੬. ਪਾਟਿਦੇਸਨੀਯਕਣ੍ਡਂ
੧. ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
ਪਾਟਿਦੇਸਨੀਯਾ ਧਮ੍ਮਾ, ਖੁਦ੍ਦਕਾਨਂ ਅਨਨ੍ਤਰਾ;
ਠਪਿਤਾ ਯੇ ਅਯਂ ਦਾਨਿ, ਤੇਸਂ ਭਵਤਿ ਵਣ੍ਣਨਾ.
੫੫੨. ਪਠਮਪਾਟਿਦੇਸਨੀਯੇ ਤਾਵ ਪਟਿਕ੍ਕਮਨਕਾਲੇਤਿ ਪਿਣ੍ਡਾਯ ਚਰਿਤ੍ਵਾ ਪਟਿਆਗਮਨਕਾਲੇ. ਸਬ੍ਬੇਵ ਅਗ੍ਗਹੇਸੀਤਿ ਸਬ੍ਬਮੇਵ ਅਗ੍ਗਹੇਸਿ. ਪਵੇਧੇਨ੍ਤੀਤਿ ਕਮ੍ਪਮਾਨਾ. ਅਪੇਹੀਤਿ ਅਪਗਚ੍ਛ.
੫੫੩-੫. ਗਾਰਯ੍ਹਂ ਆਵੁਸੋਤਿਆਦਿ ਪਟਿਦੇਸੇਤਬ੍ਬਾਕਾਰਦਸ੍ਸਨਂ. ਰਥਿਕਾਤਿ ਰਚ੍ਛਾ. ਬ੍ਯੂਹਨ੍ਤਿ ਅਨਿਬ੍ਬਿਜ੍ਝਿਤ੍ਵਾ ਠਿਤਾ ਗਤਪਚ੍ਚਾਗਤਰਚ੍ਛਾ. ਸਿਙ੍ਘਾਟਕਨ੍ਤਿ ਚਤੁਕ੍ਕੋਣਂ ਵਾ ਤਿਕੋਣਂ ਵਾ ਮਗ੍ਗਸਮੋਧਾਨਟ੍ਠਾਨਂ. ਘਰਨ੍ਤਿ ਕੁਲਘਰਂ. ਏਤੇਸੁ ਯਤ੍ਥ ਕਤ੍ਥਚਿ ਠਤ੍ਵਾ ਗਣ੍ਹਨ੍ਤਸ੍ਸ ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰਗਣਨਾਯ ਪਾਟਿਦੇਸਨੀਯਂ. ਹਤ੍ਥਿਸਾਲਾਦੀਸੁ ਗਣ੍ਹਨ੍ਤਸ੍ਸਾਪਿ ਏਸੇਵ ਨਯੋ. ਭਿਕ੍ਖੁਨੀ ਰਥਿਕਾਯ ਠਤ੍ਵਾ ਦੇਤਿ, ਭਿਕ੍ਖੁ ਸਚੇਪਿ ਅਨ੍ਤਰਾਰਾਮਾਦੀਸੁ ਠਤ੍ਵਾ ਗਣ੍ਹਾਤਿ, ਆਪਤ੍ਤਿਯੇਵ. ‘‘ਅਨ੍ਤਰਘਰਂ ਪਵਿਟ੍ਠਾਯਾ’’ਤਿ ਹਿ ਵਚਨਤੋ ਭਿਕ੍ਖੁਨਿਯਾ ਅਨ੍ਤਰਘਰੇ ਠਤ੍ਵਾ ਦਦਮਾਨਾਯ ਵਸੇਨੇਤ੍ਥ ਆਪਤ੍ਤਿ ਵੇਦਿਤਬ੍ਬਾ, ਭਿਕ੍ਖੁਸ੍ਸ ਠਿਤਟ੍ਠਾਨਂ ਪਨ ਅਪ੍ਪਮਾਣਂ. ਤਸ੍ਮਾ ਸਚੇਪਿ ਵੀਥਿਆਦੀਸੁ ਠਿਤੋ ਭਿਕ੍ਖੁ ਅਨ੍ਤਰਾਰਾਮਾਦੀਸੁ ਠਤ੍ਵਾ ਦਦਮਾਨਾਯ ਭਿਕ੍ਖੁਨਿਯਾ ਗਣ੍ਹਾਤਿ, ਅਨਾਪਤ੍ਤਿਯੇਵ.
ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਆਹਾਰਤ੍ਥਾਯ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਜ੍ਝੋਹਾਰੇ ਅਜ੍ਝੋਹਾਰੇ ਆਪਤ੍ਤਿ ਦੁਕ੍ਕਟਸ੍ਸਾਤਿ ਇਦਂ ਆਮਿਸੇਨ ਅਸਮ੍ਭਿਨ੍ਨਂ ਸਨ੍ਧਾਯ ਵੁਤ੍ਤਂ, ਸਮ੍ਭਿਨ੍ਨੇ ਪਨ ਏਕਰਸੇ ਪਾਟਿਦੇਸਨੀਯਮੇਵ. ਏਕਤੋ ਉਪਸਮ੍ਪਨ੍ਨਾਯਾਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ. ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਯਥਾਵਤ੍ਥੁਕਮੇਵ.
੫੫੬. ਦਾਪੇਤਿ ਨ ਦੇਤੀਤਿ ਅਞ੍ਞਾਤਿਕਾ ਅਞ੍ਞੇਨ ਕੇਨਚਿ ਦਾਪੇਤਿ ਤਂ ਗਣ੍ਹਨ੍ਤਸ੍ਸ ਅਨਾਪਤ੍ਤਿ. ਉਪਨਿਕ੍ਖਿਪਿਤ੍ਵਾ ਦੇਤੀਤਿ ਭੂਮਿਯਂ ਠਪੇਤ੍ਵਾ ‘‘ਇਦਂ ਅਯ੍ਯ ਤੁਮ੍ਹਾਕਂ ਦਮ੍ਮੀ’’ਤਿ ਦੇਤਿ, ਏਵਂ ਦਿਨ੍ਨਂ ‘‘ਸਾਧੁ ਭਗਿਨੀ’’ਤਿ ਸਮ੍ਪਟਿਚ੍ਛਿਤ੍ਵਾ ਤਾਯ ਏਵ ਵਾ ਭਿਕ੍ਖੁਨਿਯਾ ਅਞ੍ਞੇਨ ਵਾ ਕੇਨਚਿ ਪਟਿਗ੍ਗਹਾਪੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਸਿਕ੍ਖਮਾਨਾਯ ਸਾਮਣੇਰਿਯਾਤਿ ਏਤਾਸਂ ਦਦਮਾਨਾਨਂ ਗਣ੍ਹਨ੍ਤਸ੍ਸ ਅਨਾਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ.
ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਪਠਮਪਾਟਿਦੇਸਨੀਯਂ.
੨. ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
੫੫੮. ਦੁਤਿਯੇ – ਅਪਸਕ੍ਕ ਤਾਵ ਭਗਿਨੀਤਿਆਦਿ ਅਪਸਾਦੇਤਬ੍ਬਾਕਾਰਦਸ੍ਸਨਂ.
੫੬੧. ਅਤ੍ਤਨੋ ਭਤ੍ਤਂ ਦਾਪੇਤਿ ਨ ਦੇਤੀਤਿ ਏਤ੍ਥ ਸਚੇਪਿ ਅਤ੍ਤਨੋ ਭਤ੍ਤਂ ਦੇਤਿ, ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿਯੇਵ, ਪੁਰਿਮਸਿਕ੍ਖਾਪਦੇਨ ਆਪਤ੍ਤਿ. ਅਞ੍ਞੇਸਂ ਭਤ੍ਤਂ ਦੇਤਿ ਨ ਦਾਪੇਤੀਤਿ ਏਤ੍ਥ ਸਚੇਪਿ ਦਾਪੇਯ੍ਯ, ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ ਭਵੇਯ੍ਯ. ਦੇਨ੍ਤਿਯਾ ਪਨ ਨੇਵ ਇਮਿਨਾ ਨ ਪੁਰਿਮੇਨ ਆਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਕਥਿਨਸਮੁਟ੍ਠਾਨਂ – ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਦੁਤਿਯਪਾਟਿਦੇਸਨੀਯਂ.
੩. ਤਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
੫੬੨. ਤਤਿਯੇ – ਉਭਤੋਪਸਨ੍ਨਨ੍ਤਿ ਦ੍ਵੀਹਿ ਪਸਨ੍ਨਂ ਉਪਾਸਕੇਨਪਿ ਉਪਾਸਿਕਾਯਪਿ. ਤਸ੍ਮਿਂ ਕਿਰ ਕੁਲੇ ਉਭੋਪਿ ਤੇ ਸੋਤਾਪਨ੍ਨਾਯੇਵ. ਭੋਗੇਨ ਹਾਯਤੀਤਿ ਏਦਿਸਞ੍ਹਿ ਕੁਲਂ ਸਚੇਪਿ ਅਸੀਤਿਕੋਟਿਧਨਂ ਹੋਤਿ, ਭੋਗੇਹਿ ਹਾਯਤਿਯੇਵ. ਕਸ੍ਮਾ? ਯਸ੍ਮਾ ਤਤ੍ਥ ਨੇਵ ਉਪਾਸਿਕਾ ਨ ਉਪਾਸਕੋ ਭੋਗੇ ਰਕ੍ਖਤਿ.
੫੬੯. ਘਰਤੋ ਨੀਹਰਿਤ੍ਵਾ ਦੇਨ੍ਤੀਤਿ ਆਸਨਸਾਲਂ ਵਾ ਵਿਹਾਰਂ ਵਾ ਆਨੇਤ੍ਵਾ ਦੇਨ੍ਤਿ. ਸਚੇਪਿ ਅਨਾਗਤੇ ਭਿਕ੍ਖੁਮ੍ਹਿ ਪਠਮਂਯੇਵ ਨੀਹਰਿਤ੍ਵਾ ਦ੍ਵਾਰੇ ਠਪੇਤ੍ਵਾ ਪਚ੍ਛਾ ਸਮ੍ਪਤ੍ਤਸ੍ਸ ਦੇਨ੍ਤਿ, ਵਟ੍ਟਤਿ. ਭਿਕ੍ਖੁਂ ਪਨ ਦਿਸ੍ਵਾ ਅਨ੍ਤੋਗੇਹਤੋ ਨੀਹਰਿਤ੍ਵਾ ਦਿਯ੍ਯਮਾਨਂ ਨ ਵਟ੍ਟਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ ਤਿਚਿਤ੍ਤਂ, ਤਿਵੇਦਨਨ੍ਤਿ.
ਤਤਿਯਪਾਟਿਦੇਸਨੀਯਂ.
੪. ਚਤੁਤ੍ਥਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
੫੭੦. ਚਤੁਤ੍ਥੇ – ਅਵਰੁਦ੍ਧਾ ਹੋਨ੍ਤੀਤਿ ਪਟਿਵਿਰੁਦ੍ਧਾ ਹੋਨ੍ਤਿ.
੫੭੩. ਪਞ੍ਚਨ੍ਨਂ ਪਟਿਸਂਵਿਦਿਤਨ੍ਤਿ ਪਞ੍ਚਸੁ ਸਹਧਮ੍ਮਿਕੇਸੁ ਯਂਕਿਞ੍ਚਿ ਪੇਸੇਤ੍ਵਾ ਖਾਦਨੀਯਂ ਭੋਜਨੀਯਂ ਆਹਰਿਸ੍ਸਾਮਾਤਿ ਪਟਿਸਂਵਿਦਿਤਂ ਕਤਮ੍ਪਿ ਅਪ੍ਪਟਿਸਂਵਿਦਿਤਮੇਵਾਤਿ ਅਤ੍ਥੋ. ਆਰਾਮਂ ਆਰਾਮੂਪਚਾਰਂ ਠਪੇਤ੍ਵਾਤਿ ਆਰਞ੍ਞਕਸੇਨਾਸਨਾਰਾਮਞ੍ਚ ਤਸ੍ਸ ਉਪਚਾਰਞ੍ਚ ਠਪੇਤ੍ਵਾ; ਉਪਚਾਰਤੋ ਨਿਕ੍ਖਨ੍ਤਂ ਅਨ੍ਤਰਾਮਗ੍ਗੇ ਭਿਕ੍ਖੁਂ ਦਿਸ੍ਵਾ ਵਾ ਗਾਮਂ ਆਗਤਸ੍ਸ ਵਾ ਪਟਿਸਂਵਿਦਿਤਂ ਕਤਮ੍ਪਿ ਅਪ੍ਪਟਿਸਂਵਿਦਿਤਮੇਵ ਹੋਤੀਤਿ ਵੇਦਿਤਬ੍ਬਂ. ਸਚੇ ਸਾਸਙ੍ਕਂ ਹੋਤਿ ਸਾਸਙ੍ਕਨ੍ਤਿ ਆਚਿਕ੍ਖਿਤਬ੍ਬਨ੍ਤਿ ਕਸ੍ਮਾ ਆਚਿਕ੍ਖਿਤਬ੍ਬਂ? ਆਰਾਮੇ ਚੋਰੇ ਵਸਨ੍ਤੇ ਅਮ੍ਹਾਕਂ ਨਾਰੋਚੇਨ੍ਤੀਤਿ ਵਚਨਪਟਿਮੋਚਨਤ੍ਥਂ. ਚੋਰਾ ਵਤ੍ਤਬ੍ਬਾ ਮਨੁਸ੍ਸਾ ਇਧੂਪਚਰਨ੍ਤੀਤਿ ਕਸ੍ਮਾ ਵਤ੍ਤਬ੍ਬਂ? ਅਤ੍ਤਨੋ ਉਪਟ੍ਠਾਕੇਹਿ ਅਮ੍ਹੇ ਗਣ੍ਹਾਪੇਨ੍ਤੀਤਿ ਵਚਨਪਟਿਮੋਚਨਤ੍ਥਂ.
ਯਾਗੁਯਾ ਪਟਿਸਂਵਿਦਿਤੇ ਤਸ੍ਸਾ ਪਰਿਵਾਰੋ ਆਹਰਿਯ੍ਯਤੀਤਿ ਯਾਗੁਯਾ ਪਟਿਸਂਵਿਦਿਤਂ ਕਤ੍ਵਾ ‘‘ਕਿਂ ਸੁਦ੍ਧਯਾਗੁਯਾ ਦਿਨ੍ਨਾਯ ਪੂਵਭਤ੍ਤਾਦੀਨਿਪਿ ਏਤਿਸ੍ਸਾ ਯਾਗੁਯਾ ਪਰਿਵਾਰਂ ਕਤ੍ਵਾ ਦਸ੍ਸਾਮਾ’’ਤਿ ਏਵਂ ਯਂ ਕਿਞ੍ਚਿ ਆਹਰਨ੍ਤਿ, ਸਬ੍ਬਂ ਪਟਿਸਂਵਿਦਿਤਮੇਵ ਹੋਤਿ. ਭਤ੍ਤੇਨ ਪਟਿਸਂਵਿਦਿਤੇਤਿਆਦੀਸੁਪਿ ਏਸੇਵ ਨਯੋ. ਅਸੁਕਂ ਨਾਮ ਕੁਲਂ ਪਟਿਸਂਵਿਦਿਤਂ ਕਤ੍ਵਾ ਖਾਦਨੀਯਾਦੀਨਿ ਗਹੇਤ੍ਵਾ ਗਚ੍ਛਤੀਤਿ ਸੁਤ੍ਵਾ ਅਞ੍ਞਾਨਿਪਿ ਤੇਨ ਸਦ੍ਧਿਂ ਅਤ੍ਤਨੋ ਦੇਯ੍ਯਧਮ੍ਮਂ ਆਹਰਨ੍ਤਿ, ਵਟ੍ਟਤਿ. ਯਾਗੁਯਾ ਪਟਿਸਂਵਿਦਿਤਂ ਕਤ੍ਵਾ ਪੂਵਂ ਵਾ ਭਤ੍ਤਂ ਵਾ ਆਹਰਨ੍ਤਿ, ਏਤਮ੍ਪਿ ਵਟ੍ਟਤੀਤਿ ਕੁਰੁਨ੍ਦਿਯਂ ਵੁਤ੍ਤਂ.
੫੭੫. ਗਿਲਾਨਸ੍ਸਾਤਿ ਅਪ੍ਪਟਿਸਂਵਿਦਿਤੇਪਿ ਗਿਲਾਨਸ੍ਸ ਅਨਾਪਤ੍ਤਿ. ਪਟਿਸਂਵਿਦਿਤੇ ਵਾ ਗਿਲਾਨਸ੍ਸ ਵਾ ਸੇਸਕਨ੍ਤਿ ਏਕਸ੍ਸਤ੍ਥਾਯ ਪਟਿਸਂਵਿਦਿਤਂ ਕਤ੍ਵਾ ਆਹਟਂ, ਤਸ੍ਸ ਸੇਸਕਂ ਅਞ੍ਞਸ੍ਸਾਪਿ ਭੁਞ੍ਜਿਤੁਂ ਵਟ੍ਟਤਿ. ਚਤੁਨ੍ਨਂ ਪਞ੍ਚਨ੍ਨਂ ਵਾ ਪਟਿਸਂਵਿਦਿਤਂ ਕਤ੍ਵਾ ਬਹੁਂ ਆਹਟਂ ਹੋਤਿ, ਅਞ੍ਞੇਸਮ੍ਪਿ ਦਾਤੁਂ ਇਚ੍ਛਨ੍ਤਿ, ਏਤਮ੍ਪਿ ਪਟਿਸਂਵਿਦਿਤਸੇਸਕਮੇਵ, ਸਬ੍ਬੇਸਮ੍ਪਿ ਵਟ੍ਟਤਿ. ਅਥ ਅਧਿਕਮੇਵ ਹੋਤਿ, ਸਨ੍ਨਿਧਿਂ ਮੋਚੇਤ੍ਵਾ ਠਪਿਤਂ ਦੁਤਿਯਦਿਵਸੇਪਿ ਵਟ੍ਟਤਿ. ਗਿਲਾਨਸ੍ਸ ਆਹਟਾਵਸੇਸੇਪਿ ਏਸੇਵ ਨਯੋ. ਯਂ ਪਨ ਅਪ੍ਪਟਿਸਂਵਿਦਿਤਮੇਵ ਕਤ੍ਵਾ ਆਭਤਂ, ਤਂ ਬਹਿਆਰਾਮਂ ਪੇਸੇਤ੍ਵਾ ਪਟਿਸਂਵਿਦਿਤਂ ਕਾਰੇਤ੍ਵਾ ਆਹਰਾਪੇਤਬ੍ਬਂ, ਭਿਕ੍ਖੂਹਿ ਵਾ ਗਨ੍ਤ੍ਵਾ ਅਨ੍ਤਰਾਮਗ੍ਗੇ ਗਹੇਤਬ੍ਬਂ. ਯਮ੍ਪਿ ਵਿਹਾਰਮਜ੍ਝੇਨ ਗਚ੍ਛਨ੍ਤਾ ਵਾ ਵਨਚਰਕਾਦਯੋ ਵਾ ਵਨਤੋ ਆਹਰਿਤ੍ਵਾ ਦੇਨ੍ਤਿ, ਪੁਰਿਮਨਯੇਨੇਵ ਪਟਿਸਂਵਿਦਿਤਂ ਕਾਰੇਤਬ੍ਬਂ. ਤਤ੍ਥਜਾਤਕਨ੍ਤਿ ਆਰਾਮੇ ਜਾਤਕਮੇਵ; ਮੂਲਖਾਦਨੀਯਾਦਿਂ ਅਞ੍ਞੇਨ ਕਪ੍ਪਿਯਂ ਕਤ੍ਵਾ ਦਿਨ੍ਨਂ ਪਰਿਭੁਞ੍ਜਤੋ ਅਨਾਪਤ੍ਤਿ. ਸਚੇ ਪਨ ਤਂ ਗਾਮਂ ਹਰਿਤ੍ਵਾ ਪਚਿਤ੍ਵਾ ਆਹਰਨ੍ਤਿ, ਨ ਵਟ੍ਟਤਿ. ਪਟਿਸਂਵਿਦਿਤਂ ਕਾਰੇਤਬ੍ਬਂ. ਸੇਸਮੇਤ੍ਥ ਉਤ੍ਤਾਨਮੇਵ.
ਕਥਿਨਸਮੁਟ੍ਠਾਨਂ – ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਚਤੁਤ੍ਥਪਾਟਿਦੇਸਨੀਯਂ.
ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ
ਪਾਟਿਦੇਸਨੀਯਵਣ੍ਣਨਾ ਨਿਟ੍ਠਿਤਾ.
ਪਾਟਿਦੇਸਨੀਯਕਣ੍ਡਂ ਨਿਟ੍ਠਿਤਂ.