੨. ਸਙ੍ਘਾਦਿਸੇਸਕਣ੍ਡਂ (ਭਿਕ੍ਖੁਨੀਵਿਭਙ੍ਗਵਣ੍ਣਨਾ)

੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

ਪਾਰਾਜਿਕਾਨਨ੍ਤਰਸ੍ਸ, ਅਯਂ ਦਾਨਿ ਭਵਿਸ੍ਸਤਿ;

ਸਙ੍ਘਾਦਿਸੇਸਕਣ੍ਡਸ੍ਸ, ਅਨੁਤ੍ਤਾਨਤ੍ਥਵਣ੍ਣਨਾ.

੬੭੮. ਉਦੋਸਿਤਨ੍ਤਿ ਭਣ੍ਡਸਾਲਾ. ਮਾਯ੍ਯੋ ਏਵਂ ਅਵਚਾਤਿ ਅਯ੍ਯੋ ਮਾ ਏਵਂ ਅਵਚ. ਅਪਿਨਾਯ੍ਯਾਤਿ ਅਪਿਨੁ ਅਯ੍ਯਾ. ਅਚ੍ਚਾਵਦਥਾਤਿ ਅਤਿਕ੍ਕਮਿਤ੍ਵਾ ਵਦਥ; ਅਕ੍ਕੋਸਥਾਤਿ ਵੁਤ੍ਤਂ ਹੋਤਿ.

੬੭੯. ਉਸ੍ਸਯਵਾਦਿਕਾਤਿ ਮਾਨੁਸ੍ਸਯਵਸੇਨ ਕੋਧੁਸ੍ਸਯਵਸੇਨ ਵਿਵਦਮਾਨਾ. ਯਸ੍ਮਾ ਪਨ ਸਾ ਅਤ੍ਥਤੋ ਅਟ੍ਟਕਾਰਿਕਾ ਹੋਤਿ, ਤਸ੍ਮਾ ‘‘ਉਸ੍ਸਯਵਾਦਿਕਾ ਨਾਮ ਅਡ੍ਡਕਾਰਿਕਾ ਵੁਚ੍ਚਤੀ’’ਤਿ ਪਦਭਾਜਨੇ ਵੁਤ੍ਤਂ. ਏਤ੍ਥ ਚ ਅਡ੍ਡੋਤਿ ਵੋਹਾਰਿਕਵਿਨਿਚ੍ਛਯੋ ਵੁਚ੍ਚਤਿ, ਯਂ ਪਬ੍ਬਜਿਤਾ ‘‘ਅਧਿਕਰਣ’’ਨ੍ਤਿਪਿ ਵਦਨ੍ਤਿ. ਦੁਤਿਯਂ ਵਾ ਪਰਿਯੇਸਤੀਤਿ ਸਕ੍ਖਿਂ ਵਾ ਸਹਾਯਂ ਵਾ ਪਰਿਯੇਸਤਿ, ਦੁਕ੍ਕਟਂ. ਗਚ੍ਛਤਿ ਵਾਤਿ ਉਪਸ੍ਸਯੋ ਵਾ ਹੋਤੁ ਭਿਕ੍ਖਾਚਾਰਮਗ੍ਗੋ ਵਾ, ਯਤ੍ਥ ਠਿਤਾਯ ‘‘ਅਡ੍ਡਂ ਕਰਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਤਿ, ਤਤੋ ਵੋਹਾਰਿਕਾਨਂ ਸਨ੍ਤਿਕਂ ਗਚ੍ਛਨ੍ਤਿਯਾ ਪਦਵਾਰੇ ਪਦਵਾਰੇ ਦੁਕ੍ਕਟਂ. ਏਕਸ੍ਸ ਆਰੋਚੇਤੀਤਿ ਦ੍ਵੀਸੁ ਜਨੇਸੁ ਯਸ੍ਸ ਕਸ੍ਸਚਿ ਏਕਸ੍ਸ ਕਥਂ ਯੋ ਕੋਚਿ ਵੋਹਾਰਿਕਾਨਂ ਆਰੋਚੇਤਿ. ਦੁਤਿਯਸ੍ਸ ਆਰੋਚੇਤੀਤਿ ਏਤ੍ਥਾਪਿ ਏਸੇਵ ਨਯੋ.

ਅਯਂ ਪਨੇਤ੍ਥ ਅਸਮ੍ਮੋਹਤ੍ਥਾਯ ਵਿਤ੍ਥਾਰਕਥਾ – ਯਤ੍ਥ ਕਤ੍ਥਚਿ ਅਨ੍ਤਮਸੋ ਭਿਕ੍ਖੁਨੁਪਸ੍ਸਯਂ ਆਗਤੇਪਿ ਵੋਹਾਰਿਕੇ ਦਿਸ੍ਵਾ ਭਿਕ੍ਖੁਨੀ ਅਤ੍ਤਨੋ ਕਥਂ ਆਰੋਚੇਤਿ, ਭਿਕ੍ਖੁਨਿਯਾ ਦੁਕ੍ਕਟਂ. ਉਪਾਸਕੋ ਅਤ੍ਤਨੋ ਕਥਂ ਆਰੋਚੇਤਿ, ਭਿਕ੍ਖੁਨਿਯਾ ਥੁਲ੍ਲਚ੍ਚਯਂ. ਪਠਮਂ ਉਪਾਸਕੋ ਅਤ੍ਤਨੋ ਕਥਂ ਆਰੋਚੇਤਿ, ਭਿਕ੍ਖੁਨਿਯਾ ਦੁਕ੍ਕਟਂ. ਅਥ ਸਾ ਅਤ੍ਤਨੋ ਕਥਂ ਆਰੋਚੇਤਿ, ਥੁਲ੍ਲਚ੍ਚਯਂ. ਭਿਕ੍ਖੁਨੀ ਉਪਾਸਕਂ ਵਦਤਿ – ‘‘ਮਮ ਚ ਤਵ ਚ ਕਥਂ ਤ੍ਵਂਯੇਵ ਆਰੋਚੇਹੀ’’ਤਿ, ਸੋ ਅਤ੍ਤਨੋ ਵਾ ਕਥਂ ਪਠਮਂ ਆਰੋਚੇਤੁ ਭਿਕ੍ਖੁਨਿਯਾ ਵਾ, ਪਠਮਾਰੋਚਨੇ ਦੁਕ੍ਕਟਂ, ਦੁਤਿਯਾਰੋਚਨੇ ਥੁਲ੍ਲਚ੍ਚਯਂ. ਉਪਾਸਕੋ ਭਿਕ੍ਖੁਨਿਂ ਵਦਤਿ – ‘‘ਮਮ ਚ ਤਵ ਚ ਕਥਂ ਤ੍ਵਂਯੇਵ ਆਰੋਚੇਹੀ’’ਤਿ, ਏਤ੍ਥਾਪਿ ਏਸੇਵ ਨਯੋ.

ਭਿਕ੍ਖੁਨੀ ਕਪ੍ਪਿਯਕਾਰਕੇਨ ਕਥਾਪੇਤਿ, ਤਤ੍ਥ ਕਪ੍ਪਿਯਕਾਰਕੋ ਵਾ ਭਿਕ੍ਖੁਨਿਯਾ ਕਥਂ ਪਠਮਂ ਆਰੋਚੇਤੁ, ਇਤਰੋ ਵਾ ਅਤ੍ਤਨੋ ਕਥਂ, ਕਪ੍ਪਿਯਕਾਰਕੋ ਵਾ ਉਭਿਨ੍ਨਮ੍ਪਿ ਕਥਂ, ਇਤਰੋ ਵਾ ਉਭਿਨ੍ਨਮ੍ਪਿ ਕਥਂ ਆਰੋਚੇਤੁ, ਯਥਾ ਵਾ ਤਥਾ ਵਾ ਆਰੋਚਿਯਮਾਨੇ ਪਠਮੇ ਆਰੋਚਨੇ ਭਿਕ੍ਖੁਨਿਯਾ ਦੁਕ੍ਕਟਂ, ਦੁਤਿਯੇ ਥੁਲ੍ਲਚ੍ਚਯਂ. ਯਥਾ ਵਾ ਤਥਾ ਵਾ ਆਰੋਚਿਤਂ ਪਨ ਉਭਿਨ੍ਨਮ੍ਪਿ ਕਥਂ ਸੁਤ੍ਵਾ ਵੋਹਾਰਿਕੇਹਿ ਵਿਨਿਚ੍ਛਯੇ ਕਤੇ ਅਡ੍ਡਪਰਿਯੋਸਾਨਂ ਨਾਮ ਹੋਤਿ, ਤਸ੍ਮਿਂ ਅਡ੍ਡਪਰਿਯੋਸਾਨੇ ਭਿਕ੍ਖੁਨਿਯਾ ਜਯੇਪਿ ਪਰਾਜਯੇਪਿ ਸਙ੍ਘਾਦਿਸੇਸੋ. ਸਚੇ ਪਨ ਗਤਿਗਤਂ ਅਧਿਕਰਣਂ ਹੋਤਿ, ਸੁਤਪੁਬ੍ਬਂ ਵੋਹਾਰਿਕੇਹਿ. ਅਥ ਤੇ ਭਿਕ੍ਖੁਨਿਞ੍ਚ ਅਡ੍ਡਕਾਰਕਞ੍ਚ ਦਿਸ੍ਵਾਵ ‘‘ਤੁਮ੍ਹਾਕਂ ਕਥਨਕਿਚ੍ਚਂ ਨਤ੍ਥਿ, ਜਾਨਾਮ ਮਯਂ ਏਤ੍ਥ ਪਵਤ੍ਤਿ’’ਨ੍ਤਿ ਸਯਮੇਵ ਵਿਨਿਚ੍ਛਿਨਿਤ੍ਵਾ ਦੇਨ੍ਤਿ, ਏਵਰੂਪੇ ਅਡ੍ਡਪਰਿਯੋਸਾਨੇਪਿ ਭਿਕ੍ਖੁਨਿਯਾ ਅਨਾਪਤ੍ਤਿ.

ਪਠਮਂ ਆਪਤ੍ਤਿ ਏਤਸ੍ਸਾਤਿ ਪਠਮਾਪਤ੍ਤਿਕੋ; ਵੀਤਿਕ੍ਕਮਕ੍ਖਣੇਯੇਵ ਆਪਜ੍ਜਿਤਬ੍ਬੋਤਿ ਅਤ੍ਥੋ, ਤਂ ਪਠਮਾਪਤ੍ਤਿਕਂ. ਪਦਭਾਜਨੇ ਪਨ ਅਧਿਪ੍ਪਾਯਮਤ੍ਤਂ ਦਸ੍ਸੇਤੁਂ ‘‘ਸਹ ਵਤ੍ਥੁਜ੍ਝਾਚਾਰਾ ਆਪਜ੍ਜਤਿ ਅਸਮਨੁਭਾਸਨਾਯਾ’’ਤਿ ਵੁਤ੍ਤਂ. ਅਯਞ੍ਹੇਤ੍ਥ ਅਤ੍ਥੋ – ਸਹ ਵਤ੍ਥੁਜ੍ਝਾਚਾਰਾ ਯਂ ਭਿਕ੍ਖੁਨੀ ਆਪਜ੍ਜਤਿ, ਨ ਤਤਿਯਾਯ ਸਮਨੁਭਾਸਨਾਯ, ਅਯਂ ਪਠਮਮੇਵ ਸਹ ਵਤ੍ਥੁਜ੍ਝਾਚਾਰੇਨ ਆਪਜ੍ਜਿਤਬ੍ਬਤ੍ਤਾ ਪਠਮਾਪਤ੍ਤਿਕੋਤਿ. ਭਿਕ੍ਖੁਨਿਸਙ੍ਘਤੋ ਨਿਸ੍ਸਾਰੇਤੀਤਿ ਨਿਸ੍ਸਾਰਣੀਯੋ; ਤਂ ਨਿਸ੍ਸਾਰਣੀਯਂ. ਪਦਭਾਜਨੇ ਪਨ ਅਧਿਪ੍ਪਾਯਮਤ੍ਤਂ ਦਸ੍ਸੇਤੁਂ ‘‘ਸਙ੍ਘਮ੍ਹਾ ਨਿਸ੍ਸਾਰੀਯਤੀਤਿ ਵੁਤ੍ਤਂ. ਤਤ੍ਥ ਯਂ ਆਪਨ੍ਨਾ ਭਿਕ੍ਖੁਨੀ ਸਙ੍ਘਤੋ ਨਿਸ੍ਸਾਰੀਯਤਿ, ਸੋ ਨਿਸ੍ਸਾਰਣੀਯੋਤਿ ਏਵਮਤ੍ਥੋ ਦਟ੍ਠਬ੍ਬੋ. ਨ ਹਿ ਸੋ ਏਵ ਧਮ੍ਮੋ ਸਙ੍ਘਮ੍ਹਾ ਕੇਨਚਿ ਨਿਸ੍ਸਾਰੀਯਤਿ. ਤੇਨ ਪਨ ਧਮ੍ਮੇਨ ਭਿਕ੍ਖੁਨੀ ਨਿਸ੍ਸਾਰੀਯਤਿ, ਤਸ੍ਮਾ ਸੋ ਨਿਸ੍ਸਾਰੇਤੀਤਿ ਨਿਸ੍ਸਾਰਣੀਯੋ.

ਆਕਡ੍ਢਿਯਮਾਨਾ ਗਚ੍ਛਤੀਤਿ ਅਡ੍ਡਕਾਰਕਮਨੁਸ੍ਸੇਹਿ ਸਯਂ ਵਾ ਆਗਨ੍ਤ੍ਵਾ ਦੂਤਂ ਵਾ ਪੇਸੇਤ੍ਵਾ ਏਹੀਤਿ ਵੁਚ੍ਚਮਾਨਾ ਵੋਹਾਰਿਕਾਨਂ ਸਨ੍ਤਿਕਂ ਗਚ੍ਛਤਿ, ਤਤੋ ਅਡ੍ਡਕਾਰਕੋ ਅਤ੍ਤਨੋ ਵਾ ਕਥਂ ਪਠਮਂ ਆਰੋਚੇਤੁ ਭਿਕ੍ਖੁਨਿਯਾ ਵਾ, ਨੇਵ ਪਠਮਾਰੋਚਨੇ ਦੁਕ੍ਕਟਂ, ਨ ਦੁਤਿਯਾਰੋਚਨੇ ਥੁਲ੍ਲਚ੍ਚਯਂ. ਅਮਚ੍ਚੇਹਿ ਵਿਨਿਚ੍ਛਿਨਿਤ੍ਵਾ ਕਤੇ ਅਡ੍ਡਪਰਿਯੋਸਾਨੇਪਿ ਅਨਾਪਤ੍ਤਿਯੇਵ. ਸਚੇਪਿ ਅਡ੍ਡਕਾਰਕੋ ਭਿਕ੍ਖੁਨਿਂ ਵਦਤਿ ‘‘ਮਮ ਚ ਤਵ ਚ ਕਥਂ ਤ੍ਵਮੇਵ ਕਥੇਹੀ’’ਤਿ; ਕਥੇਨ੍ਤਿਯਾਪਿ ਕਥਂ ਸੁਤ੍ਵਾ ਕਤੇ ਅਡ੍ਡਪਰਿਯੋਸਾਨੇਪਿ ਅਨਾਪਤ੍ਤਿਯੇਵ.

ਰਕ੍ਖਂ ਯਾਚਤੀਤਿ ਧਮ੍ਮਿਕਂ ਰਕ੍ਖਂ ਯਾਚਤਿ, ਅਨਾਪਤ੍ਤਿ. ਇਦਾਨਿ ਯਥਾਯਾਚਿਤਾ ਰਕ੍ਖਾ ਧਮ੍ਮਿਕਾ ਹੋਤਿ, ਤਂ ਦਸ੍ਸੇਤੁਂ ਅਨੋਦਿਸ੍ਸ ਆਚਿਕ੍ਖਤੀਤਿ ਆਹ. ਤਤ੍ਥ ਅਤੀਤਂ ਆਰਬ੍ਭ ਅਤ੍ਥਿ ਓਦਿਸ੍ਸਆਚਿਕ੍ਖਨਾ, ਅਤ੍ਥਿ ਅਨੋਦਿਸ੍ਸਆਚਿਕ੍ਖਨਾ, ਅਨਾਗਤਂ ਆਰਬ੍ਭਾਪਿ ਅਤ੍ਥਿ ਓਦਿਸ੍ਸਆਚਿਕ੍ਖਨਾ, ਅਤ੍ਥਿ ਅਨੋਦਿਸ੍ਸਆਚਿਕ੍ਖਨਾ.

ਕਥਂ ਅਤੀਤਂ ਆਰਬ੍ਭ ਓਦਿਸ੍ਸਆਚਿਕ੍ਖਨਾ ਹੋਤਿ? ਭਿਕ੍ਖੁਨੁਪਸ੍ਸਯੇ ਗਾਮਦਾਰਕਾ ਧੁਤ੍ਤਾਦਯੋ ਵਾ ਯੇ ਕੇਚਿ ਅਨਾਚਾਰਂ ਵਾ ਆਚਰਨ੍ਤਿ, ਰੁਕ੍ਖਂ ਵਾ ਛਿਨ੍ਦਨ੍ਤਿ, ਫਲਾਫਲਂ ਵਾ ਹਰਨ੍ਤਿ, ਪਰਿਕ੍ਖਾਰੇ ਵਾ ਅਚ੍ਛਿਨ੍ਦਨ੍ਤਿ. ਭਿਕ੍ਖੁਨੀ ਵੋਹਾਰਿਕੇ ਉਪਸਙ੍ਕਮਿਤ੍ਵਾ ‘‘ਅਮ੍ਹਾਕਂ ਉਪਸ੍ਸਯੇ ਇਦਂ ਨਾਮ ਕਤ’’ਨ੍ਤਿ ਵਦਤਿ. ‘‘ਕੇਨਾ’’ਤਿ ਵੁਤ੍ਤੇ ‘‘ਅਸੁਕੇਨ ਚ ਅਸੁਕੇਨ ਚਾ’’ਤਿ ਆਚਿਕ੍ਖਤਿ. ਏਵਂ ਅਤੀਤਂ ਆਰਬ੍ਭ ਓਦਿਸ੍ਸਆਚਿਕ੍ਖਨਾ ਹੋਤਿ, ਸਾ ਨ ਵਟ੍ਟਤਿ. ਤਞ੍ਚੇ ਸੁਤ੍ਵਾ ਤੇ ਵੋਹਾਰਿਕਾ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਭਿਕ੍ਖੁਨਿਯਾ ਗੀਵਾ ਹੋਤਿ. ਦਣ੍ਡਂ ਗਣ੍ਹਿਸ੍ਸਨ੍ਤੀਤਿ ਅਧਿਪ੍ਪਾਯੇਪਿ ਸਤਿ ਗੀਵਾਯੇਵ ਹੋਤਿ. ਸਚੇ ਪਨ ਤਸ੍ਸ ਦਣ੍ਡਂ ਗਣ੍ਹਥਾਤਿ ਵਦਤਿ, ਪਞ੍ਚਮਾਸਕਮਤ੍ਤੇ ਗਹਿਤੇ ਪਾਰਾਜਿਕਂ ਹੋਤਿ.

‘‘ਕੇਨਾ’’ਤਿ ਵੁਤ੍ਤੇ ਪਨ ‘‘ਅਸੁਕੇਨਾਤਿ ਵਤ੍ਤੁਂ ਅਮ੍ਹਾਕਂ ਨ ਵਟ੍ਟਤਿ, ਤੁਮ੍ਹੇਯੇਵ ਜਾਨਿਸ੍ਸਥ. ਕੇਵਲਞ੍ਹਿ ਮਯਂ ਰਕ੍ਖਂ ਯਾਚਾਮ, ਤਂ ਨੋ ਦੇਥ, ਅਵਹਟਭਣ੍ਡਞ੍ਚ ਆਹਰਾਪੇਥਾ’’ਤਿ ਵਤ੍ਤਬ੍ਬਂ. ਏਵਂ ਅਨੋਦਿਸ੍ਸ ਆਚਿਕ੍ਖਨਾ ਹੋਤਿ, ਸਾ ਵਟ੍ਟਤਿ. ਏਵਂ ਵੁਤ੍ਤੇ ਸਚੇਪਿ ਤੇ ਵੋਹਾਰਿਕਾ ਕਾਰਕੇ ਗਵੇਸਿਤ੍ਵਾ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਸਾਪਤੇਯ੍ਯਮ੍ਪਿ ਗਹਿਤਂ ਭਿਕ੍ਖੁਨਿਯਾ, ਨੇਵ ਗੀਵਾ ਨ ਆਪਤ੍ਤਿ.

ਪਰਿਕ੍ਖਾਰਂ ਹਰਨ੍ਤੇ ਦਿਸ੍ਵਾ ਤੇਸਂ ਅਨਤ੍ਥਕਾਮਤਾਯ ਚੋਰੋ ਚੋਰੋਤਿ ਵਤ੍ਤੁਮ੍ਪਿ ਨ ਵਟ੍ਟਤਿ. ਏਵਂ ਵੁਤ੍ਤੇਪਿ ਹਿ ਯਂ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਮ੍ਪਿ ਭਿਕ੍ਖੁਨਿਯਾ ਗੀਵਾ ਹੋਤਿ. ਅਤ੍ਤਨੋ ਵਚਨਕਰਂ ਪਨ ‘‘ਇਮਿਨਾ ਮੇ ਪਰਿਕ੍ਖਾਰੋ ਗਹਿਤੋ, ਤਂ ਆਹਰਾਪੇਹਿ, ਮਾ ਚਸ੍ਸ ਦਣ੍ਡਂ ਕਰੋਹੀ’’ਤਿ ਵਤ੍ਤੁਂ ਵਟ੍ਟਤਿ. ਦਾਸਦਾਸੀਵਾਪਿਆਦੀਨਂ ਅਤ੍ਥਾਯ ਅਡ੍ਡਂ ਕਰੋਨ੍ਤਿ, ਅਯਂ ਅਕਪ੍ਪਿਯਅਡ੍ਡੋ ਨਾਮ, ਨ ਵਟ੍ਟਤਿ.

ਕਥਂ ਅਨਾਗਤਂ ਆਰਬ੍ਭ ਓਦਿਸ੍ਸਆਚਿਕ੍ਖਨਾ ਹੋਤਿ? ਵੁਤ੍ਤਨਯੇਨੇਵ ਪਰੇਹਿ ਅਨਾਚਾਰਾਦੀਸੁ ਕਤੇਸੁ ਭਿਕ੍ਖੁਨੀ ਵੋਹਾਰਿਕੇ ਏਵਂ ਵਦਤਿ ‘‘ਅਮ੍ਹਾਕਂ ਉਪਸ੍ਸਯੇ ਇਦਞ੍ਚਿਦਞ੍ਚ ਕਰੋਨ੍ਤਿ, ਰਕ੍ਖਂ ਨੋ ਦੇਥ ਆਯਤਿਂ ਅਕਰਣਤ੍ਥਾਯਾ’’ਤਿ. ‘‘ਕੇਨ ਏਵਂ ਕਤ’’ਨ੍ਤਿ ਵੁਤ੍ਤੇ ਚ ‘‘ਅਸੁਕੇਨ ਅਸੁਕੇਨ ਚਾ’’ਤਿ ਆਚਿਕ੍ਖਤਿ. ਏਵਂ ਅਨਾਗਤਂ ਆਰਬ੍ਭ ਓਦਿਸ੍ਸਆਚਿਕ੍ਖਨਾ ਹੋਤਿ, ਸਾਪਿ ਨ ਵਟ੍ਟਤਿ. ਤੇਸਞ੍ਹਿ ਦਣ੍ਡੇ ਕਤੇ ਪੁਰਿਮਨਯੇਨੇਵ ਸਬ੍ਬਂ ਭਿਕ੍ਖੁਨਿਯਾ ਗੀਵਾ. ਸੇਸਂ ਪੁਰਿਮਸਦਿਸਮੇਵ.

ਸਚੇ ਪਨ ਵੋਹਾਰਿਕਾ ‘‘ਭਿਕ੍ਖੁਨੁਪਸ੍ਸਯੇ ਏਵਰੂਪਂ ਅਨਾਚਾਰਂ ਕਰੋਨ੍ਤਾਨਂ ਇਮਂ ਨਾਮ ਦਣ੍ਡਂ ਕਰੋਮਾ’’ਤਿ ਭੇਰਿਂ ਚਰਾਪੇਤ੍ਵਾ ਆਣਾਯ ਅਤਿਟ੍ਠਮਾਨੇ ਪਰਿਯੇਸਿਤ੍ਵਾ ਦਣ੍ਡਂ ਕਰੋਨ੍ਤਿ, ਭਿਕ੍ਖੁਨਿਯਾ ਨੇਵ ਗੀਵਾ ਨ ਆਪਤ੍ਤਿ.

ਯੋ ਚਾਯਂ ਭਿਕ੍ਖੁਨੀਨਂ ਵੁਤ੍ਤੋ, ਭਿਕ੍ਖੂਨਮ੍ਪਿ ਏਸੇਵ ਨਯੋ. ਭਿਕ੍ਖੁਨੋਪਿ ਹਿ ਓਦਿਸ੍ਸਆਚਿਕ੍ਖਨਾ ਨ ਵਟ੍ਟਤਿ. ਯਂ ਤਥਾ ਆਚਿਕ੍ਖਿਤੇ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਗੀਵਾ ਹੋਤਿ. ਵੁਤ੍ਤਨਯੇਨੇਵ ਦਣ੍ਡਂ ਗਣ੍ਹਾਪੇਨ੍ਤਸ੍ਸ ਪਾਰਾਜਿਕਂ. ਯੋ ਪਨ ‘‘ਦਣ੍ਡਂ ਕਰਿਸ੍ਸਨ੍ਤੀ’’ਤਿ ਜਾਨਨ੍ਤੋਪਿ ਅਨੋਦਿਸ੍ਸ ਕਥੇਤਿ, ਤੇ ਚ ਪਰਿਯੇਸਿਤ੍ਵਾ ਦਣ੍ਡਂ ਕਰੋਨ੍ਤਿਯੇਵ, ਨ ਦੋਸੋ. ਵਿਹਾਰਸੀਮਾਯ ਰੁਕ੍ਖਾਦੀਨਿ ਛਿਨ੍ਦਨ੍ਤਾਨਂ ਵਾਸਿਫਰਸੁਆਦੀਨਿ ਗਹੇਤ੍ਵਾ ਪਾਸਾਣੇਹਿ ਕੋਟ੍ਟੇਨ੍ਤਿ, ਨ ਵਟ੍ਟਤਿ. ਸਚੇ ਧਾਰਾ ਭਿਜ੍ਜਤਿ, ਕਾਰਾਪੇਤ੍ਵਾ ਦਾਤਬ੍ਬਾ. ਉਪਧਾਵਿਤ੍ਵਾ ਤੇਸਂ ਪਰਿਕ੍ਖਾਰੇ ਗਣ੍ਹਨ੍ਤਿ, ਤਮ੍ਪਿ ਨ ਕਾਤਬ੍ਬਂ, ਲਹੁਪਰਿਵਤ੍ਤਞ੍ਹਿ ਚਿਤ੍ਤਂ, ਥੇਯ੍ਯਚੇਤਨਾਯ ਉਪ੍ਪਨ੍ਨਾਯ ਮੂਲਚ੍ਛੇਜ੍ਜਮ੍ਪਿ ਗਚ੍ਛੇਯ੍ਯ. ਸੇਸਂ ਉਤ੍ਤਾਨਮੇਵ.

ਕਥਿਨਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਸਤ੍ਤਰਸਕੇ ਪਠਮਸਿਕ੍ਖਾਪਦਂ.

੨. ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੮੨. ਦੁਤਿਯੇ – ਵਰਭਣ੍ਡਨ੍ਤਿ ਮੁਤ੍ਤਾਮਣਿਵੇਲ਼ੁਰਿਯਾਦਿ ਮਹਗ੍ਘਭਣ੍ਡਂ.

੬੮੩. ਅਨਪਲੋਕੇਤ੍ਵਾਤਿ ਅਨਾਪੁਚ੍ਛਿਤ੍ਵਾ. ਗਣਂ ਵਾਤਿ ਮਲ੍ਲਗਣਭਟਿਪੁਤ੍ਤਗਣਾਦਿਕਂ. ਪੂਗਨ੍ਤਿ ਧਮ੍ਮਗਣਂ. ਸੇਣਿਨ੍ਤਿ ਗਨ੍ਧਿਕਸੇਣਿਦੁਸ੍ਸਿਕਸੇਣਿਆਦਿਕਂ. ਯਤ੍ਥ ਯਤ੍ਥ ਹਿ ਰਾਜਾਨੋ ਗਣਾਦੀਨਂ ਗਾਮਨਿਗਮੇ ਨਿਯ੍ਯਾਤੇਨ੍ਤਿ ‘‘ਤੁਮ੍ਹੇਵ ਏਤ੍ਥ ਅਨੁਸਾਸਥਾ’’ਤਿ, ਤਤ੍ਥ ਤਤ੍ਥ ਤੇ ਏਵ ਇਸ੍ਸਰਾ ਹੋਨ੍ਤਿ. ਤਸ੍ਮਾ ਤੇ ਸਨ੍ਧਾਯ ਇਦਂ ਵੁਤ੍ਤਂ. ਏਤ੍ਥ ਚ ਰਾਜਾਨਂ ਵਾ ਗਣਾਦਿਕੇ ਵਾ ਆਪੁਚ੍ਛਿਤ੍ਵਾਪਿ ਭਿਕ੍ਖੁਨਿਸਙ੍ਘੋ ਆਪੁਚ੍ਛਿਤਬ੍ਬੋਵ. ਠਪੇਤ੍ਵਾ ਕਪ੍ਪਨ੍ਤਿ ਤਿਤ੍ਥਿਯੇਸੁ ਵਾ ਅਞ੍ਞਭਿਕ੍ਖੁਨੀਸੁ ਵਾ ਪਬ੍ਬਜਿਤਪੁਬ੍ਬਂ ਕਪ੍ਪਗਤਿਕਂ ਠਪੇਤ੍ਵਾਤਿ. ਸੇਸਂ ਉਤ੍ਤਾਨਮੇਵ.

ਚੋਰੀਵੁਟ੍ਠਾਪਨਸਮੁਟ੍ਠਾਨਂ – ਕੇਨਚਿ ਕਰਣੀਯੇਨ ਪਕ੍ਕਨ੍ਤਾਸੁ ਭਿਕ੍ਖੁਨੀਸੁ ਅਗਨ੍ਤ੍ਵਾ ਖਣ੍ਡਸੀਮਂ ਯਥਾਨਿਸਿਨ੍ਨਟ੍ਠਾਨੇਯੇਵ ਅਤ੍ਤਨੋ ਨਿਸ੍ਸਿਤਕਪਰਿਸਾਯ ਸਦ੍ਧਿਂ ਵੁਟ੍ਠਾਪੇਨ੍ਤਿਯਾ ਵਾਚਾਚਿਤ੍ਤਤੋ ਸਮੁਟ੍ਠਾਤਿ, ਖਣ੍ਡਸੀਮਂ ਵਾ ਨਦਿਂ ਵਾ ਗਨ੍ਤ੍ਵਾ ਵੁਟ੍ਠਾਪੇਨ੍ਤਿਯਾ ਕਾਯਵਾਚਾਚਿਤ੍ਤਤੋ ਸਮੁਟ੍ਠਾਤਿ, ਅਨਾਪੁਚ੍ਛਾ ਵੁਟ੍ਠਾਪਨਵਸੇਨ ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਦੁਤਿਯਸਿਕ੍ਖਾਪਦਂ.

੩. ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੨. ਤਤਿਯੇ – ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾਤਿ ਏਤ੍ਥ ਏਕਂ ਪਾਦਂ ਅਤਿਕ੍ਕਾਮੇਨ੍ਤਿਯਾ ਥੁਲ੍ਲਚ੍ਚਯਂ, ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇ ਸਙ੍ਘਾਦਿਸੇਸੋ. ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਨ੍ਤਿ ਏਤ੍ਥ ਪਰਿਕ੍ਖੇਪਾਰਹਟ੍ਠਾਨਂ ਏਕੇਨ ਪਾਦੇਨ ਅਤਿਕ੍ਕਮਤਿ ਥੁਲ੍ਲਚ੍ਚਯਂ, ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇ ਸਙ੍ਘਾਦਿਸੇਸੋ. ਅਪਿਚੇਤ੍ਥ ਸਕਗਾਮਤੋ ਨਿਕ੍ਖਮਨ੍ਤਿਯਾ ਗਾਮਨ੍ਤਰਪਚ੍ਚਯਾ ਅਨਾਪਤ੍ਤਿ, ਨਿਕ੍ਖਮਿਤ੍ਵਾ ਪਨ ਗਾਮਨ੍ਤਰਂ ਗਚ੍ਛਨ੍ਤਿਯਾ ਪਦਵਾਰੇ ਪਦਵਾਰੇ ਦੁਕ੍ਕਟਂ, ਏਕੇਨ ਪਾਦੇਨ ਇਤਰਸ੍ਸ ਗਾਮਸ੍ਸ ਪਰਿਕ੍ਖੇਪੇ ਵਾ ਉਪਚਾਰੇ ਵਾ ਅਤਿਕ੍ਕਨ੍ਤਮਤ੍ਤੇ ਥੁਲ੍ਲਚ੍ਚਯਂ, ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇ ਸਙ੍ਘਾਦਿਸੇਸੋ. ਤਤੋ ਨਿਕ੍ਖਮਿਤ੍ਵਾ ਪੁਨ ਸਕਗਾਮਂ ਪਵਿਸਨ੍ਤਿਯਾਪਿ ਏਸੇਵ ਨਯੋ. ਸਚੇ ਪਨ ਖਣ੍ਡਪਾਕਾਰੇਨ ਵਾ ਵਤਿਛਿਦ੍ਦੇਨ ਵਾ ਭਿਕ੍ਖੁਨਿਵਿਹਾਰਭੂਮਿਯੇਵ ਸਕ੍ਕਾ ਹੋਤਿ ਪਵਿਸਿਤੁਂ, ਏਵਂ ਪਵਿਸਮਾਨਾਯ ਕਪ੍ਪਿਯਭੂਮਿਂ ਨਾਮ ਪਵਿਟ੍ਠਾ ਹੋਤਿ, ਤਸ੍ਮਾ ਵਟ੍ਟਤਿ. ਸਚੇਪਿ ਹਤ੍ਥਿਪਿਟ੍ਠਿਆਦੀਹਿ ਵਾ ਇਦ੍ਧਿਯਾ ਵਾ ਪਵਿਸਤਿ, ਵਟ੍ਟਤਿਯੇਵ. ਪਦਸਾ ਗਮਨਮੇਵ ਹਿ ਇਧਾਧਿਪ੍ਪੇਤਂ. ਤੇਨੇਵ ‘‘ਪਠਮਂ ਪਾਦਂ ਅਤਿਕ੍ਕਾਮੇਨ੍ਤਿਯਾ’’ਤਿਆਦਿਮਾਹ.

ਦ੍ਵੇ ਗਾਮਾ ਭਿਕ੍ਖੁਨਿਵਿਹਾਰੇਨ ਸਮ੍ਬਦ੍ਧਵਤਿਕਾ ਹੋਨ੍ਤਿ, ਯਸ੍ਮਿਂ ਗਾਮੇ ਭਿਕ੍ਖੁਨਿਵਿਹਾਰੋ, ਤਤ੍ਥ ਪਿਣ੍ਡਾਯ ਚਰਿਤ੍ਵਾ ਪੁਨ ਵਿਹਾਰਂ ਪਵਿਸਿਤ੍ਵਾ ਸਚੇ ਵਿਹਾਰਮਜ੍ਝੇਨ ਇਤਰਸ੍ਸ ਗਾਮਸ੍ਸ ਮਗ੍ਗੋ ਅਤ੍ਥਿ, ਗਨ੍ਤੁਂ ਵਟ੍ਟਤਿ. ਤਤੋ ਪਨ ਗਾਮਤੋ ਤੇਨੇਵ ਮਗ੍ਗੇਨ ਪਚ੍ਚਾਗਨ੍ਤਬ੍ਬਂ. ਸਚੇ ਗਾਮਦ੍ਵਾਰੇਨ ਨਿਕ੍ਖਮਿਤ੍ਵਾ ਆਗਚ੍ਛਤਿ, ਪੁਰਿਮਨਯੇਨੇਵ ਆਪਤ੍ਤਿਭੇਦੋ ਵੇਦਿਤਬ੍ਬੋ. ਸਕਗਾਮਤੋ ਕੇਨਚਿ ਕਰਣੀਯੇਨ ਭਿਕ੍ਖੁਨੀਹਿ ਸਦ੍ਧਿਂ ਨਿਕ੍ਖਨ੍ਤਾਯ ਪੁਨ ਪਵਿਸਨਕਾਲੇ ਹਤ੍ਥਿ ਵਾ ਮੁਚ੍ਚਤਿ, ਉਸ੍ਸਾਰਣਾ ਵਾ ਹੋਤਿ, ਇਤਰਾ ਭਿਕ੍ਖੁਨਿਯੋ ਸਹਸਾ ਗਾਮਂ ਪਵਿਸਨ੍ਤਿ, ਯਾਵ ਅਞ੍ਞਾ ਭਿਕ੍ਖੁਨੀ ਆਗਚ੍ਛਤਿ, ਤਾਵ ਬਹਿਗਾਮਦ੍ਵਾਰੇ ਠਾਤਬ੍ਬਂ. ਸਚੇ ਨ ਆਗਚ੍ਛਤਿ, ਦੁਤਿਯਿਕਾ ਭਿਕ੍ਖੁਨੀ ਪਕ੍ਕਨ੍ਤਾ ਨਾਮ ਹੋਤਿ, ਪਵਿਸਿਤੁਂ ਵਟ੍ਟਤਿ.

ਪੁਬ੍ਬੇ ਮਹਾਗਾਮੋ ਹੋਤਿ, ਮਜ੍ਝੇ ਭਿਕ੍ਖੁਨਿਵਿਹਾਰੋ. ਪਚ੍ਛਾ ਤਂ ਗਾਮਂ ਚਤ੍ਤਾਰੋ ਜਨਾ ਲਭਿਤ੍ਵਾ ਵਿਸੁਂ ਵਿਸੁਂ ਵਤਿਪਰਿਕ੍ਖੇਪਂ ਕਤ੍ਵਾ ਵਿਭਜਿਤ੍ਵਾ ਭੁਞ੍ਜਨ੍ਤਿ, ਵਿਹਾਰਤੋ ਏਕਂ ਗਾਮਂ ਗਨ੍ਤੁਂ ਵਟ੍ਟਤਿ. ਤਤੋ ਅਪਰਂ ਗਾਮਂ ਦ੍ਵਾਰੇਨ ਵਾ ਵਤਿਛਿਦ੍ਦੇਨ ਵਾ ਪਵਿਸਿਤੁਂ ਨ ਵਟ੍ਟਤਿ. ਪੁਨ ਵਿਹਾਰਮੇਵ ਪਚ੍ਚਾਗਨ੍ਤੁਂ ਵਟ੍ਟਤਿ. ਕਸ੍ਮਾ? ਵਿਹਾਰਸ੍ਸ ਚਤੁਗਾਮਸਾਧਾਰਣਤ੍ਤਾ.

ਅਨ੍ਤਰਵਾਸਕੋ ਤੇਮਿਯਤੀਤਿ ਯਤ੍ਥ ਯਥਾ ਤਿਮਣ੍ਡਲਪਟਿਚ੍ਛਾਦਨਂ ਹੋਤਿ; ਏਵਂ ਨਿਵਤ੍ਥਾਯ ਭਿਕ੍ਖੁਨਿਯਾ ਵਸ੍ਸਕਾਲੇ ਤਿਤ੍ਥੇਨ ਵਾ ਅਤਿਤ੍ਥੇਨ ਵਾ ਓਤਰਿਤ੍ਵਾ ਯਤ੍ਥ ਕਤ੍ਥਚਿ ਉਤ੍ਤਰਨ੍ਤਿਯਾ ਏਕਦ੍ਵਙ੍ਗੁਲਮਤ੍ਤਮ੍ਪਿ ਅਨ੍ਤਰਵਾਸਕੋ ਤੇਮਿਯਤਿ. ਸੇਸਂ ਨਦੀਲਕ੍ਖਣਂ ਨਦੀਨਿਮਿਤ੍ਤਕਥਾਯ ਆਵਿ ਭਵਿਸ੍ਸਤਿ. ਏਵਰੂਪਂ ਨਦਿਂ ਤਿਤ੍ਥੇਨ ਵਾ ਅਤਿਤ੍ਥੇਨ ਵਾ ਓਤਰਿਤ੍ਵਾ ਉਤ੍ਤਰਣਕਾਲੇ ਪਠਮਂ ਪਾਦਂ ਉਦ੍ਧਰਿਤ੍ਵਾ ਤੀਰੇ ਠਪੇਨ੍ਤਿਯਾ ਥੁਲ੍ਲਚ੍ਚਯਂ, ਦੁਤਿਯਪਾਦੁਦ੍ਧਾਰੇ ਸਙ੍ਘਾਦਿਸੇਸੋ. ਸੇਤੁਨਾ ਗਚ੍ਛਤਿ, ਅਨਾਪਤ੍ਤਿ. ਪਦਸਾ ਓਤਰਿਤ੍ਵਾ ਉਤ੍ਤਰਣਕਾਲੇ ਸੇਤੁਂ ਆਰੋਹਿਤ੍ਵਾ ਉਤ੍ਤਰਨ੍ਤਿਯਾਪਿ ਅਨਾਪਤ੍ਤਿ. ਸੇਤੁਨਾ ਪਨ ਗਨ੍ਤ੍ਵਾ ਉਤ੍ਤਰਣਕਾਲੇ ਪਦਸਾ ਗਚ੍ਛਨ੍ਤਿਯਾ ਆਪਤ੍ਤਿਯੇਵ. ਯਾਨਨਾਵਾਆਕਾਸਗਮਨਾਦੀਸੁਪਿ ਏਸੇਵ ਨਯੋ. ਓਰਿਮਤੀਰਤੋ ਪਨ ਪਰਤੀਰਮੇਵ ਅਕ੍ਕਮਨ੍ਤਿਯਾ ਅਨਾਪਤ੍ਤਿ. ਰਜਨਕਮ੍ਮਤ੍ਥਂ ਗਨ੍ਤ੍ਵਾ ਦਾਰੁਸਙ੍ਕਡ੍ਢਨਾਦਿਕਿਚ੍ਚੇਨ ਦ੍ਵੇ ਤਿਸ੍ਸੋ ਉਭਯਤੀਰੇਸੁ ਵਿਚਰਨ੍ਤਿ, ਵਟ੍ਟਤਿ. ਸਚੇ ਪਨੇਤ੍ਥ ਕਾਚਿ ਕਲਹਂ ਕਤ੍ਵਾ ਇਤਰਂ ਤੀਰਂ ਗਚ੍ਛਤਿ, ਆਪਤ੍ਤਿ. ਦ੍ਵੇ ਏਕਤੋ ਉਤ੍ਤਰਨ੍ਤਿ, ਏਕਾ ਮਜ੍ਝੇ ਨਦਿਯਾ ਕਲਹਂ ਕਤ੍ਵਾ ਨਿਵਤ੍ਤਿਤ੍ਵਾ ਓਰਿਮਤੀਰਮੇਵ ਆਗਚ੍ਛਤਿ, ਆਪਤ੍ਤਿ. ਇਤਰਿਸ੍ਸਾ ਪਨ ਅਯਂ ਪਕ੍ਕਨ੍ਤਟ੍ਠਾਨੇ ਠਿਤਾ ਹੋਤਿ, ਤਸ੍ਮਾ ਪਰਤੀਰਂ ਗਚ੍ਛਨ੍ਤਿਯਾਪਿ ਅਨਾਪਤ੍ਤਿ. ਨ੍ਹਾਯਿਤੁਂ ਵਾ ਪਾਤੁਂ ਵਾ ਓਤਿਣ੍ਣਾ ਤਮੇਵ ਤੀਰਂ ਪਚ੍ਚੁਤ੍ਤਰਤਿ, ਅਨਾਪਤ੍ਤਿ.

ਸਹ ਅਰੁਣੁਗ੍ਗਮਨਾਤਿ ਏਤ੍ਥ ਸਚੇ ਸਜ੍ਝਾਯਂ ਵਾ ਪਧਾਨਂ ਵਾ ਅਞ੍ਞਂ ਵਾ ਕਿਞ੍ਚਿ ਕਮ੍ਮਂ ਕੁਰੁਮਾਨਾ ਪੁਰੇਅਰੁਣੇਯੇਵ ਦੁਤਿਯਿਕਾਯ ਸਨ੍ਤਿਕਂ ਗਮਿਸ੍ਸਾਮੀਤਿ ਆਭੋਗਂ ਕਰੋਤਿ, ਅਜਾਨਨ੍ਤਿਯਾ ਏਵ ਚਸ੍ਸਾ ਅਰੁਣੋ ਉਗ੍ਗਚ੍ਛਤਿ, ਅਨਾਪਤ੍ਤਿ. ਅਥ ਪਨ ‘‘ਯਾਵ ਅਰੁਣੁਗ੍ਗਮਨਾ ਇਧੇਵ ਭਵਿਸ੍ਸਾਮੀ’’ਤਿ ਵਾ ਅਨਾਭੋਗੇਨ ਵਾ ਵਿਹਾਰਸ੍ਸ ਏਕਦੇਸੇ ਅਚ੍ਛਤਿ, ਦੁਤਿਯਿਕਾਯ ਹਤ੍ਥਪਾਸਂ ਨ ਓਤਰਤਿ, ਅਰੁਣੁਗ੍ਗਮਨੇ ਸਙ੍ਘਾਦਿਸੇਸੋ. ਹਤ੍ਥਪਾਸੋਯੇਵ ਹਿ ਇਧ ਪਮਾਣਂ, ਹਤ੍ਥਪਾਸਾਤਿਕ੍ਕਮੇ ਏਕਗਬ੍ਭੋਪਿ ਨ ਰਕ੍ਖਤਿ.

ਅਗਾਮਕੇ ਅਰਞ੍ਞੇਤਿ ਏਤ੍ਥ ‘‘ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾ ਸਬ੍ਬਮੇਤਂ ਅਰਞ੍ਞ’’ਨ੍ਤਿ ਏਵਂ ਵੁਤ੍ਤਲਕ੍ਖਣਮੇਵ ਅਰਞ੍ਞਂ. ਤਂ ਪਨੇਤਂ ਕੇਵਲਂ ਗਾਮਾਭਾਵੇਨ ‘‘ਅਗਾਮਕ’’ਨ੍ਤਿ ਵੁਤ੍ਤਂ, ਨ ਵਿਞ੍ਝਾਟਵਿਸਦਿਸਤਾਯ. ਤਾਦਿਸੇ ਅਰਞ੍ਞੇ ਓਕ੍ਕਨ੍ਤੇ ਦਸ੍ਸਨੂਪਚਾਰੇ ਵਿਜਹਿਤੇ ਸਚੇਪਿ ਸਵਨੂਪਚਾਰੋ ਅਤ੍ਥਿ, ਆਪਤ੍ਤਿ. ਤੇਨੇਵ ਵੁਤ੍ਤਂ ਅਟ੍ਠਕਥਾਯਂ ‘‘ਸਚੇ ਭਿਕ੍ਖੁਨੀਸੁ ਮਹਾਬੋਧਿਅਙ੍ਗਣਂ ਪਵਿਸਨ੍ਤੀਸੁ ਏਕਾ ਬਹਿ ਤਿਟ੍ਠਤਿ, ਤਸ੍ਸਾਪਿ ਆਪਤ੍ਤਿ. ਲੋਹਪਾਸਾਦਂ ਪਵਿਸਨ੍ਤੀਸੁਪਿ ਪਰਿਵੇਣਂ ਪਵਿਸਨ੍ਤੀਸੁਪਿ ਏਸੇਵ ਨਯੋ. ਮਹਾਚੇਤਿਯਂ ਵਨ੍ਦਮਾਨਾਸੁ ਏਕਾ ਉਤ੍ਤਰਦ੍ਵਾਰੇਨ ਨਿਕ੍ਖਮਿਤ੍ਵਾ ਗਚ੍ਛਤਿ, ਤਸ੍ਸਾਪਿ ਆਪਤ੍ਤਿ. ਥੂਪਾਰਾਮਂ ਪਵਿਸਨ੍ਤੀਸੁ ਏਕਾ ਬਹਿ ਤਿਟ੍ਠਤਿ, ਤਸ੍ਸਾਪਿ ਆਪਤ੍ਤੀ’’ਤਿ. ਏਤ੍ਥ ਚ ਦਸ੍ਸਨੂਪਚਾਰੋ ਨਾਮ ਯਤ੍ਥ ਠਿਤਂ ਦੁਤਿਯਿਕਾ ਪਸ੍ਸਤਿ. ਸਚੇ ਪਨ ਸਾਣਿਪਾਕਾਰਨ੍ਤਰਿਕਾਪਿ ਹੋਤਿ, ਦਸ੍ਸਨੂਪਚਾਰਂ ਵਿਜਹਤਿ ਨਾਮ. ਸਵਨੂਪਚਾਰੋ ਨਾਮ ਯਤ੍ਥ ਠਿਤਾ ਮਗ੍ਗਮੂਲ਼੍ਹਸਦ੍ਦੇਨ ਵਿਯ ਧਮ੍ਮਸਵਨਾਰੋਚਨਸਦ੍ਦੇਨ ਵਿਯ ਚ ‘‘ਅਯ੍ਯੇ’’ਤਿ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤਿ. ਅਜ੍ਝੋਕਾਸੇ ਦੂਰੇਪਿ ਦਸ੍ਸਨੂਪਚਾਰੋ ਨਾਮ ਹੋਤਿ. ਸੋ ਏਵਰੂਪੇ ਸਵਨੂਪਚਾਰੇ ਵਿਜਹਿਤੇ ਨ ਰਕ੍ਖਤਿ, ਵਿਜਹਿਤਮਤ੍ਤੇਵ ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਏਕਾ ਮਗ੍ਗਂ ਗਚ੍ਛਨ੍ਤੀ ਓਹੀਯਤਿ. ਸਉਸ੍ਸਾਹਾ ਚੇ ਹੁਤ੍ਵਾ ਇਦਾਨਿ ਪਾਪੁਣਿਸ੍ਸਾਮੀਤਿ ਅਨੁਬਨ੍ਧਤਿ, ਅਨਾਪਤ੍ਤਿ. ਸਚੇ ਪੁਰਿਮਾਯੋ ਅਞ੍ਞੇਨ ਮਗ੍ਗੇਨ ਗਚ੍ਛਨ੍ਤਿ, ਪਕ੍ਕਨ੍ਤਾ ਨਾਮ ਹੋਨ੍ਤਿ, ਅਨਾਪਤ੍ਤਿਯੇਵ. ਦ੍ਵਿਨ੍ਨਂ ਗਚ੍ਛਨ੍ਤੀਨਂ ਏਕਾ ਅਨੁਬਨ੍ਧਿਤੁਂ ਅਸਕ੍ਕੋਨ੍ਤੀ ‘‘ਗਚ੍ਛਤੁ ਅਯ’’ਨ੍ਤਿ ਓਹੀਯਤਿ, ਇਤਰਾਪਿ ‘‘ਓਹੀਯਤੁ ਅਯ’’ਨ੍ਤਿ, ਗਚ੍ਛਤਿ, ਦ੍ਵਿਨ੍ਨਮ੍ਪਿ ਆਪਤ੍ਤਿ. ਸਚੇ ਪਨ ਗਚ੍ਛਨ੍ਤੀਸੁ ਪੁਰਿਮਾਪਿ ਅਞ੍ਞਂ ਮਗ੍ਗਂ ਗਣ੍ਹਾਤਿ, ਪਚ੍ਛਿਮਾਪਿ ਅਞ੍ਞਂ, ਏਕਾ ਏਕਿਸ੍ਸਾ ਪਕ੍ਕਨ੍ਤਟ੍ਠਾਨੇ ਤਿਟ੍ਠਤਿ, ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ.

੬੯੩. ਪਕ੍ਖਸਙ੍ਕਨ੍ਤਾ ਵਾਤਿ ਤਿਤ੍ਥਾਯਤਨਂ ਸਙ੍ਕਨ੍ਤਾ, ਸੇਸਂ ਉਤ੍ਤਾਨਮੇਵ. ਪਠਮਪਾਰਾਜਿਕਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਤਤਿਯਸਿਕ੍ਖਾਪਦਂ.

੪. ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੪-੮. ਚਤੁਤ੍ਥੇ – ਪਾਦਪੀਠਂ ਨਾਮ ਧੋਤਪਾਦਟ੍ਠਪਨਕਂ. ਪਾਦਕਠਲਿਕਾ ਨਾਮ ਅਧੋਤਪਾਦਟ੍ਠਪਨਕਂ. ਅਨਞ੍ਞਾਯ ਗਣਸ੍ਸ ਛਨ੍ਦਨ੍ਤਿ ਤਸ੍ਸੇਵ ਕਾਰਕਗਣਸ੍ਸ ਛਨ੍ਦਂ ਅਜਾਨਿਤ੍ਵਾ. ਵਤ੍ਤੇ ਵਤ੍ਤਨ੍ਤਿਨ੍ਤਿ ਤੇਚਤ੍ਤਾਲੀਸਪ੍ਪਭੇਦੇ ਨੇਤ੍ਥਾਰਵਤ੍ਤੇ ਵਤ੍ਤਮਾਨਂ. ਸੇਸਂ ਉਤ੍ਤਾਨਮੇਵ.

ਧੁਰਨਿਕ੍ਖੇਪਸਮੁਟ੍ਠਾਨਂ – ਕਾਯਵਾਚਾਚਿਤ੍ਤਤੋ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਚਤੁਤ੍ਥਸਿਕ੍ਖਾਪਦਂ.

੫. ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੧. ਪਞ੍ਚਮੇ – ਏਕਤੋ ਅਵਸ੍ਸੁਤੇਤਿ ਏਤ੍ਥ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ ਦਟ੍ਠਬ੍ਬੋ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨੇਤਂ ਨ ਵੁਤ੍ਤਂ, ਤਂ ਪਾਲ਼ਿਯਾ ਸਮੇਤਿ. ਸੇਸਂ ਉਤ੍ਤਾਨਮੇਵ.

ਪਠਮਪਾਰਾਜਿਕਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਨ੍ਤਿ.

ਪਞ੍ਚਮਸਿਕ੍ਖਾਪਦਂ.

੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੫-੬. ਛਟ੍ਠੇ – ਯਤੋ ਤ੍ਵਨ੍ਤਿ ਯਸ੍ਮਾ ਤ੍ਵਂ. ਉਯ੍ਯੋਜੇਤਿ ਆਪਤ੍ਤਿ ਦੁਕ੍ਕਟਸ੍ਸਾਤਿਆਦਿਕਾ ਸਙ੍ਘਾਦਿਸੇਸਪਰਿਯੋਸਾਨਾ ਆਪਤ੍ਤਿਯੋ ਕਸ੍ਸਾ ਹੋਨ੍ਤੀਤਿ? ਉਯ੍ਯੋਜਿਕਾਯ. ਵੁਤ੍ਤਞ੍ਚੇਤਂ ਪਰਿਵਾਰੇਪਿ –

‘‘ਨ ਦੇਤਿ ਨ ਪਟਿਗ੍ਗਣ੍ਹਾਤਿ, ਪਟਿਗ੍ਗਹੋ ਤੇਨ ਨ ਵਿਜ੍ਜਤਿ;

ਆਪਜ੍ਜਤਿ ਗਰੁਕਂ ਨ ਲਹੁਕਂ, ਤਞ੍ਚ ਪਰਿਭੋਗਪਚ੍ਚਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);

ਅਯਞ੍ਹਿ ਗਾਥਾ ਇਮਂ ਉਯ੍ਯੋਜਿਕਂ ਸਨ੍ਧਾਯ ਵੁਤ੍ਤਾ. ਇਤਰਿਸ੍ਸਾ ਪਨ ਆਪਤ੍ਤਿਭੇਦੋ ਪਠਮਸਿਕ੍ਖਾਪਦੇ ਵਿਭਤ੍ਤੋਤਿ. ਸੇਸਂ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਛਟ੍ਠਸਿਕ੍ਖਾਪਦਂ.

੭. ਸਤ੍ਤਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੯. ਸਤ੍ਤਮੇ – ਯਾਵਤਤਿਯਕਪਦਤ੍ਥੋ ਮਹਾਵਿਭਙ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਸੇਸਂ ਉਤ੍ਤਾਨਮੇਵਾਤਿ.

ਸਮਨੁਭਾਸਨਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਸਤ੍ਤਮਸਿਕ੍ਖਾਪਦਂ.

੮. ਅਟ੍ਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੧੫. ਅਟ੍ਠਮੇ – ਕਿਸ੍ਮਿਞ੍ਚਿਦੇਵ ਅਧਿਕਰਣੇਤਿ ਚਤੁਨ੍ਨਂ ਅਞ੍ਞਤਰਸ੍ਮਿਂ. ਪਦਭਾਜਨੇ ਪਨ ਕੇਵਲਂ ਅਧਿਕਰਣਵਿਭਾਗਂ ਦਸ੍ਸੇਤੁਂ ‘‘ਅਧਿਕਰਣਂ ਨਾਮ ਚਤ੍ਤਾਰਿ ਅਧਿਕਰਣਾਨੀ’’ਤਿਆਦਿ ਵੁਤ੍ਤਂ. ਸੇਸਂ ਉਤ੍ਤਾਨਮੇਵ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਅਟ੍ਠਮਸਿਕ੍ਖਾਪਦਂ.

੯. ਨਵਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੨੩. ਨਵਮੇ – ਸਂਸਟ੍ਠਾਤਿ ਮਿਸ੍ਸੀਭੂਤਾ. ਅਨਨੁਲੋਮਿਕੇਨਾਤਿ ਪਬ੍ਬਜਿਤਾਨਂ ਅਨਨੁਲੋਮੇਨ ਕਾਯਿਕਵਾਚਸਿਕੇਨ. ਸਂਸਟ੍ਠਾਤਿ ਗਿਹੀਨਂ ਕੋਟ੍ਟਨਪਚਨਗਨ੍ਧਪਿਸਨਮਾਲਾਗਨ੍ਥਨਾਦਿਨਾ ਕਾਯਿਕੇਨ ਸਾਸਨਪਟਿਸਾਸਨਾਹਰਣਸਞ੍ਚਰਿਤ੍ਤਾਦਿਨਾ ਵਾਚਸਿਕੇਨ ਚ ਸਂਸਟ੍ਠਾ. ਪਾਪੋ ਕਿਤ੍ਤਿਸਦ੍ਦੋ ਏਤਾਸਨ੍ਤਿ ਪਾਪਸਦ੍ਦਾ. ਪਾਪੋ ਆਜੀਵਸਙ੍ਖਾਤੋ ਸਿਲੋਕੋ ਏਤਾਸਨ੍ਤਿ ਪਾਪਸਿਲੋਕਾ. ਸੇਸਂ ਉਤ੍ਤਾਨਮੇਵ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਨਵਮਸਿਕ੍ਖਾਪਦਂ.

੧੦. ਦਸਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੨੭. ਦਸਮੇ – ਏਵਾਚਾਰਾਤਿ ਏਵਂਆਚਾਰਾ. ਯਾਦਿਸੋ ਤੁਮ੍ਹਾਕਂ ਆਚਾਰੋ, ਤਾਦਿਸਾ ਆਚਾਰਾਤਿ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ. ਉਞ੍ਞਾਯਾਤਿ ਅਵਞ੍ਞਾਯ ਨੀਚਂ ਕਤ੍ਵਾ ਜਾਨਨਾਯ. ਪਰਿਭਵੇਨਾਤਿ ਕਿਂ ਇਮਾ ਕਰਿਸ੍ਸਨ੍ਤੀਤਿ ਏਵਂ ਪਰਿਭਵਿਤ੍ਵਾ ਜਾਨਨੇਨ. ਅਕ੍ਖਨ੍ਤਿਯਾਤਿ ਅਸਹਨਤਾਯ; ਕੋਧੇਨਾਤਿ ਅਤ੍ਥੋ. ਵੇਭਸ੍ਸਿਯਾਤਿ ਬਲਵਭਸ੍ਸਭਾਵੇਨ; ਅਤ੍ਤਨੋ ਬਲਪ੍ਪਕਾਸਨੇਨ ਸਮੁਤ੍ਰਾਸਨੇਨਾਤਿ ਅਤ੍ਥੋ. ਦੁਬ੍ਬਲ੍ਯਾਤਿ ਤੁਮ੍ਹਾਕਂ ਦੁਬ੍ਬਲਭਾਵੇਨ. ਸਬ੍ਬਤ੍ਥ ਉਞ੍ਞਾਯ ਚ ਪਰਿਭਵੇਨ ਚਾਤਿ ਏਵਂ ਸਮੁਚ੍ਚਯਤ੍ਥੋ ਦਟ੍ਠਬ੍ਬੋ. ਵਿਵਿਚ੍ਚਥਾਤਿ ਵਿਨਾ ਹੋਥ. ਸੇਸਂ ਉਤ੍ਤਾਨਮੇਵ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਦਸਮਸਿਕ੍ਖਾਪਦਂ.

ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਸਤ੍ਤਰਸ ਸਙ੍ਘਾਦਿਸੇਸਾਤਿ ਏਤ੍ਥ ਛਨ੍ਨਂ ਪਠਮਾਪਤ੍ਤਿਕਾਨਂ ਅਨਨ੍ਤਰਾ ਸਞ੍ਚਰਿਤ੍ਤਂ, ਦ੍ਵੇ ਦੁਟ੍ਠਦੋਸਾਤਿ ਇਮਾਨਿ ਤੀਣਿ ਸਿਕ੍ਖਾਪਦਾਨਿ ਮਹਾਵਿਭਙ੍ਗਤੋ ਪਕ੍ਖਿਪਿਤ੍ਵਾ ਨਵ ਪਠਮਾਪਤ੍ਤਿਕਾ, ਚਤੁਨ੍ਨਂ ਯਾਵਤਤਿਯਕਾਨਂ ਅਨਨ੍ਤਰਾ ਮਹਾਵਿਭਙ੍ਗਤੋਪਿ ਚਤ੍ਤਾਰੋ ਯਾਵਤਤਿਯਕੇ ਪਕ੍ਖਿਪਿਤ੍ਵਾ ਅਟ੍ਠ ਯਾਵਤਤਿਯਕਾ ਵੇਦਿਤਬ੍ਬਾ. ਏਵਂ ਸਬ੍ਬੇਪਿ ਪਾਤਿਮੋਕ੍ਖੁਦ੍ਦੇਸਮਗ੍ਗੇਨ ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਸਤ੍ਤਰਸ ਸਙ੍ਘਾਦਿਸੇਸਾ ਧਮ੍ਮਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸੇਸਂ ਉਤ੍ਤਾਨਮੇਵ ਅਞ੍ਞਤ੍ਰ ਪਕ੍ਖਮਾਨਤ੍ਤਾ. ਤਂ ਪਨ ਖਨ੍ਧਕੇ ਵਿਤ੍ਥਾਰੇਨ ਵਣ੍ਣਯਿਸ੍ਸਾਮਾਤਿ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ ਭਿਕ੍ਖੁਨੀਵਿਭਙ੍ਗੇ

ਸਤ੍ਤਰਸਕਵਣ੍ਣਨਾ ਨਿਟ੍ਠਿਤਾ.

ਸਙ੍ਘਾਦਿਸੇਸਕਣ੍ਡਂ ਨਿਟ੍ਠਿਤਂ.