੨. ਗਣਭੋਜਨਸਿਕ੍ਖਾਪਦਵਣ੍ਣਨਾ

੨੦੯. ਦੁਤਿਯਸਿਕ੍ਖਾਪਦੇ – ਪਰਿਹੀਨਲਾਭਸਕ੍ਕਾਰੋਤਿ ਸੋ ਕਿਰ ਅਜਾਤਸਤ੍ਤੁਨਾ ਰਾਜਾਨਂ ਮਾਰਾਪੇਤ੍ਵਾਪਿ ਅਭਿਮਾਰੇ ਯੋਜੇਤ੍ਵਾਪਿ ਰੁਹਿਰੁਪ੍ਪਾਦਂ ਕਤ੍ਵਾਪਿ ਗੁਲ਼੍ਹਪਟਿਚ੍ਛਨ੍ਨੋ ਅਹੋਸਿ. ਯਦਾ ਪਨ ਦਿਵਾਯੇਵ ਧਨਪਾਲਕਂ ਪਯੋਜੇਸਿ, ਤਦਾ ਪਾਕਟੋ ਜਾਤੋ. ‘‘ਕਥਂ ਦੇਵਦਤ੍ਤੋ ਹਤ੍ਥਿਂ ਪਯੋਜੇਸੀ’’ਤਿ ਪਰਿਕਥਾਯ ਉਪ੍ਪਨ੍ਨਾਯ ‘‘ਨ ਕੇਵਲਂ ਹਤ੍ਥਿਂ ਪਯੋਜੇਸਿ, ਰਾਜਾਨਮ੍ਪਿ ਮਾਰਾਪੇਸਿ, ਅਭਿਮਾਰੇਪਿ ਪੇਸੇਸਿ, ਸਿਲਮ੍ਪਿ ਪਵਿਜ੍ਝਿ, ਪਾਪੋ ਦੇਵਦਤ੍ਤੋ’’ਤਿ ਪਾਕਟੋ ਅਹੋਸਿ. ‘‘ਕੇਨ ਸਦ੍ਧਿਂ ਇਦਂ ਕਮ੍ਮਮਕਾਸੀ’’ਤਿ ਚ ਵੁਤ੍ਤੇ ‘‘ਰਞ੍ਞਾ ਅਜਾਤਸਤ੍ਤੁਨਾ’’ਤਿ ਆਹਂਸੁ. ਤਤੋ ਨਾਗਰਾ ‘‘ਕਥਞ੍ਹਿ ਨਾਮ ਰਾਜਾ ਏਵਰੂਪਂ ਚੋਰਂ ਸਾਸਨਕਣ੍ਟਕਂ ਗਹੇਤ੍ਵਾ ਵਿਚਰਿਸ੍ਸਤੀ’’ਤਿ ਉਟ੍ਠਹਿਂਸੁ. ਰਾਜਾ ਨਗਰਸਙ੍ਖੋਭਂ ਞਤ੍ਵਾ ਦੇਵਦਤ੍ਤਂ ਨੀਹਰਿ. ਤਤੋ ਪਟ੍ਠਾਯ ਚਸ੍ਸ ਪਞ੍ਚਥਾਲਿਪਾਕਸਤਾਨਿ ਉਪਚ੍ਛਿਨ੍ਦਿ, ਉਪਟ੍ਠਾਨਮ੍ਪਿਸ੍ਸ ਨ ਅਗਮਾਸਿ, ਅਞ੍ਞੇਪਿਸ੍ਸ ਮਨੁਸ੍ਸਾ ਨ ਕਿਞ੍ਚਿ ਦਾਤਬ੍ਬਂ ਵਾ ਕਾਤਬ੍ਬਂ ਵਾ ਮਞ੍ਞਿਂਸੁ. ਤੇਨ ਵੁਤ੍ਤਂ – ‘‘ਪਰਿਹੀਨਲਾਭਸਕ੍ਕਾਰੋ’’ਤਿ. ਕੁਲੇਸੁ ਵਿਞ੍ਞਾਪੇਤ੍ਵਾ ਵਿਞ੍ਞਾਪੇਤ੍ਵਾ ਭੁਞ੍ਜਤੀਤਿ ‘‘ਮਾ ਮੇ ਗਣੋ ਭਿਜ੍ਜੀ’’ਤਿ ਪਰਿਸਂ ਪੋਸੇਨ੍ਤੋ ‘‘ਤ੍ਵਂ ਏਕਸ੍ਸ ਭਿਕ੍ਖੁਨੋ ਭਤ੍ਤਂ ਦੇਹਿ, ਤ੍ਵਂ ਦ੍ਵਿਨ੍ਨ’’ਨ੍ਤਿ ਏਵਂ ਵਿਞ੍ਞਾਪੇਤ੍ਵਾ ਸਪਰਿਸੋ ਕੁਲੇਸੁ ਭੁਞ੍ਜਤਿ.

੨੧੧. ਚੀਵਰਂ ਪਰਿਤ੍ਤਂ ਉਪ੍ਪਜ੍ਜਤੀਤਿ ਭਤ੍ਤਂ ਅਗਣ੍ਹਨ੍ਤਾਨਂ ਚੀਵਰਂ ਨ ਦੇਨ੍ਤਿ, ਤਸ੍ਮਾ ਪਰਿਤ੍ਤਂ ਉਪ੍ਪਜ੍ਜਤਿ.

੨੧੨. ਚੀਵਰਕਾਰਕੇ ਭਿਕ੍ਖੂ ਭਤ੍ਤੇਨ ਨਿਮਨ੍ਤੇਨ੍ਤੀਤਿ ਗਾਮੇ ਪਿਣ੍ਡਾਯ ਚਰਿਤ੍ਵਾ ਚਿਰੇਨ ਚੀਵਰਂ ਨਿਟ੍ਠਾਪੇਨ੍ਤੇ ਦਿਸ੍ਵਾ ‘‘ਏਵਂ ਲਹੁਂ ਨਿਟ੍ਠਾਪੇਤ੍ਵਾ ਚੀਵਰਂ ਪਰਿਭੁਞ੍ਜਿਸ੍ਸਨ੍ਤੀ’’ਤਿ ਪੁਞ੍ਞਕਾਮਤਾਯ ਨਿਮਨ੍ਤੇਨ੍ਤਿ.

੨੧੫. ਨਾਨਾਵੇਰਜ੍ਜਕੇਤਿ ਨਾਨਾਵਿਧੇਹਿ ਅਞ੍ਞਰਜ੍ਜੇਹਿ ਆਗਤੇ. ‘‘ਨਾਨਾਵਿਰਜ੍ਜਕੇ’’ਤਿਪਿ ਪਾਠੋ, ਅਯਮੇਵਤ੍ਥੋ.

੨੧੭-੮. ਗਣਭੋਜਨੇਤਿ ਗਣਸ੍ਸ ਭੋਜਨੇ. ਇਧ ਚ ਗਣੋ ਨਾਮ ਚਤ੍ਤਾਰੋ ਭਿਕ੍ਖੂ ਆਦਿਂ ਕਤ੍ਵਾ ਤਤੁਤ੍ਤਰਿਂ ਭਿਕ੍ਖੂ ਅਧਿਪ੍ਪੇਤਾ, ਤੇਨੇਵ ਸਬ੍ਬਨ੍ਤਿਮਂ ਪਰਿਚ੍ਛੇਦਂ ਦਸ੍ਸੇਨ੍ਤੋ ਆਹ ‘‘ਯਤ੍ਥ ਚਤ੍ਤਾਰੋ ਭਿਕ੍ਖੂ…ਪੇ… ਏਤਂ ਗਣਭੋਜਨਂ ਨਾਮਾ’’ਤਿ. ਤਂ ਪਨੇਤਂ ਗਣਭੋਜਨਂ ਦ੍ਵੀਹਾਕਾਰੇਹਿ ਪਸਵਤਿ ਨਿਮਨ੍ਤਨਤੋ ਵਾ ਵਿਞ੍ਞਤ੍ਤਿਤੋ ਵਾ. ਕਥਂ ਨਿਮਨ੍ਤਨਤੋ ਪਸਵਤਿ? ਚਤ੍ਤਾਰੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹੇ, ਭਨ੍ਤੇ, ਓਦਨੇਨ ਨਿਮਨ੍ਤੇਮਿ, ਓਦਨਂ ਮੇ ਗਣ੍ਹਥ ਆਕਙ੍ਖਥ ਓਲੋਕੇਥ ਅਧਿਵਾਸੇਥ ਪਟਿਮਾਨੇਥਾ’’ਤਿ ਏਵਂ ਯੇਨ ਕੇਨਚਿ ਵੇਵਚਨੇਨ ਵਾ ਭਾਸਨ੍ਤਰੇਨ ਵਾ ਪਞ੍ਚਨ੍ਨਂ ਭੋਜਨਾਨਂ ਨਾਮਂ ਗਹੇਤ੍ਵਾ ਨਿਮਨ੍ਤੇਤਿ. ਏਵਂ ਏਕਤੋ ਨਿਮਨ੍ਤਿਤਾ ਪਰਿਚ੍ਛਿਨ੍ਨਕਾਲਵਸੇਨ ਅਜ੍ਜਤਨਾਯ ਵਾ ਸ੍ਵਾਤਨਾਯ ਵਾ ਏਕਤੋ ਗਚ੍ਛਨ੍ਤਿ, ਏਕਤੋ ਗਣ੍ਹਨ੍ਤਿ, ਏਕਤੋ ਭੁਞ੍ਜਨ੍ਤਿ, ਗਣਭੋਜਨਂ ਹੋਤਿ, ਸਬ੍ਬੇਸਂ ਆਪਤ੍ਤਿ. ਏਕਤੋ ਨਿਮਨ੍ਤਿਤਾ ਏਕਤੋ ਵਾ ਨਾਨਤੋ ਵਾ ਗਚ੍ਛਨ੍ਤਿ, ਏਕਤੋ ਗਣ੍ਹਨ੍ਤਿ, ਨਾਨਤੋ ਭੁਞ੍ਜਨ੍ਤਿ, ਆਪਤ੍ਤਿਯੇਵ. ਪਟਿਗ੍ਗਹਣਮੇਵ ਹਿ ਏਤ੍ਥ ਪਮਾਣਂ. ਏਕਤੋ ਨਿਮਨ੍ਤਿਤਾ ਏਕਤੋ ਵਾ ਨਾਨਤੋ ਵਾ ਗਚ੍ਛਨ੍ਤਿ, ਨਾਨਤੋ ਗਣ੍ਹਨ੍ਤਿ, ਏਕਤੋ ਵਾ ਨਾਨਤੋ ਵਾ ਭੁਞ੍ਜਨ੍ਤਿ, ਅਨਾਪਤ੍ਤਿ. ਚਤ੍ਤਾਰਿ ਪਰਿਵੇਣਾਨਿ ਵਾ ਵਿਹਾਰੇ ਵਾ ਗਨ੍ਤ੍ਵਾ ਨਾਨਤੋ ਨਿਮਨ੍ਤਿਤਾ ਏਕਟ੍ਠਾਨੇ ਠਿਤੇਸੁਯੇਵ ਵਾ ਏਕੋ ਪੁਤ੍ਤੇਨ ਏਕੋ ਪਿਤਰਾਤਿ ਏਵਮ੍ਪਿ ਨਾਨਤੋ ਨਿਮਨ੍ਤਿਤਾ ਏਕਤੋ ਵਾ ਨਾਨਤੋ ਵਾ ਗਚ੍ਛਨ੍ਤੁ, ਏਕਤੋ ਵਾ ਨਾਨਤੋ ਵਾ ਭੁਞ੍ਜਨ੍ਤੁ, ਸਚੇ ਏਕਤੋ ਗਣ੍ਹਨ੍ਤਿ, ਗਣਭੋਜਨਂ ਹੋਤਿ, ਸਬ੍ਬੇਸਂ ਆਪਤ੍ਤਿ. ਏਵਂ ਤਾਵ ਨਿਮਨ੍ਤਨਤੋ ਪਸਵਤਿ.

ਕਥਂ ਵਿਞ੍ਞਤ੍ਤਿਤੋ? ਚਤ੍ਤਾਰੋ ਭਿਕ੍ਖੂ ਏਕਤੋ ਠਿਤਾ ਵਾ ਨਿਸਿਨ੍ਨਾ ਵਾ ਉਪਾਸਕਂ ਦਿਸ੍ਵਾ ‘‘ਅਮ੍ਹਾਕਂ ਚਤੁਨ੍ਨਮ੍ਪਿ ਭਤ੍ਤਂ ਦੇਹੀ’’ਤਿ ਵਾ ਵਿਞ੍ਞਾਪੇਯ੍ਯੁਂ, ਪਾਟੇਕ੍ਕਂ ਵਾ ਪਸ੍ਸਿਤ੍ਵਾ ‘‘ਮਯ੍ਹਂ ਦੇਹਿ, ਮਯ੍ਹਂ ਦੇਹੀ’’ਤਿ ਏਵਂ ਏਕਤੋ ਵਾ ਨਾਨਤੋ ਵਾ ਵਿਞ੍ਞਾਪੇਤ੍ਵਾ ਏਕਤੋ ਵਾ ਗਚ੍ਛਨ੍ਤੁ ਨਾਨਤੋ ਵਾ, ਭਤ੍ਤਂ ਗਹੇਤ੍ਵਾਪਿ ਏਕਤੋ ਵਾ ਭੁਞ੍ਜਨ੍ਤੁ ਨਾਨਤੋ ਵਾ, ਸਚੇ ਏਕਤੋ ਗਣ੍ਹਨ੍ਤਿ, ਗਣਭੋਜਨਂ ਹੋਤਿ, ਸਬ੍ਬੇਸਂ ਆਪਤ੍ਤਿ. ਏਵਂ ਵਿਞ੍ਞਤ੍ਤਿਤੋ ਪਸਵਤਿ.

ਪਾਦਾਪਿ ਫਲਿਤਾਤਿ ਯਥਾ ਮਹਾਚਮ੍ਮਸ੍ਸ ਪਰਤੋ ਮਂਸਂ ਦਿਸ੍ਸਤਿ; ਏਵਂ ਫਾਲਿਤਾ, ਵਾਲਿਕਾਯ ਵਾ ਸਕ੍ਖਰਾਯ ਵਾ ਪਹਟਮਤ੍ਤੇ ਦੁਕ੍ਖਂ ਉਪ੍ਪਾਦੇਨ੍ਤਿ, ਨ ਸਕ੍ਕਾ ਹੋਤਿ ਅਨ੍ਤੋਗਾਮੇ ਪਿਣ੍ਡਾਯ ਚਰਿਤੁਂ. ਈਦਿਸੇ ਗੇਲਞ੍ਞੇ ਗਿਲਾਨਸਮਯੋਤਿ ਭੁਞ੍ਜਿਤਬ੍ਬਂ, ਨ ਲੇਸਕਪ੍ਪਿਯਂ ਕਾਤਬ੍ਬਂ.

ਚੀਵਰੇ ਕਯਿਰਮਾਨੇਤਿ ਯਦਾ ਸਾਟਕਞ੍ਚ ਸੁਤ੍ਤਞ੍ਚ ਲਭਿਤ੍ਵਾ ਚੀਵਰਂ ਕਰੋਨ੍ਤਿ ਤਦਾ; ਵਿਸੁਞ੍ਹਿ ਚੀਵਰਕਾਰਸਮਯੋ ਨਾਮ ਨਤ੍ਥਿ. ਤਸ੍ਮਾ ਯੋ ਤਤ੍ਥ ਚੀਵਰੇ ਕਤ੍ਤਬ੍ਬਂ ਯਂਕਿਞ੍ਚਿ ਕਮ੍ਮਂ ਕਰੋਤਿ, ਮਹਾਪਚ੍ਚਰਿਯਞ੍ਹਿ ‘‘ਅਨ੍ਤਮਸੋ ਸੂਚਿਵੇਧਨਕੋ’’ਤਿਪਿ ਵੁਤ੍ਤਂ, ਤੇਨ ਚੀਵਰਕਾਰਸਮਯੋਤਿ ਭੁਞ੍ਜਿਤਬ੍ਬਂ. ਕੁਰੁਨ੍ਦਿਯਂ ਪਨ ਵਿਤ੍ਥਾਰੇਨੇਵ ਵੁਤ੍ਤਂ. ਯੋ ਚੀਵਰਂ ਵਿਚਾਰੇਤਿ, ਛਿਨ੍ਦਤਿ, ਮੋਘਸੁਤ੍ਤਂ ਠਪੇਤਿ, ਆਗਨ੍ਤੁਕਪਟ੍ਟਂ ਠਪੇਤਿ, ਪਚ੍ਚਾਗਤਂ ਸਿਬ੍ਬਤਿ, ਆਗਨ੍ਤੁਕਪਟ੍ਟਂ ਬਨ੍ਧਤਿ, ਅਨੁਵਾਤਂ ਛਿਨ੍ਦਤਿ ਘਟ੍ਟੇਤਿ ਆਰੋਪੇਤਿ, ਤਤ੍ਥ ਪਚ੍ਚਾਗਤਂ ਸਿਬ੍ਬਤਿ, ਸੁਤ੍ਤਂ ਕਰੋਤਿ ਵਲੇਤਿ, ਪਿਪ੍ਫਲਿਕਂ ਨਿਸੇਤਿ, ਪਰਿਵਤ੍ਤਨਂ ਕਰੋਤਿ, ਸਬ੍ਬੋਪਿ ਚੀਵਰਂ ਕਰੋਤਿਯੇਵਾਤਿ ਵੁਚ੍ਚਤਿ. ਯੋ ਪਨ ਸਮੀਪੇ ਨਿਸਿਨ੍ਨੋ ਜਾਤਕਂ ਵਾ ਧਮ੍ਮਪਦਂ ਵਾ ਕਥੇਤਿ, ਅਯਂ ਨ ਚੀਵਰਕਾਰਕੋ. ਏਤਂ ਠਪੇਤ੍ਵਾ ਸੇਸਾਨਂ ਗਣਭੋਜਨੇ ਅਨਾਪਤ੍ਤੀਤਿ.

ਅਦ੍ਧਯੋਜਨਨ੍ਤਿ ਏਤ੍ਤਕਮ੍ਪਿ ਅਦ੍ਧਾਨਂ ਗਨ੍ਤੁਕਾਮੇਨ. ਯੋ ਪਨ ਦੂਰਂ ਗਨ੍ਤੁਕਾਮੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ. ਗਚ੍ਛਨ੍ਤੇਨਾਤਿ ਅਦ੍ਧਾਨਂ ਗਚ੍ਛਨ੍ਤੇਨ, ਅਦ੍ਧਯੋਜਨਬ੍ਭਨ੍ਤਰੇ ਗਾਵੁਤੇਪਿ ਭੁਞ੍ਜਿਤੁਂ ਵਟ੍ਟਤਿ. ਗਤੇਨ ਭੁਞ੍ਜਿਤਬ੍ਬਨ੍ਤਿ ਗਤੇਨ ਏਕਦਿਵਸਂ ਭੁਞ੍ਜਿਤਬ੍ਬਂ. ਨਾਵਾਭਿਰੁਹਨੇਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਅਭਿਰੁਲ਼੍ਹੇਨ ਇਚ੍ਛਿਤਟ੍ਠਾਨਂ ਗਨ੍ਤ੍ਵਾਪਿ ਯਾਵ ਨ ਓਰੋਹਤਿ ਤਾਵ ਭੁਞ੍ਜਿਤਬ੍ਬਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਚਤੁਤ੍ਥੇ ਆਗਤੇਤਿ ਅਯਂ ਅਨ੍ਤਿਮਪਰਿਚ੍ਛੇਦੋ, ਚਤੁਤ੍ਥੇਪਿ ਆਗਤੇ ਯਤ੍ਥ ਨ ਯਾਪੇਨ੍ਤਿ; ਸੋ ਮਹਾਸਮਯੋ. ਯਤ੍ਥ ਪਨ ਸਤਂ ਵਾ ਸਹਸ੍ਸਂ ਵਾ ਸਨ੍ਨਿਪਤਨ੍ਤਿ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ. ਤਸ੍ਮਾ ਤਾਦਿਸੇ ਕਾਲੇ ‘‘ਮਹਾਸਮਯੋ’’ਤਿ ਅਧਿਟ੍ਠਹਿਤ੍ਵਾ ਭੁਞ੍ਜਿਤਬ੍ਬਂ. ਯੋ ਕੋਚਿ ਪਰਿਬ੍ਬਾਜਕਸਮਾਪਨ੍ਨੋਤਿ ਸਹਧਮ੍ਮਿਕੇਸੁ ਵਾ ਤਿਤ੍ਥਿਯੇਸੁ ਵਾ ਅਞ੍ਞਤਰੋ, ਏਤੇਸਞ੍ਹਿ ਯੇਨ ਕੇਨਚਿ ਕਤੇ ਭਤ੍ਤੇ ‘‘ਸਮਣਭਤ੍ਤਸਮਯੋ’’ਤਿ ਭੁਞ੍ਜਿਤਬ੍ਬਂ.

੨੨੦. ਅਨਾਪਤ੍ਤਿ ਸਮਯੇਤਿ ਸਤ੍ਤਸੁ ਸਮਯੇਸੁ ਅਞ੍ਞਤਰਸ੍ਮਿਂ ਅਨਾਪਤ੍ਤਿ. ਦ੍ਵੇ ਤਯੋ ਏਕਤੋਤਿ ਯੇਪਿ ਅਕਪ੍ਪਿਯਨਿਮਨ੍ਤਨਂ ਸਾਦਿਯਿਤ੍ਵਾ ਦ੍ਵੇ ਵਾ ਤਯੋ ਵਾ ਏਕਤੋ ਗਹੇਤ੍ਵਾ ਭੁਞ੍ਜਨ੍ਤਿ, ਤੇਸਮ੍ਪਿ ਅਨਾਪਤ੍ਤਿ.

ਤਤ੍ਥ ਅਨਿਮਨ੍ਤਿਤਚਤੁਤ੍ਥਂ, ਪਿਣ੍ਡਪਾਤਿਕਚਤੁਤ੍ਥਂ, ਅਨੁਪਸਮ੍ਪਨ੍ਨਚਤੁਤ੍ਥਂ, ਪਤ੍ਤਚਤੁਤ੍ਥਂ, ਗਿਲਾਨਚਤੁਤ੍ਥਨ੍ਤਿ ਪਞ੍ਚਨ੍ਨਂ ਚਤੁਕ੍ਕਾਨਂ ਵਸੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਕਥਂ? ਇਧੇਕਚ੍ਚੋ ਚਤ੍ਤਾਰੋ ਭਿਕ੍ਖੂ ‘‘ਭਤ੍ਤਂ ਗਣ੍ਹਥਾ’’ਤਿ ਨਿਮਨ੍ਤੇਤਿ. ਤੇਸੁ ਤਯੋ ਗਤਾ, ਏਕੋ ਨ ਗਤੋ. ਉਪਾਸਕੋ ‘‘ਏਕੋ ਭਨ੍ਤੇ ਥੇਰੋ ਕੁਹਿ’’ਨ੍ਤਿ ਪੁਚ੍ਛਤਿ. ਨਾਗਤੋ ਉਪਾਸਕਾਤਿ. ਸੋ ਅਞ੍ਞਂ ਤਙ੍ਖਣਪ੍ਪਤ੍ਤਂ ਕਞ੍ਚਿ ‘‘ਏਹਿ ਭਨ੍ਤੇ’’ਤਿ ਪਵੇਸੇਤ੍ਵਾ ਚਤੁਨ੍ਨਮ੍ਪਿ ਭਤ੍ਤਂ ਦੇਤਿ, ਸਬ੍ਬੇਸਂ ਅਨਾਪਤ੍ਤਿ. ਕਸ੍ਮਾ? ਗਣਪੂਰਕਸ੍ਸ ਅਨਿਮਨ੍ਤਿਤਤ੍ਤਾ. ਤਯੋ ਏਵ ਹਿ ਤਤ੍ਥ ਨਿਮਨ੍ਤਿਤਾ ਗਣ੍ਹਿਂਸੁ, ਤੇਹਿ ਗਣੋ ਨ ਪੂਰਤਿ, ਗਣਪੂਰਕੋ ਚ ਅਨਿਮਨ੍ਤਿਤੋ, ਤੇਨ ਗਣੋ ਭਿਜ੍ਜਤੀਤਿ ਇਦਂ ਅਨਿਮਨ੍ਤਿਤਚਤੁਤ੍ਥਂ.

ਪਿਣ੍ਡਪਾਤਿਕਚਤੁਤ੍ਥੇ – ਨਿਮਨ੍ਤਨਕਾਲੇ ਏਕੋ ਪਿਣ੍ਡਪਾਤਿਕੋ ਹੋਤਿ, ਸੋ ਨਾਧਿਵਾਸੇਤਿ. ਗਮਨਵੇਲਾਯ ਪਨ ‘‘ਏਹਿ ਭਨ੍ਤੇ’’ਤਿ ਵੁਤ੍ਤੇ ਅਨਧਿਵਾਸਿਤਤ੍ਤਾ ਅਨਾਗਚ੍ਛਨ੍ਤਮ੍ਪਿ ‘‘ਏਥ ਭਿਕ੍ਖਂ ਲਚ੍ਛਥਾ’’ਤਿ ਗਹੇਤ੍ਵਾ ਗਚ੍ਛਨ੍ਤਿ, ਸੋ ਤਂ ਗਣਂ ਭਿਨ੍ਦਤਿ. ਤਸ੍ਮਾ ਸਬ੍ਬੇਸਂ ਅਨਾਪਤ੍ਤਿ.

ਅਨੁਪਸਮ੍ਪਨ੍ਨਚਤੁਤ੍ਥੇ – ਸਾਮਣੇਰੇਨ ਸਦ੍ਧਿਂ ਨਿਮਨ੍ਤਿਤਾ ਹੋਨ੍ਤਿ, ਸੋਪਿ ਗਣਂ ਭਿਨ੍ਦਤਿ.

ਪਤ੍ਤਚਤੁਤ੍ਥੇ – ਏਕੋ ਸਯਂ ਅਗਨ੍ਤ੍ਵਾ ਪਤ੍ਤਂ ਪੇਸੇਤਿ; ਏਵਮ੍ਪਿ ਗਣੋ ਭਿਜ੍ਜਤਿ. ਤਸ੍ਮਾ ਸਬ੍ਬੇਸਂ ਅਨਾਪਤ੍ਤਿ.

ਗਿਲਾਨਚਤੁਤ੍ਥੇ – ਗਿਲਾਨੇਨ ਸਦ੍ਧਿਂ ਨਿਮਨ੍ਤਿਤਾ ਹੋਨ੍ਤਿ, ਤਤ੍ਥ ਗਿਲਾਨਸ੍ਸੇਵ ਅਨਾਪਤ੍ਤਿ, ਇਤਰੇਸਂ ਪਨ ਗਣਪੂਰਕੋ ਹੋਤਿ. ਨ ਹਿ ਗਿਲਾਨੇਨ ਗਣੋ ਭਿਜ੍ਜਤਿ. ਤਸ੍ਮਾ ਤੇਸਂ ਆਪਤ੍ਤਿਯੇਵ. ਮਹਾਪਚ੍ਚਰਿਯਂ ਪਨ ਅਵਿਸੇਸੇਨ ਵੁਤ੍ਤਂ.

ਸਮਯਲਦ੍ਧਕੋ ਸਯਮੇਵ ਮੁਚ੍ਚਤਿ, ਸੇਸਾਨਂ ਗਣਪੂਰਕਤ੍ਤਾ ਆਪਤ੍ਤਿਕਰੋ ਹੋਤਿ. ਤਸ੍ਮਾ ਚੀਵਰਦਾਨਸਮਯਲਦ੍ਧਕਾਦੀਨਮ੍ਪਿ ਵਸੇਨ ਚਤੁਕ੍ਕਾਨਿ ਵੇਦਿਤਬ੍ਬਾਨਿ. ਸਚੇ ਪਨ ਅਧਿਵਾਸੇਤ੍ਵਾ ਗਤੇਸੁਪਿ ਚਤੂਸੁ ਜਨੇਸੁ ਏਕੋ ਪਣ੍ਡਿਤੋ ਭਿਕ੍ਖੁ ‘‘ਅਹਂ ਤੁਮ੍ਹਾਕਂ ਗਣਂ ਭਿਨ੍ਦਿਸ੍ਸਾਮਿ, ਨਿਮਨ੍ਤਨਂ ਸਾਦਿਯਥਾ’’ਤਿ ਵਤ੍ਵਾ ਯਾਗੁਖਜ੍ਜਕਾਵਸਾਨੇ ਭਤ੍ਤਤ੍ਥਾਯ ਪਤ੍ਤਂ ਗਣ੍ਹਨ੍ਤਾਨਂ ਅਦਤ੍ਵਾ ‘‘ਇਮੇ ਤਾਵ ਭਿਕ੍ਖੂ ਭੋਜੇਤ੍ਵਾ ਵਿਸ੍ਸਜ੍ਜੇਥ, ਅਹਂ ਪਚ੍ਛਾ ਅਨੁਮੋਦਨਂ ਕਤ੍ਵਾ ਗਮਿਸ੍ਸਾਮੀ’’ਤਿ ਨਿਸਿਨ੍ਨੋ. ਤੇਸੁ ਭੁਤ੍ਵਾ ਗਤੇਸੁ ‘‘ਦੇਥ ਭਨ੍ਤੇ ਪਤ੍ਤ’’ਨ੍ਤਿ ਉਪਾਸਕੇਨ ਪਤ੍ਤਂ ਗਹੇਤ੍ਵਾ ਭਤ੍ਤੇ ਦਿਨ੍ਨੇ ਭੁਞ੍ਜਿਤ੍ਵਾ ਅਨੁਮੋਦਨਂ ਕਤ੍ਵਾ ਗਚ੍ਛਤਿ, ਸਬ੍ਬੇਸਂ ਅਨਾਪਤ੍ਤਿ. ਪਞ੍ਚਨ੍ਨਞ੍ਹਿ ਭੋਜਨਾਨਂਯੇਵ ਵਸੇਨ ਗਣਭੋਜਨੇ ਵਿਸਙ੍ਕੇਤਂ ਨਤ੍ਥਿ. ਓਦਨੇਨ ਨਿਮਨ੍ਤਿਤਾ ਕੁਮ੍ਮਾਸਂ ਗਣ੍ਹਨ੍ਤਾਪਿ ਆਪਤ੍ਤਿਂ ਆਪਜ੍ਜਨ੍ਤਿ. ਤਾਨਿ ਚ ਤੇਹਿ ਏਕਤੋ ਨ ਗਹਿਤਾਨਿ. ਯਾਗੁਆਦੀਸੁ ਪਨ ਵਿਸਙ੍ਕੇਤਂ ਹੋਤਿ, ਤਾਨਿ ਤੇਹਿ ਏਕਤੋ ਗਹਿਤਾਨੀਤਿ. ਏਵਂ ਏਕੋ ਪਣ੍ਡਿਤੋ ਅਞ੍ਞੇਸਮ੍ਪਿ ਅਨਾਪਤ੍ਤਿਂ ਕਰੋਤਿ.

ਤਸ੍ਮਾ ਸਚੇ ਕੋਚਿ ਸਙ੍ਘਭਤ੍ਤਂ ਕਤ੍ਤੁਕਾਮੇਨ ਨਿਮਨ੍ਤਨਤ੍ਥਾਯ ਪੇਸਿਤੋ ਵਿਹਾਰਂ ਆਗਮ੍ਮ ‘‘ਭਨ੍ਤੇ, ਸ੍ਵੇ ਅਮ੍ਹਾਕਂ ਘਰੇ ਭਿਕ੍ਖਂ ਗਣ੍ਹਥਾ’’ਤਿ ਅਵਤ੍ਵਾ ‘‘ਭਤ੍ਤਂ ਗਣ੍ਹਥਾ’’ਤਿ ਵਾ ‘‘ਸਙ੍ਘਭਤ੍ਤਂ ਗਣ੍ਹਥਾ’’ਤਿ ਵਾ ‘‘ਸਙ੍ਘੋ ਭਤ੍ਤਂ ਗਣ੍ਹਾਤੂ’’ਤਿ ਵਾ ਵਦਤਿ, ਭਤ੍ਤੁਦ੍ਦੇਸਕੇਨ ਪਣ੍ਡਿਤੇਨ ਭਵਿਤਬ੍ਬਂ, ਨੇਮਨ੍ਤਨਿਕਾ ਗਣਭੋਜਨਤੋ ਪਿਣ੍ਡਪਾਤਿਕਾ ਚ ਧੁਤਙ੍ਗਭੇਦਤੋ ਮੋਚੇਤਬ੍ਬਾ. ਕਥਂ? ਏਵਂ ਤਾਵ ਵਤ੍ਤਬ੍ਬਂ – ‘‘ਸ੍ਵੇ ਨ ਸਕ੍ਕਾ ਉਪਾਸਕਾ’’ਤਿ. ‘‘ਪੁਨਦਿਵਸੇ, ਭਨ੍ਤੇ’’ਤਿ. ‘‘ਪੁਨਦਿਵਸੇਪਿ ਨ ਸਕ੍ਕਾ’’ਤਿ. ਏਵਂ ਯਾਵ ਅਦ੍ਧਮਾਸਮ੍ਪਿ ਹਰਿਤ੍ਵਾ ਪੁਨ ਵਤ੍ਤਬ੍ਬੋ – ‘‘ਤ੍ਵਂ ਕਿਂ ਅਵਚਾ’’ਤਿ? ਸਚੇ ਪੁਨਪਿ ‘‘ਸਙ੍ਘਭਤ੍ਤਂ ਗਣ੍ਹਥਾ’’ਤਿ ਵਦਤਿ, ਤਤੋ ‘‘ਇਮਂ ਤਾਵ ਉਪਾਸਕ ਪੁਪ੍ਫਂ ਕਪ੍ਪਿਯਂ ਕਰੋਹਿ, ਇਮਂ ਤਿਣ’’ਨ੍ਤਿ ਏਵਂ ਵਿਕ੍ਖੇਪਂ ਕਤ੍ਵਾ ਪੁਨ ‘‘ਕਿਂ ਕਥਯਿਤ੍ਥਾ’’ਤਿ ਪੁਚ੍ਛਿਤਬ੍ਬੋ. ਸਚੇ ਪੁਨਪਿ ਤਥੇਵ ਵਦਤਿ, ‘‘ਆਵੁਸੋ, ਤ੍ਵਂ ਪਿਣ੍ਡਪਾਤਿਕੇ ਵਾ ਮਹਾਥੇਰੇ ਵਾ ਨ ਲਚ੍ਛਸਿ, ਸਾਮਣੇਰੇ ਲਚ੍ਛਸੀ’’ਤਿ ਵਤ੍ਤਬ੍ਬੋ. ‘‘ਨਨੁ, ਭਨ੍ਤੇ ਅਸੁਕਸ੍ਮਿਞ੍ਚ ਅਸੁਕਸ੍ਮਿਞ੍ਚ ਗਾਮੇ ਭਦਨ੍ਤੇ ਭੋਜੇਸੁਂ, ਅਹਂ ਕਸ੍ਮਾ ਨ ਲਭਾਮੀ’’ਤਿ ਚ ਵੁਤ੍ਤੇ ‘‘ਤੇ ਨਿਮਨ੍ਤੇਤੁਂ ਜਾਨਨ੍ਤਿ, ਤ੍ਵਂ ਨ ਜਾਨਾਸੀ’’ਤਿ. ਤੇ ਕਥਂ ਨਿਮਨ੍ਤੇਸੁਂ ਭਨ੍ਤੇਤਿ? ਤੇ ਏਵਮਾਹਂਸੁ – ‘‘ਅਮ੍ਹਾਕਂ, ਭਨ੍ਤੇ, ਭਿਕ੍ਖਂ ਗਣ੍ਹਥਾ’’ਤਿ. ਸਚੇ ਸੋਪਿ ਤਥੇਵ ਵਦਤਿ, ਵਟ੍ਟਤਿ. ਅਥ ਪੁਨਪਿ ‘‘ਭਤ੍ਤਂ ਗਣ੍ਹਥਾ’’ਤਿ ਵਦਤਿ, ‘‘ਨ ਦਾਨਿ ਤ੍ਵਂ, ਆਵੁਸੋ, ਬਹੂ ਭਿਕ੍ਖੂ ਲਚ੍ਛਸਿ, ਤਯੋ ਏਵ ਲਚ੍ਛਸੀ’’ਤਿ ਵਤ੍ਤਬ੍ਬੋ. ‘‘ਨਨੁ, ਭਨ੍ਤੇ, ਅਸੁਕਸ੍ਮਿਞ੍ਚ ਅਸੁਕਸ੍ਮਿਞ੍ਚ ਗਾਮੇ ਸਕਲਂ ਭਿਕ੍ਖੁਸਙ੍ਘਂ ਭੋਜੇਸੁਂ, ਅਹਂ ਕਸ੍ਮਾ ਨ ਲਭਾਮੀ’’ਤਿ? ‘‘ਤ੍ਵਂ ਨਿਮਨ੍ਤੇਤੁਂ ਨ ਜਾਨਾਸੀ’’ਤਿ. ‘‘ਤੇ ਕਥਂ ਨਿਮਨ੍ਤੇਸੁ’’ਨ੍ਤਿ? ਤੇ ‘‘ਭਿਕ੍ਖਂ ਗਣ੍ਹਥਾ’’ਤਿ ਆਹਂਸੂਤਿ. ਸਚੇ ਸੋਪਿ ‘‘ਭਿਕ੍ਖਂ ਗਣ੍ਹਥਾ’’ਤਿ ਵਦਤਿ, ਵਟ੍ਟਤਿ. ਅਥ ਪੁਨਪਿ ‘‘ਭਤ੍ਤਮੇਵਾ’’ਤਿ ਵਦਤਿ, ਤਤੋ ਵਤ੍ਤਬ੍ਬੋ – ‘‘ਗਚ੍ਛ ਤ੍ਵਂ, ਨਤ੍ਥਮ੍ਹਾਕਂ ਤਵ ਭਤ੍ਤੇਨਤ੍ਥੋ, ਨਿਬਦ੍ਧਗੋਚਰੋ ਏਸ ਅਮ੍ਹਾਕਂ, ਮਯਮੇਤ੍ਥ ਪਿਣ੍ਡਾਯ ਚਰਿਸ੍ਸਾਮਾ’’ਤਿ. ਤਂ ‘‘ਚਰਥ, ਭਨ੍ਤੇ’’ਤਿ ਵਤ੍ਵਾ ਆਗਤਂ ਪੁਚ੍ਛਨ੍ਤਿ – ‘‘ਕਿਂ ਭੋ ਲਦ੍ਧਾ ਭਿਕ੍ਖੂ’’ਤਿ. ‘‘ਕਿਂ ਏਤੇਨ ਬਹੁ ਏਤ੍ਥ ਵਤ੍ਤਬ੍ਬਂ, ‘ਥੇਰਾ ਸ੍ਵੇ ਪਿਣ੍ਡਾਯ ਚਰਿਸ੍ਸਾਮਾ’ਤਿ ਆਹਂਸੁ. ਮਾ ਦਾਨਿ ਤੁਮ੍ਹੇ ਪਮਜ੍ਜਿਤ੍ਥਾ’’ਤਿ. ਦੁਤਿਯਦਿਵਸੇ ਚੇਤਿਯਵਤ੍ਤਂ ਕਤ੍ਵਾ ਠਿਤਾ ਭਿਕ੍ਖੂ ਸਙ੍ਘਤ੍ਥੇਰੇਨ ਵਤ੍ਤਬ੍ਬਾ – ‘‘ਆਵੁਸੋ, ਧੁਰਗਾਮੇ ਸਙ੍ਘਭਤ੍ਤਂ ਅਪਣ੍ਡਿਤਮਨੁਸ੍ਸੋ ਪਨ ਅਗਮਾਸਿ, ਗਚ੍ਛਾਮ ਧੁਰਗਾਮੇ ਪਿਣ੍ਡਾਯ ਚਰਿਸ੍ਸਾਮਾ’’ਤਿ. ਭਿਕ੍ਖੂਹਿ ਥੇਰਸ੍ਸ ਵਚਨਂ ਕਾਤਬ੍ਬਂ, ਨ ਦੁਬ੍ਬਚੇਹਿ ਭਵਿਤਬ੍ਬਂ, ਗਾਮਦ੍ਵਾਰੇ ਅਟ੍ਠਤ੍ਵਾਵ ਪਿਣ੍ਡਾਯ ਚਰਿਤਬ੍ਬਂ. ਤੇਸੁ ਪਤ੍ਤਾਨਿ ਗਹੇਤ੍ਵਾ ਨਿਸੀਦਾਪੇਤ੍ਵਾ ਭੋਜੇਨ੍ਤੇਸੁ ਭੁਞ੍ਜਿਤਬ੍ਬਂ. ਸਚੇ ਆਸਨਸਾਲਾਯ ਭਤ੍ਤਂ ਠਪੇਤ੍ਵਾ ਰਥਿਕਾਸੁ ਆਹਿਣ੍ਡਨ੍ਤਾ ਆਰੋਚੇਨ੍ਤਿ – ‘‘ਆਸਨਸਾਲਾਯ, ਭਨ੍ਤੇ, ਭਤ੍ਤਂ ਗਣ੍ਹਥਾ’’ਤਿ ਨ ਵਟ੍ਟਤਿ.

ਅਥ ਪਨ ਭਤ੍ਤਂ ਆਦਾਯ ਤਤ੍ਥ ਤਤ੍ਥ ਗਨ੍ਤ੍ਵਾ ‘‘ਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ਪਟਿਕਚ੍ਚੇਵ ਵਾ ਵਿਹਾਰਂ ਅਭਿਹਰਿਤ੍ਵਾ ਪਤਿਰੂਪੇ ਠਾਨੇ ਠਪੇਤ੍ਵਾ ਆਗਤਾਗਤਾਨਂ ਦੇਨ੍ਤਿ, ਅਯਂ ਅਭਿਹਟਭਿਕ੍ਖਾ ਨਾਮ ਵਟ੍ਟਤਿ. ਸਚੇ ਪਨ ਭਤ੍ਤਸਾਲਾਯ ਦਾਨਂ ਸਜ੍ਜੇਤ੍ਵਾ ਤਂ ਤਂ ਪਰਿਵੇਣਂ ਪਹਿਣਨ੍ਤਿ ‘‘ਭਤ੍ਤਸਾਲਾਯ ਭਤ੍ਤਂ ਗਣ੍ਹਥਾ’’ਤਿ, ਨ ਵਟ੍ਟਤਿ. ਯੇ ਪਨ ਮਨੁਸ੍ਸਾ ਪਿਣ੍ਡਚਾਰਿਕੇ ਭਿਕ੍ਖੂ ਦਿਸ੍ਵਾ ਆਸਨਸਾਲਂ ਸਮ੍ਮਜ੍ਜਿਤ੍ਵਾ ਤਤ੍ਥ ਨਿਸੀਦਾਪੇਤ੍ਵਾ ਭੋਜੇਨ੍ਤਿ, ਨ ਤੇ ਪਟਿਕ੍ਖਿਪਿਤਬ੍ਬਾ. ਯੇ ਪਨ ਗਾਮੇ ਭਿਕ੍ਖਂ ਅਲਭਿਤ੍ਵਾ ਗਾਮਤੋ ਨਿਕ੍ਖਮਨ੍ਤੇ ਭਿਕ੍ਖੂ ਦਿਸ੍ਵਾ ‘‘ਭਨ੍ਤੇ ਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ਤੇ ਪਟਿਕ੍ਖਿਪਿਤਬ੍ਬਾ, ਨ ਵਾ ਨਿਵਤ੍ਤਿਤਬ੍ਬਂ. ਸਚੇ ‘‘ਨਿਵਤ੍ਤਥ, ਭਨ੍ਤੇ, ਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ‘‘ਨਿਵਤ੍ਤਥਾ’’ਤਿ ਵੁਤ੍ਤਪਦੇ ਨਿਵਤ੍ਤਿਤੁਂ ਵਟ੍ਟਤਿ. ‘‘ਨਿਵਤ੍ਤਥ ਭਨ੍ਤੇ, ਘਰੇ ਭਤ੍ਤਂ ਕਤਂ, ਗਾਮੇ ਭਤ੍ਤਂ ਕਤ’’ਨ੍ਤਿ ਵਦਨ੍ਤਿ, ਗੇਹੇ ਚ ਗਾਮੇ ਚ ਭਤ੍ਤਂ ਨਾਮ ਯਸ੍ਸ ਕਸ੍ਸਚਿ ਹੋਤੀਤਿ ਨਿਵਤ੍ਤਿਤੁਂ ਵਟ੍ਟਤਿ. ‘‘ਨਿਵਤ੍ਤਥ, ਭਤ੍ਤਂ ਗਣ੍ਹਥਾ’’ਤਿ ਸਮ੍ਬਨ੍ਧਂ ਕਤ੍ਵਾ ਵਦਨ੍ਤਿ, ਨਿਵਤ੍ਤਿਤੁਂ ਨ ਵਟ੍ਟਤਿ. ਆਸਨਸਾਲਤੋ ਪਿਣ੍ਡਾਯ ਚਰਿਤੁਂ ਨਿਕ੍ਖਮਨ੍ਤੇ ਦਿਸ੍ਵਾ ‘‘ਨਿਸੀਦਥ ਭਨ੍ਤੇ ਭਤ੍ਤਂ ਗਣ੍ਹਥਾ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਨਿਚ੍ਚਭਤ੍ਤਨ੍ਤਿ ਧੁਵਭਤ੍ਤਂ ਵੁਚ੍ਚਤਿ. ‘‘ਨਿਚ੍ਚਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ਬਹੂਨਮ੍ਪਿ ਏਕਤੋ ਗਹੇਤੁਂ ਵਟ੍ਟਤਿ. ਸਲਾਕਭਤ੍ਤਾਦੀਸੁਪਿ ਏਸੇਵ ਨਯੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਗਣਭੋਜਨਸਿਕ੍ਖਾਪਦਂ ਦੁਤਿਯਂ.