੯. ਰਤਨਵਗ੍ਗੋ

੧. ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ

੪੯੪. ਰਾਜਵਗ੍ਗਸ੍ਸ ਪਠਮਸਿਕ੍ਖਾਪਦੇ – ਓਰਕੋਤਿ ਪਰਿਤ੍ਤਕੋ. ਉਪਰਿਪਾਸਾਦਵਰਗਤੋਤਿ ਪਾਸਾਦਵਰਸ੍ਸ ਉਪਰਿਗਤੋ. ਅਯ੍ਯਾਨਂ ਵਾਹਸਾਤਿ ਅਯ੍ਯਾਨਂ ਕਾਰਣਾ; ਤੇਹਿ ਜਾਨਾਪਿਤਤ੍ਤਾ ਜਾਨਾਮੀਤਿ ਵੁਤ੍ਤਂ ਹੋਤਿ.

੪੯੭. ਪਿਤਰਂ ਪਤ੍ਥੇਤੀਤਿ ਅਨ੍ਤਰਂ ਪਸ੍ਸਿਤ੍ਵਾ ਘਾਤੇਤੁਂ ਇਚ੍ਛਤਿ. ਰਾਜਨ੍ਤੇਪੁਰਂ ਹਤ੍ਥਿਸਮ੍ਮਦ੍ਦਨ੍ਤਿਆਦੀਸੁ ਹਤ੍ਥੀਹਿ ਸਮ੍ਮਦ੍ਦੋ ਏਤ੍ਥਾਤਿ ਹਤ੍ਥਿਸਮ੍ਮਦ੍ਦਂ; ਹਤ੍ਥਿਸਮ੍ਬਾਧਨ੍ਤਿ ਅਤ੍ਥੋ. ਅਸ੍ਸਰਥਸਮ੍ਮਦ੍ਦਪਦੇਪਿ ਏਸੇਵ ਨਯੋ. ‘‘ਸਮ੍ਮਤ੍ਤ’’ਨ੍ਤਿ ਕੇਚਿ ਪਠਨ੍ਤਿ, ਤਂ ਨ ਗਹੇਤਬ੍ਬਂ. ‘‘ਰਞ੍ਞੋ ਅਨ੍ਤੇਪੁਰੇ ਹਤ੍ਥਿਸਮ੍ਮਦ੍ਦ’’ਨ੍ਤਿਪਿ ਪਾਠੋ, ਤਤ੍ਥ ਹਤ੍ਥੀਨਂ ਸਮ੍ਮਦ੍ਦਂ ਹਤ੍ਥਿਸਮ੍ਮਦ੍ਦਨ੍ਤਿ ਅਤ੍ਥੋ, ਰਞ੍ਞੋ ਅਨ੍ਤੇਪੁਰੇ ਹਤ੍ਥਿਸਮ੍ਮਦ੍ਦੋ ਅਤ੍ਥੀਤਿ ਵੁਤ੍ਤਂ ਹੋਤਿ. ਏਸ ਨਯੋ ਸੇਸਪਦੇਸੁਪਿ. ਰਜਨੀਯਾਨੀਤਿ ਤਸ੍ਮਿਂ ਅਨ੍ਤੇਪੁਰੇ ਏਦਿਸਾਨਿ ਰੂਪਾਦੀਨਿ.

੪੯੮. ਮੁਦ੍ਧਾਵਸਿਤ੍ਤਸ੍ਸਾਤਿ ਮੁਦ੍ਧਨਿ ਅਵਸਿਤ੍ਤਸ੍ਸ. ਅਨਿਕ੍ਖਨ੍ਤੋ ਰਾਜਾ ਇਤੋਤਿ ਅਨਿਕ੍ਖਨ੍ਤਰਾਜਕਂ, ਤਸ੍ਮਿਂ ਅਨਿਕ੍ਖਨ੍ਤਰਾਜਕੇ; ਸਯਨਿਘਰੇਤਿ ਅਤ੍ਥੋ. ਰਤਨਂ ਵੁਚ੍ਚਤਿ ਮਹੇਸੀ, ਨਿਗ੍ਗਤਨ੍ਤਿ ਨਿਕ੍ਖਨ੍ਤਂ, ਅਨਿਗ੍ਗਤਂ ਰਤਨਂ ਇਤੋਤਿ ਅਨਿਗ੍ਗਤਰਤਨਕਂ, ਤਸ੍ਮਿਂ ਅਨਿਗ੍ਗਤਰਤਨਕੇ; ਸਯਨਿਘਰੇਤਿ ਅਤ੍ਥੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਅਨ੍ਤੇਪੁਰਸਿਕ੍ਖਾਪਦਂ ਪਠਮਂ.

੨. ਰਤਨਸਿਕ੍ਖਾਪਦਵਣ੍ਣਨਾ

੫੦੨-੩. ਦੁਤਿਯੇ – ਵਿਸ੍ਸਰਿਤ੍ਵਾਤਿ ਪਮੁਸ੍ਸਿਤ੍ਵਾ. ਪੁਣ੍ਣਪਤ੍ਤਂ ਨਾਮ ਸਤਤੋ ਪਞ੍ਚ ਕਹਾਪਣਾ. ਕ੍ਯਾਹਂ ਕਰਿਸ੍ਸਾਮੀਤਿ ਕਿਂ ਅਹਂ ਕਰਿਸ੍ਸਾਮਿ. ਆਭਰਣਂ ਓਮੁਞ੍ਚਿਤ੍ਵਾਤਿ ਮਹਾਲਤਂ ਨਾਮ ਨਵਕੋਟਿਅਗ੍ਘਨਕਂ ਅਲਙ੍ਕਾਰਂ ਅਪਨੇਤ੍ਵਾ.

੫੦੪. ਅਨ੍ਤੇਵਾਸੀਤਿ ਪਰਿਚਾਰਕੋ.

੫੦੬. ਅਪਰਿਕ੍ਖਿਤ੍ਤਸ੍ਸ ਉਪਚਾਰੋਤਿ ਏਤ੍ਥ ਉਪਚਾਰੋ ਨਾਮ ਆਰਾਮਸ੍ਸ ਦ੍ਵੇ ਲੇਡ੍ਡੁਪਾਤਾ – ‘‘ਆਵਸਥਸ੍ਸ ਪਨ ਸੁਪ੍ਪਪਾਤੋ ਵਾ ਮੁਸਲਪਾਤੋ ਵਾ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਉਗ੍ਗਣ੍ਹਾਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਜਾਤਰੂਪਰਜਤਂ ਅਤ੍ਤਨੋ ਅਤ੍ਥਾਯ ਉਗ੍ਗਣ੍ਹਨ੍ਤਸ੍ਸ ਵਾ ਉਗ੍ਗਣ੍ਹਾਪੇਨ੍ਤਸ੍ਸ ਵਾ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਸਙ੍ਘਗਣਪੁਗ੍ਗਲਚੇਤਿਯਨਵਕਮ੍ਮਾਨਂ ਅਤ੍ਥਾਯ ਦੁਕ੍ਕਟਂ, ਅਵਸੇਸਂ ਮੁਤ੍ਤਾਦਿਰਤਨਂ ਅਤ੍ਤਨੋ ਵਾ ਸਙ੍ਘਾਦੀਨਂ ਵਾ ਅਤ੍ਥਾਯ ਉਗ੍ਗਣ੍ਹਨ੍ਤਸ੍ਸ ਵਾ ਉਗ੍ਗਣ੍ਹਾਪੇਨ੍ਤਸ੍ਸ ਵਾ ਦੁਕ੍ਕਟਂ. ਕਪ੍ਪਿਯਵਤ੍ਥੁ ਵਾ ਅਕਪ੍ਪਿਯਵਤ੍ਥੁ ਵਾ ਹੋਤੁ, ਅਨ੍ਤਮਸੋ ਮਾਤੁ ਕਣ੍ਣਪਿਲ਼ਨ੍ਧਨਤਾਲ਼ਪਣ੍ਣਮ੍ਪਿ ਗਿਹਿਸਨ੍ਤਕਂ ਭਣ੍ਡਾਗਾਰਿਕਸੀਸੇਨ ਪਟਿਸਾਮੇਨ੍ਤਸ੍ਸ ਪਾਚਿਤ੍ਤਿਯਮੇਵ.

ਸਚੇ ਪਨ ਮਾਤਾਪਿਤੂਨਂ ਸਨ੍ਤਕਂ ਅਵਸ੍ਸਂ ਪਟਿਸਾਮੇਤਬ੍ਬਂ ਕਪ੍ਪਿਯਭਣ੍ਡਂ ਹੋਤਿ, ਅਤ੍ਤਨੋ ਅਤ੍ਥਾਯ ਗਹੇਤ੍ਵਾ ਪਟਿਸਾਮੇਤਬ੍ਬਂ. ‘‘ਇਦਂ ਪਟਿਸਾਮੇਤ੍ਵਾ ਦੇਹੀ’’ਤਿ ਵੁਤ੍ਤੇ ਪਨ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਂ. ਸਚੇ ‘‘ਪਟਿਸਾਮੇਹੀ’’ਤਿ ਪਾਤੇਤ੍ਵਾ ਗਚ੍ਛਨ੍ਤਿ, ਪਲਿਬੋਧੋ ਨਾਮ ਹੋਤਿ, ਪਟਿਸਾਮੇਤੁਂ ਵਟ੍ਟਤਿ. ਵਿਹਾਰੇ ਕਮ੍ਮਂ ਕਰੋਨ੍ਤਾ ਵਡ੍ਢਕੀਆਦਯੋ ਵਾ ਰਾਜਵਲ੍ਲਭਾ ਵਾ ਅਤ੍ਤਨੋ ਉਪਕਰਣਭਣ੍ਡਂ ਵਾ ਸਯਨਭਣ੍ਡਂ ਵਾ ‘‘ਪਟਿਸਾਮੇਤ੍ਵਾ ਦੇਥਾ’’ਤਿ ਵਦਨ੍ਤਿ, ਛਨ੍ਦੇਨਪਿ ਭਯੇਨਪਿ ਨ ਕਾਤਬ੍ਬਮੇਵ, ਗੁਤ੍ਤਟ੍ਠਾਨਂ ਪਨ ਦਸ੍ਸੇਤੁਂ ਵਟ੍ਟਤਿ. ਬਲਕ੍ਕਾਰੇਨ ਪਾਤੇਤ੍ਵਾ ਗਤੇਸੁ ਚ ਪਟਿਸਾਮੇਤੁਂ ਵਟ੍ਟਤਿ.

ਅਜ੍ਝਾਰਾਮੇ ਵਾ ਅਜ੍ਝਾਵਸਥੇ ਵਾਤਿ ਏਤ੍ਥ ਸਚੇ ਮਹਾਵਿਹਾਰਸਦਿਸੋ ਮਹਾਰਾਮੋ ਹੋਤਿ, ਤਤ੍ਥ ਪਾਕਾਰਪਰਿਕ੍ਖਿਤ੍ਤੇ ਪਰਿਵੇਣੇ ਯਤ੍ਥ ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਗਹਿਤਂ ਭਵਿਸ੍ਸਤੀਤਿ ਸਙ੍ਕਾ ਉਪ੍ਪਜ੍ਜਤਿ, ਤਾਦਿਸੇ ਏਵ ਠਾਨੇ ਉਗ੍ਗਣ੍ਹਿਤ੍ਵਾ ਵਾ ਉਗ੍ਗਣ੍ਹਾਪੇਤ੍ਵਾ ਵਾ ਠਪੇਤਬ੍ਬਂ. ਮਹਾਬੋਧਿਦ੍ਵਾਰਕੋਟ੍ਠਕਅਮ੍ਬਙ੍ਗਣਸਦਿਸੇਸੁ ਪਨ ਮਹਾਜਨਸਞ੍ਚਰਣਟ੍ਠਾਨੇਸੁ ਨ ਗਹੇਤਬ੍ਬਂ, ਪਲਿਬੋਧੋ ਨ ਹੋਤਿ. ਕੁਰੁਨ੍ਦਿਯਂ ਪਨ ਵੁਤ੍ਤਂ ‘‘ਏਕੋ ਮਗ੍ਗਂ ਗਚ੍ਛਨ੍ਤੋ ਨਿਮਨੁਸ੍ਸਟ੍ਠਾਨੇ ਕਿਞ੍ਚਿ ਭਣ੍ਡਂ ਪਸ੍ਸਤਿ, ਆਕਿਣ੍ਣਮਨੁਸ੍ਸੇਪਿ ਜਾਤੇ ਮਨੁਸ੍ਸਾ ਤਮੇਵ ਭਿਕ੍ਖੁਂ ਆਸਙ੍ਕਨ੍ਤਿ, ਤਸ੍ਮਾ ਮਗ੍ਗਾ ਓਕ੍ਕਮ੍ਮ ਨਿਸੀਦਿਤਬ੍ਬਂ. ਸਾਮਿਕੇਸੁ ਆਗਤੇਸੁ ਤਂ ਆਚਿਕ੍ਖਿਤਬ੍ਬਂ. ਸਚੇ ਸਾਮਿਕੇ ਨ ਪਸ੍ਸਤਿ ਪਤਿਰੂਪਂ ਕਰਿਸ੍ਸਤੀ’’ਤਿ.

ਰੂਪੇਨ ਵਾ ਨਿਮਿਤ੍ਤੇਨ ਵਾ ਸਞ੍ਞਾਣਂ ਕਤ੍ਵਾਤਿ ਏਤ੍ਥ ਰੂਪਂ ਨਾਮ ਅਨ੍ਤੋਭਣ੍ਡਿਕਾਯ ਭਣ੍ਡਂ; ਤਸ੍ਮਾ ਭਣ੍ਡਿਕਂ ਮੁਞ੍ਚਿਤ੍ਵਾ ਗਣੇਤ੍ਵਾ ਏਤ੍ਤਕਾ ਕਹਾਪਣਾ ਵਾ ਜਾਤਰੂਪਰਜਤਂ ਵਾਤਿ ਸਲ੍ਲਕ੍ਖੇਤਬ੍ਬਂ. ਨਿਮਿਤ੍ਤਨ੍ਤਿ ਲਞ੍ਛਨਾਦਿ; ਤਸ੍ਮਾ ਲਞ੍ਛਿਤਾਯ ਭਣ੍ਡਿਕਾਯ ਮਤ੍ਤਿਕਾਲਞ੍ਛਨਨ੍ਤਿ ਵਾ ਲਾਖਾਲਞ੍ਛਨਨ੍ਤਿ ਵਾ ਨੀਲਪਿਲੋਤਿਕਾਯ ਭਣ੍ਡਿਕਾ ਕਤਾਤਿ ਵਾ ਸੇਤਪਿਲੋਤਿਕਾਯ ਕਤਾਤਿ ਵਾ ਏਵਮਾਦਿ ਸਬ੍ਬਂ ਸਲ੍ਲਕ੍ਖੇਤਬ੍ਬਂ.

ਭਿਕ੍ਖੂ ਪਤਿਰੂਪਾਤਿ ਲਜ੍ਜਿਨੋ ਕੁਕ੍ਕੁਚ੍ਚਕਾ. ਲੋਲਜਾਤਿਕਾਨਞ੍ਹਿ ਹਤ੍ਥੇ ਠਪੇਤੁਂ ਨ ਲਭਤਿ. ਯੋ ਪਨ ਨੇਵ ਤਮ੍ਹਾ ਆਵਾਸਾ ਪਕ੍ਕਮਤਿ, ਨ ਸਾਮਿਕੇ ਪਸ੍ਸਤਿ, ਤੇਨਾਪਿ ਅਤ੍ਤਨੋ ਚੀਵਰਾਦਿਮੂਲਂ ਨ ਕਾਤਬ੍ਬਂ; ਥਾਵਰਂ ਪਨ ਸੇਨਾਸਨਂ ਵਾ ਚੇਤਿਯਂ ਵਾ ਪੋਕ੍ਖਰਣੀ ਵਾ ਕਾਰੇਤਬ੍ਬਾ. ਸਚੇ ਦੀਘਸ੍ਸ ਅਦ੍ਧੁਨੋ ਅਚ੍ਚਯੇਨ ਸਾਮਿਕੋ ਆਗਚ੍ਛਤਿ, ‘‘ਉਪਾਸਕ ਤਵ ਸਨ੍ਤਕੇਨ ਇਦਂ ਨਾਮ ਕਤਂ, ਅਨੁਮੋਦਾਹੀ’’ਤਿ ਵਤ੍ਤਬ੍ਬੋ. ਸਚੇ ਅਨੁਮੋਦਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਅਨੁਮੋਦਤਿ, ‘‘ਮਮ ਧਨਂ ਦੇਥਾ’’ਤਿ ਚੋਦੇਤਿਯੇਵ, ਅਞ੍ਞਂ ਸਮਾਦਪੇਤ੍ਵਾ ਦਾਤਬ੍ਬਂ.

੫੦੭. ਰਤਨਸਮ੍ਮਤਂ ਵਿਸ੍ਸਾਸਂ ਗਣ੍ਹਾਤੀਤਿਆਦੀਸੁ ਆਮਾਸਮੇਵ ਸਨ੍ਧਾਯ ਵੁਤ੍ਤਂ. ਅਨਾਮਾਸਂ ਨ ਵਟ੍ਟਤਿਯੇਵ. ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਰਤਨਸਿਕ੍ਖਾਪਦਂ ਦੁਤਿਯਂ.

੩. ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਵਣ੍ਣਨਾ

੫੦੮. ਤਤਿਯੇ – ਤਿਰਚ੍ਛਾਨਕਥਨ੍ਤਿ ਅਰਿਯਮਗ੍ਗਸ੍ਸ ਤਿਰਚ੍ਛਾਨਭੂਤਂ ਕਥਂ. ਰਾਜਕਥਨ੍ਤਿ ਰਾਜਪਟਿਸਂਯੁਤ੍ਤ ਕਥਂ. ਚੋਰਕਥਾਦੀਸੁਪਿ ਏਸੇਵ ਨਯੋ.

੫੧੨. ਸਨ੍ਤਂ ਭਿਕ੍ਖੁਨ੍ਤਿ ਏਤ੍ਥ ਯਂ ਵਤ੍ਤਬ੍ਬਂ, ਤਂ ਚਾਰਿਤ੍ਤਸਿਕ੍ਖਾਪਦੇ ਵੁਤ੍ਤਮੇਵ. ਸਚੇ ਸਮ੍ਬਹੁਲਾ ਕੇਨਚਿ ਕਮ੍ਮੇਨ ਗਾਮਂ ਪਵਿਸਨ੍ਤਿ, ‘‘ਵਿਕਾਲੇ ਗਾਮਪ੍ਪਵੇਸਨਂ ਆਪੁਚ੍ਛਾਮੀ’’ਤਿ ਸਬ੍ਬੇਹਿ ਅਞ੍ਞਮਞ੍ਞਂ ਆਪੁਚ੍ਛਿਤਬ੍ਬਂ. ਤਸ੍ਮਿਂ ਗਾਮੇ ਤਂ ਕਮ੍ਮਂ ਨ ਸਮ੍ਪਜ੍ਜਤੀਤਿ ਅਞ੍ਞਂ ਗਾਮਂ ਗਚ੍ਛਨ੍ਤਿ, ਗਾਮਸਤਮ੍ਪਿ ਹੋਤੁ, ਪੁਨ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਸਚੇ ਪਨ ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਵਿਹਾਰਂ ਗਚ੍ਛਨ੍ਤਾ ਅਨ੍ਤਰਾ ਅਞ੍ਞਂ ਗਾਮਂ ਪਵਿਸਿਤੁਕਾਮਾ ਹੋਨ੍ਤਿ, ਪੁਨ ਆਪੁਚ੍ਛਿਤਬ੍ਬਮੇਵ.

ਕੁਲਘਰੇ ਵਾ ਆਸਨਸਾਲਾਯ ਵਾ ਭਤ੍ਤਕਿਚ੍ਚਂ ਕਤ੍ਵਾ ਤੇਲਭਿਕ੍ਖਾਯ ਵਾ ਸਪ੍ਪਿਭਿਕ੍ਖਾਯ ਵਾ ਚਰਿਤੁਕਾਮੋ ਹੋਤਿ, ਸਚੇ ਪਸ੍ਸੇ ਭਿਕ੍ਖੁ ਅਤ੍ਥਿ, ਆਪੁਚ੍ਛਿਤ੍ਵਾ ਗਨ੍ਤਬ੍ਬਂ. ਅਸਨ੍ਤੇ ਨਤ੍ਥੀਤਿ ਗਨ੍ਤਬ੍ਬਂ. ਵੀਥਿਂ ਓਤਰਿਤ੍ਵਾ ਭਿਕ੍ਖੁਂ ਪਸ੍ਸਤਿ, ਆਪੁਚ੍ਛਨਕਿਚ੍ਚਂ ਨਤ੍ਥਿ, ਅਨਾਪੁਚ੍ਛਿਤ੍ਵਾਪਿ ਚਰਿਤਬ੍ਬਮੇਵ. ਗਾਮਮਜ੍ਝੇਨ ਮਗ੍ਗੋ ਹੋਤਿ, ਤੇਨ ਗਚ੍ਛਨ੍ਤਸ੍ਸ ਤੇਲਾਦਿਭਿਕ੍ਖਾਯ ਚਰਿਸ੍ਸਾਮੀਤਿ ਚਿਤ੍ਤੇ ਉਪ੍ਪਨ੍ਨੇ ਸਚੇ ਪਸ੍ਸੇ ਭਿਕ੍ਖੁ ਅਤ੍ਥਿ, ਆਪੁਚ੍ਛਿਤ੍ਵਾ ਚਰਿਤਬ੍ਬਂ. ਮਗ੍ਗਾ ਅਨੋਕ੍ਕਮ੍ਮ ਭਿਕ੍ਖਾਯ ਚਰਨ੍ਤਸ੍ਸ ਪਨ ਆਪੁਚ੍ਛਨਕਿਚ੍ਚਂ ਨਤ੍ਥਿ, ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰੋ ਅਦਿਨ੍ਨਾਦਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੫੧੫. ਅਨ੍ਤਰਾਰਾਮਨ੍ਤਿਆਦੀਸੁ ਨ ਕੇਵਲਂ ਅਨਾਪੁਚ੍ਛਾ ਕਾਯਬਨ੍ਧਨਂ ਅਬਨ੍ਧਿਤ੍ਵਾ ਸਙ੍ਘਾਟਿਂ ਅਪਾਰੁਪਿਤ੍ਵਾ ਗਚ੍ਛਨ੍ਤਸ੍ਸਪਿ ਅਨਾਪਤ੍ਤਿ. ਆਪਦਾਸੂਤਿ ਸੀਹੋ ਵਾ ਬ੍ਯਗ੍ਘੋ ਵਾ ਆਗਚ੍ਛਤਿ, ਮੇਘੋ ਵਾ ਉਟ੍ਠੇਤਿ, ਅਞ੍ਞੋ ਵਾ ਕੋਚਿ ਉਪਦ੍ਦਵੋ ਉਪ੍ਪਜ੍ਜਤਿ, ਅਨਾਪਤ੍ਤਿ. ਏਵਰੂਪਾਸੁ ਆਪਦਾਸੁ ਬਹਿਗਾਮਤੋ ਅਨ੍ਤੋਗਾਮਂ ਪਵਿਸਿਤੁਂ ਵਟ੍ਟਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਂ ਤਤਿਯਂ.

੪. ਸੂਚਿਘਰਸਿਕ੍ਖਾਪਦਵਣ੍ਣਨਾ

੫੧੭-੨੦. ਚਤੁਤ੍ਥੇ – ਭੇਦਨਮੇਵ ਭੇਦਨਕਂ; ਤਂ ਅਸ੍ਸ ਅਤ੍ਥੀਤਿ ਭੇਦਨਕਮੇਵ. ਅਰਣਿਕੇਤਿ ਅਰਣਿਧਨੁਕੇ. ਵਿਧੇਤਿ ਵੇਧਕੇ. ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਸੂਚਿਘਰਸਿਕ੍ਖਾਪਦਂ ਚਤੁਤ੍ਥਂ.

੫. ਮਞ੍ਚਸਿਕ੍ਖਾਪਦਵਣ੍ਣਨਾ

੫੨੨. ਪਞ੍ਚਮੇ – ਛੇਦਨਕਂ ਵੁਤ੍ਤਨਯਮੇਵ.

੫੨੫. ਛਿਨ੍ਦਿਤ੍ਵਾ ਪਰਿਭੁਞ੍ਜਤੀਤਿ ਏਤ੍ਥ ਸਚੇ ਨ ਛਿਨ੍ਦਿਤੁਕਾਮੋ ਹੋਤਿ, ਭੂਮਿਯਂ ਨਿਖਣਿਤ੍ਵਾ ਪਮਾਣਂ ਉਪਰਿ ਦਸ੍ਸੇਤਿ, ਉਤ੍ਤਾਨਂ ਵਾ ਕਤ੍ਵਾ ਪਰਿਭੁਞ੍ਜਤਿ, ਉਕ੍ਖਿਪਿਤ੍ਵਾ ਵਾ ਤੁਲਾਸਙ੍ਘਾਟੇ ਠਪੇਤ੍ਵਾ ਅਟ੍ਟਂ ਕਤ੍ਵਾ ਪਰਿਭੁਞ੍ਜਤਿ, ਸਬ੍ਬਂ ਵਟ੍ਟਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ.

ਮਞ੍ਚਸਿਕ੍ਖਾਪਦਂ ਪਞ੍ਚਮਂ.

੬. ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ

੫੨੬. ਛਟ੍ਠੇ – ਤੂਲਂ ਓਨਦ੍ਧਮੇਤ੍ਥਾਤਿ ਤੂਲੋਨਦ੍ਧਂ; ਤੂਲਂ ਪਕ੍ਖਿਪਿਤ੍ਵਾ ਉਪਰਿ ਚਿਮਿਲਿਕਾਯ ਓਨਦ੍ਧਨ੍ਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ.

ਤੂਲੋਨਦ੍ਧਸਿਕ੍ਖਾਪਦਂ ਛਟ੍ਠਂ.

੭. ਨਿਸੀਦਨਸਿਕ੍ਖਾਪਦਵਣ੍ਣਨਾ

੫੩੧-੪. ਸਤ੍ਤਮੇ – ਨਿਸੀਦਨਂ ਅਨੁਞ੍ਞਾਤਂ ਹੋਤੀਤਿ ਕਤ੍ਥ ਅਨੁਞ੍ਞਾਤਂ? ਚੀਵਰਕ੍ਖਨ੍ਧਕੇ ਪਣੀਤਭੋਜਨਵਤ੍ਥੁਸ੍ਮਿਂ. ਵੁਤ੍ਤਞ੍ਹਿ ਤਤ੍ਥ – ‘‘ਅਨੁਜਾਨਾਮਿ, ਭਿਕ੍ਖਵੇ, ਕਾਯਗੁਤ੍ਤਿਯਾ ਚੀਵਰਗੁਤ੍ਤਿਯਾ ਸੇਨਾਸਨਗੁਤ੍ਤਿਯਾ ਨਿਸੀਦਨ’’ਨ੍ਤਿ (ਮਹਾਵ. ੩੫੩). ਸੇਯ੍ਯਥਾਪਿ ਪੁਰਾਣਾਸਿਕੋਟ੍ਠੋਤਿ ਯਥਾ ਨਾਮ ਪੁਰਾਣਚਮ੍ਮਕਾਰੋਤਿ ਅਤ੍ਥੋ. ਯਥਾ ਹਿ ਚਮ੍ਮਕਾਰੋ ਚਮ੍ਮਂ ਵਿਤ੍ਥਤਂ ਕਰਿਸ੍ਸਾਮੀਤਿ ਇਤੋ ਚਿਤੋ ਚ ਸਮਞ੍ਛਤਿ, ਕਡ੍ਢਤਿ; ਏਵਂ ਸੋਪਿ ਤਂ ਨਿਸੀਦਨਂ. ਤੇਨ ਤਂ ਭਗਵਾ ਏਵਮਾਹ – ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’’ਤਿ ਸਨ੍ਥਤਸਦਿਸਂ ਸਨ੍ਥਰਿਤ੍ਵਾ ਏਕਸ੍ਮਿਂ ਅਨ੍ਤੇ ਸੁਗਤਵਿਦਤ੍ਥਿਯਾ ਵਿਦਤ੍ਥਿਮਤ੍ਤੇ ਪਦੇਸੇ ਦ੍ਵੀਸੁ ਠਾਨੇਸੁ ਫਾਲੇਤ੍ਵਾ ਤਿਸ੍ਸੋ ਦਸਾ ਕਰਿਯਨ੍ਤਿ, ਤਾਹਿ ਦਸਾਹਿ ਸਦਸਂ ਨਾਮ ਵੁਚ੍ਚਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ.

ਨਿਸੀਦਨਸਿਕ੍ਖਾਪਦਂ ਸਤ੍ਤਮਂ.

੮. ਕਣ੍ਡੁਪਟਿਚ੍ਛਾਦਿਸਿਕ੍ਖਾਪਦਵਣ੍ਣਨਾ

੫੩੭. ਅਟ੍ਠਮੇ – ਕਣ੍ਡੁਪਟਿਚ੍ਛਾਦਿ ਅਨੁਞ੍ਞਾਤਾ ਹੋਤੀਤਿ ਕਤ੍ਥ ਅਨੁਞ੍ਞਾਤਾ? ਚੀਵਰਕ੍ਖਨ੍ਧਕੇ ਬੇਲਟ੍ਠਸੀਸਵਤ੍ਥੁਸ੍ਮਿਂ. ਵੁਤ੍ਤਞ੍ਹਿ ਤਤ੍ਥ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯਸ੍ਸ ਕਣ੍ਡੁ ਵਾ ਪਿਲ਼ਕਾ ਵਾ ਅਸ੍ਸਾਵੋ ਵਾ ਥੁਲ੍ਲਕਚ੍ਛੁ ਵਾ ਆਬਾਧੋ ਤਸ੍ਸ ਕਣ੍ਡੁਪਟਿਚ੍ਛਾਦਿ’’ਨ੍ਤਿ (ਮਹਾਵ. ੩੫੪).

੫੩੯. ਯਸ੍ਸ ਅਧੋਨਾਭਿ ਉਬ੍ਭਜਾਣੁਮਣ੍ਡਲਨ੍ਤਿ ਯਸ੍ਸ ਭਿਕ੍ਖੁਨੋ ਨਾਭਿਯਾ ਹੇਟ੍ਠਾ ਜਾਣੁਮਣ੍ਡਲਾਨਂ ਉਪਰਿ. ਕਣ੍ਡੂਤਿ ਕਚ੍ਛੁ. ਪਿਲ਼ਕਾਤਿ ਲੋਹਿਤਤੁਣ੍ਡਿਕਾ ਸੁਖੁਮਪਿਲ਼ਕਾ. ਅਸ੍ਸਾਵੋਤਿ ਅਰਿਸਭਗਨ੍ਦਰਮਧੁਮੇਹਾਦੀਨਂ ਵਸੇਨ ਅਸੁਚਿਪਗ੍ਘਰਣਕਂ. ਥੁਲ੍ਲਕਚ੍ਛੁ ਵਾ ਆਬਾਧੋਤਿ ਮਹਾਪਿਲ਼ਕਾਬਾਧੋ ਵੁਚ੍ਚਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ.

ਕਣ੍ਡੁਪਟਿਚ੍ਛਾਦਿਸਿਕ੍ਖਾਪਦਂ ਅਟ੍ਠਮਂ.

੯. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ

੫੪੨. ਨਵਮੇ – ਵਸ੍ਸਿਕਸਾਟਿਕਾ ਅਨੁਞ੍ਞਾਤਾ ਹੋਤੀਤਿ ਕਤ੍ਥ ਅਨੁਞ੍ਞਾਤਾ? ਚੀਵਰਕ੍ਖਨ੍ਧਕੇ ਵਿਸਾਖਾਵਤ੍ਥੁਸ੍ਮਿਂ. ਵੁਤ੍ਤਞ੍ਹਿ ਤਤ੍ਥ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਿਕਸਾਟਿਕ’’ਨ੍ਤਿ (ਮਹਾਵ. ੩੫੨). ਸੇਸਮੇਤ੍ਥ ਉਤ੍ਤਾਨਮੇਵ. ਛਸਮੁਟ੍ਠਾਨਂ.

ਵਸ੍ਸਿਕਸਾਟਿਕਸਿਕ੍ਖਾਪਦਂ ਨਵਮਂ.

੧੦. ਨਨ੍ਦਤ੍ਥੇਰਸਿਕ੍ਖਾਪਦਵਣ੍ਣਨਾ

੫੪੭. ਦਸਮੇ – ਚਤੁਰਙ੍ਗੁਲੋਮਕੋਤਿ ਚਤੂਹਿ ਅਙ੍ਗੁਲੇਹਿ ਊਨਕਪ੍ਪਮਾਣੋ. ਸੇਸਂ ਉਤ੍ਤਾਨਮੇਵ. ਛਸਮੁਟ੍ਠਾਨਂ.

ਨਨ੍ਦਤ੍ਥੇਰਸਿਕ੍ਖਾਪਦਂ ਦਸਮਂ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਰਤਨਵਗ੍ਗੋ ਨਵਮੋ.

ਉਦ੍ਦਿਟ੍ਠਾ ਖੋਤਿਆਦਿ ਵੁਤ੍ਤਨਯਮੇਵਾਤਿ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਖੁਦ੍ਦਕਵਣ੍ਣਨਾ ਸਮਤ੍ਤਾ.

ਪਾਚਿਤ੍ਤਿਯਕਣ੍ਡਂ ਨਿਟ੍ਠਿਤਂ.