੮. ਸਹਧਮ੍ਮਿਕਵਗ੍ਗੋ

੧. ਸਹਧਮ੍ਮਿਕਸਿਕ੍ਖਾਪਦਵਣ੍ਣਨਾ

੪੩੪. ਸਹਧਮ੍ਮਿਕਵਗ੍ਗਸ੍ਸ ਪਠਮਸਿਕ੍ਖਾਪਦੇ – ਏਤਸ੍ਮਿਂ ਸਿਕ੍ਖਾਪਦੇਤਿ ਏਤਸ੍ਮਿਂ ਸਿਕ੍ਖਾਪਦੇ ਯਂ ਵੁਤ੍ਤਂ, ਤਂ ਨ ਤਾਵ ਸਿਕ੍ਖਿਸ੍ਸਾਮਿ. ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਪਨ ਵਾਚਾਯ ਵਾਚਾਯ ਆਪਤ੍ਤਿ ਵੇਦਿਤਬ੍ਬਾ. ਸਿਕ੍ਖਮਾਨੇਨ ਭਿਕ੍ਖਵੇ ਭਿਕ੍ਖੁਨਾਤਿ ਓਵਾਦਂ ਸਿਰਸਾ ਸਮ੍ਪਟਿਚ੍ਛਿਤ੍ਵਾ ਸਿਕ੍ਖਿਤੁਕਾਮੇਨੇਵ ਹੁਤ੍ਵਾ ਆਜਾਨਿਤਬ੍ਬਞ੍ਚੇਵ ਪੁਚ੍ਛਿਤਬ੍ਬਞ੍ਚ ਉਪਪਰਿਕ੍ਖਿਤਬ੍ਬਞ੍ਚ. ਸੇਸਮੇਤ੍ਥ ਦੁਬ੍ਬਚਸਿਕ੍ਖਾਪਦੇ ਵੁਤ੍ਤਨਯੇਨੇਵ ਪਦਤ੍ਥਤੋ ਵੇਦਿਤਬ੍ਬਂ. ਵਿਨਿਚ੍ਛਯਤੋ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਸਹਧਮ੍ਮਿਕਸਿਕ੍ਖਾਪਦਂ ਪਠਮਂ.

੨. ਵਿਲੇਖਨਸਿਕ੍ਖਾਪਦਵਣ੍ਣਨਾ

੪੩੮. ਦੁਤਿਯੇ – ਵਿਨਯਕਥਂ ਕਥੇਤੀਤਿ ਵਿਨਯਕਥਾ ਨਾਮ ਕਪ੍ਪਿਯਾਕਪ੍ਪਿਯਆਪਤ੍ਤਾਨਾਪਤ੍ਤਿਸਂਵਰਪਹਾਨਪਟਿਸਂਯੁਤ੍ਤਕਥਾ, ਤਂ ਕਥੇਤਿ. ਵਿਨਯਸ੍ਸ ਵਣ੍ਣਂ ਭਾਸਤੀਤਿ ਵਿਨਯਸ੍ਸ ਵਣ੍ਣੋ ਨਾਮ ਪਞ੍ਚਨ੍ਨਮ੍ਪਿ ਸਤ੍ਤਨ੍ਨਮ੍ਪਿ ਆਪਤ੍ਤਿਕ੍ਖਨ੍ਧਾਨਂ ਵਸੇਨ ਮਾਤਿਕਂ ਨਿਕ੍ਖਿਪਿਤ੍ਵਾ ਪਦਭਾਜਨੇਨ ਵਣ੍ਣਨਾ, ਤਂ ਭਾਸਤਿ. ਵਿਨਯਪਰਿਯਤ੍ਤਿਯਾ ਵਣ੍ਣਂ ਭਾਸਤੀਤਿ ਵਿਨਯਂ ਪਰਿਯਾਪੁਣਨ੍ਤਾਨਂ ਵਿਨਯਪਰਿਯਤ੍ਤਿਮੂਲਕਂ ਵਣ੍ਣਂ ਗੁਣਂ ਆਨਿਸਂਸਂ ਭਾਸਤਿ. ਵਿਨਯਧਰੋ ਹਿ ਵਿਨਯਪਰਿਯਤ੍ਤਿਮੂਲਕੇ ਪਞ੍ਚਾਨਿਸਂਸੇ ਛਾਨਿਸਂਸੇ ਸਤ੍ਤਾਨਿਸਂਸੇ ਅਟ੍ਠਾਨਿਸਂਸੇ ਨਵਾਨਿਸਂਸੇ ਦਸਾਨਿਸਂਸੇ ਏਕਾਦਸਾਨਿਸਂਸੇ ਚ ਲਭਤਿ ਤੇ ਸਬ੍ਬੇ ਭਾਸਤੀਤਿ ਅਤ੍ਥੋ. ਕਤਮੇ ਪਞ੍ਚਾਨਿਸਂਸੇ ਲਭਤੀਤਿ? ਅਤ੍ਤਨੋ ਸੀਲਕ੍ਖਨ੍ਧਸੁਗੁਤ੍ਤਿਆਦਿਕੇ. ਵੁਤ੍ਤਞ੍ਹੇਤਂ –

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਵਿਨਯਧਰੇ ਪੁਗ੍ਗਲੇ – ਅਤ੍ਤਨੋ ਸੀਲਕ੍ਖਨ੍ਧੋ ਸੁਗੁਤ੍ਤੋ ਹੋਤਿ ਸੁਰਕ੍ਖਿਤੋ, ਕੁਕ੍ਕੁਚ੍ਚਪਕਤਾਨਂ ਪਟਿਸਰਣਂ ਹੋਤਿ, ਵਿਸਾਰਦੋ ਸਙ੍ਘਮਜ੍ਝੇ ਵੋਹਰਤਿ, ਪਚ੍ਚਤ੍ਥਿਕੇ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਣ੍ਹਾਤਿ, ਸਦ੍ਧਮ੍ਮਟ੍ਠਿਤਿਯਾ ਪਟਿਪਨ੍ਨੋ ਹੋਤੀ’’ਤਿ (ਪਰਿ. ੩੨੫).

ਕਥਮਸ੍ਸ ਅਤ੍ਤਨੋ ਸੀਲਕ੍ਖਨ੍ਧੋ ਸੁਗੁਤ੍ਤੋ ਹੋਤਿ ਸੁਰਕ੍ਖਿਤੋ? ਇਧੇਕਚ੍ਚੋ ਭਿਕ੍ਖੁ ਆਪਤ੍ਤਿਂ ਆਪਜ੍ਜਨ੍ਤੋ ਛਹਾਕਾਰੇਹਿ ਆਪਜ੍ਜਤਿ – ਅਲਜ੍ਜਿਤਾ, ਅਞ੍ਞਾਣਤਾ, ਕੁਕ੍ਕੁਚ੍ਚਪਕਤਤਾ, ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾ, ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾ, ਸਤਿਸਮ੍ਮੋਸਾਤਿ.

ਕਥਂ ਅਲਜ੍ਜਿਤਾਯ ਆਪਤ੍ਤਿਂ ਆਪਜ੍ਜਤਿ? ਅਕਪ੍ਪਿਯਭਾਵਂ ਜਾਨਨ੍ਤੋਯੇਵ ਮਦ੍ਦਿਤ੍ਵਾ ਵੀਤਿਕ੍ਕਮਂ ਕਰੋਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤਿ, ਆਪਤ੍ਤਿਂ ਪਰਿਗੂਹਤਿ;

ਅਗਤਿਗਮਨਞ੍ਚ ਗਚ੍ਛਤਿ, ਏਦਿਸੋ ਵੁਚ੍ਚਤਿ ਅਲਜ੍ਜਿਪੁਗ੍ਗਲੋ’’ਤਿ. (ਪਰਿ. ੩੫੯);

ਕਥਂ ਅਞ੍ਞਾਣਤਾਯ ਆਪਜ੍ਜਤਿ? ਅਞ੍ਞਾਣਪੁਗ੍ਗਲੋ ਹਿ ਮਨ੍ਦੋ ਮੋਮੂਹੋ ਕਤ੍ਤਬ੍ਬਾਕਤ੍ਤਬ੍ਬਂ ਅਜਾਨਨ੍ਤੋ ਅਕਤ੍ਤਬ੍ਬਂ ਕਰੋਤਿ, ਕਤ੍ਤਬ੍ਬਂ ਵਿਰਾਧੇਤਿ; ਏਵਂ ਅਞ੍ਞਾਣਤਾਯ ਆਪਜ੍ਜਤਿ.

ਕਥਂ ਕੁਕ੍ਕੁਚ੍ਚਪਕਤਤਾਯ ਆਪਜ੍ਜਤਿ? ਕਪ੍ਪਿਯਾਕਪ੍ਪਿਯਂ ਨਿਸ੍ਸਾਯ ਕੁਕ੍ਕੁਚ੍ਚੇ ਉਪ੍ਪਨ੍ਨੇ ਵਿਨਯਧਰਂ ਪੁਚ੍ਛਿਤ੍ਵਾ ਕਪ੍ਪਿਯਞ੍ਚੇ ਕਤ੍ਤਬ੍ਬਂ ਸਿਯਾ, ਅਕਪ੍ਪਿਯਞ੍ਚੇ ਨ ਕਤ੍ਤਬ੍ਬਂ, ਅਯਂ ਪਨ ‘‘ਵਟ੍ਟਤੀ’’ਤਿ ਮਦ੍ਦਿਤ੍ਵਾ ਵੀਤਿਕ੍ਕਮਤਿਯੇਵ; ਏਵਂ ਕੁਕ੍ਕੁਚ੍ਚਪਕਤਤਾਯ ਆਪਜ੍ਜਤਿ.

ਕਥਂ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਯ ਆਪਜ੍ਜਤਿ? ਅਚ੍ਛਮਂਸਂ ਸੂਕਰਮਂਸਨ੍ਤਿ ਖਾਦਤਿ, ਦੀਪਿਮਂਸਂ ਮਿਗਮਂਸਨ੍ਤਿ ਖਾਦਤਿ, ਅਕਪ੍ਪਿਯਭੋਜਨਂ ਕਪ੍ਪਿਯਭੋਜਨਨ੍ਤਿ ਭੁਞ੍ਜਤਿ, ਵਿਕਾਲੇ ਕਾਲਸਞ੍ਞਾਯ ਭੁਞ੍ਜਤਿ, ਅਕਪ੍ਪਿਯਪਾਨਕਂ ਕਪ੍ਪਿਯਪਾਨਕਨ੍ਤਿ ਪਿਵਤਿ; ਏਵਂ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਯ ਆਪਜ੍ਜਤਿ.

ਕਥਂ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਆਪਜ੍ਜਤਿ? ਸੂਕਰਮਂਸਂ ਅਚ੍ਛਮਂਸਨ੍ਤਿ ਖਾਦਤਿ, ਮਿਗਮਂਸਂ ਦੀਪਿਮਂਸਨ੍ਤਿ ਖਾਦਤਿ, ਕਪ੍ਪਿਯਭੋਜਨਂ ਅਕਪ੍ਪਿਯਭੋਜਨਨ੍ਤਿ ਭੁਞ੍ਜਤਿ, ਕਾਲੇ ਵਿਕਾਲਸਞ੍ਞਾਯ ਭੁਞ੍ਜਤਿ, ਕਪ੍ਪਿਯਪਾਨਕਂ ਅਕਪ੍ਪਿਯਪਾਨਕਨ੍ਤਿ ਪਿਵਤਿ; ਏਵਂ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਆਪਜ੍ਜਤਿ.

ਕਥਂ ਸਤਿਸਮ੍ਮੋਸਾਯ ਆਪਜ੍ਜਤਿ? ਸਹਸੇਯ੍ਯਚੀਵਰਵਿਪ੍ਪਵਾਸਭੇਸਜ੍ਜਚੀਵਰਕਾਲਾਤਿਕ੍ਕਮਨਪਚ੍ਚਯਾ ਆਪਤ੍ਤਿਞ੍ਚ ਸਤਿਸਮ੍ਮੋਸਾਯ ਆਪਜ੍ਜਤਿ; ਏਵਮਿਧੇਕਚ੍ਚੋ ਭਿਕ੍ਖੁ ਇਮੇਹਿ ਛਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ.

ਵਿਨਯਧਰੋ ਪਨ ਇਮੇਹਿ ਛਹਾਕਾਰੇਹਿ ਆਪਤ੍ਤਿਂ ਨਾਪਜ੍ਜਤਿ. ਕਥਂ ਲਜ੍ਜਿਤਾਯ ਨਾਪਜ੍ਜਤਿ? ਸੋ ਹਿ ‘‘ਪਸ੍ਸਥ ਭੋ, ਅਯਂ ਕਪ੍ਪਿਯਾਕਪ੍ਪਿਯਂ ਜਾਨਨ੍ਤੋਯੇਵ ਪਣ੍ਣਤ੍ਤਿਵੀਤਿਕ੍ਕਮਂ ਕਰੋਤੀ’’ਤਿ ਇਮਂ ਪਰੂਪਵਾਦਂ ਰਕ੍ਖਨ੍ਤੋਪਿ ਨਾਪਜ੍ਜਤਿ; ਏਵਂ ਲਜ੍ਜਿਤਾਯ ਨਾਪਜ੍ਜਤਿ. ਸਹਸਾ ਆਪਨ੍ਨਮ੍ਪਿ ਦੇਸਨਾਗਾਮਿਨਿਂ ਦੇਸੇਤ੍ਵਾ ਵੁਟ੍ਠਾਨਗਾਮਿਨਿਯਾ ਵੁਟ੍ਠਹਿਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਤਿ. ਤਤੋ –

‘‘ਸਞ੍ਚਿਚ੍ਚ ਆਪਤ੍ਤਿਂ ਨ ਆਪਜ੍ਜਤਿ, ਆਪਤ੍ਤਿਂ ਨ ਪਰਿਗੂਹਤਿ;

ਅਗਤਿਗਮਨਞ੍ਚ ਨ ਗਚ੍ਛਤਿ, ਏਦਿਸੋ ਵੁਚ੍ਚਤਿ ਲਜ੍ਜਿਪੁਗ੍ਗਲੋ’’ਤਿ. (ਪਰਿ. ੩੫੯)

ਇਮਸ੍ਮਿਂ ਲਜ੍ਜਿਭਾਵੇ ਪਤਿਟ੍ਠਿਤੋਵ ਹੋਤਿ.

ਕਥਂ ਞਾਣਤਾਯ ਨਾਪਜ੍ਜਤਿ? ਸੋ ਹਿ ਕਪ੍ਪਿਯਾਕਪ੍ਪਿਯਂ ਜਾਨਾਤਿ, ਤਸ੍ਮਾ ਕਪ੍ਪਿਯਮੇਵ ਕਰੋਤਿ, ਅਕਪ੍ਪਿਯਂ ਨ ਕਰੋਤਿ; ਏਵਂ ਞਾਣਤਾਯ ਨਾਪਜ੍ਜਤਿ.

ਕਥਂ ਅਕੁਕ੍ਕੁਚ੍ਚਪਕਤਤਾਯ ਨਾਪਜ੍ਜਤਿ? ਸੋ ਹਿ ਕਪ੍ਪਿਯਾਕਪ੍ਪਿਯਂ ਨਿਸ੍ਸਾਯ ਕੁਕ੍ਕੁਚ੍ਚੇ ਉਪ੍ਪਨ੍ਨੇ ਵਤ੍ਥੁਂ ਓਲੋਕੇਤ੍ਵਾ ਮਾਤਿਕਂ ਪਦਭਾਜਨਂ ਅਨ੍ਤਰਾਪਤ੍ਤਿਂ ਆਪਤ੍ਤਿਂ ਅਨਾਪਤ੍ਤਿਞ੍ਚ ਓਲੋਕੇਤ੍ਵਾ ਕਪ੍ਪਿਯਞ੍ਚੇ ਹੋਤਿ ਕਰੋਤਿ, ਅਕਪ੍ਪਿਯਞ੍ਚੇ ਨ ਕਰੋਤਿ; ਏਵਂ ਅਕੁਕ੍ਕੁਚ੍ਚਪਕਤਤਾਯ ਨਾਪਜ੍ਜਤਿ.

ਕਥਂ ਅਕਪ੍ਪਿਯਾਦਿਸਞ੍ਞਿਤਾਯ ਨਾਪਜ੍ਜਤਿ? ਸੋ ਹਿ ਕਪ੍ਪਿਯਾਕਪ੍ਪਿਯਂ ਜਾਨਾਤਿ, ਤਸ੍ਮਾ ਅਕਪ੍ਪਿਯੇ ਕਪ੍ਪਿਯਸਞ੍ਞੀ ਨ ਹੋਤਿ, ਕਪ੍ਪਿਯੇ ਅਕਪ੍ਪਿਯਸਞ੍ਞੀ ਨ ਹੋਤਿ; ਸੁਪ੍ਪਤਿਟ੍ਠਿਤਾ ਚਸ੍ਸ ਸਤਿ ਹੋਤਿ, ਅਧਿਟ੍ਠਾਤਬ੍ਬਂ ਅਧਿਟ੍ਠੇਤਿ, ਵਿਕਪ੍ਪੇਤਬ੍ਬਂ ਵਿਕਪ੍ਪੇਤਿ. ਇਤਿ ਇਮੇਹਿ ਛਹਾਕਾਰੇਹਿ ਆਪਤ੍ਤਿਂ ਨਾਪਜ੍ਜਤਿ. ਆਪਤ੍ਤਿਂ ਅਨਾਪਜ੍ਜਨ੍ਤੋ ਅਖਣ੍ਡਸੀਲੋ ਹੋਤਿ ਪਰਿਸੁਦ੍ਧਸੀਲੋ; ਏਵਮਸ੍ਸ ਅਤ੍ਤਨੋ ਸੀਲਕ੍ਖਨ੍ਧੋ ਸੁਗੁਤ੍ਤੋ ਹੋਤਿ ਸੁਰਕ੍ਖਿਤੋ.

ਕਥਂ ਕੁਕ੍ਕੁਚ੍ਚਪਕਤਾਨਂ ਪਟਿਸਰਣਂ ਹੋਤਿ? ਤਿਰੋਰਟ੍ਠੇਸੁ ਤਿਰੋਜਨਪਦੇਸੁ ਚ ਉਪ੍ਪਨ੍ਨਕੁਕ੍ਕੁਚ੍ਚਾ ਭਿਕ੍ਖੂ ‘‘ਅਸੁਕਸ੍ਮਿਂ ਕਿਰ ਵਿਹਾਰੇ ਵਿਨਯਧਰੋ ਵਸਤੀ’’ਤਿ ਦੂਰਤੋਪਿ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਕੁਕ੍ਕੁਚ੍ਚਂ ਪੁਚ੍ਛਨ੍ਤਿ, ਸੋ ਤੇਹਿ ਕਤਸ੍ਸ ਕਮ੍ਮਸ੍ਸ ਵਤ੍ਥੁਂ ਓਲੋਕੇਤ੍ਵਾ ਆਪਤ੍ਤਾਨਾਪਤ੍ਤਿਗਰੁਕਲਹੁਕਾਦਿਭੇਦਂ ਸਲ੍ਲਕ੍ਖੇਤ੍ਵਾ ਦੇਸਨਾਗਾਮਿਨਿਂ ਦੇਸਾਪੇਤ੍ਵਾ ਵੁਟ੍ਠਾਨਗਾਮਿਨਿਯਾ ਵੁਟ੍ਠਾਪੇਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਪੇਤਿ; ਏਵਂ ਕੁਕ੍ਕੁਚ੍ਚਪਕਤਾਨਂ ਪਟਿਸਰਣਂ ਹੋਤਿ.

ਵਿਸਾਰਦੋ ਸਙ੍ਘਮਜ੍ਝੇ ਵੋਹਰਤੀਤਿ ਅਵਿਨਯਧਰਸ੍ਸ ਹਿ ਸਙ੍ਘਮਜ੍ਝੇ ਕਥੇਨ੍ਤਸ੍ਸ ਭਯਂ ਸਾਰਜ੍ਜਂ ਓਕ੍ਕਮਤਿ, ਵਿਨਯਧਰਸ੍ਸ ਤਂ ਨ ਹੋਤਿ. ਕਸ੍ਮਾ? ‘‘ਏਵਂ ਕਥੇਨ੍ਤਸ੍ਸ ਦੋਸੋ ਹੋਤਿ; ਏਵਂ ਨ ਦੋਸੋ’’ਤਿ ਞਤ੍ਵਾ ਕਥਨਤੋ.

ਪਚ੍ਚਤ੍ਥਿਕੇ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਣ੍ਹਾਤੀਤਿ ਏਤ੍ਥ ਦ੍ਵਿਧਾ ਪਚ੍ਚਤ੍ਥਿਕਾ ਨਾਮ – ਅਤ੍ਤਪਚ੍ਚਤ੍ਥਿਕਾ ਚ ਸਾਸਨਪਚ੍ਚਤ੍ਥਿਕਾ ਚ. ਤਤ੍ਥ ਮੇਤ੍ਤਿਯਭੁਮ੍ਮਜਕਾ ਚ ਭਿਕ੍ਖੂ ਵਡ੍ਢੋ ਚ ਲਿਚ੍ਛਵੀ ਅਮੂਲਕੇਨ ਅਨ੍ਤਿਮਵਤ੍ਥੁਨਾ ਚੋਦੇਸੁਂ, ਇਮੇ ਅਤ੍ਤਪਚ੍ਚਤ੍ਥਿਕਾ ਨਾਮ. ਯੇ ਵਾ ਪਨਞ੍ਞੇਪਿ ਦੁਸ੍ਸੀਲਾ ਪਾਪਧਮ੍ਮਾ, ਸਬ੍ਬੇ ਤੇ ਅਤ੍ਤਪਚ੍ਚਤ੍ਥਿਕਾ. ਵਿਪਰੀਤਦਸ੍ਸਨਾ ਪਨ ਅਰਿਟ੍ਠਭਿਕ੍ਖੁਕਣ੍ਟਕਸਾਮਣੇਰਵੇਸਾਲਿਕਵਜ੍ਜਿਪੁਤ੍ਤਕਾ ਪਰੂਪਹਾਰਅਞ੍ਞਾਣਕਙ੍ਖਾਪਰਵਿਤਰਣਾਦਿਵਾਦਾ ਮਹਾਸਙ੍ਘਿਕਾਦਯੋ ਚ ਅਬੁਦ੍ਧਸਾਸਨਂ ‘‘ਬੁਦ੍ਧਸਾਸਨ’’ਨ੍ਤਿ ਵਤ੍ਵਾ ਕਤਪਗ੍ਗਹਾ ਸਾਸਨਪਚ੍ਚਤ੍ਥਿਕਾ ਨਾਮ. ਤੇ ਸਬ੍ਬੇਪਿ ਸਹਧਮ੍ਮੇਨ ਸਕਾਰਣੇਨ ਵਚਨੇਨ ਯਥਾ ਤਂ ਅਸਦ੍ਧਮ੍ਮਂ ਪਤਿਟ੍ਠਾਪੇਤੁਂ ਨ ਸਕ੍ਕੋਨ੍ਤਿ, ਏਵਂ ਸੁਨਿਗ੍ਗਹਿਤਂ ਕਤ੍ਵਾ ਨਿਗ੍ਗਣ੍ਹਾਤਿ.

ਸਦ੍ਧਮ੍ਮਟ੍ਠਿਤਿਯਾ ਪਟਿਪਨ੍ਨੋ ਹੋਤੀਤਿ ਏਤ੍ਥ ਪਨ ਤਿਵਿਧੋ ਸਦ੍ਧਮ੍ਮੋ ਪਰਿਯਤ੍ਤਿਪਟਿਪਤ੍ਤਿਅਧਿਗਮਵਸੇਨ. ਤਤ੍ਥ ਤੇਪਿਟਕਂ ਬੁਦ੍ਧਵਚਨਂ ਪਰਿਯਤ੍ਤਿਸਦ੍ਧਮ੍ਮੋ ਨਾਮ. ਤੇਰਸ ਧੁਤਙ੍ਗਗੁਣਾ ਚੁਦ੍ਦਸ ਖਨ੍ਧਕਵਤ੍ਤਾਨਿ ਦ੍ਵੇਅਸੀਤਿ ਮਹਾਵਤ੍ਤਾਨੀਤਿ ਅਯਂ ਪਟਿਪਤ੍ਤਿਸਦ੍ਧਮ੍ਮੋ ਨਾਮ. ਚਤ੍ਤਾਰੋ ਮਗ੍ਗਾ ਚ ਫਲਾਨਿ ਚਾਤਿ ਅਯਂ ਅਧਿਗਮਸਦ੍ਧਮ੍ਮੋ ਨਾਮ.

ਤਤ੍ਥ ਕੇਚਿ ਥੇਰਾ ‘‘ਯੋ ਵੋ, ਆਨਨ੍ਦ, ਮਯਾ ਧਮ੍ਮੋ ਚ ਵਿਨਯੋ ਚ ਦੇਸਿਤੋ ਪਞ੍ਞਤ੍ਤੋ, ਸੋ ਵੋ ਮਮਚ੍ਚਯੇਨ ਸਤ੍ਥਾ’’ਤਿ (ਦੀ. ਨਿ. ੨.੨੧੬) ਇਮਿਨਾ ਸੁਤ੍ਤੇਨ ‘‘ਸਾਸਨਸ੍ਸ ਪਰਿਯਤ੍ਤਿ ਮੂਲ’’ਨ੍ਤਿ ਵਦਨ੍ਤਿ. ਕੇਚਿ ਥੇਰਾ ‘‘ਇਮੇ ਚ ਸੁਭਦ੍ਦ ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’’ਤਿ (ਦੀ. ਨਿ. ੨.੨੧੪) ਇਮਿਨਾ ਸੁਤ੍ਤੇਨ ‘‘ਸਾਸਨਸ੍ਸ ਪਟਿਪਤ੍ਤਿਮੂਲ’’ਨ੍ਤਿ ਵਤ੍ਵਾ ‘‘ਯਾਵ ਪਞ੍ਚ ਭਿਕ੍ਖੂ ਸਮ੍ਮਾ ਪਟਿਪਨ੍ਨਾ ਸਂਵਿਜ੍ਜਨ੍ਤਿ, ਤਾਵ ਸਾਸਨਂ ਠਿਤਂ ਹੋਤੀ’’ਤਿ ਆਹਂਸੁ. ਇਤਰੇ ਪਨ ਥੇਰਾ ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਸੁਪ੍ਪਟਿਪਨ੍ਨਸ੍ਸਪਿ ਧਮ੍ਮਾਭਿਸਮਯੋ ਨਤ੍ਥੀ’’ਤਿ ਆਹਂਸੁ. ਸਚੇ ਪਞ੍ਚ ਭਿਕ੍ਖੂ ਚਤ੍ਤਾਰਿ ਪਾਰਾਜਿਕਾਨਿ ਰਕ੍ਖਣਕਾ ਹੋਨ੍ਤਿ, ਤੇ ਸਦ੍ਧੇ ਕੁਲਪੁਤ੍ਤੇ ਪਬ੍ਬਾਜੇਤ੍ਵਾ ਪਚ੍ਚਨ੍ਤਿਮੇ ਜਨਪਦੇ ਉਪਸਮ੍ਪਾਦੇਤ੍ਵਾ ਦਸਵਗ੍ਗਂ ਗਣਂ ਪੂਰੇਤ੍ਵਾ ਮਜ੍ਝਿਮੇ ਜਨਪਦੇਪਿ ਉਪਸਮ੍ਪਦਂ ਕਰਿਸ੍ਸਨ੍ਤਿ, ਏਤੇਨੁਪਾਯੇਨ ਵੀਸਤਿਵਗ੍ਗਗਣਂ ਸਙ੍ਘਂ ਪੂਰੇਤ੍ਵਾ ਅਤ੍ਤਨੋਪਿ ਅਬ੍ਭਾਨਕਮ੍ਮਂ ਕਤ੍ਵਾ ਸਾਸਨਂ ਵੁਡ੍ਢਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਗਮਯਿਸ੍ਸਨ੍ਤਿ. ਏਵਮਯਂ ਵਿਨਯਧਰੋ ਤਿਵਿਧਸ੍ਸਾਪਿ ਸਦ੍ਧਮ੍ਮਸ੍ਸ ਚਿਰਟ੍ਠਿਤਿਯਾ ਪਟਿਪਨ੍ਨੋ ਹੋਤੀਤਿ ਏਵਮਯਂ ਵਿਨਯਧਰੋ ਇਮੇ ਤਾਵ ਪਞ੍ਚਾਨਿਸਂਸੇ ਪਟਿਲਭਤੀਤਿ ਵੇਦਿਤਬ੍ਬੋ.

ਕਤਮੇ ਛ ਆਨਿਸਂਸੇ ਲਭਤੀਤਿ? ਤਸ੍ਸਾਧੇਯ੍ਯੋ ਉਪੋਸਥੋ, ਪਵਾਰਣਾ, ਸਙ੍ਘਕਮ੍ਮਂ, ਪਬ੍ਬਜ੍ਜਾ, ਉਪਸਮ੍ਪਦਾ, ਨਿਸ੍ਸਯਂ ਦੇਤਿ ਸਾਮਣੇਰਂ ਉਪਟ੍ਠਾਪੇਤਿ.

ਯੇ ਇਮੇ ਚਾਤੁਦ੍ਦਸਿਕੋ, ਪਨ੍ਨਰਸਿਕੋ, ਸਾਮਗ੍ਗਿਉਪੋਸਥੋ, ਸਙ੍ਘੇ ਉਪੋਸਥੋ, ਗਣੇ ਪੁਗ੍ਗਲੇ ਉਪੋਸਥੋ, ਸੁਤ੍ਤੁਦ੍ਦੇਸੋ, ਪਾਰਿਸੁਦ੍ਧਿ, ਅਧਿਟ੍ਠਾਨਉਪੋਸਥੋਤਿ ਨਵ ਉਪੋਸਥਾ, ਸਬ੍ਬੇ ਤੇ ਵਿਨਯਧਰਾਯਤ੍ਤਾ.

ਯਾਪਿ ਚ ਇਮਾ ਚਾਤੁਦ੍ਦਸਿਕਾ ਪਨ੍ਨਰਸਿਕਾ, ਸਾਮਗ੍ਗਿਪਵਾਰਣਾ, ਸਙ੍ਘੇ ਪਵਾਰਣਾ ਗਣੇ ਪੁਗ੍ਗਲੇ ਪਵਾਰਣਾ, ਤੇਵਾਚਿਕਾ, ਦ੍ਵੇਵਾਚਿਕਾ, ਸਮਾਨਵਸ੍ਸਿਕਾ ਪਵਾਰਣਾਤਿ ਨਵ ਪਵਾਰਣਾਯੋ, ਤਾਪਿ ਵਿਨਯਧਰਾਯਤ੍ਤਾ ਏਵ, ਤਸ੍ਸ ਸਨ੍ਤਕਾ, ਸੋ ਤਾਸਂ ਸਾਮੀ.

ਯਾਨਿਪਿ ਇਮਾਨਿ ਅਪਲੋਕਨਕਮ੍ਮਂ ਞਤ੍ਤਿਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਞਤ੍ਤਿਚਤੁਤ੍ਥਕਮ੍ਮਨ੍ਤਿ ਚਤ੍ਤਾਰਿ ਸਙ੍ਘਕਮ੍ਮਾਨਿ, ਤਾਨਿ ਵਿਨਯਧਰਾਯਤ੍ਤਾਨਿ.

ਯਾਪਿ ਚਾਯਂ ਉਪਜ੍ਝਾਯੇਨ ਹੁਤ੍ਵਾ ਕੁਲਪੁਤ੍ਤਾਨਂ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਕਾਤਬ੍ਬਾ, ਅਯਮ੍ਪਿ ਵਿਨਯਧਰਾਯਤ੍ਤਾਵ. ਨ ਹਿ ਅਞ੍ਞੋ ਦ੍ਵਿਪਿਟਕਧਰੋਪਿ ਏਤਂ ਕਾਤੁਂ ਲਭਤਿ. ਸੋ ਏਵ ਨਿਸ੍ਸਯਂ ਦੇਤਿ, ਸਾਮਣੇਰਂ ਉਪਟ੍ਠਾਪੇਤਿ. ਅਞ੍ਞੋ ਨੇਵ ਨਿਸ੍ਸਯਂ ਦਾਤੁਂ ਲਭਤਿ, ਨ ਸਾਮਣੇਰਂ ਉਪਟ੍ਠਾਪੇਤੁਂ. ਸਾਮਣੇਰੂਪਟ੍ਠਾਨਂ ਪਚ੍ਚਾਸੀਸਨ੍ਤੋ ਪਨ ਵਿਨਯਧਰਸ੍ਸ ਸਨ੍ਤਿਕੇ ਉਪਜ੍ਝਂ ਗਾਹਾਪੇਤ੍ਵਾ ਵਤ੍ਤਪਟਿਪਤ੍ਤਿਂ ਸਾਦਿਤੁਂ ਲਭਤਿ. ਏਤ੍ਥ ਚ ਨਿਸ੍ਸਯਦਾਨਞ੍ਚੇਵ ਸਾਮਣੇਰੂਪਟ੍ਠਾਨਞ੍ਚ ਏਕਮਙ੍ਗਂ.

ਇਤਿ ਇਮੇਸੁ ਛਸੁ ਆਨਿਸਂਸੇਸੁ ਏਕੇਨ ਸਦ੍ਧਿਂ ਪੁਰਿਮਾ ਪਞ੍ਚ ਛ ਹੋਨ੍ਤਿ, ਦ੍ਵੀਹਿ ਸਦ੍ਧਿਂ ਸਤ੍ਤ, ਤੀਹਿ ਸਦ੍ਧਿਂ ਅਟ੍ਠ, ਚਤੂਹਿ ਸਦ੍ਧਿਂ ਨਵ, ਪਞ੍ਚਹਿ ਸਦ੍ਧਿਂ ਦਸ, ਸਬ੍ਬੇਹਿ ਪੇਤੇਹਿ ਸਦ੍ਧਿਂ ਏਕਾਦਸਾਤਿ ਏਵਂ ਵਿਨਯਧਰੋ ਪੁਗ੍ਗਲੋ ਪਞ੍ਚ ਛ ਸਤ੍ਤ ਅਟ੍ਠ ਨਵ ਦਸ ਏਕਾਦਸ ਚ ਆਨਿਸਂਸੇ ਲਭਤੀਤਿ ਵੇਦਿਤਬ੍ਬੋ. ਏਵਂ ਭਗਵਾ ਇਮੇ ਆਨਿਸਂਸੇ ਦਸ੍ਸੇਨ੍ਤੋ ਵਿਨਯਪਰਿਯਤ੍ਤਿਯਾ ਵਣ੍ਣਂ ਭਾਸਤੀਤਿ ਵੇਦਿਤਬ੍ਬੋ.

ਆਦਿਸ੍ਸ ਆਦਿਸ੍ਸਾਤਿ ਪੁਨਪ੍ਪੁਨਂ ਵਵਤ੍ਥਪੇਤ੍ਵਾ ਵਿਸੁਂ ਵਿਸੁਂ ਕਤ੍ਵਾ. ਆਯਸ੍ਮਤੋ ਉਪਾਲਿਸ੍ਸ ਵਣ੍ਣਂ ਭਾਸਤੀਤਿ ਵਿਨਯਪਰਿਯਤ੍ਤਿਂ ਨਿਸ੍ਸਾਯ ਉਪਾਲਿਤ੍ਥੇਰਸ੍ਸ ਗੁਣਂ ਭਾਸਤਿ ਥੋਮੇਤਿ ਪਸਂਸਤਿ. ਕਸ੍ਮਾ? ਅਪ੍ਪੇਵ ਨਾਮ ਮਮ ਵਣ੍ਣਨਂ ਸੁਤ੍ਵਾਪਿ ਭਿਕ੍ਖੂ ਉਪਾਲਿਸ੍ਸ ਸਨ੍ਤਿਕੇ ਵਿਨਯਂ ਉਗ੍ਗਹੇਤਬ੍ਬਂ ਪਰਿਯਾਪੁਣਿਤਬ੍ਬਂ ਮਞ੍ਞੇਯ੍ਯੁਂ, ਏਵਮਿਦਂ ਸਾਸਨਂ ਅਦ੍ਧਨਿਯਂ ਭਵਿਸ੍ਸਤਿ, ਪਞ੍ਚਵਸ੍ਸਸਹਸ੍ਸਾਨਿ ਪਵਤ੍ਤਿਸ੍ਸਤੀਤਿ.

ਤੇਧ ਬਹੂ ਭਿਕ੍ਖੂਤਿ ਤੇ ਇਮਂ ਭਗਵਤੋ ਵਣ੍ਣਨਂ ਸੁਤ੍ਵਾ ‘‘ਇਮੇ ਕਿਰਾਨਿਸਂਸੇ ਨੇਵ ਸੁਤ੍ਤਨ੍ਤਿਕਾ ਨ ਆਭਿਧਮ੍ਮਿਕਾ ਲਭਨ੍ਤੀ’’ਤਿ ਯਥਾਪਰਿਕਿਤ੍ਤਿਤਾਨਿਸਂਸਾਧਿਗਮੇ ਉਸ੍ਸਾਹਜਾਤਾ ਬਹੂ ਭਿਕ੍ਖੂ ਥੇਰਾ ਚ ਨਵਾ ਚ ਮਜ੍ਝਿਮਾ ਚ ਆਯਸ੍ਮਤੋ ਉਪਾਲਿਸ੍ਸ ਸਨ੍ਤਿਕੇ ਵਿਨਯਂ ਪਰਿਯਾਪੁਣਨ੍ਤੀਤਿ ਅਯਮੇਤ੍ਥ ਅਤ੍ਥੋ. ਇਧਾਤਿ ਨਿਪਾਤਮਤ੍ਤਮੇਵ.

੪੩੯-੪੦. ਉਦ੍ਦਿਸ੍ਸਮਾਨੇਤਿ ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਉਦ੍ਦਿਸ੍ਸਮਾਨੇ, ਸੋ ਪਨ ਯਸ੍ਮਾ ਆਚਰਿਯੇ ਅਤ੍ਤਨੋ ਰੁਚਿਯਾ ਉਦ੍ਦਿਸਨ੍ਤੇ ਵਾ ਆਚਰਿਯਂ ਯਾਚਿਤ੍ਵਾ ਅਨ੍ਤੇਵਾਸਿਕੇਨ ਉਦ੍ਦਿਸਾਪੇਨ੍ਤੇ ਵਾ ਯੋ ਨਂ ਧਾਰੇਤਿ, ਤਸ੍ਮਿਂ ਸਜ੍ਝਾਯਂ ਕਰੋਨ੍ਤੇ ਵਾ ਉਦ੍ਦਿਸ੍ਸਮਾਨੋ ਨਾਮ ਹੋਤਿ, ਤਸ੍ਮਾ ‘‘ਉਦ੍ਦਿਸਨ੍ਤੇ ਵਾ ਉਦ੍ਦਿਸਾਪੇਨ੍ਤੇ ਵਾ ਸਜ੍ਝਾਯਂ ਵਾ ਕਰੋਨ੍ਤੇ’’ਤਿ ਪਦਭਾਜਨਂ ਵੁਤ੍ਤਂ. ਖੁਦ੍ਦਾਨੁਖੁਦ੍ਦਕੇਹੀਤਿ ਖੁਦ੍ਦਕੇਹਿ ਚ ਅਨੁਖੁਦ੍ਦਕੇਹਿ ਚ. ਯਾਵਦੇਵਾਤਿ ਤੇਸਂ ਸਂਵਤ੍ਤਨਮਰਿਯਾਦਪਰਿਚ੍ਛੇਦਵਚਨਂ. ਇਦਂ ਵੁਤ੍ਤਂ ਹੋਤਿ – ਏਤਾਨਿ ਹਿ ਯੇ ਉਦ੍ਦਿਸਨ੍ਤਿ, ਉਦ੍ਦਿਸਾਪੇਨ੍ਤਿ ਸਜ੍ਝਾਯਨ੍ਤਿ ਵਾ, ਤੇਸਂ ਤਾਵ ਸਂਵਤ੍ਤਨ੍ਤਿ ਯਾਵ ‘‘ਕਪ੍ਪਤਿ ਨੁ ਖੋ, ਨ ਕਪ੍ਪਤਿ ਨੁ ਖੋ’’ਤਿ ਕੁਕ੍ਕੁਚ੍ਚਸਙ੍ਖਾਤੋ ਵਿਪ੍ਪਟਿਸਾਰੋ ਵਿਹੇਸਾ ਵਿਚਿਕਿਚ੍ਛਾਸਙ੍ਖਾਤੋ ਮਨੋਵਿਲੇਖੋ ਚ ਉਪ੍ਪਜ੍ਜਤਿਯੇਵ. ਅਥ ਵਾ ਯਾਵਦੇਵਾਤਿ ਅਤਿਸਯਵਵਤ੍ਥਾਪਨਂ; ਤਸ੍ਸ ਸਂਵਤ੍ਤਨ੍ਤੀਤਿ ਇਮਿਨਾ ਸਮ੍ਬਨ੍ਧੋ, ਕੁਕ੍ਕੁਚ੍ਚਾਯ ਵਿਹੇਸਾਯ ਵਿਲੇਖਾਯ ਅਤਿਵਿਯ ਸਂਵਤ੍ਤਨ੍ਤਿਯੇਵਾਤਿ ਵੁਤ੍ਤਂ ਹੋਤਿ. ਉਪਸਮ੍ਪਨ੍ਨਸ੍ਸ ਵਿਨਯਂ ਵਿਵਣ੍ਣੇਤੀਤਿ ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ ਤਸ੍ਸ ਤਸ੍ਮਿਂ ਵਿਮਤਿਂ ਉਪ੍ਪਾਦੇਤੁਕਾਮੋ ਵਿਨਯਂ ਵਿਵਣ੍ਣੇਤਿ ਨਿਨ੍ਦਤਿ ਗਰਹਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਵਿਲੇਖਨਸਿਕ੍ਖਾਪਦਂ ਦੁਤਿਯਂ.

੩. ਮੋਹਨਸਿਕ੍ਖਾਪਦਵਣ੍ਣਨਾ

੪੪੪. ਤਤਿਯੇ – ਅਨ੍ਵਦ੍ਧਮਾਸਨ੍ਤਿ ਅਨੁਪਟਿਪਾਟਿਯਾ ਅਦ੍ਧਮਾਸੇ ਅਦ੍ਧਮਾਸੇ; ਯਸ੍ਮਾ ਪਨ ਸੋ ਉਪੋਸਥਦਿਵਸੇ ਉਦ੍ਦਿਸਿਯਤਿ, ਤਸ੍ਮਾ ‘‘ਅਨੁਪੋਸਥਿਕ’’ਨ੍ਤਿ ਪਦਭਾਜਨੇ ਵੁਤ੍ਤਂ. ਉਦ੍ਦਿਸ੍ਸਮਾਨੇਤਿ ਉਦ੍ਦਿਸਿਯਮਾਨੇ. ਯਸ੍ਮਾ ਪਨ ਸੋ ਪਾਤਿਮੋਕ੍ਖੁਦ੍ਦੇਸਕੇ ਉਦ੍ਦਿਸਨ੍ਤੇ ਉਦ੍ਦਿਸਿਯਮਾਨੋ ਨਾਮ ਹੋਤਿ, ਤਸ੍ਮਾ ‘‘ਉਦ੍ਦਿਸਨ੍ਤੇ’’ਤਿ ਪਦਭਾਜਨੇ ਵੁਤ੍ਤਂ. ਯਞ੍ਚ ਤਤ੍ਥ ਆਪਤ੍ਤਿਂ ਆਪਨ੍ਨੋਤਿ ਤਸ੍ਮਿਂ ਅਨਾਚਾਰੇ ਚਿਣ੍ਣੇ ਯਂ ਆਪਤ੍ਤਿਂ ਆਪਨ੍ਨੋ. ਯਥਾਧਮ੍ਮੋ ਕਾਰੇਤਬ੍ਬੋਤਿ ਅਞ੍ਞਾਣੇਨ ਆਪਨ੍ਨਤ੍ਤਾ ਤਸ੍ਸਾ ਆਪਤ੍ਤਿਯਾ ਮੋਕ੍ਖੋ ਨਤ੍ਥਿ, ਯਥਾ ਪਨ ਧਮ੍ਮੋ ਚ ਵਿਨਯੋ ਚ ਠਿਤੋ, ਤਥਾ ਕਾਰੇਤਬ੍ਬੋ. ਦੇਸਨਾਗਾਮਿਨਿਞ੍ਚੇ ਆਪਨ੍ਨੋ ਹੋਤਿ, ਦੇਸਾਪੇਤਬ੍ਬੋ, ਵੁਟ੍ਠਾਨਗਾਮਿਨਿਞ੍ਚੇ, ਵੁਟ੍ਠਾਪੇਤਬ੍ਬੋਤਿ ਅਤ੍ਥੋ. ਸਾਧੁਕਨ੍ਤਿ ਸੁਟ੍ਠੁ. ਅਟ੍ਠਿਂਕਤ੍ਵਾਤਿ ਅਤ੍ਥਿਕਭਾਵਂ ਕਤ੍ਵਾ; ਅਤ੍ਥਿਕੋ ਹੁਤ੍ਵਾਤਿ ਵੁਤ੍ਤਂ ਹੋਤਿ.

੪੪੭. ਧਮ੍ਮਕਮ੍ਮੇਤਿਆਦੀਸੁ ਮੋਹਾਰੋਪਨਕਮ੍ਮਂ ਅਧਿਪ੍ਪੇਤਂ. ਸੇਸਮੇਤ੍ਥ ਉਤ੍ਤਾਨਮੇਵ. ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਮੋਹਨਸਿਕ੍ਖਾਪਦਂ ਤਤਿਯਂ.

੪. ਪਹਾਰਸਿਕ੍ਖਾਪਦਵਣ੍ਣਨਾ

੪੪੯. ਚਤੁਤ੍ਥੇ – ਪਹਾਰਂ ਦੇਨ੍ਤੀਤਿ ‘‘ਆਵੁਸੋ ਪੀਠਕਂ ਪਞ੍ਞਪੇਥ, ਪਾਦਧੋਵਨਂ ਆਹਰਥਾ’’ਤਿਆਦੀਨਿ ਵਤ੍ਵਾ ਤਥਾ ਅਕਰੋਨ੍ਤਾਨਂ ਪਹਾਰਂ ਦੇਨ੍ਤਿ.

੪੫੧. ਪਹਾਰਂ ਦੇਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਪਹਰਿਤੁਕਾਮਤਾਯ ਪਹਾਰੇ ਦਿਨ੍ਨੇ ਸਚੇਪਿ ਮਰਤਿ ਪਾਚਿਤ੍ਤਿਯਮੇਵ. ਪਹਾਰੇਨ ਹਤ੍ਥੋ ਵਾ ਪਾਦੋ ਵਾ ਭਿਜ੍ਜਤਿ, ਸੀਸਂ ਵਾ ਭਿਨ੍ਨਂ ਹੋਤਿ, ਪਾਚਿਤ੍ਤਿਯਮੇਵ. ‘‘ਯਥਾਯਂ ਸਙ੍ਘਮਜ੍ਝੇ ਨ ਵਿਰੋਚਤਿ, ਤਥਾ ਨਂ ਕਰੋਮੀ’’ਤਿ ਏਵਂ ਵਿਰੂਪਕਰਣਾਧਿਪ੍ਪਾਯੇਨ ਕਣ੍ਣਂ ਵਾ ਨਾਸਂ ਵਾ ਛਿਨ੍ਦਤਿ, ਦੁਕ੍ਕਟਂ.

੪੫੨. ਅਨੁਪਸਮ੍ਪਨ੍ਨਸ੍ਸਾਤਿ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ ਇਤ੍ਥਿਯਾ ਵਾ ਪੁਰਿਸਸ੍ਸ ਵਾ ਅਨ੍ਤਮਸੋ ਤਿਰਚ੍ਛਾਨਗਤਸ੍ਸਾਪਿ ਪਹਾਰਂ ਦੇਤਿ, ਦੁਕ੍ਕਟਂ. ਸਚੇ ਪਨ ਰਤ੍ਤਚਿਤ੍ਤੋ ਇਤ੍ਥਿਂ ਪਹਰਤਿ, ਸਙ੍ਘਾਦਿਸੇਸੋ.

੪੫੩. ਕੇਨਚਿ ਵਿਹੇਠਿਯਮਾਨੋਤਿ ਮਨੁਸ੍ਸੇਨ ਵਾ ਤਿਰਚ੍ਛਾਨਗਤੇਨ ਵਾ ਵਿਹੇਠਿਯਮਾਨੋ. ਮੋਕ੍ਖਾਧਿਪ੍ਪਾਯੋਤਿ ਤਤੋ ਅਤ੍ਤਨੋ ਮੋਕ੍ਖਂ ਪਤ੍ਥਯਮਾਨੋ. ਪਹਾਰਂ ਦੇਤੀਤਿ ਕਾਯਕਾਯਪਟਿਬਦ੍ਧਨਿਸ੍ਸਗ੍ਗਿਯਾਨਂ ਅਞ੍ਞਤਰੇਨ ਪਹਾਰਂ ਦੇਤਿ, ਅਨਾਪਤ੍ਤਿ. ਸਚੇਪਿ ਅਨ੍ਤਰਾਮਗ੍ਗੇ ਚੋਰਂ ਵਾ ਪਚ੍ਚਤ੍ਥਿਕਂ ਵਾ ਵਿਹੇਠੇਤੁਕਾਮਂ ਦਿਸ੍ਵਾ ‘‘ਉਪਾਸਕ, ਏਤ੍ਥੇਵ ਤਿਟ੍ਠ, ਮਾ ਆਗਮੀ’’ਤਿ ਵਤ੍ਵਾ ਵਚਨਂ ਅਨਾਦਿਯਿਤ੍ਵਾ ਆਗਚ੍ਛਨ੍ਤਂ ‘‘ਗਚ੍ਛ ਰੇ’’ਤਿ ਮੁਗ੍ਗਰੇਨ ਵਾ ਸਤ੍ਥਕੇਨ ਵਾ ਪਹਰਿਤ੍ਵਾ ਯਾਤਿ, ਸੋ ਚੇ ਤੇਨ ਪਹਾਰੇਨ ਮਰਤਿ, ਅਨਾਪਤ੍ਤਿਯੇਵ. ਵਾਲ਼ਮਿਗੇਸੁਪਿ ਏਸੇਵ ਨਯੋ. ਸੇਸਮੇਤ੍ਥ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿ ਪਨਸ੍ਸ ਪਠਮਪਾਰਾਜਿਕਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.

ਪਹਾਰਸਿਕ੍ਖਾਪਦਂ ਚਤੁਤ੍ਥਂ.

੫. ਤਲਸਤ੍ਤਿਕਸਿਕ੍ਖਾਪਦਵਣ੍ਣਨਾ

੪੫੪. ਪਞ੍ਚਮੇ – ਤਲਸਤ੍ਤਿਕਂ ਉਗ੍ਗਿਰਨ੍ਤੀਤਿ ਪਹਾਰਦਾਨਾਕਾਰਂ ਦਸ੍ਸੇਤ੍ਵਾ ਕਾਯਮ੍ਪਿ ਕਾਯਪਟਿਬਦ੍ਧਮ੍ਪਿ ਉਚ੍ਚਾਰੇਨ੍ਤਿ. ਤੇ ਪਹਾਰਸਮੁਚ੍ਚਿਤਾ ਰੋਦਨ੍ਤੀਤਿ ਤੇ ਪਹਾਰਪਰਿਚਿਤਾ ਪੁਬ੍ਬੇਪਿ ਲਦ੍ਧਪਹਾਰਤ੍ਤਾ ਇਦਾਨਿ ਚ ਪਹਾਰਂ ਦਸ੍ਸਨ੍ਤੀਤਿ ਮਞ੍ਞਮਾਨਾ ਰੋਦਨ੍ਤੀਤਿ ਅਤ੍ਥੋ. ‘‘ਪਹਾਰਸ੍ਸ ਮੁਚ੍ਚਿਤਾ’’ਤਿਪਿ ਸਜ੍ਝਾਯਨ੍ਤਿ, ਤਤ੍ਥ ‘‘ਪਹਾਰਸ੍ਸ ਭੀਤਾ’’ਤਿ ਅਤ੍ਥੋ.

੪੫੭. ਉਗ੍ਗਿਰਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਸਚੇ ਉਗ੍ਗਿਰਿਤ੍ਵਾ ਵਿਰਦ੍ਧੋ ਪਹਾਰਂ ਦੇਤਿ, ਅਵਸ੍ਸਂ ਧਾਰੇਤੁਂ ਅਸਕ੍ਕੋਨ੍ਤਸ੍ਸ ਪਹਾਰੋ ਸਹਸਾ ਪਤਤਿ, ਨ ਪਹਰਿਤੁਕਾਮਤਾਯ ਦਿਨ੍ਨਤ੍ਤਾ ਦੁਕ੍ਕਟਂ. ਤੇਨ ਪਹਾਰੇਨ ਹਤ੍ਥਾਦੀਸੁ ਯਂਕਿਞ੍ਚਿ ਭਿਜ੍ਜਤਿ, ਦੁਕ੍ਕਟਮੇਵ.

੪੫੮. ਮੋਕ੍ਖਾਧਿਪ੍ਪਾਯੋ ਤਲਸਤ੍ਤਿਕਂ ਉਗ੍ਗਿਰਤੀਤਿ ਏਤ੍ਥ ਪੁਬ੍ਬੇ ਵੁਤ੍ਤੇਸੁ ਵਤ੍ਥੂਸੁ ਪੁਰਿਮਨਯੇਨੇਵ ਤਲਸਤ੍ਤਿਕਂ ਉਗ੍ਗਿਰਨ੍ਤਸ੍ਸ ਅਨਾਪਤ੍ਤਿ. ਸਚੇਪਿ ਵਿਰਜ੍ਝਿਤ੍ਵਾ ਪਹਾਰਂ ਦੇਤਿ, ਅਨਾਪਤ੍ਤਿਯੇਵ. ਸੇਸਂ ਪੁਰਿਮਸਦਿਸਮੇਵ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਤਲਸਤ੍ਤਿਕਸਿਕ੍ਖਾਪਦਂ ਪਞ੍ਚਮਂ.

੬. ਅਮੂਲਕਸਿਕ੍ਖਾਪਦਵਣ੍ਣਨਾ

੪੫੯. ਛਟ੍ਠੇ – ਅਨੁਦ੍ਧਂਸੇਨ੍ਤੀਤਿ ਤੇ ਕਿਰ ਸਯਂ ਆਕਿਣ੍ਣਦੋਸਤ੍ਤਾ ‘‘ਏਵਂ ਭਿਕ੍ਖੂ ਅਮ੍ਹੇ ਨੇਵ ਚੋਦੇਸ੍ਸਨ੍ਤਿ, ਨ ਸਾਰੇਸ੍ਸਨ੍ਤੀ’’ਤਿ ਅਤ੍ਤਪਰਿਤ੍ਤਾਣਂ ਕਰੋਨ੍ਤਾ ਪਟਿਕਚ੍ਚੇਵ ਭਿਕ੍ਖੂ ਅਮੂਲਕੇਨ ਸਙ੍ਘਾਦਿਸੇਸੇਨ ਚੋਦੇਨ੍ਤਿ. ਸੇਸਮੇਤ੍ਥ ਤੇਰਸਕਮ੍ਹਿ ਅਮੂਲਕਸਿਕ੍ਖਾਪਦੇ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

ਅਮੂਲਕਸਿਕ੍ਖਾਪਦਂ ਛਟ੍ਠਂ.

੭. ਸਞ੍ਚਿਚ੍ਚਸਿਕ੍ਖਾਪਦਵਣ੍ਣਨਾ

੪੬੪. ਸਤ੍ਤਮੇ – ਉਪਦਹਨ੍ਤੀਤਿ ਉਪ੍ਪਾਦੇਨ੍ਤਿ. ਕੁਕ੍ਕੁਚ੍ਚਂ ਉਪਦਹਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਵਾਚਾਯ ਵਾਚਾਯ ਆਪਤ੍ਤਿ. ਅਨੁਪਸਮ੍ਪਨ੍ਨਸ੍ਸਾਤਿ ਸਾਮਣੇਰਸ੍ਸ. ਮਾਤੁਗਾਮੇਨ ਸਦ੍ਧਿਂ ਰਹੋ ਮਞ੍ਞੇ ਤਯਾ ਨਿਸਿਨ੍ਨਂ ਨਿਪਨ੍ਨਂ ਭੁਤ੍ਤਂ ਪੀਤਂ, ਸਙ੍ਘਮਜ੍ਝੇ ਇਦਞ੍ਚਿਦਞ੍ਚ ਕਤਨ੍ਤਿਆਦਿਨਾ ਨਯੇਨ ਕੁਕ੍ਕੁਚ੍ਚਂ ਉਪਦਹਤਿ, ਵਾਚਾਯ ਵਾਚਾਯ ਦੁਕ੍ਕਟਂ. ਸੇਸਮੇਤ੍ਥ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿਪਿ ਅਮੂਲਕਸਦਿਸਾਨੇਵਾਤਿ.

ਸਞ੍ਚਿਚ੍ਚਸਿਕ੍ਖਾਪਦਂ ਸਤ੍ਤਮਂ.

੮. ਉਪਸ੍ਸੁਤਿਸਿਕ੍ਖਾਪਦਵਣ੍ਣਨਾ

੪੭੧. ਅਟ੍ਠਮੇ – ਅਧਿਕਰਣਜਾਤਾਨਨ੍ਤਿ ਏਤੇਹਿ ਭਣ੍ਡਨਾਦੀਹਿ ਉਪ੍ਪਨ੍ਨਵਿਵਾਦਾਧਿਕਰਣਾਨਂ. ਉਪਸ੍ਸੁਤਿਨ੍ਤਿ ਸੁਤਿਸਮੀਪਂ; ਯਤ੍ਥ ਠਤ੍ਵਾ ਸਕ੍ਕਾ ਹੋਤਿ ਤੇਸਂ ਵਚਨਂ ਸੋਤੁਂ, ਤਤ੍ਥਾਤਿ ਅਤ੍ਥੋ. ਗਚ੍ਛਤਿ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਪਦਵਾਰੇ ਪਦਵਾਰੇ ਦੁਕ੍ਕਟਂ. ਮਨ੍ਤੇਨ੍ਤਨ੍ਤਿ ਅਞ੍ਞੇਨ ਸਦ੍ਧਿਂ ਅਞ੍ਞਸ੍ਮਿਂ ਮਨ੍ਤਯਮਾਨੇ; ‘‘ਮਨ੍ਤੇਨ੍ਤੇ’’ਤਿ ਵਾ ਪਾਠੋ, ਅਯਮੇਵਤ੍ਥੋ.

੪੭੩. ਵੂਪਸਮਿਸ੍ਸਾਮੀਤਿ ਉਪਸਮਂ ਗਮਿਸ੍ਸਾਮਿ, ਕਲਹਂ ਨ ਕਰਿਸ੍ਸਾਮਿ. ਅਤ੍ਤਾਨਂ ਪਰਿਮੋਚੇਸ੍ਸਾਮੀਤਿ ਮਮ ਅਕਾਰਕਭਾਵਂ ਕਥੇਤ੍ਵਾ ਅਤ੍ਤਾਨਂ ਮੋਚੇਸ੍ਸਾਮਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਥੇਯ੍ਯਸਤ੍ਥਸਮੁਟ੍ਠਾਨਂ – ਕਾਯਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਸਿਯਾ ਕਿਰਿਯਂ ਸੋਤੁਕਾਮਤਾਯ ਗਮਨਵਸੇਨ, ਸਿਯਾ ਅਕਿਰਿਯਂ ਠਿਤਟ੍ਠਾਨਂ ਆਗਨ੍ਤ੍ਵਾ ਮਨ੍ਤਯਮਾਨਾਨਂ ਅਜਾਨਾਪਨਵਸੇਨ, ਰੂਪਿਯਂ ਅਞ੍ਞਵਾਦਕਂ ਉਪਸ੍ਸੁਤੀਤਿ ਇਮਾਨਿ ਹਿ ਤੀਣਿ ਸਿਕ੍ਖਾਪਦਾਨਿ ਏਕਪਰਿਚ੍ਛੇਦਾਨਿ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਉਪਸ੍ਸੁਤਿਸਿਕ੍ਖਾਪਦਂ ਅਟ੍ਠਮਂ.

੯. ਕਮ੍ਮਪਟਿਬਾਹਨਸਿਕ੍ਖਾਪਦਵਣ੍ਣਨਾ

੪੭੪. ਨਵਮੇ – ਸਚੇ ਚ ਮਯਂ ਜਾਨੇਯ੍ਯਾਮਾਤਿ ਸਚੇ ਮਯਂ ਜਾਨੇਯ੍ਯਾਮ; ਚਕਾਰੋ ਪਨ ਨਿਪਾਤਮਤ੍ਤਮੇਵ. ਧਮ੍ਮਿਕਾਨਨ੍ਤਿ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਕਤਤ੍ਤਾ ਧਮ੍ਮਾ ਏਤੇਸੁ ਅਤ੍ਥੀਤਿ ਧਮ੍ਮਿਕਾਨਿ; ਤੇਸਂ ਧਮ੍ਮਿਕਾਨਂ ਚਤੁਨ੍ਨਂ ਸਙ੍ਘਕਮ੍ਮਾਨਂ. ਖਿਯ੍ਯਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਵਾਚਾਯ ਵਾਚਾਯ ਪਾਚਿਤ੍ਤਿਯਂ. ਸੇਸਂ ਉਤ੍ਤਾਨਮੇਵ. ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਕਮ੍ਮਪਟਿਬਾਹਨਸਿਕ੍ਖਾਪਦਂ ਨਵਮਂ.

੧੦. ਛਨ੍ਦਂਅਦਤ੍ਵਾਗਮਨਸਿਕ੍ਖਾਪਦਵਣ੍ਣਨਾ

੪੮੧. ਦਸਮੇ – ਵਤ੍ਥੁ ਵਾ ਆਰੋਚਿਤਨ੍ਤਿ ਚੋਦਕੇਨ ਚ ਚੁਦਿਤਕੇਨ ਚ ਅਤ੍ਤਨੋ ਕਥਾ ਕਥਿਤਾ, ਅਨੁਵਿਜ੍ਜਕੋ ਸਮ੍ਮਤੋ, ਏਤ੍ਤਾਵਤਾਪਿ ਵਤ੍ਥੁਮੇਵ ਆਰੋਚਿਤਂ ਹੋਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਧੁਰਨਿਕ੍ਖੇਪਸਮੁਟ੍ਠਾਨਂ – ਕਾਯਵਾਚਾਚਿਤ੍ਤਤੋ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਛਨ੍ਦਂ ਅਦਤ੍ਵਾ ਗਮਨਸਿਕ੍ਖਾਪਦਂ ਦਸਮਂ.

੧੧. ਦੁਬ੍ਬਲਸਿਕ੍ਖਾਪਦਵਣ੍ਣਨਾ

੪੮੪. ਏਕਾਦਸਮੇ – ਯਥਾਮਿਤ੍ਤਤਾਤਿ ਯਥਾਮਿਤ੍ਤਤਾਯ; ਯੋ ਯੋ ਮਿਤ੍ਤੋ, ਤਸ੍ਸ ਤਸ੍ਸ ਦੇਤੀਤਿ ਵੁਤ੍ਤਂ ਹੋਤਿ. ਏਸ ਨਯੋ ਸਬ੍ਬਪਦੇਸੁ. ਸੇਸਂ ਉਜ੍ਝਾਪਨਕਾਦੀਸੁ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਦੁਬ੍ਬਲਸਿਕ੍ਖਾਪਦਂ ਏਕਾਦਸਮਂ.

੧੨. ਪਰਿਣਾਮਨਸਿਕ੍ਖਾਪਦਵਣ੍ਣਨਾ

੪੮੯. ਦ੍ਵਾਦਸਮੇ – ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਤਿਂਸਕੇ ਪਰਿਣਾਮਨਸਿਕ੍ਖਾਪਦੇ ਵੁਤ੍ਤਨਯਮੇਵ. ਅਯਮੇਵ ਹਿ ਵਿਸੇਸੋ – ਤਤ੍ਥ ਅਤ੍ਤਨੋ ਪਰਿਣਾਮਿਤਤ੍ਤਾ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਇਧ ਪੁਗ੍ਗਲਸ੍ਸ ਪਰਿਣਾਮਿਤਤ੍ਤਾ ਸੁਦ੍ਧਿਕਪਾਚਿਤ੍ਤਿਯਨ੍ਤਿ.

ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਪਰਿਣਾਮਨਸਿਕ੍ਖਾਪਦਂ ਦ੍ਵਾਦਸਮਂ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਸਹਧਮ੍ਮਿਕਵਗ੍ਗੋ ਅਟ੍ਠਮੋ.