੬. ਸੁਰੁਸੁਰੁਵਗ੍ਗਵਣ੍ਣਨਾ

੬੨੭. ਸੁਰੁਸੁਰੁਕਾਰਕਨ੍ਤਿ ਸੁਰੁਸੁਰੂਤਿ ਏਵਂ ਸਦ੍ਦਂ ਕਤ੍ਵਾ ਕਤ੍ਵਾ. ਦਵੋਤਿ ਪਰਿਹਾਸਵਚਨਂ; ਤਂ ਯੇਨ ਕੇਨਚਿ ਪਰਿਯਾਯੇਨ ‘‘ਕਿਂ ਬੁਦ੍ਧੋ, ਸਿਲਕਬੁਦ੍ਧੋ, ਪਟਿਬੁਦ੍ਧੋ; ਕਿਂ ਧਮ੍ਮੋ, ਗੋਧਮ੍ਮੋ, ਅਜਧਮ੍ਮੋ; ਕਿਂ ਸਙ੍ਘੋ, ਮਿਗਸਙ੍ਘੋ, ਪਸੁਸਙ੍ਘੋ’’ਤਿਆਦਿਨਾ ਨਯੇਨ ਤੀਣਿ ਰਤਨਾਨਿ ਆਰਬ੍ਭ ਨ ਕਾਤਬ੍ਬਨ੍ਤਿ ਅਤ੍ਥੋ.

੬੨੮. ਹਤ੍ਥਨਿਲ੍ਲੇਹਕਨ੍ਤਿ ਹਤ੍ਥਂ ਨਿਲ੍ਲੇਹਿਤ੍ਵਾ ਨਿਲ੍ਲੇਹਿਤ੍ਵਾ. ਭੁਞ੍ਜਨ੍ਤੇਨ ਹਿ ਅਙ੍ਗੁਲਿਮਤ੍ਤਮ੍ਪਿ ਨਿਲ੍ਲੇਹਿਤੁਂ ਨ ਵਟ੍ਟਤਿ. ਘਨਯਾਗੁਫਾਣਿਤਪਾਯਾਸਾਦਿਕੇ ਪਨ ਅਙ੍ਗੁਲੀਹਿ ਗਹੇਤ੍ਵਾ ਅਙ੍ਗੁਲਿਯੋ ਮੁਖੇ ਪਵੇਸੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਪਤ੍ਤਨਿਲ੍ਲੇਹਕਓਟ੍ਠਨਿਲ੍ਲੇਹਕੇਸੁਪਿ ਏਸੇਵ ਨਯੋ. ਤਸ੍ਮਾ ਏਕਙ੍ਗੁਲਿਯਾਪਿ ਪਤ੍ਤੋ ਨ ਨਿਲ੍ਲੇਹਿਤਬ੍ਬੋ, ਏਕਓਟ੍ਠੋਪਿ ਜਿਵ੍ਹਾਯ ਨ ਨਿਲ੍ਲੇਹਿਤਬ੍ਬੋ, ਓਟ੍ਠਮਂਸੇਹਿ ਏਵ ਪਨ ਗਹੇਤ੍ਵਾ ਅਨ੍ਤੋ ਪਵੇਸੇਤੁਂ ਵਟ੍ਟਤਿ.

੬੩੧. ਕੋਕਨਦੇਤਿ ਏਵਂਨਾਮਕੇ. ਕੋਕਨਦਨ੍ਤਿ ਪਦੁਮਂ ਵੁਚ੍ਚਤਿ, ਸੋ ਚ ਪਾਸਾਦੋ ਪਦੁਮਸਣ੍ਠਾਨੋ, ਤੇਨਸ੍ਸ ਕੋਕਨਦੋਤ੍ਵੇਵ ਨਾਮਂ ਅਕਂਸੁ. ਨ ਸਾਮਿਸੇਨ ਹਤ੍ਥੇਨ ਪਾਨੀਯਥਾਲਕਨ੍ਤਿ ਏਤਂ ਪਟਿਕ੍ਕੂਲਵਸੇਨ ਪਟਿਕ੍ਖਿਤ੍ਤਂ, ਤਸ੍ਮਾ ਸਙ੍ਘਿਕਮ੍ਪਿ ਪੁਗ੍ਗਲਿਕਮ੍ਪਿ ਗਿਹਿਸਨ੍ਤਕਮ੍ਪਿ ਅਤ੍ਤਨੋ ਸਨ੍ਤਕਮ੍ਪਿ ਸਙ੍ਖਮ੍ਪਿ ਸਰਾਵਮ੍ਪਿ ਥਾਲਕਮ੍ਪਿ ਨ ਗਹੇਤਬ੍ਬਮੇਵ, ਗਣ੍ਹਨ੍ਤਸ੍ਸ ਦੁਕ੍ਕਟਂ. ਸਚੇ ਪਨ ਹਤ੍ਥਸ੍ਸ ਏਕਦੇਸੋ ਆਮਿਸਮਕ੍ਖਿਤੋ ਨ ਹੋਤਿ, ਤੇਨ ਪਦੇਸੇਨ ਗਹੇਤੁਂ ਵਟ੍ਟਤਿ.

੬੩੨. ਉਦ੍ਧਰਿਤ੍ਵਾ ਵਾਤਿ ਸਿਤ੍ਥਾਨਿ ਉਦਕਤੋ ਉਦ੍ਧਰਿਤ੍ਵਾ ਏਕਸ੍ਮਿਂ ਠਾਨੇ ਰਾਸਿਂ ਕਤ੍ਵਾ ਉਦਕਂ ਛਡ੍ਡੇਤਿ. ਭਿਨ੍ਦਿਤ੍ਵਾ ਵਾਤਿ ਸਿਤ੍ਥਾਨਿ ਭਿਨ੍ਦਿਤ੍ਵਾ ਉਦਕਗਤਿਕਾਨਿ ਕਤ੍ਵਾ ਛਡ੍ਡੇਤਿ. ਪਟਿਗ੍ਗਹੇ ਵਾਤਿ ਪਟਿਗ੍ਗਹੇਨ ਪਟਿਚ੍ਛਨ੍ਤੋ ਨਂ ਪਟਿਗ੍ਗਹੇ ਛਡ੍ਡੇਤਿ. ਨੀਹਰਿਤ੍ਵਾਤਿ ਬਹਿ ਨੀਹਰਿਤ੍ਵਾ ਛਡ੍ਡੇਤਿ; ਏਵਂ ਛਡ੍ਡੇਨ੍ਤਸ੍ਸ ਅਨਾਪਤ੍ਤਿ.

੬੩੪. ਸੇਤਚ੍ਛਤ੍ਤਨ੍ਤਿ ਵਤ੍ਥਪਲਿਗੁਣ੍ਠਿਤਂ ਪਣ੍ਡਰਚ੍ਛਤ੍ਤਂ. ਕਿਲਞ੍ਜਚ੍ਛਤ੍ਤਨ੍ਤਿ ਵਿਲੀਵਚ੍ਛਤ੍ਤਂ. ਪਣ੍ਣਚ੍ਛਤ੍ਤਨ੍ਤਿ ਤਾਲਪਣ੍ਣਾਦੀਹਿ ਯੇਹਿ ਕੇਹਿਚਿ ਕਤਂ. ਮਣ੍ਡਲਬਦ੍ਧਂ ਸਲਾਕਬਦ੍ਧਨ੍ਤਿ ਇਦਂ ਪਨ ਤਿਣ੍ਣਮ੍ਪਿ ਛਤ੍ਤਾਨਂ ਪਞ੍ਜਰਦਸ੍ਸਨਤ੍ਥਂ ਵੁਤ੍ਤਂ. ਤਾਨਿ ਹਿ ਮਣ੍ਡਲਬਦ੍ਧਾਨਿ ਚੇਵ ਹੋਨ੍ਤਿ ਸਲਾਕਬਦ੍ਧਾਨਿ ਚ. ਯਮ੍ਪਿ ਤਤ੍ਥਜਾਤਕਦਣ੍ਡਕੇਨ ਕਤਂ ਏਕਪਣ੍ਣਚ੍ਛਤ੍ਤਂ ਹੋਤਿ, ਤਮ੍ਪਿ ਛਤ੍ਤਮੇਵ. ਏਤੇਸੁ ਯਂਕਿਞ੍ਚਿ ਛਤ੍ਤਂ ਪਾਣਿਮ੍ਹਿ ਅਸ੍ਸਾਤਿ ਛਤ੍ਤਪਾਣਿ. ਸੋ ਤਂ ਛਤ੍ਤਂ ਧਾਰਯਮਾਨੋ ਵਾ ਅਂਸੇ ਵਾ ਕਤ੍ਵਾ ਊਰੁਮ੍ਹਿ ਵਾ ਠਪੇਤ੍ਵਾ ਯਾਵ ਹਤ੍ਥੇਨ ਨ ਮੁਚ੍ਚਤਿ, ਤਾਵਸ੍ਸ ਧਮ੍ਮਂ ਦੇਸੇਤੁਂ ਨ ਵਟ੍ਟਤਿ, ਦੇਸੇਨ੍ਤਸ੍ਸ ਵੁਤ੍ਤਨਯੇਨ ਦੁਕ੍ਕਟਂ. ਸਚੇ ਪਨਸ੍ਸ ਅਞ੍ਞੋ ਛਤ੍ਤਂ ਧਾਰੇਤਿ, ਛਤ੍ਤਪਾਦੁਕਾਯ ਵਾ ਠਿਤਂ ਹੋਤਿ, ਹਤ੍ਥਤੋ ਅਪਗਤਮਤ੍ਤੇ ਛਤ੍ਤਪਾਣਿ ਨਾਮ ਨ ਹੋਤਿ. ਤਸ੍ਸ ਧਮ੍ਮਂ ਦੇਸੇਤੁਂ ਵਟ੍ਟਤਿ. ਧਮ੍ਮਪਰਿਚ੍ਛੇਦੋ ਪਨੇਤ੍ਥ ਪਦਸੋਧਮ੍ਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੬੩੫. ਦਣ੍ਡਪਾਣਿਸ੍ਸਾਤਿ ਏਤ੍ਥ ਦਣ੍ਡੋ ਨਾਮ ਮਜ੍ਝਿਮਸ੍ਸ ਪੁਰਿਸਸ੍ਸ ਚਤੁਹਤ੍ਥਪ੍ਪਮਾਣੋ ਦਣ੍ਡਪਾਣਿਭਾਵੋ ਪਨਸ੍ਸ ਛਤ੍ਤਪਾਣਿਮ੍ਹਿ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੬੩੬. ਸਤ੍ਥਪਾਣਿਮ੍ਹਿਪਿ ਏਸੇਵ ਨਯੋ. ਅਸਿਂ ਸਨ੍ਨਹਿਤ੍ਵਾ ਠਿਤੋਪਿ ਹਿ ਸਤ੍ਥਪਾਣਿਸਙ੍ਖ੍ਯਂ ਨ ਗਚ੍ਛਤਿ.

੬੩੭. ਆਵੁਧਪਾਣਿਸ੍ਸਾਤਿ ਏਤ੍ਥ ਕਿਞ੍ਚਾਪਿ ਵੁਤ੍ਤਂ – ‘‘ਆਵੁਧਂ ਨਾਮ ਚਾਪੋ ਕੋਦਣ੍ਡੋ’’ਤਿ, ਅਥ ਖੋ ਸਬ੍ਬਾਪਿ ਧਨੁਵਿਕਤਿ ਸਦ੍ਧਿਂ ਸਰਵਿਕਤਿਯਾ ਆਵੁਧਨ੍ਤਿ ਵੇਦਿਤਬ੍ਬਂ. ਤਸ੍ਮਾ ਸਦ੍ਧਿਂ ਵਾ ਸਰੇਨ ਧਨੁਂ ਗਹੇਤ੍ਵਾ ਸੁਦ੍ਧਧਨੁਂ ਵਾ ਸੁਦ੍ਧਸਰਂ ਵਾ ਸਜਿਯਧਨੁਂ ਵਾ ਨਿਜ੍ਜਿਯਧਨੁਂ ਵਾ ਗਹੇਤ੍ਵਾ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਧਮ੍ਮੋ ਦੇਸੇਤੁਂ ਨ ਵਟ੍ਟਤਿ. ਸਚੇ ਪਨਸ੍ਸ ਧਨੁਂ ਕਣ੍ਠੇਪਿ ਪਟਿਮੁਕ੍ਕਂ ਹੋਤਿ, ਯਾਵ ਹਤ੍ਥੇਨ ਨ ਗਣ੍ਹਾਤਿ, ਤਾਵ ਧਮ੍ਮਂ ਦੇਸੇਤੁਂ ਵਟ੍ਟਤਿਯੇਵਾਤਿ.

ਛਟ੍ਠੋ ਵਗ੍ਗੋ.