੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੫-੬. ਛਟ੍ਠੇ – ਯਤੋ ਤ੍ਵਨ੍ਤਿ ਯਸ੍ਮਾ ਤ੍ਵਂ. ਉਯ੍ਯੋਜੇਤਿ ਆਪਤ੍ਤਿ ਦੁਕ੍ਕਟਸ੍ਸਾਤਿਆਦਿਕਾ ਸਙ੍ਘਾਦਿਸੇਸਪਰਿਯੋਸਾਨਾ ਆਪਤ੍ਤਿਯੋ ਕਸ੍ਸਾ ਹੋਨ੍ਤੀਤਿ? ਉਯ੍ਯੋਜਿਕਾਯ. ਵੁਤ੍ਤਞ੍ਚੇਤਂ ਪਰਿਵਾਰੇਪਿ –

‘‘ਨ ਦੇਤਿ ਨ ਪਟਿਗ੍ਗਣ੍ਹਾਤਿ, ਪਟਿਗ੍ਗਹੋ ਤੇਨ ਨ ਵਿਜ੍ਜਤਿ;

ਆਪਜ੍ਜਤਿ ਗਰੁਕਂ ਨ ਲਹੁਕਂ, ਤਞ੍ਚ ਪਰਿਭੋਗਪਚ੍ਚਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);

ਅਯਞ੍ਹਿ ਗਾਥਾ ਇਮਂ ਉਯ੍ਯੋਜਿਕਂ ਸਨ੍ਧਾਯ ਵੁਤ੍ਤਾ. ਇਤਰਿਸ੍ਸਾ ਪਨ ਆਪਤ੍ਤਿਭੇਦੋ ਪਠਮਸਿਕ੍ਖਾਪਦੇ ਵਿਭਤ੍ਤੋਤਿ. ਸੇਸਂ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਛਟ੍ਠਸਿਕ੍ਖਾਪਦਂ.