ਸੋਲ਼ਸਮਹਾਵਾਰੋ

ਪਞ੍ਞਤ੍ਤਿਵਾਰਵਣ੍ਣਨਾ

ਵਿਸੁਦ੍ਧਪਰਿਵਾਰਸ੍ਸ, ਪਰਿਵਾਰੋਤਿ ਸਾਸਨੇ;

ਧਮ੍ਮਕ੍ਖਨ੍ਧਸਰੀਰਸ੍ਸ, ਖਨ੍ਧਕਾਨਂ ਅਨਨ੍ਤਰਾ.

ਸਙ੍ਗਹਂ ਯੋ ਸਮਾਰੁਲ਼੍ਹੋ, ਤਸ੍ਸ ਪੁਬ੍ਬਾਗਤਂ ਨਯਂ;

ਹਿਤ੍ਵਾ ਦਾਨਿ ਕਰਿਸ੍ਸਾਮਿ, ਅਨੁਤ੍ਤਾਨਤ੍ਥਵਣ੍ਣਨਂ.

੧. ਤਤ੍ਥ ਯਂ ਤੇਨ ਭਗਵਤਾ…ਪੇ… ਪਞ੍ਞਤ੍ਤਨ੍ਤਿ ਆਦਿਨਯਪ੍ਪਵਤ੍ਤਾਯ ਤਾਵ ਪੁਚ੍ਛਾਯ ਅਯਂ ਸਙ੍ਖੇਪਤ੍ਥੋ – ਯੋ ਸੋ ਭਗਵਾ ਸਾਸਨਸ੍ਸ ਚਿਰਟ੍ਠਿਤਿਕਤ੍ਥਂ ਧਮ੍ਮਸੇਨਾਪਤਿਨਾ ਸਦ੍ਧਮ੍ਮਗਾਰਵਬਹੁਮਾਨਵੇਗਸਮੁਸ੍ਸਿਤਂ ਅਞ੍ਜਲਿਂ ਸਿਰਸ੍ਮਿਂ ਪਤਿਟ੍ਠਾਪੇਤ੍ਵਾ ਯਾਚਿਤੋ ਦਸ ਅਤ੍ਥਵਸੇ ਪਟਿਚ੍ਚ ਵਿਨਯਪਞ੍ਞਤ੍ਤਿਂ ਪਞ੍ਞਪੇਸਿ, ਤੇਨ ਭਗਵਤਾ ਤਸ੍ਸ ਤਸ੍ਸ ਸਿਕ੍ਖਾਪਦਸ੍ਸ ਪਞ੍ਞਤ੍ਤਿਕਾਲਂ ਜਾਨਤਾ, ਤਸ੍ਸਾ ਤਸ੍ਸਾ ਸਿਕ੍ਖਾਪਦਪਞ੍ਞਤ੍ਤਿਯਾ ਦਸ ਅਤ੍ਥਵਸੇ ਪਸ੍ਸਤਾ; ਅਪਿਚ ਪੁਬ੍ਬੇਨਿਵਾਸਾਦੀਹਿ ਜਾਨਤਾ, ਦਿਬ੍ਬੇਨ ਚਕ੍ਖੁਨਾ ਪਸ੍ਸਤਾ, ਤੀਹਿ ਵਿਜ੍ਜਾਹਿ ਛਹਿ ਵਾ ਪਨ ਅਭਿਞ੍ਞਾਹਿ ਜਾਨਤਾ, ਸਬ੍ਬਤ੍ਥ ਅਪ੍ਪਟਿਹਤੇਨ ਸਮਨ੍ਤਚਕ੍ਖੁਨਾ ਪਸ੍ਸਤਾ, ਸਬ੍ਬਧਮ੍ਮਜਾਨਨਸਮਤ੍ਥਾਯ ਪਞ੍ਞਾਯ ਜਾਨਤਾ, ਸਬ੍ਬਸਤ੍ਤਾਨਂ ਚਕ੍ਖੁਵਿਸਯਾਤੀਤਾਨਿ ਤਿਰੋਕੁਟ੍ਟਾਦਿਗਤਾਨਿ ਚਾਪਿ ਰੂਪਾਨਿ ਅਤਿਵਿਸੁਦ੍ਧੇਨ ਮਂਸਚਕ੍ਖੁਨਾ ਚ ਪਸ੍ਸਤਾ, ਅਤ੍ਤਹਿਤਸਾਧਿਕਾਯ ਸਮਾਧਿਪਦਟ੍ਠਾਨਾਯ ਪਟਿਵੇਧਪਞ੍ਞਾਯ ਜਾਨਤਾ, ਪਰਹਿਤਸਾਧਿਕਾਯ ਕਰੁਣਾਪਦਟ੍ਠਾਨਾਯ ਦੇਸਨਾਪਞ੍ਞਾਯ ਪਸ੍ਸਤਾ, ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ‘‘ਯਂ ਪਠਮਂ ਪਾਰਾਜਿਕਂ ਪਞ੍ਞਤ੍ਤਂ, ਤਂ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਪਞ੍ਞਤ੍ਤਂ, ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਤ੍ਥਿ ਤਤ੍ਥ ਪਞ੍ਞਤ੍ਤਿ…ਪੇ… ਕੇਨਾਭਤ’’ਨ੍ਤਿ.

੨. ਪੁਚ੍ਛਾਵਿਸ੍ਸਜ੍ਜਨੇ ਪਨ ‘‘ਯਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਪਠਮਂ ਪਾਰਾਜਿਕ’’ਨ੍ਤਿ ਇਦਂ ਕੇਵਲਂ ਪੁਚ੍ਛਾਯ ਆਗਤਸ੍ਸ ਆਦਿਪਦਸ੍ਸ ਪਚ੍ਚੁਦ੍ਧਰਣਮਤ੍ਤਮੇਵ, ‘‘ਕਤ੍ਥ ਪਞ੍ਞਤ੍ਤਨ੍ਤਿ ਵੇਸਾਲਿਯਾ ਪਞ੍ਞਤ੍ਤਂ; ਕਂ ਆਰਬ੍ਭਾਤਿ ਸੁਦਿਨ੍ਨਂ ਕਲਨ੍ਦਪੁਤ੍ਤਂ ਆਰਬ੍ਭਾ’’ਤਿ ਏਵਮਾਦਿਨਾ ਪਨ ਨਯੇਨ ਪੁਨਪਿ ਏਤ੍ਥ ਏਕੇਕਂ ਪਦਂ ਪੁਚ੍ਛਿਤ੍ਵਾਵ ਵਿਸ੍ਸਜ੍ਜਿਤਂ. ਏਕਾ ਪਞ੍ਞਤ੍ਤੀਤਿ ‘‘ਯੋ ਪਨ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯ ਪਾਰਾਜਿਕੋ ਹੋਤਿ ਅਸਂਵਾਸੋ’’ਤਿ ਅਯਂ ਏਕਾ ਪਞ੍ਞਤ੍ਤਿ. ਦ੍ਵੇ ਅਨੁਪਞ੍ਞਤ੍ਤਿਯੋਤਿ ‘‘ਅਨ੍ਤਮਸੋ ਤਿਰਚ੍ਛਾਨਗਤਾਯਪੀ’’ਤਿ ਚ, ‘‘ਸਿਕ੍ਖਂ ਅਪਚ੍ਚਕ੍ਖਾਯਾ’’ਤਿ ਚ ਮਕ੍ਕਟਿਵਜ੍ਜਿਪੁਤ੍ਤਕਵਤ੍ਥੂਨਂ ਵਸੇਨ ਵੁਤ੍ਤਾ – ਇਮਾ ਦ੍ਵੇ ਅਨੁਪਞ੍ਞਤ੍ਤਿਯੋ. ਏਤ੍ਤਾਵਤਾ ‘‘ਅਤ੍ਥਿ ਤਤ੍ਥ ਪਞ੍ਞਤ੍ਤਿ ਅਨੁਪਞ੍ਞਤ੍ਤਿ ਅਨੁਪ੍ਪਨ੍ਨਪਞ੍ਞਤ੍ਤੀ’’ਤਿ ਇਮਿਸ੍ਸਾ ਪੁਚ੍ਛਾਯ ਦ੍ਵੇ ਕੋਟ੍ਠਾਸਾ ਵਿਸ੍ਸਜ੍ਜਿਤਾ ਹੋਨ੍ਤਿ. ਤਤਿਯਂ ਵਿਸ੍ਸਜ੍ਜੇਤੁਂ ਪਨ ‘‘ਅਨੁਪ੍ਪਨ੍ਨਪਞ੍ਞਤ੍ਤਿ ਤਸ੍ਮਿਂ ਨਤ੍ਥੀ’’ਤਿ ਵੁਤ੍ਤਂ. ਅਯਞ੍ਹਿ ਅਨੁਪ੍ਪਨ੍ਨਪਞ੍ਞਤ੍ਤਿ ਨਾਮ ਅਨੁਪ੍ਪਨ੍ਨੇ ਦੋਸੇ ਪਞ੍ਞਤ੍ਤਾ; ਸਾ ਅਟ੍ਠਗਰੁਧਮ੍ਮਵਸੇਨ ਭਿਕ੍ਖੁਨੀਨਂਯੇਵ ਆਗਤਾ, ਅਞ੍ਞਤ੍ਰ ਨਤ੍ਥਿ. ਤਸ੍ਮਾ ਵੁਤ੍ਤਂ ‘‘ਅਨੁਪ੍ਪਨ੍ਨਪਞ੍ਞਤ੍ਤਿ ਤਸ੍ਮਿਂ ਨਤ੍ਥੀ’’ਤਿ. ਸਬ੍ਬਤ੍ਥਪਞ੍ਞਤ੍ਤੀਤਿ ਮਜ੍ਝਿਮਦੇਸੇ ਚੇਵ ਪਚ੍ਚਨ੍ਤਿਮਜਨਪਦੇਸੁ ਚ ਸਬ੍ਬਤ੍ਥਪਞ੍ਞਤ੍ਤਿ. ਵਿਨਯਧਰਪਞ੍ਚਮੇਨ ਗਣੇਨ ‘‘ਉਪਸਮ੍ਪਦਾ, ਗੁਣਙ੍ਗੁਣੂਪਾਹਨਾ, ਧੁਵਨਹਾਨਂ, ਚਮ੍ਮਤ੍ਥਰਣ’’ਨ੍ਤਿ ਇਮਾਨਿ ਹਿ ਚਤ੍ਤਾਰਿ ਸਿਕ੍ਖਾਪਦਾਨਿ ਮਜ੍ਝਿਮਦੇਸੇਯੇਵ ਪਞ੍ਞਤ੍ਤਿ. ਏਤ੍ਥੇਵ ਏਤੇਹਿ ਆਪਤ੍ਤਿ ਹੋਤਿ, ਨ ਪਚ੍ਚਨ੍ਤਿਮਜਨਪਦੇਸੁ. ਸੇਸਾਨਿ ਸਬ੍ਬਾਨੇਵ ਸਬ੍ਬਤ੍ਥਪਞ੍ਞਤ੍ਤਿ ਨਾਮ.

ਸਾਧਾਰਣਪਞ੍ਞਤ੍ਤੀਤਿ ਭਿਕ੍ਖੂਨਞ੍ਚੇਵ ਭਿਕ੍ਖੁਨੀਨਞ੍ਚ ਸਾਧਾਰਣਪਞ੍ਞਤ੍ਤਿ; ਸੁਦ੍ਧਭਿਕ੍ਖੂਨਮੇਵ ਹਿ ਸੁਦ੍ਧਭਿਕ੍ਖੁਨੀਨਂ ਵਾ ਪਞ੍ਞਤ੍ਤਂ ਸਿਕ੍ਖਾਪਦਂ ਅਸਾਧਾਰਣਪਞ੍ਞਤ੍ਤਿ ਨਾਮ ਹੋਤਿ. ਇਦਂ ਪਨ ਭਿਕ੍ਖੁਂ ਆਰਬ੍ਭ ਉਪ੍ਪਨ੍ਨੇ ਵਤ੍ਥੁਸ੍ਮਿਂ ‘‘ਯਾ ਪਨ ਭਿਕ੍ਖੁਨੀ ਛਨ੍ਦਸੋ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯ, ਅਨ੍ਤਮਸੋ ਤਿਰਚ੍ਛਾਨਗਤੇਨਪਿ ਪਾਰਾਜਿਕਾ ਹੋਤਿ ਅਸਂਵਾਸਾ’’ਤਿ ਭਿਕ੍ਖੁਨੀਨਮ੍ਪਿ ਪਞ੍ਞਤ੍ਤਂ, ਵਿਨੀਤਕਥਾਮਤ੍ਤਮੇਵ ਹਿ ਤਾਸਂ ਨਤ੍ਥਿ, ਸਿਕ੍ਖਾਪਦਂ ਪਨ ਅਤ੍ਥਿ, ਤੇਨ ਵੁਤ੍ਤਂ ‘‘ਸਾਧਾਰਣਪਞ੍ਞਤ੍ਤੀ’’ਤਿ. ਉਭਤੋਪਞ੍ਞਤ੍ਤਿਯਮ੍ਪਿ ਏਸੇਵ ਨਯੋ. ਬ੍ਯਞ੍ਜਨਮਤ੍ਤਮੇਵ ਹਿ ਏਤ੍ਥ ਨਾਨਂ, ਭਿਕ੍ਖੂਨਂ ਭਿਕ੍ਖੁਨੀਨਮ੍ਪਿ ਸਾਧਾਰਣਤ੍ਤਾ ਸਾਧਾਰਣਪਞ੍ਞਤ੍ਤਿ, ਉਭਿਨ੍ਨਮ੍ਪਿ ਪਞ੍ਞਤ੍ਤਤ੍ਤਾ ਉਭਤੋਪਞ੍ਞਤ੍ਤੀਤਿ. ਅਤ੍ਥੇ ਪਨ ਭੇਦੋ ਨਤ੍ਥਿ.

ਨਿਦਾਨੋਗਧਨ੍ਤਿ ‘‘ਯਸ੍ਸ ਸਿਯਾ ਆਪਤ੍ਤਿ ਸੋ ਆਵਿਕਰੇਯ੍ਯਾ’’ਤਿ ਏਤ੍ਥ ਸਬ੍ਬਾਪਤ੍ਤੀਨਂ ਅਨੁਪਵਿਟ੍ਠਤ੍ਤਾ ਨਿਦਾਨੋਗਧਂ; ਨਿਦਾਨੇ ਅਨੁਪਵਿਟ੍ਠਨ੍ਤਿ ਅਤ੍ਥੋ. ਦੁਤਿਯੇਨ ਉਦ੍ਦੇਸੇਨਾਤਿ ਨਿਦਾਨੋਗਧਂ ਨਿਦਾਨਪਰਿਯਾਪਨ੍ਨਮ੍ਪਿ ਸਮਾਨਂ ‘‘ਤਤ੍ਰਿਮੇ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ’’ਤਿਆਦਿਨਾ ਦੁਤਿਯੇਨੇਵ ਉਦ੍ਦੇਸੇਨ ਉਦ੍ਦੇਸਂ ਆਗਚ੍ਛਤਿ. ਚਤੁਨ੍ਨਂ ਵਿਪਤ੍ਤੀਨਨ੍ਤਿ ਸੀਲਵਿਪਤ੍ਤਿਆਦੀਨਂ. ਪਠਮਾ ਹਿ ਦ੍ਵੇ ਆਪਤ੍ਤਿਕ੍ਖਨ੍ਧਾ ਸੀਲਵਿਪਤ੍ਤਿ ਨਾਮ, ਅਵਸੇਸਾ ਪਞ੍ਚ ਆਚਾਰਵਿਪਤ੍ਤਿ ਨਾਮ. ਮਿਚ੍ਛਾਦਿਟ੍ਠਿ ਚ ਅਨ੍ਤਗ੍ਗਾਹਿਕਦਿਟ੍ਠਿ ਚ ਦਿਟ੍ਠਿਵਿਪਤ੍ਤਿ ਨਾਮ, ਆਜੀਵਹੇਤੁ ਪਞ੍ਞਤ੍ਤਾਨਿ ਛ ਸਿਕ੍ਖਾਪਦਾਨਿ ਆਜੀਵਵਿਪਤ੍ਤਿ ਨਾਮ. ਇਤਿ ਇਮਾਸਂ ਚਤੁਨ੍ਨਂ ਵਿਪਤ੍ਤੀਨਂ ਇਦਂ ਪਾਰਾਜਿਕਂ ਸੀਲਵਿਪਤ੍ਤਿ ਨਾਮ ਹੋਤਿ.

ਏਕੇਨ ਸਮੁਟ੍ਠਾਨੇਨਾਤਿ ਦ੍ਵਙ੍ਗਿਕੇਨ ਏਕੇਨ ਸਮੁਟ੍ਠਾਨੇਨ. ਏਤ੍ਥ ਹਿ ਚਿਤ੍ਤਂ ਅਙ੍ਗਂ ਹੋਤਿ, ਕਾਯੇਨ ਪਨ ਆਪਤ੍ਤਿਂ ਆਪਜ੍ਜਤਿ. ਤੇਨ ਵੁਤ੍ਤਂ ‘‘ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤੀ’’ਤਿ. ਦ੍ਵੀਹਿ ਸਮਥੇਹਿ ਸਮ੍ਮਤੀਤਿ ‘‘ਆਪਨ੍ਨੋਸੀ’’ਤਿ ਸਮ੍ਮੁਖਾ ਪੁਚ੍ਛਿਯਮਾਨੋ ‘‘ਆਮ ਆਪਨ੍ਨੋਮ੍ਹੀ’’ਤਿ ਪਟਿਜਾਨਾਤਿ, ਤਾਵਦੇਵ ਭਣ੍ਡਨਕਲਹਵਿਗ੍ਗਹਾ ਵੂਪਸਨ੍ਤਾ ਹੋਨ੍ਤਿ, ਸਕ੍ਕਾ ਚ ਹੋਤਿ ਤਂ ਪੁਗ੍ਗਲਂ ਅਪਨੇਤ੍ਵਾ ਉਪੋਸਥੋ ਵਾ ਪਵਾਰਣਾ ਵਾ ਕਾਤੁਂ. ਇਤਿ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚਾਤਿ ਦ੍ਵੀਹਿ ਸਮਥੇਹਿ ਸਮ੍ਮਤਿ, ਨ ਚ ਤਪ੍ਪਚ੍ਚਯਾ ਕੋਚਿ ਉਪਦ੍ਦਵੋ ਹੋਤਿ. ਯਂ ਪਨ ਉਪਰਿ ਪਞ੍ਞਤ੍ਤਿਵਗ੍ਗੇ ‘‘ਨ ਕਤਮੇਨ ਸਮਥੇਨ ਸਮ੍ਮਤੀ’’ਤਿ ਵੁਤ੍ਤਂ, ਤਂ ਸਮਥਂ ਓਤਾਰੇਤ੍ਵਾ ਅਨਾਪਤ੍ਤਿ ਕਾਤੁਂ ਨ ਸਕ੍ਕਾਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ.

ਪਞ੍ਞਤ੍ਤਿ ਵਿਨਯੋਤਿ ‘‘ਯੋ ਪਨ ਭਿਕ੍ਖੂ’’ਤਿਆਦਿਨਾ ਨਯੇਨ ਵੁਤ੍ਤਮਾਤਿਕਾ ਪਞ੍ਞਤ੍ਤਿ ਵਿਨਯੋਤਿ ਅਤ੍ਥੋ. ਵਿਭਤ੍ਤੀਤਿ ਪਦਭਾਜਨਂ ਵੁਚ੍ਚਤਿ; ਵਿਭਤ੍ਤੀਤਿ ਹਿ ਵਿਭਙ੍ਗਸ੍ਸੇਵੇਤਂ ਨਾਮਂ. ਅਸਂਵਰੋਤਿ ਵੀਤਿਕ੍ਕਮੋ. ਸਂਵਰੋਤਿ ਅਵੀਤਿਕ੍ਕਮੋ. ਯੇਸਂ ਵਤ੍ਤਤੀਤਿ ਯੇਸਂ ਵਿਨਯਪਿਟਕਞ੍ਚ ਅਟ੍ਠਕਥਾ ਚ ਸਬ੍ਬਾ ਪਗੁਣਾਤਿ ਅਤ੍ਥੋ. ਤੇ ਧਾਰੇਨ੍ਤੀਤਿ ਤੇ ਏਤਂ ਪਠਮਪਾਰਾਜਿਕਂ ਪਾਲ਼ਿਤੋ ਚ ਅਤ੍ਥਤੋ ਚ ਧਾਰੇਨ੍ਤਿ; ਨ ਹਿ ਸਕ੍ਕਾ ਸਬ੍ਬਂ ਵਿਨਯਪਿਟਕਂ ਅਜਾਨਨ੍ਤੇਨ ਏਤਸ੍ਸ ਅਤ੍ਥੋ ਜਾਨਿਤੁਨ੍ਤਿ. ਕੇਨਾਭਤਨ੍ਤਿ ਇਦਂ ਪਠਮਪਾਰਾਜਿਕਂ ਪਾਲ਼ਿਵਸੇਨ ਚ ਅਤ੍ਥਵਸੇਨ ਚ ਯਾਵ ਅਜ੍ਜਤਨਕਾਲਂ ਕੇਨ ਆਨੀਤਨ੍ਤਿ. ਪਰਮ੍ਪਰਾਭਤਨ੍ਤਿ ਪਰਮ੍ਪਰਾਯ ਆਨੀਤਂ.

੩. ਇਦਾਨਿ ਯਾਯ ਪਰਮ੍ਪਰਾਯ ਆਨੀਤਂ, ਤਂ ਦਸ੍ਸੇਤੁਂ ‘‘ਉਪਾਲਿ ਦਾਸਕੋ ਚੇਵਾ’’ਤਿਆਦਿਨਾ ਨਯੇਨ ਪੋਰਾਣਕੇਹਿ ਮਹਾਥੇਰੇਹਿ ਗਾਥਾਯੋ ਠਪਿਤਾ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਨਿਦਾਨਵਣ੍ਣਨਾਯਮੇਵ ਵੁਤ੍ਤਂ. ਇਮਿਨਾ ਨਯੇਨ ਦੁਤਿਯਪਾਰਾਜਿਕਾਦਿਪੁਚ੍ਛਾਵਿਸ੍ਸਜ੍ਜਨੇਸੁਪਿ ਵਿਨਿਚ੍ਛਯੋ ਵੇਦਿਤਬ੍ਬੋਤਿ.

ਮਹਾਵਿਭਙ੍ਗੇ ਪਞ੍ਞਤ੍ਤਿਵਾਰਵਣ੍ਣਨਾ ਨਿਟ੍ਠਿਤਾ.

ਕਤਾਪਤ੍ਤਿਵਾਰਾਦਿਵਣ੍ਣਨਾ

੧੫੭. ਇਤੋ ਪਰਂ ‘‘ਮੇਥੁਨਂ ਧਮ੍ਮਂ ਪਟਿਸੇਵਨ੍ਤੋ ਕਤਿ ਆਪਤ੍ਤਿਯੋ ਆਪਜ੍ਜਤੀ’’ਤਿ ਆਦਿਪ੍ਪਭੇਦੋ ਕਤਾਪਤ੍ਤਿਵਾਰੋ, ‘‘ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਸ੍ਸ ਆਪਤ੍ਤਿਯੋ ਚਤੁਨ੍ਨਂ ਵਿਪਤ੍ਤੀਨਂ ਕਤਿ ਵਿਪਤ੍ਤਿਯੋ ਭਜਨ੍ਤੀ’’ਤਿ ਆਦਿਪ੍ਪਭੇਦੋ ਵਿਪਤ੍ਤਿਵਾਰੋ, ‘‘ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਸ੍ਸ ਆਪਤ੍ਤਿਯੋ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਕਤਿਹਿ ਆਪਤ੍ਤਿਕ੍ਖਨ੍ਧੇਹਿ ਸਙ੍ਗਹਿਤਾ’’ਤਿ ਆਦਿਪ੍ਪਭੇਦੋ ਸਙ੍ਗਹਵਾਰੋ, ‘‘ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਸ੍ਸ ਆਪਤ੍ਤਿਯੋ ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਹਨ੍ਤੀ’’ਤਿ ਆਦਿਪ੍ਪਭੇਦੋ ਸਮੁਟ੍ਠਾਨਵਾਰੋ, ‘‘ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਸ੍ਸ ਆਪਤ੍ਤਿਯੋ ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣ’’ਨ੍ਤਿ ਆਦਿਪ੍ਪਭੇਦੋ ਅਧਿਕਰਣਵਾਰੋ, ‘‘ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਸ੍ਸ ਆਪਤ੍ਤਿਯੋ ਸਤ੍ਤਨ੍ਨਂ ਸਮਥਾਨਂ ਕਤਿਹਿ ਸਮਥੇਹਿ ਸਮ੍ਮਨ੍ਤੀ’’ਤਿ ਆਦਿਪ੍ਪਭੇਦੋ ਸਮਥਵਾਰੋ, ਤਦਨਨ੍ਤਰੋ ਸਮੁਚ੍ਚਯਵਾਰੋ ਚਾਤਿ ਇਮੇ ਸਤ੍ਤ ਵਾਰਾ ਉਤ੍ਤਾਨਤ੍ਥਾ ਏਵ.

੧੮੮. ਤਤੋ ਪਰਂ ‘‘ਮੇਥੁਨਂ ਧਮ੍ਮਂ ਪਟਿਸੇਵਨਪਚ੍ਚਯਾ ਪਾਰਾਜਿਕਂ ਕਤ੍ਥ ਪਞ੍ਞਤ੍ਤ’’ਨ੍ਤਿਆਦਿਨਾ ਨਯੇਨ ਪੁਨ ਪਚ੍ਚਯਵਸੇਨ ਏਕੋ ਪਞ੍ਞਤ੍ਤਿਵਾਰੋ, ਤਸ੍ਸ ਵਸੇਨ ਪੁਰਿਮਸਦਿਸਾ ਏਵ ਕਤਾਪਤ੍ਤਿਵਾਰਾਦਯੋ ਸਤ੍ਤ ਵਾਰਾਤਿ ਏਵਂ ਅਪਰੇਪਿ ਅਟ੍ਠ ਵਾਰਾ ਵੁਤ੍ਤਾ, ਤੇਪਿ ਉਤ੍ਤਾਨਤ੍ਥਾ ਏਵ. ਇਤਿ ਇਮੇ ਅਟ੍ਠ, ਪੁਰਿਮਾ ਅਟ੍ਠਾਤਿ ਮਹਾਵਿਭਙ੍ਗੇ ਸੋਲ਼ਸ ਵਾਰਾ ਦਸ੍ਸਿਤਾ. ਤਤੋ ਪਰਂ ਤੇਨੇਵ ਨਯੇਨ ਭਿਕ੍ਖੁਨਿਵਿਭਙ੍ਗੇਪਿ ਸੋਲ਼ਸ ਵਾਰਾ ਆਗਤਾਤਿ ਏਵਮਿਮੇ ਉਭਤੋਵਿਭਙ੍ਗੇ ਦ੍ਵਤ੍ਤਿਂਸ ਵਾਰਾ ਪਾਲ਼ਿਨਯੇਨੇਵ ਵੇਦਿਤਬ੍ਬਾ. ਨ ਹੇਤ੍ਥ ਕਿਞ੍ਚਿ ਪੁਬ੍ਬੇ ਅਵਿਨਿਚ੍ਛਿਤਂ ਨਾਮ ਅਤ੍ਥਿ.

ਮਹਾਵਿਭਙ੍ਗੇ ਚ ਭਿਕ੍ਖੁਨਿਵਿਭਙ੍ਗੇ ਚ

ਸੋਲ਼ਸਮਹਾਵਾਰਵਣ੍ਣਨਾ ਨਿਟ੍ਠਿਤਾ.