ਅਯਂ ‘‘ਵਿਨਯੋ ਸਂਵਰਤ੍ਥਾਯਾ’’ਤਿਆਦਿਕਾ ਪਰਮ੍ਪਰਪਚ੍ਚਯਤਾਪਿ ਏਤਦਤ੍ਥਾਯ. ਸੋਤਾਵਧਾਨਨ੍ਤਿ ਇਮਿਸ੍ਸਾ ਪਰਮ੍ਪਰਪਚ੍ਚਯਕਥਾਯ ਸੋਤਾਵਧਾਨਂ. ਇਮਂ ਕਥਂ ਸੁਤ੍ਵਾ ਯਂ ਉਪ੍ਪਜ੍ਜਤਿ ਞਾਣਂ, ਤਮ੍ਪਿ ਏਤਦਤ੍ਥਾਯ. ਯਦਿਦਂ ਅਨੁਪਾਦਾ ਚਿਤ੍ਤਸ੍ਸ ਵਿਮੋਕ੍ਖੋਤਿ ਯੋ ਅਯਂ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍ਵਾ ਚਿਤ੍ਤਸ੍ਸ ਅਰਹਤ੍ਤਫਲਸਙ੍ਖਾਤੋ ਵਿਮੋਕ੍ਖੋ, ਸੋਪਿ ਏਤਦਤ੍ਥਾਯ; ਅਪਚ੍ਚਯਪਰਿਨਿਬ੍ਬਾਨਤ੍ਥਾਯ ਏਵਾਤਿ ਅਤ੍ਥੋ.

੩੬੭. ਅਨੁਯੋਗਵਤ੍ਤਗਾਥਾਸੁ ਪਠਮਗਾਥਾ ਵੁਤ੍ਤਤ੍ਥਾ ਏਵ.

ਵਤ੍ਥੁਂ ਵਿਪਤ੍ਤਿਂ ਆਪਤ੍ਤਿਂ, ਨਿਦਾਨਂ ਆਕਾਰਅਕੋਵਿਦੋ ਪੁਬ੍ਬਾਪਰਂ ਨ ਜਾਨਾਤੀਤਿ ‘‘ਵਤ੍ਥੁ’’ਨ੍ਤਿਆਦੀਨਿ ‘‘ਨ ਜਾਨਾਤੀ’’ਤਿ ਪਦੇਨ ਸਮ੍ਬਨ੍ਧੋ. ‘‘ਅਕੋਵਿਦੋ’’ਤਿ ਪਦਸ੍ਸ ‘‘ਸ ਵੇ ਤਾਦਿਸਕੋ’’ਤਿ ਇਮਿਨਾ ਸਮ੍ਬਨ੍ਧੋ. ਤਸ੍ਮਾ ਅਯਮੇਤ੍ਥ ਯੋਜਨਾ – ਯੋ ਭਿਕ੍ਖੁ ਪਾਰਾਜਿਕਾਦੀਨਂ ਵਤ੍ਥੁਂ ਨ ਜਾਨਾਤਿ, ਚਤੁਬ੍ਬਿਧਂ ਵਿਪਤ੍ਤਿਂ ਨ ਜਾਨਾਤਿ, ਸਤ੍ਤਵਿਧਂ ਆਪਤ੍ਤਿਂ ਨ ਜਾਨਾਤਿ, ‘‘ਇਦਂ ਸਿਕ੍ਖਾਪਦਂ ਅਸੁਕਸ੍ਮਿਂ ਨਾਮ ਨਗਰੇ ਪਞ੍ਞਤ੍ਤ’’ਨ੍ਤਿ ਏਵਂ ਨਿਦਾਨਂ ਨ ਜਾਨਾਤਿ, ‘‘ਇਦਂ ਪੁਰਿਮਵਚਨਂ ਇਦਂ ਪਚ੍ਛਿਮਵਚਨ’’ਨ੍ਤਿ ਪੁਬ੍ਬਾਪਰਂ ਨ ਜਾਨਾਤਿ, ‘‘ਇਦਂ ਕਤਂ ਇਦਂ ਅਕਤ’’ਨ੍ਤਿ ਕਤਾਕਤਂ ਨ ਜਾਨਾਤਿ. ਸਮੇਨ ਚਾਤਿ ਤੇਨੇਵ ਪੁਬ੍ਬਾਪਰਂ ਅਜਾਨਨਸ੍ਸ ਸਮੇਨ ਅਞ੍ਞਾਣੇਨ, ‘‘ਕਤਾਕਤਂ ਨ ਜਾਨਾਤੀ’’ਤਿ ਵੁਤ੍ਤਂ ਹੋਤਿ; ਏਵਂ ਤਾਵ ਨਜਾਨਾਤਿ-ਪਦੇਨ ਸਦ੍ਧਿਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਯਂ ਪਨੇਤਂ ‘‘ਆਕਾਰਅਕੋਵਿਦੋ’’ਤਿ ਵੁਤ੍ਤਂ, ਤਤ੍ਥ ਆਕਾਰਅਕੋਵਿਦੋਤਿ ਕਾਰਣਾਕਾਰਣੇ ਅਕੋਵਿਦੋ. ਇਤਿ ਯ੍ਵਾਯਂ ਵਤ੍ਥੁਆਦੀਨਿਪਿ ਨ ਜਾਨਾਤਿ, ਆਕਾਰਸ੍ਸ ਚ ਅਕੋਵਿਦੋ, ਸ ਵੇ ਤਾਦਿਸਕੋ ਭਿਕ੍ਖੁ ਅਪਟਿਕ੍ਖੋਤਿ ਵੁਚ੍ਚਤਿ.

ਕਮ੍ਮਞ੍ਚ ਅਧਿਕਰਣਞ੍ਚਾਤਿ ਇਮੇਸਮ੍ਪਿ ਪਦਾਨਂ ‘‘ਨ ਜਾਨਾਤੀ’’ਤਿ ਪਦੇਨੇਵ ਸਮ੍ਬਨ੍ਧੋ. ਅਯਂ ਪਨੇਤ੍ਥ ਯੋਜਨਾ – ਤਥੇਵ ਇਤਿ ਯ੍ਵਾਯਂ ਕਮ੍ਮਞ੍ਚ ਨ ਜਾਨਾਤਿ, ਅਧਿਕਰਣਞ੍ਚ ਨ ਜਾਨਾਤਿ, ਸਤ੍ਤਪ੍ਪਕਾਰੇ ਸਮਥੇ ਚਾਪਿ ਅਕੋਵਿਦੋ, ਰਾਗਾਦੀਹਿ ਪਨ ਰਤ੍ਤੋ ਦੁਟ੍ਠੋ ਚ ਮੂਲ਼੍ਹੋ ਚ, ਭਯੇਨ ਭਯਾ ਗਚ੍ਛਤਿ, ਸਮ੍ਮੋਹੇਨ ਮੋਹਾ ਗਚ੍ਛਤਿ, ਰਤ੍ਤਤ੍ਤਾ ਪਨ ਦੁਟ੍ਠਤ੍ਤਾ ਚ ਛਨ੍ਦਾ ਦੋਸਾ ਚ ਗਚ੍ਛਤਿ, ਪਰਂ ਸਞ੍ਞਾਪੇਤੁਂ ਅਸਮਤ੍ਥਤਾਯ ਨ ਚ ਸਞ੍ਞਤ੍ਤਿਕੁਸਲੋ, ਕਾਰਣਾਕਾਰਣਦਸ੍ਸਨੇ ਅਸਮਤ੍ਥਤਾਯ ਨਿਜ੍ਝਤ੍ਤਿਯਾ ਚ ਅਕੋਵਿਦੋ ਅਤ੍ਤਨੋ ਸਦਿਸਾਯ ਪਰਿਸਾਯ ਲਦ੍ਧਤ੍ਤਾ ਲਦ੍ਧਪਕ੍ਖੋ, ਹਿਰਿਯਾ ਪਰਿਬਾਹਿਰਤ੍ਤਾ ਅਹਿਰਿਕੋ, ਕਾਲ਼ਕੇਹਿ ਕਮ੍ਮੇਹਿ ਸਮਨ੍ਨਾਗਤਤ੍ਤਾ ਕਣ੍ਹਕਮ੍ਮੋ, ਧਮ੍ਮਾਦਰਿਯਪੁਗ੍ਗਲਾਦਰਿਯਾਨਂ ਅਭਾਵਤੋ ਅਨਾਦਰੋ, ਸ ਵੇ ਤਾਦਿਸਕੋ ਭਿਕ੍ਖੁ ਅਪਟਿਕ੍ਖੋਤਿ ਵੁਚ੍ਚਤਿ, ਨ ਪਟਿਕ੍ਖਿਤਬ੍ਬੋ ਨ ਓਲੋਕੇਤਬ੍ਬੋ, ਨ ਸਮ੍ਮਨ੍ਨਿਤ੍ਵਾ ਇਸ੍ਸਰਿਯਾਧਿਪਚ੍ਚਜੇਟ੍ਠਕਟ੍ਠਾਨੇ ਠਪੇਤਬ੍ਬੋਤਿ ਅਤ੍ਥੋ. ਸੁਕ੍ਕਪਕ੍ਖਗਾਥਾਨਮ੍ਪਿ ਯੋਜਨਾਨਯੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ.

ਚੂਲ਼ਸਙ੍ਗਾਮਵਣ੍ਣਨਾ ਨਿਟ੍ਠਿਤਾ.