੩. ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ

੨੨੧. ਤਤਿਯਸਿਕ੍ਖਾਪਦੇ – ਨ ਖੋ ਇਦਂ ਓਰਕਂ ਭਵਿਸ੍ਸਤਿ, ਯਥਯਿਮੇ ਮਨੁਸ੍ਸਾ ਸਕ੍ਕਚ੍ਚਂ ਭਤ੍ਤਂ ਕਰੋਨ੍ਤੀਤਿ, ਯੇਨ ਨਿਯਾਮੇਨ ਇਮੇ ਮਨੁਸ੍ਸਾ ਸਕ੍ਕਚ੍ਚਂ ਭਤ੍ਤਂ ਕਰੋਨ੍ਤਿ, ਤੇਨ ਞਾਯਤਿ – ‘‘ਇਦਂ ਸਾਸਨਂ ਇਦਂ ਵਾ ਬੁਦ੍ਧਪ੍ਪਮੁਖੇ ਸਙ੍ਘੇ ਦਾਨਂ ਨ ਖੋ ਓਰਕਂ ਭਵਿਸ੍ਸਤਿ, ਪਰਿਤ੍ਤਂ ਲਾਮਕਂ ਨੇਵ ਭਵਿਸ੍ਸਤੀ’’ਤਿ. ਕਿਰਪਤਿਕੋਤਿ ਏਤ੍ਥ ‘‘ਕਿਰੋ’’ਤਿ ਤਸ੍ਸ ਕੁਲਪੁਤ੍ਤਸ੍ਸ ਨਾਮਂ; ਅਧਿਪਚ੍ਚਟ੍ਠੇਨ ਪਨ ‘‘ਕਿਰਪਤਿਕੋ’’ਤਿ ਵੁਚ੍ਚਤਿ. ਸੋ ਕਿਰ ਇਸ੍ਸਰੋ ਅਧਿਪਤਿ ਮਾਸਉਤੁਸਂਵਚ੍ਛਰਨਿਯਾਮੇਨ ਵੇਤਨਂ ਦਤ੍ਵਾ ਕਮ੍ਮਕਾਰਕੇ ਕਮ੍ਮਂ ਕਾਰੇਤਿ. ਬਦਰਾ ਪਟਿਯਤ੍ਤਾਤਿ ਉਪਚਾਰਵਸੇਨ ਵਦਤਿ. ਬਦਰਮਿਸ੍ਸੇਨਾਤਿ ਬਦਰਸਾਲ਼ਵੇਨ.

੨੨੨. ਉਸ੍ਸੂਰੇ ਆਹਰਿਯਿਤ੍ਥਾਤਿ ਅਤਿਦਿਵਾ ਆਹਰਿਯਿਤ੍ਥ.

੨੨੬. ਮਯ੍ਹਂ ਭਤ੍ਤਪਚ੍ਚਾਸਂ ਇਤ੍ਥਨ੍ਨਾਮਸ੍ਸ ਦਮ੍ਮੀਤਿ ਅਯਂ ਭਤ੍ਤਵਿਕਪ੍ਪਨਾ ਨਾਮ ਸਮ੍ਮੁਖਾਪਿ ਪਰਮ੍ਮੁਖਾਪਿ ਵਟ੍ਟਤਿ. ਸਮ੍ਮੁਖਾ ਦਿਸ੍ਵਾ ‘‘ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਤ੍ਵਾ ਭੁਞ੍ਜਿਤਬ੍ਬਂ, ਅਦਿਸ੍ਵਾ ਪਞ੍ਚਸੁ ਸਹਧਮ੍ਮਿਕੇਸੁ ‘‘ਇਤ੍ਥਨ੍ਨਾਮਸ੍ਸ ਵਿਕਪ੍ਪੇਮੀ’’ਤਿ ਵਤ੍ਵਾ ਭੁਞ੍ਜਿਤਬ੍ਬਂ. ਮਹਾਪਚ੍ਚਰਿਯਾਦੀਸੁ ਪਨ ਪਰਮ੍ਮੁਖਾਵਿਕਪ੍ਪਨਾਵ ਵੁਤ੍ਤਾ. ਸਾ ਚਾਯਂ ਯਸ੍ਮਾ ਵਿਨਯਕਮ੍ਮੇਨ ਸਙ੍ਗਹਿਤਾ, ਤਸ੍ਮਾ ਭਗਵਤੋ ਵਿਕਪ੍ਪੇਤੁਂ ਨ ਵਟ੍ਟਤਿ. ਭਗਵਤਿ ਹਿ ਗਨ੍ਧਕੁਟਿਯਂ ਨਿਸਿਨ੍ਨੇਪਿ ਸਙ੍ਘਮਜ੍ਝੇ ਨਿਸਿਨ੍ਨੇਪਿ ਸਙ੍ਘੇਨ ਗਣਪ੍ਪਹੋਨਕੇ ਭਿਕ੍ਖੂ ਗਹੇਤ੍ਵਾ ਤਂ ਤਂ ਕਮ੍ਮਂ ਕਤਂ ਸੁਕਤਮੇਵ ਹੋਤਿ, ਭਗਵਾ ਨੇਵ ਕਮ੍ਮਂ ਕੋਪੇਤਿ; ਨ ਸਮ੍ਪਾਦੇਤਿ. ਨ ਕੋਪੇਤਿ ਧਮ੍ਮਿਸ੍ਸਰਤ੍ਤਾ, ਨ ਸਮ੍ਪਾਦੇਤਿ ਅਗਣਪੂਰਕਤ੍ਤਾ.

੨੨੯. ਦ੍ਵੇ ਤਯੋ ਨਿਮਨ੍ਤਨੇ ਏਕਤੋ ਭੁਞ੍ਜਤੀਤਿ ਦ੍ਵੇ ਤੀਣਿ ਨਿਮਨ੍ਤਨਾਨਿ ਏਕਪਤ੍ਤੇ ਪਕ੍ਖਿਪਿਤ੍ਵਾ ਮਿਸ੍ਸੇਤ੍ਵਾ ਏਕਂ ਕਤ੍ਵਾ ਭੁਞ੍ਜਤੀਤਿ ਅਤ੍ਥੋ. ਦ੍ਵੇ ਤੀਣਿ ਕੁਲਾਨਿ ਨਿਮਨ੍ਤੇਤ੍ਵਾ ਏਕਸ੍ਮਿਂ ਠਾਨੇ ਨਿਸੀਦਾਪੇਤ੍ਵਾ ਇਤੋ ਚਿਤੋ ਚ ਆਹਰਿਤ੍ਵਾ ਭਤ੍ਤਂ ਆਕਿਰਨ੍ਤਿ, ਸੂਪਬ੍ਯਞ੍ਜਨਂ ਆਕਿਰਨ੍ਤਿ, ਏਕਮਿਸ੍ਸਕਂ ਹੋਤਿ, ਏਤ੍ਥ ਅਨਾਪਤ੍ਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸਚੇ ਪਨ ਮੂਲਨਿਮਨ੍ਤਨਂ ਹੇਟ੍ਠਾ ਹੋਤਿ, ਪਚ੍ਛਿਮਂ ਪਚ੍ਛਿਮਂ ਉਪਰਿ, ਤਂ ਉਪਰਿਤੋ ਪਟ੍ਠਾਯ ਭੁਞ੍ਜਨ੍ਤਸ੍ਸ ਆਪਤ੍ਤਿ. ਹਤ੍ਥਂ ਪਨ ਅਨ੍ਤੋ ਪਵੇਸੇਤ੍ਵਾ ਪਠਮਨਿਮਨ੍ਤਨਤੋ ਏਕਮ੍ਪਿ ਕਬਲ਼ਂ ਉਦ੍ਧਰਿਤ੍ਵਾ ਭੁਤ੍ਤਕਾਲਤੋ ਪਟ੍ਠਾਯ ਯਥਾ ਤਥਾ ਵਾ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ਸਚੇਪਿ ਤਤ੍ਥ ਖੀਰਂ ਵਾ ਰਸਂ ਵਾ ਆਕਿਰਨ੍ਤਿ, ਯੇਨ ਅਜ੍ਝੋਤ੍ਥਤਂ ਭਤ੍ਤਂ ਏਕਰਸਂ ਹੋਤਿ, ਕੋਟਿਤੋ ਪਟ੍ਠਾਯ ਭੁਞ੍ਜਨ੍ਤਸ੍ਸ ਅਨਾਪਤ੍ਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ਵੁਤ੍ਤਂ – ‘‘ਖੀਰਭਤ੍ਤਂ ਵਾ ਰਸਭਤ੍ਤਂ ਵਾ ਲਭਿਤ੍ਵਾ ਨਿਸਿਨ੍ਨਸ੍ਸ ਤਤ੍ਥੇਵ ਅਞ੍ਞੇਪਿ ਖੀਰਭਤ੍ਤਂ ਵਾ ਰਸਭਤ੍ਤਂ ਵਾ ਆਕਿਰਨ੍ਤਿ, ਖੀਰਂ ਵਾ ਰਸਂ ਵਾ ਪਿਵਤੋ ਅਨਾਪਤ੍ਤਿ. ਭੁਞ੍ਜਨ੍ਤੇਨ ਪਨ ਪਠਮਂ ਲਦ੍ਧਮਂਸਖਣ੍ਡਂ ਵਾ ਭਤ੍ਤਪਿਣ੍ਡਂ ਵਾ ਮੁਖੇ ਪਕ੍ਖਿਪਿਤ੍ਵਾ ਕੋਟਿਤੋ ਪਟ੍ਠਾਯ ਭੁਞ੍ਜਿਤੁਂ ਵਟ੍ਟਤਿ. ਸਪ੍ਪਿਪਾਯਾਸੇਪਿ ਏਸੇਵ ਨਯੋ’’ਤਿ.

ਮਹਾਉਪਾਸਕੋ ਭਿਕ੍ਖੁਂ ਨਿਮਨ੍ਤੇਤਿ, ਤਸ੍ਸ ਕੁਲਂ ਉਪਗਤਸ੍ਸ ਉਪਾਸਕੋਪਿ ਤਸ੍ਸ ਪੁਤ੍ਤਦਾਰਭਾਤਿਕਭਗਿਨਿਆਦਯੋਪਿ ਅਤ੍ਤਨੋ ਅਤ੍ਤਨੋ ਕੋਟ੍ਠਾਸਂ ਆਹਰਿਤ੍ਵਾ ਪਤ੍ਤੇ ਪਕ੍ਖਿਪਨ੍ਤਿ, ਉਪਾਸਕੇਨ ਪਠਮਂ ਦਿਨ੍ਨਂ ਅਭੁਞ੍ਜਿਤ੍ਵਾ ਪਚ੍ਛਾ ਲਦ੍ਧਂ ਭੁਞ੍ਜਨ੍ਤਸ੍ਸ ‘‘ਅਨਾਪਤ੍ਤੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਕੁਰੁਨ੍ਦਟ੍ਠਕਥਾਯਂ ਪਨ ਵਟ੍ਟਤੀਤਿ ਵੁਤ੍ਤਂ. ਮਹਾਪਚ੍ਚਰਿਯਂ ‘‘ਸਚੇ ਪਾਟੇਕ੍ਕਂ ਪਚਨ੍ਤਿ, ਅਤ੍ਤਨੋ ਅਤ੍ਤਨੋ ਪਕ੍ਕਭਤ੍ਤਤੋ ਆਹਰਿਤ੍ਵਾ ਦੇਨ੍ਤਿ, ਤਤ੍ਥ ਪਚ੍ਛਾ ਆਹਟਂ ਪਠਮਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ. ਯਦਿ ਪਨ ਸਬ੍ਬੇਸਂ ਏਕੋਵ ਪਾਕੋ ਹੋਤਿ, ਪਰਮ੍ਪਰਭੋਜਨਂ ਨ ਹੋਤੀ’’ਤਿ ਵੁਤ੍ਤਂ. ਮਹਾਉਪਾਸਕੋ ਨਿਮਨ੍ਤੇਤ੍ਵਾ ਨਿਸੀਦਾਪੇਤਿ, ਅਞ੍ਞੋ ਮਨੁਸ੍ਸੋ ਪਤ੍ਤਂ ਗਣ੍ਹਾਤਿ, ਨ ਦਾਤਬ੍ਬਂ. ਕਿਂ ਭਨ੍ਤੇ ਨ ਦੇਥਾਤਿ? ਨਨੁ ਉਪਾਸਕ ਤਯਾ ਨਿਮਨ੍ਤਿਤਮ੍ਹਾਤਿ! ਹੋਤੁ ਭਨ੍ਤੇ, ਲਦ੍ਧਂ ਲਦ੍ਧਂ ਭੁਞ੍ਜਥਾਤਿ ਵਦਤਿ, ਭੁਞ੍ਜਿਤੁਂ ਵਟ੍ਟਤਿ. ਅਞ੍ਞੇਨ ਆਹਰਿਤ੍ਵਾ ਭਤ੍ਤੇ ਦਿਨ੍ਨੇ ਆਪੁਚ੍ਛਿਤ੍ਵਾਪਿ ਭੁਞ੍ਜਿਤੁਂ ਵਟ੍ਟਤੀਤਿ ਕੁਰੁਨ੍ਦਿਯਂ ਵੁਤ੍ਤਂ.

ਅਨੁਮੋਦਨਂ ਕਤ੍ਵਾ ਗਚ੍ਛਨ੍ਤਂ ਧਮ੍ਮਂ ਸੋਤੁਕਾਮਾ ‘‘ਸ੍ਵੇਪਿ ਭਨ੍ਤੇ ਆਗਚ੍ਛੇਯ੍ਯਾਥਾ’’ਤਿ ਸਬ੍ਬੇ ਨਿਮਨ੍ਤੇਨ੍ਤਿ, ਪੁਨਦਿਵਸੇ ਆਗਨ੍ਤ੍ਵਾ ਲਦ੍ਧਂ ਲਦ੍ਧਂ ਭੁਞ੍ਜਿਤੁਂ ਵਟ੍ਟਤਿ. ਕਸ੍ਮਾ? ਸਬ੍ਬੇਹਿ ਨਿਮਨ੍ਤਿਤਤ੍ਤਾ. ਏਕੋ ਭਿਕ੍ਖੁ ਪਿਣ੍ਡਾਯ ਚਰਨ੍ਤੋ ਭਤ੍ਤਂ ਲਭਤਿ, ਤਮਞ੍ਞੋ ਉਪਾਸਕੋ ਨਿਮਨ੍ਤੇਤ੍ਵਾ ਘਰੇ ਨਿਸੀਦਾਪੇਤਿ, ਨ ਚ ਤਾਵ ਭਤ੍ਤਂ ਸਮ੍ਪਜ੍ਜਤਿ. ਸਚੇ ਸੋ ਭਿਕ੍ਖੁ ਪਿਣ੍ਡਾਯ ਚਰਿਤ੍ਵਾ ਲਦ੍ਧਭਤ੍ਤਂ ਭੁਞ੍ਜਤਿ, ਆਪਤ੍ਤਿ. ਅਭੁਤ੍ਵਾ ਨਿਸਿਨ੍ਨੇ ‘‘ਕਿਂ ਭਨ੍ਤੇ ਨ ਭੁਞ੍ਜਸੀ’’ਤਿ ਵੁਤ੍ਤੇ ‘‘ਤਯਾ ਨਿਮਨ੍ਤਿਤਤ੍ਤਾ’’ਤਿ ਵਤ੍ਵਾ ਲਦ੍ਧਂ ਲਦ੍ਧਂ ਭੁਞ੍ਜਥ ਭਨ੍ਤੇ’’ਤਿ ਵੁਤ੍ਤੋ ਭੁਞ੍ਜਤਿ, ਵਟ੍ਟਤਿ.

ਸਕਲੇਨ ਗਾਮੇਨਾਤਿ ਸਕਲੇਨ ਗਾਮੇਨ ਏਕਤੋ ਹੁਤ੍ਵਾ ਨਿਮਨ੍ਤਿਤਸ੍ਸੇਵ ਯਤ੍ਥ ਕਤ੍ਥਚਿ ਭੁਞ੍ਜਤੋ ਅਨਾਪਤ੍ਤਿ. ਪੂਗੇਪਿ ਏਸੇਵ ਨਯੋ. ਨਿਮਨ੍ਤਿਯਮਾਨੋ ਭਿਕ੍ਖਂ ਗਹੇਸ੍ਸਾਮੀਤਿ ਭਣਤੀਤਿ ‘‘ਭਤ੍ਤਂ ਗਣ੍ਹਾ’’ਤਿ ਨਿਮਨ੍ਤਿਯਮਾਨੋ ‘‘ਨ ਮਯ੍ਹਂ ਤਵ ਭਤ੍ਤੇਨਤ੍ਥੋ, ਭਿਕ੍ਖਂ ਗਣ੍ਹਿਸ੍ਸਾਮੀ’’ਤਿ ਵਦਤਿ. ਏਤ੍ਥ ਪਨ ਮਹਾਪਦੁਮਤ੍ਥੇਰੋ ਆਹ – ‘‘ਏਵਂ ਵਦਨ੍ਤੋ ਇਮਸ੍ਮਿਂ ਸਿਕ੍ਖਾਪਦੇ ਅਨਿਮਨ੍ਤਨਂ ਕਾਤੁਂ ਸਕ੍ਕੋਤਿ, ਭੁਞ੍ਜਨਤ੍ਥਾਯ ਪਨ ਓਕਾਸੋ ਕਤੋ ਹੋਤੀਤਿ ਨੇਵ ਗਣਭੋਜਨਤੋ ਨ ਚਾਰਿਤ੍ਤਤੋ ਮੁਚ੍ਚਤੀ’’ਤਿ. ਮਹਾਸੁਮਤ੍ਥੇਰੋ ਆਹ – ‘‘ਯਦਗ੍ਗੇਨ ਅਨਿਮਨ੍ਤਨਂ ਕਾਤੁਂ ਸਕ੍ਕੋਤਿ, ਤਦਗ੍ਗੇਨ ਨੇਵ ਗਣਭੋਜਨਂ ਨ ਚਾਰਿਤ੍ਤਂ ਹੋਤੀ’’ਤਿ. ਸੇਸਂ ਉਤ੍ਤਾਨਮੇਵ.

ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ ਏਤ੍ਥ ਹਿ ਭੋਜਨਂ ਕਿਰਿਯਾ, ਅਵਿਕਪ੍ਪਨਂ ਅਕਿਰਿਯਾ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਰਮ੍ਪਰਭੋਜਨਸਿਕ੍ਖਾਪਦਂ ਤਤਿਯਂ.