੭. ਨਿਸੀਦਨਸਿਕ੍ਖਾਪਦਵਣ੍ਣਨਾ

੫੩੧-੪. ਸਤ੍ਤਮੇ – ਨਿਸੀਦਨਂ ਅਨੁਞ੍ਞਾਤਂ ਹੋਤੀਤਿ ਕਤ੍ਥ ਅਨੁਞ੍ਞਾਤਂ? ਚੀਵਰਕ੍ਖਨ੍ਧਕੇ ਪਣੀਤਭੋਜਨਵਤ੍ਥੁਸ੍ਮਿਂ. ਵੁਤ੍ਤਞ੍ਹਿ ਤਤ੍ਥ – ‘‘ਅਨੁਜਾਨਾਮਿ, ਭਿਕ੍ਖਵੇ, ਕਾਯਗੁਤ੍ਤਿਯਾ ਚੀਵਰਗੁਤ੍ਤਿਯਾ ਸੇਨਾਸਨਗੁਤ੍ਤਿਯਾ ਨਿਸੀਦਨ’’ਨ੍ਤਿ (ਮਹਾਵ. ੩੫੩). ਸੇਯ੍ਯਥਾਪਿ ਪੁਰਾਣਾਸਿਕੋਟ੍ਠੋਤਿ ਯਥਾ ਨਾਮ ਪੁਰਾਣਚਮ੍ਮਕਾਰੋਤਿ ਅਤ੍ਥੋ. ਯਥਾ ਹਿ ਚਮ੍ਮਕਾਰੋ ਚਮ੍ਮਂ ਵਿਤ੍ਥਤਂ ਕਰਿਸ੍ਸਾਮੀਤਿ ਇਤੋ ਚਿਤੋ ਚ ਸਮਞ੍ਛਤਿ, ਕਡ੍ਢਤਿ; ਏਵਂ ਸੋਪਿ ਤਂ ਨਿਸੀਦਨਂ. ਤੇਨ ਤਂ ਭਗਵਾ ਏਵਮਾਹ – ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’’ਤਿ ਸਨ੍ਥਤਸਦਿਸਂ ਸਨ੍ਥਰਿਤ੍ਵਾ ਏਕਸ੍ਮਿਂ ਅਨ੍ਤੇ ਸੁਗਤਵਿਦਤ੍ਥਿਯਾ ਵਿਦਤ੍ਥਿਮਤ੍ਤੇ ਪਦੇਸੇ ਦ੍ਵੀਸੁ ਠਾਨੇਸੁ ਫਾਲੇਤ੍ਵਾ ਤਿਸ੍ਸੋ ਦਸਾ ਕਰਿਯਨ੍ਤਿ, ਤਾਹਿ ਦਸਾਹਿ ਸਦਸਂ ਨਾਮ ਵੁਚ੍ਚਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ.

ਨਿਸੀਦਨਸਿਕ੍ਖਾਪਦਂ ਸਤ੍ਤਮਂ.