੭. ਪਾਦੁਕਵਗ੍ਗਵਣ੍ਣਨਾ

੬੩੮. ਅਕ੍ਕਨ੍ਤਸ੍ਸਾਤਿ ਛਤ੍ਤਦਣ੍ਡਕੇ ਅਙ੍ਗੁਲਨ੍ਤਰਂ ਅਪ੍ਪਵੇਸੇਤ੍ਵਾ ਕੇਵਲਂ ਪਾਦੁਕਂ ਅਕ੍ਕਮਿਤ੍ਵਾ ਠਿਤਸ੍ਸ. ਪਟਿਮੁਕ੍ਕਸ੍ਸਾਤਿ ਪਟਿਮੁਞ੍ਚਿਤ੍ਵਾ ਠਿਤਸ੍ਸ. ਉਪਾਹਨਾਯਪਿ ਏਸੇਵ ਨਯੋ. ਓਮੁਕ੍ਕੋਤਿ ਪਨੇਤ੍ਥ ਪਣ੍ਹਿਕਬਦ੍ਧਂ ਓਮੁਞ੍ਚਿਤ੍ਵਾ ਠਿਤੋ ਵੁਚ੍ਚਤਿ.

੬੪੦. ਯਾਨਗਤਸ੍ਸਾਤਿ ਏਤ੍ਥ ਸਚੇਪਿ ਦ੍ਵੀਹਿ ਜਨੇਹਿ ਹਤ੍ਥਸਙ੍ਘਾਟੇਨ ਗਹਿਤੋ, ਸਾਟਕੇ ਵਾ ਠਪੇਤ੍ਵਾ ਵਂਸੇਨ ਵਯ੍ਹਤਿ, ਅਯੁਤ੍ਤੇ ਵਾ ਵਯ੍ਹਾਦਿਕੇ ਯਾਨੇ, ਵਿਸਙ੍ਖਰਿਤ੍ਵਾ ਵਾ ਠਪਿਤੇ ਚਕ੍ਕਮਤ੍ਤੇਪਿ ਨਿਸਿਨ੍ਨੋ ਯਾਨਗਤੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਸਚੇ ਪਨ ਦ੍ਵੇਪਿ ਏਕਯਾਨੇ ਨਿਸਿਨ੍ਨਾ ਹੋਨ੍ਤਿ, ਵਟ੍ਟਤਿ. ਵਿਸੁਂ ਨਿਸਿਨ੍ਨੇਸੁਪਿ ਉਚ੍ਚੇ ਯਾਨੇ ਨਿਸਿਨ੍ਨੇਨ ਨੀਚੇ ਨਿਸਿਨ੍ਨਸ੍ਸ ਦੇਸੇਤੁਂ ਵਟ੍ਟਤਿ, ਸਮਪ੍ਪਮਾਣੇਪਿ ਵਟ੍ਟਤਿ. ਪੁਰਿਮੇ ਯਾਨੇ ਨਿਸਿਨ੍ਨੇਨ ਪਚ੍ਛਿਮੇ ਨਿਸਿਨ੍ਨਸ੍ਸ ਵਟ੍ਟਤਿ. ਪਚ੍ਛਿਮੇ ਪਨ ਉਚ੍ਚਤਰੇਪਿ ਨਿਸਿਨ੍ਨੇਨ ਦੇਸੇਤੁਂ ਨ ਵਟ੍ਟਤਿ.

੬੪੧. ਸਯਨਗਤਸ੍ਸਾਤਿ ਅਨ੍ਤਮਸੋ ਕਟਸਾਰਕੇਪਿ ਪਕਤਿਭੂਮਿਯਮ੍ਪਿ ਨਿਪਨ੍ਨਸ੍ਸ ਉਚ੍ਚੇਪਿ ਮਞ੍ਚਪੀਠੇ ਵਾ ਭੂਮਿਪਦੇਸੇ ਵਾ ਠਿਤੇਨ ਨਿਸਿਨ੍ਨੇਨ ਵਾ ਦੇਸੇਤੁਂ ਨ ਵਟ੍ਟਤਿ. ਸਯਨਗਤੇਨ ਪਨ ਸਯਨਗਤਸ੍ਸ ਉਚ੍ਚਤਰੇ ਵਾ ਸਮਪ੍ਪਮਾਣੇ ਵਾ ਨਿਪਨ੍ਨੇਨ ਦੇਸੇਤੁਂ ਵਟ੍ਟਤਿ. ਨਿਪਨ੍ਨੇਨ ਚ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਦੇਸੇਤੁਂ ਵਟ੍ਟਤਿ, ਨਿਸਿਨ੍ਨੇਨਾਪਿ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਵਟ੍ਟਤਿ. ਠਿਤੇਨ ਠਿਤਸ੍ਸੇਵ ਵਟ੍ਟਤਿ.

੬੪੨. ਪਲ੍ਲਤ੍ਥਿਕਾਯਾਤਿ ਆਯੋਗਪਲ੍ਲਤ੍ਥਿਕਾਯ ਵਾ ਹਤ੍ਥਪਲ੍ਲਤ੍ਥਿਕਾਯ ਵਾ ਦੁਸ੍ਸਪਲ੍ਲਤ੍ਥਿਕਾਯ ਵਾ ਯਾਯ ਕਾਯਚਿ ਪਲ੍ਲਤ੍ਥਿਕਾਯ ਨਿਸਿਨ੍ਨਸ੍ਸ ਅਗਿਲਾਨਸ੍ਸ ਦੇਸੇਤੁਂ ਨ ਵਟ੍ਟਤਿ.

੬੪੩. ਵੇਠਿਤਸੀਸਸ੍ਸਾਤਿ ਦੁਸ੍ਸਵੇਠਨੇਨ ਵਾ ਮੋਲ਼ਿਆਦੀਹਿ ਵਾ ਯਥਾ ਕੇਸਨ੍ਤੋ ਨ ਦਿਸ੍ਸਤਿ; ਏਵਂ ਵੇਠਿਤਸੀਸਸ੍ਸ.

੬੪੪. ਓਗੁਣ੍ਠਿਤਸੀਸਸ੍ਸਾਤਿ ਸਸੀਸਂ ਪਾਰੁਤਸ੍ਸ.

੬੪੫. ਛਮਾਯਂ ਨਿਸਿਨ੍ਨੇਨਾਤਿ ਭੂਮਿਯਂ ਨਿਸਿਨ੍ਨੇਨ. ਆਸਨੇ ਨਿਸਿਨ੍ਨਸ੍ਸਾਤਿ ਅਨ੍ਤਮਸੋ ਵਤ੍ਥਮ੍ਪਿ ਤਿਣਾਨਿਪਿ ਸਨ੍ਥਰਿਤ੍ਵਾ ਨਿਸਿਨ੍ਨਸ੍ਸ.

੬੪੭. ਛਪਕਸ੍ਸਾਤਿ ਚਣ੍ਡਾਲਸ੍ਸ. ਛਪਕੀਤਿ ਚਣ੍ਡਾਲੀ. ਨਿਲੀਨੋਤਿ ਪਟਿਚ੍ਛਨ੍ਨੋ ਹੁਤ੍ਵਾ. ਯਤ੍ਰ ਹਿ ਨਾਮਾਤਿ ਯੋ ਹਿ ਨਾਮ. ਸਬ੍ਬਮਿਦਂ ਚਰਿਮਂ ਕਤਨ੍ਤਿ ਤਤ੍ਥੇਵ ਪਰਿਪਤੀਤਿ ‘‘ਸਬ੍ਬੋ ਅਯਂ ਲੋਕੋ ਸਙ੍ਕਰਂ ਗਤੋ ਨਿਮ੍ਮਰਿਯਾਦੋ’’ਤਿ ਇਮਂ ਵਚਨਂ ਵਤ੍ਵਾ ਤਤ੍ਥੇਵ ਤੇਸਂ ਦ੍ਵਿਨ੍ਨਮ੍ਪਿ ਅਨ੍ਤਰਾ ਰੁਕ੍ਖਤੋ ਪਤਿਤੋ. ਪਤਿਤ੍ਵਾ ਚ ਪਨ ਉਭਿਨ੍ਨਮ੍ਪਿ ਪੁਰਤੋ ਠਤ੍ਵਾ ਇਮਂ ਗਾਥਂ ਅਭਾਸਿ –

‘‘ਉਭੋ ਅਤ੍ਥਂ ਨ ਜਾਨਨ੍ਤਿ…ਪੇ… ਅਸ੍ਮਾ ਕੁਮ੍ਭਮਿਵਾਭਿਦਾ’’ਤਿ.

ਤਤ੍ਥ ਉਭੋ ਅਤ੍ਥਂ ਨ ਜਾਨਨ੍ਤੀਤਿ ਦ੍ਵੇਪਿ ਜਨਾ ਪਾਲ਼ਿਯਾ ਅਤ੍ਥਂ ਨ ਜਾਨਨ੍ਤਿ. ਧਮ੍ਮਂ ਨ ਪਸ੍ਸਰੇਤਿ ਪਾਲ਼ਿਂ ਨ ਪਸ੍ਸਨ੍ਤਿ. ਕਤਮੇ ਤੇ ਉਭੋਤਿ? ‘‘ਯੋ ਚਾਯਂ ਮਨ੍ਤਂ ਵਾਚੇਤਿ, ਯੋ ਚਾਧਮ੍ਮੇਨਧੀਯਤੀ’’ਤਿ. ਏਵਂ ਬ੍ਰਾਹ੍ਮਣਞ੍ਚ ਰਾਜਾਨਞ੍ਚ ਉਭੋਪਿ ਅਧਮ੍ਮਿਕਭਾਵੇ ਠਪੇਸਿ.

ਤਤੋ ਬ੍ਰਾਹ੍ਮਣੋ ਸਾਲੀਨਨ੍ਤਿ ਗਾਥਮਾਹ. ਤਸ੍ਸਤ੍ਥੋ – ਜਾਨਾਮਹਂ ਭੋ ‘‘ਅਯਂ ਅਧਮ੍ਮੋ’’ਤਿ; ਅਪਿ ਚ ਖੋ ਮਯਾ ਦੀਘਰਤ੍ਤਂ ਸਪੁਤ੍ਤਦਾਰਪਰਿਜਨੇਨ ਰਞ੍ਞੋ ਸਨ੍ਤਕੋ ਸਾਲੀਨਂ ਓਦਨੋ ਭੁਤ੍ਤੋ. ਸੁਚਿਮਂਸੂਪਸੇਚਨੋਤਿ ਨਾਨਪ੍ਪਕਾਰਵਿਕਤਿਸਮ੍ਪਾਦਿਤਂ ਸੁਚਿਮਂਸੂਪਸੇਚਨਂ ਮਿਸ੍ਸੀਕਰਣਮਸ੍ਸਾਤਿ ਸੁਚਿਮਂਸੂਪਸੇਚਨੋ. ਤਸ੍ਮਾ ਧਮ੍ਮੇ ਨ ਵਤ੍ਤਾਮੀਤਿ ਯਸ੍ਮਾ ਏਵਂ ਮਯਾ ਰਞ੍ਞੋ ਓਦਨੋ ਭੁਤ੍ਤੋ, ਅਞ੍ਞੇ ਚ ਬਹੂ ਲਾਭਾ ਲਦ੍ਧਾ, ਤਸ੍ਮਾ ਧਮ੍ਮੇ ਅਹਂ ਨ ਵਤ੍ਤਾਮਿ ਉਦਰੇ ਬਦ੍ਧੋ ਹੁਤ੍ਵਾ, ਨ ਧਮ੍ਮਂ ਅਜਾਨਨ੍ਤੋ. ਅਯਞ੍ਹਿ ਧਮ੍ਮੋ ਅਰਿਯੇਹਿ ਵਣ੍ਣਿਤੋ ਪਸਤ੍ਥੋ ਥੋਮਿਤੋਤਿ ਜਾਨਾਮਿ.

ਅਥ ਨਂ ਛਪਕੋ ‘‘ਧਿਰਤ੍ਥੂ’’ਤਿਆਦਿਨਾ ਗਾਥਾਦ੍ਵਯੇਨ ਅਜ੍ਝਭਾਸਿ. ਤਸ੍ਸਤ੍ਥੋ – ਯੋ ਤਯਾ ਧਨਲਾਭੋ ਚ ਯਸਲਾਭੋ ਚ ਲਦ੍ਧੋ, ਧਿਰਤ੍ਥੁ ਤਂ ਧਨਲਾਭਂ ਯਸਲਾਭਞ੍ਚ ਬ੍ਰਾਹ੍ਮਣ. ਕਸ੍ਮਾ? ਯਸ੍ਮਾ ਅਯਂ ਤਯਾ ਲਦ੍ਧੋ ਲਾਭੋ ਆਯਤਿਂ ਅਪਾਯੇਸੁ ਵਿਨਿਪਾਤਨਹੇਤੁਨਾ ਸਮ੍ਪਤਿ ਚ ਅਧਮ੍ਮਚਰਣੇਨ ਵੁਤ੍ਤਿ ਨਾਮ ਹੋਤਿ. ਏਵਰੂਪਾ ਯਾ ਵੁਤ੍ਤਿ ਆਯਤਿਂ ਵਿਨਿਪਾਤੇਨ ਇਧ ਅਧਮ੍ਮਚਰਣੇਨ ਵਾ ਨਿਪ੍ਪਜ੍ਜਤਿ, ਕਿਂ ਤਾਯ ਵੁਤ੍ਤਿਯਾ? ਤੇਨ ਵੁਤ੍ਤਂ –

‘‘ਧਿਰਤ੍ਥੁ ਤਂ ਧਨਲਾਭਂ, ਯਸਲਾਭਞ੍ਚ ਬ੍ਰਾਹ੍ਮਣ;

ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ ਵਾ’’ਤਿ.

ਪਰਿਬ੍ਬਜ ਮਹਾਬ੍ਰਹ੍ਮੇਤਿ ਮਹਾਬ੍ਰਾਹ੍ਮਣ ਇਤੋ ਦਿਸਾ ਸੀਘਂ ਪਲਾਯਸ੍ਸੁ. ਪਚਨ੍ਤਞ੍ਞੇਪਿ ਪਾਣਿਨੋਤਿ ਅਞ੍ਞੇਪਿ ਸਤ੍ਤਾ ਪਚਨ੍ਤਿ ਚੇਵ ਭੁਞ੍ਜਨ੍ਤਿ ਚ; ਨ ਕੇਵਲਂ ਤ੍ਵਞ੍ਚੇਵ ਰਾਜਾ ਚ. ਮਾ ਤ੍ਵਂ ਅਧਮ੍ਮੋ ਆਚਰਿਤੋ ਅਸ੍ਮਾ ਕੁਮ੍ਭਮਿਵਾਭਿਦਾਤਿ ਸਚੇ ਹਿ ਤ੍ਵਂ ਇਤੋ ਅਪਰਿਬ੍ਬਜਿਤ੍ਵਾ ਇਮਂ ਅਧਮ੍ਮਂ ਆਚਰਿਸ੍ਸਸਿ, ਤਤੋ ਤ੍ਵਂ ਸੋ ਅਧਮ੍ਮੋ ਏਵਂ ਆਚਰਿਤੋ ਯਥਾ ਉਦਕਕੁਮ੍ਭਂ ਪਾਸਾਣੋ ਭਿਨ੍ਦੇਯ੍ਯ; ਏਵਂ ਭੇਚ੍ਛਤਿ, ਤੇਨ ਮਯਂ ਤਂ ਵਦਾਮ –

‘‘ਪਰਿਬ੍ਬਜ ਮਹਾਬ੍ਰਹ੍ਮੇ, ਪਚਨ੍ਤਞ੍ਞੇਪਿ ਪਾਣਿਨੋ;

ਮਾ ਤ੍ਵਂ ਅਧਮ੍ਮੋ ਆਚਰਿਤੋ, ਅਸ੍ਮਾ ਕੁਮ੍ਭਮਿਵਾਭਿਦਾ’’ਤਿ.

ਉਚ੍ਚੇ ਆਸਨੇਤਿ ਅਨ੍ਤਮਸੋ ਭੂਮਿਪ੍ਪਦੇਸੇਪਿ ਉਨ੍ਨਤਟ੍ਠਾਨੇ ਨਿਸਿਨ੍ਨਸ੍ਸ ਦੇਸੇਤੁਂ ਨ ਵਟ੍ਟਤਿ.

੬੪੮. ਨ ਠਿਤੋ ਨਿਸਿਨ੍ਨਸ੍ਸਾਤਿ ਸਚੇਪਿ ਥੇਰੁਪਟ੍ਠਾਨਂ ਗਨ੍ਤ੍ਵਾ ਠਿਤਂ ਦਹਰਭਿਕ੍ਖੁਂ ਆਸਨੇ ਨਿਸਿਨ੍ਨੋ ਮਹਾਥੇਰੋ ਪਞ੍ਹਂ ਪੁਚ੍ਛਤਿ, ਨ ਕਥੇਤਬ੍ਬਂ. ਗਾਰਵੇਨ ਪਨ ਥੇਰਂ ਉਟ੍ਠਹਿਤ੍ਵਾ ਪੁਚ੍ਛਥਾਤਿ ਵਤ੍ਤੁਂ ਨ ਸਕ੍ਕਾ, ਪਸ੍ਸੇ ਠਿਤਭਿਕ੍ਖੁਸ੍ਸ ਕਥੇਮੀਤਿ ਕਥੇਤੁਂ ਵਟ੍ਟਤਿ.

੬੪੯. ਨ ਪਚ੍ਛਤੋ ਗਚ੍ਛਨ੍ਤੇਨਾਤਿ ਏਤ੍ਥ ਸਚੇ ਪੁਰਤੋ ਗਚ੍ਛਨ੍ਤੋ ਪਚ੍ਛਤੋ ਗਚ੍ਛਨ੍ਤਂ ਪਞ੍ਹਂ ਪੁਚ੍ਛਤਿ, ਨ ਕਥੇਤਬ੍ਬਂ. ਪਚ੍ਛਿਮਸ੍ਸ ਭਿਕ੍ਖੁਨੋ ਕਥੇਮੀਤਿ ਕਥੇਤੁਂ ਵਟ੍ਟਤਿ. ਸਦ੍ਧਿਂ ਉਗ੍ਗਹਿਤਧਮ੍ਮਂ ਪਨ ਸਜ੍ਝਾਯਿਤੁਂ ਵਟ੍ਟਤਿ. ਸਮਧੁਰੇਨ ਗਚ੍ਛਨ੍ਤਸ੍ਸ ਕਥੇਤੁਂ ਵਟ੍ਟਤਿ.

੬੫੦. ਨ ਉਪ੍ਪਥੇਨਾਤਿ ਏਤ੍ਥਾਪਿ ਸਚੇ ਦ੍ਵੇਪਿ ਸਕਟਪਥੇ ਏਕੇਕਚਕ੍ਕਪਥੇਨ ਵਾ ਉਪ੍ਪਥੇਨ ਵਾ ਸਮਧੁਰਂ ਗਚ੍ਛਨ੍ਤਿ, ਵਟ੍ਟਤਿ.

੬੫੧. ਅਸਞ੍ਚਿਚ੍ਚਾਤਿ ਪਟਿਚ੍ਛਨ੍ਨਟ੍ਠਾਨਂ ਗਚ੍ਛਨ੍ਤਸ੍ਸ ਸਹਸਾ ਉਚ੍ਚਾਰੋ ਵਾ ਪਸ੍ਸਾਵੋ ਵਾ ਨਿਕ੍ਖਮਤਿ, ਅਸਞ੍ਚਿਚ੍ਚ ਕਤੋ ਨਾਮ ਅਨਾਪਤ੍ਤਿ.

੬੫੨. ਨ ਹਰਿਤੇਤਿ ਏਤ੍ਥ ਯਮ੍ਪਿ ਜੀਵਰੁਕ੍ਖਸ੍ਸ ਮੂਲਂ ਪਥਵਿਯਂ ਦਿਸ੍ਸਮਾਨਂ ਗਚ੍ਛਤਿ, ਸਾਖਾ ਵਾ ਭੂਮਿਲਗ੍ਗਾ ਗਚ੍ਛਤਿ, ਸਬ੍ਬਂ ਹਰਿਤਸਙ੍ਖਾਤਮੇਵ. ਖਨ੍ਧੇ ਨਿਸੀਦਿਤ੍ਵਾ ਅਪ੍ਪਹਰਿਤਟ੍ਠਾਨੇ ਪਾਤੇਤੁਂ ਵਟ੍ਟਤਿ. ਅਪ੍ਪਹਰਿਤਟ੍ਠਾਨਂ ਓਲੋਕੇਨ੍ਤਸ੍ਸੇਵ ਸਹਸਾ ਨਿਕ੍ਖਮਤਿ, ਗਿਲਾਨਟ੍ਠਾਨੇ ਠਿਤੋ ਹੋਤਿ, ਵਟ੍ਟਤਿ. ਅਪ੍ਪਹਰਿਤੇ ਕਤੋਤਿ ਅਪ੍ਪਹਰਿਤਂ ਅਲਭਨ੍ਤੇਨ ਤਿਣਣ੍ਡੁਪਕਂ ਵਾ ਪਲਾਲਣ੍ਡੁਪਕਂ ਵਾ ਠਪੇਤ੍ਵਾ ਕਤੋਪਿ ਪਚ੍ਛਾ ਹਰਿਤਂ ਓਤ੍ਥਰਤਿ, ਵਟ੍ਟਤਿਯੇਵ. ਖੇਲ਼ੇਨ ਚੇਤ੍ਥ ਸਿਙ੍ਘਾਣਿਕਾਪਿ ਸਙ੍ਗਹਿਤਾਤਿ ਮਹਾਪਚ੍ਚਰਿਯਂ ਵੁਤ੍ਤਂ.

੬੫੩. ਨ ਉਦਕੇਤਿ ਏਤਂ ਪਰਿਭੋਗਉਦਕਮੇਵ ਸਨ੍ਧਾਯ ਵੁਤ੍ਤਂ, ਵਚ੍ਚਕੁਟਿਸਮੁਦ੍ਦਾਦਿਉਦਕੇਸੁ ਪਨ ਅਪਰਿਭੋਗੇਸੁ ਅਨਾਪਤ੍ਤਿ. ਦੇਵੇ ਵਸ੍ਸਨ੍ਤੇ ਸਮਨ੍ਤਤੋ ਉਦਕੋਘੋ ਹੋਤਿ, ਅਨੁਦਕਟ੍ਠਾਨਂ ਓਲੋਕੇਨ੍ਤਸ੍ਸੇਵ ਨਿਕ੍ਖਮਤਿ, ਵਟ੍ਟਤਿ. ਮਹਾਪਚ੍ਚਰਿਯਂ ਵੁਤ੍ਤਂ – ‘‘ਏਤਾਦਿਸੇ ਕਾਲੇ ਅਨੁਦਕਟ੍ਠਾਨਂ ਅਲਭਨ੍ਤੇਨ ਕਾਤੁਂ ਵਟ੍ਟਤੀ’’ਤਿ. ਸੇਸਂ ਸਬ੍ਬਸਿਕ੍ਖਾਪਦੇਸੁ ਉਤ੍ਤਾਨਤ੍ਥਮੇਵ.

ਸਤ੍ਤਮੋ ਵਗ੍ਗੋ.

ਸਮੁਟ੍ਠਾਨਾਦਿਦੀਪਨਤ੍ਥਾਯ ਪਨੇਤ੍ਥ ਇਦਂ ਪਕਿਣ੍ਣਕਂ – ਉਜ੍ਜਗ੍ਘਿਕਉਚ੍ਚਾਸਦ੍ਦਪਟਿਸਂਯੁਤ੍ਤਾਨਿ ਚਤ੍ਤਾਰਿ, ਸਕਬਲ਼ੇਨ ਮੁਖੇਨ ਬ੍ਯਾਹਰਣਂ ਏਕਂ, ਛਮਾਨੀਚਾਸਨਠਾਨਪਚ੍ਛਤੋਗਮਨਉਪ੍ਪਥਗਮਨਪਟਿਸਂਯੁਤ੍ਤਾਨਿ ਪਞ੍ਚਾਤਿ ਇਮਾਨਿ ਦਸ ਸਿਕ੍ਖਾਪਦਾਨਿ ਸਮਨੁਭਾਸਨਸਮੁਟ੍ਠਾਨਾਨਿ ਕਾਯਵਾਚਾਚਿਤ੍ਤਤੋ ਸਮੁਟ੍ਠਹਨ੍ਤਿ, ਕਿਰਿਯਾਨਿ, ਸਞ੍ਞਾਵਿਮੋਕ੍ਖਾਨਿ, ਸਚਿਤ੍ਤਕਾਨਿ, ਲੋਕਵਜ੍ਜਾਨਿ, ਕਾਯਕਮ੍ਮਵਚੀਕਮ੍ਮਾਨਿ, ਅਕੁਸਲਚਿਤ੍ਤਾਨਿ, ਦੁਕ੍ਖਵੇਦਨਾਨੀਤਿ.

ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਂ ਥੇਯ੍ਯਸਤ੍ਥਸਮੁਟ੍ਠਾਨਂ ਕਾਯਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਛਤ੍ਤਪਾਣਿਦਣ੍ਡਪਾਣਿਸਤ੍ਥਪਾਣਿਆਵੁਧਪਾਣਿਪਾਦੁਕਉਪਾਹਨਯਾਨਸਯਨਪਲ੍ਲਤ੍ਥਿਕਵੇਠਿਤਓਗੁਣ੍ਠਿਤਨਾਮਕਾਨਿ ਏਕਾਦਸ ਸਿਕ੍ਖਾਪਦਾਨਿ ਧਮ੍ਮਦੇਸਨਸਮੁਟ੍ਠਾਨਾਨਿ ਵਾਚਾਚਿਤ੍ਤਤੋ ਸਮੁਟ੍ਠਹਨ੍ਤਿ, ਕਿਰਿਯਾਕਿਰਿਯਾਨਿ, ਸਞ੍ਞਾਵਿਮੋਕ੍ਖਾਨਿ, ਸਚਿਤ੍ਤਕਾਨਿ, ਲੋਕਵਜ੍ਜਾਨਿ, ਵਚੀਕਮ੍ਮਾਨਿ, ਅਕੁਸਲਚਿਤ੍ਤਾਨਿ, ਦੁਕ੍ਖਵੇਦਨਾਨੀਤਿ.

ਅਵਸੇਸਾਨਿ ਤੇਪਣ੍ਣਾਸ ਸਿਕ੍ਖਾਪਦਾਨਿ ਪਠਮਪਾਰਾਜਿਕਸਮੁਟ੍ਠਾਨਾਨੀਤਿ.

ਸਬ੍ਬਸੇਖਿਯੇਸੁ ਆਬਾਧਪਚ੍ਚਯਾ ਅਨਾਪਤ੍ਤਿ, ਥੂਪੀਕਤਪਿਣ੍ਡਪਾਤੇ ਸੂਪਬ੍ਯਞ੍ਜਨੇਨ ਪਟਿਚ੍ਛਾਦਨੇ ਉਜ੍ਝਾਨਸਞ੍ਞਿਮ੍ਹੀਤਿ ਤੀਸੁ ਸਿਕ੍ਖਾਪਦੇਸੁ ਗਿਲਾਨੋ ਨਤ੍ਥੀਤਿ.

ਸੇਖਿਯਵਣ੍ਣਨਾ ਨਿਟ੍ਠਿਤਾ.

ਸੇਖਿਯਕਣ੍ਡਂ ਨਿਟ੍ਠਿਤਂ.