੫. ਅਚੇਲਕਵਗ੍ਗੋ

੧. ਅਚੇਲਕਸਿਕ੍ਖਾਪਦਵਣ੍ਣਨਾ

੨੬੯. ਅਚੇਲਕਵਗ੍ਗਸ੍ਸ ੯ ਪਠਮਸਿਕ੍ਖਾਪਦੇ – ਪਰਿਵੇਸਨਨ੍ਤਿ ਪਰਿਵਿਸਨਟ੍ਠਾਨਂ. ਪਰਿਬ੍ਬਾਜਕਸਮਾਪਨ੍ਨੋਤਿ ਪਬ੍ਬਜ੍ਜਂ ਸਮਾਪਨ੍ਨੋ. ਦੇਤਿ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਸਮਤਿਤ੍ਤਿਕਂ ਯਾਗੁਪਤ੍ਤਂ ਏਕਪਯੋਗੇਨ ਦੇਤਿ, ਏਕਂ ਪਾਚਿਤ੍ਤਿਯਂ. ਅਵਚ੍ਛਿਨ੍ਦਿਤ੍ਵਾ ਅਵਚ੍ਛਿਨ੍ਦਿਤ੍ਵਾ ਦੇਤਿ, ਪਯੋਗੇ ਪਯੋਗੇ ਪਾਚਿਤ੍ਤਿਯਂ. ਏਸੇਵ ਨਯੋ ਪੂਵਭਤ੍ਤਾਦੀਸੁ. ਤਿਤ੍ਥਿਯੇ ਅਤਿਤ੍ਥਿਯਸਞ੍ਞੀਤਿ ਮਾਤਾ ਵਾ ਪਿਤਾ ਵਾ ਤਿਤ੍ਥਿਯੇਸੁ ਪਬ੍ਬਜਤਿ, ਤੇਸਂ ਮਾਤਾਪਿਤੁਸਞ੍ਞਾਯ ਦੇਨ੍ਤਸ੍ਸਾਪਿ ਪਾਚਿਤ੍ਤਿਯਮੇਵ ਹੋਤਿ. ਦਾਪੇਤੀਤਿ ਅਨੁਪਸਮ੍ਪਨ੍ਨੇਨ ਦਾਪੇਤਿ.

੨੭੩. ਉਪਨਿਕ੍ਖਿਪਿਤ੍ਵਾ ਦੇਤੀਤਿ ਤਥਾਰੂਪੇ ਭਾਜਨੇ ਠਪੇਤ੍ਵਾ ਤਂ ਭਾਜਨਂ ਤੇਸਂ ਸਨ੍ਤਿਕੇ ਭੂਮਿਯਂ ਨਿਕ੍ਖਿਪਿਤ੍ਵਾ ਦੇਤਿ, ਤੇਸਂ ਵਾ ਭਾਜਨਂ ਨਿਕ੍ਖਿਪਾਪੇਤ੍ਵਾ ਤਤ੍ਥ ਦੇਤਿ, ਪਤ੍ਤਂ ਆਧਾਰਕੇ ਵਾ ਭੂਮਿਯਂ ਵਾ ਠਪੇਤ੍ਵਾਪਿ ‘‘ਇਤੋ ਗਣ੍ਹਥਾ’’ਤਿ ਵਤ੍ਤੁਂ ਵਟ੍ਟਤਿ. ਸਚੇ ਤਿਤ੍ਥਿਯੋ ਵਦਤਿ ‘‘ਮਯ੍ਹਂ ਨਾਮ ਇਦਂ ਸਨ੍ਤਕਂ, ਇਧ ਨ ਆਕਿਰਥਾ’’ਤਿ ਆਕਿਰਿਤਬ੍ਬਂ. ਤਸ੍ਸ ਸਨ੍ਤਕਤ੍ਤਾ ਸਹਤ੍ਥਾ ਦਾਨਂ ਨਾਮ ਨ ਹੋਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਅਚੇਲਕਸਿਕ੍ਖਾਪਦਂ ਪਠਮਂ.

੨. ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ

੨੭੪. ਦੁਤਿਯਸਿਕ੍ਖਾਪਦੇ – ਪਟਿਕ੍ਕਮਨੇਪੀਤਿ ਆਸਨਸਾਲਾਯਮ੍ਪਿ. ਭਤ੍ਤਵਿਸ੍ਸਗ੍ਗਨ੍ਤਿ ਭਤ੍ਤਕਿਚ੍ਚਂ. ਨ ਸਮ੍ਭਾਵੇਸੀਤਿ ਨ ਪਾਪੁਣਿ.

੨੭੬. ਅਨਾਚਾਰਨ੍ਤਿ ਵੁਤ੍ਤਾਵਸੇਸਂ ਕਾਯਵਚੀਦ੍ਵਾਰਵੀਤਿਕ੍ਕਮਂ. ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ ਵਿਜਹਨ੍ਤਸ੍ਸਾਤਿ ਏਤ੍ਥ ਯਦਿ ਠਿਤੋ ਵਾ ਨਿਸਿਨ੍ਨੋ ਵਾ ਉਯ੍ਯੋਜੇਤਿ; ਯੋ ਉਯ੍ਯੋਜਿਤੋ, ਸੋ ਵਿਜਹਤਿ, ਤਸ੍ਸ ਚ ਆਪਤ੍ਤਿ ਨਾਮ ਨਤ੍ਥਿ. ਤਸ੍ਮਿਂ ਪਨ ਵਿਜਹਨ੍ਤੇਪਿ ਅਤ੍ਥਤੋ ਇਤਰੇਨ ਵਿਜਹਿਤਮੇਵ ਹੋਤਿ. ਤਸ੍ਮਾ ਯੋ ਉਯ੍ਯੋਜੇਤਿ, ਤਸ੍ਸੇਵਾਯਂ ਆਪਤ੍ਤਿ. ਤਤ੍ਥ ਸਚੇ ਉਪਚਾਰਬ੍ਭਨ੍ਤਰੇ ਏਕੋ ਪਾਦੋ ਹੋਤਿ, ਦੁਕ੍ਕਟਂ. ਸੀਮਾਤਿਕ੍ਕਮੇ ਪਾਚਿਤ੍ਤਿਯਂ. ਏਤ੍ਥ ਚ ਦਸ੍ਸਨੂਪਚਾਰਸ੍ਸ ਅਬ੍ਭੋਕਾਸੇ ਦ੍ਵਾਦਸਹਤ੍ਥਪ੍ਪਮਾਣਂ, ਤਥਾ ਸਵਨੂਪਚਾਰਸ੍ਸ. ਸਚੇ ਪਨ ਅਨ੍ਤਰਾ ਕੁਟ੍ਟਦ੍ਵਾਰਪਾਕਾਰਾਦਯੋ ਹੋਨ੍ਤਿ, ਤੇਹਿ ਅਨ੍ਤਰਿਤਭਾਵੋ ਦਸ੍ਸਨੂਪਚਾਰਾਤਿਕ੍ਕਮੋ, ਤਸ੍ਸ ਵਸੇਨ ਆਪਤ੍ਤਿ ਵੇਦਿਤਬ੍ਬਾ. ਨ ਅਞ੍ਞੋ ਕੋਚਿ ਪਚ੍ਚਯੋ ਹੋਤੀਤਿ ਠਪੇਤ੍ਵਾ ਵੁਤ੍ਤਪ੍ਪਕਾਰਮਨਾਚਾਰਂ ਅਞ੍ਞਂ ਕਿਞ੍ਚਿ ਕਾਰਣਂ ਨ ਹੋਤਿ.

੨੭੭. ਕਲਿਸਾਸਨਂ ਆਰੋਪੇਤੀਤਿ ‘‘ਕਲੀ’’ਤਿ ਕੋਧੋ; ਤਸ੍ਸ ਸਾਸਨਂ ਆਰੋਪੇਤਿ; ਕੋਧਸ੍ਸ ਆਣਂ ਆਰੋਪੇਤਿ; ਕੋਧਵਸੇਨ ਠਾਨਨਿਸਜ੍ਜਾਦੀਸੁ ਦੋਸਂ ਦਸ੍ਸੇਤ੍ਵਾ ‘‘ਪਸ੍ਸਥ ਭੋ ਇਮਸ੍ਸ ਠਾਨਂ, ਨਿਸਜ੍ਜਂ ਆਲੋਕਿਤਂ ਵਿਲੋਕਿਤਂ ਖਾਣੁਕੋ ਵਿਯ ਤਿਟ੍ਠਤਿ, ਸੁਨਖੋ ਵਿਯ ਨਿਸੀਦਤਿ, ਮਕ੍ਕਟੋ ਵਿਯ ਇਤੋ ਚਿਤੋ ਚ ਵਿਲੋਕੇਤੀ’’ਤਿ ਏਵਂ ਅਮਨਾਪਵਚਨਂ ਵਦਤਿ ‘‘ਅਪ੍ਪੇਵ ਨਾਮ ਇਮਿਨਾਪਿ ਉਬ੍ਬਾਲ਼੍ਹੋ ਪਕ੍ਕਮੇਯ੍ਯਾ’’ਤਿ. ਸੇਸਂ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਉਯ੍ਯੋਜਨਸਿਕ੍ਖਾਪਦਂ ਦੁਤਿਯਂ.

੩. ਸਭੋਜਨਸਿਕ੍ਖਾਪਦਵਣ੍ਣਨਾ

੨੭੯. ਤਤਿਯਸਿਕ੍ਖਾਪਦੇ – ਸਯਨਿਘਰੇਤਿ ਸਯਨਿਯਘਰੇ. ਯਤੋ ਅਯ੍ਯਸ੍ਸ ਭਿਕ੍ਖਾ ਦਿਨ੍ਨਾਤਿ ਯਸ੍ਮਾ ਭਿਕ੍ਖਾ ਦਿਨ੍ਨਾ, ਯਂ ਆਗਤੇਨ ਲਦ੍ਧਬ੍ਬਂ ਤਂ ਵੋ ਲਦ੍ਧਂ; ਗਚ੍ਛਥਾਤਿ ਅਧਿਪ੍ਪਾਯੋ. ਪਰਿਯੁਟ੍ਠਿਤੋਤਿ ਰਾਗਪਰਿਯੁਟ੍ਠਿਤੋ; ਮੇਥੁਨਾਧਿਪ੍ਪਾਯੋਤਿ ਅਤ੍ਥੋ.

੨੮੦. ਸਹ ਉਭੋਹਿ ਜਨੇਹੀਤਿ ਸਭੋਜਨਂ; ਤਸ੍ਮਿਂ ਸਭੋਜਨੇ. ਅਥ ਵਾ ਸਭੋਜਨੇਤਿ ਸਭੋਗੇ. ਰਾਗਪਰਿਯੁਟ੍ਠਿਤਸ੍ਸ ਹਿ ਪੁਰਿਸਸ੍ਸ ਇਤ੍ਥੀ ਭੋਗੋ ਇਤ੍ਥਿਯਾ ਚ ਪੁਰਿਸੋ. ਤੇਨੇਵਸ੍ਸ ਪਦਭਾਜਨੇ – ‘‘ਇਤ੍ਥੀ ਚੇਵ ਹੋਤਿ ਪੁਰਿਸੋ ਚਾ’’ਤਿਆਦਿ ਵੁਤ੍ਤਂ. ਮਹਲ੍ਲਕੇ ਘਰੇਤਿ ਮਹਲ੍ਲਕੇ ਸਯਨਿਘਰੇ. ਪਿਟ੍ਠਸਙ੍ਘਾਟਸ੍ਸ ਹਤ੍ਥਪਾਸਂ ਵਿਜਹਿਤ੍ਵਾਤਿ ਤਸ੍ਸ ਸਯਨਿਘਰੇ ਗਬ੍ਭਸ੍ਸ ਯੋ ਪਿਟ੍ਠਸਙ੍ਘਾਟੋ, ਤਸ੍ਸ ਹਤ੍ਥਪਾਸਂ ਵਿਜਹਿਤ੍ਵਾ; ਅਨ੍ਤੋਸਯਨਸ੍ਸ ਆਸਨ੍ਨੇ ਠਾਨੇ ਨਿਸੀਦਤੀਤਿ ਅਤ੍ਥੋ. ਈਦਿਸਞ੍ਚ ਸਯਨਿਘਰਂ ਮਹਾਚਤੁਸ੍ਸਾਲਾਦੀਸੁ ਹੋਤਿ. ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾਤਿ ਇਮਿਨਾ ਮਜ੍ਝਾਤਿਕ੍ਕਮਂ ਦਸ੍ਸੇਤਿ. ਤਸ੍ਮਾ ਯਥਾ ਵਾ ਤਥਾ ਵਾ ਕਤਸ੍ਸ ਖੁਦ੍ਦਕਸ੍ਸ ਸਯਨਿਘਰਸ੍ਸ ਮਜ੍ਝਾਤਿਕ੍ਕਮੇ ਆਪਤ੍ਤਿ ਵੇਦਿਤਬ੍ਬਾ. ਸੇਸਮੇਤ੍ਥ ਉਤ੍ਤਾਨਮੇਵ.

ਪਠਮਪਾਰਾਜਿਕਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਨ੍ਤਿ.

ਸਭੋਜਨਸਿਕ੍ਖਾਪਦਂ ਤਤਿਯਂ.

੨੮੪. ਚਤੁਤ੍ਥਪਞ੍ਚਮਸਿਕ੍ਖਾਪਦੇਸੁ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਅਨਿਯਤਦ੍ਵਯੇ ਵੁਤ੍ਤਨਯਮੇਵ. ਯਥਾ ਚ ਸਭੋਜਨਸਿਕ੍ਖਾਪਦਂ, ਏਵਮੇਤਾਨਿਪਿ ਪਠਮਪਾਰਾਜਿਕਸਮੁਟ੍ਠਾਨਾਨੇਵਾਤਿ.

ਰਹੋਪਟਿਚ੍ਛਨ੍ਨਸਿਕ੍ਖਾਪਦਂ ਚਤੁਤ੍ਥਂ, ਰਹੋਨਿਸਜ੍ਜਸਿਕ੍ਖਾਪਦਂ ਪਞ੍ਚਮਂ.

੬. ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ

੨੯੪. ਛਟ੍ਠਸਿਕ੍ਖਾਪਦੇ – ਦੇਥਾਵੁਸੋ ਭਤ੍ਤਨ੍ਤਿ ਏਤ੍ਥ ਤਂ ਕਿਰ ਭਤ੍ਤਂ ਅਭਿਹਟਂ ਅਹੋਸਿ, ਤਸ੍ਮਾ ਏਵਮਾਹਂਸੁ. ਅਨਭਿਹਟੇ ਪਨ ਏਵਂ ਵਤ੍ਤੁਂ ਨ ਲਬ੍ਭਤਿ, ਪਯੁਤ੍ਤਵਾਚਾ ਹੋਤਿ.

੨੯੫. ਤੇਨ ਹਿ ਭਿਕ੍ਖਵੇ ਪਟਿਗ੍ਗਹੇਤ੍ਵਾ ਨਿਕ੍ਖਿਪਥਾਤਿ ਇਦਂ ਪਨ ਭਗਵਾ ਕੁਲਸ੍ਸ ਸਦ੍ਧਾਨੁਰਕ੍ਖਣਤ੍ਥਾਯ ਆਹ. ਯਦਿ ‘‘ਭਾਜੇਤ੍ਵਾ ਖਾਦਥਾ’’ਤਿ ਵਦੇਯ੍ਯ, ਮਨੁਸ੍ਸਾਨਂ ਪਸਾਦਞ੍ਞਥਤ੍ਤਂ ਸਿਯਾ. ਉਸ੍ਸਾਰਿਯਿਤ੍ਥਾਤਿ ਪਟਿਹਰਿਯਿਤ੍ਥ; ਘਰਂਯੇਵ ਨਂ ਗਹੇਤ੍ਵਾ ਅਗਮਂਸੂਤਿ ਵੁਤ੍ਤਂ ਹੋਤਿ.

੨੯੮. ਸਨ੍ਤਂ ਭਿਕ੍ਖੁਨ੍ਤਿ ਏਤ੍ਥ ਕਿਤ੍ਤਾਵਤਾ ਸਨ੍ਤੋ ਹੋਤਿ, ਕਿਤ੍ਤਾਵਤਾ ਅਸਨ੍ਤੋਤਿ? ਅਨ੍ਤੋਵਿਹਾਰੇ ਯਤ੍ਥ ਠਿਤਸ੍ਸ ਕੁਲਾਨਿ ਪਯਿਰੁਪਾਸਨਚਿਤ੍ਤਂ ਉਪ੍ਪਨ੍ਨਂ, ਤਤੋ ਪਟ੍ਠਾਯ ਯਂ ਪਸ੍ਸੇ ਵਾ ਅਭਿਮੁਖੇ ਵਾ ਪਸ੍ਸਤਿ, ਯਸ੍ਸ ਸਕ੍ਕਾ ਹੋਤਿ ਪਕਤਿਵਚਨੇਨ ਆਰੋਚੇਤੁਂ, ਅਯਂ ਸਨ੍ਤੋ ਨਾਮ. ਇਤੋ ਚਿਤੋ ਚ ਪਰਿਯੇਸਿਤ੍ਵਾ ਆਰੋਚਨਕਿਚ੍ਚਂ ਨਾਮ ਨਤ੍ਥਿ. ਯੋ ਹਿ ਏਵਂ ਪਰਿਯੇਸਿਤਬ੍ਬੋ, ਸੋ ਅਸਨ੍ਤੋਯੇਵ. ਅਪਿਚ ਅਨ੍ਤੋਉਪਚਾਰਸੀਮਾਯ ਭਿਕ੍ਖੁਂ ਦਿਸ੍ਵਾ ਆਪੁਚ੍ਛਿਸ੍ਸਾਮੀਤਿ ਗਨ੍ਤ੍ਵਾ ਤਤ੍ਥ ਯਂ ਪਸ੍ਸਤਿ, ਸੋ ਆਪੁਚ੍ਛਿਤਬ੍ਬੋ. ਨੋ ਚੇ ਪਸ੍ਸਤਿ, ਅਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪਵਿਟ੍ਠੋ ਨਾਮ ਹੋਤਿ.

੩੦੨. ਅਨ੍ਤਰਾਰਾਮਨ੍ਤਿ ਅਨ੍ਤੋਗਾਮੇ ਵਿਹਾਰੋ ਹੋਤਿ, ਤਂ ਗਚ੍ਛਤਿ. ਭਤ੍ਤਿਯਘਰਨ੍ਤਿ ਨਿਮਨ੍ਤਿਤਘਰਂ ਵਾ ਸਲਾਕਭਤ੍ਤਾਦਿਦਾਯਕਾਨਂ ਵਾ ਘਰਂ. ਆਪਦਾਸੂਤਿ ਜੀਵਿਤਬ੍ਰਹ੍ਮਚਰਿਯਨ੍ਤਰਾਯੇਸੁ ਸਤਿ ਗਨ੍ਤੁਂ ਵਟ੍ਟਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਾਕਿਰਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਚਾਰਿਤ੍ਤਸਿਕ੍ਖਾਪਦਂ ਛਟ੍ਠਂ.

੭. ਮਹਾਨਾਮਸਿਕ੍ਖਾਪਦਵਣ੍ਣਨਾ

੩੦੩. ਸਤ੍ਤਮਸਿਕ੍ਖਾਪਦੇ – ਮਹਾਨਾਮੋ ਨਾਮ ਭਗਵਤੋ ਚੂਲ਼ਪਿਤੁਪੁਤ੍ਤੋ ਮਾਸਮਤ੍ਤੇਨ ਮਹਲ੍ਲਕਤਰੋ ਦ੍ਵੀਸੁ ਫਲੇਸੁ ਪਤਿਟ੍ਠਿਤੋ ਅਰਿਯਸਾਵਕੋ. ਭੇਸਜ੍ਜਂ ਉਸ੍ਸਨ੍ਨਂ ਹੋਤੀਤਿ ਵਜਤੋ ਆਹਰਿਤ੍ਵਾ ਠਪਿਤਸਪ੍ਪਿ ਬਹੁ ਹੋਤਿ.

੩੦੬. ਸਾਦਿਤਬ੍ਬਾਤਿ ਤਸ੍ਮਿਂ ਸਮਯੇ ਰੋਗੋ ਨਤ੍ਥੀਤਿ ਨ ਪਟਿਕ੍ਖਿਪਿਤਬ੍ਬਾ; ਰੋਗੇ ਸਤਿ ਵਿਞ੍ਞਾਪੇਸ੍ਸਾਮੀਤਿ ਅਧਿਵਾਸੇਤਬ੍ਬਾ. ਏਤ੍ਤਕੇਹਿ ਭੇਸਜ੍ਜੇਹਿ ਪਵਾਰੇਮੀਤਿ ਨਾਮਵਸੇਨ ਸਪ੍ਪਿਤੇਲਾਦੀਸੁ ਦ੍ਵੀਹਿ ਤੀਹਿ ਵਾ ਪਰਿਮਾਣਵਸੇਨ ਪਤ੍ਥੇਨ ਨਾਲ਼ਿਯਾ ਆਲ਼੍ਹਕੇਨਾਤਿ ਵਾ.ਅਞ੍ਞਂ ਭੇਸਜ੍ਜਂ ਵਿਞ੍ਞਾਪੇਤੀਤਿ ਸਪ੍ਪਿਨਾ ਪਵਾਰਿਤੋ ਤੇਲਂ ਵਿਞ੍ਞਾਪੇਤਿ, ਆਲ਼੍ਹਕੇਨ ਪਵਾਰਿਤੋ ਦੋਣਂ. ਨ ਭੇਸਜ੍ਜੇਨ ਕਰਣੀਯੇਨਾਤਿ ਮਿਸ੍ਸਕਭਤ੍ਤੇਨਪਿ ਚੇ ਯਾਪੇਤੁਂ ਸਕ੍ਕੋਤਿ, ਨ ਭੇਸਜ੍ਜਕਰਣੀਯਂ ਨਾਮ ਹੋਤਿ.

੩੧੦. ਪਵਾਰਿਤਾਨਨ੍ਤਿ ਯੇ ਅਤ੍ਤਨੋ ਪੁਗ੍ਗਲਿਕਾਯ ਪਵਾਰਣਾਯ ਪਵਾਰਿਤਾ; ਤੇਸਂ ਪਵਾਰਿਤਾਨੁਰੂਪੇਨ ਵਿਞ੍ਞਤ੍ਤਿਯਾ ਅਨਾਪਤ੍ਤਿ. ਸਙ੍ਘਵਸੇਨ ਪਵਾਰਿਤੇਸੁ ਪਨ ਪਮਾਣਂ ਸਲ੍ਲਕ੍ਖੇਤਬ੍ਬਮੇਵਾਤਿ. ਸੇਸਂ ਉਤ੍ਤਾਨਮੇਵ.

ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਮਹਾਨਾਮਸਿਕ੍ਖਾਪਦਂ ਸਤ੍ਤਮਂ.

੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ

੩੧੧. ਅਟ੍ਠਮੇ – ਅਬ੍ਭੁਯ੍ਯਾਤੋਤਿ ਅਭਿਉਯ੍ਯਾਤੋ; ਪਰਸੇਨਂ ਅਭਿਮੁਖੋ ਗਮਿਸ੍ਸਾਮੀਤਿ ਨਗਰਤੋ ਨਿਗ੍ਗਤੋਤਿ ਅਤ੍ਥੋ. ਉਯ੍ਯੁਤ੍ਤਨ੍ਤਿ ਕਤਉਯ੍ਯੋਗਂ; ਗਾਮਤੋ ਨਿਕ੍ਖਨ੍ਤਨ੍ਤਿ ਅਤ੍ਥੋ.

੩੧੪. ਦ੍ਵਾਦਸਪੁਰਿਸੋ ਹਤ੍ਥੀਤਿ ਚਤ੍ਤਾਰੋ ਆਰੋਹਕਾ ਏਕੇਕਪਾਦਰਕ੍ਖਕਾ ਦ੍ਵੇ ਦ੍ਵੇਤਿ ਏਵਂ ਦ੍ਵਾਦਸਪੁਰਿਸੋ ਹੋਤਿ. ਤਿਪੁਰਿਸੋ ਅਸ੍ਸੋਤਿ ਏਕੋ ਆਰੋਹਕੋ ਦ੍ਵੇ ਪਾਦਰਕ੍ਖਕਾਤਿ ਏਵਂ ਤਿਪੁਰਿਸੋ ਹੋਤਿ. ਚਤੁਪੁਰਿਸੋ ਰਥੋਤਿ ਏਕੋ ਸਾਰਥਿ ਏਕੋ ਯੋਧੋ ਦ੍ਵੇ ਆਣਿਰਕ੍ਖਕਾਤਿ ਏਵਂ ਚਤੁਪੁਰਿਸੋ ਹੋਤਿ. ਚਤ੍ਤਾਰੋ ਪੁਰਿਸਾ ਸਰਹਤ੍ਥਾਤਿ ਆਵੁਧਹਤ੍ਥਾ ਚਤ੍ਤਾਰੋ ਪੁਰਿਸਾਤਿ ਅਯਂ ਪਚ੍ਛਿਮਕੋਟਿਯਾ ਚਤੁਰਙ੍ਗਸਮਨ੍ਨਾਗਤਾ ਸੇਨਾ ਨਾਮ. ਈਦਿਸਂ ਸੇਨਂ ਦਸ੍ਸਨਾਯ ਗਚ੍ਛਤੋ ਪਦੇ ਪਦੇ ਦੁਕ੍ਕਟਂ. ਦਸ੍ਸਨੂਪਚਾਰਂ ਵਿਜਹਿਤ੍ਵਾਤਿ ਕੇਨਚਿ ਅਨ੍ਤਰਿਤਾ ਵਾ ਨਿਨ੍ਨਂ ਓਰੁਲ਼੍ਹਾ ਵਾ ਨ ਦਿਸ੍ਸਤਿ; ਇਧ ਠਤ੍ਵਾ ਨ ਸਕ੍ਕਾ ਦਟ੍ਠੁਨ੍ਤਿ ਅਞ੍ਞਂ ਠਾਨਂ ਗਨ੍ਤ੍ਵਾ ਪਸ੍ਸਤੋ ਪਯੋਗੇ ਪਯੋਗੇ ਪਾਚਿਤ੍ਤਿਯਨ੍ਤਿ ਅਤ੍ਥੋ.

੩੧੫. ਏਕਮੇਕਨ੍ਤਿ ਹਤ੍ਥਿਆਦੀਸੁ ਚਤੂਸੁ ਅਙ੍ਗੇਸੁ ਏਕਮੇਕਂ; ਅਨ੍ਤਮਸੋ ਏਕਪੁਰਿਸਾਰੁਲ਼੍ਹਕਹਤ੍ਥਿਮ੍ਪਿ ਏਕਮ੍ਪਿ ਸਰਹਤ੍ਥਂ ਪੁਰਿਸਂ. ਅਨੁਯ੍ਯੁਤ੍ਤਾ ਨਾਮ ਰਾਜਾ ਉਯ੍ਯਾਨਂ ਵਾ ਨਦਿਂ ਵਾ ਗਚ੍ਛਤਿ; ਏਵਂ ਅਨੁਯ੍ਯੁਤ੍ਤਾ ਹੋਤਿ.

੩੧੬. ਆਪਦਾਸੂਤਿ ਜੀਵਿਤਬ੍ਰਹ੍ਮਚਰਿਯਨ੍ਤਰਾਯੇਸੁ ਸਤਿ ਏਤ੍ਥ ਗਤੋ ਮੁਞ੍ਚਿਸ੍ਸਾਮੀਤਿ ਗਚ੍ਛਤੋ ਅਨਾਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਉਯ੍ਯੁਤ੍ਤਸੇਨਾਸਿਕ੍ਖਾਪਦਂ ਅਟ੍ਠਮਂ.

੯. ਸੇਨਾਵਾਸਸਿਕ੍ਖਾਪਦਵਣ੍ਣਨਾ

੩੧੯. ਨਵਮੇ – ਅਤ੍ਥਙ੍ਗਤੇ ਸੂਰਿਯੇ ਸੇਨਾਯ ਵਸਤੀਤਿ ਤਿਟ੍ਠਤੁ ਵਾ ਨਿਸੀਦਤੁ ਵਾ ਸਯਤੁ ਵਾ ਸਚੇਪਿ ਆਕਾਸੇ ਇਦ੍ਧਿਯਾ ਕਞ੍ਚਿ ਇਰਿਯਾਪਥਂ ਕਪ੍ਪੇਤਿ, ਪਾਚਿਤ੍ਤਿਯਮੇਵ. ਸੇਨਾ ਵਾ ਪਟਿਸੇਨਾਯ ਰੁਦ੍ਧਾ ਹੋਤੀਤਿ ਯਥਾ ਸਞ੍ਚਾਰੋ ਛਿਜ੍ਜਤਿ; ਏਵਂ ਰੁਦ੍ਧਾ ਹੋਤਿ. ਪਲਿਬੁਦ੍ਧੋਤਿ ਵੇਰਿਕੇਨ ਵਾ ਇਸ੍ਸਰੇਨ ਵਾ ਰੁਦ੍ਧੋ. ਸੇਸਂ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਸੇਨਾਵਾਸਸਿਕ੍ਖਾਪਦਂ ਨਵਮਂ.

੧੦. ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ

੩੨੨. ਦਸਮੇ – ਉਗ੍ਗਨ੍ਤ੍ਵਾ ਉਗ੍ਗਨ੍ਤ੍ਵਾ ਏਤ੍ਥ ਯੁਜ੍ਝਨ੍ਤੀਤਿ ਉਯ੍ਯੋਧਿਕਂ; ਸਮ੍ਪਹਾਰਟ੍ਠਾਨਸ੍ਸੇਤਂ ਅਧਿਵਚਨਂ. ਬਲਸ੍ਸ ਅਗ੍ਗਂ ਜਾਨਨ੍ਤਿ ਏਤ੍ਥਾਤਿ ਬਲਗ੍ਗਂ; ਬਲਗਣਨਟ੍ਠਾਨਨ੍ਤਿ ਅਤ੍ਥੋ. ਸੇਨਾਯ ਵਿਯੂਹਂ ਸੇਨਾਬ੍ਯੂਹਂ; ਸੇਨਾਨਿਵੇਸਸ੍ਸੇਤਂ ਅਧਿਵਚਨਂ. ਤਯੋ ਹਤ੍ਥੀ ਪਚ੍ਛਿਮਂ ਹਤ੍ਥਾਨੀਕਨ੍ਤਿ ਯੋ ਪੁਬ੍ਬੇ ਵੁਤ੍ਤੋ ਦ੍ਵਾਦਸਪੁਰਿਸੋ ਹਤ੍ਥੀਤਿ ਤੇਨ ਹਤ੍ਥਿਨਾ ਤਯੋ ਹਤ੍ਥੀ. ਸੇਸੇਸੁਪਿ ਏਸੇਵ ਨਯੋ. ਸੇਸਂ ਉਯ੍ਯੁਤ੍ਤਸੇਨਾਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਉਯ੍ਯੋਧਿਕਸਿਕ੍ਖਾਪਦਂ ਦਸਮਂ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਅਚੇਲਕਵਗ੍ਗੋ ਪਞ੍ਚਮੋ.