ਚੋਦਨਾਕਣ੍ਡਂ

ਅਨੁਵਿਜ੍ਜਕਕਿਚ੍ਚਵਣ੍ਣਨਾ

੩੬੦-੩੬੧. ਇਦਾਨਿ ਏਵਂ ਉਪ੍ਪਨ੍ਨਾਯ ਚੋਦਨਾਯ ਵਿਨਯਧਰੇਨ ਕਤ੍ਤਬ੍ਬਕਿਚ੍ਚਂ ਦਸ੍ਸੇਤੁਂ ਅਨੁਵਿਜ੍ਜਕੇਨਾਤਿਆਦਿ ਆਰਦ੍ਧਂ. ਤਤ੍ਥ ਦਿਟ੍ਠਂ ਦਿਟ੍ਠੇਨਾਤਿ ਗਾਥਾਯ ਅਯਮਤ੍ਥੋ – ਏਕੇਨੇਕੋ ਮਾਤੁਗਾਮੇਨ ਸਦ੍ਧਿਂ ਏਕਟ੍ਠਾਨਤੋ ਨਿਕ੍ਖਮਨ੍ਤੋ ਵਾ ਪਵਿਸਨ੍ਤੋ ਵਾ ਦਿਟ੍ਠੋ, ਸੋ ਤਂ ਪਾਰਾਜਿਕੇਨ ਚੋਦੇਤਿ, ਇਤਰੋ ਤਸ੍ਸ ਦਸ੍ਸਨਂ ਅਨੁਜਾਨਾਤਿ. ਤਂ ਪਨ ਦਸ੍ਸਨਂ ਪਟਿਚ੍ਚ ਪਾਰਾਜਿਕਂ ਨ ਉਪੇਤਿ, ਨ ਪਟਿਜਾਨਾਤਿ. ਏਵਮੇਤ੍ਥ ਯਂ ਤੇਨ ਦਿਟ੍ਠਂ, ਤਂ ਤਸ੍ਸ ‘‘ਦਿਟ੍ਠੋ ਮਯਾ’’ਤਿ ਇਮਿਨਾ ਦਿਟ੍ਠਵਚਨੇਨ ਸਮੇਤਿ. ਯਸ੍ਮਾ ਪਨ ਇਤਰੋ ਤਂ ਦਸ੍ਸਨਂ ਪਟਿਚ੍ਚ ਦੋਸਂ ਨ ਪਟਿਜਾਨਾਤਿ, ਤਸ੍ਮਾ ਅਸੁਦ੍ਧਪਰਿਸਙ੍ਕਿਤੋ ਹੋਤਿ; ਅਮੂਲਕਪਰਿਸਙ੍ਕਿਤੋਤਿ ਅਤ੍ਥੋ. ਤਸ੍ਸ ਪੁਗ੍ਗਲਸ੍ਸ ‘‘ਸੁਦ੍ਧੋ ਅਹ’’ਨ੍ਤਿ ਪਟਿਞ੍ਞਾਯ ਤੇਨ ਸਦ੍ਧਿਂ ਉਪੋਸਥੋ ਕਾਤਬ੍ਬੋ. ਸੇਸਗਾਥਾਦ੍ਵਯੇਪਿ ਏਸੇਵ ਨਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਅਨੁਵਿਜ੍ਜਕਕਿਚ੍ਚਵਣ੍ਣਨਾ ਨਿਟ੍ਠਿਤਾ.

ਚੋਦਕਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ

੩੬੨-੩੬੩. ਚੋਦਨਾਯ ਕੋ ਆਦੀਤਿਆਦਿਪੁਚ੍ਛਾਨਂ ਵਿਸ੍ਸਜ੍ਜਨੇ ਸਚ੍ਚੇ ਚ ਅਕੁਪ੍ਪੇ ਚਾਤਿ ਸਚ੍ਚੇ ਪਤਿਟ੍ਠਾਤਬ੍ਬਂ ਅਕੁਪ੍ਪੇ ਚ. ਯਂ ਕਤਂ ਵਾ ਨ ਕਤਂ ਵਾ, ਤਦੇਵ ਵਤ੍ਤਬ੍ਬਂ, ਨ ਚ ਚੋਦਕੇ ਵਾ ਅਨੁਵਿਜ੍ਜਕੇ ਵਾ ਸਙ੍ਘੇ ਵਾ ਕੋਪੋ ਉਪ੍ਪਾਦੇਤਬ੍ਬੋ. ਓਤਿਣ੍ਣਾਨੋਤਿਣ੍ਣਂ ਜਾਨਿਤਬ੍ਬਨ੍ਤਿ ਓਤਿਣ੍ਣਞ੍ਚ ਅਨੋਤਿਣ੍ਣਞ੍ਚ ਵਚਨਂ ਜਾਨਿਤਬ੍ਬਂ. ਤਤ੍ਰਾਯਂ ਜਾਨਨਵਿਧਿ – ਏਤ੍ਤਕਾ ਚੋਦਕਸ੍ਸ ਪੁਬ੍ਬਕਥਾ, ਏਤ੍ਤਕਾ ਪਚ੍ਛਿਮਕਥਾ, ਏਤ੍ਤਕਾ ਚੁਦਿਤਕਸ੍ਸ ਪੁਬ੍ਬਕਥਾ, ਏਤ੍ਤਕਾ ਪਚ੍ਛਿਮਕਥਾਤਿ ਜਾਨਿਤਬ੍ਬਾ. ਚੋਦਕਸ੍ਸ ਪਮਾਣਂ ਗਣ੍ਹਿਤਬ੍ਬਂ, ਚੁਦਿਤਕਸ੍ਸ ਪਮਾਣਂ ਗਣ੍ਹਿਤਬ੍ਬਂ, ਅਨੁਵਿਜ੍ਜਕਸ੍ਸ ਪਮਾਣਂ ਗਣ੍ਹਿਤਬ੍ਬਂ, ਅਨੁਵਿਜ੍ਜਕੋ ਅਪ੍ਪਮਤ੍ਤਕਮ੍ਪਿ ਅਹਾਪੇਨ੍ਤੋ ‘‘ਆਵੁਸੋ ਸਮਨ੍ਨਾਹਰਿਤ੍ਵਾ ਉਜੁਂ ਕਤ੍ਵਾ ਆਹਰਾ’’ਤਿ ਵਤ੍ਤਬ੍ਬੋ, ਸਙ੍ਘੇਨ ਏਵਂ ਪਟਿਪਜ੍ਜਿਤਬ੍ਬਂ. ਯੇਨ ਧਮ੍ਮੇਨ ਯੇਨ ਵਿਨਯੇਨ ਯੇਨ ਸਤ੍ਥੁਸਾਸਨੇਨ ਤਂ ਅਧਿਕਰਣਂ ਵੂਪਸਮ੍ਮਤੀਤਿ ਏਤ੍ਥ ਧਮ੍ਮੋਤਿ ਭੂਤਂ ਵਤ੍ਥੁ. ਵਿਨਯੋਤਿ ਚੋਦਨਾ ਚੇਵ ਸਾਰਣਾ ਚ. ਸਤ੍ਥੁਸਾਸਨਨ੍ਤਿ ਞਤ੍ਤਿਸਮ੍ਪਦਾ ਚੇਵ ਅਨੁਸ੍ਸਾਵਨਸਮ੍ਪਦਾ ਚ. ਏਤੇਨ ਹਿ ਧਮ੍ਮੇਨ ਚ ਵਿਨਯੇਨ ਚ ਸਤ੍ਥੁਸਾਸਨੇਨ ਚ ਅਧਿਕਰਣਂ ਵੂਪਸਮਤਿ, ਤਸ੍ਮਾ ਅਨੁਵਿਜ੍ਜਕੇਨ ਭੂਤੇਨ ਵਤ੍ਥੁਨਾ ਚੋਦੇਤ੍ਵਾ ਆਪਤ੍ਤਿਂ ਸਾਰੇਤ੍ਵਾ ਞਤ੍ਤਿਸਮ੍ਪਦਾਯ ਚੇਵ ਅਨੁਸ੍ਸਾਵਨਸਮ੍ਪਦਾਯ ਚ ਤਂ ਅਧਿਕਰਣਂ ਵੂਪਸਮੇਤਬ੍ਬਂ, ਅਨੁਵਿਜ੍ਜਕੇਨ ਏਵਂ ਪਟਿਪਜ੍ਜਿਤਬ੍ਬਂ. ਸੇਸਮੇਤ੍ਥ ਉਤ੍ਤਾਨਮੇਵ.

੩੬੪. ਉਪੋਸਥੋ ਕਿਮਤ੍ਥਾਯਾਤਿਆਦਿਪੁਚ੍ਛਾਵਿਸ੍ਸਜ੍ਜਨਮ੍ਪਿ ਉਤ੍ਤਾਨਮੇਵ. ਅਵਸਾਨਗਾਥਾਸੁ ਥੇਰੇ ਚ ਪਰਿਭਾਸਤੀਤਿ ਅਵਮਞ੍ਞਂ ਕਰੋਨ੍ਤੋ ‘‘ਕਿਂ ਇਮੇ ਜਾਨਨ੍ਤੀ’’ਤਿ ਪਰਿਭਾਸਤਿ. ਖਤੋ ਉਪਹਤਿਨ੍ਦ੍ਰਿਯੋਤਿ ਤਾਯ ਛਨ੍ਦਾਦਿਗਾਮਿਤਾਯ ਤੇਨ ਚ ਪਰਿਭਾਸਨੇਨ ਅਤ੍ਤਨਾ ਅਤ੍ਤਨੋ ਖਤਤ੍ਤਾ ਖਤੋ. ਸਦ੍ਧਾਦੀਨਞ੍ਚ ਇਨ੍ਦ੍ਰਿਯਾਨਂ ਉਪਹਤਤ੍ਤਾ ਉਪਹਤਿਨ੍ਦ੍ਰਿਯੋ. ਨਿਰਯਂ ਗਚ੍ਛਤਿ ਦੁਮ੍ਮੇਧੋ, ਨ ਚ ਸਿਕ੍ਖਾਯ ਗਾਰਵੋਤਿ ਸੋ ਖਤੋ ਉਪਹਤਿਨ੍ਦ੍ਰਿਯੋ ਪਞ੍ਞਾਯ ਅਭਾਵਤੋ ਦੁਮ੍ਮੇਧੋ ਤੀਸੁ ਸਿਕ੍ਖਾਸੁ ਅਸਿਕ੍ਖਨਤੋ ਨ ਚ ਸਿਕ੍ਖਾਯ ਗਾਰਵੋ ਕਾਯਸ੍ਸ ਭੇਦਾ ਨਿਰਯਮੇਵ ਉਪਗਚ੍ਛਤਿ, ਤਸ੍ਮਾ ਨ ਚ ਆਮਿਸਂ ਨਿਸ੍ਸਾਯ…ਪੇ… ਯਥਾ ਧਮ੍ਮੋ ਤਥਾ ਕਰੇਤਿ. ਤਸ੍ਸਤ੍ਥੋ ਨ ਚ ਆਮਿਸਂ ਨਿਸ੍ਸਾਯ ਕਰੇ, ਚੁਦਿਤਕਚੋਦਕੇਸੁ ਹਿ ਅਞ੍ਞਤਰੇਨ ਦਿਨ੍ਨਂ ਚੀਵਰਾਦਿਆਮਿਸਂ ਗਣ੍ਹਨ੍ਤੋ ਆਮਿਸਂ ਨਿਸ੍ਸਾਯ ਕਰੋਤਿ, ਏਵਂ ਨ ਕਰੇਯ੍ਯ. ਨ ਚ ਨਿਸ੍ਸਾਯ ਪੁਗ੍ਗਲਨ੍ਤਿ ‘‘ਅਯਂ ਮੇ ਉਪਜ੍ਝਾਯੋ ਵਾ ਆਚਰਿਯੋ ਵਾ’’ਤਿਆਦਿਨਾ ਨਯੇਨ ਛਨ੍ਦਾਦੀਹਿ ਗਚ੍ਛਨ੍ਤੋ ਪੁਗ੍ਗਲਂ ਨਿਸ੍ਸਾਯ ਕਰੋਤਿ, ਏਵਂ ਨ ਕਰੇਯ੍ਯ. ਅਥ ਖੋ ਉਭੋਪੇਤੇ ਵਿਵਜ੍ਜੇਤ੍ਵਾ ਯਥਾ ਧਮ੍ਮੋ ਠਿਤੋ, ਤਥੇਵ ਕਰੇਯ੍ਯਾਤਿ.

ਉਪਕਣ੍ਣਕਂ ਜਪ੍ਪਤੀਤਿ ‘‘ਏਵਂ ਕਥੇਹਿ, ਮਾ ਏਵਂ ਕਥਯਿਤ੍ਥਾ’’ਤਿ ਕਣ੍ਣਮੂਲੇ ਮਨ੍ਤੇਤਿ. ਜਿਮ੍ਹਂ ਪੇਕ੍ਖਤੀਤਿ ਦੋਸਮੇਵ ਗਵੇਸਤਿ. ਵੀਤਿਹਰਤੀਤਿ ਵਿਨਿਚ੍ਛਯਂ ਹਾਪੇਤਿ. ਕੁਮ੍ਮਗ੍ਗਂ ਪਟਿਸੇਵਤੀਤਿ ਆਪਤ੍ਤਿਂ ਦੀਪੇਤਿ.

ਅਕਾਲੇਨ ਚ ਚੋਦੇਤੀਤਿ ਅਨੋਕਾਸੇ ਅਨਜ੍ਝਿਟ੍ਠੋਵ ਚੋਦੇਤਿ. ਪੁਬ੍ਬਾਪਰਂ ਨ ਜਾਨਾਤੀਤਿ ਪੁਰਿਮਕਥਞ੍ਚ ਪਚ੍ਛਿਮਕਥਞ੍ਚ ਨ ਜਾਨਾਤਿ.

ਅਨੁਸਨ੍ਧਿਵਚਨਪਥਂ ਨ ਜਾਨਾਤੀਤਿ ਕਥਾਨੁਸਨ੍ਧਿਵਿਨਿਚ੍ਛਯਾਨੁਸਨ੍ਧਿਵਸੇਨ ਵਚਨਂ ਨ ਜਾਨਾਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਚੋਦਨਾਕਣ੍ਡਵਣ੍ਣਨਾ ਨਿਟ੍ਠਿਤਾ.