੧. ਪਠਮਅਨਿਯਤਸਿਕ੍ਖਾਪਦਵਣ੍ਣਨਾ

੪੪੩. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਪਠਮਅਨਿਯਤਸਿਕ੍ਖਾਪਦਂ. ਤਤ੍ਥ ਕਾਲਯੁਤ੍ਤਂ ਸਮੁਲ੍ਲਪਨ੍ਤੋਤਿ ਕਾਲਂ ਸਲ੍ਲਕ੍ਖੇਤ੍ਵਾ ਯਦਾ ਨ ਅਞ੍ਞੋ ਕੋਚਿ ਸਮੀਪੇਨ ਗਚ੍ਛਤਿ ਵਾ ਆਗਚ੍ਛਤਿ ਵਾ ਤਦਾ ਤਦਨੁਰੂਪਂ ‘‘ਕਚ੍ਚਿ ਨ ਉਕ੍ਕਣ੍ਠਸਿ, ਨ ਕਿਲਮਸਿ, ਨ ਛਾਤਾਸੀ’’ਤਿਆਦਿਕਂ ਗੇਹਸ੍ਸਿਤਂ ਕਥਂ ਕਥੇਨ੍ਤੋ. ਕਾਲਯੁਤ੍ਤਂ ਧਮ੍ਮਂ ਭਣਨ੍ਤੋਤਿ ਕਾਲਂ ਸਲ੍ਲਕ੍ਖੇਤ੍ਵਾ ਯਦਾ ਅਞ੍ਞੋ ਕੋਚਿ ਸਮੀਪੇਨ ਗਚ੍ਛਤਿ ਵਾ ਆਗਚ੍ਛਤਿ ਵਾ ਤਦਾ ਤਦਨੁਰੂਪਂ ‘‘ਉਪੋਸਥਂ ਕਰੇਯ੍ਯਾਸਿ, ਸਲਾਕਭਤ੍ਤਂ ਦਦੇਯ੍ਯਾਸੀ’’ਤਿਆਦਿਕਂ ਧਮ੍ਮਕਥਂ ਕਥੇਨ੍ਤੋ.

ਬਹੂ ਧੀਤਰੋ ਚ ਪੁਤ੍ਤਾ ਚ ਅਸ੍ਸਾਤਿ ਬਹੁਪੁਤ੍ਤਾ. ਤਸ੍ਸਾ ਕਿਰ ਦਸ ਪੁਤ੍ਤਾ ਦਸ ਧੀਤਰੋ ਅਹੇਸੁਂ, ਬਹੂ ਨਤ੍ਤਾਰੋ ਅਸ੍ਸਾਤਿ ਬਹੁਨਤ੍ਤਾ. ਯਥੇਵ ਹਿ ਤਸ੍ਸਾ ਏਵਮਸ੍ਸਾ ਪੁਤ੍ਤਧੀਤਾਨਮ੍ਪਿ ਵੀਸਤਿ ਵੀਸਤਿ ਦਾਰਕਾ ਅਹੇਸੁਂ, ਇਤਿ ਸਾ ਵੀਸੁਤ੍ਤਰਚਤੁਸਤਪੁਤ੍ਤਨਤ੍ਤਪਰਿਵਾਰਾ ਅਹੋਸਿ. ਅਭਿਮਙ੍ਗਲਸਮ੍ਮਤਾਤਿ ਉਤ੍ਤਮਮਙ੍ਗਲਸਮ੍ਮਤਾ. ਯਞ੍ਞੇਸੂਤਿ ਦਾਨਪ੍ਪਦਾਨੇਸੁ. ਛਣੇਸੂਤਿ ਆਵਾਹਵਿਵਾਹਮਙ੍ਗਲਾਦੀਸੁ ਅਨ੍ਤਰੁਸ੍ਸਵੇਸੁ. ਉਸ੍ਸਵੇਸੂਤਿ ਆਸਾਲ਼੍ਹੀਪਵਾਰਣਨਕ੍ਖਤ੍ਤਾਦੀਸੁ ਮਹੁਸ੍ਸਵੇਸੁ. ਪਠਮਂ ਭੋਜੇਨ੍ਤੀਤਿ ‘‘ਇਮੇਪਿ ਦਾਰਕਾ ਤਯਾ ਸਮਾਨਾਯੁਕਾ ਨਿਰੋਗਾ ਹੋਨ੍ਤੂ’’ਤਿ ਆਯਾਚਨ੍ਤਾ ਪਠਮਂਯੇਵ ਭੋਜੇਨ੍ਤਿ, ਯੇਪਿ ਸਦ੍ਧਾ ਹੋਨ੍ਤਿ ਪਸਨ੍ਨਾ, ਤੇਪਿ ਭਿਕ੍ਖੂ ਭੋਜੇਤ੍ਵਾ ਤਦਨਨ੍ਤਰਂ ਸਬ੍ਬਪਠਮਂ ਤਂਯੇਵ ਭੋਜੇਨ੍ਤਿ. ਨਾਦਿਯੀਤਿ ਤਸ੍ਸਾ ਵਚਨਂ ਨ ਆਦਿਯਿ, ਨ ਗਣ੍ਹਿ, ਨ ਵਾ ਆਦਰਮਕਾਸੀਤਿ ਅਤ੍ਥੋ.

੪੪੪-੫. ਅਲਂਕਮ੍ਮਨਿਯੇਤਿ ਕਮ੍ਮਕ੍ਖਮਂ ਕਮ੍ਮਯੋਗ੍ਗਨ੍ਤਿ ਕਮ੍ਮਨਿਯਂ, ਅਲਂ ਪਰਿਯਤ੍ਤਂ ਕਮ੍ਮਨਿਯਭਾਵਾਯਾਤਿ ਅਲਂਕਮ੍ਮਨਿਯਂ, ਤਸ੍ਮਿਂ ਅਲਂਕਮ੍ਮਨਿਯੇ, ਯਤ੍ਥ ਅਜ੍ਝਾਚਾਰਂ ਕਰੋਨ੍ਤਾ ਸਕ੍ਕੋਨ੍ਤਿ, ਤਂ ਕਮ੍ਮਂ ਕਾਤੁਂ ਤਾਦਿਸੇਤਿ ਅਤ੍ਥੋ. ਤੇਨੇਵਸ੍ਸ ਪਦਭਾਜਨੇ ਵੁਤ੍ਤਂ – ‘‘ਸਕ੍ਕਾ ਹੋਤਿ ਮੇਥੁਨਂ ਧਮ੍ਮਂ ਪਟਿਸੇਵਿਤੁ’’ਨ੍ਤਿ, ਯਤ੍ਥ ਮੇਥੁਨਂ ਧਮ੍ਮਂ ਸਕ੍ਕਾ ਹੋਤਿ ਪਟਿਸੇਵਿਤੁਨ੍ਤਿ ਵੁਤ੍ਤਂ ਹੋਤਿ. ਨਿਸਜ੍ਜਂ ਕਪ੍ਪੇਯ੍ਯਾਤਿ ਨਿਸਜ੍ਜਂ ਕਰੇਯ੍ਯ, ਨਿਸੀਦੇਯ੍ਯਾਤਿ ਅਤ੍ਥੋ. ਯਸ੍ਮਾ ਪਨ ਨਿਸੀਦਿਤ੍ਵਾਵ ਨਿਪਜ੍ਜਤਿ, ਤੇਨਸ੍ਸ ਪਦਭਾਜਨੇ ਉਭਯਮ੍ਪਿ ਵੁਤ੍ਤਂ. ਤਤ੍ਥ ਉਪਨਿਸਿਨ੍ਨੋਤਿ ਉਪਗਨ੍ਤ੍ਵਾ ਨਿਸਿਨ੍ਨੋ. ਏਵਂ ਉਪਨਿਪਨ੍ਨੋਪਿ ਵੇਦਿਤਬ੍ਬੋ. ਭਿਕ੍ਖੁ ਨਿਸਿਨ੍ਨੇਤਿ ਭਿਕ੍ਖੁਮ੍ਹਿ ਨਿਸਿਨ੍ਨੇਤਿ ਅਤ੍ਥੋ. ਉਭੋ ਵਾ ਨਿਸਿਨ੍ਨਾਤਿ ਦ੍ਵੇਪਿ ਅਪਚ੍ਛਾ ਅਪੁਰਿਮਂ ਨਿਸਿਨ੍ਨਾ. ਏਤ੍ਥ ਚ ਕਿਞ੍ਚਾਪਿ ਪਾਲ਼ਿਯਂ ‘‘ਸੋਤਸ੍ਸ ਰਹੋ’’ਤਿ ਆਗਤਂ, ਚਕ੍ਖੁਸ੍ਸ ਰਹੇਨੇਵ ਪਨ ਪਰਿਚ੍ਛੇਦੋ ਵੇਦਿਤਬ੍ਬੋ. ਸਚੇਪਿ ਹਿ ਪਿਹਿਤਕਵਾਟਸ੍ਸ ਗਬ੍ਭਸ੍ਸ ਦ੍ਵਾਰੇ ਨਿਸਿਨ੍ਨੋ ਵਿਞ੍ਞੂ ਪੁਰਿਸੋ ਹੋਤਿ, ਨੇਵ ਅਨਾਪਤ੍ਤਿਂ ਕਰੋਤਿ. ਅਪਿਹਿਤਕਵਾਟਸ੍ਸ ਪਨ ਦ੍ਵਾਰੇ ਨਿਸਿਨ੍ਨੋ ਅਨਾਪਤ੍ਤਿਂ ਕਰੋਤਿ. ਨ ਕੇਵਲਞ੍ਚ ਦ੍ਵਾਰੇ ਅਨ੍ਤੋਦ੍ਵਾਦਸਹਤ੍ਥੇਪਿ ਓਕਾਸੇ ਨਿਸਿਨ੍ਨੋ, ਸਚੇ ਸਚਕ੍ਖੁਕੋ ਵਿਕ੍ਖਿਤ੍ਤੋਪਿ ਨਿਦ੍ਦਾਯਨ੍ਤੋਪਿ ਅਨਾਪਤ੍ਤਿਂ ਕਰੋਤਿ. ਸਮੀਪੇ ਠਿਤੋਪਿ ਅਨ੍ਧੋ ਨ ਕਰੋਤਿ, ਚਕ੍ਖੁਮਾਪਿ ਨਿਪਜ੍ਜਿਤ੍ਵਾ ਨਿਦ੍ਦਾਯਨ੍ਤੋ ਨ ਕਰੋਤਿ. ਇਤ੍ਥੀਨਂ ਪਨ ਸਤਮ੍ਪਿ ਅਨਾਪਤ੍ਤਿਂ ਨ ਕਰੋਤਿਯੇਵ.

ਸਦ੍ਧੇਯ੍ਯਵਚਸਾਤਿ ਸਦ੍ਧਾਤਬ੍ਬਵਚਨਾ. ਸਾ ਪਨ ਯਸ੍ਮਾ ਅਰਿਯਸਾਵਿਕਾਵ ਹੋਤਿ, ਤੇਨਸ੍ਸ ਪਦਭਾਜਨੇ ‘‘ਆਗਤਫਲਾ’’ਤਿਆਦਿ ਵੁਤ੍ਤਂ. ਤਤ੍ਥ ਆਗਤਂ ਫਲਂ ਅਸ੍ਸਾਤਿ ਆਗਤਫਲਾ ਪਟਿਲਦ੍ਧਸੋਤਾਪਤ੍ਤਿਫਲਾਤਿ ਅਤ੍ਥੋ. ਅਭਿਸਮੇਤਾਵਿਨੀਤਿ ਪਟਿਵਿਦ੍ਧਚਤੁਸਚ੍ਚਾ. ਵਿਞ੍ਞਾਤਂ ਸਿਕ੍ਖਤ੍ਤਯਸਾਸਨਂ ਏਤਾਯਾਤਿ ਵਿਞ੍ਞਾਤਸਾਸਨਾ. ਨਿਸਜ੍ਜਂ ਭਿਕ੍ਖੁ ਪਟਿਜਾਨਮਾਨੋਤਿ ਕਿਞ੍ਚਾਪਿ ਏਵਰੂਪਾ ਉਪਾਸਿਕਾ ਦਿਸ੍ਵਾ ਵਦਤਿ, ਅਥ ਖੋ ਭਿਕ੍ਖੁ ਨਿਸਜ੍ਜਂ ਪਟਿਜਾਨਮਾਨੋਯੇਵ ਤਿਣ੍ਣਂ ਧਮ੍ਮਾਨਂ ਅਞ੍ਞਤਰੇਨ ਕਾਰੇਤਬ੍ਬੋ, ਨ ਅਪ੍ਪਟਿਜਾਨਮਾਨੋਤਿ ਅਤ੍ਥੋ.

ਯੇਨ ਵਾ ਸਾ ਸਦ੍ਧੇਯ੍ਯਵਚਸਾ ਉਪਾਸਿਕਾ ਵਦੇਯ੍ਯ ਤੇਨ ਸੋ ਭਿਕ੍ਖੁ ਕਾਰੇਤਬ੍ਬੋਤਿ ਨਿਸਜ੍ਜਾਦੀਸੁ ਆਕਾਰੇਸੁ ਯੇਨ ਵਾ ਆਕਾਰੇਨ ਸਦ੍ਧਿਂ ਮੇਥੁਨਧਮ੍ਮਾਦੀਨਿ ਆਰੋਪੇਤ੍ਵਾ ਸਾ ਉਪਾਸਿਕਾ ਵਦੇਯ੍ਯ, ਪਟਿਜਾਨਮਾਨੋਵ ਤੇਨ ਸੋ ਭਿਕ੍ਖੁ ਕਾਰੇਤਬ੍ਬੋ. ਏਵਰੂਪਾਯਪਿ ਉਪਾਸਿਕਾਯ ਵਚਨਮਤ੍ਤੇਨ ਨ ਕਾਰੇਤਬ੍ਬੋਤਿ ਅਤ੍ਥੋ. ਕਸ੍ਮਾ? ਯਸ੍ਮਾ ਦਿਟ੍ਠਂ ਨਾਮ ਤਥਾਪਿ ਹੋਤਿ, ਅਞ੍ਞਥਾਪਿ ਹੋਤਿ.

ਤਦਤ੍ਥਜੋਤਨਤ੍ਥਞ੍ਚ ਇਦਂ ਵਤ੍ਥੁਂ ਉਦਾਹਰਨ੍ਤਿ – ਮਲ੍ਲਾਰਾਮਵਿਹਾਰੇ ਕਿਰ ਏਕੋ ਖੀਣਾਸਵਤ੍ਥੇਰੋ ਏਕਦਿਵਸਂ ਉਪਟ੍ਠਾਕਕੁਲਂ ਗਨ੍ਤ੍ਵਾ ਅਨ੍ਤੋਗੇਹੇ ਨਿਸੀਦਿ, ਉਪਾਸਿਕਾਪਿ ਸਯਨਪਲ੍ਲਙ੍ਕਂ ਨਿਸ੍ਸਾਯ ਠਿਤਾ ਹੋਤਿ. ਅਥੇਕੋ ਪਿਣ੍ਡਚਾਰਿਕੋ ਦ੍ਵਾਰੇ ਠਿਤੋ ਦਿਸ੍ਵਾ ‘‘ਥੇਰੋ ਉਪਾਸਿਕਾਯ ਸਦ੍ਧਿਂ ਏਕਾਸਨੇ ਨਿਸਿਨ੍ਨੋ’’ਤਿ ਸਞ੍ਞਂ ਪਟਿਲਭਿਤ੍ਵਾ ਪੁਨਪ੍ਪੁਨਂ ਓਲੋਕੇਸਿ. ਥੇਰੋਪਿ ‘‘ਅਯਂ ਮਯਿ ਅਸੁਦ੍ਧਲਦ੍ਧਿਕੋ ਜਾਤੋ’’ਤਿ ਸਲ੍ਲਕ੍ਖੇਤ੍ਵਾ ਕਤਭਤ੍ਤਕਿਚ੍ਚੋ ਵਿਹਾਰਂ ਗਨ੍ਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਪਵਿਸਿਤ੍ਵਾ ਅਨ੍ਤੋਵ ਨਿਸੀਦਿ. ਸੋਪਿ ਭਿਕ੍ਖੁ ‘‘ਥੇਰਂ ਚੋਦੇਸ੍ਸਾਮੀ’’ਤਿ ਆਗਨ੍ਤ੍ਵਾ ਉਕ੍ਕਾਸਿਤ੍ਵਾ ਦ੍ਵਾਰਂ ਵਿਵਰਿ. ਥੇਰੋ ਤਸ੍ਸ ਚਿਤ੍ਤਂ ਞਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਕੂਟਾਗਾਰਕਣ੍ਣਿਕਂ ਨਿਸ੍ਸਾਯ ਪਲ੍ਲਙ੍ਕੇਨ ਨਿਸੀਦਿ. ਸੋਪਿ ਭਿਕ੍ਖੁ ਅਨ੍ਤੋ ਪਵਿਸਿਤ੍ਵਾ ਮਞ੍ਚਞ੍ਚ ਹੇਟ੍ਠਾਮਞ੍ਚਞ੍ਚ ਓਲੋਕੇਤ੍ਵਾ ਥੇਰਂ ਅਪਸ੍ਸਨ੍ਤੋ ਉਦ੍ਧਂ ਉਲ੍ਲੋਕੇਸਿ, ਅਥ ਆਕਾਸੇ ਨਿਸਿਨ੍ਨਂ ਥੇਰਂ ਦਿਸ੍ਵਾ ‘‘ਭਨ੍ਤੇ, ਏਵਂ ਮਹਿਦ੍ਧਿਕਾ ਨਾਮ ਤੁਮ੍ਹੇ ਮਾਤੁਗਾਮੇਨ ਸਦ੍ਧਿਂ ਏਕਾਸਨੇ ਨਿਸਿਨ੍ਨਭਾਵਂ ਵਦਾਪੇਥ ਏਵਾ’’ਤਿ ਆਹ. ਥੇਰੋ ‘‘ਅਨ੍ਤਰਘਰਸ੍ਸੇਵੇਸੋ ਆਵੁਸੋ ਦੋਸੋ, ਅਹਂ ਪਨ ਤਂ ਸਦ੍ਧਾਪੇਤੁਂ ਅਸਕ੍ਕੋਨ੍ਤੋ ਏਵਮਕਾਸਿਂ, ਰਕ੍ਖੇਯ੍ਯਾਸਿ ਮ’’ਨ੍ਤਿ ਵਤ੍ਵਾ ਓਤਰੀਤਿ.

੪੪੬. ਇਤੋ ਪਰਂ ਸਾ ਚੇ ਏਵਂ ਵਦੇਯ੍ਯਾਤਿਆਦਿ ਸਬ੍ਬਂ ਪਟਿਞ੍ਞਾਯ ਕਾਰਣਾਕਾਰਦਸ੍ਸਨਤ੍ਥਂ ਵੁਤ੍ਤਂ, ਤਤ੍ਥ ਮਾਤੁਗਾਮਸ੍ਸ ਮੇਥੁਨਂ ਧਮ੍ਮਂ ਪਟਿਸੇਵਨ੍ਤੋਤਿ ਮਾਤੁਗਾਮਸ੍ਸ ਮਗ੍ਗੇ ਮੇਥੁਨਂ ਧਮ੍ਮਂ ਪਟਿਸੇਵਨ੍ਤੋਤਿ ਅਤ੍ਥੋ. ਨਿਸਜ੍ਜਾਯ ਕਾਰੇਤਬ੍ਬੋਤਿ ਨਿਸਜ੍ਜਂ ਪਟਿਜਾਨਿਤ੍ਵਾ ਮੇਥੁਨਧਮ੍ਮਪਟਿਸੇਵਨਂ ਅਪ੍ਪਟਿਜਾਨਨ੍ਤੋ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਯਾ ਅਕਾਰੇਤ੍ਵਾ ਨਿਸਜ੍ਜਾਮਤ੍ਤੇਨ ਯਂ ਆਪਤ੍ਤਿਂ ਆਪਜ੍ਜਤਿ ਤਾਯ ਕਾਰੇਤਬ੍ਬੋ, ਪਾਚਿਤ੍ਤਿਯਾਪਤ੍ਤਿਯਾ ਕਾਰੇਤਬ੍ਬੋਤਿ ਅਤ੍ਥੋ. ਏਤੇਨ ਨਯੇਨ ਸਬ੍ਬਚਤੁਕ੍ਕੇਸੁ ਵਿਨਿਚ੍ਛਯੋ ਵੇਦਿਤਬ੍ਬੋ.

੪੫੧. ਸਿਕ੍ਖਾਪਦਪਰਿਯੋਸਾਨੇ ਪਨ ਆਪਤ੍ਤਾਨਾਪਤ੍ਤਿਪਰਿਚ੍ਛੇਦਦਸ੍ਸਨਤ੍ਥਂ ਵੁਤ੍ਤੇਸੁ ਗਮਨਂ ਪਟਿਜਾਨਾਤੀਤਿਆਦੀਸੁ ਗਮਨਂ ਪਟਿਜਾਨਾਤੀਤਿ ‘‘ਰਹੋਨਿਸਜ੍ਜਸ੍ਸਾਦਤ੍ਥਂ ਗਤੋਮ੍ਹੀ’’ਤਿ ਏਵਂ ਗਮਨਂ ਪਟਿਜਾਨਾਤਿ, ਨਿਸਜ੍ਜਨ੍ਤਿ ਨਿਸਜ੍ਜਸ੍ਸਾਦੇਨੇਵ ਨਿਸਜ੍ਜਂ ਪਟਿਜਾਨਾਤਿ. ਆਪਤ੍ਤਿਨ੍ਤਿ ਤੀਸੁ ਅਞ੍ਞਤਰਂ ਆਪਤ੍ਤਿਂ. ਆਪਤ੍ਤਿਯਾ ਕਾਰੇਤਬ੍ਬੋਤਿ ਤੀਸੁ ਯਂ ਪਟਿਜਾਨਾਤਿ, ਤਾਯ ਕਾਰੇਤਬ੍ਬੋ. ਸੇਸਮੇਤ੍ਥ ਚਤੁਕ੍ਕੇ ਉਤ੍ਤਾਨਾਧਿਪ੍ਪਾਯਮੇਵ. ਦੁਤਿਯਚਤੁਕ੍ਕੇ ਪਨ ਗਮਨਂ ਨ ਪਟਿਜਾਨਾਤੀਤਿ ਰਹੋ ਨਿਸਜ੍ਜਸ੍ਸਾਦਵਸੇਨ ਨ ਪਟਿਜਾਨਾਤਿ, ‘‘ਸਲਾਕਭਤ੍ਤਾਦਿਨਾ ਅਤ੍ਤਨੋ ਕਮ੍ਮੇਨ ਗਤੋਮ੍ਹਿ, ਸਾ ਪਨ ਮਯ੍ਹਂ ਨਿਸਿਨ੍ਨਟ੍ਠਾਨਂ ਆਗਤਾ’’ਤਿ ਵਦਤਿ. ਸੇਸਮੇਤ੍ਥਾਪਿ ਉਤ੍ਤਾਨਾਧਿਪ੍ਪਾਯਮੇਵ.

ਅਯਂ ਪਨ ਸਬ੍ਬਤ੍ਥ ਵਿਨਿਚ੍ਛਯੋ – ਰਹੋ ਨਿਸਜ੍ਜਸ੍ਸਾਦੋਤਿ ਮੇਥੁਨਧਮ੍ਮਸਨ੍ਨਿਸ੍ਸਿਤਕਿਲੇਸੋ ਵੁਚ੍ਚਤਿ. ਯੋ ਭਿਕ੍ਖੁ ਤੇਨਸ੍ਸਾਦੇਨ ਮਾਤੁਗਾਮਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ਅਕ੍ਖਿਂ ਅਞ੍ਜੇਤਿ, ਦੁਕ੍ਕਟਂ. ਨਿਵਾਸਨਂ ਨਿਵਾਸੇਤਿ, ਕਾਯਬਨ੍ਧਨਂ ਬਨ੍ਧਤਿ, ਚੀਵਰਂ ਪਾਰੁਪਤਿ, ਸਬ੍ਬਤ੍ਥ ਪਯੋਗੇ ਪਯੋਗੇ ਦੁਕ੍ਕਟਂ. ਗਚ੍ਛਤਿ, ਪਦਵਾਰੇ ਪਦਵਾਰੇ ਦੁਕ੍ਕਟਂ. ਗਨ੍ਤ੍ਵਾ ਨਿਸੀਦਤਿ, ਦੁਕ੍ਕਟਮੇਵ. ਮਾਤੁਗਾਮੇ ਆਗਨ੍ਤ੍ਵਾ ਨਿਸਿਨ੍ਨਮਤ੍ਤੇ ਪਾਚਿਤ੍ਤਿਯਂ. ਸਚੇ ਸਾ ਇਤ੍ਥੀ ਕੇਨਚਿ ਕਰਣੀਯੇਨ ਉਟ੍ਠਾਯੁਟ੍ਠਾਯ ਪੁਨਪ੍ਪੁਨਂ ਨਿਸੀਦਤਿ, ਨਿਸਜ੍ਜਾਯ ਨਿਸਜ੍ਜਾਯ ਪਾਚਿਤ੍ਤਿਯਂ. ਯਂ ਸਨ੍ਧਾਯ ਗਤੋ, ਸਾ ਨ ਦਿਟ੍ਠਾ, ਅਞ੍ਞਾ ਆਗਨ੍ਤ੍ਵਾ ਨਿਸੀਦਤਿ, ਅਸ੍ਸਾਦੇ ਉਪ੍ਪਨ੍ਨੇ ਪਾਚਿਤ੍ਤਿਯਂ. ਮਹਾਪਚ੍ਚਰਿਯਂ ਪਨ ‘‘ਗਮਨਕਾਲਤੋ ਪਟ੍ਠਾਯ ਅਸੁਦ੍ਧਚਿਤ੍ਤਤ੍ਤਾ ਆਪਤ੍ਤਿਯੇਵਾ’’ਤਿ ਵੁਤ੍ਤਂ. ਸਚੇ ਸਮ੍ਬਹੁਲਾ ਆਗਚ੍ਛਨ੍ਤਿ, ਮਾਤੁਗਾਮਗਣਨਾਯ ਪਾਚਿਤ੍ਤਿਯਾਨਿ. ਸਚੇ ਉਟ੍ਠਾਯੁਟ੍ਠਾਯ ਪੁਨਪ੍ਪੁਨਂ ਨਿਸੀਦਨ੍ਤਿ, ਨਿਸਜ੍ਜਾਗਣਨਾਯ ਪਾਚਿਤ੍ਤਿਯਾਨਿ. ਅਨਿਯਮੇਤ੍ਵਾ ਦਿਟ੍ਠਦਿਟ੍ਠਾਯ ਸਦ੍ਧਿਂ ਰਹਸ੍ਸਾਦਂ ਕਪ੍ਪੇਸ੍ਸਾਮੀਤਿ ਗਨ੍ਤ੍ਵਾ ਨਿਸਿਨ੍ਨਸ੍ਸਾਪਿ ਆਗਤਾਗਤਾਨਂ ਵਸੇਨ ਪੁਨਪ੍ਪੁਨਂ ਨਿਸਜ੍ਜਾਵਸੇਨ ਚ ਵੁਤ੍ਤਨਯੇਨੇਵ ਆਪਤ੍ਤਿਯੋ ਵੇਦਿਤਬ੍ਬਾ. ਸਚੇ ਸੁਦ੍ਧਚਿਤ੍ਤੇਨ ਗਨ੍ਤ੍ਵਾ ਨਿਸਿਨ੍ਨਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਨਿਸਿਨ੍ਨਾਯ ਇਤ੍ਥਿਯਾ ਰਹਸ੍ਸਾਦੋ ਉਪ੍ਪਜ੍ਜਤਿ ਅਨਾਪਤ੍ਤਿ.

ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੇਵਾਤਿ.

ਪਠਮਅਨਿਯਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.