੨. ਦੁਤਿਯਪਾਰਾਜਿਕਂ
ਦੁਤਿਯਂ ਅਦੁਤਿਯੇਨ, ਯਂ ਜਿਨੇਨ ਪਕਾਸਿਤਂ;
ਪਾਰਾਜਿਕਂ ਤਸ੍ਸ ਦਾਨਿ, ਪਤ੍ਤੋ ਸਂਵਣ੍ਣਨਾਕ੍ਕਮੋ.
ਯਸ੍ਮਾ ਤਸ੍ਮਾ ਸੁਵਿਞ੍ਞੇਯ੍ਯਂ, ਯਂ ਪੁਬ੍ਬੇ ਚ ਪਕਾਸਿਤਂ;
ਤਂ ਸਬ੍ਬਂ ਵਜ੍ਜਯਿਤ੍ਵਾਨ, ਹੋਤਿ ਸਂਵਣ੍ਣਨਾ ਅਯਂ.
ਧਨਿਯਵਤ੍ਥੁਵਣ੍ਣਨਾ
੮੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਗਿਜ੍ਝਕੂਟੇ ਪਬ੍ਬਤੇਤਿ ਤਤ੍ਥ ਰਾਜਗਹੇਤਿ ਏਵਂਨਾਮਕੇ ਨਗਰੇ, ਤਞ੍ਹਿ ਮਨ੍ਧਾਤੁ-ਮਹਾਗੋਵਿਨ੍ਦਾਦੀਹਿ ਪਰਿਗ੍ਗਹਿਤਤ੍ਤਾ ‘‘ਰਾਜਗਹ’’ਨ੍ਤਿ ਵੁਚ੍ਚਤਿ. ਅਞ੍ਞੇਪੇਤ੍ਥ ਪਕਾਰੇ ਵਣ੍ਣਯਨ੍ਤਿ. ਕਿਂ ਤੇਹਿ! ਨਾਮਮੇਤਂ ਤਸ੍ਸ ਨਗਰਸ੍ਸ. ਤਂ ਪਨੇਤਂ ਬੁਦ੍ਧਕਾਲੇ ਚ ਚਕ੍ਕਵਤ੍ਤਿਕਾਲੇ ਚ ਨਗਰਂ ਹੋਤਿ. ਸੇਸਕਾਲੇ ਸੁਞ੍ਞਂ ਹੋਤਿ ਯਕ੍ਖਪਰਿਗ੍ਗਹਿਤਂ, ਤੇਸਂ ਵਸਨ੍ਤਵਨਂ ਹੁਤ੍ਵਾ ਤਿਟ੍ਠਤਿ. ਏਵਂ ਗੋਚਰਗਾਮਂ ਦਸ੍ਸੇਤ੍ਵਾ ਨਿਵਾਸਨਟ੍ਠਾਨਮਾਹ – ਗਿਜ੍ਝਕੂਟੇ ਪਬ੍ਬਤੇਤਿ. ਸੋ ਚ ਗਿਜ੍ਝਾ ਤਸ੍ਸ ਕੂਟੇਸੁ ਵਸਿਂਸੁ, ਗਿਜ੍ਝਸਦਿਸਾਨਿ ਵਾ ਤਸ੍ਸ ਕੂਟਾਨਿ; ਤਸ੍ਮਾ ਗਿਜ੍ਝਕੂਟੋਤਿ ਵੁਚ੍ਚਤੀਤਿ ਵੇਦਿਤਬ੍ਬੋ.
ਸਮ੍ਬਹੁਲਾਤਿ ਵਿਨਯਪਰਿਯਾਯੇਨ ਤਯੋ ਜਨਾ ਸਮ੍ਬਹੁਲਾਤਿ ਵੁਚ੍ਚਨ੍ਤਿ, ਤਤੋ ਪਰਂ ਸਙ੍ਘੋ. ਸੁਤ੍ਤਨ੍ਤਪਰਿਯਾਯੇਨ ਤਯੋ ਤਯੋ ਏਵ, ਤਤੋ ਪਟ੍ਠਾਯ ਸਮ੍ਬਹੁਲਾ. ਇਧ ਪਨ ਤੇ ਸੁਤ੍ਤਨ੍ਤਪਰਿਯਾਯੇਨ ਸਮ੍ਬਹੁਲਾਤਿ ਵੇਦਿਤਬ੍ਬਾ. ਸਨ੍ਦਿਟ੍ਠਾਤਿ ਨਾਤਿਵਿਸ੍ਸਾਸਿਕਾ ਨ ਦਲ਼੍ਹਮਿਤ੍ਤਾ; ਤਤ੍ਥ ਤਤ੍ਥ ਸਙ੍ਗਮ੍ਮ ਦਿਟ੍ਠਤ੍ਤਾ ਹਿ ਤੇ ਸਨ੍ਦਿਟ੍ਠਾਤਿ ਵੁਚ੍ਚਨ੍ਤਿ. ਸਮ੍ਭਤ੍ਤਾਤਿ ਅਤਿਵਿਸ੍ਸਾਸਿਕਾ ਦਲ਼੍ਹਮਿਤ੍ਤਾ; ਤੇ ਹਿ ਸੁਟ੍ਠੁ ਭਤ੍ਤਾ ਭਜਮਾਨਾ ਏਕਸਮ੍ਭੋਗਪਰਿਭੋਗਾਤਿ ਕਤ੍ਵਾ ‘‘ਸਮ੍ਭਤ੍ਤਾ’’ਤਿ ਵੁਚ੍ਚਨ੍ਤਿ. ਇਸਿਗਿਲਿਪਸ੍ਸੇਤਿ ਇਸਿਗਿਲਿ ਨਾਮ ਪਬ੍ਬਤੋ, ਤਸ੍ਸ ਪਸ੍ਸੇ. ਪੁਬ੍ਬੇ ਕਿਰ ਪਞ੍ਚਸਤਮਤ੍ਤਾ ਪਚ੍ਚੇਕਬੁਦ੍ਧਾ ਕਾਸਿਕੋਸਲਾਦੀਸੁ ਜਨਪਦੇਸੁ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਤਸ੍ਮਿਂ ਪਬ੍ਬਤੇ ਸਨ੍ਨਿਪਤਿਤ੍ਵਾ ਸਮਾਪਤ੍ਤਿਯਾ ਵੀਤਿਨਾਮੇਨ੍ਤਿ. ਮਨੁਸ੍ਸਾ ਤੇ ਪਵਿਸਨ੍ਤੇਵ ਪਸ੍ਸਨ੍ਤਿ ਨ ਨਿਕ੍ਖਮਨ੍ਤੇ. ਤਤੋ ਆਹਂਸੁ – ‘‘ਅਯਂ ਪਬ੍ਬਤੋ ਇਮੇ ਇਸਯੋ ਗਿਲਤੀ’’ਤਿ. ਤਦੁਪਾਦਾਯ ਤਸ੍ਸ ‘‘ਇਸਿਗਿਲਿ’’ਤ੍ਵੇਵ ਸਮਞ੍ਞਾ ਉਦਪਾਦਿ, ਤਸ੍ਸ ਪਸ੍ਸੇ ਪਬ੍ਬਤਪਾਦੇ.
ਤਿਣਕੁਟਿਯੋ ਕਰਿਤ੍ਵਾਤਿ ਤਿਣਚ੍ਛਦਨਾ ਸਦ੍ਵਾਰਬਨ੍ਧਾ ਕੁਟਿਯੋ ਕਤ੍ਵਾ. ਵਸ੍ਸਂ ਉਪਗਚ੍ਛਨ੍ਤੇਨ ਹਿ ਨਾਲਕਪਟਿਪਦਂ ਪਟਿਪਨ੍ਨੇਨਾਪਿ ਪਞ੍ਚਨ੍ਨਂ ਛਦਨਾਨਂ ਅਞ੍ਞਤਰੇਨ ਛਨ੍ਨੇਯੇਵ ਸਦ੍ਵਾਰਬਨ੍ਧੇ ਸੇਨਾਸਨੇ ਉਪਗਨ੍ਤਬ੍ਬਂ. ਵੁਤ੍ਤਞ੍ਹੇਤਂ – ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬਂ. ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੦੪). ਤਸ੍ਮਾ ਵਸ੍ਸਕਾਲੇ ਸਚੇ ਸੇਨਾਸਨਂ ਲਭਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਲਭਤਿ, ਹਤ੍ਥਕਮ੍ਮਂ ਪਰਿਯੇਸਿਤ੍ਵਾਪਿ ਕਾਤਬ੍ਬਂ. ਹਤ੍ਥਕਮ੍ਮਂ ਅਲਭਨ੍ਤੇਨ ਸਾਮਮ੍ਪਿ ਕਾਤਬ੍ਬਂ. ਨ ਤ੍ਵੇਵ ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬਂ. ਅਯਮਨੁਧਮ੍ਮਤਾ. ਤਸ੍ਮਾ ਤੇ ਭਿਕ੍ਖੂ ਤਿਣਕੁਟਿਯੋ ਕਰਿਤ੍ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦੀਨਿ ਪਰਿਚ੍ਛਿਨ੍ਦਿਤ੍ਵਾ ਕਤਿਕਵਤ੍ਤਾਨਿ ਚ ਖਨ੍ਧਕਵਤ੍ਤਾਨਿ ਚ ਅਧਿਟ੍ਠਾਯ ਤੀਸੁ ਸਿਕ੍ਖਾਸੁ ਸਿਕ੍ਖਮਾਨਾ ਵਸ੍ਸਂ ਉਪਗਚ੍ਛਿਂਸੁ.
ਆਯਸ੍ਮਾਪਿ ਧਨਿਯੋਤਿ ਨ ਕੇਵਲਂ ਤੇ ਥੇਰਾਵ ਇਮਸ੍ਸ ਸਿਕ੍ਖਾਪਦਸ੍ਸ ਆਦਿਕਮ੍ਮਿਕੋ ਆਯਸ੍ਮਾ ਧਨਿਯੋਪਿ. ਕੁਮ੍ਭਕਾਰਪੁਤ੍ਤੋਤਿ ਕੁਮ੍ਭਕਾਰਸ੍ਸ ਪੁਤ੍ਤੋ; ਤਸ੍ਸ ਹਿ ਨਾਮਂ ਧਨਿਯੋ, ਪਿਤਾ ਕੁਮ੍ਭਕਾਰੋ, ਤੇਨ ਵੁਤ੍ਤਂ – ‘‘ਧਨਿਯੋ ਕੁਮ੍ਭਕਾਰਪੁਤ੍ਤੋ’’ਤਿ. ਵਸ੍ਸਂ ਉਪਗਚ੍ਛੀਤਿ ਤੇਹਿ ਥੇਰੇਹਿ ਸਦ੍ਧਿਂ ਏਕਟ੍ਠਾਨੇਯੇਵ ਤਿਣਕੁਟਿਕਂ ਕਰਿਤ੍ਵਾ ਵਸ੍ਸਂ ਉਪਗਚ੍ਛਿ. ਵਸ੍ਸਂਵੁਤ੍ਥਾਤਿ ਪੁਰਿਮਿਕਾਯ ਉਪਗਤਾ ਮਹਾਪਵਾਰਣਾਯ ਪਵਾਰਿਤਾ ਪਾਟਿਪਦਦਿਵਸਤੋ ਪਟ੍ਠਾਯ ‘‘ਵੁਤ੍ਥਵਸ੍ਸਾ’’ਤਿ ਵੁਚ੍ਚਨ੍ਤਿ. ਏਵਂ ਵਸ੍ਸਂਵੁਤ੍ਥਾ ਹੁਤ੍ਵਾ.
ਤਿਣਕੁਟਿਯੋ ਭਿਨ੍ਦਿਤ੍ਵਾਤਿ ਨ ਦਣ੍ਡਮੁਗ੍ਗਰਾਦੀਹਿ ਚੁਣ੍ਣਵਿਚੁਣ੍ਣਂ ਕਤ੍ਵਾ, ਵਤ੍ਤਸੀਸੇਨ ਪਨ ਤਿਣਞ੍ਚ ਦਾਰੁਵਲ੍ਲਿ-ਆਦੀਨਿ ਚ ਓਰੋਪੇਤ੍ਵਾਤਿ ਅਤ੍ਥੋ. ਯੇਨ ਹਿ ਵਿਹਾਰਪਚ੍ਚਨ੍ਤੇ ਕੁਟਿ ਕਤਾ ਹੋਤਿ, ਤੇਨ ਸਚੇ ਆਵਾਸਿਕਾ ਭਿਕ੍ਖੂ ਹੋਨ੍ਤਿ, ਤੇ ਆਪੁਚ੍ਛਿਤਬ੍ਬਾ. ‘‘ਸਚੇ ਇਮਂ ਕੁਟਿਂ ਪਟਿਜਗ੍ਗਿਤ੍ਵਾ ਕੋਚਿ ਵਸਿਤੁਂ ਉਸ੍ਸਹਤਿ, ਤਸ੍ਸ ਦੇਥਾ’’ਤਿ ਵਤ੍ਵਾ ਪਕ੍ਕਮਿਤਬ੍ਬਂ. ਯੇਨ ਅਰਞ੍ਞੇ ਵਾ ਕਤਾ ਹੋਤਿ, ਪਟਿਜਗ੍ਗਨਕਂ ਵਾ ਨ ਲਭਤਿ, ਤੇਨ ‘‘ਅਞ੍ਞੇਸਮ੍ਪਿ ਪਰਿਭੋਗਂ ਭਵਿਸ੍ਸਤੀ’’ਤਿ ਪਟਿਸਾਮੇਤ੍ਵਾ ਗਨ੍ਤਬ੍ਬਂ. ਤੇ ਪਨ ਭਿਕ੍ਖੂ ਅਰਞ੍ਞੇ ਕੁਟਿਯੋ ਕਤ੍ਵਾ ਪਟਿਜਗ੍ਗਨਕਂ ਅਲਭਨ੍ਤਾ ਤਿਣਞ੍ਚ ਕਟ੍ਠਞ੍ਚ ਪਟਿਸਾਮੇਤ੍ਵਾ ਸਙ੍ਗੋਪੇਤ੍ਵਾਤਿ ਅਤ੍ਥੋ. ਯਥਾ ਚ ਠਪਿਤਂ ਤਂ ਉਪਚਿਕਾਹਿ ਨ ਖਜ੍ਜਤਿ, ਅਨੋਵਸ੍ਸਕਞ੍ਚ ਹੋਤਿ, ਤਥਾ ਠਪੇਤ੍ਵਾ ‘‘ਇਦਂ ਠਾਨਂ ਆਗਨ੍ਤ੍ਵਾ ਵਸਿਤੁਕਾਮਾਨਂ ਸਬ੍ਰਹ੍ਮਚਾਰੀਨਂ ਉਪਕਾਰਾਯ ਭਵਿਸ੍ਸਤੀ’’ਤਿ ਗਮਿਯਵਤ੍ਤਂ ਪੂਰੇਤ੍ਵਾ.
ਜਨਪਦਚਾਰਿਕਂ ਪਕ੍ਕਮਿਂਸੂਤਿ ਅਤ੍ਤਨੋ ਅਤ੍ਤਨੋ ਚਿਤ੍ਤਾਨੁਕੂਲਂ ਜਨਪਦਂ ਅਗਮਂਸੁ. ਆਯਸ੍ਮਾ ਪਨ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤਤ੍ਥੇਵ ਵਸ੍ਸਂ ਵਸੀਤਿਆਦਿ ਉਤ੍ਤਾਨਤ੍ਥਮੇਵ. ਯਾਵਤਤਿਯਕਨ੍ਤਿ ਯਾਵਤਤਿਯਵਾਰਂ. ਅਨਵਯੋਤਿ ਅਨੁਅਵਯੋ, ਸਨ੍ਧਿਵਸੇਨ ਉਕਾਰਲੋਪੋ. ਅਨੁ ਅਨੁ ਅਵਯੋ, ਯਂ ਯਂ ਕੁਮ੍ਭਕਾਰੇਹਿ ਕਤ੍ਤਬ੍ਬਂ ਨਾਮ ਅਤ੍ਥਿ, ਸਬ੍ਬਤ੍ਥ ਅਨੂਨੋ ਪਰਿਪੁਣ੍ਣਸਿਪ੍ਪੋਤਿ ਅਤ੍ਥੋ. ਸਕੇਤਿ ਅਤ੍ਤਨੋ ਸਨ੍ਤਕੇ. ਆਚਰਿਯਕੇਤਿ ਆਚਰਿਯਕਮ੍ਮੇ. ਕੁਮ੍ਭਕਾਰਕਮ੍ਮੇਤਿ ਕੁਮ੍ਭਕਾਰਾਨਂ ਕਮ੍ਮੇ; ਕੁਮ੍ਭਕਾਰੇਹਿ ਕਤ੍ਤਬ੍ਬਕਮ੍ਮੇਤਿ ਅਤ੍ਥੋ. ਏਤੇਨ ਸਕਂ ਆਚਰਿਯਕਂ ਸਰੂਪਤੋ ਦਸ੍ਸਿਤਂ ਹੋਤਿ. ਪਰਿਯੋਦਾਤਸਿਪ੍ਪੋਤਿ ਪਰਿਸੁਦ੍ਧਸਿਪ੍ਪੋ. ਅਨਵਯਤ੍ਤੇਪਿ ਸਤਿ ਅਞ੍ਞੇਹਿ ਅਸਦਿਸਸਿਪ੍ਪੋਤਿ ਵੁਤ੍ਤਂ ਹੋਤਿ.
ਸਬ੍ਬਮਤ੍ਤਿਕਾਮਯਨ੍ਤਿ ਪਿਟ੍ਠਸਙ੍ਘਾਟਕਕਵਾਟਸੂਚਿਘਟਿਕਵਾਤਪਾਨਕਵਾਟਮਤ੍ਤਂ ਠਪੇਤ੍ਵਾ ਅਵਸੇਸਂ ਭਿਤ੍ਤਿਛਦਨਿਟ੍ਠਕਥਮ੍ਭਾਦਿਭੇਦਂ ਸਬ੍ਬਂ ਗੇਹਸਮ੍ਭਾਰਂ ਮਤ੍ਤਿਕਾਮਯਮੇਵ ਕਤ੍ਵਾਤਿ ਅਤ੍ਥੋ. ਤਿਣਞ੍ਚ ਕਟ੍ਠਞ੍ਚ ਗੋਮਯਞ੍ਚ ਸਙ੍ਕਡ੍ਢਿਤ੍ਵਾ ਤਂ ਕੁਟਿਕਂ ਪਚੀਤਿ ਤਂ ਸਬ੍ਬਮਤ੍ਤਿਕਾਮਯਂ ਕਤ੍ਵਾ ਪਾਣਿਕਾਯ ਘਂਸਿਤ੍ਵਾ ਸੁਕ੍ਖਾਪੇਤ੍ਵਾ ਤੇਲਤਮ੍ਬਮਤ੍ਤਿਕਾਯ ਪਰਿਮਜ੍ਜਿਤ੍ਵਾ ਅਨ੍ਤੋ ਚ ਬਹਿ ਚ ਤਿਣਾਦੀਹਿ ਪੂਰੇਤ੍ਵਾ ਯਥਾ ਪਕ੍ਕਾ ਸੁਪਕ੍ਕਾ ਹੋਤਿ, ਏਵਂ ਪਚਿ. ਏਵਂ ਪਕ੍ਕਾ ਚ ਪਨ ਸਾ ਅਹੋਸਿ ਕੁਟਿਕਾ. ਅਭਿਰੂਪਾਤਿ ਸੁਰੂਪਾ. ਪਾਸਾਦਿਕਾਤਿ ਪਸਾਦਜਨਿਕਾ. ਲੋਹਿਤਿਕਾਤਿ ਲੋਹਿਤਵਣ੍ਣਾ. ਕਿਙ੍ਕਣਿਕਸਦ੍ਦੋਤਿ ਕਿਙ੍ਕਣਿਕਜਾਲਸ੍ਸ ਸਦ੍ਦੋ. ਯਥਾ ਕਿਰ ਨਾਨਾਰਤਨੇਹਿ ਕਤਸ੍ਸ ਕਿਙ੍ਕਣਿਕਜਾਲਸ੍ਸ ਸਦ੍ਦੋ ਹੋਤਿ, ਏਵਂ ਤਸ੍ਸਾ ਕੁਟਿਕਾਯ ਵਾਤਪਾਨਨ੍ਤਰਿਕਾਦੀਹਿ ਪਵਿਟ੍ਠੇਨ ਵਾਤੇਨ ਸਮਾਹਤਾਯ ਸਦ੍ਦੋ ਅਹੋਸਿ. ਏਤੇਨਸ੍ਸਾ ਅਨ੍ਤੋ ਚ ਬਹਿ ਚ ਸੁਪਕ੍ਕਭਾਵੋ ਦਸ੍ਸਿਤੋ ਹੋਤਿ. ਮਹਾਅਟ੍ਠਕਥਾਯਂ ਪਨ ‘‘ਕਿਙ੍ਕਣਿਕਾ’’ਤਿ ਕਂਸਭਾਜਨਂ, ਤਸ੍ਮਾ ਯਥਾ ਅਭਿਹਤਸ੍ਸ ਕਂਸਭਾਜਨਸ੍ਸ ਸਦ੍ਦੋ, ਏਵਮਸ੍ਸਾ ਵਾਤਪ੍ਪਹਤਾਯ ਸਦ੍ਦੋ ਅਹੋਸੀ’’ਤਿ ਵੁਤ੍ਤਂ.
੮੫. ਕਿਂ ਏਤਂ, ਭਿਕ੍ਖਵੇਤਿ ਏਤ੍ਥ ਜਾਨਨ੍ਤੋਵ ਭਗਵਾ ਕਥਾਸਮੁਟ੍ਠਾਪਨਤ੍ਥਂ ਪੁਚ੍ਛਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਨ੍ਤਿ ਸਬ੍ਬਮਤ੍ਤਿਕਾਮਯਾਯ ਕੁਟਿਕਾਯ ਕਰਣਭਾਵਂ ਆਦਿਤੋ ਪਟ੍ਠਾਯ ਭਗਵਤੋ ਆਰੋਚੇਸੁਂ. ਕਥਞ੍ਹਿ ਨਾਮ ਸੋ, ਭਿਕ੍ਖਵੇ…ਪੇ… ਕੁਟਿਕਂ ਕਰਿਸ੍ਸਤੀਤਿ ਇਦਂ ਅਤੀਤਤ੍ਥੇ ਅਨਾਗਤਵਚਨਂ; ਅਕਾਸੀਤਿ ਵੁਤ੍ਤਂ ਹੋਤਿ. ਤਸ੍ਸ ਲਕ੍ਖਣਂ ਸਦ੍ਦਸਤ੍ਥਤੋ ਪਰਿਯੇਸਿਤਬ੍ਬਂ. ਨ ਹਿ ਨਾਮ, ਭਿਕ੍ਖਵੇ, ਤਸ੍ਸ ਮੋਘਪੁਰਿਸਸ੍ਸ ਪਾਣੇਸੁ ਅਨੁਦ੍ਦਯਾ ਅਨੁਕਮ੍ਪਾ ਅਵਿਹੇਸਾ ਭਵਿਸ੍ਸਤੀਤਿ ਏਤ੍ਥ ਅਨੁਦ੍ਦਯਾਤਿ ਅਨੁਰਕ੍ਖਣਾ; ਏਤੇਨ ਮੇਤ੍ਤਾਪੁਬ੍ਬਭਾਗਂ ਦਸ੍ਸੇਤਿ. ਅਨੁਕਮ੍ਪਾਤਿ ਪਰਦੁਕ੍ਖੇਨ ਚਿਤ੍ਤਕਮ੍ਪਨਾ. ਅਵਿਹੇਸਾਤਿ ਅਵਿਹਿਂਸਨਾ; ਏਤੇਹਿ ਕਰੁਣਾਪੁਬ੍ਬਭਾਗਂ ਦਸ੍ਸੇਤਿ. ਇਦਂ ਵੁਤ੍ਤਂ ਹੋਤਿ – ‘‘ਭਿਕ੍ਖਵੇ, ਤਸ੍ਸ ਮੋਘਪੁਰਿਸਸ੍ਸ ਪਥਵੀਖਣਨਚਿਕ੍ਖਲ੍ਲਮਦ੍ਦਨਅਗ੍ਗਿਦਾਨੇਸੁ ਬਹੂ ਖੁਦ੍ਦਾਨੁਖੁਦ੍ਦਕੇ ਪਾਣੇ ਬ੍ਯਾਬਾਧੇਨ੍ਤਸ੍ਸ ਵਿਨਾਸੇਨ੍ਤਸ੍ਸ ਤੇਸੁ ਪਾਣੇਸੁ ਮੇਤ੍ਤਾਕਰੁਣਾਨਂ ਪੁਬ੍ਬਭਾਗਮਤ੍ਤਾਪਿ ਅਨੁਦ੍ਦਯਾ ਅਨੁਕਮ੍ਪਾ ਅਵਿਹੇਸਾ ਨ ਹਿ ਨਾਮ ਭਵਿਸ੍ਸਤਿ ਅਪ੍ਪਮਤ੍ਤਕਾਪਿ ਨਾਮ ਨ ਭਵਿਸ੍ਸਤੀ’’ਤਿ. ਮਾ ਪਚ੍ਛਿਮਾ ਜਨਤਾ ਪਾਣੇਸੁ ਪਾਤਬ੍ਯਤਂ ਆਪਜ੍ਜੀਤਿ ਪਚ੍ਛਿਮੋ ਜਨਸਮੂਹੋ ਪਾਣੇਸੁ ਪਾਤਬ੍ਯਭਾਵਂ ਮਾ ਆਪਜ੍ਜਿ. ‘‘ਬੁਦ੍ਧਕਾਲੇਪਿ ਭਿਕ੍ਖੂਹਿ ਏਵਂ ਕਤਂ, ਈਦਿਸੇਸੁ ਠਾਨੇਸੁ ਪਾਣਾਤਿਪਾਤਂ ਕਰੋਨ੍ਤਾਨਂ ਨਤ੍ਥਿ ਦੋਸੋ’’ਤਿ ਮਞ੍ਞਿਤ੍ਵਾ ਇਮਸ੍ਸ ਦਿਟ੍ਠਾਨੁਗਤਿਂ ਆਪਜ੍ਜਮਾਨਾ ਪਚ੍ਛਿਮਾ ਜਨਤਾ ਮਾ ਪਾਣੇਸੁ ਪਾਤਬ੍ਯੇ ਘਂਸਿਤਬ੍ਬੇ ਏਵਂ ਮਞ੍ਞੀਤਿ ਵੁਤ੍ਤਂ ਹੋਤਿ.
ਏਵਂ ਧਨਿਯਂ ਗਰਹਿਤ੍ਵਾ ਨ ਚ, ਭਿਕ੍ਖਵੇ, ਸਬ੍ਬਮਤ੍ਤਿਕਾਮਯਾ ਕੁਟਿਕਾ ਕਾਤਬ੍ਬਾਤਿ ਆਯਤਿਂ ਤਾਦਿਸਾਯ ਕੁਟਿਕਾਯ ਕਰਣਂ ਪਟਿਕ੍ਖਿਪਿ; ਪਟਿਕ੍ਖਿਪਿਤ੍ਵਾ ਚ ‘‘ਯੋ ਕਰੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਸਬ੍ਬਮਤ੍ਤਿਕਾਮਯਕੁਟਿਕਾਕਰਣੇ ਆਪਤ੍ਤਿਂ ਠਪੇਸਿ. ਤਸ੍ਮਾ ਯੋਪਿ ਪਥਵੀਖਣਨਾਦਿਨਾ ਪਾਣੇਸੁ ਪਾਤਬ੍ਯਤਂ ਅਨਾਪਜ੍ਜਨ੍ਤੋ ਤਾਦਿਸਂ ਕੁਟਿਕਂ ਕਰੋਤਿ, ਸੋਪਿ ਦੁਕ੍ਕਟਂ ਆਪਜ੍ਜਤਿ. ਪਥਵੀਖਣਨਾਦੀਹਿ ਪਨ ਪਾਣੇਸੁ ਪਾਤਬ੍ਯਤਂ ਆਪਜ੍ਜਨ੍ਤੋ ਯਂ ਯਂ ਵਤ੍ਥੁਂ ਵੀਤਿਕ੍ਕਮਤਿ, ਤਤ੍ਥ ਤਤ੍ਥ ਵੁਤ੍ਤਮੇਵ ਆਪਤ੍ਤਿਂ ਆਪਜ੍ਜਤਿ. ਧਨਿਯਤ੍ਥੇਰਸ੍ਸ ਆਦਿਕਮ੍ਮਿਕਤ੍ਤਾ ਅਨਾਪਤ੍ਤਿ. ਸੇਸਾਨਂ ਸਿਕ੍ਖਾਪਦਂ ਅਤਿਕ੍ਕਮਿਤ੍ਵਾ ਕਰੋਨ੍ਤਾਨਮ੍ਪਿ ਕਤਂ ਲਭਿਤ੍ਵਾ ਤਤ੍ਥ ਵਸਨ੍ਤਾਨਮ੍ਪਿ ਦੁਕ੍ਕਟਮੇਵ. ਦਬ੍ਬਸਮ੍ਭਾਰਮਿਸ੍ਸਕਾ ਪਨ ਯਥਾ ਵਾ ਤਥਾ ਵਾ ਮਿਸ੍ਸਾ ਹੋਤੁ, ਵਟ੍ਟਤਿ. ਸੁਦ੍ਧਮਤ੍ਤਿਕਾਮਯਾਵ ਨ ਵਟ੍ਟਤਿ. ਸਾਪਿ ਇਟ੍ਠਕਾਹਿ ਗਿਞ੍ਜਕਾਵਸਥਸਙ੍ਖੇਪੇਨ ਕਤਾ ਵਟ੍ਟਤਿ. ਏਵਂ ਭਨ੍ਤੇਤਿ ਖੋ…ਪੇ… ਤਂ ਕੁਟਿਂ ਭਿਨ੍ਦਿਂਸੂਤਿ ਭਗਵਤੋ ਵਚਨਂ ਸਮ੍ਪਟਿਚ੍ਛਿਤ੍ਵਾ ਕਟ੍ਠੇਹਿ ਚ ਪਾਸਾਣੇਹਿ ਚ ਤਂ ਕੁਟਿਕਂ ਵਿਕਿਰਨ੍ਤਾ ਭਿਨ੍ਦਿਂਸੁ.
ਅਥ ਖੋ ਆਯਸ੍ਮਾ ਧਨਿਯੋਤਿਆਦਿਮ੍ਹਿ ਅਯਂ ਸਙ੍ਖੇਪਤ੍ਥੋ – ਧਨਿਯੋ ਏਕਪਸ੍ਸੇ ਦਿਵਾਵਿਹਾਰਂ ਨਿਸਿਨ੍ਨੋ ਤੇਨ ਸਦ੍ਦੇਨ ਆਗਨ੍ਤ੍ਵਾ ਤੇ ਭਿਕ੍ਖੂ ‘‘ਕਿਸ੍ਸ ਮੇ ਤੁਮ੍ਹੇ, ਆਵੁਸੋ, ਕੁਟਿਂ ਭਿਨ੍ਦਥਾ’’ਤਿ ਪੁਚ੍ਛਿਤ੍ਵਾ ‘‘ਭਗਵਾ ਭੇਦਾਪੇਤੀ’’ਤਿ ਸੁਤ੍ਵਾ ਸੁਬ੍ਬਚਤਾਯ ਸਮ੍ਪਟਿਚ੍ਛਿ.
ਕਸ੍ਮਾ ਪਨ ਭਗਵਾ ਇਮਿਨਾ ਅਤਿਮਹਨ੍ਤੇਨ ਉਸ੍ਸਾਹੇਨ ਅਤ੍ਤਨੋ ਵਸਨਤ੍ਥਂ ਕਤਂ ਕੁਟਿਕਂ ਭੇਦਾਪੇਸਿ, ਨਨੁ ਏਤਸ੍ਸੇਤ੍ਥ ਵਯਕਮ੍ਮਮ੍ਪਿ ਅਤ੍ਥੀਤਿ? ਕਿਞ੍ਚਾਪਿ ਅਤ੍ਥਿ, ਅਥ ਖੋ ਨਂ ਭਗਵਾ ਅਕਪ੍ਪਿਯਾਤਿ ਭਿਨ੍ਦਾਪੇਸਿ, ਤਿਤ੍ਥਿਯਧਜੋਤਿ ਭਿਨ੍ਦਾਪੇਸਿ. ਅਯਮੇਤ੍ਥ ਵਿਨਿਚ੍ਛਯੋ. ਅਟ੍ਠਕਥਾਯਂ ਪਨ ਅਞ੍ਞਾਨਿਪਿ ਕਾਰਣਾਨਿ ਵੁਤ੍ਤਾਨਿ – ਸਤ੍ਤਾਨੁਦ੍ਦਯਾਯ, ਪਤ੍ਤਚੀਵਰਗੁਤ੍ਤਤ੍ਥਾਯ, ਸੇਨਾਸਨਬਾਹੁਲ੍ਲਪਅਸੇਧਨਾਯਾਤਿਆਦੀਨਿ. ਤਸ੍ਮਾ ਇਦਾਨਿਪਿ ਯੋ ਭਿਕ੍ਖੁ ਬਹੁਸ੍ਸੁਤੋ ਵਿਨਯਞ੍ਞੂ ਅਞ੍ਞਂ ਭਿਕ੍ਖੁਂ ਅਕਪ੍ਪਿਯਂ ਪਰਿਕ੍ਖਾਰਂ ਗਹੇਤ੍ਵਾ ਵਿਚਰਨ੍ਤਂ ਦਿਸ੍ਵਾ ਤਂ ਛਿਨ੍ਦਾਪੇਯ੍ਯ ਵਾ ਭਿਨ੍ਦਾਪੇਯ੍ਯ ਵਾ ਅਨੁਪਵਜ੍ਜੋ, ਸੋ ਨੇਵ ਚੋਦੇਤਬ੍ਬੋ ਨ ਸਾਰੇਤਬ੍ਬੋ; ਨ ਤਂ ਲਬ੍ਭਾ ਵਤ੍ਤੁਂ ‘‘ਮਮ ਪਰਿਕ੍ਖਾਰੋ ਤਯਾ ਨਾਸਿਤੋ, ਤਂ ਮੇ ਦੇਹੀ’’ਤਿ.
ਪਾਲ਼ਿਮੁਤ੍ਤਕਵਿਨਿਚ੍ਛਯੋ
ਤਤ੍ਰਾਯਂ ਪਾਲ਼ਿਮੁਤ੍ਤਕੋ ਕਪ੍ਪਿਯਾਕਪ੍ਪਿਯਪਰਿਕ੍ਖਾਰਵਿਨਿਚ੍ਛਯੋ – ਕੇਚਿ ਤਾਲਪਣ੍ਣਚ੍ਛਤ੍ਤਂ ਅਨ੍ਤੋ ਵਾ ਬਹਿ ਵਾ ਪਞ੍ਚਵਣ੍ਣੇਨ ਸੁਤ੍ਤੇਨ ਸਿਬ੍ਬਨ੍ਤਾ ਵਣ੍ਣਮਟ੍ਠਂ ਕਰੋਨ੍ਤਿ, ਤਂ ਨ ਵਟ੍ਟਤਿ. ਏਕਵਣ੍ਣੇਨ ਪਨ ਨੀਲੇਨ ਵਾ ਪੀਤਕੇਨ ਵਾ ਯੇਨ ਕੇਨਚਿ ਸੁਤ੍ਤੇਨ ਅਨ੍ਤੋ ਵਾ ਬਹਿ ਵਾ ਸਿਬ੍ਬਿਤੁਂ ਛਤ੍ਤਦਣ੍ਡਗ੍ਗਾਹਕਂ ਸਲਾਕਪਞ੍ਜਰਂ ਵਾ ਵਿਨਨ੍ਧਿਤੁਂ ਵਟ੍ਟਤਿ. ਤਞ੍ਚ ਖੋ ਥਿਰਕਰਣਤ੍ਥਂ, ਨ ਵਣ੍ਣਮਟ੍ਠਤ੍ਥਾਯ. ਛਤ੍ਤਪਣ੍ਣਕੇਸੁ ਮਕਰਦਨ੍ਤਕਂ ਵਾ ਅਡ੍ਢਚਨ੍ਦਕਂ ਵਾ ਛਿਨ੍ਦਿਤੁਂ ਨ ਵਟ੍ਟਤਿ. ਛਤ੍ਤਦਣ੍ਡੇ ਗੇਹਥਮ੍ਭੇਸੁ ਵਿਯ ਘਟਕੋ ਵਾ ਵਾਲ਼ਰੂਪਕਂ ਵਾ ਨ ਵਟ੍ਟਤਿ. ਸਚੇਪਿ ਸਬ੍ਬਤ੍ਥ ਆਰਗ੍ਗੇਨ ਲੇਖਾ ਦਿਨ੍ਨਾ ਹੋਤਿ, ਸਾਪਿ ਨ ਵਟ੍ਟਤਿ. ਘਟਕਮ੍ਪਿ ਵਾਲ਼ਰੂਪਮ੍ਪਿ ਭਿਨ੍ਦਿਤ੍ਵਾ ਧਾਰੇਤਬ੍ਬਂ. ਲੇਖਾਪਿ ਘਂਸਿਤ੍ਵਾ ਵਾ ਅਪਨੇਤਬ੍ਬਾ, ਸੁਤ੍ਤਕੇਨ ਵਾ ਦਣ੍ਡੋ ਵੇਠੇਤਬ੍ਬੋ. ਦਣ੍ਡਬੁਨ੍ਦੇ ਪਨ ਅਹਿਚ੍ਛਤ੍ਤਕਸਣ੍ਠਾਨਂ ਵਟ੍ਟਤਿ. ਵਾਤਪ੍ਪਹਾਰੇਨ ਅਚਲਨਤ੍ਥਂ ਛਤ੍ਤਮਣ੍ਡਲਿਕਂ ਰਜ੍ਜੁਕੇਹਿ ਗਾਹੇਤ੍ਵਾ ਦਣ੍ਡੇ ਬਨ੍ਧਨ੍ਤਿ, ਤਸ੍ਮਿਂ ਬਨ੍ਧਨਟ੍ਠਾਨੇ ਵਲਯਮਿਵ ਉਕ੍ਕਿਰਿਤ੍ਵਾ ਲੇਖਂ ਠਪੇਨ੍ਤਿ, ਸਾ ਵਟ੍ਟਤਿ.
ਚੀਵਰਮਣ੍ਡਨਤ੍ਥਾਯ ਨਾਨਾਸੁਤ੍ਤਕੇਹਿ ਸਤਪਦੀਸਦਿਸਂ ਸਿਬ੍ਬਨ੍ਤਾ ਆਗਨ੍ਤੁਕਪਟ੍ਟਂ ਠਪੇਨ੍ਤਿ, ਅਞ੍ਞਮ੍ਪਿ ਯਂਕਿਞ੍ਚਿ ਸੂਚਿਕਮ੍ਮਵਿਕਾਰਂ ਕਰੋਨ੍ਤਿ, ਪਟ੍ਟਮੁਖੇ ਵਾ ਪਰਿਯਨ੍ਤੇ ਵਾ ਵੇਣਿਂ ਵਾ ਸਙ੍ਖਲਿਕਂ ਵਾ, ਏਵਮਾਦਿ ਸਬ੍ਬਂ ਨ ਵਟ੍ਟਤਿ, ਪਕਤਿਸੂਚਿਕਮ੍ਮਮੇਵ ਵਟ੍ਟਤਿ. ਗਣ੍ਠਿਕਪਟ੍ਟਕਞ੍ਚ ਪਾਸਕਪਟ੍ਟਞ੍ਚ ਅਟ੍ਠਕੋਣਮ੍ਪਿ ਸੋਲ਼ਸਕੋਣਮ੍ਪਿ ਕਰੋਨ੍ਤਿ, ਤਤ੍ਥ ਅਗ੍ਘਿਯਗਯਮੁਗ੍ਗਰਾਦੀਨਿ ਦਸ੍ਸੇਨ੍ਤਿ, ਕਕ੍ਕਟਕ੍ਖੀਨਿ ਉਕ੍ਕਿਰਨ੍ਤਿ, ਸਬ੍ਬਂ ਨ ਵਟ੍ਟਤਿ, ਚਤੁਕੋਣਮੇਵ ਵਟ੍ਟਤਿ. ਕੋਣਸੁਤ੍ਤਪਿਲ਼ਕਾ ਚ ਚੀਵਰੇ ਰਤ੍ਤੇ ਦੁਵਿਞ੍ਞੇਯ੍ਯਰੂਪਾ ਵਟ੍ਟਨ੍ਤਿ. ਕਞ੍ਜਿਕਪਿਟ੍ਠਖਲਿਆਦੀਸੁ ਚੀਵਰਂ ਪਕ੍ਖਿਪਿਤੁਂ ਨ ਵਟ੍ਟਤਿ. ਚੀਵਰਕਮ੍ਮਕਾਲੇ ਪਨ ਹਤ੍ਥਮਲਸੂਚਿਮਲਾਦੀਨਂ ਧੋਵਨਤ੍ਥਂ ਕਿਲਿਟ੍ਠਕਾਲੇ ਚ ਧੋਵਨਤ੍ਥਂ ਵਟ੍ਟਤਿ. ਗਨ੍ਧਂ ਵਾ ਲਾਖਂ ਵਾ ਤੇਲਂ ਵਾ ਰਜਨੇ ਪਕ੍ਖਿਪਿਤੁਂ ਨ ਵਟ੍ਟਤਿ.
ਚੀਵਰਂ ਰਜਿਤ੍ਵਾ ਸਙ੍ਖੇਨ ਵਾ ਮਣਿਨਾ ਵਾ ਯੇਨ ਕੇਨਚਿ ਨ ਘਟ੍ਟੇਤਬ੍ਬਂ. ਭੂਮਿਯਂ ਜਾਣੁਕਾਨਿ ਨਿਹਨ੍ਤ੍ਵਾ ਹਤ੍ਥੇਹਿ ਗਹੇਤ੍ਵਾ ਦੋਣਿਯਮ੍ਪਿ ਨ ਘਂਸਿਤਬ੍ਬਂ. ਦੋਣਿਯਂ ਵਾ ਫਲਕੇ ਵਾ ਠਪੇਤ੍ਵਾ ਅਨ੍ਤੇ ਗਾਹਾਪੇਤ੍ਵਾ ਹਤ੍ਥੇਹਿ ਪਹਰਿਤੁਂ ਪਨ ਵਟ੍ਟਤਿ; ਤਮ੍ਪਿ ਮੁਟ੍ਠਿਨਾ ਨ ਕਾਤਬ੍ਬਂ. ਪੋਰਾਣਕਤ੍ਥੇਰਾ ਪਨ ਦੋਣਿਯਮ੍ਪਿ ਨ ਠਪੇਸੁਂ. ਏਕੋ ਗਹੇਤ੍ਵਾ ਤਿਟ੍ਠਤਿ; ਅਪਰੋ ਹਤ੍ਥੇ ਕਤ੍ਵਾ ਹਤ੍ਥੇਨ ਪਹਰਤਿ. ਚੀਵਰਸ੍ਸ ਕਣ੍ਣਸੁਤ੍ਤਕਂ ਨ ਵਟ੍ਟਤਿ, ਰਜਿਤਕਾਲੇ ਛਿਨ੍ਦਿਤਬ੍ਬਂ. ਯਂ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣਸੁਤ੍ਤਕ’’ਨ੍ਤਿ (ਮਹਾਵ. ੩੪੪) ਏਵਂ ਅਨੁਞ੍ਞਾਤਂ, ਤਂ ਅਨੁਵਾਤੇ ਪਾਸਕਂ ਕਤ੍ਵਾ ਬਨ੍ਧਿਤਬ੍ਬਂ ਰਜਨਕਾਲੇ ਲਗ੍ਗਨਤ੍ਥਾਯ. ਗਣ੍ਠਿਕੇਪਿ ਸੋਭਾਕਰਣਤ੍ਥਂ ਲੇਖਾ ਵਾ ਪਿਲ਼ਕਾ ਵਾ ਨ ਵਟ੍ਟਤਿ, ਨਾਸੇਤ੍ਵਾ ਪਰਿਭੁਞ੍ਜਿਤਬ੍ਬਂ.
ਪਤ੍ਤੇ ਵਾ ਥਾਲਕੇ ਵਾ ਆਰਗ੍ਗੇਨ ਲੇਖਂ ਕਰੋਨ੍ਤਿ, ਅਨ੍ਤੋ ਵਾ ਬਹਿ ਵਾ ਨ ਵਟ੍ਟਤਿ. ਪਤ੍ਤਂ ਭਮਂ ਆਰੋਪੇਤ੍ਵਾ ਮਜ੍ਜਿਤ੍ਵਾ ਪਚਨ੍ਤਿ – ‘‘ਮਣਿਵਣ੍ਣਂ ਕਰਿਸ੍ਸਾਮਾ’’ਤਿ, ਨ ਵਟ੍ਟਤਿ; ਤੇਲਵਣ੍ਣੋ ਪਨ ਵਟ੍ਟਤਿ. ਪਤ੍ਤਮਣ੍ਡਲੇ ਭਿਤ੍ਤਿਕਮ੍ਮਂ ਨ ਵਟ੍ਟਤਿ, ਮਕਰਦਨ੍ਤਕਂ ਪਨ ਵਟ੍ਟਤਿ.
ਧਮਕਰਣਛਤ੍ਤਕਸ੍ਸ ਉਪਰਿ ਵਾ ਹੇਟ੍ਠਾ ਵਾ ਧਮਕਰਣਕੁਚ੍ਛਿਯਂ ਵਾ ਲੇਖਾ ਨ ਵਟ੍ਟਤਿ, ਛਤ੍ਤਮੁਖਵਟ੍ਟਿਯਂ ਪਨਸ੍ਸ ਲੇਖਾ ਵਟ੍ਟਤਿ.
ਕਾਯਬਨ੍ਧਨਸ੍ਸ ਸੋਭਨਤ੍ਥਂ ਤਹਿਂ ਤਹਿਂ ਦਿਗੁਣਂ ਸੁਤ੍ਤਂ ਕੋਟ੍ਟੇਨ੍ਤਿ, ਕਕ੍ਕਟਚ੍ਛੀਨਿ ਉਟ੍ਠਪੇਨ੍ਤਿ, ਨ ਵਟ੍ਟਤਿ. ਉਭੋਸੁ ਪਨ ਅਨ੍ਤੇਸੁ ਦਸਾਮੁਖਸ੍ਸ ਥਿਰਭਾਵਾਯ ਦਿਗੁਣਂ ਕੋਟ੍ਟੇਤੁਂ ਵਟ੍ਟਤਿ. ਦਸਾਮੁਖੇ ਪਨ ਘਟਕਂ ਵਾ ਮਕਰਮੁਖਂ ਵਾ ਦੇਡ੍ਡੁਭਸੀਸਂ ਵਾ ਯਂਕਿਞ੍ਚਿ ਵਿਕਾਰਰੂਪਂ ਕਾਤੁਂ ਨ ਵਟ੍ਟਤਿ. ਤਤ੍ਥ ਤਤ੍ਥ ਅਚ੍ਛੀਨਿ ਦਸ੍ਸੇਤ੍ਵਾ ਮਾਲਾਕਮ੍ਮਲਤਾਕਮ੍ਮਾਦੀਨਿ ਵਾ ਕਤ੍ਵਾ ਕੋਟ੍ਟਿਤਕਾਯਬਨ੍ਧਨਮ੍ਪਿ ਨ ਵਟ੍ਟਤਿ. ਉਜੁਕਮੇਵ ਪਨ ਮਚ੍ਛਕਣ੍ਟਕਂ ਵਾ ਖਜ੍ਜੁਰਿਪਤ੍ਤਕਂ ਵਾ ਮਟ੍ਠਪਟ੍ਟਿਕਂ ਵਾ ਕਤ੍ਵਾ ਕੋਟ੍ਟਿਤੁਂ ਵਟ੍ਟਤਿ. ਕਾਯਬਨ੍ਧਨਸ੍ਸ ਦਸਾ ਏਕਾ ਵਟ੍ਟਤਿ, ਦ੍ਵੇ ਤੀਣਿ ਚਤ੍ਤਾਰਿਪਿ ਵਟ੍ਟਨ੍ਤਿ; ਤਤੋ ਪਰਂ ਨ ਵਟ੍ਟਨ੍ਤਿ. ਰਜ੍ਜੁਕਕਾਯਬਨ੍ਧਨਂ ਏਕਮੇਵ ਵਟ੍ਟਤਿ. ਪਾਮਙ੍ਗਸਣ੍ਠਾਨਂ ਪਨ ਏਕਮ੍ਪਿ ਨ ਵਟ੍ਟਤਿ. ਦਸਾ ਪਨ ਪਾਮਙ੍ਗਸਣ੍ਠਾਨਾਪਿ ਵਟ੍ਟਤਿ. ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ਬਹੁਰਜ੍ਜੁਕਨ੍ਤਿ ਨ ਵਤ੍ਤਬ੍ਬਂ, ਤਂ ਵਟ੍ਟਤਿ.
ਕਾਯਬਨ੍ਧਨਵਿਧੇ ਅਟ੍ਠਮਙ੍ਗਲਾਦਿਕਂ ਯਂਕਿਞ੍ਚਿ ਵਿਕਾਰਰੂਪਂ ਨ ਵਟ੍ਟਤਿ, ਪਰਿਚ੍ਛੇਦਲੇਖਾਮਤ੍ਤਂ ਵਟ੍ਟਤਿ. ਵਿਧਕਸ੍ਸ ਉਭੋਸੁ ਅਨ੍ਤੇਸੁ ਥਿਰਕਰਣਤ੍ਥਾਯ ਘਟਕਂ ਕਰੋਨ੍ਤਿ, ਅਯਮ੍ਪਿ ਵਟ੍ਟਤਿ.
ਅਞ੍ਜਨਿਯਂ ਇਤ੍ਥਿਪੁਰਿਸਚਤੁਪ੍ਪਦਸਕੁਣਰੂਪਂ ਵਾ ਮਾਲਾਕਮ੍ਮ-ਲਤਾਕਮ੍ਮਮਕਰਦਨ੍ਤਕ-ਗੋਮੁਤ੍ਤਕਅਡ੍ਢਚਨ੍ਦਕਾਦਿਭੇਦਂ ਵਾ ਵਿਕਾਰਰੂਪਂ ਨ ਵਟ੍ਟਤਿ. ਘਂਸਿਤ੍ਵਾ ਵਾ ਛਿਨ੍ਦਿਤ੍ਵਾ ਵਾ ਯਥਾ ਵਾ ਨ ਪਞ੍ਞਾਯਤਿ, ਤਥਾ ਸੁਤ੍ਤੇਨ ਵੇਠੇਤ੍ਵਾ ਵਲ਼ਞ੍ਜੇਤਬ੍ਬਾ. ਉਜੁਕਮੇਵ ਪਨ ਚਤੁਰਂਸਾ ਵਾ ਅਟ੍ਠਂਸਾ ਵਾ ਸੋਲ਼ਸਂਸਾ ਵਾ ਅਞ੍ਜਨੀ ਵਟ੍ਟਤਿ. ਹੇਟ੍ਠਤੋ ਪਿਸ੍ਸਾ ਦ੍ਵੇ ਵਾ ਤਿਸ੍ਸੋ ਵਾ ਵਟ੍ਟਲੇਖਾਯੋ ਵਟ੍ਟਨ੍ਤਿ. ਗੀਵਾਯਮ੍ਪਿਸ੍ਸਾ ਪਿਧਾਨਕਬਨ੍ਧਨਤ੍ਥਂ ਏਕਾ ਵਟ੍ਟਲੇਖਾ ਵਟ੍ਟਤਿ.
ਅਞ੍ਜਨਿਸਲਾਕਾਯਪਿ ਵਣ੍ਣਮਟ੍ਠਕਮ੍ਮਂ ਨ ਵਟ੍ਟਤਿ. ਅਞ੍ਜਨਿਤ੍ਥਵਿਕਾਯਮ੍ਪਿ ਯਂਕਿਞ੍ਚਿ ਨਾਨਾਵਣ੍ਣੇਨ ਸੁਤ੍ਤੇਨ ਵਣ੍ਣਮਟ੍ਠਕਮ੍ਮਂ ਨ ਵਟ੍ਟਤਿ. ਏਸੇਵ ਨਯੋ ਕੁਞ੍ਚਿਕਾਕੋਸਕੇਪਿ. ਕੁਞ੍ਚਿਕਾਯ ਵਣ੍ਣਮਟ੍ਠਕਮ੍ਮਂ ਨ ਵਟ੍ਟਤਿ, ਤਥਾ ਸਿਪਾਟਿਕਾਯਂ. ਏਕਵਣ੍ਣਸੁਤ੍ਤੇਨ ਪਨੇਤ੍ਥ ਯੇਨ ਕੇਨਚਿ ਸਿਬ੍ਬਿਤੁਂ ਵਟ੍ਟਤਿ.
ਆਰਕਣ੍ਟਕੇਪਿ ਵਟ੍ਟਮਣਿਕਂ ਵਾ ਅਞ੍ਞਂ ਵਾ ਵਣ੍ਣਮਟ੍ਠਂ ਨ ਵਟ੍ਟਤਿ. ਗੀਵਾਯਂ ਪਨ ਪਰਿਚ੍ਛੇਦਲੇਖਾ ਵਟ੍ਟਤਿ. ਪਿਪ੍ਫਲਿਕੇਪਿ ਮਣਿਕਂ ਵਾ ਪਿਲ਼ਕਂ ਵਾ ਯਂਕਿਞ੍ਚਿ ਉਟ੍ਠਪੇਤੁਂ ਨ ਵਟ੍ਟਤਿ. ਦਣ੍ਡਕੇ ਪਨ ਪਰਿਚ੍ਛੇਦਲੇਖਾ ਵਟ੍ਟਤਿ. ਨਖਚ੍ਛੇਦਨਂ ਵਲਿਤਕਂਯੇਵ ਕਰੋਨ੍ਤਿ, ਤਸ੍ਮਾ ਤਂ ਵਟ੍ਟਤਿ. ਉਤ੍ਤਰਾਰਣਿਯਂ ਵਾ ਅਧਰਾਰਣਿਯਂ ਵਾ ਅਰਣਿਧਨੁਕੇ ਵਾ ਉਪਰਿਪੇਲ੍ਲਨਦਣ੍ਡਕੇ ਵਾ ਮਾਲਾਕਮ੍ਮਾਦਿਕਂ ਯਂਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ, ਪੇਲ੍ਲਨਦਣ੍ਡਕਸ੍ਸ ਪਨ ਵੇਮਜ੍ਝੇ ਮਣ੍ਡਲਂ ਹੋਤਿ, ਤਤ੍ਥ ਪਰਿਚ੍ਛੇਦਲੇਖਾਮਤ੍ਤਂ ਵਟ੍ਟਤਿ. ਸੂਚਿਸਣ੍ਡਾਸਂ ਕਰੋਨ੍ਤਿ, ਯੇਨ ਸੂਚਿਂ ਡਂਸਾਪੇਤ੍ਵਾ ਘਂਸਨ੍ਤਿ, ਤਤ੍ਥ ਮਕਰਮੁਖਾਦਿਕਂ ਯਂਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ, ਸੂਚਿਡਂਸਨਤ੍ਥਂ ਪਨ ਮੁਖਮਤ੍ਤਂ ਹੋਤਿ, ਤਂ ਵਟ੍ਟਤਿ.
ਦਨ੍ਤਕਟ੍ਠਚ੍ਛੇਦਨਵਾਸਿਯਮ੍ਪਿ ਯਂਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ, ਉਜੁਕਮੇਵ ਕਪ੍ਪਿਯਲੋਹੇਨ ਉਭੋਸੁ ਵਾ ਪਸ੍ਸੇਸੁ ਚਤੁਰਂਸਂ ਵਾ ਅਟ੍ਠਂਸਂ ਵਾ ਬਨ੍ਧਿਤੁਂ ਵਟ੍ਟਤਿ. ਕਤ੍ਤਰਦਣ੍ਡੇਪਿ ਯਂਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ, ਹੇਟ੍ਠਾ ਏਕਾ ਵਾ ਦ੍ਵੇ ਵਾ ਵਟ੍ਟਲੇਖਾ ਉਪਰਿ ਅਹਿਚ੍ਛਤ੍ਤਕਮਕੁਲ਼ਮਤ੍ਤਞ੍ਚ ਵਟ੍ਟਤਿ.
ਤੇਲਭਾਜਨੇਸੁ ਵਿਸਾਣੇ ਵਾ ਨਾਲ਼ਿਯਂ ਵਾ ਅਲਾਬੁਕੇ ਵਾ ਆਮਣ੍ਡਸਾਰਕੇ ਵਾ ਠਪੇਤ੍ਵਾ ਇਤ੍ਥਿਰੂਪਂ ਪੁਰਿਸਰੂਪਞ੍ਚ ਅਵਸੇਸਂ ਸਬ੍ਬਮ੍ਪਿ ਵਣ੍ਣਮਟ੍ਠਕਮ੍ਮਂ ਵਟ੍ਟਤਿ.
ਮਞ੍ਚਪੀਠੇ ਭਿਸਿਬਿਮ੍ਬੋਹਨੇ ਭੂਮਤ੍ਥਰਣੇ ਪਾਦਪੁਞ੍ਛਨੇ ਚਙ੍ਕਮਨਭਿਸਿਯਾ ਸਮ੍ਮੁਞ੍ਜਨਿਯਂ ਕਚਵਰਛਡ੍ਡਨਕੇ ਰਜਨਦੋਣਿਕਾਯ ਪਾਨੀਯਉਲ਼ੁਙ੍ਕੇ ਪਾਨੀਯਘਟੇ ਪਾਦਕਥਲਿਕਾਯ ਫਲਕਪੀਠਕੇ ਵਲਯਾਧਾਰਕੇ ਦਣ੍ਡਾਧਾਰਕੇਪਤ੍ਤਪਿਧਾਨੇ ਤਾਲਵਣ੍ਟੇ ਵੀਜਨੇਤਿ – ਏਤੇਸੁ ਸਬ੍ਬਂ ਮਾਲਾਕਮ੍ਮਾਦਿਵਣ੍ਣਮਟ੍ਠਕਮ੍ਮਂ ਵਟ੍ਟਤਿ. ਸੇਨਾਸਨੇ ਪਨ ਦ੍ਵਾਰਕਵਾਟਵਾਤਪਾਨਕਵਾਟਾਦੀਸੁ ਸਬ੍ਬਰਤਨਮਯਮ੍ਪਿ ਵਣ੍ਣਮਟ੍ਠਕਮ੍ਮਂ ਵਟ੍ਟਤਿ.
ਸੇਨਾਸਨੇ ਕਿਞ੍ਚਿ ਪਟਿਸੇਧੇਤਬ੍ਬਂ ਨਤ੍ਥਿ, ਅਞ੍ਞਤ੍ਰ ਵਿਰੁਦ੍ਧਸੇਨਾਸਨਾ. ਵਿਰੁਦ੍ਧਸੇਨਾਸਨਂ ਨਾਮ ਅਞ੍ਞੇਸਂ ਸੀਮਾਯ ਰਾਜਵਲ੍ਲਭੇਹਿ ਕਤਸੇਨਾਸਨਂ ਵੁਚ੍ਚਤਿ, ਤਸ੍ਮਾ ਯੇ ਤਾਦਿਸਂ ਸੇਨਾਸਨਂ ਕਰੋਨ੍ਤਿ, ਤੇ ਵਤ੍ਤਬ੍ਬਾ – ‘‘ਮਾ ਅਮ੍ਹਾਕਂ ਸੀਮਾਯ ਸੇਨਾਸਨਂ ਕਰੋਥਾ’’ਤਿ. ਅਨਾਦਿਯਿਤ੍ਵਾ ਕਰੋਨ੍ਤਿਯੇਵ, ਪੁਨਪਿ ਵਤ੍ਤਬ੍ਬਾ – ‘‘ਮਾ ਏਵਂ ਅਕਤ੍ਥ, ਮਾ ਅਮ੍ਹਾਕਂ ਉਪੋਸਥਪਵਾਰਣਾਨਂ ਅਨ੍ਤਰਾਯਮਕਤ੍ਥ, ਮਾ ਸਾਮਗ੍ਗਿਂ ਭਿਨ੍ਦਿਤ੍ਥ, ਤੁਮ੍ਹਾਕਂ ਸੇਨਾਸਨਂ ਕਤਮ੍ਪਿ ਕਤਟ੍ਠਾਨੇ ਨ ਠਸ੍ਸਤੀ’’ਤਿ. ਸਚੇ ਬਲਕ੍ਕਾਰੇਨ ਕਰੋਨ੍ਤਿਯੇਵ, ਯਦਾ ਤੇਸਂ ਲਜ੍ਜਿਪਰਿਸਾ ਉਸ੍ਸਨ੍ਨਾ ਹੋਤਿ, ਸਕ੍ਕਾ ਚ ਹੋਤਿ ਲਦ੍ਧੁਂ ਧਮ੍ਮਿਕੋ ਵਿਨਿਚ੍ਛਯੋ, ਤਦਾ ਤੇਸਂ ਪੇਸੇਤਬ੍ਬਂ – ‘‘ਤੁਮ੍ਹਾਕਂ ਆਵਾਸਂ ਹਰਥਾ’’ਤਿ. ਸਚੇ ਯਾਵ ਤਤਿਯਂ ਪੇਸਿਤੇ ਹਰਨ੍ਤਿ, ਸਾਧੁ; ਨੋ ਚੇ ਹਰਨ੍ਤਿ, ਠਪੇਤ੍ਵਾ ਬੋਧਿਞ੍ਚ ਚੇਤਿਯਞ੍ਚ ਅਵਸੇਸਸੇਨਾਸਨਾਨਿ ਭਿਨ੍ਦਿਤਬ੍ਬਾਨਿ, ਨੋ ਚ ਖੋ ਅਪਰਿਭੋਗਂ ਕਰੋਨ੍ਤੇਹਿ, ਪਟਿਪਾਟਿਯਾ ਪਨ ਛਦਨ-ਗੋਪਾਨਸੀ-ਇਟ੍ਠਕਾਦੀਨਿ ਅਪਨੇਤ੍ਵਾ ਤੇਸਂ ਪੇਸੇਤਬ੍ਬਂ – ‘‘ਤੁਮ੍ਹਾਕਂ ਦਬ੍ਬਸਮ੍ਭਾਰੇ ਹਰਥਾ’’ਤਿ. ਸਚੇ ਹਰਨ੍ਤਿ, ਸਾਧੁ; ਨੋ ਚੇ ਹਰਨ੍ਤਿ, ਅਥ ਤੇਸੁ ਦਬ੍ਬਸਮ੍ਭਾਰੇਸੁ ਹਿਮਵਸ੍ਸਵਾਤਾਤਪਾਦੀਹਿ ਪੂਤਿਭੂਤੇਸੁ ਵਾ ਚੋਰੇਹਿ ਵਾ ਹਟੇਸੁ ਅਗ੍ਗਿਨਾ ਵਾ ਦਡ੍ਢੇਸੁ ਸੀਮਸਾਮਿਕਾ ਭਿਕ੍ਖੂ ਅਨੁਪਵਜ੍ਜਾ, ਨ ਲਬ੍ਭਾ ਚੋਦੇਤੁਂ ‘‘ਤੁਮ੍ਹੇਹਿ ਅਮ੍ਹਾਕਂ ਦਬ੍ਬਸਮ੍ਭਾਰਾ ਨਾਸਿਤਾ’’ਤਿ ਵਾ ‘‘ਤੁਮ੍ਹਾਕਂ ਗੀਵਾ’’ਤਿ ਵਾ. ਯਂ ਪਨ ਸੀਮਸਾਮਿਕੇਹਿ ਭਿਕ੍ਖੂਹਿ ਕਤਂ, ਤਂ ਸੁਕਤਮੇਵ ਹੋਤੀਤਿ.
ਪਾਲ਼ਿਮੁਤ੍ਤਕਵਿਨਿਚ੍ਛਯੋ ਨਿਟ੍ਠਿਤੋ.
੮੬. ਏਵਂ ਭਿਨ੍ਨਾਯ ਪਨ ਕੁਟਿਕਾਯ ਧਨਿਯਸ੍ਸ ਪਰਿਵਿਤਕ੍ਕਞ੍ਚ ਪੁਨ ਕੁਟਿਕਰਣਤ੍ਥਾਯ ਉਸ੍ਸਾਹਞ੍ਚ ਦਸ੍ਸੇਤੁਂ ‘‘ਅਥ ਖੋ ਆਯਸ੍ਮਤੋ’’ਤਿਆਦਿ ਵੁਤ੍ਤਂ. ਤਤ੍ਥ ਦਾਰੁਗਹੇ ਗਣਕੋਤਿ ਰਞ੍ਞੋ ਦਾਰੁਭਣ੍ਡਾਗਾਰੇ ਦਾਰੁਗੋਪਕੋ. ਦੇਵਗਹਦਾਰੂਨੀਤਿ ਦੇਵੇਨ ਗਹਿਤਦਾਰੂਨਿ. ਰਾਜਪਟਿਗ੍ਗਹਿਤਭੂਤਾਨਿ ਦਾਰੂਨੀਤਿ ਅਤ੍ਥੋ. ਨਗਰਪਟਿਸਙ੍ਖਾਰਿਕਾਨੀਤਿ ਨਗਰਸ੍ਸ ਪਟਿਸਙ੍ਖਾਰੂਪਕਰਣਾਨਿ. ਆਪਦਤ੍ਥਾਯ ਨਿਕ੍ਖਿਤ੍ਤਾਨੀਤਿ ਅਗ੍ਗਿਦਾਹੇਨ ਵਾ ਪੁਰਾਣਭਾਵੇਨ ਵਾ ਪਟਿਰਾਜੂਪਰੁਨ੍ਧਨਾਦਿਨਾ ਵਾ ਗੋਪੁਰਟ੍ਟਾਲਕਰਾਜਨ੍ਤੇਪੁਰਹਤ੍ਥਿਸਾਲਾਦੀਨਂ ਵਿਪਤ੍ਤਿ ਆਪਦਾਤਿ ਵੁਚ੍ਚਤਿ. ਤਦਤ੍ਥਂ ਨਿਕ੍ਖਿਤ੍ਤਾਨੀਤਿ ਵੁਤ੍ਤਂ ਹੋਤਿ. ਖਣ੍ਡਾਖਣ੍ਡਿਕਂ ਛੇਦਾਪੇਤ੍ਵਾਤਿ ਅਤ੍ਤਨੋ ਕੁਟਿਯਾ ਪਮਾਣਂ ਸਲ੍ਲਕ੍ਖੇਤ੍ਵਾ ਕਿਞ੍ਚਿ ਅਗ੍ਗੇ ਕਿਞ੍ਚਿ ਮਜ੍ਝੇ ਕਿਞ੍ਚਿ ਮੂਲੇ ਖਣ੍ਡਾਖਣ੍ਡਂ ਕਰੋਨ੍ਤੋ ਛੇਦਾਪੇਸਿ.
੮੭. ਵਸ੍ਸਕਾਰੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ. ਮਗਧਮਹਾਮਤ੍ਤੋਤਿ ਮਗਧਰਟ੍ਠੇ ਮਹਾਮਤ੍ਤੋ, ਮਹਤਿਯਾ ਇਸ੍ਸਰਿਯਮਤ੍ਤਾਯ ਸਮਨ੍ਨਾਗਤੋ, ਮਗਧਰਞ੍ਞੋ ਵਾ ਮਹਾਮਤ੍ਤੋ; ਮਹਾਅਮਚ੍ਚੋਤਿ ਵੁਤ੍ਤਂ ਹੋਤਿ. ਅਨੁਸਞ੍ਞਾਯਮਾਨੋਤਿ ਤਤ੍ਥ ਤਤ੍ਥ ਗਨ੍ਤ੍ਵਾ ਪਚ੍ਚਵੇਕ੍ਖਮਾਨੋ. ਭਣੇਤਿ ਇਸ੍ਸਰਾਨਂ ਨੀਚਟ੍ਠਾਨਿਕਪੁਰਿਸਾਲਪਨਂ. ਬਨ੍ਧਂ ਆਣਾਪੇਸੀਤਿ ਬ੍ਰਾਹ੍ਮਣੋ ਪਕਤਿਯਾਪਿ ਤਸ੍ਮਿਂ ਇਸ੍ਸਾਪਕਤੋਵ. ਸੋ ਰਞ੍ਞੋ ‘‘ਆਣਾਪੇਹੀ’’ਤਿ ਵਚਨਂ ਸੁਤ੍ਵਾ ਯਸ੍ਮਾ ‘‘ਪਕ੍ਕੋਸਾਪੇਹੀ’’ਤਿ ਰਞ੍ਞੋ ਨ ਵੁਤ੍ਤਂ, ਤਸ੍ਮਾ ‘‘ਨਂ ਹਤ੍ਥੇਸੁ ਚ ਪਾਦੇਸੁ ਚ ਬਨ੍ਧਂ ਕਤ੍ਵਾ ਆਣਾਪੇਸ੍ਸਾਮੀ’’ਤਿ ਬਨ੍ਧਂ ਆਣਾਪੇਸਿ. ਅਦ੍ਦਸ ਖੋ ਆਯਸ੍ਮਾ ਧਨਿਯੋਤਿ ਕਥਂ ਅਦ੍ਦਸ? ਸੋ ਕਿਰ ਅਤ੍ਤਨਾ ਲੇਸੇਨ ਦਾਰੂਨਂ ਹਟਭਾਵਂ ਞਤ੍ਵਾ ‘‘ਨਿਸ੍ਸਂਸਯਂ ਏਸ ਦਾਰੂਨਂ ਕਾਰਣਾ ਰਾਜਕੁਲਤੋ ਵਧਂ ਵਾ ਬਨ੍ਧਂ ਵਾ ਪਾਪੁਣਿਸ੍ਸਤਿ, ਤਦਾ ਨਂ ਅਹਮੇਵ ਮੋਚੇਸ੍ਸਾਮੀ’’ਤਿ ਨਿਚ੍ਚਕਾਲਂ ਤਸ੍ਸ ਪਵਤ੍ਤਿਂ ਸੁਣਨ੍ਤੋਯੇਵ ਵਿਚਰਤਿ. ਤਸ੍ਮਾ ਤਖਣਞ੍ਞੇਵ ਗਨ੍ਤ੍ਵਾ ਅਦ੍ਦਸ. ਤੇਨ ਵੁਤ੍ਤਂ – ‘‘ਅਦ੍ਦਸ ਖੋ ਆਯਸ੍ਮਾ ਧਨਿਯੋ’’ਤਿ. ਦਾਰੂਨਂ ਕਿਚ੍ਚਾਤਿ ਦਾਰੂਨਂ ਕਾਰਣਾ. ਪੁਰਾਹਂ ਹਞ੍ਞਾਮੀਤਿ ਅਹਂ ਪੁਰਾ ਹਞ੍ਞਾਮਿ; ਯਾਵ ਅਹਂ ਨ ਹਞ੍ਞਾਮਿ, ਤਾਵ ਤ੍ਵਂ ਏਯ੍ਯਾਸੀਤਿ ਅਤ੍ਥੋ.
੮੮. ਇਙ੍ਘ, ਭਨ੍ਤੇ, ਸਰਾਪੇਹੀਤਿ ਏਤ੍ਥ ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਪਠਮਾਭਿਸਿਤ੍ਤੋਤਿ ਅਭਿਸਿਤ੍ਤੋ ਹੁਤ੍ਵਾ ਪਠਮਂ. ਏਵਰੂਪਿਂ ਵਾਚਂ ਭਾਸਿਤਾਤਿ ‘‘ਦਿਨ੍ਨਞ੍ਞੇਵ ਸਮਣਬ੍ਰਾਹ੍ਮਣਾਨਂ ਤਿਣਕਟ੍ਠੋਦਕਂ ਪਰਿਭੁਞ੍ਜਨ੍ਤੂ’’ਤਿ ਇਮਂ ਏਵਰੂਪਿਂ ਵਾਚਂ ਅਭਿਸਿਤ੍ਤੋ ਹੁਤ੍ਵਾ ਪਠਮਮੇਵ ਯਂ ਤ੍ਵਂ ਅਭਾਸਿ, ਤਂ ਸਯਮੇਵ ਭਾਸਿਤ੍ਵਾ ਇਦਾਨਿ ਸਰਸਿ, ਨ ਸਰਸੀਤਿ ਵੁਤ੍ਤਂ ਹੋਤਿ. ਰਾਜਾਨੋ ਕਿਰ ਅਭਿਸਿਤ੍ਤਮਤ੍ਤਾਯੇਵ ਧਮ੍ਮਭੇਰਿਂ ਚਰਾਪੇਨ੍ਤਿ – ‘‘ਦਿਨ੍ਨਞ੍ਞੇਵ ਸਮਣਬ੍ਰਾਹ੍ਮਣਾਨਂ ਤਿਣਕਟ੍ਠੋਦਕਂ ਪਰਿਭੁਞ੍ਜਨ੍ਤੂ’’ਤਿ ਤਂ ਸਨ੍ਧਾਯ ਏਸ ਵਦਤਿ. ਤੇਸਂ ਮਯਾ ਸਨ੍ਧਾਯ ਭਾਸਿਤਨ੍ਤਿ ਤੇਸਂ ਅਪ੍ਪਮਤ੍ਤਕੇਪਿ ਕੁਕ੍ਕੁਚ੍ਚਾਯਨ੍ਤਾਨਂ ਸਮਿਤਬਾਹਿਤਪਾਪਾਨਂ ਸਮਣਬ੍ਰਾਹ੍ਮਣਾਨਂ ਤਿਣਕਟ੍ਠੋਦਕਹਰਣਂ ਸਨ੍ਧਾਯ ਮਯਾ ਏਤਂ ਭਾਸਿਤਂ; ਨ ਤੁਮ੍ਹਾਦਿਸਾਨਨ੍ਤਿ ਅਧਿਪ੍ਪਾਯੋ. ਤਞ੍ਚ ਖੋ ਅਰਞ੍ਞੇ ਅਪਰਿਗ੍ਗਹਿਤਨ੍ਤਿ ਤਞ੍ਚ ਤਿਣਕਟ੍ਠੋਦਕਂ ਯਂ ਅਰਞ੍ਞੇ ਅਪਰਿਗ੍ਗਹਿਤਂ ਹੋਤਿ; ਏਤਂ ਸਨ੍ਧਾਯ ਮਯਾ ਭਾਸਿਤਨ੍ਤਿ ਦੀਪੇਤਿ.
ਲੋਮੇਨ ਤ੍ਵਂ ਮੁਤ੍ਤੋਸੀਤਿ ਏਤ੍ਥ ਲੋਮਮਿਵ ਲੋਮਂ, ਕਿਂ ਪਨ ਤਂ? ਪਬ੍ਬਜ੍ਜਾਲਿਙ੍ਗਂ. ਕਿਂ ਵੁਤ੍ਤਂ ਹੋਤਿ? ਯਥਾ ਨਾਮ ਧੁਤ੍ਤਾ ‘‘ਮਂਸਂ ਖਾਦਿਸ੍ਸਾਮਾ’’ਤਿ ਮਹਗ੍ਘਲੋਮਂ ਏਲ਼ਕਂ ਗਣ੍ਹੇਯ੍ਯੁਂ. ਤਮੇਨਂ ਅਞ੍ਞੋ ਵਿਞ੍ਞੁਪੁਰਿਸੋ ਦਿਸ੍ਵਾ ‘‘ਇਮਸ੍ਸ ਏਲ਼ਕਸ੍ਸ ਮਂਸਂ ਕਹਾਪਣਮਤ੍ਤਂ ਅਗ੍ਘਤਿ. ਲੋਮਾਨਿ ਪਨ ਲੋਮਵਾਰੇ ਲੋਮਵਾਰੇ ਅਨੇਕੇ ਕਹਾਪਣੇ ਅਗ੍ਘਨ੍ਤੀ’’ਤਿ ਦ੍ਵੇ ਅਲੋਮਕੇ ਏਲ਼ਕੇ ਦਤ੍ਵਾ ਗਣ੍ਹੇਯ੍ਯ. ਏਵਂ ਸੋ ਏਲ਼ਕੋ ਵਿਞ੍ਞੁਪੁਰਿਸਮਾਗਮ੍ਮ ਲੋਮੇਨ ਮੁਚ੍ਚੇਯ੍ਯ. ਏਵਮੇਵ ਤ੍ਵਂ ਇਮਸ੍ਸ ਕਮ੍ਮਸ੍ਸ ਕਤਤ੍ਤਾ ਵਧਬਨ੍ਧਨਾਰਹੋ. ਯਸ੍ਮਾ ਪਨ ਅਰਹਦ੍ਧਜੋ ਸਬ੍ਭਿ ਅਵਜ੍ਝਰੂਪੋ, ਤ੍ਵਞ੍ਚ ਸਾਸਨੇ ਪਬ੍ਬਜਿਤਤ੍ਤਾ ਯਂ ਪਬ੍ਬਜ੍ਜਾਲਿਙ੍ਗਭੂਤਂ ਅਰਹਦ੍ਧਜਂ ਧਾਰੇਸਿ. ਤਸ੍ਮਾ ਤ੍ਵਂ ਇਮਿਨਾ ਪਬ੍ਬਜ੍ਜਾਲਿਙ੍ਗਲੋਮੇਨ ਏਲ਼ਕੋ ਵਿਯ ਵਿਞ੍ਞੁਪੁਰਿਸਮਾਗਮ੍ਮ ਮੁਤ੍ਤੋਸੀਤਿ.
ਮਨੁਸ੍ਸਾ ਉਜ੍ਝਾਯਨ੍ਤੀਤਿ ਰਞ੍ਞੋ ਪਰਿਸਤਿ ਭਾਸਮਾਨਸ੍ਸ ਸਮ੍ਮੁਖਾ ਚ ਪਰਮ੍ਮੁਖਾ ਚ ਸੁਤ੍ਵਾ ਤਤ੍ਥ ਤਤ੍ਥ ਮਨੁਸ੍ਸਾ ਉਜ੍ਝਾਯਨ੍ਤਿ, ਅਵਜ੍ਝਾਯਨ੍ਤਿ, ਅਵਜਾਨਨ੍ਤਾ ਤਂ ਝਾਯਨ੍ਤਿ ਓਲੋਕੇਨ੍ਤਿ ਲਾਮਕਤੋ ਵਾ ਚਿਨ੍ਤੇਨ੍ਤੀਤਿ ਅਤ੍ਥੋ. ਖਿਯ੍ਯਨ੍ਤੀਤਿ ਤਸ੍ਸ ਅਵਣ੍ਣਂ ਕਥੇਨ੍ਤਿ ਪਕਾਸੇਨ੍ਤਿ. ਵਿਪਾਚੇਨ੍ਤੀਤਿ ਵਿਤ੍ਥਾਰਿਕਂ ਕਰੋਨ੍ਤਿ, ਸਬ੍ਬਤ੍ਥ ਪਤ੍ਥਰਨ੍ਤਿ; ਅਯਞ੍ਚ ਅਤ੍ਥੋ ਸਦ੍ਦਸਤ੍ਥਾਨੁਸਾਰੇਨ ਵੇਦਿਤਬ੍ਬੋ. ਅਯਂ ਪਨੇਤ੍ਥ ਯੋਜਨਾ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ’’ਤਿਆਦੀਨਿ ਚਿਨ੍ਤੇਨ੍ਤਾ ਉਜ੍ਝਾਯਨ੍ਤਿ. ‘‘ਨਤ੍ਥਿ ਇਮੇਸਂ ਸਾਮਞ੍ਞ’’ਨ੍ਤਿਆਦੀਨਿ ਭਣਨ੍ਤਾ ਖਿਯ੍ਯਨ੍ਤਿ. ‘‘ਅਪਗਤਾ ਇਮੇ ਸਾਮਞ੍ਞਾ’’ਤਿਆਦੀਨਿ ਤਤ੍ਥ ਤਤ੍ਥ ਵਿਤ੍ਥਾਰੇਨ੍ਤਾ ਵਿਪਾਚੇਨ੍ਤੀਤਿ. ਏਤੇਨ ਨਯੇਨ ਇਮੇਸਂ ਪਦਾਨਂ ਇਤੋ ਪਰਮ੍ਪਿ ਤਤ੍ਥ ਤਤ੍ਥ ਆਗਤਪਦਾਨੁਰੂਪੇਨ ਯੋਜਨਾ ਵੇਦਿਤਬ੍ਬਾ. ਬ੍ਰਹ੍ਮਚਾਰਿਨੋਤਿ ਸੇਟ੍ਠਚਾਰਿਨੋ. ਸਾਮਞ੍ਞਨ੍ਤਿ ਸਮਣਭਾਵੋ. ਬ੍ਰਹ੍ਮਞ੍ਞਨ੍ਤਿ ਸੇਟ੍ਠਭਾਵੋ. ਸੇਸਂ ਉਤ੍ਤਾਨਤ੍ਥਮੇਵ.
ਰਞ੍ਞੋ ਦਾਰੂਨੀਤਿਆਦਿਮ੍ਹਿ ‘‘ਅਦਿਨ੍ਨਂ ਆਦਿਯਿਸ੍ਸਤੀ’’ਤਿ ਅਯਂ ਉਜ੍ਝਾਯਨਤ੍ਥੋ. ਯਂ ਪਨੇਤਂ ਅਦਿਨ੍ਨਂ ਆਦਿਯਿ, ਤਂ ਦਸ੍ਸੇਤੁਂ ‘‘ਰਞ੍ਞੋ ਦਾਰੂਨੀ’’ਤਿ ਵੁਤ੍ਤਂ. ਇਤਿ ਵਚਨਭੇਦੇ ਅਸਮ੍ਮੁਯ੍ਹਨ੍ਤੇਹਿ ਅਤ੍ਥੋ ਵੇਦਿਤਬ੍ਬੋ. ਪੁਰਾਣਵੋਹਾਰਿਕੋ ਮਹਾਮਤ੍ਤੋਤਿ ਭਿਕ੍ਖੁਭਾਵਤੋ ਪੁਰਾਣੇ ਗਿਹਿਕਾਲੇ ਵਿਨਿਚ੍ਛਯਵੋਹਾਰੇ ਨਿਯੁਤ੍ਤਤ੍ਤਾ ‘‘ਵੋਹਾਰਿਕੋ’’ਤਿ ਸਙ੍ਖਂ ਗਤੋ ਮਹਾਅਮਚ੍ਚੋ.
ਅਥ ਖੋ ਭਗਵਾ ਤਂ ਭਿਕ੍ਖੁਂ ਏਤਦਵੋਚਾਤਿ ਭਗਵਾ ਸਾਮਂਯੇਵ ਲੋਕਵੋਹਾਰਮ੍ਪਿ ਜਾਨਾਤਿ, ਅਤੀਤਬੁਦ੍ਧਾਨਂ ਪਞ੍ਞਤ੍ਤਿਮ੍ਪਿ ਜਾਨਾਤਿ – ‘‘ਪੁਬ੍ਬੇਪਿ ਬੁਦ੍ਧਾ ਏਤ੍ਤਕੇਨ ਪਾਰਾਜਿਕਂ ਪਞ੍ਞਪੇਨ੍ਤਿ, ਏਤ੍ਤਕੇਨ ਥੁਲ੍ਲਚ੍ਚਯਂ, ਏਤ੍ਤਕੇਨ ਦੁਕ੍ਕਟ’’ਨ੍ਤਿ. ਏਵਂ ਸਨ੍ਤੇਪਿ ਸਚੇ ਅਞ੍ਞੇਹਿ ਲੋਕਵੋਹਾਰਵਿਞ੍ਞੂਹਿ ਸਦ੍ਧਿਂ ਅਸਂਸਨ੍ਦਿਤ੍ਵਾ ਪਾਦਮਤ੍ਤੇਨ ਪਾਰਾਜਿਕਂ ਪਞ੍ਞਪੇਯ੍ਯ, ਤੇਨਸ੍ਸ ਸਿਯੁਂ ਵਤ੍ਤਾਰੋ ‘‘ਸੀਲਸਂਵਰੋ ਨਾਮ ਏਕਭਿਕ੍ਖੁਸ੍ਸਪਿ ਅਪ੍ਪਮੇਯ੍ਯੋ ਅਸਙ੍ਖ੍ਯੇਯ੍ਯੋ ਮਹਾਪਥਵੀ-ਸਮੁਦ੍ਦ-ਆਕਾਸਾਨਿ ਵਿਯ ਅਤਿਵਿਤ੍ਥਿਣ੍ਣੋ, ਕਥਞ੍ਹਿ ਨਾਮ ਭਗਵਾ ਪਾਦਮਤ੍ਤਕੇਨ ਨਾਸੇਸੀ’’ਤਿ! ਤਤੋ ਤਥਾਗਤਸ੍ਸ ਞਾਣਬਲਂ ਅਜਾਨਨ੍ਤਾ ਸਿਕ੍ਖਾਪਦਂ ਕੋਪੇਯ੍ਯੁਂ, ਪਞ੍ਞਤ੍ਤਮ੍ਪਿ ਸਿਕ੍ਖਾਪਦਂ ਯਥਾਠਾਨੇ ਨ ਤਿਟ੍ਠੇਯ੍ਯ. ਲੋਕਵੋਹਾਰਵਿਞ੍ਞੂਹਿ ਪਨ ਸਦ੍ਧਿਂ ਸਂਸਨ੍ਦਿਤ੍ਵਾ ਪਞ੍ਞਤ੍ਤੇ ਸੋ ਉਪਵਾਦੋ ਨ ਹੋਤਿ. ਅਞ੍ਞਦਤ੍ਥੁ ਏਵਂ ਵਤ੍ਤਾਰੋ ਹੋਨ੍ਤਿ – ‘‘ਇਮੇਹਿ ਨਾਮ ਅਗਾਰਿਕਾਪਿ ਪਾਦਮਤ੍ਤੇਨ ਚੋਰਂ ਹਨਨ੍ਤਿਪਿ ਬਨ੍ਧਨ੍ਤਿਪਿ ਪਬ੍ਬਾਜੇਨ੍ਤਿਪਿ. ਕਸ੍ਮਾ ਭਗਵਾ ਪਬ੍ਬਜਿਤਂ ਨ ਨਾਸੇਸ੍ਸਤਿ; ਯੇਨ ਪਰਸਨ੍ਤਕਂ ਤਿਣਸਲਾਕਮਤ੍ਤਮ੍ਪਿ ਨ ਗਹੇਤਬ੍ਬ’’ਨ੍ਤਿ! ਤਥਾਗਤਸ੍ਸ ਚ ਞਾਣਬਲਂ ਜਾਨਿਸ੍ਸਨ੍ਤਿ. ਪਞ੍ਞਤ੍ਤਮ੍ਪਿ ਚ ਸਿਕ੍ਖਾਪਦਂ ਅਕੁਪ੍ਪਂ ਭਵਿਸ੍ਸਤਿ, ਯਥਾਠਾਨੇ ਠਸ੍ਸਤਿ. ਤਸ੍ਮਾ ਲੋਕਵੋਹਾਰਵਿਞ੍ਞੂਹਿ ਸਦ੍ਧਿਂ ਸਂਸਨ੍ਦਿਤ੍ਵਾ ਪਞ੍ਞਪੇਤੁਕਾਮੋ ਸਬ੍ਬਾਵਨ੍ਤਂ ਪਰਿਸਂ ਅਨੁਵਿਲੋਕੇਨ੍ਤੋ ਅਥ ਖੋ ਭਗਵਾ ਅਵਿਦੂਰੇ ਨਿਸਿਨ੍ਨਂ ਦਿਸ੍ਵਾ ਤਂ ਭਿਕ੍ਖੁਂ ਏਤਦਵੋਚ ‘‘ਕਿਤ੍ਤਕੇਨ ਖੋ ਭਿਕ੍ਖੁ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਚੋਰਂ ਗਹੇਤ੍ਵਾ ਹਨਤਿ ਵਾ ਬਨ੍ਧਤਿ ਵਾ ਪਬ੍ਬਾਜੇਤਿ ਵਾ’’ਤਿ.
ਤਤ੍ਥ ਮਾਗਧੋਤਿ ਮਗਧਾਨਂ ਇਸ੍ਸਰੋ. ਸੇਨਿਯੋਤਿ ਸੇਨਾਯ ਸਮ੍ਪਨ੍ਨੋ. ਬਿਮ੍ਬਿਸਾਰੋਤਿ ਤਸ੍ਸ ਨਾਮਂ. ਪਬ੍ਬਾਜੇਤਿ ਵਾਤਿ ਰਟ੍ਠਤੋ ਨਿਕ੍ਖਾਮੇਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਪਞ੍ਚਮਾਸਕੋ ਪਾਦੋਤਿ ਤਦਾ ਰਾਜਗਹੇ ਵੀਸਤਿਮਾਸਕੋ ਕਹਾਪਣੋ ਹੋਤਿ, ਤਸ੍ਮਾ ਪਞ੍ਚਮਾਸਕੋ ਪਾਦੋ. ਏਤੇਨ ਲਕ੍ਖਣੇਨ ਸਬ੍ਬਜਨਪਦੇਸੁ ਕਹਾਪਣਸ੍ਸ ਚਤੁਤ੍ਥੋ ਭਾਗੋ ‘‘ਪਾਦੋ’’ਤਿ ਵੇਦਿਤਬ੍ਬੋ. ਸੋ ਚ ਖੋ ਪੋਰਾਣਸ੍ਸ ਨੀਲਕਹਾਪਣਸ੍ਸ ਵਸੇਨ, ਨ ਇਤਰੇਸਂ ਰੁਦ੍ਰਦਾਮਕਾਦੀਨਂ. ਤੇਨ ਹਿ ਪਾਦੇਨ ਅਤੀਤਬੁਦ੍ਧਾਪਿ ਪਾਰਾਜਿਕਂ ਪਞ੍ਞਪੇਸੁਂ, ਅਨਾਗਤਾਪਿ ਪਞ੍ਞਪੇਸ੍ਸਨ੍ਤਿ. ਸਬ੍ਬਬੁਦ੍ਧਾਨਞ੍ਹਿ ਪਾਰਾਜਿਕਵਤ੍ਥੁਮ੍ਹਿ ਵਾ ਪਾਰਾਜਿਕੇ ਵਾ ਨਾਨਤ੍ਤਂ ਨਤ੍ਥਿ. ਇਮਾਨੇਵ ਚਤ੍ਤਾਰਿ ਪਾਰਾਜਿਕਵਤ੍ਥੂਨਿ. ਇਮਾਨੇਵ ਚਤ੍ਤਾਰਿ ਪਾਰਾਜਿਕਾਨਿ. ਇਤੋ ਊਨਂ ਵਾ ਅਤਿਰੇਕਂ ਵਾ ਨਤ੍ਥਿ. ਤਸ੍ਮਾ ਭਗਵਾਪਿ ਧਨਿਯਂ ਵਿਗਰਹਿਤ੍ਵਾ ਪਾਦੇਨੇਵ ਦੁਤਿਯਪਾਰਾਜਿਕਂ ਪਞ੍ਞਪੇਨ੍ਤੋ ‘‘ਯੋ ਪਨ ਭਿਕ੍ਖੁ ਅਦਿਨ੍ਨਂ ਥੇਯ੍ਯਸਙ੍ਖਾਤ’’ਨ੍ਤਿਆਦਿਮਾਹ.
ਏਵਂ ਮੂਲਚ੍ਛੇਜ੍ਜਵਸੇਨ ਦਲ਼੍ਹਂ ਕਤ੍ਵਾ ਦੁਤਿਯਪਾਰਾਜਿਕੇ ਪਞ੍ਞਤ੍ਤੇ ਅਪਰਮ੍ਪਿ ਅਨੁਪਞ੍ਞਤ੍ਤਤ੍ਥਾਯ ਰਜਕਭਣ੍ਡਿਕਵਤ੍ਥੁ ਉਦਪਾਦਿ, ਤਸ੍ਸੁਪ੍ਪਤ੍ਤਿਦੀਪਨਤ੍ਥਮੇਤਂ ਵੁਤ੍ਤਂ – ‘‘ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤੀ’’ਤਿ. ਤਸ੍ਸਤ੍ਥੋ ਚ ਅਨੁਪਞ੍ਞਤ੍ਤਿਸਮ੍ਬਨ੍ਧੋ ਚ ਪਠਮਪਾਰਾਜਿਕਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਯਥਾ ਚ ਇਧ, ਏਵਂ ਇਤੋ ਪਰੇਸੁ ਸਬ੍ਬਸਿਕ੍ਖਾਪਦੇਸੁ. ਯਂ ਯਂ ਪੁਬ੍ਬੇ ਵੁਤ੍ਤਂ, ਤਂ ਤਂ ਸਬ੍ਬਂ ਵਜ੍ਜੇਤ੍ਵਾ ਉਪਰੂਪਰਿ ਅਪੁਬ੍ਬਮੇਵ ਵਣ੍ਣਯਿਸ੍ਸਾਮ. ਯਦਿ ਹਿ ਯਂ ਯਂ ਵੁਤ੍ਤਨਯਂ, ਤਂ ਤਂ ਪੁਨਪਿ ਵਣ੍ਣਯਿਸ੍ਸਾਮ, ਕਦਾ ਵਣ੍ਣਨਾਯ ਅਨ੍ਤਂ ਗਮਿਸ੍ਸਾਮ! ਤਸ੍ਮਾ ਯਂ ਯਂ ਪੁਬ੍ਬੇ ਵੁਤ੍ਤਂ, ਤਂ ਤਂ ਸਬ੍ਬਂ ਸਾਧੁਕਂ ਉਪਸਲ੍ਲਕ੍ਖੇਤ੍ਵਾ ਤਤ੍ਥ ਤਤ੍ਥ ਅਤ੍ਥੋ ਚ ਯੋਜਨਾ ਚ ਵੇਦਿਤਬ੍ਬਾ. ਅਪੁਬ੍ਬਂ ਪਨ ਯਂਕਿਞ੍ਚਿ ਅਨੁਤ੍ਤਾਨਤ੍ਥਂ, ਤਂ ਸਬ੍ਬਂ ਮਯਮੇਵ ਵਣ੍ਣਯਿਸ੍ਸਾਮ.
ਧਨਿਯਵਤ੍ਥੁਵਣ੍ਣਨਾ ਨਿਟ੍ਠਿਤਾ.
੯੦. ਰਜਕਤ੍ਥਰਣਂ ਗਨ੍ਤ੍ਵਾਤਿ ਰਜਕਤਿਤ੍ਥਂ ਗਨ੍ਤ੍ਵਾ; ਤਞ੍ਹਿ ਯਸ੍ਮਾ ਤਤ੍ਥ ਰਜਕਾ ਵਤ੍ਥਾਨਿ ਅਤ੍ਥਰਨ੍ਤਿ, ਤਸ੍ਮਾ ਰਜਕਤ੍ਥਰਣਨ੍ਤਿ ਵੁਚ੍ਚਤਿ. ਰਜਕਭਣ੍ਡਿਕਨ੍ਤਿ ਰਜਕਾਨਂ ਭਣ੍ਡਿਕਂ; ਰਜਕਾ ਸਾਯਨ੍ਹਸਮਯੇ ਨਗਰਂ ਪਵਿਸਨ੍ਤਾ ਬਹੂਨਿ ਵਤ੍ਥਾਨਿ ਏਕੇਕਂ ਭਣ੍ਡਿਕਂ ਬਨ੍ਧਨ੍ਤਿ. ਤਤੋ ਏਕਂ ਭਣ੍ਡਿਕਂ ਤੇਸਂ ਪਮਾਦੇਨ ਅਪਸ੍ਸਨ੍ਤਾਨਂ ਅਵਹਰਿਤ੍ਵਾ ਥੇਨੇਤ੍ਵਾਤਿ ਅਤ੍ਥੋ.
ਪਦਭਾਜਨੀਯਵਣ੍ਣਨਾ
੯੨. ਗਾਮੋਨਾਮਾਤਿ ਏਵਮਾਦਿ ‘‘ਗਾਮਾ ਵਾ ਅਰਞ੍ਞਾ ਵਾ’’ਤਿ ਏਤ੍ਥ ਵੁਤ੍ਤਸ੍ਸ ਗਾਮਸ੍ਸ ਚ ਅਰਞ੍ਞਸ੍ਸ ਚ ਪਭੇਦਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਯਸ੍ਮਿਂ ਗਾਮੇ ਏਕਾ ਏਵ ਕੁਟਿ, ਏਕਂ ਗੇਹਂ ਸੇਯ੍ਯਥਾਪਿ ਮਲਯਜਨਪਦੇ; ਅਯਂ ਏਕਕੁਟਿਕੋ ਗਾਮੋ ਨਾਮ. ਏਤੇਨ ਨਯੇਨ ਅਪਰੇਪਿ ਵੇਦਿਤਬ੍ਬਾ. ਅਮਨੁਸ੍ਸੋਨਾਮ ਯੋ ਸਬ੍ਬਸੋ ਵਾ ਮਨੁਸ੍ਸਾਨਂ ਅਭਾਵੇਨ ਯਕ੍ਖਪਰਿਗ੍ਗਹਭੂਤੋ; ਯਤੋ ਵਾ ਮਨੁਸ੍ਸਾ ਕੇਨਚਿ ਕਾਰਣੇਨ ਪੁਨਪਿ ਆਗਨ੍ਤੁਕਾਮਾ ਏਵ ਅਪਕ੍ਕਨ੍ਤਾ. ਪਰਿਕ੍ਖਿਤ੍ਤੋਨਾਮ ਇਟ੍ਠਕਪਾਕਾਰਂ ਆਦਿਂ ਕਤ੍ਵਾ ਅਨ੍ਤਮਸੋ ਕਣ੍ਟਕਸਾਖਾਹਿਪਿ ਪਰਿਕ੍ਖਿਤ੍ਤੋ. ਗੋਨਿਸਾਦਿਨਿਵਿਟ੍ਠੋਨਾਮ ਵੀਥਿਸਨ੍ਨਿਵੇਸਾਦਿਵਸੇਨ ਅਨਿਵਿਸਿਤ੍ਵਾ ਯਥਾ ਗਾਵੋ ਤਤ੍ਥ ਤਤ੍ਥ ਦ੍ਵੇ ਤਯੋ ਨਿਸੀਦਨ੍ਤਿ, ਏਵਂ ਤਤ੍ਥ ਤਤ੍ਥ ਦ੍ਵੇ ਤੀਣਿ ਘਰਾਨਿ ਕਤ੍ਵਾ ਨਿਵਿਟ੍ਠੋ. ਸਤ੍ਥੋਤਿ ਜਙ੍ਘਸਤ੍ਥਸਕਟਸਤ੍ਥਾਦੀਸੁ ਯੋ ਕੋਚਿ. ਇਮਸ੍ਮਿਞ੍ਚ ਸਿਕ੍ਖਾਪਦੇ ਨਿਗਮੋਪਿ ਨਗਰਮ੍ਪਿ ਗਾਮਗ੍ਗਹਣੇਨੇਵ ਗਹਿਤਨ੍ਤਿ ਵੇਦਿਤਬ੍ਬਂ.
ਗਾਮੂਪਚਾਰੋਤਿਆਦਿ ਅਰਞ੍ਞਪਰਿਚ੍ਛੇਦਦਸ੍ਸਨਤ੍ਥਂ ਵੁਤ੍ਤਂ. ਇਨ੍ਦਖੀਲੇ ਠਿਤਸ੍ਸਾਤਿ ਯਸ੍ਸ ਗਾਮਸ੍ਸ ਅਨੁਰਾਧਪੁਰਸ੍ਸੇਵ ਦ੍ਵੇ ਇਨ੍ਦਖੀਲਾ, ਤਸ੍ਸ ਅਬ੍ਭਨ੍ਤਰਿਮੇ ਇਨ੍ਦਖੀਲੇ ਠਿਤਸ੍ਸ; ਤਸ੍ਸ ਹਿ ਬਾਹਿਰੋ ਇਨ੍ਦਖੀਲੋ ਆਭਿਧਮ੍ਮਿਕਨਯੇਨ ਅਰਞ੍ਞਸਙ੍ਖੇਪਂ ਗਚ੍ਛਤਿ. ਯਸ੍ਸ ਪਨ ਏਕੋ, ਤਸ੍ਸ ਗਾਮਦ੍ਵਾਰਬਾਹਾਨਂ ਵੇਮਜ੍ਝੇ ਠਿਤਸ੍ਸ. ਯਤ੍ਰਾਪਿ ਹਿ ਇਨ੍ਦਖੀਲੋ ਨਤ੍ਥਿ, ਤਤ੍ਰ ਗਾਮਦ੍ਵਾਰਬਾਹਾਨਂ ਵੇਮਜ੍ਝਮੇਵ ‘‘ਇਨ੍ਦਖੀਲੋ’’ਤਿ ਵੁਚ੍ਚਤਿ. ਤੇਨ ਵੁਤ੍ਤਂ – ‘‘ਗਾਮਦ੍ਵਾਰਬਾਹਾਨਂ ਵੇਮਜ੍ਝੇ ਠਿਤਸ੍ਸਾ’’ਤਿ. ਮਜ੍ਝਿਮਸ੍ਸਾਤਿ ਥਾਮਮਜ੍ਝਿਮਸ੍ਸ, ਨੋ ਪਮਾਣਮਜ੍ਝਿਮਸ੍ਸ, ਨੇਵ ਅਪ੍ਪਥਾਮਸ੍ਸ, ਨ ਮਹਾਥਾਮਸ੍ਸ; ਮਜ੍ਝਿਮਥਾਮਸ੍ਸਾਤਿ ਵੁਤ੍ਤਂ ਹੋਤਿ. ਲੇਡ੍ਡੁਪਾਤੋਤਿ ਯਥਾ ਮਾਤੁਗਾਮੋ ਕਾਕੇ ਉਡ੍ਡਾਪੇਨ੍ਤੋ ਉਜੁਕਮੇਵ ਹਤ੍ਥਂ ਉਕ੍ਖਿਪਿਤ੍ਵਾ ਲੇਡ੍ਡੁਂ ਖਿਪਤਿ, ਯਥਾ ਚ ਉਦਕੁਕ੍ਖੇਪੇ ਉਦਕਂ ਖਿਪਨ੍ਤਿ, ਏਵਂ ਅਖਿਪਿਤ੍ਵਾ ਯਥਾ ਤਰੁਣਮਨੁਸ੍ਸਾ ਅਤ੍ਤਨੋ ਬਲਂ ਦਸ੍ਸੇਨ੍ਤਾ ਬਾਹਂ ਪਸਾਰੇਤ੍ਵਾ ਲੇਡ੍ਡੁਂ ਖਿਪਨ੍ਤਿ, ਏਵਂ ਖਿਤ੍ਤਸ੍ਸ ਲੇਡ੍ਡੁਸ੍ਸ ਪਤਨਟ੍ਠਾਨਂ. ਪਤਿਤੋ ਪਨ ਲੁਠਿਤ੍ਵਾ ਯਤ੍ਥ ਗਚ੍ਛਤਿ, ਤਂ ਨ ਗਹੇਤਬ੍ਬਂ.
ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਘਰੂਪਚਾਰੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋਤਿ ਏਤ੍ਥ ਪਨ ਨਿਬ੍ਬਕੋਸਸ੍ਸ ਉਦਕਪਾਤਟ੍ਠਾਨੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਸੁਪ੍ਪਪਾਤੋ ਵਾ ਮੁਸਲਪਾਤੋ ਵਾ ਘਰੂਪਚਾਰੋ ਨਾਮ. ਤਸ੍ਮਿਂ ਘਰੂਪਚਾਰੇ ਠਿਤਸ੍ਸ ਲੇਡ੍ਡੁਪਾਤੋ ਗਾਮੂਪਚਾਰੋਤਿ ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਂ. ਮਹਾਪਚ੍ਚਰਿਯਮ੍ਪਿ ਤਾਦਿਸਮੇਵ. ਮਹਾਅਟ੍ਠਕਥਾਯਂ ਪਨ ‘‘ਘਰਂ ਨਾਮ, ਘਰੂਪਚਾਰੋ ਨਾਮ, ਗਾਮੋ ਨਾਮ, ਗਾਮੂਪਚਾਰੋ ਨਾਮਾ’’ਤਿ ਮਾਤਿਕਂ ਠਪੇਤ੍ਵਾ ਨਿਬ੍ਬਕੋਸਸ੍ਸ ਉਦਕਪਾਤਟ੍ਠਾਨਬ੍ਭਨ੍ਤਰਂ ਘਰਂ ਨਾਮ. ਯਂ ਪਨ ਦ੍ਵਾਰੇ ਠਿਤੋ ਮਾਤੁਗਾਮੋ ਭਾਜਨਧੋਵਨਉਦਕਂ ਛਡ੍ਡੇਤਿ, ਤਸ੍ਸ ਪਤਨਟ੍ਠਾਨਞ੍ਚ ਮਾਤੁਗਾਮੇਨੇਵ ਅਨ੍ਤੋਗੇਹੇ ਠਿਤੇਨ ਪਕਤਿਯਾ ਬਹਿ ਖਿਤ੍ਤਸ੍ਸ ਸੁਪ੍ਪਸ੍ਸ ਵਾ ਸਮ੍ਮੁਞ੍ਜਨਿਯਾ ਵਾ ਪਤਨਟ੍ਠਾਨਞ੍ਚ, ਘਰਸ੍ਸ ਪੁਰਤੋ ਦ੍ਵੀਸੁ ਕੋਣੇਸੁ ਸਮ੍ਬਨ੍ਧਿਤ੍ਵਾ ਮਜ੍ਝੇ ਰੁਕ੍ਖਸੂਚਿਦ੍ਵਾਰਂ ਠਪੇਤ੍ਵਾ ਗੋਰੂਪਾਨਂ ਪਵੇਸਨਨਿਵਾਰਣਤ੍ਥਂ ਕਤਪਰਿਕ੍ਖੇਪੋ ਚ ਅਯਂ ਸਬ੍ਬੋਪਿ ਘਰੂਪਚਾਰੋ ਨਾਮ. ਤਸ੍ਮਿਂ ਘਰੂਪਚਾਰੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤਬ੍ਭਨ੍ਤਰਂ ਗਾਮੋ ਨਾਮ. ਤਤੋ ਅਞ੍ਞਸ੍ਸ ਲੇਡ੍ਡੁਪਾਤਸ੍ਸ ਅਬ੍ਭਨ੍ਤਰਂ ਗਾਮੂਪਚਾਰੋ ਨਾਮਾਤਿ ਵੁਤ੍ਤਂ. ਇਦਮੇਤ੍ਥ ਪਮਾਣਂ. ਯਥਾ ਚੇਤ੍ਥ, ਏਵਂ ਸਬ੍ਬਤ੍ਥ ਯੋ ਯੋ ਅਟ੍ਠਕਥਾਵਾਦੋ ਵਾ ਥੇਰਵਾਦੋ ਵਾ ਪਚ੍ਛਾ ਵੁਚ੍ਚਤਿ ਸੋ ਪਮਾਣਤੋ ਦਟ੍ਠਬ੍ਬੋ.
ਯਞ੍ਚੇਤਂ ਮਹਾਅਟ੍ਠਕਥਾਯਂ ਵੁਤ੍ਤਂ, ਤਂ ਪਾਲ਼ਿਯਾ ਵਿਰੁਦ੍ਧਮਿਵ ਦਿਸ੍ਸਤਿ. ਪਾਲ਼ਿਯਞ੍ਹਿ – ‘‘ਘਰੂਪਚਾਰੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋ’’ਤਿ ਏਤ੍ਤਕਮੇਵ ਵੁਤ੍ਤਂ. ਅਟ੍ਠਕਥਾਯਂ ਪਨ ਤਂ ਲੇਡ੍ਡੁਪਾਤਂ ਗਾਮਸਙ੍ਖੇਪਂ ਕਤ੍ਵਾ ਤਤੋ ਪਰਂ ਗਾਮੂਪਚਾਰੋ ਵੁਤ੍ਤੋਤਿ? ਵੁਚ੍ਚਤੇ – ਸਚ੍ਚਮੇਵ ਪਾਲ਼ਿਯਂ ਵੁਤ੍ਤਂ, ਅਧਿਪ੍ਪਾਯੋ ਪਨੇਤ੍ਥ ਵੇਦਿਤਬ੍ਬੋ. ਸੋ ਚ ਅਟ੍ਠਕਥਾਚਰਿਯਾਨਮੇਵ ਵਿਦਿਤੋ. ਤਸ੍ਮਾ ਯਥਾ ‘‘ਘਰੂਪਚਾਰੇ ਠਿਤਸ੍ਸਾ’’ਤਿ ਏਤ੍ਥ ਘਰੂਪਚਾਰਲਕ੍ਖਣਂ ਪਾਲ਼ਿਯਂ ਅਵੁਤ੍ਤਮ੍ਪਿ ਅਟ੍ਠਕਥਾਯਂ ਵੁਤ੍ਤਵਸੇਨ ਗਹਿਤਂ. ਏਵਂ ਸੇਸਮ੍ਪਿ ਗਹੇਤਬ੍ਬਂ.
ਤਤ੍ਰਾਯਂ ਨਯੋ – ਇਧ ਗਾਮੋ ਨਾਮ ਦੁਵਿਧੋ ਹੋਤਿ – ਪਰਿਕ੍ਖਿਤ੍ਤੋ ਚ ਅਪਰਿਕ੍ਖਿਤ੍ਤੋ ਚ. ਤਤ੍ਰ ਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪੋਯੇਵ ਪਰਿਚ੍ਛੇਦੋ. ਤਸ੍ਮਾ ਤਸ੍ਸ ਵਿਸੁਂ ਪਰਿਚ੍ਛੇਦਂ ਅਵਤ੍ਵਾ ‘‘ਗਾਮੂਪਚਾਰੋ ਨਾਮ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਇਨ੍ਦਖੀਲੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋ’’ਤਿ ਪਾਲ਼ਿਯਂ ਵੁਤ੍ਤਂ. ਅਪਰਿਕ੍ਖਿਤ੍ਤਸ੍ਸ ਪਨ ਗਾਮਸ੍ਸ ਗਾਮਪਰਿਚ੍ਛੇਦੋ ਵਤ੍ਤਬ੍ਬੋ. ਤਸ੍ਮਾ ਤਸ੍ਸ ਗਾਮਪਰਿਚ੍ਛੇਦਦਸ੍ਸਨਤ੍ਥਂ ‘‘ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਘਰੂਪਚਾਰੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋ’’ਤਿ ਵੁਤ੍ਤਂ. ਗਾਮਪਰਿਚ੍ਛੇਦੇ ਚ ਦਸ੍ਸਿਤੇ ਗਾਮੂਪਚਾਰਲਕ੍ਖਣਂ ਪੁਬ੍ਬੇ ਵੁਤ੍ਤਨਯੇਨੇਵ ਸਕ੍ਕਾ ਞਾਤੁਨ੍ਤਿ ਪੁਨ ‘‘ਤਤ੍ਥ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋ’’ਤਿ ਨ ਵੁਤ੍ਤਂ. ਯੋ ਪਨ ਘਰੂਪਚਾਰੇ ਠਿਤਸ੍ਸ ਲੇਡ੍ਡੁਪਾਤਂਯੇਵ ‘‘ਗਾਮੂਪਚਾਰੋ’’ਤਿ ਵਦਤਿ, ਤਸ੍ਸ ਘਰੂਪਚਾਰੋ ਗਾਮੋਤਿ ਆਪਜ੍ਜਤਿ. ਤਤੋ ਘਰਂ, ਘਰੂਪਚਾਰੋ, ਗਾਮੋ, ਗਾਮੂਪਚਾਰੋਤਿ ਏਸ ਵਿਭਾਗੋ ਸਙ੍ਕਰੀਯਤਿ. ਅਸਙ੍ਕਰਤੋ ਚੇਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ ਵਿਕਾਲੇ ਗਾਮਪ੍ਪਵੇਸਨਾਦੀਸੁ. ਤਸ੍ਮਾ ਪਾਲ਼ਿਞ੍ਚ ਅਟ੍ਠਕਥਞ੍ਚ ਸਂਸਨ੍ਦਿਤ੍ਵਾ ਵੁਤ੍ਤਨਯੇਨੇਵੇਤ੍ਥ ਗਾਮੋ ਚ ਗਾਮੂਪਚਾਰੋ ਚ ਵੇਦਿਤਬ੍ਬੋ. ਯੋਪਿ ਚ ਗਾਮੋ ਪੁਬ੍ਬੇ ਮਹਾ ਹੁਤ੍ਵਾ ਪਚ੍ਛਾ ਕੁਲੇਸੁ ਨਟ੍ਠੇਸੁ ਅਪ੍ਪਕੋ ਹੋਤਿ, ਸੋ ਘਰੂਪਚਾਰਤੋ ਲੇਡ੍ਡੁਪਾਤੇਨੇਵ ਪਰਿਚ੍ਛਿਨ੍ਦਿਤਬ੍ਬੋ. ਪੁਰਿਮਪਰਿਚ੍ਛੇਦੋ ਪਨਸ੍ਸ ਪਰਿਕ੍ਖਿਤ੍ਤਸ੍ਸਾਪਿ ਅਪਰਿਕ੍ਖਿਤ੍ਤਸ੍ਸਾਪਿ ਅਪ੍ਪਮਾਣਮੇਵਾਤਿ.
ਅਰਞ੍ਞਂ ਨਾਮ ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾਤਿ ਇਮਂ ਯਥਾਵੁਤ੍ਤਲਕ੍ਖਣਂ ਗਾਮਞ੍ਚ ਗਾਮੂਪਚਾਰਞ੍ਚ ਠਪੇਤ੍ਵਾ ਇਮਸ੍ਮਿਂ ਅਦਿਨ੍ਨਾਦਾਨਸਿਕ੍ਖਾਪਦੇ ਅਵਸੇਸਂ ‘‘ਅਰਞ੍ਞਂ’’ ਨਾਮਾਤਿ ਵੇਦਿਤਬ੍ਬਂ. ਅਭਿਧਮ੍ਮੇ ਪਨ ‘‘ਅਰਞ੍ਞਨ੍ਤਿ ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾ ਸਬ੍ਬਮੇਤਂ ਅਰਞ੍ਞ’’ਨ੍ਤਿ (ਵਿਭ. ੫੨੯) ਵੁਤ੍ਤਂ. ਆਰਞ੍ਞਕਸਿਕ੍ਖਾਪਦੇ ‘‘ਆਰਞ੍ਞਕਂ ਨਾਮ ਸੇਨਾਸਨਂ ਪਞ੍ਚਧਨੁਸਤਿਕਂ ਪਚ੍ਛਿਮ’’ਨ੍ਤਿ (ਪਾਰਾ. ੬੫੪) ਵੁਤ੍ਤਂ. ਤਂ ਇਨ੍ਦਖੀਲਤੋ ਪਟ੍ਠਾਯ ਆਰੋਪਿਤੇਨ ਆਚਰਿਯਧਨੁਨਾ ਪਞ੍ਚਧਨੁਸਤਪ੍ਪਮਾਣਨ੍ਤਿ ਵੇਦਿਤਬ੍ਬਂ. ਏਵਂ ਭਗਵਤਾ ‘‘ਗਾਮਾ ਵਾ ਅਰਞ੍ਞਾ ਵਾ’’ਤਿ ਏਤਸ੍ਸ ਅਤ੍ਥਂ ਵਿਭਜਨ੍ਤੇਨ ‘‘ਘਰਂ, ਘਰੂਪਚਾਰੋ, ਗਾਮੋ, ਗਾਮੂਪਚਾਰੋ ਅਰਞ੍ਞ’’ਨ੍ਤਿ ਪਾਪਭਿਕ੍ਖੂਨਂ ਲੇਸੋਕਾਸਨਿਸੇਧਨਤ੍ਥਂ ਪਞ੍ਚ ਕੋਟ੍ਠਾਸਾ ਦਸ੍ਸਿਤਾ. ਤਸ੍ਮਾ ਘਰੇ ਵਾ ਘਰੂਪਚਾਰੇ ਵਾ ਗਾਮੇ ਵਾ ਗਾਮੂਪਚਾਰੇ ਵਾ ਅਰਞ੍ਞੇ ਵਾ ਪਾਦਗ੍ਘਨਕਤੋ ਪਟ੍ਠਾਯ ਸਸ੍ਸਾਮਿਕਂ ਭਣ੍ਡਂ ਅਵਹਰਨ੍ਤਸ੍ਸ ਪਾਰਾਜਿਕਮੇਵਾਤਿ ਵੇਦਿਤਬ੍ਬਂ.
ਇਦਾਨਿ ‘‘ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯੇਯ੍ਯਾ’’ਤਿਆਦੀਨਂ ਅਤ੍ਥਦਸ੍ਸਨਤ੍ਥਂ ‘‘ਅਦਿਨ੍ਨਂ ਨਾਮਾ’’ਤਿਆਦਿਮਾਹ. ਤਤ੍ਥ ਅਦਿਨ੍ਨਨ੍ਤਿ ਦਨ੍ਤਪੋਨਸਿਕ੍ਖਾਪਦੇ ਅਤ੍ਤਨੋ ਸਨ੍ਤਕਮ੍ਪਿ ਅਪ੍ਪਟਿਗ੍ਗਹਿਤਕਂ ਕਪ੍ਪਿਯਂ ਅਜ੍ਝੋਹਰਣੀਯਂ ਵੁਚ੍ਚਤਿ. ਇਧ ਪਨ ਯਂਕਿਞ੍ਚਿ ਪਰਪਰਿਗ੍ਗਹਿਤਂ ਸਸ੍ਸਾਮਿਕਂ ਭਣ੍ਡਂ, ਤਦੇਤਂ ਤੇਹਿ ਸਾਮਿਕੇਹਿ ਕਾਯੇਨ ਵਾ ਵਾਚਾਯ ਵਾ ਨ ਦਿਨ੍ਨਨ੍ਤਿ ਅਦਿਨ੍ਨਂ. ਅਤ੍ਤਨੋ ਹਤ੍ਥਤੋ ਵਾ ਯਥਾਠਿਤਟ੍ਠਾਨਤੋ ਵਾ ਨ ਨਿਸ੍ਸਟ੍ਠਨ੍ਤਿ ਅਨਿਸ੍ਸਟ੍ਠਂ. ਯਥਾਠਾਨੇ ਠਿਤਮ੍ਪਿ ਅਨਪੇਕ੍ਖਤਾਯ ਨ ਪਰਿਚ੍ਚਤ੍ਤਨ੍ਤਿ ਅਪਰਿਚ੍ਚਤ੍ਤਂ. ਆਰਕ੍ਖਸਂਵਿਧਾਨੇਨ ਰਕ੍ਖਿਤਤ੍ਤਾ ਰਕ੍ਖਿਤਂ. ਮਞ੍ਜੂਸਾਦੀਸੁ ਪਕ੍ਖਿਪਿਤ੍ਵਾ ਗੋਪਿਤਤ੍ਤਾ ਗੋਪਿਤਂ. ‘‘ਮਮ ਇਦ’’ਨ੍ਤਿ ਤਣ੍ਹਾਮਮਤ੍ਤੇਨ ਮਮਾਯਿਤਤ੍ਤਾ ਮਮਾਯਿਤਂ. ਤਾਹਿ ਅਪਰਿਚ੍ਚਾਗਰਕ੍ਖਣਗੋਪਨਾਹਿ ਤੇਹਿ ਭਣ੍ਡਸਾਮਿਕੇਹਿ ਪਰੇਹਿ ਪਰਿਗ੍ਗਹਿਤਨ੍ਤਿ ਪਰਪਰਿਗ੍ਗਹਿਤਂ. ਏਤਂ ਅਦਿਨ੍ਨਂ ਨਾਮ.
ਥੇਯ੍ਯਸਙ੍ਖਾਤਨ੍ਤਿ ਏਤ੍ਥ ਥੇਨੋਤਿ ਚੋਰੋ, ਥੇਨਸ੍ਸ ਭਾਵੋ ਥੇਯ੍ਯਂ; ਅਵਹਰਣਚਿਤ੍ਤਸ੍ਸੇਤਂ ਅਧਿਵਚਨਂ. ‘‘ਸਙ੍ਖਾ, ਸਙ੍ਖਾਤ’’ਨ੍ਤਿ ਅਤ੍ਥਤੋ ਏਕਂ; ਕੋਟ੍ਠਾਸਸ੍ਸੇਤਂ ਅਧਿਵਚਨਂ, ‘‘ਸਞ੍ਞਾਨਿਦਾਨਾ ਹਿ ਪਪਞ੍ਚਸਙ੍ਖਾ’’ਤਿਆਦੀਸੁ (ਸੁ. ਨਿ. ੮੮੦) ਵਿਯ. ਥੇਯ੍ਯਞ੍ਚ ਤਂ ਸਙ੍ਖਾਤਞ੍ਚਾਤਿ ਥੇਯ੍ਯਸਙ੍ਖਾਤਂ, ਥੇਯ੍ਯਚਿਤ੍ਤਸਙ੍ਖਾਤੋ ਏਕੋ ਚਿਤ੍ਤਕੋਟ੍ਠਾਸੋਤਿ ਅਤ੍ਥੋ. ਕਰਣਤ੍ਥੇ ਚੇਤਂ ਪਚ੍ਚਤ੍ਤਵਚਨਂ, ਤਸ੍ਮਾ ਥੇਯ੍ਯਸਙ੍ਖਾਤੇਨਾਤਿ ਅਤ੍ਥਤੋ ਦਟ੍ਠਬ੍ਬਂ. ਯੋ ਚ ਥੇਯ੍ਯਸਙ੍ਖਾਤੇਨ ਆਦਿਯਤਿ, ਸੋ ਯਸ੍ਮਾ ਥੇਯ੍ਯਚਿਤ੍ਤੋ ਹੋਤਿ, ਤਸ੍ਮਾ ਬ੍ਯਞ੍ਜਨਂ ਅਨਾਦਿਯਿਤ੍ਵਾ ਅਤ੍ਥਮੇਵ ਦਸ੍ਸੇਤੁਂ ਥੇਯ੍ਯਚਿਤ੍ਤੋ ਅਵਹਰਣਚਿਤ੍ਤੋਤਿ ਏਵਮਸ੍ਸ ਪਦਭਾਜਨਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.
ਆਦਿਯੇਯ੍ਯ , ਹਰੇਯ੍ਯ, ਅਵਹਰੇਯ੍ਯ, ਇਰਿਯਾਪਥਂ ਵਿਕੋਪੇਯ੍ਯ, ਠਾਨਾ ਚਾਵੇਯ੍ਯ, ਸਙ੍ਕੇਤਂ ਵੀਤਿਨਾਮੇਯ੍ਯਾਤਿ ਏਤ੍ਥ ਪਨ ਪਠਮਪਦਂ ਅਭਿਯੋਗਵਸੇਨ ਵੁਤ੍ਤਂ, ਦੁਤਿਯਪਦਂ ਅਞ੍ਞੇਸਂ ਭਣ੍ਡਂ ਹਰਨ੍ਤਸ੍ਸ ਗਚ੍ਛਤੋ ਵਸੇਨ, ਤਤਿਯਪਦਂ ਉਪਨਿਕ੍ਖਿਤ੍ਤਭਣ੍ਡਵਸੇਨ, ਚਤੁਤ੍ਥਂ ਸਵਿਞ੍ਞਾਣਕਵਸੇਨ, ਪਞ੍ਚਮਂ ਥਲੇ ਨਿਕ੍ਖਿਤ੍ਤਾਦਿਵਸੇਨ, ਛਟ੍ਠਂ ਪਰਿਕਪ੍ਪਵਸੇਨ ਵਾ ਸੁਙ੍ਕਘਾਤਵਸੇਨ ਵਾ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਯੋਜਨਾ ਪਨੇਤ੍ਥ ਏਕਭਣ੍ਡਵਸੇਨਪਿ ਨਾਨਾਭਣ੍ਡਵਸੇਨਪਿ ਹੋਤਿ. ਏਕਭਣ੍ਡਵਸੇਨ ਚ ਸਵਿਞ੍ਞਾਣਕੇਨੇਵ ਲਬ੍ਭਤਿ, ਨਾਨਾਭਣ੍ਡਵਸੇਨ ਸਵਿਞ੍ਞਾਣਕਾਵਿਞ੍ਞਾਣਕਮਿਸ੍ਸਕੇਨ.
ਤਤ੍ਥ ਨਾਨਾਭਣ੍ਡਵਸੇਨ ਤਾਵ ਏਵਂ ਵੇਦਿਤਬ੍ਬਂ – ਆਦਿਯੇਯ੍ਯਾਤਿ ਆਰਾਮਂ ਅਭਿਯੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾਮਿਕਸ੍ਸ ਵਿਮਤਿਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸਾਮਿਕੋ ‘‘ਨ ਮਯ੍ਹਂ ਭਵਿਸ੍ਸਤੀ’’ਤਿ ਧੁਰਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਹਰੇਯ੍ਯਾਤਿ ਅਞ੍ਞਸ੍ਸ ਭਣ੍ਡਂ ਹਰਨ੍ਤੋ ਸੀਸੇ ਭਾਰਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਖਨ੍ਧਂ ਓਰੋਪੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਅਵਹਰੇਯ੍ਯਾਤਿ ਉਪਨਿਕ੍ਖਿਤ੍ਤਂ ਭਣ੍ਡਂ ‘‘ਦੇਹਿ ਮੇ ਭਣ੍ਡ’’ਨ੍ਤਿ ਵੁਚ੍ਚਮਾਨੋ ‘‘ਨਾਹਂ ਗਣ੍ਹਾਮੀ’’ਤਿ ਭਣਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾਮਿਕਸ੍ਸ ਵਿਮਤਿਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸਾਮਿਕੋ ‘‘ਨ ਮਯ੍ਹਂ ਦਸ੍ਸਤੀ’’ਤਿ ਧੁਰਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਇਰਿਯਾਪਥਂਵਿਕੋਪੇਯ੍ਯਾਤਿ ‘‘ਸਹਭਣ੍ਡਹਾਰਕਂ ਨੇਸ੍ਸਾਮੀ’’ਤਿ ਪਠਮਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਠਾਨਾ ਚਾਵੇਯ੍ਯਾਤਿ ਥਲਟ੍ਠਂ ਭਣ੍ਡਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਸਙ੍ਕੇਤਂ ਵੀਤਿਨਾਮੇਯ੍ਯਾਤਿ ਪਰਿਕਪ੍ਪਿਤਟ੍ਠਾਨਂ ਪਠਮਂ ਪਾਦਂ ਅਤਿਕ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਅਤਿਕ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਅਥ ਵਾ ਪਠਮਂ ਪਾਦਂ ਸੁਙ੍ਕਘਾਤਂ ਅਤਿਕ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਅਤਿਕ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸਾਤਿ – ਅਯਮੇਤ੍ਥ ਨਾਨਾਭਣ੍ਡਵਸੇਨ ਯੋਜਨਾ.
ਏਕਭਣ੍ਡਵਸੇਨ ਪਨ ਸਸ੍ਸਾਮਿਕਂ ਦਾਸਂ ਵਾ ਤਿਰਚ੍ਛਾਨਂ ਵਾ ਯਥਾਵੁਤ੍ਤੇਨ ਅਭਿਯੋਗਾਦਿਨਾ ਨਯੇਨ ਆਦਿਯਤਿ ਵਾ ਹਰਤਿ ਵਾ ਅਵਹਰਤਿ ਵਾ ਇਰਿਯਾਪਥਂ ਵਾ ਵਿਕੋਪੇਤਿ, ਠਾਨਾ ਵਾ ਚਾਵੇਤਿ, ਪਰਿਚ੍ਛੇਦਂ ਵਾ ਅਤਿਕ੍ਕਾਮੇਤਿ – ਅਯਮੇਤ੍ਥ ਏਕਭਣ੍ਡਵਸੇਨ ਯੋਜਨਾ.
ਪਞ੍ਚਵੀਸਤਿਅਵਹਾਰਕਥਾ
ਅਪਿਚ ਇਮਾਨਿ ਛ ਪਦਾਨਿ ਵਣ੍ਣੇਨ੍ਤੇਨ ਪਞ੍ਚ ਪਞ੍ਚਕੇ ਸਮੋਧਾਨੇਤ੍ਵਾ ਪਞ੍ਚਵੀਸਤਿ ਅਵਹਾਰਾ ਦਸ੍ਸੇਤਬ੍ਬਾ. ਏਵਂ ਵਣ੍ਣਯਤਾ ਹਿ ਇਦਂ ਅਦਿਨ੍ਨਾਦਾਨਪਾਰਾਜਿਕਂ ਸੁਵਣ੍ਣਿਤਂ ਹੋਤਿ. ਇਮਸ੍ਮਿਞ੍ਚ ਠਾਨੇ ਸਬ੍ਬਅਟ੍ਠਕਥਾ ਆਕੁਲਾ ਲੁਲ਼ਿਤਾ ਦੁਵਿਞ੍ਞੇਯ੍ਯਵਿਨਿਚ੍ਛਯਾ. ਤਥਾ ਹਿ ਸਬ੍ਬਅਟ੍ਠਕਥਾਸੁ ਯਾਨਿ ਤਾਨਿ ਪਾਲ਼ਿਯਂ ‘‘ਪਞ੍ਚਹਾਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸ, ਪਰਪਰਿਗ੍ਗਹਿਤਞ੍ਚ ਹੋਤੀ’’ਤਿਆਦਿਨਾ ਨਯੇਨ ਅਵਹਾਰਙ੍ਗਾਨਿ ਵੁਤ੍ਤਾਨਿ, ਤਾਨਿਪਿ ਗਹੇਤ੍ਵਾ ਕਤ੍ਥਚਿ ਏਕਂ ਪਞ੍ਚਕਂ ਦਸ੍ਸਿਤਂ, ਕਤ੍ਥਚਿ ‘‘ਛਹਾਕਾਰੇਹੀ’’ਤਿ ਆਗਤੇਹਿ ਸਦ੍ਧਿਂ ਦ੍ਵੇ ਪਞ੍ਚਕਾਨਿ ਦਸ੍ਸਿਤਾਨਿ. ਏਤਾਨਿ ਚ ਪਞ੍ਚਕਾਨਿ ਨ ਹੋਨ੍ਤਿ. ਯਤ੍ਥ ਹਿ ਏਕੇਕੇਨ ਪਦੇਨ ਅਵਹਾਰੋ ਸਿਜ੍ਝਤਿ, ਤਂ ਪਞ੍ਚਕਂ ਨਾਮ ਵੁਚ੍ਚਤਿ. ਏਤ੍ਥ ਪਨ ਸਬ੍ਬੇਹਿਪਿ ਪਦੇਹਿ ਏਕੋਯੇਵ ਅਵਹਾਰੋ. ਯਾਨਿ ਚ ਤਤ੍ਥ ਲਬ੍ਭਮਾਨਾਨਿਯੇਵ ਪਞ੍ਚਕਾਨਿ ਦਸ੍ਸਿਤਾਨਿ, ਤੇਸਮ੍ਪਿ ਨ ਸਬ੍ਬੇਸਂ ਅਤ੍ਥੋ ਪਕਾਸਿਤੋ. ਏਵਮਿਮਸ੍ਮਿਂ ਠਾਨੇ ਸਬ੍ਬਅਟ੍ਠਕਥਾ ਆਕੁਲਾ ਲੁਲ਼ਿਤਾ ਦੁਵਿਞ੍ਞੇਯ੍ਯਵਿਨਿਚ੍ਛਯਾ. ਤਸ੍ਮਾ ਪਞ੍ਚ ਪਞ੍ਚਕੇਸਮੋਧਾਨੇਤ੍ਵਾ ਦਸ੍ਸਿਯਮਾਨਾ ਇਮੇ ਪਞ੍ਚਵੀਸਤਿ ਅਵਹਾਰਾ ਸਾਧੁਕਂ ਸਲ੍ਲਕ੍ਖੇਤਬ੍ਬਾ.
ਪਞ੍ਚ ਪਞ੍ਚਕਾਨਿ ਨਾਮ – ਨਾਨਾਭਣ੍ਡਪਞ੍ਚਕਂ, ਏਕਭਣ੍ਡਪਞ੍ਚਕਂ, ਸਾਹਤ੍ਥਿਕਪਞ੍ਚਕਂ, ਪੁਬ੍ਬਪਯੋਗਪਞ੍ਚਕਂ, ਥੇਯ੍ਯਾਵਹਾਰਪਞ੍ਚਕਨ੍ਤਿ. ਤਤ੍ਥ ਨਾਨਾਭਣ੍ਡਪਞ੍ਚਕਞ੍ਚ ਏਕਭਣ੍ਡਪਞ੍ਚਕਞ੍ਚ ‘‘ਆਦਿਯੇਯ੍ਯ, ਹਰੇਯ੍ਯ, ਅਵਹਰੇਯ੍ਯ, ਇਰਿਯਾਪਥਂ ਵਿਕੋਪੇਯ੍ਯ, ਠਾਨਾ ਚਾਵੇਯ੍ਯਾ’’ਤਿ ਇਮੇਸਂ ਪਦਾਨਂ ਵਸੇਨ ਲਬ੍ਭਨ੍ਤਿ. ਤਾਨਿ ਪੁਬ੍ਬੇ ਯੋਜੇਤ੍ਵਾ ਦਸ੍ਸਿਤਨਯੇਨੇਵ ਵੇਦਿਤਬ੍ਬਾਨਿ. ਯਂ ਪਨੇਤਂ ‘‘ਸਙ੍ਕੇਤਂ ਵੀਤਿਨਾਮੇਯ੍ਯਾ’’ਤਿ ਛਟ੍ਠਂ ਪਦਂ, ਤਂ ਪਰਿਕਪ੍ਪਾਵਹਾਰਸ੍ਸ ਚ ਨਿਸ੍ਸਗ੍ਗਿਯਾਵਹਾਰਸ੍ਸ ਚ ਸਾਧਾਰਣਂ. ਤਸ੍ਮਾ ਤਂ ਤਤਿਯਪਞ੍ਚਮੇਸੁ ਪਞ੍ਚਕੇਸੁ ਲਬ੍ਭਮਾਨਪਦਵਸੇਨ ਯੋਜੇਤਬ੍ਬਂ. ਵੁਤ੍ਤਂ ਨਾਨਾਭਣ੍ਡਪਞ੍ਚਕਞ੍ਚ ਏਕਭਣ੍ਡਪਞ੍ਚਕਞ੍ਚ.
ਕਤਮਂ ਸਾਹਤ੍ਥਿਕਪਞ੍ਚਕਂ? ਪਞ੍ਚ ਅਵਹਾਰਾ – ਸਾਹਤ੍ਥਿਕੋ, ਆਣਤ੍ਤਿਕੋ, ਨਿਸ੍ਸਗ੍ਗਿਯੋ, ਅਤ੍ਥਸਾਧਕੋ, ਧੁਰਨਿਕ੍ਖੇਪੋਤਿ. ਤਤ੍ਥ ਸਾਹਤ੍ਥਿਕੋ ਨਾਮ ਪਰਸ੍ਸ ਭਣ੍ਡਂ ਸਹਤ੍ਥਾ ਅਵਹਰਤਿ. ਆਣਤ੍ਤਿਕੋ ਨਾਮ ‘‘ਅਸੁਕਸ੍ਸ ਭਣ੍ਡਂ ਅਵਹਰਾ’’ਤਿ ਅਞ੍ਞਂ ਆਣਾਪੇਤਿ. ਨਿਸ੍ਸਗ੍ਗਿਯੋ ਨਾਮ ਅਨ੍ਤੋਸੁਙ੍ਕਘਾਤੇ ਠਿਤੋ ਬਹਿਸੁਙ੍ਕਘਾਤਂ ਪਾਤੇਤਿ, ਆਪਤ੍ਤਿ ਪਾਰਾਜਿਕਸ੍ਸਾਤਿ, ਇਮਿਨਾ ਚ ਸਦ੍ਧਿਂ ‘‘ਸਙ੍ਕੇਤਂ ਵੀਤਿਨਾਮੇਯ੍ਯਾ’’ਤਿ ਇਦਂ ਪਦਯੋਜਨਂ ਲਭਤਿ. ਅਤ੍ਥਸਾਧਕੋ ਨਾਮ ‘‘ਅਸੁਕਂ ਨਾਮ ਭਣ੍ਡਂ ਯਦਾ ਸਕ੍ਕੋਸਿ, ਤਦਾ ਅਵਹਰਾ’’ਤਿ ਆਣਾਪੇਤਿ. ਤਤ੍ਥ ਸਚੇ ਪਰੋ ਅਨਨ੍ਤਰਾਯਿਕੋ ਹੁਤ੍ਵਾ ਤਂ ਅਵਹਰਤਿ, ਆਣਾਪਕੋ ਆਣਤ੍ਤਿਕ੍ਖਣੇਯੇਵ ਪਾਰਾਜਿਕੋ ਹੋਤਿ, ਅਵਹਾਰਕੋ ਪਨ ਅਵਹਟਕਾਲੇ. ਅਯਂ ਅਤ੍ਥਸਾਧਕੋ. ਧੁਰਨਿਕ੍ਖੇਪੋ ਪਨ ਉਪਨਿਕ੍ਖਿਤ੍ਤਭਣ੍ਡਵਸੇਨ ਵੇਦਿਤਬ੍ਬੋ. ਇਦਂ ਸਾਹਤ੍ਥਿਕਪਞ੍ਚਕਂ.
ਕਤਮਂ ਪੁਬ੍ਬਪਯੋਗਪਞ੍ਚਕਂ? ਅਪਰੇਪਿ ਪਞ੍ਚ ਅਵਹਾਰਾ – ਪੁਬ੍ਬਪਯੋਗੋ, ਸਹਪਯੋਗੋ, ਸਂਵਿਦਾਵਹਾਰੋ, ਸਙ੍ਕੇਤਕਮ੍ਮਂ, ਨਿਮਿਤ੍ਤਕਮ੍ਮਨ੍ਤਿ. ਤਤ੍ਥ ਆਣਤ੍ਤਿਵਸੇਨ ਪੁਬ੍ਬਪਯੋਗੋ ਵੇਦਿਤਬ੍ਬੋ. ਠਾਨਾ ਚਾਵਨਵਸੇਨ ਸਹਪਯੋਗੋ. ਇਤਰੇ ਪਨ ਤਯੋ ਪਾਲ਼ਿਯਂ (ਪਾਰਾ. ੧੧੮-੧੨੦) ਆਗਤਨਯੇਨੇਵ ਵੇਦਿਤਬ੍ਬਾਤਿ. ਇਦਂ ਪੁਬ੍ਬਪਯੋਗਪਞ੍ਚਕਂ.
ਕਤਮਂ ਥੇਯ੍ਯਾਵਹਾਰਪਞ੍ਚਕਂ? ਅਪਰੇਪਿ ਪਞ੍ਚ ਅਵਹਾਰਾ – ਥੇਯ੍ਯਾਵਹਾਰੋ, ਪਸਯ੍ਹਾਵਹਾਰੋ, ਪਰਿਕਪ੍ਪਾਵਹਾਰੋ, ਪਟਿਚ੍ਛਨ੍ਨਾਵਹਾਰੋ, ਕੁਸਾਵਹਾਰੋਤਿ. ਤੇ ਪਞ੍ਚਪਿ ‘‘ਅਞ੍ਞਤਰੋ ਭਿਕ੍ਖੁ ਸਙ੍ਘਸ੍ਸ ਚੀਵਰੇ ਭਾਜਿਯਮਾਨੇ ਥੇਯ੍ਯਚਿਤ੍ਤੋ ਕੁਸਂ ਸਙ੍ਕਾਮੇਤ੍ਵਾ ਚੀਵਰਂ ਅਗ੍ਗਹੇਸੀ’’ਤਿ (ਪਾਰਾ. ੧੩੮) ਏਤਸ੍ਮਿਂ ਕੁਸਸਙ੍ਕਾਮਨਵਤ੍ਥੁਸ੍ਮਿਂ ਵਣ੍ਣਯਿਸ੍ਸਾਮ. ਇਦਂ ਥੇਯ੍ਯਾਵਹਾਰਪਞ੍ਚਕਂ. ਏਵਮਿਮਾਨਿ ਪਞ੍ਚ ਪਞ੍ਚਕਾਨਿ ਸਮੋਧਾਨੇਤ੍ਵਾ ਇਮੇ ਪਞ੍ਚਵੀਸਤਿ ਅਵਹਾਰਾ ਵੇਦਿਤਬ੍ਬਾ.
ਇਮੇਸੁ ਚ ਪਨ ਪਞ੍ਚਸੁ ਪਞ੍ਚਕੇਸੁ ਕੁਸਲੇਨ ਵਿਨਯਧਰੇਨ ਓਤਿਣ੍ਣਂ ਵਤ੍ਥੁਂ ਸਹਸਾ ਅਵਿਨਿਚ੍ਛਿਨਿਤ੍ਵਾਵ ਪਞ੍ਚ ਠਾਨਾਨਿ ਓਲੋਕੇਤਬ੍ਬਾਨਿ. ਯਾਨਿ ਸਨ੍ਧਾਯ ਪੋਰਾਣਾ ਆਹੁ –
‘‘ਵਤ੍ਥੁਂ ਕਾਲਞ੍ਚ ਦੇਸਞ੍ਚ, ਅਗ੍ਘਂ ਪਰਿਭੋਗਪਞ੍ਚਮਂ;
ਤੁਲਯਿਤ੍ਵਾ ਪਞ੍ਚ ਠਾਨਾਨਿ, ਧਾਰੇਯ੍ਯਤ੍ਥਂ ਵਿਚਕ੍ਖਣੋ’’ਤਿ.
ਤਤ੍ਥ ਵਤ੍ਥੁਨ੍ਤਿ ਭਣ੍ਡਂ; ਅਵਹਾਰਕੇਨ ਹਿ ‘‘ਮਯਾ ਇਦਂ ਨਾਮ ਅਵਹਟ’’ਨ੍ਤਿ ਵੁਤ੍ਤੇਪਿ ਆਪਤ੍ਤਿਂ ਅਨਾਰੋਪੇਤ੍ਵਾਵ ਤਂ ਭਣ੍ਡਂ ਸਸ੍ਸਾਮਿਕਂ ਵਾ ਅਸ੍ਸਾਮਿਕਂ ਵਾਤਿ ਉਪਪਰਿਕ੍ਖਿਤਬ੍ਬਂ. ਸਸ੍ਸਾਮਿਕੇਪਿ ਸਾਮਿਕਾਨਂ ਸਾਲਯਭਾਵੋ ਵਾ ਨਿਰਾਲਯਭਾਵੋ ਵਾ ਉਪਪਰਿਕ੍ਖਿਤਬ੍ਬੋ. ਸਚੇ ਤੇਸਂ ਸਾਲਯਕਾਲੇ ਅਵਹਟਂ, ਭਣ੍ਡਂ ਅਗ੍ਘਾਪੇਤ੍ਵਾ ਆਪਤ੍ਤਿ ਕਾਤਬ੍ਬਾ. ਸਚੇ ਨਿਰਾਲਯਕਾਲੇ, ਨ ਪਾਰਾਜਿਕੇਨ ਕਾਰੇਤਬ੍ਬੋ. ਭਣ੍ਡਸਾਮਿਕੇਸੁ ਪਨ ਭਣ੍ਡਂ ਆਹਰਾਪੇਨ੍ਤੇਸੁ ਭਣ੍ਡਂ ਦਾਤਬ੍ਬਂ. ਅਯਮੇਤ੍ਥ ਸਾਮੀਚਿ.
ਇਮਸ੍ਸ ਪਨਤ੍ਥਸ੍ਸ ਦੀਪਨਤ੍ਥਮਿਦਂ ਵਤ੍ਥੁ – ਭਾਤਿਯਰਾਜਕਾਲੇ ਕਿਰ ਮਹਾਚੇਤਿਯਪੂਜਾਯ ਦਕ੍ਖਿਣਦਿਸਤੋ ਏਕੋ ਭਿਕ੍ਖੁ ਸਤ੍ਤਹਤ੍ਥਂ ਪਣ੍ਡੁਕਾਸਾਵਂ ਅਂਸੇ ਕਰਿਤ੍ਵਾ ਚੇਤਿਯਙ੍ਗਣਂ ਪਾਵਿਸਿ; ਤਙ੍ਖਣਮੇਵ ਚ ਰਾਜਾਪਿ ਚੇਤਿਯਵਨ੍ਦਨਤ੍ਥਂ ਆਗਤੋ. ਤਤ੍ਥ ਉਸ੍ਸਾਰਣਾਯ ਵਤ੍ਤਮਾਨਾਯ ਮਹਾਜਨਸਮ੍ਮਦ੍ਦੋ ਅਹੋਸਿ. ਅਥ ਸੋ ਭਿਕ੍ਖੁ ਜਨਸਮ੍ਮਦ੍ਦਪੀਲ਼ਿਤੋ ਅਂਸਤੋ ਪਤਨ੍ਤਂ ਕਾਸਾਵਂ ਅਦਿਸ੍ਵਾਵ ਨਿਕ੍ਖਨ੍ਤੋ; ਨਿਕ੍ਖਮਿਤ੍ਵਾ ਚ ਕਾਸਾਵਂ ਅਪਸ੍ਸਨ੍ਤੋ ‘‘ਕੋ ਈਦਿਸੇ ਜਨਸਮ੍ਮਦ੍ਦੇ ਕਾਸਾਵਂ ਲਚ੍ਛਤਿ, ਨ ਦਾਨਿ ਤਂ ਮਯ੍ਹ’’ਨ੍ਤਿ ਧੁਰਨਿਕ੍ਖੇਪਂ ਕਤ੍ਵਾ ਗਤੋ. ਅਥਞ੍ਞੋ ਭਿਕ੍ਖੁ ਪਚ੍ਛਾ ਆਗਚ੍ਛਨ੍ਤੋ ਤਂ ਕਾਸਾਵਂ ਦਿਸ੍ਵਾ ਥੇਯ੍ਯਚਿਤ੍ਤੇਨ ਗਹੇਤ੍ਵਾ ਪੁਨ ਵਿਪ੍ਪਟਿਸਾਰੀ ਹੁਤ੍ਵਾ ‘‘ਅਸ੍ਸਮਣੋ ਦਾਨਿਮ੍ਹਿ, ਵਿਬ੍ਭਮਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨੇਪਿ ‘‘ਵਿਨਯਧਰੇ ਪੁਚ੍ਛਿਤ੍ਵਾ ਞਸ੍ਸਾਮੀ’’ਤਿ ਚਿਨ੍ਤੇਸਿ.
ਤੇਨ ਚ ਸਮਯੇਨ ਚੂਲ਼ਸੁਮਨਤ੍ਥੇਰੋ ਨਾਮ ਸਬ੍ਬਪਰਿਯਤ੍ਤਿਧਰੋ ਵਿਨਯਾਚਰਿਯਪਾਮੋਕ੍ਖੋ ਮਹਾਵਿਹਾਰੇ ਪਟਿਵਸਤਿ. ਸੋ ਭਿਕ੍ਖੁ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਓਕਾਸਂ ਕਾਰੇਤ੍ਵਾ ਅਤ੍ਤਨੋ ਕੁਕ੍ਕੁਚ੍ਚਂ ਪੁਚ੍ਛਿ. ਥੇਰੋ ਤੇਨ ਭਟ੍ਠੇ ਜਨਕਾਯੇ ਪਚ੍ਛਾ ਆਗਨ੍ਤ੍ਵਾ ਗਹਿਤਭਾਵਂ ਞਤ੍ਵਾ ‘‘ਅਤ੍ਥਿ ਦਾਨਿ ਏਤ੍ਥ ਓਕਾਸੋ’’ਤਿ ਚਿਨ੍ਤੇਤ੍ਵਾ ਆਹ – ‘‘ਸਚੇ ਕਾਸਾਵਸਾਮਿਕਂ ਭਿਕ੍ਖੁਂ ਆਨੇਯ੍ਯਾਸਿ, ਸਕ੍ਕਾ ਭਵੇਯ੍ਯ ਤਵ ਪਤਿਟ੍ਠਾ ਕਾਤੁ’’ਨ੍ਤਿ. ‘‘ਕਥਾਹਂ, ਭਨ੍ਤੇ, ਤਂ ਦਕ੍ਖਿਸ੍ਸਾਮੀ’’ਤਿ? ‘‘ਤਹਿਂ ਤਹਿਂ ਗਨ੍ਤ੍ਵਾ ਓਲੋਕੇਹੀ’’ਤਿ. ਸੋ ਪਞ੍ਚਪਿ ਮਹਾਵਿਹਾਰੇ ਓਲੋਕੇਤ੍ਵਾ ਨੇਵ ਅਦ੍ਦਕ੍ਖਿ. ਤਤੋ ਨਂ ਥੇਰੋ ਪੁਚ੍ਛਿ – ‘‘ਕਤਰਾਯ ਦਿਸਾਯ ਬਹੂ ਭਿਕ੍ਖੂ ਆਗਚ੍ਛਨ੍ਤੀ’’ਤਿ? ‘‘ਦਕ੍ਖਿਣਦਿਸਾਯ, ਭਨ੍ਤੇ’’ਤਿ. ‘‘ਤੇਨ ਹਿ ਕਾਸਾਵਂ ਦੀਘਤੋ ਚ ਤਿਰਿਯਞ੍ਚ ਮਿਨਿਤ੍ਵਾ ਠਪੇਹਿ. ਠਪੇਤ੍ਵਾ ਦਕ੍ਖਿਣਦਿਸਾਯ ਵਿਹਾਰਪਟਿਪਾਟਿਯਾ ਵਿਚਿਨਿਤ੍ਵਾ ਤਂ ਭਿਕ੍ਖੁਂ ਆਨੇਹੀ’’ਤਿ. ਸੋ ਤਥਾ ਕਤ੍ਵਾ ਤਂ ਭਿਕ੍ਖੁਂ ਦਿਸ੍ਵਾ ਥੇਰਸ੍ਸ ਸਨ੍ਤਿਕਂ ਆਨੇਸਿ. ਥੇਰੋ ਪੁਚ੍ਛਿ – ‘‘ਤਵੇਦਂ ਕਾਸਾਵ’’ਨ੍ਤਿ? ‘‘ਆਮ, ਭਨ੍ਤੇ’’ਤਿ. ‘‘ਕੁਹਿਂ ਤੇ ਪਾਤਿਤ’’ਨ੍ਤਿ? ਸੋ ਸਬ੍ਬਂ ਆਚਿਕ੍ਖਿ. ਥੇਰੋ ਪਨ ਤੇਨ ਕਤਂ ਧੁਰਨਿਕ੍ਖੇਪਂ ਸੁਤ੍ਵਾ ਇਤਰਂ ਪੁਚ੍ਛਿ – ‘‘ਤਯਾ ਇਦਂ ਕੁਹਿਂ ਦਿਸ੍ਵਾ ਗਹਿਤ’’ਨ੍ਤਿ? ਸੋਪਿ ਸਬ੍ਬਂ ਆਰੋਚੇਸਿ. ਤਤੋ ਨਂ ਥੇਰੋ ਆਹ – ‘‘ਸਚੇ ਤੇ ਸੁਦ੍ਧਚਿਤ੍ਤੇਨ ਗਹਿਤਂ ਅਭਵਿਸ੍ਸ, ਅਨਾਪਤ੍ਤਿਯੇਵ ਤੇ ਅਸ੍ਸ. ਥੇਯ੍ਯਚਿਤ੍ਤੇਨ ਪਨ ਗਹਿਤਤ੍ਤਾ ਦੁਕ੍ਕਟਂ ਆਪਨ੍ਨੋਸਿ. ਤਂ ਦੇਸੇਤ੍ਵਾ ਅਨਾਪਤ੍ਤਿਕੋ ਹੋਹਿ. ਇਦਞ੍ਚ ਕਾਸਾਵਂ ਅਤ੍ਤਨੋ ਸਨ੍ਤਕਂ ਕਤ੍ਵਾ ਏਤਸ੍ਸੇਵ ਭਿਕ੍ਖੁਨੋ ਦੇਹੀ’’ਤਿ. ਸੋ ਭਿਕ੍ਖੁ ਅਮਤੇਨੇਵ ਅਭਿਸਿਤ੍ਤੋ ਪਰਮਸ੍ਸਾਸਪ੍ਪਤ੍ਤੋ ਅਹੋਸੀਤਿ. ਏਵਂ ਵਤ੍ਥੁ ਓਲੋਕੇਤਬ੍ਬਂ.
ਕਾਲੋਤਿ ਅਵਹਾਰਕਾਲੋ. ਤਦੇਵ ਹਿ ਭਣ੍ਡਂ ਕਦਾਚਿ ਸਮਗ੍ਘਂ ਹੋਤਿ, ਕਦਾਚਿ ਮਹਗ੍ਘਂ. ਤਸ੍ਮਾ ਤਂ ਭਣ੍ਡਂ ਯਸ੍ਮਿਂ ਕਾਲੇ ਅਵਹਟਂ, ਤਸ੍ਮਿਂਯੇਵ ਕਾਲੇ ਯੋ ਤਸ੍ਸ ਅਗ੍ਘੋ ਹੋਤਿ, ਤੇਨ ਅਗ੍ਘੇਨ ਆਪਤ੍ਤਿ ਕਾਰੇਤਬ੍ਬਾ. ਏਵਂ ਕਾਲੋ ਓਲੋਕੇਤਬ੍ਬੋ.
ਦੇਸੋਤਿ ਅਵਹਾਰਦੇਸੋ. ਤਞ੍ਹਿ ਭਣ੍ਡਂ ਯਸ੍ਮਿਂ ਦੇਸੇ ਅਵਹਟਂ, ਤਸ੍ਮਿਂਯੇਵ ਦੇਸੇ ਯੋ ਤਸ੍ਸ ਅਗ੍ਘੋ ਹੋਤਿ, ਤੇਨ ਅਗ੍ਘੇਨ ਆਪਤ੍ਤਿ ਕਾਰੇਤਬ੍ਬਾ. ਭਣ੍ਡੁਟ੍ਠਾਨਦੇਸੇ ਹਿ ਭਣ੍ਡਂ ਸਮਗ੍ਘਂ ਹੋਤਿ, ਅਞ੍ਞਤ੍ਥ ਮਹਗ੍ਘਂ.
ਇਮਸ੍ਸਾਪਿ ਚ ਅਤ੍ਥਸ੍ਸ ਦੀਪਨਤ੍ਥਮਿਦਂ ਵਤ੍ਥੁ – ਅਨ੍ਤਰਸਮੁਦ੍ਦੇ ਕਿਰ ਏਕੋ ਭਿਕ੍ਖੁ ਸੁਸਣ੍ਠਾਨਂ ਨਾਲ਼ਿਕੇਰਂ ਲਭਿਤ੍ਵਾ ਭਮਂ ਆਰੋਪੇਤ੍ਵਾ ਸਙ੍ਖਥਾਲਕਸਦਿਸਂ ਮਨੋਰਮਂ ਪਾਨੀਯਥਾਲਕਂ ਕਤ੍ਵਾ ਤਤ੍ਥੇਵ ਠਪੇਤ੍ਵਾ ਚੇਤਿਯਗਿਰਿਂ ਅਗਮਾਸਿ. ਅਥਞ੍ਞੋ ਭਿਕ੍ਖੁ ਅਨ੍ਤਰਸਮੁਦ੍ਦਂ ਗਨ੍ਤ੍ਵਾ ਤਸ੍ਮਿਂ ਵਿਹਾਰੇ ਪਟਿਵਸਨ੍ਤੋ ਤਂ ਥਾਲਕਂ ਦਿਸ੍ਵਾ ਥੇਯ੍ਯਚਿਤ੍ਤੇਨ ਗਹੇਤ੍ਵਾ ਚੇਤਿਯਗਿਰਿਮੇਵ ਆਗਤੋ. ਤਸ੍ਸ ਤਤ੍ਥ ਯਾਗੁਂ ਪਿਵਨ੍ਤਸ੍ਸ ਤਂ ਥਾਲਕਂ ਦਿਸ੍ਵਾ ਥਾਲਕਸਾਮਿਕੋ ਭਿਕ੍ਖੁ ਆਹ – ‘‘ਕੁਤੋ ਤੇ ਇਦਂ ਲਦ੍ਧ’’ਨ੍ਤਿ? ‘‘ਅਨ੍ਤਰਸਮੁਦ੍ਦਤੋ ਮੇ ਆਨੀਤ’’ਨ੍ਤਿ. ਸੋ ਤਂ ‘‘ਨੇਤਂ ਤਵ ਸਨ੍ਤਕਂ, ਥੇਯ੍ਯਾਯ ਤੇ ਗਹਿਤ’’ਨ੍ਤਿ ਸਙ੍ਘਮਜ੍ਝਂ ਆਕਡ੍ਢਿ. ਤਤ੍ਥ ਚ ਵਿਨਿਚ੍ਛਯਂ ਅਲਭਿਤ੍ਵਾ ਮਹਾਵਿਹਾਰਂ ਅਗਮਿਂਸੁ. ਤਤ੍ਥ ਭੇਰਿਂ ਪਹਰਾਪੇਤ੍ਵਾ ਮਹਾਚੇਤਿਯਸਮੀਪੇ ਸਨ੍ਨਿਪਾਤਂ ਕਤ੍ਵਾ ਵਿਨਿਚ੍ਛਯਂ ਆਰਭਿਂਸੁ. ਵਿਨਯਧਰਤ੍ਥੇਰਾ ਅਵਹਾਰਂ ਸਞ੍ਞਾਪੇਸੁਂ.
ਤਸ੍ਮਿਞ੍ਚ ਸਨ੍ਨਿਪਾਤੇ ਆਭਿਧਮ੍ਮਿਕਗੋਦਤ੍ਤਤ੍ਥੇਰੋ ਨਾਮ ਵਿਨਯਕੁਸਲੋ ਹੋਤਿ. ਸੋ ਏਵਮਾਹ – ‘‘ਇਮਿਨਾ ਇਦਂ ਥਾਲਕਂ ਕੁਹਿਂ ਅਵਹਟ’’ਨ੍ਤਿ? ‘‘ਅਨ੍ਤਰਸਮੁਦ੍ਦੇ ਅਵਹਟ’’ਨ੍ਤਿ. ‘‘ਤਤ੍ਰਿਦਂ ਕਿਂ ਅਗ੍ਘਤੀ’’ਤਿ? ‘‘ਨ ਕਿਞ੍ਚਿ ਅਗ੍ਘਤਿ. ਤਤ੍ਰ ਹਿ ਨਾਲ਼ਿਕੇਰਂ ਭਿਨ੍ਦਿਤ੍ਵਾ ਮਿਞ੍ਜਂ ਖਾਦਿਤ੍ਵਾ ਕਪਾਲਂ ਛਡ੍ਡੇਨ੍ਤਿ, ਦਾਰੁਅਤ੍ਥਂ ਪਨ ਫਰਤੀ’’ਤਿ. ‘‘ਇਮਸ੍ਸ ਭਿਕ੍ਖੁਨੋ ਏਤ੍ਥ ਹਤ੍ਥਕਮ੍ਮਂ ਕਿਂ ਅਗ੍ਘਤੀ’’ਤਿ? ‘‘ਮਾਸਕਂ ਵਾ ਊਨਮਾਸਕਂ ਵਾ’’ਤਿ. ‘‘ਅਤ੍ਥਿ ਪਨ ਕਤ੍ਥਚਿ ਸਮ੍ਮਾਸਮ੍ਬੁਦ੍ਧੇਨ ਮਾਸਕੇਨ ਵਾ ਊਨਮਾਸਕੇਨ ਵਾ ਪਾਰਾਜਿਕਂ ਪਞ੍ਞਤ੍ਤ’’ਨ੍ਤਿ. ਏਵਂ ਵੁਤ੍ਤੇ ‘‘ਸਾਧੁ! ਸਾਧੁ! ਸੁਕਥਿਤਂ ਸੁਵਿਨਿਚ੍ਛਿਤ’’ਨ੍ਤਿ ਏਕਸਾਧੁਕਾਰੋ ਅਹੋਸਿ. ਤੇਨ ਚ ਸਮਯੇਨ ਭਾਤਿਯਰਾਜਾਪਿ ਚੇਤਿਯਵਨ੍ਦਨਤ੍ਥਂ ਨਗਰਤੋ ਨਿਕ੍ਖਮਨ੍ਤੋ ਤਂ ਸਦ੍ਦਂ ਸੁਤ੍ਵਾ ‘‘ਕਿਂ ਇਦ’’ਨ੍ਤਿ ਪੁਚ੍ਛਿਤ੍ਵਾ ਸਬ੍ਬਂ ਪਟਿਪਾਟਿਯਾ ਸੁਤ੍ਵਾ ਨਗਰੇ ਭੇਰਿਂ ਚਰਾਪੇਸਿ – ‘‘ਮਯਿ ਸਨ੍ਤੇ ਭਿਕ੍ਖੂਨਮ੍ਪਿ ਭਿਕ੍ਖੂਨੀਨਮ੍ਪਿ ਗਿਹੀਨਮ੍ਪਿ ਅਧਿਕਰਣਂ ਆਭਿਧਮ੍ਮਿਕਗੋਦਤ੍ਤਤ੍ਥੇਰੇਨ ਵਿਨਿਚ੍ਛਿਤਂ ਸੁਵਿਨਿਚ੍ਛਿਤਂ, ਤਸ੍ਸ ਵਿਨਿਚ੍ਛਯੇ ਅਤਿਟ੍ਠਮਾਨਂ ਰਾਜਾਣਾਯ ਠਪੇਮੀ’’ਤਿ. ਏਵਂ ਦੇਸੋ ਓਲੋਕੇਤਬ੍ਬੋ.
ਅਗ੍ਘੋਤਿ ਭਣ੍ਡਗ੍ਘੋ. ਨਵਭਣ੍ਡਸ੍ਸ ਹਿ ਯੋ ਅਗ੍ਘੋ ਹੋਤਿ, ਸੋ ਪਚ੍ਛਾ ਪਰਿਹਾਯਤਿ; ਯਥਾ ਨਵਧੋਤੋ ਪਤ੍ਤੋ ਅਟ੍ਠ ਵਾ ਦਸ ਵਾ ਅਗ੍ਘਤਿ, ਸੋ ਪਚ੍ਛਾ ਭਿਨ੍ਨੋ ਵਾ ਛਿਦ੍ਦੋ ਵਾ ਆਣਿਗਣ੍ਠਿਕਾਹਤੋ ਵਾ ਅਪ੍ਪਗ੍ਘੋ ਹੋਤਿ ਤਸ੍ਮਾ ਨ ਸਬ੍ਬਦਾ ਭਣ੍ਡਂ ਪਕਤਿਅਗ੍ਘੇਨੇਵ ਕਾਤਬ੍ਬਨ੍ਤਿ. ਏਵਂ ਅਗ੍ਘੋ ਓਲੋਕੇਤਬ੍ਬੋ.
ਪਰਿਭੋਗੋਤਿ ਭਣ੍ਡਪਰਿਭੋਗੋ. ਪਰਿਭੋਗੇਨਾਪਿ ਹਿ ਵਾਸਿਆਦਿਭਣ੍ਡਸ੍ਸ ਅਗ੍ਘੋ ਪਰਿਹਾਯਤਿ. ਤਸ੍ਮਾ ਏਵਂ ਉਪਪਰਿਕ੍ਖਿਤਬ੍ਬਂ, ਸਚੇ ਕੋਚਿ ਕਸ੍ਸਚਿ ਪਾਦਗ੍ਘਨਕਂ ਵਾਸਿਂ ਹਰਤਿ, ਤਤ੍ਰ ਵਾਸਿਸਾਮਿਕੋ ਪੁਚ੍ਛਿਤਬ੍ਬੋ – ‘‘ਤਯਾ ਅਯਂ ਵਾਸਿ ਕਿਤ੍ਤਕੇਨ ਕੀਤਾ’’ਤਿ? ‘‘ਪਾਦੇਨ, ਭਨ੍ਤੇ’’ਤਿ. ‘‘ਕਿਂ ਪਨ ਤੇ ਕਿਣਿਤ੍ਵਾਵ ਠਪਿਤਾ, ਉਦਾਹੁ ਤਂ ਵਲ਼ਞ੍ਜੇਸੀ’’ਤਿ? ਸਚੇ ਵਦਤਿ ‘‘ਏਕਦਿਵਸਂ ਮੇ ਦਨ੍ਤਕਟ੍ਠਂ ਵਾ ਰਜਨਛਲ੍ਲਿਂ ਵਾ ਪਤ੍ਤਪਚਨਕਦਾਰੁਂ ਵਾ ਛਿਨ੍ਨਂ, ਘਂਸਿਤ੍ਵਾ ਵਾ ਨਿਸਿਤਾ’’ਤਿ. ਅਥਸ੍ਸਾ ਪੋਰਾਣੋ ਅਗ੍ਘੋ ਭਟ੍ਠੋਤਿ ਵੇਦਿਤਬ੍ਬੋ. ਯਥਾ ਚ ਵਾਸਿਯਾ ਏਵਂ ਅਞ੍ਜਨਿਯਾ ਵਾ ਅਞ੍ਜਨਿਸਲਾਕਾਯ ਵਾ ਕੁਞ੍ਚਿਕਾਯ ਵਾ ਪਲਾਲੇਨ ਵਾ ਥੁਸੇਹਿ ਵਾ ਇਟ੍ਠਕਚੁਣ੍ਣੇਨ ਵਾ ਏਕਵਾਰਂ ਘਂਸਿਤ੍ਵਾ ਧੋਵਨਮਤ੍ਤੇਨਾਪਿ ਅਗ੍ਘੋ ਭਸ੍ਸਤਿ. ਤਿਪੁਮਣ੍ਡਲਸ੍ਸ ਮਕਰਦਨ੍ਤਚ੍ਛੇਦਨੇਨਾਪਿ ਪਰਿਮਜ੍ਜਿਤਮਤ੍ਤੇਨਾਪਿ, ਉਦਕਸਾਟਿਕਾਯ ਸਕਿਂ ਨਿਵਾਸਨਪਾਰੁਪਨੇਨਾਪਿ ਪਰਿਭੋਗਸੀਸੇਨ ਅਂਸੇ ਵਾ ਸੀਸੇ ਵਾ ਠਪਨਮਤ੍ਤੇਨਾਪਿ, ਤਣ੍ਡੁਲਾਦੀਨਂ ਪਪ੍ਫੋਟਨੇਨਾਪਿ ਤਤੋ ਏਕਂ ਵਾ ਦ੍ਵੇ ਵਾ ਅਪਨਯਨੇਨਾਪਿ, ਅਨ੍ਤਮਸੋ ਏਕਂ ਪਾਸਾਣਸਕ੍ਖਰਂ ਉਦ੍ਧਰਿਤ੍ਵਾ ਛਡ੍ਡਿਤਮਤ੍ਤੇਨਾਪਿ, ਸਪ੍ਪਿਤੇਲਾਦੀਨਂ ਭਾਜਨਨ੍ਤਰਪਅਵਤ੍ਤਨੇਨਾਪਿ, ਅਨ੍ਤਮਸੋ ਤਤੋ ਮਕ੍ਖਿਕਂ ਵਾ ਕਿਪਿਲ੍ਲਿਕਂ ਵਾ ਉਦ੍ਧਰਿਤ੍ਵਾ ਛਡ੍ਡਿਤਮਤ੍ਤੇਨਾਪਿ, ਗੁਲ਼ਪਿਣ੍ਡਕਸ੍ਸ ਮਧੁਰਭਾਵਜਾਨਨਤ੍ਥਂ ਨਖੇਨ ਵਿਜ੍ਝਿਤ੍ਵਾ ਅਣੁਮਤ੍ਤਂ ਗਹਿਤਮਤ੍ਤੇਨਾਪਿ ਅਗ੍ਘੋ ਭਸ੍ਸਤਿ. ਤਸ੍ਮਾ ਯਂਕਿਞ੍ਚਿ ਪਾਦਗ੍ਘਨਕਂ ਵੁਤ੍ਤਨਯੇਨੇਵ ਸਾਮਿਕੇਹਿ ਪਰਿਭੋਗੇਨ ਊਨਂ ਕਤਂ ਹੋਤਿ, ਨ ਤਂ ਅਵਹਟੋ ਭਿਕ੍ਖੁ ਪਾਰਾਜਿਕੇਨ ਕਾਤਬ੍ਬੋ. ਏਵਂ ਪਰਿਭੋਗੋ ਓਲੋਕੇਤਬ੍ਬੋ. ਏਵਂ ਇਮਾਨਿ ਤੁਲਯਿਤ੍ਵਾ ਪਞ੍ਚ ਠਾਨਾਨਿ ਧਾਰੇਯ੍ਯਤ੍ਥਂ ਵਿਚਕ੍ਖਣੋ, ਆਪਤ੍ਤਿਂ ਵਾ ਅਨਾਪਤ੍ਤਿਂ ਵਾ ਗਰੁਕਂ ਵਾ ਲਹੁਕਂ ਵਾ ਆਪਤ੍ਤਿਂ ਯਥਾਠਾਨੇ ਠਪੇਯ੍ਯਾਤਿ.
ਨਿਟ੍ਠਿਤੋ ‘‘ਆਦਿਯੇਯ੍ਯ…ਪੇ… ਸਙ੍ਕੇਤਂ ਵੀਤਿਨਾਮੇਯ੍ਯਾ’’ਤਿ.
ਇਮੇਸਂ ਪਦਾਨਂ ਵਿਨਿਚ੍ਛਯੋ.
ਇਦਾਨਿ ਯਦਿਦਂ ‘‘ਯਥਾਰੂਪੇ ਅਦਿਨ੍ਨਾਦਾਨੇ’’ਤਿਆਦੀਨਿ ਵਿਭਜਨ੍ਤੇਨ ‘‘ਯਥਾਰੂਪਂ ਨਾਮਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਥਾਰੂਪਨ੍ਤਿ ਯਥਾਜਾਤਿਕਂ. ਤਂ ਪਨ ਯਸ੍ਮਾ ਪਾਦਤੋ ਪਟ੍ਠਾਯ ਹੋਤਿ, ਤਸ੍ਮਾ ‘‘ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ’’ਤਿ ਆਹ. ਤਤ੍ਥ ਪਾਦੇਨ ਕਹਾਪਣਸ੍ਸ ਚਤੁਤ੍ਥਭਾਗਂ ਅਕਪ੍ਪਿਯਭਣ੍ਡਮੇਵ ਦਸ੍ਸੇਤਿ. ਪਾਦਾਰਹੇਨ ਪਾਦਗ੍ਘਨਕਂ ਕਪ੍ਪਿਯਭਣ੍ਡਂ. ਅਤਿਰੇਕਪਾਦੇਨ ਉਭਯਮ੍ਪਿ. ਏਤ੍ਤਾਵਤਾ ਸਬ੍ਬਾਕਾਰੇਨ ਦੁਤਿਯਪਾਰਾਜਿਕਪ੍ਪਹੋਨਕਵਤ੍ਥੁ ਦਸ੍ਸਿਤਂ ਹੋਤਿ.
ਪਥਬ੍ਯਾ ਰਾਜਾਤਿ ਸਕਲਪਥਵਿਯਾ ਰਾਜਾ ਦੀਪਚਕ੍ਕਵਤ੍ਤੀ ਅਸੋਕਸਦਿਸੋ, ਯੋ ਵਾ ਪਨਞ੍ਞੋਪਿ ਏਕਦੀਪੇ ਰਾਜਾ, ਸੀਹਲ਼ਰਾਜਸਦਿਸੋ. ਪਦੇਸਰਾਜਾਤਿ ਏਕਦੀਪਸ੍ਸ ਪਦੇਸਿਸ੍ਸਰੋ, ਬਿਮ੍ਬਿਸਾਰ-ਪਸੇਨਦਿ-ਆਦਯੋ ਵਿਯ. ਮਣ੍ਡਲਿਕਾ ਨਾਮ ਯੇ ਦੀਪਪਦੇਸੇਪਿ ਏਕਮੇਕਂ ਮਣ੍ਡਲਂ ਭੁਞ੍ਜਨ੍ਤਿ. ਅਨ੍ਤਰਭੋਗਿਕਾ ਨਾਮ ਦ੍ਵਿਨ੍ਨਂ ਰਾਜੂਨਂ ਅਨ੍ਤਰਾ ਕਤਿਪਯਗਾਮਸਾਮਿਕਾ. ਅਕ੍ਖਦਸ੍ਸਾਤਿ ਧਮ੍ਮਵਿਨਿਚ੍ਛਨਕਾ, ਤੇ ਧਮ੍ਮਸਭਾਯਂ ਨਿਸੀਦਿਤ੍ਵਾ ਅਪਰਾਧਾਨੁਰੂਪਂ ਚੋਰਾਨਂ ਹਤ੍ਥਪਾਦਚ੍ਛੇਜ੍ਜਾਦਿਂ ਅਨੁਸਾਸਨ੍ਤਿ. ਯੇ ਪਨ ਠਾਨਨ੍ਤਰਪ੍ਪਤ੍ਤਾ ਅਮਚ੍ਚਾ ਵਾ ਰਾਜਕੁਮਾਰਾ ਵਾ ਕਤਾਪਰਾਧਾ ਹੋਨ੍ਤਿ, ਤੇ ਰਞ੍ਞੋ ਆਰੋਚੇਨ੍ਤਿ, ਗਰੁਕਂ ਠਾਨਂ ਸਯਂ ਨ ਵਿਨਿਚ੍ਛਿਨਨ੍ਤਿ. ਮਹਾਮਤ੍ਤਾਤਿ ਠਾਨਨ੍ਤਰਪ੍ਪਤ੍ਤਾ ਮਹਾਅਮਚ੍ਚਾ; ਤੇਪਿ ਤਤ੍ਥ ਤਤ੍ਥ ਗਾਮੇ ਵਾ ਨਿਗਮੇ ਵਾ ਨਿਸੀਦਿਤ੍ਵਾ ਰਾਜਕਿਚ੍ਚਂ ਕਰੋਨ੍ਤਿ. ਯੇ ਵਾ ਪਨਾਤਿ ਅਞ੍ਞੇਪਿ ਯੇ ਰਾਜਕੁਲਨਿਸ੍ਸਿਤਾ ਵਾ ਸਕਿਸ੍ਸਰਿਯਨਿਸ੍ਸਿਤਾ ਵਾ ਹੁਤ੍ਵਾ ਛੇਜ੍ਜਭੇਜ੍ਜਂ ਅਨੁਸਾਸਨ੍ਤਿ, ਸਬ੍ਬੇਪਿ ਤੇ ਇਮਸ੍ਮਿਂ ਅਤ੍ਥੇ ‘‘ਰਾਜਾਨੋ’’ਤਿ ਦਸ੍ਸੇਤਿ.
ਹਨੇਯ੍ਯੁਨ੍ਤਿ ਪੋਥੇਯ੍ਯੁਞ੍ਚੇਵ ਛਿਨ੍ਦੇਯ੍ਯੁਞ੍ਚ. ਪਬ੍ਬਾਜੇਯ੍ਯੁਨ੍ਤਿ ਨੀਹਰੇਯ੍ਯੁਂ. ਚੋਰੋਸੀਤਿ ਏਵਮਾਦੀਨਿ ਚ ਵਤ੍ਵਾ ਪਰਿਭਾਸੇਯ੍ਯੁਂ; ਤੇਨੇਵਾਹ – ‘‘ਪਰਿਭਾਸੋ ਏਸੋ’’ਤਿ. ਪੁਰਿਮਂ ਉਪਾਦਾਯਾਤਿ ਮੇਥੁਨਂ ਧਮ੍ਮਂ ਪਟਿਸੇਵਿਤ੍ਵਾ ਪਾਰਾਜਿਕਂ ਆਪਤ੍ਤਿਂ ਆਪਨ੍ਨਂ ਪੁਗ੍ਗਲਂ ਉਪਾਦਾਯ. ਸੇਸਂ ਪੁਬ੍ਬੇ ਵੁਤ੍ਤਨਯਤ੍ਤਾ ਉਤ੍ਤਾਨਪਦਤ੍ਥਤ੍ਤਾ ਚ ਪਾਕਟਮੇਵਾਤਿ.
੯੩. ਏਵਂ ਉਦ੍ਦਿਟ੍ਠਸਿਕ੍ਖਾਪਦਂ ਪਦਾਨੁਕ੍ਕਮੇਨ ਵਿਭਜਿਤ੍ਵਾ ਇਦਾਨਿ ਯਂ ਤਂ ਆਦਿਯੇਯ੍ਯਾਤਿਆਦੀਹਿ ਛਹਿ ਪਦੇਹਿ ਸਙ੍ਖੇਪਤੋ ਆਦਾਨਂ ਦਸ੍ਸੇਤ੍ਵਾ ਸਙ੍ਖੇਪਤੋਏਵ ‘‘ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ’’ਤਿ ਆਦਾਤਬ੍ਬਭਣ੍ਡਂ ਦਸ੍ਸਿਤਂ, ਤਂ ਯਤ੍ਥ ਯਤ੍ਥ ਠਿਤਂ, ਯਥਾ ਯਥਾ ਆਦਾਨਂ ਗਚ੍ਛਤਿ, ਅਨਾਗਤੇ ਪਾਪਭਿਕ੍ਖੂਨਂ ਲੇਸੋਕਾਸਨਿਰੁਨ੍ਧਨਤ੍ਥਂ ਤਥਾ ਤਥਾ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਭੂਮਟ੍ਠਂ ਥਲਟ੍ਠ’’ਨ੍ਤਿਆਦਿਨਾ ਨਯੇਨ ਮਾਤਿਕਂ ਠਪੇਤ੍ਵਾ ‘‘ਭੂਮਟ੍ਠਂ ਨਾਮ ਭਣ੍ਡਂ ਭੂਮਿਯਂ ਨਿਕ੍ਖਿਤ੍ਤਂ ਹੋਤੀ’’ਤਿਆਦਿਨਾ ਨਯੇਨ ਤਸ੍ਸ ਵਿਭਙ੍ਗਂ ਆਹ.
ਪਞ੍ਚਵੀਸਤਿਅਵਹਾਰਕਥਾ ਨਿਟ੍ਠਿਤਾ.
ਭੂਮਟ੍ਠਕਥਾ
੯੪. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾਯ ਸਦ੍ਧਿਂ ਵਿਨਿਚ੍ਛਯਕਥਾ. ਨਿਖਾਤਨ੍ਤਿ ਭੂਮਿਯਂ ਖਣਿਤ੍ਵਾ ਠਪਿਤਂ. ਪਟਿਚ੍ਛਨ੍ਨਨ੍ਤਿ ਪਂਸੁਇਟ੍ਠਕਾਦੀਹਿ ਪਟਿਚ੍ਛਨ੍ਨਂ. ਭੂਮਟ੍ਠਂ ਭਣ੍ਡਂ…ਪੇ… ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਤਂ ਏਵਂ ਨਿਖਣਿਤ੍ਵਾ ਵਾ ਪਟਿਚ੍ਛਾਦੇਤ੍ਵਾ ਵਾ ਠਪਿਤਤ੍ਤਾ ਭੂਮਿਯਂ ਠਿਤਂ ਭਣ੍ਡਂ ਯੋ ਭਿਕ੍ਖੁ ਕੇਨਚਿਦੇਵ ਉਪਾਯੇਨ ਞਤ੍ਵਾ ‘‘ਆਹਰਿਸ੍ਸਾਮੀ’’ਤਿ ਥੇਯ੍ਯਚਿਤ੍ਤੋ ਹੁਤ੍ਵਾ ਰਤ੍ਤਿਭਾਗੇ ਉਟ੍ਠਾਯ ਗਚ੍ਛਤਿ, ਸੋ ਭਣ੍ਡਟ੍ਠਾਨਂ ਅਪ੍ਪਤ੍ਵਾਪਿ ਸਬ੍ਬਕਾਯਵਚੀਵਿਕਾਰੇਸੁ ਦੁਕ੍ਕਟਂ ਆਪਜ੍ਜਤਿ. ਕਥਂ? ਸੋ ਹਿ ਤਸ੍ਸ ਆਹਰਣਤ੍ਥਾਯ ਉਟ੍ਠਹਨ੍ਤੋ ਯਂ ਯਂ ਅਙ੍ਗਪਚ੍ਚਙ੍ਗਂ ਫਨ੍ਦਾਪੇਤਿ, ਸਬ੍ਬਤ੍ਥ ਦੁਕ੍ਕਟਮੇਵ. ਨਿਵਾਸਨਪਾਰੁਪਨਂ ਸਣ੍ਠਪੇਤਿ, ਹਤ੍ਥਵਾਰੇ ਹਤ੍ਥਵਾਰੇ ਦੁਕ੍ਕਟਂ. ‘‘ਮਹਨ੍ਤਂ ਨਿਧਾਨਂ ਨ ਸਕ੍ਕਾ ਏਕੇਨ ਆਹਰਿਤੁਂ, ਦੁਤਿਯਂ ਪਰਿਯੇਸਿਸ੍ਸਾਮੀ’’ਤਿ ਕਸ੍ਸਚਿ ਸਹਾਯਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ਦ੍ਵਾਰਂ ਵਿਵਰਤਿ, ਪਦਵਾਰੇ ਚ ਹਤ੍ਥਵਾਰੇ ਚ ਦੁਕ੍ਕਟਂ. ਦ੍ਵਾਰਪਿਦਹਨੇ ਪਨ ਅਞ੍ਞਸ੍ਮਿਂ ਵਾ ਗਮਨਸ੍ਸ ਅਨੁਪਕਾਰੇ ਅਨਾਪਤ੍ਤਿ. ਤਸ੍ਸ ਨਿਪਨ੍ਨੋਕਾਸਂ ਗਨ੍ਤ੍ਵਾ ‘‘ਇਤ੍ਥਨ੍ਨਾਮਾ’’ਤਿ ਪਕ੍ਕੋਸਤਿ, ਤਮਤ੍ਥਂ ਆਰੋਚੇਤ੍ਵਾ ‘‘ਏਹਿ ਗਚ੍ਛਾਮਾ’’ਤਿ ਵਦਤਿ, ਵਾਚਾਯ ਵਾਚਾਯ ਦੁਕ੍ਕਟਂ. ਸੋ ਤਸ੍ਸ ਵਚਨੇਨ ਉਟ੍ਠਹਤਿ, ਤਸ੍ਸਾਪਿ ਦੁਕ੍ਕਟਂ. ਉਟ੍ਠਹਿਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ਨਿਵਾਸਨਪਾਰੁਪਨਂ ਸਣ੍ਠਪੇਤਿ, ਦ੍ਵਾਰਂ ਵਿਵਰਿਤ੍ਵਾ ਤਸ੍ਸ ਸਮੀਪਂ ਗਚ੍ਛਤਿ, ਹਤ੍ਥਵਾਰਪਦਵਾਰੇਸੁ ਸਬ੍ਬਤ੍ਥ ਦੁਕ੍ਕਟਂ. ਸੋ ਤਂ ਪੁਚ੍ਛਤਿ ‘‘ਅਸੁਕੋ ਚ ਅਸੁਕੋ ਚ ਕੁਹਿਂ, ਅਸੁਕਞ੍ਚ ਅਸੁਕਞ੍ਚ ਪਕ੍ਕੋਸਾਹੀ’’ਤਿ, ਵਾਚਾਯ ਵਾਚਾਯ ਦੁਕ੍ਕਟਂ. ਸਬ੍ਬੇ ਸਮਾਗਤੇ ਦਿਸ੍ਵਾ ‘‘ਮਯਾ ਅਸੁਕਸ੍ਮਿਂ ਨਾਮ ਠਾਨੇ ਏਵਰੂਪੋ ਨਿਧਿ ਉਪਲਦ੍ਧੋ, ਗਚ੍ਛਾਮ ਤਂ ਗਹੇਤ੍ਵਾ ਪੁਞ੍ਞਾਨਿ ਚ ਕਰਿਸ੍ਸਾਮ, ਸੁਖਞ੍ਚ ਜੀਵਿਸ੍ਸਾਮਾ’’ਤਿ ਵਦਤਿ, ਵਾਚਾਯ ਵਾਚਾਯ ਦੁਕ੍ਕਟਮੇਵ.
ਏਵਂ ਲਦ੍ਧਸਹਾਯੋ ਕੁਦਾਲਂ ਪਰਿਯੇਸਤਿ. ਸਚੇ ਪਨਸ੍ਸ ਅਤ੍ਤਨੋ ਕੁਦਾਲੋ ਅਤ੍ਥਿ, ‘‘ਤਂ ਆਹਰਿਸ੍ਸਾਮੀ’’ਤਿ ਗਚ੍ਛਨ੍ਤੋ ਚ ਗਣ੍ਹਨ੍ਤੋ ਚ ਆਹਰਨ੍ਤੋ ਚ ਸਬ੍ਬਤ੍ਥ ਹਤ੍ਥਵਾਰਪਦਵਾਰੇਸੁ ਦੁਕ੍ਕਟਂ ਆਪਜ੍ਜਤਿ. ਸਚੇ ਨਤ੍ਥਿ, ਅਞ੍ਞਂ ਭਿਕ੍ਖੁਂ ਵਾ ਗਹਟ੍ਠਂ ਵਾ ਗਨ੍ਤ੍ਵਾ ਯਾਚਤਿ, ਯਾਚਨ੍ਤੋ ਚ ਸਚੇ ‘‘ਕੁਦਾਲਂ ਮੇ ਦੇਹਿ, ਕੁਦਾਲੇਨ ਮੇ ਅਤ੍ਥੋ, ਕਿਞ੍ਚਿ ਕਾਤਬ੍ਬਮਤ੍ਥਿ, ਤਂ ਕਤ੍ਵਾ ਪਚ੍ਚਾਹਰਿਸ੍ਸਾਮੀ’’ਤਿ ਮੁਸਾ ਅਭਣਨ੍ਤੋ ਯਾਚਤਿ, ਵਾਚਾਯ ਵਾਚਾਯ ਦੁਕ੍ਕਟਂ. ਸਚੇ ‘‘ਮਾਤਿਕਾ ਸੋਧੇਤਬ੍ਬਾ ਅਤ੍ਥਿ, ਵਿਹਾਰੇ ਭੂਮਿਕਮ੍ਮਂ ਕਾਤਬ੍ਬਂ ਅਤ੍ਥੀ’’ਤਿ ਮੁਸਾਪਿ ਭਣਤਿ, ਯਂ ਯਂ ਵਚਨਂ ਮੁਸਾ, ਤਤ੍ਥ ਤਤ੍ਥ ਪਾਚਿਤ੍ਤਿਯਂ. ਮਹਾਅਟ੍ਠਕਥਾਯਂ ਪਨ ਸਚ੍ਚੇਪਿ ਅਲਿਕੇਪਿ ਦੁਕ੍ਕਟਮੇਵ ਵੁਤ੍ਤਂ, ਤਂ ਪਮਾਦਲਿਖਿਤਨ੍ਤਿ ਵੇਦਿਤਬ੍ਬਂ. ਨ ਹਿ ਅਦਿਨ੍ਨਾਦਾਨਸ੍ਸ ਪੁਬ੍ਬਪਯੋਗੇ ਪਾਚਿਤ੍ਤਿਯਟ੍ਠਾਨੇ ਦੁਕ੍ਕਟਂ ਨਾਮ ਅਤ੍ਥਿ. ਸਚੇ ਪਨ ਕੁਦਾਲਸ੍ਸ ਦਣ੍ਡੋ ਨਤ੍ਥਿ, ‘‘ਦਣ੍ਡਂ ਕਰਿਸ੍ਸਾਮੀ’’ਤਿ ਵਾਸਿਂ ਵਾ ਫਰਸੁਂ ਵਾ ਨਿਸੇਤਿ, ਤਦਤ੍ਥਾਯ ਗਚ੍ਛਤਿ, ਗਨ੍ਤ੍ਵਾ ਸੁਕ੍ਖਕਟ੍ਠਂ ਛਿਨ੍ਦਤਿ ਤਚ੍ਛਤਿ ਆਕੋਟੇਤਿ, ਸਬ੍ਬਤ੍ਥ ਹਤ੍ਥਵਾਰਪਦਵਾਰੇਸੁ ਦੁਕ੍ਕਟਂ. ਅਲ੍ਲਰੁਕ੍ਖਂ ਛਿਨ੍ਦਤਿ, ਪਾਚਿਤ੍ਤਿਯਂ. ਤਤੋ ਪਰਂ ਸਬ੍ਬਪਯੋਗੇਸੁ ਦੁਕ੍ਕਟਂ. ਸਙ੍ਖੇਪਟ੍ਠਕਥਾਯਂ ਪਨ ਮਹਾਪਚ੍ਚਰਿਯਞ੍ਚ ਤਤ੍ਥ ਜਾਤਕਕਟ੍ਠਲਤਾਛੇਦਨਤ੍ਥਂ ਵਾਸਿਫਰਸੁਂ ਪਰਿਯੇਸਨ੍ਤਾਨਮ੍ਪਿ ਦੁਕ੍ਕਟਂ ਵੁਤ੍ਤਂ. ਸਚੇ ਪਨ ਤੇਸਂ ਏਵਂ ਹੋਤਿ ‘‘ਵਾਸਿਫਰਸੁਕੁਦਾਲੇ ਯਾਚਨ੍ਤਾ ਆਸਙ੍ਕਿਤਾ ਭਵਿਸ੍ਸਾਮ, ਲੋਹਂ ਸਮੁਟ੍ਠਾਪੇਤ੍ਵਾ ਕਰੋਮਾ’’ਤਿ. ਤਤੋ ਅਰਞ੍ਞਂ ਗਨ੍ਤ੍ਵਾ ਲੋਹਬੀਜਤ੍ਥਂ ਪਥਵਿਂ ਖਣਨ੍ਤਿ, ਅਕਪ੍ਪਿਯਪਥਵਿਂ ਖਣਨ੍ਤਾਨਂ ਦੁਕ੍ਕਟੇਹਿ ਸਦ੍ਧਿਂ ਪਾਚਿਤ੍ਤਿਯਾਨੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਯਥਾ ਚ ਇਧ, ਏਵਂ ਸਬ੍ਬਤ੍ਥ ਪਾਚਿਤ੍ਤਿਯਟ੍ਠਾਨੇ ਦੁਕ੍ਕਟਾ ਨ ਮੁਚ੍ਚਤਿ. ਕਪ੍ਪਿਯਪਥਵਿਂ ਖਣਨ੍ਤਾਨਂ ਦੁਕ੍ਕਟਾਨਿਯੇਵ. ਬੀਜਂ ਪਨ ਗਹੇਤ੍ਵਾ ਤਤੋ ਪਰਂ ਸਬ੍ਬਕਿਰਿਯਾਸੁ ਪਯੋਗੇ ਪਯੋਗੇ ਦੁਕ੍ਕਟਂ.
ਪਿਟਕਪਰਿਯੇਸਨੇਪਿ ਹਤ੍ਥਵਾਰਪਦਵਾਰੇਸੁ ਵੁਤ੍ਤਨਯੇਨੇਵ ਦੁਕ੍ਕਟਂ. ਮੁਸਾਵਾਦੇ ਪਾਚਿਤ੍ਤਿਯਂ. ਪਿਟਕਂ ਕਾਤੁਕਾਮਤਾਯ ਵਲ੍ਲਿਚ੍ਛੇਦਨੇ ਪਾਚਿਤ੍ਤਿਯਨ੍ਤਿ ਸਬ੍ਬਂ ਪੁਰਿਮਨਯੇਨੇਵ ਵੇਦਿਤਬ੍ਬਂ. ਗਚ੍ਛਤਿ ਵਾ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਵਂ ਪਰਿਯਿਟ੍ਠਸਹਾਯਕੁਦਾਲਪਿਟਕੋ ਨਿਧਿਟ੍ਠਾਨਂ ਗਚ੍ਛਤਿ, ਪਦਵਾਰੇ ਪਦਵਾਰੇ ਦੁਕ੍ਕਟਂ. ਸਚੇ ਪਨ ਗਚ੍ਛਨ੍ਤੋ ‘‘ਇਮਂ ਨਿਧਿਂ ਲਦ੍ਧਾ ਬੁਦ੍ਧਪੂਜਂ ਵਾ ਧਮ੍ਮਪੂਜਂ ਵਾ ਸਙ੍ਘਭਤ੍ਤਂ ਵਾ ਕਰਿਸ੍ਸਾਮੀ’’ਤਿ ਕੁਸਲਂ ਉਪ੍ਪਾਦੇਤਿ, ਕੁਸਲਚਿਤ੍ਤੇਨ ਗਮਨੇ ਅਨਾਪਤ੍ਤਿ. ਕਸ੍ਮਾ? ‘‘ਥੇਯ੍ਯਚਿਤ੍ਤੋ ਦੁਤਿਯਂ ਵਾ…ਪੇ… ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ. ਯਥਾ ਚ ਇਧ, ਏਵਂ ਸਬ੍ਬਤ੍ਥ ਅਥੇਯ੍ਯਚਿਤ੍ਤਸ੍ਸ ਅਨਾਪਤ੍ਤਿ. ਮਗ੍ਗਤੋ ਓਕ੍ਕਮ੍ਮ ਨਿਧਾਨਟ੍ਠਾਨਂ ਗਮਨਤ੍ਥਾਯ ਮਗ੍ਗਂ ਕਰੋਨ੍ਤੋ ਭੂਤਗਾਮਂ ਛਿਨ੍ਦਤਿ, ਪਾਚਿਤ੍ਤਿਯਂ. ਸੁਕ੍ਖਕਟ੍ਠਂ ਛਿਨ੍ਦਤਿ, ਦੁਕ੍ਕਟਂ.
ਤਤ੍ਥਜਾਤਕਨ੍ਤਿ ਚਿਰਨਿਹਿਤਾਯ ਕੁਮ੍ਭਿਯਾ ਉਪਰਿ ਜਾਤਕਂ. ਕਟ੍ਠਂ ਵਾ ਲਤਂ ਵਾਤਿ ਨ ਕੇਵਲਂ ਕਟ੍ਠਲਤਮੇਵ, ਯਂਕਿਞ੍ਚਿ ਅਲ੍ਲਂ ਵਾ ਸੁਕ੍ਖਂ ਵਾ ਤਿਣਰੁਕ੍ਖਲਤਾਦਿਂ ਛਿਨ੍ਦਨ੍ਤਸ੍ਸ ਸਹਪਯੋਗਤ੍ਤਾ ਦੁਕ੍ਕਟਮੇਵ ਹੋਤਿ.
ਅਟ੍ਠਵਿਧਂ ਹੇਤਂ ਦੁਕ੍ਕਟਂ ਨਾਮ ਇਮਸ੍ਮਿਂ ਠਾਨੇ ਸਮੋਧਾਨੇਤ੍ਵਾ ਥੇਰੇਹਿ ਦਸ੍ਸਿਤਂ – ਪੁਬ੍ਬਪਯੋਗਦੁਕ੍ਕਟਂ, ਸਹਪਯੋਗਦੁਕ੍ਕਟਂ, ਅਨਾਮਾਸਦੁਕ੍ਕਟਂ, ਦੁਰੁਪਚਿਣ੍ਣਦੁਕ੍ਕਟਂ, ਵਿਨਯਦੁਕ੍ਕਟਂ, ਞਾਤਦੁਕ੍ਕਟਂ, ਞਤ੍ਤਿਦੁਕ੍ਕਟਂ, ਪਟਿਸ੍ਸਵਦੁਕ੍ਕਟਨ੍ਤਿ. ਤਤ੍ਥ ‘‘ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਕੁਦਾਲਂ ਵਾ ਪਿਟਕਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਦਂ ਪੁਬ੍ਬਪਯੋਗਦੁਕ੍ਕਟਂ ਨਾਮ. ਏਤ੍ਥ ਹਿ ਦੁਕ੍ਕਟਟ੍ਠਾਨੇ ਦੁਕ੍ਕਟਂ, ਪਾਚਿਤ੍ਤਿਯਟ੍ਠਾਨੇ ਪਾਚਿਤ੍ਤਿਯਮੇਵ ਹੋਤਿ. ‘‘ਤਤ੍ਥਜਾਤਕਂ ਕਟ੍ਠਂ ਵਾ ਲਤਂ ਵਾ ਛਿਨ੍ਦਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਦਂ ਸਹਪਯੋਗਦੁਕ੍ਕਟਂ ਨਾਮ. ਏਤ੍ਥ ਪਨ ਪਾਚਿਤ੍ਤਿਯਵਤ੍ਥੁ ਚ ਦੁਕ੍ਕਟਵਤ੍ਥੁ ਚ ਦੁਕ੍ਕਟਟ੍ਠਾਨੇਯੇਵ ਤਿਟ੍ਠਤਿ. ਕਸ੍ਮਾ? ਅਵਹਾਰਸ੍ਸ ਸਹਪਯੋਗਤ੍ਤਾਤਿ. ਯਂ ਪਨ ਦਸਵਿਧਂ ਰਤਨਂ, ਸਤ੍ਤਵਿਧਂ ਧਞ੍ਞਂ, ਸਬ੍ਬਞ੍ਚ ਆਵੁਧਭਣ੍ਡਾਦਿਂ ਆਮਸਨ੍ਤਸ੍ਸ ਦੁਕ੍ਕਟਂ ਵੁਤ੍ਤਂ, ਇਦਂ ਅਨਾਮਾਸਦੁਕ੍ਕਟਂ ਨਾਮ. ਯਂ ਕਦਲਿਨਾਲ਼ਿਕੇਰਾਦੀਨਂ ਤਤ੍ਥਜਾਤਕਫਲਾਨਿ ਆਮਸਨ੍ਤਸ੍ਸ ਦੁਕ੍ਕਟਂ ਵੁਤ੍ਤਂ, ਇਦਂ ਦੁਰੁਪਚਿਣ੍ਣਦੁਕ੍ਕਟਂ ਨਾਮ. ਯਂ ਪਨ ਪਿਣ੍ਡਾਯ ਚਰਨ੍ਤਸ੍ਸ ਪਤ੍ਤੇ ਰਜੇ ਪਤਿਤੇ ਪਤ੍ਤਂ ਅਪ੍ਪਟਿਗ੍ਗਹੇਤ੍ਵਾ ਅਧੋਵਿਤ੍ਵਾ ਵਾ ਤਤ੍ਥ ਭਿਕ੍ਖਂ ਗਣ੍ਹਨ੍ਤਸ੍ਸ ਦੁਕ੍ਕਟਂ ਵੁਤ੍ਤਂ, ਇਦਂ ਵਿਨਯਦੁਕ੍ਕਟਂ ਨਾਮ. ‘‘ਸੁਤ੍ਵਾ ਨ ਵਦਨ੍ਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੪੧੯) ਇਦਂ ਞਾਤਦੁਕ੍ਕਟਂ ਨਾਮ. ਯਂ ਏਕਾਦਸਸੁ ਸਮਨੁਭਾਸਨਾਸੁ ‘‘ਞਤ੍ਤਿਯਾ ਦੁਕ੍ਕਟ’’ਨ੍ਤਿ (ਪਾਰਾ. ੪੧੪) ਵੁਤ੍ਤਂ, ਇਦਂ ਞਤ੍ਤਿਦੁਕ੍ਕਟਂ ਨਾਮ. ‘‘ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੦੭) ਇਦਂ ਪਟਿਸ੍ਸਵਦੁਕ੍ਕਟਂ ਨਾਮ. ਇਦਂ ਪਨ ਸਹਪਯੋਗਦੁਕ੍ਕਟਂ. ਤੇਨ ਵੁਤ੍ਤਂ – ‘‘ਯਂਕਿਞ੍ਚਿ ਅਲ੍ਲਂ ਵਾ ਸੁਕ੍ਖਂ ਵਾ ਤਿਣਰੁਕ੍ਖਲਤਾਦਿਂ ਛਿਨ੍ਦਨ੍ਤਸ੍ਸ ਸਹਪਯੋਗਤ੍ਤਾ ਦੁਕ੍ਕਟਮੇਵ ਹੋਤੀ’’ਤਿ.
ਸਚੇ ਪਨਸ੍ਸ ਤਤ੍ਥਜਾਤਕੇ ਤਿਣਰੁਕ੍ਖਲਤਾਦਿਮ੍ਹਿ ਛਿਨ੍ਨੇਪਿ ਲਜ੍ਜਿਧਮ੍ਮੋ ਓਕ੍ਕਮਤਿ, ਸਂਵਰੋ ਉਪ੍ਪਜ੍ਜਤਿ, ਛੇਦਨਪਚ੍ਚਯਾ ਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤਿ. ਅਥ ਧੁਰਨਿਕ੍ਖੇਪਂ ਅਕਤ੍ਵਾ ਸਉਸ੍ਸਾਹੋਵ ਪਂਸੁਂ ਖਣਤਿ, ਛੇਦਨਦੁਕ੍ਕਟਂ ਪਟਿਪ੍ਪਸ੍ਸਮ੍ਭਤਿ, ਖਣਨਦੁਕ੍ਕਟੇ ਪਤਿਟ੍ਠਾਤਿ. ਅਕਪ੍ਪਿਯਪਥਵਿਂ ਖਣਨ੍ਤੋਪਿ ਹਿ ਇਧ ਸਹਪਯੋਗਤ੍ਤਾ ਦੁਕ੍ਕਟਮੇਵ ਆਪਜ੍ਜਤਿ. ਸਚੇ ਪਨਸ੍ਸ ਸਬ੍ਬਦਿਸਾਸੁ ਖਣਿਤ੍ਵਾ ਕੁਮ੍ਭਿਮੂਲਂ ਪਤ੍ਤਸ੍ਸਾਪਿ ਲਜ੍ਜਿਧਮ੍ਮੋ ਓਕ੍ਕਮਤਿ, ਖਣਨਪਚ੍ਚਯਾ ਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤਿ.
ਬ੍ਯੂਹਤਿ ਵਾਤਿ ਅਥ ਪਨ ਸਉਸ੍ਸਾਹੋਵ ਪਂਸੁਂ ਵਿਯੂਹਤਿ, ਏਕਪਸ੍ਸੇ ਰਾਸਿਂ ਕਰੋਤਿ, ਖਣਨਦੁਕ੍ਕਟਂ ਪਟਿਪ੍ਪਸ੍ਸਮ੍ਭਤਿ, ਵਿਯੂਹਨਦੁਕ੍ਕਟੇ ਪਤਿਟ੍ਠਾਤਿ. ਤਞ੍ਚ ਪਂਸੁਂ ਤਤ੍ਥ ਤਤ੍ਥ ਪੁਞ੍ਜਂ ਕਰੋਨ੍ਤੋ ਪਯੋਗੇ ਪਯੋਗੇ ਦੁਕ੍ਕਟਂ ਆਪਜ੍ਜਤਿ. ਸਚੇ ਪਨ ਰਾਸਿਂ ਕਤ੍ਵਾਪਿ ਧੁਰਨਿਕ੍ਖੇਪਂ ਕਰੋਤਿ, ਲਜ੍ਜਿਧਮ੍ਮਂ ਆਪਜ੍ਜਤਿ, ਵਿਯੂਹਨਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤਿ. ਉਦ੍ਧਰਤਿ ਵਾਤਿ ਅਥ ਪਨ ਸਉਸ੍ਸਾਹੋਵ ਪਂਸੁਂ ਉਦ੍ਧਰਿਤ੍ਵਾ ਬਹਿ ਪਾਤੇਤਿ, ਵਿਯੂਹਨਦੁਕ੍ਕਟਂ ਪਟਿਪ੍ਪਸ੍ਸਮ੍ਭਤਿ, ਉਦ੍ਧਰਣਦੁਕ੍ਕਟੇ ਪਤਿਟ੍ਠਾਤਿ. ਪਂਸੁਂ ਪਨ ਕੁਦਾਲੇਨ ਵਾ ਹਤ੍ਥੇਹਿ ਵਾ ਪਚ੍ਛਿਯਾ ਵਾ ਤਹਿਂ ਤਹਿਂ ਪਾਤੇਨ੍ਤੋ ਪਯੋਗੇ ਪਯੋਗੇ ਦੁਕ੍ਕਟਂ ਆਪਜ੍ਜਤਿ. ਸਚੇ ਪਨ ਸਬ੍ਬਂ ਪਂਸੁਂ ਨੀਹਰਿਤ੍ਵਾ ਕੁਮ੍ਭਿਂ ਥਲਟ੍ਠਂ ਕਤ੍ਵਾਪਿ ਲਜ੍ਜਿਧਮ੍ਮਂ ਆਪਜ੍ਜਤਿ, ਉਦ੍ਧਰਣਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤਿ. ਅਥ ਪਨ ਸਉਸ੍ਸਾਹੋਵ ਕੁਮ੍ਭਿਂ ਆਮਸਤਿ, ਉਦ੍ਧਰਣਦੁਕ੍ਕਟਂ ਪਟਿਪ੍ਪਸ੍ਸਮ੍ਭਤਿ, ਆਮਸਨਦੁਕ੍ਕਟੇ ਪਤਿਟ੍ਠਾਤਿ. ਆਮਸਿਤ੍ਵਾਪਿ ਚ ਲਜ੍ਜਿਧਮ੍ਮਂ ਆਪਜ੍ਜਨ੍ਤੋ ਆਮਸਨਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤਿ. ਅਥ ਸਉਸ੍ਸਾਹੋਵ ਕੁਮ੍ਭਿਂ ਫਨ੍ਦਾਪੇਤਿ, ਆਮਸਨਦੁਕ੍ਕਟਂ ਪਟਿਪ੍ਪਸ੍ਸਮ੍ਭਤਿ, ‘‘ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ ਵੁਤ੍ਤਥੁਲ੍ਲਚ੍ਚਯੇ ਪਤਿਟ੍ਠਾਤਿ.
ਤਤ੍ਰਾਯਂ ਦੁਕ੍ਕਟਥੁਲ੍ਲਚ੍ਚਯਾਨਂ ਦ੍ਵਿਨ੍ਨਮ੍ਪਿ ਵਚਨਤ੍ਥੋ – ਪਠਮਂ ਤਾਵੇਤ੍ਥ ਦੁਟ੍ਠੁ ਕਤਂ ਸਤ੍ਥਾਰਾ ਵੁਤ੍ਤਕਿਚ੍ਚਂ ਵਿਰਾਧੇਤ੍ਵਾ ਕਤਨ੍ਤਿ ਦੁਕ੍ਕਟਂ. ਅਥ ਵਾ ਦੁਟ੍ਠਂ ਕਤਂ, ਵਿਰੂਪਾ ਸਾ ਕਿਰਿਯਾ ਭਿਕ੍ਖੁਕਿਰਿਯਾਨਂ ਮਜ੍ਝੇ ਨ ਸੋਭਤੀਤਿ ਏਵਮ੍ਪਿ ਦੁਕ੍ਕਟਂ. ਵੁਤ੍ਤਞ੍ਚੇਤਂ –
‘‘ਦੁਕ੍ਕਟਂ ਇਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;
ਅਪਰਦ੍ਧਂ ਵਿਰਦ੍ਧਞ੍ਚ, ਖਲਿਤਂ ਯਞ੍ਚ ਦੁਕ੍ਕਟਂ.
‘‘ਯਂ ਮਨੁਸ੍ਸੋ ਕਰੇ ਪਾਪਂ, ਆਵਿ ਵਾ ਯਦਿ ਵਾ ਰਹੋ;
ਦੁਕ੍ਕਟਨ੍ਤਿ ਪਵੇਦੇਨ੍ਤਿ, ਤੇਨੇਤਂ ਇਤਿ ਵੁਚ੍ਚਤੀ’’ਤਿ. (ਪਰਿ. ੩੩੯);
ਇਤਰਂ ਪਨ ਥੂਲਤ੍ਤਾ, ਅਚ੍ਚਯਤ੍ਤਾ ਚ ਥੁਲ੍ਲਚ੍ਚਯਂ. ‘‘ਸਮ੍ਪਰਾਯੇ ਚ ਦੁਗ੍ਗਤਿ’’ (ਸਂ. ਨਿ. ੧.੪੯), ‘‘ਯਂ ਹੋਤਿ ਕਟੁਕਪ੍ਫਲ’’ਨ੍ਤਿਆਦੀਸੁ (ਧ. ਪ. ੬੬; ਨੇਤ੍ਤਿ. ੯੧) ਵਿਯ ਚੇਤ੍ਥ ਸਂਯੋਗਭਾਵੋ ਵੇਦਿਤਬ੍ਬੋ. ਏਕਸ੍ਸ ਸਨ੍ਤਿਕੇ ਦੇਸੇਤਬ੍ਬੇਸੁ ਹਿ ਅਚ੍ਚਯੇਸੁ ਤੇਨ ਸਮੋ ਥੂਲੋ ਅਚ੍ਚਯੋ ਨਤ੍ਥਿ. ਤਸ੍ਮਾ ਵੁਤ੍ਤਂ ‘‘ਥੂਲਤ੍ਤਾ ਅਚ੍ਚਯਤ੍ਤਾ ਚ ਥੁਲ੍ਲਚ੍ਚਯ’’ਨ੍ਤਿ. ਵੁਤ੍ਤਞ੍ਚੇਤਂ –
‘‘ਥੁਲ੍ਲਚ੍ਚਯਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;
ਏਕਸ੍ਸ ਮੂਲੇ ਯੋ ਦੇਸੇਤਿ, ਯੋ ਚ ਤਂ ਪਟਿਗ੍ਗਣ੍ਹਤਿ;
ਅਚ੍ਚਯੋ ਤੇਨ ਸਮੋ ਨਤ੍ਥਿ, ਤੇਨੇਤਂ ਇਤਿ ਵੁਚ੍ਚਤੀ’’ਤਿ. (ਪਰਿ. ੩੩੯);
ਫਨ੍ਦਾਪੇਨ੍ਤਸ੍ਸ ਚ ਪਯੋਗੇ ਪਯੋਗੇ ਥੁਲ੍ਲਚ੍ਚਯਂ. ਫਨ੍ਦਾਪੇਤ੍ਵਾਪਿ ਚ ਲਜ੍ਜਿਧਮ੍ਮਂ ਓਕ੍ਕਨ੍ਤੋ ਥੁਲ੍ਲਚ੍ਚਯਂ ਦੇਸੇਤ੍ਵਾ ਮੁਚ੍ਚਤਿ. ਸਹਪਯੋਗਤੋ ਪਟ੍ਠਾਯੇਵ ਚੇਤ੍ਥ ਪੁਰਿਮਾ ਪੁਰਿਮਾ ਆਪਤ੍ਤਿ ਪਟਿਪ੍ਪਸ੍ਸਮ੍ਭਤਿ. ਸਹਪਯੋਗਂ ਪਨ ਅਕਤ੍ਵਾ ਲਜ੍ਜਿਧਮ੍ਮਂ ਓਕ੍ਕਨ੍ਤੇਨ ਯਾ ਪੁਬ੍ਬਪਯੋਗੇ ਦੁਕ੍ਕਟਪਾਚਿਤ੍ਤਿਯਾ ਆਪਨ੍ਨਾ, ਸਬ੍ਬਾ ਤਾ ਦੇਸੇਤਬ੍ਬਾ. ਸਹਪਯੋਗੇ ਚ ਤਤ੍ਥਜਾਤਕਚ੍ਛੇਦਨੇ ਬਹੁਕਾਨਿਪਿ ਦੁਕ੍ਕਟਾਨਿ ਪਂਸੁਖਣਨਂ ਪਤ੍ਵਾ ਪਟਿਪ੍ਪਸ੍ਸਮ੍ਭਨ੍ਤਿ. ਏਕਂ ਖਣਨਦੁਕ੍ਕਟਮੇਵ ਹੋਤਿ. ਖਣਨੇ ਬਹੁਕਾਨਿਪਿ ਵਿਯੂਹਨਂ, ਵਿਯੂਹਨੇ ਬਹੁਕਾਨਿਪਿ ਉਦ੍ਧਰਣਂ, ਉਦ੍ਧਰਣੇ ਬਹੁਕਾਨਿਪਿ ਆਮਸਨਂ, ਆਮਸਨੇ ਬਹੁਕਾਨਿਪਿ ਫਨ੍ਦਾਪਨਂ ਪਤ੍ਵਾ ਪਟਿਪ੍ਪਸ੍ਸਮ੍ਭਨ੍ਤਿ. ਪਂਸੁਖਣਨਾਦੀਸੁ ਚ ਲਜ੍ਜਿਧਮ੍ਮੇ ਉਪ੍ਪਨ੍ਨੇ ਬਹੁਕਾਪਿ ਆਪਤ੍ਤਿਯੋ ਹੋਨ੍ਤੁ, ਏਕਮੇਵ ਦੇਸੇਤ੍ਵਾ ਮੁਚ੍ਚਤੀਤਿ ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਂ. ਪੁਰਿਮਾਪਤ੍ਤਿਪਟਿਪ੍ਪਸ੍ਸਦ੍ਧਿ ਚ ਨਾਮੇਸਾ ‘‘ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ ਪਟਿਪ੍ਪਸ੍ਸਮ੍ਭਨ੍ਤੀ’’ਤਿ (ਪਾਰਾ. ੪੧੪) ਏਵਂ ਅਨੁਸਾਵਨਾਸੁਤ੍ਤੇਸੁਯੇਵ ਆਗਤਾ. ਇਧ ਪਨ ਦੁਤਿਯਪਾਰਾਜਿਕੇ ਅਟ੍ਠਕਥਾਚਰਿਯਪ੍ਪਮਾਣੇਨ ਗਹੇਤਬ੍ਬਾਤਿ.
ਠਾਨਾਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸਾਤਿ ਯੋ ਪਨ ਫਨ੍ਦਾਪੇਤ੍ਵਾਪਿ ਲਜ੍ਜਿਧਮ੍ਮਂ ਅਨੋਕ੍ਕਮਿਤ੍ਵਾਵ ਤਂ ਕੁਮ੍ਭਿਂ ਠਾਨਤੋ ਅਨ੍ਤਮਸੋ ਕੇਸਗ੍ਗਮਤ੍ਤਮ੍ਪਿ ਚਾਵੇਤਿ, ਪਾਰਾਜਿਕਮੇਵ ਆਪਜ੍ਜਤੀਤਿ ਅਤ੍ਥੋ. ਠਾਨਾ ਚਾਵਨਞ੍ਚੇਤ੍ਥ ਛਹਿ ਆਕਾਰੇਹਿ ਵੇਦਿਤਬ੍ਬਂ. ਕਥਂ? ਕੁਮ੍ਭਿਂ ਮੁਖਵਟ੍ਟਿਯਂ ਗਹੇਤ੍ਵਾ ਅਤ੍ਤਨੋ ਅਭਿਮੁਖਂ ਆਕਡ੍ਢਨ੍ਤੋ ਇਮਿਨਾ ਅਨ੍ਤੇਨ ਫੁਟ੍ਠੋਕਾਸਂ ਕੇਸਗ੍ਗਮਤ੍ਤਮ੍ਪਿ ਪਾਰਿਮਨ੍ਤੇਨ ਅਤਿਕ੍ਕਾਮੇਤਿ, ਪਾਰਾਜਿਕਂ. ਤਥੇਵ ਗਹੇਤ੍ਵਾ ਪਰਤੋ ਪੇਲ੍ਲੇਨ੍ਤੋ ਪਾਰਿਮਨ੍ਤੇਨ ਫੁਟ੍ਠੋਕਾਸਂ ਕੇਸਗ੍ਗਮਤ੍ਤਮ੍ਪਿ ਇਮਿਨਾ ਅਨ੍ਤੇਨ ਅਤਿਕ੍ਕਾਮੇਤਿ, ਪਾਰਾਜਿਕਂ. ਵਾਮਤੋ ਵਾ ਦਕ੍ਖਿਣਤੋ ਵਾ ਅਪਨਾਮੇਨ੍ਤੋ ਵਾਮਨ੍ਤੇਨ ਫੁਟ੍ਠੋਕਾਸਂ ਕੇਸਗ੍ਗਮਤ੍ਤਮ੍ਪਿ ਦਕ੍ਖਿਣਨ੍ਤੇਨ ਅਤਿਕ੍ਕਾਮੇਤਿ, ਪਾਰਾਜਿਕਂ. ਦਕ੍ਖਿਣਨ੍ਤੇਨ ਵਾ ਫੁਟ੍ਠੋਕਾਸਂ ਕੇਸਗ੍ਗਮਤ੍ਤਮ੍ਪਿ ਵਾਮਨ੍ਤੇਨ ਅਤਿਕ੍ਕਾਮੇਤਿ, ਪਾਰਾਜਿਕਂ. ਉਦ੍ਧਂ ਉਕ੍ਖਿਪਨ੍ਤੋ ਕੇਸਗ੍ਗਮਤ੍ਤਮ੍ਪਿ ਭੂਮਿਤੋ ਮੋਚੇਤਿ, ਪਾਰਾਜਿਕਂ. ਖਣਿਤ੍ਵਾ ਹੇਟ੍ਠਤੋ ਓਸੀਦੇਨ੍ਤੋ ਬੁਨ੍ਦੇਨ ਫੁਟ੍ਠੋਕਾਸਂ ਕੇਸਗ੍ਗਮਤ੍ਤਮ੍ਪਿ ਮੁਖਵਟ੍ਟਿਯਾ ਅਤਿਕ੍ਕਾਮੇਤਿ, ਪਾਰਾਜਿਕਨ੍ਤਿ ਏਵਂ ਏਕਟ੍ਠਾਨੇ ਠਿਤਾਯ ਕੁਮ੍ਭਿਯਾ. ਯਦਿ ਪਨ ਕੁਮ੍ਭਿਮੁਖਵਟ੍ਟਿਯਾ ਪਾਸਂ ਕਤ੍ਵਾ ਲੋਹਖਾਣੁਂ ਵਾ ਖਦਿਰਸਾਰਾਦਿਖਾਣੁਂ ਵਾ ਪਥਵਿਯਂ ਆਕੋਟੇਤ੍ਵਾ ਤਤ੍ਥ ਸਙ੍ਖਲਿਕਾਯ ਬਨ੍ਧਿਤ੍ਵਾ ਠਪੇਨ੍ਤਿ, ਏਕਿਸ੍ਸਾ ਦਿਸਾਯ ਏਕਾਯ ਸਙ੍ਖਲਿਕਾਯ ਬਦ੍ਧਾਯ ਦ੍ਵੇ ਠਾਨਾਨਿ ਲਬ੍ਭਨ੍ਤਿ, ਦ੍ਵੀਸੁ ਤੀਸੁ ਚਤੂਸੁ ਦਿਸਾਸੁ ਚਤੂਹਿ ਸਙ੍ਖਲਿਕਾਹਿ ਬਦ੍ਧਾਯ ਪਞ੍ਚ ਠਾਨਾਨਿ ਲਬ੍ਭਨ੍ਤਿ.
ਤਤ੍ਥ ਏਕਖਾਣੁਕੇ ਬਦ੍ਧਕੁਮ੍ਭਿਯਾ ਪਠਮਂ ਖਾਣੁਕਂ ਵਾ ਉਦ੍ਧਰਤਿ, ਸਙ੍ਖਲਿਕਂ ਵਾ ਛਿਨ੍ਦਤਿ, ਥੁਲ੍ਲਚ੍ਚਯਂ. ਤਤੋ ਕੁਮ੍ਭਿਂ ਯਥਾਵੁਤ੍ਤਨਯੇਨ ਕੇਸਗ੍ਗਮਤ੍ਤਮ੍ਪਿ ਠਾਨਾ ਚਾਵੇਤਿ, ਪਾਰਾਜਿਕਂ. ਅਥ ਪਠਮਂ ਕੁਮ੍ਭਿਂ ਉਦ੍ਧਰਤਿ, ਥੁਲ੍ਲਚ੍ਚਯਂ. ਤਤੋ ਖਾਣੁਕਂ ਕੇਸਗ੍ਗਮਤ੍ਤਮ੍ਪਿ ਠਾਨਾ ਚਾਵੇਤਿ, ਸਙ੍ਖਲਿਕਂ ਵਾ ਛਿਨ੍ਦਤਿ, ਪਾਰਾਜਿਕਂ. ਏਤੇਨ ਉਪਾਯੇਨ ਦ੍ਵੀਸੁ ਤੀਸੁ ਚਤੂਸੁ ਖਾਣੁਕੇਸੁ ਬਦ੍ਧਕੁਮ੍ਭਿਯਾਪਿ ਪਚ੍ਛਿਮੇ ਠਾਨਾਚਾਵਨੇ ਪਾਰਾਜਿਕਂ. ਸੇਸੇਸੁ ਥੁਲ੍ਲਚ੍ਚਯਂ ਵੇਦਿਤਬ੍ਬਂ.
ਸਚੇ ਖਾਣੁ ਨਤ੍ਥਿ, ਸਙ੍ਖਲਿਕਾਯ ਅਗ੍ਗੇ ਵਲਯਂ ਕਤ੍ਵਾ ਤਤ੍ਥਜਾਤਕੇ ਮੂਲੇ ਪਵੇਸਿਤਂ ਹੋਤਿ, ਪਠਮਂ ਕੁਮ੍ਭਿਂ ਉਦ੍ਧਰਿਤ੍ਵਾ ਪਚ੍ਛਾ ਮੂਲਂ ਛੇਤ੍ਵਾ ਵਲਯਂ ਨੀਹਰਤਿ, ਪਾਰਾਜਿਕਂ. ਅਥ ਮੂਲਂ ਅਚ੍ਛੇਤ੍ਵਾ ਵਲਯਂ ਇਤੋ ਚਿਤੋ ਚ ਸਾਰੇਤਿ, ਰਕ੍ਖਤਿ. ਸਚੇ ਪਨ ਮੂਲਤੋ ਅਨੀਹਰਿਤ੍ਵਾਪਿ ਹਤ੍ਥੇਨ ਗਹੇਤ੍ਵਾ ਆਕਾਸਗਤਂ ਕਰੋਤਿ, ਪਾਰਾਜਿਕਂ. ਅਯਮੇਤ੍ਥ ਵਿਸੇਸੋ. ਸੇਸਂ ਵੁਤ੍ਤਨਯਮੇਵ.
ਕੇਚਿ ਪਨ ਨਿਮਿਤ੍ਤਤ੍ਥਾਯ ਕੁਮ੍ਭਿਮਤ੍ਥਕੇ ਨਿਗ੍ਰੋਧਰੁਕ੍ਖਾਦੀਨਿ ਰੋਪੇਨ੍ਤਿ, ਮੂਲਾਨਿ ਕੁਮ੍ਭਿਂ ਵਿਨਨ੍ਧਿਤ੍ਵਾ ਠਿਤਾਨਿ ਹੋਨ੍ਤਿ, ‘‘ਮੂਲਾਨਿ ਛਿਨ੍ਦਿਤ੍ਵਾ ਕੁਮ੍ਭਿਂ ਗਹੇਸ੍ਸਾਮੀ’’ਤਿ ਛਿਨ੍ਦਨ੍ਤਸ੍ਸ ਪਯੋਗੇ ਪਯੋਗੇ ਦੁਕ੍ਕਟਂ. ਛਿਨ੍ਦਿਤ੍ਵਾ ਓਕਾਸਂ ਕਤ੍ਵਾ ਕੁਮ੍ਭਿਂ ਕੇਸਗ੍ਗਮਤ੍ਤਮ੍ਪਿ ਠਾਨਾ ਚਾਵੇਤਿ, ਪਾਰਾਜਿਕਂ. ਮੂਲਾਨਿ ਛਿਨ੍ਦਤੋਵ ਲੁਠਿਤ੍ਵਾ ਕੁਮ੍ਭੀ ਨਿਨ੍ਨਟ੍ਠਾਨਂ ਗਤਾ, ਰਕ੍ਖਤਿ ਤਾਵ. ਗਤਟ੍ਠਾਨਤੋ ਉਦ੍ਧਰਤਿ, ਪਾਰਾਜਿਕਂ. ਸਚੇ ਛਿਨ੍ਨੇਸੁ ਮੂਲੇਸੁ ਏਕਮੂਲਮਤ੍ਤੇਨ ਕੁਮ੍ਭੀ ਤਿਟ੍ਠਤਿ, ਸੋ ਚ ਤਂ ‘‘ਇਮਸ੍ਮਿਂ ਮੂਲੇ ਛਿਨ੍ਨੇ ਪਤਿਸ੍ਸਤੀ’’ਤਿ ਛਿਨ੍ਦਤਿ, ਛਿਨ੍ਨਮਤ੍ਤੇ ਪਾਰਾਜਿਕਂ. ਸਚੇ ਪਨ ਏਕਮੂਲੇਨੇਵ ਪਾਸੇ ਬਦ੍ਧਸੂਕਰੋ ਵਿਯ ਠਿਤਾ ਹੋਤਿ, ਅਞ੍ਞਂ ਕਿਞ੍ਚਿ ਲਗ੍ਗਨਕਂ ਨਤ੍ਥਿ, ਤਸ੍ਮਿਮ੍ਪਿ ਮੂਲੇ ਛਿਨ੍ਨਮਤ੍ਤੇ ਪਾਰਾਜਿਕਂ. ਸਚੇ ਕੁਮ੍ਭਿਮਤ੍ਥਕੇ ਮਹਾਪਾਸਾਣੋ ਠਪਿਤੋ ਹੋਤਿ, ਤਂ ਦਣ੍ਡੇਨ ਉਕ੍ਖਿਪਿਤ੍ਵਾ ਅਪਨੇਤੁਕਾਮੋ ਕੁਮ੍ਭਿਮਤ੍ਥਕੇ ਜਾਤਰੁਕ੍ਖਂ ਛਿਨ੍ਦਤਿ, ਦੁਕ੍ਕਟਂ. ਤਸ੍ਸਾ ਸਮੀਪੇ ਜਾਤਕਂ ਛੇਤ੍ਵਾ ਆਹਰਤਿ, ਅਤਤ੍ਥਜਾਤਕਤ੍ਤਾ ਤਂ ਛਿਨ੍ਦਤੋ ਪਾਚਿਤ੍ਤਿਯਂ.
ਅਤ੍ਤਨੋ ਭਾਜਨਨ੍ਤਿ ਸਚੇ ਪਨ ਕੁਮ੍ਭਿਂ ਉਦ੍ਧਰਿਤੁਂ ਅਸਕ੍ਕੋਨ੍ਤੋ ਕੁਮ੍ਭਿਗਤਭਣ੍ਡਗ੍ਗਹਣਤ੍ਥਂ ਅਤ੍ਤਨੋ ਭਾਜਨਂ ਪਵੇਸੇਤ੍ਵਾ ਅਨ੍ਤੋਕੁਮ੍ਭਿਯਂ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਰਿਚ੍ਛੇਦੋ ਚੇਤ੍ਥ ਪਾਰਾਜਿਕਨਿਯਮਨਤ੍ਥਂ ਵੁਤ੍ਤੋ. ਥੇਯ੍ਯਚਿਤ੍ਤੇਨ ਪਨ ਊਨਪਞ੍ਚਮਾਸਕਮ੍ਪਿ ਆਮਸਨ੍ਤੋ ਦੁਕ੍ਕਟਂ ਆਪਜ੍ਜਤਿਯੇਵ.
ਫਨ੍ਦਾਪੇਤੀਤਿ ਏਤ੍ਥ ਯਾਵ ਏਕਾਬਦ੍ਧਂ ਕਤ੍ਵਾ ਅਤ੍ਤਨੋ ਭਾਜਨਂ ਪਵੇਸੇਤਿ, ਤਾਵ ਫਨ੍ਦਾਪੇਤੀਤਿ ਵੁਚ੍ਚਤਿ. ਅਪਿ ਚ ਇਤੋ ਚਿਤੋ ਚ ਅਪਬ੍ਯੂਹਨ੍ਤੋਪਿ ਫਨ੍ਦਾਪੇਤਿਯੇਵ, ਸੋ ਥੁਲ੍ਲਚ੍ਚਯਂ ਆਪਜ੍ਜਤਿ. ਯਦਾ ਪਨ ਏਕਾਬਦ੍ਧਭਾਵੋ ਛਿਨ੍ਨੋ, ਕੁਮ੍ਭਿਗਤਂ ਕੁਮ੍ਭਿਯਮੇਵ, ਭਾਜਨਗਤਮ੍ਪਿ ਭਾਜਨੇਯੇਵ ਹੋਤਿ, ਤਦਾ ਅਤ੍ਤਨੋ ਭਾਜਨਗਤਂ ਨਾਮ ਹੋਤਿ. ਏਵਂ ਕਤ੍ਵਾ ਕੁਮ੍ਭਿਤੋ ਅਨੀਹਤੇਪਿ ਚ ਭਾਜਨੇ ਪਾਰਾਜਿਕਂ ਆਪਜ੍ਜਤਿ.
ਮੁਟ੍ਠਿਂ ਵਾ ਛਿਨ੍ਦਤੀਤਿ ਏਤ੍ਥ ਯਥਾ ਅਙ੍ਗੁਲਨ੍ਤਰੇਹਿ ਨਿਕ੍ਖਨ੍ਤਕਹਾਪਣਾ ਕੁਮ੍ਭਿਗਤੇ ਕਹਾਪਣੇ ਨ ਸਮ੍ਫੁਸਨ੍ਤਿ, ਏਵਂ ਮੁਟ੍ਠਿਂ ਕਰੋਨ੍ਤੋ ਮੁਟ੍ਠਿਂ ਛਿਨ੍ਦਤਿ ਨਾਮ; ਸੋਪਿ ਪਾਰਾਜਿਕਂ ਆਪਜ੍ਜਤਿ.
ਸੁਤ੍ਤਾਰੂਲ਼੍ਹਨ੍ਤਿ ਸੁਤ੍ਤੇ ਆਰੂਲ਼੍ਹਂ; ਸੁਤ੍ਤੇਨ ਆਵੁਤਸ੍ਸਾਪਿ ਸੁਤ੍ਤਮਯਸ੍ਸਾਪਿ ਏਤਂ ਅਧਿਵਚਨਂ. ਪਾਮਙ੍ਗਾਦੀਨਿਹਿ ਸੋਵਣ੍ਣਮਯਾਨਿਪਿ ਹੋਨ੍ਤਿ ਰੂਪਿਯਮਯਾਨਿਪਿ ਸੁਤ੍ਤਮਯਾਨਿਪਿ, ਮੁਤ੍ਤਾਵਲਿਆਦਯੋਪਿ ਏਤ੍ਥੇਵ ਸਙ੍ਗਹਂ ਗਤਾ. ਵੇਠਨਨ੍ਤਿ ਸੀਸਵੇਠਨਪਟੋ ਵੁਚ੍ਚਤਿ. ਏਤੇਸੁ ਯਂਕਿਞ੍ਚਿ ਥੇਯ੍ਯਚਿਤ੍ਤੋ ਆਮਸਤਿ, ਦੁਕ੍ਕਟਂ. ਫਨ੍ਦਾਪੇਤਿ, ਥੁਲ੍ਲਚ੍ਚਯਂ. ਪਾਮਙ੍ਗਾਦੀਨਿ ਕੋਟਿਯਂ ਗਹੇਤ੍ਵਾ ਆਕਾਸਟ੍ਠਂ ਅਕਰੋਨ੍ਤੋ ਉਚ੍ਚਾਰੇਤਿ, ਥੁਲ੍ਲਚ੍ਚਯਂ.
ਘਂਸਨ੍ਤੋ ਨੀਹਰਤੀਤਿ ਏਤ੍ਥ ਪਨ ਪਰਿਪੁਣ੍ਣਾਯ ਕੁਮ੍ਭਿਯਾ ਉਪਰਿ ਸਮਤਿਤ੍ਤਿਕਂ ਕੁਮ੍ਭਿਂ ਕਤ੍ਵਾ ਠਪਿਤਂ ਵਾ ਏਕਂ ਕੋਟਿਂ ਬੁਨ੍ਦੇ ਏਕਂ ਕੋਟਿਂ ਮੁਖਵਟ੍ਟਿਯਂ ਕਤ੍ਵਾ ਠਪਿਤਂ ਵਾ ਘਂਸਨ੍ਤਸ੍ਸ ਨੀਹਰਤੋ ਥੁਲ੍ਲਚ੍ਚਯਂ. ਕੁਮ੍ਭਿਮੁਖਾ ਮੋਚੇਨ੍ਤਸ੍ਸ ਪਾਰਾਜਿਕਂ. ਯਂ ਪਨ ਉਪਡ੍ਢਕੁਮ੍ਭਿਯਂ ਵਾ ਰਿਤ੍ਤਕੁਮ੍ਭਿਯਂ ਵਾ ਠਪਿਤਂ, ਤਸ੍ਸ ਅਤ੍ਤਨੋ ਫੁਟ੍ਠੋਕਾਸੋਵ ਠਾਨਂ, ਨ ਸਕਲਾ ਕੁਮ੍ਭੀ, ਤਸ੍ਮਾ ਤਂ ਘਂਸਨ੍ਤਸ੍ਸਾਪਿ ਨੀਹਰਤੋ ਪਤਿਟ੍ਠਿਤੋਕਾਸਤੋ ਕੇਸਗ੍ਗਮਤ੍ਤੇ ਮੁਤ੍ਤੇ ਪਾਰਾਜਿਕਮੇਵ. ਕੁਮ੍ਭਿਯਾ ਪਨ ਪਰਿਪੁਣ੍ਣਾਯ ਵਾ ਊਨਾਯ ਵਾ ਉਜੁਕਮੇਵ ਉਦ੍ਧਰਨ੍ਤਸ੍ਸ ਹੇਟ੍ਠਿਮਕੋਟਿਯਾ ਪਤਿਟ੍ਠਿਤੋਕਾਸਾ ਮੁਤ੍ਤਮਤ੍ਤੇਵ ਪਾਰਾਜਿਕਂ. ਅਨ੍ਤੋਕੁਮ੍ਭਿਯਂ ਠਪਿਤਂ ਯਂਕਿਞ੍ਚਿ ਪਾਰਾਜਿਕਪ੍ਪਹੋਨਕਂ ਭਣ੍ਡਂ ਸਕਲਕੁਮ੍ਭਿਯਂ ਚਾਰੇਨ੍ਤਸ੍ਸ, ਪਾਮਙ੍ਗਾਦਿਞ੍ਚ ਘਂਸਿਤ੍ਵਾ ਨੀਹਰਨ੍ਤਸ੍ਸ ਯਾਵ ਮੁਖਵਟ੍ਟਿਂ ਨਾਤਿਕ੍ਕਮਤਿ, ਤਾਵ ਥੁਲ੍ਲਚ੍ਚਯਮੇਵ. ਤਸ੍ਸ ਹਿ ਸਬ੍ਬਾਪਿ ਕੁਮ੍ਭੀ ਠਾਨਨ੍ਤਿ ਸਙ੍ਖੇਪਮਹਾਪਚ੍ਚਰਿਯਾਦੀਸੁ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਠਪਿਤਟ੍ਠਾਨਮੇਵ ਠਾਨਂ, ਨ ਸਕਲਾ ਕੁਮ੍ਭੀ. ਤਸ੍ਮਾ ਯਥਾਠਿਤਟ੍ਠਾਨਤੋ ਕੇਸਗ੍ਗਮਤ੍ਤਮ੍ਪਿ ਮੋਚੇਨ੍ਤਸ੍ਸ ਪਾਰਾਜਿਕਮੇਵਾ’’ਤਿ ਵੁਤ੍ਤਂ, ਤਂ ਪਮਾਣਂ. ਇਤਰਂ ਪਨ ਆਕਾਸਗਤਂ ਅਕਰੋਨ੍ਤਸ੍ਸ ਚੀਵਰਵਂਸੇ ਠਪਿਤਚੀਵਰਵੇਠਨਕਨਯੇਨ ਵੁਤ੍ਤਂ, ਤਂ ਨ ਗਹੇਤਬ੍ਬਂ. ਵਿਨਯਵਿਨਿਚ੍ਛਯੇ ਹਿ ਆਗਤੇ ਗਰੁਕੇ ਠਾਤਬ੍ਬਂ, ਏਸਾ ਵਿਨਯਧਮ੍ਮਤਾ. ਅਪਿਚ ‘‘ਅਤ੍ਤਨੋ ਭਾਜਨਗਤਂ ਵਾ ਕਰੋਤਿ, ਮੁਟ੍ਠਿਂ ਵਾ ਛਿਨ੍ਦਤੀ’’ਤਿ ਵਚਨਤੋ ਪੇਤਂ ਵੇਦਿਤਬ੍ਬਂ. ਯਥਾ ਅਨ੍ਤੋਕੁਮ੍ਭਿਯਂ ਠਿਤਸ੍ਸ ਨ ਸਬ੍ਬਾ ਕੁਮ੍ਭੀ ਠਾਨਨ੍ਤਿ.
ਸਪ੍ਪਿਆਦੀਸੁ ਯਂਕਿਞ੍ਚਿ ਪਿਵਤੋ ਏਕਪਯੋਗੇਨ ਪੀਤਮਤ੍ਤੇ ਪਾਰਾਜਿਕਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਮਹਾਪਚ੍ਚਰਿਯਾਦੀਸੁ ਪਨ ਅਯਂ ਵਿਭਾਗੋ ਦਸ੍ਸਿਤੋ – ‘‘ਮੁਖਂ ਅਨਪਨੇਤ੍ਵਾ ਆਕਡ੍ਢਨ੍ਤਸ੍ਸ ਪਿਵਤੋ ਸਚੇ ਪਰਗਲਗਤਂ ਪਾਦਂ ਨ ਅਗ੍ਘਤਿ, ਮੁਖਗਤੇਨ ਸਦ੍ਧਿਂ ਅਗ੍ਘਤਿ, ਰਕ੍ਖਤਿ ਤਾਵ. ਕਣ੍ਠੇਨ ਪਨ ਪਰਿਚ੍ਛਿਨ੍ਨਕਾਲੇਯੇਵ ਪਾਰਾਜਿਕਂ ਹੋਤਿ. ਸਚੇਪਿ ਓਟ੍ਠੇਹਿ ਪਰਿਚ੍ਛਿਨ੍ਦਨ੍ਤੋ ਓਟ੍ਠੇ ਪਿਦਹਤਿ, ਪਾਰਾਜਿਕਮੇਵ. ਉਪ੍ਪਲਦਣ੍ਡਵੇਲ਼ੁਨਾਲ਼ਿਨਲ਼ਨਾਲ਼ਿਆਦੀਹਿ ਪਿਵਨ੍ਤਸ੍ਸਾਪਿ ਸਚੇ ਪਰਗਲਗਤਮੇਵ ਪਾਦਂ ਅਗ੍ਘਤਿ, ਪਾਰਾਜਿਕਂ. ਸਚੇ ਸਹ ਮੁਖਗਤੇਨ ਅਗ੍ਘਤਿ, ਨ ਤਾਵ ਪਾਰਾਜਿਕਂ ਹੋਤਿ. ਉਪ੍ਪਲਦਣ੍ਡਾਦਿਗਤੇਨ ਸਦ੍ਧਿਂ ਏਕਾਬਦ੍ਧਭਾਵਂ ਕੋਪੇਤ੍ਵਾ ਓਟ੍ਠੇਹਿ ਪਰਿਚ੍ਛਿਨ੍ਨਮਤ੍ਤੇ ਪਾਰਾਜਿਕਂ. ਸਚੇ ਉਪ੍ਪਲਦਣ੍ਡਾਦਿਗਤੇਨ ਸਦ੍ਧਿਂ ਅਗ੍ਘਤਿ, ਉਪ੍ਪਲਦਣ੍ਡਾਦੀਨਂ ਬੁਨ੍ਦੇ ਅਙ੍ਗੁਲਿਯਾਪਿ ਪਿਹਿਤਮਤ੍ਤੇ ਪਾਰਾਜਿਕਂ. ਪਾਦਗ੍ਘਨਕੇ ਪਰਗਲਂ ਅਪ੍ਪਵਿਟ੍ਠੇ ਉਪ੍ਪਲਦਣ੍ਡਾਦੀਸੁ ਚ ਮੁਖੇ ਚ ਅਤਿਰੇਕਪਾਦਾਰਹਮ੍ਪਿ ਏਕਾਬਦ੍ਧਂ ਹੁਤ੍ਵਾ ਤਿਟ੍ਠਤਿ, ਰਕ੍ਖਤਿਯੇਵਾ’’ਤਿ. ਤਂ ਸਬ੍ਬਮ੍ਪਿ ਯਸ੍ਮਾ ‘‘ਅਤ੍ਤਨੋ ਭਾਜਨਗਤਂ ਵਾ ਕਰੋਤਿ, ਮੁਟ੍ਠਿਂ ਵਾ ਛਿਨ੍ਦਤੀ’’ਤਿ ਇਮਂ ਨਯਂ ਭਜਤਿ, ਤਸ੍ਮਾ ਸੁਦਸ੍ਸਿਤਮੇਵ. ਏਸ ਤਾਵ ਏਕਾਬਦ੍ਧੇ ਨਯੋ.
ਸਚੇ ਪਨ ਹਤ੍ਥੇਨ ਵਾ ਪਤ੍ਤੇਨ ਵਾ ਥਾਲਕਾਦਿਨਾ ਵਾ ਕੇਨਚਿ ਭਾਜਨੇਨ ਗਹੇਤ੍ਵਾ ਪਿਵਤਿ, ਯਮ੍ਹਿ ਪਯੋਗੇ ਪਾਦਗ੍ਘਨਕਂ ਪੂਰੇਤਿ, ਤਮ੍ਹਿ ਗਤੇ ਪਾਰਾਜਿਕਂ. ਅਥ ਮਹਗ੍ਘਂ ਹੋਤਿ, ਸਿਪ੍ਪਿਕਾਯਪਿ ਏਕਪਯੋਗੇਨੇਵ ਪਾਦਗ੍ਘਨਕਂ ਗਹੇਤੁਂ ਸਕ੍ਕਾ ਹੋਤਿ, ਏਕੁਦ੍ਧਾਰੇਯੇਵ ਪਾਰਾਜਿਕਂ. ਭਾਜਨਂ ਪਨ ਨਿਮੁਜ੍ਜਾਪੇਤ੍ਵਾ ਗਣ੍ਹਨ੍ਤਸ੍ਸ ਯਾਵ ਏਕਾਬਦ੍ਧਂ ਹੋਤਿ, ਤਾਵ ਰਕ੍ਖਤਿ. ਮੁਖਵਟ੍ਟਿਪਰਿਚ੍ਛੇਦੇਨ ਵਾ ਉਦ੍ਧਾਰੇਨ ਵਾ ਪਾਰਾਜਿਕਂ. ਯਦਾ ਪਨ ਸਪ੍ਪਿਂ ਵਾ ਤੇਲਂ ਵਾ ਅਚ੍ਛਂ ਤੇਲਸਦਿਸਮੇਵ ਮਧੁਫਾਣਿਤਂ ਵਾ ਕੁਮ੍ਭਿਂ ਆਵਿਞ੍ਛੇਤ੍ਵਾ ਅਤ੍ਤਨੋ ਭਾਜਨੇ ਪਵੇਸੇਤਿ, ਤਦਾ ਤੇਸਂ ਅਚ੍ਛਤਾਯ ਏਕਾਬਦ੍ਧਤਾ ਨਤ੍ਥੀਤਿ ਪਾਦਗ੍ਘਨਕੇ ਮੁਖਵਟ੍ਟਿਤੋ ਗਲ਼ਿਤਮਤ੍ਤੇ ਪਾਰਾਜਿਕਂ.
ਪਚਿਤ੍ਵਾ ਠਪਿਤਂ ਪਨ ਮਧੁਫਾਣਿਤਂ ਸਿਲੇਸੋ ਵਿਯ ਚਿਕ੍ਕਨਂ ਆਕਡ੍ਢਨਵਿਕਡ੍ਢਨਯੋਗ੍ਗਂ ਹੋਤਿ, ਉਪ੍ਪਨ੍ਨੇ ਕੁਕ੍ਕੁਚ੍ਚੇ ਏਕਾਬਦ੍ਧਮੇਵ ਹੁਤ੍ਵਾ ਪਟਿਨੀਹਰਿਤੁਂ ਸਕ੍ਕੋਤਿ, ਏਤਂ ਮੁਖਵਟ੍ਟਿਯਾ ਨਿਕ੍ਖਮਿਤ੍ਵਾ ਭਾਜਨੇ ਪਵਿਟ੍ਠਮ੍ਪਿ ਬਾਹਿਰੇਨ ਸਦ੍ਧਿਂ ਏਕਾਬਦ੍ਧਤ੍ਤਾ ਰਕ੍ਖਤਿ, ਮੁਖਵਟ੍ਟਿਤੋ ਛਿਨ੍ਨਮਤ੍ਤੇ ਪਨ ਪਾਰਾਜਿਕਂ. ਯੋਪਿ ਥੇਯ੍ਯਚਿਤ੍ਤੇਨ ਪਰਸ੍ਸ ਕੁਮ੍ਭਿਯਾ ਪਾਦਗ੍ਘਨਕਂ ਸਪ੍ਪਿਂ ਵਾ ਤੇਲਂ ਵਾ ਅਵਸ੍ਸਪਿਵਨਕਂ ਯਂਕਿਞ੍ਚਿ ਦੁਕੂਲਸਾਟਕਂ ਵਾ ਚਮ੍ਮਖਣ੍ਡਾਦੀਨਂ ਵਾ ਅਞ੍ਞਤਰਂ ਪਕ੍ਖਿਪਤਿ, ਹਤ੍ਥਤੋ ਮੁਤ੍ਤਮਤ੍ਤੇ ਪਾਰਾਜਿਕਂ.
ਰਿਤ੍ਤਕੁਮ੍ਭਿਯਾ ‘‘ਇਦਾਨਿ ਤੇਲਂ ਆਕਿਰਿਸ੍ਸਨ੍ਤੀ’’ਤਿ ਞਤ੍ਵਾ ਯਂਕਿਞ੍ਚਿ ਭਣ੍ਡਂ ਥੇਯ੍ਯਚਿਤ੍ਤੋ ਪਕ੍ਖਿਪਤਿ, ਤਂ ਚੇ ਤਤ੍ਥ ਤੇਲੇ ਆਕਿਣ੍ਣੇ ਪਞ੍ਚਮਾਸਕਅਗ੍ਘਨਕਂ ਪਿਵਤਿ, ਪੀਤਮਤ੍ਤੇ ਪਾਰਾਜਿਕਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਤਂ ਪਨ ਤਤ੍ਥੇਵ ਸੁਕ੍ਖਤਲ਼ਾਕੇ ਸੁਕ੍ਖਮਾਤਿਕਾਯ ਉਜੁਕਰਣਵਿਨਿਚ੍ਛਯੇਨ ਵਿਰੁਜ੍ਝਤਿ, ਅਵਹਾਰਲਕ੍ਖਣਞ੍ਚੇਤ੍ਥ ਨ ਪਞ੍ਞਾਯਤਿ, ਤਸ੍ਮਾ ਨ ਗਹੇਤਬ੍ਬਂ. ਮਹਾਪਚ੍ਚਰਿਯਾਦੀਸੁ ਪਨ ਤਸ੍ਸ ਉਦ੍ਧਾਰੇ ਪਾਰਾਜਿਕਂ ਵੁਤ੍ਤਂ, ਤਂ ਯੁਤ੍ਤਂ.
ਪਰਸ੍ਸ ਰਿਤ੍ਤਕੁਮ੍ਭਿਯਾ ਸਙ੍ਗੋਪਨਤ੍ਥਾਯ ਭਣ੍ਡਂ ਠਪੇਤ੍ਵਾ ਤਤ੍ਥ ਤੇਲੇ ਆਕਿਣ੍ਣੇ ‘‘ਸਚੇ ਅਯਂ ਜਾਨਿਸ੍ਸਤਿ, ਮਂ ਪਲਿਬੁਜ੍ਝਿਸ੍ਸਤੀ’’ਤਿ ਭੀਤੋ ਪਾਦਗ੍ਘਨਕਂ ਤੇਲਂ ਪੀਤਂ ਭਣ੍ਡਂ ਥੇਯ੍ਯਚਿਤ੍ਤੇਨ ਉਦ੍ਧਰਤਿ, ਪਾਰਾਜਿਕਂ. ਸੁਦ੍ਧਚਿਤ੍ਤੇਨ ਉਦ੍ਧਰਤਿ, ਪਰੇ ਆਹਰਾਪੇਨ੍ਤੇ ਭਣ੍ਡਦੇਯ੍ਯਂ. ਭਣ੍ਡਦੇਯ੍ਯਂ ਨਾਮ ਯਂ ਪਰਸ੍ਸ ਨਟ੍ਠਂ, ਤਸ੍ਸ ਮੂਲਂ ਵਾ ਤਦੇਵ ਵਾ ਭਣ੍ਡਂ ਦਾਤਬ੍ਬਨ੍ਤਿ ਅਤ੍ਥੋ. ਨੋ ਚੇ ਦੇਤਿ, ਸਾਮਿਕਸ੍ਸ ਧੁਰਨਿਕ੍ਖੇਪੇ ਪਾਰਾਜਿਕਂ. ਸਚੇ ਪਰਸ੍ਸ ਕੁਮ੍ਭਿਯਾ ਅਞ੍ਞੋ ਸਪ੍ਪਿਂ ਵਾ ਤੇਲਂ ਵਾ ਆਕਿਰਤਿ, ਤਤ੍ਰ ਚਾਯਂ ਥੇਯ੍ਯਚਿਤ੍ਤੇਨ ਤੇਲਪਿਵਨਕਂ ਭਣ੍ਡਂ ਪਕ੍ਖਿਪਤਿ, ਵੁਤ੍ਤਨਯੇਨੇਵ ਪਾਰਾਜਿਕਂ. ਅਤ੍ਤਨੋ ਰਿਤ੍ਤਕੁਮ੍ਭਿਯਾ ਪਰਸ੍ਸ ਸਪ੍ਪਿਂ ਵਾ ਤੇਲਂ ਵਾ ਆਕਿਰਣਭਾਵਂ ਞਤ੍ਵਾ ਥੇਯ੍ਯਚਿਤ੍ਤੇਨ ਭਣ੍ਡਂ ਨਿਕ੍ਖਿਪਤਿ, ਪੁਬ੍ਬੇ ਵੁਤ੍ਤਨਯੇਨੇਵ ਉਦ੍ਧਾਰੇ ਪਾਰਾਜਿਕਂ. ਸੁਦ੍ਧਚਿਤ੍ਤੋ ਨਿਕ੍ਖਿਪਿਤ੍ਵਾ ਪਚ੍ਛਾ ਥੇਯ੍ਯਚਿਤ੍ਤੇਨ ਉਦ੍ਧਰਤਿ, ਪਾਰਾਜਿਕਮੇਵ. ਸੁਦ੍ਧਚਿਤ੍ਤੋਵ ਉਦ੍ਧਰਤਿ, ਨੇਵ ਅਵਹਾਰੋ, ਨ ਗੀਵਾ; ਮਹਾਪਚ੍ਚਰਿਯਂ ਪਨ ਅਨਾਪਤ੍ਤਿਮਤ੍ਤਮੇਵ ਵੁਤ੍ਤਂ. ‘‘‘ਕਿਸ੍ਸ ਮਮ ਕੁਮ੍ਭਿਯਂ ਤੇਲਂ ਆਕਿਰਸੀ’ਤਿ ਕੁਪਿਤੋ ਅਤ੍ਤਨੋ ਭਣ੍ਡਂ ਉਦ੍ਧਰਿਤ੍ਵਾ ਛਡ੍ਡੇਤਿ, ਨੋ ਭਣ੍ਡਦੇਯ੍ਯ’’ਨ੍ਤਿ ਕੁਰੁਨ੍ਦਿਯਂ ਵੁਤ੍ਤਂ. ਥੇਯ੍ਯਚਿਤ੍ਤੇਨ ਮੁਖਵਟ੍ਟਿਯਂ ਗਹੇਤ੍ਵਾ ਕੁਮ੍ਭਿਂ ਆਵਿਞ੍ਛਤਿ ਤੇਲਂ ਗਲ਼ੇਤੁਕਾਮੋ, ਪਾਦਗ੍ਘਨਕੇ ਗਲ਼ਿਤੇ ਪਾਰਾਜਿਕਂ. ਥੇਯ੍ਯਚਿਤ੍ਤੇਨੇਵ ਜਜ੍ਜਰਂ ਕਰੋਤਿ ‘‘ਸਵਿਤ੍ਵਾ ਗਮਿਸ੍ਸਤੀ’’ਤਿ ਪਾਦਗ੍ਘਨਕੇ ਸਵਿਤ੍ਵਾ ਗਤੇ ਪਾਰਾਜਿਕਂ. ਥੇਯ੍ਯਚਿਤ੍ਤੇਨੇਵ ਛਿਦ੍ਦਂ ਕਰੋਤਿ ਓਮਟ੍ਠਂ ਵਾ ਉਮ੍ਮਟ੍ਠਂ ਵਾ ਵੇਮਟ੍ਠਂ ਵਾ, ਇਦਂ ਪਨ ਸਮ੍ਮੋਹਟ੍ਠਾਨਂ; ਤਸ੍ਮਾ ਸੁਟ੍ਠੁ ਸਲ੍ਲੇਕ੍ਖੇਤਬ੍ਬਂ. ਅਯਞ੍ਹੇਤ੍ਥ ਵਿਨਿਚ੍ਛਯੋ – ਓਮਟ੍ਠਂ ਨਾਮ ਅਧੋਮੁਖਛਿਦ੍ਦਂ; ਉਮ੍ਮਟ੍ਠਂ ਨਾਮ ਉਦ੍ਧਂਮੁਖਛਿਦ੍ਦਂ; ਵੇਮਟ੍ਠਂ ਨਾਮ ਉਲ਼ੁਙ੍ਕਸ੍ਸੇਵ ਉਜੁਗਤਛਿਦ੍ਦਂ. ਤਤ੍ਰ ਓਮਟ੍ਠਸ੍ਸ ਬਹਿ ਪਟ੍ਠਾਯ ਕਤਸ੍ਸ ਅਬ੍ਭਨ੍ਤਰਨ੍ਤਤੋ ਪਾਦਗ੍ਘਨਕੇ ਤੇਲੇ ਗਲ਼ਿਤੇ ਬਹਿ ਅਨਿਕ੍ਖਨ੍ਤੇਪਿ ਪਾਰਾਜਿਕਂ. ਕਸ੍ਮਾ? ਯਸ੍ਮਾ ਤਤੋ ਗਲ਼ਿਤਮਤ੍ਤਮੇਵ ਬਹਿਗਤਂ ਨਾਮ ਹੋਤਿ, ਨ ਕੁਮ੍ਭਿਗਤਸਙ੍ਖ੍ਯਂ ਲਭਤਿ. ਅਨ੍ਤੋ ਪਟ੍ਠਾਯ ਕਤਸ੍ਸ ਬਾਹਿਰਨ੍ਤਤੋ ਪਾਦਗ੍ਘਨਕੇ ਗਲ਼ਿਤੇ ਪਾਰਾਜਿਕਂ. ਉਮ੍ਮਟ੍ਠਸ੍ਸ ਯਥਾ ਤਥਾ ਵਾ ਕਤਸ੍ਸ ਬਾਹਿਰਨ੍ਤਤੋ ਪਾਦਗ੍ਘਨਕੇ ਗਲ਼ਿਤੇ ਪਾਰਾਜਿਕਂ. ਤਞ੍ਹਿ ਯਾਵ ਬਾਹਿਰਨ੍ਤਤੋ ਨ ਗਲ਼ਤਿ, ਤਾਵ ਕੁਮ੍ਭਿਗਤਮੇਵ ਹੋਤਿ. ‘‘ਵੇਮਟ੍ਠਸ੍ਸ ਚ ਕਪਾਲਮਜ੍ਝਤੋ ਗਲ਼ਿਤਵਸੇਨ ਕਾਰੇਤਬ੍ਬੋ’’ਤਿ ਅਟ੍ਠਕਥਾਸੁ ਵੁਤ੍ਤਂ. ਤਂ ਪਨ ਅਨ੍ਤੋ ਚ ਬਹਿ ਚ ਪਟ੍ਠਾਯ ਮਜ੍ਝੇ ਠਪੇਤ੍ਵਾ ਕਤਛਿਦ੍ਦੇ ਤਲ਼ਾਕਸ੍ਸ ਚ ਮਰਿਯਾਦਭੇਦੇਨ ਸਮੇਤਿ. ਅਨ੍ਤੋ ਪਟ੍ਠਾਯ ਕਤੇ ਪਨ ਬਾਹਿਰਨ੍ਤੇਨ, ਬਹਿ ਪਟ੍ਠਾਯ ਕਤੇ ਅਬ੍ਭਨ੍ਤਰਨ੍ਤੇਨ ਕਾਰੇਤਬ੍ਬੋਤਿ ਇਦਮੇਤ੍ਥ ਯੁਤ੍ਤਂ. ਯੋ ਪਨ ‘‘ਵਟ੍ਟਿਤ੍ਵਾ ਗਚ੍ਛਿਸ੍ਸਤੀ’’ਤਿ ਥੇਯ੍ਯਚਿਤ੍ਤੇਨ ਕੁਮ੍ਭਿਯਾ ਆਧਾਰਕਂ ਵਾ ਉਪਤ੍ਥਮ੍ਭਨਲੇਡ੍ਡੁਕੇ ਵਾ ਅਪਨੇਤਿ, ਵਟ੍ਟਿਤ੍ਵਾ ਗਤਾਯ ਪਾਰਾਜਿਕਂ. ਤੇਲਾਕਿਰਣਭਾਵਂ ਪਨ ਞਤ੍ਵਾ ਰਿਤ੍ਤਕੁਮ੍ਭਿਯਾ ਜਜ੍ਜਰਭਾਵੇ ਵਾ ਛਿਦ੍ਦੇਸੁ ਵਾ ਕਤੇਸੁ ਪਚ੍ਛਾ ਨਿਕ੍ਖਨ੍ਤਤੇਲਪ੍ਪਮਾਣੇਨ ਭਣ੍ਡਦੇਯ੍ਯਂ ਹੋਤਿ. ਅਟ੍ਠਕਥਾਸੁ ਪਨ ਕਤ੍ਥਚਿ ਪਾਰਾਜਿਕਨ੍ਤਿਪਿ ਲਿਖਿਤਂ, ਤਂ ਪਮਾਦਲਿਖਿਤਂ.
ਪਰਿਪੁਣ੍ਣਾਯ ਕੁਮ੍ਭਿਯਾ ਉਪਰਿ ਕਥਲਂ ਵਾ ਪਾਸਾਣਂ ਵਾ ‘‘ਪਤਿਤ੍ਵਾ ਭਿਨ੍ਦਿਸ੍ਸਤਿ, ਤਤੋ ਤੇਲਂ ਪਗ੍ਘਰਿਸ੍ਸਤੀ’’ਤਿ ਥੇਯ੍ਯਚਿਤ੍ਤੇਨ ਦੁਬ੍ਬਨ੍ਧਂ ਵਾ ਕਰੋਤਿ, ਦੁਟ੍ਠਪਿਤਂ ਵਾ ਠਪੇਤਿ, ਅਵਸ੍ਸਪਤਨਕਂ ਤਥਾ ਕਰੋਨ੍ਤਸ੍ਸ ਕਤਮਤ੍ਤੇ ਪਾਰਾਜਿਕਂ. ਰਿਤ੍ਤਕੁਮ੍ਭਿਯਾ ਉਪਰਿ ਕਰੋਤਿ, ਤਂ ਪਚ੍ਛਾ ਪੁਣ੍ਣਕਾਲੇ ਪਤਿਤ੍ਵਾ ਭਿਨ੍ਦਤਿ, ਭਣ੍ਡਦੇਯ੍ਯਂ. ਈਦਿਸੇਸੁ ਹਿ ਠਾਨੇਸੁ ਭਣ੍ਡਸ੍ਸ ਨਤ੍ਥਿਕਾਲੇ ਕਤਪਯੋਗਤ੍ਤਾ ਆਦਿਤੋਵ ਪਾਰਾਜਿਕਂ ਨ ਹੋਤਿ. ਭਣ੍ਡਵਿਨਾਸਦ੍ਵਾਰਸ੍ਸ ਪਨ ਕਤਤ੍ਤਾ ਭਣ੍ਡਦੇਯ੍ਯਂ ਹੋਤਿ. ਆਹਰਾਪੇਨ੍ਤੇਸੁ ਅਦਦਤੋ ਸਾਮਿਕਾਨਂ ਧੁਰਨਿਕ੍ਖੇਪੇਨ ਪਾਰਾਜਿਕਂ.
ਥੇਯ੍ਯਚਿਤ੍ਤੇਨ ਮਾਤਿਕਂ ਉਜੁਕਂ ਕਰੋਤਿ ‘‘ਵਟ੍ਟਿਤ੍ਵਾ ਵਾ ਗਮਿਸ੍ਸਤਿ, ਵੇਲਂ ਵਾ ਉਤ੍ਤਰਾਪੇਸ੍ਸਤੀ’’ਤਿ; ਵਟ੍ਟਿਤ੍ਵਾ ਵਾ ਗਚ੍ਛਤੁ, ਵੇਲਂ ਵਾ ਉਤ੍ਤਰਤੁ, ਉਜੁਕਰਣਕਾਲੇ ਪਾਰਾਜਿਕਂ. ਈਦਿਸਾ ਹਿ ਪਯੋਗਾ ਪੁਬ੍ਬਪਯੋਗਾਵਹਾਰੇ ਸਙ੍ਗਹਂ ਗਚ੍ਛਨ੍ਤਿ. ਸੁਕ੍ਖਮਾਤਿਕਾਯ ਉਜੁਕਤਾਯ ਪਚ੍ਛਾ ਉਦਕੇ ਆਗਤੇ ਵਟ੍ਟਿਤ੍ਵਾ ਵਾ ਗਚ੍ਛਤੁ, ਵੇਲਂ ਵਾ ਉਤ੍ਤਰਤੁ, ਭਣ੍ਡਦੇਯ੍ਯਂ. ਕਸ੍ਮਾ? ਠਾਨਾ ਚਾਵਨਪਯੋਗਸ੍ਸ ਅਭਾਵਾ. ਤਸ੍ਸ ਲਕ੍ਖਣਂ ਨਾਵਟ੍ਠੇ ਆਵਿ ਭਵਿਸ੍ਸਤਿ.
ਤਤ੍ਥੇਵ ਭਿਨ੍ਦਤਿ ਵਾਤਿਆਦੀਸੁ ਅਟ੍ਠਕਥਾਯਂ ਤਾਵ ਵੁਤ੍ਤਂ – ‘‘ਭਿਨ੍ਦਤਿ ਵਾਤਿ ਮੁਗ੍ਗਰੇਨ ਪੋਥੇਤ੍ਵਾ ਭਿਨ੍ਦਤਿ. ਛਡ੍ਡੇਤਿ ਵਾਤਿ ਉਦਕਂ ਵਾ ਵਾਲਿਕਂ ਵਾ ਆਕਿਰਿਤ੍ਵਾ ਉਤ੍ਤਰਾਪੇਤਿ. ਝਾਪੇਤਿ ਵਾਤਿ ਦਾਰੂਨਿ ਆਹਰਿਤ੍ਵਾ ਝਾਪੇਤਿ. ਅਪਰਿਭੋਗਂ ਵਾ ਕਰੋਤੀਤਿ ਅਖਾਦਿਤਬ੍ਬਂ ਵਾ ਅਪਾਤਬ੍ਬਂ ਵਾ ਕਰੋਤਿ; ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਵਿਸਂ ਵਾ ਉਚ੍ਛਿਟ੍ਠਂ ਵਾ ਕੁਣਪਂ ਵਾ ਪਾਤੇਸਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਠਾਨਾਚਾਵਨਸ੍ਸ ਨਤ੍ਥਿਤਾਯ ਦੁਕ੍ਕਟਂ, ਬੁਦ੍ਧਵਿਸਯੋ ਨਾਮੇਸੋ. ਕਿਞ੍ਚਾਪਿ ਦੁਕ੍ਕਟਂ, ਆਹਰਾਪੇਨ੍ਤੇ ਪਨ ਭਣ੍ਡਦੇਯ੍ਯ’’ਨ੍ਤਿ. ਤਤ੍ਥ ਪੁਰਿਮਦ੍ਵਯਂ ਨ ਸਮੇਤਿ. ਤਞ੍ਹਿ ਕੁਮ੍ਭਿਜਜ੍ਜਰਕਰਣੇਨ ਚ ਮਾਤਿਕਾਉਜੁਕਰਣੇਨ ਚ ਸਦ੍ਧਿਂ ਏਕਲਕ੍ਖਣਂ. ਪਚ੍ਛਿਮਂ ਪਨ ਦ੍ਵਯਂ ਠਾਨਾ ਅਚਾਵੇਨ੍ਤੇਨਾਪਿ ਸਕ੍ਕਾ ਕਾਤੁਂ. ਤਸ੍ਮਾ ਏਤ੍ਥ ਏਵਂ ਵਿਨਿਚ੍ਛਯਂ ਵਦਨ੍ਤਿ – ‘‘ਅਟ੍ਠਕਥਾਯਂ ਕਿਰ ‘ਠਾਨਾ ਚਾਵਨਸ੍ਸ ਨਤ੍ਥਿਤਾਯ ਦੁਕ੍ਕਟ’ਨ੍ਤਿ ਇਦਂ ਪਚ੍ਛਿਮਦ੍ਵਯਂ ਸਨ੍ਧਾਯ ਵੁਤ੍ਤਂ. ਠਾਨਾ ਚਾਵਨਂ ਅਕਰੋਨ੍ਤੋਯੇਵ ਹਿ ਥੇਯ੍ਯਚਿਤ੍ਤੇਨ ਵਾ ਵਿਨਾਸੇਤੁਕਾਮਤਾਯ ਵਾ ਝਾਪੇਯ੍ਯਪਿ, ਅਪਰਿਭੋਗਮ੍ਪਿ ਕਰੇਯ੍ਯ. ਪੁਰਿਮਦ੍ਵਯੇ ਪਨ ਵੁਤ੍ਤਨਯੇਨ ਭਿਨ੍ਦਨ੍ਤਸ੍ਸ ਵਾ ਛਡ੍ਡੇਨ੍ਤਸ੍ਸ ਵਾ ਠਾਨਾ ਚਾਵਨਂ ਅਤ੍ਥਿ, ਤਸ੍ਮਾ ਤਥਾ ਕਰੋਨ੍ਤਸ੍ਸ ਵਿਨਾਸੇਤੁਕਾਮਤਾਯ ਭਣ੍ਡਦੇਯ੍ਯਂ, ਥੇਯ੍ਯਚਿਤ੍ਤੇਨ ਪਾਰਾਜਿਕ’’ਨ੍ਤਿ. ਪਾਲ਼ਿਯਂ ‘‘ਦੁਕ੍ਕਟ’’ਨ੍ਤਿ ਵੁਤ੍ਤਤ੍ਤਾ ਅਯੁਤ੍ਤਨ੍ਤਿ ਚੇ? ਨ; ਅਞ੍ਞਥਾ ਗਹੇਤਬ੍ਬਤ੍ਥਤੋ. ਪਾਲ਼ਿਯਞ੍ਹਿ ਥੇਯ੍ਯਚਿਤ੍ਤਪਕ੍ਖੇ ‘‘ਭਿਨ੍ਦਤਿ ਵਾਤਿ ਉਦਕੇਨ ਸਮ੍ਭਿਨ੍ਦਤਿ, ਛਡ੍ਡੇਤਿ ਵਾਤਿ ਤਤ੍ਥ ਵਮਤਿ ਵਾ ਪਸ੍ਸਾਵਂ ਵਾ ਛਡ੍ਡੇਤੀ’’ਤਿ ਏਵਮੇਕੇ ਵਦਨ੍ਤਿ.
ਅਯਂ ਪਨੇਤ੍ਥ ਸਾਰੋ – ਵਿਨੀਤਵਤ੍ਥੁਮ੍ਹਿ ਤਿਣਜ੍ਝਾਪਕੋ ਵਿਯ ਠਾਨਾ ਅਚਾਵੇਤੁਕਾਮੋਵ ਕੇਵਲਂ ਭਿਨ੍ਦਤਿ, ਭਿਨ੍ਨਤ੍ਤਾ ਪਨ ਤੇਲਾਦੀਨਿ ਨਿਕ੍ਖਮਨ੍ਤਿ, ਯਂ ਵਾ ਪਨੇਤ੍ਥ ਪਤ੍ਥਿਨ੍ਨਂ, ਤਂ ਏਕਾਬਦ੍ਧਮੇਵ ਤਿਟ੍ਠਤਿ. ਅਛਡ੍ਡੇਤੁਕਾਮੋਯੇਵ ਚ ਕੇਵਲਂ ਤਤ੍ਥ ਉਦਕਵਾਲਿਕਾਦੀਨਿ ਆਕਿਰਤਿ, ਆਕਿਣ੍ਣਤ੍ਤਾ ਪਨ ਤੇਲਂ ਛਡ੍ਡੀਯਤਿ. ਤਸ੍ਮਾ ਵੋਹਾਰਵਸੇਨ ‘‘ਭਿਨ੍ਦਤਿ ਵਾ ਛਡ੍ਡੇਤਿ ਵਾ’’ਤਿ ਵੁਚ੍ਚਤੀਤਿ. ਏਵਮੇਤੇਸਂ ਪਦਾਨਂ ਅਤ੍ਥੋ ਗਹੇਤਬ੍ਬੋ. ਨਾਸੇਤੁਕਾਮਤਾਪਕ੍ਖੇ ਪਨ ਇਤਰਥਾਪਿ ਯੁਜ੍ਜਤਿ. ਏਵਞ੍ਹਿ ਕਥਿਯਮਾਨੇ ਪਾਲ਼ਿ ਚ ਅਟ੍ਠਕਥਾ ਚ ਪੁਬ੍ਬਾਪਰੇਨ ਸਂਸਨ੍ਦਿਤ੍ਵਾ ਕਥਿਤਾ ਹੋਨ੍ਤਿ. ਏਤ੍ਤਾਵਤਾਪਿ ਚ ਸਨ੍ਤੋਸਂ ਅਕਤ੍ਵਾ ਆਚਰਿਯੇ ਪਯਿਰੁਪਾਸਿਤ੍ਵਾ ਵਿਨਿਚ੍ਛਯੋ ਵੇਦਿਤਬ੍ਬੋਤਿ.
ਭੂਮਟ੍ਠਕਥਾ ਨਿਟ੍ਠਿਤਾ.
ਥਲਟ੍ਠਕਥਾ
੯੫. ਥਲਟ੍ਠੇ ਥਲੇ ਨਿਕ੍ਖਿਤ੍ਤਨ੍ਤਿ ਭੂਮਿਤਲੇ ਵਾ ਪਾਸਾਣਤਲਪਬ੍ਬਤਤਲਾਦੀਸੁ ਵਾ ਯਤ੍ਥ ਕਤ੍ਥਚਿ ਪਟਿਚ੍ਛਨ੍ਨੇ ਵਾ ਅਪ੍ਪਟਿਚ੍ਛਨ੍ਨੇ ਵਾ ਠਪਿਤਂ ਥਲਟ੍ਠਨ੍ਤਿ ਵੇਦਿਤਬ੍ਬਂ. ਤਂ ਸਚੇ ਰਾਸਿਕਤਂ ਹੋਤਿ, ਅਨ੍ਤੋਕੁਮ੍ਭਿਯਂ ਭਾਜਨਗਤਕਰਣਮੁਟ੍ਠਿਚ੍ਛੇਦਨਵਿਨਿਚ੍ਛਯੇਨ ਵਿਨਿਚ੍ਛਿਨਿਤਬ੍ਬਂ. ਸਚੇ ਏਕਾਬਦ੍ਧਂ ਸਿਲੇਸਨਿਯ੍ਯਾਸਾਦਿ ਪਕ੍ਕਮਧੁਫਾਣਿਤਵਿਨਿਚ੍ਛਯੇਨ ਵਿਨਿਚ੍ਛਿਨਿਤਬ੍ਬਂ. ਸਚੇ ਗਰੁਕਂ ਹੋਤਿ ਭਾਰਬਦ੍ਧਂ ਲੋਹਪਿਣ੍ਡਿ-ਗੁਲ਼ਪਿਣ੍ਡਿ-ਤੇਲਮਧੁਘਟਾਦਿ ਵਾ, ਕੁਮ੍ਭਿਯਂ ਠਾਨਾਚਾਵਨਵਿਨਿਚ੍ਛਯੇਨ ਵਿਨਿਚ੍ਛਿਨਿਤਬ੍ਬਂ. ਸਙ੍ਖਲਿਕਬਦ੍ਧਸ੍ਸ ਚ ਠਾਨਭੇਦੋ ਸਲ੍ਲਕ੍ਖੇਤਬ੍ਬੋ. ਪਤ੍ਥਰਿਤ੍ਵਾ ਠਪਿਤਂ ਪਨ ਪਾਵਾਰਤ੍ਥਰਣਸਾਟਕਾਦਿਂ ਉਜੁਕਂ ਗਹੇਤ੍ਵਾ ਆਕਡ੍ਢਤਿ, ਪਾਰਿਮਨ੍ਤੇ ਓਰਿਮਨ੍ਤੇਨ ਫੁਟ੍ਠੋਕਾਸਂ ਅਤਿਕ੍ਕਨ੍ਤੇ ਪਾਰਾਜਿਕਂ. ਏਵਂ ਸਬ੍ਬਦਿਸਾਸੁ ਸਲ੍ਲਕ੍ਖੇਤਬ੍ਬਂ. ਵੇਠੇਤ੍ਵਾ ਉਦ੍ਧਰਤਿ, ਕੇਸਗ੍ਗਮਤ੍ਤਂ ਆਕਾਸਗਤਂ ਕਰੋਨ੍ਤਸ੍ਸ ਪਾਰਾਜਿਕਂ. ਸੇਸਂ ਵੁਤ੍ਤਨਯਮੇਵਾਤਿ.
ਥਲਟ੍ਠਕਥਾ ਨਿਟ੍ਠਿਤਾ.
ਆਕਾਸਟ੍ਠਕਥਾ
੯੬. ਆਕਾਸਟ੍ਠੇ ਮੋਰਸ੍ਸ ਛਹਿ ਆਕਾਰੇਹਿ ਠਾਨਪਰਿਚ੍ਛੇਦੋ ਵੇਦਿਤਬ੍ਬੋ – ਪੁਰਤੋ ਮੁਖਤੁਣ੍ਡਕੇਨ, ਪਚ੍ਛਤੋ ਕਲਾਪਗ੍ਗੇਨ, ਉਭਯਪਸ੍ਸੇਸੁ ਪਕ੍ਖਪਰਿਯਨ੍ਤੇਹਿ, ਅਧੋ ਪਾਦਨਖਸਿਖਾਯ, ਉਦ੍ਧਂ ਸਿਖਗ੍ਗੇਨਾਤਿ. ਭਿਕ੍ਖੁ ‘‘ਸਸ੍ਸਾਮਿਕਂ ਆਕਾਸਟ੍ਠਂ ਮੋਰਂ ਗਹੇਸ੍ਸਾਮੀ’’ਤਿ ਪੁਰਤੋ ਵਾ ਤਿਟ੍ਠਤਿ, ਹਤ੍ਥਂ ਵਾ ਪਸਾਰੇਤਿ, ਮੋਰੋ ਆਕਾਸੇਯੇਵ ਪਕ੍ਖੇ ਚਾਰੇਤਿ, ਵਾਤਂ ਗਾਹਾਪੇਤ੍ਵਾ ਗਮਨਂ ਉਪਚ੍ਛਿਨ੍ਦਿਤ੍ਵਾ ਤਿਟ੍ਠਤਿ. ਤਸ੍ਸ ਭਿਕ੍ਖੁਨੋ ਦੁਕ੍ਕਟਂ. ਤਂ ਅਫਨ੍ਦੇਨ੍ਤੋ ਹਤ੍ਥੇਨ ਆਮਸਤਿ, ਦੁਕ੍ਕਟਮੇਵ. ਠਾਨਾ ਅਚਾਵੇਨ੍ਤੋ ਫਨ੍ਦਾਪੇਤਿ, ਥੁਲ੍ਲਚ੍ਚਯਂ. ਹਤ੍ਥੇਨ ਪਨ ਗਹੇਤ੍ਵਾ ਵਾ ਅਗ੍ਗਹੇਤ੍ਵਾ ਵਾ ਮੁਖਤੁਣ੍ਡਕੇਨ ਫੁਟ੍ਠੋਕਾਸਂ ਕਲਾਪਗ੍ਗਂ, ਕਲਾਪਗ੍ਗੇਨ ਵਾ ਫੁਟ੍ਠੋਕਾਸਂ ਮੁਖਤੁਣ੍ਡਕਂ ਅਤਿਕ੍ਕਾਮੇਤਿ, ਪਾਰਾਜਿਕਂ. ਤਥਾ ਵਾਮਪਕ੍ਖਪਰਿਯਨ੍ਤੇਨ ਫੁਟ੍ਠੋਕਾਸਂ ਦਕ੍ਖਿਣਪਕ੍ਖਪਰਿਯਨ੍ਤਂ, ਦਕ੍ਖਿਣਪਕ੍ਖਪਰਿਯਨ੍ਤੇਨ ਵਾ ਫੁਟ੍ਠੋਕਾਸਂ ਵਾਮਪਕ੍ਖਪਰਿਯਨ੍ਤਂ ਅਤਿਕ੍ਕਾਮੇਤਿ, ਪਾਰਾਜਿਕਂ. ਤਥਾ ਪਾਦਨਖਸਿਖਾਯ ਫੁਟ੍ਠੋਕਾਸਂ ਸਿਖਗ੍ਗਂ, ਸਿਖਗ੍ਗੇਨ ਵਾ ਫੁਟ੍ਠੋਕਾਸਂ ਪਾਦਨਖਸਿਖਂ ਅਤਿਕ੍ਕਾਮੇਤਿ, ਪਾਰਾਜਿਕਂ.
ਆਕਾਸੇਨ ਗਚ੍ਛਨ੍ਤੋ ਮੋਰੋ ਸੀਸਾਦੀਸੁ ਯਸ੍ਮਿਂ ਅਙ੍ਗੇ ਨਿਲੀਯਤਿ, ਤਂ ਤਸ੍ਸ ਠਾਨਂ. ਤਸ੍ਮਾ ਤਂ ਹਤ੍ਥੇ ਨਿਲੀਨਂ ਇਤੋ ਚਿਤੋ ਚ ਕਰੋਨ੍ਤੋਪਿ ਫਨ੍ਦਾਪੇਤਿਯੇਵ, ਯਦਿ ਪਨ ਇਤਰੇਨ ਹਤ੍ਥੇਨ ਗਹੇਤ੍ਵਾ ਠਾਨਾ ਚਾਵੇਤਿ, ਪਾਰਾਜਿਕਂ. ਇਤਰਂ ਹਤ੍ਥਂ ਉਪਨੇਤਿ, ਮੋਰੋ ਸਯਮੇਵ ਉਡ੍ਡੇਤ੍ਵਾ ਤਤ੍ਥ ਨਿਲੀਯਤਿ, ਅਨਾਪਤ੍ਤਿ. ਅਙ੍ਗੇ ਨਿਲੀਨਭਾਵਂ ਞਤ੍ਵਾ ਥੇਯ੍ਯਚਿਤ੍ਤੇਨ ਏਕਂ ਪਦਵਾਰਂ ਗਚ੍ਛਤਿ, ਥੁਲ੍ਲਚ੍ਚਯਂ. ਦੁਤਿਯੇ ਪਾਰਾਜਿਕਂ.
ਭੂਮਿਯਂ ਠਿਤਮੋਰੋ ਦ੍ਵਿਨ੍ਨਂ ਵਾ ਪਾਦਾਨਂ ਕਲਾਪਸ੍ਸ ਚ ਵਸੇਨ ਤੀਣਿ ਠਾਨਾਨਿ ਲਭਤਿ. ਤਂ ਉਕ੍ਖਿਪਨ੍ਤਸ੍ਸ ਯਾਵ ਏਕਮ੍ਪਿ ਠਾਨਂ ਪਥਵਿਂ ਫੁਸਤਿ, ਤਾਵ ਥੁਲ੍ਲਚ੍ਚਯਂ. ਕੇਸਗ੍ਗਮਤ੍ਤਮ੍ਪਿ ਪਥਵਿਯਾ ਮੋਚਿਤਮਤ੍ਤੇ ਪਾਰਾਜਿਕਂ. ਪਞ੍ਜਰੇ ਠਿਤਂ ਸਹ ਪਞ੍ਜਰੇਨ ਉਦ੍ਧਰਤਿ, ਪਾਰਾਜਿਕਂ. ਯਦਿ ਪਨ ਪਾਦਂ ਨ ਅਗ੍ਘਤਿ, ਸਬ੍ਬਤ੍ਥ ਅਗ੍ਘਵਸੇਨ ਕਾਤਬ੍ਬਂ. ਅਨ੍ਤੋਵਤ੍ਥੁਮ੍ਹਿ ਚਰਨ੍ਤਂ ਮੋਰਂ ਥੇਯ੍ਯਚਿਤ੍ਤੇਨ ਪਦਸਾ ਬਹਿਵਤ੍ਥੁਂ ਨੀਹਰਨ੍ਤੋ ਦ੍ਵਾਰਪਰਿਚ੍ਛੇਦਂ ਅਤਿਕ੍ਕਾਮੇਤਿ, ਪਾਰਾਜਿਕਂ. ਵਜੇ ਠਿਤਬਲੀਬਦ੍ਦਸ੍ਸ ਹਿ ਵਜੋ ਵਿਯ ਅਨ੍ਤੋਵਤ੍ਥੁ ਤਸ੍ਸ ਠਾਨਂ. ਹਤ੍ਥੇਨ ਪਨ ਗਹੇਤ੍ਵਾ ਅਨ੍ਤੋਵਤ੍ਥੁਸ੍ਮਿਮ੍ਪਿ ਆਕਾਸਗਤਂ ਕਰੋਨ੍ਤਸ੍ਸ ਪਾਰਾਜਿਕਮੇਵ. ਅਨ੍ਤੋਗਾਮੇ ਚਰਨ੍ਤਮ੍ਪਿ ਗਾਮਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਸ੍ਸ ਪਾਰਾਜਿਕਂ. ਸਯਮੇਵ ਨਿਕ੍ਖਮਿਤ੍ਵਾ ਗਾਮੂਪਚਾਰੇ ਵਾ ਵਤ੍ਥੂਪਚਾਰੇ ਵਾ ਚਰਨ੍ਤਂ ਪਨ ਥੇਯ੍ਯਚਿਤ੍ਤੋ ਕਟ੍ਠੇਨ ਵਾ ਕਥਲਾਯ ਵਾ ਉਤ੍ਰਾਸੇਤ੍ਵਾ ਅਟਵਿਮੁਖਂ ਕਰੋਤਿ, ਮੋਰੋ ਉਡ੍ਡੇਤ੍ਵਾ ਅਨ੍ਤੋਗਾਮੇ ਵਾ ਅਨ੍ਤੋਵਤ੍ਥੁਮ੍ਹਿ ਵਾ ਛਦਨਪਿਟ੍ਠੇ ਵਾ ਨਿਲੀਯਤਿ, ਰਕ੍ਖਤਿ. ਸਚੇ ਪਨ ਅਟਵਿਮੁਖੇ ਉਡ੍ਡੇਤਿ ਵਾ ਗਚ੍ਛਤਿ ਵਾ ‘‘ਅਟਵਿਂ ਪਵੇਸੇਤ੍ਵਾ ਗਹੇਸ੍ਸਾਮੀ’’ਤਿ ਪਰਿਕਪ੍ਪੇ ਅਸਤਿ ਪਥਵਿਤੋ ਕੇਸਗ੍ਗਮਤ੍ਤਮ੍ਪਿ ਉਡ੍ਡਿਤਮਤ੍ਤੇ ਵਾ ਦੁਤਿਯਪਦਵਾਰੇ ਵਾ ਪਾਰਾਜਿਕਂ. ਕਸ੍ਮਾ? ਯਸ੍ਮਾ ਗਾਮਤੋ ਨਿਕ੍ਖਨ੍ਤਸ੍ਸ ਠਿਤਟ੍ਠਾਨਮੇਵ ਠਾਨਂ ਹੋਤਿ. ਕਪਿਞ੍ਜਰਾਦੀਸੁਪਿ ਅਯਮੇਵ ਵਿਨਿਚ੍ਛਯੋ.
ਸਾਟਕਂ ਵਾਤਿ ਵਾਤਵੇਗੁਕ੍ਖਿਤ੍ਤਂ ਪਥਵਿਤਲੇ ਪਤ੍ਥਰਿਤ੍ਵਾ ਠਪਿਤਮਿਵ ਆਕਾਸੇਨ ਗਚ੍ਛਨ੍ਤਂ ਖਲਿਬਦ੍ਧਂ ਸਾਟਕਂ ਅਭਿਮੁਖਾਗਤਂ ਹਤ੍ਥੇਨ ਏਕਸ੍ਮਿਂ ਅਨ੍ਤੇ ਗਣ੍ਹਾਤਿ, ਇਤੋ ਚਿਤੋ ਚ ਠਾਨਂ ਅਵਿਕੋਪੇਨ੍ਤੋਯੇਵ ਗਮਨੁਪਚ੍ਛੇਦੇ ਦੁਕ੍ਕਟਂ. ਠਾਨਾਚਾਵਨਂ ਅਕਰੋਨ੍ਤੋ ਚਾਲੇਤਿ, ਫਨ੍ਦਾਪਨੇ ਥੁਲ੍ਲਚ੍ਚਯਂ. ਠਾਨਾ ਚਾਵੇਤਿ, ਪਾਰਾਜਿਕਂ. ਠਾਨਪਰਿਚ੍ਛੇਦੋ ਚਸ੍ਸ ਮੋਰਸ੍ਸੇਵ ਛਹਿ ਆਕਾਰੇਹਿ ਵੇਦਿਤਬ੍ਬੋ.
ਅਬਦ੍ਧਸਾਟਕੋ ਪਨ ਏਕਸ੍ਮਿਂ ਅਨ੍ਤੇ ਗਹਿਤਮਤ੍ਤੇਵ ਦੁਤਿਯੇਨਨ੍ਤੇਨ ਪਤਿਤ੍ਵਾ ਭੂਮਿਯਂ ਪਤਿਟ੍ਠਾਤਿ, ਤਸ੍ਸ ਦ੍ਵੇ ਠਾਨਾਨਿ ਹੋਨ੍ਤਿ – ਹਤ੍ਥੋ ਚੇਵ ਭੂਮਿ ਚ. ਤਂ ਯਥਾਗਹਿਤਮੇਵ ਪਠਮਂ ਗਹਿਤੋਕਾਸਪ੍ਪਦੇਸਤੋ ਚਾਲੇਤਿ, ਥੁਲ੍ਲਚ੍ਚਯਂ. ਪਚ੍ਛਾ ਭੂਮਿਤੋ ਦੁਤਿਯਹਤ੍ਥੇਨ ਵਾ ਪਾਦੇਨ ਵਾ ਉਕ੍ਖਿਪਤਿ, ਪਾਰਾਜਿਕਂ. ਪਠਮਂ ਵਾ ਭੂਮਿਤੋ ਉਦ੍ਧਰਤਿ, ਥੁਲ੍ਲਚ੍ਚਯਂ. ਪਚ੍ਛਾ ਗਹਿਤੋਕਾਸਪ੍ਪਦੇਸਤੋ ਚਾਵੇਤਿ, ਪਾਰਾਜਿਕਂ. ਗਹਣਂ ਵਾ ਅਮੁਞ੍ਚਨ੍ਤੋ ਉਜੁਕਮੇਵ ਹਤ੍ਥਂ ਓਨਾਮੇਤ੍ਵਾ ਭੂਮਿਗਤਂ ਕਤ੍ਵਾ ਤੇਨੇਵ ਹਤ੍ਥੇਨ ਉਕ੍ਖਿਪਤਿ, ਪਾਰਾਜਿਕਂ. ਵੇਠਨੇਪਿ ਅਯਮੇਵ ਵਿਨਿਚ੍ਛਯੋ.
ਹਿਰਞ੍ਞਂ ਵਾ ਸੁਵਣ੍ਣਂ ਵਾ ਛਿਜ੍ਜਮਾਨਨ੍ਤਿ ਮਨੁਸ੍ਸਾਨਂ ਅਲਙ੍ਕਰੋਨ੍ਤਾਨਂ ਗੀਵੇਯ੍ਯਕਾਦਿਪਿਲ਼ਨ੍ਧਨਂ ਵਾ ਸੁਵਣ੍ਣਸਲਾਕਂ ਛਿਨ੍ਦਨ੍ਤਾਨਂ ਸੁਵਣ੍ਣਕਾਰਾਨਂ ਸੁਵਣ੍ਣਖਣ੍ਡਂ ਵਾ ਛਿਜ੍ਜਮਾਨਂ ਪਤਤਿ, ਤਞ੍ਚੇ ਭਿਕ੍ਖੁ ਆਕਾਸੇਨ ਆਗਚ੍ਛਨ੍ਤਂ ਥੇਯ੍ਯਚਿਤ੍ਤੋ ਹਤ੍ਥੇਨ ਗਣ੍ਹਾਤਿ, ਗਹਣਮੇਵ ਠਾਨਂ. ਗਹਿਤਪ੍ਪਦੇਸਤੋ ਹਤ੍ਥਂ ਅਪਨੇਤਿ, ਪਾਰਾਜਿਕਂ. ਚੀਵਰੇ ਪਤਿਤਂ ਹਤ੍ਥੇਨ ਉਕ੍ਖਿਪਤਿ, ਪਾਰਾਜਿਕਂ. ਅਨੁਦ੍ਧਰਿਤ੍ਵਾਵ ਯਾਤਿ, ਦੁਤਿਯੇ ਪਦਵਾਰੇ ਪਾਰਾਜਿਕਂ. ਪਤ੍ਤੇ ਪਤਿਤੇਪਿ ਏਸੇਵ ਨਯੋ. ਸੀਸੇ ਵਾ ਮੁਖੇ ਵਾ ਪਾਦੇ ਵਾ ਪਤਿਟ੍ਠਿਤਂ ਹਤ੍ਥੇਨ ਗਣ੍ਹਾਤਿ, ਪਾਰਾਜਿਕਂ. ਅਗ੍ਗਹੇਤ੍ਵਾਵ ਯਾਤਿ, ਦੁਤਿਯੇ ਪਦਵਾਰੇ ਪਾਰਾਜਿਕਂ. ਯਤ੍ਥ ਕਤ੍ਥਚਿ ਪਤਤਿ, ਤਸ੍ਸ ਪਤਿਤੋਕਾਸੋਵ ਠਾਨਂ, ਨ ਸਬ੍ਬਂ ਅਙ੍ਗਪਚ੍ਚਙ੍ਗਂ ਪਤ੍ਤਚੀਵਰਂ ਵਾਤਿ.
ਆਕਾਸਟ੍ਠਕਥਾ ਨਿਟ੍ਠਿਤਾ.
ਵੇਹਾਸਟ੍ਠਕਥਾ
੯੭. ਵੇਹਾਸਟ੍ਠੇ ਮਞ੍ਚਪੀਠਾਦੀਸੁ ਠਪਿਤਂ ਭਣ੍ਡਂ ਆਮਾਸਂ ਵਾ ਹੋਤੁ ਅਨਾਮਾਸਂ ਵਾ, ਥੇਯ੍ਯਚਿਤ੍ਤੇਨ ਆਮਸਨ੍ਤਸ੍ਸ ਦੁਕ੍ਕਟਂ. ਮਞ੍ਚਪੀਠੇਸੁ ਠਪਿਤਭਣ੍ਡੇਸੁ ਪਨੇਤ੍ਥ ਥਲਟ੍ਠੇ ਵੁਤ੍ਤਨਯੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਸਚੇ ਖਲਿਯਾ ਬਦ੍ਧਸਾਟਕੋ ਮਞ੍ਚੇ ਵਾ ਪੀਠੇ ਵਾ ਪਤ੍ਥਟੋ ਮਜ੍ਝੇਨ ਮਞ੍ਚਤਲਂ ਨ ਫੁਸਤਿ, ਮਞ੍ਚਪਾਦੇਵ ਫੁਸਤਿ, ਤੇਸਂ ਵਸੇਨ ਠਾਨਂ ਵੇਦਿਤਬ੍ਬਂ. ਪਾਦਾਨਂ ਉਪਰਿ ਫੁਟ੍ਠੋਕਾਸਮੇਵ ਹਿ ਅਤਿਕ੍ਕਮਿਤਮਤ੍ਤੇਨ ਤਤ੍ਥ ਪਾਰਾਜਿਕਂ ਹੋਤਿ. ਸਹ ਮਞ੍ਚਪੀਠੇਹਿ ਹਰਨ੍ਤਸ੍ਸ ਪਨ ਮਞ੍ਚਪੀਠਪਾਦਾਨਂ ਪਤਿਟ੍ਠਿਤੋਕਾਸਵਸੇਨ ਠਾਨਂ ਵੇਦਿਤਬ੍ਬਂ.
ਚੀਵਰਵਂਸੇ ਵਾਤਿ ਚੀਵਰਠਪਨਤ੍ਥਾਯ ਬਨ੍ਧਿਤ੍ਵਾ ਠਪਿਤੇ ਵਂਸੇ ਵਾ ਕਟ੍ਠਦਣ੍ਡਕੇ ਵਾ. ਤਤ੍ਥ ਸਂਹਰਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਠਪਿਤਚੀਵਰਸ੍ਸ ਪਤਿਟ੍ਠਿਤੋਕਾਸੇਨ ਫੁਟ੍ਠੋਕਾਸੋਵ ਠਾਨਂ, ਨ ਸਬ੍ਬੋ ਚੀਵਰਵਂਸੋ. ਤਸ੍ਮਾ ਥੇਯ੍ਯਚਿਤ੍ਤੇਨ ਤਂ ਭੋਗੇ ਗਹੇਤ੍ਵਾ ਆਕਡ੍ਢਨ੍ਤਸ੍ਸ ਪਾਰਤੋ ਵਂਸੇ ਪਤਿਟ੍ਠਿਤੋਕਾਸਂ ਓਰਤੋ ਚੀਵਰੇਨ ਵਂਸਸ੍ਸ ਫੁਟ੍ਠਪ੍ਪਦੇਸਂ ਅਤਿਕ੍ਕਾਮੇਨ੍ਤਸ੍ਸ ਏਕਦ੍ਵਙ੍ਗੁਲਮਤ੍ਤਾਕਡ੍ਢਨੇਨੇਵ ਪਾਰਾਜਿਕਂ. ਅਨ੍ਤੇ ਗਹੇਤ੍ਵਾ ਆਕਡ੍ਢਨ੍ਤਸ੍ਸਾਪਿ ਏਸੇਵ ਨਯੋ. ਤਤ੍ਥੇਵ ਪਨ ਚੀਵਰਵਂਸੇ ਵਾਮਤੋ ਵਾ ਦਕ੍ਖਿਣਤੋ ਵਾ ਸਾਰੇਨ੍ਤਸ੍ਸ ਵਾਮਨ੍ਤੇਨ ਦਕ੍ਖਿਣਨ੍ਤਟ੍ਠਾਨਂ ਦਕ੍ਖਿਣਨ੍ਤੇਨ ਵਾ ਵਾਮਨ੍ਤਟ੍ਠਾਨਂ ਅਤਿਕ੍ਕਨ੍ਤਮਤ੍ਤੇ ਦਸਦ੍ਵਾਦਸਙ੍ਗੁਲਮਤ੍ਤਸਾਰਣੇਨੇਵ ਪਾਰਾਜਿਕਂ. ਉਦ੍ਧਂ ਉਕ੍ਖਿਪਨ੍ਤਸ੍ਸ ਕੇਸਗ੍ਗਮਤ੍ਤੁਕ੍ਖਿਪਨੇਨ ਪਾਰਾਜਿਕਂ. ਚੀਵਰਵਂਸਂ ਫੁਸਨ੍ਤਂ ਵਾ ਅਫੁਸਨ੍ਤਂ ਵਾ ਰਜ੍ਜੁਕੇਨ ਬਨ੍ਧਿਤ੍ਵਾ ਠਪਿਤਚੀਵਰਂ ਮੋਚੇਨ੍ਤਸ੍ਸ ਥੁਲ੍ਲਚ੍ਚਯਂ, ਮੁਤ੍ਤੇ ਪਾਰਾਜਿਕਂ. ਮੁਤ੍ਤਮਤ੍ਤਮੇਵ ਹਿ ਤਂ ‘‘ਠਾਨਾ ਚੁਤ’’ਨ੍ਤਿ ਸਙ੍ਖ੍ਯਂ ਗਚ੍ਛਤਿ. ਵਂਸੇ ਵੇਠੇਤ੍ਵਾ ਠਪਿਤਂ ਨਿਬ੍ਬੇਠੇਨ੍ਤਸ੍ਸ ਥੁਲ੍ਲਚ੍ਚਯਂ, ਨਿਬ੍ਬੇਠਿਤਮਤ੍ਤੇ ਪਾਰਾਜਿਕਂ. ਵਲਯਂ ਕਤ੍ਵਾ ਠਪਿਤੇ ਵਲਯਂ ਛਿਨ੍ਦਤਿ ਵਾ ਮੋਚੇਤਿ ਵਾ ਏਕਂ ਵਾ ਵਂਸਕੋਟਿਂ ਮੋਚੇਤ੍ਵਾ ਨੀਹਰਤਿ, ਥੁਲ੍ਲਚ੍ਚਯਂ. ਛਿਨ੍ਨਮਤ੍ਤੇ ਮੁਤ੍ਤਮਤ੍ਤੇ ਨੀਹਟਮਤ੍ਤੇ ਚ ਪਾਰਾਜਿਕਂ. ਤਥਾ ਅਕਤ੍ਵਾਵ ਚੀਵਰਵਂਸੇ ਇਤੋ ਚਿਤੋ ਚ ਸਾਰੇਤਿ, ਰਕ੍ਖਤਿ ਤਾਵ. ਵਲਯਸ੍ਸ ਹਿ ਸਬ੍ਬੋਪਿ ਚੀਵਰਵਂਸੋ ਠਾਨਂ. ਕਸ੍ਮਾ? ਤਤ੍ਥ ਸਂਸਰਣਧਮ੍ਮਤਾਯ. ਯਦਾ ਪਨ ਨਂ ਹਤ੍ਥੇਨ ਗਹੇਤ੍ਵਾ ਆਕਾਸਗਤਂ ਕਰੋਤਿ, ਪਾਰਾਜਿਕਂ. ਪਸਾਰੇਤ੍ਵਾ ਠਪਿਤਸ੍ਸ ਪਤਿਟ੍ਠਿਤੋਕਾਸੇਨ ਫੁਟ੍ਠੋਕਾਸੋਵ ਠਾਨਂ. ਤਤ੍ਥ ਸਂਹਰਿਤ੍ਵਾ ਠਪਿਤੇ ਵੁਤ੍ਤਨਯੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਯਂ ਪਨ ਏਕੇਨਨ੍ਤੇਨ ਭੂਮਿਂ ਫੁਸਿਤ੍ਵਾ ਠਿਤਂ ਹੋਤਿ, ਤਸ੍ਸ ਚੀਵਰਵਂਸੇ ਚ ਭੂਮਿਯਞ੍ਚ ਪਤਿਟ੍ਠਿਤੋਕਾਸਵਸੇਨ ਦ੍ਵੇ ਠਾਨਾਨਿ. ਤਤ੍ਥ ਭੂਮਿਯਂ ਏਕੇਨਨ੍ਤੇਨ ਪਤਿਟ੍ਠਿਤੇ ਅਬਦ੍ਧਸਾਟਕੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਚੀਵਰਰਜ੍ਜੁਯਾਪਿ ਅਯਮੇਵ ਵਿਨਿਚ੍ਛਯੋ.
ਅਙ੍ਕੁਸਕੇ ਲਗ੍ਗੇਤ੍ਵਾ ਠਪਿਤਭਣ੍ਡਂ ਪਨ ਭੇਸਜ੍ਜਘਟੋ ਵਾ ਭੇਸਜ੍ਜਤ੍ਥਵਿਕਾ ਵਾ ਸਚੇ ਭਿਤ੍ਤਿਂ ਵਾ ਭੂਮਿਂ ਵਾ ਅਫੁਸਿਤ੍ਵਾ ਠਪਿਤਂ ਲਗ੍ਗਨਕਂ ਘਂਸਨ੍ਤਸ੍ਸ ਨੀਹਰਤੋ ਅਙ੍ਕੁਸਕੋਟਿਤੋ ਨਿਕ੍ਖਨ੍ਤਮਤ੍ਤੇ ਪਾਰਾਜਿਕਂ. ਲਗ੍ਗਨਕਂ ਬਦ੍ਧਂ ਹੋਤਿ, ਬੁਨ੍ਦੇਨ ਉਕ੍ਖਿਪਿਤ੍ਵਾ ਆਕਾਸਗਤਂ ਕਰੋਨ੍ਤਸ੍ਸ ਅਙ੍ਕੁਸਕੋਟਿਤੋ ਅਨਿਕ੍ਖਨ੍ਤੇਪਿ ਪਾਰਾਜਿਕਂ. ਭਿਤ੍ਤਿਨਿਸ੍ਸਿਤਂ ਹੋਤਿ, ਪਠਮਂ ਅਙ੍ਕੁਸਕੋਟਿਤੋ ਨੀਹਰਤਿ, ਥੁਲ੍ਲਚ੍ਚਯਂ. ਪਚ੍ਛਾ ਭਿਤ੍ਤਿਂ ਮੋਚੇਤਿ, ਪਾਰਾਜਿਕਂ. ਪਠਮਂ ਭਿਤ੍ਤਿਂ ਮੋਚੇਤ੍ਵਾ ਪਚ੍ਛਾ ਅਙ੍ਕੁਸਤੋ ਨੀਹਰਨ੍ਤਸ੍ਸਾਪਿ ਏਸੇਵ ਨਯੋ. ਸਚੇ ਪਨ ਭਾਰਿਯਂ ਭਣ੍ਡਂ ਨੀਹਰਿਤੁਂ ਅਸਕ੍ਕੋਨ੍ਤੋ ਸਯਂ ਭਿਤ੍ਤਿਨਿਸ੍ਸਿਤਂ ਕਤ੍ਵਾ ਅਙ੍ਕੁਸਤੋ ਨੀਹਰਤਿ, ਪੁਨ ਭਿਤ੍ਤਿਂ ਅਮੋਚੇਤ੍ਵਾਪਿ ਅਙ੍ਕੁਸਤੋ ਨੀਹਟਮਤ੍ਤੇਯੇਵ ਪਾਰਾਜਿਕਂ. ਅਤ੍ਤਨਾ ਕਤਟ੍ਠਾਨਞ੍ਹਿ ਠਾਨਂ ਨ ਹੋਤਿ. ਭੂਮਿਂ ਫੁਸਿਤ੍ਵਾ ਠਿਤਸ੍ਸ ਪਨ ਦ੍ਵੇ ਏਵ ਠਾਨਾਨਿ. ਤਤ੍ਥ ਵੁਤ੍ਤੋਯੇਵ ਵਿਨਿਚ੍ਛਯੋ. ਯਂ ਪਨ ਸਿਕ੍ਕਾਯ ਪਕ੍ਖਿਪਿਤ੍ਵਾ ਲਗ੍ਗਿਤਂ ਹੋਤਿ, ਤਂ ਸਿਕ੍ਕਾਤੋ ਨੀਹਰਨ੍ਤਸ੍ਸਾਪਿ ਸਹ ਸਿਕ੍ਕਾਯ ਅਙ੍ਕੁਸਤੋ ਨੀਹਰਨ੍ਤਸ੍ਸਾਪਿ ਪਾਰਾਜਿਕਂ. ਭਿਤ੍ਤਿਭੂਮਿਸਨ੍ਨਿਸ੍ਸਿਤਵਸੇਨ ਚੇਤ੍ਥ ਠਾਨਭੇਦੋਪਿ ਵੇਦਿਤਬ੍ਬੋ.
ਭਿਤ੍ਤਿਖੀਲੋਤਿ ਉਜੁਕਂ ਕਤ੍ਵਾ ਭਿਤ੍ਤਿਯਂ ਆਕੋਟਿਤੋ ਵਾ ਤਤ੍ਥਜਾਤਕੋ ਏਵ ਵਾ; ਨਾਗਦਨ੍ਤੋ ਪਨ ਵਙ੍ਕੋ ਆਕੋਟਿਤੋ ਏਵ. ਤੇਸੁ ਲਗ੍ਗੇਤ੍ਵਾ ਠਪਿਤਂ ਅਙ੍ਕੁਸਕੇ ਵੁਤ੍ਤਨਯੇਨੇਵ ਵਿਨਿਚ੍ਛਿਨਿਤਬ੍ਬਂ. ਦ੍ਵੀਸੁ ਤੀਸੁ ਪਨ ਪਟਿਪਾਟਿਯਾ ਠਿਤੇਸੁ ਆਰੋਪੇਤ੍ਵਾ ਠਪਿਤਂ ਕੁਨ੍ਤਂ ਵਾ ਭਿਨ੍ਦਿਵਾਲਂ ਵਾ ਅਗ੍ਗੇ ਵਾ ਬੁਨ੍ਦੇ ਵਾ ਗਹੇਤ੍ਵਾ ਆਕਡ੍ਢਤਿ, ਏਕਮੇਕਸ੍ਸ ਫੁਟ੍ਠੋਕਾਸਮਤ੍ਤੇ ਅਤਿਕ੍ਕਨ੍ਤੇ ਪਾਰਾਜਿਕਂ. ਫੁਟ੍ਠੋਕਾਸਮਤ੍ਤਮੇਵ ਹਿ ਤੇਸਂ ਠਾਨਂ ਹੋਤਿ, ਨ ਸਬ੍ਬੇ ਖੀਲਾ ਵਾ ਨਾਗਦਨ੍ਤਾ ਵਾ. ਭਿਤ੍ਤਿਅਭਿਮੁਖੋ ਠਤ੍ਵਾ ਮਜ੍ਝੇ ਗਹੇਤ੍ਵਾ ਆਕਡ੍ਢਤਿ, ਓਰਿਮਨ੍ਤੇਨ ਫੁਟ੍ਠੋਕਾਸਂ ਪਾਰਿਮਨ੍ਤੇਨ ਅਤਿਕ੍ਕਨ੍ਤਮਤ੍ਤੇ ਪਾਰਾਜਿਕਂ. ਪਰਤੋ ਪੇਲ੍ਲੇਨ੍ਤਸ੍ਸਾਪਿ ਏਸੇਵ ਨਯੋ. ਹਤ੍ਥੇਨ ਗਹੇਤ੍ਵਾ ਉਜੁਕਂ ਉਕ੍ਖਿਪਨ੍ਤੋ ਕੇਸਗ੍ਗਮਤ੍ਤਮ੍ਪਿ ਆਕਾਸਗਤਂ ਕਰੋਤਿ, ਪਾਰਾਜਿਕਂ. ਭਿਤ੍ਤਿਂ ਨਿਸ੍ਸਾਯ ਠਪਿਤਂ ਭਿਤ੍ਤਿਂ ਘਂਸਨ੍ਤੋ ਆਕਡ੍ਢਤਿ, ਅਗ੍ਗੇਨ ਫੁਟ੍ਠੋਕਾਸਂ ਬੁਨ੍ਦਂ, ਬੁਨ੍ਦੇਨ ਵਾ ਫੁਟ੍ਠੋਕਾਸਂ ਅਗ੍ਗਂ ਅਤਿਕ੍ਕਾਮੇਨ੍ਤਸ੍ਸ ਪਾਰਾਜਿਕਂ. ਭਿਤ੍ਤਿਅਭਿਮੁਖੋ ਠਤ੍ਵਾ ਆਕਡ੍ਢਨ੍ਤੋ ਏਕੇਨਨ੍ਤੇਨ ਫੁਟ੍ਠੋਕਾਸਂ ਅਪਰਨ੍ਤਂ ਅਤਿਕ੍ਕਾਮੇਤਿ, ਪਾਰਾਜਿਕਂ. ਉਜੁਕਂ ਉਕ੍ਖਿਪਨ੍ਤੋ ਕੇਸਗ੍ਗਮਤ੍ਤਂ ਆਕਾਸਗਤਂ ਕਰੋਤਿ, ਪਾਰਾਜਿਕਂ.
ਰੁਕ੍ਖੇ ਵਾ ਲਗ੍ਗਿਤਨ੍ਤਿ ਤਾਲਰੁਕ੍ਖਾਦੀਸੁ ਆਰੋਪੇਤ੍ਵਾ ਲਗ੍ਗਿਤੇ ਅਙ੍ਕੁਸਕਾਦੀਸੁ ਵੁਤ੍ਤਨਯੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਤਤ੍ਥਜਾਤਕਂ ਪਨ ਤਾਲਪਿਣ੍ਡਿਂ ਚਾਲੇਨ੍ਤਸ੍ਸ ਥੁਲ੍ਲਚ੍ਚਯਂ. ਯਸ੍ਮਿਂ ਫਲੇ ਪਾਰਾਜਿਕਵਤ੍ਥੁ ਪੂਰਤਿ, ਤਸ੍ਮਿਂ ਬਨ੍ਧਨਾ ਮੁਤ੍ਤਮਤ੍ਤੇ ਪਾਰਾਜਿਕਂ. ਪਿਣ੍ਡਿਂ ਛਿਨ੍ਦਤਿ, ਪਾਰਾਜਿਕਂ. ਅਗ੍ਗੇਨ ਪਣ੍ਣਨ੍ਤਰਂ ਆਰੋਪੇਤ੍ਵਾ ਠਪਿਤਾ ਦ੍ਵੇ ਠਾਨਾਨਿ ਲਭਤਿ – ਠਪਿਤਟ੍ਠਾਨਞ੍ਚ ਵਣ੍ਟਟ੍ਠਾਨਞ੍ਚ; ਤਤ੍ਥ ਵੁਤ੍ਤਨਯੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਯੋ ਪਨ ‘‘ਛਿਨ੍ਨਮਤ੍ਤਾ ਪਤਮਾਨਾ ਸਦ੍ਦਂ ਕਰੇਯ੍ਯਾ’’ਤਿ ਭਯੇਨ ਸਯਂ ਅਗ੍ਗੇਨ ਪਣ੍ਣਨ੍ਤਰਂ ਆਰੋਪੇਤ੍ਵਾ ਛਿਨ੍ਦਤਿ, ਛਿਨ੍ਨਮਤ੍ਤੇ ਪਾਰਾਜਿਕਂ. ਅਤ੍ਤਨਾ ਕਤਟ੍ਠਾਨਞ੍ਹਿ ਠਾਨਂ ਨ ਹੋਤਿ. ਏਤੇਨ ਉਪਾਯੇਨ ਸਬ੍ਬਰੁਕ੍ਖਾਨਂ ਪੁਪ੍ਫਫਲੇਸੁ ਵਿਨਿਚ੍ਛਯੋ ਵੇਦਿਤਬ੍ਬੋ.
ਪਤ੍ਤਾਧਾਰਕੇਪੀਤਿ ਏਤ੍ਥ ਰੁਕ੍ਖਾਧਾਰਕੋ ਵਾ ਹੋਤੁ ਵਲਯਾਧਾਰਕੋ ਵਾ ਦਣ੍ਡਾਧਾਰਕੋ ਵਾ ਯਂਕਿਞ੍ਚਿ ਪਤ੍ਤਟ੍ਠਪਨਕਂ ਪਚ੍ਛਿਕਾਪਿ ਹੋਤੁ ਪਤ੍ਤਾਧਾਰਕੋ ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਤਤ੍ਥ ਠਪਿਤਪਤ੍ਤਸ੍ਸ ਪਤ੍ਤੇਨ ਫੁਟ੍ਠੋਕਾਸੋ ਏਵ ਠਾਨਂ. ਤਤ੍ਥ ਰੁਕ੍ਖਾਧਾਰਕੇ ਪਞ੍ਚਹਾਕਾਰੇਹਿ ਠਾਨਪਰਿਚ੍ਛੇਦੋ ਹੋਤਿ. ਤਤ੍ਥ ਠਿਤਂ ਪਤ੍ਤਂ ਮੁਖਵਟ੍ਟਿਯਂ ਗਹੇਤ੍ਵਾ ਚਤੂਸੁ ਦਿਸਾਸੁ ਯਤੋ ਕੁਤੋਚਿ ਕਡ੍ਢਨ੍ਤੋ ਏਕੇਨਨ੍ਤੇਨ ਫੁਟ੍ਠੋਕਾਸਂ ਅਪਰਨ੍ਤਂ ਅਤਿਕ੍ਕਾਮੇਤਿ, ਪਾਰਾਜਿਕਂ. ਉਦ੍ਧਂ ਕੇਸਗ੍ਗਮਤ੍ਤਂ ਉਕ੍ਖਿਪਤੋ ਪਾਰਾਜਿਕਂ. ਸਹਾਧਾਰਕੇਨ ਹਰਨ੍ਤਸ੍ਸਾਪਿ ਏਸੇਵ ਨਯੋਤਿ.
ਵੇਹਾਸਟ੍ਠਕਥਾ ਨਿਟ੍ਠਿਤਾ.
ਉਦਕਟ੍ਠਕਥਾ
੯੮. ਉਦਕਟ੍ਠੇ – ਉਦਕੇ ਨਿਕ੍ਖਿਤ੍ਤਂ ਹੋਤੀਤਿ ਰਾਜਭਯਾਦਿਭੀਤੇਹਿ ਉਦਕੇਨ ਅਵਿਨਸ੍ਸਨਧਮ੍ਮੇਸੁ ਤਮ੍ਬਲੋਹਭਾਜਨਾਦੀਸੁ ਸੁਪ੍ਪਟਿਚ੍ਛਨ੍ਨਂ ਕਤ੍ਵਾ ਪੋਕ੍ਖਰਣੀਆਦੀਸੁ ਅਸਨ੍ਦਨਕੇ ਉਦਕੇ ਨਿਕ੍ਖਿਤ੍ਤਂ. ਤਸ੍ਸ ਪਤਿਟ੍ਠਿਤੋਕਾਸੋਯੇਵ ਠਾਨਂ, ਨ ਸਬ੍ਬਂ ਉਦਕਂ. ਗਚ੍ਛਤਿ ਵਾ ਆਪਤ੍ਤਿ ਦੁਕ੍ਕਟਸ੍ਸਾਤਿ ਅਗਮ੍ਭੀਰੇ ਉਦਕੇ ਪਦਸਾ ਗਚ੍ਛਨ੍ਤਸ੍ਸ ਪਦਵਾਰੇ ਪਦਵਾਰੇ ਦੁਕ੍ਕਟਂ. ਗਮ੍ਭੀਰੇ ਹਤ੍ਥੇਹਿ ਵਾ ਪਾਦੇਹਿ ਵਾ ਪਯੋਗਂ ਕਰੋਨ੍ਤਸ੍ਸ ਹਤ੍ਥਵਾਰੇਹਿ ਵਾ ਪਦਵਾਰੇਹਿ ਵਾ ਪਯੋਗੇ ਪਯੋਗੇ ਦੁਕ੍ਕਟਂ. ਏਸੇਵ ਨਯੋ ਕੁਮ੍ਭਿਗਹਣਤ੍ਥਂ ਨਿਮੁਜ੍ਜਨੁਮ੍ਮੁਜ੍ਜਨੇਸੁ. ਸਚੇ ਪਨ ਅਨ੍ਤਰਾ ਕਿਞ੍ਚਿ ਉਦਕਸਪ੍ਪਂ ਵਾ ਵਾਲ਼ਮਚ੍ਛਂ ਵਾ ਦਿਸ੍ਵਾ ਭੀਤੋ ਪਲਾਯਤਿ, ਅਨਾਪਤ੍ਤਿ. ਆਮਸਨਾਦੀਸੁ ਭੂਮਿਗਤਾਯ ਕੁਮ੍ਭਿਯਾ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਤਤ੍ਥ ਭੂਮਿਂ ਖਣਿਤ੍ਵਾ ਕਡ੍ਢਤਿ, ਇਧ ਕਦ੍ਦਮੇ ਓਸਾਰੇਤਿ. ਏਵਂ ਛਹਾਕਾਰੇਹਿ ਠਾਨਪਰਿਚ੍ਛੇਦੋ ਹੋਤਿ.
ਉਪ੍ਪਲਾਦੀਸੁ ਯਸ੍ਮਿਂ ਪੁਪ੍ਫੇ ਵਤ੍ਥੁਂ ਪੂਰੇਤਿ, ਤਸ੍ਮਿਂ ਛਿਨ੍ਨਮਤ੍ਤੇ ਪਾਰਾਜਿਕਂ. ਉਪ੍ਪਲਜਾਤਿਕਾਨਞ੍ਚੇਤ੍ਥ ਯਾਵ ਏਕਸ੍ਮਿਮ੍ਪਿ ਪਸ੍ਸੇ ਵਾਕੋ ਨ ਛਿਜ੍ਜਤਿ, ਤਾਵ ਰਕ੍ਖਤਿ. ਪਦੁਮਜਾਤਿਕਾਨਂ ਪਨ ਦਣ੍ਡੇ ਛਿਨ੍ਨੇ ਅਬ੍ਭਨ੍ਤਰੇ ਸੁਤ੍ਤਂ ਅਚ੍ਛਿਨ੍ਨਮ੍ਪਿ ਨ ਰਕ੍ਖਤਿ. ਸਾਮਿਕੇਹਿ ਛਿਨ੍ਦਿਤ੍ਵਾ ਠਪਿਤਾਨਿ ਉਪ੍ਪਲਾਦੀਨਿ ਹੋਨ੍ਤਿ, ਯਂ ਵਤ੍ਥੁਂ ਪੂਰੇਤਿ, ਤਸ੍ਮਿਂ ਉਦ੍ਧਟੇ ਪਾਰਾਜਿਕਂ. ਹਤ੍ਥਕਬਦ੍ਧਾਨਿ ਹੋਨ੍ਤਿ, ਯਸ੍ਮਿਂ ਹਤ੍ਥਕੇ ਵਤ੍ਥੁ ਪੂਰਤਿ, ਤਸ੍ਮਿਂ ਉਦ੍ਧਟੇ ਪਾਰਾਜਿਕਂ. ਭਾਰਬਦ੍ਧਾਨਿ ਹੋਨ੍ਤਿ, ਤਂ ਭਾਰਂ ਛਨ੍ਨਂ ਆਕਾਰਾਨਂ ਯੇਨ ਕੇਨਚਿ ਆਕਾਰੇਨ ਠਾਨਾ ਚਾਵੇਨ੍ਤਸ੍ਸ ਭੂਮਟ੍ਠਕੁਮ੍ਭਿਯਂ ਵੁਤ੍ਤਨਯੇਨ ਪਾਰਾਜਿਕਂ. ਦੀਘਨਾਲ਼ਾਨਿ ਉਪ੍ਪਲਾਦੀਨਿ ਹੋਨ੍ਤਿ, ਪੁਪ੍ਫੇਸੁ ਵਾ ਨਾਲ਼ੇਸੁ ਵਾ ਵੇਣਿਂ ਕਤ੍ਵਾ ਉਦਕਪਿਟ੍ਠੇ ਰਜ੍ਜੁਕੇਸੁ ਤਿਣਾਨਿ ਸਨ੍ਥਰਿਤ੍ਵਾ ਠਪੇਨ੍ਤਿ ਵਾ ਬਨ੍ਧਨ੍ਤਿ ਵਾ, ਤੇਸਂ ਦੀਘਤੋ ਪੁਪ੍ਫਗ੍ਗੇਨ ਚ ਨਾਲ਼ਨ੍ਤੇਨ ਚ ਤਿਰਿਯਂ ਪਰਿਯਨ੍ਤੇਹਿ ਹੇਟ੍ਠਾ ਪਤਿਟ੍ਠਿਤੋਕਾਸੇਨ ਉਦ੍ਧਂ ਉਪਰਿ ਠਿਤਸ੍ਸ ਪਿਟ੍ਠਿਯਾਤਿ ਛਹਾਕਾਰੇਹਿ ਠਾਨਾ ਚਾਵਨਪਰਿਚ੍ਛੇਦੋ ਵੇਦਿਤਬ੍ਬੋ.
ਯੋਪਿ ਉਦਕਪਿਟ੍ਠਿਯਂ ਠਪਿਤਪੁਪ੍ਫਕਲਾਪਂ ਉਦਕਂ ਚਾਲੇਤ੍ਵਾ ਵੀਚਿਂ ਉਟ੍ਠਾਪੇਤ੍ਵਾ ਕੇਸਗ੍ਗਮਤ੍ਤਮ੍ਪਿ ਯਥਾਠਿਤਟ੍ਠਾਨਤੋ ਚਾਵੇਤਿ, ਪਾਰਾਜਿਕਂ. ਅਥ ਪਨ ਪਰਿਕਪ੍ਪੇਤਿ ‘‘ਏਤ੍ਥ ਗਤਂ ਗਹੇਸ੍ਸਾਮੀ’’ਤਿ, ਰਕ੍ਖਤਿ ਤਾਵ; ਗਤਟ੍ਠਾਨੇ ਪਨ ਉਦ੍ਧਰਤੋ ਪਾਰਾਜਿਕਂ. ਉਦਕਤੋ ਅਚ੍ਚੁਗ੍ਗਤਸ੍ਸ ਪੁਪ੍ਫਸ੍ਸ ਸਕਲਮੁਦਕਂ ਠਾਨਂ, ਤਂ ਉਪ੍ਪਾਟੇਤ੍ਵਾ ਉਜੁਕਂ ਉਦ੍ਧਰਨ੍ਤਸ੍ਸ ਨਾਲ਼ਨ੍ਤੇ ਕੇਸਗ੍ਗਮਤ੍ਤਂ ਉਦਕਤੋ ਅਤਿਕ੍ਕਨ੍ਤੇ ਪਾਰਾਜਿਕਂ. ਪੁਪ੍ਫੇ ਗਹੇਤ੍ਵਾ ਅਪਨਾਮੇਤ੍ਵਾ ਆਕਡ੍ਢਨ੍ਤੋ ਉਪ੍ਪਾਟੇਤਿ, ਨ ਉਦਕਂ ਠਾਨਂ, ਉਪ੍ਪਾਟਿਤਮਤ੍ਤੇ ਪਾਰਾਜਿਕਂ. ਕਲਾਪਬਦ੍ਧਾਨਿ ਪੁਪ੍ਫਾਨਿ ਉਦਕਟ੍ਠਾਨੇ ਵਾ ਰੁਕ੍ਖੇ ਵਾ ਗਚ੍ਛੇ ਵਾ ਬਨ੍ਧਿਤ੍ਵਾ ਠਪੇਨ੍ਤਿ, ਬਨ੍ਧਨਂ ਅਮੋਚੇਤ੍ਵਾ ਇਤੋ ਚਿਤੋ ਚ ਕਰੋਨ੍ਤਸ੍ਸ ਥੁਲ੍ਲਚ੍ਚਯਂ, ਬਨ੍ਧਨੇ ਮੁਤ੍ਤਮਤ੍ਤੇ ਪਾਰਾਜਿਕਂ. ਪਠਮਂ ਬਨ੍ਧਨਂ ਮੋਚੇਤ੍ਵਾ ਪਚ੍ਛਾ ਹਰਤਿ, ਏਤ੍ਥ ਛਹਾਕਾਰੇਹਿ ਠਾਨਪਰਿਚ੍ਛੇਦੋਤਿ ਇਦਂ ਉਭਯਂ ਮਹਾਪਚ੍ਚਰਿਯਾਦੀਸੁ ਵੁਤ੍ਤਂ. ਪਦੁਮਿਨਿਯਂ ਪੁਪ੍ਫਾਨਿ ਸਹ ਪਦੁਮਿਨਿਂਯਾ ਗਣ੍ਹਿਤੁਕਾਮਸ੍ਸ ਪੁਪ੍ਫਨਾਲ਼ੇਹਿ ਚ ਪਤ੍ਤਨਾਲ਼ੇਹਿ ਚ ਫੁਟ੍ਠਉਦਕਵਸੇਨ ਉਦ੍ਧਞ੍ਚੇਵ ਤਿਰਿਯਞ੍ਚ ਠਾਨਪਰਿਚ੍ਛੇਦੋ ਵੇਦਿਤਬ੍ਬੋ. ਤਂ ਪਨਸ੍ਸ ਪਦੁਮਿਨਿਂ ਅਨੁਪ੍ਪਾਟੇਤ੍ਵਾ ਪੁਪ੍ਫਾਨਿ ਵਾ ਪਤ੍ਤਾਨਿ ਵਾ ਅਤ੍ਤਨੋ ਅਭਿਮੁਖਂ ਆਕਡ੍ਢਨ੍ਤਸ੍ਸ ਥੁਲ੍ਲਚ੍ਚਯਂ. ਉਪ੍ਪਾਟਿਤਮਤ੍ਤੇ ਪਾਰਾਜਿਕਂ.
ਪੁਪ੍ਫਪਤ੍ਤਨਾਲ਼ੇ ਠਾਨਤੋ ਅਚਾਵੇਤ੍ਵਾਪਿ ਪਠਮਂ ਪਦੁਮਿਨਿਂ ਉਪ੍ਪਾਟੇਨ੍ਤਸ੍ਸ ਥੁਲ੍ਲਚ੍ਚਯਂ. ਪਚ੍ਛਾ ਪੁਪ੍ਫਪਤ੍ਤਨਾਲ਼ੇਸੁ ਠਾਨਾ ਚਾਵਿਤੇਸੁ ਪਾਰਾਜਿਕਂ. ਉਪ੍ਪਾਟਿਤਾਯ ਪਦੁਮਿਨਿਯਾ ਪੁਪ੍ਫਂ ਗਣ੍ਹਨ੍ਤੋ ਪਨ ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬੋ. ਬਹਿ ਠਪਿਤੇ ਰਾਸਿਕਤਕਲਾਪਬਦ੍ਧਭਾਰਬਦ੍ਧਪੁਪ੍ਫੇਪਿ ਏਸੇਵ ਨਯੋ. ਭਿਸਂ ਵਾ ਮੁਲ਼ਾਲਂ ਵਾ ਯੇਨ ਵਤ੍ਥੁ ਪੂਰਤਿ, ਤਂ ਉਪ੍ਪਾਟੇਨ੍ਤਸ੍ਸ ਪਾਰਾਜਿਕਂ. ਕਦ੍ਦਮੇ ਫੁਟ੍ਠੋਕਾਸਵਸੇਨ ਚੇਤ੍ਥ ਠਾਨਂ ਪਰਿਚ੍ਛਿਨ੍ਦਿਤਬ੍ਬਂ. ਤਾਨਿ ਉਪ੍ਪਾਟੇਨ੍ਤਸ੍ਸ ਸੁਖੁਮਮ੍ਪਿ ਮੂਲਂ ਅਚ੍ਛਿਨ੍ਨਂ ਹੋਤਿ, ਰਕ੍ਖਤਿ ਤਾਵ. ਭਿਸਪਬ੍ਬੇ ਜਾਤਂ ਪਤ੍ਤਂ ਵਾ ਪੁਪ੍ਫਂ ਵਾ ਹੋਤਿ, ਤਮ੍ਪਿ ਰਕ੍ਖਤੀਤਿ ਮਹਾਅਟ੍ਠਕਥਾਯਮੇਵ ਵੁਤ੍ਤਂ. ਭਿਸਗਣ੍ਠਿਮ੍ਹਿ ਪਨ ਕਣ੍ਟਕੋ ਹੋਤਿ ਯੋਬ੍ਬਨਪ੍ਪਤ੍ਤਾਨਂ ਮੁਖਪਿਲ਼ਕਾ ਵਿਯ, ਅਯਂ ਅਦੀਘਤ੍ਤਾ ਨ ਰਕ੍ਖਤਿ. ਸੇਸਂ ਉਪ੍ਪਲਾਦੀਸੁ ਵੁਤ੍ਤਨਯਮੇਵ.
ਮਚ੍ਛਕਚ੍ਛਪਾਨਂ ਸਸ੍ਸਾਮਿਕਾਨਂ ਵਾਪਿਆਦੀਸੁ ਸਕਲਮੁਦਕਂ ਠਾਨਂ. ਤਸ੍ਮਾ ਯੋ ਪਟਿਜਗ੍ਗਨਟ੍ਠਾਨੇ ਸਸ੍ਸਾਮਿਕਂ ਮਚ੍ਛਂ ਬਲ਼ਿਸੇਨ ਵਾ ਜਾਲੇਨ ਵਾ ਕੁਮਨੇਨ ਵਾ ਹਤ੍ਥੇਨ ਵਾ ਗਣ੍ਹਾਤਿ, ਤਸ੍ਸ ਯੇਨ ਮਚ੍ਛੇਨ ਵਤ੍ਥੁ ਪੂਰਤਿ, ਤਸ੍ਮਿਂ ਕੇਸਗ੍ਗਮਤ੍ਤਮ੍ਪਿ ਉਦਕਤੋ ਉਦ੍ਧਟਮਤ੍ਤੇ ਪਾਰਾਜਿਕਂ. ਕੋਚਿ ਮਚ੍ਛੋ ਗਯ੍ਹਮਾਨੋ ਇਤੋ ਚਿਤੋ ਚ ਧਾਵਤਿ, ਆਕਾਸਂ ਵਾ ਉਪ੍ਪਤਤਿ, ਤੀਰੇ ਵਾ ਪਤਤਿ, ਆਕਾਸੇ ਵਾ ਠਿਤਂ ਤੀਰੇ ਵਾ ਪਤਿਤਂ ਗਣ੍ਹਤੋਪਿ ਪਾਰਾਜਿਕਮੇਵ. ਕਚ੍ਛਪਮ੍ਪਿ ਬਹਿ ਗੋਚਰਤ੍ਥਂ ਗਤਂ ਗਣ੍ਹਤੋ ਏਸੇਵ ਨਯੋ. ਉਦਕਟ੍ਠਂ ਪਨ ਉਦਕਾ ਮੋਚਯਤੋ ਪਾਰਾਜਿਕਂ.
ਤੇਸੁ ਤੇਸੁ ਪਨ ਜਨਪਦੇਸੁ ਸਬ੍ਬਸਾਧਾਰਣਸ੍ਸ ਮਹਾਤਲ਼ਾਕਸ੍ਸ ਨਿਦ੍ਧਮਨਤੁਮ੍ਬਂ ਨਿਸ੍ਸਾਯ ਸਬ੍ਬਸਾਧਾਰਣਮੇਵ ਕੁਨ੍ਨਦੀਸਦਿਸਂ ਉਦਕਵਾਹਕਂ ਖਣਨ੍ਤਿ. ਤਤੋ ਖੁਦ੍ਦਕਮਾਤਿਕਾਯੋ ਨੀਹਰਿਤ੍ਵਾ ਮਾਤਿਕਾਕੋਟਿਯਂ ਅਤ੍ਤਨੋ ਅਤ੍ਤਨੋ ਵਲ਼ਞ੍ਜਨਤ੍ਥਾਯ ਆਵਾਟੇ ਖਣਨ੍ਤਿ. ਤੇਸਂ ਪਨ ਯਦਾ ਉਦਕੇਨ ਅਤ੍ਥੋ ਹੋਤਿ, ਤਦਾ ਆਵਾਟੇ ਖੁਦ੍ਦਕਮਾਤਿਕਾਯੋ ਉਦਕਵਾਹਕਞ੍ਚ ਸੋਧੇਤ੍ਵਾ ਨਿਦ੍ਧਮਨਤੁਮ੍ਬਂ ਉਗ੍ਘਾਟੇਨ੍ਤਿ. ਤਤੋ ਉਦਕੇਨ ਸਦ੍ਧਿਂ ਮਚ੍ਛਾ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਆਵਾਟੇ ਪਤ੍ਵਾ ਵਸਨ੍ਤਿ. ਤਤ੍ਥ ਤਲ਼ਾਕੇ ਚ ਉਦਕਵਾਹਕੇਸੁ ਚ ਮਚ੍ਛੇ ਗਣ੍ਹਨ੍ਤੇ ਨ ਵਾਰੇਨ੍ਤਿ. ਖੁਦ੍ਦਕਾਸੁ ਪਨ ਅਤ੍ਤਨੋ ਅਤ੍ਤਨੋ ਮਾਤਿਕਾਸੁ ਉਦਕਆਵਾਟੇਸੁ ਚ ਪਵਿਟ੍ਠਮਚ੍ਛੇ ਗਣ੍ਹਿਤੁਂ ਨ ਦੇਨ੍ਤਿ, ਵਾਰੇਨ੍ਤਿ; ਤਤ੍ਥ ਯੋ ਤਲ਼ਾਕੇ ਵਾ ਨਿਦ੍ਧਮਨਤੁਮ੍ਬੇ ਵਾ ਉਦਕਵਾਹਕੇ ਵਾ ਮਚ੍ਛੇ ਗਣ੍ਹਾਤਿ, ਅਵਹਾਰੇਨ ਸੋ ਨ ਕਾਰੇਤਬ੍ਬੋ. ਖੁਦ੍ਦਕਮਾਤਿਕਾਸੁ ਪਨ ਆਵਾਟੇਸੁ ਵਾ ਪਵਿਟ੍ਠਂ ਗਣ੍ਹਨ੍ਤੋ ਗਹਿਤਸ੍ਸ ਅਗ੍ਘਵਸੇਨ ਕਾਰੇਤਬ੍ਬੋ. ਸਚੇ ਤਤੋ ਗਯ੍ਹਮਾਨੋ ਮਚ੍ਛੋ ਆਕਾਸੇ ਵਾ ਉਪ੍ਪਤਤਿ, ਤੀਰੇ ਵਾ ਪਤਤਿ, ਤਂ ਆਕਾਸਟ੍ਠਂ ਵਾ ਤੀਰਟ੍ਠਂ ਵਾ ਉਦਕਵਿਨਿਮੁਤ੍ਤਂ ਗਣ੍ਹਤੋ ਅਵਹਾਰੋ ਨਤ੍ਥਿ. ਕਸ੍ਮਾ? ਯਸ੍ਮਾ ਅਤ੍ਤਨੋ ਪਰਿਗ੍ਗਹਟ੍ਠਾਨੇ ਠਿਤਸ੍ਸੇਵ ਤੇ ਸਾਮਿਕਾ. ਏਵਰੂਪਾ ਹਿ ਤਤ੍ਥ ਕਤਿਕਾ. ਕਚ੍ਛਪੇਪਿ ਏਸੇਵ ਨਯੋ.
ਸਚੇ ਪਨ ਮਚ੍ਛੋ ਗਯ੍ਹਮਾਨੋ ਆਵਾਟਤੋ ਖੁਦ੍ਦਕਮਾਤਿਕਂ ਆਰੁਹਤਿ, ਤਤ੍ਥ ਨਂ ਗਣ੍ਹਤੋਪਿ ਅਵਹਾਰੋਯੇਵ. ਖੁਦ੍ਦਕਮਾਤਿਕਾਤੋ ਪਨ ਉਦਕਵਾਹਕਂ, ਤਤੋ ਚ ਤਲ਼ਾਕਂ ਆਰੂਲ਼੍ਹਂ ਗਣ੍ਹਤੋ ਅਵਹਾਰੋ ਨਤ੍ਥਿ. ਯੋ ਆਵਾਟਤੋ ਭਤ੍ਤਸਿਤ੍ਥੇਹਿ ਪਲੋਭੇਤ੍ਵਾ ਮਾਤਿਕਂ ਆਰੋਪੇਤ੍ਵਾ ਗਣ੍ਹਾਤਿ, ਅਵਹਾਰੋਵ. ਤਤੋ ਪਨ ਪਲੋਭੇਤ੍ਵਾ ਉਦਕਵਾਹਕਂ ਆਰੋਪੇਤ੍ਵਾ ਗਣ੍ਹਨ੍ਤਸ੍ਸ ਅਵਹਾਰੋ ਨਤ੍ਥਿ. ਕੇਚਿ ਪਨ ਕੁਤੋਚਿਦੇਵ ਸਬ੍ਬਸਾਧਾਰਣਟ੍ਠਾਨਤੋ ਮਚ੍ਛੇ ਆਨੇਤ੍ਵਾ ਪਚ੍ਛਿਮਵਤ੍ਥੁਭਾਗੇ ਉਦਕਾਵਾਟੇ ਖਿਪਿਤ੍ਵਾ ਪੋਸੇਤ੍ਵਾ ਦਿਵਸੇ ਦਿਵਸੇ ਦ੍ਵੇ ਤੀਣਿ ਉਤ੍ਤਰਿਭਙ੍ਗਤ੍ਥਾਯ ਮਾਰੇਨ੍ਤਿ. ਏਵਰੂਪਂ ਮਚ੍ਛਂ ਉਦਕੇ ਵਾ ਆਕਾਸੇ ਵਾ ਤੀਰੇ ਵਾ ਯਤ੍ਥ ਕਤ੍ਥਚਿ ਠਿਤਂ ਗਣ੍ਹਤੋ ਅਵਹਾਰੋ ਏਵ. ਕਚ੍ਛਪੇਪਿ ਏਸੇਵ ਨਯੋ.