੪. ਕਾਣਮਾਤਾਸਿਕ੍ਖਾਪਦਵਣ੍ਣਨਾ

੨੩੦. ਚਤੁਤ੍ਥਸਿਕ੍ਖਾਪਦੇ – ਕਾਣਮਾਤਾਤਿ ਕਾਣਾਯ ਮਾਤਾ. ਸਾ ਕਿਰਸ੍ਸਾ ਧੀਤਾ ਅਭਿਰੂਪਾ ਅਹੋਸਿ, ਯੇ ਯੇ ਤਂ ਪਸ੍ਸਨ੍ਤਿ, ਤੇ ਤੇ ਰਾਗੇਨ ਕਾਣਾ ਹੋਨ੍ਤਿ, ਰਾਗਨ੍ਧਾ ਹੋਨ੍ਤੀਤਿ ਅਤ੍ਥੋ. ਤਸ੍ਮਾ ਪਰੇਸਂ ਕਾਣਭਾਵਕਰਣਤੋ ‘‘ਕਾਣਾ’’ਤਿ ਵਿਸ੍ਸੁਤਾ ਅਹੋਸਿ. ਤਸ੍ਸਾ ਵਸੇਨ ਮਾਤਾਪਿਸ੍ਸਾ ‘‘ਕਾਣਮਾਤਾ’’ਤਿ ਪਾਕਟਾ ਜਾਤਾ. ਆਗਤਨ੍ਤਿ ਆਗਮਨਂ. ਕਿਸ੍ਮਿਂ ਵਿਯਾਤਿ ਕੀਦਿਸਂ ਵਿਯ; ਲਜ੍ਜਨਕਂ ਵਿਯ ਹੋਤੀਤਿ ਅਧਿਪ੍ਪਾਯੋ. ਰਿਤ੍ਤਹਤ੍ਥਂ ਗਨ੍ਤੁਨ੍ਤਿ ਰਿਤ੍ਤਾ ਹਤ੍ਥਾ ਅਸ੍ਮਿਂ ਗਮਨੇ ਤਦਿਦਂ ਰਿਤ੍ਤਹਤ੍ਥਂ, ਤਂ ਰਿਤ੍ਤਹਤ੍ਥਂ ਗਮਨਂ ਗਨ੍ਤੁਂ ਲਜ੍ਜਨਕਂ ਵਿਯ ਹੋਤੀਤਿ ਵੁਤ੍ਤਂ ਹੋਤਿ. ਪਰਿਕ੍ਖਯਂ ਅਗਮਾਸੀਤਿ ਉਪਾਸਿਕਾ ਅਰਿਯਸਾਵਿਕਾ ਭਿਕ੍ਖੂ ਦਿਸ੍ਵਾ ਸਨ੍ਤਂ ਅਦਾਤੁਂ ਨ ਸਕ੍ਕੋਤਿ, ਤਸ੍ਮਾ ਤਾਵ ਦਾਪੇਸਿ, ਯਾਵ ਸਬ੍ਬਂ ਪਰਿਕ੍ਖਯਂ ਅਗਮਾਸਿ. ਧਮ੍ਮਿਯਾ ਕਥਾਯਾਤਿ ਏਤ੍ਥ ਕਾਣਾਪਿ ਮਾਤੁ ਅਤ੍ਥਾਯ ਦੇਸਿਯਮਾਨਂ ਧਮ੍ਮਂ ਸੁਣਨ੍ਤੀ ਦੇਸਨਾਪਰਿਯੋਸਾਨੇ ਸੋਤਾਪਨ੍ਨਾ ਅਹੋਸਿ. ਉਟ੍ਠਾਯਾਸਨਾ ਪਕ੍ਕਾਮੀਤਿ ਆਸਨਤੋ ਉਟ੍ਠਹਿਤ੍ਵਾ ਗਤੋ. ਸੋਪਿ ਪੁਰਿਸੋ ‘‘ਸਤ੍ਥਾ ਕਿਰ ਕਾਣਮਾਤਾਯ ਨਿਵੇਸਨਂ ਅਗਮਾਸੀ’’ਤਿ ਸੁਤ੍ਵਾ ਕਾਣਂ ਆਨੇਤ੍ਵਾ ਪਕਤਿਟ੍ਠਾਨੇਯੇਵ ਠਪੇਸਿ.

੨੩੧. ਇਮਸ੍ਮਿਂ ਪਨ ਵਤ੍ਥੁਸ੍ਮਿਂ ਉਪ੍ਪਨ੍ਨਮਤ੍ਤੇ ਅਪ੍ਪਞ੍ਞਤ੍ਤੇਯੇਵ ਸਿਕ੍ਖਾਪਦੇ ਪਾਥੇਯ੍ਯਵਤ੍ਥੁ ਉਦਪਾਦਿ, ਤਸ੍ਮਾ ਅਨਨ੍ਤਰਮੇਵ ਚੇਤਂ ਦਸ੍ਸੇਤੁਂ ‘‘ਤੇਨ ਖੋ ਪਨ ਸਮਯੇਨਾ’’ਤਿਆਦਿ ਵੁਤ੍ਤਂ. ਸੋਪਿ ਚ ਉਪਾਸਕੋ ਅਰਿਯਸਾਵਕਤ੍ਤਾ ਸਬ੍ਬਮੇਵ ਦਾਪੇਸਿ. ਤੇਨ ਵੁਤ੍ਤਂ – ‘‘ਪਰਿਕ੍ਖਯਂ ਅਗਮਾਸੀ’’ਤਿ.

੨੩੩. ਯਂਕਿਞ੍ਚਿ ਪਹੇਣਕਤ੍ਥਾਯਾਤਿ ਪਣ੍ਣਾਕਾਰਤ੍ਥਾਯ ਪਟਿਯਤ੍ਤਂ ਯਂਕਿਞ੍ਚਿ ਅਤਿਰਸਕਮੋਦਕਸਕ੍ਖਲਿਕਾਦਿ ਸਬ੍ਬਂ ਇਧ ਪੂਵੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਯਂਕਿਞ੍ਚਿ ਪਾਥੇਯ੍ਯਤ੍ਥਾਯਾਤਿ ਮਗ੍ਗਂ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗਤ੍ਥਾਯ ਪਟਿਯਤ੍ਤਂ ਯਂਕਿਞ੍ਚਿ ਬਦ੍ਧਸਤ੍ਤੁਅਬਦ੍ਧਸਤ੍ਤੁਤਿਲਤਣ੍ਡੁਲਾਦਿ ਸਬ੍ਬਂ ਇਧ ਮਨ੍ਥੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਤਤੋ ਚੇ ਉਤ੍ਤਰਿਨ੍ਤਿ ਸਚੇਪਿ ਤਤਿਯਂ ਪਤ੍ਤਂ ਥੂਪੀਕਤਂ ਗਣ੍ਹਾਤਿ, ਪੂਵਗਣਨਾਯ ਪਾਚਿਤ੍ਤਿਯਂ.

ਦ੍ਵਤ੍ਤਿਪਤ੍ਤਪੂਰੇ ਪਟਿਗ੍ਗਹੇਤ੍ਵਾਤਿ ਮੁਖਵਟ੍ਟਿਯਾ ਹੇਟ੍ਠਿਮਲੇਖਾਯ ਸਮਪੂਰੇ ਪਤ੍ਤੇ ਗਹੇਤ੍ਵਾ. ਅਮੁਤ੍ਰ ਮਯਾ ਦ੍ਵਤ੍ਤਿਪਤ੍ਤਪੂਰਾਤਿ ਏਤ੍ਥ ਸਚੇ ਦ੍ਵੇ ਗਹਿਤਾ, ‘‘ਅਤ੍ਰ ਮਯਾ ਦ੍ਵੇ ਪਤ੍ਤਪੂਰਾ ਪਟਿਗ੍ਗਹਿਤਾ, ਤ੍ਵਂ ਏਕਂ ਗਣ੍ਹੇਯ੍ਯਾਸੀ’’ਤਿ ਵਤ੍ਤਬ੍ਬਂ. ਤੇਨਾਪਿ ਅਞ੍ਞਂ ਪਸ੍ਸਿਤ੍ਵਾ ‘‘ਪਠਮਂ ਆਗਤੇਨ ਦ੍ਵੇ ਪਤ੍ਤਪੂਰਾ ਗਹਿਤਾ, ਮਯਾ ਏਕੋ, ਮਾ ਤ੍ਵਂ ਗਣ੍ਹੀ’’ਤਿ ਵਤ੍ਤਬ੍ਬਂ. ਯੇਨ ਪਠਮਂ ਏਕੋ ਗਹਿਤੋ, ਤਸ੍ਸਾਪਿ ਪਰਮ੍ਪਰਾਰੋਚਨੇ ਏਸੇਵ ਨਯੋ. ਯੇਨ ਪਨ ਸਯਮੇਵ ਤਯੋ ਗਹਿਤਾ, ਤੇਨ ਅਞ੍ਞਂ ਦਿਸ੍ਵਾ ‘‘ਮਾ ਖੋ ਏਤ੍ਥ ਪਟਿਗ੍ਗਣ੍ਹਿ’’ ਚ੍ਚੇਵ ਵਤ੍ਤਬ੍ਬਂ. ਪਟਿਕ੍ਕਮਨਂ ਨੀਹਰਿਤ੍ਵਾਤਿ ਆਸਨਸਾਲਂ ਹਰਿਤ੍ਵਾ, ਆਸਨਸਾਲਂ ਗਚ੍ਛਨ੍ਤੇਨ ਚ ਛਡ੍ਡਿਤਸਾਲਾ ਨ ਗਨ੍ਤਬ੍ਬਾ. ਯਤ੍ਥ ਮਹਾ ਭਿਕ੍ਖੁਸਙ੍ਘੋ ਨਿਸੀਦਤਿ, ਤਤ੍ਥ ਗਨ੍ਤਬ੍ਬਂ. ਮਹਾਪਚ੍ਚਰਿਯਂ ਪਨ ਵੁਤ੍ਤਂ ‘‘ਯਾ ਲਦ੍ਧਟ੍ਠਾਨਤੋ ਆਸਨ੍ਨਾ ਆਸਨਸਾਲਾ, ਤਤ੍ਥ ਗਨ੍ਤਬ੍ਬਂ. ਅਤ੍ਤਨੋ ‘ਸਨ੍ਦਿਟ੍ਠਾਨਂ ਵਾ ਸਮ੍ਭਤ੍ਤਾਨਂ ਵਾ ਏਕਨਿਕਾਯਿਕਾਨਂ ਵਾ ਦਸ੍ਸਾਮੀ’ਤਿ ਅਞ੍ਞਤ੍ਥ ਗਨ੍ਤੁਂ ਨ ਲਬ੍ਭਤਿ. ਸਚੇ ਪਨਸ੍ਸ ਨਿਬਦ੍ਧਨਿਸੀਦਨਟ੍ਠਾਨਂ ਹੋਤਿ, ਦੂਰਮ੍ਪਿ ਗਨ੍ਤੁਂ ਵਟ੍ਟਤੀ’’ਤਿ.

ਸਂਵਿਭਜਿਤਬ੍ਬਨ੍ਤਿ ਸਚੇ ਤਯੋ ਪਤ੍ਤਪੂਰਾ ਗਹਿਤਾ, ਏਕਂ ਅਤ੍ਤਨੋ ਠਪੇਤ੍ਵਾ ਦ੍ਵੇ ਭਿਕ੍ਖੁਸਙ੍ਘਸ੍ਸ ਦਾਤਬ੍ਬਾ. ਸਚ੍ਚੇ ਦ੍ਵੇ ਗਹਿਤਾ, ਏਕਂ ਅਤ੍ਤਨੋ ਠਪੇਤ੍ਵਾ ਏਕੋ ਸਙ੍ਘਸ੍ਸ ਦਾਤਬ੍ਬੋ, ਯਥਾਮਿਤ੍ਤਂ ਪਨ ਦਾਤੁਂ ਨ ਲਬ੍ਭਤਿ. ਯੇਨ ਏਕੋ ਗਹਿਤੋ, ਨ ਤੇਨ ਕਿਞ੍ਚਿ ਅਕਾਮਾ ਦਾਤਬ੍ਬਂ, ਯਥਾਰੁਚਿ ਕਾਤਬ੍ਬਂ.

੨੩੫. ਗਮਨੇ ਪਟਿਪ੍ਪਸ੍ਸਦ੍ਧੇਤਿ ਅਨ੍ਤਰਾਮਗ੍ਗੇ ਉਪਦ੍ਦਵਂ ਵਾ ਦਿਸ੍ਵਾ ਅਨਤ੍ਥਿਕਤਾਯ ਵਾ ‘‘ਮਯਂ ਇਦਾਨਿ ਨ ਪੇਸਿਸ੍ਸਾਮ, ਨ ਗਮਿਸ੍ਸਾਮਾ’’ਤਿ ਏਵਂ ਗਮਨੇ ਪਟਿਪ੍ਪਸ੍ਸਦ੍ਧੇ ਉਪਚ੍ਛਿਨ੍ਨੇ. ਞਾਤਕਾਨਂ ਪਵਾਰਿਤਾਨਨ੍ਤਿ ਏਤੇਸਂ ਬਹੁਮ੍ਪਿ ਦੇਨ੍ਤਾਨਂ ਪਟਿਗ੍ਗਣ੍ਹਨ੍ਤਸ੍ਸ ਅਨਾਪਤ੍ਤਿ. ਅਟ੍ਠਕਥਾਸੁ ਪਨ ‘‘ਤੇਸਮ੍ਪਿ ਪਾਥੇਯ੍ਯਪਹੇਣਕਤ੍ਥਾਯ ਪਟਿਯਤ੍ਤਤੋ ਪਮਾਣਮੇਵ ਵਟ੍ਟਤੀ’’ਤਿ ਵੁਤ੍ਤਂ. ਸੇਸਂ ਉਤ੍ਤਾਨਮੇਵ.

ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਕਾਣਮਾਤਾਸਿਕ੍ਖਾਪਦਂ ਚਤੁਤ੍ਥਂ.