੮. ਕੁਮਾਰਿਭੂਤਵਗ੍ਗੋ

੧-੨-੩. ਪਠਮਦੁਤਿਯਤਤਿਯਸਿਕ੍ਖਾਪਦਵਣ੍ਣਨਾ

੧੧੧੯. ਕੁਮਾਰਿਭੂਤਵਗ੍ਗਸ੍ਸ ਪਠਮਦੁਤਿਯਤਤਿਯਸਿਕ੍ਖਾਪਦਾਨਿ ਤੀਣਿ ਤੀਹਿ ਗਿਹਿਗਤਸਿਕ੍ਖਾਪਦੇਹਿ ਸਦਿਸਾਨਿ. ਯਾ ਪਨ ਤਾ ਸਬ੍ਬਪਠਮਾ ਦ੍ਵੇ ਮਹਾਸਿਕ੍ਖਮਾਨਾ, ਤਾ ਅਤਿਕ੍ਕਨ੍ਤਵੀਸਤਿਵਸ੍ਸਾਤਿ ਵੇਦਿਤਬ੍ਬਾ. ਤਾ ਗਿਹਿਗਤਾ ਵਾ ਹੋਨ੍ਤੁ ਅਗਿਹਿਗਤਾ ਵਾ, ਸਿਕ੍ਖਮਾਨਾ ਇਚ੍ਚੇਵ ਵਤ੍ਤਬ੍ਬਾ, ਗਿਹਿਗਤਾਤਿ ਵਾ ਕੁਮਾਰਿਭੂਤਾਤਿ ਵਾ ਨ ਵਤ੍ਤਬ੍ਬਾ. ਗਿਹਿਗਤਾਯ ਦਸਵਸ੍ਸਕਾਲੇ ਸਿਕ੍ਖਾਸਮ੍ਮੁਤਿਂ ਦਤ੍ਵਾ ਦ੍ਵਾਦਸਵਸ੍ਸਕਾਲੇ ਉਪਸਮ੍ਪਦਾ ਕਾਤਬ੍ਬਾ. ਏਕਾਦਸਵਸ੍ਸਕਾਲੇ ਦਤ੍ਵਾ ਤੇਰਸਵਸ੍ਸਕਾਲੇ ਕਾਤਬ੍ਬਾ, ਦ੍ਵਾਦਸਤੇਰਸਚੁਦ੍ਦਸਪਨ੍ਨਰਸਸੋਲ਼ਸਸਤ੍ਤਰਸਅਟ੍ਠਾਰਸਵਸ੍ਸਕਾਲੇ ਸਮ੍ਮੁਤਿਂ ਦਤ੍ਵਾ ਵੀਸਤਿਵਸ੍ਸਕਾਲੇ ਉਪਸਮ੍ਪਦਾ ਕਾਤਬ੍ਬਾ. ਅਟ੍ਠਾਰਸਵਸ੍ਸਕਾਲਤੋ ਪਟ੍ਠਾਯ ਚ ਪਨਾਯਂ ਗਿਹਿਗਤਾਤਿਪਿ ਕੁਮਾਰਿਭੂਤਾਤਿਪਿ ਵਤ੍ਤੁਂ ਵਟ੍ਟਤਿ, ਕੁਮਾਰਿਭੂਤਾ ਪਨ ਗਿਹਿਗਤਾਤਿ ਨ ਵਤ੍ਤਬ੍ਬਾ, ਕੁਮਾਰਿਭੂਤਾ ਇਚ੍ਚੇਵ ਵਤ੍ਤਬ੍ਬਾ. ਮਹਾਸਿਕ੍ਖਮਾਨਾ ਪਨ ਗਿਹਿਗਤਾਤਿਪਿ ਵਤ੍ਤੁਂ ਨ ਵਟ੍ਟਤਿ, ਕੁਮਾਰਿਭੂਤਾਤਿਪਿ ਵਤ੍ਤੁਂ ਨ ਵਟ੍ਟਤਿ, ਸਿਕ੍ਖਾਸਮ੍ਮੁਤਿਦਾਨਵਸੇਨ ਪਨ ਤਿਸ੍ਸੋਪਿ ਸਿਕ੍ਖਮਾਨਾਤਿ ਵਤ੍ਤੁਂ ਵਟ੍ਟਤਿ.

ਪਠਮਦੁਤਿਯਤਤਿਯਾਨਿ.

੪-੫-੬. ਚਤੁਤ੍ਥਪਞ੍ਚਮਛਟ੍ਠਸਿਕ੍ਖਾਪਦਵਣ੍ਣਨਾ

੧੧੩੬. ਚਤੁਤ੍ਥਪਞ੍ਚਮਛਟ੍ਠੇਸੁ ਸਬ੍ਬਂ ਉਤ੍ਤਾਨਮੇਵ. ਸਬ੍ਬਾਨਿ ਤਿਸਮੁਟ੍ਠਾਨਾਨਿ ਚਤੁਤ੍ਥਂ ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ. ਪਞ੍ਚਮਂ ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ. ਯਞ੍ਚੇਤ੍ਥ ਸਙ੍ਘੇਨ ਪਰਿਚ੍ਛਿਨ੍ਦਿਤਬ੍ਬਾਤਿ ਵੁਤ੍ਤਂ, ਤਸ੍ਸ ਉਪਪਰਿਕ੍ਖਿਤਬ੍ਬਾਤਿ ਅਤ੍ਥੋ. ਛਟ੍ਠਂ ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ ਦੁਕ੍ਖਵੇਦਨਨ੍ਤਿ. ਯਂ ਪਨੇਤ੍ਥ ‘‘ਪਰਿਚ੍ਛਿਨ੍ਦਿਤ੍ਵਾ’’ਤਿ ਵੁਤ੍ਤਂ, ਤਸ੍ਸ ਉਪਪਰਿਕ੍ਖਿਤ੍ਵਾਤਿ ਅਤ੍ਥੋ.

ਚਤੁਤ੍ਥਪਞ੍ਚਮਛਟ੍ਠਸਿਕ੍ਖਾਪਦਾਨਿ

੭. ਸਤ੍ਤਮਸਿਕ੍ਖਾਪਦਵਣ੍ਣਨਾ

੧੧੫੦. ਸਤ੍ਤਮੇ – ਸਬ੍ਬਂ ਉਤ੍ਤਾਨਮੇਵ. ਧੁਰਨਿਕ੍ਖੇਪਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਸਤ੍ਤਮਸਿਕ੍ਖਾਪਦਂ.

੮. ਅਟ੍ਠਮਸਿਕ੍ਖਾਪਦਵਣ੍ਣਨਾ

੧੧੫੪. ਅਟ੍ਠਮੇਪਿ – ਸਬ੍ਬਂ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿਪਿ ਅਨਨ੍ਤਰਸਦਿਸਾਨੇਵਾਤਿ.

ਅਟ੍ਠਮਸਿਕ੍ਖਾਪਦਂ.

੯. ਨਵਮਸਿਕ੍ਖਾਪਦਵਣ੍ਣਨਾ

੧੧੫੮. ਨਵਮੇ – ਸੋਕਾਵਾਸਨ੍ਤਿ ਸਙ੍ਕੇਤਂ ਕਤ੍ਵਾ ਅਗਚ੍ਛਮਾਨਾ ਪੁਰਿਸਾਨਂ ਅਨ੍ਤੋ ਸੋਕਂ ਪਵੇਸੇਤੀਤਿ ਸੋਕਾਵਾਸਾ, ਤਂ ਸੋਕਾਵਾਸਂ. ਤੇਨੇਵਾਹ – ‘‘ਸੋਕਾਵਾਸਾ ਨਾਮ ਪਰੇਸਂ ਦੁਕ੍ਖਂ ਉਪ੍ਪਾਦੇਤੀ’’ਤਿ. ਅਥ ਵਾ ਘਰਂ ਵਿਯ ਘਰਸਾਮਿਕਾ, ਅਯਮ੍ਪਿ ਪੁਰਿਸਸਮਾਗਮਂ ਅਲਭਮਾਨਾ ਸੋਕਂ ਆਵਿਸਤਿ. ਇਤਿ ਯਂ ਆਵਿਸਤਿ, ਸ੍ਵਾਸ੍ਸਾ ਆਵਾਸੋ ਹੋਤੀਤਿ ਸੋਕਾਵਾਸਾ. ਤੇਨਾਹ – ‘‘ਸੋਕਂ ਆਵਿਸਤੀ’’ਤਿ. ਅਜਾਨਨ੍ਤੀਤਿ ਏਦਿਸਾ ਅਯਨ੍ਤਿ ਅਜਾਨਮਾਨਾ. ਸੇਸਂ ਉਤ੍ਤਾਨਮੇਵ. ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਨਵਮਸਿਕ੍ਖਾਪਦਂ.

੧੦. ਦਸਮਸਿਕ੍ਖਾਪਦਵਣ੍ਣਨਾ

੧੧੬੪. ਦਸਮੇ – ਅਨਾਪੁਚ੍ਛਾਤਿ ਅਨਾਪੁਚ੍ਛਿਤ੍ਵਾ. ਭਿਕ੍ਖੁਨੀਹਿ ਦ੍ਵਿਕ੍ਖਤ੍ਤੁਂ ਆਪੁਚ੍ਛਿਤਬ੍ਬਂ – ਪਬ੍ਬਜ੍ਜਾਕਾਲੇ ਚ ਉਪਸਮ੍ਪਦਾਕਾਲੇ ਚ, ਭਿਕ੍ਖੂਨਂ ਪਨ ਸਕਿਂ ਆਪੁਚ੍ਛਿਤੇਪਿ ਵਟ੍ਟਤਿ.

੧੧੬੫. ਅਜਾਨਨ੍ਤੀਤਿ ਮਾਤਾਦੀਨਂ ਅਤ੍ਥਿਭਾਵਂ ਅਜਾਨਨ੍ਤੀ. ਸੇਸਂ ਉਤ੍ਤਾਨਮੇਵ. ਇਦਂ ਅਪੁਬ੍ਬਸਮੁਟ੍ਠਾਨਸੀਸਂ. ਚਤੁਸਮੁਟ੍ਠਾਨਂ – ਵਾਚਤੋ ਕਾਯਵਾਚਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਕਥਂ? ਅਬ੍ਭਾਨਕਮ੍ਮਾਦੀਸੁ ਕੇਨਚਿਦੇਵ ਕਰਣੀਯੇਨ ਖਣ੍ਡਸੀਮਾਯਂ ਨਿਸਿਨ੍ਨਾ ‘‘ਪਕ੍ਕੋਸਥ ਸਿਕ੍ਖਮਾਨਂ, ਇਧੇਵ ਨਂ ਉਪਸਮ੍ਪਾਦੇਸ੍ਸਾਮਾ’’ਤਿ ਉਪਸਮ੍ਪਾਦੇਤਿ; ਏਵਂ ਵਾਚਤੋ ਸਮੁਟ੍ਠਾਤਿ. ਉਪਸ੍ਸਯਤੋ ਪਟ੍ਠਾਯ ਉਪਸਮ੍ਪਾਦੇਸ੍ਸਾਮੀਤਿ ਵਤ੍ਵਾ ਖਣ੍ਡਸੀਮਂ ਗਚ੍ਛਨ੍ਤਿਯਾ ਕਾਯਵਾਚਤੋ ਸਮੁਟ੍ਠਾਤਿ. ਦ੍ਵੀਸੁਪਿ ਠਾਨੇਸੁ ਪਣ੍ਣਤ੍ਤਿਭਾਵਂ ਜਾਨਿਤ੍ਵਾਵ ਵੀਤਿਕ੍ਕਮਂ ਕਰੋਨ੍ਤਿਯਾ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਅਨਨੁਜਾਨਾਪੇਤ੍ਵਾ ਉਪਸਮ੍ਪਾਦਨਤੋ ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਦਸਮਸਿਕ੍ਖਾਪਦਂ.

੧੧. ਏਕਾਦਸਮਸਿਕ੍ਖਾਪਦਵਣ੍ਣਨਾ

੧੧੬੭-੮. ਏਕਾਦਸਮੇ – ਪਾਰਿਵਾਸਿਕਛਨ੍ਦਦਾਨੇਨਾਤਿ ਪਾਰਿਵਾਸਿਯੇਨ ਛਨ੍ਦਦਾਨੇਨ. ਤਤ੍ਥ ਚਤੁਬ੍ਬਿਧਂ ਪਾਰਿਵਾਸਿਯਂ – ਪਰਿਸਪਾਰਿਵਾਸਿਯਂ, ਰਤ੍ਤਿਪਾਰਿਵਾਸਿਯਂ, ਛਨ੍ਦਪਾਰਿਵਾਸਿਯਂ, ਅਜ੍ਝਾਸਯਪਾਰਿਵਾਸਿਯਨ੍ਤਿ. ਤਤ੍ਥ ਪਰਿਸਪਾਰਿਵਾਸਿਯਂ ਨਾਮ ਭਿਕ੍ਖੂ ਕੇਨਚਿਦੇਵ ਕਰਣੀਯੇਨ ਸਨ੍ਨਿਪਤਿਤਾ ਹੋਨ੍ਤਿ, ਅਥ ਮੇਘੋ ਵਾ ਉਟ੍ਠਾਤਿ, ਉਸ੍ਸਾਰਣਾ ਵਾ ਕਰਿਯਤਿ, ਮਨੁਸ੍ਸਾ ਵਾ ਅਜ੍ਝੋਤ੍ਥਰਨ੍ਤਾ ਆਗਚ੍ਛਨ੍ਤਿ, ਭਿਕ੍ਖੂ ‘‘ਅਨੋਕਾਸਾ ਮਯਂ ਅਞ੍ਞਤ੍ਰ ਗਚ੍ਛਾਮਾ’’ਤਿ ਛਨ੍ਦਂ ਅਵਿਸ੍ਸਜ੍ਜੇਤ੍ਵਾਵ ਉਟ੍ਠਹਨ੍ਤਿ. ਇਦਂ ਪਰਿਸਪਾਰਿਵਾਸਿਯਂ. ਕਿਞ੍ਚਾਪਿ ਪਰਿਸਪਾਰਿਵਾਸਿਯਂ, ਛਨ੍ਦਸ੍ਸ ਪਨ ਅਵਿਸ੍ਸਟ੍ਠਤ੍ਤਾ ਕਮ੍ਮਂ ਕਾਤੁਂ ਵਟ੍ਟਤਿ.

ਪੁਨ ਭਿਕ੍ਖੂ ‘‘ਉਪੋਸਥਾਦੀਨਿ ਕਰਿਸ੍ਸਾਮਾ’’ਤਿ ਰਤ੍ਤਿਂ ਸਨ੍ਨਿਪਤਿਤ੍ਵਾ ‘‘ਯਾਵ ਸਬ੍ਬੇ ਸਨ੍ਨਿਪਤਨ੍ਤਿ, ਤਾਵ ਧਮ੍ਮਂ ਸੁਣਿਸ੍ਸਾਮਾ’’ਤਿ ਏਕਂ ਅਜ੍ਝੇਸਨ੍ਤਿ, ਤਸ੍ਮਿਂ ਧਮ੍ਮਕਥਂ ਕਥੇਨ੍ਤੇਯੇਵ ਅਰੁਣੋ ਉਗ੍ਗਚ੍ਛਤਿ. ਸਚੇ ‘‘ਚਾਤੁਦ੍ਦਸਿਕਂ ਉਪੋਸਥਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ ‘‘ਪਨ੍ਨਰਸੋ’’ਤਿ ਕਾਤੁਂ ਵਟ੍ਟਤਿ. ਸਚੇ ਪਨ੍ਨਰਸਿਕਂ ਕਾਤੁਂ ਨਿਸਿਨ੍ਨਾ ਪਾਟਿਪਦੇ ਅਨੁਪੋਸਥੇ ਉਪੋਸਥਂ ਕਾਤੁਂ ਨ ਵਟ੍ਟਤਿ, ਅਞ੍ਞਂ ਪਨ ਸਙ੍ਘਕਿਚ੍ਚਂ ਕਾਤੁਂ ਵਟ੍ਟਤਿ. ਇਦਂ ਰਤ੍ਤਿਪਾਰਿਵਾਸਿਯਂ ਨਾਮ.

ਪੁਨ ਭਿਕ੍ਖੂ ‘‘ਕਿਞ੍ਚਿਦੇਵ ਅਬ੍ਭਾਨਾਦਿਸਙ੍ਘਕਮ੍ਮਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ ਹੋਨ੍ਤਿ, ਤਤ੍ਰੇਕੋ ਨਕ੍ਖਤ੍ਤਪਾਠਕੋ ਭਿਕ੍ਖੁ ਏਵਂ ਵਦਤਿ – ‘‘ਅਜ੍ਜ ਨਕ੍ਖਤ੍ਤਂ ਦਾਰੁਣਂ, ਮਾ ਇਮਂ ਕਮ੍ਮਂ ਕਰੋਥਾ’’ਤਿ. ਤੇ ਤਸ੍ਸ ਵਚਨੇਨ ਛਨ੍ਦਂ ਵਿਸ੍ਸਜ੍ਜੇਤ੍ਵਾ ਤਤ੍ਥੇਵ ਨਿਸਿਨ੍ਨਾ ਹੋਨ੍ਤਿ. ਅਥਞ੍ਞੋ ਆਗਨ੍ਤ੍ਵਾ ‘‘ਨਕ੍ਖਤ੍ਤਂ ਪਟਿਮਾਨੇਨ੍ਤਂ ਅਤ੍ਥੋ ਬਾਲਂ ਉਪਚ੍ਚਗਾ’’ਤਿ (ਜਾ. ੧.੧.੪੯) ਵਤ੍ਵਾ ‘‘ਕਿਂ ਨਕ੍ਖਤ੍ਤੇਨ ਕਰੋਥਾ’’ਤਿ ਵਦਤਿ. ਇਦਂ ਛਨ੍ਦਪਾਰਿਵਾਸਿਯਞ੍ਚੇਵ ਅਜ੍ਝਾਸਯਪਾਰਿਵਾਸਿਯਞ੍ਚ. ਏਤਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਅਨਾਨੇਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ.

ਵੁਟ੍ਠਿਤਾਯ ਪਰਿਸਾਯਾਤਿ ਛਨ੍ਦਂ ਵਿਸ੍ਸਜ੍ਜੇਤ੍ਵਾ ਕਾਯੇਨ ਵਾ ਵਾਚਾਯ ਵਾ ਛਨ੍ਦਵਿਸ੍ਸਜ੍ਜਨਮਤ੍ਤੇਨੇਵ ਵਾ ਉਟ੍ਠਿਤਾਯ ਪਰਿਸਾਯ.

੧੧੬੯. ਅਨਾਪਤ੍ਤਿ ਅਵੁਟ੍ਠਿਤਾਯ ਪਰਿਸਾਯਾਤਿ ਛਨ੍ਦਂ ਅਵਿਸ੍ਸਜ੍ਜੇਤ੍ਵਾ ਅਵੁਟ੍ਠਿਤਾਯ ਅਨਾਪਤ੍ਤਿ. ਸੇਸਂ ਉਤ੍ਤਾਨਮੇਵ. ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਏਕਾਦਸਮਸਿਕ੍ਖਾਪਦਂ.

੧੨. ਦ੍ਵਾਦਸਮਸਿਕ੍ਖਾਪਦਵਣ੍ਣਨਾ

੧੧੭੦. ਦ੍ਵਾਦਸਮੇ – ਉਪਸ੍ਸਯੋ ਨ ਸਮ੍ਮਤੀਤਿ ਵਸਨੋਕਾਸੋ ਨਪ੍ਪਹੋਤਿ. ਸੇਸਂ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿ ਅਨਨ੍ਤਰਸਦਿਸਾਨੇਵਾਤਿ.

ਦ੍ਵਾਦਸਮਸਿਕ੍ਖਾਪਦਂ.

੧੩. ਤੇਰਸਮਸਿਕ੍ਖਾਪਦਵਣ੍ਣਨਾ

੧੧੭੫. ਤੇਰਸਮੇ – ਏਕਂ ਵਸ੍ਸਂ ਦ੍ਵੇਤਿ ਏਕਨ੍ਤਰਿਕੇ ਏਕਸ੍ਮਿਂ ਸਂਵਚ੍ਛਰੇ ਦ੍ਵੇ ਵੁਟ੍ਠਾਪੇਤਿ. ਸੇਸਂ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿਪਿ ਵੁਤ੍ਤਸਦਿਸਾਨੇਵਾਤਿ.

ਤੇਰਸਮਸਿਕ੍ਖਾਪਦਂ.

ਕੁਮਾਰਿਭੂਤਵਗ੍ਗੋ ਅਟ੍ਠਮੋ.