੯. ਛਤ੍ਤੁਪਾਹਨਵਗ੍ਗੋ
੧. ਪਠਮਸਿਕ੍ਖਾਪਦਵਣ੍ਣਨਾ
੧੧੮੧. ਛਤ੍ਤਵਗ੍ਗਸ੍ਸ ਪਠਮਸਿਕ੍ਖਾਪਦੇ – ਸਕਿਮ੍ਪਿ ਧਾਰੇਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਮਗ੍ਗਗਮਨੇ ਏਕਪਯੋਗੇਨੇਵ ਦਿਵਸਮ੍ਪਿ ਧਾਰੇਤਿ, ਏਕਾਵ ਆਪਤ੍ਤਿ. ਸਚੇ ਕਦ੍ਦਮਾਦੀਨਿ ਪਤ੍ਵਾ ਉਪਾਹਨਾ ਓਮੁਞ੍ਚਿਤ੍ਵਾ ਛਤ੍ਤਮੇਵ ਧਾਰੇਨ੍ਤੀ ਗਚ੍ਛਤਿ, ਦੁਕ੍ਕਟਂ. ਅਥਾਪਿ ਗਚ੍ਛਾਦੀਨਿ ਦਿਸ੍ਵਾ ਛਤ੍ਤਂ ਅਪਨਾਮੇਤ੍ਵਾ ਉਪਾਹਨਾਰੁਲ਼੍ਹਾਵ ਗਚ੍ਛਤਿ, ਦੁਕ੍ਕਟਮੇਵ. ਸਚੇ ਛਤ੍ਤਮ੍ਪਿ ਅਪਨਾਮੇਤ੍ਵਾ ਉਪਾਹਨਾਪਿ ਓਮੁਞ੍ਚਿਤ੍ਵਾ ਪੁਨ ਧਾਰੇਤਿ, ਪੁਨ ਪਾਚਿਤ੍ਤਿਯਂ. ਏਵਂ ਪਯੋਗਗਣਨਾਯ ਆਪਤ੍ਤਿਯੋ ਵੇਦਿਤਬ੍ਬਾ. ਸੇਸਂ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਪਠਮਸਿਕ੍ਖਾਪਦਂ.
੨. ਦੁਤਿਯਸਿਕ੍ਖਾਪਦਵਣ੍ਣਨਾ
੧੧੮੪. ਦੁਤਿਯੇ – ਯਾਨੇਨ ਯਾਯਨ੍ਤੀਤਿ ਏਤ੍ਥਾਪਿ ਓਰੋਹਿਤ੍ਵਾ ਪੁਨਪ੍ਪੁਨਂ ਅਭਿਰੁਹਨ੍ਤਿਯਾ ਪਯੋਗਗਣਨਾਯ ਆਪਤ੍ਤਿਯੋ ਵੇਦਿਤਬ੍ਬਾ. ਸੇਸਂ ਪਠਮੇ ਵੁਤ੍ਤਨਯਮੇਵਾਤਿ.
ਦੁਤਿਯਸਿਕ੍ਖਾਪਦਂ.
੩. ਤਤਿਯਸਿਕ੍ਖਾਪਦਵਣ੍ਣਨਾ
੧੧੯੦. ਤਤਿਯੇ – ਵਿਪ੍ਪਕਿਰਿਯਿਂਸੂਤਿ ਮਣਯੋ ਵਿਪ੍ਪਕਿਣ੍ਣਾ. ਇਧਾਪਿ ਓਮੁਞ੍ਚਿਤ੍ਵਾ ਧਾਰੇਨ੍ਤਿਯਾ ਪਯੋਗਗਣਨਾਯ ਆਪਤ੍ਤਿਯੋ. ਸਮੁਟ੍ਠਾਨਾਦੀਨਿ ਵੁਤ੍ਤਨਯਾਨੇਵ. ਕੇਵਲਂ ਇਧ ਅਕੁਸਲਚਿਤ੍ਤਂ ਹੋਤੀਤਿ.
ਤਤਿਯਸਿਕ੍ਖਾਪਦਂ.
੪. ਚਤੁਤ੍ਥਸਿਕ੍ਖਾਪਦਵਣ੍ਣਨਾ
੧੧੯੪. ਚਤੁਤ੍ਥੇ – ਸੀਸੂਪਗਾਦੀਸੁ ਯਂ ਯਂ ਧਾਰੇਤਿ, ਤਸ੍ਸ ਤਸ੍ਸ ਵਸੇਨ ਵਤ੍ਥੁਗਣਨਾਯ ਆਪਤ੍ਤਿਯੋ ਵੇਦਿਤਬ੍ਬਾ. ਸੇਸਂ ਤਤਿਯੇ ਵੁਤ੍ਤਨਯਮੇਵਾਤਿ.
ਚਤੁਤ੍ਥਸਿਕ੍ਖਾਪਦਂ.
੫. ਪਞ੍ਚਮਸਿਕ੍ਖਾਪਦਵਣ੍ਣਨਾ
੧੧੯੯. ਪਞ੍ਚਮੇ – ਗਨ੍ਧਵਣ੍ਣਕੇਨਾਤਿ ਗਨ੍ਧੇਨ ਚ ਵਣ੍ਣਕੇਨ ਚ. ਸੇਸਂ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿ ਤਤਿਯਸਦਿਸਾਨੇਵਾਤਿ.
ਪਞ੍ਚਮਸਿਕ੍ਖਾਪਦਂ.
੬. ਛਟ੍ਠਸਿਕ੍ਖਾਪਦਵਣ੍ਣਨਾ
੧੨੦੨. ਛਟ੍ਠੇ – ਸਬ੍ਬਂ ਪਞ੍ਚਮੇ ਵੁਤ੍ਤਸਦਿਸਮੇਵਾਤਿ.
ਛਟ੍ਠਸਿਕ੍ਖਾਪਦਂ.
੭. ਸਤ੍ਤਮਸਿਕ੍ਖਾਪਦਵਣ੍ਣਨਾ
੧੨੦੮-੯. ਸਤ੍ਤਮੇ – ਉਮ੍ਮਦ੍ਦਾਪੇਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਹਤ੍ਥਂ ਅਮੋਚੇਤ੍ਵਾ ਉਮ੍ਮਦ੍ਦਨੇ ਏਕਾਵ ਆਪਤ੍ਤਿ, ਮੋਚੇਤ੍ਵਾ ਮੋਚੇਤ੍ਵਾ ਉਮ੍ਮਦ੍ਦਨੇ ਪਯੋਗਗਣਨਾਯ ਆਪਤ੍ਤਿਯੋ. ਸਮ੍ਬਾਹਨੇਪਿ ਏਸੇਵ ਨਯੋ. ਗਿਲਾਨਾਯਾਤਿ ਅਨ੍ਤਮਸੋ ਮਗ੍ਗਗਮਨਪਰਿਸ੍ਸਮੇਨਾਪਿ ਸਾਬਾਧਾਯ. ਆਪਦਾਸੂਤਿ ਚੋਰਭਯਾਦੀਹਿ ਸਰੀਰਕਮ੍ਪਨਾਦੀਸੁ. ਸੇਸਂ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿ ਤਤਿਯਸਦਿਸਾਨੇਵਾਤਿ.
ਸਤ੍ਤਮਸਿਕ੍ਖਾਪਦਂ.
੮-੯-੧੦. ਅਟ੍ਠਮਨਵਮਦਸਮਸਿਕ੍ਖਾਪਦਵਣ੍ਣਨਾ
੧੨੧੦. ਅਟ੍ਠਮਾਦੀਸੁ ਤੀਸੁ ਸਿਕ੍ਖਮਾਨਾਯ ਸਾਮਣੇਰਿਯਾ, ਗਿਹਿਨਿਯਾਤਿ ਇਦਮੇਵ ਨਾਨਾਕਰਣਂ, ਸੇਸਂ ਸਤ੍ਤਮੇ ਵੁਤ੍ਤਸਦਿਸਮੇਵਾਤਿ.
ਅਟ੍ਠਮਨਵਮਦਸਮਸਿਕ੍ਖਾਪਦਾਨਿ.
੧੧. ਏਕਾਦਸਮਸਿਕ੍ਖਾਪਦਵਣ੍ਣਨਾ
੧੨੧੪. ਏਕਾਦਸਮੇ – ਭਿਕ੍ਖੁਸ੍ਸ ਪੁਰਤੋਤਿ ਅਭਿਮੁਖਮੇਵਾਤਿ ਅਤ੍ਥੋ. ਇਦਂ ਪਨ ਉਪਚਾਰਂ ਸਨ੍ਧਾਯ ਕਥਿਤਨ੍ਤਿ ਵੇਦਿਤਬ੍ਬਂ. ਸੇਸਂ ਉਤ੍ਤਾਨਮੇਵ. ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਏਕਾਦਸਮਸਿਕ੍ਖਾਪਦਂ.
੧੨. ਦ੍ਵਾਦਸਮਸਿਕ੍ਖਾਪਦਵਣ੍ਣਨਾ
੧੨੧੯-੨੩. ਦ੍ਵਾਦਸਮੇ – ਅਨੋਕਾਸਕਤਨ੍ਤਿ ਅਸੁਕਸ੍ਮਿਂ ਨਾਮ ਠਾਨੇ ਪੁਚ੍ਛਾਮੀਤਿ ਏਵਂ ਅਕਤਓਕਾਸਂ. ਤੇਨੇਵਾਹ – ‘‘ਅਨੋਕਾਸਕਤਨ੍ਤਿ ਅਨਾਪੁਚ੍ਛਾ’’ਤਿ. ਅਨੋਦਿਸ੍ਸਾਤਿ ਅਸੁਕਸ੍ਮਿਂ ਨਾਮ ਠਾਨੇ ਪੁਚ੍ਛਾਮੀਤਿ ਏਵਂ ਅਨਿਯਮੇਤ੍ਵਾ ਕੇਵਲਂ ‘‘ਪੁਚ੍ਛਿਤਬ੍ਬਂ ਅਤ੍ਥਿ, ਪੁਚ੍ਛਾਮਿ ਅਯ੍ਯਾ’’ਤਿ ਏਵਂ ਵਤ੍ਵਾ. ਸੇਸਂ ਉਤ੍ਤਾਨਮੇਵ. ਪਦਸੋਧਮ੍ਮਸਮੁਟ੍ਠਾਨਂ – ਵਾਚਤੋ ਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਦ੍ਵਾਦਸਮਸਿਕ੍ਖਾਪਦਂ.
੧੩. ਤੇਰਸਮਸਿਕ੍ਖਾਪਦਵਣ੍ਣਨਾ
੧੨੨੬. ਤੇਰਸਮੇ – ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾਤਿ ਏਕੇਨ ਪਾਦੇਨ ਅਤਿਕ੍ਕਨ੍ਤੇ ਦੁਕ੍ਕਟਂ, ਦੁਤਿਯੇਨ ਪਾਚਿਤ੍ਤਿਯਂ. ਉਪਚਾਰੇਪਿ ਏਸੇਵ ਨਯੋ.
੧੨੨੭. ਅਚ੍ਛਿਨ੍ਨਚੀਵਰਿਕਾਯਾਤਿਆਦੀਸੁ ਸਙ੍ਕਚ੍ਚਿਕਚੀਵਰਮੇਵ ਚੀਵਰਨ੍ਤਿ ਵੇਦਿਤਬ੍ਬਂ. ਆਪਦਾਸੂਤਿ ਮਹਗ੍ਘਂ ਹੋਤਿ ਸਙ੍ਕਚ੍ਚਿਕਂ, ਪਾਰੁਪਿਤ੍ਵਾ ਗਚ੍ਛਨ੍ਤਿਯਾਵ ਉਪਦ੍ਦਵੋ ਉਪ੍ਪਜ੍ਜਤਿ, ਏਵਰੂਪਾਸੁ ਆਪਦਾਸੁ ਅਨਾਪਤ੍ਤਿ. ਸੇਸਂ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਤੇਰਸਮਸਿਕ੍ਖਾਪਦਂ.
ਛਤ੍ਤੁਪਾਹਨਵਗ੍ਗੋ ਨਵਮੋ.
ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਛਸਟ੍ਠਿਸਤਂ ਪਾਚਿਤ੍ਤਿਯਾ ਧਮ੍ਮਾਤਿ ਏਤ੍ਥ ਸਬ੍ਬਾਨੇਵ ਭਿਕ੍ਖੁਨੀਨਂ ਖੁਦ੍ਦਕੇਸੁ ਛਨ੍ਨਵੁਤਿ, ਭਿਕ੍ਖੂਨਂ ਦ੍ਵੇਨਵੁਤੀਤਿ ਅਟ੍ਠਾਸੀਤਿਸਤਂ ਸਿਕ੍ਖਾਪਦਾਨਿ, ਤਤੋ ਸਕਲਂ ਭਿਕ੍ਖੁਨੀਵਗ੍ਗਂ, ਪਰਮ੍ਪਰਭੋਜਨਂ, ਅਨਤਿਰਿਤ੍ਤਭੋਜਨਂ, ਅਨਤਿਰਿਤ੍ਤੇਨ ਅਭਿਹਟ੍ਠੁਂ ਪਵਾਰਣਂ, ਪਣੀਤਭੋਜਨਵਿਞ੍ਞਤ੍ਤਿ, ਅਚੇਲਕਸਿਕ੍ਖਾਪਦਂ, ਦੁਟ੍ਠੁਲ੍ਲਪਟਿਚ੍ਛਾਦਨਂ, ਊਨਵੀਸਤਿਵਸ੍ਸੁਪਸਮ੍ਪਾਦਨਂ, ਮਾਤੁਗਾਮੇਨ ਸਦ੍ਧਿਂ ਸਂਵਿਧਾਯ ਅਦ੍ਧਾਨਗਮਨਂ, ਰਾਜਨ੍ਤੇਪੁਰਪ੍ਪਵੇਸਨਂ, ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਵਿਕਾਲੇ ਗਾਮਪ੍ਪਵੇਸਨਂ, ਨਿਸੀਦਨਂ ਵਸ੍ਸਿਕਸਾਟਿਕਨ੍ਤਿ ਇਮਾਨਿ ਦ੍ਵਾਵੀਸਤਿ ਸਿਕ੍ਖਾਪਦਾਨਿ ਅਪਨੇਤ੍ਵਾ ਸੇਸਾਨਿ ਸਤਞ੍ਚ ਛਸਟ੍ਠਿ ਚ ਸਿਕ੍ਖਾਪਦਾਨਿ ਪਾਤਿਮੋਕ੍ਖੁਦ੍ਦੇਸਮਗ੍ਗੇਨ ਉਦ੍ਦਿਟ੍ਠਾਨਿ ਹੋਨ੍ਤੀਤਿ ਵੇਦਿਤਬ੍ਬਾਨਿ. ਤੇਨਾਹ – ‘‘ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਛਸਟ੍ਠਿਸਤਂ ਪਾਚਿਤ੍ਤਿਯਾ ਧਮ੍ਮਾ…ਪੇ… ਏਵਮੇਤਂ ਧਾਰਯਾਮੀ’’ਤਿ.
ਤਤ੍ਰਾਯਂ ਸਙ੍ਖੇਪਤੋ ਸਮੁਟ੍ਠਾਨਵਿਨਿਚ੍ਛਯੋ – ਗਿਰਗ੍ਗਸਮਜ੍ਜਂ, ਚਿਤ੍ਤਾਗਾਰਸਿਕ੍ਖਾਪਦਂ, ਸਙ੍ਘਾਣਿ, ਇਤ੍ਥਾਲਙ੍ਕਾਰੋ, ਗਨ੍ਧਵਣ੍ਣਕੋ, ਵਾਸਿਤਕਪਿਞ੍ਞਾਕੋ, ਭਿਕ੍ਖੁਨੀਆਦੀਹਿ ਉਮ੍ਮਦ੍ਦਨਪਰਿਮਦ੍ਦਨਾਨੀਤਿ ਇਮਾਨਿ ਦਸ ਸਿਕ੍ਖਾਪਦਾਨਿ ਅਚਿਤ੍ਤਕਾਨਿ ਲੋਕਵਜ੍ਜਾਨਿ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਵਿਨਾਪਿ ਚਿਤ੍ਤੇਨ ਆਪਜ੍ਜਿਤਬ੍ਬਤ੍ਤਾ ਅਚਿਤ੍ਤਕਾਨਿ, ਚਿਤ੍ਤੇ ਪਨ ਸਤਿ ਅਕੁਸਲੇਨੇਵ ਆਪਜ੍ਜਿਤਬ੍ਬਤ੍ਤਾ ਲੋਕਵਜ੍ਜਾਨਿ. ਅਵਸੇਸਾਨਿ ਅਚਿਤ੍ਤਕਾਨਿ, ਪਣ੍ਣਤ੍ਤਿਵਜ੍ਜਾਨੇਵ. ਚੋਰੀਵੁਟ੍ਠਾਪਨਂ, ਗਾਮਨ੍ਤਰਂ, ਆਰਾਮਸਿਕ੍ਖਾਪਦਂ ਗਬ੍ਭਿਨਿਵਗ੍ਗੇ ਆਦਿਤੋ ਪਟ੍ਠਾਯ ਸਤ੍ਤ, ਕੁਮਾਰਿਭੂਤਵਗ੍ਗੇ ਆਦਿਤੋ ਪਟ੍ਠਾਯ ਪਞ੍ਚ, ਪੁਰਿਸਸਂਸਟ੍ਠਂ ਪਾਰਿਵਾਸਿਯਛਨ੍ਦਦਾਨਂ, ਅਨੁਵਸ੍ਸਵੁਟ੍ਠਾਪਨਂ, ਏਕਨ੍ਤਰਿਕਵੁਟ੍ਠਾਪਨਨ੍ਤਿ ਇਮਾਨਿ ਏਕੂਨਵੀਸਤਿ ਸਿਕ੍ਖਾਪਦਾਨਿ ਸਚਿਤ੍ਤਕਾਨਿ ਪਣ੍ਣਤ੍ਤਿਵਜ੍ਜਾਨਿ, ਅਵਸੇਸਾਨਿ ਸਚਿਤ੍ਤਕਾਨਿ ਲੋਕਵਜ੍ਜਾਨੇਵਾਤਿ.
ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ ਭਿਕ੍ਖੁਨੀਵਿਭਙ੍ਗੇ
ਖੁਦ੍ਦਕਵਣ੍ਣਨਾ ਨਿਟ੍ਠਿਤਾ.
ਪਾਚਿਤ੍ਤਿਯਕਣ੍ਡਂ ਨਿਟ੍ਠਿਤਂ.