੫. ਤਲਸਤ੍ਤਿਕਸਿਕ੍ਖਾਪਦਵਣ੍ਣਨਾ

੪੫੪. ਪਞ੍ਚਮੇ – ਤਲਸਤ੍ਤਿਕਂ ਉਗ੍ਗਿਰਨ੍ਤੀਤਿ ਪਹਾਰਦਾਨਾਕਾਰਂ ਦਸ੍ਸੇਤ੍ਵਾ ਕਾਯਮ੍ਪਿ ਕਾਯਪਟਿਬਦ੍ਧਮ੍ਪਿ ਉਚ੍ਚਾਰੇਨ੍ਤਿ. ਤੇ ਪਹਾਰਸਮੁਚ੍ਚਿਤਾ ਰੋਦਨ੍ਤੀਤਿ ਤੇ ਪਹਾਰਪਰਿਚਿਤਾ ਪੁਬ੍ਬੇਪਿ ਲਦ੍ਧਪਹਾਰਤ੍ਤਾ ਇਦਾਨਿ ਚ ਪਹਾਰਂ ਦਸ੍ਸਨ੍ਤੀਤਿ ਮਞ੍ਞਮਾਨਾ ਰੋਦਨ੍ਤੀਤਿ ਅਤ੍ਥੋ. ‘‘ਪਹਾਰਸ੍ਸ ਮੁਚ੍ਚਿਤਾ’’ਤਿਪਿ ਸਜ੍ਝਾਯਨ੍ਤਿ, ਤਤ੍ਥ ‘‘ਪਹਾਰਸ੍ਸ ਭੀਤਾ’’ਤਿ ਅਤ੍ਥੋ.

੪੫੭. ਉਗ੍ਗਿਰਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਸਚੇ ਉਗ੍ਗਿਰਿਤ੍ਵਾ ਵਿਰਦ੍ਧੋ ਪਹਾਰਂ ਦੇਤਿ, ਅਵਸ੍ਸਂ ਧਾਰੇਤੁਂ ਅਸਕ੍ਕੋਨ੍ਤਸ੍ਸ ਪਹਾਰੋ ਸਹਸਾ ਪਤਤਿ, ਨ ਪਹਰਿਤੁਕਾਮਤਾਯ ਦਿਨ੍ਨਤ੍ਤਾ ਦੁਕ੍ਕਟਂ. ਤੇਨ ਪਹਾਰੇਨ ਹਤ੍ਥਾਦੀਸੁ ਯਂਕਿਞ੍ਚਿ ਭਿਜ੍ਜਤਿ, ਦੁਕ੍ਕਟਮੇਵ.

੪੫੮. ਮੋਕ੍ਖਾਧਿਪ੍ਪਾਯੋ ਤਲਸਤ੍ਤਿਕਂ ਉਗ੍ਗਿਰਤੀਤਿ ਏਤ੍ਥ ਪੁਬ੍ਬੇ ਵੁਤ੍ਤੇਸੁ ਵਤ੍ਥੂਸੁ ਪੁਰਿਮਨਯੇਨੇਵ ਤਲਸਤ੍ਤਿਕਂ ਉਗ੍ਗਿਰਨ੍ਤਸ੍ਸ ਅਨਾਪਤ੍ਤਿ. ਸਚੇਪਿ ਵਿਰਜ੍ਝਿਤ੍ਵਾ ਪਹਾਰਂ ਦੇਤਿ, ਅਨਾਪਤ੍ਤਿਯੇਵ. ਸੇਸਂ ਪੁਰਿਮਸਦਿਸਮੇਵ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਤਲਸਤ੍ਤਿਕਸਿਕ੍ਖਾਪਦਂ ਪਞ੍ਚਮਂ.