੩. ਨਿਸ੍ਸਗ੍ਗਿਯਕਣ੍ਡਂ (ਭਿਕ੍ਖੁਨੀਵਿਭਙ੍ਗਵਣ੍ਣਨਾ)

ਪਠਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

ਤਿਂਸ ਨਿਸ੍ਸਗ੍ਗਿਯਾ ਧਮ੍ਮਾ, ਭਿਕ੍ਖੁਨੀਨਂ ਪਕਾਸਿਤਾ;

ਯੇ ਤੇਸਂ ਦਾਨਿ ਭਵਤਿ, ਅਯਂ ਸਂਵਣ੍ਣਨਾਕ੍ਕਮੋ.

੭੩੩. ਆਮਤ੍ਤਿਕਾਪਣਨ੍ਤਿ ਅਮਤ੍ਤਾਨਿ ਵੁਚ੍ਚਨ੍ਤਿ ਭਾਜਨਾਨਿ; ਤਾਨਿ ਯੇ ਵਿਕ੍ਕਿਣਨ੍ਤਿ, ਤੇ ਵੁਚ੍ਚਨ੍ਤਿ ਆਮਤ੍ਤਿਕਾ; ਤੇਸਂ ਆਪਣੋ ਆਮਤ੍ਤਿਕਾਪਣੋ; ਤਂ ਵਾ ਪਸਾਰੇਸ੍ਸਨ੍ਤੀਤਿ ਅਤ੍ਥੋ.

੭੩੪. ਪਤ੍ਤਸਨ੍ਨਿਚਯਂ ਕਰੇਯ੍ਯਾਤਿ ਪਤ੍ਤਸਨ੍ਨਿਧਿਂ ਕਰੇਯ੍ਯ; ਏਕਾਹਂ ਅਨਧਿਟ੍ਠਹਿਤ੍ਵਾ ਵਾ ਅਵਿਕਪ੍ਪੇਤ੍ਵਾ ਵਾ ਪਤ੍ਤਂ ਠਪੇਯ੍ਯਾਤਿ ਅਤ੍ਥੋ. ਸੇਸਂ ਮਹਾਵਿਭਙ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਯਮੇਵ ਹਿ ਵਿਸੇਸੋ – ਤਤ੍ਥ ਦਸਾਹਂ ਪਰਿਹਾਰੋ, ਇਧ ਏਕਾਹਮ੍ਪਿ ਨਤ੍ਥਿ. ਸੇਸਂ ਤਾਦਿਸਮੇਵ.

ਇਦਮ੍ਪਿ ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਅਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਠਮਸਿਕ੍ਖਾਪਦਂ.

ਦੁਤਿਯਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੩੮. ਦੁਤਿਯੇ – ਦੁਚ੍ਚੋਲ਼ਾਤਿ ਵਿਰੂਪਚੋਲ਼ਾ; ਜਿਣ੍ਣਚੋਲ਼ਾਤਿ ਅਤ੍ਥੋ. ਅਪਯ੍ਯਾਹੀਤਿ ਅਪਿ ਅਯ੍ਯਾਹਿ.

੭੪੦. ਆਦਿਸ੍ਸ ਦਿਨ੍ਨਨ੍ਤਿ ਸਮ੍ਪਤ੍ਤਾ ਭਾਜੇਨ੍ਤੂਤਿ ਵਤ੍ਵਾਪਿ ਇਦਂ ਗਣਸ੍ਸ ਇਦਂ ਤੁਮ੍ਹਾਕਂ ਦਮ੍ਮੀਤਿ ਵਤ੍ਵਾ ਵਾ ਦਾਤੁਕਮ੍ਯਤਾਯ ਪਾਦਮੂਲੇ ਠਪੇਤ੍ਵਾ ਵਾ ਦਿਨ੍ਨਮ੍ਪਿ ਆਦਿਸ੍ਸ ਦਿਨ੍ਨਂ ਨਾਮ ਹੋਤਿ. ਏਤਂ ਸਬ੍ਬਮ੍ਪਿ ਅਕਾਲਚੀਵਰਂ. ਅਯ੍ਯਾਯ ਦਮ੍ਮੀਤਿ ਏਵਂ ਪਟਿਲਦ੍ਧਂ ਪਨ ਯਥਾਦਾਨੇਯੇਵ ਉਪਨੇਤਬ੍ਬਂ. ਸੇਸਂ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਦੁਤਿਯਸਿਕ੍ਖਾਪਦਂ.

ਤਤਿਯਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੪੩-੫. ਤਤਿਯੇ – ਹਨ੍ਦਾਤਿ ਗਣ੍ਹ. ਸਯਂ ਅਚ੍ਛਿਨ੍ਦਤੀਤਿ ਏਕਂ ਦਤ੍ਵਾ ਏਕਂ ਅਚ੍ਛਿਨ੍ਦਨ੍ਤਿਯਾ ਏਕਂ ਨਿਸ੍ਸਗ੍ਗਿਯਂ, ਬਹੂਸੁ ਬਹੂਨਿ. ਸਚੇ ਸਂਹਰਿਤ੍ਵਾ ਠਪਿਤਾਨਿ ਏਕਤੋ ਅਚ੍ਛਿਨ੍ਦਤਿ, ਵਤ੍ਥੁਗਣਨਾਯ ਆਪਤ੍ਤਿਯੋ. ਬਨ੍ਧਿਤ੍ਵਾ ਠਪਿਤੇਸੁ ਪਨ ਏਕਾਵ ਆਪਤ੍ਤਿ. ਸੇਸਂ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਤਤਿਯਸਿਕ੍ਖਾਪਦਂ.

ਚਤੁਤ੍ਥਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੪੮. ਚਤੁਤ੍ਥੇ – ਕਯੇਨਾਤਿ ਮੂਲੇਨ. ਨ ਮੇ ਆਵੁਸੋ ਸਪ੍ਪਿਨਾ ਅਤ੍ਥੋ; ਤੇਲੇਨ ਮੇ ਅਤ੍ਥੋਤਿ ਇਦਂ ਕਿਰ ਸਾ ਆਹਟਸਪ੍ਪਿਂ ਦਤ੍ਵਾ ਤੇਲਮ੍ਪਿ ਆਹਰਿਸ੍ਸਤੀਤਿ ਮਞ੍ਞਮਾਨਾ ਆਹ. ਵਿਞ੍ਞਾਪੇਤ੍ਵਾਤਿ ਜਾਨਾਪੇਤ੍ਵਾ; ਇਦਂ ਨਾਮ ਆਹਰਾਤਿ ਯਾਚਿਤ੍ਵਾ ਵਾ.

੭੫੨. ਤਞ੍ਞੇਵ ਵਿਞ੍ਞਾਪੇਤੀਤਿ ਯਂ ਪਠਮਂ ਵਿਞ੍ਞਤ੍ਤਂ ਤਂ ਥੋਕਂ ਨਪ੍ਪਹੋਤਿ, ਤਸ੍ਮਾ ਪੁਨ ਤਞ੍ਞੇਵ ਵਿਞ੍ਞਾਪੇਤੀਤਿ ਅਤ੍ਥੋ. ਅਞ੍ਞਞ੍ਚ ਵਿਞ੍ਞਾਪੇਤੀਤਿ ਸਚੇ ਪਠਮਂ ਸਪ੍ਪਿਵਿਞ੍ਞਤ੍ਤਂ, ਯਮਕਂ ਪਚਿਤਬ੍ਬਨ੍ਤਿ ਚ ਵੇਜ੍ਜੇਨ ਵੁਤ੍ਤਤ੍ਤਾ ਤੇਲੇਨ ਅਤ੍ਥੋ ਹੋਤਿ, ਤਤੋ ਤੇਲੇਨਾਪਿ ਮੇ ਅਤ੍ਥੋਤਿ ਏਵਂ ਅਞ੍ਞਞ੍ਚ ਵਿਞ੍ਞਾਪੇਤਿ. ਆਨਿਸਂਸਂ ਦਸ੍ਸੇਤ੍ਵਾਤਿ ਸਚੇ ਕਹਾਪਣਸ੍ਸ ਸਪ੍ਪਿ ਆਭਤਂ ਹੋਤਿ, ਇਮਿਨਾ ਮੂਲੇਨ ਦਿਗੁਣਂ ਤੇਲਂ ਲਬ੍ਭਤਿ, ਤੇਨਾਪਿ ਚ ਇਦਂ ਕਿਚ੍ਚਂ ਨਿਪ੍ਫਜ੍ਜਤਿ, ਤਸ੍ਮਾ ਤੇਲਂ ਆਹਰਾਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ ਵਿਞ੍ਞਾਪੇਤੀਤਿ. ਸੇਸਂ ਉਤ੍ਤਾਨਮੇਵ.

ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਚਤੁਤ੍ਥਸਿਕ੍ਖਾਪਦਂ.

ਪਞ੍ਚਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੫੩. ਪਞ੍ਚਮੇ – ਨ ਮੇ ਸਿਕ੍ਖਮਾਨੇਤਿ ਇਦਂ ਕਿਰ ਸਾ ਕੁਲਧੀਤਾ ‘‘ਅਯਂ ਅਦ੍ਧਾ ਏਵਂ ਵੁਤ੍ਤਾ ਇਦਂ ਤੇਲਂ ਠਪੇਤ੍ਵਾ ਸਪ੍ਪਿਮ੍ਪਿ ਮੇ ਅਤ੍ਤਨੋ ਕੁਲਘਰਾ ਆਹਰਿਸ੍ਸਤੀ’’ਤਿ ਮਞ੍ਞਮਾਨਾ ਆਹ. ਚੇਤਾਪੇਤ੍ਵਾਤਿ ਜਾਨਾਪੇਤ੍ਵਾ ਇਚ੍ਚੇਵ ਅਤ੍ਥੋ. ਸੇਸਂ ਸਬ੍ਬਤ੍ਥ ਚਤੁਤ੍ਥਸਦਿਸਮੇਵਾਤਿ.

ਪਞ੍ਚਮਸਿਕ੍ਖਾਪਦਂ.

ਛਟ੍ਠਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੫੮. ਛਟ੍ਠੇ – ਛਨ੍ਦਕਨ੍ਤਿ ‘‘ਇਦਂ ਨਾਮ ਧਮ੍ਮਕਿਚ੍ਚਂ ਕਰਿਸ੍ਸਾਮ, ਯਂ ਸਕ੍ਕੋਥ; ਤਂ ਦੇਥਾ’’ਤਿ ਏਵਂ ਪਰੇਸਂ ਛਨ੍ਦਞ੍ਚ ਰੁਚਿਞ੍ਚ ਉਪ੍ਪਾਦੇਤ੍ਵਾ ਗਹਿਤਪਰਿਕ੍ਖਾਰਸ੍ਸੇਤਂ ਅਧਿਵਚਨਂ. ਅਞ੍ਞਦਤ੍ਥਿਕੇਨਾਤਿ ਅਞ੍ਞਸ੍ਸਤ੍ਥਾਯ ਦਿਨ੍ਨੇਨ. ਅਞ੍ਞੁਦ੍ਦਿਸਿਕੇਨਾਤਿ ਅਞ੍ਞਂ ਉਦ੍ਦਿਸਿਤ੍ਵਾ ਦਿਨ੍ਨੇਨ. ਸਙ੍ਘਿਕੇਨਾਤਿ ਸਙ੍ਘਸ੍ਸ ਪਰਿਚ੍ਚਤ੍ਤੇਨ.

੭੬੨. ਸੇਸਕਂ ਉਪਨੇਤੀਤਿ ਯਦਤ੍ਥਾਯ ਦਿਨ੍ਨੋ, ਤਂ ਚੇਤਾਪੇਤ੍ਵਾ ਅਵਸੇਸਂ ਅਞ੍ਞਸ੍ਸਤ੍ਥਾਯ ਉਪਨੇਤਿ. ਸਾਮਿਕੇ ਅਪਲੋਕੇਤ੍ਵਾਤਿ ‘‘ਤੁਮ੍ਹੇਹਿ ਚੀਵਰਤ੍ਥਾਯ ਦਿਨ੍ਨੋ, ਅਮ੍ਹਾਕਞ੍ਚ ਚੀਵਰਂ ਅਤ੍ਥਿ, ਤੇਲਾਦੀਹਿ ਪਨ ਅਤ੍ਥੋ’’ਤਿ ਏਵਂ ਆਪੁਚ੍ਛਿਤ੍ਵਾ ਉਪਨੇਤਿ. ਆਪਦਾਸੂਤਿ ਤਥਾਰੂਪੇਸੁ ਉਪਦ੍ਦਵੇਸੁ; ਭਿਕ੍ਖੁਨਿਯੋ ਵਿਹਾਰਂ ਛਡ੍ਡੇਤ੍ਵਾ ਪਕ੍ਕਮਨ੍ਤਿ, ਏਵਰੂਪਾਸੁ ਆਪਦਾਸੁ ਯਂ ਵਾ ਤਂ ਵਾ ਚੇਤਾਪੇਤੁਂ ਵਟ੍ਟਤਿ. ਸੇਸਂ ਉਤ੍ਤਾਨਮੇਵ.

ਛਸਮੁਟ੍ਠਾਨਂ – ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਛਟ੍ਠਸਿਕ੍ਖਾਪਦਂ.

ਸਤ੍ਤਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੬੪. ਸਤ੍ਤਮੇ – ਸਞ੍ਞਾਚਿਕੇਨਾਤਿ ਸਯਂ ਯਾਚਿਤਕੇਨ. ਏਤਦੇਵੇਤ੍ਥ ਨਾਨਾਕਰਣਂ. ਸੇਸਂ ਛਟ੍ਠਸਦਿਸਮੇਵਾਤਿ.

ਸਤ੍ਤਮਸਿਕ੍ਖਾਪਦਂ.

ਅਟ੍ਠਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੬੯. ਅਟ੍ਠਮੇ – ਮਹਾਜਨਿਕੇਨਾਤਿ ਗਣਸ੍ਸ ਪਰਿਚ੍ਚਤ੍ਤੇਨ. ਏਤਦੇਵੇਤ੍ਥ ਨਾਨਾਕਰਣਂ.

ਅਟ੍ਠਮਸਿਕ੍ਖਾਪਦਂ.

ਨਵਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੭੪. ਨਵਮਸਿਕ੍ਖਾਪਦੇ – ਸਞ੍ਞਾਚਿਕੇਨਾਤਿ ਇਦਂ ਪਦਂ ਇਤੋ ਅਧਿਕਤਰਂ.

ਨਵਮਸਿਕ੍ਖਾਪਦਂ.

ਦਸਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੭੮. ਦਸਮੇ – ਪਰਿਵੇਣਂ ਉਨ੍ਦ੍ਰਿਯਤੀਤਿ ਪਰਿਵੇਣਂ ਵਿਨਸ੍ਸਤਿ; ਪਰਿਪਤਤੀਤਿ ਅਤ੍ਥੋ. ਇਦਞ੍ਚ ਪਦਂ ਪੁਗ੍ਗਲਿਕੇਨ ਸਞ੍ਞਾਚਿਕੇਨਾਤਿ ਇਦਞ੍ਚ ਏਤ੍ਤਕਮੇਵ ਨਾਨਾਕਰਣਂ. ਸੇਸਂ ਪੁਬ੍ਬਸਦਿਸਮੇਵਾਤਿ.

ਦਸਮਸਿਕ੍ਖਾਪਦਂ.

ਏਕਾਦਸਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੮੪. ਏਕਾਦਸਮੇ – ਗਰੁਪਾਵੁਰਣਨ੍ਤਿ ਸੀਤਕਾਲੇ ਪਾਵੁਰਣਂ. ਚਤੁਕ੍ਕਂਸਪਰਮਨ੍ਤਿ ਏਤ੍ਥ ਕਂਸੋ ਨਾਮ ਚਤੁਕ੍ਕਹਾਪਣਿਕੋ ਹੋਤਿ; ਤਸ੍ਮਾ ਪਦਭਾਜਨੇ ‘‘ਸੋਲ਼ਸਕਹਾਪਣਗ੍ਘਨਕ’’ਨ੍ਤਿ ਵੁਤ੍ਤਂ.

ਏਕਾਦਸਮਸਿਕ੍ਖਾਪਦਂ.

ਦ੍ਵਾਦਸਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਵਣ੍ਣਨਾ

੭੮੯. ਦ੍ਵਾਦਸਮੇ – ਲਹੁਪਾਵੁਰਣਨ੍ਤਿ ਉਣ੍ਹਕਾਲੇ ਪਾਵੁਰਣਂ. ਸੇਸਂ ਸਿਕ੍ਖਾਪਦਦ੍ਵਯੇਪਿ ਉਤ੍ਤਾਨਮੇਵ.

ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਦ੍ਵਾਦਸਮਸਿਕ੍ਖਾਪਦਂ.

ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾ ਧਮ੍ਮਾਤਿ ਏਤ੍ਥ ਮਹਾਵਿਭਙ੍ਗੇ ਚੀਵਰਵਗ੍ਗਤੋ ਧੋਵਨਞ੍ਚ ਪਟਿਗ੍ਗਹਣਞ੍ਚਾਤਿ ਦ੍ਵੇ ਸਿਕ੍ਖਾਪਦਾਨਿ ਅਪਨੇਤ੍ਵਾ ਅਕਾਲਚੀਵਰਂ ਕਾਲਚੀਵਰਨ੍ਤਿ ਅਧਿਟ੍ਠਹਿਤ੍ਵਾ ਭਾਜਿਤਸਿਕ੍ਖਾਪਦੇਨ ਚ ਪਰਿਵਤ੍ਤੇਤ੍ਵਾ ਅਚ੍ਛਿਨ੍ਨਚੀਵਰੇਨ ਚ ਪਠਮਵਗ੍ਗੋ ਪੂਰੇਤਬ੍ਬੋ. ਪੁਨ ਏਲ਼ਕਲੋਮਵਗ੍ਗਸ੍ਸ ਆਦਿਤੋ ਸਤ੍ਤ ਸਿਕ੍ਖਾਪਦਾਨਿ ਅਪਨੇਤ੍ਵਾ ਸਤ੍ਤ ਅਞ੍ਞਦਤ੍ਥਿਕਾਨਿ ਪਕ੍ਖਿਪਿਤ੍ਵਾ ਦੁਤਿਯਵਗ੍ਗੋ ਪੂਰੇਤਬ੍ਬੋ. ਤਤਿਯਵਗ੍ਗਤੋ ਪਠਮਪਤ੍ਤਂ ਵਸ੍ਸਿਕਸਾਟਿਕਂ ਆਰਞ੍ਞਕਸਿਕ੍ਖਾਪਦਨ੍ਤਿ ਇਮਾਨਿ ਤੀਣਿ ਅਪਨੇਤ੍ਵਾ ਪਤ੍ਤਸਨ੍ਨਿਚਯਗਰੁਪਾਵੁਰਣਲਹੁਪਾਵੁਰਣਸਿਕ੍ਖਾਪਦੇਹਿ ਤਤਿਯਵਗ੍ਗੋ ਪੂਰੇਤਬ੍ਬੋ. ਇਤਿ ਭਿਕ੍ਖੁਨੀਨਂ ਦ੍ਵਾਦਸ ਸਿਕ੍ਖਾਪਦਾਨਿ ਏਕਤੋਪਞ੍ਞਤ੍ਤਾਨਿ, ਅਟ੍ਠਾਰਸ ਉਭਤੋਪਞ੍ਞਤ੍ਤਾਨੀਤਿ ਏਵਂ ਸਬ੍ਬੇਪਿ ਪਾਤਿਮੋਕ੍ਖੁਦ੍ਦੇਸਮਗ੍ਗੇਨ ‘‘ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾ ਧਮ੍ਮਾ’’ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸੇਸਂ ਵੁਤ੍ਤਨਯਮੇਵਾਤਿ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ ਭਿਕ੍ਖੁਨੀਵਿਭਙ੍ਗੇ

ਤਿਂਸਕਵਣ੍ਣਨਾ ਨਿਟ੍ਠਿਤਾ.

ਨਿਸ੍ਸਗ੍ਗਿਯਕਣ੍ਡਂ ਨਿਟ੍ਠਿਤਂ.